Samoan Devotional

OPEN HEAVENS

MATALA LE LAGI MO LE ASO FARAILE 22 NOVEMA 2024

(tusia e Pastor EA Adeboye)

Manatu Autu: Iloa lou faamoemoega (Discover your purpose)

Tauloto -Tusi Paia– Ieremia 29:11 “'Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe”.

Faitauga – Tusi Paia – Faataoto 19:20-21

Ao lei valaau le Atua ia te au e galue mo le Ekalesia, o la’u miti sa iai i lea taimi o le avea ma Pule Sili o se Iunivesite pito i laitiiti i Aferika atoa. Sa ou manatu o se miti lelei, ma o lea na ou saili ma naunau ia ausia i lo’u malosi atoa. E lei o’o la lou mafaufau, a maea ona avea ma Pule Sili pito I laitiitii, o lea le isi tulaga e sosoo ai?  Sa ou manatu ua faatulaga lelei mea uma o lo’u lumanai, ae o le mea moni, e latalata lava la’u vaai. Ou te faafetai i le Atua ona na afio mai ma aumai se faamoemoega ola mo lo’u lumanai. 

E lelei le fai o miti ma faamoemoega maualuluga ae talitonu mai, o so’o se faamoemoega e tetee i le finagalo o le Atua, e aumai ai na o puapuaga ae leai ma se lelei.  Fai mai le Isaia 45:9

'‘Oi talofa i lē ‘ua finau ma lē na faia o ia, o le ta‘ega ipu i ta‘ega ipu o le ‘ele‘ele. Pe fai atu ‘ea le ‘omea i lē na te gaosia, “O le a ‘ea ‘e te faia?” pe fai atu lau galuega, “‘Ua leai ni ona lima?” '

Le au pele e, na faia oe e le Atua (Efeso 2:10). Aua e te taumafai e te alu i le isi itu e ese mai le finagalo o le Atua pe afai e te le fia sē solo, o le ipu omea e faafinau ma lē na te gaosia o ia, e avea ma ta’ega ipu. E pau le auala e ausia ai taunuuga manuia I le olaga, o le savali i le ala na faia oe e le Atua e te ui ai. E tatau ona e saili le faamoemoega a le Atua mo lou olaga ona e savali ai lea. 

E te ono fesili, “E faapefea ona e iloa le faamoemoega a le Atua mo lou olaga?” Afai e lē leiloa e se tasi lona faamoemoega, e mafai ona iloa sina vaega i le faalatalata lea i lē na faia o ia. Ao mafuta ma lē na faia o ia, e amata ona iloa mea e faaaoga ai, mai lē na faia o ia ma iloa ai lona faamoemoega. O le Atua na faia oe, faaalu lou taimi e mafuta lelei ai ma ia, i aso uma. A’o e faia lea tulaga, e amata ai ona ia tuuina sa’o atu ia te oe ni faatonuga o mea maoti e faia. O nei faatonuga ma galuega e faatino, e amata ai lona manino mai, le faamoemoega o lou olaga. 

Na manatu Peteru o lona faamoemoega o le faifaiva. Na galue malosi o se faifaiva ua o’o i le po atoa, tusa pe leai se i’a na maua. Peitai ina ua fetaiai ma Iesu, na fetalai atu ia te ia, ’Mulimuli mai, ou te faia oe ma faifaiva o tagata’. Ina ua mulimuli ia Iesu, ua ia ausia le faamoemoega o lona olaga. 

Le au pele e, faalatalata i le Atua ona ia faaali atu lea o lou faamoemoega i le lalolagi nei. Ia faia sau faaiuga e usitai i ana faatonuga, ona e ausia lea o lou faamoemoega ma le taunuuga lelei. 

Tatalo

Tama, faamolemole fesoasoani mai ia te au ina ia ou faalatalata atu ia te oe ina ia ou ausia lou faamoemoega ma le taunuuga lelei, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 21 NOVEMA 2024

(tusia e Pastor EA Adeboye)

Manatu Autu: E moni le siitiaga? (Is the Rapture Real?)

Tauloto -Tusi Paia–Mataio 24:38 “Auā e pei ‘ona faia i ona po a o le‘i o‘o le lolo, ‘ua latou ‘a‘ai ma inu, ‘ua latou fai avā fo‘i ma fa‘aavaga, ‘ua o‘o lava i le aso na ulu atu ai Noa i le va‘a,”

‭‭

Faitauga – Tusi Paia –1 Tesalonia 4:13-17

E pei ona tatou vaavaai iai I le faitauga o le Tusi Paia o le asō, o le siitiaga e muamua ona toe tutū mai o ē sa maliliu ia Keriso, ona fa‘afuase‘i lea ‘ona ‘aveina a‘e o i latou o ē ola ma totoe, fa‘atasi ma i latou i ao, ‘ina ‘ia fetaia‘i ma le Ali‘i i le vā nimonimo; ‘ona tatou fa‘atasi pea lava lea ma le Ali‘i.  O le tele o tagata e manatu o le siitiaga e lē moni aua ua leva ona latou faalogo iai ae lei tupu. 

E lē afaina le manatu toatele o tagata i le moni o le siitiaga. Mo lou lava lelei, e sili le suesue lelei ma talitonu i le Upu a le Atua. Fai mai le Tusi Paia o lea aso e oo mai e pei o le gaoi I le po ma e tatau ona e nofo sauni pe afai e te lē manao e tuua pea oe I le lalolagi (1Tesaloni 5:1-8). 

O se tulaga maoae o perofetaga i le Tusi Paia, e faigata ona talitonu iai tagata. Ina ua faia se perofetaga i le Isaia 7:14 e fanau mai le tama i se taupou, e lē fetaui i le manatu. I lēna taimi, e toatele tagata sa maitauina pe moni le fanau o se taupou. I le tele o senituri mulimuli ane na fanau mai ai Iesu mai ia Maria le taupou. Pe na talitonu tagata I le perofetaga a Isaia pe leai, na taunuu lava le Upu a le Atua. I totonu o le Tusi Paia e tele perofetaga e foliga mai e matua faigata ona tupu peitai ua taunuu lava. Afai e maoti faamaumauga a le Tusi Paia, o le poto le talitonu e matua moni lava le Upu e faatatau i le siitiaga. 

Ina ua folafola e Noa o le a oo mai le lolo e faaumatia le lalolagi atu, na taliē ma aamu ia te ia. Na ia amata ona fau le vaa ae ua atili ai lē taliē. Ua tele tausaga ua mavae ae le oo mai lava le lolo. Ae lei o atu Noa ma lona aiga I totonu o le vaa, o loo inu pea tagata ma fiafia e pei ona masani ai I aso uma, peitai I ni nai aso mulimuli ane, ua malelemo uma. O le asō, e toatele tagata o loo ola faatamala, ma faatuatuanai I le tulaga moni o le siitiaga. Peitai fai mai le Tusi Paia i le 1 Korinito 15:52, e faafuasei ona oo mai le siitiaga. Na o I latou o loo nofo sauni e faaolaina ae o le toatele o le a tuua i le lalolagi nei e fesagai ma puapuaga. 

E tasi le mea ou te mautinoa, o le aso e tupu ai le siitiaga, o le a faateia le toatele. E tele ni tagata o le a salamo ona na latou faalogo i le siitiaga, ae o loo ola ma soifua pea I olaga e aunoa ma le sauni e ala I le tuuina atu o latou ola ia Iesu Keriso ma soifua faapaiaina. O le faanoanoaga mo I latou I lea taimi,  ua tuai aua e na o le faatasi ona tupu le siitiaga. Le au pele e, ua e sauni mo le siitiaga? E mautinoa e tupu le siitiaga. Ia e poto ma nofo sauni, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 20 NOVEMA 2024

(tusia e Pastor EA Adeboye)

Manatu Autu: E mafai ona atoatoa lou olioli (You can be full of joy)

Tauloto -Tusi Paia–Salamo 16:11 “E te fa‘ailoa mai ‘iā te a‘u le ala o le ola; o i ou luma le fiafia e malie ai; o i lou itū taumatau le ‘oli‘oli e fa‘avavau.”

‭‭

Faitauga – Tusi Paia –Ieremia 29:11-12

“‘Ua o‘o mai nei lava tou te le‘i ole atu i se mea i lo‘u igoa; ‘inā ole atu ia, ‘ona ‘outou maua ai lea, ‘ina ‘ia ‘ato‘atoa ai lo ‘outou ‘oli‘oli.” Ioane‬ ‭16‬:‭24‬ ‭

Na fetalai Iesu Keriso I le fuaitau o loo taua I luga, e mafai ona atoatoa lo outou olioli. I nisi faaupuga, o loo fai mai, e mafai ona e lē maua se faanoanoaga. E toatele tagata o loo foliga manuia i le vaai atu I fafo ao totonu, ua faasolo atu i le oti. E toatele tagata o tauave faanoanoaga e le mafai ona faasoa mai ma faafitauli o loo nanā I se olaga e faafoliga. Peitai, e mafai e le Atua ona aveesea faanoanoaga ma faamalolo I ē loto momomo (Salamo 147:3). Afai o loo iai ou faafitauli ma faanoanoaga e lē mafai ona e faasoa I seisi, e te malolō I le asō I le suafa o Iesu Keriso. 

I le tele o tausaga talu ai, e iai se tasi o ou afafine na sau ia te a’u ou te tatalo mo ia. Na ou fesili poo le a se mea e manao ou te tatalo ai, ae fai mai e sili atu pe a aua nei ou iloa , ae a tali le tatalo, e toe foi mai e faia sana tautinoga ia te a’u. Ua sili atu ma le 20 tausaga ae o loo susū pea le moega pe a moe. Fai mai e le mafai ona alu I se mea ma ana uo pe a momoe ai, peitai na foia lenei faafitauli I se tatalo faigofie. I le suafa o le Alii o Iesu ua mafai ona maua lou avanoa e faalogo pe faitau ai i lenei faamalosiau, afai o iai ni ou faanoanoaga lilo i lou olaga, e tafiesea I le asō. 

Na fetalai Iesu i le Ioane 16:24, i le ala e liua ai faanoanoaga i le atoatoa o le olioli, o le ole atu lea ia te ia. E foliga o se faatonuga faigofie ae telē lona mana. E lē o le tagi ma popole, ae tau o le tatalo. Fai mai le Mataio 7:27, tusa po’o le a le telē o lou popole, e le mafai ona e faaopoopoina se inisi i lou umī. 

Le au pele e, aua le popole. Aua le faamaimauina le taimi i le popole, faaaoga le taimi e tatalo ai. Fai mai le Filipi 4:6 “Aua ne‘i popole ‘outou i se mea e tasi a ‘ia fa‘ailoa atu o ‘outou mana‘o i mea uma lava i le Atua, i le tatalo, ma le fa‘atoga, ‘atoa ma le fa‘afetai.”

A fafagu oe i le po ini mafaufauga faatuatuvale, nofo I luga e tatalo. Ao e tatalo ma pese viiga i le Atua, e aveesea faanoanoaga mai lou loto ae suia I le olioli. Ou te tatalo ia faatumulia oe ma e maua le atoatoa o le olioli, I le suafa o Iesu. 

Tatalo

Tamā, ia aua lava nei ou te toe maua le faanoanoaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 19 NOVEMA 2024

(tusia e Pastor EA Adeboye)

Manatu Autu: Maua o vavega  (Drawing miracles)

Tauloto -Tusi Paia–Mareko 9:23“Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”

‭‭

Faitauga – Tusi Paia –Mareko 5:21-34

Mai lea taimi i lea taimi i totonu o le Tusi Pa’ia, e te  faitau ai i ni tagata sa latou mauaina ni vavega e le’i fuafuaina. O se fa’ata’ita’iga, i le Tusi Paia,  sa feafioa’i solo Iesu e aunoa ma se fuafuaga e tatalo mo se tagata i ala na ia uia, ae peita’i e iai lava tagata na te’i lava ua maua a latou vavega. O se tasi o ia tagata o le fafine puna toto, I le tatou tusi faitau o le asō. Sa afio atu Iesu e toe faatu le afafine o Iairo, mai le oti, ae feiloai ai ma le fafine lea. Sa ia uunai malosi atu i le ogatotonu o le motu o tagata mo sona avanoa e pa’i ai i le ofu o Iesu, ma maua ai lana vavega. Ina ua fa’ataunuu lea tulaga, sa soloia esea ai puapuagatia uma o le 12 tausaga o lona olaga. Ana ia lē fa’ataunuuina lea tulaga, se manu e maliu o ia o se fafine ma’i ma puapuagatia.

E te silafia e mafai ona e mauaina se vavega e tusa pe le o tatalo se Faife’au a le Atua mo oe? E mafai ona  e auai i se polokalame, a o faatino le galuega, a fai e te faapea ane oe ia te oe, pei o le fafine punatoto, “Afai ou te pa’I atu tau lava o se pito o ona lavalava, ou te maua se vavega” E faia lava e le Atua.

O se tasi o tama ta tagipalau i le RCGG sa faatalitali mo se la pepe ma lona toalua. I se tasi o aso a’o faia le sauniga o Agaga Pa’ia, sa ia faapea ane i lona loto, “Afai e pupula mai le Taitai Aoao ia te a’u, ou te maua  loa se tamaititi.” Ou te le iloa se mea o tupu, ae o le taimi na ou tilotilo atu ai I Le vaega o iai lenei alii, ua matua fa’atumulia i le fiafia. Ina ua tuanai masina e 9, ae fanau loa se la pepe. Sa iai foi se fafine i tausaga e tele ua tuanai, sa ia faalogo i faamatalaga o mea tetele ua faia e le Atua e ala iai matou. Sa ia auai mai i se tasi o matou polokalame ma faapea i lona loto, “Afai ou te va’aia le auauna a le Atua, ou te mauaina le fofō o lo’u ma’i”. I le taimi ao ou tu i le pulelaa, sa fesili lenei fafine i tagata i ona tafatafa, po o a’u lea. Ina ua latou faamaonia atu ia te ia, ona amata ai loa ona ia vivii, ma sa ia maua lana vavega.

Afai e te faatuatua, e mafai ona e mauaina vavega i so’o se taimi. E tusa pe le ta’ua mai e se faife’au lau mataupu pe faaee foi ona lima I ou luga i taimi o sauniga, e te maua se vavega e ala mai ia te ia. E te le tau fa’atalitali i se faifeau e tatalo mo oe. E mafai ona e maua se vavega e ala mai ia te ia ona o lou fa’atuatua! O ia te oe le faatuatua e maua ai vavega? I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 18 NOVEMA 2024

(tusia e Pastor EA Adeboye)

Manatu Autu: Pe a afio mai le Atua  (When God moves)

Tauloto -Tusi Paia–Mataio 9:35“Ua fa‘ata‘amilo Iesu i ‘a‘ai uma ma faoa ‘a‘ai, ‘ua a‘oa‘o i o latou sunako ma tala‘i le tala lelei o le mālō, ‘ua ia fa‘amālōlō fo‘i i ma‘i uma ma ma‘i tigā uma o le nu‘u.”

‭‭

Faitauga – Tusi Paia –Mataio 9:35-36

A afio mai le Atua, e na te tufa atu vavega I le ala. A e faitau i le Tusi Paia, e te iloa ai le tele taimi na tupu ai lea tulaga. Mo se faataitaiga, I le Kenese 18, a’o afio atu I Sotoma, sa ia tu i le ala i le faleie o Aperaamo e faia se vavega mo ia. E faapena foi I le Luka 7:11-15, na afio atu Iesu i le taulaga o Naina ma ia vaaia se tagata ua maliu o loo agai atu e tanu. Na ia pa’i atu i le fata o iai le maliu, ma na vave ona toetu mai lea tagata mai le oti. 

Fai mai le Salamo 97:3 e muamua le afi i luma o le Atua. I nisi faaupuga, e iai le afi e muamua e faafeao ia te ia. O lona uiga o soo se taimi e afio mai ai, e muamua le afi ia te ia, e tafiesea soo se mea leaga, ma saunia le ala mo Lē o lona suafa o le ‘Afi e Maamaai’. Tusa pe lē o oe o loo afio mai iai le Atua, ao ui ane o ia i lou fale, o soo se mea leaga i lou fale o le a pa’i iai o ia. Afai o lē o loo ui ane ia te oe o le Atua Matautia, e lē toe iai se ma’i, tigā, faanoanoaga, mativa po’o soo se mea leaga e toe totoe. 

Le au pele e, o le tulaga lelei lea o le iai o tuaoi kerisiano, aua e asiasi iai le Atua mai lea taimi I lea taimi. A afio mai o ia e asiasi iai latou, ona o loo e latalata atu iai, e tatau foi ona maua sau vavega. O le mea lea e tatau ai ona e faia se galuega ia faaolaina ou tuaoi, ma so’o se tasi e te mafuta iai I Le tele o taimi. Fai mai le Tusi Paia o le amiotonu e viia ai le nuu (Faataoto 14:34), o lona uiga afai o siomia oe e tagata amiotonu, e tele taimi e afio mai ai le Atua i le faapotopotoga o lo’o e iai ia faamautinoaina e faamanuiaina pea oe, ona o ia, faapea foi ma le faapotopotoga atoa. 

Ia maitau mai, o le ‘Afi e maamaai’ e inoino i le agasala. O lona uiga a afio mai, o soo se mea e iai le agasala e faaumatia. O le tulaga lea e tatau ona e alu ese ma le agasala aua e te lē fia avea ma se tagata e aafia I le ‘Afi e ma’ama’ai’ a’o afio mai o ia I lou siomaga. 

Le au pele e, faamautinoa o loo e ola ma soifua I se olaga faapaiaina ma ia siomia oe e fanau moni a le Atua, a afio mai o ia I so’o se taimi i lou siomaga, e te maua se vavega. 

Tatalo

Tamā, faamolemole afio mai oe I lou siomaga I le asō Ina ia ou maua se vavega, I le suafa o Iesu, Amene. 

OPEN HEAVENS

MATALA LE LAGI MO LE ASO SA 17 NOVEMA 2024

(tusia e Pastor EA Adeboye)

Manatu Autu: Faigauō Ma Le Atua  (Friendship With God)

Tauloto -Tusi Paia–Ioane 15:14“O a‘u uō ‘outou, pe ‘āfai tou te faia mea, uma lava ‘ou te fai atu ai ‘iā te ‘outou.”

‭‭

Faitauga – Tusi Paia –Ioane 15:13-15

O le Atua e toatele lana fanau, peita’i e pei ona silafia e matua uma, e masani lava ona i ai se tasi o le fanau e avea ma pele. E ui e lē manana’o e ta’u sa’o mai, a’o le latou mafutaga ma le atali’i/afafine lea e tulaga ese nai lo’o le masani i le va o matua ma fanau, e masani ona i’u ina pei o se faigauō. E faapenā fo’i le Atua e lē gata ina mana’o e avea oe ma ona atali’i/afafine, ae finagalo fo’i ia e latalata iā te ia, ma avea oe ma ana uo.

E alofa ma faapelepele Iesu i ana uo auā na ia fetalai e ofo atu lona soifua mo ana uo (Ioane 15:13). E i ai sau uo e mafai ona lotomalie e liliu uma iā te ia se fa’ama’i ina ia aua ai ne’i e pesia pe e te ma’i ai? E pei o le Upu o tusia i le Mataio 8:17. E mafai e se isi o au uo ona talia se pulufana mo oe? E silisili atu mea na faia e Iesu, ina ua fasia o ia e fitafita Roma ma fa’atautau ia i luga o le satauro. O lona uiga, o Iesu o le uo silisili, e leai se tasi e tutusa ma ia.

E masani ona faamatala e tagata a latou uo. A o ta’atele ma masani tagata I le masesei o faigauō ona o le manatu faapito iā te ia lava, poo ni fe’ese’esea’iga, o le faigauō a Iesu Keriso e tumau e faavavau. Poo afatia Iau folauga i se afā (Mataio 14:24-25), poo e ui i se afi (Tanielu 3:22-25), na te lē tuua oe. Tusa fo’i pe silafia e Iesu e mafai ona e fa’alataina ia, na te lē faafitia lava oe (Luka 22:31-32). Fai mai le Tusi Paia i le tusi o Ioane 13:1; e alofa Iesu iā te oe e o’o i le gata’aga.

E faafefea ona avea oe ma uo a le Atua? Fai mai la tatou upu tauloto o le asō, e mafai ona avea i tatou o ana uo pe a o tatou usiusita’i i ana poloaiga. E sili atu ma le ‘alo’ese mai le faia o le agasala; o lona uiga a fai mai, “Aua e te ai, ou te mana’o e te anapogi i le asō,” e tatau ona e usita’i ma fai. Afai ua e vaivai, ua e fia moe, a e fetalai mai, “Ta talanoa ae e te lē i moe,” e tatau ona tu’u lou fiamoe ae tatalo. Afai e fai mai, “Aumai ia te a’u lau taavale,” e tatau ona e faia. O Aperaamo na tā’ua o le uō a le Atua i le 2 Nofoaiga A Tupu 20:7; auā ina ua fetalai le Atua ia te ia e ave lona atalii e fai ma taulaga mu I le Kenese 22:1-3; na loto atoa I ai o ia ma sauni e fai.

Le au Pele e, poo le a se mea e poloaiina oe e le Atua e fai, ia e usita’i ma fai i le taimi lava lea e aunoa ma le fa’atuai. E lē tatau ona i ai se mea o lenei lalolagi e faa faigata ia te oe ona fai ma taulaga mu i le Atua. Ua na o le pau lea o le ala e avea ai oe ma ana uo. O le usiusita’i i poloaiga a le Atua o le ki lea ma le tatala o le lua faigauō. Ua e sauni e fai ma uo a le Atua? O le usitai i poloaiga a le Atua o le ki lea i le avea ma ana uō, I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 16 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 3.  (The Bible, gender and sexuality 3)

Tauloto -Tusi Paia–Efeso 4:25 “O lenei, ‘ia ‘outou tu‘u ‘ese le pepelo, ‘ia tautalatala fa‘amaoni ta‘itasi ma lē la te tuā‘oi; auā o itū tino lava tatou o le tasi i le tasi.”

‭‭

Faitauga – Tusi Paia –Roma 1:20-32

I le taualuga o le lesona na o’u amata i aso e lua ua mavae fa’atatau i itupa ma feusuaiga, o le a o’u faasoa atu ma oe se a’oa’oga na o’u maua. I ni tausaga ua mavae, sa o’u I se atunuu i Sisifo ou te lauga ai, ma na faatalanoa a’u e se tusitala faatatau i so’u manatu e uiga i ulugalii a le tama ma le tama, ma le teine ma le teine poo itupa tutusa. Na o’u tali i le uso na faatalanoaina a’u, na faia e le Atua tane ma fafine ia fanafanau. Ona o’u fesili lea, “E mafai ea e tagata itupa tutusa ona fanau ni fanau?” Na fa’ai’u la’u faamatalaga i lo’u fai atu, afai o tagata uma o le a faaipoipo i se isi la te itupa tutusa, o le a uma ai i le lalolagi i le augātupulaga lenei.

Faapei o se atali’i/afafine o le Atua, so’o se taimi e te maua ai le avanoa e te talanoa ai faatatau i feusuaiga faa Sotoma ma Komoro aua e te ‘alo ma taamilomilo solo lau talanoa. O le mafuaaga o le sasao fa’aafi o le amioleaga ona o le fefefe o tagata lelei e ta’u le mea moni. Aua e te gūgū pe a fai atu tagata o latou e tosina o latou loto i feusuaiga ma tagata o la latou lava itupa. Aua e te faamasino pe fa’asala ia i latou, a ia ta’u ia i latou le mea moni ma le alofa. O le fa’asala o i latou e na o le faatupu ai o le misa, ma o lo tatou Atua e lē o se Atua o fa’asalaga, a o le Atua o le alofa. Talanoa i ai i le alofa, a ia faasino pea ia i latou upu o le Tusi Paia, o mea o o latou faia e lē mai le Atua auā o loo manino i lana upu e inosia e ia amioga faapea. Ta’u ia i latou e te augofie e tatalo ma i latou ma fesoasoani ia fa’asa’oloto i latou mai nei lagona.

O le faitauga mai le Tusi Paia o le asō ua ta’u mai ai ia i tatou le mea e tupu i tagata pe a tu’u pea i o latou mafaufau leaga; o ia tagata e lē mafai ona i’u lelei vagana ua salamō. Tumau e tete’e i feusuaiga I le va o tagata itupa tutusa, ma fai mea uma e te mafaia e faaali atu ai i tagata faapea le ala sa’o e tatau ona soifua ai o loo tusia i le Tusi Paia. Na tu mau Lota e tete’e atu i feusuaiga fa’afātama ma fa’afafine i le Tusi o Kenese 19:1-7, e ui na matua’i iloga lona popole. Na te le’i fa’atagaina tagata Sotoma e ulufale i lona fale e fai le amio leaga ma agelu na ia valaaulia e malōlō i totonu o lona fale, tiga ona faatauanau le nuu ia te ia ma toetoe a osofa’i lona āiga.

Le au Pele e, ou te iloa i nisi atunuu, o se solitulafono le tau o le upu moni fa’atatau i feusuaiga fa’a Sotoma, peita’i e sili atu lo tatou mālō iā Keriso, ma e tatau ona o tatou faailoa o ia i mea uma tatou te i ai. Aua e te tūtū ma matamata a’o agai atu tagata i le fa’afanoga; e I ai lou tiute e tatau ona fai e lavea’i ai ni agaga se toatele, (Iuta 1:17-23). Ta’u atu le Upu moni I le Afioga Paia a le Atua fa’atatau i le faa Sotoma i soose taimi ma se aso e te maua ai le avanoa. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 15 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 2.  (The Bible, gender and sexuality 2)

Tauloto -Tusi Paia–Levitiko 18:22 “Aua lua te momoe ma se tane, e pei ‘ona momoe ma se fafine; o le mea e ‘inosia lava lea.”

‭‭

Faitauga – Tusi Paia –Levitiko 18:22-30

O le asō, o le a faaauau atu le a’oa’oga po’o le ā le faasinomaga a le Tusi Paia i itupa ma feusuaiga. O loo manino mai le Tusi Paia i le tauloto o le asō, e inosia I le Atua le momoe o se tane ma le tane e pei ona momoe ma le fafine. O le momoe o le tane ma le tane ua valivali mai o se masani i le tele o atunuu, peitai o so’o se tasi o faia, o loo faatino se mea e inosia. I le faitauga mai le Tusi Paia o le asō, fai mai o i latou e momoe ma seisi i le itupa e tasi, a lē salamō, e faate’aina mai ona tagata. O lo’o faapea mai foi o atunuu ma nuu o loo solomua ona talia ma faaosofia lona faia, e faasalaina ma e latou te lē maua se filemu. Aua nei e faatagaina nei ituaiga a’oa’oga mai ia atunuu e ofi mai i lou atunuu ma le nuu, o le Upu a le Atua o le ‘ioe’ ma le ‘Amene’. Fai mai le Upu a le Atua o ia tagata ma latou nuu e faasalaina, e tatau la ona tatou o ese mamao mai i ia a’oa’oga ae siitia ma faamalosia tatalo mo i latou. 

A e faitau ia Sotoma ma Komoro, o nuu na faaumatia e le Atua i le afi ma le teiō, e te vaai i nuu ua faaleagaina ona o feusuaiga a le itupa e tasi (Kenese 19:1-25). E ui o nei nuu e siitia le tamaoaiga ma foliga mai o ni nofoaga lauolaola ma matagofie e nofo ai (Kenese 13:8-12), na i’u Ina faaumatia ona o le amioleaga ma amioga inosia a tagata o loo nonofo ai. E ui lava na tuliloaina e latou fili ma sa taumafai Aperaamo e laveai I latou i le Kenese 14:1-16,  ae na latou faaauau pea ma le loto faamaualuga le faia o mea e inosia i le Atua, ma na i’u ai ina faaumatia ma ua latou fano ai. Fai mai le Tusi Paia i le Isaia 3:9

“‘Ua iloa i latou i le amio a o latou mata, ‘ua latou fa‘aali mai a latou agasala pei o Sotoma, ‘ua latou le natia lava. ‘Oi talofa ‘iā te i latou! auā o i latou lava ‘ua o‘o ai le leaga ‘iā te i latou.”

‭‭

Le au pele e, aua e te auai I nei taui o le amioleaga. Aua e te talitonu i le pepelo e iai tagata e fananau mai lava e fiafia I tagata o le itupa e tasi. O feusuaiga ma tagata o le itupa e tasi, o se mea e inosia i le Atua aua foi e lē aofia i mea na faia e le Atua. O se gaioiga faa tiapolo le taumafai e faaumatia ola o tagata ae fesuiai galuega mamana na faia e le Atua. Afai o loo e faia feusuaiga ma seisi I le itupa e tasi, tatalo I Le Atua Ina ia faasaoloto oe mai mailei ma galuega a le tiapolo, vaai se faifeau po’o se tagata o le Atua e tatalo  mo oe. 

Le au pele e, e alofa le Atua ia te oe ma ua ia auina mai lenei feau mo oe Ina ia faasaolotoina ai oe pe faaaoga foi oe, e faasaoloto ai nisi tagata. 

Tatalo, 

Tamā, faamolemole faasaoloto I le asō, soo se tagata o loo faia ma auai I feusuaiga ma le itupa e tasi I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 14 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 1  (The Bible, gender and sexuality 1) 

Tauloto -Tusi Paia–Kenese 1:27 “Ona faia lea e le Atua o le tagata i lona fa‘atusa, o le fa‘atusa o le Atua na ia faia ai o ia, na faia e ia o i lā‘ua o le tane ma le fafine.”

‭‭

Faitauga – Tusi Paia –Kenese 7:1-3

O loo tatou ola i le asō i se lalolagi e toatele tagata ua matua nunumi i lo latou ituaiga tagata (gender) ma ē e tosina iai(sexuality). O nisi kerisiano e nunumi ma lē mautonu I lenei mataupu. I nai aso o lumanai nei, o le a tatou matua suesue i le Tusi Paia e faamatala le upu moni e faatatau i ituaiga tagata ma tagata e tosina iai. 

Muamua ou te matua faamanino atu, na faia e Le Atua le tagata i lona faatusa ma na faia I laua o le tane ma le fafine (Kenese 1:27), ma o soo se mea i fafo o le uluai foafoaga a le Atua, e I fafo foi o lona finagalo. A maea ona faia ese Tusiata po’o se tufuga se galuega matagofie, na te tusia ai lana faailoga o ia na faia. O le tagata, o le galuega pito i matagofie ma maualuga na faia e Le Atua, e matua faapitoa lava e leai ma se tagata e toalua na faia e tutusa, e eseese e iloa I tamaimai lima. A ave e se tagata se galuega matagofie, ma manatu e faia iai ni suiga, e aveesea ai  lona taua. O tagata o loo taumafai e faia suiga I o latou ituaiga tagata, o loo latou faaleagaina le matagofie o le uluai foafoaga. O loo latou faapea atu I le Atua, o lē na faia I latou, e sili atu lo latou iloa pe ana latou faia le tagata. 

E tasi le mea ia maitau mai, e le faia ni mea sese e le Atua. O lona uiga, o soo se tagata e faapea mai, o lona lagona o ia  o se tane o loo saisaitia I totonu o le tino o se teine, e vave ā ona ou iloa o le tiapolo loo galue mai ma faaosofia lea tagata e faaleaga lona tino, o le galuega pito i matagofie a le Atua. O le suia o le uluai foafoaga o le tagata, le suia o itu tino, e matautia aua o loo lapatai mai le Tusi Paia o tatou tino o le malumalu o Agaga Paia ma e faaumatia e Le Atua so’o se tasi na te faaleaga lona malumalu (1 Korinito 3:16-17). O loo iai faamaumauga o tagata ua suia o latou ituaiga tagata ma itu tino ua tautino, o loo latou feagai ma tulaga faaletonu I Le soifua maloloina e oo I le mafaufau ona o a latou faaiuga. E le mafai e le tagata ona suia foafoaga a Le Atua e aunoa ma le lē maua o le taui pe afai e lē salamō.

E iai se tasi o matou faifeau na saisai e leoleo ona ua ia lauga atu i se potopotoga o tagata ma faapea atu, ‘Alii ma tamaitai’. Na fai i le faifeau e le na o alii ma tamaitai na auai. Ina ua ou faalogo iai,  na ou manatu, ‘e fia ituaiga tagata na faia e le Atua?’. O lou tino o le malumalu o le Atua, ma o soo se fautuaga e faaleaga ai, e mai le tiapolo. Afai ua e lē mautonu i lou ituaiga tagata, faalatalata i le Atua, suesue lau Tusi Paia, ma tatalo e sili atu muamua. Talanoa i se kerisiano e matua le olaga, ma tumau i manatu o le Atua e faatatau I lea mataupu. E faaali atu e le Atua po’o ai lou tagata I le Atua ma lona faamoemoega mo lou olaga. E iai lana fuafuaga ma le faamoemoega mo oe, mai I le amataga ae lei fuafuaina oe I Le manava o lou tina (Ieremia 1:5). Na faia oe e le Atua I ala mata‘utia e ofo tele ai, ma o soo se tagata e ese mai ai sana tala e fai atu ia te oe, e lē sa’o, I Le suafa o Iesu, Amene. 

OPEN HEAVENS

MATALA LE LAGI MO LE ASO LULU 13  NOVEMA 2024

(tusia e Pastor EA Adeboye)

Manatu Autu: Tagata oti o loo savali (Dead man walking)

Tauloto -Tusi Paia–Filipi 3:19“O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi.”

Faitauga – Tusi Paia –2 Timoteo 3:1-4

E ui o loo ola ma soifua pea tagata e naunau I mea faafiafia ma foliga mai o loo sologa lelei mea uma, peitai o le tulaga moni, ua oti i latou. O ituaiga tagata ia e saili I mea faafiafia ma e le pulea o latou tagata. O le mea moni e faatusa I latou I ni tagata oti o loo savavali pea. Afai o loo tosina pea lau vaai I mea faafiafia, o lona uiga o loo pulea lou agaga e le tino. O loo atagia ai le oti faaleagaga. E tatau ona e pulea atoatoa lou tagata. Aua le faatagaina le naunau i le moe e sili atu i le manaomia ona e galue. Aua le faatagaina le naunau e ai e sili atu i le manaomia ona e anapogi. O le ki i le pulea lelei o lou olaga e fua i le pulea lelei o lou loto. O le tau o le pulea lelei o lou loto e taugata atu i le tau pe a leai se pulea o lou tagata. O se tagata e paū lava ona o mea faafiafia, e oti mativa. O le tulaga lea o loo fai mai ai lē Tusi Paia i le Faataoto 21:17

“O le tagata mativa ‘ua mana‘o i mea fa‘afiafia, o lē ‘ua mana‘o i le uaina ma le suāu‘u, e le mau‘oa ia.”

‭‭

E leai ma se tagata e ausia ni mea tetele pe a paū I mea faafiafia I taimi uma. O soo se tagata e faia lea mea e ulufale mai i le lalolagi nei ma tuua ae leiloa e tagata. 

O le naunau I mea faafiafia e matua lamatia ai le tagata, ma fai mai le 2 Timoteo 3:1-5, e le tatau ona e mafuta ma tagata  ua na o le saili I mea faafiafia. Fai mai e tatau ona e alu ese ma tagata e alolofa ma naunau atu i mea faafiafia ma alolofa iai latou e sili atu i le Atua. E le ‘aia ese laau ona lava fua. E tu aua le manaoga o Isi tagata. I le auala lava e tasi, na faia le tagata e faamalosiau I isi tagata ma lagolago I o latou atunuu. E le’i faia I latou e auauna iai latou lava. 

A talanoa le tagata I le alofa ia te ia lava, o loo manatu faapito. Afai e te fia soifua, e tatau ona e faaosofia ma faatino galuega mo le lelei o tagata i lou siomaga. O soo se tagata o loo ola ma soifua mo ia lava, ua amata ona oti. O le auala e pito sili ona lelei e faaosofia ai I latou i lou siomaga ,o le taitai mai o i latou mai le pogisa ae agai I totonu o le malamalama o Keriso. O le mafuaaga moni  lea o le ola o se kerisiano, na filifilia oe e fua mai ni fua(Ioane 15:16). 

Le au pele e, ia faamautinoa o loo e soifua pea e le gata o le saili o lou lelei ae faapea foi le lelei o isi tagata. E le atoatoa lou soifua pe afai e te lei faia se galuega e faaleleia ai tagata i lou siomaga, i Le suafa o Iesu, Amene.