OPEN HEAVENS

MATALA LE LAGI MO LE ASO LUA 17 OKETOPA 2023

Manatu Autu: O oe o se kerisiano fou pe ua tuai ma leva? (Are you a fresh or stale Christian?)

Tauloto – Mataio 18:3 ‘‘ua fa‘apea atu, “E moni, ‘ou te fai atu ‘iā te ‘outou, a lē liua ‘outou ma ‘avea ‘ia pei o tamaiti, tou te lē sao lava i le mālō o le lagi.....”

Faitauga - Tusi Paia: Mataio 18:1-6

Upu Folafola

Afai sauniga fa’aevagelia e manumaloina agaga mo le Atua, o vaega pito matagofie o le Tusi Pa’ia e masani ona laugaina ia taitaiina mai ai ē e le’i fanaufouina, ia manumaloina o latou agaga mo Iesu. E masani ona folafola e le failauga, afai latou te o mai ia Iesu Keriso o le a latou maua le fa’amalologa, o le togiolaina o latou agasala, o le sa’olotoga, e siitia o latou tulaga ma isi tulaga faapena, ma e moni uma nei fa’amatalaga. O le taimi latou te tuuina atu ai o latou ola mo Keriso, ua avea ai i latou ma Kerisiano fou. O Kerisiano fou la e mana’omia ona fa’aauau pea le tulaga faafouina i taimi uma e pei ona tatou faitau ai i le tusi faitau mai le Tusi Paia o le asō. Ioe, o ē fou I le faaolataga, e pepe ā o latou kerisiano ma e tatau ona tuputupu ane e avea ma kerisiano matutua, ae le tatau ona ave’esea lo latou faafouina ia Keriso, ma e manaomia le fa’afouina pea o latou mafaufau. (Roma 2:12)

E anoanoa’I lava foliga vaaia o kerisiano fou. O le tulaga muamua, o le galala ma le naunau e malamalama I le upu a le Atua (1Peteru 2:2). O tagata faato’a faaolaina ia Keriso ,e le taitai faifaiaga I mafutaga a le ‘au Kerisiano. E masani ona va’aia lo latou nonofo pito i luma I sauniga, ina ia leai se isi e fa’alavelave ona latou te naunau I le upu a le Atua. Ae paga lea, e molimauina tagata ua leva ona fa’aolaina, ua galo ia I latou le latou naunauta’iga I le upu sa iai muamua. Afai ua e matua I le faaolataga, e tatau ona siitia atu lou tulaga i mea ‘ai a’ano, ae peita’i e to’atele nisi latou te le ‘ausia lea tulaga ma ua manogi leva, e ui e latou te faapea mai ua matutua I le faaolataga. E avea le tagata ma kerisiano ua manogi leva, pe afai ua le toe fafagaina lona tagata i le upu o le Atua i aso uma.

Le ‘au pele, afai e le o toe lava sou taimi e suesue, sa’iliili ma fafaga lou agaga i le Tusi Pa’ia i aso uma, e fa’asolosolo lemu atu lava ona avea oe o se Kerisiano ua manogi leva.  Se’i vagana ua e toe mauaina le gālala ma amata ona fafagaina lou tagata i le upu o le Atua i aso uma, o lona uiga o oe o se kersiano ua vaivai o le a oti.

O le isi uiga vaaia o Kerisiano e fou, e lē mapu lo latou talanoa ma molimau atu Iesu i isi tagata. E matuā leai se matamuli pe māasiasi e ta’u le suafa o Keriso. A o le Kerisano ua tuai ma manogi leva, ua manatu ane, ua le tatau ia te ia ona toe lauga atu le tala lelei i so’o se tagata, ma ua galo ia te ia le fa’atonuga a Iesu I le Mareko 16:15 ma lana lapata’iga i le tusi o Mataio 10:33. O le tulaga faafouina ma le tulaga ua manogi leva, e le fua i le umi o le taimi talu ona e fa’aolaina, ae e fua i ou uiga va’aia ma lou faatauaina o mataupu tau i le Atua. O anafea na gata ai ona e manumaloina se agaga mo Keriso? I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 16 OKETOPA 2023

Manatu Autu: Alofa tunoa moni. (Real grace)

Tauloto – Roma 6:14 ‘‘Auā e lē pule le agasala ‘iā te ‘outou; auā ‘ua ‘outou lē nonofo i le tulafono, a o le alofa tunoa....”

Faitauga - Tusi Paia: Tito 2:11-12

Upu Folafola

E toatele failauga o le Tusi Paia I aso nei e faapea mai a faaolaina loa le tagata, ua faaolaina e faavavau, o lona uiga e alu lea tagata I le lagi tusa pe ola pea I le agasala. E matua pepelo lea manatu. Fai mai la’u Tusi Paia I le Roma 6:15 O lenei, pe fa‘apefea? Tatou te agasala ‘ea, ‘ina ‘ua tatou lē nonofo i le tulafono, a o le alofa tunoa? ‘Aua ne‘i fa‘apea.

O le alofa tunoa e faaaupegaina I tatou e ola faapaiaina ae lē o le faatagaina e faia pea le agasala. O le tulaga e faia e le alofa tunoa e na te avatu le malosiaga e mafai ai ona e ola e tetee atu i mea e manao ai lou tino e faia. Ua faaolaina oe e le alofa tunoa (Efeso 2:4-5). A maea lea, o le alofa tunoa na taitaiina mai oe I le faaolataga, e a’oa’oina oe e ola faapaiaina. 11Auā o le alofa tunoa o le Atua ‘ua ‘aumai ai le fa‘aolataga, ‘ua fa‘aalia mai lea i tagata uma lava. 12O lo‘o a‘oa‘o mai ai ‘iā te i tatou, ‘ia tatou tēte‘a ‘ese ma le fa‘alēmata‘u ‘atoa ma tu‘inanau fa‘alelalolagi, a ‘ia tatou nonofo ma le fa‘autauta ma le amiotonu ‘atoa ma le amio Atua i lenei olaga (Tito 2:11-12). O le galuega moni lea a le alofa tunoa o lo’o talanoa mai ai le Tusi Paia. 

9o lē na fa‘aola mai ‘iā i tatou, ma vala‘au mai i le vala‘au pa‘ia, e lē tusa ma a tatou galuega, ‘ae tusa ma lona lava finagalo ma lona alofa tunoa na foa‘iina mai ‘iā i tatou ‘iā Keriso Iesu talu mai le vavau. (2 Timoteo 1:9)

Faamolemole aua e te amanaiaina so’o se tagata e fai atu ia te oe o le alofa tunoa o le Atua e faataga ai oe e faia pea le agasala. O se feau lena mai le tiapolo, o lo’o afifi faalelei mai e auina atu ai tagata I seoli. E iloa lelei e le tiapolo e leai se tagata agasala e ulufale I le lagi I le ola e faavavau, ma o lea ua ia tusia ai ma le faaeteete lenei feau mo kerisiano ina ia mautinoa e latou te faia pea le agasala tusa pe ua talia le valaau o Iesu I o latou olaga, peitai e le manumalo satani ia te oe, I le suafa o Iesu. 

E toatele tagata maualuluga I le galuega a le Atua e matou te finau I le mataupu lenei, o so’o se taimi ou te fai ai lava iai latou, ‘a faapea la e sa’o outou, a talia loa ma tuuina atu lou ola ia Iesu Keriso, e mautinoa le lagi tusa pe ou te faia pea le agasala. O lona uiga a o’o mai le siitiaga pe maliu foi, e ta te o uma I le lagi. Peitai, afai e sese lau mau ae o’o mai le siitiaga pe maliu foi, ou te alu I le lagi ae alu oe I seoli. I nei mea e lua, e sili atu lou filifilia o le ala e mautinoa e sefe ai a’u’. Ae faapefea oe? O le alofa tunoa e maua ai le malosiaga e ola e tetee I le agasala ae lē o le faatagaina e faia pea le agasala, I le suafa o Iesu, Amene. 

OPEN HEAVENS

MATALA LE LAGI MO LE ASO SA 15 OKETOPA 2023

Manatu Autu: O le Nuu o puapuagā e lē gata. (The Land of Endless Sufferings)

Tauloto – Mataio 13:42 ‘‘E lafoina i latou i totonu o le ‘ogāumu ‘a‘asa; e i ai le tagiauē ma le lilivau o nifo...”

Faitauga - Tusi Paia: Mataio 13:24-30, 36-43

Upu Folafola

O i latou e lē sao atu I le Aai o le Atua e i’u I le isi nofoaga e lē mafai ona o’u fa’amatalaina o se aai. Ou te faapea atu o le nofoaga o puapuaga e faavavau auā o se nofoaga o le tagiaue ma le lilivau o nifo, fefe ma le tetemū e lē mafai ona fa’amatalaina i ni upu. O i latou uma e i lenei nofoaga pogisa e lē mapu le oi ma le tigā e faavavau. O le nofoaga e faaigoa o le afi o kena (Mareko 9:47). O le tulaga muamua e ao ona e iloa i le afi I seoli, o se nofoaga o le pologa ma le fa’afanoga e faavavau. O loo fa’amatala mai i le Luka 16:23 se tamā na i’u I seoli e faapea, “Ua i seoli ua fa’ataugaina, ona tepa a’e ai lea o ia, ua na iloa mamao atu ia Aperaamo ma Lasalo i lona fatafata.”

O i latou uma e i seoli e faataugāina faasoloatoa e aunoa ma se mapusaga. I le Mareko 9:48 o loo fa’ailoa mai ai e Iesu nisi o puapuagā ma tigā e o’o iā i latou. “ o i ai e lē mamate o latou ilo, e lē tineia fo’i le afi.”

E lē o faapea mai le tusi “o le ilo” e lē mate, a o loo fai mai “o latou ilo.” I se isi faaupuga, o ilo e omai mai tino o i latou o loo i seoli, ma o ilo e lē mafai ona faaumatia e feola pea, ma aai mai i tino o i latou o loo tagiaue i seoli. O le afi fo’i e lē mate e ola pea ma susunuina ai pea i latou o i seoli i taimi uma ma aso uma. Ua faapea mai Iesu i le Mataio 25:41, o le afi e faavavau. Fai mai Fa’aaliga 14:11, “ o le asu fo’i o lo latou puapuagā e alu a’e e faavavau faavavau lavā; latou te lē maua fo’i se filemu i le ao ma le po o e ua ifo I le manu feai ma lona faatagata ma se na te talia le faailoga o lona igoa.” O se tasi o moomooga e oi pea i ai i latou o mu i le afi i seoli, o sina matāua o le suāvai se’i fa’amalūlū a’i o latou laulaufaiva I le mumū o le afi (Luka 16:24). E leai se miti fa’afefe tagata e mafai ona latalata pe faatusa i le mata’utia o le afi e lē mate i seoli.

E tele Tusi o le Afioga Paia a le Atua o loo faamatala ai e Iesu seoli o se nofoaga e i ai le tagiaue ma le lilivau o nifo. Afai e faapea mai o le mata’utia o le mamafa o le puapuagā ua mafua ai le tagiaue ma le uiō, aisea la e lilivau ai o latou nifo? O le lilivau o nifo o se tulaga e o’o i ai le tagata pe a salamō i sana mea na fai. O tagata e o i seoli e lilivau o latou nifo e o’o i le faavavau, i le salamō latou te le’i ola i ala o le Atua a’o i le lalolagi ma maua le mānava ola. O oe o loo e i le lalolagi ma o loo maua pea le avanoa o loo mo’omo’o i ai i latou o i seoli ia latou toe maua. O loo i ai lou avanoa e te salamō ai ma toe amata se amataga fou. Salamō nei loa I au agasala, tu’u lou ola iā Iesu Keriso ma amata ola faapaiaina nei loa, manū o i ai pea le avanoa. Afai e te fa’atuai ma i’u ina misi le avanoa e te toe manatua lenei faamalosi’au a ua e i seoli, ma e toe faapea ifo maimau pe a na toe maua sou avanoa, a ua tuai. Filifili ma le poto. E te lavatia puapuaga ma le fa’afanoga I seoli? Ua e malie e te i’u I seoli ona o le agasala o loo e faia pea? Tu’u ne’i loa, salamō ma liliu I le Atua e te ola ai, na te lē tulia oe, manū o i ai pea le avanoa. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 14 OKETOPA 2023

Manatu Autu: O le Aai e leai se La (The City Without A Sun)

Tauloto – Faaaliga 21:23 ‘‘E lē aogā fo‘i i le ‘a‘ai ‘ona pupula i ai o le lā, po o le masina; auā o le pupula o le Atua ‘ua fa‘amalamalamaina ai ia, o le Tama‘i Mamoe fo‘i o lona molī lea..”

Faitauga - Tusi Paia: Isaia 60:17-21

Upu Folafola

O le faaopoopoga lenei i le aai pupula na o’u faamatala atu ananafi. E ese mai faamanuiaga fa’a le tino ma le mafaufau o lou i ai i lenā aai, a’o le tau fo’i e atoatoa le lelei. E lē malulū tele pe vevela; e lelei atoatoa mea uma. O le mea moni, o le vevela o le la o loo e mafatia ai i lalo nei e te lē toe lagona aua e leai se la i le Aai. O le pupula o le Atua e faamalamalamaina ai le aai, e pei o la tatou upu tauloto mai le Tusi Paia o le asō.

Mafaufau I se nofoaga e lelei atoatoa ai mea uma e o’o I le tau. O se aai e leai se mea e faaletonu. I le aai lenei, o meaola o loo o tatou fefefe ai i le taimi nei ma faaigoa o manu ai vao, tatou te lē toe fefefe ai. Ua faapea mai Isaia 11:6-8 “E nofo faatasi le luko ma le tama’i mamoe, e taoto fo’i le nameri faatasi ma le tama’i ‘oti; e faatasi fo’i le tama’i povi ma le leona ta’anoa atoa ma le manu peti, e ta’ita’iina fo’i i latou e le tama itiiti. E aai faatasi le povi fafine ma le urosa, e taooto faatasi a la’ua tama; e ai fo’i e le leona ‘au o saito pei o le povi. E taalo fo’i le tama e le’i te’a ma le susu i le lua o le asipi, o le tama fo’i ua te’a ma le susu, e tu’u e ia lona lima i le lua o le gata uogo.”

O le aai lenei e tatau lava ona e taumafai i le mea e gata ai lou mafai ia e o’o i ai, ma avea ma ou nofoaga e faavavau. O le ala lea na fetalai ai Iesu I le Mataio 8:36 “Auā se a le aoga i le tagata pe afai na te maua le lalolagi uma, ae māumau lona ola?” Auā fo’i o mea uma i lenei lalolagi e leai ma se tāua pe a fa’atusatusa i le matagofie o le aai o le Atua. Aua ne’i i ai se mea e faalavelave pe taofia oe mai lou ulufale atu i le aai o loo tausinio i ai le au Kerisiano. Ia e matua’i naunau e te maua le lagi, afai e faalavelave lou lima tipi ese (tulou). Afai fo’i e te tausua’i i lou mata, inā sali ese ia(Mataio 18:9). 

Le au Pele e, ia e ‘alo’alo mamao ese mai le agasala ina ia e sao atu i le nuu pupula e faavavau. E tatau lou fa’a taulaga o mea uma o iā te oe i le asō ina ia e taunuu i lenei aai. Aua ne’i avea tupe, lauiloa, malosi ma le tamāoaiga e taofia oe mai lou ulufale atu i le lagi. E leai se mea o lenei lalolagi e sili atu pe faatusalia I le olioli saga e te maua pe a e maua le nuu Paia ma le matagofie o loo afio ai le Alii lou Atua o ia lava o le malamalama o le Lagi le Aai Pupula. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 13 OKETOPA 2023

Manatu Autu: O le Aai e fai I le auro ona auala (The City with streets of gold)

Tauloto – Ioane 14:2 ‘‘E tele mea e nonofo ai i le maota o lo‘u Tamā; ‘ana leai, ‘ua ‘ou fai atu ‘iā te ‘outou; ‘ou te alu e sauni se mea e nonofo ai ‘outou...”

Faitauga - Tusi Paia: Faaaliga 21:1-27

Upu Folafola

E tele naua taulaga tetele ma aai matagofie I lenei lalolagi. E iai taulaga o le mama ia o latou auala, o nofoaga e tafafao ai tagata e mama ma lelei atoatoa faapea taavale taugata ma le matagofie e feoai ai tagata. E tusa po’o le a le aulelei ma matagofie o nei aai ma taulaga, e iai se aai e sili mamao atu lona matagofie e peiseai o ni aai matitiva nei aai matagofie I le lalolagi pe a faatusa iai. 

I lenei aai, o ona auala e faia I le auro maoi lelei e pei o tioata manino (Faaaliga 21:21). O teuga auro uma e pito taugata ma feilafi o loo teteu ai tagata ma faalialia I le lalolagi nei, e le taitai ona faatusa lona lelei I le auro o le a tatou savavali ai luga I le aai lea. O loo manino, e leai se mativa I lenei aai. I lenei aai, e le toe oi ma pologa I se mea. O le malo I lenei aai, e matua filigā ma lelei ana pulega e leai se mea e oge ma mativa ai seisi. O le mea moni o le tagata pito mativa I lea aai, e nofo I lona maota tele. O lo’o matua faamanino mai lea tulaga I le tatou tauloto mai le Tusi Paia. O lenei aai tele o se aai e mauoloa ma mamalu e leai seisi e le fia nofo ai. 

E le gata e saunia uma e le malo mea e manaomia e tagatanuu uma o le aai, e latou te saunia foi tulaga uma e faafiafia ai lagona o tagata:  4E sōloi‘esea fo‘i e le Atua loimata uma i o latou mata, e leai fo‘i se toe oti, po o se fa‘anoanoa, po o se auē, e leai fo‘i se toe puapuagā auā ‘ua mavae atu mea muamua.” Faaaliga 21:4

E pau lea o le aai ou te faia mea uma ia ou alu iai. E faapefea ona avea se tagata ma ona tagatanuu? Fai mai le Faaaliga 21:27 e faapea:  27E lē sao atu lava i ai se mea leaga e tasi, po o sē na te faia se mea ‘inosia, po o sē pepelo; na o i latou lava ē ‘ua tusia i le tusi o le ola a le Tama‘i Mamoe.

Ina ia faamautinoa o loo tusia lou igoa I le tusi o le ola a le Tamai mamoe, e tatau ona lafoai lou ola ia Iesu ma talia o ia e avea ma ou Alii ma Faaola, ona e ola faapaiaina lea mo lou olaga atoa, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 12 OKETOPA 2023

Manatu Autu: O le Ala pe a  ua leai seisi ala (The Way where there is no way)

Tauloto – Mataio 19:26 ‘‘Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”

Faitauga - Tusi Paia: Esoto 14:9-31

Upu Folafola

O Iesu o le Ala lea, ma e leai lava seisi ala. O loo faamatala mai i le tusi a Ioane 11:39-44 le tala ia Lasalo. Faapea, na maliu o ia ma na lagomau mo aso e 4. Ina ua taunuu atu Iesu ma ona soo i le tuugamau ma Ia faatonu ia fuli ese le maa, ae na fai ane le tuafafine o Lasalo ia Iesu, ua tuai tele. Ua ia mautinoa, ana taunuu ane Iesu a o leʻi maliu lona tuagane, semanū e mafai ona faamālōlōina o ia e Iesu. O lana faamatalaga foʻi e atagia mai ai, ni ona lagona e uiga iā Iesu, faapea, ana taunuu atu o ia ina ua faatoʻā maliu lona tuagane e pei o le tulaga o le afafine o Iairo, ae leʻi lagomau e pei o le tama a le fafine o Naina ua oti lana tane, semanū e mafai e Iesu ona faatūina Lasalo mai le oti, ae peitai ua maliu lona tuagane, ma ua maea foi ona tanu mo le 4 aso, ua leai seisi ala. Peitai, o Iesu Keriso, le Ala pe a ua leai lava se isi Ala, ua na o lona faatonu lava e fuli ese le maa, ma valaau loa ia Lasalo, e sau I fafo mai le tuugamau.

Sa i ai se tasi o o’u atalii, e aumau I se atunuu sa ou asiasi i ai. Na ou faamoemoe e vaai ia te ia i le malae vaalele, ae e le’I oo ane. Sa ou fesili atu mo ia, ae na taʻu mai, o loʻo i le falemaʻi, ua vaivai. Na ou alu e vaai i le falemai ae na ave a’u i se Vaega o le falemai faapitoa lea sa taofia ai, ona o ni tulaga ua leai se faamoemoe mo lona soifua – o le vaega lea mo tagata ua mautinoa e le o toe mamao ona maliliu lea. Sa ou tatalo mo ia i lena Aso Toonai ma e o’o atu i le Aso Lulu na sosoo ai, ua te'a I tua lo'u atalii, ua atoatoa foi lona malosi. O tagata uma foi i lena Vaega o le falemai, na malolo uma, ua malolosi ma ua tetea uma I tua i lena lava aso.

E I ai le taimi e silasila ai tagata i ala uma o loʻo i ona luma, ae peitai, e leai se tasi o na ala e foliga mai o se auala e  fofo ai ona faafitauli. Pau lava le tagata e mafai ona foia ai nei faigata, o Iesu. A o iai le fanauga a Isaraelu i le va o le Sami Ulaula ma le ʻautau a Aikupito, i se vaaiga faaletagata, e matua leai se filifiliga saʻo e mafai ona fai. E feoti uma i latou pe a liliu e tau ma Aikupito aua e leai ni o latou tomai ma agavaa faafitafita po’o ni auupega. Ua I o latou luma le sami ulaula ma e leai se fesili mo le agai i luma. Na manino lava o lo latou taunuuga, ua i aao o Farao, peitai o le taimi lea ae le’i afio atu ‘Le Ala’. O le taimi lava na augani atu ai Mose i le Atua e laveai I latou, na saunia e le Atua le ala, e ui ina ua leai seisi ala, ma ua faaumatia uma ai Aikupito.

Tuu atu lou ola atoa mo Iesu ma valaau atu ia te Ia na te faia se ala mo oe,  i le mea ua leai lava se ala, ma o le a Ia tali atu ia te oe, I le suafa o Iesu, Amene.

OPEN HEAVENS

MATALA LE LAGI MO LE ASO LULU 11 OKETOPA 2023

Manatu Autu: O le Ala I Luga 2 (The Way Up 2)

Tauloto – Efeso 2:6 ‘Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi..’

Faitauga - Tusi Paia: Ioane 14:1-6

Upu Folafola

I le faitauga o le Tusi Paia o le aso, na folafola e Iesu e toe afio mai e avatu ia tatou I le nofoaga o afio ai. O le fesili, o fea o iai o ia? Na iloa atu e le au so’o o ia ao afio a’e I le lagi ma o loo faamauina lea I le Galuega 1:9-10 e faapea: ‘9‘Ua fetalai atu o ia i ia mea, ‘ona si‘itia lea o ia, a o latou o va‘ava‘ai atu; ‘ua ‘avea fo‘i o ia i le ao nai o latou luma. 10‘Ua latou tulimata‘i a‘e i le lagi, a o afio a‘e o ia, fa‘auta fo‘i, o tagata e to‘alua ‘ua tutū mai ‘iā te i latou ma ‘ofu sisina.  

O lo’o manino na afio a’e ma siitia Iesu I le lagi. Na fetalai Iesu I le Ioane 14:6 e leai seisi e oo atu I le Tama vagana pe a ui atu ia te ia. E manino lelei. E toatele tagata e fai mai e tele ala I le lagi, e pepelo tele ia manatu. E na o Iesu le ala I le lagi. E leai se talitonuga poo se lotu I fafo o Iesu Keriso e mafai ai ona e alu I le lagi. 

O lenei, o ai I latou e mafai e Iesu Keriso ona ave I luga I le lagi pe a tuua le lalolagi nei? Fai mai le Efeso 5:27: ‘ ina ‘ia na tu‘uina atu o ia, ‘iā te ia, o le ekalesia matagofie lava, e leai sona ila, po o se ma‘anuminumi, po o se tasi mea fa‘apenā, a ‘ia pa‘ia ma ‘ia lē ponā. E pau tagata e ave e Iesu I le lagi e mau ma ia o I latou e leai se ila po’o se maanuminumi. Afai e leai se ola faapaiaina, e le avea oe e Iesu I le lagi pe a tuua le lalolagi nei, e pau le isi nofoaga o lo’o iai o Seoli. 

E toatele tagata o lo’o valaau I le suafa o Iesu I le taimi nei, ae e oo atu I le taimi e moeiini ai o latou fofoga mai lenei lalolagi, e tetei ane I Seoli. O lou toaga i le lotu e le o se auala lea e faamautinoa ai lou nofoaga I le lagi, o lou galue punouai I le galuega a le Atua po’o le avea foi ma faifeau e lē o tapulaa ia e maua ai le lagi. Ua na o se mafutaga vavalalata ma Iesu Keriso, le ala I luga, e mafai ai ona faamautinoa lou ulufale atu I le lagi. O le nofoaga e te iai e faavavau e le faataalo iai seisi. O nisi o le a mafuta I le ola e faavavau ma Iesu keriso ma ana agelu ma maua le fiafia e faavavau, a’o nisi o le a iai I le lepa afi e faavavau ma le tiapolo ma ana temoni ma matua puapuaga e faavavau. Ua o’o I le taimi e taofia ai le ola faafoliga ae lafoai atoatoa lou ola ia Iesu. Ua tatau ona tuu ese le mapo lotu ae faaolaola le mafutaga vavalalata ma Iesu Keriso. Ua o’o I le taiumi e taofia ai le kerisiano na o le Aso Sa, ae ia avea lou olaga e atagia ai Iesu. Ua o’o I le taimi e saunia ai mo le lagi mai lou loto atoa. Afai e valaau le Alii I lou ola I le aso, o fea e te ono alu iai, o le lagi po’o seoli? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 10 OKETOPA 2023

Manatu Autu: O le Ala I Luga 1 (The Way Up 1)

Tauloto – Salamo 3:3 ‘A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.’

Faitauga - Tusi Paia: 1 Samuelu 2:7-9

Upu Folafola

O Iesu le Ala e aga’i ai i luga.  Sa ia fetalai i le Ioane 12:32 “O a’u foi, afai e siitia au ai le eleele, ou te tosina uma mai tagata ia te a’u.” E masani Iesu I le tosina mai o tagata ia agai i luga. Talitonu mai ma le faamaoni e tasi lava le tagata e mafai ona siitia lou tulaga, ua na o Iesu Keriso, ae afai e te le talitonu iai, faitau le Salamo 75:6-7;

“6Auā e lē o sasa‘e po o sisifo, po o le vao e i ai mauga, 7a o le Atua na te fa‘amasinoina, o ia na te fa‘amaulaloina le tasi, o ia fo‘i na te fa‘aeaina i luga le tasi..”

O le Atua na te faaeaina le tagata. Afai e faaeaina oe e se tagata, o le tagata foi e toe aumaia oe i lalo. A o le mea moni, e anoanoa’i pa puipui e taofiofi ai le tagata. E mafai ona taumafai se tagata e faaeaina oe, ae faapefea pe afai e faamalolo o ia mai le galuega ae lei faatinoina lana folafolaga? Ae e iai seisi na faapea atu ia te oe, o le a ola umi pea lena tagata I le taimi e te manaomia ai lana fesoasoani? E pau Le e mautinoa e maua ai lou aga’i i luga o le Atua. O le mafuaaga lena e na o ia le ala e agai ai I luga. 

A'o agai atu I lou 40 tausaga, na o’u maua se faaaliga mai le Atua, o ni kalafi se lua faamatematika. O le kalafi muamua e alu I luga, ao le lona lua e alu I lalo ae I le ogatotonu o nei kalafi pe a feliuai, o loo tusia ai le numera 40.  Sa ou manino lelei i le uiga o le 40, o lo’u aso fanau. Ona fesili mai lea o le Atua ia te a’u: “O fea o ia kalafi e  te manao iai?”Sa ou filifilia le pito maualalo aua o lona uiga o lo’o ou iai I le tulaga pito maualalo I le 40 o ou Tausaga, ma o le a faasolo atu le agai I luga i le lumanai. E sili atu lea I lo leisi kalafi o loo faaalia ai ua ou  ‘ausia le tulaga pito maualuga i lo’u  40 tausaga, o lona uiga  o le a gata ai iina le tulaga ou te ‘ausia. Ona faapea mai lea o le Alii, afai ou te loto e siitia pea a’u e ia, e tatau ona ou faamatuu ese ou mau tofi e faalagilagi ai a’u ae ia tau lava o le faalupega o le ‘faifeau’. E moni lava lana upu aua na amata mai lea aso, o lo’o ia siitia pea a’u I luga. 

O le loto maulalo le ki tatala mo so’o se tasi o naunau e faaeaina ma siitia pea o ia i lugā e Iesu Keriso. Fai mai le Tusi Paia I le 1 Peteru 5:6 “O le mea lea, ia fa’amaulalo ai outou i lalo o le a’ao malosi o le Atua, ina ia fa’amaualugaina outou e ia i ona po e tatau ai.”

Afai e te naunau e faaeaina oe e le Atua e sili atu I lau tupulaga, e ao ona tu’uina atu lou ola ia Iesu Keriso, ma fa’ataitai i lona loto maualalo.  O Iesu le ala e agai ai i luga I le tulaga faaeaina, peitai, e na te siitia na’o e loto maualalo, I le suafa o Iesu, Amene. 

 OPEN HEAVENS

MATALA LE LAGI MO LE ASO GAFUA 9 OKETOPA 2023

Manatu Autu: O le Ala I Luma (The Way Forward)

Tauloto – Faataoto 4:18 ‘A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.’

Faitauga - Tusi Paia: Luka 5:1-7

Upu Folafola

O Iesu o le ala e agai ai I luma. I le Luka 5:1-7, sa fagota Peteru I le po atoa ae leai se i’a na maua. E le faapea e paie, ae ua avea o se tagata ua le ausia lona faamoemoega. Peitai ina ua oo atu Iesu I lona vaa, ua faafuase’I ona maua le ala I luma. E toatele tagata e pei o Peteru o lo’o tamilomilo solo lava I le mea e tasi. Afai e o’o atu Iesu I lou vaa, o le a faavavevave lou agai atu I luma. 

Na sau se tasi o o’u atalii ma faapea mai, ‘Tama o lo’o tumau pea lo’u tulaga mo le 12 tausaga. O lenei ua ou tusi talosaga mo se avanoa I se tasi o fale faigaluega ma o lea ua maua se avanoa e faatalatalanoa ai, ma ou te manaomia ni tatalo ia manuia’. O le a amata ona ou tatalo mo ia ae faapea mai, ‘Leai, ou te le manao I se tatalo, tau lava o sau upu mo a’u’, ona ou faapea atu lea, ‘Alu, e I’u I le manuia lau faatalatalanoaga’. Na faapea mai, ‘Amene’. O le aso na soso’o ai na foi mai ma le fiafia ma faapea mai, ‘Tama, na matuā ou sauni mo le faatalatalanoaga, ae ou o’o atu, e na o le tolu lava fesili, o ai lou igoa? o le a le avanoa na e tusi talosaga ai? O afea e te fia amata ai?’. Ua ou faamalo atu ia te ia ae faapea mai, ‘toe aumai se isi upu mo a’u’ ma ua faapea ona fai. O le aso na sosoo ai na sau ma le gatete, ‘Tama, na ou usu atu I le galuega fou ae fai mai ua faamavae le pule sili ma ua fai mai o le a avea a’u ma pule sili.’ Na toe fai mai e toe avatu seisi au upu ma ua faapea ona faia. Na toe foi mai I le aso na sosoo au ma ua lē maugagana. ‘Tama ua latou iloa o le mafuaaga na faamavae ai le pule sili ona o le totogi o lea na latou faaluaina lou totogi ina ia taofia lo’u alu ese’.  Ua avatu iai la’u faamalo ae faapea mai e toe avatu seisi upu mo ia. Ua ou ata ma faapea atu, ‘ua e manao ea e ave ma oe le pisinisi mai ē e ona?’. 

A'o avea au ma faiaoga I le Iuvesite, sa iai sa’u avetaavale ma e masani e o’o atu I le afa o le masina ua matua leai ma sa’u tupe e oo I le penisini o le taavale ou te alu aitalafu mai se tupe mai la’u avetaavale sei utu ai. Sa lelei lo’u totogi na iai ae peitai sa foliga mai e leai se alu I luma. Ae ina ua ou fetaiai ma Keriso, na liua mea uma I le lelei ma le manuia, e le faapea o so’u poto, ae ona ua lafoai lou ola ia Keriso ma ua ou ola faapaiaina. E mafai foi ona avea lenei tulaga mo oe pe afai e te faia le mea na ou faia. Afai e iai Iesu I lou vaa, e mautinoa le maua o le manuia, I le suafa o Iesu, Amene. 

OPEN HEAVENS

MATALA LE LAGI MO LE ASO SA 8 OKETOPA 2023

Manatu Autu: O le Ala I fafo (The Way out)

Tauloto – Esoto 6:6 ‘O lenei, fai atu i le fānauga a Isaraelu, ‘O a‘u o le ALI‘I, ‘ou te ‘aumaia ‘outou i lalo o avega mamafa a Aikupito; ‘ou te lavea‘i mai fo‘i ‘iā te ‘outou a‘i a latou galuega, ‘ou te fa‘aolaina mai fo‘i ‘outou i le lima fa‘aloaloa ma sala tetele’

Faitauga - Tusi Paia: Luka 7:11-15

Upu Folafola

Auā o Iesu le Ala, e faapena fo’i ona ta’u mai ai o ia fo’i le Ala e alu ese ai mai faafitauli. E i ai faafitauli i le lalolagi e lē mafai ona e fō’ia tusa po’o le a lou poto. Peita’I o Iesu e leai se faafitauli na te lē mafaia. O Iesu Keriso le ala e ulufafo ai mai mafatiaga.

I la tatou Tusi Paia faitau o le asō o lo’o ta’u mai ai se fafine ua maliu lana tane, na oti lana tama. E lē tau ta’ua maia e se isi ia i tatou o lenei tinā sa tumu i le loto mafatia. O se fiafiaga I le tinā le aso na ia fanauina ai lana tama, mautinoa sa iā te ia le olioli peita’i na taumafai malosi le tiapolo e suia lona olioli i le faanoanoa ma manumalō ai ina ua fasiotia e le tiapolo lona toalua, ma fa’asolo atu ai i si ana tama e toatasi. Ou te mautinoa a’o fa’agāsolo toe sauniga o le atali’i ma aga’i atu i lona tuugamau, sa faapenā ona atili faateteleina le loto fa’avauvau o le tinā, auā sa iloa e lenei tinā o nisi o i latou o loo mulimuli atu ia te ia o loo faafoliga o tagi tu’i faatasi ma ia a’o loo faapea ifo i o latou loto, “Aisea ua tupu ai nei mea leaga ia te oe? Na o oe o e nofo I le taulaga? Atonu ua e faia se sesē I le Atua ua fa’asala ai oe,” peita’i na fetaia’i ma Iesu Keriso ma suia ai lona loto faavauvau I le fiafia. A’o e faitauina ma faalogologo I lenei faamalosi’au I le asō, ua tafiesea le faanoanoa mai lou olaga e faavavau I le suafa o Iesu.

Sa valaaulia a’u ou te lauga I se faatasiga i Ikoyi o se nuui Nigeria i ni tausaga ua mavae. Sa tu’u ou te lauga fa’atatau i le ulutala, “E te manaomia se vavega,” peita’i a’o o’u fa’atalitali i le potu malolō o le fale sa o’u nofo ai ma vaavaai i le matagofie o le fale, sa o’u manatu e sui le autū o la’u lauga e faapea, “E tatau i le tagata ona vivi’i i le Atua.” Sa o’u manatu o lē e ona le fale ma ana mālō e foliga mai ua latou maua uma mea latou te manaomia, peita’i na fetalai le Atua Silisiliese ia o’u talanoa ia i latou i le autū, “E te mana’omia se vavega.” Na o’u iloa mulimuli ane o le tama tama e toatasi a le fafine e malosi tele i fualaau fa’asāina. Ina ua musu lona tinā e ave I ai se tupe e faatau ai aisa, mariuana ma isi, na tago tu’u ni fualaau fa’asāina I totonu o le ato a lona tinā, ma a malaga i Lonetona ia maua ai lona tinā e leoleo i le malae vaalele. E foliga aulelei ma matagofie mea uma i fafo, a’o totonu, e fa’anoanoa.

O le aso lea a’o o’u lauga, na ofoina atu e le taulealea lona ola iā Iesu Keriso, mai le aso fo’i lea, na maua ai e le tinā o le taulealea lenei le olioli. Afai e te mana’o e iā te oe le olioli mo aso o totoe o lou soifua, ua na o Iesu Keriso le ala. Tu’u iā Iesu na te amoina lau avega (Mataio11:28). Ua na o Iesu e aumai ai le malologa mo le loto mafatia, peita’i ia ofoina atu muamua lou ola iā te ia. I le suafa o Iesu Keriso. Amene.