Samoan Devotional

OPEN HEAVENS

MATALA LE LAGI MO LE ASO LUA 25 IUNI 2024

(tusia e Pastor EA Adeboye)

Manatu Autu: Faailoga o le Manufeai 2 (Mark of the Beast 2)

Tauloto -Tusi Paia– Faaaliga 13:17 ‘Ina ‘ia lē mafaia ‘ona fa‘atau mai pe fa‘atau atu e se tasi, tau lava o ē ‘ua i ai le fa‘ailoga, po o le igoa o le manu fe‘ai, po o le faitau aofa‘i o lona igoa..

Faitauga – Tusi Paia – Faaaliga 14:9-10

O ananafi sa ou taua o le fa’ailoga o le manu fe’ai, e mafai ona faaaoga se faailoga, se igoa, po’o se numera. Sa ou fai atu foi o le fa’ailoga e lē pei o se tatau ua ta i le pa’u o le tagata, a o se mea e tu’uina i totonu o tino o tagata ua taliaina, e taitaiina ma usitaia ai le malo i lena taimi, e faauluulu i le anetikeriso. O le asō, o le a ou talanoa atu I le mea tonu o le a tu’u i totonu o tino o tagata latou te taliaina le fa’ailoga o le manu fe’ai.

Afai o e malamalama i suiga fa’atekonolosi e oo mai i le taimi nei, o le a e manino ai i le tulaga o le mafai ona tuuina i totonu o tino o tagata o “microchips” e mafai ai ona feso’otai sa’o le mafaufau  i upega tafa’ilagi ma faia fesootaiga i le telefoni e faaaoga le mafaufau, ma faia togafitiga fa’a foma’i e pei o ni vavega, e malolo vave ai se vae na gau ma isi mea faapena. Mai i su’esu’ega ua fa’aaoga ai “microchips”, ua mafai ai e saienisi ona vā’ai atu i so’o se mea o va’ai iai le tagata, e mafai foi ona fa’atonutonu lea tagata e sii i luga ona lima po’o ona vae. O ia “microchips” e fesootai sa’o lava i fai’ai o tagata, ma o soo se tagata o pulea nei microchips, e mafai ona fa’atonutonu ma pulea mafaufau o tagata o loo iai I totonu nei microchips. O lona uiga, o lou taliaina o le fa’ailoga, ua lafoai atoa lou tagata e pule ai le malo o tulai mai I lea taimi. O le malo e iai le pule I lea taimi, e latou te pulea ma faatonu tagata e faia so’o se mea e mananao ai. 

O le mafua’aga lena o so’o se tasi e iai le fa’ailoga, e iai foi le fa’asala, aua foi o le a lē toe mafai ona latou faia le finagalo o le Atua, aua o le a pulea e le anetikeriso o latou mafaufau. O le taliaina o le microchip io latou tino o le a fa’amausaliina ai lo latou taunuuga, aua o le a pulea e le anetikeriso o latou mafaufau e usita’I ua tau lava o ia.

'Tou te le‘i iloa ‘ea, o lē tou te tu‘uina atu i ai ‘outou e fai ma ‘au‘auna e ‘ana‘ana i ai, o ana ‘au‘auna ‘outou tou te ‘ana‘ana i ai, po o le agasala e o‘o ai le oti, po o le ‘ana‘ana e o‘o ai le amiotonu? 'Roma 6:16

Ua iloa e Satani le Tusi Pa’ia ma ia iloa, o lē e te usita’i iai, o lou matai foi lea. O tagata uma latou te talia le fa’ailoga o le manu fe’ai o le a avea o se auauna a Satani. Le ‘au pelē, ‘aua ne’i e faia se tulaga e te lamatia ai, ma e iai i le lalolagi i le taimi ua toeitiiti tagata uma ua avea ma auauna a Satani. O le a pei o Seoli le lalolagi i lea taimi, ma o le a matua faigata ona teena e tagata le faailoga. Ave lou ola ia Keriso ma ia e ola faapa’iaina i le taimi nei, ina ia e iai I le Lagi i le taimi o le a pulea ai e le anetikeriso le lalolagi. Ia e faia mea uma e mautinoa ai lou iai i le Lagi pe a o’o mai le anetikeriso e nate pulea le lalolagi. I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 24 IUNI 2024

(tusia e Pastor EA Adeboye)

Manatu Autu: Faailoga o le Manufeai 1 (Mark of the Beast 1)

Tauloto -Tusi Paia– Faaaliga 13:16 ‘Ua faia fo‘i e ia ‘ona ia fa‘ailogaina o tagata uma, o tagata nu‘u ‘atoa ma ali‘i, o ē mau‘oa ma ē matitiva, o ē sa‘oloto ma ē pologa, ‘ia fa‘ailogaina i latou i o latou lima taumatau, po’o latou muaulu.

Faitauga – Tusi Paia – Faaaliga 13:11-18

E toatele tagata ua faalogo i le faailoga o le manufeai peitai e lei iai se taimi e suesue ai po’o le a tonu lenei mea. O loo faamaite mai sina faamatalaga i le tauloto mai le Tuis Paia o le aso. 

O le faailoga o le manu feai e tolu ituaiga eseese e mafai ona faia ai, e mafai ona faia o se faailoga, o se igoa, po’o se numera. Po’o le a lava le ituaiga e faaaogaina, o le faailoga lea o le manu feai, ma o so’o se tagata na te faaaogaina ma talia lenei faailoga i lona lima taumatau po’o le muaulu, ua faailogaina e tapuai i le manufeai. E pau ia o tagata e faataga ona faatau atu, faatau mai pe talia e auai i meafai a le nuu ma le atunuu pe a o’o ina maea le siitiaga. O so’o se tagata e musu e talia le faailoga, o le a sailia ma fasiotia. 

O le a tonu lenei faailoga?i le vaitau o le aposetolo o Ioane, sa leai ni tekonolosi, ma o lea sa ia taumafai e faamatala le faaaliga na ia vaaia i mea o loo iai i lena vaitaimi. O se faailoga e faia i le lima taumatau po’o le muaulu e tatau ona faia e se masini ma o se faailoga e le mafai ona aveese pe fufulu ese. O le mafuaaga e le mafai ai ona aveesea se pe’a ona o lo’o ta I le pau o le tagata. Peitai o nei pe’a, a maea se taimi e mafai ona matafi pe aveesea foi ini taotoga e faaaoga ai masini. O le faailoga o le manufeai, o le a matua taua e faailoga ai tagata ma o latou faamaumauga, e le tatau ona matafi pe aveesea i so’o se faiga. O lona uiga e tatau ona faailoga e loloto atu i lo le pa’u o le tino. E le faatinoina e tau o se faailoga i le pau ae o se faailoga e tuu i totonu o le tino. 

Afai o le faailoga o le manufeai e tatau ona I totonu o le tino, o lona uiga e iai se mea o le a tuu i totonu o tino o tagata o le a totoe i le lalolagi pe a maea ai le siitiaga, ma o le a avea ma faailoga o le tapuai i le manufeai (Faaaliga 20:4). O le a avea ma faailoga e tau atu ai i tagata uma, ’e te faamaoni i le manufeai feai ma e te usitai ia te ia’. O lenei faailoga o le a faaaogaina e pulea ai tagata ma faamalosia lo latou usitai i le manufeai tusa pe fiafia iai pe leai. 

O le a faaauau lenei talanoaga a taeao, peitai ou te fia faamalosiau ia te oe I le aso, lafoai lou ola ia Iesu Keriso pe a mafai ona e faia. Na maliu Iesu mo au agasala ina ia mafai ona e nofotupu ma ia e faavavau. Aua le faamaimauina le galuega togiola ua maea ona faia e Iesu mo oe. Aua e te misia le siitiaga ina ia aua ai nei avea oe ma pologa a le tiapolo. I le suafa o Iesu, Amene. 

OPEN HEAVENS

MATALA LE LAGI MO LE ASO SA 23 IUNI 2024

(tusia e Pastor EA Adeboye)

Manatu Autu: O Le Toetu lona lua (The second Resurrection).

Tauloto -Tusi Paia– Faaaliga 20:6 ‘6‘Amu‘ia mōna ‘ua pa‘ia lē ‘ua i ai se tofi i le ulua‘i toetū; e lē o‘o fo‘i le pule a le oti fa‘alua ‘iā te i latou, ‘ae ‘avea i latou ma ositaulaga a le Atua ma Keriso, latou te fai ma tupu fo‘i fa‘atasi ma ia i tausaga e afe..'

Faitauga – Tusi Paia – Ioane 5:28-29

Ina ua maea le lesona ananafi, atonu o loo e fesili, “Afai e toe afio mai Iesu e fa’ato’ilalo le tiapolo ma ana ‘au, o le a le mea o le a tupu i tagata ua ia i latou le faailoga a le manu feai o le a totoe i le lalolagi?” Fai mai le Tusi o Fa’aaliga 19:17-21; a afio mai Iesu faatasi ma lana fa’atoanofotane e tau ma le tiapolo, o le a faapotopotoina e se agelu manu uma e felelei, ma valaaulia i latou i se faiga’ai tele, latou te aai ai i tino o i latou na ‘au ma le tiapolo e tau ma le ‘autau a le Alii. E tusa ma fa’amaumauga a le National Geographic, e i le va o le 50 piliona ma le 430 piliona le aofa’i o manu felelei i le lalolagi. O lona uiga, ua manino, o loo lava manu felelei e aai i tino o i latou e faasagatau i le Atua.

A o toe tutū a’e i latou na maliliu e aunoa ma le faailoga a le manu feai, e nofo tupu faatasi ma Keriso mo le afe tausaga, o e na oti a o tau ma Keriso ma lana ‘autau, e lē toe tutū i latou seia atoa ia tausaga e afe (Fa’aaliga 20:5). A uma ona fa’aumatia ‘autau, o le a totoe pea nisi o e le’i tau i le taua peita’i na o latou talia le faailoga a le manu feai i le lalolagi. O tagata la nei o le a pule ai le ‘au paia mo le afe tausaga. A atoa le afe tausaga ona tatalaina mai lea o Satani mai lona falepuipui, ma o le a ia faapotopoto se ‘autau tele e tau ma le ‘au paia. Peita’i, o le taimi lea, e lē mana’omia ona tau le ‘au paia auā o le a auina ifo e le Atua le afi mai le lagi e susunu ai lo latou fili.

Fai mai le Fa’aaliga 20;7-9: 7‘Ia tatou fiafia ma ‘oli‘oli, ma tu‘u atu le vi‘iga ‘iā te ia; auā ‘ua o‘o mai le tausama‘aga o le Tama‘i Mamoe, o lona faletua fo‘i ‘ua saunia o ia e ia. 8‘Ua tu‘uina atu fo‘i ‘iā te ia ‘ina ‘ia ‘ofu o ia i le ‘ie vavae e mamā ma le pupula.” Auā o le ‘ie vavae o le amio tonu lea a le ‘au pa‘ia. 9‘Ua fai mai fo‘i o ia ‘iā te a‘u, “‘Ia e tusi, ‘Amu‘ia e ‘ua tala‘iina i le tausama‘aga o le Tama‘i Mamoe.” ‘Ua fai mai fo‘i o ia ‘iā te a‘u, “O afioga moni ia a le Atua.”

A feoti uma loa i latou ua i ai le faailoga a le manu feai, e toe tutū a’e o latou agaga e tutū i o latou lava faamasinoga. O le toetū lona lua lea. O i latou uma e I le toetu lona lua o le a mau tulaga i le oti faalua, o le fa’asalaga lea e faavavau I le lepa afi faatasi ma Satani ma ana ‘au. Ou te tatalo ia aua ne’i e auai i le oti lona lua i le suafa o Iesu. Peita’i e i ai lau pitolaau e ao ona fai e ala i lou fa’amautinoa e tu’u lou ola iā Iesu Keriso ma ola i se olaga fa’apa’iaina. Ia e faia mea uma ina ia aua lava nei e alu I le oti faalua, i le suafa o Iesu. Amene.

OPEN HEAVENS

MATALA LE LAGI MO LE ASO TOONAI 22 IUNI 2024

(tusia e Pastor EA Adeboye)

Manatu Autu: O Le Ulua’i Toetu (The First Resurrection).

Tauloto -Tusi Paia– Faaaliga 20:6 ‘6‘Amu‘ia mōna ‘ua pa‘ia lē ‘ua i ai se tofi i le ulua‘i toetū; e lē o‘o fo‘i le pule a le oti fa‘alua ‘iā te i latou, ‘ae ‘avea i latou ma ositaulaga a le Atua ma Keriso, latou te fai ma tupu fo‘i fa‘atasi ma ia i tausaga e afe..'

Faitauga – Tusi Paia – Faaaliga 20:4-6

O le ulua’i toetu o se mataupu e lē masani ona laugaina i totonu o ekalesia, ma e malamalama gofie i le mafuaaga auā e lē o se mataupu e tatau ona fa’amalosia e so’o se faifeau lana aulotu e auai. O tagata uma e tatau ona tausiniō e o i le si’itiaga pe a afio mai Iesu e ave lana fanau. O i latou e tuua pe a mavae le si’itiaga, e la’ititi se avanoa e saofagā ai i latou i le ola e faavavau, o lona uiga o lou faavalevalea lou misia o le si’itiaga.

O le toetu muamua o le avanoa mulimuli lea e tu’u mai ia i latou e misia le si’itiaga. A uma le si’itiaga ma ua pule le anetikeriso i le lalolagi, o le a ia faia se tulafono mo tagata uma i luga o le fogaeleele e ifo i le manu feai ma talia le faailoga a le manū feai. O le tusi o Fa’aaliga o loo tusia i ni fa’ailoga, o lea la, aua e te manatu o le ifo i le manufeai o lona uiga o se manufeai o le a nofo i se nofoalii ma o le a fa’amalosia tagata e ifo atu i ai. O le uiga moni, o tagata uma o le a fa’amalosia e usita’i ma faalogo i le manufeai. Ou te tatalo ia aua ne’i e i le lalolagi i lea taimi, i le suafa o Iesu.

O le a i ai nisi o le a o latou misia le si’itiaga ma o le a mautū o latou loto e lē ifo I le manufeai pe talia lana fa’amau fa’ailoga. O le a matua’i faigata mo i latou aua o le a faia e lē anetikeriso so’o se mea na te mafai e faaumatia ai latou. O le a matua’i mamafa sauaga ia i latou i aso ma taimi uma, e lē gata i le mafaufau, o tupe, o le tino ma itu uma. E atili ai ona leaga, ona toeititi o tagata uma o le lalolagi o le a ifo I le manufeai, ma o le a na o i latou to’aitiiti i se lalolagi pogisa i le agasala. O le a leai ni sauniga lotu ma ni faatasiga auā ua o uma le toatele o le ekalesia i le si’itiaga. E lē toe i ai se faifeau e faamalosi’au ia i latou, leai fo’i se uso poo se tuafafine e fa’alototele ia i latou; O le a na o i latou to’aitiiti ma le lalolagi ma le faigamalō - o le a matua’i faigatā lava. O le toatele o tagata o e o le a filifili e lē ifo i le manufeai e i’u lava ina ifo ma i’u ai i seoli. O i latou o le a tutumau o le a tipi esea o latou ulu (tulou) e le anetikeriso. Peita’i a toe afio mai Iesu faatasi ma ana ‘au Paia e fa’ato’ilalo le tiapolo, o le a ia toe avatu ia i latou le isi avanoa e faamasinoina ai, ma faatasi ai ma Iesu e pule i le lalolagi mo le afe tausaga.

Le au pele e, tu’u nei lou ola iā Iesu Keriso pe afai e te le’i filifili e ola fa’apaiaina mo aso o totoe o lou soifua ina ia o’o mai le iuga o o’u aso i le lalolagi poo le toe afio mai o Iesu, ia e faatasi ma ia i le si’itiaga, ina ia aua ne’i e tofo i le pologa ma le auē o le ulua’i toetu. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 21 IUNI 2024

(tusia e Pastor EA Adeboye)

Manatu Autu: O le toe fili  (The last enemy).

Tauloto -Tusi Paia– 1 Korinito 15:26 ‘O le toe fili e fa‘aumatia, o le oti lea;'

Faitauga – Tusi Paia – 1 Korinito 15:55-58

E tele fili o le tagata, ae o le toe fili e fesagai ma so’o se tagata o le oti. E tusa ma le 1 Korinito 15:26, o le toe fili e faaumatia, o le oti. E iloa atu e le oti o lo’o e fesagai ma isi fili ona faatalitali lea seia oo i le taimi mulimuli e osofai ai. E leai ma se auala e te alofia ai le oti. Fai mai le Eperu 9:27. E tofia mo le tagata e tasi lona oti, o lona uiga e tatou te oo uma i le oti. O tupu, peresitene, faifeau ma taitai o Ekalesia e oo uma lava I le oti. E ui e maualuga le faauuga sa ia Elisaia, na o’o foi i le oti. 

O le tala fiafia, ua faaumatia e Iesu le toe fili o tagata. I le 1 Korinito 15:41-57, o loo manino i le Tusi Paia ua faaumatia le oti i le manumalo. Afai o oe o le faatoanofotane a Iesu Keriso ma o loo e faamaoni e auauna i le Atua i le agaga ma le faamaoni, o le oti ua pei o se solofanua o lo’o faatietie atu oe i lou aiga matagofie i le lagi. O i latou e lei faaolaina, e tatau ona fefefe i le oti, aua o le oti e taitaia tagata kerisiano i le lagi peitai e taitaia tagata agasala i seoli. 

E tulia i seoli o ē fai amio leaga, o nu‘u uma lava o ē fa‘agalogalo i le Atua (Salamo 9:17). Fetalai Iesu i le Luka 12:5'‘Ae ‘ou te fa‘asino atu ‘iā te ‘outou i lē tou te matata‘u i ai; ‘ia ‘outou matata‘u i le Atua, a mavae ‘ona fasioti e ia, e ana le pule e lafo atu i Kēna; e moni, ‘ou te fai atu ‘iā te ‘outou, ‘ia ‘outou matata‘u ‘iā te ia. '

O seoli e faatigaina e temoni tagata agasala a’o faatalitali le oti faalua. A maea le siitiaga, e faia le faaipoipoga a le faatoanofotane ma le faatoafaiava faatasi ma isi mea e tutupu (Faaaliga 19:7-21), a maea lea ona lafoina loa lea o le tiapolo ma ana temoni i le lepa afi. O i latou e leai ni o latou igoa i le Tusi o le ola, e lafoia foi i latou i le lepa afi e faatasi ma le tiapolo ma ana temoni (Faaaliga 20:14-15, Faaaliga 21:8), o le oti faalua lea. O le oti lea e te faia mea uma ia aua nei e o’o iai. O I latou uma e oti faalua e faamalaia i le lepa, e iai le afi ma le teio e susunuina i latou e faavavau. O le a tuaoi i latou ma le tiapolo ma ana temoni. Afai ua e vaai ma fefe i se temoni, e te le fia iai i se nofoaga e taufai miliona temoni tou te mafuta e faavavau. E leai se agasala ua suamalie tele e fetaui ma talafeagai ai lou alu i le lepa afi, e leai ma se mea e tasi, i le suafa o Iesu, Amene

OPEN HEAVENS

MATALA LE LAGI MO LE ASO TOFI 20 IUNI 2024

(tusia e Pastor EA Adeboye)

Manatu Autu: E leai se mea e lilo (Nothing is hidden).

Tauloto -Tusi Paia– Eperu 4:13 ‘E lē lilo fo‘i se tasi mea na faia i ona luma, a ‘ua ta‘atia fua ‘ina ‘ua aliali mai o mea uma lava i lana silafaga, tatou te ta‘u atu ‘iā te ia a tatou amio.'

Faitauga – Tusi Paia – Iosua 7:1-22

Sa valaaulia a’u e se matai taua, i ni nai tausaga ua mavae, e tatalo mo ia ona sa gasegase. Na ou fesili i lenei tamalii, pe ua faaolaina, ae tali mai “Ioe”. Na ou fiafia tele ma sa ou faamautinoa ia te ia e manuia lona gasegase. Sa ou tatalo,  peitai e leai se mea na tupu. Na ou auina atu la’u vaega tatalo matutua i lona fale e nonofo ai, na latou anapogi ma tatalo mo ia mo aso e 7. Peitai, ua atili ai ona tigaina lona ma’i. Ona ou filifili loa lea e tatalo ma anapogi mo le 21 aso. Na fetalai mai le Atua. “Atalii e, e lelei le anapogi, ae afai o lo’o e anapogi mo lenei tagata, e lē toe malosi lava o ia”. Na ou tali atu, ’ae fai mai lenei tagata o ia o lou atalii, aisea e te le finagalo ai e faamalolo ia te ia?’ Ona ia faailoa mai ou te fesili iai ni fesili se fitu i le tamalii lenei.

Na ou toe asiasi i le matai taua lenei, ma ou fai atu i ai, ’lau afioga, ua faatonu au e le Atua ou te fai atu ia te oe ni fesili. Sa saunoa mai e fesili atu. E leʻi maea ona fai uma a’u fesili, ae ua ia iloa, ua faaalia uma ana mealilo. Na ou manatu o le a salamo o ia, ina ia mafai ona ma tatalo faatasi i le Atua e faamalolo o ia, ae sa ia fai mai ia te a’u, ou te alu ese ma aua le toe asiasi atu ia te ia. E i ai se mea e te manatu ua natia e te le manaʻo e iloa e se tasi? Fai mai le afioga a le Atua i le Luka 8:17. Auā e leai se mea lilo e le faaalia; e leai foi se mea natia e le faailoa, a e iu ina faaalia.

E silafia e le Atua agasala lilo e faia e tagata, ma afai latou te mumusu e taʻutaʻu atu ma salamō mai ai, e mafai ona ia filifili e faailoa atu na agasala i se auala e faalumaina ai i latou.

O le mea moni o le natia o le agasala e le faapea ai ua natia foi lona taui. E manino le afioga a le Atua. O le mea e te lūlūina, e te seleseleina lava (Kalatia 6:7) O loo faapea mai le Faataoto 11:21 e leai se tagata agasala e sao mai le faasalaga. Afai o loo e nanaina ni agasala, o la’u fautuaga ia te oe ia ta’uta’u atu i le Atua ma salamo vave e aloese ai mai le taui e te maua.  Ua iā i tatou se folafolaga sili mai le Atua ‘āfai tatou te fa‘aali a tatou agasala, e fa‘amaoni o ia, ma le amiotonu e fa‘amāgalo ai a tatou agasala. (1 Ioane 1:9, Faataoto 28:13). Afai e iai ni au agasala faalilolilo, e iai se filifiliga e mafai ona e faia I le aso, pe e faaauau pea i na agasala ma mafatia I ona taui ma faasalaga poo le lafoai ina ia e maua le alofa mutimutivale o le Atua. Filifili ma le poto. Afai o iai sau agasala o loo lilo, ia salamo, ma lafoai I le aso, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 19 IUNI 2024

(tusia e Pastor EA Adeboye)

Manatu Autu: Mafuta mai I latou 3 (Spend time with them 3).

Tauloto -Tusi Paia– 1 Timoteo 3:12 ‘'O tiakono, ‘ia ta‘itasi ma lana avā e to‘atasi, ‘ia pule lelei i la latou fānau ma o latou lava ‘āiga, '

Faitauga – Tusi Paia – 1 Timoteo 3:1-5

O le a faaauau pea I le aso le aoaoga I le aoga ma le taua o le mafuta ma fanau. E tele nisi o faifeau ua latou faia le tulaga sese o le faamuamua o le galuega a le Atua I lo latou fanau, e lē faapea le faatulagaina o lo’o finagalo iai le Atua. O loo taua I le faitauga o le Tusi Paia o le asō, e tatau I le tagata ona pulea lelei lona aiga ae lei avea ma taitai e tausia le Ekalesia. O le finagalo o le Atua, e faamuamua lou aiga ona soso’o lea iai ma le galuega a le Atua. Afai e le o lelei ona pulea totonu o lou aiga, e le tatau ona e taitai ma tausia le galuega a le Atua.

Afai o oe o se faifeau I le galuega a le Atua, aua e te tuulafoai I lou aiga ona o lo’o e taumafai e atia’e isi aiga.  E tele fanau a faifeau o loo tele faafitauli o latou feagai e manaomia le fesoasoani, peitai o loo pisi matua e fesoasoani e tau fofo faafitauli o tamaiti o isi aiga, e sese lea tulaga. Aua ete faatalale I lau fanau ona e te manatu ua lava le aoaoga o loo faia o le Upu a le Atua I taimi o faigalotu o le afiafi ma le lotu a le Ekalesia. E le faapea o tilotilo atu lau fanau ia te oe ua na o se faifeau, e tatau foi ona e faalogo mai lea taimi I lea taimi i lou tulaga o le matua. A e mafuta I lau fanau, aua ete talanoa iai o oe o le faifeau, talanoa iai o oe o le matua. Ia avea le galuega a le Atua o se mea e fiafia iai ae le o se mea e inoino iai le fanau ona o lo’o aveesea ai o latou matua mai iai latou. 

Ua ou iloa e tatau ona ou mafuta I lau fanau i taimi o aso faapitoa, ma a afai polokalame a le lotu I vaitau ia, e mautinoa ou te avea foi iai la’u fanau. A matou agai atu I nei polokalame, e fai au tala malie I si au fanau ina ia fiafia i mea ou te agai iai. A o’o atu I nofoaga e fai ai polokalame, o le mea ou te nofo ai pe moe ai, e iai foi la’u fanau. E iai foi taimi faigata ua pau se mea ua maua e momoe ai o se moega laupapa, e matou te momoe faatasi ai lava. Ua avea lava nei taimi o polokalame ou te mafuta ma fiafia faatasi ai ma la’u fanau, ae e le avea o se taimi e leai ai se latou mafutaga ma le latou tama. Afai o loo e tatalo ia ausia ni mea tetele I le galuega a le Atua, manatua e te tatalo mo lou aiga. Ia faamuamua lou aiga I taimi o tatalo. O mea e te tatalo ai e fua iai mea o loo ave iai lau faamuamua. Ia muamua ona e pulea lelei lou aiga ae e te lei filifili e avea ma taitai I le galuega a le Atua, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 18 IUNI 2024

(tusia e Pastor EA Adeboye)

Manatu Autu: Mafuta mai I latou 2 (Spend time with them 2).

Tauloto -Tusi Paia– 2 Korinito 2:11 ‘ina ne‘i ‘ole‘olegia i tatou e Satani; auā tatou te lē vālea i ana togafiti. '

Faitauga – Tusi Paia – Fa’ata’oto 1:10-16

O ananafi na amata ai ona ou talatalanoa atu i le tāua o le mafuta ma tatou fanau. E pei ona mafuta atu matua i latou fanau, e tatau foi ona latou mafuta i tagata ma isi mea o lo’o lotolotoi ai a latou fanau. E tatau i matua ona va’ava’ai ma iloa polokalame o lo’o matamata ai fanau i luga o telefoni. Afai o matamata i ni ata komi, e tatau ona matamata faatasi ina ia latou iloa po’o saogalemu le fanau i mea o matamata iai. 

E manaomia ona siaki e matua vaega o upega tafa’ilagi o lo’o āsia e latou fanau, ma vala’aulia mai a latou uo i le fale, ma mafuta iai, ina ia iloa lelei ituaiga uo o lo’o fiafia iai le fanau. E tatau ona asiasi atu matua i a’oga a le fanau ina ia silafia ituaiga faia’oga o loo a’oa’oina a latou fanau. Aua lava ne’i manatu faatauvaa mātua i mea o lo’o faia ma aafia ai a latou fanau. O so’o se mea po’o ni tagata o lo’o mafuta iai le fanau, e iai lava le avanoa e aoaoina mai ai ma tosina iai, ma o le mafuaaga lea e tatau ai lava ona iloa e matua tagata uma o loo mafuta iai a latou fanau. I le faitauga o le Tusi Paia o le aso, na aoa’i lelei e Solomona lona atalii i tagata e tatau ona mafuta iai. Na iloa lelei e Solomona, tusa pe na a’oa’oina lelei lona atalii, e iai lava le avanoa e ta’ita’i seseina ai e isi tagata. 

E iai mea tatou te a’oa’ia ai a tatou fanau ae e taumafai foi le lalolagi e tauanau ma faatosina i le fanau e o ese mai ai. I le tatou tauloto o le aso mai le Tusi Paia, o lo o lapata’i mai, ia ‘aua ne’i tatou valea i togafiti fa’a’ole’ole a Satani. E tatau i matua ona ave le latou fa’amuamua i tulaga uma o lo’o ave iai le fa’amuamua a le fanau. E leai se poto i le a’oa’o o lau fanau ona tu’ulafoa’i lea i le lalolagi e fa’aleaga i latou. Ae le gata i lea e tatau i matua ona ave le fanau i faapotopotoga e faaola ai o latou agaga ma tuuina iai lo latou malosi. Ia uuna’ia le fanau e avea ma vae ma lima i totonu o latou ‘aulotu fa’apea ma mafutaga e faitau tusi Kerisiano ma Tusi Paia ma faapotopotoga a kerisiano. E  lelei lava mea o loo faia i le a’oga, ae tatau i matua ona ave le fanau i mafutaga a le Ekalesia ma le au kerisiano. E le tatau ona fa’atuatuanai le ola fa’aleagaga o a tatou fanau, peitai ia a’oa’o le fanau ina ia fa’atupula’ia le mafutaga ma le Agaga Pa’ia ma latou faalogologo i lona leo, ma fa’atonutonu ai le mea e fai ma le mea e ‘alo ese ai, e tusa pe le o auai fa’atasi ma latou matua.

Afai o oe o se matua, ia fa’atalanoa lau fanau, e te silafia ai o latou loto ma mea o lo’o latou fa’atāuaina ma ave iai le faamuamua. O lo’o faapea mai Mataio 15: 11'E lē o le mea ‘ua tu‘u i le gutu e leaga ai le tagata, a o le mea e sau mai le gutu, o lea ‘ua leaga ai le tagata.” '

Talanoa i le fanau e uiga i mea uma ma so’o se mea lava, ina ia e faalogo i latou fa’amatalaga ma iloa ai mea o loo i latou loto. Ou te tatalo e te le faato’ilaloina i luma o le Atua ona o lau fanau, i le suafa o Iesu. E sili atu i le mafuta lelei i lau fanau, e matuā fa’atāuaina ona e mafuta atu i tagata ma mea eseese o lo’o iai lau fanau, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 17 IUNI 2024

(tusia e Pastor EA Adeboye)

Manatu Autu: Mafuta mai I latou 1 (Spend time with them 1).

Tauloto -Tusi Paia– Faataoto 17:6  ‘‘O le pale o toeaina, o fānau a latou fānau ia; o le fa‘amatagofie o le fānau, o latou tamā ia..”

Faitauga – Tusi Paia – Teuteronome 11:19-21

O se tulaga ogaoga i lenei augatupulaga, o matua ua matuā pisi tele i galuega ua faatalalē i latou fanau. O se tulaga matuā sese tele pe afai e tele atu le taimi o le tausi tama e mafuta ai ma tamaiti i lo matua. Fai mai le 1 Korinito 15:33, o lē feoa‘i ma ē amio leaga e leaga ai amio lelei. O le tagata e pito sili ona tele lona taimi e mafuta ai i lau fanau, e pito sili foi ona telē lo latou sao e a’oa’oina ai latou. Afai o oe o se matua, e te tali i le Atua i le faafaileleina o fanau ua ia foai ia te oe, ae le o le faase’e atu i seisi tagata. 

O nei aso, e pei ua tauva ulugalii po’o ai e tele atu tupe e na te maua. A ō atu tamā e faigaluega, e faigaluega foi tinā ae ua tuua tamaiti e aunoa ma le tausia lelei. O tama ma tina, e tatau ona faaavanoa taimi e tausi ma aoao tamaiti ua foai atu iai e le Atua. Fai mai le Salamo 127:3, o fanau o le tofi mai le Atua, I nisi faaupuga, a e tuua lenei lalolagi, o le finagalo o le Atua, e te tuua lau fanau na e tausia i lenei lalolagi, o lau fanau ma fanau faaleagaga. O matua ua tofia e le Atua e tausia ma vaaia fanau, ma a latou faaleagaina nei fanau, e latou maua le taui ma le tali mai le Atua. 

E iai taimi sa ou fiataalo soka ai ma tamaiti o le matou nuu a’o ou laitiiti, ae faafetai i le Atua, sa iai lou tina i le fale e na te tulia lava a’u e fai meaaoga. Sa ou faapea e ese ma le saua peitai sa ia tausia ma aoao a’u ua ou maua ai le malosiaga e faatuatuanai i mea faalavelave ae tulimatai le ausia o fuafuaga fa’ata’atitia o lo’u olaga. O lo’u fefe i lo’u tama pe a sasa a’u  na faatonutonuia lelei ai a’u a’o tuputupu a’e. O nisi tamaiti e amata ona tupu ae amio leaga ao nonofo faatasi ma matua. Peitai e tele ni tausaga ae faatoa iloa e matua nei amio, ma e oo atu i lea taimi, ua na o le alofa tunoa o le Atua e mafai ai ona toe suia. Afai o oe o se matua, aua e te soona pisi ae a’oa’o le fanau ua foai atu ia te oe. A e tuua lenei lalolagi, e leai se taua o le tele o taavale ma fale ia te oe, o le mea pito taua o le fanau e te tuua i le lalolagi nei. Fai mai leisi muagagana faa Aferika, ’Afai e te musu e atinae se tamaitiiti ona o loo e atinaeina le fale, o le tamaitiiti e te lei atinaeina o le a faatauina atu le fale na e atina’eina’. Afai o oe o se matua, o le fanau na foai atu e le Atua e tatau ona ave iai le faamuamua, ae le o le oa ma le tamaoaiga. O le a le telē o le taimi o lo’o e mafuta ai ma lau fanau? I le suafa o Iesu, Amene. 

OPEN HEAVENS

MATALA LE LAGI MO LE ASO SA 16 IUNI 2024

(tusia e Pastor EA Adeboye)

Manatu Autu: Faamanuiaga a Tama (The Father’s blessing).

Tauloto -Tusi Paia– Kenese 49:26  ‘‘O manuia o lou tamā ‘ua sili lava ia i manuia o o‘u tupuga, ‘ua o‘o i le tuā‘oi lava o mauga o le vavau; e o‘o pea lava ia i luga o le ulu o Iosefa,ma le tumua‘i o lē na sili i ona uso.”.

Faitauga – Tusi Paia – Kenese 27:27-40

O le tamā e tele ma malosi lona sao i le olaga ma le taunuuga o lana fanau. So’o se tama/teine poto, e na te saili e lē aunoa faamanuiaga a lona tamā na fanau mai ai ma lona tamā fa’aleagaga. O le mafuaaga lenā e tatau ai lava ona e mafaufau i auala e faaosofia ai lou tamā e faamanuia ia te oe. Paga lea o nei aso o le tele o tagata ua tulituli na o oa o lenei lalolagi e maua mai o latou tamā ae seāseā mafaufau pe faafefea ona tupu a’e se loto fia faamanuia o latou tamā ia i latou.

O se tasi aso, faatoa o’u fo’i mai i se malaga, ma e toalua ni fanau fa’aleagaga ia te a’u na omai faafeiloa’i a’u. O lē na muamua ma feiloai sa na o le faatalofa mai ia te a’u, o le isi ma soso’o mai na ia faasasa’o ma aumai a’u ato, o le taimi lava lea na o’u faapea atu ai iā te ia, “Faamanuia le Atua ia te oe.” Na fai mai le atalii muamua, “Tamā e te le’i fai mai, ‘Ia Fa’amanuia le Atua ia te a’u.” Sa o’u tali, “O le a se mea na e faia mo a’u? Na e vaai mai o amo mai a’u ato a e te le’i fesoasoani mai.” Afai e te mana’o e faamanuia atu lou tamā ia te oe, e tatau ona e sauni e fai se mea e fia fa’amanuia atu ai lou tamā.

O le tasi mea taua e uiga I le faamanuia a le tamā, e lē mafai ona toe aveesea. E ui na iloa mulimuliane e Isaako ua ia faamanuia iā Iakopo ae lē o Esau, e le’i mafai ona ia toe liliua lana faamanuia (Kenese 27:33). O le mafuaaga lea e tatau ai ona e saili le faamanuiaga mai lou tamā i so’o se ala e te maua.

O le taimi e faamanuia ai lou tamā ia te oe, ua e manuia e faavavau. Peita’i e eseese faamanuiaga. O isi faamanuia e fai mai le agaga, o isi e mai le loto ma isi ua na o le fofoga. Ina ua mana’o Isaako e faamanuia iā Esau, na ia fai i lona atalii e sauni le taumafa sa sili ona fiafia i ai, se’i tausami ai ona ia faamanuia atu lea ia te ia ma lona agaga atoa (Kenese 27:4).

E mafai ona faamanuia se tamā i lana fanau e to’atolu, ae sili atu le manuia o le tasi mai le isi toalua ona e sili atu le alofa I ai o le tamā. O le a le tele o le alofa o lou tamā ia te oe? E fai ma au masani lou fa’afiafia i lou tamā ia tatalo ai mo oe, po o oe o se atalii poo se afafine e fa’atigā i lona loto i aso uma? O nisi e seāseā avea ni tupe I nai o latou mātua matutua, o isi e tau lē vili i ai a’o isi e matua’i lē o a e asi. Atonu ua matutua ma vaivai i latou peita’i o a latou faamanuia ma fetu’u e tumau pea le ogaoga. Po’o le a lava lau o lo’o fai, faamautinoa e te maua ni faamanuiaga sautualasi mai lou tamā a’o soifua pea o ia. Fai nei se galuega lelei mo lou tamā ia faaosofia ai e faamanuia ia te oe. Afai o oe o se tamā, faapotopoto lau fanau ma faamanuia ia i latou ma lou loto atoa. I le suafa o Iesu. Amene.