Samoan Devotional

OPEN HEAVENS

MATALA LE LAGI MO LE ASO SA 25 FEPUARI 2024

Manatu Autu: O le Valaau ia Faatuputeleina (A Call To Multiplication)

Tauloto – Isaia 54:2 “‘Ia fa‘alautele le mea e tu ai lou fale ‘ie; ‘ia fāloina ‘ie puipui o mea ‘e te nofo ai. ‘Aua ‘e te fa‘aitiitia; ‘ia fa‘aumiumiina au maea ma ‘ia malolosi au fao..”

Faitauga - Tusi Paia: Isaia 54:2-4

Upu Folafola

E toatele tagata e talia le valaau a le Atua, amata i le galuega e tusa ma le valaau, mā e latou te iloa loa ua ausia se vaega tele, ona gata ai lea ua malie le loto, ma le manatu o le aupito lelei lea e mafai ona latou maua. E lē o le faamoemoe lea na tuuina mai e Iesu mo i tatou ina ua ia tuua le lalolagi; Na ia fetalai ia fai i tatou ma molimau ia te ia, mai Ierusalema (le nofoaga o e alala ai) i Iutaia uma lava ma Samaria e o’o lava i le tuluiga o le lalolagi (Galuega 1:8). E fia silasila le Atua i le fa’atuputeleina o au galuega ia manuia ai le lalolagi. Aua le taofia au galuega seia manumaloina le lalolagi atoa mo Keriso.

O Isaako, sa lē na o le tupu ma ola ma avea ma tagata taualoa, fai mai le Tusi Paia sa tupu ma siitia pea (Kenese 26:12-13). Fai mai le Aposetolo o Paulo, sa momo’e punoua’i pea mo le lumana’i; fai mai le Filipi 3:13-14: “Le au uso e, ou te lē manatu ua o’u maua, a’o le mea e tasi ou te faia, ou te faagalogalo i mea ua tuana’i, ou te momo’e punoua’i fo’i i mea o lumana’i, ou te tausisi atu I le faailoga, ia maua ai le taui na valaauina ai a’u mai luga e le Atua ia Keriso Iesu.”

Ana o’u faalogo i tagata na fai mai i le tele o tausaga ua tuana’i, ua o’u taunuu i le taunuuga, semanū e lē tupu le suiga ua i ai ne’i le RCCG. Sa o’u fai i nai uso nei, “Faafetai lava, o lea ou te le’i amata.”

Ou te manatua le silia ma le 30 tausaga talu ai, ina ua sau se uso i totonu o lo’u ofisa a’o o’u anapogi mo le 40 aso. Na iloa mai a’u o o’u taoto ua vaivai le tino, auā ou te le’i ‘ai mo ni vaiaso, ma ia faapea mai, “O le ā se isi mea na e te sailia ua e saga atugalu ai? O lou falesā e aupito telē i Aferika, o le ā se isi mea o e mana’o ai?” Pe ana o’u amanaia nei ituaiga manatu, atonu ailoga e te faalogo iā Adeboye i aso nei.

E lē gata e tatau ona e tupu ma fa’ateleina aafiaga lelei e te faia i le lalolagi, ae tatau fo’i ona si’i si’i i luga lou iloa o lē na auina atu oe. O le malosi na aumaia oe i le tulaga ua e i ai nei, e lē lavā lea e avea oe i le isi laasaga i luga atu. Na folafola mai e Iesu Keriso se valaaulia mo i latou uma e fia inu, e o atu iā te ia e feinu ai. Na toe faapea mai o sē faatuatua ia te ia, e tafe mai vaitafe mai totonu iā te ia, o le vai ola lava (Ioane 7:37-38). E mana’omia lou inu mai pea iā te ia le vaiola pe a e mana’o e te tupu pea ma fa’ateleina. O le loloto o lou saili i le Atua, o le tele lea o lana foai sasa’a mai ia te oe. Aua nei gata le maualuga o mea e te ausia, momoe punouai I mea o lumanai seia manumalo le lalolagi atoa mo Keriso, I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 24 FEPUARI 2024

Manatu Autu: O le Valaau ia Tutumau (A Call To Tenacity)

Tauloto – Roma 4:20 “E manumālō lima o ē filigā i galuega; a o lē paiē, e fai taulaga o ia.”

Faitauga - Tusi Paia: Kenese 37:6-28, 41:39-44

Upu Folafola

Ina ua ou su’esu’e iā i latou na muamua iā te a’u i le galuega a le Atua, na o’u iloa ai o le toatele o i latou na o latou maua folafolaga mai le Atua faatatau i le galuega ua ia valaauina latou e fai. Peita’i e fai si umi o le taimi e lei vavala mai le folafolaga e pei ona fetalai le Atua ia I latou, ae na ō latou galulue pea seia o’o ina faataunuuina e le Atua lana folafolaga.

A valaauina oe e le Atua mo se galuega, e faaali atu e le Atua iā te oe le taunuuga manaia. Peita’i e amata loa ona e galue i le galuega ua totofi ai oe amata loa ona e vaaia faigata e tatau ona e ui ai ia maua ai le taunuuga manuia na ia folafolaina. Na fai miti a Iosefa o le a ifo atu ona uso ma ona matua iā te ia. E manaia ma fa’afiafia loto nei miti, peita’i a’o le’i faataunuuina ia miti, na faatauina Iosefa e fai ma pologa, na tu’ua’iina pepelo ma lafo i le falepuipui. Ae le’i fa’avaivai ai, na tumau pea lona faamoemoe, ma lona talitonu e i ai le aso e faataunuuina ai e le Atua lana folafolaga- ma na taunuu lava.

Le au pele e, afai na valaau le Atua ia te oe e fai se galuega ma folafola atu ni manuia mo oe ae o’o mai i le taimi nei e lē o tutusa ana folafolaga ma mea na e tutupu i lou olaga, aua e te popole. O i latou uma lava e i ai le valaau a le Atua i o latou olaga, e faapea fo’i le faigata o le ala e taunuu ai le valaau, peita’i na o i latou e maua’a ma tumau na faamanuiaina.

Ina ua valaau le Atua ia te a’u o’u te galue tumau i lana galuega, o le tasi ana folafolaga na fai mai iā te a’u, o le a o’u ta’ita’ia se ‘autau malosi o aso e gata ai mo ia. O le taimi lea o to’aitiiti lava le ‘aulotu. Sa ou manatu o le a ia vave fa’atupu le aulotu ia toatele ma maua ai le ‘autau peita’i, a faaopoopo ni tagata se toalua i le tasi vaiaso, e o’o atu i le isi vaiaso ua faaitiitia i le toafā. Sa o’u faia ni semina, anapogi, tatalo ma fai uma mea ou te iloa e tatau ona tupu ai le lotu, peita’i e leai. Ua o’u tuua la’u galue totogi lelei sa o’u galue ai, ae o’u tali i le valaau a le Atua i lo’u olaga, ma ua fai nei a’u ma mea ula a a’u uo i le Iunivesite auā i o latou manatu ua leaga lo’u ulu ua fai ai lea fa’aiuga. Na foliga e poloka mea uma, ae o’u te le’i fa’avaivai ai. Ou te le’i fa’alotolotolua i lo’u faatuatua ma e le’i māluelue lo’u talitonu ma lo’u fa’amoemoe i le Atua. O le asō ua silia ma le 190 atunuu o le lalolagi ua i ai le Ekalesia RCCG ma ua mafai ona matou faapea atu o se ‘autau malosi o ona po e gata ai.

Faapei o Iosefa, aua e te fa’avaivai ma fa’alotolotolua i taimi faigata; taumafai pea ma savali i luma ona e vaai lea I le faataunuuina e le Atua o ana folafolaga i lou soifua. I le suafa o Iesu Keriso, Amene.

 OPEN HEAVENS

MATALA LE LAGI MO LE ASO FARAILE 23 FEPUARI 2024

Manatu Autu: O le valaau e galue ma le filigā (A call to diligence) 

Tauloto – Faataoto 12:24 “E manumālō lima o ē filigā i galuega; a o lē paiē, e fai taulaga o ia.”

Faitauga - Tusi Paia: Galuega 28:1-6

Upu Folafola

Ina ua ou iloa ana le seanoa le mauaina e le Atua o lo’u nei tagata, semanu ou te tumau ai lava o se faiaoga I le Iunivesite o lo’o agai atu I seoli, na ou faia ai loa se faaiuga, ou te le fia ola e pei o isi kerisiano. O se tagata faiaoga I le matematika e le manao e pei o isi faiaoga matematika, e suesue ma le filigā mea na ausia e i latou ua o’o I le faatumutumuga o faiaoga matematika e pei o Pythagoras ma isi. Ona ou te lei manao e pei a’u o isi kerisiano, e tolu tausaga o ou suesueina tagata na faaaogaina tele e le Atua. O se tasi o I latou o Elia. Afai na e faalogo I a’u lauga e faaigoaina o le ‘Agai I luga’ e maua I luga o le (Dove TV’s You tube channel), e te iloa ai na tele se taimi o ou suesue I le olaga o Elia. Na ou suesue foi ia Paulo aua o ia o se tagata e maualuga lona a’oa’oina e pei o a’u, o ia o se polofesa o le Tulafono na galue I le galuega o le talalelei e pei o a’u ma na manuia lona iuga. Ua ou iloa mai le 2 Timoteo 4:6-8 o se tagata e galue ma le filiga. Na galue ma le filiga Paulo I vaega uma o lona olaga. I le Galuega 28:1-6 ina ua afatia le va’a I le motu o Malta, a’o nonofo tagata e faamafanafana I le afi ona ua ma’alilili, o Paulo le tagata na alu e ao fafie. I aso o le amataga o le Ekalesia I taimi o fonotaga tetele, sa masani ona matou o ma tama e ao mai fafie e faaaoga I le fonotaga. Sa matou fufulu ipu ma faia isi galuega faatauvaa, e faia ma le olioli. 

So’o se taimi e fufulu ai ipu ae o mai nisi e fao atu le mea fufulu ipu mai ia te au, ou te fai lava iai, ‘fufulu ane lau vaega o ipu ae tuu pea lau vaega ou te fufuluina’. O lima e le mafai ona faia galuega palapala mo le malo o le Atua e le mafai ona faaaogaina e faamalōlō ai ma’i. A fai se polokalame I le tou Ekalesia, aua e te soso ese ma galuega palapala ma le faatauvaa. Faapalapalā ou lima, e te maofa I le faauuga e amata ona gaoioi I ou lima. 

O le toatele o faifeau lagolago I le Taitai aoao o le Ekalesia I le taimi nei, o tama sa galulue ma faia feau I aso ia. Auā foi o I latou e iloa ma masani I le galue ma le filiga ao amata mai, e faatuatuaina foi la e galulue ma le filiga I le taimi e manuia ma siitia ai. Ou te masani ona ou vaai I tagata o faapea mai e toatele tagata ua valaauina I nei aso. E moni e ono iai le valaau, ae ua maea ona tofotofoina? E le taitai ona lava tau o le valaauina. E mafai ona faamatu’u atu se galuega e te vaaia ae ou alu ou te moe ma le iloa e te faataunuuina mae’ae’a? Na o I latou e galulue ma le filigā e faaaogaina lelei lo latou valaauina. O le valaauina e aunoa ma le galue filigā e le fua mai ai le manuia, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 22 FEPUARI 2024

Manatu Autu: O fea e te iu iai? (Where will you end up?) 

Tauloto – Failauga 7:8 “E sili ‘ona lelei o le i‘uga o se mea i lona amataga. E sili ‘ona lelei o lē ‘ua ‘onosa‘i i lē ‘ua loto fa‘amaualuga.”

Faitauga - Tusi Paia: Luka 16:19-31

Upu Folafola

E toatele tagata o lo’o soifua i le lalolagi nei, ua tele ina seetia I le tuinanau o le agasala. Ua manatu ane I latou, o lo’o ola ma soifua I le lelei o le olaga, ae galo iai latou, e tatau ona manatu I lo latou iuga e sili atu I le tulaga o lo’o iai nei. O le taimi I le soifuaga nei, e pei o le sau o le matagi ma toe mou atu. E iai le nofoaga e lipoti i ai tagata uma pe a moeiini o latou fofoga I le maliu, ona o’o atu lea I lena nofoaga seia o’o I le faavavau. O la’u fesili ia te oe i le taimi nei, a e o’o i le faavavau, o le a le itu o le a e i ai, o le itu i le lagi po o le itu o seoli?

Fai mai le Tusi Paia, a toe afio mai le Alii, o le a ia vaevaeina tagata i ni vaega se lua, o mamoe i lona itu taumatau ma le ʻoti i lona itu tauagavale. (Mataio 25:31-46 ). Fesili ane ia te oe lava, ‘O le ā le itu o le Atua o le a ou iai pe a o’o mai le iʻuga?’ E le taua le tulaga o loo e iai nei, ae o le nofoaga e te alu iai I le iuga. O se tasi o mafuaaga ou te le fefe ai i le oti, ona ou te mautinoa o le oti i lenei lalolagi, o lo’u avanoa lena i le Malo o le Atua i le Lagi. Afai e te le o mautinoa po o fea e te alu i ai pe a  tuua lenei lalolagi, e tatau ona e fefe i le oti. O le mea e sili ai, pe e te fefe i le oti pe leai, e tofu lava le tagata ma lona taimi ma le Alii. A o’o mai lena aso, talosia o le a e i ai i le itu taumatau o le Atua.

Afai o e tu mo le Atua i le taimi nei, faamolemole ia e tumau pea. Tatalo i le Atua ina ia faatumauina lou faatuatua e o’o i le iuga, aua e le afaina po o le a le umi na auauna ai se tagata I le Atua, afai e toe foi I le agasala ae oo i le oti I lea taimi, e fano i seoli e pei ona tatou faitau ai i le Esekielu 18: 24:

‘Ae ‘āfai o liliu ‘ese lē ‘ua amiotonu i lana amiotonu ma ‘ua fai amio leaga ma ‘ua fai e tusa ma mea uma e ‘inosia e faia e lē ‘ua amio leaga, e ola ‘ea ia? O lana amiotonu uma na ia faia, e lē manatua; o lana agasala ‘ua ia agasala ai ma ona sesē ‘ua ia sesē ai, ‘ona o ia mea e oti ai o ia.

E iai foi tagata afai na agasala i lona olaga atoa, ae latalata atu I le taimi e maliu ai ae salamo ma ma amata ona ola e pei o Keriso, e maua e lena tagata  le lagi (Esekielu 18:21-22). E na o i latou e tumau seʻia oo i le gataaga e faaolaina (Mataio 24:13).

Tatalo

Tama, fai mai le Iuta 1:24, na o lau afio e mafai ona leoleo I le tagata ina nei paū. Faamolemole leoleo ia te a’u ina ia ou tumau ma tulai pea seia o’o I le iuga, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 21 FEPUARI 2024

Manatu Autu: OPEN HEAVENS

MATALA LE LAGI MO LE ASO LULU 21 FEPUARI 2024

Manatu Autu: O le lima taumatau o le Atua (The Right hand of God) 

Tauloto – Salamo 48:10 “Le Atua e, e pei o lou suafa, e fa‘apea lou vi‘iga ‘ona o‘o i tulu‘iga o le lalolagi ‘ua tumu lou ‘a‘ao taumatau i le amiotonu...”

Faitauga - Tusi Paia: Salamo 89:8-13

Upu Folafola

Ua ou malamalama I le eseesega o le taumatau ma le agavale e sili atu I lo le faatulagaina I le tino.  Mo se faataitaiga I le Mataio 5:30, na talanoa mai ai Iesu I mea uma e faia ina ia aua nei misia le lagi, na fetalai mai ‘‘Āfai fo‘i ‘e te tausuai i lou lima taumatau’ e faigofie foi le fetalai mai ‘afai e te tausuai I lou lima’ peitai na ia faamaoti mai le lima taumatau ona o lona taua. I le Kenese 48:8-20 ao faamanuia e Iakopo atalii e toalua o Iosefa, na ia tu’u lona lima taumatau I le atali’i laitiiti ae tu’u le lima agavale I le atalii matua. O le I’uga, na sili atu manuia na maua e le atalii laiitiiti I lo le matua (Teuteronome 33:17). 

O lenei, afai e malosi faapea le lima taumatau o se tagata, e te manatu I le malosi e sili atu o le lima taumatau o le Atua aua na faia I tatou I lona faatusa (Kenese 1:26). Fai mai le Salamo 17:7, e faaola e le Atua I lona aao taumatau. I nisi faaupuga, afai e faasaoina mai se tagata mai le gutu o seoli, o le lima taumatau o le Atua o loo galue. O le mafuaaga lea e te tatalo ai ina ia siitia le aao taumatau o le Atua mo lou aiga uma e le’i faaolaina. E le gata I lea fai mai le Salamo 139:10 e ta’ita’i I lona lima taumatau. Fai mai le Isaia 41:10 e siitia e le Atua I lona lima taumatau. A maea ona ia faaolaina ia te oe, e na te ta’ita’i ia te oe I lona lima taumatau, e na te faia ia e tulai pea I le lima taumatau e tasi. Fai mai le Esoto 15:6 e le gata e iai le malosi I lona lima taumatau, e iai foi le mamalu ma le faaneetaga. I le Esoto 15:11-12 fai mai le Tusi Paia na nutipalaina e le aao taumatau o le Atua le tiapolo. I le Mareko 14:62 fai mai le Tusi Paia o le lima taumatau o le Atua o le lima taumatau o le mana. O le lima taumatau o le Atua e te maua ai le olioli ma le loto malie e faavavau (Salamo 16:11). 

Le au pele e, ia e mataituina, e na o le au faaolaina e iai I le lima taumatau o le Atua (Mataio 25:34). Afai e te lei faaolaina, e tatau ona lafoai lou ola ia Keriso aua o I latou o lo’o I lona itu tauagavale e tigaina I latou. O I latou ia e lilivau nifo ma taufaitagiaue ona o le amiolega o loo soifua ai. Lafoai lou ola I a Keriso I le asō ma ia e maua le itu taumatau o le Atua. 

Tatalo

Tama, faamolemole ia sii ane lou aao taumatau mo a’u ma ia faaumatia fili uma o lo’o faasagatau mai ia te a’u I le suafa o Iesu, Amene.  

Tauloto – Salamo 48:10 “Le Atua e, e pei o lou suafa, e fa‘apea lou vi‘iga ‘ona o‘o i tulu‘iga o le lalolagi ‘ua tumu lou ‘a‘ao taumatau i le amiotonu...”

Faitauga - Tusi Paia: Salamo 89:8-13

Upu Folafola

Ua ou malamalama I le eseesega o le taumatau ma le agavale e sili atu I lo le faatulagaina I le tino.  Mo se faataitaiga I le Mataio 5:30, na talanoa mai ai Iesu I mea uma e faia ina ia aua nei misia le lagi, na fetalai mai ‘‘Āfai fo‘i ‘e te tausuai i lou lima taumatau’ e faigofie foi le fetalai mai ‘afai e te tausuai I lou lima’ peitai na ia faamaoti mai le lima taumatau ona o lona taua. I le Kenese 48:8-20 ao faamanuia e Iakopo atalii e toalua o Iosefa, na ia tu’u lona lima taumatau I le atali’i laitiiti ae tu’u le lima agavale I le atalii matua. O le I’uga, na sili atu manuia na maua e le atalii laiitiiti I lo le matua (Teuteronome 33:17). 

 OPEN HEAVENS

MATALA LE LAGI MO LE ASO LUA 20 FEPUARI 2024

Manatu Autu: O le a le fetalaiga a le Atua? (What did God say?). 

Tauloto – Sapakuka 2:1 “‘Ou te tu i le mea ‘ou te leoleo ai, ‘ou te tu fo‘i a‘u i le ‘olo, ‘ou te va‘ava‘ai fo‘i ‘ina ‘ia ‘ou iloa pe se a se mea e fetalai mai ai o ia ‘iā te a‘u pe se a fo‘i se mea ‘ou te tali atu ai i la‘u finauga..”

Faitauga - Tusi Paia: Salamo 119:101-105

Upu Folafola

Ina ia ola ma soifua manuia I le lalolagi nei, e le na o le mea‘ai e te mana’omia. I le Mataio 4:4 o loo faapea mai e te manaomia afioga uma e tulei mai i fofoga o le Atua. O lona uiga e tatau ona e mata’ituina ma faalogo I le Atua ia faifaipea. E toatele tagata e manatu a tatalo i le Atua, o se ala itu tasi, e na o le o atu I le Atua ma laulau atu iai o latou faafitauli ona gata ai lea iina. E leai! O le vaega e pito sili ona tāua o le tatalo, o le faalogo lea I le Atua po’o le a lona finagalo I so’o se mataupu. O le ulufale mai o ana afioga e oo mai ai le malamalama (Salamo 119:130). 

I le tele o taimi pe a ou feagai ma ni tulaga faigata, ae ou valaau i le Atua mo se fesoasoani, ae leai se tali mai, ou te faapea ane, ‘ua tupu le faalavelave’, peitai e fa’aauauina pea ona ou tagi atu ia te ia. A o’o ina ou fa’alogo atu ua tali mai, ona ou iloa foi lea, ua fo’ia le faafitauli. E o’o foi pe a tali mai le Atua e faatonu ma lapatai a’u, o le tali mai e faailoa mai ai ia te a’u, o lo’o faafofoga I a’u talosaga ma faaali mai se mea o le a tupu.  

O lo’o faamaumau I le Tusi Paia i le 1 Samuelu 30: 1-18, le tulaga na tupu ia Tavita ma ana autau ina ua tāfea ma avea uma e le au Ameleka o fafine, o latou aiga ma mea tōtino uma, seia toe fa’afo’isia mai mea uma I le taitaiga a le Atua. O se itulā pogisa tele mo Tavita ma le nu’u a’o le’i tali mai le Atua. Na matua fetāgisi alii o le nu’u, ma le faanoanoa tele, ua o’o ina taupulepule e fasioti Tavita. Fa’afetai na poto le gaioiga a Tavita ma ua ia saili I le Atua po’o le a le mea e faia, ma ina ua usita’ia ma mulimuli I faa’tonuga a le Atua, sa toe faafo’isia mea uma ia tei latou.

I le tauloto mai le Tusi Paia o le asō, ua faapea mai Sapakuka e tu i le mea o leoleo ai, i le ‘olo, ma va’ava’ai po’o le a se tali mai o le Atua. Le ‘au pelē, o le ā se tali mai a le Atua I ou mana’oga ua e folasia i ona luma? O le a se tali a le Atua e uiga i lou aiga, i lou lumana’I, o lau galuega ma ou tofiga i le lumanai? Afai o ‘oe o se fanau a le Atua, ia e silafia, e finagalo le Atua e talanoa ia te oe e uiga i lau mataupu. Pagā lea, e tele le ‘au uso fa’atuatua, latou te le fa’atalitali ma fa’alogologo mo se finagalo fa’aalia a le Atua mo i latou. I le Ieremia 33:3 o lo’o faapea mai le Atua: “Ia e valaau mai ia te a’u ona ou tali ai lea ia te oe”.  O lo’o faapea mai “Ou te tali ia te oe”. O lona uiga, a e tatalo ia te ia, ta’u atu ia te ia, ‘Le Alii e, ou te le mālolo sei vagana ua e tali mai ia te a’u’. Ia manatua, o le vaega e pito sili ona tāua o le tatalo, o le fa’alogo I le finagalo o le Atua e faatatau I lau mataupu, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 19 FEPUARI 2024

Manatu Autu: Matua saili (Diligently seeking). 

Tauloto – Ieremia 29:13 “E sā‘ili mai ‘outou ‘iā te a‘u, tou te maua fo‘i, pe a ‘outou sā‘ili mai ‘iā te a‘u ma ‘outou loto ‘atoa...”

Faitauga - Tusi Paia: Salamo 63:1-8

Upu Folafola

Fai mai le Eperu 11:6 e tauia e le Atua I latou e matua saili ia te ia. E na te tauia na o I latou e faia mea lelei ma faia i le lelei atoatoa, o lona uiga o lenei fuaitau o lo’o faapea mai, e finagalo le Atua I ona tagata e matua saili ia te ia. O le mafuaaga lea na faatonu ai e le Atua ia Tavita ia matua saili ia te ia, ma o le a le tali a Tavita?

Na fai atu lo‘u loto ‘iā te oe i lau na e fetalai mai, “‘Ia ‘outou sā‘ili‘ili mai ‘iā te a‘u; le ALI‘I e, ‘ou te sā‘ili‘ili atu i lau afio, Salamo 27:8

Fai mai Tavita, ‘Le Atua e, afai ete faatonu a’u ia ou saili atu ia te oe, ou te saili ia te oe, e fai mai lou loto ou te saili ia te oe’. O le aso, o lo’o finagalo le Atua e te saili atu ia te ia. O le a lau tali i ai?

E te saili i le Atua i le suesue i le Tusi Paia ma le tatalo. E ui e toatele tagata e latou te faia e pei o isi galuega, ao i latou e matua saili, e sili atu suesuega latou te fai. E latou te suesue i le Tusi Paia mo le tele o itula, e matua saili i se mataupu seia malamalama i le finagalo o le Atua i lea mataupu. Ua latou manatu o le tatalo e le o se galuega, o le vaega masani o le olaga. O so’o se taimi e te vaai ai iai latou, e tatalo aua e fai mai le 1 Tesalonia5:17 e tatalo e le aunoa. A tatalo, e le na o le faaaogaina o upu, e sasa’a atu o latou loto i le Atua ma le naunautaiga ‘Le Alii e, ou te fia iloa atili lau Afio’. E tele itula e na o le mafuta ma talanoa loloto ma le Atua. 

Le au pele, saili i le Atua i aso uma seia e moe, e o’o i le taimi o e moe. Fai mai Solomona, e o’o i le taimi e moe ai o loo ala lona loto ma faalogo I Lana pele o loo fai mai e sau. (Pese a Solomona 5:2). Na fai mai Tavita i le Salamo 63:6-8 e mafaufau i le Atua i lona moega i le po, e o’o i lona loto e mulimuli i le Atua. O faamatalaga nei e atagia ai le alofa moni i le Atua. Ae faapefea oe ma lou Atua o lē e pele ia te oe?

E iai le taui o le matua saili i le Atua. Le au pele e, ave ou aso e saili ai i le Alii ma ia na o ia. Saili ia te ia a’o e tausami, ia taulai ou naunautaiga uma ia te ia. Afai e matua saili ia te ia, e tatala mai lona finagalo ia te oe i ni auala e leiloa e le tele o kerisiano. E iai mataupu ua faailoa mai e le Atua ia te au i le Agaga e le mafai ona ou faailoa faalauaitele aua e ono le malamalama iai i latou e lē saili i le Atua. Fai sau faaiuga e matua saili i le Atua e amata atu nei, i le suafa o Iesu, Amene.

OPEN HEAVENS

MATALA LE LAGI MO LE ASO SA 18 FEPUARI 2024

Manatu Autu: E te talafeaga? (Are you relevant). 

Tauloto – Galuega 6:5 “Ua lelei fo‘i le ‘upu i le to‘atele uma lava; ‘ona filifili lea e i latou ‘iā Setefano, o le tagata ‘ua tumu i le fa‘atuatua ma le Agaga Pa‘ia ma Filipo, ma Pokoro, ma Nikanora, ma Timona, ma Pamena, ma Nikolao o le Anetioka sa lotu i le lotu a sa Iuta...”

Faitauga - Tusi Paia: Ioane 15:1-6

Upu Folafola

E eseese ituaiga tagata o lo’o galulue i Ekalesia i aso nei. O nisi e matua’i talafeagai lava i le galuega a le Atua ma, e iloa gofie e tagata uma pe a lē auai i se galuega. Ae I ai fo’i isi tagata e seasea fetagofi e fai se galuega, e o’o lava i le matagaluega o lo’o galulue ai. E sili atu fo’i ona leaga ituaiga tagata e lavea i le lisi o le ‘au galulue a’o le faatinoga e fiu e su’e e lē maua. E seāseā auai i fonotaga a le ‘au galulue ma e leai ma se mea e iloa ai o tagata galulue mo’i mo le Atua. Ou te lē iloa po’o le fea o nei ituaiga tagata galulue o lo’o e i ai, peita’i afai e lē o iloga lou tagata galue e maitau gofie ai e tagata lou lē auai i se galuega, lona uiga ua manaomia ona faaleleia.

O le ulua’i vaega o tagata galulue I le Tusi Paia o tiakono e to’afitu ua tāua i le Galuega 6:5. O se tasi o i latou o Filipo, ma o loo tāu’a I le Galuega 21:8, sa avea o ia ma se tasi e tāu’a o lē e folafola le tala lelei. O loo tāu’a manino ia i le Tusi Paia o le “fai evagelia,” o lona uiga atonu sa i ai se tasi po’o nisi sa lauga le tala lelei a’o Filipo lava o le fai evagelia. E lē gata i lea, o lo’o fa’amatalaina o se tasi o le to’afitu e faamanatu mai ai ia i tatou o ia o se tasi o tiakono e to’afitu na filifilia. Peita’i e ese mai ia Filipo ma Setefano, o le isi to’alima e le’i toe tāua o latou igoa, tatou te le’i toe faalogo i ai.

Na fesili mai ia te a’u se tasi o le fanau a la’u fanau i se tasi aso, “Tamā, e te iloa lelei le Tusi Paia?” Sa o’u tali atu, “Ioe” na toe fesili mai, “O ai Pokoro?” sa o’u tali i ai ou te lē iloa. Sa toe fesili “O ai Timona?” na o’u tali, “o Simona?” fai mai “leai o Timona”. Na o’u faapea atu, “ou te lē iloa fo’i se Timona.” Ona faapea mai lea o lo’u afafine, “o Pokoro ma Timona na fa’au’u faatasi ma Setefano ma Filipo e fai ma tiakono.” Sa o’u tali, “e moni? Ia i ai le alofa mutimutivale o le Atua ia Pokoro. Ou te iloa Setefano, ou te iloa fo’i Filipo, a’o le uso ia Pokoro, o le a se mea na ia faia e ono manatua ai o ia?” E faapenā fo’i oe, a ta’u lou suafa i lau ekalesia o e galue ai, e mafai ona manatua e tagata ni mea sa e faia?

E lē o fai atu e tatau ona e fealua’i solo e fa’ailoa i tagata uma galuega o lo’o e faia. Peita’i e tatau ona iloga lau galue i totonu o le vaega poo le matagaluega ua filifilia e te galue ai. Fa’ata’ita’iga, afai o ē lavea I tagata e faamamaina le falesa, e tatau ona iloa uma e tagata, a e i ai e matua’i iila ma mamā le falesā. Ia matua’i tele se suiga pe a e i ai ina ia lē mafai e se tasi ona faapea mai e lē iloaina oe, pe nātia lou talafeagai i totonu o le malumalu o le Atua, I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 17 FEPUARI 2024

Manatu Autu: Aua e te tago I lona Viiga (Don’t Touch His Glory). 

Tauloto – Mataio 6:2 “O lea a e avatu ni mea alofa, ‘aua ne‘i e ilia le pū i ou luma, e pei ‘ona faia e tagata; fa‘afiaamiotonu i sunako ma ala, ‘ina ‘ia vi‘ia o i latou e tagata. E moni, ‘ou te fai atu ‘iā te ‘outou, ‘ua maua e i latou lo latou taui..”

Faitauga - Tusi Paia: Mataio 6:1-4

Upu Folafola

Ua o’u vaai i tagata e fesoasoani i nisi o le ‘au uso, ma fiafia e faamatala ma tāla’i solo la latou fesoasoani, i so’o se avanoa latou te maua. E leaga tele lea amio ma e lē tusa ma aoaoga a le Atua. Na fetalai Iesu I le Mataio 6:3, A ‘ē avatu ni meaalofa aua ne’i iloa e lou lima tauagavale le mea ua faia e lou lima taumatau. Ua faapea mai Mataio 5:16, A susulu atu lo outou malamalama i luma o tagata, ina ia latou iloa la outou amio lelei, latou te Viia ai le Atua. I se isi faaupuga, e te lē sailia sou oe lava viiga i galuega lelei e te faia; o le Viiga e tatau ona fa’afo’i i le Atua, ua na o ia lava e toatasi.

A ē fesoasoani i se tasi, ae o’o i se aso e toe fo’i e ta’u i le uso, “Manatua lo’u fesoasoani iā te oe i le isi aso?” Tusa ua e taumafai e fai lea uso ma pagota ia te oe. Aua ne’i e tu’u i se isi se lagona o loo nofo aitalafu iā te oe ona o se fesoasoani sa e faia i ai. O ni mea lelei e te faia, fai mo le Atua. Aua ne’i avea oe o se tigā i se uso poo se faamanatu i se maasiasi ona sa e fesoasoani i ai. E ao ona e manatua o le fa’au’uga a le Atua na ta’ita’iina oe e te faia mea lelei mo lea uso. Ua leva na fuafua e le Atua le fesoasoani, o lou faamanuiaga le filifilia o oe e fa’atinoa.

Fai mai Efeso 2:10; Auā o lana lava galuega i tatou, na faia i tatou iā Keriso Iesu, ina ia faia galuega lelei, na saunia anamua e le Atua, ina ia tatou savavali ai. Afai na faia oe e le Atua mo galuega lelei ma tofia oe e faataunuuina, ae e alu ma tāla’i e pei o oe lava e toatasi ma lau fesoasoani le mafuaaga ua manuia ai se uso, o lenā ua e taumafai e fao le viiga o le Atua. A e malamalama i le Atua, e faigofie ona e iloa na te lē avatua lona mamalu i se tasi.

Fai mai Isaia 42:8; O a’u o le Alii, o lo’u igoa lea; o lo’u mamalu fo’i o’u te lē avatua lea i se tasi, ma lo’u viiga o’u te lē avatua i tupua ua ta.

Aua ne’i e taumafai e finau ma le Atua i galuega lelei o loo ia faia i olaga o nisi e ala iā te oe. Ua na o oe o se mea faigaluega i lona aao, ma o le viiga e ao ona fo’i tutasi iā te ia. A e faia faapea, e te maua lou taui mo lau galuega lelei ua fai, ae lē o le malaia ona o lou taumafai e fao lona viiga. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 16 FEPUARI 2024

Manatu Autu: Faaeaina mai le Atua (Divine promotion). 

Tauloto – Salamo 75:7 “a o le Atua na te fa‘amasinoina, o ia na te fa‘amaulaloina le tasi, o ia fo‘i na te fa‘aeaina i luga le tasi.”

Faitauga - Tusi Paia: Salamo 75:4-7

Tatalo

O le faaeaina e pito sili ona lelei mo so’o se tagata, o le faaeaina lea mai le Atua, e le mafai ona avea e se tagata lona viiga. I le 1 Samuelu 16:1-13, na faauuina se tamaitiiti e avea ma tupu, e le faapea na faia ona sa fiafia iai se tagata pe na talanoa foi iai se tagata, ae ona ua finagalo le Atua e faaeaina o ia. Ou te talitonu o lo’o finagalo le Atua e faaeaina se tagata o loo faitauina lenei upu, ma o oe lea I le suafa o Iesu. 

A amata ona faaeaina oe e le Atua, e le mafai ona e iloa po’o le a le maualuga e na te ave oe iai auā foi o ona aao e faavavau (Teuteronome 33:27). Fai mai le 1 Samuelu 2:8, Na te fa‘atula‘iina le tagatalautele nai le ‘ele‘ele, na te fa‘aeaina fo‘i le tagata mativa nai le fa‘atafuna ‘Ia nofo fa‘atasi ma ali‘i, ‘ia fai fo‘i mo latou tofi le nofoāli‘i mamalu, o le faaeaina moni lea. O le matuā mativa lava o le tulaga na iai lo’u tama, e oo I tagata matitiva latou te lauina le mativa. O le aso na ia faatauina ai se faamalu na matua ova le fiafia o le matou aiga e peiseai ua faatau se fale fou. Afai e mafai e le Atua ona siitia se atalii o se faifaatoga mativa ma avea ma tagata e fiafia Taitai o malo e feiloai iai, e te iloa ai iina e le mafai ona e iloa le maualuga e siitia oe iai e leAtua. Na ia faaeaina Tavita mai le tulaga pito faatauvaa I lona aiga seia o’o ina avea ma Tamā o le Tupu o Tupu (Faaaliga 22:16). 

O lena la ua e iloa e leai se gataaga o le mamao e mafai ona ave oe iai e le Atua, o le tulaga e te ono fesili ai, ‘e faapefea ona ou avea ma sui e faaeaina?’ O le vaega muamua e te manaomia e filifili ai oe e le Atua o le alofa mutimutivale. O ia o le Tupu, e pule aoao poo ai e finagalo e siitia. O le ituaiga tagata ou te iloa e le mafai ona teena e le Atua o le tagata salamo faamaoni (Salamo 51:17). O le tulaga lea ua matua gagau le loto o le tagata e pau le mea e naunau iai o le faia o le finagalo o le Atua. O lea tagata e le fiafia e faatiga I le Atua ma afai e faatiga iai tagata, e vave I ia tagata ona faanoanoa ma vave aioi ane mo le faamagaloga. 

O le ituaiga tagata lea o loo saili e le Atua ina ua ia saili mo se tupu o Isaraelu. Fai mai I le Galuea 13:22, ua ia maua se tagata e faia lona finagalo. O le ituaiga tagata lea e faaeaina e le Atua. Afai o lo’o e faapena, o lona uiga ua avea oe ma sui e faaeaina I le agaga, I le suafa o Iesu, Amene.