Samoan Devotional

 OPEN HEAVENS

MATALA LE LAGI MO LE ASO FARAILE 5 APERILA 2024

(tusia e Pastor EA Adeboye)

Manatu Autu: O le a le mea e faia e le faauuga? (What does the anointing do?)

Tauloto -Tusi Paia– Galuega 10:38 “o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua..” 

Faitauga - Tusi Paia: Faamasino 15:10-16

O se auli uila ua na o se fasi uamea sei vagana ua fesootai ma le eletise. A faapipii la le fasi uamea I le eletise, ona aoga lea e faamafolafola ai ofu ua maanuminumi. E o’o I le TV, ua na o ni vaega eseese ma ni uaea o loo pipii ai. A aunoa ma le eletise, e leai tele se aoga. Peitai a faapipii loa I le eletise, e mafai ona e matamata I mea o loo tutupu I isi vaega o le lalolagi ao tutupu I le taimi lea. E mafai e le faauuga ona liua mea masani I mea matautia. 

I le Faamasino 15:14-15, ina ua latou aumai Samasoni I luma o Filisitia, ma ua latou fiafia, fai mai le Tusi Paia ona osofia lea o ia e le Agaga o le ALI‘I' ua ‘avea maea sa i ona lima e pei se manoa lino ‘ua mū i le afi. '‘Ona maua lea e ia o le ivi ‘auvae fou o le asini, ma ina ua fesootai le auvae o le asini ma le faauuga, ua avea ma auupega e fasi a‘i tagata e afe. O le faauuga, ua liua le mea masani I se mea matautia. 

O le eletise I lona fausaga mai, e pei o le afi. E te ono leiloa atu aua o lo’o puipuia ao faaaoga I totonu o lou fale. E faapena tonu lava le faauuga, o le afi. Ina ua paū ma afio mai le Agaga Paia I tagata I le afeafe aupitoaluga, ua latou vaaia laulaufaiva afi I luga o ulu o tagata. O le eseese o le uila vilivae ma le uila afi, o le afi. E mafai ona e vili le uila mo le 100 kilomita e faaaoga ai lou malosi, peitai e o’o atu I le taimi e uma ai, e ono manaomia le fui vai e faatei ai oe. Peitai, afai e te tietie I se uila afi, e te mafai ona alu I le mamao lava lea e tasi I se taimi e pupuu atu e aunoa ma lou tigaina tele. O le mea tonu lena e faia e le faauuga. A e vaai I se tagata o galue ma faia galuega e faia e tagata e toasefulu, e aunoa ma le lelava ae o lo’o foliga lelei ma malosi, o le eseesega o le faauuga. O lenei, afai ua e faauuina, o le tulaga o lo’o e maua, o le malosi e ausia ai mea uma e le mafai ona e faia I lou malosi. 

O le faau’uga e le na o faifeau. O se fomai e faauuina e mafai ona ia vaai ma’i  tuga ma maua fofo e le mafai e le tele o isi fomai ona vaai. O le tagata fai pisinisi faauuina e ausia mea tetele e le mafai e lona malosi masani ona ausia. A o’o mai le faauuga I luga ia te oe, e faaaupegaina oe e faia ma ausia mea uma e sili atu I ou manatunatuga. Mo se faataitaiga, o le faauuga na mafai ai e Elia ona tamo’e I luma atu o le kariota a Aapo (1 Tupu 18:46). 

Le au pele e, ou te faamalosi ia te oe ia e saili le faauuga mai le Atua. E avatu ai ia te oe le vave e toe feliuaina ai lou olaga mo le lelei, I le suafa o Iesu, Amene.   

OPEN HEAVENS

MATALA LE LAGI MO LE ASO TOFI 4 APERILA 2024

(tusia e Pastor EA Adeboye)

Manatu Autu: O le a le faauuga? (What is the anointing?)

Tauloto -Tusi Paia– 2 Korinito 1:21 “ua o‘o ‘ina ‘aumai e i latou i ē mama‘i i malae, ma fa‘ata‘o‘oto ai i moega ma fata, tau lava ‘ina ‘ia fa‘apaoloina ai nisi o i latou i le ata o Peteru pe a ui ane o ia......” 

Faitauga - Tusi Paia: Isaia 61:1-3

E toatele tagata, e latou te fia vaai i vavega. A latou vaai i se tagata o le Atua o faa’e’e ona lima i luga o se tagata ma’i, e latou te fia iloa po’o le a tonu le tulaga o loo faamatuu mai I ona lima I le tagata ma’i e mafua ai le faamalologa. A fai mai na paū se tagata I le faauuga, o le fesili, o le a le faauuga?

O le faauuga e mafai ona faamatalaina o le 'eletise faalelagi', ma o lo’o gaosi e le Agaga Paia. I se isi faaupuga, e pei lava ona i ai le eletise i le lalolagi, e maua mai ai le malosiaga e faaola ai tatou masini, e faapena le faauuga o le eletise mai le lagi. A e silasila i se tagata faʻauʻuina, o lena tagata ua fesoʻotaʻi I le malosiaga o loo gaosia le faauuina I le lagi, o le Agaga Paia lea, ma o lea ua ia maua ma tafe ai le faauuga ia te ia. Fai mai le Galuega 1:8, e te maua le mana pe a o’o mai le Agaga Paia ia te oe. O le fesootaiga lena ma le Agaga Paia, e faatupulaia le tafe o le faauuga ia te oe. E tatau ona e matauina, o le faauuga, e le o le Agaga Paia. O le Agaga Paia e gaosia le fa'au'uga. O le Agaga Paia o le Atua lava ia.

E fa'afefea ona e feso'ota'i ma le Agaga Pa'ia ina ia maua le fa'au'uga?  O le vaega muamua e tatau ona e maitauina, o ia o le Agaga Paia ma e le mafai ona latalata o ia i se mea e lē paia. Afai e te fia fesootai ma le Agaga Paia, e tatau ona e faapaiaina. E le faauuina e le Atua se tagata agasala. Fai mai le Amosa 3:3 e lē mafai ona savavali faatasi se toʻalua, seʻi vaganā ua malilie faatasi. Afai e te lē ola faapaiaina, e lē mafai ona galue le Agaga Paia i totonu ia te oe.

E le gata i lea, e pei lava ona e fesootai ma seisi tagata e talanoa i se gagana, e faapena ona e fesootai ma le Agaga Paia pe a e tautala i gagana eseese. O le tele o lou tautala i gagana eseese, o le tele foi lea o le eletise faalelagi e te maua I lou tagata ma faatupuina pea le faauuga i ate oe. Ua e iloa, o le  fa'au'uina o oe, e fa'alagolago tele i le tele o lou fa'atuatua. Fai mai le Iuta 1:20, ‘ia ‘outou ati a‘e ‘iā te ‘outou i lo ‘outou fa‘atuatua e silisili ‘ona pa‘ia, o le Agaga Pa‘ia tou te tatalo ai. O lea, o le tele o lou tautala i le Agaga Paia, o le tele foi lena o lou faatuatua. O le tele o lou faatuatua, o le tele foi lena o lou faauuina ma e faia ai mea uma sa le mafai ona e faia. E tatau foi ona e iloa, o loʻo i ai le isi tulaga maualuga atu o le faʻauʻuga e le mafai ona e ausia pe afai e te le faʻaopoopoina le anapogi I au tatalo masani (Mataio 17:21). Faatupu lou faatuatua e ala I le tautala I gagana eseese I aso uma ma saili le papatisoga o le Agaga Paia pe afai e te lei maua lava, I le suafa o Iesu, Amene. 

 OPEN HEAVENS

MATALA LE LAGI MO LE ASO LULU 3 APERILA 2024

(tusia e Pastor EA Adeboye)

Manatu Autu: E mafai foi ona e faia vavega (You too can work miracles)

Tauloto -Tusi Paia– Galuega 5:15 “ua o‘o ‘ina ‘aumai e i latou i ē mama‘i i malae, ma fa‘ata‘o‘oto ai i moega ma fata, tau lava ‘ina ‘ia fa‘apaoloina ai nisi o i latou i le ata o Peteru pe a ui ane o ia......” 

Faitauga - Tusi Paia: Mareko 16:17-18

O Keriso I le aso, e finagalo e te tutuli temoni ma faia so’o se vavega. O le fesili, o oe o se tagata faatuatua? Afai o le tali o le ‘ioe’, o lona uiga e mafai foi ona e faia vavega e pei na faia e Iesu. E mafai ona e fesili, ‘aisea ua le mafai ai ona ou faia e o’o mai I le taimi nei?’ I le Mareko 3:13-15, na faatonu e Iesu lona ‘au so’o I le mea e tatau ona faia. E tatau ona mafuta I le Atua, talai le talalelei, faamalolo I ē mamai ma tutuli temoni. O le mafuaaga e toatele ai kerisiano e le mafai ona faia ni vavega, ona latou te le o mulimuli I le faasologa lea. O le a le tele o le taimi o lo’o e mafuta ai I le Atua? O le laasaga muamua lea I le faia o vavega. E tatau ona tele se taimi e faaalu e suesue ai le Tusi Paia ma tatalo I aso uma. O le tele o le taimi e te mafuta ai I le Atua, o le tele foi lena o le mana e faaee ia te oe. 

E manaomia foi lou talai o le talalelei ia Iesu Keriso. I le Mataio 28:19, na fetalai Iesu, ‘O lenei, ‘ia ‘outou ō atu e fai nu‘u uma lava ma so‘o ma papatiso atu ‘iā te i latou i le suafa o le Tamā, ma le Atali‘i, ma le Agaga Pa‘ia’;

E toatele kerisiano e le o atu e talai le talalelei. E le mafai ona avatu e le Atua ia te oe le mana e faia ai vavega e te faalialia atu ai I tagata, e na te foai atu pe afai e faaaogaina e manumaloina ai agaga mo lona malo. Afai e te faia ma le sa’o laasaga muamua ia e lua, e mulimuli atu le mana e faia ai vavega. E toatele tagata e manatu e le o se tulaga e faamalosia lo latou maua o le mana o le Atua. Afai ou te manatu e le faamalosia le faamalolo o tagata, ou te le totogiina foi la le tau e faigofie ai ona maua le mana e faia ai faamalologa. Afai ou te le manatu tele pe a maliliu tagata, ou te le tatalo malosi foi la ae lei o’o le oti I lea tagata. Afai e te malamalama moni I le finagalo o le Atua e fia faaaogaina oe e faamalolo ai mai, faatutu mai e ua oti, ma tutuli temoni, ma ua e iloa foi e le mafai ona o ese temoni seiloga o le tatalo ma le anapogi (Mataio 17:21), semanu ua vave suia lou naunau I le meaai ma le tuinanau o le tino. 

Afai o oe o se soo, e tusa ma le Mareko 3:13-15, o lo’o faamoemoe le Atua e te faamalolo I e mamai. E iai foi le taimi e auina atu ai oe e le Atua e faatu mai se tagata mai le oti, tutuli temoni ma faamamaina tagata ua maua I mai e leai se fofo (mataio 10:7-8). Afai o oe o se so’o o Iesu, e faamalosia lou totogiina o le tau e ala I lou ola ina ia e maua le mana e faia ai vavega. O oe ea o se so’o moni o Keriso? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 2 APERILA 2024

(tusia e Pastor EA Adeboye)

Manatu Autu: Tatalo mo le Ekalesia (Prayers for the Church)

Tauloto -Tusi Paia– Kolose 1:9 “O le mea lea o i mā‘ua fo‘i ma te le‘i mapu ai lava i le tatalo mo ‘outou, talu le aso na mā fa‘alogologo ai, ma te ‘ai‘oi atu fo‘i ‘ina ‘ia ‘ato‘atoa ‘ona ‘outou iloa lelei o lona finagalo, i le poto uma ‘atoa ma le mafaufau fa‘aleagaga;.....” 

Faitauga - Tusi Paia: Efeso 1:16-20

1.       Tama, faafetai mo le viiga ma le mamalu ua e tuuina I lau Ekalesia faapea ma mea uma ua e faia e ala i lau Ekalesia I le lalolagi nei.

2.       Le Alii e faamolemole, fesaosani I lau Ekalesia i lo matou atunuu ina ia tumau ma le faamaoni i lo latou valaauina. Aua nei faatagaina le o ese mai I lou faamoemoega autu I le lalolagi nei, I le suafa o Iesu.

3.       Tama, faamolemole ia faatuputeleina lou alofa I totonu o fata faitaulaga eseese I lau Ekalesia. Ia matou iloa o matou lava e tasi, I le suafa o Iesu.

4.       Tama, faamolemole ia e fesoasoani i taitai o le Ekalesia I le lalolagi atoa. Ia puipui I latou mai osofaiga a le fili ma ia aua nei o latou vaivai I le faataunuuina o lau galuega, I le suafa o Iesu, Amene.

5.       Tama, faamolemole ia foai le punaoa ma le tamaoaiga I lau Ekalesia e talai le talalelei ia Iesu Keriso ma faalautele lou malo I le lalolagi nei, I le suafa o Iesu.

6.       Tama ia faatuputeleina le mamalu, le malosi ma le pule a le Ekalesia i so’o se vaega o le olaga nei faapea vaega uma o loo atinae e tagata, I le suafa o Iesu.

7.       Tama, faamolemole ia e fesoasoani I le malo o lo matou atunuu ina ia manumalo I luitau uma o latou feagai, fesoasoani mai iai matou ia matou ausia le manumalo, I le suafa o Iesu. 

8.       Tama, faamolemole ia faatumulia lou Agaga I totonu o lau Ekalesia. Fesoasoani mai ia matou maua ma siitia pea le mafutaga ma lou Agaga Paia I totonu o lau Ekalesia, ia sili atu foi I aso anamua, I le suafa o Iesu. 

9.        Tama, faamolemole ia e foai mai mea uma e manaomia e le Ekalesia e faataunuu ai le poloaiga sili e manumaloina agaga mo lou malo. Ia e faauuina ma foai mai le mana iai matou e faataunuuina ai lau galuega I le lalolagi nei, I le suafa o Iesu. 

10.   Tama, faamolemole ia e totō ma faatumulia lou alofa tunoa I le Ekalesia ina ia mafai ona matou faaali atu le alofa I le lalolagi ma manumaloina agaga mo lou malo, I le suafa o Iesu. 

11.   Tama, faamolemole foai  I lau Ekalesia le poto e pulea ai augatupulaga I le taimi nei ma tausaga o lumanai, I le suafa o Iesu. 

12.   Ia faalauteleina le aoaoina o lau Upu Moni I totonu o le Ekalesia ina ia fua mai I ni fua lelei I tagata o le Ekalesia, I le suafa o Iesu e tatalo atu ai, Amene. 

OPEN HEAVENS

MATALA LE LAGI MO LE ASO GAFUA 1 APERILA 2024

(tusia e Pastor EA Adeboye)

Manatu Autu: Toe faamumū le meaalofa (Stir up the gift)

Tauloto -Tusi Paia– 2 Timoteo 1:6 “O le mea lea ‘ou te fa‘amanatu atu ai ‘iā te oe ‘ia toe fa‘amumū le mea alofa mai le Atua, o lo‘o ‘iā te oe lea i le fa‘ae‘e atu o o‘u lima.....” 

Faitauga - Tusi Paia: 2 Tupu 2:13-25

E toatele tagata ua latou maua le faauuga a le Atua, peitai ane, e lei tupu lava se vavega e ala iai latou. Afai e maua e se tagata le faauuga, e gase I totonu ia te ia seiloga e tago lea tagata e faamumū. Ina ua maua e Elisaia le faauuga a Elia e ala I lona ofu na tuu ia te ia, ua na o se ofu masani seia o’o I le aso na ia faaaogaina ai ta ai le vai ma ua vaeluaina. 

Na ou auai I se tasi o fonotaga tele a Kenneth Hagin I Tulsa I Amerika ma ou vaaia le mana faaalia o le Atua. Na fai la’u faaiuga o le a ou alu e vaai o ia ma e faafetai I le alofa tunoa o le Atua, sa mafai. Na ia fesili mai, ‘alii talavou, o le a se mea e te manao iai?’ Na ou tali, ‘lau susuga, ou te manao I mea uma o lo’o ia te oe’. Ina ua maea lana galuega I tagata uma na iai ona faliu mai lea ia te au ma faapea mai, ‘alii talavou, tootuli’. Ua ou tootuli ma na ou vaaia ona lima lautetele e lua ua tu’u I luga o lo’u ulu, na gata ai iina lo’u iloa o se mea. Ou te te’i ane, o lo’o ou taatia I lalo, ae o lo’o tootuli o ia I o’u tafatafa, tuu lima I lo’u ulu ma tatalo faatauanau I Gagana eseese. 

Ina ua matou foi I Nigeria, na ou fai I lo’u tamā faaleagaga, e faataga mai ona faasolo tagata I ni laina ma ou tatalo mo latou. I na aso, matou te lē tatalo mo ni tagata, e tatalo lava le tagata ia. Na faataga e lo’u tamā le faifeau, ma na o’o loa I le sauniga o le afiafi o le Aso Sa na sosoo ai, na faalaina uma tagata. O nisi o tagata na matou o I Tulsa sa iai ma sa latou vaai e pauu tagata I lalo pe a tatalo ai Kenneth Hagin, o lea na o mai tutu I tua o tagata e fesoasoani pe a pauu. Na faaee ou lima I le tagata muamua ma tatalo, e le’i pau. E lei afaina ia te au aua ou te iloa o le pauu o tagata e lē o se faailoga lea o ni vavega ua tupu. Peitai e o’o atu I le tagata lona fitu, na pau I lalo se tagata I lalo o le faauuga. Na sosoo atu ai ma nisi tagata. Sa ou faamumū le meaalofa na tuuina mai ia te au ma ou vaaia lona tino ma le galue mai. 

Afai na faaee lima ma faauuina oe e se tagata o le Atua, e le o se taimi lenei e te nofonofo ai. O lena faauuga o lo’o gase ma lē aoga pe afai e lē faaaogaina. Vaai ni avanoa e te tatalo ai mo tagata ma faamumū le meaalofa. O le tagata muamua e te tatalo ai e ono lē faamaloloina I le taimi lava lena, peitai ane, toaga e faamumū le meaalofa ma e le umi se taimi ae e vaaia le galue malosi, I le suafa o Iesu, Amene. 

OPEN HEAVENS

MATALA LE LAGI MO LE ASO SA 31 MATI 2024

(tusia e Pastor EA Adeboye)

Manatu Autu: Vavaeeseina (Consecration)

Tauloto -Tusi Paia– 2 Korinito 6:17 “O lea, ‘Ia ō mai ai ‘outou nai totonu ‘iā te i latou, ma ‘ia ‘outou vavae mai, ‘ua fetalai mai ai le Ali‘i, ‘aua fo‘i tou te papa‘i atu i se mea leaga; ‘ona ‘ou talia ai lea o ‘outou....” 

Faitauga - Tusi Paia: Roma 12:1-2

O le uiga o le vavaeeeseina, o le lafoa’i atoatoa o lou ola I le Atua, I se isi faaupuga, ia tumau I le Alii, ia na o ia. Pagā lea, o le toatele o tagata e pipi’i le lima e tasi i le Atua a’o le isi lima i le lalolagi. E faafefea ona e faamatala kerisiano e fai mai ua ofo atoa o latou ola mo Keriso ae o i taulasea ma fofo faataulaitu pe a feagai ma faigatā? O kerisiano ua moni le vavaeeseina, ua sauni e usita’i ma fai mea uma mo le Atua. O tagata faapea, e tusa pe ui i le tele o puapuaga mo le Alii, peita’i e manatu pea i latou o le mea e fiafia tele ai, pe a i ai faatasi le Atua ma i latou (Iakopo 1:2).

O se fa’ata’ita’iga lelei o se tagata e moni le vavaeeseina mo le Alii o le Aposetolo o Paulo. Na matua’i iloga le tuuina atu atoa o lona soifua mo le Atua. E tigā ona fautuaina ia e le Atua e aua ne’i alu i Ierusalema ae na alu pea e lauga le tala lelei, (Galuega 21:11-14). Sa matua’i saunia ia ma sa faapea ona ia ta’utino i le Kalatia 2:20; Ua fa’asatauroina faatasi i maua ma Keriso; ou te lē toe ola a’u, a o Keriso o lo’o ola i totonu iā te a’u; o le ola fo’i o’u te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te a’u, ma foaiina mai o ia e ia mo a’u.

O i latou ua vavaeeseina ma faapaiaina e manatu tele I le Atua e sili atu I so’o se tasi poo se isi lava mea. Sa ou matamata i se faatalanoaga i luga o le Dove TV i se tasi aso, ma na faapea mai le tagata sa faatalanoa, i aso ua tuana’i, pau le fa’ataua na i le au kerisiano ia fa’aaogā i latou e le Atua, peita’i o aso nei, ua sili atu ona popole tagata pe faafefea ona o latou fa’aaogāina le Atua. O le toatele ua na ona fa’aaogā o le ola kerisiano e fai ma pupuni e foliga lelei ai i tagata, peita’i a o’o mai sina faafitauli latou te faafitia Keriso. Fa’ata’ita’iga o aso nei, tele kerisiano ua fa’amatu’u ese lo latou faatuatua i le suega o se toalua. E oofu i ofu e fa’aaliali ai le tino ia faatosina ai tamaloloa, auai i potopotoga faapaupau ma le manatu e saili ai se isi e fiafia ai, ma le tulaga e sili atu ona leaga, o le ola lē mamā ae lei faaipoipo.

O le tala faalototele a se misionare na u’unaia malosi la’u filifiliga ia vavaeeseina lo’u tagata mo le Atua. Sa galue i se vaiaai e sauāina ai kerisiano. I le aso o lana faaipoipoga, a o sauni o ia, na o’o atu taitai o le aai osofa’i lona fale ma ave fa’amalosia ia ona o lona laugaina o le tala lelei. E le’i tagi o ia ae sa ‘ata’ata, sogi i filifili na lokaina ona lima ma fai atu, “Le Alii e, ou te le’i iloa e faapitoa tele a’u iā te oe e te lē mana’o e i ai se isi tagata i lo’u olaga ia tau o oe. Oka se aulelei o la’u mama faaipoipo iā te a’u.” O se ola ofoina atoa mo le Atua lona soifua, e ui na vaai tagata o se faalavelave tugā, a o lana vaai i filifili na saisaia ona lima, o le mama faaipoipo mo ia, le faatoa nofo tane a le Atua.

Le au pele e, ua vavaeseina oe mo Iesu? E te naunau ea e ui I tiga ona o Keriso? I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 30 MATI 2024

(tusia e Pastor EA Adeboye)

Manatu Autu: Na ia faia uma mo oe 2 (He did it all for you 2)

Tauloto -Tusi Paia– Eperu 9:26 “auā ‘ana fa‘apea po ‘ua tatau ‘ona tigāina fa‘alasi o ia talu ona fa‘avaeina o le lalolagi a o lenei, ‘ua tasi lava le fa‘aalia mai o ia i le fa‘a‘atoaga o tausaga, ‘ina ‘ia ‘ave‘eseina le agasala, ‘ina ‘ua faia o ia e ia ma taulaga...” 

Faitauga - Tusi Paia: Mataio 26:37-45

E silafia e Iesu le taunuuga mai le amataga, o lea la, na ia silafia e mata’utia le tulaga o le a i ai i luga o le satauro, o lea na ia tatalo ai i le tusi o Mataio 26:39 faapea, “Lo’u Tamā e, afai e mafai, ia ave ese lenei ipu iā te a’u; ae aua le faia lo’u loto, a o lou finagalo.” O loo faamauina i le Tusi Paia a o faia lana tatalo, o lona afu sisina ua pei o ‘alu’alu toto. E ta’u mai ai ia i tatou, na matua’i uigā i le Alii Fa’aola lana tatalo. Peita’i na finagalo malie e ui i puapuagā.

E lei fa’amalosia Iesu e tuuina mai lona soifua mo oe ma a’u. Na saunoa manino i le tusi o Ioane 10:18, na ia tuuina mai lona ola e ia lava. E mamafa lenei saunoaga ma e faaosofia ai a’u ou te fesili faapea, “ O le a le ituaiga alofa e una’ia se tagata e tuuina atu ia lava e fa’alumaina ma fasia faapea?”

Na o’u maua le tali sa’o o la’u fesili i le Ioane 15:13 e faapea; E lē sili lava le alofa o se tasi i lenei alofa, ia tuuina atu e se tasi lona ola mo ana uo.

O le alofa sili lea i le lalolagi. E alofa Iesu iā te oe, e sili atu na i loo le alofa o se isi lava tagata i le lalolagi, ma ua ia fa’aalia i le tuuina mai o lona soifua atoa mo oe.

Ou te toe fesili pea ia te a’u, “O le a se mea e tuleia se tagata e ofo lona soifua faapenei?” Na o’u vaaia le tali o lenei fesili i le Ioane 10:11-12. O le leoleo mamoe lelei, na te lē tuua mamoe ae sola, pe a vaai atu ua sau se luko. E aputiputi ma puipui e ia le lafu mamoe ne’i fa’atama’ia e le fili aua e pele iā te ia mamoe. O le tiapolo le luko, e taumafai e gaoi, fasioti ma fa’aumatia, a’o Iesu le leoleo mamoe na tuuina mai lona soifua mo oe ia e maua le ola e faavavau.

Na o Iesu e te maua ai le puipuiga moni mai maiu’u o le luko-le tiapolo. Afai e te talitonu iā Iesu le leoleo mamoe lelei ma ofoina atu loa ola iā te ia, e leai se malosi o le luko e fa’ato’ilalo ai oe auā ua uma ona maliu Iesu mo oe. Peitai e mafai ona fa’aumatia e le luko so’ose tasi e lē mulimuli iā Iesu po o kerisiano fo’i e ta’asē mamao ma ia.

Le au pele e, afai e te lē mana’o e maua oe ma faaleaga e le fili, ofo nei lou ola iā Iesu Keriso. Mulimuli ia te ia, na o ia lava. Ua uma ona totogi e Iesu le tau mo oe, ua na o ia e te o’o ai i le ola e faavavau. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 29 MATI 2024

(tusia e Pastor EA Adeboye)

Manatu Autu: Na ia faia uma mo oe 1 (He did it all for you 1)

Tauloto -Tusi Paia– Ioane 3:16 “Auā ‘ua fa‘apea lava ‘ona alofa mai o le Atua i le lalolagi ‘ua ia ‘aumai ai lona Atali‘i e to‘atasi, ‘ina ‘ia lē fano se tasi o ē fa‘atuatua ‘iā te ia, a ‘ia maua e ia le ola e fa‘avavau..” 

Faitauga - Tusi Paia: Roma 5:6-8

Ao iai Keriso I luga o le satauro, ua foliga mai ua ia le maua se fesoasoani. O lenei tagata, e mafai ona ia valaau ni ‘au a agelu e 12 e fesoasoani ia te ia, peitai sa faasatauroina ma foliga ua ia le maua se fesoasoani. O le mea moni, o le a se mea e mafai e se tagata ua tuitui ona vae ma ona lima I le satauro? Mo se faataitaiga, ao iai Iesu I le satauro na ia faapea mai, ‘ua ou fiainu’. Ua latou lē avatua ia te ia se vai, ae ua avatu le vineka, ua ia le faia se mea. E le faapea ua leai se mana ia te ia e faia ai se mea e finagalo iai, ae ona o lenei, afai e na te faasaoina o ia I lena taimi, semanu e avea oe ma a’u ma meaai, po’o se tagata e manumalo ai le fili. O lona uiga, ona o lona alofa mo I tatou, ua ia le maua ai se fesoasoani. Ua ia le maua se fesoasoani e saunia le ala e tatou te maua ai le fesoasoani. Afai ua faamamaina oe I le toto o Iesu, e lē oge le fesoasoani e te maua, I le suafa o Iesu. 

I luga o le satauro, ua tuulafoaia Iesu. Na ia alaga ma le leotele  I le Mataio 27:46, “….Lo‘u Atua e, lo‘u Atua e, se a le mea ‘ua e tu‘ulafoa‘i mai ai a‘u?”  E le o talanoa I le taimi lea ina ua tuulafoaiina o ia e e le au so’o. Na latou lafoai o ia ina ua saisai mai e fitafita, ae o le taimi lea, ua tuulafoaiina foi o ia e le Atua le Tama. O le tulaga pito sili lea ona tigā ia Iesu aua foi e lei iai se taimi muamua na la valavala ai ma le Atua. Peitai, na ia ui ai I ia tulaga uma ina ia tatou maua se mafutaga vavalalata ma le Tama I taimi uma. Na uia e Iesu na tigā uma ina ia aua nei e tuulafoaina ma o so’o se taimi e te valaau ai I le Atua, e tali mai o ia. 

O mea uma na tutupu I Kalevaria na tigā ma matua faanoanoa ai Iesu, e le mafai ona e uia nei tiga ma le faamāina e aunoa ma le faanoanoaga. A’o Iesu, na ui I ia faanoanoaga uma ina ia e maua le olioli. O lona uiga, afai ua faamamaina moni oe e le toto o Iesu Keriso, o mea uma e oo mai ai le faanoanoaga ia te oe, ua tafiesea I le aso, I le suafa o Iesu. 

Na ia faia uma mo oe ina ia e maua se olaga e sili atu I le olaga e ofo atu e le lalolagi, le ola e faavavau. O le fesili mo oe I le asō, o e fiafia ea I faamanuiaga o le galuega Togiola na faia e Iesu mo oe I le satauro? Ua faamamaina moni oe I le toto o Iesu? O e ola ma soifua e pei o Keriso? O faamanuiaga o le galuega Togiola na ia totogiina, e mo I latou e ola faapaiaina. O so’o se tagata e ola faapaiaina moni, e latou te maua faamanuiaga o le galuega Togiola na faia e Iesu I le satauro. Ua faia la’u filifiliga mautu ou te ola faapaiaina mo lo’u olaga atoa. Ae faapefea oe? E na o i latou e ola faapaiaina e mafai ona latou maua faamanuiaga o le maliu o Iesu I luga o le satauro, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 28 MATI 2024

(tusia e Pastor EA Adeboye)

Manatu Autu: O le tulaga kerisiano e faatatau ia te oe lava (Christianity is personal)

Tauloto -Tusi Paia– Ieremia 1:5 “Na a‘u iloa oe a o le‘i faia oe e a‘u i le manava; na a‘u fa‘apa‘iaina oe a o le‘i fānau mai oe, na a‘u tofia oe e fai ma perofeta i nu‘u.” 

Faitauga - Tusi Paia: Ioane 10:3-4

So’o se taimi e fia talanoa ai le Atua I se faapotopotoga, tusa po’o le a le toatele, e fia talanoa sa’o I tagata taitoatasi. O le faaaliga 3:20 na tusia I le Ekalesia atoa ae na ia fetalai, “ai se tasi….”. Fai mai le Ioane 3:16 “Auā ‘ua fa‘apea lava ‘ona alofa mai o le Atua i le lalolagi ‘ua ia ‘aumai ai lona Atali‘i e to‘atasi, ‘ina ‘ia lē fano se tasi ..”. 

Na tatou omai I lenei lalolagi taitoatasi. O lo’o manino I le Kenese 25:21-26, tusa po’o ni masaga, a faananau mai, e faasolo mai taitoatasi. Tusa foi pe taoto le tina (tulou), e faasolo mai taitoatasi pepe e le fomai. Fai mai le Roma 14:12, e tatou te avatu taitoatasi tala o a tatou amio I luma o le Atua. O ni feau ma aoaoga mai lenei faamalosiau e le mo tagata uma, o lo’o momoli faapitoa atu lava mo oe. So’o se taimi e fia talanoa ai Tavita I se mataupu taua, e na te faia lava e faatatau ia te ia. I le Salamo 23:1, na ia tusia, ‘O le ALI‘I, o lo‘u leoleo mamoe o ia; e leai se mea ‘ou te mativa ai’. E lei faapea mai Tavita, ‘o le Alii o lo tatou leoleo mamoe’. 

O nisi o le au uso a faaiu se sauniga e latou te faapea mai, ‘E moni e mulimuli mai ‘iā tei matou le agalelei ma le alofa i aso uma o matou ola; matou te nonofo fo‘i i le fale o le ALI‘I i aso e tele lava’. E masani ona ou manatu po’o fea e aumai ai aua e le maua I totonu o la’u Tusi Paia. O le sa’o o lo’o tusia ai e faapea, ‘E moni e mulimuli mai ‘iā te a‘u le agalelei ma le alofa i aso uma o lo‘u ola; ‘ou te nofo fo‘i i le fale o le ALI‘I i aso e tele lava’(Salamo 23:6). O le agalelei ma le alofa o le Atua e le mo tatou uma, e mo a’u. O le taui o lo’u nofo I le fale o le Alii e mo a’u, ae le mo tatou. 

I le Salamo 27:8, na faapea mai Tavita, ‘Na fai atu lo‘u loto ‘iā te oe i lau na e fetalai mai, “‘Ia ‘outou sā‘ili‘ili mai ‘iā te a‘u; le ALI‘I e, ‘ou te sā‘ili‘ili atu i lau afio’. Ou te leiloa mafaufauga o tagata, po’o le a le mamao e naunau ai e saili I le Alii ae po’o le a foi le fiaai ma le fiainu I le Atua. E le mafai ona ou fiaai ma fiainu I le Atua mo latou. Aua nei e avea le lē fiaai ma le lē fiainu o se tagata I le Atua e taofia ai oe, tusa pe aofia ai le faifeau. O lau savaliga ma le Atua o se tulaga e faatatau ia te oe lava. Afai e te lua feiloai faafesagai ma le Atua I le aso o le faamasinoga, e te avatu le tala e faatatau I au amio ma lou lava ola ia te ia. Afai e te vaai atu I isi kerisiano e lē faatauaina la latou savaliga o ni kerisiano, aua e te amanaia. O le ola o se kerisiano, o se tulaga e faatatau ia te oe lava. Ia e saili I fofoga o le Atua ma faamalosiau I isi kerisiano ia latou faia, aua nei avea lo latou ola faaleogalua e a’afia ai oe. O le ola o se kerisiano o se tulaga tau oe. Aua nei e faatagaina amioga a isi tagata e taofia lau savaliga ma le Atua, I le suafa o Iesu, Amene.   

OPEN HEAVENS

MATALA LE LAGI MO LE ASO LULU 27 MATI 2024

(tusia e Pastor EA Adeboye)

Manatu Autu: Aua e te gaoi (Thou shall not steal)

Tauloto -Tusi Paia– Esoto 20:15 'Aua ‘e te gaoi.'

Faitauga - Tusi Paia: Efeso 4:27-28

O le tuinanau o mata, o le faalialiavale I le olaga nei, ma le tuinanau o le tino, o le mafuaaga lea e tele ai ina ave e tagata meatotino a isi tagata. O le tuinanau ia maua mea uma e aunoa ma le galue, faatasi ma le naunau I le oa ma le tamaoaiga, e oo atu ai I le gaoi. E finagalo le Atua ia e maua mea uma e te manaomia e tusa ma ona ala ma lona lava taimi. E naunau le Atua e foai atu mea uma e te manaomia pe sili atu foi, peitai e tatau ona e muai saili lona malo ma le amiotonu. E leai se tagata e sili ona faamanuia atu ia te oe e sili atu I le Atua, o lea e sili atu ona e faatali I faamanuiaga a le Atua aua e mautinoa e te mauoa ma faatamaoaigaina e aunoa ma le tiga e faaopoopo iai (Faataoto 10:22). Aua e te faatagaina le tiapolo e faaseseina oe I mea feilafi. Fai mai le Mareko 8:36, 'Auā se a le aogā i le tagata, pe ‘āfai na te maua le lalolagi uma, ‘ae māumau lona ola? '

Le au pele, aua nei e faatauina lou agaga ina ia maua le tamaoaiga  e ala I le gaoi. E leai se mea I lenei lalolagi e faatusa I le taua o lou agaga. E le fiafia Le Atua I le gaoi. Afai e te naunau e tele mea e te maua, fatele le galue malosi. Aua e te gaoi mai tagata o lo’o galulue malolosi e maua a latou mea e tele. O nisi tagata e taumafai e faamatala ni mafuaaga taua na faia ai. Mo se faataitaiga, o nisi e faapea mai o le faia o auala faaalatua e le tutusa ma le gaoi. O nisi e faapea mai e ese le gaoi ese fefaatauaiga lē talafeagai I luga o upega tafailagi. 

Le au pele e, o le taimi e tago ai se tagata ave pe faaaoga le meatotino a leisi tagata e aunoa ma le faatagaina pe faia foi I se auala taufa’asesē, o le gaoi lava lea. I le 1 Korinito 6:10, o lo’o manino I le Tusi Paia o le tagata gaoi, e lē fai mo latou le malo o le Atua. O le tiapolo o le tamā o tagata gaoi e tusa ma le Ioane 10:10, o le gaoi o lana galuega muamua lea I le olaga o se tagata. Sa faapea mai lo’u tama faaleagaga, o lou Tama I le lagi e na te tausi ia te oe I mea ua ia te ia. Afai o le Atua o lou Tama, e na te tausi ia te oe e ala I faamalologa, faamanuiaga, ma le ola faafualoa ae afai o lou tama o le tiapolo, e na te tausi ia te oe I ma’i, faafitauli I faaipoipoga, oti ma vaega faapena. E le tatau ona manatu tagata gaoi e tali le Atua ia latou tatalo aua e le o le Atua Lo latou tama. 

I le Levitiko 6:4 ma le Esoto 22:1-4, fai mai le Atua afai ua e gaoia se mea, e tatau ona e toe faafoi ma faaluaina I lē na gaoi mai ai. Aua e te teua mea gaoi I lou fale. Ma le mulimuli, o lē gaoi, ‘aua ne‘i toe gaoi, ‘ae lelei ‘ina fa‘amalosi o ia i galuega a ona lima i mea aogā, ‘ia maua e ia se mea e avatu i ē ‘ua matitiva.(Efeso 4:28). O le gaoi e taitaia oe I le vaega a le tiapolo ma avea ai o ia ma alii I lou olaga. Aua e te gaoi, I le suafa o Iesu, Amene.