Samoan Devotional

OPEN HEAVENS

MATALA LE LAGI MO LE ASO LULU 27 TESEMA 2023

Manatu Autu: O le tosina mai o faamanuiaga a le Atua 2 (Attracting God’s Blessings 2)

Tauloto – Teuteronome 28:1 ‘Āfai fo‘i ‘e te matuā fa‘alogo i le si‘ufofoga o le ALI‘I lou Atua, e ‘ana‘ana e fai ana poloa‘iga uma lava ‘ou te fai atu ai ‘iā te oe i le aso nei, ‘ona fa‘asilisiliina lea o oe e le ALI‘I lou Atua i nu‘u uma lava o le lalolagi;’

Faitauga - Tusi Paia: Teuteronome 28:1-2

Upu Folafola

Talitonu mai ma le faamaoni, e mafai ona e tosina mai faamanuiaga a le Atua ua o’o I le tulaga ua e faapea, ‘Le Atua e, ua tele naua nei mea’. Tusa pe e te talitonu I ai pe leai, ou te folafola atu o le a o’o mai le tausaga e te faapea atu ai I le Atua, ‘Le Alii e, ua matua tele naua nei faamanuiaga’. O lau tautinoga lena I le suafa o Iesu, Amene. 

I le tele o Tausaga talu ai, na fai mai le Atua ia te au e ofo atu faaositaulaga lau taavale muamua. Ua mavae Tausaga, ua faatau mai mo a’u e se tagata se taavale Mercedes Benz. I na aso, e toatele tagata e manatu afai o oe o se afafine poo se atalii o le Atua, e tatau ona e tumau pea I le mativa ma o lea na ou lokaina ai lenei taavale I le fale taavale. Ua mavae sina taimi ona asiasi mai lea o le Alii I se tasi po ma faapea mai, ‘Atalii, aisea ua e faatuai ai le maua o le faamanuiaga a lo’u afafine lea na foai atu ia te oe le taavale? E sili ona e faaaoga loa le taavale aua e sili atu leisi taavale o le a foai atu. 

I le ta o le 3 I le isi taeao, na sau se tamaloa ia te au ma faapea mai, ‘ua le mafai ona ou moe, fai mai le Atua ou te foai atu le taavale lea mo oe’. Na ou sau I fafo e tilotilo ma ou vaaia se limousine e ono faitotoa. Ua ou ataata. Ina ua alu le tamaloa lea, na ou faapea atu I le Atua, ‘Lou Tama e, ua e silafia e le mafai ona ou faaaogaina lenei taavale. E mafai ona ou faatauina lenei taavale ona faaaoga lea o le tupe e faia ai se isi galuega?’ ua faapea mai o ia e le afaina lea itu. 

Peitai ane, e lei gata ai iina le foai a le Atua. E iai se aso se tasi, na sau ai se tamaloa ma foai mai ia te a’u ni taavale se tolu o le ituaiga o le Mercedes Benz ma faapea mai, ‘e finagalo le Atua ou te foai atu taavale nei e tolu mo oe’. Ua ou faapea atu, ‘Le Atua e, o le a ea le mea ua tupu? O le a le mea e tatau ona ou faia? Ua o’o mai le maasiasi ona o le tele o nei faamanuiaga’. Na faapea mai le Alii ia te au, ‘Atalii, e te lei vaai I le maualuga e tatau ona e iai. E pau le auala e mafai ona taofia ai le maua o nei faamanuiaga pe afai e te le toe ola faapaiaina’. O lenei, ona e le mafai ona taofia lo’u ola faapaiaina aua foi ou te maua le lagi, o nisi e manatu ua ou maua le maualuga o faamanuiaga, latou te lei iloa e sili atu isi faamanuiaga o lo’o agai mai e ala I le alofa tunoa o le Atua. 

E te le o iloa le mea o lo’o e misia pe afai e te musua e ola faapaiaina. Ou te faatuaina oe e te faataitai iai ona e vaai lea ua feliuaina mo le lelei lou olaga e le Atua. A silasila atu le Atua o faapaiaina le olaga o se tagata, e na te sasaa atu ana faamanuiaga ia te ia e faulai ma tele. O tagata e ola faapaiaina latou te tosina mai faamanuiaga a le Atua I o latou olaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 26 TESEMA 2023

Manatu Autu: O le tosina mai o faamanuiaga a le Atua (Attracting God’s Blessings)

Tauloto – Teuteronome 28:2 ‘e maua fo‘i e oe o nei mea uma e manuia ai; e o‘o lava ia ‘iā te oe, pe ‘āfai ‘e te fa‘alogo i le si‘ufofoga o le ALI‘I lou Atua:’

Faitauga - Tusi Paia: Kenese 22:1-18

Upu Folafola

O se fa’amanuiaga, o se foliga va’aia lea o malosiaga uma mai le lagi ma le lalolagi ma lalo ifo o le lalolagi ina ua ‘au ‘au faatasi e fesoasoani i se tagata. A fa’amanuia le Atua i se tagata, o mea uma, lona aiga, lana galuega, o mea tau tupe ma so’o se mea lava, o le a gaoioi mo le manuia o lena tagata! Afai e te naunau mo se fa’amanuiaga mai le Atua e tatau ona e silafia gaioiga e tosina mai ai ni faamanuiaga mai le Atua. Fai mai le Salamo 15:3, o le Atua o le tupu silisili ese ma o ia, na te faia mea e finagalo ai o ia. E mafai ona ia fa’amanuia i so’o se tagata e finagalo iai. E mafai ona ia fa’amanuia le tagata la’ititi nai lo le tagata matua. O ia lava o le Atua. I le tatou tauloto mai le Tusi Paia o le asō, ua fa’amanino mai le finagalo o le Atua: 

‘e maua fo‘i e oe o nei mea uma e manuia ai; e o‘o lava ia ‘iā te oe, pe ‘āfai ‘e te fa‘alogo i le si‘ufofoga o le ALI‘I lou Atua: (Teuteronome 28:2)

 O lo’o fa’aopoopo mai Teuterenome 11:26- 28:

“26Fa‘auta mai, ‘ou te tu‘uina atu i o ‘outou luma i le aso nei le manuia ma le malaia; 27o le manuia pe ‘āfai tou te fa‘alogo i poloa‘iga a le ALI‘I lo ‘outou Atua, ‘ou te fai atu ai ‘iā te ‘outou i le aso nei; 28a o le malaia pe ‘āfai tou te lē fa‘alogo i poloa‘iga a le ALI‘I lo ‘outou Atua, ‘ae ō ‘ese i le ala ‘ou te fai atu ai ‘iā te ‘outou i le aso nei, tou te mulimuli ai i atua ‘ese ‘ua ‘outou lē iloa.”

O le filifiliga e te faia I le va o le ola faapa’iaina po’o le agasala, e fua iai poo le a le tulaga e te tosina mai I lou olaga, o fa’amanuiaga, po’o malaia. Afai e te ola fa’apaiaina, e tosina mai faamanuiaga a le Atua, ae afai e te filifilia e ola i le agasala, e tosina mai malaia. O le fea o nei vaega e te filifilia? 

O fa’amanuiaga e lē o’o mai e aunoa ma se mafua’aga. I le Kenese 27 1-4 sa faatonu e Isaako ia Esau, ia tapena mai se taumafataga matagofie e faamalieina ai lona loto, ona ia fa’amanuia lea ia te ia ae le’I oti. E ui o Esau sa tatau ona maua le faamanuiaga, o Iakopo na aumaia muamua le meaai, ma ia maua ai le faamanuiaga. Sa faama’ite e Iakopo lona maua o le fa’amanuiaga, I lona faia lea o se mea e fiafia ma malie ai le loto a lona tama. Afai e te manao e faamanuia oe e le Atua, ia e faia lona finagalo ma fa’afiafia ia te ia i taimi uma. 

Ina ia ‘ausia lea tulaga, e tatau ona e ola faapa’iaina. Afai e te musuā e ola faapa’iaina, lafoai le manatu e tosina mai ni faamanuiaga mai le Atua. ‘Aua nei fa’asesēina oe o le maua o tupe o le pau lea o le faailoga o fa’amanuiaga a le Atua. O le tagata ua moni le fa’amanuiaina, ua ia te ia le filemu atoatoa fa’atasi ma le tamaoaiga. O le ola faapa’iaina e tosina mai ai fa’amanuiaga a le Atua, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 25 TESEMA 2023

Manatu Autu: Ia olioli ma fiafia ai le lagi (Make heaven rejoice)

Tauloto – Luka 15:7 ‘Ou te fai atu ‘iā te ‘outou, e fa‘apea fo‘i ‘ona tele o le ‘oli‘oli i le lagi i le tagata agasala e to‘atasi e salamō, ‘ae itiiti i ē amiotonu e to‘aivasefulu ma le to‘aiva e lē tusa i ai le salamō.

Faitauga - Tusi Paia: Ioane 15:8

Upu Folafola

O le aso lenei o le Kerisimasi ma ou te mautinoa e toatele kerisiano I le lalolagi o loo faia ni a latou fiafia ma sauni e faia se aiga I ni meaai o le kerisimasi. E le afaina lea itu ae aua ne’I galo e avatu I le e ona le aso fanau se vaega e mafai ona fiafia ma olioli ai o ia. O le tatou tauloto mai le Tusi Paia o le aso o loo faapea mai e fiafia le lagi pe a maua se agaga se tasi e sau ia Iesu. Afai e te manumaloina se agaga se tasi, fai mai e olioli ma faia se fiafia tele I le lagi ona o oe. 

E pau le naunautaiga o Iesu ina ia ‘aua nei ta’uleaogaina lona afio mai I le lalolagi e pei ona tatou fiafia ai I lenei vaitau. Tau atu Keriso I se tagata I lenei vaitau. Afai o lo’o e faia se faalalauga I luga o upega tafailagi I lenei aso, faaopoopo atu iai se feau e ono iloa ai e I latou e le faatuatua ia Iesu Keriso. Afai e te foai I e matitiva I lenei vaitau, faaopoopo iai ma se feau I le talalelei ia Iesu Keriso. Afai o lo’o e momoli atu ni feau faamanuia o le kerisimasi, faaopoopo atu iai ma se feau o le faaolataga. Ou te avatu ni faataitaiga e pei ona taua I lalo. 

Mo feau tusitusia e lafo I le telefoni I e pele ia te oe: ‘Manuia le kerisimasi. O le aso tatou te fiafia ma faamanatu ai le uluai afio mai o Iesu Keriso e auina mai le faaolataga. Ua lata ona toe afio mai e avatu lana fanau I le lagi. A afio ma o ia a taeao, e te ono siitia ma Ia pe tuua I le lalolagi nei?’

Mo luga o upega tafailagi: ‘O se aso matagofie lenei aua o loo tatou fiafia I le fanau mai o le Faaola o le lalolagi. Ua faamaonia ai ou te maua le lagi e faavavau aua ua maea ona foai lo’u ola mo ia ma ola faapaiaina. O fea e te ono iai e faavavau pe a o’o mai le siitiaga? Ta’uta’u o ia o lou Alii ma lou Faaola I le aso’. 

Mo so’o se tagata e na te avatu se upu tusitusia e faatatau I le talalelei ia Iesu Keriso, e olioli ma fiafia le lagi ona o oe. Ou te leiloa seisi auala e sili atu e fiafia ai I le kerisimasi I lo le faafiafia I Lē e ona le aso fanau, ma talitonu mai, e fiafia Iesu mo lau galuega lena I le aso. A’o a’u, o le Aso Kerisimasi ma le Aso Maliu o le Eseta, o vaitau pito taua lea e talai ai le talalelei ia Iesu Keriso. Ou te faaaogaina lava nei avanoa ia olioli ma fiafia ai le lagi ma ua ou iloa ai foi, e aumai ai foi e Iesu ni avanoa e faafiafia ai ia te au. E te le manao foi I lena avanoa? Ia manuia le kerisimasi, I le suafa o Iesu, Amene.  

OPEN HEAVENS

MATALA LE LAGI MO LE ASO SA 24 TESEMA 2023

Manatu Autu: Aua le tusiesea i latou (Don’t write them off)

Tauloto – 1 Timoteo 1:15 “O le ‘upu moni lenei, e tatau lava ‘ona matuā talia, na maliu mai Keriso Iesu i le lalolagi na te fa‘aolaina o ē agasala; ‘ua sili musa a‘u nei ‘iā i latou....”

Faitauga - Tusi Paia: 1 Timoteo 1:15-16

Upu Folafola

O le Atua, e faigata ona tatou malamalama i ona ala. O nisi taimi o tagata na te filifilia e fai ma ona sui, o i latou ua manatu nisi latou te lē mafaia se mea, e lē aoga. Atonu e I ai se isi o lou aiga e faaigoa o le mamoe uliuli o le aiga. Aua le tusiesea le uso; e mafai ona fa’aaogaina ia e le Atua e feliuaina lou aiga mo le lelei. Tatalo pea mo nai uso faapea, ma galue i le mea e gata ai lou mafai e tusa ma le finagalo o le Atua, e aumai le uso iā Keriso.

I le Mareko 5:1-20, ua faamatala mai ai le alii mai Katara sa mau o ia i tuugamau faatasi ma tagata oti. O tagata o lona aiga ma le nuu atoa, ua latou tusiesea ia, e leai se mea lelei e maua mai ai, peita’i i se tasi aso, na liliuina ai e le Atua lenei tagata e faaletonu le mafaufau e avea ma fai evagelia. I le Galuega 19:11-12, na fa’aaogā e le Atua solosolo ma ie tali eleele a le tagata sa sauāina le au Kerisiano, e fa’amālōlō ai ma’i ma tutuli temoni. O le afu sisina o le tagata lava lea, ua I ai nei le mana, e mafai ai ona o’o mai le fa’asa’olotoga I tagata. I le Galuega 5:14-16 ua tatou vaai ai i le fa’aaogāina e le Atua o le ata lafoia o se tagata fai faiva (sa lē mafaia se mea)e fa’amālōlō ai ma’i. O lo tatou Atua, o lē e mafaia ona liliu se tagata e faaletonu le mafaufau e avea ma fai evagelia, na te tu’u le mana i se tagata fa’atupu faalavelave, e mafai ai e lona afu maligi ona fa’amālōlō ma’i, mafai ona ia fa’aaogā le ata lafoia o se faifaiva e malolō ai e mama’i, e lē liliu o ia, ananafi ma le asō e o’o I le faavavau ( Eperu 13:8). E mafaia e le Atua ona fai faapea mo le uso ua tusiesea e tagata uma.

Ou te iloa le mamao na o’u i ai i le lalolagi a’o le’i faaolaina lo’u agaga e le Alii. E masani ona o’u faapea, a na o a’u o le Atua o’u te lē faaolaina Adeboye. O a’u o se tagata sa faia le agasala i aso uma, peita’i na laveaiina au e le Atua ma ua ia fa’aaogaina nei e fai galuega tetele. E faia fo’i faapea e le Atua mo le uso ua lē toe manana’o ai tagata.

Sa sau se tagata Mosalemi i se tasi o a matou sauniga na o’u faapea ai, o ofu o loo ofuina e tagata uma o loo i le sauniga e fa’au’uina. Na fo’i i lona fale ma le loto fiafia. O se tasi aso na filifili ai e ofu I le ofu fa’au’uina i sana faatalanoaga mo se galuega ma le manatu ia maua ai le galuega. Na lavea le pasi sa alu ai ma sasao ai se afi. Na mu uma le pasese ma maliliu. A’o le tamā lenei sa na o ni nai mu i vaega o lona tino e lei ufiufia i le ofu. Faafetai I le Atua sa i ai se tagata e lei fiu ia te ia, ma ia ta’ita’i le uso iā Keriso. Aua ne’i e fiu i se uso ma tusiesea o ia. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 23 TESEMA 2023

Manatu Autu: O Lē na te faailoa mea ua natia (The Revealer of Concealed Things)

Tauloto – Isaia 45:3 “Ou te foa‘i atu fo‘i ‘iā te oe ‘oloa o lo‘o i le pogisā, ma ‘oloa lilo o lo‘o i mea nanā; ‘ina ‘ia e iloa o a‘u lava o le ALI‘I, o lē vala‘au i lou lava igoa, o le Atua o Isaraelu...”

Faitauga - Tusi Paia: Tanielu 2:1-19

Upu Folafola

Ua faamatala mai e le tatou Tusi Paia faitau o le asō le tala i se tupu na fai sana miti ae ala a’e ua ia lē manatua lana miti. Na poloa’iina e le tupu tagata popoto o lona mālō ia latou faailoa lana miti ma lona uiga, peita’i latou te le’i mafaia. O lea na to’atāma’i ai le tupu, ma ia faatonu ai ana auauna ia fa’aumatia uma le au popoto o i totonu o lona mālō. O lenei poloaiga e a’afia ai fo’i Tanielu ma ana uo, o lea na faavave ai ona talosaga Tanielu i le tupu e tu’u mai sina taimi, aua ua ia mautinoa e fa’ailoa mai e le Atua le miti ma lona uiga ia te ia. Na tatalo Tanielu ma ana uo, ona fa’aali mai lea e le Atua iā te ia le miti a le tupu ma lona fa’auigaina. O le ala lea ua faapea mai ai Tanielu i le Tusi o Tanielu 2:21; O ia fo‘i na te liua tausaga ma tau; e ‘ave‘eseina e ia o tupu, e tofia fo‘i e ia o tupu; Pe foa‘iina mai e ia le poto i ē o popoto, ma le malamalama i ē o iloa mafaufau.

O le talalelei lenei mo so’o se tama po’o teine aoga o faitau i lenei faamalosi’au: o le mataupu lenā e fa’afaigatā iā te oe i le taimi nei, o le a avea ma mataupu e tulaga ese ai ou togi mai isi uma tamaiti i le suafa o Iesu. So’o se Kerisiano o galue i soose vaega o le olaga, e mana’omia le Atua e faailoa atu ia te ia mea lilo, o loo nātia. I le 2 Tupu 6:9-20, o Elisaia sa fai ma lavea’i i le tupu o Isaraelu. A na leai Elisaia semanū e maua le tupu e le osofaiga a le ‘autau a le tupu o Suria.

Afai o oe o se tasi o ta’ita’i, poo se tasi e mau tulaga i upu fai o le mālō, e mana’omia lou tatalo I le Atua e fa’aali ia te oe mea ua ia nātia, ia lē aunoa. O tagata fai pisinisi fo’i e manaomia le faaaliga mai le Atua e uiga ia latou pisinisi. O le mea moni, na folafola e le Atua i le tusi o Isaia 45:3; “Ou te foai atu fo’i iā te oe oloa o loo i le pogisa, ma oloa lilo o loo i mea manā; ina ia e iloa o a’u lava o le Alii, o le valaau i lou lava igoa, o le Atua o Isaraelu.”

E i ai tamāoaiga o nātia i le mea lilo, e te mana’omia lou Atua na te faaali ia te oe ia mea. E mafai ona ia faailoa ia te oe e ala i se manatu, poo se auala fou, peita’i faatoa e maua ma vaai i nei oa ma tamāoaiga, ina ua e galue ma saili. O se tamā na faigata na maua se tupe e ola ai, ona tatalo lea I le Atua mo se fesoasoani, ona faasino lea e le Atua iā te ia, e tago e fai pinati e cover i le honey. Na usita’i le tamā lenei i le Atua, ma o le taimi nei ua fealua’i i lana ia lava vaalele.

Tatalo

Tamā faamolemole faailoa mai mea lilo tetele iā te a’u, ia suia ai lo’u olaga e o’o i le iuga, I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 22 TESEMA 2023

Manatu Autu: O le galueaina o tupe I auala a le Atua (God’s banking system)

Tauloto – Mataio 19:29 “‘Ai sē tasi ‘ua ia tu‘ua o fale, po o uso, po o tuafafine, po o le tamā, po o le tinā, po le avā, po o le fānau, po o fanua ‘ona o lo‘u igoa, e maua e ia e ta‘isautuaselau, e fai fo‘i mōna tofi le ola fa‘avavau..”

Faitauga - Tusi Paia: 2 Korinito 9:6-8

Upu Folafola

O le auala e galueaina ai tupe e le Atua e ese mai lava I ala masani o faletupe. E le faapei o faletupe masani I le lalolagi, e tatau ona teuina au tupe ona faatoa mafai lea ona e talaina se tupe. O faletupe i le lalolagi e masani ona toese a latou tau po’o le totogi o le auaunaga, ma e uma ane ua itiiti atu lau tupe ua tala I tua I lo le aofai na iai ina ua teuina. Ao le faletupe a le Atua, e pau le mea e te manaomia o se mafutaga vavalalata ma ia, o Lē e ona le faletupe ma oe, e agavaa ma faatagaina e tala tupe mai lana faletupe. Mo nisi, e avatu e le Atua le faatagana ma le avanoa tuu saunoa e tala ai tupe mai lana faletupe. Ao nisi, e na te Faataga e tala na o vaega e fua I le malosiaga e mafai ai ona tauaveina mai lea taimi I lea taimi, o nisi e avatu iai le faatagana e tala na o se vaega I lena taimi e tasi. Ou te leiloa ia te oe, a’o a’u, ou te manao e aumai e le Atua ia te a’u le avanoa tuu saunoa e tala tupe ai mai lana faletupe I soo se taimi. 

I le 1 Tupu 17:8-16, o loo tusia ai le tala I le fafine ua oti lana tane na ia foai atu lana meaai mulimuli I le perofeta a le Atua, ma na amata atu i le aso lena seia oo atu I le sili atu ma le tolu Tausaga, na matua faulai le tele o meaai I lona fale I aso uma. O le tulaga lena e ta’u o le talaina o tupe e tuu saunoa mai le faletupe a le Atua. I le 2 Tupu 4:1-7, sa iai foi se tasi fafine ua oti lana tane sa iai se mea na ia manaomia. Na foai atu iai e le Atua le avanoa e maua ai se uu mai le faleoloa a le Atua ma ina ua tumu uma fagu omea na maua e lenei fafine, ona taofia ai lea o le tafe a le uu. O le talaina lena o tupe e fua I lona malosiaga e tauaveina ai. I le Mataio 17:24-27, ina ua fesiligia e nisi Peteru e tusa ma le lafoga a Iesu, na faatonu e Iesu Peteru e alu e fagota ma aoina mai le tupe e totogi ai lafoga mai le gutu o se ia o le a maua I lana fagota. O le talaina lea o tupe e fua I le mea o loo manaomia I lea taimi. 

O lo’u Tama faaleagaga o Pa Josiah Akindayomi, o le na faavaeina le Ekalesia Redeemed Christian Church of God, na ia faamatalaina se aso na ia ole atu ai ma tagi atu I le Atua mo se meaai ae na faapea mai le Alii, ‘fai I lou toalua, mai I le ulo supo lena, ia tago e asu mai ai le meaai mo aso uma, ae ia aua lava nei tilotilo I totonu’. Na ia tau atu I lona toalua le faaaliga mai le Alii ma na amata mai le aso lea, na matua maua pea ma faulai ituaiga supo eseese na asuina mai le ulo lea seia oo I le aso ua matua le mafai ona taofi le fia iloa e lona toalua ma tilotilo loa I totonu o le ulo. Ua ia iloa ai, e leai ma se mea I totonu o le ulo. O le faataitaiga lea o le talaina mai e tusa ma le mea o loo manaomia I le taimi lea. 

Le au pele e, o le mafai ona talaina mai o so’o se mea mai le faletupe a le Atua, e ao ona e osia se mafutaga vavalalata ma le Atua e ala I le taliaina o Iesu e avea ma ou Alii ma Faaola. Afai e te naunau e te maua e lē aunoa le faulai o mea mai le Atua, e ao ona saunia lou tagata e foai atu mea faalelava o lo’o ia te oe, I le suafa o Iesu, Amene. 

 OPEN HEAVENS

MATALA LE LAGI MO LE ASO TOFI 21 TESEMA 2023

Manatu Autu: E le mafai ona e faatapula’aina le Atua2 (You can’t box God in 2)

Tauloto – Efeso 3:20 “Ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou.”

Faitauga - Tusi Paia: Isaia 55:8-9

Upu Folafola

O le tele o tagata, ua faapea ifo lava, ua o latou iloa lelei le Atua. Ua manatu ua latou iloa ma silafia uiga ma auala uma o le Alii. Ina ua mavae le tele o Faaaliga mai le Atua ia Paulo, na tele mafatiaga I le galuega e o’o lava I sauaga e pei o le fetogi I ma’a ma lafoaiina ia maliu ai, a’o talai le Talalelei. Ae fai mai le Aposetolo o Paulo i le Filipi 3:10; ‘‘Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu”. 

Afai e te auai I se sauniga lotu, o le tele o faamanuiaga e te maua mai ai e faʻatapulaʻaina e tusa ma ou manatu. Afai e te faʻamoemoe o le a taʻua e le faifeʻau sou manaoga, peitai ua le taua, ona e manatu lea ua le tali mai le Atua i lau tatalo. E mafai e le Atua ona filifili e galue leotele pe filemu foi; pau lava le mea na te manaomia mai ia te oe, o le faatuatua, ae le o se sailiiliga o le auala o le a ia galue mai ai. E faamoemoe o ia tatou te savavali i le faatuatua ae lē o le vaai (2 Korinito 5:7).

Sa fai se molimau a se tamaitai na ola mai ma le tele o faaletonu I lona soifua maloloina- e tasi lona mama, ua le lua, ma o lona fatu o lo’o i le itu taumatau o lona fatafata, ae le o le itu tauagavale. Ona o nei tulaga, na tauivi ai lava lenei tamaitai ma gasegase mai le aso na fanau mai ai. Mulimuli ane, na fautuaina e se tasi tagata, se falemai i Dubai, ae sa tonu ia te ia e alu muamua i le sauniga a le Agaga Paia I la matou Ekalesia. E leai se faaaliga faapitoa na maua mai e tusa ma lona gasegase i le taimi o le sauniga. Mulimuli ane, na alu i Dubai e pei ona ia fuafuaina. Ina ua taunuu o ia i Dubai, sa faia suesuega a fomaʻi, ona fesiligia lea o lenei tamaitai po’o le a tonu le mafuaaga o lona sau I le falemai, ona e leʻi mafai ona latou maua se ma’I poo se faaletonu ia te ia. Sa manatu lenei tamaitai, e le iloa e nei fomai se mea ma o lea na alu ai I seisi falemai i Dubai lava. Na faia foi suʻesuʻega a fomai o le falemai lenei, ma latou faamaonia ai foi, e leai se gasegase. E lei talitonu Fomai, o le tamaitai Nigeria lava lenei e tasi ua maea ona latou faitau ma Iloilo pepa mai le falemai, lea e faailoa ai o lona fatu e I le itu taumatau ma le māmā e tasi. 

Ana faapea na manatu lenei tamaitai, e lē o manatu mai le Atua ona ou te lei taua lana mataupu ma lona ma’I I le taimi o le Sauniga Faapitoa o le Agaga Paia, semanu  ua ia misia lenei vavega. ‘Aua e te taumafai e faatapula’aina le Atua, I misi ni vavega mo lou soifua.

Tatalo

Tama, faamolemole fesoasoani mai ia te a’u ina ia aua nei o’u ola e fua I le vaai ae ia faia ma le faatuatua ia te oe I taimi uma, I le suafa o Iesu, Amene. 

 OPEN HEAVENS

MATALA LE LAGI MO LE ASO LULU 20 TESEMA 2023

Manatu Autu: E le mafai ona e faatapulaa le Atua 1 (You can’t box God in 1)

Tauloto – Roma 11:33 “Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala...”

Faitauga - Tusi Paia: Roma 11:33-36

Upu Folafola

Afai e te malamalama lelei I le Atua, e te ono silafia e eseese lava auala e na te faatino ai so’o se mea mai lea taimi I lea taimi. Tusa pe na te faatino se mea e tasi, e ono suia le auala e faatino ai. Mo se faataitaiga, I le 2 Tupu 5:1-14 na ia faatonu Naamanu e alu e tofu I le vai I Ioritana ma ina ua usitai, na faamaloloina lona lepela. I le Mataio 8:1-3, a’o ia faamaloloina se tasi o lepela, na ia pa’i atu ia te ia ona faamaloloina lea. I le Luka 17:11-19, na faamamaina e Iesu lepela e toasefulu I le na o le fetalai atu, ‘alu e suesue lelei ma faamaonia lou faamalologa e le ositaulauga sili’. 

Afai e te ono manatu ua e silafia  auala e faatino ai e le Atua se mea, ona agai uma lea o lou faatuatua ma le faamuamua I lea vaega, e te ono misia lau vavega. O le mafuaaga lea e tatau ai ona e alu atu ia te ia e aunoa ma le tamau o lou manatu I se auala e tasi o le a faatino ai e le Atua. E maualuga atu ona ala I ou ala (Isaia 55:8-9). Ou te leiloa po’o le a auala e fofo ai e le Atua ou faafitauli ae lei maea le Tausaga, ae ou te iloa lelei, e na te le ono faatinoina e tusa ma ou manatu. Pau o lea, faalogo lelei ia te ia ma faataga o ia e taitai ia te oe. 

E ono lē faia e le Atua le mea lena o lo’o e ole atu ai I le auala o lo’o e faamoemoe iai. E na te ono filifili e faatino e faifai lemu. E na te ono lē faia lemu ae faatino Ioa I le taimi nei. E pau le tulaga ia e mautinoa, e faia e le Atua ma o so’o se auala e faaaoga e le Atua, o le auala e pito sili ona lelei e faia ai. 

Aua e te taumafai e faatapulaa le Atua. Aua e te manatu e na te faia le vavega mo oe e tusa ma le auala na faia ai se tautinoga a se tagata I totonu o le lotu. Aua e te mafaufau loloto I se auala e te manatu o le a faatino ai e le Atua, ona e misia lea o lau vavega pe afai e lē faatinoina e le Atua e tusa ma lou manatu, e pei o Naamanu semanu e misia lana vavega. Afai ua e iloa ma mautinoa le auala e maua ai le vavega, aisea e te faalavelave ai la I le Atua?

Afai e te silafia e le mafai ona e faia lava e oe, taatia pea I le Atua Silisili Ese e filifili le auala e faatino ai mo oe. Aua e te taumafai e faatapulaa le Atua. Ou te tatalo ia faia e le Atua se mea lelei e ono faateia ai oe ae lei uma lenei Tausaga, I le suafa o Iesu, Amene.  

OPEN HEAVENS

MATALA LE LAGI MO LE ASO LUA 19 TESEMA 2023

Manatu Autu: E mafai pea e le Atua ona faataunuuina (God can still do it)

Tauloto – 2 Peteru 3:8 “A e aua ne‘i lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e tasi..”

Faitauga - Tusi Paia: Isaia 55:10-13

Upu Folafola

O iai ea se folafolaga a le Atua ua faia mo oe ae e lei faatinoina lava? Ou te fia ta’u atu ia te oe, e le faatuai le Atua ma e mafai ona ia fa’ataunu’uina lana folafolaga i toe aso o lenei tausaga. Pau le mea ia e matuā mautinoa sa faia e le Atua lena folafolaga ia te oe, ma o lo’o iai sau gaioiga o faia e te ‘ausia ai le mea na ia folafolaina. Ou te ta’u atu ma le mautinoa o le a ia fa’ataunu’uina ae e lei i’u lenei tausaga e pei ona ia folafolaina. Aua nei muta lou fa’amoemoega.

O le tāua o se fa’amatalaga e fua i le tagata o loo ia faia. Mo se fa’ata’ita’iga, o se gasegase ua taofia i le falema’i a ua fai ane iai se tagata teufale, o le a te’a le ma’i i se aso ua ta’ua. E mautinoa e le talitonuina e le gasegase, aua foi, e leai se pule ma le poto i le tagata teufale e faate’a ai se ma’i. Peitai, afai e sau le fomai, vaai le ma’I ma faapea mai ‘O le a e te’a i le asō’, e vave ona fiafia le tagata sa gasegase. O Lē sa faia ni folafolaga ia te oe i le amataga o lenei Tausaga, o Ia o le “Upu Moni” e pei ona ta’ua i le tusi o Ioane 14:6 ma le Numera 23:19 e faapea: “E le se tagata le Atua e tala pepelo ai o ia, po o se atalii o se tagata e salamo ai o ia; na fetalai mai o ia, na te le faia ‘ea? Ua fetalai mai foi o ia, na te le fa’ataunu’uina ‘ea?”

O le Atua lenei ua ta’ua o Lē e sili ona maualuga ma o ia o le Silisili ‘Ese, e leai se mea na te le mafaia. Ua ia faataunuuina I se toe taimi mo le toatele o ni tagata muamua. Afai sa ia mua’i fa’ataunu’uina, o le a ia faia fo’i mo oe i le suafa o Iesu. Pau o lea, ia e mautinoa sa ia folafolaina mo oe, ma e te mautinoa e te lei faia se mea e ono suia ai lona manatu. Fa’amolemole ia fa’aolaola lou fa’atuatua auā o loo faapea mai le tusi o Iakopo1:6 “A ia ole atu ma le fa’atuatua, ‘aua lava nei masalosalo; aua o le masalosalo e tusa ia ma peau o le sami ua sousou i le matagi ma le felafolafoa’ina.” Afai o iai se masalosalo i lou loto, o lona uiga o le a e le maua le mea na e ole atu ai.

Afai foi e te lei faamaoni i le Atua pe e te lei faia se galuega ina ia tino mai lea folafolaga mo oe, sau i luma o le Atua i le asō ma ta’utino ou sese. Lafoai ese ma e tagi atu e fa’amagalo ia te oe. O le Atua e alofa mutimutivale ma afai  e silasila mai I le moni o lou agaga salamo, o le a le tuulafoaina oe e ia (Ioane 6:37).    

Ia fa’aolaola lou fa’atuatua. E mafai e le Atua ona fa’atino ana folafolaga ae le’i o’o atu i le fa’ai’uga o lenei Tausaga, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 18 TESEMA 2023

Manatu Autu: O le auala i le mana faale Atua (The key to divine power)

Tauloto – 2 Korinito 10:6 “o loo nofo sauni foi i matou e taui atu i le lē anaana uma, pe a faaatoatoaina lo outou anaana.”

Faitauga - Tusi Paia: 2 Korinito 7:1

Upu Folafola

Ina ua avea a’u o se kerisiano, sa ou naunau ia ‘aua nei o pei o le toatele o kerisiano. Na ou naunau ia avea au o se kerisano e iai le mana e faia so’o se mea e o’o I mea e faigata ona ausia. Ua vave ona ou iloa, e maua le mana pe afai e matua tuuina atu ma le atoatoa lo’u ola I le Atua. Afai e te suesueina le soifuaga o Paulo le aposetolo, na matua maualuga le mana ia te ia e o’o I ona solosolo, o ofu na malolo ai ma’I, e te vaai iai ina ua fetaia’i ma Iesu I Tamaseko, na faapaū I le eleele ma faapea mai, ‘O le a le mea e te finagalo ou te faia le Alii e?’ (Galuega 9:6). O le matua lafoai o le ola ma le atoatoa lena mai le amataga. Ua e faalogo I lana tautinoga I le Kalatia 2:20 

‘Ua faasatauroina faatasi i maua ma Keriso; a e ou te le toe ola a‘u, a o Keriso o lo’o ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui’.

I nisi faaupuga, o loo ia faapea mai, ‘ia outou faagalo le Paulo tuai, faagalo mea uma e te iloa ia te a’u muamua, e pau le ala o lo’o ‘ou ola ai o Keriso o lo’o ola I totonu ia te au’. O le mafuaga lea na ia faapea mai ai I le Filipi 1:21 Auā o lo‘u ola ua ia Keriso lea; a o lo‘u oti, o lo‘u manuia lea.

E ala I le alofa tunoa o le Atua, ua ia faia mea tetele e tauala ia te a’u, e matua faafiafiaina ai lo’u tagata na ou lafoai mea uma ia te ia. O mea nei e lavātia ai le tiga o le ola e lafoai ma le atoatoa I le Atua. 

E iai nisi o tagata e mananao e faaaoga I latou e le Atua I ni ala matautia, peitai latou te tala pepelo I nisi o taimi. O nisi e mananao latou te faamalōlō I ma’I peitai e taua tele le tupe iai latou ua le mafai ona avatu I le Atua. O nisi latou te fia faatonuina agaga leaga ae oo I le tiapolo o loo tilotilo iai latou ma faapea mai, ‘Mai lou gutu e agasala? E te manatu e mafai ona e faatonuina a’u?’ 

Aveese lau faamuamua I mea o le lalolagi o lo’o faalavelave ia te oe, ae lafoai ma le atoatoa I le Atua. Ia tatalo e le aunoa, suesue ma saili I lau Tusi Paia ia faifaipea, toaga e anapogi, ia avatu lou ola ma le atoatoa mo le Atua. Ia faailoa atu ia te ia ua e tuuina atu ma le atoatoa lou ola ia te ia, ma ua na o ia lava. Aua e te popole I mea o le lalolagi nei o loo e tau saili. Na folafola e Iesu Keriso I le Mataio 19:29 Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, po o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

Ou te faamaonia le moni o lenei folafolaga aua ua ia faatinoina I lo’u olaga. Faataitai iai ona e vaai lea iai I lou olaga. 

Tatalo

Tama, faamolemole foai mai ia te a’u le alofa tunoa e faia ai mea uma ina ia ou tauaveina ma faaaogaina lou mana mo lou viiga I le lalolagi nei, I le suafa o Iesu, Amene.