Samoan Devotional

OPEN HEAVENS

MATALA LE LAGI MO LE ASO SA 20 AOKUSO 2023

Manatu Autu: Mai le pogisa I le malamalama 6 (From darkness to light 6).

Tauloto – Tusi Paia: Ioane 12:46 “46‘Ua ‘ou sau o le malamalama i le lalolagi, ‘ina ‘ia lē tumau pea i le pouliuli se tasi e fa‘atuatua mai ‘iā te a‘u....”

Faitauga - Tusi Paia: Salamo 126:1-3

Upu Folafola

Mai le Tala iā Patimaio, tatou te iloa ai o le pogisa ma le faanoanoa e o faatasi. E lē manaomia lou iloa o le poto salalau e te silafia ai so’o se tagata e tauaso ma aisi o se tagata faanoanoa. Ou te tatalo mo oe, ia aua lava ne’i puaoa lau vaai i le suafa o Iesu.

O le pogisa ma le faanoanoa e o faatasi, o lona uiga o le malamalama e aumaia le olioli. Fai mai Salamo 16:11 “E te faailoa mai iā te a’u le ala i le ola; o i o’u luma le fiafia e mālie ai; o i lo’u itu taumatau le olioli e faavavau.”

Fai mai le tatou Tusi Paia faitau o le asō, a faafoisia mai e le Alii tagata nai le tafeaga, ona tumu ai lea o latou fofoga I le ‘ata’ata. O le natura lea o le malamalama; na te aumaia le ‘ata. O le malamalama o le faailoga o le olioli. (Ioane 16:24)

Sa i ai se fafine sa mama’i tigaina lana fanau ua faitau aso, ona alu lea i se taulaitu vavalo mo se fofo. Ina ua taunuu i le fale o le taulaitu, na avane e lana ava se fatu laau (pei se pinati) e ai e le fafine lea ma faapea ane i ai o le fofō lea o lona faafitauli. Na ai e le fafine le fatu laau, ma e o’o ifo I le po, ua ia iloa, ua I ai i totonu o se fonotaga a le ‘au faataulaitu. E le’i umi ae ia ofo atu lona toalua i faataulaitu. Ina ua mavae pe a ma le 2 tausaga ae manana’o isi faataulaitu i se tasi o lana fanau - a’o si ana fanau lenei o loo naunau ia puipuia o latou ola. Sa auai mai le fafine lenei i se tasi o a matou polokalame i le aai e nofo lata ane iai, a’o fai le lauga sa o’u maitauina se vevesi i le potopotoga. Ina ua mae’a le sauniga sa ta’u mai e le au galulue sa sasao se afi I le ofu o le fafine a’o fai le lauga. Sa matou tatalo ma le fafine ma ia ofoina atu lona ola mo Iesu Keriso ma ina ua fo’i i lona aiga sa paū mai se gata ua mate mai ia te ia. (sei tulou) Ua fa’asa’olotoina ia mai lea aso e o’o mai i le asō. O le pogisa, e na te lē avatua ia te oe se olioli, ae na o le faanoanoa. Ua faapea mai le Faataoto 10:22 “O le faamanuia a le Alii, o lea e fa’atamaoaiga a’i; na te lē faaopoopo i ai se tigā.” A ofo atu e le tiapolo ia te oe se mea e foliga lelei ma manaia, e te lē tosina i ai, i le suafa o Iesu.

Afai o oe o se fanau moni o le malamalama, e faafefea ona e alu ese ma Iesu - le malamalama o le lalolagi? Ua fetalai Iesu I le Mataio 11:28 “Ia outou omai iā te a’u, o outou uma o e tigaina ma mafatia i avega, o a’u fo’i e malolō ai outou.” Afai e te tumau i le pogisa, e mafatia pea oe, peita’i a e liliu mai ia Iesu Keriso, na te faia se amataga fou mo oe, ma faamanuia ia te oe. Afai e te mana’o moni I le malamalama, amata ola fa’apaiaina nei e amata i le asō, I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 19 AOKUSO 2023

Manatu Autu: Mai le pogisa I le malamalama 5 (From darkness to light 5).

Tauloto – Tusi Paia: 1 Samuelu 2:6 “O le ALI‘I na te fasioti ma fa‘aola; na te fa‘ao‘o ifo i le tu‘ugamau, ma fa‘afo‘i a‘e...”

Faitauga - Tusi Paia: Neemia 4:1-15

Upu Folafola

Mai le tala iā Patimaio, e mafai ona tatou iloa ai o le pogisa ma le ola saisaitia e o faatasi. Atonu ua leva ona nofo Patimaio i lona nofoaga lea e tasi ma aisi talu ona tauaso o ia. Talu ai o le tumau i le mea e tasi, e lē tupu e fesootai i le pogisa, o lona uiga, o le malamalama o le faatusa o le aga’i I luma ma le faaeaina. Fai mai Salamo 75:6-7 Auā e le o sasa’e, po o sisifo, po o le vao e i ai mauga, a o le Atua na te fa’amasinoina o ia na te faamaulaloina le tasi, o ia fo’i na te fa’aeaina i luga le tasi.

I le 1 Samuelu 2:8 ua ta’u mai ai iā i tatou e mafaia e le Atua ona siitia se tagata aisi nai le eleele ma faaeaina ia seia tula’i faatasi ma alii. A e manatu ua leva tele ona e I le tulaga e tasi mo le tele o tausaga, o lona uiga e foliga mai o loo e i le pogisa. E manaomia lou pipi’i i le malamalama I le taimi nei ina ia mafai ona e faia se suiga moni.

O le ola saisaitia e mafua i le malosi o le pouliuli. E lē mana’o le tiapolo e te tupu ola ola. O le mafuaaga lenā, ina ua taumafai Neemia e toe fausia pa o le aai, na faaoso e le tiapolo le toatele o tagata e taofi le galuega. O se tasi uso sa ma talanoa i ni tausaga ua mavae; na faapea mai, “Ua o’u lē iloa po’o le a le mea ua tupu, e foliga mai ua faatupulaia o’u fili.” Sa o’u fai atu I le uso, “Se’i e faamatala mai po’o a mai lau savaliga I nai tausaga ua mavae,” fai mai le uso, o lo’o ua sologa lelei mea uma, so’ose mea na te faia e tupu ma manuia. Sa ou tali atu, “O le mafuaaga lenā.” E i ai i latou e fiafia pe a vaai i tagata o āisi ma tau saili se meaai, e lē manana’o e o ese tagata mai le ola mativa. O le pogisa e lē mana’o e la’a i luma lou soifuaga, ae faafetai i le Atua o le malamalama o le faailoga o le faaeaina.

Sa i ai se tamā sa umi se taimi o soifua i se olaga se tasi e leai se suiga. A’o faia se tasi o matou sauniga sa fetalai le Atua ia te a’u ma sa o’u faapea atu loa I le potopotoga, “O lo’o i ai se tasi iinei, e I ai se tasi e latalata atu ia te oe, o le a maliu i le vaiaso o i luma. Aua e te faanoanoa auā e uma le maliu ae siitia lou tulaga.” O le vaiaso na soso’o ai, na maliu ai lona tamā, peita’i a’o le’i maliu le toeaina na ia ta’utino i lona atali’i sa fai lana Upu faapea, “e faafefea ona sili atu lo’u atali’i ia te a’u?” O lea na ia fa’aaogaina ai le mana o le tiapolo e faaleaga ai le olaga o le atali’i. Na maliu loa le tamā amata loa ona faaeaina le olaga o le atalii. So’ose tasi o taofia lou faaeaina ma musu e te manuia o le a se’ia i luga ma fa’alēaogaina e le Atua Silisiliese i le suafa o Iesu.

Tatalo

Tamā ia faaleagaina uma so’o se mea o loo polokaina le siitia o lo’u tulaga ma lo’u faaeaina e o’o mai i le taimi nei, i le suafa o Iesu. Amene

OPEN HEAVENS

MATALA LE LAGI MO LE ASO FARAILE 18 AOKUSO 2023

Manatu Autu: Mai le pogisa I le malamalama 4 (From darkness to light 4).

Tauloto – Tusi Paia: Levitiko 26:9 “Auā ‘ou te manatu alofa ‘iā te ‘outou, ‘ou te fa‘auluolaina ‘outou, ma fa‘ato‘ateleina, ‘ou te fa‘atumauina fo‘i la‘u feagaiga ‘iā te ‘outou..”

Faitauga - Tusi Paia: Kenese 1:26-31

Upu Folafola

E feso’otai le pogisa ma le pā. O lo’o atagia ai o le malamalama e tutusa lelei ma le fanafanau. Afai e te suesueina le Tusi Paia, e te silafia ai o le finagalo o le Atua ia e fanafanau ma uluola. O le poloaiga muamua na ia avatu I le tagata o lenei: ‘Ia fanafānau ia ma ‘ia uluola’(Kenese 1:28). I le Esoto 23:26, na fetalai le Atua Silisiliese: ‘E leai sē papā sana tama, e lē pā fo‘i se tasi i lou nu‘u; ‘ou te fa‘a‘atoaina lava ou aso’. Ou te folafola atu, afai o loo e faatuatua I le Atua mo se tamaitiiti e fanau mai, e te tauaveina se masaga I le suafa o Iesu. 

E iai nisi e pā ma o lo’o fai mai le fomai e leai ma se mea o faaletonu i le ulugalii aua foi o lo’o afaina I le tiapolo. E iai se tamaitai na ulu atu le tina o lona toalua I lona fale ma faapea atu: ‘si au tama, tago e ai le falaoa lea e taofia ma poloka ai lou manava’(tulou). Na ai e lenei tamaitai, ae sa le manatu mamafa I upu a le tina lea. Na amata mai I le aso lea ona taofia lona palapala (tulou) mo le tele o Tausaga. Faafetai I le Atua na fai sa matou polokalame I lona taulaga mo ni nai aso. O se tasi o aoauli ao faagasolo le polokalame, sa moe lenei tamaitai ma fai sana miti. Fai mai na iloa atu ni tagata e ofu ini ofu fomai o lo’o latou faia sona taotoga ao taoto I luga o le fata. Na latou tosoina mai se maea umi lava mai ia te ia a’o le faaiuga o lenei maea, o loo faapona ai se fasi falaoa uliuli. Na tei atu I luga ma iloa ua malolo. O le taimi mulimuli na fesootai ai ma lea tamaitai, ua toalima lana fanau. Po’o le a lava galuega a le pogina ua taofia ai ona e fanafanau, e suia e le Malamalama, I le suafa o Iesu. 

E iai ni tagata na fesili mai ia te au po’o le a lava le tulaga ou te tetee ai I faaipoipoga a le itupa tutusa. Ou te toe fesili atu iai, ‘e faapefea ona maua ni fanau a ni tamaloloa se toalua poo ni fafine se toalua?’. Ua fai mai e mafai ona o e vaetama mai tamaiti, a’o le fesili, e faapefea ona maua mai tamaiti e ono ō e vaetama mai? Afai e ola uma faapea tagata, e vave ona le toe iai ni tagata ma e mafai ona tupu I totonu o le 100 tausaga pe a faaauau pea lea ituaiga olaga. Ou te fai iai, ‘e pepelo le tiapolo’. Ou te le popole I upu e faia e tagata po’o faalapotopotoga, ou te tumau pea I le upu moni. O lo’o manino le Upu a le Atua, ‘Ia fanafanau ma uluola’ 

 O so’o se tagata o lo’o taumafai e le usitai ma tete’e I lea poloaiga, o lo’o tetee I le Atua. 

Tatalo

Tama, e pei ona poloaina a’u ia ou fanafanau ma uluola, e usitaia uma e lo’u tino ma tulaga uma ia te a’u lea poloaiga, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 17 AOKUSO 2023

Manatu Autu: Mai le pogisa I le malamalama 3 (From darkness to light 3).

Tauloto – Tusi Paia: Salamo 68:6 “O le Atua na te fa‘atagatāina ē ‘ua ausage; na te ‘aumaia ē ‘ua noanoatia i le mea e manuia ai; a o ē fouvale, latou te nonofo i le nu‘u naumati...”

Faitauga - Tusi Paia: Salamo 23:1-6

Upu Folafola

I le tusi a Mareko 10:46-52 o lo’o i ai le tala ia Patimaio, e faapea, na ia valaau ia Iesu mo se fesoasoani, o nisi o tagata na fai atu ia te ia, e filemu. E lei faalavelave, pe faatigā iā i latou, ae na latou ʻinoʻino lava iā te ia. E le ofo le loto I lea tulaga, ona o le pogisa, o le ita lea, o le malamalama, o le alofa lea. Ua faapea mai le Faataoto 14:20, o le tagata mativa, e oo I ona tuaoi e ʻinoʻino i ai. O le pogisa e o faatasi ma le mativa, ae o le mativa e oo atu ai I le inosia. E mafai ona inoino tagata ia te oe ona o lou mativa. Faafetai i le Atua, o ia o le malamalama, o le alofa. Ua faapea mai le Roma 8:37 e tatou te manumalo a’ia’i ona o Lē na alofa mai iā te I tatou. Afai e te feso'ota'i ma le malamalama, e mautinoa lou manumalo. E le afaina pe toafia tagata e inoino ia te oe; afai e afio Iesu ia te oe, e te manumalo.

Ina ua tagi atu Patimaio mo se fesoasoani, e leai ma se tasi na fesoasoani ia te ia, seʻia o’o ina valaau mai le malamalama o le lalolagi iā te ia. O Patimaio o se tagata na lagonaina le nofo toatasi (loneliness). E matua fesootai lelei le pogisa ma le lagona nofo toatasi. I le Salamo 121:5, fai mai o Ieova o lou paolo lea i lou itu taumatau. O lona uiga e faatasi pea le Atua ma oe. Afai e te fesootai atu i le malamalama o le lalolagi, e le mafai lava ona toe lagonaina le nofo toatasi. E toatele tagata e mauoa ma faamanuiaina o latou olaga, ae e I ai pea lagona o le nofo toatasi. E mafua ona latou te leʻi fesootai ma le malamalama o le lalolagi. O lagona nofo toʻatasi o Patimaio, na muta ina ua feiloaʻi ma Iesu, o le taimi foi lea na avea ai o ia ma tagata taʻutaʻua ma o loʻo tatou talanoa pea e faatatau ia te ia e o’o mai i le aso.

E mafai e le malamalama ona tafiesea le lagona nofo toatasi a o le pogisa e na te fusia. O le tele o taimi, o le lagona nofo toatasi ‘o se taunuuga o galuega a le pogisa. O le malamalama na faia le upu i le Kenese 2:18 e le lelei ona nofo toatasi le tagata. I tausaga ua mavae, na sau ai se tina ia te a’u ma fai mai, na te manaomia lava se fesoasoani. E toafa lana fanau teine - o le uii e 28 tausaga le matua ae leai ma seisi ua fai toalua. A o ou sauni e tatalo, na faailoa mai le Alii ia te au, ou te fesili iai ni fesili, ma na ou iloa ai, e i ai se temoni i totonu o lenei aiga, ua ia ia faia se feagaiga I tamaitai nei. O le temoni lea na taofiaina i latou mai le faaipoipo atu. Sa matou tatalo ma tuuina mai e le Atua ia i matou le manumalo i lenei feagaiga leaga. I totonu o le tausaga, na faaipoipo uma tamaitai nei e to’afa. Soʻo se feagaiga leaga lava, na e osia e ono taofia ai oe mai le siitia atu i le isi tulaga, o le a faʻaumatia e le malamalama I le aso, i le suafa o Iesu, Amene.

OPEN HEAVENS

MATALA LE LAGI MO LE ASO LULU 16 AOKUSO 2023

Manatu Autu: Mai le pogisa I le malamalama 2 (From darkness to light 2).

Tauloto – Tusi Paia: Faataoto 4:18 “A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la..”

Faitauga - Tusi Paia: Isaia 58:8-14

Upu Folafola

O le isi faailoga vaaia o le pogisa o le mativa. O Patimaio e le gata I le tauaso, e mativa foi. O loo faamauina e le Tusi Paia o ia o se tagata tauaso e mativa. O soo se tulaga e aisi ai se tagata mo se meaai e tau o le mativa. O le fuafuaga a le Atua Silisili ese mo oe e le o le aisi, ae ia e faatamaoaigaina. Mo le tele o Tausaga, na taofia pea e le tiapolo le Ekalesia I le pogisa ma e tele faifeau na laugaina e tutusa le ola faapaiaina ma le mativa. O loo silafia lelei e le tiapolo e faigofie ona talai le talalelei pe a iai le tupe. Ou te le leiloa ia te oe, peitai I le suafa o Iesu Keriso, a’o a’u, ou te agai atu I le manuia faulai, aua o le malamalama e tu mo le manuia faatamaoaigaina. 

O le pogisa e galue ia e o’o I le mativa, ae o le matafaioi a le malamalama, ia faatamaoaigaina oe. O lo’o faamanino mai e le 2 Korinito 8:9 

9Auā ‘ua ‘outou iloa le alofa tunoa o lo tatou Ali‘i o Iesu Keriso, sa tamao‘āiga ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ‘outou i lona mativa.

Na faamativaina o ia ina ia e maua e ala I lona mativa le tamaoaiga. Afai o oe moni o se atalii po’o se afafine o le Atua, ia e tauaveina le malamalama o le Atua Silisili ese I totonu ia te oe, o le talalelei lenei mo ‘oe, o I latou uma e fai mai e te oti mativa, o le a lē fiafia I latou. Fai mai le 3 Ioane 2, Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga. Afai e finagalo le Atua ia e manuia e pei ona manuia o lou agaga, e le afaina po’o a mailei a le fili o loo fuafuaina, e te manuia. 

E iai se tamaloa mauoa na misa ma lana ava. Na fai atu lana ava ia te ia, ‘e te savali I se aso I le auala o Lagos’. E matua mauoa lenei tamaloa e sili atu ma le 14 ana taavale, ma na ata aamu I lenei faamatalaga. Ae iai le aso na sau ai I le lotu toe tasi lana taavale ma le 50 I lana taga. Ua fia ai ae ua manatu, a faaaoga le tupe e ai ai, e I’u ina savali ma o’o ai le fetuu a lana ava. O lea na alu faaaoga e utu ai le penisini o le taavale. Peitai ina ua oo mai o ia I le malamalama, na suia mea uma I le lelei mo ia. O le aso na ia faia ai se tautinoga, e lua ona fale faatoa uma ona fau. E mafai e le Atua ona aumai oe mai le tulaga mativa I le tulaga e manuia faulai pe afai e te tuuina atu lou ola ia te ia ma e ola faapaiaina. 

Tatalo

Tama, faamolemole, ia pupula mai lou malamala I lo’u olaga ma tafiesea le pogisa o le mativa, ia matua mamao ese ma a’u I le suafa o Iesu, Amene. 

OPEN HEAVENS

MATALA LE LAGI MO LE ASO LUA 15 AOKUSO 2023

Manatu Autu: Mai le pogisa I le malamalama 1 (From darkness to light 1).

Tauloto – Tusi Paia: Ioane 9:5 “Manū ‘ou i ai i le lalolagi, o a‘u o le malamalama o le lalolagi.”

Faitauga - Tusi Paia: 1 Ioane 1:5-10

Upu Folafola

E iai nisi vaega o le olaga nei e faigata ona faamatalaina. O se tasi o na vaega, o le malamalama. A fesili atu se isi ia te oe: “O lea le malamalama?” e te ono faapea mai: “O le tuufaafeagai o le pogisa.” Peita’i a fai e te fia manino i le malamalama, e tatau ona e manino I le pogisa. O le tala o le a tatou suesue iai o Patimaio, o le tauaso sa feiloa’i ma Iesu, ona faaumatia ai lea o le pogisa i lona olaga. A tatou va’ai i le tusia o Mareko 10:46-52, tatou te iloa ai nisi o vaega o loo faaalia e le pogisa e faailoa ai mea o lo’o lilofia i le malamalama. O se fa’ataitaiga, o le pogisa e tutusa lelei ma le ma’i o le tino. Afai o le pogisa e atagia I le ma’i, o lona uiga o le malamalama e atagia ai le faamalologa o le ma’i, o lo’o maua ma faamausili ia Iesu Keriso le malamalama o le lalolagi. (Esoto 15: 26). Afai e iai se lua mafutaga vavalalata  ma Iesu, e le mafai ona tumau se ma’i I lou olaga. 

E le o se tala fou le tulaga o le pogisa ma le ti’apolo e o faatasi ma fealofani lelei. Afai  e te silasila i le tusi o Luka 13:11-17, e te silafia manino ai o Iesu Keriso na ia ta’ua ai o le agaga o le ma’i, o se sui a Satani. O ma’i ma gasegase tugā e ulufatu mai i le pogisa. Peitai o le malamalama o le Atua e iloa ai malosiaga o le pogisa ma fa’aumatia uma ai. 

E iai se uso na sauni e malaga i Amerika e faaauau ai a’oa’oga maualuluga, ona ia faia lea o se fiafia ae lei malaga ‘ese. A’o faagasolo lea fiafia sa o’o mai le fili ma totō se agaga leaga i lenei alii. O le taimi na tu eleele ai i Amerika, sa ia lagona le tiga o lona manava. Sa faia ituaiga su’esu’ega eseese a ua siliga se togafitiga, a ua na o le fa’ateteleina o le tiga. E 6 tausaga o tauivi  ma le gasegase, tele ni vai na ia inumia, seia o’o ina ma’ea lana a’oga. Ina ua ia fo’i mai I Nigeria, sa ia maua le tala ile matou polokalame sa fa’asolo i le nu’u o Ibadan ma sa ia malaga mamao mai le taulaga o Zaria i lona fia auai. Sa taumafai le ti’apolo i auala eseese e taofia lona malaga mai, ae sa mafai ona taunu’u mai i le toe aso o le polokalame. A o fa’asolo le lauga mulimuli, sa nofo i lalo lenei alii, ma ina ua pa’i le upu o le Atua ia te ia, ua faate’ia tagata i lona tauvala’au leo tele, “Ua ou sa’oloto!” aua o le tiga ua silia ma le 6 tausaga sa ia tau’aveina, ua tafiesea. Ou te faia se perofetaga atu ia te oe: e le afaina po’o lea le umi o e tau’aveina le gasegase po o le ma’I, e tafiesea e lo’u Tama mai le lagi mai ia te oe I le asō, I le suafa mata’utia o Iesu.

Tatalo

 Tama, faamolemole ia e tafiesea so’o se ituaiga pogisa mai lo’u olaga, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 14 AOKUSO 2023

Manatu Autu: Iesu o lo tatou faiaoga (Jesus our teacher).

Tauloto – Tusi Paia: 2 Ioane 1:9 “O i latou uma lava o ē tu‘umavaega, ‘ae lē tumau i le a‘oa‘oga ia Keriso, e lē o ‘iā te i latou le Atua; o lē tumau i le a‘oa‘oga ia Keriso, o ‘iā te ia lava le Tamā ‘atoa ma le Alo.”

Faitauga - Tusi Paia: Mataio 7:24-28

Upu Folafola

O lo’o faamanino mai i le Ioane 3:1-2, o Iesu o le faiaoga. E ono faateia oe I le tulaga lenei, o Iesu I le taimi o lana galuega I le lalolagi, e lei valaauina e tagata o se fai Evagalia, po’o se perofeta po’o se faifeau, na latou taua o ia o le faiaoga. O so’o se mea na oo iai Iesu, na ia a’oa’o e o’o I le matafaga (Mareko 2:13).

O Iesu o le faiaoga ma e fiafia e fai ma o tatou faiaoga. O se talalelei tele lenei mo I tatou aua o le faiaoga e fua iai le pasi po’o le lē pasi foi o le tamaitiiti aoga. Afai e mafai e le faiaoga ona faamaonia ua ala ona lē pasi le tamaitiiti a’oga ona o le lē usitai I faatonuga uma, e mafai ona lē tuuaia o ia I le tulaga e o’o iai lea tamaitiiti. E te iloa manino lelei lea tulaga ina ua tuuina mai le ripoti a Iesu I le faaiuga o lana galuega I le lalolagi e pei ona fetalai Iesu I le Ioane 17:12  

12‘Ua ‘ou tausia i latou i lou suafa, ‘ina ‘ua ‘ou ‘iā te i latou i le lalolagi; ‘ua ‘ou leoleo i ē na e foa‘i mai ‘iā te a‘u, e leai fo‘i se isi o latou ‘ua fano, na o le tagata o le malaia, ‘ia taunu‘u ai le Tusi.

O lona uiga afai e te faalogo I faatonuga uma a Iesu ma usitai ia te ia, e mautinoa e fesoasoani o ia ia te o’e ina ia e maua le lagi I le maea ai o lenei lalolagi. 

Ina ua toetu mai Iesu mai le oti, na siitia lona tulaga mai le faiaoga I le Faiaoga o faiaoga uma. O le mafuaaga lea I le Ioane 20:16, na faaigoaina o ia e Maria le Makatala ia ‘Raponi’, o se igoa faapitoa e ave iai latou o ni faiaoga sili ona tauoloa. Mo nisi o I tatou o faiaoga o le talalelei, fai mai le Iakopo 3:1 e sili atu ona faasalaina I tatou I aso mulimuli pe afai e le sa’o ma lē lelei le faia o le latou galuega. Auā foi o le matafaioi a le faiaoga o le talalelei o le aoao lelei o agaga ua tuuina atu iai latou e le Atua Silisili ese. O le talalelei lenei, o lo’o iai lo tatou faiaoga e a’oa’oina I tatou ina ia tatou pasi uma I le suega o le aso mulimuli. E e aoao pea o ia iai tatou ina ia tatou manumalo I so’o se galuega e na te tuuina mai I o tatou lima. O le mafuaaga lea ou te fai ai lava I la’u fanau ia aua nei ova tele le pisi I galuega a le Ekalesia e ono momotu ai le fesootaiga ma le Faiaoga o faiaoga. Talitonu mai ma le faamaoni, e le mafai ona manumalo le galuega a le Atua o loo e faatinoina  e aunoa ma ia. E le mafai ona e laveai mai agaga mai seoli ma le malo o Satani ma e manatu e le soona faia oe e le tiapolo. O le a ia faia galuega ma mailei uma ina ia e paū, ae peitai, a faapea o lo’o e fesootai vavalalata ma le Faiaoga o faiaoga, e te manumalo I le i’uga. Ia e fesootai pea I le Faiaoga o faiaoga. 

Tatalo 

Le Atua e, Iesu lo matou Alii Faaola, le Faiaoga o faiaoga uma, faamolemole a’oa’o ia te a’u I mea uma e tatau ona ou faia ina ia ou maua le lagi I le iuga, I le suafa o Iesu, Amene.   

OPEN HEAVENS

MATALA LE LAGI MO LE ASO SA 13 AOKUSO 2023

Manatu Autu: Pe a fesili le Atua (When God asks a question).

Tauloto – Tusi Paia: Iopu 38:1-3 “1‘Ona tali mai ai lea o le ALI‘I ‘iā Iopu mai le afā, ‘ua fa‘apea mai: O le Ali‘i

2“O ai ‘ea lenei ‘ua na fa‘apouliuligia la‘u pule, i ‘upu e lē o i ai le poto? 3‘Inā fusi ia lou sulugātiti e pei o le tagata malosi; ‘ou te fesili atu fo‘i ‘iā te oe, ‘inā e fa‘ailoa mai ia ‘iā te a‘u.”

Faitauga - Tusi Paia: 1 Tupu 19:9-14

Upu Folafola

I le tatou Tusi Paia faitau o le asō, na fesili faalua le Atua iā Elia i le fesili e tasi. “ Elia e, se a lau mea e fai iina?” A fetalai faalua le Atua i le fesili e tasi, e tatau ona i ai se mafuaaga. O le masani, a fesili le Atua ia te oe, o loo ia tofotofo. I le Ioane 6:5-7, ina ua silasila atu Iesu i le motu o tagata, ona fāliu lea o ia ma fesili atu i se tasi o ona so’o poo fea latou te faatauina mai ai ni areto e fafaga ai i latou. O lo’o faapea mai fo’i le Tusi Paia, “Ua faapea atu Iesu, o lana tofotofo iā te ia, auā ua silafia lava e ia le mea o le a na faia.” O le faiaoga, na te silafia lava le tali, o lona fia iloa po’o malamalama tamaiti aoga e ala ai ona fai ana fesili.

I le Kenese 3:1-7, ina ua aai Atamu ma Eva I le fua o le laau na fa’asāina ma lalafi ai i tua o se laau, ua leva na silasila le Atua ia I lāua. Peita’i na ia fesili “Atamu o fea oe?” Ina ua tali Atamu, “Na ma faalogo I lou siufofoga ona ma fefefe ai lea auā ua mā’ua lē lavalavā.” Na toe fesili le Atua. “O ai na fai atu iā te oulua ua lua lē lavalavā?” Ua mae’a silafia e le Atua peita’i na fesili pea se’i vaai po’o le a se la tali. Ae pagā lea ua laua tu’ua’ia solo le leaga ma faasalaina ai i laua. I le Kenese 4:3-10, na fesili le Atua ia Kaino po’o fea Apelu. Ina ua faapea mai Kaino na te lē iloa, na fetalai pea le Atua, “ o loo tagi mai le eleele le toto o lou uso I le mea na e fasiotia ma tanumia ai o ia. Na silafia e le Atua mai le amataga le mea o i ai Apelu ae na ia fesili pea iā Kaino poo fea lona uso ae pagā lea e le’i tautala sa’o Kaino.

A fesili atu le Atua ia te oe, aemaise pe a faatatau i se agasala na e fai, faapaū faō i ona luma ma tagi atu mo lona alofa mutimutivale. O le fesili a le Atua na ua fai atu o lona fia silafia po ua moni lou salamō pe leai. Ae afai o le fesili e lē ona o se agasala na e faia, o la’u fautuaga ia e fesili iā Agaga Paia e fesoasoani iā te oe e tali.

I la tatou Tusi Paia faitau o le asō na fesili faalua le Atua iā Elia i le fesili e tasi ae tasi lava le tali a Elia na fai fa’alua. Ou te talitonu na fesili le Atua i le taimi lona lua ona na finagalo inā sui ia le tali a Elia. Ou te manatu a na le tali Elia ma le loto lē mautonu semanū e lē fai i ai le Atua e fa’auu lē na sui tulaga ia te ia i le taimi lava lea. I le Esekielu 37:3, sa atamai Esekielu. Na fesili le Atua ia te ia, “E mafai ea ona toe ola o ia ivi?” E lei iloa e Esekielu tali ona ia faapea mai lea, “Le Alii e, le Atua e, ua e silafia lava oe.” O fesili a le Atua o tofotofoga, fesili iā Agaga Paia e fesoasoani iā te oe e tali fesili a le Atua pe a fesiligia oe. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 12 AOKUSO 2023

Manatu Autu: O le musumusu a le Atua (The Whisper of God).

Tauloto – Tusi Paia: 1 Tupu 19:12 “e mulimuli i le mafui‘e o le afi; e le‘i i ai le ALI‘I i le afi; e mulimuli i le afi o le leo filemū ma le itiiti.”

Faitauga - Tusi Paia: 1 Tupu 19:9-14

Upu Folafola

I le Tusi o Ioane 13:21-30, i le taimi o le paseka mulimuli, na fetalai ai Iesu e i ai se tasi o i latou (au so’o) o le a faalataina ia, ona fai lea o Peteru ia Ioane le so’o alofaina e fesili iā Iesu po’o ai, ae tali Iesu i se musumusu na o Ioane na ia lagonaina.

I se tasi o a matou sauniga o le Agaga Paia, na fetalai le Atua, “ O a’u mamoe uma e lagona lo’u leo ae to’aitiiti e lagona la’u musumusu.” E i ai le eseesega pe a fetalai le Atua, ma le musumusu. A e lagona le musumusu a le Atua, o le a muamua I luma lau savaliga ma Keriso nai lo’o isi o le au uso. O le a silisili atu fo’i mea uma e te faia. Ou te tatalo ia amata i le asō ona e lagona le musumusu a le Atua i le suafa o Iesu.

Ina ia e lagona le musumusuga a le Atua, e tatau ona sili lou latalata ia te ia na i lo’o lou latalata i se isi lava tagata. Na lagona e Ioane le musumusu a Iesu auā fai mai le Tusi Paia I le tusi a Ioane 13:25 sa nofo Ioane i talaane o Iesu, “ua faalagolago mai o ia i le fatafata o Iesu, ona fai mai lea iā te ia, le Alii e, o ai ea?”

E lē mafai ona e fai mai e te latalata atu i se tagata nai lo’o le e faalagolago i lona fatafata. O le nofoaga lea e tatau ona e nofo ai, o le fatafata o le Alii Fa’aola. E tatau ona e latalata ma pipi’i i le fatafata o le Atua se’ia e lagona le tātā o lona fatu. Ua na o ni nai tagata toaitiiti e latalata faapea le latou mafutaga ma le Atua ma e te iloa gofie e lē mafai ona malolō mai le galuega tala’i po’o le manumalōina o agaga auā o le faamuamua lea a le Atua o tagata ia faaolaina agaga.

O le tulaga lelei, o le fa’anaunauga lea o le Atua ia aumai oe le tagata la te mafuta vavalalata. Fai mai le Iakopo 4:8 “ Ia outou fa’alatalata atu I le Atua, ona fa’alatalata mai lea o ia iā te outou. Tagata agasala e, inā fafano ia o outou lima, o outou e fa’alotolotolua e, inā fa’amamā ia o outou loto.”

O le fesili, ua e naunau ea e fa’alatalata iā te ia, afai e te tali i le Ioe, o le a le vavalalata? So’o se taimi e te agasala ai, e fai ai le pupuni I le lua va ma le Atua. (Isaia 59:1-2), ma le (Salamo 66:18). O le mea muamua e tatau ona e faia e te faalagolago ai i le fatafata o Iesu ma e lagona lana musumusuga o le ola fa’apaiaina. E te ola faapaiaina loa, amata loa ona faailoa atu e le Atua mea mo na o oe lava. E te fia faalogo ma lagona le musumusuga a le Atua ma avea oe o sē e malamalama I mea lilo I le finagalo o le Atua?

Fa’alatalata nei loa I le Atua i lona nofoalii Paia, manumaloina o agaga ma le mafutaga ma ia i le asō. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 11 AOKUSO 2023

Manatu Autu: Mafuaaga e filemu ai le Atua (Why God may be silent).

Tauloto – Tusi Paia: Ieremia 29:11 “Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe..”

Faitauga - Tusi Paia: Ioane 5:1-9

Upu Folafola

I le tele o tausaga talu ai a’o ou iai I le tulaga o se faifeau talavou, sa iai se nofoaga o togalauapiga tele I totonu o Nigeria e taua o le ‘Togalauapiga a Talavou (Youth Camp)’. E masani ona matou o e fai ai a matou mafutaga. E iai se aso ao matou iai I lea nofoaga mo se mafutaga, na sau le pule o le nofoaga ma fai mai o lo’o fia faatau lea nofoaga mo le $100,000. Sa leai sa matou tupe na iai e latalata I le tau lea peitai sa maualuga lou faatuatua e mafai e le Atua ona faatauina lea nofoaga mo matou. Na ou faapotopoto la matou vaega ma tatalo faataamilo I lea nofoaga, ma folafola ua matou maua e tusa ma le Upu a le Atua I le Iosua 1:3 O mea uma lava e solia o e ‘outou alofivae, ‘ou te foa‘iina atu ai ‘iā te ‘outou, e pei ‘ona ‘ou fai atu ai ‘iā Mose.

Mulimuli ane, ina ua vaai mai lē e ana le fanua e leai se matou tupe, na latou faatau atu lea nofoaga I se Ekalesia e tele atu. Ua matua matou faanoanoa. Ua matou liliu atu I le Atua, “Le Alii e, na matou tatalo, na matou tutu I lau Upu”. I nei mea uma, sa filemu pea le Atua e leai se tali mai. Na filemu ma lē tali mai aua e sili atu le mea ua ia saunia mo I matou. Ua ia silafia lelei, o le 40 eka o se nofoaga itiiti pe a fua I le mea o le a ia ave I matou iai. I le alofa tunoa o le Atua, o le fale tele tuai sa faia ai a matou sauniga, e tu I luga o le fanua e sili atu ma le 40 eka. Ao le matou fale fou faatoa uma ona fausia e tolu kilomita le umi, tolu kilomita le lautele. 

Afai ua e tatalo, vivii I le Atua, ma ua e mautinoa le mauaa o lou faatuatua, ae o loo filemu pea le Atua, e leiloa pe sili atu se mea o lo’o ia finagalo mo oe I lo le mea o lo’o e ole atu ai. O ia o le Atua e fiafia e foai e sili atu I mea o lo’o manatunatu iai lana fanau. Fai mai le Tusi Paia I le Efeso 3:20 O lenei, ‘ia ‘iā te ia o lē na te mafaia ‘ona faia o mea uma le fa‘asilisili lava i mea tatou te ole atu ai ma mafaufau i ai, e tusa ma le mana o lo‘o matuā galue i totonu ‘iā te i tatou,

I le tatou faitauga o le Tusi Paia mo le asō, o le tamaloa I le vai I Petesa, sa ia taumafai e faamatala ia Iesu lona ma’I ma lona faafitauli ma lona manatu e fesoasoani Iesu e ave ia I tafatafa o le vai, peitai e lei tali Iesu I lona manao, ae na ia faia se mea e sili atu. O le tulaga tonu lava lea e tupu I le tele o taimi e te tatalo ai ma peiseai e le o liliu mai le Atua. E leiloa poo ia saunia se mea faasili ma sili atu mo oe. Aua e te faavaivai, faatuatua ia te ia. Fai mai le Isaia 55:8-9 

Auā o o‘u manatu e lē o ‘outou manatu, o o‘u ala e lē o ‘outou ala, ‘ua fetalai mai ai le ALI‘I. 9Auā e pei ‘ona sili ‘ona maualuga o le lagi i le lalolagi, ‘ua fa‘apea ‘ona sili ‘ona maualuga o o‘u ala i o ‘outou ala, ma o‘u manatu e sili i o ‘outou manatu.