Samoan Devotional

OPEN HEAVENS

MATALA LE LAGI MO LE ASO GAFUA 1 ME 2023

Manatu Autu:  E mafai e le Atua ona siitia so’o se tagata (God can promote anyone)

Tauloto – Tusi Paia: Salamo 113:7-8 ‘7Na te fa‘atula‘iina mai le tagatalautele nai le efuefu, na te fa‘aeaina lē ‘ua mativa nai le fa‘atafuna; 8‘ina ‘ia fa‘anofo fa‘atasi o ia ma ali‘i, o ali‘i lava o lona nu‘u.

Faitauga - Tusi Paia: Salamo 75:5-7

Upu Folafola

O loo taua mai le tatou faitauga o le Tusi Paia I le asō, o le Atua o ia e na te siitia le tagata. E na o le Atua e na te siitia ma faaeaina se tagata, e le mafai e seisi tagata, e o’o I alii o le nuu ma le atunuu. O lou taumafai e siitia oe ma maua ni faalupega o ni taitai e lē tutusa ma le siitia. O Saulo sa faalupe pea o le tupu mo ni tausaga ina ua maea ona teena o ia e le Atua ae faau’u Tavita e sui ai o ia. O le tulaga lea na matua le mafai ai ona ia faia se mea e faatoilalo ai Koliata a’o Tavita na faauuina e sui ai o ia, na ia faatoilalo le sauai. Afai e te faitau le 1 Samuelu 18:7, e te iloa ai mai pese a fafine ma tamaiti, e sili atu lo latou manatu ia Tavita I lo Saulo e ui o loo faalupe pea Saulo o ia o le tupu. 

O lenei la ua manino e na o le Atua e mafai ona ia siitia ma faaeaina se tagata, o leisi fesili: ‘o ai tagata e masani ona filifilia e le Atua e siitia ma faaeaina? Fai mai le 1 Samuelu 2:7-8 e faapea:

7O le ALI‘I na te fa‘amativaina ma fa‘atamao‘āigaina; o ia na te fa‘amaulaloina ma fa‘amaualugaina. 8Na te fa‘atula‘iina le tagatalautele nai le ‘ele‘ele, na te fa‘aeaina fo‘i le tagata mativa nai le fa‘atafuna. ‘Ia nofo fa‘atasi ma ali‘i, ‘ia fai fo‘i mo latou tofi le nofoāli‘i mamalu. Auā o lo‘o i le ALI‘I fa‘avae o le lalolagi, ‘ua na fa‘ae‘e ai le atu laulau.

E mafai e le Atua ona filifilia se tagata mativa mai le faatafuna ma amata ona siitia o ia seia o’o ina aai faatasi ma tupu. E mafai e le Atua ona siitia ma faaeaina so’o se tasi, ma o la’u tatalo mo oe I le asō, ia vave ona o’o mai lou faaeaina I le suafa o Iesu. E leai ma se tagata e le mafai e le Atua ona faaeaina. Tusa lava po’o le a le maualalo o lo’o iai lou tulaga I le taimi nei, e mafai e le Atua ona siitia ma faaeaina oe I se tulaga maoae le maualuga e sili atu I manatumanatuga o tagata o le lalolagi atoa, e ofo ai pe a faalogo I lou talaaga. Afai e te naunau e siitia oe e le Atua, e tatau ona avea oe o se tagata e faia lona finagalo pe a o’o I le taimi e faaeaina ai oe. 

22‘Ua na ‘ave ‘ese fo‘i ‘iā te ia, ‘ona fa‘atūina lea e ia o Tavita e fai mo latou tupu; ‘ua ia molitino fo‘i ‘iā te ia, ‘ua fa‘apea ane, ‘‘Ua ‘ou maua Tavita le atali‘i o Iese, o le tagata e tusa ma lo‘u nei loto, na te faia o mea uma lava ‘ou te mana‘o i ai.’ Galuega 13:22

E mafai ea e le Atua ona faataunuuina lona finagalo e ala ia te oe pe a maea ona ia siitia ma faaeaina oe? Afai o lau tali o le ‘ioe’, sauni loa mo le faaeaina e tuufaatasia e le Atua. 

E te faia ea le finagalo o le Atua I taimi uma? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 30 APERILA 2023

Manatu Autu:  Pulea lou tagata (Dominion over yourself)

Tauloto – Tusi Paia: Faataoto 25:28 ‘O le tagata ‘ua lē mafai ona ia pulea lona loto, ‘ua pei o le ‘a‘ai ‘ua fa‘atafunaina, ‘ua leai ni ona ‘aupā...

Faitauga - Tusi Paia: 1 Korinito 9:24-27

Upu Folafola

Na faia e le Atua le tagata I lona faatusa ina ia mafai ona ia te ia le pule (Kenese 1:26). O le tulaga lea e te ono silafia ai e leai se manu I le lalolagi atoa e lei pule e se tagata, liona, elefane ma isi manu faapena. Ia e maitau lelei mai le itu lenei, o le tagata o lo’o iai le pule , o le tagata lea ua mafai ona ia pulea lona lava tagata. E mafai ona e pulea manu, manu felelei ma meaola uma I le sami, ae a le mafai ona e pulea lou tagata, e pei oe o se aai ua faatafunaina ua leai ni ‘aupa (Faataoto 25:28). 

Sei o tatou suesue I nisi o vaega o le tino e tatau ona e pulea. O lo’o faapea mai le 1 Peteru 3:10, afai e te fia soifua umi ma e maua se olaga fiafia, taofiofi le laulafaiva ma ia pulea lelei. E  ese ma le matautia o le laulaufaiva e  faigata ona taofiofia (Ioakopo 3:5-8) ae e te mafai mea uma I le faatasi mai o Keriso e faamalosiau Ia te oe (Filipi 4:13). 

O lo’o faapea mai le Tusi Paia e tatau ona e pulea lou laualo. O loo faamalosiau mai le Filipi 3:19 ia aua lava nei avea le laualo ma le atua o se tagata. Afai e te faapea mai e te pulea mea uma ae le mafai ona e pulea lou laualo, e le mafai ona e anapogi, e le mafai ona e pulea aua o loo iai se atua ese I totonu ia te oe. E iai le muagagana faa Aferika e faapea ‘E leai seisi atua e pei o le laualo, e manao I se taulaga I aso uma’. E tatau ona e pulea lou laualo. 

E tatau foi ona e  pulea le moe. Afai o lo’o e faapea mai o lo’o ia te oe le pule, e tatau ona faia sau faaiuga e faapea:  ‘ou te le moe I le po lenei ae sei faia sau mafutaga ma le Atua’. Fai mai le Faataoto 6:9-11, afai e le mafai ona e pulea le moe, e vave ona e o’o atu I le mativa. 

E tatau ona pulea lelei lou tino, o mata, o lima ma vaega faapena. E iai lava mea e le tatau ona e vaai pe tago foi iai, nofoaga e le tatau ona e alu iai, o musika e le tatau ona e faalogo iai. Afai e te naunau ia maea lau tausinioga o se kerisiano I le manuia, e tatau ona pulea lou tino (1 Korinito 9:24-27). 

Tatalo

Le Alii e, faamolemole fesoasoani mai ia te a’u ina ia ou pulea ma le atoatoa so’o se vaega o lo’u olaga ma lo’u tino, i le suafa matautia o Iesu Keriso. Amene.

OPEN HEAVENS

MATALA LE LAGI MO LE ASO TOONAI 29 APERILA 2023

Manatu Autu:  E te manaomia le fa’au’uga (you need the anointing)

Tauloto – Tusi Paia: Salamo 45:7 ‘Ua e finagalo i le amiotonu, ma ē ‘ino‘ino i le amio leaga; o le mea lea ‘ua fa‘au‘uina ai oe e le Atua, o lou Atua lava, i le suāu‘u o le fiafia, e sili lava i ē tou te fa‘atasi..

Faitauga - Tusi Paia: 1 Ioane 2:27

Upu Folafola

O le fa’au’uga e mafai ona fa’amatalaina o le eletise fa’alelagi. O lea faamatalaga o le ā fesoasoani e te malamalama ai i le tāua o le fa’au’uga. Afai o se tagata o loo ia faia le agasala ae fa’au’uina, e faaumatia e le fa’au’uga lea uso aua a e faatamala ma lē faaeteete I le eletise e te sipakā. O Samasoni sa maualuga le fa’au’uga sa iā te ia peita’i na feofeoa’i ma fafine talitane. O se auauna a le Atua e ola mulilua, ua ia tapena ia lava mo le fa’afanoga. I se isi faaupuga a tu’u faatasi le fa’au’uga ma le agasala e fanau mai ai le oti, a’o le fa’au’uga ma le olamamā e tutupu ai taunuuga manuia.

Fa’ata’ita’iga o le fa’au’uga sa i luga o Aperaamo, o le tamāoaiga. ( Kenese 22:17-18) sa augātupulagā aua sa ia a’oa’oina lana fanau i ala o le Atua. (Kenese 18:19). Na faamanuiaina Aperaamo, na sili atu le manuia o lona atali’i o Isaako ae na silisili atu le manuia o Iakopo le atali’i o Isaako. Na fa’aauau e Iosefa le atali’i o Iakopo le fa’au’uga ma e na tulaga ese fo’i le fa’aaogaina o ia e le Atua.

E manaomia e Kerisiano le fa’au’uga e faatino ai le finagalo o le Atua i o latou olaga. Atonu ua e faafofoga I le tala I tagata e toalua sa o laua usuina le Salamo 23, o le tasi o se tagata pese lauiloa, sa patipati uma tagata I le matagofie o lana pese. O le isi o se tamā matua na ia usuina le Salamo lava lea e 23 ma a’o usuina le pese na to’otutuli tagata uma ma vivi’i i le Atua. O le isi na pese i lona siufofoga matagofie e masani ona pese ai, a’o le isi na pese ma le fa’au’uga ma o taunuuga o nei pesega e lua e eseese. O lea afai o oe o se tagata pese, e matua’i e manaomia le fa’au’uga. Ua faailoa mai fo’i i le Salamo 24:3-4 ituaiga tagata e tula’i i le mamalu o le Atua, o lona uiga e manaomia fo’i e i latou e faasinoina tagata i o latou nofoaga (ushers) le fa’au’uga. O tagata tatalo latou te mana’omia le fa’au’uga aua fai mai Roma 8:26 e fesoasoani le Agaga Paia ia tatou tatalo.

O lo tatou Alii o Iesu sa fa’au’uina I le Agaga Paia a’o le’i amatalia lana galuega (Galuega 10:38) Afai e le’i faia e le Alii se vavega e tasi vaganā ina ua afio ifo le Agaga Paia i ona luga, e te lē mafaia fo’i la ona fai se galuega e tasi e aunoa ma Agaga Paia. E te manaomia Agaga Paia.

Tatalo

Tamā faamolemole auina mai lou Agaga Paia e pulea vaega uma o lo’u olaga i le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 28 APERILA 2023

Manatu Autu:  Ia susulu atu lou malamalama (Let your light shine)

Tauloto – Tusi Paia: Mataio 5:16 ‘Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.

Faitauga - Tusi Paia: Galuega 13:42-52

Upu Folafola

I le tusi o Ioane 9:5, o loo fetalai Iesu Keriso ‘Manū ‘ou i ai i le lalolagi, o a‘u o le malamalama o le lalolagi’. O loo ia fetalai foi I le Mataio 5:14“O ‘outou, o le malamalama o le lalolagi. E lē mafai ‘ona lilo le ‘a‘ai ‘ua tu i luga o le mauga”. Afai o oe o se atalii poo se afafine o le Atua, o lona uiga e te agavaa e avea ma malamalama. Na faaopoopo atu le isi fetalaiga a Iesu e faapea ‘Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi (Mataio 5:16).

O so’o se mea e faia e le Atua, e na te faia ma le lelei atoatoa ma maoae. O lona uiga o lona malamalama e uiga ese ma matautia. E finagalo foi o ia e te susulu atu ia maoae. E finagalo le Atua e te susulu atu e pei o Iosefa. I le Kenese 41:1-44, ina ua maea ona faamatala e Iosefa miti a Farao, fai mai tagata “Pe tatou te maua ‘ea sē tusa ma lenei tagata, o lē ‘ua i ai le Agaga o le Atua.” O loo finagalo le Atua e te susulu atu e pei o Mose. I le Numera 12:3, fai mai le Tusi Paia e leai seisi tagata e loto faamaualalo e pei o Mose. Na susulu atu lona loto maualalo. E finagalo le Atua e te susulu atu e pei o Tepora. I le tusi o Faamasino 4:1-14 ina ua oo I le taimi e o atu ai I le taua, na faapea mai le taitaiau, ‘ou te le alu seiloga e alu Tepora’ ona alu atu lea o ia ma le autau. 

E finagalo le Atua ia tatou susulu atu e pei o Tanielu. I le tusi o Tanielu 6:1-3, fai mai le Tusi Paia e toatolu isi tagata na filifilia e taitai I ofisa uma o le malo, ae na pito sili ona maoae atu le galue a Tanielu iai latou uma. Ua ia te ia le agaga o le atamai tele, ua susulu atu o ia. 

I o tatou tulaga o kerisiano, e tatou te susulu atu pe afai tatou te talai atu le talalelei ma suia tagata I le amiotonu e ala I le mana o Agaga Paia. I le Galuega 6:1-8, e iai tagata na filifilia e avea ma uluai tiakono ae a ou fesili atu ia te oe I le aso, O ai Pokono? O ai Nikanora? O ai Timona? E mautinoa e te faapea mai ‘ou te leiloa’. O I latou o se vaega o le uluai toafitu o tiakono na filifilia ae peitai e lei susulu atu. Na filifilia oe e le Atua ia e susulu atu. Ia e susulu atu pea ia maoae ina ia maualuga ai pea le viiga o le Atua I lou olaga. 

Tatalo

Tama e, faamolemole ia ou susulu atu pea mo oe I taimi uma, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 27 APERILA 2023

Manatu Autu:  O oe ea o se molimau? (Are you a witness?)

Tauloto – Tusi Paia: Mataio 5:16 ‘Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.

Faitauga - Tusi Paia: Mareko 16:15-18

Upu Folafola

Na fetalai le Alii Faaola o Iesu Keriso, o poloaiga uma mai le Atua e mafai ona aoteleina i vaega e lua: Muamua, e tatau ona e alofa atu i le Atua ma lou loto atoa, o lou agaga atoa ma lou manatu atoa ma lona lua, ia e alofa atu i le lua te tuaoi ia pei o oe lava ia te oe ( Mataio 22:37-40 ). E ui i le faigofie ona e faapea, “Ou te alofa i le Atua, ae o le vaega e faaalia moni ai lou alofa i le Atua, o lou usiusitai lea i ana poloaʻiga uma(Ioane 14:15 ). E le mafai foi ona e fai atu, e te alofa i lou tuaoi, ae e aunoa ma le faaalia mai i au amioga.

O so’o uma o Iesu, ua maea ona tofia e talaʻi atu le talalelei i tagata uma lava (Mareko 16:15) o lea, afai e te alofa moni i le Atua ma ou tuaoi, o mea uma e te faia, e tala’i atu lea ia i latou, o faamatalaga uma e faatatau ia Iesu. O lo’o tatou fiafia lava ia Keriso I le taimi nei aua sa talai mai e nisi o ia ia’i tatou.

Ua aoaoina I tatou, o Iesu e na te amoina avega (Mataio 11:28). E toatele i tatou na o mai ia Iesu ona o a tatou avega. E leai se malosi e mafaia ona tosoina a’u i le fale o loo ta’ua o le laumua o le Ekalesia Redeemed Christian Church of God, pe ana leai se faafitauli tele sa ia te a’u. Na valaaulia aʻu e se tasi o le aulotu ma na ia faapea mai, “E tauave e le Alii o Iesu lau avega”. Ou te lei mafaufauina lava ou te ono tapuai i se tamai faletapua’i e fausia i laupapa, nai lo se malumalu tele, pe ana leai le avega na ou tauaveina.

Tala’i atu i au uo, o le Atua o Lē sili ona foai. O lo’o faapea mai le tusi a Filipi 4:19A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu. Tala’i atu i au uo, o Iesu Keriso o lou malosi lea. E mafai ona ia fesoasoani ia te oe ma tuuina atu ia te oe manuia uma, aua e mafai ona e faia mea uma e ala ia Keriso o le na te faamalosi ia te oe (Filipi 4:13). 

E tusa ai ma le finagalo o le Atua, e le faapea e lua ni tulaga ma le Alii. A le alofa ia te ia, e inoino ia te ia. Afai e te alofa ia te ia, o le a e alofa i ou tuaoi, talaʻi atu ia I latou mea uma o lo’o e silafia e uiga ia Iesu. 

Tatalo

Le Alii e, faamolemole foai mai ia te au le alofa tunoa ma le malosiaga e mafai ai ona ou molimau atu ma le atoatoa mo oe I taimi uma, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 26 APERILA 2023

Manatu Autu:  O ai lou ulu? (Who is your head?)

Tauloto – Tusi Paia: Kolose 1:18 ‘O ia o le ulu o le tino, o le ekalesia lea; o le amataga fo‘i o ia, o le ulumatua o ē ‘ua oti, ‘ina ‘ia fai o ia ma fa‘asilisili i mea uma lava.’

Faitauga - Tusi Paia: Efeso 4:1-12

Upu Folafola

Ua silafia uma e le toatele o le Ekalesia e mo I latou ua valaauina e le Atua. O Keriso o le ulu o le Ekalesia aua o le tulaga pito sili ona taua o se tagata o le ulu. E pito sili ona taua le ulu aua a manaomia se ata mo se tusi folau, e pau le mea e manaomia o le ata o le ulu. O le fatu, fatugao ma le ate (tulou), o totoga ia e mafai ona suia mai se tasi tagata, ae e le mafai ona suia le ulu. 

O Keriso ea lou ulu? Afai o lau tali o le ioe, o ia ea o lau vaai? O mata o se vaega taua tele o le ulu ma ua tatou iloa le taua tele o le maua o le vaai. Afai e leai se sulu ma leai se valoaaga, e faasalalauina le nuu (Faataoto 29:18). O Keriso ea lau faalogo? Afai o Keriso lau faaolgo, o lona uiga e tupu pea lou faatuatua aua o loo faapea mai le Roma 10:17, e tupu le faatuatua I le taulogologo atu, o le taulogologo atu fo‘i o i le afioga a le Keriso lea. O le upu o Iesu Keriso (Ioane 1:1,14). 

Ona o’o atu lea I le isu. E taulia mea e te manava I totonu ma aumai I fafo e pei ona tusia I le Galuega 17:28 Auā ‘O ia o lo‘o ola ai i tatou, ma gāoioi ai’. O lo’o e ola ma soifua o se kerisiano pe afai o loo e manava I totonu ma fafo Keriso. 

O ai e pule I lou mafaufau? O a mea e te faataga e alu iai lou mafaufau? Fai mai le Faataoto 23:7 7Auā e pei ‘ona manatu o ia i lona loto, ‘ua fa‘apea lava o ia’. Fai mai le Filipi 4:8 o ituaiga mafaufauga e tatau ona tatou maua, o mea uma ‘ua moni, o mea uma ‘ua ta‘uleleia, o mea uma ‘ua tonu, o mea uma ‘ua mamā, o mea uma ‘ua matagofie, ma mea uma ‘ua logoleleia.

O ai e pule I lou gutu? O a mea e te ai ai? O ai e te viia? O le Atua po’o tagata? Fai mai le Ioane 4:24O le Atua o le agaga lava ia; o ē tapua‘i ‘iā te ia, e tatau ‘ona tapua‘i atu ai i le agaga ma le fa‘amaoni.” E faapefea ona e tatalo? O ai e pule ia te oe I le tatalo? Fai mai le Ioane 14:14‘Āfai tou te ole atu i se mea i lo‘u igoa, ‘ou te faia lava.

E avea oe ma kerisiano manuia pe afai o Keriso o lou ulu, o lē pule ai. O le tatou tatalo e tatau ona faapea, ‘Keriso, faamolemole avea oe ma ou ulu, aua foi e manuia mea uma ona o le ulu, e mafai ona e fofoina so’o se mea I ou luma. Afai e iai se faaletonu I le ulu, e faaletonu uma ai ma isi mea. 

Tatalo

Le Alii e, faamolemole ia avea oe ma o’u ulu e amata atu nei, I le suafa o Iesu Keriso, Amene.

OPEN HEAVENS

MATALA LE LAGI MO LE ASO LUA 25 APERILA 2023

Manatu Autu:  E sili atu I le faauuga (More than the anointing)

Tauloto – Tusi Paia: Salamo 23:5 ‘E te laulau mai mea i le la‘o‘ai ma a‘u, i luma o ē ita mai ‘iā te a‘u; ‘ua e fa‘au‘uina lo‘u ulu i le suāu‘u; ‘ua taumasuasua la‘u ipu.’

Faitauga - Tusi Paia: Salamo 45:7-8

Upu Folafola

A tatou talanoa i le fa’au’uga, e loto foa’i tele le Atua e na te foai mai ma le faulai. Sa fa’au’uina Tavita e le Atua I luma o ona uso i le 1 Samuelu 16:13, ma faapena foi ina ua avea ma Tupu o Iuta i le 2 Samuelu 2:4, e o’o foi ina ua avea ma Tupu ia Isaraelu i le 2 Samuelu 5:3. O lona uiga sa faaauau pea ona sasa’a mai e le Atua lana faau’uga I luga o Tavita.

I le tusi o Galuega 19:11-12, o loo tusia I le Tusi Paia, na matua fa’au’uina e le Atua Paulo e o’o i ona solosolo sa mafai ona maloloina ai tagata mama’i. I le tusi o Galuega 5:15 na matua fa’au’uina e le Atua Peteru i se tulaga maoa’e, e aafia so’o se mea e paū iai lona ataata. I sa’u malaga i Amerika e asiasi se tasi o la’u fanau, na ou vaai ai ini fafine se to’afa o feoa’i I totonu o le umukuka. Sa ou manatu pe aisea o manaomia ai e lona to’alua ia tagata e toatele e kukaina sa’u mea‘ai. Ae ou te le’i iloa o fafine ia sa latou faatuatua I le Atua ina ia mauaina ni a latou fanau. Ui i lea, ina ua uma ona ou ‘ai, ua ou alu lea. Ina ua ou malaga ese, sa auaua’I uma fafine nei ma nonofo taitasi I le nofoa na ou nofo ai. Ina ua tuanai le 9 o masina, o le to’atolu o i latou ua manuia ma ua tauaveing ni pepe, a’o le to’atasi sa fanau i le tolu masina mulimuli ane. E amata atu I le aso, o so’o se mea e te savalivali ai o le a faauuina, i le suafa o Iesu.

Afai e te fia maua le fa’au’uga faapea, e tatau ona e tapenapena e te ola i se olaga e vavaeeseina. E le mafai ona e

nanau ma alofa tele i mea o le lalolagi ma e manatu e te tau’aveina se fa’auuga faapea. O ē ua faauuina I le tulaga ua taumasuasua, e matua masani ma malolosi i le tatalo faapea le suesueina o le Tusi Pa’ia. E pei ona faapea mai Paulo i le 2 Korinito 11:27-28: 27Na ‘ou i le galuega mamafa ma le tigā, o le mataala so‘o, o le fia ‘ai ma le fia inu; o le anapogi so‘o, o le ma‘alili ma le lē lavalavā. 28Tu‘u ia o isi mea, a o le mea e mafatia ai a‘u i aso fai so‘o, o le popole lea ‘ona o ekalesia uma.

E foai e le Atua le ituaiga fa’au’uga faapenei i tagata ua faatauina atu o latou ola ma le atoatoa mo ia. Afai e amata ona e maua le fa’au’uga faapenei, ia mautinoa e te faaaogaina, ina ia ‘alofia ai le tu’uitiitia. E pei ona iai le tulaga e gata ai le ola o ma’a moliuila, o le fa’au’uga e iai le umi e aoga ai. Ia e faaaogaina le fa’au’uga ua tuuina atu ia te oe, mo lona viiga, ina ne’i mamulu ese.

Tatalo

Tama e, faamolemole ia taumasuasua lau fa’au’uga I luga ia te a’u, I le suafa o Iesu Keriso, Amene.

OPEN HEAVENS

MATALA LE LAGI MO LE ASO GAFUA 24 APERILA 2023

Manatu Autu:  E sili atu I le manumalo (More than victory)

Tauloto – Tusi Paia: Roma 8:37 ‘A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou..’

Faitauga - Tusi Paia: 2 Nofoaiga Tupu 20:1-25

Upu Folafola

E loto foai tele le Atua e na te fia foai atu ia te oe le manumalo. E na te avatu le manumalo a’ia’i (Roma 8:37). E na te avatu e lē na o le manumalo, e avatu le manumalo aiai poo le manumalo e faulai. Fai mai Tavita I le Salamo 23:5 e le faapea na avatu e le Atua e na o le manumalo I ona fili uma, na ia saunia foi se laoai mo ia I luma o e uma e ita ia te ia. E ese ma sili atu lea ituaiga o manumalo. 

I le tatou faitauga o le Tusi Paia o le aso, e toatolu ni tupu na faasagatau mai ia Iosefatu, na faaaogaina e le Atua i latou lava e faaumatia I tagata, ma na o’o ina foai uma o latou manuia ia Iosefatu. E lei iai Iosefatu I se taua ae o ia ma ona tagata na latou ‘ae’ae I le manuia o le manumalo ma ua tele le oa ma le tamaoaiga ua latou maua e tolu aso o tau la’u I lo latou atunuu. E o gatasi lea ma le folafolaga a le Atua I le Teuterenome 28:7

E tu‘uina mai e le ALI‘I o ē ita ‘iā te oe o ē laga mai ‘iā te oe ‘ia fasia i ou luma; o le ala e fasi e ō mai ai i latou ‘iā te oe, a o ala e fitu e sōsōla atu ai i latou i ou luma.

O loo faaalia mai e le Atua Silisili Ese aua o lo’o ia fesoasoani ia te oe, o I latou o lo’o tetee ma finau ma oe e fano I latou ma peiseai ua leai (Isaia 41:10-13). Na fetalai le Alii e tau o ia mo ‘oe ao ‘oe e te maua le filemu (Esoto 14:14). O loo faapea mai foi I le Kolose 2:14-15

14‘Ina ‘ua sōloia le tusi o la tatou ‘aitalafu na nofo sala ai tatou i tulafono sa tete‘e mai ‘iā te i tatou, ‘ua ‘ave‘eseina ai fo‘i nai le vaeloto, ma fa‘amauina ai i fao i le satauro. 15‘Ua tu‘u‘eseina e ia o ali‘i sili ma faipule, ‘ona fa‘aalia mai lea o i latou ‘ia iloa uma, ‘ua manumālō o ia ‘iā te i latou i lea lava mea.

E tatau ona e fiafia pe afai o oe o se afafine po’o se atalii moni o le Atua. O I latou e lē iloa Iesu Keriso, e latou te lē iloa mea o lo’o latou misia. O ia o lo’o I totonu ia te oe e sili atu I lē o lo’o I le lalolagi. Afai e te fia agavaa e avea ma I latou e alofa iai ma mafuta ma le Atua, ia e usitai I le Atua (Ioane 14:23). Afai e te fia maua le manumalo I ē ita mai ia te oe e aunoa ma se taua e faia, ia e usiusitai I poloaiga a le Atua. 

Tatalo

Tamā faamolemole aumai ia te a’u le alofa tunoa e usiusitai ai I au poloaiga uma. I le suafa o Iesu Keriso, Amene.

 OPEN HEAVENS
MATALA LE LAGI MO LE ASO SA 23 APERILA 2023

Manatu Autu:  E sili atu I le Uluola (More than Fruitfulness)

Tauloto – Tusi Paia: Filipi 4:6 ‘Aua ne‘i popole ‘outou i se mea e tasi a ‘ia fa‘ailoa atu o ‘outou mana‘o i mea uma lava i le Atua, i le tatalo, ma le fa‘atoga, ‘atoa ma le fa‘afetai.’

Faitauga - Tusi Paia: Salamo 67:5-6

Upu Folafola

O lo’u Atua e agalelei, a finagalo e liliu le leai o se fanau I le uluola na te foai ia i latou ni fanau se toatele. Afai e te lē talitonu mai silasila I le tala iā Hana. I le 1 Samuelu 2:21 na ole ma faatoga atu Hana I le Atua mo se tama se tasi (1) ma faapea fo’i ona ia folafola e toe ofo atu ia i le Atua, peita’i na foai mai e le Atua e lē gata I le tama na ole atu ai ae faapea ma nisi fanau e to’alima. O le tala fiafia mo so’o se tinā ua tā’ua ma faaigoaina e pā, i le 9 masina o lumana’i o le a e sapaia se masaga I le suafa o Iesu.

Ua tele ni ta’utinoga i la matou polokalame i le (RCCG) Redeemed Christian Church of God a nisi na fai i ai fomai e lē mafai ona maua se pepe a ua foai i ai e le Atua se fanau. Sa i ai se tasi tinā sa fai i ai fomai e lē gafatia e lona manava ona tauave se pepe (sei tulou). Sa tusi mai lea tinā iā matou ona matou tatalo lea mo ia, mai le manava o lea tinā o lē na fai i ai fomai e lē gafatia se pepe se tasi (1) na fanau mai ai se masaga 4, poo le 4 pepe I le taimi e tasi. Ou te toe faapea atu e lē afaina poo le a le umi o e faatali mo se tama mai lou manava (tulou) o le a foai atu e lo’u Atua se fanau mo oe i le 9 masina o lumana’i I le suafa o Iesu.

Afai ua fua lou olaga ma e te mana’o e saga fua atili, maitau mai fai mai Ioane 15:1-2 o lā uma e fua e teuteu e le Atua ina ia fua mai atili. Peita’i o le uluola e lē na o le maua o le fanau, e aafia ai fo’i pisinisi, galuega a le Atua ma isi uma vaega o le olaga. E lua ituaiga tagata uluola o i latou e faatupulaia o latou fua faapei o le faaaogaina o le faailoga faaopoopo o le Matematika (addition) ma le faatupulaia I le faailoga faatele (multiplication). Ou te lē iloa iā te oe a’o a’u ou te mana’o i le faailoga faatele na i lō le faaopoopo.

O le mealilo I le mafuaaga o le faateleina o ou manuia o le loto faafetai. A e faafetai i le Atua ma le loto atoa e lē aunoa i mea na ia faia mo oe ananafi, na te toe faia fo’i e sili atu mo oe i le asō. Ina ua uma ona fanaua e Hana o Samuelu, sa ia usu se pese faafetai i le Atua ma sa toe foa’i mai i ai e le Atua isi fanau e to’alima (1 Samuelu 2:1-10, 21). Ina ua mana’omia e Iesu le faauuga e faatele ai ma faatupu falaoa e lima ma i’a e lua e pei ona tusia i le Mataio 14:13-21, sa ia faafetai i le Atua mo lana foai ma na amata tupu ma faateleina. Faafetai I le Atua mo lana foai, ona e matamata lea i le feliuaina o oe e le Atua mai le siitia i sina faaopoopoga I le faatupulaia fa’ale Atua.

Tatalo

Tamā faafetai mo mea uma ua e faia mo a’u. Ana lē seanoa lou fesoasoani mai ou te lē maua lava se mea e tasi. Faafetai lo’u Alii e, i lau foai. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 22 APERILA 2023

Manatu Autu:  E sili atu I manuia (More than blessings)

Tauloto – Tusi Paia: Kenese 22:18 ‘O lau fānau fo‘i e manuia ai atu nu‘u uma lava o le lalolagi auā ‘ua e usiusita‘i i la‘u ‘upu.”’

Faitauga - Tusi Paia: Ieremia 17:7-8

Upu Folafola

O lo tatou Atua o se Tamā agalelei ma loto foa’i. A finagalo e faamanuia e faamanuia sautualasi. Fa’ata’ita’iga ina ua uma le uaina o le faaipoipoga mo le au valaaulia, na avatu e Iesu le uaina e sili atu, e lava fo’i ma totoe. (Ioane 2:1-11) ua faapea mai fo’i le Salamo 68:19 ‘Ia fa‘afetaia le Ali‘i, i lea aso ma lea aso; ‘ua ‘ia ‘ave o tatou avega, o le Atua o lo tatou olataga ia. Selā.

I le Teuterenome 28:1-2 o loo talanoa mai i manuia e tele e fa’asilisiliina ai oe e le Alii lou Atua. O nei manuia e si’osi’omia ai oe. O le ituaiga manuia e faaosofia ai oe e te faapea atu, “ Le Alii e, ua tele naunau” o le a amata o’o mai iā te oe i le taimi nei i le suafa o Iesu.

E ese mai i manuia sasa’a mai mo oe i aso uma, E mafai ona faamanuia sautualasi oe ia avea ma faamanuiaga i nisi. Na faapenā ona ia faamanuia Solomona. I le 1 Tupu 3:13 na fetalai le Atua o le a ia matua’i faamanuia iā Solomona ina ia leai se tupu e tusa ma ia i ona aso uma. O manuia o Solomona na manuia ai fo’i le fanauga a Isaraelu. Fai mai 1 Tupu 10:27 ‘Ua fa‘ateleina e le tupu Ierusalema o ario ‘ua fa‘apei o ma‘a; ‘ua ia fa‘ateleina fo‘i o arasi ‘ua fa‘apei o sukamoru i le fanua maulalo.

E mafai ona faia faapea e le Atua mo oe. E mafai ona ia to mai faamanuiaga tetele mo oe e manuia ai lau augā tupulaga uma, e leai se isi e toe o’o i ai le mativa. Peita’i o le ituaiga manuia lenei e mo i latou e foa’i fai taulaga I le Atua e pei ona fai e Solomona, o loo tāua I le 1 Tupu 3:4. 

I le tausaga 2007 sa sau se taulealea ia te a’u e mana’o na te totogiina meaai o le matou sauniga sa tapena. Sa ou ave i ai se ata faatatau o le tau aofa’i o meaai mo tagata e miliona mo aiga e lua (2) I le aso mo le vaiaso atoa. Sa fai mai le taulealea o le a toe feso’ota’i mai ia te a’u. Sa leai so’u manatu ou te toe vaai i lea taulealea peita’i na o’o mai i le vaiaso na sosoo ai e pei ona ia folafola ma totogi atoa le tau o meaai o le sauniga. O le mea moni sa fai sana nonōgātupe mai se faletupe e fa’aatoa ai lana foa’i. E lei leva ae valaaulia ia e le faletupe lava lea sa fai ai lana nonogatupe e avea ma latou Pule sili. A e fai taulaga ma le loto fiafia, loto malie i le Atua, na te faamanuia fo’i iā te oe ia avea ai oe o se faamanuiaga i nisi.

Tatalo

Tamā faamolemole foai mai lou alofa tunoa ou te fai taulaga ai iā te oe i le suafa o Iesu. Amene.