Samoan Devotional

OPEN HEAVENS

MATALA LE LAGI MO LE ASO GAFUA 5 AOKUSO 2024

(tusia e Pastor EA Adeboye)

Manatu Autu: Afi i lou fatafata (Fire in your bosom)

Tauloto -Tusi Paia– 1 Tesalonia 5:22“Ia mamao ‘outou ma mea leaga ‘ese‘ese uma lava.”

Faitauga - Tusi Paia: Faataoto 4:14-15

Fai mai le Tusi Paia e leai se tagata e na te aveai le afi i lona fatafa ae le mu ai (Faataoto 6:27). O le afi i lenei fuaitau o loo faatatau i le agasala. Afai e faataga e se tagata faatuatua le agasala i lona siomaga, o loo aveai e lea tagata le afi i lona fatafata ma e iu lava ina mu ai. 

Na aoaoina a’u I le tala ia Iosefa, a finau le tiapolo e faatoilalo se tagata, o le a ia faatulaga faaosoosoga i le ala o lea tagata, ma o le a ia vaai atu iai i taimi uma. E iloa ele tiapolo afai e faatulaga le faaosoosoga i ona luma i aso uma, e tele le avanoa e pau ai. O le mea lea, ou te fai ai lava i lau fanau, ia aua lava nei faia ni a latou failautusi mai le isi itupa. E sili atu le aveese o le faaosoosoga mai lou siomaga i lo taumafai e tamau i le talitonuga e mafai ona tetee atu i le faaosoosoga. 

O se muagagagna i lo matou nuu, afai e te le ai ai, aua le sogisogi iai. Afai o loo fai atu pea se tane ia te oe le tamaitai e fia uo ia te oe, ae ete iloa e iu ai I le agasala, aisea o loo e talia ai le telefoni pe a vili atu? Afai e faaosoosoina gofie oe e gaoi, aisea ete talia ai le tulaga teutupe i le tou ofisa poo se faalapotopotoga? E tatau ona e alu ese mamao mai soo se mea e te ono agasala ai aua o le tiapolo, o loo faamatalaina o se gata. O le gata e filemu ana auala ae poto leaga. E foliga lamatia, ma e sosolo atu lava i ou tafatafa ae ete le o iloa. E te ono folafola ele taitai ona e faia se mea, ae a e faatagaina lea mea i lou siomaga, e faia e le tiapolo i lona poto leaga le mea e iu ane lava ua e faia. 

Fai mai upu a le au matutua, o se avanoa i le puipui o le fale e sao mai ai se pili i totonu o le fale. Afai ete tuu avanoa i le faaosoosoga i lou siomaga, ua e faaavanoa se vaega o le puipui o lou agaga, ma e vave ona sosolo atu le agasala i totonu. Alu ese ma au uo e fiafia e tatai oe e faia le agasala, sui le nofoaga e te nofo ai e le faigofie ona faaosoosoina ai oe, aveese mai lau telefoni soo se mea e faaosoosoina ai oe e faia le agasala, ia faia mea uma ina ia taumamao le agasala ma faaosoosoga mai ia te oe. E sili atu lou le toe maua o ia mea ae e alu i le lagi, i lo le maua uma o mea, ae iu ane i seoli. Mafaufau lelei i mea uma ma tagata e tauala mai ai faaosoosoga ia te oe, alu ese mamao ma i latou, i le suafa o Iesu, Amene. 

OPEN HEAVENS

MATALA LE LAGI MO LE ASO SA 4 AOKUSO 2024

(tusia e Pastor EA Adeboye)

Manatu Autu:  E Tatau Ona Vaeluaina Le Sami Ulaula (The Red Sea Must Part)

Tauloto -Tusi Paia– Kenese 32:24“Ua tu‘ua fo‘i Iakopo e to‘atasi; ‘Ua la ivi fo‘i ma le tasi tagata ‘ua o‘o ‘ina aoina.”

Faitauga - Tusi Paia: Esoto 14:21-29

I le Tusi o Esoto 14:5-31, sa fememe’ai le fanauga a Isaraelu. Sa tuliloa mai i latou e le ‘autau a Aikupito a’o luma atu o i latou o se sami tele e lē mafai ona o latou fe’ausi ai e sopolia le isi itu. Sa leai se fofō e mafaia e se tagata i lo latou faafitauli, o lea na o latou tapa atu ai iā Mose mo se fesoasoani. Faafetai I le Atua sa i ai le poto iā Mose e sulufai ai i le Atua auā i fetaulaiga ala faapea, na o le fesoasoani mai le Atua e te ola ai.

I tulaga faigata e pei ona sa i ai le fanauga a Isaraelu e tatau ona e faasaga i fofoga o le Atua ma faapea atu i ai, “Le Alii e, e tatau ona vaeluaina lenei Sami Ulaula, ou te lē tuua oe seia e faia se ala mo a’u.” O le taimi lea e te tatalo ai ma le loto finafinau ia silafia ai e le Atua e te lē fia malolo sei vagana ua tupu se vavega.

O’u te manatua se vaitaimi na o’u i ai i se tulaga faapea. Sa ou taoto faasasa’o i luga o le ala i le tulua o po ma ao i totonu o le aai o le togiola, ma o’u tagi atu i le Atua mo se fesoasoani. A i ai se faafitauli ogaoga ma ua leai se ala e sao ai, ou te pipi’i mau i le Atua i tatalo, ma ou te lē mapu se’i vaganā ua ia vaeluaina le sami ma faia se ala mo a’u.

I le Mataio 15:22-28, na iloa e le fafine Kanana ua na o Iesu le tali mo ma’i temoni o lana tama, e le’i fa’avaivai i le ole atu ma faatauanau le Fa’aola seia o’o ina talia lona mana’o. O le fafine puna toto ua so’o fomai o alu i ai ma uma ai ana tupe ae le’i malolo lona ma’i. Na ia iloa pau lea o le lavea’i mo ia o le pa’i atu iā Iesu, o lea e ui i le tumu o tagata ma sa vaivai lona tino ona o lona ma’i, na faamalosi pea e saili lona ala seia o’o ina pa’i atu iā Iesu ma malolō ai lona ma’i.

Atonu o le mafuaaga o le nofoa’i o nisi kerisiano i tatalo ona latou te lē o mafai ona iloa atu le latalata mai o le fili ia i latou. Atonu latou te lē o iloa le osofa’i mai o le fili ia faaumatia i latou. Le au pele e, aua e te faatali ne’i tuai; tatalo nei loa! Fa’ato’ilalo nei loa ma fa’aumatia le faafitauli o loo fai ma faalavelave iā te oe. Ua lava lenā nofonofo ma le manatu o le tali o lou faafitauli o loo i se isi tagata. Ua na o Iesu e fesoasoani ma lavea’i iā te oe. Afai e te valaau iā te ia e saunia se ala mo oe, e tali mai o ia. Ua e sauni e tatalo I le taimi nei? Tatalo nei loa. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 3 AOKUSO 2024

(tusia e Pastor EA Adeboye)

Manatu Autu:   - O a’oa’iga e fuafuaina lou lumana’i (Discipline ‘Shapes Your Future)

Tauloto -Tusi Paia– Eperu 12:11 ‘O a‘oa‘iga uma fo‘i a o i ai, e lē manatu i ai o se mea e ‘oli‘oli ai, a o le mea e fa‘anoanoa ai; ‘ae mulimuli ane e fua mai ai le fua o le amiotonu ē manuia ai ē ‘ua a‘oa‘oina ai’

Faitauga - Tusi Paia: Kenese 25:29-34

A o o’u i aoga maualuga, na fai mai lo’u faiaoga iā i matou, o tagata soifua uma lava na omai i le lalolagi ma avega o puapuagā mo i latou e fa’aaogā a’o le’i tuua le lalolagi. E mafai ona e filifili e fa’aaogā lau ato puapuagā a o e la’ititi, ia sa’oloto ai lou olaga pe a e matua, poo le taofi mau o puapuagā ae fai le saolotoga a’o laititi. Peita’i e tatau ona e malamalama, e mautinoa e te faaaogaina le aluga o puapuaga pe a e matua.

Afai e te filifili e fa’aaogā lou aluga o puapuaga a’o e la’ititi, o le a e tuua oe lava I se olaga pulea malu puipuia. O le a e su’esu’e a o taa’alo isi, auai i leoleoga tatalo i po a’o fai pātī isi, ati’ae se tagata amio lelei a’o loo fai e isi le amioleaga ma faaputuputu mo le lumanai. a’o isi o loo fa’aalu uma tupe latou te maua. Fai mai le upu tauloto o le asō, o taimi o a’oa’iga e lē manatu o se mea e olioli ai peita’i e maua ai le filemu o le mafaufau I le lumana’i. O i latou e lē tuuina atu i latou lava i a’oa’iga a’o laiti o latou olaga, e mautinoa o loo faatali mai puapuaga mo i latou i le lumana’i. O oe e faia lau filifiliga, faataga lou tagata e ui i puapuaga o a’oa’iga i le taimi nei, poo le faasaga i le taui o le a’oa’iga mulimuli ane. Fai mai le Failauga 7:8 “E sili ‘ona lelei o le i‘uga o se mea i lona amataga. E sili ‘ona lelei o lē ‘ua ‘onosa‘i i lē ‘ua loto fa‘amaualuga.”

E sili ona tāua lou i’uga na i lo’o lou amataga. E lē afaina pe e te sau i se aiga mativa, o le mea taulia aua ne’i e oti mativa. E lē afaina pe afai o oe sa leaga lou olaga toeitiiti a e alu i seoli; e taulia lou i’u i le ola e faavavau. Aua ne’i maimaua lou lumana’i i fiafiaga e gata I le taimi nei. O Esau na fia’ai ma ia fa’ataua ai lona tofi o le ulumatua mo se ipu polesi; na ia tia’ia manuia tu’u fa’asolo mo se taumafa e tasi! Semanū faapenei o tatou faapea; o le Atua o Aperaamo, Isaako ma Esau, peita’i na ave e Esau lona tulaga iā Iakopo ona o lona fia taumafa polesi. Atonu e te faapea mai sa valea Esau, peita’i e toatele tagata o loo amio faatasi ma Esau i le taimi nei. E i ai tagata semanū faapenei o avea ma perofeta iloga peita’i ua lē faataunuuina manuia ona o le lima minute o le faitaaga. O nisi e mafai ona latou maua ni pisinisi tetele peita’i ua maimau ona o le paie e galulue.

Le au pele e, o le pologa o le ola pulea i a’oa’iga i le taimi nei e lē faatusalia i le taui e te selesele i le lumana’i. I le suafa o Iesu Amene.

OPEN HEAVENS

MATALA LE LAGI MO LE ASO FARAILE 2 AOKUSO 2024

(tusia e Pastor EA Adeboye)

Manatu Autu:   - Tatalo mo ou tuaoi ma le (Prayers for your neighbourhood )

Tauloto -Tusi Paia– Salamo 122: 6 ‘“‘Ai‘oi atu ‘outou ‘ina ‘ia manuia Ierusalema: “‘Ia manuia i latou o ē alolofa ‘iā te oe.”

‭‭ 

Faitauga - Tusi Paia: Levitiko 19:15-18

1. Faafetai  le Alii e mo o’u tuaoi. Faafetai mo o’u tuaoi ma taitai uma I lo’u nuu. 
2. Tama, ou te tatalo ia faamautu ona atia’e lou malo I lou nuu. Ia faia pea lou finagalo I lou nuu i taimi uma, I le suafa o Iesu. 
3. Tama, faamolemole auina mai au agelu e puipui I lou nuu, I le suafa o Iesu. 
4. Tama, faamolemole ia aua nei manatu mama tagata o lo’u nuu I tagata amioleaga. Ia aveesea i latou ma lou nuu I le suafa o Iesu. 
5. Tama, ou te tuuina atu I ou aao tamaiti uma I lou nuu. Ia maua e i latou le amio atua ma ia tutupu ae e avea ma tagata e faia mea tetele ma manumalo i le lalolagi, i le suafa o Iesu. 
6. Tama, ia avea le tau ma le siosiomaga i lou nuu e lelei mo le soifua maloloina ma le tulaga lelei o tagata, i le suafa o Iesu.
7. Tama, faamolemole ia faataga le malo e faia tulafono ma faiga faavae e lelei mo i matou, i le suafa o Iesu. 
8. Tama, faamolemole ia e faaaogaina a’u e taitaiina mai tagata o lou nuu ia latalata ia te oe. Feosaosani mai ia te a’u e faia se toe faaolaolaga i le itu faaleagaga i lou nuu, ia talia ma tuuina atu ola o tagata uma ia te oe, I le suafa o Iesu. 
9. Tama, faamolemole foai le poto I taitai o lou nuu e taitaia mataupu e manuia ai le nuu. Ia latou faia faaiuga tonu e siitia ai le tulaga lelei o le nuu, i le suafa o Iesu.
10. Tama, ia e faailoga fale uma i lou nuu e pei o fale uma o Le au Isaraelu i le Esoto 12:13. Aua nei faatagaina le oti poo faannoanoaga e oo i lou nuu, i le suafa o Iesu.
11. Le Alii e, ia avea lou nuu ma faamanuiaga i lou atunuu. Ia avea lou nuu e faaeaea ai lou atunuu, i le suafa o Iesu. 
12. Tama, ia e tatala faamalamalama o le lagi ma sasaa mai manuia mo lou nuu ma le atunuu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 1 AOKUSO 2024

(tusia e Pastor EA Adeboye)

Manatu Autu:   - Faamaualalo, faamaualuga ma vavega (Humility, pride, and miracles)

Tauloto -Tusi Paia– 2 Tupu 5:13 ‘A ‘ua fa‘alatalata ane ana ‘au‘auna, ‘ua fai ane ‘iā te ia, ‘ua fa‘apea ane, “Sena e, ana fai atu e le perofeta se mea tele ‘iā te oe, ‘e te lē faia ‘ea? A o lenei, ‘e te lē faia ‘ea ‘ina ‘ua ia fai atu ‘iā te oe, ‘‘E te tā‘ele, ‘e te mamā ai?’

‭‭ 

Faitauga - Tusi Paia: Mataio 15:22-28

E le foaia e le Atua ni vavega I tagata faamaualuluga. Ua ou maitauina o soo se tagata na maua se vavega mai a Iesu, na ole atu ma le faamaualalo. O le lepela I le Mataio 8:2-3, na tapuai ia Iesu, o le pule o le toaselau I le Mataio 8: 5-10, e na te lei tulia mai se auauna, na sau lava o ia ma ole atu ia Iesu ia faamalolo lana auauna, ao le fafine I le Mataio 15:22-28, na lafo iai e Iesu ni upu mamafa ma faatusa o ia I se taifau, peitai e lei to’atamai ai lenei fafine. Peitai o tagata sa tatau ona maua vavega mai ia Iesu, e lei maua, na faaalia lo latou faamaualuluga, aemaise lava tagata o Lona nuu (Mataio 13:54-58). Fai mai le Tusi Paia, na o ni nai vavega na mafai ona fai I lona nuu. 

Na toeitiiti lava oti Naamanu o lepela lava ona o le faamaualuga. Na alu I le perofeta mo se faamalologa ma ua faatonu e alu e taele I le vai o Ioritana. Ae oso lona ita ma manao e toe foi I lona atunuu e oti o se lepela, ona o le manatu o se tagata I lona tulaga, e le tatau ona alu e taele I le vai I Ioritana. Faafetai I ana auauna na fautua ia te ia ma suia ai lona mafaufau. 

E iai taimi e fai mai ai e le Atua ia te a’u se faatonuga e pei e faatamaitiiti, I taimi o matou sauniga o le Agaga Paia. Ona o a’u o se atalii I aao o le Atua, ou te tau atu I tagata ana faatonuga, ma o I latou e le manatu ua maualuluga tele o latou tulaga, e o fai, e masani lava ona foi mai ma ni tautinoga. E iai se taimi na faapea mai le Atua e valaau uma tagata e tiga patua e o mai, ona faatonu lea o a’u ou te siva faataamilo iai latou. E foliga e faatamaititi lea mea, ae na ou usitai. Ina ua maea, ua le toe iai seisi e tiga se tua ma ua mafai ona aapa e pai lima i tamaimai vae. 

Afai ua e faamaualuga tele ua le mafai ona e gauai I Le auauna a le Atua, e lei mafai ona e maua se vavega mai ia te ia. Afai ua maualuga tele Lou tulaga ua le mafai ai ona e faia se faatonuga, e le mafai ona e maua se vavega. E tatau ona e faamaualalo i luma o le Atua Silisiliese pe afai e te fia maua ni vavega. Ou te ofo I nisi taimi I tagata o le faigofie ia ona gauai I fomai, e tali a latou fesili ma tuuina atu o latou tino e suesueina ma togafitia, peitai a oo loa I le Atua, e faaali mai uiga faamaualuluga e pei ua sili atu lo latou iloa i lo le Atua. Afai e te fia maua se vavega mai le Atua, tuu ese le faamaualuga ae sau ia te ia e pei o se tamaitiiti, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 31 IULAI 2024

(tusia e Pastor EA Adeboye)

Manatu Autu:   - Pule a le Tagata Faatuatua (Believer’s Authority )

Tauloto -Tusi Paia– Luka 10:19 “Fa‘auta, ‘ou te foa‘i ‘iā te ‘outou le pule e soli ai gata ma akarava ma le malosi uma o le fili; e leai lava se mea e leaga ai ‘outou.”

‭‭ 

Faitauga - Tusi Paia: Efeso 2:6-7

Fai mai le Eperu 11:3 na faia le lalolagi ma mea uma I afioga uma e tulei mai fofoga o le Atua. O le Atua o le Agaga o ia (Ioane 4:24) ma o mea uma o loo vaaia I le lalolagi nei, e faavae I mea i le itu i le agaga, le siomaga o mea e le vaaia. O le aa o le laau e te iloa ai le tulaga o loo iai le laau, e faapena foi le siomaga o mea e vaaia, e fua i mea o loo iai i le siomaga o agaga, o mea e le vaaia. Mo se faataitaiga, I le Esoto 14:16, na faaloaloa le tootoo o Mose, ona vaeluaina lea o le sami. E le se mea masani ona vaeluaina le sami pe a faaloaloa se tootoo, e tatau lava ona iai se malosiaga e le vaaia na galue i le vaeluaina o le sami. A e silasila la i le tagata Lea na faaloaloaina le tootoo, e tatau lava ona iai sona sootaga I le faavae mautu e pulea le sami ma mea uma I Le lalolagi, o le sootaga lea o le sootaga ma le Atua. Talitonu mai, afai o oe o se atalii poo se afafine o le Atua Silisili Ese, e leai ma se mea i le lalolagi e le mafai ona e pule ai. E ia te oe le pule i mea uma aua fai mai le Salamo 82:6 o oe o le atua. 

I le tele o tausaga talu ai, ao sauni e faia sa matou aoga Tusi Paia I se fale o se polofesa o le Iunivesite i Ibadan, ae tei ua timu. O le toatele ia o matou ua le ofi I le potu malolo o le fale, o lea na ou faaaogaina loa la’u pule o le atalii o le Atua e taofi ai le timu. Ua uma le timu ona faia lea o le mafutaga Tusi Paia. E lei leva na uma la matou mafutaga ae taunuu atu nisi tagata. Ua tetei I le o atu e le o timu le vaega o loo iai le fale o Le polofesa aua na tuai atu ona o le timu o le vaega atoa o le Iunivesite. O le taimi e avea ai oe ma atalii poo se afafine o le Atua, e te maua le pule I mea uma, o latou faavae mautu o loo I le siomaga o le agaga e le vaaia, ma e aofia ai le tau, o temoni ma isi. Afai o oe o se sui o le aiga o le Atua, o oe o o le tupu, ma a fai atu se upu a le tupu, e iai le mana (Failauga 8:4). 

E tatau ona e mataitu lelei, afai o le tagata e le o se atalii poo se afafine moni o le Atua, ae taumafai e faaaoga le pule a le Atua, e faamaina e pei o atalii o Seva (Galuega 19:13-16). O soo se folafolaga e te faia pe a faaaogaina lea pule, e tatau ona o gatasi ma le Upu a le Atua. O se fale e vaevaeina e le mafai ona tu (Mataio 12:25). Afai o oe moni o se fanau a le Atua, e te savali e tusa ma le Upu a lou Tama. Afai o oe o se atalii poo se afafine o le Atua, amata ona e faatonu mea e te manao e tino mai i lou olaga ma aveese mea e te le manao ai, I Le suafa o Iesu, Amene. 

OPEN HEAVENS

MATALA LE LAGI MO LE ASO LUA 30 IULAI 2024

(tusia e Pastor EA Adeboye)

Manatu Autu:   - Fifilemu po’o le mafuta (Comfort vs Fellowship )

Tauloto -Tusi Paia– Mataio 18:20 “Auā o le mea ‘ua fa‘apotopoto ai se to‘alua, po’o se to‘atolu i lo‘u igoa, ‘ou te i ai fa‘atasi ma i latou.”

‭‭

Faitauga - Tusi Paia: Eperu 10:24-25

‭

I le aso, ou te fia mafaufau loloto i le filifiliga e nofo fifilemu I le fale ma matamata tapua’iga i  luga o upega tafa’ilagi, poo le auai i sauniga lotu. E manino le fuaitau o le asō i le faapea mai, ‘aua e te manatu faatauva’a i le mafuta fa’atasi ma le ‘au uso Kerisiano. O lona uiga, a fai e te filifili e te auai i se sauniga i luga o upega tafa’ilagi a ua mama ia te oe lou auai i le sauniga i le falesa, o lona uiga ua faatuatuana’i ia te oe le mafuta faatasi ma le ‘au uso Kerisiano ae faamuamua ia te oe lou fifilemu.

Ona o lau filifiliaga e nofo fifilemu nai lo le auai I se mafutaga, e ono tutupu mai ai nisi tulaga e tele. O ia tulaga e aofia ai lou taliina o telefoni ma lou matamata i itulau o upega tafailagi a o faia le sauniga lotu. Ae le gata i lea, o loo e ai ma inu peitai sa tatau ona e faalogo ma talia le mana o le Ola mai le lagi. Auā o ia tulaga o le a tele le avanoa e tosina ‘ese ai lou mafaufau mai le sauniga, e pei o le tui’tu’i mai se isi i lau faitoto’a pe ete manatua foi se mea ua galo ia te oe ona faia. O mea ia o le a malosi ona fa’atosina ‘ese ai lou mafaufau mai le sauniga lotu ma e misia ai ni mea lelei o faia e le Atua I lena taimi. Ae afai e te auai atu i le sauniga lotu I le falesa, e ono la’itiiti pe leai foi se mea e ono faalavelave aua o tagata uma o loo iai i le sauniga o loo taulai le vaai i le Atua. Latou te tatalo faatauanau fa’atasi i le Atua, ma o le a malosi le mana o le afi i le siosiomaga, ma ua faamumuina ai ma le afi I totonu ia te oe. E le taitai ona tutusa le tulaga lea i lou matamata  i se sauniga I luga o le TV. Ta’u mai, a e vaai atu I luga o le tv i se fale o mu, e te fa’alogoina le vevela o le afi i totonu o lou fale?    

Se’i vaganā ua matuā leai leai lava se auala e mafai ai ona e auai i se sauniga lotu, pe a fai e mamao tele po’o nisi mafua’aga, e le taitai ona tutusa se mea e te maua mai se sauniga e te auai atu iai, ma le matamata mai le fale. E silasila le Atua i lou loto; na te silafia lelei lau filifiga e faia, pe o e nofo fifilemu I le fale poo e fia mafuta ma le ‘au uso Kerisiano. O ia na fetalai ia ‘aua nei tatou fa’atuatuanai le mafutaga ma le au uso; na te le uuna’ia oe e te le usita’ia lona finagalo. E iai lava le ‘ese’esega  o le tagata e matamata i le gaioioi mai o le Atua ma le tagata  o loo i totonu o le gaioioi mai o le Atua.  ‘Aua ne’i faamuamua ia te oe lou fifilemu nai lo le mafuta ma le auuso faatuatua. I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 29 IULAI 2024

(tusia e Pastor EA Adeboye)

Manatu Autu:   - Lau Telefoni vs lau Tusi Paia (Your Phone vs your Bible )

Tauloto -Tusi Paia– Esoto 20:3 ”“‘Aua ne‘i e fai mo oe ni atua ‘ese i o‘u luma.”

‭‭

Faitauga - Tusi Paia: Esoto 20:3-6

‭

O telefoni I nei aso e lelei ma aoga ua faafaigofie ai fesootaiga ma soo se tagata I le lalolagi. E ui I lea tulaga lelei, e tatau ona faaeteete ina nei pulea lou ola e lau telefoni. Aua nei avea lau telefoni ma mea e te ola ma masani ai, aua na fetalai Iesu, o le tagata e ola mai afioga uma e tulei mai ona fofoga (Mataio 4:4). O le Tusi Paia e tatau ona e ola ma fai ma au masani, ae le o le telefoni. Afai e te le mataala i lea tulaga, e faigofie lava ona avea le telefoni e suia le Upu a le Atua I lou olaga, ma e lamatia lea tulaga aua fai mai le Tusi Paia o lo tatou Atua o le Atua fua(Esoto 34:14). 

A e maleifua mai i le taeao, e te tago muamua i lau Telefoni poo le Tusi Paia? E leiloa pe e te faapea mai, o le telefoni ona e fia siaki le taimi, ae leiloa poo la e te suesue muamua itulau eseese o upega tafailagi, ae le o fuaitau mai le Tusi Paia? Ao faasolo le aso, o a mea e tele ina e manatunatu iai, o mea na e matamata ai Ie Telefoni poo le Upu a le Atua? E tatau ona e manatunatu I le Upu a le Atua I le ao atoa ma le po, ae le o ata ma tala eseese I luga o lau telefoni. Afai e amata ona lua talanoa ma se tagata i lou ofisa poo fea lava, e amata I se tala malie poo se fuaitau mai le Tusi Paia? Fai mai le Efeso 5:19, e tatau ona tatou fetautalatala‘i i salāmo, ma pese, peitai ua le toe iai ni talanoaga faapea, ua na o talanoaga I mea malie ma mea e tutupu mai i ma o. E te iloa mai ai, e manaomia lou salamo pe afai ua tau mamao lou loto mai le Atua mo se taimi umi ae e te lei silafia? Ua oo I le taimi e tatau ona e toe foi I le Upu a le Atua e fai ma masani e te fiafia iai. Ua oo I le taimi e toe amata ona suesue I le Upu a le Atua o se mea muamua I le taeao ma mea mulimuli I le po i aso uma. 

Afai ua tau mamao lou loto mai le Atua, a toe faafoi mai lou loto I Le Upu a le Atua, e manaomia le pulea lelei o lou loto. E tatau ona faia ni au faaiuga lelei ma tamau ai. Mo se faataitaiga, tuu ese lau telefoni ma Ou tafatafa ae tuu lau Tusi Paia I tafatafa o lou aluga ae lei moe. E faigofie ai ona e faitaua ae e te lei moe ma e ala mai. E ono alagatatau foi ona aveese nisi itulau o upega tafailagi mai lau telefoni ua tele ona e fiafia iai. E mafai ona faaalu aoga ai lou taimi sa maimau I ia itulau, e tatalo ai ma suesue le Upu a le Atua. Aua e te faatagaina le telefoni o se auupega a le tiapolo e tetee i le tuputupu a’e o lou ola faaleagaga. I le suafa o Iesu, Amene. 

OPEN HEAVENS

MATALA LE LAGI MO LE ASO SA 28 IULAI 2024

(tusia e Pastor EA Adeboye)

Manatu Autu: Tagata mulimuli lelei 4 (Good Followership 4)

Tauloto -Tusi Paia– Roma 15:30 Le ‘au uso e, ‘ou te ‘ai‘oi atu ‘iā te ‘outou, ‘ona o lo tatou Ali‘i o Iesu Keriso, ma le alofa o le Agaga, ‘ia ‘outou matuā finafinau fa‘atasi ma a‘u i talosaga i le Atua mo a‘u;'

Faitauga – Tusi Paia – Mataio 26:36-38

I le fa’ai’uga o tatou lesona faatatau i tagata mulimuli lelei, e pei ona amatalia i nai aso ua mavae, e tāua lou manatua, poo le a le foliga malolosi o ta’ita’i e te vaai atu i ai, e mana’omia pea e i latou le fa’amalosi’au mai ia i latou o loo latou ta’ita’ia. Talu ai, auā o le tulaga ta’ita’i e tumu i taimi lelei ma taimi leaga. A o’o i taimi faigata, o fautuaga ma fa’amalosi’au o le a fesoasoani iā i latou ia manumalō. O le tautala i upu fa’a lototele, ave I ai o meaalofa, ma le fa’aaloalo ma fa’a tāua i ou ta’ita’i i so’o se ala e te mafaia ona fai, o le a avea ma fesoasoani e fa’amafanafana ma fa’a lototele ia i latou e faamalolosi i le galuega, tusa pe faigata le tofi ta’ita’i.

Tele tausaga ua mavae, sa lagona lo’u fa’avaivai. Sa ou faamavae mai la’u galuega faiaoga totogi lelei e avea ma ta’ita’i aoao o le ekalesia, ma fa’aalu le tele o lo’u taimi e a’oa’o ai tagata ma tatalo mo latou. Sa tele se avega sa ou tauaveina, ae sa foliga e leai se isi na fa’atāuaina lo’u tautigā. I se tasi aso, sa matua’i lagona le vaivai o lo’u loto ma le faavaivai i le tauaveina o le tofiga ta’ita’i aoao o le ekalesia ma i’u ai ina o’u moe i lo’u ofisa. Ou te ala a’e o i ai se teineitiiti i lo’u ofisa ma se keke. Fai mai na fetalai le Atua ia te ia e sau e aumai le keke iā te a’u. Ou te lē fiafia tele i keke, peita’i na o’u aia le keke auā sa pa’i i lo’u loto le agalelei o lenei teineitiiti. A tu’u e le Atua i lou loto e fai se mea lelei e fa’amalosi’au ai lou ta’ita’i, faamolemole aua e te musu e fai; atonu o se ala e fa’alototele ai se ta’ita’i ua faavaivai i le galuega.

O le tagata mulimuli lelei, e taumafai e faaitiitia le avega a le ta’ita’i ae lē o le faaopoopo. O ta’ita’i o tagata soifua pei o oe; e feagai ma faafitauli pei lava o oe, pe sili atu le tele o latou faafitauli ona o le tofiga ta’ita’i o loo i ai. Atonu e lē mafai ona e aveesea uma le avega o le tofiga ta’ita’i peita’i e te mafaia ona fa’amalosi’au i ai ina ia aua ne’i manatu o se mea fa’alēaogā lo latou tautigā, ma lototele ai e galue atili. I ni tausaga ua te’a, sa matuā iloga lo’u loto mafatia, peita’i o le mea sa fesoasoani iā te a’u ou te tula’i i luga ma finau pea, o le meli a se tasi o o’u afafine fa’aleagaga na fai mai, “Tamā fa’ataga le Atua e siia oe.” Atonu o lau meli o le a fa’aaogā e le Atua e fa’alototele ai lou ta’ita’i.

Ina ua latalata Iesu i le taimi e fa’asatauroina ai, na ia ave Peteru, Iakopo ma Ioane i le fanua o togālaau i Ketesemane e tatalo faatasi ma ia; ona sa ia mana’omia la latou fa’amalosi’au mo le galuega fitā o le a fai. Tatalo mo ou ta’ita’i. O isi taimi o le vaai atu o e tatalo mo latou, o le fa’amafanafanaga lea o loo latou mana’omia e lototetele ai e galulue pea ma le fiafia. Ave se meli fa’amalosi’au pe faatau se meaalofa mo lou ta’ita’i i le asō e faafetaia ai i latou mo galuega uma o loo fai ma avega o loo latou tauaveina, i le suafa o Iesu. Amene.