Samoan Devotional

OPEN HEAVENS

MATALA LE LAGI MO LE ASO LUA 16 IANUARI 2024

Manatu Autu: O le tusi e manatua ai 1(The book of remembrance 1)

Tauloto – Neemia 13:14 “‘Lo‘u Atua e, ‘ia e manatu mai ‘iā te a‘u ‘ona o lenei mea, ‘aua fo‘i ne‘i sōloi‘esea lo‘u alofa na faia e a‘u mo le fale o lo‘u Atua, ma ana sauniga..”

Faitauga - Tusi Paia: Eseta 6:1-11. 

Upu Folafola

Ou te folafola atu ia te oe I le asō, a’o e faitau pe faafofoga foi I lenei upu, o le a tatalaina se tusi e manatua ai oe I mea lelei, I le suafa o Iesu. I suesuega, o le uiga o le upu e ‘manatua ai’, o le toe aumai lea o se faamaumauga i se mataupu I lou mafaufau poo le faamauina foi o se faamaumauga I lou mafaufau. I le Kenese 8:1, fai mai le Tusi Paia na manatua e le Atua Noa. E ono manatu nisi pe faapefea ona galo ma lē manatua I le Atua Noa ma lona aiga na ia tuua I le vaa. Ae a faapea mai loa le Tusi Paia na manatua e le Atua Noa, o lona uiga moni o lenei, ua avea atoatoa le faamuamua a le Atua ia Noa ma le tulaga ua tupu ia te ia. O le mea foi lena e tasi na tupu ia Rasela I le Kenese 30:22-23 e pei ona tusia I le Tusi Paia:

22‘Ua manatua fo‘i Rasela e le Atua, ‘ua fa‘afofoga le Atua ‘iā te ia ‘ua fa‘afānauina ia. 23‘Ona tō ai lea o ia ‘ua fānau le tama tane, ‘ua fa‘apea ai, “‘Ua ‘ave‘eseina e le Atua i lo‘u luma.”   

O le fuaitau foi o lo’o taua I luga e atagia ai seisi uiga o le manatua, o le aveeseina e se malosiaga maualuga atu lona maasiasi po’o le luma. A manatua e le Atua se fafine ua pā, e to o ia ma faafanauina ni tamaiti e pei o le tala ia Hana I le 1 Samuelu 1:1-28. Sa matua amusia o ia ma faamāina e I latou o loo latou iai faatasi ona o lona le fanau ma ua foliga mai foi, ua leai se faamoemoe ia te ia. Peitai, na manatua o ia e le Alii ma ua ia tali mai ia te ia a’o tagi atu I le nofoaga o Silo. Ina ua toe foi mai I Silo, ua sapai mai I ona lima le pepe, o lana tautinoga. 

I le faitauga o le Tusi Paia o le aso, na o’o ma afio mai le Atua mo Moretekai e faasagatau I lona fili o Haamanu. Na tatalo Moretekai ma lona tei o Eseta ona maua lea o le tali I lo la faafitauli. Ua le mafai e le tupu ona moe ona ia faatonuina lea e faitau atu ia te ia le tusi o faamaumauga. Ina ua faia lea tulaga, o mea lelei na faia e Moretekai na faagaloina, ua toe manatua. Ua na o le Atua e mafai ona faia lea tulaga. Na malamalama lelei Neemia le tulaga e oo iai le tagata pe afai e manatua e le Atua, o le mafuaaga lea na ia tatalo ai I le tatalo I le tauloto o le aso. 

Le au pele e, ou te faamalosiau ia te oe, e ole atu I le Atua Silisiliese ina ia tatala se tusi e manatua ai mea lelei na e faia I lenei Tausaga. E faapipii atu lo’u faatuatua ma lou faatuatua, ma ou te tatalo ia manatua pea oe e le Atua I lenei Tausaga atoa ma sili atu I le suafa matautia o Iesu, Amene. 

OPEN HEAVENS

MATALA LE LAGI MO LE ASO GAFUA 15 IANUARI 2024

Manatu Autu: O le a maua le lelei 7 (It shall be well 7)

Tauloto – Ioelu 2:25 “‘Ou te taui atu ‘iā te ‘outou o tausaga na ‘aina e le sē akerise, ma le sē aleka, ma le se kasili, ma le sē kasama, o la‘u itūtau‘a tele na ‘ou ‘auina atu ‘iā te ‘outou..”

Faitauga - Tusi Paia: 1 Samuelu 30:1-8, 18-19. 

Upu Folafola

O le a faamaea atu I le asō le talanoaga I ni feau faaperofetaga mai le Atua mo oe mai le Isaia 3:10 o loo faapea mai, e lelei ma manuia le ola I le amiotonu I lenei Tausaga ma sili atu. E finagalo le Atua ina ia e fiafia I le ola manuia ma e aofia ai, le toe faaolaina o mea na leiloa ma faoa e le tiapolo. Ou te folafola atu, e toe faaolaina ma toe maua au mea uma na leiloa ma faoa e le tiapolo, I le suafa o Iesu. 

O lo tatou Tama I le Lagi na fetalai mai I nei upu, “O a‘u lava, ‘ou te savali atu i ou luma,ma ‘ou fa‘alauleleiina mea maupu‘epu‘e.‘Ou te nutinini‘i i puipui ‘apamemea; ‘ou te gauia fo‘i fa‘amau u‘amea” (Isaia 45:2). I  nisi faaupuga, o loo faamautuina mai e le Alii le iai o lona mamalu ma I tatou a’o faagasolo lenei Tausaga fou. Na aumai seisi upu mai lo tatou Alii o Iesu Keriso e faamausali ai I le Ioane 16:33

‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.”

O nei upu ua faamautuina I afioga a le Atua e aumai ai le faamoemoega iai tatou I le Tausaga talu ai ma o le a manuia foi ma lelei mea mo oe I lenei tauasaga. 

Le au pele e, o le maua o le lelei ma le manuia I lenei Tausaga, e tatau ona a’oa’oina ma maua e tatou se lesona mai le faitauga o le Tusi Paia o le aso. Na fesili Tavita I le Atua ae lei alu e tuliloa ona fili, ma na faamaonia muamua e le Atua e iu I le manumalo. Ou te faamalosiau ia te oe ia fai ma masani lou fesili I le Atua mo lana taitaiga I so’o se mea e te faia I totonu o le Tulafono I lenei Tausaga.  E ui o Tavita o se taitai au tautaua, e le’i topetopea ona faia lana faaiuga e tuliloa I latou na osofaia ma faoa mea uma a le togalauapiga a Isaraelu I le taimi a’o lei iai. Ae o le mea na ia faia, na ia saili muamua I le Taitaia’u Sili, Ieova Nisi, mo le faasinomaga faalelagi ina ia mautinoa le manumalo. Na fai iai le Atua ia ō e tuliloa le fili, ma ina ua ia faia, na toe maua uma mai oloa ma mea uma na faoa. 

O e iloa ni mea ua faoa e le fili mai ia te oe? E iai ni avanoa taua e te manatu ua e misia? Sa iai ea ni la’asaga sa tatau ona e faia peitai sa e le faia ma ua e manatu ua leai seisi ala? Ou te faamalosiau ia te oe, o lo’u Atua e mafai ona fesoasoani ia te oe ina ia toe faafoisia ma maua ina mai mea uma, pe afai e te faatuatua ia te ia ma lafoai mea uma ia te ia.

Ou te toe folafola atu, ao e lafoai mea uma ia Iesu ma saili le taitaiga mai ia te ia, e te toe maua mea uma na leiloa ma faoa mai ia te oe, o le a lelei ma manuia mea uma ia te oe, I le suafa o Iesu, Amene.  

OPEN HEAVENS

MATALA LE LAGI MO LE ASO SA 14 IANUARI 2024

Manatu Autu: O le a maua le lelei 6 (It shall be well 6)

Tauloto – Ioane 5:14 “Ua mavae ia mea, ‘ua silafia o ia e Iesu i le malumalu, ‘ona fetalai atu lea o Iesu ‘iā te ia, “Fa‘auta, ‘ua e mālōlō oe; ‘aua ‘e te toe agasala, ne‘i o‘o atu ‘iā te oe se leaga e sili i lenā.”

Faitauga - Tusi Paia: Ioane 5:1-14

Upu Folafola

I le fa’aauauina o le talanoaga fa’atatau i le folafolaga a le Atua, e maua le manuia e le tagata amiotonu (Isaia 3:10), e tāua lou maitaua o le soifua maloloina lelei o le tagata le isi faailoga o le manuia o se uso. O se tasi e fai mo ia le falema’i ona o gasegase o le tino e lē mafai na fai mai o lo’o lelei ma manuia. O’u te folafola atu i le suafa mata’utia o Iesu Keriso e amata atu i le asō e o’o I le faavavau ona e ola soifua malōlōina.

O le tala o loo i la tatou Tusi Paia faitau o le asō ua fa’aalia manino mai ai le mana faamalolō o lo tatou Alii o Iesu Keriso ma fa’amautinoa mai ai fo’i e mafai ona maua tatou i ma’i ona e faapogai I le agasala. O le mafuaaga lea na tusia ai e Agaga Paia e ala ia Luka le Tusi o Galuega 10:38 faapea:

“o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua..”

Ina ia e ola soifua maloloina, leai ni ma’i i lenei tausaga fou, aveese ni agasala o aafia ai lou olaga. Ta’u i le Atua ma ole atu mo lana fa’amagaloga, ma salamō moni mai lau agasala. A lē moni lou salamō mai so’o se agasala o e fai, ua e tu’u oe lava e fa’ataugāina e le tiapolo, e pei ona fetalai ai Iesu i le tagata ma’i i la tatou tusi tauloto o le asō. Na aumai e Iesu se fa’ataoto i le Luka 5:36-38 faatatau i le utufia o le uaina fou i le fagupa’u tuai. E lē mafai ona e maua se vavega mai le Atua ae ola pea i le olaga agasala; e tutusa lenā ma le utu o le uaina fou i le fagu uaina tuai. E pei ona lapata’i mai Iesu i le fa’ataoto o lea tagata e mautinoa le fa’aleagaina.

I la tatou faitauga mai le Tusi Paia o le asō, na faamalolō e Iesu se tagata ma’i, mulimuli ane ina ua toe fetaui ma Iesu, na ave i ai e Iesu se lapataiga, ia aua ne’i toe agasala o ia. O se lesona mo i tatou, e lē lava i so’ose uso ona maua le fa’amalolōga po’o so’o se vavega ae uma toe fo’i fai le agasala. E mautinoa e lē tumau le fa’amalolōga ma le vavega i lea uso. E faapei ona o’u folafola le fa’amalolōga ma le soifua laulelei i ou luga i le asō, ia faapea ona taofia oe e le Atua mamao ese mai le agasala ina ia aua ne’i leiloa vavega ua faia e le Atua mo oe, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 13 IANUARI 2024

Manatu Autu: O le a maua le lelei 5 (It shall be well 5)

Tauloto – Filipi 4:19 “A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.”

Faitauga - Tusi Paia: 2 Korinito 9:8-11

Upu Folafola

O le asō o le a fa’aauau ona o’u talanoa i le feau fa’aperofetaga a le Atua i lana fanau e ala mai i lana upu i le Isaia 3:10 e faapea, “Fai atu ia i le ua amiotonu, e manuia o ia; auā o le fua o a latou galuega latou te aai ai.” O le finagalo o le Atua, ia iā te oe le manuia i so’o se vaega o lou soifua e aofia ai ma au tupe. Pagā lea, e toatele tagata o loo ola pea i le mativa ona latou te lē o tuuina atu mea uma I le Atua, ua na o ia le pogai o le tamāoaiga moni, na te lē faaopoopo i ai se tigā (Fa’ataoto 10:22).

Ua fa’amalamalama mai e le Tusi Paia iā i tatou, na o’o le tagata I le mativa ona o le agasala: Kenese 3:17-19

17‘Ua ia fetalai atu fo‘i ‘iā Atamu: “‘Ua e usiusita‘i i le ‘upu a lau avā ma ‘ua e ‘ai i le la‘au na ‘ou fai atu ai ‘iā te oe, na fa‘apea atu, ‘E ‘aua ‘e te ‘ai ai.’ O le mea lea ‘ua malaia ai le lau‘ele‘ele ‘ona o oe; ‘e te ‘ai ai ma le tigā i aso uma o lou ola. 18E tutupu mai ai o la‘au tuitui ma la‘au talatala ‘iā te oe, ‘e te ‘ai fo‘i la‘au afu o le fanua. 19‘E te ‘ai fo‘i au mea e ‘ai ma le afu o ou mata, se‘ia e toe fo‘i atu i le ‘ele‘ele. Auā na faiina ai lava oe; auā o le efuefu oe, ‘e te toe fo‘i atu lava i le efuefu.”

Faafetai na afio mai Iesu Keriso e togiola le tagata mai le agasala ma le fa’afanoga e aofia ai ma le mativa. Fai mai le Tusi Paia na fa’amativaina Iesu ona o i tatou; ina ia fa’atamāoaigaina tatou i lona mativa (2 Korinito 8:9). A ofoina atu e se tagata lona ola ia Iesu Keriso, e fa’asa’olotoina lea uso mai le mativa ma agava’a ai o ia i le tamāoaiga e lē ma fa’atusalia o le Atua Silisiliese.

O lo’u Atua o Ieova Irae (Kenese 22:13-14), o lona uiga o ia o le Alii na te foa’i. O ia fo’i o le Atua e ou le malosi uma lava (Kenese 17:1, 35:11), o lona uiga o ia o le Atua mata’utia e ou le malosi uma lava. E iā te ia le oloa e lē ma faitaulia i lona fale teuoloa. Na ia fetalai o iā te ia le ario o iā te ia fo’i le auro (Hakai 2:8). Na ia fetalai fo’i “Auā o iā te a’u manu uma i le vaomatua, o manu e tata’a i mauga e afe” (Salamo 50:10). O le fuafuaga a le Atua i le amataga o le tagata na te maua ma pulea lona tamāoaiga e tele, aemaise i le lalolagi (Kenese 1:26-30). 

Le au pele e, afai e te le’i faaolaina, tu’u ne’i loa lou ola iā Keriso, ona avea lea o ia ma lou Atua na te avatua mea uma e te mana’o ai. E foai atu e le Atua le tamāoaiga e aunoa ma se tiga iā te oe ma le malosi e maua ai oloa (Teuterenome 8:18). O le a maua le lelei i au tupe ma lou tamāoaiga i le tausaga nei ma le lumana’i, aua ua faasaolotoina i tatou mai fa’afanoga uma o le agasala e aofia ai ma le mativa I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 12 IANUARI 2024

Manatu Autu: O le a maua le lelei 4 (It shall be well 4)

Tauloto – Mataio 17:21 “A ‘ua nā o le tatalo ma le anapogi e ō ‘ese ai mea fa‘apenā.”

Faitauga - Tusi Paia: Mataio 17:14-21

Upu Folafola

I aso e tolu ua tuanai , sa ou talanoa atu I ni vaega e tatau ona e faataunuuina I lenei Tausaga ina ia mafai ona e maua le lelei ma le manuia I lenei Tausaga, ma o nisi nei, ola I le amiotonu, vivii I le Atua ma le tatalo e le aunoa. O le asō, o le a ou talanoa atu I le anapogi, o seisi tulaga e te maua ai le fiafia I le manuia I mea uma. 

I le faitauga o le Tusi Paia o le aso, o lo’o faaalia se vaega e lei mafai ona faia e le au so’o o Iesu Keriso, o le lē mafai lea ona tutuli temoni na mafua ai ona vaivai le mafaufau o se taulealea. Peitai ina ua o’o atu Iesu, na malolo vave lenei tama talavou. E faateia a’u I le tele o faaliliuga o le Tusi Paia o lo’o taumafai lava e tuu I lalo le taua o le tatalo ma le anapogi I le olaga o se kerisiano I le tele lea ina latou aveese le fuaiupu 21 o le mataupu lenei o le Mataio 17. Ua mausalī afioga a le Atua i le lagi e fa‘avavau lava (Salamo 119:89). O lo tatou Alii, e le gata sa tatalo o ia, na anapogi foi o ia mo se taimi umi (Luka 4:1-2). 

Le au pele e, I lenei Tausaga fou, faaopoopo le anapogi I le ola I le amiotonu, tatalo ma le viiga o le Atua Silisiliese. E te maua le agalelei faulai o le Atua ma manuia mea uma ia te oe. O lo’u lava olaga ou te iloa ai, e leai seisi e oti I le anapogi, ae maua ai lou malosi I le tino ma faapena foi I le agaga. O la’u tautinoga lea I lo’u olaga, o lea ua savali lo’u 82 tausaga e atoa ini nai masina o lumanai e ala I le alofa tunoa o le Atua a’e o lo’o fai pea ma a’u masani le anapogi. Ou te malosi atu I le tele o nisi o talavou o lo’o faatolu na aai I le aso faaopoopo iai ma vai aiga. 

Ao avea au o se kerisiano e talavou lava, ou te lei amata I se anapogi umi, ma afai e te lei faia muamua se anapogi, faataitai I le fa’amisi o le meaai o le taeao ae suia I le tatalo. Ona e soso’o lea ma le misi o le meaai o le taeao ma le aoauli. E lei leva ae e o’o atu I le tulaga ua anapogi mo le 24 itula, sosoo ma le o’o atu I anapogi umi e pei ona faia e Iesu Keriso, na anapogi mo le 40 aso ma le 40 po. 

O le tulaga mulimuli, ou te fia taua le tulaga lenei, afai e te anapogi, e te fia ai. E tatau ona lava lou onosai, pulea lou tagata ma taofiofi ina ia aua nei tatalaina lau anapogi ae lei oo I le taimi e tatala ai. Tau ina foai atu e le Atua le alofa tunoa e te tatalo ai ma anapogi, ma e te maua lava le lelei ma le manuia I lenei Tausaga atoa ma sili atu, I le suafa o Iesu. Amene. 

OPEN HEAVENS

MATALA LE LAGI MO LE ASO TOFI 11 IANUARI 2024

Manatu Autu: O le a maua le lelei 3 (It shall be well 3)

Tauloto – Ioane 14:13 “O mea uma fo‘i tou te ole atu ai i lo‘u igoa, ‘ou te faia lava; ‘ina ‘ia vi‘ia le Tamā ‘ona o le Atali‘i..”

Faitauga - Tusi Paia: Ioane 14:13-14

Upu Folafola

I aso e lua ua tuana’i, sa ou talanoa ai I le talafeagai o le ola I le amiotonu ma fai ma masani lou vivii i le Atua pe afai e te naunau e lelei ma manuia mea uma ia te oe I lenei tausaga fou. O le asō, o le a ou faaaogaina ai le tatalo o se galuega faaleagaga faaopoopo e tatau ona e matua faatauaina i lenei Tausaga fou ina ia lelei ma manuia ai oe.

E manino lava, ua faigata le lalolagi nei, ona ua latalata mai aso mulimuli. O le faamafanafanaga mo I tatou, o loo faamautu mai e le Alii I le tusi a Ioelu 2:3 lea na Ia fetalai mai ai, “E i‘u fo‘i ‘ina fa‘aolaina o i latou uma lava o ē vala‘au atu i le suafa o le ALI‘I; auā e i ai le fa‘aolataga i le mauga o Siona ma Ierusalema, fa‘apei ‘ona fetalai mai ai o le ALI‘I, e i ai fo‘i i ē ‘ua totoe o i latou ia e vala‘auina e le ALI‘I”.

I le tusi a Faamasino, o loo faapea mai le Tusi Paia na faia e le fanauga a Isaraelu amioga faletatau i luma o Ieova, ma na faamata’u e tagata Mitiana i latou mo le fitu Tausaga (Faamasino 6:1-2). Ae peitai, ina ua iloa e le fanauga a Isaraelu o le Alii na faasalaina i latou ona o a latou agasala, sa latou alalaga atu ia te ia i talosaga. Na tali mai le Alii ma laveaʻiina I latou mai o latou puapuaga e pei foi ona ia tali atu ia te oe i le asō, i le suafa o Iesu.

14‘āfai e fa‘amaulalo lo‘u nu‘u ē ‘ua ta‘ua i lo‘u igoa ma latou tatalo ma sā‘ili‘ili ‘iā te a‘u ma liliu ‘ese i o latou ala leaga, ‘ona ‘ou fa‘alogo ai lea mai le lagi ma fa‘amāgalo ‘iā latou agasala ma fa‘aolaina lo latou nu‘u. 2 Nofoaiga Tupu 7:14

Le au pele e, afai e te fia maua manuia mo lenei tausaga fou, e tatau ona e toe faaleleia lau fata faitaulaga o le tatalo ma e tatalo ma le faanaunau i le Alii. Na folafola e Iesu i ona so’o uma e talitonu ia te Ia, afai latou te ole atu i so’o se mea i Lona suafa, o le a ia faia lava (Ioane 14:14). 

O le ā le mea lena o lo’o e faatalitali i ai? Tatalo nei i le Atua ma faaauau ona tatalo ia te Ia seia o’o ina ia faia se suiga atoatoa i tulaga leaga uma e te ono o’o i ai. Ua sauni le Alii e tali mai I tatalo a Lana fanau i lenei tausaga pe afai e tatalo atu lana fanau Ia te ia I lona suafa Paia. E lelei mea uma mo oe, pe a faʻaaluina sou taimi lelei e tatalo ai i le Atua i lenei tausaga, i le suafa o Iesu.

Tatalo, 

Tama, fesoasoani mai ina ia lelei mea uma mo a’u I lenei tauasaga fou I le suafa o Iesu, Amene. 

OPEN HEAVENS

MATALA LE LAGI MO LE ASO LULU 10 IANUARI 2024

Manatu Autu: O le a maua le lelei 2 (It shall be well 2)

Tauloto – Salamo 67:5 “Le Atua e, ‘ia vi‘ia oe e le nu‘u; ‘ia vi‘ia lava oe e le nu‘u, o i latou uma lava.”

Faitauga - Tusi Paia: Salamo 67:5-7

Upu Folafola

I le aso ananafi, na ou folafola atu o le a maua le lelei e le fanau a le Atua I lenei Tausaga, ma o le a taunuu lava I le suafa o Iesu. Peitai, e iai lava tulaga ma mea e tatau ona faia ina ia iloatino mai nei faamanuiaga I lou olaga. O se tasi o ia tulaga o le vivii I le Atua I taimi uma. 

O loo faapea mai le faitauga o le Tusi Paia o le aso, o fua o le laueleele e faamanuia ai oe pe a e viia le Atua. Afai e a’oa’oina lou tagata ia viia le Atua ma lou loto atoa ma lou malosi atoa, e galulue mea uma I le laueleele ia mautinoa e manuia mea uma e te faia. O le tala I le 2 Nofoaiga Tupu 20:20-24 o se tala matagofie I le aogā o le viiga pe afai e taulai I Lē e onomea iai le viiga, o le Atua Silisiliese. Afai e te vivii I le Atua Silisiliese, e tulai o ia e tau taua mo oe. E faatoilaloina ou fili ma e ita mai ia te oe, e olioli foi tagata ona o oe. 

O lo’o atagia mai na tatalo le fai Salamo I le faitauga o le Tusi Paia o le aso, ina ia foai le alofa tunoa I tagata e vivii ai I le Atua. Aua foi ua na o le Atua e mafai ona faaosofia le tagata e faia so’o se mea mo ia (Filipi 2:13). O mea uma tatou te faia mo le Atua e ala lava I lona alofa tunoa, e o’o I le tatou vivii ia te ia. E faamalosi foi le Atua I le tagata e vivii ia te ia I le faia lea o mea tetele e matua faigata ona ausia. Ou te tatalo ia faia e le Atua se mea matautia le matagofie I lou olaga I lenei Tausaga e te pese ma siva ai I le olioli. O le a tele taimi e te siva ai I le olioli I lenei Tausaga, I le suafa o Iesu, Amene. 

I Tausaga ua leva, na faapea mai le Alii I le taimi o a matou sauniga ia matou vivii I le Atua e aunoa ma le ole atu I se mea. Sa iai se tina na sau ma se ma’I tugā I lona tino. Ona o lea faatonuga mai le Alii, sa le fiafia lenei tina I le taimi o le sauniga ma o lea na sau ai e vaai se faifeau toeaina mo ni tatalo mo ia. Na fai iai le faifeau toeaina lea, o le la ua faasalalau mai e le taitai aoao o loo taitaia le sauniga ua na o le fai o viiga e aunoa ma se mea e ole atu ai se tagata. E ui na musua lenei tina, na ia faia ma ua vivii faatasi ma le faapotopotoga. Ina ua amata ona vivii o ia, ua maua ai lona faamalologa. 

Ou te faamalosiau ia te oe, ia e faia o se masani I aso uma le vivii I le Atua I lenei Tausaga I se auala e silisili atu I lo taimi muamua, ona e maua ma tumau ai lea i le lelei. Afai tatou te viia le Atua, e liligi mai e le Atua uaga o faamanuiaga ia tei tatou, I le suafa o Iesu, Amene.      

OPEN HEAVENS

MATALA LE LAGI MO LE ASO LUA 9 IANUARI 2024

Manatu Autu: O le a maua le lelei 1 (It shall be well 1)

Tauloto – Salamo 92:12 “E tupu olaola le tagata amiotonu e pei o le pama; e tupu tele e pei o le arasi i Lepanona.”

Faitauga - Tusi Paia: Isaia 3:10

Upu Folafola

Faatoa maea atu le Tausaga tuai ma ona lelei ma leaga. E iai lava le manatu masani o le a faasolo ai lava faapena pe sili atu foi ona leaga pe a fua I fuafuaga alu mamao a tagata. Peitai ane, e tusa ma le faitauga mai le Tusi Paia o le aso, ou te folafola atu I lou olaga, ‘O le a e maua le lelei!’

E ui lava e faamalosiau mo I tatou lenei feau taua mai le Alii, e le tatau ona aveesea mai o tatou manatu le mea moni o loo afifi mai I le faitauga o le Tusi Paia, o le amiotonu o le faavae lea o le tulaga lelei. Le au pele e, ou te faamalosiau ia te oe ia e ola ma soifua I le amiotonu I lenei Tausaga fou pe afai e te manao e te maua le lelei, e lelei lou aiga, o lau pisinisi, o lou tamaoaiga ma au mea uma. 

O se tasi o fesili e te ono faia, ‘E faapefea ona e ola I le amiotonu I lenei augatupulaga leaga, lea foi o lo’o faapea mai le Tusi Paia I le Roma 3:23 ua agasala tagata uma ma ua le maua le mamalu o le Atua?’ E faigofie le tali o lenei fesili, fai mai le 1 Ioane 1:9, afai tatou te ta’utino a tatou agasala, e faamagalo I tatou e le Atua, ma o le toto o Iesu Keriso, le Alo e toatasi o le Atua, e na te faamama I tatou mai agasala uma. Fai mai le Isaia 64:6

“O i matou nei e tusa ma le mea leaga i matou uma; o a matou amiotonu uma e tusa ia ma le ‘ie o le ma‘i. ‘Ua mamae i matou uma e pei o le lau la‘au, o a matou amioletonu e pei se matagi ‘ua lelea ai i matou”.

O le fuaitau o lo’o taua I luga, e faamautuina le upu moni e le mafai e I tatou lava ona faamamā I tatou ma talia I tatou e le Atua ona o a tatou galuega, ua na o le amiotonu mai le Atua, e tatou te maua e ala ia Iesu Keriso, o lē na maliu mo a tatou agasala e mafai ai ona talia e le Atua (Filipi 3:3-9). 

E moni, e tele tagata o loo latou fuafuaina e tele luitau ma fita o le Tausaga fou, ae ou te faapea atu,  o lē nofo I le mea lilo o iai le Silisiliese, e mau o ia I le paolo o Lē e ona le malosi uma lava (Salamo 91:1) e na te laveaiina ma puipui I latou mai mailei a le fai manu. O lo’o faapea mai foi le Tusi Paia, e le fia silasila le Atua I le amio leaga (Sapakuka 1:13). O lo’o atagia ai e tatau ona e maua le amiotonu o le Atua e ala ia Keriso pe afai e te fia maua le nofoaga lilo o iai le Silisiliese. 

A’o lafoai lou ola ia Iesu ma savali I lana amiotonu I lenei Tausaga atoa ma sili atu, ou te folafola atu faalua, o le a lelei mea uma mo oe. O I latou uma e nonofo I le mealilo o iai le Silisiliese, e latou te fiafia I le lelei o mea uma mo latou olaga atoa, I le suafa o Iesu, Amene.     

OPEN HEAVENS

MATALA LE LAGI MO LE ASO GAFUA 8 IANUARI 2024

Manatu Autu: Folafolaga ma Fuafuaga mo le Tausaga Fou 7 (New Year Resolutions 7)

Tauloto – 1 Peteru 1:16 “Auā ‘ua tusia, “‘Ia pa‘ia ‘outou, auā o a‘u nei e pa‘ia lava a‘u.”

Faitauga - Tusi Paia: Esekielu 14:6-8

Upu Folafola

I aso e ono ua tuanai atu nei, sa tatou suesue I folafolaga ma fuafuaga o le tausaga fou, ma sa ou faamalosiau I tagata uma o faalogologo poo faitau foi I lenei aoaoga ina ia mulimuli ma savavali ai. Sa ou faamalosiau atu I la’u savaliga ma le Atua I lenei Tausaga, o le a ou tapuai ia te ia, ole atu mo lana fesoasoani, faamaualalo, foai ia te ia, faatuatua ia te ia ma faalatalata atu ia te ia e sili atu I Tausaga ua mavae. Peitai, o nei fuafuaga e faigata ona ausia pe afai e le faia sa’u filifiliga ia ola faapaiaina ia sili atu I taimi muamua. O lenei Tausaga, ou te filifili ou te le faia lava se mea e ono to’atamai ai le Atua. O le a ou ola faapaiaina ma tumau ai. 

Fai mai le Amosa 3:3 E feoa‘i fa‘atasi ‘ea se to‘alua pe a le loto gatasi i lā‘ua? Suesue lelei le tulaga na e soifua ai I le lua Tausaga talu ai, e te manatu ea e fiafia le Atua e faalatalata atu ia te oe ma lou iloa lelei, e lē mafai ona silasila o ia I le amioleaga? (Sapakuka 1:13). 

Afai e te naunau moni e faalatalata I le Atua, ma e manao e fofo uma e le Atua ou faafitauli I lenei Tausaga, e tatau ona e salamo ma lafoai agasala uma. Aua e te manatu e te ola I le agasala ae fesoasoani atu pea le Atua. E tatau ea ona tatou faaauau le ola I le agasala ae maua pea le alofa tunoa o le Atua? O le tali a le aposetolo o Paulo I le fesili lea. ‘ia taofia e le Atua’ (Roma 6:1-2). O le alofa tunoa o le fesoasoani a le Atua ma e le tatau ona maua e se tagata agasala. 

O tatou taulaga, tapuaiga, tatalo ma isi galuega e maimau uma pe afai tatou te lē ola faapaiaina. O lona uiga, afai e te manatu ia aua nei faamaimauina le taimi I nei folafolaga ma fuafuaga e le maua ni fua, e tatau ona e ola faapaiaina. E le faalogo le Atua ini tatalo a tagata agasala (Salamo 66:18), e na te le talia foi a latou taulaga (Isaia 59:1-2). 

Le au pele e, mo fuafuaga uma na tatou talanoa ai I I aso e ono ua tuanai ia maua ni fua, e tatau ona mautu lau faaiuga e ola faapaiaina I lenei Tausaga e sili atu I tausaga ua te’a. I lenei Tausaga e le gata o le a sili atu lou alofa I le amiotonu ae o le a faateleina foi lou inoino I le amioleaga. O le auala lea e faatele ai le faauuga a le Atua ia te au ma oe e sili atu muamua (Eperu 1:9). 

O le Atua Silisili Ese e na te foai atu ia te oe le manuia lautele ao faia lau faaiuga e ola faapaiaina ma faataunuuina uma fuafuaga na talanoaina I le ono aso ua tuanai, I le suafa o Iesu, Amene. 

OPEN HEAVENS

MATALA LE LAGI MO LE ASO SA 7 IANUARI 2024

Manatu Autu: Folafolaga ma Fuafuaga mo le Tausaga Fou 6 (New Year Resolutions 6)

Tauloto – Iakopo 4:8 “‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, ‘inā fafano ia o ‘outou lima, o ‘outou e fa‘alotolotolua e, ‘inā fa‘amamā ia o ‘outou loto..”

Faitauga - Tusi Paia: Ioane 15:4-7

Upu Folafola

O la’u fuafuaga mo le Tausaga fou lona ono, o le savali faalatalata atu I le Atua ia sili atu I Tausaga ua tuanai. Fai mai le Tusi Paia I le Iakopo 4:8 a tatou faalatalata atu I le Atua, ona ia faalatalata mai ai lea iai tatou. O lo tatou Atua e le faapea e na o lou pa’i atu lava ia te ia ona toe tamoe ese lea. O le Atua e naunau ia tatou tumau ia te ia (Ioane 15:4-7).

O nisi o tatou ua na o ni kerisiano e tau o le Aso Sa, tatou te o I le lotu na o le Aso Sa, e na o le pau foi lena o le taimi e faitau ai le Tusi Paia ma tatalo. E finagalo le Atua Silisili Ese ia tatou faalatalata atu ia te ia, tumau ia te ia I aso uma. O lenei Tausaga fou e sili atu I Tausaga ua mavae, o le a ou faalatalata I le Atua ma ia faamautinoa o loo ia faatasi ma a’u I aso uma. Ua ou iloa, e iai faafitauli e mafai ona e fofoina I se Tausaga, lua Tausaga ao nisi e 10 tausaga, peitai a e faalatalata I le Atua, e mafai ona ia fofoina faafitauli I ni nai minute. 

Sa ou aoga I le faia o lou faailoga PHD I le Iunivesite o Lagos. E mafai ona maua se PHD I le matematika pe afai e mafai ona e sueina le tali o se fesili faamatematika. O le fesili faamatematika e tatau ona fou e lei suea muamua e seisi se tali, e te le mautinoa I le taimi e faia ai pe iai sona tali ae le mafai ona maua le faailoga PHD seiloga e maoti vaega nei. Na amata loa a’u suesuega I le auiliiliina o le fesili faamatematika ma e iu ane, ua 186 fesili ma ua matua ou leiloa po’o le a leisi mea o le faia. Ua oo atu I le 18 masina o tau faamautinoa le fesili ma lona tali. I se tasi po a’o ou punoai pea e su’e le tali, ua ou manatu e sili le moe. Na ou iu ane ua suesue la’u Tusi Paia I le Esoto 14:21-28, o le savaliga a le fanauga a Isaraelu I le sami ulaula, ona faaali mai lea o le Atua ia te au, ‘Atalii, alu e aumai au fesili matematika’. Ua amata ona ia taitai ia te a’u ia vaevaeina nei mau fesili I ni vaega se lua, e tasi I le itu tauagavale ao le isi I le itu taumatau. Ua faateia a’u I lou vaaia o se mea ou te lei vaai iai muamua. O fesili uma I le itu taumatau e isi ni vaega e tutusa ma e faapena foi I le itu tauagavale. Na faapea mai le Alii ia te au, ‘Sue muamua loa le tali o fuaiupu I le itu tauagavale, ona faapena foi lea I le itu taumatau, ona tuu faatasi loa lea’. I totonu o le 5 itula, ua maea ona ou taliina le fesili faamatematika sa ou taumafai e faia I le 18 masina. 

Po’o le a lava sau fesili po’o se faafitauli o lo’o lua feagai, faalatalalata I le Atua I lenei Tausaga, ona ia foai atu lea o ni tali I le suafa o Iesu. Faalatalata I le Atua I lenei Tausaga e sili atu I Tausaga ua tuanai, ona ia foai atu lea o tali I ou faafitauli ua tausagā, I le suafa o Iesu, Amene.