Samoan Devotional

OPEN HEAVENS

MATALA LE LAGI MO LE ASO TOONAI 16 MATI 2024

Manatu Autu: Ola lē faapito (Live Selflessly).

Tauloto – Faaaliga 4:11 “Lo matou Ali‘i e, ma lo matou Atua e tatau lava oe ‘ina ‘ia tu‘u atu ‘iā te oe le vi‘iga, ma le fa‘ane‘ene‘ega ma le mana. Auā na e faia mea uma lava, ‘ona o lou finagalo fo‘i e i ai i latou ma ‘ua faia.”

Faitauga - Tusi Paia: Kenese 50:15-21

 Upu Folafola

O toeaiina e lua sefulu ma le fa i le lagi na latou faamanino mai i la tatou upu tauloto o le asō, na faia i tatou ia o tatou fa’ataunu’uina le finagalo o le Atua. Afai tatou te ola mo i tatou lava, ua lē aogā le faamoemoe na ala a’I ona faia i tatou. A soifua se tagata mo le Atua, e lē fa’aaogaina sesē e ia manuia ma avanoa.

O Iosefa, o le fa’ata’ita’iga lelei lea o se tasi na ola mo le Atua ma isi tagata aemaise ona uso. E ui na i’u ina o latou agaleaga iā te ia, a’o lona loto fesoasoani na alu ai su’e ona uso ma momoli i ai a latou meaai. E o’o atu Iosefa I le fanua sa tatau ona i ai ona uso ua leai nisi, e le’i fo’i Iosefa ae na ia saili pea ona uso seia o’o ina maua, e pei ona fa’amatalaina mai i le Kenese 37:13-28.

O le alofa o Iosefa I le Atua na ia tete’e atu ai i faaosoosoga a le toalua o lona matai. Sa lē mafai e Iosefa ona fai se mea e tigā ai le finagalo o le Atua e pei o lana tali i le Kenese 39:9 faapea; “E leai se sili iā te a’u i le fale nei, ua na lē taofi sina mea iā te a’u, ua na o oe, auā o oe lona faletua; pe faapefea ona ou faia lenei mea leaga tele ma o’u agasala ai i le Atua?”

E lē gata i lea, o lona alofa i tagata na ia fa’amatalaina ai miti a le tagata sa la falepuipui faatasi, ma i’u ai ina avea ia ma Palemia o Aikupito. Ina ua faaeaina Iosefa e lei toe manatu i faigata na ui ai ona o le saua ma le agaleaga o ona uso na faatau ai ia e fai ma pologa. O le alofa o le Atua sa i totonu iā te ia na mafai ai ona ia iloa o puapuaga na ui ai e mo se faamoemoe maualuga o le Atua mo le tagata. Na ia faapea mai i le Kenese 50:20; “ A o outou, na fai togafiti e outou ia leaga ai a’u; a o le Atua na finagalo ia ‘ia i’u i le lelei, ina ia o’o ina faaolaina o le nuu e toatele, pei ona i ai i ona po nei.”

O lo tatou Tamā o I le lagi, e finagalo tatou te ola i se olaga e lē faapito iā i tatou lava, ina ia mafai ona o tatou taunuu i le atoatoaga o lona faamoemoe mo i tatou. O ē manatu faapito, e faaleagaina e i latou, latou lava e aunoa ma lo latou iloa.

O Mose e ui na soifua i le tele o le tamāoaiga i totonu o le maota o le tupu o Falao, ae na filifili e pagatia faatasi ma ona tagata (fanauga a Isaraelu) ma laveaiina i latou mai le pologa, i lona ta’ita’iina ese o i latou mai Aikupito (Eperu 11:24-27). O lona alofa fa’asafua na mautinoa ai na te faataunuuina le polokalame a le Atua i lona soifua ma le nuu atoa o Isaraelu. Le au pele e, amata ola nei mo isi ou uso, ona e maua lea o le tumu o le mamalu o le Atua i le tamāoaiga I le Agaga ma le tino.

Tatalo

Tamā ia amata i le asō faamolemole fesoasoani mai ia o’u ola mo isi ae lē mo na o a’u lava. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 15 MATI 2024

Manatu Autu: O le toatele o le lelei lea (The more the merrier).

Tauloto – Teuteronome 32:30 ‘Pe fa‘apefea ‘ona tulia e le to‘atasi le to‘aafe, ma tutuli e le to‘alua o afe o sefulu, ‘ana le fa‘atauina atu i latou e lo latou Papa, ma tu‘uina atu i latou e le ALI‘I?

Faitauga - Tusi Paia: Failauga 4:9-12

 Upu Folafola

O le toatele o le Ekalesia o le lelei foi lea o le sauniga. Afai e lē toatele I tatou, e faapefea ona tatou siitia le viiga e leotele ma malie? O le toatele o tatou o le leotele foi lena o le tatou viiga ma o le manaia ma lelei foi lena e vivii faatasi ai I le Atua. Ou te fia ta’u atu le mea na amata mai ai le patipati. E iai se aso na iloa ai e le tamaimai lima manu felelei o pepese mai ona latou faapea lea, ‘le Atua e, e matou te fia vivii foi ia te oe’. Ua taumafai e fai se leo ae leai. Ua faafuasei ona manatu, ‘afai e galulue faatasi ma seisi tamaimai lima, e leiloa pe maua ai se leo’. Ua faalogo atu I sina fitifiti o tamai lima e lua, e lei leva ae amata galulue uma tamaimailima ma le alofi lima ma ua amata ona leo tele ane seia oo ina matua leo tele e sii ai le viiga e olioli ma fiafia ai I le Alii. 

E faapena foi I tatou, afai e toatele ma faatupulaia kerisiano, e siitia foi mea e mafai ona oo atu iai la tatou pule I le lalolagi. Afai e toatele I tatou o kerisiano, e le mafai ona le faalogo iai tagata aua foi e tele lona aafiaga. Afai e toasefulu ni tagata e o mai e tete’e I se poloaiga poo se faiga faavae a le malo, e faigofie ona lē amanaia e le malo. Peitai a o mai ni tagata se 10,000 e tutū faatasi e tete’e I le poloaiga poo le faiga faavae lava lea e tasi, e matua faigata e le malo ona teena I latou. O I latou e umia tulaga pule I le vaega o loo e galue ai, e latou te faalogo ia te oe pe afai tou te toatele. E faapena foi ona mafai e lau Ekalesia ma le aulotu ona iai lo latou sao I le fuafuaina o le aganuu ma faiga faavae e pulea  nofoaga o lo’o iai. 

Afai e toatele I tatou, e tele galuega e mafai ona faataunuuina. A o mai ni tagata se toasefulu e faia se galuega, e tatau ona matua galulue malosi ina ia maea ona faataunuuina. Peitai, a o mai ni tagata e selau e faia le galuega lea e tasi, e mautinoa e itiiti atu le malosi mai tagata taitoatasi e manaomia e maea ai ona faatino. O lona uiga e tele galuega e mafai ona vave faataunuuina pe afai e toatele. 

Le au pele e, afai o le Atua o lou Tama, e tatau ona e filiga e faalautele lona malo. Talai le talalelei I so’o se mea e te iai ona fai lea o sau fuafuaga mautu ia manumaloina se tagata se toatasi mo Keriso I le aso. Afai e le mafai ona e alu I le au talai, lagolago I le au misionare e ala I le tatalo ma lou tamaoaiga. O le toatele lava o kerisiano I le lalolagi atoa, o le maualuga foi lena o vaega e oo atu iai la tatou pule. Ia fai ma tiute masani le talai atu o le talalelei I se tagata se toatasi I le aso, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 14 MATI 2024

Manatu Autu: O le Poloaiga tele (The Great Commission).

Tauloto – Mataio 28:19-20 ‘'Ua fetalai atu fo‘i o ia ‘iā te i latou, “Ō atu ia ‘outou i le lalolagi uma, ‘inā tala‘i atu ai le tala lelei i tagata uma lava'

Faitauga - Tusi Paia: Faataoto 13:1-4

 Upu Folafola

Ina ua mavae le toetu mai o Iesu, sa Ia faaali atu o Ia lava i ona so’o. E lua mafuaaga na ia faaalia ai I ona so’o. Muamua, na ia faaalia o ia lava, e faamautinoa ai, e lē o maliu o Ia, ae o loo soifua pea. (1 Korinito 15:6 ) O le māfuaaga lona lua, o le tuuina atu lea iā i latou o faatonuga mulimuli a’o leʻi tuua e ia le lalolagi. O a faatonuga na sili ona taua na ia tuuina atu ia i latou a o lei afioese? O lo’o iai nei faatonuga i le tusi a Mareko 16:15-18.

I le maea ai ona ia totogiina le taulaga silisili, ua fetalai mai Iesu, ‘Alu e talai atu i tagata uma i le lalolagi, e le tatau ona fano se tasi i Seoli. Afai e mafai ona latou talitonu mai ia te au, e latou te maua le pule i I so’o se gasegase, temoni ma so’o se ava malosi, ma e iʻu lava i le Lagi nai lo seoli’. O faatonuga ia na ia avatu i ona so’o a’o leʻi afio ese. O oe o se tasi o ona so’o? Afai o lau tali o le Ioe, pe na e usitaʻia ea lenei faatonuga? 

14O lenei, pe fa‘apefea ‘ona latou vala‘au atu i lē ‘ua latou lē fa‘atuatua i ai? Pe fa‘apefea fo‘i ‘ona latou fa‘atuatua i lē ‘ua latou lē fa‘alogo atu i ai? Pe fa‘apefea fo‘i ‘ona latou fa‘alogo atu, pe ā leai se tala‘i atu? Roma 10:14

Ou te manaʻo ia e mafaufau loloto i le mau o le Tusi Paia o loʻo i luga, ma le mea moni lenei, e toatele tagata o lo’o o atu i seoli ona e leai se tasi e talai atu le talalelei iai latou. Mafaufau loloto i le mea moni, o nisi o au uo, tuaoi ma e tou te galulue faatasi e mafai ona o atu i seoli pe afai e te le o  talai atu iai le talalelei ia Iesu Keriso. Sa fai se miti a se tasi tagata, ma na ia vaaia se agelu o sau mai seoli ma se tusi mo ia. Fai mai le agelu, o lenei tusi e mo oe, na aumai I se tasi na fai mai na te iloa oe. O le uso lenei, o lana uo. I le tusi na ia tusia ai, ‘Ua ou i inei ona e te lei ta’u mai ia te au le matautia o lenei nofoaga. I tausaga uma na tatou mafuta ai, e te leʻi taʻu maia ia te aʻu o loʻo ou agai atu i se tulaga lamatia’. Na ala I luga lenei tama ma o le vaveao lava lena, sa alu atu o ia i le nofoaga o si ana uo e talai atu I ai le talalelei. Ina ua ia tuʻituʻi atu i le faitotoʻa, na sau se tagata e tatala ma fai mai ‘Ua e faalogo I se tala?’ Sa ia tali atu, “O le a lena tala? ” Na tali mai le uso lenei, ua maliu lau uo anapo.

Sa le mafai e lenei tama ona laveai lana uo mai le malaia e faavavau. Talai atu i au uo, ma tagata uma tou te galulue faatasi le avanoa e soso ese ai mai malaia e faavavau; Ta’u atu ia i latou Iesu Keriso. Talai atu i tagata uma e te fesootai i ai Iesu Keriso. O le a sou lagona pe afai e o uma au uo I seoli ona e lei talai atu Iesu Keriso iai latou ma lapatai I latou I le malaia o seoli? Talai atu loa iai latou, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 13 MATI 2024

Manatu Autu: O le tulaga siitia e afua mai I le faitaulaga (With greatness comes sacrifice).

Tauloto – 1 Korinito 15:10 ‘A o le alofa tunoa o le Atua ‘ua ‘ou fa‘apenei ai a‘u; o lona alofa tunoa fo‘i o ‘iā te a‘u, e lē fa‘alēaogāina lea, a ‘ua sili la‘u galuega ‘iā latou uma; a o le alofa tunoa o le Atua ‘ua ‘iā te a‘u... '

Faitauga - Tusi Paia: Faataoto 13:1-4

 Upu Folafola

Na asiasi mai lo’u tama faaleagaga I lo’u fale I le 1975. Ua ma tatalo I lea po, ona o uma lea o tagata e momoe, o lou manatu lea na iai. Peitai ina ua ou alu I le faleletaua I le 10 I le po, ae ou vaaia lou Tama o lo’o tatalo. I le 5 I le vaveao ao ou tulai I le faleletaua, na ou vaaia o lo’o tatalo pea I ona tulivae. Ina ua malama le taeao, na ou talanoa I lo’u Tama pe iai se faafitauli aua o lou lava manatu a tatalo umi se tagata o lona uiga e iai se faafitauli. Na ataata ma faapea mai, ‘e leai se faafitauli, aua e te popole, o le a vave ona e malamalama I se taimi lata mai’. Ua matua faateia a’u ona o le leai o se faafitauli ae ua alu le po o tatalo. Ua ou iloa foi ua faapea mai le Atua ia te a’u ou te faataitai ia te ia. 

 E iai se faifeau na sau ia  te au ma faapea mai, ‘na amata faatasi la tatou savaliga, na tutusa lelei o tatou tulaga, ao lenei ua mamao a lau alu I luma, faasoa mai le mea lilo’. Ua ou fai atu iai, ‘e leai ma se mea ese o ou faia tou te le iloa, ou te anapogi, tatalo ma leoleo I le tatalo. Afai e te fia manao e pei o au, faataitai iai. 

E iai se tamaloa mai seisi Ekalesia na tatalo faapea, ‘le Atua, foai mai iai te au le 10% o mea o lo’o faia e Pastor Adeboye, ona ou malie lea’. Ona fai lea iai o le Atua, ‘fai le mea o lo’o faia e ia ona ou avatu lea o le mea ua ou foai ia Adeboye’ Ua ia fesili I le Atua, ‘o le a lana mea o lo’o faia?’. Fai mai le Atua, ‘na ia amata I le tatalo ma le anapogi mo aso e 40’. Ona ia faapea mai lea, ‘Le Atua, ua lava ia a’u I le tulaga o lo’o iai nei’. Na o I latou e mafai ona faitaulaga e siitia maualuga. E le mafai ona siitia maualuga oe pe afai na o le fafaga lava o lou tino I meaai ma fafaga lou mafaufau I mea faafiafia, o mea na e faamalie ma faafiafia, e mo se taimi puupuu. O se tagata e tele faafitauli tau tupe e mafai ona matamata I ata tifaga malie ma ata ai, ma e ono foliga o se tagata fiafia, ae a uma le tifaga, e toe foi lava e faafesagai ma faafitauli. O mea faafiafia o le olaga e aunoa ma le faitaulaga, e mo se taimi pu’upu’u, tago e totogi le tau ina ia ausia le faamoemoega autu o lou olaga, ia faaeaina ma siitia maualuga. 

O le maualuga lava o se fale, o le loloto foi lena e tatau ona eli e le tufuga ina ia malosi ma mautu le faavae. O mea e siitia oe I luga I lenei olaga, o mea e te faia e leiloa mai e nisi. O le ala e te tatalo ai ma anapogi, aoga, faigaluega ae leiloa mai e tagata e fua iai le maualuga e siitia oe iai. Galue e totogi le tau ona e maua lea o le taui o le siitia maualuga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 12 MATI 2024

Manatu Autu: O le afi a le Atua (The Fire of God).

Tauloto – Esoto 19:18 ‘O le mauga o Sinai fo‘i ‘ua pusa ‘atoa uma auā na afio ifo ai le ALI‘I i le afi, ‘ua alu a‘e fo‘i ona asu pei o le asu o se umu; ‘ua lūlūteleina lava le mauga ‘atoa uma.. '

Faitauga - Tusi Paia: Galuega 2:3-4

 Upu Folafola

I le tusi o Faamasino 15:14-15 o lo’o ta’ua e le Tusi Pa’ia, ina ua aumai Samasoni i luma o le ‘au Filisitia, o le taimi lava na latou vivii ai, na afio ane ai le Agaga o le Atua i se afi e le iloa e mata, ma ua susunuina ese ai manoa na saisaitia ai Samasoni. Ina ua paū le afi I luga o Samasoni, ua ia tago i le ivi ‘auvae fou o le asini, o se meatau I lona lima, ua  fa’aumatia ai tagata e afe.

A o’o ina fa’au’uina oe, so’o se mea e te pa’i atu iai e faau’uina. O loo fa’amatala e le Mareko 5:25-29 le faamalologa I le pai atu I ‘ofu o Iesu. Ua taua I le Galuega 5:14-16  e o’o I le ataata o Peteru ua mafai ona faamalolo ai tagata mamai. Fai mai le Galuega 19:11-12, e o’o i solosolo ma tali eleele a Paulo ua faamalolo ai le au mamai. 

E te mana’omia le afi o le Atua, ma e te mauaina i le asō. O lo’o maua lou avanoa e maua ai le afi o le Atua aua fai mai le Mataio 3:11, o le folafolaga na aumai, o le a papatisoina oe  e Iesu Keriso I le Agaga Pa’ia i le afi. A e mauaina le afi o le Atua, e suia lou olaga e faavavau. Afai e te maua le afi a le Atua, e mafai ona e faamaloloina ma’i  tugā ua leai ni fofo, ma matuā faigofie e sili atu muamua ona manumaloina agaga e tele mo le Malo a le Atua.

E le gata e te mana’omia le afi o le Atua e faamalolo ai ma’i, e te mana’omia foi e faasagatau ai I ou fili uma. Fai mai le Faamasino 14:5-6, na agai atu Samasoni i Timenata, ae faafuase’ia ona osofaia o ia e se leona tagi. Na paū le afi a le Atua ia te ia, ma ua ia saeia ninii le leona. E te mana’omia le afi o le Atua ne’i mea ane ua osofaia oe e se Leona tagi, ona e faapea atu lea iai, ‘Ua ou matua sauniuni mo oe!’ A o e tuputupu a’e i le Alii, e le taumate o le a tete’e malosi ma faasagatau mai le fili, ma e te manaomia le afi o le Atua e liaina so’o se mea e fai ma fa’alavelave I le galuega a le Atua.

Fai mai le Ioane 4:48 e iai tagata e lē talitonu I le Upu a le Atua seiloga e vaai I faailoga ma mea ofoofogia. A o ia faailoga ma mea ofoofogia e faato’a tutupu pe afai ua papatisoina oe i le afi o le Atua. Ua faamanuiaina a’u I le manumaloina o agaga o tagata I tulaga maualuluga ma aloa’ia ia Keriso ona o le molimauina o vavega tetele na faia e le Atua e tauala ia te a’u. 

Ou te talosaga atu e te ‘ai’oi I le Atua mo le papatisoga i le afi mai le lagi, ina ia iloa tino I lou olaga faailoga ma vavega e tele. O le a faigofie ai foi ona galue mo le Atua ma fua tele mai o fua. Tagi ma ole atu I le Atua I le asō mo se itula atoa mo le papatisoga o le afi. Ona amata atu lea I le aso, ia avea lea ma au tatalo masani I aso uma, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 11 MATI 2024

Manatu Autu: Lima Faauuina (Annointed Hands).

Tauloto – Luka 4:40 ‘'O i latou uma sa i ai tagata ē mama‘i i ma‘i ‘ese‘ese, ‘ua latou ‘aumaia i latou ‘iā te ia i le goto o le lā; ‘ua pa‘ipa‘i tasi atu ona ‘a‘ao ‘iā te i latou, ma fa‘amālōlō ‘iā te i latou. '

Faitauga - Tusi Paia: Esoto 17:8-13

 Upu Folafola

A e vaai I se tagata o le Atua e faae’e lima I luga o tagata ona malolo lea, o le mafuaaga ona o lima o lena tagata ua pai I le afi a le Atua. O lima e faauuina ina ua pa’I I le afi a le Atua. I le Esoto 3, ina ua lafoai e Mose lona tootoo I le eleele paia, ua liua I se gata ona faatonu lea e le Atua e tago e u’u le gata I lona siusiu. Ina ua tago Mose e uu le gata, na pai lona lima I le eleele paia na pai iai le afi. Mai lena aso, ua liua ona lima ua avea oni lima e faapitoa. I le Esoto 17:8-13, ua tatou vaai I lima lava ia, na filifilia le iuga o le taua I le va o Isaraelu ma Amaleka. O so’o se taimi na siitia ai I luga ona lima, na manumalo lea o Isaraelu, ae a pauu I lalo ona lima ona ua mamafa, ua amata ona malo le autau a Amaleka. Sa iai ma Mose ia Arona ma Huro, e fa o la lima tuufaatasi, peitai ua la iloa o lima o Mose na pa’i I le eleele paia, e ese mai I lima masani o tagata. E lei siitia o laua lima, ae na fesoasoani e siitia I luga lima o Mose. I le Esoto 14:16, na faapea mai le Atua ia Mose: ‘a o oe, ‘ia e si‘i i luga lou to‘oto‘o, ma fa‘aloaloa lou lima i luga o le sami, ma e vaeluaina ai; ō atu ai le fānauga a Isaraelu i totonu o le sami, i le ‘iliti tai matūtū’.

Na faau’uina e le Atua lima o Mose, o lea na ia faatonuina e faaloaloa ona lima I luga o le sami ulaula ma ua vaeluaina. I le Esoto 14:21 ina ua faaloaloa lima o Mose I luga o le sami, e leai se mea a le sami e mafai ona fai ua na o le vaeluaina loa. I le Teuteronome 34:9, o lima lava ia na tuuina atu le poto ia Iosua: 

9‘Ua tumu fo‘i Iosua le atali‘i o Nuno i le agaga e poto ai; auā na fa‘ae‘e atu e Mose ona lima i luga ‘iā te ia; na fa‘alogo fo‘i le fānauga a Isaraelu ‘iā te ia, ma ‘ua latou faia e pei ‘ona poloa‘i mai ai o le ALI‘I ‘iā Mose.

E mafai e le mana o le Atua ona liua lima masani ini lima faapitoa. Afai e te faitau I le Ioane 9:1-7, ina ua vaai Iesu I se tamaloa na fanau mai o tauaso, na ia feanu I le palapala, ona aumai lea ma faauuina ai mata o le tagata tauaso. O le palapala masani e mafai ona liua I se palapala faapitoa ma e fua I lima na pa’i iai. 

E mafai ona paia ou lima I le asō, ae o le tulaga muamua, e tatau ona paia ou lima. Fai mai le Salamo 24:3-4, ua na o lima mamā, ma le loto mama e mafai ona alu a‘e i le mauga o le ALI‘I e tumau i lona afio‘aga pa‘ia. E paia ou lima? E na o lima e paia e mafai ona tumau ai le afi a le Atua, I le suafa o Iesu, Amene.

OPEN HEAVENS

MATALA LE LAGI MO LE ASO SA 10 MATI 2024

Manatu Autu: Pe A Pa’ū Le Afi (When Fire Falls).

Tauloto – Levitiko 10:2 ‘Ona alu ane ai lea o le afi mai luma o le ALI‘I, ‘ua mū ai i lā‘ua, ‘ona la oti ai lea i luma o le ALI‘I..’

Faitauga - Tusi Paia: Levitiko 10:1-5

 Upu Folafola

A e auai I se sauniga, ma o lo’o tatalo tagata uma ia pa’ū le afi, ia e faaeteete auā a pa’ū le afi a le Atua, e oti nisi ae olioli isi. A pa’ū le afi a le Atua e fa’aumatia i latou e lē ‘au ma ia ae fa’ateleina le malolosi o lana fanau. I le Tanielu 3:19-39, ina ua o latou lafo Satarako Mesako ma Apeteniko i totonu o le afi, na fa’aumatia o latou noanoataga e le afi, na savavali ese mai le afi ma ulufale i le fa’aeaina, a’o i latou na ‘au ma le fili sa tutū lata ane i le afi na fano.

I tausaga ua mavae, a’o o’u lauga i se tasi o sauniga, na pa’ū ifo le afi a le Atua. A’o fa’asolo le fa’amalolōga o le ‘au uso, sa tamo’e ese i fafo se fafine mai le sauniga. Na valaau mai i fafo i le uso na la omai, e alu atu e avatu lana ato i fafo se’i alu i le fale. Na fa’ateia le uso na la omai ma fesili pe aisea e lē sau ai ia i totonu e avatu lana ato, ae faapea mai le fafine o loo i ai le afi i totonu o le fale ma e fefe e sau i totonu ne’i mu. A pa’ū le afi a le Atua i se sauniga, e momoli mai ai le fa’amalolōga ma le tulaga si’itia i le fanau a le Atua, ae mafai ona fa’aumatia ai i latou e lē o ‘au ma le Atua. O lona uiga la, a’o e le’i fa’atasi atu iā i latou o valaau i le afi e pa’ū ifo, afai e le’i avea oe ma atali’I po’o se afafine o le Atua, fa’amolemole fai nei loa.

E tatau fo’i ona o’u iloa ma maitauina o nisi taimi, e o’o faafuasei ifo le afi a le Atua i le ogatotonu o se sauniga. E mafai fo’i ona lē iloa e le failauga o le a liligi ifo e le Atua le afi. A pa’ū ifo le afi, na o i latou e ‘au faatasi ma le Atua e sao. O le mafuaaga na o’u filifilia ai le faitauga i la tatou Tusi Paia faitau o le asō ona o’u te fia talanoa faapitoa iā i latou o galulue i le lotu a’o lo’o faia pea le agasala. Tu’u atoa lou ola I le Alii o Iesu Keriso auā afai e te tu latalata i le taimi e amata pa’ū ifo ai le afi, ae e te lē o i le ‘au a le Atua, e lē manuia le taunuuga.

E tu’u avanoa pea le Atua seia e salamō peita’i a pa’ū le afi a le Atua e te le’i salamō, o le aso lea e te maua ai lou taui, e lē toe i ai se avanoa i tua atu. Toatele o lo’o feagai ma ma’i ma mea faigatā auā na pa’ū le afi a le Atua o I le itu a le fili.

Tatalo

Tamā faamolemole faamagalo a’u i agasala uma ua o’u faia ia te oe. Faamolemole fesoasoani mai ia te a’u ia o’u tumau iā te oe i taimi uma, I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 9 MATI 2024

Manatu Autu: Ta’elega i le Afi (A Brush with Fire) 

Tauloto – Esoto 3:5 ‘Ona fetalai mai lea, “‘Aua ‘e te fa‘alatalata mai ‘i‘inei; ‘inā tō ‘ese ia ou se‘evae i ou vae, auā ‘ua sa lava le ‘ele‘ele o lo‘o e tu ai nei.’

Faitauga - Tusi Paia: Esoto 3:1-5

 Upu Folafola

I le 1 Tupu 19:19 a’o ui atu Elia i luma o Elisaia ma lafo atu lona ofu tele i luga iā te ia, na suia ai le olaga o Elisaia mai lea aso. So’o se mea e pa’i i ai Agaga Paia ua pa’i i ai le afi, ma suia ai e lē toe fo’i i foliga tuai. Ua ta’u mai i le Esoto 3:1-5 o le afi a le Atua na o’o atu i le itu I tua o le toafa, ma faaigoa ai e le Atua mai lea aso e o’o mai i le taimi nei o le laueleele Sa. Ina ua taunuu atu I ai Mose, na fetalai mai le Atua e talai ona se’evae auā ua sa le eleele o loo tu ai.

O le tusi o Esoto 4:1-20 o loo faamatala maia ia i tatou le paia o le eleele, auā o mea uma na pa’i i lea laueleele na faapenā ona suia e pei ona tā’ua i le fuaiupu e 20 e faapea; “Ona ave lea e Mose o lana avā ma ona atali’i, na ia fa’ati’eti’e i latou i luga o le asini, ua fo’i atu i le nu’u o Aikupito; ua ave fo’i e Mose le to’oto’o o le Atua i lona lima.”

Ina ua uma ona fetaia’i Mose ma le afi a le Atua, ona alu ai lea o Mose i Aikupito, ma ia ave faatasi ma le to’oto’o o le Atua. O le to’oto’o masani o se leoleo mamoe ua avea ne’i ma to’oto’o o le Atua ina ua pa’i i le eleele Paia.

I ni tausaga ua mavae, sa ma’i tigaina se fafine, ma ua fai mai foma’i ua leai se togafiti latou te toe mafaia e fesoasoani ai iā te ia. Na fautuaina fo’i e foma’i si ana fanau e ave lo latou tinā i lo latou aiga a o’o i le taimi e maliu ai a o loo i ai faatasi ma lona aiga. Ona fai lea o le tinā lenei i lana fanau, “aua le avea a’u i le fale, ave a’u i le ofisa autū o le RCCG.” Ona fai atu lea o lana fanau, “Mama e leai se lotu o faia ne’i. E lē o i o le faifeau.” Fai mai le tinā “Ou te le’i fai atu ou te fia alu e vaai le faifeau; na o le ave a o a’u i o.” O loa lana fanau ave lo latou tinā i le falesā, peita’i ona ua vaivai tele le tinā ua lē mafai ona savali, na fai ai I lana fanau e si’i ia se’i pa’i atu i se tasi o pou o le falesā. O le taimi a na pa’i ai le tinā i le pou, na malolō atoatoa ai mai lona ma’i, ma mafai ai ona toe savali lava ia e fo’i i le taavale. Sa fa’ata’ele e le afi a le Atua le tinā e ala i lona faatuatua ma malolō ai.

E i ai le mana mata’utia i so’o se mea e tuvae i laueleele faapaiaina. Aua e te alu fa’a samasamanoa i sauniga, ia e malamalama o loo e alu i se nofoaga e i ai le afi. A e alu i lau ekalesia alu sauni e fetaia’i ma le Atua ona e vaai lea i vavega tetele i lou soifua. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 8 MATI 2024

Manatu Autu: E tatau ona galue malosi le tagata faauuina - (The anointed must work hard)  

Tauloto – Ioane 5:17 “Ona tali atu lea o Iesu ‘iā te i latou, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u.”

Faitauga - Tusi Paia: 1 Korinito 15:10

Upu Folafola

E toatele tagata a vaavaai atu I tagata faauuina, latou te naunau ma mananao ia latou maua, e latou te fia faaloaloa lima I luga o tagata mama’i ona malolo lea. O le faauuga e faamalolo ai ma’I o lo’o avanoa mo so’o se tagata faatuatua. Fai mai le Mareko 16:17-18, afai e te faatuatua, e mulimuli mai faailoga ia te oe ma e aofia ai ma le faamaloloina o ma’i. Peitai, a e suesueina lelei le Mataio 8:14-18, e te iloa ai o le taimi lava e te maua ai le meaalofa o le faamalologa, o le a lolofi mai le toatele o tagata. Na faamalolō e Peteru le tina o lona toalua, ma e o’o atu I le afiafi, ua o mai uma tagata mama’i ma I latou ua ulufia e temoni. Na aave solo tala ma ua toatele tagata ua lolofi mai mo le faamalologa. 

Afai e te manao a faaloaloa ou lima I luga o tagata mama’i ona malolo lea, e tatau ona saunia lou tagata e galue malosi, e te lauga, faamalolo mai, faamafanafana i e o loto momomo. A iai nisi ua tupu ai ni faalavelave, e latou te valaau mai ia te oe mo se fesoasoani. E tatau ona e faasaoloto I e o nofo pologa, o lona uiga e toatele tagata e ulufia I temoni o le a asiasi atu ia te oe, ma e tusa ma le Efeso 6:12, o le tutuli o temoni e aofia ai ma le tau o taua i le agaga. O le taua I le agaga e le o se vaega mo tagata paie. Sa I lo tatou Alii o Iesu le faauuga (Galuega 10:38) ae I le Mareko 6:31, na ia fai atu I le au soo, ‘sei o tatou malolo’ aua foi ua galue faasoloatoa ua le maua se taimi e tausami ai. Afai e te fia maua le faauuga, ia saunia lou tagata e galue malosi. Ou te le o fai atu ina ia faafefe ai oe, o lo’o fai atu ina ia saunia lou tagata, aua e iai se tagata o lo’o faitauina pe faalogo I lenei faamalosiau o le a siitia ma matua faauuina I le mana, I le suafa o Iesu. 

I le tele o tausaga talu ai, na ou faitaua le 1 Korinito 12:31 o loo faapea mai; ‘'‘Ia ‘outou naunau i mea alofa e sili; ‘ae peita‘i ‘ou te fa‘asino atu ‘iā te ‘outou le ala e silisili lava.' Ua ou iloa ai, e faataga e le Atua le tagata e naunau ma manao I meaalofa e silisili, ma o lea na ou fai ai I le Atua, ‘ou te naunau ma manao I le faauuga sa ia Elia, Paulo, Peteru ma Iesu ao iai I le lalolagi. Faaopoopo uma ia mealofa ona faatele lea faalua’. Na tali le Atua, ‘e matautia ma e te ono afaina ai I lau talosaga aua e le mafai ona toe tuua oe e tagata e te malolo’. Na ou tali, ‘e le afaina ia te a’u’. E tatou te vavevave I nisi o taimi. Ua ou malamalama lelei I lea tulaga I le taimi nei. Afai e te manao ma naunau ia faauuina, tatalo I le tatalo lenei ma lou loto atoa. 

Tatalo

Tama, ua ou sauni e faia lau galuega I so’o se vaega o le lalolagi e te ave a’u iai. Faamolemole ia faauuina a’u i le mana e faia ai lau galuega, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 7 MATI 2024

Manatu Autu: O le mafuaaga o le faauuga - (The purpose of the anointing) 

Tauloto – Luka 4:18 “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva.

‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso,

e tu‘u sa‘oloto i ē ‘ua fa‘asauāina,....”

Faitauga - Tusi Paia: Isaia 61:1-3

Upu Folafola

I le faitauga o le Tusi Paia o le asō, o lo’o faapea mai le Tusi Paia o le mafuaaga muamua o le o’o mai o le Agaga ole Alii ia te oe o le talai o le talalelei. Fai mai le Galuega 1:8 ‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.” 

Fai mai le Atua, ‘e le mafai ona avea oe ma molimau ia te ia I le mafanafana o lou fale po’o se faapotopotoga, e tatau ona e alu atu mai Ierusalema I Iutaia, ma Samaria seia o’o I tuluiga uma o le lalolagi. O le faauuga, e le faaaogaina na o totonu o lou atunuu, e faaaoga foi mo le talaiga o le talalelei I fafo atu seia oo I le tuluiga o le lalolagi. O le mafuaaga lea ou te ofo ai pe a ou vaai I faifeau e le mafai ona o atu I fafo atu o lo latou siomaga mafanafana e talai le talalelei, o faifeau e na o le lauga lava i a latou aulotu ma Ekalesia, o nofoaga e fiafia ma filemu ai. E latou te lē manatu I le lalolagi atoa, ae peiseai ua manatu, e le o se latou pisinisi pe a o tagata I seoli. 

Afai e faauuina oe, o lau galuega muamua o le talai I tagata o lo’o tou faatasi ona faasolo atu lea I tagata latalata ane seia oo I tuluiga o le lalolagi. A e alu atu ma talai le talalelei, o le a e iloa ai o lo’o toatele pea tagata o le lalolagi e latou te lē iloa Keriso. A e savali I totonu o le nofoaga tutotonu e taua o le ‘Aai o Togalauapiga’ I Nigeria, e te vaaia ai fu’a e faaalia ai ata ma igoa o atunuu e lei mafai ona oo atu iai le talalelei ia Iesu Keriso. E faia lea ma faamanatu iai tatou e lei valaauina I tatou e tumau I tatou nofoaga mafanafana, ae e tatau ona tatou o atu e manumaloina agaga mo le Alii. 

Ua 82 nei ou Tausaga, tusa po’o le a lo’u matua e lei taofia ai lou alu atu I soo se nofoaga e talai le talalelei aua ou te iloa lelei o le mafuaaga muamua lea na faauuina ai a’u e le Atua. Ua ou oo I atunuu e toatele tagata o le lalolagi latou te le iloa e iai ni atunuu faapea. O le mafuaaga e toatele ai faifeau talavou e tulai mai ma pauu, ona ua latou maua le faauuga ae filifili e nonofo I o latou nofoaga o lo’o filemu ai. 

Le au pele e, ua tele le seleselega ae ua toalaiti le au faigaluega. E avanoa mai ea lou tagata? Ia e alu atu ma galulue ma lou Tama I le lagi aemaise i le taimi o lo’o e talavou pea. O le a le mea o lo’o e faia I le faauuga a le Atua I lou olaga? I le suafa o Iesu, Amene.