OPEN HEAVENS
MATALA LE LAGI MO LE ASO LUA 13 TESEMA 2022

Manatu Autu: Alofa Tunoa e le o se Laisene e Agasala ai (Grace is not a License to Sin).

Tauloto – Tusi Paia: Roma 6:1-2‘1O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? 2‘Aua ne‘i fa‘apea. O i tatou ‘ua oti i la le agasala, pe fa‘apefea ‘ona tatou ola pea i ai?.’ 

Faitauga - Tusi Paia: Roma 6:1-12

Upu Folafola

O le alofa tunoa o le malosiaga faaleagaga ua foaiina e le Atua ia i tatou ina ia tatou ola usiusita’i ai ia te ia. O lo’o faapea mai le Tusi Pa’ia i le Roma 6: 14 – Auā e lē pule le agasala ‘iā te ‘outou; auā ‘ua ‘outou lē nonofo i le tulafono, a o le alofa tunoa.

O le alofa tunoa e lē o se laisene e fa’ataga ai ona tatou faia le agasala. O le alofa tunoa o se fesoasoani tatou te faia ai le finagalo o le Atua. Ana faapea o le manumalo i le agasala e le mafai ona ausia, semanū e le maliu Iesu. Auā o lona uiga o lona maliu o se mea na faia fua, e leai se uiga. Fai mai le Mataio 1:21 “E fānau mai e ia le tama tane, ‘e te fa‘aigoa fo‘i ‘iā te ia o Iesu; auā e fa‘aola e ia lona nu‘u ai a latou agasala.”           

Afai e te auai ia Iesu Keriso, e avatu e le Atua ia te oe le alofa tunoa e mafai ai ona e ola ma soifua e manumalo I le agasala e le mafai ai ona pule ia te oe. Aua nei faatagaina a’oa’o pepelo e faaseseina oe e te talitonu ai o le alofa tunoa e avatu ai ia te oe le saolotoga e faia ai pea le agasala, o le totogi o le agasala o le oti. O le a toe afio mai le Atua I se Ekalesia e leai se ila poo se maanuminumi. Afai e te naunau e avea oe ma vaega o le Ekalesia lea, e tatau ona e alu ese ma le agasala. 

Fai mai le Efeso 5:27‘ina ‘ia na tu‘uina atu o ia, ‘iā te ia, o le ekalesia matagofie lava, e leai sona ila, po o se ma‘anuminumi, po o se tasi mea fa‘apenā, a ‘ia pa‘ia ma ‘ia lē ponā.

Afai ua e agasala, e naunau le Atua e avatu ia te oe lona alofa mutimutivale, ona o lona alofa tunoa, ‘ae afai e te fa’amelea lona alofa tunoa ma faia pea le agasala ma au masani, o lona uiga ua e tauanauina mai lou lava malaia. E manino le Tusi Pa’ia i le faapea mai - e lē faatagaina e le Atua le fa’aauauina pea o lau agasala, ae faaaoga le faulai o lona alofa tunoa e fai ma ‘alofaga. Fai mai le Roma 6:1-2 ‘1O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? 2‘Aua ne‘i fa‘apea. O i tatou ‘ua oti i la le agasala, pe fa‘apefea ‘ona tatou ola pea i ai?.’

O se kerisiano ua moni lona faaolaina, o le a ia sailia le alofa tunoa o le Atua e taofia maumaututu ai le agasala mai lona olaga, ae le o le ‘avea o se ‘alofaga e fai ai pea le agasala.

Tatalo

Tamā aumai lou alofa tunoa e matua faaumatia le agasala I lou olaga. O le alofa tunoa ou te matua’i le toe naunau ai i le agasala, le Alii e, faamolemole foai mai lou alofa tunoa, I le suafa pele o  Iesu Keriso, Amene. 

OPEN HEAVENS
MATALA LE LAGI MO LE ASO GAFUA 12 TESEMA 2022

Manatu Autu: Taua o le Tatalo (The Efficacy of Prayer).

Tauloto – Tusi Paia: Mareko 10:52 ‘Ona fetalai atu lea o Iesu ‘iā te ia, “‘Inā alu ia; o lou fa‘atuatua ‘ua e mālōlō ai.”

‘Ona va‘ai loa lea o ona mata; ‘ona mulimuli atu ai lea o ia ‘iā Iesu i le ala..”’. 

Faitauga - Tusi Paia: 1 Tupu 18:36-38

Upu Folafola

Na aumai e se tagata se tama talavou ia te a'u I le tele o tausaga talu ai. O lona toalua, e lei leva ona la faaipoipo ua faaletonu lona mafaufau ma ua savali I le auala. E ui e foliga mai ua le toe iai se fofo o le mataupu, ae lei solomuli lenei alii. Ua avatu lenei fafine I se tagata e fai ana vai, ae sa lei iai se lelei. Ina ua ou alu atu ou te tatalo mo ia, sa saisai o ia ini maea uamea. Na ou tatalo mo ia mo le lua minute ona ou alu ese lea. O le tagata fai vai, na alu atu ma vili le toalua o le fafine lea ma fai iai pe leaga le ulu o le faifeau lea na sau e fai le tatalo. Ua ia manatu pe faapefea ona sau tatalo na o le lua minute ae e matuia le tulaga ua iai le fafine lea. Ua faanoanoa lenei alii ma ua alu ma ave lona toalua e tu’u I le fale vale. Ina ua oo atu I lea nofoaga, na fai mai le polofesa o lo’o vaaia, o le a ia mataituina gaioioga a lona toalua mo le fitu aso aua e fua iai vailaau ma togafitiga e faia. Ina ua maea le fitu aso, na valaau le polofesa I le alii ma fai iai e leai ma se faaletonu I le mafaufau o lona toalua. I totonu o le lua minute, o se tulaga matuia e peiseai ua leai se faamoemoe, ua suia ma ua maua le tali lelei. 

O le taua o le tatalo e le fua I le umi na tatalo ae fua I le umi o le taimi e iai le tagata o lo’o tatalo I le nofoaga o le mamalu o le Atua. E lei faapea na faia se sauniuniga a Iesu Keriso ae na te lei tatalo mo se tagata. E o’o I le tatalo na faatuina mai ai Lasalo mai le tuugamau ina ua maea aso e fa, e le’I atoa le lua minute na faia ai. Aua foi e tele se taimi sa faaaluina e Iesu I le tatalo, e o’o I le po atoa o tatalo I le nofoaga o le mamalu o le Atua.  

I le tatou faitauga o le Tusi Paia o le aso, ina ua tatalo Elia, e lei faapea na tigaina ai. O le tatalo na faia e le atoa se lua minute ae pau le afi mai le lagi. Aua foi o le masani a Elia o le tatalo I le mauga ma e tatou te iloa e tatau ona tatou tatalo I o tatou mauga. 

O le tatalo e lua minute e mafai ona faapau mai e le Atua le afi mai le lagi, e le faapea e mo ni tagata faapitoa, e mafai e so’o se tagata ona tatalo faapea, pe afai e faaalu taimi I le tatalo ae le iloa atu e tagata. Afai e mafai ona e faaaluina ni itula e tapuai ai ia te ia I le viiga, faitau ma suesue lelei I le Tusi Paia, o au tusitusiga ina ia e iloa atili le Atua, ia taua ma lava lou taimi e mafuta ma le Atua ae le faapea e faatopetope lou alu atu ma toe alu ese mai lona mamalu, e mafai ona e tatalo e na o le lua minute ae tutupu vavega. 

O le taua o le tatalo e le fua I le umi o le tatalo, ae o le umi ona iai o le tagata o loo tatalo I le nofoaga o le mamalu o le Atua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 11 TESEMA 2022

Manatu Autu: Agasala ma Ma’i (Sin and Sickness).

Tauloto – Tusi Paia: Ioane 5:14 ‘Ua mavae ia mea, ‘ua silafia o ia e Iesu i le malumalu, ‘ona fetalai atu lea o Iesu ‘iā te ia, “Fa‘auta, ‘ua e mālōlō oe; ‘aua ‘e te toe agasala, ne‘i o‘o atu ‘iā te oe se leaga e sili i lenā.”’. 

Faitauga - Tusi Paia: Salamo 107:17-20

Upu Folafola
O le agasala e auala mai ai ma’i I tagata, peitai e faamalolōina pe afai e salamo ma liliu atu I le Atua. Fai mai le Salamo 119:67 ‘A o le‘i puapuagātia a‘u na ‘ou sesē; a o lenei, ‘ua e tausi i lau afioga.

So’o se taimi e sau ai iā Iesu se tagata ma’i mo se fa’amālologa ae sa ia faia le agasala ao le’i ma’i. E muamua fa’amagalo e Iesu ana agasala a’o le’i aveesea ma’i mai ia te ia. E tatau ona alu ese le agasala ae fa’aavanoa le tagata mo le fa’amalologa. Afai ua e agasala I le Atua e ao ona e ole atu ia te ia mo lona alofa mutimutivale e fa’amagaloina ai oe ma faafou le lua mafutaga ma lou Atua ma faafoisia lou ola maloloina.

E avatu e le Atua se upu mo oe i le asō e laveaiina oe mai le fa’afanoga I le suafa mamana o Iesu Keriso. Ta’uta’u atu au agasala I le Atua ma fai sau filifiliga mautu e te lē toe ola i le agasala. O se mea mata’utia lou faaauau ai pea I le olaga agasala aemaise ina ua uma ona faasaoloto oe e le Atua mai osofaiga a temoni.

Ua ta’u mai e Iesu I le tusi o Luka 11: 24-26 puapuaga o le tagata e faamalolō e le Atua ae fai pea le agasala. Luka 11:24-26 24“Pe a alu le agaga leaga i fafo o le tagata, ‘ua fealualua‘i o ia i mea matūtū, ‘ua sā‘ili se mapusaga, ‘ae lē maua; ‘ona fai ane lea, ‘‘Ou te toe fo‘i i lo‘u fale na ‘ou sau ai.’ 25‘Ua o‘o i ai, ‘ona iloa ai lea, ‘ua uma ‘ona tafitafi ma teuteu. 26‘Ona alu ai lea o ia, ‘ua na ‘aumaia isi agaga e to‘afitu, e sili lo latou leaga ‘iā te ia; ‘ona latou ulufale ai lea, ‘ua nonofo ai; ‘ona sili ai lea o le leaga le tulaga o lea tagata i lo le tulaga muamua.”

A o’o faafuasei le oti I le tagata agasala e alu I seoli. Liliu nei i le Atua ma salamō I au agasala. Amata ola nei i le olaga faapaiaina ona foai atu lea e le Atua se upu e faafou ai lou agaga. So’o se tasi e lē uō ma le Atua o lo’o ui I le ala agai I le fa’afanoga. E tusa ma le Tusi o Salamo 9:17 o lea uso ua mautū lona ala i seoli.

Salamō I au agasala ma alu ese mai le olaga agasala ina ia e maua le olioli, le toe faafouina ma le fa’aolaolaga ia Keriso Iesu. O le a e nofo tupu ma Keriso i aso mulimuli i le suafa manumalo o Iesu Keriso, Amene.

OPEN HEAVENS
MATALA LE LAGI MO LE ASO TOONAI 10 TESEMA 2022

 Manatu Autu: E pule le Atua I le fua tele mai (God controls fruitfulness).

 Tauloto – Tusi Paia: Kenese 29:31 ‘Ua silafia e le ALI‘I ‘ua ‘inosia Lea, ‘ona fa‘afanafānauina lea o ia e ia, a o Rasela ‘ua pā ia.’. 

Faitauga - Tusi Paia: Isaia 54:1-8

Upu Folafola
O le Atua o ia e faia le faaiuga poo ai e fanafanau. I le Kenese 29:31 ina ua silasila atu le Atua ua inosia Lea ona ia fa’a fanauina lea o ia (tulou). O le Atua e filifilia po’o ai e fanau a’o ai e pa (tulou). Ou te talitonu ua avatu e le Atua lenei vaaiga i se tasi i le asō ina ia tu’u atoa lou talitonuga ma lou faamoemoe I le Atua ona ia fa’a fanafanauina lea o oe i le suafa o Iesu.

Sa mana’o Rasela ia maua sana fanau peitai sa sesē le nofoaga na saili i ai. I le Kenese 30:1-2 sa fai Rasela ia Iakopo lona toalua e tatau ona ia avatu ni tama ia te ia, a leai o le ā oti. Ona tali atu lea o Iakopo iā Rasela po’o ia ea o le Atua? Fai mai Kenese 30:22-24 ua manatua e le Atua Rasela, ua fa’a fanauina ia. O le faamaoniga na fa’a fanauina e le Atua Rasela e ta’u mai ia I tatou o le Atua fo’i na ia tapunia lona manava. Ua ta’u mai e le Faaaliga 3:7 ia I tatou o le Atua na I ai le ki a Tavita. A ia tatala e leai se tasi e faamauina, a ia faamauina fo’i e leai se isi e talaia. O manava uma ua tapunia o le a faa fanauina I le asō I le suafa o Iesu. E lē afaina pe a manatu le tiapolo ua ia tapunia lou manava (tulou). O le ki a Tavita o le ki autu lea. Afai e tatalaina e le Atua lou manava e fa’alēaogaina uma galuega a le tiapolo.

Peitai o le fanafanau e lē na o le maua o se fanau. E mafai na i ai manava o pisinisi, galuega, manatu lelei ma isi. I le Luka 5:1-7 sa fagota Peteru I le po atoa ae lei maua se i’a sa tapunia le manava / punāvai o manuia ia te ia seia o’o ina asiasi atu lē e i ai le ki a Tavita ma tatala manuia mo Peteru. E o’o atu I le isi faiva o Peteru I le ogasami loloto, o lē sa leai se i’a o lona faiva ua tetele le mau o lona faiva ua lē mafai ona ia ave uma i’a a ua tufa atu I isi faifaiva. A tatala e le Atua lou punāvai o manuia e te maua suiga lelei tetele e lē mafai ona e talitalia ma fa’aaogā na o oe. O le punāvai o ou manuia e ao ona matala I le masina nei I le suafa o Iesu.

E lua mea e tatau ona e faia mo le Atua ia e fua tele mai. Muamua silasila I le Atua, na o le Atua lava mo lou manuia. E a’oa’oina oe e le Atua i mea e te fai faapei ona ia a’oa’o Peteru e lafo lona upega. Lona lua aua ne’i muta lou loto talitonu. Semanū e misi e Peteru lona manuia ona ua loto vaivai. E le’i loto e lafo le upega ae sa ia faia ona o le manatu I le fetalaiga a Iesu. Atonu ua toe o se aga e taunuu i se fesuiaiga lelei o lou olaga. Ua maea talaia e le Atua punāvai o manuia mo oe amata loa lou faiva ma ao lau seleselega.

Tatalo
Tamā faamolemole tatala noanoataga o ou manuia mo a’u I le asō ma ia avea le masina lenei e iloga ai se suiga lelei mo lo’u olaga I le suafa pele o Iesu Keriso, Amene.

OPEN HEAVENS
MATALA LE LAGI MO LE ASO FARAILE 9 TESEMA 2022

Manatu Autu: Leai se alofaga (No Excuses).

Tauloto – Tusi Paia: Roma 2:1 ‘O le mea lea ‘ua e lē mautali ai oe le tagata o lē fa‘amasino atu, auā o lou fa‘amasino atu i se tasi, ‘ua e fa‘amasino ai oe e oe; auā e o‘o le fa‘amasino atu, ‘ua e faia ia lava mea’. 

Faitauga - Tusi Paia: Kenese 3:9-14

Upu Folafola
E masani I le natura o le tagata ona tuuaia isi tagata ona o a latou mea sese e faia. Na amata mai lava I le amataga I le Kenese 3:9-14, ina ua fesiligia e le Atua Atamu pe aisea ua faia ai le agasala, na ia faapea mai : ‘ona o le fafine na e aumai ia te a’u’. Ona liliu lea o le Atua I le fafine ma faapea atu: ‘Eva, aisea ua e faia lea mea?’ Na tali mai o ia ‘o le gata ua faasese i ate a’u’ E na o le gata e lei faia se alofaga aua e ono faapea mai le gata ‘o le tiapolo na ulu ia te a’u’, ua sili atu le meaola, sa ia talia, o ia na faia I lo gaoioiga a le tagata.  

Afai e te vaai I se tagata e faia lava e ia alofaga I taimi uma, ua e vaai atu I se tagata toilalo. O le faia o faamatalaga o se alofaga, o se uiga masani lea o le toilalo. I le tala I taleni I le Mataio 25:14-30, o auauna e lima taleni ma le lua taleni, na la tuuina atu ripoti o la pisinisi I lo la matai. E pau le tagata na ia alo I faamatalaga na faia, o le tagata na toilalo. Semanu e manuia ana taumafaiga pe ana faapea e le manatu ia faia se alofaga, ma o le mafuaaga lea o lona toilalo. O so’o se taimi e te manatu ai e tatau ona faia se faamatalaga e alo ai, faamanatu ia te oe lava, ‘E le o a’u o se tagata toilalo’. Afai e te manatu, tusa po’o le a le mea e tupu, e te taumafai pea e aunoa ma se alofaga, e te nofo I luga I taeao uma ma taumafai pea. E toatele tagata ua avea le malo ma le tamaoaiga, e fai ma alofaga I lo latou tulaga faaletonu I le tulaga tau tupe o lo’o iai, e ui e toatele o loo siitia ma o ese mai le mativa I lalo o le malo ma le tamaoaiga lava e tasi. Aua nei faatagaina lou tagata e faia alofaga I taimi uma, sei vagana o lo’o e manao ia e toilalo. 

Peitai, afai lava ua le mafai ona lelei se mea, aua le faia se alofaga, ae tautino o oe lava le mafuaaga. Afai e o’o I le tulaga lelei, e te avea le tauleleia. E tatau foi la ona faapena pe afai e oo I se tulaga le lelei. Afai e te tuai atu I se fonotaga ‘aua e te faia se alofaga ona o le poloka o taavale. Sa tatau ona e suesue lelei tulaga o le auala pe alagatatau ona e alu vave ina ia e mauaina le taimi amata o le fonotaga. A fai atu seisi ia te oe pe aisea ua e le anapogi ai, ‘aua le faapea ua ona o loo faaletonu lou laualo, o le alofaga le mea lena, ae ta’u pea, ua le mafai ona ua le mafai ona e pulea lou tagata.  

 Filifili I le aso, e le toe iai se alofaga. Ia taofia le faia o alofaga ona o mea ua tutupu, ona e vaai lea i se suiga lelei I lou olaga, I le suafa manumalo o Iesu Keriso, Amene. 

OPEN HEAVENS
MATALA LE LAGI MO LE ASO TOFI 8 TESEMA 2022

Manatu Autu: Foai o se mea e tau ia te oe (Giving is personal).

Tauloto – Tusi Paia: Faataoto 11:25 ‘E fa‘atamao‘āigaina le tagata matamau; o ia fo‘i lē fa‘asūsū i nisi, e fa‘asūsūina lava o ia’. 

Faitauga - Tusi Paia: 2 Samuelu 24:18-24

Upu Folafola
O le tele o taimi e o atu ai aiga e sii le viiga I le Atua, e tufatufa e le tama sene I tagata uma o lona aiga e lafo I le lotu. E alagatatau lea faiga pe afai e faia o ni tamaiti e leai ni tupe, ae ia aoaoina I latou ia maua le loto foai. Peitai afai o loo faalagolago pea lou toalua ma lau fanau matutua ia te oe e avatu ai mea e fai ai le taulaga, e tatau ona toe aoaoina I latou. I le tatou faitauga o le Tusi Paia o le aso, na teena ma lē talia e Tavita le ofo a Arana e foai atu mea e faia ai le taulaga, aua o so’o se mea e te avatu I le Atua e leai sona tau ia te oe, e faamauina lea I le tagata na totogiina le tau, ae le o oe. 

O le foai o se mea e tau ia  te oe. Afai e maua e lau fanau ni latou tupe mai ia te oe, a’oa’o iai latou e tuu ese se vaega e foai I le Atua. Afai e maua tupe a lou toalua, fautua iai e foai se vaega I le Atua. O le vaega e sau ai le tupe e alu foi iai le faamanuiaga. Fai mai le Failauga 1:7O lo‘o tafe ifo vaitafe uma i le sami; ‘ae lē tumu ai le sami; o le mea e tafe mai ai vaitafe, e toe fo‘i atu o ia i ai.  

Fai mai le Kalatia 6:7 ‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia.

E le mafai ona e seleseleina mea e te le’i totoina. O mea e te toto, o mea na e te luluina. Fai mai le Luka 6:38‘Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.” Ua na o ia na foai atu e na te maua mai. 

O ai e te manatu na alu ma ato o meaai na totoe I le tala I le fafagaina o le 5000 tagata I le Ioane 6;5-13? Na tofu le au so’o ma le ato na ave I le fale o le tamaitiiti na avatua le areto. O le tagata e lulu, e na te selesele foi. O le foai, o se mea e tau ia te oe lava aemaise I aso o le faigata. Fai mai le Salamo 41:3, afai o oe o se tagata foai, afai e te ma’i, e asiasi le Atua ia te oe. E na te tapenaina lou moega I le taimi o le ma’i. I le Salamo 20:1-3, o lo’o faamanino mai le Tusi Paia e le faagaloina e le Atua au foai aemaise o taimi o le oge ma le fememeai. E iai faamanuiaga faapitoa e faaagaga mo tagata foai ma e le taitai ona fiafia iai le tagata lima uu. O ia e faasusu, e faasusuina. Afai e mamago mea uma, o le tagata na faasusu e feliuaina ma ua faasusuina o ia I lea vaitau. 

A'oa’o lou aiga e foai I le Atua mai mea ua latou maua, I le suafa mamana o Iesu Keriso, Amene.

OPEN HEAVENS

MATALA LE LAGI MO LE ASO LULU 7 TESEMA 2022

Manatu Autu: O Galuega Talai a Agelu 2 (The Ministry of Angels 2).

 Tauloto – Tusi Paia: Galuega 12:5 ‘O lenei, ‘ua leoleoina Peteru i le fale puipui; a ‘ua faia le tatalo fa‘atauānau i le Atua e le ekalesia mo ia

 Faitauga - Tusi Paia: Galuega 12:1-11

Upu Folafola
O so’o se tagata e lei faaolaina, e matautia lona afaina I le lotoifale o agelu. I le Galuega 12:20-24, na taia e le agelu a le Ali‘I ia Herota, ‘ona ‘ati olaina lea o ia i anufe ‘ua oti ai aua ua faamaualuga. I le 2 Tupu 19:35, ina ua manatu se tupu e mafai ona ia fetaui ma se atalii o le Atua, na afio mai le Alii ma lana autaua ma se agelu e toatasi, ‘ua fasi i le togālauapi o Asuria o fitafita e 185,000 I le po e tasi. O soo se tagata e le o I le itu a le Atua, e matautia lona afaina pe afai o loo feuia’i I tafatafa o agelu. O le faafitauli mo nei tagata, o lo’o iai agelu I le tele o nofoaga. 

A'o lenei, o so’o se tagata ua faaolaina, e saogalemu pea aua e mautinoa o lo’o iai se agelu, a laitiiti o le toatasi o lo iai faatasi ma ia. O lea tagata e sili atu lona puipuiga nai lo leoleo ma fitafita o lo’o leoleoina peresitene o malo tetele o le lalolagi. O le faanoanoaga, e toatele fanau faaolaina a le Atua ua latou le toe faaaogaina a latou agelu. 

I le tatou faitauga o le Tusi Paia o le aso, na ave e Herota Iakopo ma fasioti ia te ia, ae ina ua ia ave ia Peteru, na auina mai se agelu ma ua laveaiina o ia. A e vaai I le eseesega o vaega ia e lua, ina ua ave e Herota Iakopo, sa le’i nofo tatalo le Ekalesia. E latou te le o faaolaolaina le misiona ma galuega a agelu a le Atua, ae ina ua ia ave ia Peteru, na latou tatalo ma ua faaolaolaina le galuega talai a agelu a le Atua. 

E tele mea o loo tatou afaina ai, e ui e toatele agelu o loo siomia I tatou. O le mafuaaga ona tatou te le o tatalo. Afai ua maluluina ma leai se ola I lou olaga tatalo, ua e le o faaaogaina au agelu. Ae afai e avatu ou manaoga I le Atua I le tatalo I gagana masani poo tatalo I le agaga, e faatonuina e le Atua ana agelu aua le tali o au tatalo. 

Ia e tatalo ina ia faaolaolaina le galuega a agelu I lou olaga. I le 2 Tupu 19:20, na auina atu e le Atua se feau I le tupu o Esekia e faapea atu: “O lo‘o fa‘apea ‘ona fetalai mai o le ALI‘I le Atua o Isaraelu: ‘Ua ‘ou fa‘alogo lava i lau tatalo ‘iā te a‘u ‘iā Sanerivi le tupu o Asuria.

O le tatalo a le tupu o Esekia lea na faaolaina galuega a agelu e fasiotia fitafita a Suria e 185,000 I le 2 Tupu 19:35. Ana le tatalo, semanu e avea o ia ma meaai a ona fili ma e ita ia te ia. Afai e te tatalo, e te faaolaina le galuega a agelu mo lou manuia, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO LUA 6 TESEMA 2022

 Manatu Autu: O Galuega Talai a Agelu 1 (The Ministry of Angels 1).

Tauloto – Tusi Paia: Numera 22:22 ‘Ona tupu ai lea o le to‘asā o le Atua ‘ina ‘ua alu o ia; ‘ua tu mai fo‘i le agelu a le ALI‘I i le ala e tete‘e ‘iā te ia. ‘Ua ti‘eti‘e o ia i lana asini, sa ‘iā te ia fo‘i ana ‘au‘auna e to‘alua.. 

Faitauga - Tusi Paia: Esoto 14:15-27

Upu Folafola
Fai mai le Eperu 1:13-14 o agaga e auauna ma talai. Ua aauina mai latou te tala’i I ē ua avea ma suli o le faaolataga.        O le taimi e te fa’aolaina ai ona iai lea o le agelu e tofia na te mulimuli ia te oe i so’o se mea e te alu ai. Ma o le agelu lea e puipui, fesoasoani ma tali atu mo oe. O le agelu foi lea e na te mata’ituina au gaioiga uma ma ripoti atu i le Atua. O se tulaga matagofie tele le iai o se agelu i so’o se mea e te alu iai. So’o se taimi e manatu ai le fili ua ia mauaina oe, e fa’ama’amulu ese oe e le agelu pe a moe le fili (Galuega 5:17-25, Galuega12:5- 11). E tusa pe e te faafesagai ma liona, o le a tapunia e agelu o latou gutu, ina nei e afaina ai (Tanielu 6:19-22). I le faatasi o le agelu ma oe i soo se mea e te   agai iai, o le a e mauaina se puipuiga sili ona mausali, ona e maoa’e le malosi o agelu. O le mua’i taimi e te vaaia ai le agelu o le Atua o le mea muamua lava na te ta’uina atu – ‘Aua le fefe’, aua o le a maua oe i le fefe. 

O mea e te maua mai le agelu, e fua i le itu o loo e iai. Afai e te iai i le itu a le Atua, o le a galue le agelu mo oe. Ae afai e leai, e mafai e le agelu ona poloka le auala e te uia, ina ia e fiu e taumafai atu ae tau pea i le pa sima. I le Numera 22: 21 – 35, tatou te faitau i le tala ia Pala’amo sa faatonu e le Atua e ‘aua nei alu ia Palako  ina ua ia valaau mai o ia. Ae na naunau Palaamo e alu. Sa tetee e se agelu Palaamo, ma ua sauni e faao’o le oti ia te ia, aua o loo faapea mai le Tusi Pa’ia ua tupu le to’asa o le Atua ia Palaamo i lana mea ua fai. Afai o se temoni ua tete’e mai oe, e mafai ona e fai atu iai e alu ese, ona alu ese ai lea, ae afai e te fai atu faapenā i se agelu, o le a fesili mai le agelu “I le suafa o ai?”. Afai e te tali atu: ‘I le suafa o Iesu’.  O le a faapea mai le agelu, o Iesu na faatonuina a’u ou te tu i le mea lenei, ma o le a leai se auala e te aga’i ai i luma mai lena tulaga. Afai la e te le mana’o e tetee mai oe e se agelu ma punitia ai lou ala, e sili ai pe a e le faasoesā i le Atua. 

O le agelu na tetee atu i tagata ‘Aikupito ina ia le mafai ona latalata ane i tagata Isaraelu, le po atoa, a ia malelemo i le taeao. Sa gaoioi le agelu e fa’asaoina tagata Isara’elu a o le taimi foi lea sa uuna’ia ai e le agelu tagata ‘Aikupito, i le oti. ‘Aua e te faasoesa i le Atua; a ia lafoaina lou ola ia Iesu ma ia e ola i se olaga faapa’iaina ona galulue ai lea o agelu a le Atua mo lou manuia.

E galulue agelu mo lou manuia pe afai e te  ‘au ma le Atua ae o le a latou tete’e ia te oe pe afai o e ola i le agasala. I le suafa mamana o Iesu Keriso, Amene.   

OPEN HEAVENS
MATALA LE LAGI MO LE ASO GAFUA 5 TESEMA 2022

Manatu Autu: Loto Faafetai ma Tautinoga (Gratitude and Testimonies).

Tauloto – Tusi Paia: Faaaliga 12:11 ‘A ‘ua latou manumālō ‘iā te ia ‘ona o le toto o le Tama‘i Mamoe, ma le ‘upu a la latou mau, ‘ua latou lē fa‘apelepeleina fo‘i lo latou ola ‘ua o‘o i le oti. 

Faitauga - Tusi Paia: 1 Samuelu 17:34-37

Upu Folafola
E iai se muagagana a le au matutua e faapea ‘a loto faafetai se tamaitiiti I faamanuiaga o ananafi, e toe maua ai foi isi’. E tatau ona e loto faafetai, e le faapea ona o na o mea ua faia e le Atua mo oe, ae ia matala ai foi faitotoa mo mea e le’i faia e le Atua. O nisi tagata ua le maua a latou vavega ona o le le loto faafetai. Ua latou le maua le lagolago a le Atua ona o le le mafai ona faapea atu ‘ faafetai lava’. O e o loo manatua pea le alofa mutimutivale o le Atua e latou te maua mea e faaopoopo. E faulai ma mulimuli pea faamanuiaga iai latou, ua sili atu. 

O le manatua o le alofa mutimutivale o le Atua, e fesoasoani ia te oe ia maua le faatuatua e solofa ai I lalo mauga. I le Mareko 11:22-23, o loo faapea mai Iesu, a e faatuatua I le Atua, ona a e faatonuina lea o mauga e siitia ma lafo I le sami, e usitai ia te oe. Ua faamautuina, o le Atua e le liliu e pei ona tatou iloa I le Malaki 3:6 o loo faapea mai: Auā o a‘u o le ALI‘I, ‘ou te lē liliu;. Ua tatou iloa foi le Eperu 13:8 o Iesu Keriso e le liu lava o ia, o ananafi, o le aso e o’o foi I le faavavau. O nei fuaitau o le Tusi Paia o loo faamautu le mea moni o mea na faia e le Atua ananafi, e mafai ona ia faia foi I le aso. O lea, o le tele o faamanuiaga e te manatua, e faapena foi ona siitia lou faatuatua, ma o le tele foi lea o mea e mafai ona ia faia mo oe. Afai e te manatua ma faamaumau mea ua ia faia I se vaega o lou olaga, a oo ina lua toe feagai ma lea tulaga, e te ‘ata aua foi ua e iloa e iai lou Tama o le na faia muamua, ma e mafai ona ia toe faia ma le manumalo. 

I le faitauga o le Tusi Paia o le aso, na faitauina e Tavita faamanuiaga a le Atua mo ia, ona o lea, ua ia mautinoa o le Atua lava lea e tasi o le na laveaiina o ia mai le liona ma le urosa, e mafai foi ona ia faia ia Koliata. Afai e te manatua tau lava o se vavega e tasi a le Atua I lou olaga, e te mautinoa e toe faia foi e le Atua. Na taumafai le tiapolo e ta’u mai ia te a’u e le mafai ona faia se fale tele e 3 kilomita le umi toe 3 kilomita le lautele. Ou te ata aua o lana tala lena na fai mai ao matou fausia le fale tele muamua e 100 mita le umi ae 50 mita le lautele. Na ia faia foi le luitau ao fausia le fale tele lona lua ma lona tolu, ma o lenei ua oo I lona fa, ma o lea na ou fai atu ai I le tiapolo ‘Aua faamaimauina lou taimi, o le fale e tolu kilomita le lautele ma le umi, ua na o se pepe pe a fua I mea tetele o le a o’o ona faia e le Atua.

 Silasila I mauga o loo pupuni ma taofia lou ala, ua na o se avanoa mo se tautinoga fou. 

O au tautinoga e faia ma le loto faafetai ona o mea tetele ua faia I le alofa tunoa ma le agalelei o le Atua mo oe, e maua ai foi isi vavega, I le suafa matautia o Iesu Keriso, Amene.  

OPEN HEAVENS

MATALA LE LAGI MO LE ASO SA 4 TESEMA 2022

Manatu Autu: E i ai le faamoemoe a le Atua mo lou soifua (God has a purpose for your life).

Tauloto – Tusi Paia: Isaia 64:8 ‘A o lenei, le ALI‘I e, o oe lava lo matou Tamā. O i matou nei o le ‘omea, a o oe le Tufuga;

o le galuega a ou ‘a‘ao i matou uma’

Faitauga - Tusi Paia: ieremia 18:1-6

Upu Folafola
I le tatou Tusi Paia faitau o le asō sa taumafai se fai ipu omea e fai se ipu peitai na leaga le ipu i lima o le fai ipu omea ona ia filifili lea e toe fai se isi ipu. Sa ou lauga I le silia ma le 30 tausaga talu ai i le mataupu sa faaulutalaina “Vaai i le mea e le vaaia”. Sa ou faia se ata fa’ata’ita’i o le lauga e faaaoga ai se ogalaau. Afai e te vaai I se ogalaau na o le ogalaau a e te iloa atu, peitai o le vaai a se tufuga vane ata na te iloa atu se liona ona ia ave lea o le samala ma le tofi ma amata galue loa. Na vane vane le laau i’u ina iloa atu foliga o le ulu o le liona. I le taimi o le galuega a le tufuga vane ata e mafai ona isi lua faafuasei le ogalaau. A tupu le faaletonu lea ona faapea lea o le tufuga I le ogalaau, “Sa ou mana’o e fai se liona ia te oe ae foliga mai na o se pusi e mafai na fai aua o lea ua e ta’e/ gau I se tulaga ou te lei fuafuaina.” Ona toe fa’aauau lea o le galuega a le tufuga e fai le pusi. Peitai afai e toe vaaia e le tufuga se isi faaletonu I le laau faapea loa lana tala “ok o le a ou faia la se isumu ia te oe.” A toe iloa nisi faaletonu i le ogalaau e lē mafai ai na faaaoga lona uiga pau le faaiuga a le tufuga o le faaaoga loa o le ogalaau e fai ma fafie e tafu ai afi. (Tulou)

Fai mai le Pese a Solomona 2:15 Ia outou pupu’e ia mā tatou o alope, o alope iti, o e fa’amaumau i vine aua ua fua o tatou vine.O faaletonu iti ia te oe e te le’o ano i ai e mafai na fa’aleagaina le faamoemoe a le Atua mo lou soifua. Afai e te lē faia se faaiuga sa’o I nei vaivaiga e i’u ina latou poloka le polokalame a le Atua mo oe. Atonu ua uma na ta’u atu ia te oe ua e tautala soo tele ae le’o i ai lava se suiga. Atonu ua uma na fetalai le Atua ia te oe ua ova lau tausami a o loo fai pea. Pe na fai atu fo’i se isi o oe o se uso ita ita gofie a’o lau tali e faapea lava tagata o lou aiga. O uiga nei e ui ina foliga faatauvaa ae mafai na faigata ai na faataunuu le faamoemoe tapena o le Atua mo lou soifua.

O le fai ipu e lelei tele I lana matatā peitai o le omea e ao ona gaua’i I le fai ipu ia faataunuuina ai lana galuega. Fai sau siaki mo oe lava poo I ai se suiga o le tausaga nei ma le tausaga talu ai. O tupu lou olaga? Ua ave ese pe faaitiitia au amio lē lelei? Ua e fa’ta’ita’ia ni uiga masani fou e fesoasoani ia te oe ia faataunuuina polokalame a le Atua mo lou olaga? O lea la’a o’o mai le amataga o le isi tausaga fou, tia’i ese uma tama’i alope na e faaleagaina lou vine. Aua ne’i faia oe ma faalavelave I le tuputupu a’e o lou olaga ma le faataunuuina o fuafuaga manuia a le Atua i lou olaga. I le suafa mamana o Iesu Keriso. Amene.