Samoan Devotional

OPEN HEAVENS

MATALA LE LAGI MO LE ASO GAFUA 5 FEPUARI 2024

 Manatu Autu: Papatisoga a Agaga Paia ma le mana 2 (The Holy Spirit Baptism and Power 2)

Tauloto – 2 Timoteo 1:7 “Auā ‘ua lē foa‘iina mai e le Atua ‘iā te i tatou le Agaga e mata‘u ai, a o le Agaga e fa‘amalosi ai, ma alofa ai, ma pulea ai o tatou loto.”

Faitauga - Tusi Paia: Galuega 4:1-13

Upu Folafola

I le faitauga o le Tusi Paia o le aso, na tali atu Peteru I le au Faresaio a’o tumau I lona faatuatua ma le suafa o Iesu Keriso. Peitai, na faapea le loto tele o Peteru ae lei papatisoina e Agaga Paia? O le tali faigofie e leai. 

I le Mataio 14:28-32, na faamatalaina sa iai le fefe ma le mata’u ia Peteru ina ua ia vaaia le malosi o le matagi. I le Ioane 18:16-27, ina ua faailoa e auauna o ia o se tasi sa mulimuli ia Iesu, na ia teena ma ia tauto e na te leiloa Iesu. O le Peteru lava lea e tasi ua ia tali atu i le au Faresaio. 

I le Galuega 4:10, o le tagata sa ia muai teena Iesu Keriso ua faapea mai, ‘o lē na fa‘asatauroina e ‘outou, o lē ‘ua toe fa‘atūina e le Atua nai ē ‘ua oti, o ia lava ‘ua tu mai ai lenei tagata ‘ua mālōlō i o ‘outou luma’.  Na ia faaopoopo atu; ‘E leai fo‘i se tasi ‘ua i ai le ola; e leai lava se isi igoa i lalo o le lagi ‘ua foa‘iina mai i tagata e mafaia ‘ona fa‘aolaina ai o i tatou’, ua ia tulai maumaututu ia Iesu Keriso. O Peteru ina ua maea le aso Penetekoso ua suia ma e ese mai le Peteru sa iai muamua ae lei oo mai le aso Penetekoso. Ua ia maua le loto toa ma le loto tele ma ua mafai ona lauga atu e faatatau ia Iesu Keriso I so’o se tagata tusa lava po’o le a lo latou tulaga I le atunuu. 

Fai mai le Galuega 4:13 ua iloa uma e tagata na latou iai le loto tele o Peteru ma Ioane.  I nisi faaupuga ua matua iloa tino ma vaaia e tagata lo latou loto tele. O le a le mafuaaga o lenei ituaiga loto tele? O le tali o lea fesili e maua I le Galuega 4:8 ‘Ona fai atu lea o Peteru ‘iā te i latou, ‘ua tumu o ia i le Agaga Pa‘ia, “O ‘outou ali‘i o le nu‘u, ma toeaina o Isaraelu… 

O le faatumuina ia Agaga Paia o le fofō lea o le fefe ma le mata’u. Afai o lo’o avea le fefe e taofia ai lou ausia o lou lumanai manuia, o lona uiga e lei faatumulia oe I le Agaga Paia. A faatumulia oe e Agaga Paia, e te tilotilo atu I mauga o faafitauli I ou luma ma e ataata auā e sili o ia ‘ua ‘iā te ‘outou, i lē ‘ua i le lalolagi (1 Ioane 4:4).

So’o se taimi e totolo atu ai le fefe I lou loto, amata ona e tautala I le Agaga Paia. Ia e tautala I Gagana eseese seia e oo I le tulaga ua sili atu i lou fefe. E foai atu ia te oe e Agaga Paia le loto tele e siitia ai lou tulaga I luga atu o ni faafitauli o lo’o iai I ou ala tusa lava po’o le a le tetele. Tatalo I le Agaga Paia I aso uma, suesue I lau Tusi Paia, ma faataga Agaga Paia e taitai oe. Ia avea Agaga Paia o lau paaga I taimi uma ona e vaaia lea ua e lē toe masani I le fefe. I le suafa o Iesu, Amene. 

Translated from the English version 
In the Bible reading for today, Peter confronted the Sadducees defending his faith and in the name of Jesus Christ. However, was Peter this bold before he was baptised in the Holy Spirit? The simple answer is, “No”. In Matthew 14:28-32, Peter was described as being ‘afraid’ after he saw the boisterousness of the wind. In John 18:16-27, when servants recognised him as one of Jesus’ followers, he denied it and swore that he did not know Jesus. This same Peter was now the one confronting Sadducees. In Acts 4:10, the one who denied Jesus Christ said, “The same Jesus you crucified, God has raised Him from the dead, and it is through Him that this lame man is standing before you whole.” He added that there is no other name given unto men by which anybody can be saved but by Jesus – he wa

OPEN HEAVENS

MATALA LE LAGI MO LE ASO SA 4 FEPUARI 2024

Manatu Autu: Papatisoga a Agaga Paia ma le mana 1 (The Holy Spirit Baptism and Power 1)

Tauloto – Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

Faitauga - Tusi Paia: Galuega 3:1-8

Upu Folafola

O le Faitauga mai le Tusi Paia o le asō o loo amata i le faaupuga faapea, “O lenei” o lona uiga a uma se vaaiga sa tupu, ona tupu ai lea o se mea fou. O loo faamatala e le Galuega 2 le aso Penetekoso sa faatumulia uma ai tagata sa i le afeafe aupito a luga e le Agaga Paia ma tautatala ai i gagana ese. O le “O lenei” la o loo fa’atatau I le mea o le a tupu i olaga o Peteru ma Ioane ona o le vaaiga sa tupu, o le afio ifo o Agaga Paia. O galuega ia o vavega.

A papatisoina oe e Agaga Paia, e te maua le mana. E ia te oe le mana fai vavega, faamalolō ē mama’i ma faatutū e ua oti. Pagā lea e toatele kerisiano e papatiso e Agaga Paia ma gata ai i le tautala I gagana ese ona e leai se gālala. E te maua faamanuiaga e sili atu pe a papatisoina oe e Agaga Paia; e te maua le mana e te alu atu ai e fai le galuega a le Atua.

I le tele o tausaga ua mavae, sa o’u tatalo I le Atua mo le tele o vaiaso mo le mana e fai ai lana galuega peita’i e le’i tali mai. I se tasi po, na fetalai mai le Atua ou te fifīlemū ma amata ona fesili mai ia te a’u. “Ua papatiso oe e Agaga Paia? Na ou tali atu “Ioe” sa toe fesili mai “o le a le Upu o tusia i le Galuega 1:8?” Sa o’u taulotoa atu i ai le Upu, ona fetalai mai lea, “E maua e outou le mana pe a afio ifo le Agaga Paia i luga iā te outou.” Ona o’u tali atu lea, “Le Alii e, ou te lē o lagona ou te malosi.” Na ia fetalai mai, “Na o’u fai atu e ola le amiotonu I fa’alogona?”

O le taeao na soso’o ai na aumai ai se tamaititi ia te a’u mo se tatalo. Sa lagona lo’u fefe peita’i na o’u manatua le ma talanoaga ma le Atua i le po ua mavae, ma fa’ae’e ai loa o’u lima i luga o le tamaititi ma tatalo. E le’i umi ae o’u faalogoina ua leai se leo o le tamaititi ma o’u faapea ifo i lo’u loto, “Ua oti ea le tamaititi?” Ina ua uma le tatalo, na o’u vaaia le tamaititi ua moe gapēpē. Fai mai le tinā fa’ato’ā moe lea o le tamaititi talu le tele o aso, ma ua ia mautinoa ua faamalōlō e le Atua si ana tama.

O atu i nuu uma ma fa’aaogā le mana ua uma ona foai atu e le Atua ia te oe, a leai, e ma’imau. Ina ua ou iloa ua iā te a’u le mana mai le Atua, sa o’u naunau e fa’ae’e o’u lima i luga o e mama’i. O le ala lea ua o’u o’o ai i le tulaga ua I ai ne’i, ua mafai ona tutupu vavega tetele e ala i lo’u tagata. Sa o’u fa’aaogāina le mana na tu’uina mai e le Atua talu ona ia papatiso a’u i lona Agaga Paia ma tupu tupu ai pea e o’o mai i le taimi nei. I le suafa o Iesu. Amene

OPEN HEAVENS

MATALA LE LAGI MO LE ASO TOONAI 3 FEPUARI 2024

Manatu Autu: Ituaiga Atalii Eseese 2 (Different types of sons 2)

Tauloto – 2 Samuel 7:14 “E fai a‘u mōna tamā, e fai fo‘i o ia mo‘u atali‘i; a agasala o ia ‘ou te a‘oa‘i atu ‘iā te ia ma le sasa a tagata, ma ta a tagata”

Faitauga - Tusi Paia: Salamo 84:10-12

Upu Folafola

O ananafi na o’u faapea atu ai e mafai ona vāvālalata le mafutaga a se tamā ma sona atali’i ma avea ai le atali’i o se uō a le tamā. E moni lea manatu peita’i, i le va ma uō e i ai uō faapitoa. Mai le taimi na o’u iloa ai e mafai ona avea oe ma uō pele a le Atua, o se tasi e faailoa I ai e le Atua mea uma, na o’u filifili ai o’u te fa’alatalata i le Atua ia fai ai a’u ma se tasi o ana uō faapelepele. E te mana’o e avea oe ma uō e pele i le Atua? Ia e maitau mai e i ai le tau e te totogia.

O le tele o taimi tatou te talanoa ai i le olaga e tatau ona ola ai le Kerisiano, ituaiga lavalava e ofu ai ma amioga, fai mai isi, “ O le Atua e lē faigatā, o ia o le Atua o le alofa. O le mea e i ai le Agaga o le Atua o i ai le sa’olotoga.” E masani ona o’u faapea atu, “Tatou te lē misa pe finau i lenei manatu, pule oe i lou olaga. E fua amioga uma e te fai i lou fia latalata i le Atua.

Fa’ata’ita’iga afai pau le galuega e te mana’o e fai i lou olaga atoa o le fai o feau a le ofisa, e lē manaomia la sou alu i a’oa’oga maualuluga atu. Pau le tomai e te manaomia o lou iloa fai feau masani o aso uma, ona e ausia lea o lau miti. Peita’i a e mana’o e avea oe ma polōfesa ona e alu lea e te aoga i se Iunivesite ma su’esu’e e tau i le leva o le po. Ou te mana’o e avea a’u o se polōfesa mo le Atua, o’u te fia latalata i le Atua ma avea o sana uō pele. Ou te lē mana’o e nā o se auauna a le Atua, e lē lava fo’i le nā o se atali’i po’o se uō, ou te fia avea ma uō faapitoa e pele i le Atua, ma e ala i le alofa tunoa o le Atua, o le a faapenā fo’i oe, e ui e lē taugofie.

O le avea ma se tasi o pele a le Atua e lē faigofie, e tele lou taimi e alu ai. O i latou ua avea ma uō pele a le Atua e sili atu lo latou taimi e fa’aalu e mafuta ai ma le Atua na i lo’o le mafuta ma se isi lava. O le fai fo’i ma faapitoa a le Atua e aafia ai lou fiafia i mea taumafa. E tatau ona e lava sauni e te anapogi pe a e mana’o e sili atu ona e latalata i le Atua na i loo se isi lava tagata. E alu ai fo’i au meatotino auā e tatau ona e inoino i mea o le lalolagi tau lava o le mālō o le Atua e faamuamua. Fai mai Iakopo 4:4 o le fefa’auōa’i ma le lalolagi o le ita lea I le Atua. Fai mai fo’i Mataio 6:24 e tatau ona e filifili po’o le Atua po’o le oa. Ia e tete’e atu i le oa ae pipi’i i le Atua. Ua e sauni e totogi le tau, e ala i lou fa’afitia o le lalolagi ina ia avea ma uo pele mafanafana a le Atua? Ua o’u sauni. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 2 FEPUARI 2024

Manatu Autu: Ituaiga Atalii Eseese 1 (Different Types of Sons 1)

Tauloto – Kalatia 4:31 “O lenei, le ‘au uso e, e lē ni fānau i tatou a le fafine nofo pologa, a o le fafine sa‘oloto..”

Faitauga - Tusi Paia: Kalatia 4:19-31

Upu Folafola

E tele ituaiga fanau ma o le a ou talanoa iai I lenei aso. O le ituaiga muamua e faaigoaina o le atalii faamaumau ‘oa e pei ona tusia I le Luka 15:11-24. E ala I le alofa tunoa o le Atua, e le taitai ona avea a’u o se atalii faamaumau oa I le suafa o Iesu. Ou te faamalosi ia te au ia e faia foi lea tatalo mo oe. 

A faamanuia le Atua ia te a’u, ou te le faama’imauina ana faamanuiaga. Ou te faaaogaina mo lana galuega. E talitonu nisi tagata e pau le auala e te faaalia atu ai o loo faamanuia le Atua ia te oe, o le faalialia lea o ou seevae sausau auro ma laei faapena, ma savali e peiseai e te pule I le lalolagi atoa. O foliga vaaia ia o tagata e faamaumau oa, ma ua maea ona ou faia se faaiuga ou te le fia faata’ita’i I ia ituaiga tagata. Ae faapefea oe?

O le isi vaega o fanau o lo’o talanoa mai ai le Tusi Paia o I latou e faatigā I o latou tama. Fai mai le Tusi Paia o le atali‘i valea, o le fa‘atigā loto lea i lona tamā, o le fa‘a‘ono‘ono fo‘i i lē na fānau mai o ia (Faataoto 17:25). Ua faapena foi ona faia la’u faaiuga, ou te le fia avea ma lea ituaiga tagata I le suafa o Iesu. Fai mai le Salamo 14:1 o le vale le tagata e faapea mai e leai se Atua, ua leaga ma inosia a latou amioga. Ou te faailoa le Atua I mea uma ou te faia ma ou te lē fia avea ma tagata leaga e inosia amioga. Ou te lē faatiga I lo’u tama I le lagi. Ae faapefea oe?

Afai e te alu I le Mataio 3:16-17, o lo’o talanoa le Atua I lona atalii pele ua matua fiafia iai. E fia avea a’u ma atalii faapea. Ou te fia avea ma atalii e silasila mai fofoga o le Atua ma faapea, ‘o le atalii lea, ou te alofa iai’. E mafai foi ona avea oe ma uo faapena. Ua iai atalii o le Atua ua avea ma ana uo I le faasolo mai o augatupulaga. O Aperaamo o se uo a le Atua (Isaia 41:8) ma ou te mautinoa o lo’o ia faapea, o Adeboye o la’u uo. 

E te iloa gofie I latou e avea ma pele I le Atua faapea ma ana uo, e fua I le umi ma le tele o le taimi e mafuta ai I le mamalu o le Atua. O le ituaiga atalii o lo’o naunau I se mafutaga vavalalata ma le Atua ma e faafiafia I le Atua I taimi uma. E le faapea e na o le faitau o le Tusi Paia ae o le suesue ma mafaufau I lana Upu I aso uma ina ia iloa ma silafia le Atua ma latalata atu ia te ia. O atalii e tutupu ane ma avea ma pele I le Atua, avea ma uo a le Atua ma fiafia e mafuta I lona mamalu mo le tele o itula, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 1 FEPUARI 2024

Manatu Autu: Avea ma atalii o le Atua 2 (Becoming a son of God 2)

Tauloto – Ioane 8:35 “O le pologa fo‘i, e lē tumau pea i le ‘āiga; a o le atali‘i, e tumau pea lava ia.”

Faitauga - Tusi Paia: Esoto 33:12-17

Upu Folafola

E nofo le atalii i le maota o le Atua, e le sau ma alu o ia, e nofo o ia i luma o lona tamā. O atalii, o i latou ia o e nonofo ma tumau i ona luma; po’o fea lava latou te o i ai; latou te faamautinoaina o loo faatasi le mamalu o le Alii ma i latou.

E faapefea ona e tumau i le mamalu ma le afioaga o le Atua? Muamua, e te le talasua i lou taimi filemu ma Ia. O le taimi lena e na o oe ma le Atua i le taeao, e lua te talanoa ai. O le taimi lenā e su'esu'e ai lau Tusi Paia ma e tatalo. E tatau ona amata lou aso I le Atua ma ia fai ma au masani fiafia le talanoa ia te ia I taeao uma. E lē gata i lea, aua le faia se faai'uga e aunoa ma lou fesili muamua atu i sona finagalo. E tatau ona e fesili atu ia te ia po’o a ofu e te ofuina, po’o fea o auala e te alu ai i le galuega, ma isi vaega faapena. A e ola ma faalogo i lona siufofoga, e te nofo pea ma tumau i ona luma ma lona mamalu. Fai mai le Salamo 10:4 o i latou e le o i ai le Atua i o latou mafaufauga uma, e faamaualuga ma amioleaga.

E tatau ona i ai le Atua i ou mafaufauga ma manatu uma. E tatau ona avea o Ia ma faamalosiau e lagolago i mea uma e te faia. O mea uma e te faia e tatau ona faia mo lona viiga. Fai mai le tusi 1 Korinito 10:31;

O lenei, pe tou te ‘a‘ai, pe tou te inu, po o se tasi mea tou te faia, ‘ia ‘outou faia mea uma lava ‘ia vi‘ia ai le Atua.

E saili pea e le atalii so’o se vaega e viia ai le suafa o lona tama. E le faia e le atalii se mea e fai mai ai tagata "fai mai foi o ia o le atalii o le Atua". O le tulaga lena, e ola o ia ma mafaufau lelei I lona tulaga ia tauleleia lona tama. E lē faia e ia se mea e leai se ta'ita'iga a lona Tamā, auā e lē mana'o e tuua le afioaga ma le mamalu o lona Tamā.

A e faitauina le Mareko 15:34-37, na silafia loa e Iesu ua tuulafoaiina o Ia e le Tama, sa ia tuuina atu loa lona agaga. Na mafai ona ia onosaia tiga uma ae ia faatasi pea le Atua ma Ia, ae o le taimi lava na Ia iloa ai ua le toe i ai o ia i le mamalu o Lona Tama, na ia tuuina atu loa lona agaga. E tatau ona faapena lou naunautaiga e tumau i le afioaga ma le mamalu o le Atua. Afai o oe o se atalii o le Atua, o le iai ma tumau I lona mamalu ma le afioaga, e tatau ona faapei o lou manaomia o le ea e manava ai. O le a lou latalata I Lē e te faaigoaina o lou Tama? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 31 IANUARI 2024

Manatu Autu: Avea ma atalii o le Atua 1 (Becoming a son of God 1)

Tauloto – Mataio 3:17 “Fa‘auta fo‘i, o le si‘ufofoga mai le lagi, ‘ua fa‘apea mai, “O lo‘u Atali‘i pele lenā, ‘ua ‘ou fiafia lava ‘iā te ia.”

Faitauga - Tusi Paia: 1 Ioane 3:8-9

Upu Folafola

I le aso ananafi, na ou faamalamalamaina le eseesega mautu o le atalii ma se auauna a le Atua. Ou te mautinoa o lo’o e filifili ia avea oe o se atalii o le Atua ae le o se auauna. E faapefea la ona e avea o se atalii o le Atua? O le avea ma atalii o le Atua e manaomia le ausia oni tapulaa. O le atalii o ia e pito sili ona naunau I le galuega a lona tama. E na te faia ma vaaia mea a lona tama e pei lava o ana mea aua foi e le o ia o se auauna a’o le atalii. Fai mai le Ioane 10:12, e le ofoina atu le ola o le auauna mo le mamoe, ae o Iesu, le atalii o le Atua, na ia foai lona ola mo mamoe. I le ala lava e tasi, e tatau ona saunia lou tagata e faia mea uma mo le faaolataga o tagata uma I le lalolagi. 

E le tatau ona faigata ia te oe le faia o so’o se galuega e taofia ai tagata mai le o atu I seoli. E mafai e le auauna ona iloa atu agaga o loo fano I seoli ae liliu ese I le isi itu, ae le faapena le atalii, e alu atu le atalii ma talai atu iai le talalelei iai latou seia tuuina atu o latou ola ia Keriso ma tumau I le Alii. Afai e le o oe o se tagata e naunau e manumaloina agaga mo le malo o le Atua, e ono fesiligia lou tulaga o se atalii. E so’o lava le atalii I lona tama. E na te faia mea o lo’o ia vaai atu o lo’o faia e lona tama. O le mafuaaga lea o lo’o faapea mai ai le 1 Ioane 3:9 O i latou uma o ē ‘ua fānau mai i le Atua, latou te lē faia le agasala; auā o lo‘o tumau i totonu ‘iā te i latou lona uiga; e lē mafai fo‘i ‘ona agasala, auā ‘ua fānau mai i latou i le Atua. 

O atalii moni o le Atua e inoino I le agasala. Aua ete amanaia I latou o lo’o faapea atu ia te oe, a maea ona tuuina atu lou ola ia Keriso, e le afaina le toe foi I le agasala, o lo’o pelogia oe. O fanau moni a le Atua o lo’o iai uiga o le Atua I totonu o I latou, ma o uiga nei e faigata ai ona latou faia le agasala. A latou faia le agasala, e amata ona atiati mai totonu nei uiga o le Atua ma e vave lava ona salamo. E toe foi atu I lo latou tama, e pei o se atalii moni ma augani atu mo le faamagaloga. E leai se tagata e faia pea le agasala ma le iloa ae faapea mai o ia o le atalii o le Atua, e pepelo lea tagata. O le atalii e lē so’o I le tama e taua o le tama e leai se tamā. O lo’o tusia e fiafia Iesu I le amiotonu ae inoino I le amioleaga (Eperu 1:8-9). Afai o oe moni o se atalii poo se afafine o le Atua, e te inoino I le agasala ae fiafia I le amiotonu aua o le uiga o le Atua o lo’o ia te oe. E le mafai ona e faapea mai o oe o se atalii poo se afafine o le Atua ae o lo’o e faia pea le agasala, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 30 IANUARI 2024

Manatu Autu: Auauna poo le atalii? (Servant or son?)

Tauloto – 1 Nofoaiga Tupu 17:13 “E fai a‘u mōna tamā, e fai o ia mo‘u atali‘i; ‘ou te lē ‘ave‘eseina lo‘u alofa ‘iā te ia, e pei ‘ona ‘ou ‘ave‘eseina i lē na muamua ‘iā te oe;.”

Faitauga - Tusi Paia: Luka 15:11-32

Upu Folafola

So’o se taimi ou te faapea atu ai e le o a’u se auauna a le Atua a o a’u o le Atalii o le Atua, e iai nisi e taumate po’o le a le ‘ese’esega o le avea ma fanau a le Atua ma le avea o se auauna a le Atua. A tu’u mai i se fa’aupuga faigofie e tele atu manuia o le avea o se atalii poo se afafine o le Atua nai lo le ta’ua o se auauna a le Atua.

I le Ioane 8:35 fai mai le Tusi Pa’ia, o le atalii o le Atua e nofo tumau i le maota o le Atua e fa’avavau, e ese mai i le tulaga o le auauna. O se auauna e mafai ona fa’amavae pe tuli e lona pule. A faapea atu se tama i lona atalii po’o le afafine “Ou te teena oe o se atalii, ou te le toe ta’ua oe o so’u atalii” o se tala so’ona fai, auā e so’o toto ma lona atalii, e le mafai ona ia faaesea le toto. O lona uiga, e iai pea lona atalii i lona fale. E anoanoa’i a’afiaga o lea tulaga. 

Mo se faata’ita’iga, fai mai le Salamo 23:6, “E moni e mulimuli mai ia te a’u le agalelei ma le alofa i aso uma o lo’u ola;  ou te nofo foi i le fale o le Alii i aso tele lava” O le e nofo i le fale o le Alii e mautinoa  e mulimuli ia te ia le agalelei ma le alofa o le Atua. E le gata i lea, fai mai le Salamo 91:1 “O le e nofo I le mea lilo o iai le Silisili Ese, e mau o ia I le paolo o le e ona le malosi uma lava.”

O le auauna o se tagata asiasi; na te o’o mai i le e pule pe a mana’omia o ia ma e toe tu’umuli ese pe a mae’a le mea na mana’omia ai o ia. Peitai o le atalii o le tagata e nofo tumau i le fale i taimi uma. Ae le gata i lea, e tusa ma le Ioane 5:20 e molimauina e le atalii mea uma e faaali e lona tama; a o le auauna e na te le molimauina mea uma e fai e lona pule. E iai le matagofie ma le olioli i le tatou nofo ma le iloa o mea o lo’o fa’atino e le Atua ma e mafai ona va’aiva’ai atu i gaioiga o le a faia e le Atua i le lumanai.  Mo se faataitaiga, i tausaga ua tuana’i a amata ona faaalia nisi o faafitauli, na ou fai atu i e vāvālalata ma a’u, “Ua aga’i mai puapuagā, ma a te’a ane, e iai le tagata o le a  ‘ata” ma sa faapena ona tupu, aua sa ia te a’u le avanoa fa’apitoa ou te iloa ai gaioiga a lo’u tama aua o a’u o lona atalii.

E iai nisi ituaiga o mea e tutupu i auauna, e le taitai ona tupu i se fanau. O se fa’ata’it’aiga, e ui i se tulaga lelei sa ‘ausia e Iopu, sa fa’aigoa lava e le Atua, “O la’u auauna” leitioa a fa’ataga e le Atua ia Satani e tofotofo ia te ia! (Iopu 1: 8-12). Ma e le taitai ona fa’ataga e lo’u tama le fili e na te tofotofo i lo’u soifua maloloina, po’o le tamaoaiga ia te a’u, poo so’o se mea e patino ia te a’u, auā o a’u o lona atalii. A o’o taeao, i lona alofa tunoa, o le a amata  ona ou su’esu’e i auala e avea ai a’u ma atalii o le Atua. O le ‘avea ma atalii o le Atua e sili atu nai lo le avea ma ana auauna, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 29 IANUARI 2024

Manatu Autu: O le a le Malumalu o le Atua? 6 (What is God’s temple? 6)

Tauloto – Salamo 22:3 “A o oe, e pa‘ia oe; o lo‘o e ti‘eti‘e i vi‘iga a Isaraelu.”

Faitauga - Tusi Paia: 2 Nofoaiga Tupu 5:13-14

Upu Folafola

O le malumalu o le Atua e sili atu I vaega na talanoaina I aso ua tuanai atu. O le mea moni, afai ou te fia faaigoaina le malumalu o le Atua I se igoa, ou te faaigoaina o le malumalu o viiga ma le mana. I le faitauga o le Tusi Paia o le aso, e te silafia ai le mafuaaga na faapea mai ai Tavita: 

Na ‘ou fiafia ‘ina ‘ua latou fai mai ‘iā te a‘u, “Tatou te ō i le fale o le ALI‘I.” (Salamo 122:1)

O le malumalu o le fale o viiga. Fai mai le Salamo 22:3 e afio ma tietie le Alii  I viiga a Isaraelu, ma e tatou te iloa le tino mai I le faitauga o le Tusi Paia o le aso. O le malumalu, o le fale o le faafetai aua foi o le faitauga o le Tusi Paia o le aso o loo molimau, sa latou avatu le faafetai I le Atua faatasi ai ma le viiga (2 Nofoaiga Tupu 5:13). O le mea moni, fai mai Tavita I le Salamo 100:4 ‘Ia ‘outou ulu atu i ona faitoto‘a ma le vi‘iga, ma ona lotoā ma le pese; ‘ia ‘outou vivi‘i atu ‘iā te ia, ‘ia ‘outou fa‘amanū atu i lona suafa. Ao faagasolo pese ma viiga, e faatumulia le malumalu I lona mamalu. Ma e oo mai lenei mamalu ia te oe ma e te tauaveina I so’o se mea e te agai iai. E amata atu iina ona e maua le agalelei ma le alofa mutimutivale o le Atua. 

O le malumalu o le fale e maua ai le agalelei ma le alofa mutimutivale o le  Atua. Fai mai le Tusi Paia I le Salamo 23:6 E moni e mulimuli mai ‘iā te a‘u le agalelei ma le alofa i aso uma o lo‘u ola; ‘ou te nofo fo‘i i le fale o le ALI‘I i aso e tele lava.

E iai se pese e ese ma lou fiafia iai ma e faapea upu, “e moni e mulimuli mai ia te au le agalelei ma le alofa mutimutivale o le Alii I aso uma o lou ola I aso e tele lava (x2). Ma ou te nofo I le fale o le Alii I aso e tele lava, ma ou te talisua I le laoai ua ia laulau mai mo a’u, E moni e mulimuli mai ia te au le agalelei ma le alofa mutimutivale o le Alii I aso e tele lava, I aso e tele lava o lo’u ola(2x)”. 

Le au pele e, ou te faamalosi ia te oe ia e pese lenei pese o se perofetaga I lou ola, ma afai e te le iloa lenei pese, folafola nei upu I lou ola. E tatau foi ona e soifua ma ola ai. O le nofo I le fale o le Alii e sili atu I le talisua I lona laoai ua laulauina mai mo oe. Pe fiafia iai le tiapolo pe leai, afai e te iai I le malumalu o le Alii e pese ma vivii ia te ia, e saunia mo oe le laoai e te talisua ai ma e leai se mea e mafai ona taofia. O aogā ma faamanuiaga I le malumalu o le Atua e tele naua ma e le tatau ona e misia, I le suafa o Iesu, Amene. 

OPEN HEAVENS

MATALA LE LAGI MO LE ASO SA 28 IANUARI 2024

Manatu Autu: O le a le Malumalu o le Atua? 5 (What is God’s temple? 5)

Tauloto – Eperu 4:16 “O le mea lea ‘ia tatou fa‘alatalata atu ai ma le loto tele i le nofoāli‘i o le alofa tunoa ‘ina ‘ia alofaina ai o i tatou e ia, maua ai fo‘i le alofa tunoa e fesoasoani mai i ona aso e tatau ai..”

Faitauga - Tusi Paia: Eperu 4:15-16

Upu Folafola

O le malumalu o le Atua o le fale fo’i lea o le alofa tunoa. E faaigoa e le Eperu 4:16 le malumalu o le nofoalii o le alofa tunoa. O le nofoaga e mafai ona e sulufa’i i ai ma maua ai le alofa tunoa ma le alofa mutimutivale i taimi faigata. Atonu o e manaomia le malosi ma le alofa tunoa e te manumalō ai i se faafitauli o lua feagai; o le tala lelei lenei, fai mai le Tusi Paia i le 2 Korinito 12:9, o le alofa tunoa o le Atua e lava lea e fesoasoani iā te oe auā o le vaivai e fa’aatoa ai lona mana. E te maua le alofa tunoa lea e lava, pe a e sau i lona malumalu. O tagata e o i aitu vavalo pe a manana’o i le malosi ma le mana, latou te iloa e tatau ona toaaga e o i faataulaitu nei e faafou lo latou mana. Pau mea a le tiapolo o loo fai, o le taumafai e fa’ata’ita’i meatotino a le Atua, ae na te lē mafaia ona fai. A’o i tatou e ona manuia nei e tatau fo’i ona toaaga e o i le malumalu o le Atua e faafou lo tatou malosi ma tali sapai le alofa tunoa faafouina i aso uma o le Atua, e fa’ato’ilalo ai faaosoosoga tatou te ui ai.

E i ai tagata a iloa ua latou faia le agasala, ona lē fia o lea I le lotu ona ua manatu o i latou o tagata eleelea ma le palapalā - e sesē lea manatu. I taimi faapea o lou soifuaga e te manaomia le alofa mutimutivale o le Atua. E te maua lea i lona nofoalii o le alofa tunoa. O le taimi sili lea ona manaomia ai lou alu i le lotu. A e o’o atu i lona nofoalii o lona alofa tunoa, faamaulalo lou loto. Tusa po’o oe o se tagata galue I le galuega a le Atua aua e te faafoliga i luma o tagata; ta’u i le Atua ua e agasala ma ua e salamō moni. Fai i le Atua e faamagalo oe e ala i lona alofa mutimutivale.

O isi fo’i tagata e o i le malumalu ma foliga faafia amiotonu pei o le ‘au Faresaio i le Luka 18:10-14, ma nisi faapei o le tagata ao lafoga. O le mafuaaga lea o le toatele o tagata e toaaga i le lotu a’o lo’o tele pea lapisi ma gaogaosā o nonofo ma latou. Tusa lava poo oe o le faifeau o le lotu, a e i le mamalu o le Atua i lona nofoalii o le alofa tunoa, ae e lagona e te mana’omia lona alofa mutimutivale, aua e te faafoliga o loo lelei mea uma, faatoese i le Atua ma tagi i ai e faamagalo oe.

E iloa lelei e le tiapolo o lou Atua o se Tamā finagalo faamagalo ma e te agava’a ma avanoa pea i lona alofa mutimutivale ma lona alofa tunoa i luma o lou Atua, o lea, e taumafai pea le fili i le malosi e gata ai lona mafai e taofi, fa’asesē ma fa’a vaivai oe ia aua ne’i e alu atu i lou Tamā. Sa masani ona i ai le tiapolo I le manuia o le ulu atu i le mamalu o le Atua, peita’i na leiloa lea mafutaga ina ua ia agasala, (Esekielu 28:14-16) ma e matua’i musu le tiapolo e te maua ma o’o i le manuia ua fāoa mai iā te ia.

Le au pele e, aua ne’i e faatagaina le tiapolo, agasala poo se isi lava mea e taofia oe mai le mamalu o le Atua e te maua ai lona alofa mutimutivale ma lona alofa tunoa, I le suafa o Iesu. Amene.

🙌27/01/2024

OPEN HEAVENS
MATALA LE LAGI MO LE ASO TOONAI 27 IANUARI 2024
 
Manatu Autu: O le a le Malumalu o le Atua? 4 (What is God’s temple? 4)
 
Tauloto – 2 Tupu 22:8 “‘Ua fai atu Hilikia le ositaulaga sili ‘iā Safana le tusi‘upu, “‘Ua ‘ou maua le tusi o le tulafono i le fale o le ALI‘I.” ‘Ona avatu ai lea o le tusi e Hilikia ‘iā Safana, ‘ua na faitau ai.
 
Faitauga - Tusi Paia: 2 Tupu 22:8-11
 
Upu Folafola
O le malumalu o le Atua o le fale fo’i lea o le poto; o se maota o le a’oa’oina. Ua fa’amanino mai e Tavita i le Salamo 27:4 E tasi le mea ‘ua ‘ou ole atu ai i le ALI‘I, o le mea lava lea ‘ou te sā‘ili atu ai; ‘ia ‘ou nofo i le fale o le ALI‘I i aso uma o lo‘u ola, ‘ina ‘ia ‘ou iloa atu ai le matagofie o le ALI‘I, ma ‘ou sā‘ili i lona malumalu.
 
I le maota o le Alii, e mafai ona e vaai ai i le matagofie o le Atua Silisiliese. Peita’i fai mai Tavita e lē gata i lona fia matamata i le ofoofogia o le Atua ae mana’o fo’i e talanoa ma mafuta iā te ia. I se isi fa’aupuga, afai e i ai ni au fesili e fia fai i le Atua, aumai i lona malumalu; sau e fesili iā te ia i lona malumalu.
 
A e sau i totonu o lona malumalu, e te maua fa’aaliga; o le a amata fa’ailoa atu e le Atua ia te oe mea e lē mafai ona e iloa pe a e nofonofo i lou aiga. O le mafuaaga lenā e tatau ai ona e alu e lē aunoa i le lotu ma sau api ma se peni. O se fale e te alu i ai e a’oa’o mai ai mea fou ma maua ai manatu fou. Sa tele ni taimi sa o’u lē mautonu ai i ni manatu, peita’i a’o o’u faalogologo i le Upu a le Atua, na amata susulu le malamalama o Keriso i lo’u loto ma o’u maua ai faaaliga I le fofō o le faafitauli. Leitioa fai mai le fai Salamo;
O Afioga a le Atua o le sulu ma le malamalama ia i o’u ala. Salamo 119:105
 
O le malumalu o le Atua, e te alu i ai e te faalogo i le Upu a le Atua, o le upu e te maua ai le poto e tele ma le malamalama e te lē maua i se isi lava mea. O lea, afai e te mana’o i le poto ma le faasinoga mo lau pisinisi, lou aiga, galuega a le Atua, soifua maloloina poo le a lava se vaega o le olaga, e te maua i totonu o le maota o le Atua. O i latou uma e lē misi le o i se falesa o a’oa’oina ai ma lauga le Upu a le Atua, e lē umi ona nofo lē mautonu. Latou te maua pea le to’afilemu o Le Alii.
 
Atonu o le a faapea sau fesili, “E faafefea ona o’u iloa o le upu o loo a’oa’oina i la’u ekalesia o le mea moni, o le suāsusu e lē suia?” E tatau ona e fa’ata’ita’i i le au Kerisiano i Perea, na o latou talia le upu ma le fiafia tele, a uma ona faalogo fo’i i o latou aiga saili le Tusi Paia i lea aso ma lea aso pe moni ia mea. (Galuega 17:10-11). A e tumau ma soifua I le siosiomaga o folafola ma a’oa’o ai le Upu moni a le Atua, e avea ma au meatotino le poto ma le a’oa’oina. I le suafa o Iesu. Amene.