Samoan Devotional

OPEN HEAVENS

MATALA LE LAGI MO LE ASO SA 21 ME 2023

Manatu Autu:  E faasāina le Faitaaga 2 (Sexual immorality is forbidden 2)

Tauloto – Tusi Paia: Eperu 13:4 ‘Ia fa‘amamaluina le fa‘aipoipoga e tagata uma, o le moega fo‘i o le ulugali‘i ‘ia leai sona leaga, auā e fa‘amasinoina e le Atua o ē faita‘aga ma ē mulilulua’..

Faitauga - Tusi Paia: Faataoto 7:22-27

Upu Folafola

O nei aso, o nisi o Kerisiano faamaoni ma e o’o lava i faifeau o le Talalelei ua aafia i le tele o ituaiga agasala eseese e aofia ai ma le faitaaga lea na sola ese ai Iosefa auā o le mea moni o se avanoa faa auro lea e osofaia ai e le faitaaga Iosefa ma faaleaga iā te ia peita’i e lei mafai. Ua tusia I le Kenese 39:8-9 le tali atu a Iosefa I le faaosoosoga.

8‘Ae lē mafai o ia, ma ‘ua fai atu i le faletua o lona ali‘i, “Fa‘auta, e lē iloa e lo‘u ali‘i se mea ‘ua ‘iā te a‘u i le fale, o ana mea uma fo‘i ‘ua ia tu‘u mai i lo‘u lima. 9E leai se sili ‘iā te a‘u i le fale nei, ‘ua na lē tāofi sina mea ‘iā te a‘u, ‘ua na o oe, auā o oe lona faletua; pe fa‘apefea ‘ona ‘ou faia lenei mea leaga tele ma ‘ou agasala ai i le Atua?”

O le poto faatasi ma le mata’u I le Atua na laveaiina Iosefa I le aafia i le mulilua ma le avā a lona matai. Leitioa fai mai le Tusi Paia o le mata’u I le Atua o le amataga lea o le poto (Faataoto 9:10). Maimau pe ana maua uma e le fanau a le Atua le mata’u lea i le Atua sa iā Iosefa e manumalō ai i tofotofoga ma le agasala. O le poto le sola ese mai le agasala aua fai mai le Tusi Paia I le Roma 6:23 “ O le totogi o le agasala o le oti” o lea fuaitau e faasino I le oti e faavavau. Le au pele e, e lē faatagaina le faitaaga. Saili le poto mai le Atua e ‘aloese ai mai lenei agasala e oti ai.

I le itula mulimuli a’o lei fa’alataina Iesu Keriso sa ia silafia puapuagā o le a o’o iā te ia ma sa ia faatasi faalilolilo ai ma ona so’o i Ketesemane ma ia avatu ai iā i latou le fofō o faafitauli ma le agasala. Fai mai Mataio 26:41 “Ia outou mataala ma tatalo ina ne’i o’o mai le faaosoosoga ia te outou, ua mana’o i ai le loto a’o le tino ua vaivai.” I le mataupu lenei na faaigoa e Iesu le mataala ma le tatalo o le vailaau ma le fofo i faafitauli ma le agasala.

O lenei ua valaauina tatou ia mataala I le fili sauā e faalavelave i o tatou olaga kerisiano e pei o le faitaaga, talaiga sesē, tuinanauga o le lalolagi, mata i tupe, fa’asausili, amioleaga ma isi uma ituaiga faaosoosoga ma agasala. Fai mai le Tusi Paia ua lata mai le iuga, e tatau la ona tatou mataala ma tatalo. (1 Peteru 4:7) E fa’asāina le faitaaga; mataala ma tatalo mo mea tou te faalogologo ma vaai i ai ma lou aiga. Faaeteete I tagata e te mafuta ma talanoa i ai ma ia fafaga lou tagata i le Upu a le Atua ina ia aua ne’i e agasala ia te ia. Fai mai Salamo 119:11 “Ua o’u teu i lo’u loto lau afioga ina ne’i o’u agasala ia te oe”.

Tatalo

Tamā faamolemole aua ne’i faatagaina le faitaaga e manumalō ia te a’u i le suafa o Iesu Keriso. Amene.

OPEN HEAVENS
MATALA LE LAGI MO LE ASO TOONAI 20 ME 2023

Manatu Autu:  E faasaina le Faitaaga 1 (Sexual immorality is forbidden)

Tauloto – Tusi Paia: 1 Korinito 6:18 ‘Inā sōsōla ‘ese ia ‘outou i le faita‘aga. ‘Ua auliuligia le tino i nisi agasala uma e faia e tagata; a o lē faita‘aga, e agasala ia i lona lava tino’.

Faitauga - Tusi Paia: Faataoto 5:15-23

Upu Folafola

O le upu faitaaga e aofia uma ai ituaiga feusuaiga lē faatagaina e pei o le mulilua, talitane, fa’afatane, feusuaiga fa’amalosi, ma isi uma ituaiga feusuaiga e inosia e le Atua.

E i ai se fesootaiga faapitoa i le va o nei agasala ma mata o le tagata e pei ona taua i le 2 Peteru 2:14. O mata poo foliga o loo faaaogaina felafolafoa’i i nisi taimi i le Tusi Paia ma e tāua uma laua mo le faaleleia atili o fesootaiga. O le ala lea o le talanoa mai o le Tusi Paia I le i ai o mata e tumu i le mulilua.

O le mulilua ma le mataaitu o ituaiga feusuaiga fa’asāina ia ma inosia e le Atua e pei ona fa’ailoa mai i lana Upu. O mata faitaaga o lona uiga o le fesoota’i poo le faailoa atu o le mana’o i le tuinanau ma le amioleaga. A o’o ina fa’atetele le agasala e iloa atu a i foliga o le tagata o lona mafaufau ua na o mafaufauga faitaaga ma le mulilua o tumu ai aemaise I tagata e ese mai lona to’alua.

Peita’i o le mea moni o le faatosina a le tagata talitane e taula’i I ona laumata ma ona foliga e pei ona fai mai le Faataoto 6:25 “aua ne’i naunau lou loto i lona lalelei, aua ne’i maua oe e ona laumata.” ma le Isaia 3:16 o loo talanoa mai i le savali ma o latou ua ua falō ma ua fa’amatāitu i latou. Ona o lenei mafuaaga sa vaai ai i le vali o foliga ma laumata o se faiga e faatupu ai le aulelei ma le faitaaga sa faaaoga e tagata talitane o se faatosina talu mai aso o le Tusi Paia e pei o Iesepela o loo faamatala mai i le 2 Tupu 9:30 faapea “Ua o’o Ieu i Isereelu ona logona lea e Iesepela, ona vali ai lea e ia ona mata ma teuteu lona ulu, ua vaai mai i le faamalama.” A ua fetalai lo tatou Alii o Iesu Keriso I le Mataio 5:28 “ai se vaai atu i le fafine ina ia mana’o i ai, ua uma ona mulilua ma ia i lona loto.” O lona uiga o i latou e vali o latou foliga ma fai lavalava e faatosina ai isi o loo latou faatupu lagona faitaaga ma le mulilua o isi i aso uma.

Talu ai o le au Kerisiano e tatau ona faaeteete aua ne’i o latou faatupu se mea e tautevateva ai lona uso e pei ona fai mai le Roma 14:13 ma le 1 Korinito 8:9. Ua faapea mai fo’i le 1Timoteo 2:9-10 “Ia faapea fo’i fafine ia latou teuteu ia i latou i ofu e onomea ma ia lē teu anoa’i.” ma lā tatou amio ina ia aua ne’i o tatou fa’atupu se faavaivai i le savaliga a le isi uso. O le finagalo tonu lea o le Atua.

Tatalo

Tamā faamolemole aua ne’i e tu’u ia te a’u e saisaitia i mailei o le faitaaga I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 19 ME 2023

Manatu Autu:  Alofa moni (True Love)

Tauloto – Tusi Paia: 1 Ioane 4:20 ‘Pe ‘āfai e fa‘apea mai se tasi, “‘Ou te alofa i le Atua, ‘ae ‘ino‘ino i lona uso,” o le pepelo lava ia; auā o lē lē alofa i lona uso ‘ua ia va‘ai atu i ai, pe mafai fa‘apefea ‘ona alofa o ia i le Atua ‘ua ia lē va‘ai atu i ai..

Faitauga - Tusi Paia: Iakopo 2:15-16

Upu Folafola

O le alofa o le faavae lea o le faatuatuaga faakerisiano. Ina ua fesiligia Iesu poo le a le Tulafono ua sili. O le tali a Iesu, e te alofa atu i le Ali‘i lou Atua, ma lou loto ‘atoa, ma lou agaga ‘atoa, ma lou manatu ‘atoa. E te alofa atu foi i lē lua te tuā‘oi, ‘ia fa‘apei o oe lava ‘iā te oe.’ Na ia toe avatu le faamamafa e faapea: “O nā poloa‘iga e lua ‘ua ‘autū ai le tulafono uma ma le ‘au perofeta.” (Mataio 22:36-40). 

O le alofa moni o le faavae mautu lea, o so’o se afafine po’o se atalii moni o le Atua. O so’o se tasi e faapea mai o se kerisiano ae leai se alofa ia te ia, e le o se kerisiano moni (1 Korinito 13:1-2). 

Afai e iai le alofa moni, o lona uiga e iai le alofa pepelo. O le alofa moni e iai le agalelei. O le alofa moni e le faia ona o le vaaiga a tagata, e faia le lelei aua o loo manatu I le lagona mafatia a lē o loo alofa iai. I le faitauga o le Tusi Paia o le aso, fai mai Iakopo afai e te alofa moni I se tagata, e te faia mea uma I lou malosi e maua ai se fofo o lona faafitauli. Peitai ane, o nei aso, a vaai atu le toatele o kerisiano I isi a uso kerisiano e mafai ona latou fesoasoani atu iai, e sili atu iai latou ona tatalo I le Atua mo le fesoasoani ae ua le mafai ona avatu se fesoasoani e latou. O le alofa pepelo le mea lena. O le alofa moni pe afai e te fai taulaga e fesoasoani atu ai I seisi uso kerisiano ma faia mea uma e avatu ai le fesoasoani I se uso kerisiano ma fofo ai le faafitauli. 

I le tele o Tausaga talu ai, ina ua maea se polokalame tele a le Ekalesia, ua matua ou lelava lava ua na o le fia taoto lava I lalo e malolo ma moe. Peitai a’o ou alu ese atu I le taavale, ua ou faalogo I se tamaloa o valaau leo tele mai; ‘Lou tama fesoasoani mai, tama fesoasoani mai’. Ua ou manao e tu le taavale ae ua ou iloa a tu le taavale, e lolofi mai nei le motu o tagata. O lea na ou fai I le ave taavale e ave a’u I se vaega ou te faatali mai ai ona toe foi mai lea e avatu le tamaloa lea. Ina ua oo atu le tamaloa ia te au, ma faapea mai e leai sana galuega, na o lona toalua o loo faigaluega ao lea ua fo’i mai ua leai foi sana galuega. E iai se la masaga fa ua tolu aso ua le maua se meaai. O le mea muamua na ou faia o le valaau e o mai nisi e aumai se meaai ona toe faaauaua ai lea o le matou talanoaga. E uma ane le aso lea, ua maua uma a la galuega. E faaalia le alofa I galuega tatou te faia. Le au uso e, e moni ea lou alofa I lou tuaoi e pei o oe lava ia te oe? A aunoa ma le alofa moni I le lua te tuaoi, e le mafai ona e maua le lagi (Mataio 25:35-46). E faaalia ea lou alofa moni I tagata o lo’o lua feagai? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 18 ME 2023

Manatu Autu:  O le Meaalofa o le Alofa (The Gift of Love)

Tauloto – Tusi Paia: 1 Korinito 13:13 ‘A o lenei, o tumau le fa‘atuatua, ma le fa‘amoemoe, ma le alofa, o nā mea e tolu; a o le sili o nā mea o le alofa lea.

Faitauga - Tusi Paia: 1 Korinito 13:1-13

Upu Folafola

O lo’o faamamafa e le Tusi Paia, mataupu e faatatau i le agaalofa, ma ua faatusatusa le alofa i le tuufaatasia uma lea 

o poloaʻiga a le Atua (Mataio 22:36-40). O lo o faapea mai le Tusi Paia, o le alofa o le faataunuuina lea o le tulafono (Roma 13:10). O le faaaogāina o le upu “Tulafono” i le Tusi Paia, e masani ona faasino I poloaʻiga uma ma e faatusa foi i mau o loo faamauina I Tusi o i le Feagaiga Tuai. O Lona uiga, ua fa’atusatusaina e le Atua le upu lenei o le alofa e pei ona taua I tusi o le Feagaiga Tuai, o ni taumafa taua tele e manatunatu iai. O lo’o faapea mai le Tusi Paia i le 1 Korinito 13:1-2: A fai ‘ou te tautala i gagana a tagata ‘atoa ma agelu, ‘ae leai so‘u alofa, ‘ua ‘avea a‘u ma ‘apamemea ta‘alili, po o se sumepalo tagitagi. 2‘Āfai fo‘i o ‘iā te a‘u ‘ona perofeta ane, ma le iloa o mea lilo uma, ma le malamalama uma lava; ‘āfai fo‘i o ‘iā te a‘u le fa‘atuatua uma e ‘ave ‘ese ai mauga, ‘ae leai so‘u alofa, ‘ou te lē aogā lava.

O le fuaitau o loʻo taua i luga o loʻo faamatala manino mai ai le taua o le alofa ma e tatau ona ave iai le faamuamua a fanau a le Atua, e fua I le matua faaleagaga. Ua faatusaina ai e le Atua nisi o meaalofa faaleagaga faapitoa e le masani ona aumaua, i le alofa. O le tautala i gagana a tagata ma agelu, o lona uiga o le meaalofa e tautala I gagana faaleAtua ma faaliliuina I gagana a tagata. O le faamatalaina o gagana, o se meaalofa e seasea maua ma e naunau le toatele I totonu o le tino o Keriso ia maua. Peitai o soo se tasi e iai lenei meaalofa e aunoa ma le Alofa, ua faamatalaina o se apamemea taalili po o se sumepalo tagitagi – ua silafia e le Atua o se tagata na o faamatalaga.

E lē gata i lea, o lo’o faapea mai le Tusi Paia, afai e iai i se tasi le meaalofa o le perofetaga, ma malamalama I vaega lililo uma, ma ua maua le atamai, ma le faatuatua e faia vavega tetele, peitai, a aunoa ma le alofa, e leai se aogā o lea tagata i le silafaga a le Atua. O le alofa o le tulafono auro lea e fuaina iai so’o se meaalofa tatou te faaalia ma so’o se auaunaga tatou te ofoina atu mo le Atua. O le mea lea, o le alofa o le poloaiga sili lea. Fai mai le Roma 13:10 , “E le agaleaga le alofa i le la te tuaoi; o le mea lea o le Alofa o le faataunuuina lea o le tulafono. O auaunaga e fiafia i ai le Atua e faia mai le loto, e faia i le alofa. O le Atua o le Alofa. Afai ua e fanaufouina, ua ia te oe le malosiaga e faaalia ai le alofa naua. E faamalosia lenei alofa i le faa-Kerisiano. O le a le loloto e faaalia ai le alofa I lou olaga ma le galuega?

OPEN HEAVENS

MATALA LE LAGI MO LE ASO LULU 17 ME 2023

Manatu Autu:  O finagalo le Atua e te malolo (God wants you to rest)

Tauloto – Tusi Paia: Mareko 6:31 ‘Ona fetalai atu lea o ia ‘iā te i latou, “‘Inā ō mai ia, tau lava o i tatou, i se mea tu‘ufua, se‘i tou mapu a‘e teisi” Auā e to‘atele ē na feoa‘i ai, ‘ua lē mafai ai i latou ‘ona ‘a‘ai.’. 

Faitauga - Tusi Paia: Numera 8:23-26

Upu Folafola

E taua tele I le Atua le malolo. Na malolo o ia ma faamanuia I le aso fitu ina ua maea ona ia foafoaina le lalolagi (Kenese 2:1-3). Ona saunia lea e le Atua o isi vaitau e malolo ai le tagata. I le Esoto 35:2, na faatonuia e le Atua le sapati I vaiaso uma e malolo ai ma sa faamanatuina I le aso fitu I le Feagaiga Tuai. I le Levitiko 25:4-5, na faatonuina e le Atua le Tausaga lona fitu e malolo ai e le galueaina le eleele, o tagata ma meaola uma e malolo uma mo le Tausaga atoa e aunoa ma le faia o galuega. E le tatau la ona faateia I tatou I le Esoto 31:14 o loo faapea mai: 14‘Ia ‘outou tausi i le sapati, auā e pa‘ia lava ia ‘iā te ‘outou; o lē na te solia, ‘ia fasiotia lava o ia; auā ai se tasi e fai ai se galuega, ‘ia vavae‘eseina lea i lona nu‘u. E taua tele le malolo I le Atua ma e iai lava faasalaga iai latou e le usitaia. 

E ui e usitaia pea e le nuu o Isaraelu nei vaitau e malolo ai, o lo’o faatupulaia lona tamaoaiga pe a fua I nuu tuaoi e le faamamaluina nei malologa. E tupu lea tulaga ona o le Salamo 127:1 A fai e lē atiina a‘e e le ALI‘I le fale, e galulue fua i latou o ē atiina a‘e; ‘āfai e lē leoleo e le ALI‘I le ‘a‘ai, e mataala fua o lē na te leoleoina. O lona uiga, o le galue e aunoa ma se malolo e le faapea e mafai ai ona siitia le mauoa pe siitia galuega e mafai ona e faia. 

O lo’o faaalia e Iesu Keriso le taua o le malolo I le Mareko 6:31 ina ua ia faapea atu I le ‘au so’o ina ua maea le latou talaiga muamua. “‘Inā ō mai ia, tau lava o i tatou, i se mea tu‘ufua, se‘i tou mapu a‘e teisi” Na toeitiiti lava oti Tavita I le taua ona o le leai o se malolo. Na faapea mulimuli ane taitai’au ‘E te lē toe maliu atu ma i matou i le tau‘a, ‘ina ne‘i tineia le malamalama o Isaraelu.’ (2 Samuelu 21:15-17).  E toatele tagata e o’o I faifeau a le Atua o lo’o maliliu I  ma’i o le tino ona o le lē lava o le malolo. 

Le au uso e, o lo’o faatonuina e le Atua le malolo aua e maua ai lou malosi ma e manuia ai. E o’o ia te a’u, ou te faamautinoaina o lo’o aofia le malolo I le faatulagaina o au galuega e faia tusa po’o le a le tele o mea e tatau ona faia. E moni, e sili atu mea e mafai ona e faia I le tulaga lelei pe a lava lau malolo. Le au pele, e pei lava ona finagalo le Atua e te galue punouai ma le filiga, e finagalo o ia ia lava lau malolo. 

Tatalo, 

Tama, faamolemole fesoasoani mai ia te a’u ina ia lava la’u malolo mai galuega uma, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 16 ME 2023

Manatu Autu:  O fili I le olaga nei (Opposition in life)

Tauloto – Tusi Paia: Ioane 16:33 ‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.”’. 

Faitauga - Tusi Paia: Mareko 10:46-52

Upu Folafola

I le ola nei, e iai tagata e tete’e mai iai tatou i so’o se mea. O le taimi lava e taumafai e fai se mea lelei, o le a iai fo’I ma le fili e taofia ai oe. Afai e te manatu e leai ni si e tete’e mai ona e leai ni ou fili, o lona uiga e te le o fiailoa o loo iai ni ou fili. O le upu a Faataoto 14: 20 e faapea:

20‘Ua ‘inosia lē ‘ua mativa i lē la te tuā‘oi; ‘ae to‘atele o ē alolofa i le mau‘oa.

E leai se isi na manatu e tele ni fili a Patimaio ina ua alaga atu e fia maua le malamalama. E iai nisi tagata e le nofo lelei pe a vaai atu ua manuia isi uso a tagata, ae manana’o e faato’ilaloina. E pei lava o Patimaio, aua nei e faatagaina i latou e taofia le ‘ausia o lou faamoemoega. E le afaina poo a latou tala e fai po’o a foi ni a latou gaioiga e  faatoilalo ia te oe, ae ia e taumafai i auala uma e te manumalo ai. Afai e te le faatagaina i latou e faatoilalo oe, a o’o ina e manuia, o i latou foi e mua’i o’o mai e fiafia ma oe!

A mae’a ona e manumalo i ou fili sa taumafai e fa’atoilalo oe, ma ua siitia ou manuia, o le a toatele atu fo’i ou fili.           O le natura lena o mea. E tau leai ni ou fili i le taimi o e mativa ai, ae e te nofo loa i sou fale tele, ma ua silia ma le tasi taavale i lau faletaavale, o le a e manaomia sau puipuiga.

Pe fiafia iai le ti’apolo pe leai, o le a fa’aopoopoina lou manuia ma e saga manuia pea. O le fuafuaga a le Atua mo lou soifua, ina ia e manuia ma o le a fa’ataunuuina lana fuafuaga mo oe, i le suafa o Iesu.

 E ese fili sa feagai ma a’u a o tauave le tofi faife’au, ese fili sa feagai ma a’u ina ua tofia a’u e avea ma le Ta’ita’I Aoao o le Ekalesia. O le maualuga e te ‘ausia o le tetele fo’i lena o fili o le a feagai ma oe. E le o se tala lenei e avea ma taufaamata’u ia te oe, a ia tapena ai lou loto e te tau ai ma le fili ina ia ‘aua ne’i faate’ia ai oe.

O le maualuga o se fale, o le loloto fo’i lena o le faavae e mana’omia, ina ia mafai ona ta’uaveina le mamafa o le fale.          O le taimi sa ou fa’aogaina ou te tatalo ai, a o avea a’u o se faife’au e matua laititi pe a fua i taimi ou te tatalo ai ina ua tofia a’u e avea ma Ta’ita’i Aoao o le Ekalesia. Afai e te fia ‘ausia tofiga maualuluga o le olaga nei,  ia saunia lou tagata e te alu i le mea e pito sili ona loloto, ma le Atua.    

O le maualuga e te fia ‘ausia i lenei soifuaga o ‘iina e fuaina ai le loloto e tatau ona e ‘ausia ma le Atua, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 15 ME 2023

Manatu Autu:  Saoloto mai saisaitiaga tau tupe (Freedom from financial Captivity)

Tauloto – Tusi Paia: Teuteronome 28:12 ‘E tatala mai e le ALI‘I lana tu‘ugā‘oloa lelei ma oe, o le lagi lea, e foa‘iina mai ai o le timu i lou nu‘u i ona po e tatau ai, a fa‘amanuia ai fo‘i mea uma ‘e te faia i ou lima; ‘e te avatu mea i nu‘u e tele, a ‘e te lē nonō atu’. 

Faitauga - Tusi Paia: 2 Tupu 4:1-7

Upu Folafola

E i ai tagata o loo saisaitia I tulaga tau tupe. I le Hakai 1:6, o lo’o taua I le Tusi Paia e mafai ona galue se tagata mo totogi tau tupe ae peitai, e peiseai o lo’o pau I se ato o loo iai se pu. I nisi faaupuga, e mafai e lea tagata ona maua tupe, ae e mou atu lava. E iai tagata e mataituina lelei le faaaluina o le tupe ae peitai e ofo po’o fea ua alu uma iai le tupe on aua leai se mea o totoe. Ou te malamalama lelei I lenei tulaga ae ou te lei feiloai ma le Alii o Iesu Keriso, na faapena tonu lava le tulaga na ou iai. E iai agaga ma malosiaga e galulue mai ina ‘aua lava nei maua ni taui lelei o tupe o lo’o e maua, peitai o lena tulaga e gata I le aso, I le suafa o Iesu. 

E tusa ma le Faaaliga 3:7, o Iesu Keriso o loo ia te ia le ki a Tavita ma o mea uma na te tatalaina, e le mafai e se tagata ona tapunia, ae o so’o se mea e na te tapunia, e le mafai e se tagata ona tatalaina. O le aso, o le a ia tapunia le faitotoa iai latou o loo aveina au tupe ma ia tatalaina le faitotoa o faamanuiaga mo oe, I le suafa o Iesu. 

O le nofo aitalafu, o le saisaitia lea tulaga, ae e mafai e lo’u Atua ona faamamaina aitalafu I totonu o le luasefulufa itula (Faataoto 22:7). E iai se tasi o o’u atalii na sau I le fonotaga a paaga a le Ekalesia ma sa ou tatalo o leisi taimi ou te vaai ai ia te ia, o so’o se aitalafu o loo faamauina I lona igoa o le a totogiina uma. Na ia faapea mai ‘Amene’ ae sa ia manatu e faigata ona talitonu iai. I ni nai aso mulimuli ane, o le pule o faletupe sa nofo aitalafu ai ua valaau mai ia te ia ma fesili mai ‘e faapefea ona e totogiina lau aitalafu?’ Na tali atu lou atalii , ‘Lau afioga, tusa pe ou te totogiina se tupe tele mo aso uma o totoe o lo’u olaga, e le taitai ona lava ma maea ai ona totogi le aitalafu ma e tatau ona e iloa’. Ua 50 tausaga o lona soifua. E lei leva ni nai aso, ae tusi esea e le faletupe lana aitalafu. Afai o lo’o iai ni aitalafu o loo faamauina ia te oe I le taimi nei, ou te folafola atu, o le a faamamaina I totonu o le luasefulu fa itula I le suafa o Iesu. 

E iai nisi o taimi, e le faapea e na o se tagata se toatasi o loo saisaitia, ae aofia ai le aiga atoa. Ana le seanoa le Atua I totonu o le aiga o le au Adeboye, e leiloa pe o lo’o avea pea lo matou aiga o se aiga pito sili ona matitiva I totonu ole matou nuu I le aso. Sa le mafai e ou matua ona totogi la’u aoga, ae o le Atua Silisili Ese na ia saunia mea uma ou te aoga ai ma o’o atu ina maua le faailoga pito maualuga o le PHD ma ia siitia pea a’u I luga e faifai pea. O le aso, I le alofa tunoa o le Atua, o le aiga o Adeboye ua avea ma faamanuiaga I lo matou nuu atoa. Afai e mativa lou aiga, e mafai e le Atua ona siitia lou aiga mai le tulaga mativa I le suafa o Iesu. 

Tatalo

Tamā, fesoasoani mai I lo’u aiga ma ia faamamaina uma aitalafu ma faamanuia I lo’u aiga ia faulai ina ia avea I matou ma faamanuiaga I nisi o tagata e toatele I le suafa o Iesu Keriso, Amene.

OPEN HEAVENS

MATALA LE LAGI MO LE ASO SA 14 ME 2023

Manatu Autu:  Saoloto mai saisaitiaga o le mafaufau (Freedom from Mental Captivity)

Tauloto – Tusi Paia: Efeso 1:18 ‘Ia fa‘apupulaina mata o ‘outou loto, ‘ina ‘ia ‘outou iloa le uiga o le fa‘amoemoe ‘ua i lona vala‘au mai, ma lē uiga o le faulaigamea lelei o i lana tofiga ‘ua silisili mo le ‘au pa‘ia.

Faitauga - Tusi Paia: 2 Korinito 3:12-18

Upu Folafola

E i ai tagata o loo saisaitia fa’ale mafaufau. O le lelei o le mafaufau o lea tagata ua osofaia ma faaleagaina. Fai mai Efeso 4:18 o nisi tagata ua faapouliuligia o latou mafaufau e lē malosi o le pouliuli. Afai e taumafai se tasi e faamalamalama se mea iā te oe ona faafuasei lea ona e malamalama e te faapea atu. “Oi lea ua o’u iloa.” E te lē o talanoa faatatau I ou mata fa’ale tino a’o o’u mata fa’ale mafaufau.

Sa ou galue i le a’oa’oina o le poto salalau mo se taimi umi a’o le i valaau le Atua iā te a’u ou te galue tumau i lana galuega ma ou te iloa le tigā o tamaiti aoga o e suesue punoua’i mo suega peita’i e i’u ane lava e lē pasi. E mafai ona saunia ma tapena lelei se tagata a’oga ma ua saofa’i o le a amata le suega ae solo atoa lona mafaufau ma galo mea uma. Sa tupu muamua iā te a’u a’o lei i ai so’u faailoga. Na ou taunuu i le potu suega mo se tasi o a’u mataupu o’u te fiafia i ai ae solo atoa loa ma lo’u mafaufau ma galo mea uma. Sa lē mafai ona o’u malamalama i se fesili se tasi o fesili e valu o le suega. O nei fesili e valu e filifili mai ai ni au fesili se lima e tali. O le taimi lea ua tonu i lo’u loto o le a ou alu ese ma le suega, ou te tu atu i luga o le a o’u alu ae ou faalogoina peiseaī se lima o se tagata ua toso a’u I lalo. Ou te le’i faaolaina I le taimi lea ae ou te iloa o le Atua Silisiliese le tagata lea. Sa ou nofo mo le 15 minute, sa o’u maitaulia a’u uo o faaauau pea le suega, a’o le mafai pea ona mafaufau pe manatua se mea. E lei umi ae o’u toe faitau atu i fesili o le suega ma o le taimi lea ua toe pupula lo’u mafaufau ma ua o’u malamalama i le suega. Sa o’u talia uma fesili e valu o le suega, ma tusi se faaupuga faapea i le pito i luga o la’u pepa tali mo lo’u faiaoga, “togi na o fesili e lima.” Ou te iloa o le Atua Silisili ese na ia aveesea le tali pupuni sa poloka ai lo’u mafaufau.

Afai ua tu’u e le tiapolo se ufimata e poloka ai lou malamalama e aveesea e le Atua i le asō I le suafa o Iesu.

Sa i ai se tamaititi e vaivai lava lona mafaufau I le aoga, ina ua si’i mai le vasega toa 10 i le vasega 30 tamaiti na faapena fo’i ona suia lona tulaga i le vasega mai le tu 10 i le tu 30. O ona matua o ni polofesa faiaoga i se tasi Iunivesite. Ina ua o’u alu atu mo se polokalame i lea Iunivesite sa omai nei matua ma si a la tama mo se tatalo. Sa matou tatalo ma e fai ifo le isi suega ua sili ai le tamaititi lenei. Sa tete’i ona faiaoga ma fai mai e lē mafai ona tupu lea tulaga, sa o latou faanofo esea le tamaititi mai le vasega ma toe fai lana suega, e uma ifo ua atili lele maualuga togi o le tama lenei. O’u te tatalo mo oe o lo’o faafofoga mai pe faitau I lenei faamalosi po’o le a lava se mea o faalavelave i lou mafaufau e le o mafai ai ona galue i lona lelei atoatoa e tatau ona i ai, ia aveesea I le taimi nei i le suafa o Iesu.

Tatalo

Tamā faamolemole faaumatia so’ose mea o polokaina ma faalavelave I lo’u mafaufau I le taimi nei i le suafa o Iesu Keriso, Amene.

OPEN HEAVENS

MATALA LE LAGI MO LE ASO TOONAI 13 ME 2023

Manatu Autu:  Saoloto mai saisaitiaga o le tino (Freedom from Physical Captivity)

Tauloto – Tusi Paia: Isaia 53:5 ‘A ‘ua manu‘a o ia ‘ona o a tatou solitulafono, ‘ua momomo o ia ‘ona o a tatou amio leaga. O le a‘oa‘iga e filemū ai tatou sa i ona luga lea, o ona fa‘alavalava fo‘i ‘ua mālōlō ai tatou.’

Faitauga - Tusi Paia: Luka 3:11-17

Upu Folafola

Fai mai le tusi o Luka 11:21-22 a leoleoina e le tagata malosi lona fale ona saogalemu ai lea o ana mea. Ae afai e oso atu ia te ia le tasi e sili atu lona malosi ona manumālō ai lea iā te ia. O Iesu Keriso e sili atu lona malosi. E malosi atu na i lo’o lē e sili ona malosi.

I le tatou faitauga mai le Tusi Paia o le asō o loo faamatala mai ai se fafine sa maua i se ma’i mo le sefuluvalu tausaga. E ui sa ia taumafai malosi e tu sa’o I luga e le’i mafai aua o lona ma’i e lē fa’aletino ae fa’aleagaga. Sa ia te ia le agaga e vaivai ai. A na lē fa’asa’olotoina ia mai le agaga o le ma’i e le mafai ona tu sa’o talu mai tausaga e sefulu ma le valu.

E tele gasegase e le mafai e foma’i faapitoa sili ona popoto o lenei lalolagi ona togafiti. O le mafuaaga, ona o le pogai o le tele o nei gasegase e fa’aleagaga ma e o’o i masini aupito lelei latou te lē mafai ona fa’aali mai temoni o loo i ia ma’i. A lē maua le a’a o le faafitauli e faigata fo’i o na maua se fofō. A e faalogo faapea o se gasegase tulaga ese ma e lē iloa le pogai ma se togafiti e fai i ai ona e iloa lea o se faafitauli fa’aleagaga. Afai o e mafatia i se ma’i, e fa’asa’oloto nei oe i le asō i le suafa o Iesu.

E i ai le isi ituaiga pologa o le tino e afua mai i le taimi na fanau mai ai i le lalolagi. O nisi e soifua mai ma ma’i e leai se togafiti po o se fofō e mafai i ai. Afai e fanau mai se isi ma le ma’i sela po’o le toto vaivai mo se fa’ata’ita’iga, pau le togafiti a foma’i e fai o le aumai o fualaau e fesoasoani i le tigā. Peita’i o le Atua o lē na faia le tagata e mafai ona ia faia itutino fou mo i latou ua manaomia. I le Mareko 10:43-52 o lo’o faamatala mai ai Patimaio le tauaso sa feiloai ma Iesu i se tasi aso ma faapupulaina ai ona mata. O loo o’u talitonu i le Atua mo oe, po’o le a se vaega o lou tino ua faaletonu ma o lo’o manaomia le faamalologa, ia suia faapei o se itutino fou I le suafa o Iesu.

Sa i ai se tinā mauoa sa lē sao sa na meaai, so’o se meaai na te tausamia e toe pua’i uma. (tulou) Sa toatele ni foma’i i soose itu o le lalolagi na alu I ai peita’i sa leai se suiga. E taunuu atu i se tasi o a matou polokalame a le Redeemed Christian Church of God ae fetaui ma lo’u faapea mai “Alaga Aleluia” Sa tatala lona fofoga e alaga ae oso mai I fafo se anufe mai lona fofoga (tulou) ma malōlō ai i le taimi lava lea. E mafai ona faamalōlō oe e le Atua mai so’o se gasegase ua lē mafaia e foma’i ona togafiti pe afai e te pa’i atu iā te ia e ala i lau viiga i le asō.

Tatalo

Tamā faamolemole ia liaina uma i luga so’ose laau e te le’i totōina o i lo’u olaga I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 12 ME 2023

Manatu Autu:  Fesoasoani Mai Le Atua 3 (Divine Help 3)

Tauloto – Tusi Paia: Mataio 19:26 ‘Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”’

Faitauga - Tusi Paia: 2 Nofoaiga Tupu 20:1-25

Upu Folafola

E fesoasoani le Atua ia te oe tusa pe foliga mai ua tetee mea uma ia te oe ua tau le mafai ona tatali. Afai e finagalo iai,  e faaali atu ia te oe, o Ia o le Atua e foai mai mea uma. I le Isaia 43:13, o loo fetalai mai le Atua matautia, e le mafai e seisi ona taofia o ia pe afai e finagalo e faatino se mea. I nisi faaupuga, e le afaina pe fia ni malosiaga o loo faasagatau mai, afai e finagalo le Atua e fesoasoani atu ia te oe, e leai se mea e taofia o ia. 

I le Tanielu 3, ina ua lafoina Sataraka, Mesako ma Apeteniko I le ogaumu e mumu ai le afi, na toe tafu le ogaumu e faafitu atu le aasa ma le vevela, peitai e pau tagata na feoti o fitafita na lafoina I latou I totonu. Ao tagata na lafoina I totonu o le ogaumu, na o mai I fafo o loo soifua pea. I le tusi o Faamasino 15:11-15, fai mai na o atu le aiga o Samasoni ma avatu o ia I o latou fili, peitai e maea ane le aso, na fasiotia uma le faitau afe o ona fili, a’o nisi ua ausulusulu solo. E le afaina pe toafia ni ou fili o lo’o lua feagai, e fesoasoani le Atua ia te oe, e tau ma I latou I le suafa o Iesu.

O lo’u Atua ua na o ia e saunia se ala tusa pe foliga mai ua leai lava se ala. Afai la ua foliga mai ua leai lava se ala, e saunia e le Atua le ala mo oe. E iai se aso sa ou iai I atunuu I fafo, ae ua logo atu a’u e iai se tasi o o’u atalii faaleagaga o lo’o I le falemai ua maua I le ma’i o le kanesa ua tigaina. I le manatu faaletagata, ua leai se faamoemoe. Na ou alu ma asiasi ia te ia I le aso Toonai ma tatalo mo ia. E o’o atu I le aso Lulu o le vaiaso na sosoo ai, ua te’a I tua ma le falemai lo’u atalii. O le matagofie o lenei tala, e o’o I tagata uma na iai I le vaega o le falemai lea na ou tatalo ai, na tetea uma I tua.

E iai foi se tala o se fafine na ta’u iai e fomai e 99.99% e ono maliu ai ona o se ma’i. Ua le mafai ona ou alu I le falemai I lea taimi o lea na ou tatalo ai I luga o se solosolo ona auina atu lea ia te ia. Na faaaogaina e le Atua le 0.01% pasene na totoe e faasaoina ai lona ola. Na ia tusia se tusi ma ua faaigoaina ‘Laveai mai le gutu o le tuugamau’ ua tusia ai lana tautinoga ma lona faamalologa mai le Atua. Ou te leiloa poo le a le tugā o lau mataupu, e leiloa pe ua uma faamoemoega uma e faatatau ia te oe, ae ou te folafola atu, e saunia e le Atua se ala mo oe I le aso, I le suafa o Iesu,

Tatalo, 

Tama, e leai se mea e faigata ia te oe. Faamolemole afio mai e laveai ia te a’u I le aso, I le suafa o Iesu Keriso, Amene.