Samoan Devotional

OPEN HEAVENS

MATALA LE LAGI MO LE ASO FARAILE 29 SETEMA 2023

Manatu Autu: Agamalū (Moderation)

Tauloto – Filipi 4:5 ‘Ia iloa lo ‘outou agamalū e tagata uma lava; ‘ua lata mai le Ali‘i..”

Faitauga - Tusi Paia: Filipi 4:5-9

Upu Folafola

Ia faia mea uma ma le agamalu. O le tele o tupe ua e maua e faatau ai meaai e le faapea o le a e ai ai I taimi uma. E iai nisi o tagata sa masani na anapogi a’o matitiva, ae o’o loa ina tele tupe I o latou lima ua le toe faia. Tusa pe e te le fia anapogi mo le malosi faaleagaga, e tatau ona e anapogi mo le malosi o le tino. 

E moni e ono tele au galuega e faia ae le faapea o le a le maua ai se taimi e te mafuta ai ma lou aiga. Aua nei e faatagaina le faamanuiaina e talepe ma faaumatia mea lelei ma aoga mo lou olaga. O le tupe e tatau ona faaleleia le ituaiga olaga e te soifua ai, ae lē o le faaleagaina. O le maua o se tagata faigaluega e faia au feau e le faapea o le a leai ai se faamalositino e te faia. E tatau lava ona faagaoioi lou tino I ni feau o le fale poo nisi galuega e faaaoga ai lou malosi. 

A maua tupe a nisi tagata, ua amata ona lē mafaufau ma lē faaaloalo I isi tagata vaivai. Afai e te vaai I se tagata mauoa ma le tauoloa ua le faaaloalo I tagata matutua, ua e vaai atu I se tagata e le o naunau e umi lona soifua. Na avea le tupu o Saulo ma tagata mauoloa ma le tauoloa, ona ia le toe faaaloalo lea I le perofeta o Samuelu. Na matua leaga le mea na oo iai lona olaga ua aioi mai e fasioti o ia (1 Samuelu 31:4). Na manatu Samasoni ua ia maua le malosi ma le tulaga tauoloa e mafai ai ona ia maua so’o se tamaitai e manao iai, tusa pe na tetee iai I ona matua. O lona iuga na saisai e ona fili. Aua nei e faatagaina le pule ma le malosiaga e maua I le tele o tupe ma le faamanuiaina e te faaumatia ai lava e oe lava ia. 

E le o aoaoina I tatou I le upu a le Atua e faapea e tatau ona tatou ola I le tino e faamalie le tino (Roma 8:13). Aua nei e faatagaina le manaia o le olaga e vave ai ona e oti. Ia pulea lou tino ina ia aua nei e fiafia I mea e le maua ai sou manuia. Talitonu mai ma le faamanoni, afai e te faia so’o se mea e te manao iai I so’o se taimi e te manao iai, o le a amata ona pulea oe e lou tino. Afai e te faatagaina le tupe, manuia ma le tulaga tauoloa e faafefeteina oe, e matuia lou iuga. E tele naua manuia e tatau ona ausia I le lumanai, peitai fatoa mafai ona e ausia pe afai e te agamalu I manuia ua e maua I le taimi nei. 

Aua e te faatagaina le tupe, manuia, ma le tulaga tauoloa e taofia lou maua o isi faamanuiaga o lo’o i lou lumanai, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 28 SETEMA 2023

Manatu Autu: O i ai Iesu I totonu o lou va’a? (Is Jesus in your boat?)

Tauloto – Mareko 4:38 ‘A o ia, sa i le taumuli, ‘ua tofā i le aluga; ‘ona latou, fafagu lea ‘iā te ia, ma fai mai ‘iā te ia, “Le a‘oa‘o e, ‘e te lē manatu mai ‘ea ‘iā te i matou a fano?””

Faitauga - Tusi Paia: Mareko 4:35-41

Upu Folafola

I la tatou faitauga o le Tusi Paia mo le aso, na fafagu e le au so’o o Iesu o ia, ma na Ia taofia le afa. E te manatu i le mea e ono tupu pe ana le seanoa lona iai i totonu o le vaa? O lenei olaga, e tumu i afa e agi pea, sei vagana lava ua fesoasoani mai le Atua ia te oe, e mafai e nei afa ona e malemo ai.

Po o le a lava lou atamai, e tasi lava le afa e le mafai ona e sola ese ai: o le afa o le maliu ma le oti. ‘Aua ne‘i fa‘asesēina oe, ma faapea ane, o le oti, e fa‘amata‘u ai so‘o se tasi e lē  o ‘iā Keriso. Na mafai e Tavita ona faapea mai “E ui lava ‘ina ‘ou savali i le vanu o le ata o le oti, ‘ou te lē fefe lava i se mea leaga; auā o oe tā te fa‘atasi ma a‘u; o lau la‘au ma lou to‘oto‘o e fa‘amafanafanaina ai a‘u. Salamo 23:4 auā sa i ai o ia i le itu a le Alii. Afai e lē o faatasi le Alii ma oe i lou va’a, ae o’o mai se afa, o ai e te valaau i ai?

E mafai ona agi faafuase'i mai se afa e aunoa ma se faailo. E I ai le taimi a’o o’u i luga o se vaalele mo Lonetona. Sa i ai se tamā o se tasi o le pasese, e i ai lana to’oto’o auro. I le tele o le taimi, e tulai i luga lenei tamalii, savali ma faʻaalialia lona to’oto’o auro aʻo agai atu ma toe foʻi mai i le faleletaua. Na fa’afuase’i ona fa’ailoa mai e le kapeteni e faapea, “Alii ma Tamaitai o le pasese, o lo’o I ai se fa’afitauli, ua le mafai ona tu laueleele le va’alele i le taimi nei”. O le tamaloa lenei ma lona tootoo auro ua manaʻo nei e tulai i le faleletaua, peitai ua taofia e le tamaitai o le vaalele ma faatonu e  alala I lalo. Na manino lava le fefe o lenei tamalii, ma ua musu e nofo i lona nofoa, ma e faapena foi lo’u fefe foi o a’u ia, mo sina taimi. Ona ou tatalo lea i lo’u Tama, “Le Alii e, e te lei saunoa mai ia te a’u, o le iuga lea.” Na tali mai le Alii,  “Leai e le o le iuga lea, ae ou te fia talanoa ia te oe, ona ou te iloa o le taimi lava e te tulaueleele ai, o le a e pisi, ae e tatau ona ta talanoa”. O le taimi lava na ou faalogo ai i lona siufofoga, na o’o mai ai ia te au lona filemu. Na maea loa ona talanoa mai le Alii ia te a’u, ona faatoa tu laueleele lea o le vaalele e aunoa ma se faafitauli. Ana faapea e le o a’u o se atalii o le Alii I lena aso, semanu e leai sa’u aia tatau ou te valaau ai ia te ia i le taimi o le afa ma semanu ou te fefe, e pei lava o isi lava tagata.

Afai e le o i ai o ia i totonu o lou vaa, e leai se tasi e te valaau atu I ai mo se laveai I taimi o afa. Se’I vagana lava ua i ai o ia i lou vaa, ona mafai lea ona e fai atu, "O Keriso o lo’o ia te au le faamoemoe I le manuia" Kolose 1:27. O iai Iesu I lou olaga? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 27 SETEMA 2023

Manatu Autu: Fesoasoani mai I lou lē faatuatua (Help thou my unbelief)

Tauloto – Mareko 9:24 ‘Ona ‘alaga loa lea o le tamā o le tama, ‘ua fai atu, “Le Ali‘i e, ‘ua ‘ou fa‘atuatua; ‘ia e fesoasoani i lo‘u lē fa‘atuatua.”

Faitauga - Tusi Paia: Mareko 9:17-27

Upu Folafola

I le Esekielu 37:1-11, o lo’o faamatala e le Tusi Paia le vanu o ivi mamago, ona fesili atu lea o le Atua I le perofeta ‘E mafai ea e nei ivi mamago ona toe ola?’ Na tali atu Esekielu ‘Na o oe e te silafia’. I nisi faaupuga o loo faapea atu Esekielu ‘e le mafai e lo’u faatuatua ona gafatia lena mataupu’, peitai na toe ola uma nei ivi mamago. I le Mareko 9:17-27, na aumai ese tamā lona atalii na ulufia e temoni i le au soo o Iesu. Ua le mafai ona latou faasaoloto le tamaitiiti ona latou ave lea ia Iesu. Na faapea ane iai Iesu ‘Le tupulaga lē fa‘atuatua e’. Ona tali atu lea o lea tama, “Le Ali‘i e, ‘ua ‘ou fa‘atuatua; ‘ia e fesoasoani i lo‘u lē fa‘atuatua.” Ina ua ‘ou faalogo I lenei tala, na ou fiafia aua ua ou iloa, afai e le atoatoa lo’u faatuatua, e mafai ona ou tagi atu I le Alii ona ia faatupuina lea o lo’u faatuatua. 

Ina ua avea a’u ma taitai aoao o le Ekalesia, matou te fiafia e kuka meaai ma aai faatasi pe a fai fono a le Ekalesia aoao, peitai sa tele luitau ona o le lē lava o le faasoa tau tupe ma ua mamafa le avega ua matua oi aulotu eseese. E iai se aso na ou faapea atu ai ona o lou alofa tele I tagata, ‘e iai le aso o le a e sau ai I le fonotaga aoao e aunoa ma se tupe e te sau ma oe’. Ina ua maea la matou fonotaga I lena po ma ua ou alu atu I lou ofisa e tatalo, na faapea mai le Alii ia te a’u,  ‘atalii o afea e te manao ai e tupu lena tulaga?’ na ou faapea atu, ‘I se aso lata mai’. Ua toe faapea mai, ‘ae a pe a amata atu loa nei?’ I le taimi lea, e tusa ma le 10,000 tagata e auai I a matou fonotaga. E faapefea ona ou fafagaina ni tagata se toa 10,000? Ua faapea mai le Alii, ‘tago e faasilasila I le Ekalesia aoao o le a e fafagaina I latou I le isi fonotaga’. Ua ou faapea atu, ‘Le Alii e, ou te lei lē usitai lava ia te oe muamua, ae e le mafai ona ou faia lena faasilasilaga’. E lei ona faatauanauina a’u ma ua maea le fonotaga aoao ma o uma tagata. I le masina na sosoo ai, na o mai ai tagata I le fonotaga o le Agaga Paia ma na toe fai mai foi le Atua. Ua ou faapea atu, ‘e le mafai e lou faatuatua ona tauave’. Ona faapea mai lea, ‘atalii, ua lata atu lava ina e le mauaina le vavega lea’. Na vave ona ou faia le faasilasilaga I le Ekalesia aoao, ‘Le au uso e, I le Tausaga fou, aua nei toe aumaia se tupe mo meaai, o le a fafagaina outou’. Ua sili atu nei ma le 20 tausaga talu ai na tupu lea tulaga peitai e lei iai se taimi e tasi na le mafai ai e le Atua ona faia. 

E te ono manatu o a’u o se tagata e maualuga le faatuatua, ae o le mea moni, o lo’u tama, o ia lea e fesoasoani mai I si ou tamai faatuatua ma o lea ou te faalagolago ma le atoatoa ia te ia, ma na ia faia mea uma e pei ona folafolaina. 

Tatalo, 

Tama, faamolemole fesoasoani mai I lou lē faatuatua I le suafa o Iesu, Amene. 

OPEN HEAVENS

MATALA LE LAGI MO LE ASO LUA 26 SETEMA 2023

Manatu Autu: Faamuamua le Atua I taimi uma (Put God First Always)

Tauloto – Faataoto 3:9 “‘ia e āva i le ALI‘I i lou ‘oa ma le fa‘apolopolo o au mea uma e tutupu.”

Faitauga - Tusi Paia: 1 Tupu 17:7-16

Upu Folafola

Ua ou iloa I la’u tama’i savaliga ma le Atua, e finagalo e avatu le fa’amuamua ia te ia i taimi uma. I le Mataio 6:33 na ia faapea mai: ‘Ia e sa’ili muamua lona Malo ma lana amiotonu’. I le Salamo 10:4 o loo fa’amatala ai tagata e lē sa’ili i le Atua, ma lē manatu I le Atua o ni tagata fa’amaualuluga. I le Teuterenome 26:2 ua fetalai le Atua o lau seleselega muamua e tatau ona avatu i ate ia. E finagalo le Atua ia avea o ia ma lau numera muamua, a leai o lona uiga o ia o le mea noa ia te oe. O le mea moni o se tasi o ona suafa o le Atua Fuā  (Esoto 34:14).

O lenei, a silasila mai le Atua e te avea le faamuamua ia te ia ma e te faaeaea ia te ia, ona ia fuafuaina lea o se taui talafeagai mo oe. I le Faataoto 3:9-10 fai mai le Tusi Pa’ia: “Ia e ava I le Alii i lou ‘oa, ma le faapolopolo o au mea uma e tutupu; ona tutumu ai lea o ou fale saito I le mau; e feosofi foi au tu’ugāuiana i le uaina fou”. 

I le tatou faitauga o le Tusi Paia o le asō, sa faapea atu Elia i le fafine Sarefata ua oti lana tane, ia tapena muamua mai sana meaai ae le’i faia sa la mea’ai ma lana tama. Ana o nisi fafine ua faapea atu: ‘Perofeta , pe te lei faalogo mai ‘ea e toe tasi lava le luutaga? Afai o le a ou tapenaina se mea ‘ai mo oe o le a leai lea o se mea ‘ai mo a’u ma la’u tama?’ Peitai, na te lei faia se tala faapea ia Elia, ae sa ia fa’aeaea i le Atua o lo o iai i le perofeta e ui i le tulaga faigata sa iai, ma ua tauia o ia i le lē toe motusia o le mea’ai.  E ui ina oge le atunuu atoa, ae sa le toe uma le falaoa i le kate, sa le fa’aitiitia le suau’u I le fagu. Ma o le mea lena e tupu pe a e avea le fa’amuamua I le Atua.

Sa ou iai i se tasi nuu o Ilesha I Nigeria I ni tausaga ua levaleva atu, I le faia o se polokalame fa’aevagelia, a’o le taimi lea o loo ave e la’u faiaoga polofesa  la’u pepa mo lo’u faailoga PhD i se tagata tuto’atasi e na te iloiloina ma togia le pepa. O le masani lava, e lafo le pepa I le togia, ae peita’i sa totogi e la’u faiaoga, le polofesa lona pasese e malaga e tuulima aloa’ia la’u pepa i le tagata e iloiloina. A e fesili i tagata na sa’ilia a latou PhD i lena vaitaimi, e molimau atu e faitau masina e faagasolo ai e aofia ai ma talatalanoaga e suesue ai le pepa na tusia. I le taimi lea, a’o ou pisi i Ilesha I le faia o le finagalo o le Atua, sa malaga ai la’u polofesa i le tagata Iloilo lea ma ia faapea atu iai: “Ou te lē fo’i se’i vagana ua e faitauina le pepa lenei.” Ina ua uma ona faitauina e le tagata sa iloiloina ma togia la’u pepa, sa ia faapea mai i la’u polofesa, “Ina alu ia, ma ave i le tama lana faailoga PhD.”

Afai e te fa’amuamua le finagalo o le Atua, o le a ia tali mai i ou mana’oga uma. Afai e te fa’aeaea ia te ia ma ave iai le fa’amuamua i so’o se mea, o le a e maua le taui e fa’ateleina o mea uma na e faitaulaga ai ia te ia.  Ia faamuamua le Atua i taimi uma, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 25 SETEMA 2023

Manatu Autu: Ave lona manuia o le filemu (Claim his peace)

Tauloto – Tusi Paia: Ioane 14:27 “Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u..”

Faitauga - Tusi Paia: Isaia 66:12-14

Upu Folafola

Ona o lou Tama ua ta’ua o le Perenise o le filemu (Isaia 9:6), e tatau ona amata ona e amio e pei o le Perenise o le filemu. I le tatou faitauga o le Tusi Paia o le aso, ua ia folafola, ia e maua le manuia o le filemu e pei o se vaitafe. Afai o lo’o faigata ona maua sau moe, ia e manatua le Salamo 127:2 o loo ia faapea mai e na te avatu le manuia e maua ai le moe I lana pele. 

Ina ua avea a’u ma taitai aoao o le Ekalesia, e 39 aulotu na iai ae e tele na’ua faafitauli. Sa tele ina ou popole I le faatinoina o le galuega a le Atua ma e ui e na o le 40 o’u Tausaga I lea taimi, ae ua amata ona sinā lo’u ulu. Na ou fesili I le Atua, ‘aisea le Alii e’ ona faapea mai lea o ia ‘o lo’o e tauaveina se amoga e le o sau amo. E le mafai ona ou faasoa I seisi lo’u viiga. Afai e te maua lo’u viiga, e te le tauaveina foi la la’u amoga, tuu mai la’u amoga ou te tauaveina’. Na taofia ai loa I le taimi lava lena ona ou toe popole, ma ua vave ona toe lanuuliuli laulu o lo’u ulu. 

Afai ua faoa e le tiapolo lou filemu, e tatau ona e tago e toe aumai. Fai mai le Iakopo 4:7 e te tetee atu I le tiapolo ona sola ese ai lea. E iai taimi e tatau ona e tau ma finau ia e toe maua lea filemu. A amata ona e tetee I le tiapolo, e ono faafoliga mai o lo’o fia tau mai ia te oe, ae e iloa loa e le tiapolo e te lē solomuli, o le a sola ese. 

Ao ou laitiiti ou te tino laitiiti lava ma sa iai se tamaitiiti na te fasia ma faafefe tamaiti I le aoga. Ua ia iloa e le mafai ona ‘ou malo ia te ia pe a ma fusu ma sa tele ina faifai mai ma faafefe ia te a’u I le tele o taimi. Sa ia faapologa ia te a’u I soo se avanoa e na te maua. E iai se aso ua tupu ai se manatu ia te a’u, ‘o le a ou alu ou te fusu ma lenei tamaitiiti. Ou te iloa ou te faiaina aua e tino tele, ae o le a ou alu ou te fusu seia ona fasioti ia te a’u, ona fasioti lea o ia e le malo, o lona uiga e ma te tutusa ai loa’. O le isi taimi na sau ai ma lui a’u, na ou faapea atu, ‘aua nei e pa’I mai ia te au’. Ua tei si alii ma faapea mai, ‘na fai ma sau tala?’ ona ia tu’i lea o au. Ua ou tu’I atu ae toe tu’i a’u e le tama ma ua ou pau I lalo. Na ou tu I luga ma faaauau le fusuaga. Na faafia ona ou pau I lalo I tu’I a lenei tamaitiiti peitai na ou tu I luga ma faaauau ona ou fusu atu iai. E lei leva ae manatu lenei tamaitiiti ou te le faatafa ma ua ou sauni tusa pe ou te oti ai, ma o lea na tamoe ese ai ma na ou tuliloa atu. O le tamaitiiti sa fasia ma faafefe tamaiti ua alu ma le atoa aua ua ia iloa, ou te le toe solomuli. Na amata mai I le aso lea ona ou maua le filemu. 

O lou faaola, o le Perenise o le filemu ma ua saunia le filemu mo oe (Ioane 14:27). Tago e ave ma oe I le asō ma e te maua lava I le suafa o Iesu. E iai taimi e tatau ona e finau mo lou filemu. Tetee I le tiapolo e ala I tatalo ona ia sola ese lea, I le suafa o Iesu, Amene. 

OPEN HEAVENS

MATALA LE LAGI MO LE ASO SA 24 SETEMA 2023

Manatu Autu: E tāua au upu e fai (What you say matters)

Tauloto – Tusi Paia: Mareko 11:23 ‘auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.

Faitauga - Tusi Paia: Mareko 11:20-24

Upu Folafola

Afai e te lē fa’alotolotolua ma le le masalosalo, so’o se mea e te filifili e fai o oe o le afafine/atali’i o le Atua, e fa’ataunuuina lea mo oe. I le Iopu 22:21-28, o loo tusia ai, afai e te usita’i i le Atua ma fai lona finagalo, e te talotalo iā te ia, na te faafofoga mai fo’i ia te oe; e te fa’ataunu’uina fo’i mea na e tautō ai.

E te iloa e mafai ona e faatonu lou tino ona usitai lea? O le taimi muamua na o’u malaga ai i Zambia e amata se aulotu fou a le Ekalesia RCCG, sa fa’aletonu lo’u manava i meaai sa o’u ai. Ou te manatu pe fa’a luasefulutolu ona o’u alu I le falelētā’ua (tulou) fa’atoā o’u manatua le Upu I le Afioga Paia a le Atua, “ E fa’ae’e fo’i ou lima i luga o e mama’i ona malolō lea o i latou.” O a’u le ma’i ae sa leai se isi e fa’ae’e mai ona lima ia te a’u, o lea na fa’ae’e ai o’u lima i luga o lo’u ulu ma ou tautala i lo’u manava ma uma ai le faafitauli. O le Atua lava lea e tasi o loo e auauna i ai, o le Tusi Paia o loo o’u faitau ai lenā fo’i e te silasila i ai ma le Agaga Paia e tasi o loo ia te a’u ma oe. O lona uiga e mafai fo’i ona e faia faapea.

Fai mai Roma 8:17 o suli i tatou o le Atua, o suli faatasi ma Keriso; o lona uiga o lo tatou tofi le tamāoaiga o le Atua. E tele nauā le tamaoaiga o le Atua aua o auro uma ma ario o i le lalolagi o ana ia (Hakai 2:8). E faafefea ona e agava’a i lenei tamaoaiga tele ae ola pea i le mativa? Ia e filifili e te maua le tamāoaiga. O le upu e te ta’utino i lou gutu e faia lava e le Atua iā te oe (Numera 14:28).

Ina ua o’u galue tumau i le galuega a le Atua, na manatu le toatele o a’u uō ua leaga lo’u mafaufau. Na ofo pe faafefea e se fa’auluuluga o se vaega a le Matematika ona fa’amavae ma lana galuega e avea ma ta’ita’i o se ekalesia matitiva. So’o se taimi e lē lava ai le fa’asoa, e tumau pea la’u tala, “O loo galue pea lava le Atua i le tausiga o a’u”. Na taumafai nisi tagata na matou galulue e fautua mai iā te a’u e leai se isi e fia fesoasoani ma foai ni tupe mo a’u pe a tumau pea lo’u faia o ia faamatalaga, peita’i e le’i suia la’u upu, na tumau pea la’u ta’utinoga. Ou te le’i popole I ai auā ou te le’o faamoemoe I le tagata mo se fesoasoani, ma e masani ona o’u faamanino i so’o se tasi e mafai ona fa’alogo mai. Silasila I le mamao ua aumai i ai a’u e le Atua. E tu’u atoa lo’u fa’atuatua I le Atua, ma o’u ta’utino e i ai lo’u avanoa ma lo’u tofi i le tamāoaiga ua mae’a tapena e le Atua mo a’u. E mafai fo’i ona e maua lea tamāoaiga. Soia e te fai mai e te mativa. Taofi lou faapea mai e faigatā. Manatua o loo faapea mai le Numera 14:28, “O lo’o fai mai le Alii, o lo’o ola a’u, ou te faia lava iā te outou e pei o a outou upu ua o’o mai i o’u taliga.” fa’aaogā nei loa lou fofoga e faataunuu ai ma tufi uma ai so’o semea e te manaomia, i lou olaga.

Amata nei loa ona faalau mea e te mana’o e te vaai o tutupu i lou olaga. Ia avea o lau masani e amata i le asō I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 23 SETEMA 2023

Manatu Autu: Tuli le tiapolo  (Rebuke the devil) 

Tauloto – Tusi Paia: Iopu 22:28 ‘O le mea fo‘i ‘e te filifili e fai, e fa‘atumauina lea mo oe; e pupula fo‘i le malamalama i ou ala..’

Faitauga - Tusi Paia: 2 Korinito 10:3-6

Upu Folafola

E faaauau mai le tatou talanoaga na amata ananafi, e lē na o faataulaitu, aitu vavalo ma foma’i faataulaitu e taumafai e faaleaga le taunuuga o se tagata; e fa’aleaga fo’i e ma’i.

Toatele tagata o loo mama’i pea auā ua latou taliaina le ma’i. E tatau ona tuli ese le ma’i mai lou tino. Fai mai Hosea 4:6 “Ua fa’aumatia lo’u nu’u ina ua leai se poto;” O lea ua e iloa le Upu a le Atua e mafai ona e fai i le ma’i, “E faafefea ona e osofa’i a’u o le afafine o le Foma’i sili? Fai mai lo’u tamā i le Esoto 15:26 O ia o le Alii, o lē na te faamalolōina a’u. O lona uiga ua o’u malolō I le suafa o Iesu.”

A e iloa lou tulaga iā Keriso, e faailoa i au amio e fai. Afai o oe o se atali’i o se ave fe’au, e lē tutusa lau tautala ma le tautala a le atali’i o le Peresetene. O lou tamā e lē gata o le Peresetene - a o le Peresetene o Peresetene I le lalolagi atoa (Salamo 24:7-10). O ia lea fai mai Filipi 2:9-11 o lona suafa e tootuli uma i ai tulivae. O le tulaga faanoanoa o le toatele o Kerisiano e lē fa’aaogaina le suafa o Iesu e tuli ai temoni. E tatau ona e fai i temoni, “E lē mafai ona e latalata mai iā te a’u, o a’u o le atali’i / afafine o le Alii o ‘au.” A ē faia faapea o le a e sosola uma temoni mai lou aiga i le asō. O loo manino mai i le Tusi Paia afai e moni o oe o se atali’i / afafine o le Atua Soifua, e lē tatau ona i ai se mea e te lē mafaia. Fai mai Filipi 4:13 e te mafaia mea uma ona o Keriso o loo faamalosi iā te oe.

E o’o iā Satani e mafai ona e tulia. Fai mai Iakopo 4:7 a e gaua’i I le Atua, e te tete’e atu i le tiapolo ona sola ese ai lea o ia iā te outou. A e iloa lou fa’asinomaga moni iā Keriso, e fa’aalia lou mautinoa i lau tatalo. Fa’ata’ita’iga afai e fa’aaogā e se isi le faletaele (tulou) ae e alu atu tu’itu’i le faitotoa, o le tali mai, e ta’u mai ai iā te oe o le ave feau o le fale po’o lē e ona le fale o loo i totonu. Tusa lava pe tutusa lā tali, e eseese lava mautinoa o la leo.

E tatau ona e tuli le tiapolo ma le mautinoa e sili atu le malosi o lē o iā te oe (1 Ioane 4:4) ona sola ai lea o ia iā te oe.

Ou te faatonu I le asō le agaga o le ma’i, temoni ma ‘au uma a le tiapolo, ave ese ou lima toilalo ma le palapalā mai lo’u olaga i le suafa o Iesu. Amene.

OPEN HEAVENS

MATALA LE LAGI MO LE ASO FARAILE 22 SETEMA 2023

Manatu Autu: Tetee atu I le tiapolo  (Resist the devil) 

Tauloto – Tusi Paia: Iakopo 4:7 ‘O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.’

Faitauga - Tusi Paia: Galuega 13:6-12

Upu Folafola

I le Ioane 14:12 na fetalai Iesu Keriso, ‘E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā’.

I le Mareko 4:35-41, ina ua agi mai se matagi a’o tofā Iesu I le va’a, o le mea muamua na ia faia o le faatonu o le matagi ia taofia loa. O le fuaitau o loo taua I luga e faaalia mai ai iai tatou, e mafai ona e faia mea e sili atu I lo le taofia o se matagi. 

O lo tatou Alii o Iesu Keriso o le mamoe a le Atua ae o ia foi o le leona a le ituaiga o Iuta. E moni e tatau ona e filemu e pei o le lupe ae e le tatau ona e faapena pe afai e te feagai ma se gata. Sa filemu le Alii, ae ina ua oo atu I le malumalu ma ua vaaia mea e le tatau ona faia I le malumalu, na ia fulia laulau ma tutuli I fafo le au faatau oloa. E le o se filemu lea faiga. O oe foi o le malumalu o le Atua Silisili ese. Afai e te vaai atu I se tagata o taumafai e taofia le taunuu o faamoemoega o lou olaga, e le tatau ona e faia ma le filemu, e tatau ona e tutuli ese ma taofia malosi.

Fai mai le Isaia 54:17 o lou tofi o le fa‘asalaina o so’o se laulaufaiva uma e finau atu ‘iā te oe i le fa‘amasinoga. I nisi faaupuga, o lou tofi lou faasalaina o so’o se mea e taofia le taunuu o le faamoemoega o lou olaga. E te lē filemu pe a e feagai ma I latou, e tatau ona e tutuli ese ma taofia malosi ina ia aua nei o latou faaumatia ia te oe. 

I le tele o tausaga talu ai, sa  nofo lou atalii I se fale mautotogi o loo nofo ai foi se taulasea e fai vai faataulaitu. E masani ona faasea lenei taulasea e ese ma le faalavelave tatalo a lou atalii ia te ia. Na ou fai I lou atalii e tago e tuli I fafo ae fai mai: ‘leai tama, e ma te nonofo mautotogi uma I le fale lea. E mafai lava ona ma nonofo I le fale I le va fealoai lelei’. Ua ou fai atu ua lelei. O leisi taimi na ou vaai ai I lou atalii, ua tino vale. Fai mai ua alu le taulaitu lea I nisi o ana tagata fofo o ni leoleo ma ua fai lana tagi e faalavelave tatalo a lou atalii I le nofoaga o loo nonofo uma ai. Ua lokaina e leoleo lou atalii mo ni aso ma ua ai uma e namu I le sela. Ona ou fai atu lea iai, ua e sauni ea e tuli I fafo lena tagata amioleaga? Ua ma ‘au faatasi I le tatalo ma ua alu ese lenei tamaloa ma le fale. 

E te faataga ea le tiapolo e taofia le taunuuga o le faamoemoega o lou olaga?

Tatalo 

Tama, Ia taofia so’o se autau a le tiapolo o lo’o taumafai e taofia au mai le taunuuga o le faamoemoega o lou olaga, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 21 SETEMA 2023

Manatu Autu: Faamumū le mea alofa mai le Atua  (Stir up God’s gift) 

Tauloto – Tusi Paia: 2 Timoteo 1:6 ‘O le mea lea ‘ou te fa‘amanatu atu ai ‘iā te oe ‘ia toe fa‘amumū le mea alofa mai le Atua, o lo‘o ‘iā te oe lea i le fa‘ae‘e atu o o‘u lima...’

Faitauga - Tusi Paia: Mareko 4:35-41

Upu Folafola

I la tatou faitauga o le Tusi Paia, sa iai Iesu i le vaa ma ona soo, peitai na agi lava le afā. O lona uiga, e mafai ona iai Iesu i le olaga o so’o se tagata, ae e agi malosi pea le afa. E manatu le toʻatele, o le taimi lava e toe fanaufouina ai, e lē toe agi se afā I o latou olaga. E lē moni lena tala; e taumafai malosi le tiapolo e tofotofoina lea le malosi o lou kerisiano e pei ona taua I le tusi a Ioane 15:19, Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ‘ino‘ino ai le lalolagi ia te outou.

O le avea o oe ma atalii poo se afafine o le Atua, ua lava lena e tosina mai ai afā, ae ‘aua e te popole, pau lava lenei, ia iai Iesu i lou olaga, pau lava le mea e faia, o le faamumu o ana meaalofa ia te oe, ona taofia lea o afa. Afai o oe o se afafine po’o se atalii o le Atua, ua iai Iesu ia te oe, ma e fai mai le Tusi Paia I le 1 Ioane 4: 4 e sili o ia ua ia te outou, i le ua i le lalolagi. E mafai ona i ai se malosi e pei o se sauai I totonu ia te oe, ae o lo’o moe seia e fafagu ia te ia. Fai mai le tusi a 2 Timoteo1:6 ia toe faamumū le mea alofa mai le Atua o lo’o ia te oe. Fai mai le Salamo 50:14-15 Afai e te sau I le mamalu o le Atua ma le viiga ma le faafetai, e te valaau foi ia te ia i le aso o le puapuaga, ona tali mai lea ma laveaiina oe. Ia valaau atu ia te ia seia tulai o ia mo outou, auā ua tusia i le Salamo 68:1 e faapea, pe a tulai le Atua, ona faataapeapeina lea o ona fili.

E mafai ona e aumaia le Atua Silisiliese e tulai mo oe e ala i le tatalo. I le Galuega 12:1-10 ina ua ave e Herota Iakopo, e lei tatalo le Ekalesia, ma na fasiotia Iakopo. E oo atu i le taimi na pueina faapagota ai Peteru, ua aoaoina e le ekalesia I la latou lesona ma faapea ona tatalo ai, ina ia tulai mai le Alii mo i latou e taofia le afa. Afai e te musu e tatalo, e mafai ona lofituina oe e le afa, ae afai e te tatalo, ona e manumalo lea i le afa tusa lava po o le a le malosi o lena afa.

E mafai foi ona e talosagaina o ia e tulai mo oe e ala i viiga. I le Mareko 10:46-52, a o valaau atu Patimaio ia Iesu, na faafofoga I ai le Alii, “Iesu e, le atalii o Tavita …” Ona tu lea o ia e tali atu ia te ia. A e vivii atu I le Alii, e tulai o ia mo oe. Afai e te iloa taʻuta’u ma valaau le suafa o le Atua, o le a Ia silasila mai i lou olaga, ma faatamaia soʻo se afā e osofaia oe, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 20 SETEMA 2023

Manatu Autu: Aao o le Alii e faavavau  (God’s everlasting arms) 

Tauloto – Tusi Paia: Teuteronome 33:27 ‘O i le mea ‘e te nofo ai o le Atua o le fa‘avavau lea; o i ou lalo fo‘i ‘a‘ao o le fa‘avavau; e tulia fo‘i e ia i ou luma le ‘ua ita mai; na te fetalai mai fo‘i, “‘Ia e fa‘aumatia i latou..’

Faitauga - Tusi Paia: 1 Samuelu 2:6-9

Upu Folafola

O aao o le Atua e faavavau (Teuteronome 33:27), ma a amata ona ia siitia le tagata, e le mafai e se tasi ona aumai I lalo. Afai e siitia oe e tagata, e le taitai ona mananao e tutusa lou tulaga ma I latou. I le Kenese 39:1-5 na siitia e Potifara Iosefa ma tofia e pule I mea uma I lona fale, peitai sa tumau pea lona tulaga o le pologa. 

4‘Ua tō ‘ese fo‘i Ionatana lona ‘ofu talaloa nai ‘iā te ia, ‘ua foa‘i atu ai ‘iā Tavita, ma lona ‘ofu tino, ‘atoa ma lana pelu, ma lana ‘aufana, ‘atoa ma lona fusi. 1 Samuelu 18:4

Na foai e Ionatana ia Tavita le tele o mealofa ona e alofa ia te ia ae na te lei foai atu ona seevae. I aso na, tusa po’o le a le tele o mea e te foaia I se tagata, e mafai ona ia toe aoina mai pe afai e na te lei foaia ona seevae (Ruta 4:7-8). E le gata I lea, o auauna uma e le see ini seevae. O lona uiga o lo’o faapea atu Ionatana, ‘ou te alofa tele ia te oe, peitai aua nei galo ia te oe o a’u o le perenise ao oe ose tagata lautele’. 

O leisi tulaga e aoaoina ai I tatou mai le tala o Iosefa, afai e siitia oe e tagata, e mafai foi ona latou toe toso mai oe I lalo. O Potifara lea na ia siitia Iosefa ma tofia e avea ma ulu I ana auauna uma, na ia toe lafoina o ia I le falepuipui. O I latou o loo alalaga ‘Osana’ I le aso, e ono alalaga a taeao ‘faasautauro ia te ia’. Ina ua siitia e le Atua ia Iosefa, na ia siitia o ia I se tulaga maualuga tele e o’o I lona pule na iai o Potifara, na ifo ia te ia. E siitia oe e le Atua Silisili Ese, ua lata ona ifo uma ia te oe I latou o lo’o faatiga ma faapologa ia te oe, I le suafa o Iesu. 

Na ave e le Atua matautia Tavita ao avea o ia o se leoleo mamoe, ma faaeaina o se tupu ma siitia pea o ia seia oo ina avea ma tama o le Tupu o Tupu (Faaaliga 22:16). O se faataitaiga lea o le Atua ua ia siitia se tagata ia ona aao e faavavau. 

E te silafia ea a finagalo le Atua e siitia oe, tusa pe e te maliu e faaauau pea? Peitai, e le taitai siitia e le Atua ni tagata faamaualuluga I ona aao e faavavau. E tatau ona lafoai lou ola ma le atoatoa ia Iesu ona faamaualalo lea I ona luma pe afai e te naunau e na te siitia ia te oe (1Peteru 5:6). Ia faamaualalo ina ia siitia oe e le Atua I ona aao e faavavau, I le suafa o Iesu, Amene.