Samoan Devotional

OPEN HEAVENS

MATALA LE LAGI MO LE ASO TOONAI 25 ME 2024

(tusia e Pastor EA Adeboye)

Manatu Autu: Fa’amanuiaga o le iloa o Iesu (The benefits of knowing Jesus)

Tauloto -Tusi Paia– Tanielu 11:32  ‘'O ē agasala i le feagaiga e leaga i latou ‘iā te ia i fa‘aoleolega; a o le nu‘u o ē ‘ua iloa lo latou Atua latou te fa‘amalolosi ma fai mea tetele. '

Faitauga - Tusi Paia: Filipi 7:11

O le olioli e maua i le iloa o le Atua e lē ma faitaulia. Peita’i e lē na o le pau lea. O le olioli ua na se tasi o le tele o faamanuiaga e maua e i latou e fa’auō ma le Atua. Mai la tatou fuaiupu tauloto o le asō o le a e malamalama ai o i latou e iloa lo latou Atua e malolosi ma faia mea ofoofogia. O le Kerisiano e lē fefe i lu’itau o le olaga o aso uma. Ua fa’a’auupegaina oe e le Atua e fa’ato’ilalo so’ose faafitauli e te lua fetaia’i. Fai mai le Tusi Paia I le Tusi Roma 8:37: A ua tatou manumalō ai’ai i nei mea uma lava, ona o ia ua alofa mai iā te i tatou.

E lē gata i lea, o lou iloa o Iesu e te malosi ai e savali i le manumalō i aso uma ma maua ai le lototele e tau i le taimi o faafitauli (Fa’ataoto 28:1). E mafai e le fefe ona aveese le malosi o se uso, peita’i e lei aumaia e le Atua ia te oe le agaga o le fefe, a o le malosi, alofa ma le mafaufau lelei (2 Timoteo 1:7). O lou silafia o le Atua ma malamalama i lona alofa atoatoa mo oe e te mafaia ai ona soifua manumalo i le fefe. Fai mai le Tusi Paia I le tusi 1 Ioane 4:18;

“ E leai se fefe i le alofa, a o le alofa atoatoa e fa’ate’aeseina ai le fefe; auā e a le fa’asala le fefe; o le ua fefe, e lē fa’aatoatoaina o ia i le alofa.”

Ina ua uma ona fetaia’i Paulo ma le Alii, na faatumuima o ia i le olioli ina ua ia iloa le Atua moni ma ia tusia ai upu ua avea ma a tatou Tusi faitau o le asō, o lana ta’utinoga lea ma lona loto atoa, “ua na o Iesu lona ola atoa.”

E ui fo’i ina ua tupu ma fa’ateleina lona malamalama ma lona alofa i le Alii, na naunau pea ia saga iloa atili auā ua ia iloa o le tele o lona pipi’i i le Atua, o le tele lea o lona olioli, fa’atumulia, fa’amalieina ma le mautinoa o le ola e fa’avavau. Ou te tatalo ia e maua lea ituaiga olioli i le suafa o Iesu.

Le au pele e, o lou iloa o Iesu e tupu atili ai lou faatuatua ia te ia, o le fa’ateleina o lou faatuatua o le tele lea o lou fa’afiafia o le finagalo o le Atua. Fai mai le Tusi Paia i le Eperu 11:6; A leai fo’i se faatuatua e lē mafai ona o tatou fa’afiafia i le Atua. O le olioli ua maua le ola e faavavau e tupu mai lou iloa o Iesu. Fai mai Ioane 17:3;

O le ola faavavau fo’i lenei, ia latou iloa oe le Atua moni e to’atasi, atoa ma le ua e auina mai, o Iesu Keriso lea.

O le iloa o Iesu, o le iloa lea o le filemu auā o ia o le Perenise o le filemu (Isaia 9:6).O le masani lelei ma Iesu o le iloa lea o le manuia ma le tamāoaiga (Mataio 14;14-21, 2 Korinito 8:9). O le silafia fo’i o Iesu o le iloa lea o le fa’amalolōga fa’ale lagi aemaise le soifua maloloina (1 Peteru 2;24) o fa’amanuiaga uma nei, o manuia e te maua I lou iloa o lo tatou Fa’aola. Le au pele e, ua moni lou iloa o Iesu?

Tatalo

Tamā, faamolemole faailoa atili mai ia te a’u lou alo i aso uma o lo’u ola. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 24 ME 2024

(tusia e Pastor EA Adeboye)

Manatu Autu: Mana e manuia ai (Power to prosper)

Tauloto -Tusi Paia– Teuteronome 8:18  ‘A ‘ia e manatu i le ALI‘I lou Atua, auā o ia na te avatua ‘iā te oe le malosi e maua mai ai ‘oloa, ‘ina ‘ia fa‘atumauina ai e ia lana feagaiga na ia tautō ai i ou tamā, pei ‘ona fai i le aso nei'

Faitauga - Tusi Paia: Teuteronome 8:6-18

I le tauloto mai le Tusi Paia o le aso, o loo faaalia manino e le Atua, o ia o le puna o le mana e maua ai manuia faulai. O le faamanuiaga a le Atua e fa‘atamao‘āiga ai; na te lē fa‘aopoopo i ai se tigā. O I latou e fia maua le faamanuiaga o le tamaoaiga e aunoa ma le tiga, e tatau ona faalogo lelei I le ala I le tamaoaiga o loo tusia I le Upu a le Atua. O le faitauga mai le Tusi Paia o le aso, o lo’o aofia ai upu moni mai le Upu a le Atua e faasaoloto ai le agaga mai le saisaitiaga o le mativa. E finagalo lou tama I le lagi ia e manuia faulai, ma o le a tatou suesue i nisi o nei upu moni  I le aso. 

Muamua, na faaali e le Atua I le fanauga a Isaraelu o le laueleele ma le fanua ua ia foai iai latou ua maea saunia mo I latou mai le lagi. O lona uiga o le a fua mai le laueleele I fua lelei aua foi o le Atua ua saunia, ae le faapea ona o galuega ua latou faia. Na matua faamamafa e le Atua lenei itu, na faamatalaina e le Atua lenei laueleele faapea: ‘12O le nu‘u e tausia e le ALI‘I lou Atua, e lē aunoa ‘ona silasila i ai o le ALI‘I lou Atua, e āfua mai i le amataga o le tausaga e o‘o atu lava i le gata‘aga o le Tausaga (Teuteronome 11:12).

O lona uiga o le manuia I lenei lalolagi, e tatau ona e tilotilo ese mai le tulaga o le tamaoaiga I le atunuu o lo’o e iai ae taulai lau vaai I le tamaoaiga o le lagi, o loo tausia e le Atua matautia, mai le amataga o le Tausaga e o’o I le faaiuga o le Tausaga.

Mo le tulaga o le tamaoaiga o lou ola e o gatasi ma le tulafono a le lagi, e tatau ona e usitaia tulafono a le lagi. E toatele tagata e fiafia tele  I folafolaga o le feagaiga ma le Atua, peitai e latou te le ausia vaega e tatau ona latou faataunuuina, ma e iu ane, latou te le maua le atoatoa o nei folafolaga. E foai e le Atua iai latou ua taua o ia o Lē na faia I latou, o le Faaola, ma le Alii le mana e manuia ai. E te manatu ea I le Atua o ia na faia oe? E te ava ea ia Iesu Keriso o lou Faaola pe e te faatalalē i lona maliu, e ala i lou toe foi i le agasala e ui ua e faaolaina? E faamanuia le Atua ia te oe pe afai e te ava ia te ia o lou Atua moni. 

O le aso, o loo ia fesili lenei fesili ia te oe e pei ona ia fesili ai i le fanauga a Isaraelu i le Malaki 1:6 'E āva le atali‘i i lona tamā, e āva fo‘i le ‘au‘auna i lona ali‘i; ‘āfai o a‘u o le tamā, o ifea ni ‘ou āva? ‘āfai fo‘i o a‘u o le ali‘i, o ifea lo‘u mata‘utia? Afai e te naunau moni i le mana e manuia ai mai le Atua, e tatau ona e mautinoa e te ava ia te ia i lou olaga. E tatau foi ona e matau ia te ia, ma alofa ia te ia ma lou loto atoa ma lou agaga atoa ma lou manatu atoa (Mataio 22:37). 

Tatalo

Tama, faamolemole foai mai le mana e manuia ai, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 23 ME 2024

(tusia e Pastor EA Adeboye)

Manatu Autu: O le fesoasoani silisili (The ever present help)

Tauloto -Tusi Paia– Salamo 37:39  ‘‘O lo‘o mai i le ALI‘I le fa‘aolataga o ē amiotonu; o ia lava lo latou malosi i ona po o le puapuagā... '

Faitauga - Tusi Paia: Salamo 46:1-7

E toatele fanau a le Atua e lē malamalama lelei i le tulaga lenei, o lo tatou Atua e iai o ia i mea uma. A e malamalama lelei i lenei upu moni, e faatumuina lou loto i le olioli, aua e lē afaina po’o le a le tulaga o lo’o e ui ai. I le Salamo 46:1, na faaalia e le fai Salamo i ai tatou o ia o le fesoasoani silisili. O lona toe faamautuina mai, ma ia fetalai i le Isaia 43:2, ’A ē sopo‘ia atu le vai, ‘ou te ‘iā te oe; a ē sopo‘ia atu vaitafe, e lē lofia ai oe. A ē savali i totonu o le afi, e lē mū ai oe; e lē susunuina fo‘i oe i le mumū o le afi. 

Ua toe faaopoopo mai e faamautu atili, ina ia aua lava nei iai se masalosalo, na liutino tagata le Atua ma fetalai mai i le Mataio 28:20 ”fa‘auta fo‘i, ‘ou te ‘iā te ‘outou i aso uma lava, e o‘o lava i le gata‘aga o le lalolagi, Amene.”

O se vaega e faamafanafana ma faamalosiau iai tatou. Leitioa fai mai Paulo i le Roma 8:31O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?

O le mafuaaga e leai ai seisi e mafai ona faasagatau atu ia te oe, ona o le mamalu o le Atua o loo iai ma oe, e tuliesea so’o se mea e ono lamatia ai pe faamāina ai oe. O le fesoasoani silisili na ia fesoasoani ia te au mai le maasiasi semanu ou te oo iai i le lē lava o meaai e fafaga ai le motu o tagata na auai i se tasi o matou fonotaga tele. Na sau lo’u toalua ma fesili mai mo se tupe e faaopoopo ai meaai e fagaina ai tagata e toatele ae faatoa afa le taimi na faafoe ai le fonotaga. Sa leai se tupe ia te a’u i lea taimi, peitai na afio mai le Alii i se tulaga masani e faaali mai lona matautia i lo’u ola. Na ia auina mai tagata ia te au, ua saunia meaai uma na manaomia e fafaga uma ai tagata, ma e iu ane, ua lava ma totoe meaai e fafaga ai le motu o tagata. O seisi taimi, na toeitiiti lava ou poloka i seisi atunnuu ona ua tuai ona lele ese le vaalele mo le aso, ma ua leai ma se tupe. Na ou tatalo i le fesoasoani silisili, ae ou te lei moe i lena po, ua ou maua mea uma na manaonia mo le malaga. 

I le faitauga o le Tusi Paia o le aso, e faamalosiau ia te oe ia e lototele aua foi o loo faatasi le Atua ia te oe tusa lava po’o a fuafuaga a le tiapolo e faao’olima ia te oe (1 Peteru 5:8). Le au pele e, o lenei ituaiga puipuiga, e mafai ona maua pe afai o oe o se sui o le aiga o le fesoasoani silisili. Lafoai lou ola ia Keriso ma faia sau tautinoga e te alofa i mea e alofa iai o ia ma e inoino i mea e inoino iai o ai. E vave ona e maua lona mamalu i so’o se mea e te iai. 

Tatalo

Tama, faafetai mo lou iai ia te a’u I taimi uma. Ua mausali ia te au, o oe o le fesoasoani silisili, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 22 ME 2024

(tusia e Pastor EA Adeboye)

Manatu Autu: O le a le tulaga o tulimatai? (What is your focus?).

Tauloto -Tusi Paia– Kolose 3:2  ‘‘Ia ‘outou loto lava i mea i lugā, ‘ae lē o mea i le lalolagi.. '

Faitauga - Tusi Paia: Kolose 3:1-4

Mai lou iloa faafaiaoga ae ou te lei galue o se faifeau, ou te iloa I totonu o so’o se vasega, e le o tagata uma o tulimatai ia maua le malamalama I le mataupu o lo’o aoaoina. O nisi tamaiti e tulimatai ofu o le faiaoga, po’o lana tautala foi, a’o isi o lo’o taumafai e faalialia atu I isi tamaiti ma uiga faapena. Pau le tulaga mautinoa, o I latou e tulimatai mea e lē taulia, e tele ina leai se meaaoga e maua mai i le vasega. 

E faapena foi i le malo o le Atua, e tele kerisiano e le o tulimataiina mea aoga. O nisi kerisiano e pau le mea e manao iai, ia foai mai e le Atua sana taavale, fale fou, siitia le tulaga ma le totogi ma mea faapena. Ou te alofa i nei kerisiano aua e ono maua mea o lo’o latou tulimataia, peitai e latou te ono le maua mea e pito sili ona taua o lo’o faatalalē iai. 

Na fetalai Iesu Keriso ‘ia ‘outou mua‘i sā‘ili le mālō o le Atua ma lana amiotonu; ‘ona fa‘aopoopoina atu lea o ia mea uma ‘iā te ‘outou (Mataio 6:33). I nisi faaupuga, afai e faamuamua ma tulimatai ia maua le lagi, e ala i le ola amiotonu i le lalolagi nei, o taavale, fale ma isi mea e faaopoopo atu ia te oe. O lo’u ola o se molimau ola i le fetalaiga a Iesu i le fuaitau lea mai le Tusi Paia. Ou te tulimatai le malo o le Atua ma lana amiotonu, ma o le taimi nei, e le mafai ona ou faitauina le tele o mea ua foai e le Atua ia te a’u. O le tulaga pito sili ona lelei, o lo’o ou agai atu foi i le lagi. 

Aisea e tulimatai ai mea e le tumau I lo mea e faavavau? Taulai lau vaai i mea e faavavau ona mulimuli mai lea o mea e lē tumau. E toatele tagata e le ausia le maualuga ua saunia e le Atua mo i latou ona ao faasolo mai le olaga, ua suia le tulaga ua tulimatai mai mea o le lagi sa iai, ae amata ona mulimuli ia maua le oa ma le tamaoaiga. Ua suia a latou tatalo mai le ’Le Alii e, fesoasoani mai ina ia siitia lou alofa mo oe’ i le ‘le Alii e, foai mai lea mea ma lea mea’. E tatau ona e manatua, a o’o mai le valaau, e leai ma se aoga o ia mea. Fesili i se tagata na toeitiiti lava oti, e mafai ona latou ta’u atu ia te oe o le oa ma le tamaoaiga, e ui e feilafi lona matagofie, e le tatau ona maimaua le taimi e soona faalu ai. Ia amata atu nei, ia avea le lapataiga a Paulo i le 2 Korinito 4:18 ma ituaiaga olaga e te ola ai. E tatou te le o vaavaai atu ma tulimatai mea e vaaia, ao mea e lē vaaia, aua o mea e vaaia e lē tumau, ao mea e lē vaaia e tumau e faavavau. Suesue i lou loto, o a tonu vaega o lo’o e tulimataia? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 21 ME 2024

(tusia e Pastor EA Adeboye)

Manatu Autu: Alofa I ou fili (Love your enemies).

Tauloto -Tusi Paia– Luka 6:35  ‘‘'Peita‘i ‘outou, ‘ia ‘outou alolofa atu i ē o fai ‘outou mo latou fili, ma ‘ia agalelei atu, ma ‘ia avatu tupe e nonōina, ‘aua le fa‘amoemoe i se mea e tasi e ‘aumai; e tele ai lo ‘outou taui, e ‘avea fo‘i ‘outou ma fānau a le Silisili‘ese; auā o ia le agamalū i ē agavale, ‘atoa ma ē amio leaga. '

Faitauga - Tusi Paia: Faataoto 25:21-22

O le fa’atonuga pito sili ona faigata na faia e Iesu Keriso i ona soo, atonu o le faatonuga lea ua aumai I le asō i le tatou tauloto. E finagalo Iesu e tatou te alolofa i o tatou fili pe afai o tatou o fanau moni a le Atua. O lea ‘ea se tatou gaioiga e fai i lenei fa’atonuga e foliga e faigata ona tatou faia? Muamua, e tatau ona tatou lagona, o ana fa’atonuga e lē ogaoga, (1 Ioane 5:3) Ae le gata I lea, afai tatou te manatu i manuia e mauaina i le avea o se afafine poo se atalii o le Atua, e te silafia ai, o le faatonuga a le Alii ua na o se tau itiiti e totogiina. I le ofo ai o le aposetolo o Ioane i nei faamanuiaga, na ia tusia ai I le 1 Ioane 3: 1 e faapea: 'Fa‘auta i le silisili o le alofa ‘ua foa‘iina mai e le Tamā ‘iā te i tatou, ‘ina ‘ua ta‘ua i tatou o fānau a le Atua; 

O le tulafono a le Alii ia alofa i ou fili, e lē o se aoaoga a le Feagaiga Fou. O le fa’atonuga lenei mai le Atua ona o ia lava o le Alofa (1 Ioane 4:7). Sa ia alofa ia i tatou a o tatou iai i totonu o le togalauapiga o ona fili, o tagata agasala (Roma 5:8) ma o le uiga o lea faatonuga, ia tatou foliga ia te ia i so’o se tulaga, (Efeso 5:1) e o’o lava i le tatou alolofa i o tatou fili.

Pe aisea e tāua ai i le Atua le tatou alolofa i o tatou fili? O se tasi o mafua’aga, ina ia atagia ma fa’atinoina le natura moni o lou Tama I le lagi, ma fa’aalia manino ai le eseesega o ia mai foliga o lo’o valivali mai e le ti’apolo (Kenese 3:1-5). Afai e iloa ma tofo ou fili I lena ituaiga alofa e te faaalia atu iai latou, e latou te talitonu e aunoa ma se masalosalo, e lelei lou Atua. E tele naua tagata ua latou molimauina ma tuuina atu o latou ola ia Keriso ona o tagata kerisiano sa faatinoina  galuega alofa faapea iai latou. O ou fili va’aia i le asō, e ono ‘avea ma ou uso pele ia Keriso a taeao, pe afai e te amana’iaina le fa’atonuga a le Atua, ma e alofa iai.

E ala mai i lou alofa, e soloia ese ma liu suavai lo latou agaleaga. E iai se tasi o o’u aiga, e ifo i tupua ma sa lauiloa lenei tagata i lona amio leaga, ae sa ia filifili i se tasi aso, e mulimuli mai ia te a’u i le lotu, ina ua ia lagonaina le agalelei o le Atua ua tafe atu ia te a’u i lona soifua. Ina ua su’esu’eina e isi tagata pea aisea ua ia lafoai ai lona tupua ae mulimuli pei se vale ia te au e auauana I le Alii, ua ia tautino, ua leai se isi mea e mafai ona ia faia ae filifili e auauna ia Iesu Keriso ona o lo’u alofa ua faaalia ia te ia. Sa ia fesiligia foi i latou na suesue mai: “Tou te le o va’ai mai ‘ea i le tele o suiga ia te a'u I le itu faaleAgaga faapea ma le tamaoaiga?”

Le ‘au pele, ia e agalelei i ou fili ma ‘aua lava nei e tauia lo latou agaleaga. Alofa atu i e ‘inoino ia te oe! I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 20 ME 2024

(tusia e Pastor EA Adeboye)

Manatu Autu: O lē e mamā lima (He that hath clean hands).

Tauloto -Tusi Paia– Salamo 66:18  ‘‘Ana ‘ou manatu i se amio leaga i lo‘u loto, po ‘ua lē fa‘afofoga mai le Ali‘i ‘iā te a‘u..”

Faitauga - Tusi Paia: Salamo 24:3-6

E manaomia lima mama e a’eina le mauga o le Atua maualuga ma maua o ia. Fai mai le Isaia 59:1-2Fa‘auta, e le‘i fa‘apu‘upu‘uina le ‘a‘ao o le ALI‘I, ‘ia lē mafa‘aola; e lē tutuli fo‘i ona taliga, ‘ia lē mafa‘afofoga. 2‘Ae peita‘i o a ‘outou amio leaga ‘ua fai ia ma pupuni i le vā o ‘outou ma lo ‘outou Atua, o a ‘outou agasala fo‘i ‘ua ‘alo ai ona fofoga ‘iā te ‘outou ‘ua ia lē fa‘afofoga mai ai.

Afai e te ole atu i le Atua i se mea, ae na te lē foai atu ia te oe, faamolemole suesue muamua lou olaga ae le’i amata ona e faaseā. O mama ou lima? O e ola faapaiaina? Fai mai le Tusi Paia afai e te lē o ola faapaiaina, ua e mamao ese mai le Atua ma ua ia lē faafofoga i le tele o au tatalo. Aua o tagata agasala ua mamao ese ma ia, ua le mafai ai ona ia faafofoga iai latou. E inoino le Atua i le agasala ma e le mafai ona latalata mai i le agasala. Afai e te manao i se mea mai ia te ia, alu ese mamao ese mai le agasala. 

E iai nisi tagata e manatu e mafai ona latou faamalosia le Atua e faia mea mo latou. Ona e le mananao e taofia le suamalie o le olaga agasala, ma latou iloa e le faafofoga le Atua ia latou tatalo, latou te saili se tagata faauuina a le Atua e tatalo ma latou. E latou te talitonu e tali le Atua i tatalo a le tagata faauuina. E tele taimi ou te tatalo ai mo tagata mo le faamalologa, faasaolotoga ma faamanuiaga, peitai e aunoa ma ni tali. O le tele o taimi ou te tagi atu I le Atua, ’o le a le mea ua tupu? O lea tagata o lou atalii. Aisea ua e lē tali mai ai?’ O le tele o taimi e faapea mai le Atua, ‘e te le iloa le tala atoa o le tagata lena’. E lē afaina po’o le a le maualuga o le faauuga I le tagata o le Atua, e le mafai ona faafofoga le Atua ini tatalo mo tagata agasala.

 O lo’u tama faaleagaga e masani ona faapea mai o mea lava ua maua e le tama e faaaoga e tausi ai lana fanau. Afai o le Atua o lou tama, e na te tausi ia te oe lana fanau I lona agalelei. Peitai afai o lou tama o le tiapolo, e na te tausi ia te oe i le amiolega o lo’o siomia ai o ia. Afai e te manao i faamanuiaga a le Atua, lafoai lou ola ma le atoatoa ia te ia ona e ola lea i le faamaoni ma le faapaiaina. Fai ma le Tusi Paia a aunoa ma le faapaiaina, e le mafai e se tasi ona iloa atu le Atua (Eperu 12:14), o lona uiga afai e te fia nofo i lona mamalu ma maua le faulai o lona manuia ma le agalelei, o le ola faapaiaina e tatau ona e soifua ai, i le suafa o Iesu, Amene

OPEN HEAVENS

MATALA LE LAGI MO LE ASO SA 19 ME 2024

(tusia e Pastor EA Adeboye)

Manatu Autu: Avea oe ma tagata e faatino (Be a doer).

Tauloto -Tusi Paia– Iakopo 1:22  ‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.

Faitauga - Tusi Paia: Mataio 7:24-27

Fai mai Iakopo 1:22-25 e lē tatau ona avea i tatou o ni tagata ua na o le faalogologo a ia faatino le upu a le Atua. Fai mai o tagata e lē ‘ana’ana i le Upu, ua latou fa’aseseina i latou lava ma e agava’a ona tā’ua o vale. E tusa ma le tatou faitauga mai le Tusi Paia o le asō, o le vale le tagata e faalogo i le upu ae lē faia. O se tagata faapea e pei o se tasi ua fau lona fale i luga o le oneone. O nisi o tagata ua tāua e le Atua o vale e pei ona fai mai ai le Salamo 14:1, o i latou e fai mai e leai se Atua.

Afai ou te fesili i le toatele o Kerisiano pe talitonu e i ai se Atua, e mautinoa e tali mai “Ioe.” O le fesili, aisea la e fa’atalalē ai i ana fetalaiga? O i latou ua ia faaigoa o vale o e lē ‘ana’ana i lana Upu. O I latou e lē usiusita’i i le Upu a le Atua e lē ia i latou le mata’u i le Atua. Fai mai le Faataoto 1:7, O le mata’u i le Alii o le amataga lea o le poto. Afai tatou te matata’u uma i le Atua mata’utia, tatou te usiusita’i i lana upu. O i latou e faalogogatā i le Atua, o vale.

Mo nisi tagata, o o latou manatu e faapea; “Ou te usita’i pe a ou mana’o, i le auala ou te mana’o ai, ma na o vaega o le upu e talafeagai mo au.” O ituaiga tagata ia, ua leai se mata’u i le Atua. I le Mataio 21:28-32, na faamatala e Iesu le tala i se tamā na fai atu i lona atali’i, “Alu se’i e galue i la’u tovine.” Na tali le atali’i, “Ou te lē alu.” Na mulimuli ane salamō ma alu. E faafefea ona fai atu e lou tamā se faatonuga, ae e tali atu i ona foliga, “Ou te musu?” A na e ola a’e i le olaga na a’oa’o ai a’u, e mautinoa a o le sasa le tali o lou lē mafaufau. A o le atali’i lona lua, na fai fo’i i ai le fa’atonuga a lona tamā, ma ia fai mai ua lelei, o le a alu e fai, peita’i e le’i usita’i. Fai mai Fa’ataoto 25:19, o atali’i faapea e fa’apei o le nifo ua gau ma le vae ua mapeva; e faapena se tagata e le tu mo oe i taimi faigatā. Peita’i e i ai se atali’i lona tolu e ono faigatā ona e iloa I le tatou tala na faitau; o ia lea o loo fa’amatalaina le tala, o Iesu Keriso lava ia o le alo na faapea mai, “O le a o’u alu.” ma faapea lava ona ia fai (Isaia 6:8). I le Mataio 26:39, o le atali’i lava lenei na fetalai, “. . . . aua ne’i faia lo’u loto, a o lou finagalo.”

Ia faapenei lau tali atu i le Upu a le Atua e lē aunoa, “Aua ne’i faia lo’u loto a o lou finagalo.” O la’u tatalo lenei; ia e faia i aso uma le finagalo o le Atua, fa’apei ona faia e Iesu Keriso. Ia vave ona e usitai i le Upu a le Atua ma ia atoatoa i taimi uma, pe fetaui ma lou taimi pe leai,  i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 18 ME 2024

(tusia e Pastor EA Adeboye)

Manatu Autu: Fa’aumatia le Fefe (Banishing Fear).

Tauloto -Tusi Paia– Isaia 41:10  ‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.

Faitauga - Tusi Paia: Mataio 10:26-31

Fai mai 2 Timoteo 1:7, Auā ua lē foaiina mai e le Atua ia te i tatou le agaga e mata’u ai, a o le agaga e fa’amalosi ai, ma alofa ai, ma pulea ai o tatou loto.

O le fuaitau o loo tā’ua i luga ua faailoa manino mai iā i tatou, o Agaga Paia o lē na foaiina mai e le Atua ia i tatou e lē o se agaga o le fefe. Ua ta’u mai ai fo’i o le fefe e lē o se faalogona a’o se agaga, e lē mai le Atua. O tatou kerisiano, so’o se taimi tatou te iloa ai se agaga e lē mai le Atua ia i tatou, e tatau ona fa’aumatia lea agaga i le taimi lava lea. O le asō e fa’aumatia ai le agaga o le fefe I lou olaga, I le suafa o Iesu.

O le fofō e fa’ato’ilaloina le fefe o le faatuatua. Fai mai Efeso 6:16, “ Ia fa’aopoopo i na mea uma ona tago atu i le talipupuni o le fa’atuatua, tou te mafai ai ona tinei o u fanafana mu uma a lē o loo leaga.” Na tusi le upu lenei i le Afioga Paia a le Atua i le vaitaimi o o fitafita i le taua ma a latou talipupuni e puipui ai i latou mai osofaiga a le fili. E fa’apenā fo’i ona tatou tinei u fanafana mu a le fili i le talipupuni o le fa’atuatua.

O a nei u fanafana mu? O mafaufauga e ui atu ai le agaga o le fefe i le olaga o le tagata. O le mafuaaga lea ua fai mai ai 2 Korinito 10:5 e faapea;

O loo lepeti i lalo masalosaloga, ma mea maualuluga uma ua fa’asiasia i le iloa o le Atua, o loo fa’ato’ilaloina manatu uma ia ‘ana’ana ia Keriso;

O le iloa o Keriso e lepetia i lalo mafaufauga ma masalosaloga fefe. O le tele o lou iloa o le Atua, ma le tele o lou malamalama I lona mana ma lona alofa mo oe, o le faaitiitia lea o lou fefe. E tatau ona e fa’ato’ilaloina manatu faavaivai uma i le moni o le Upu a le Atua. A oso mai mafaufauga, e ao ona e tali atu i ai i le Upu a le Atua e fa’asa’o ai. A e faia faapea i taimi uma, e te manumalō i le agaga o le fefe.

E lē mafai ona e iloa le Atua pe a e lē suesue lana upu ina ia fa’aumatia uma le fefe I lou olaga, e mana’omia lou su’esu’e o le Upu a le Atua i aso uma. Fai mai le Tusi Paia I le tusi o Roma 10:17;

. . . e tupu le faatuatua I le taulogologo atu, o le taulogologo atu fo’i o i le Afioga a le Atua lea.

O le tele o le Upu a le Atua e te faalogo ai i aso uma, o le tupu lea o lou faatuatua. E fa’amautinoa ai fo’i e leai se avanoa o le fefe i lou loto. Su’esu’e le Afioga a le Atua ma manatunatu i ai i aso uma. Tauloto lana Upu, aemaise fuaiupu e fa’atatau tonu i le fefe. A nofo le Upu a le Atua i lou loto, o le a tafiesea le fefe mai lou loto, I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 17 ME 2024

(tusia e Pastor EA Adeboye)

Manatu Autu: E inoino le Atua I pepelo (God hates lies).

Tauloto -Tusi Paia– Faaaliga 22:15  ‘'A ‘ua i tuāpā o ulī, ma ē fa‘ataulāitu, ma ē faita‘aga, ma ē fasioti tagata, ma ē ifo i tupua, ‘atoa uma lava ē ‘ua loto i le tala pepelo ma latou faia”.

Faitauga: Tusi Paia – Galuega 5:1-11

Fai mai le Faaaliga 22:15, I le finagalo o le Atua, o tagata pepelo e tutusa le vaega e iai ma ulī po’o taifau. Fai mai le Ioane 8:44 o le tiapolo e tala pepelo, o le tamā o le pepelo, o lona uiga a e pepelo, o lo’o e ta’uta’u atu o lou Tama o le tiapolo. 

I Tausaga ua mavae, na ou malaga ai i le isi nuu, ae ina ua ou toe foi mai i le fale I Lagos, na ou manatu e asiasi i lou tama faaleagaga. Ua ou latalata atu I lona fale ae ou manatua loa na ia aoaoina I matou o so’o se taimi matou te o ai I se fale o se tagata o le Atua, e tatau ona ave se meaalofa. O lea na ou afe i se tasi nuu e taua o Surulere ma faatau ni moli I le auala. Ao ai e lou tama faaleagaga se moli, na ia faapea mai, ’manaia le suamali o le moli, Na e faataua maia i luga o le auala? Na ou iloa lelei o loo faapea mai o le auala I Lagos ae na ou tali atu lava, ’ioe lau afioga’. O le taimi na ou faia ai, na faapea mai Agaga Paia, ’ua e pepelo’. Ua ou faapea atu, o le a le eseesega, na ou faataua mai le auala I Surulere. Ae na toe faapea mai Agaga Paia, ;ua e pepelo’ Ona ou faapea atu lea pe iai sona aafiaga i le suamalie o le moli?’

E lei mafai ona tuua a’u e le Agaga Paia, ma o lea na ou faapea atu ai i lou tama faaleaaga, Tama na e fesili mai muamua poo fea na fa’atau mai ai moli. Na ou faataua mai moli i le auala i Surulele. Ua luelue mai le ao o le toeaina ma faapea mai, ’Agaga Paia’. Ua ia silafia o lo’o aoaoina  a’u. O le mea lea ou te ofo ai i le toatele o kerisiano ua masani i le pepelo e o’o i le Ekalesia. 'E ‘inosia e le ALI‘I o laugutu pepelo(Faataoto 12:22). E inoino le Atua i le pepelo e lē faatuaoia. 

Afai e inoino le Atua i laugutu pepelo, o lona uiga o le tatalo a le tagata pepelo e leai ni tali e maua. E le fia faalogo le Atua i laugutu o se tagata pepelo. O le mafuaaga lea e tele ai kerisiano e oi ma lē tagolima, o pepelo e masani ona fiafia e faia ua avea ma pa puipui i le va ma le Atua. E mafai e le pepelo ona faapuupuuina le ola o se tagata. I le Galuega 5, o le fafine ma le tamaloa na pepelo i le Atua, na pauū ma maliliu ai. O se lapataiga lenei i soo se atalii poo se afafine o le Atua e fiafia i le tala pepelo. E le finagalo le Atua ia e faaumatia. Aua le pepelo. Fai sau filifiliga ia e tautala sa’o I taimi uma e amata atu nei, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 16 ME 2024

(tusia e Pastor EA Adeboye)

Manatu Autu: Aua e te gaoi (Do not steal)

Tauloto -Tusi Paia– 1 Korinito 6:10  ‘ma ē gaoi, ma ē matape‘ape‘a, ma ē ‘onā, ma ē agatele, ma ē fao mea, e lē fai mo latou tofi le mālō o le Atua'

Faitauga - Tusi Paia: Iosua 7:13-26

Fai mai le Esoto 22:2-3, o le faasalaga o le oti e talafeagai ma le gaoi. Fai mai le Faataoto 29:24, a lua fai paaga ma le gaoi, ua e inoino I lou agaga. E lē faatagaina oe, le afafine po’o le atalii o le Atua e gaoi. O le gaoi o lona uiga, o lou faoa poo le ave o se mea e le o sau mea e aunoa ma le faatagana mai le e ana, po’o le faaaoga faamalosi o se mea a seisi tagata e pei lava o sau mea. 

A’o avea a’u o se faiaoga I le Iunivesite, sa ou tusia sa’u lava tusi I mea a lo’u aiga ae sa ou manao e faaaoga teutusi a le ofisa. Ona faapea mai lea o le Atua, ‘aua’. Ua ou faapea atu, o le a le leaga? Ua faapea mai, ‘e mo tusi a le ofisa ae le mo tusi a le tou aiga’. Ua ou tali, ‘Le Alii e, o le a le tau o le teutusi?’ Ua tali mai, ‘a e iloa e taugofie faapena le teutusi, alu e faatau mai sau teutusi’.

Fai mai le Ieremia 17:11

‘Ua moe le koli i fua, ‘ae lē ni ona fua. E fa‘apea o ia e maua le ‘oa, ‘ae lē maua i le amiotonu. E tu‘u e ia ana ‘oa i le tautuluaga o ona aso, ‘ae ‘avea o ia ma vale i lona gata‘aga’.

O le uiga o le fuaitau o lo’o taua I luga, afai e maua e se tagata le oa ma le tamaoaiga i auala faagaoi, e le umi ae leai se mea, ma e i’u lava lea tagata i le salamō, sa lē tatau na faia. Mo se faataitaiga, i le 2 Tupu 5:20-27, sa taumafai Keasi e faaputu le oa i se auala faagaoi mai ia Naamanu ae i’u ane, ua avea ma lepela. 

I ni tausaga e tele ua te’a, sa avea a’u ma taitaifono o le komiti e vaaia le aoga. Sa ou manatu e fesoasoani i le aoga e ala i le fausia o se nofoaga tumau mo tama ma teine o le aoga, o se fale tele e faia ai mea a le aoga faatasi ma se potu o le pule aoga. Ua manatu le pule aoga, o le avanoa lea e fau ai foi sona fale I lona nuu e faaaoga ai nisi o mea mai le galuega a le aoga. Ma a’o faagasolo le galuega o le faleaoga, sa fai faatasi lava ma lona fale. Ina ua maea, ua sau seisi tagata ma fesili, ’o ai le tagata ua fai lona fale i luga o lo’u fanua?’ Ua ia tali atu, ’sa ou faataua mai le fanua i le leisi tagata’. Na faapea atu le tagata moni e ana le fanua, ’e sese le tagata na e faataua mai ai’. Ua fai atu le pule aoga, ’ia aua ta te misa, ae fia se tau ou te toe faatauina ai le fanua? Na fai iai le tagata e ana le fanua, e lē faataua le fanua, ae alu e toe tala ese lona fale. O lo’o tu ai lava lea fale i le fanua e oo mai I le asō, e leai seisi o nofo ai. E leai ma se mea a le tagata e ana le fanua o faaaoga ai le fanua aua na te le manaomia. O galuega uma a le pule aoga i le fauina o le fale ua maimau uma, ma ua fa’aleagaina uma ana miti aua foi o lo’o manino le upu a le Atua. 

O le olaga o le tagata gaoi e matua leaga. E tumu ona aso i fetuu ma e na te lē maua se filemu. Le au pele e, ua na o faamanuiaga a le Atua e maua e aunoa ma se faanoanoaga (Faataoto 10:22). Aua e te gaoi, i le suafa o Iesu, Amene.