Samoan Devotional

OPEN HEAVENS

MATALA LE LAGI MO LE ASO LUA 11 APERILA 2023

Manatu Autu:  Faamaualuga- E faaumatia faamoemoega 1 (Destiny Destroyers – Pride 1)

Tauloto – Tusi Paia: Luka 14:11 ‘Auā so se tasi e fa‘amaualuga o ia ‘iā te ia lava, e fa‘amaulaloina lea; a o lē fa‘amaulalo e ia ‘iā te ia, e fa‘amaualugaina lea.’.

Faitauga - Tusi Paia: Mataio 28:1-7

Upu Folafola

O loo tusia I le Faataoto 29:23 ‘O le fa‘amaualuga o le tagata e fa‘amaulaloina ai o ia; a o le fa‘amaulalo o le loto e maua ai le vi‘iga’.

O le faamaualuga, o se tasi o uiga ogaoga e tele ina faatoilaloina tagata, aemaise tagata sa latou ausia muamua ni mea tetele ma ni matati’a maualuga.  O lona uiga, a mana’o le ti’apolo e toso i lalo se tagata, e le tau auina mai ni aitu ma ni taulaitu i lena tagata;  a’o lana mea e fai o le faaalia mai i fafo o le faamaualuga a lea tagata. O loo faapea mai le Faata’oto 25:27: “O le ‘ai tele i meli, e lē lelei lea; o le su‘esu‘ega fo‘i o lo latou mamalu, o le mea e mafatia ai lea”.

O lou sailia o viiga mo oe lava o le a e le maua ai se ta’uleleia ae na o le faamāina. Soiaia e te tausa’ilia o ni tagata e siitia oe i luga I o latou tau’au e pei o oe o se tagata silisili ona lelei ua o’o mai I lenei lalolagi! Ia e faamaulalo. O le ti’apolo sa avea o se agelu faapitoa i le lagi, a ua tupu lona faamaualuga ona o  le maoa’e o lona matagofie. Ua ia sailia ni viiga mo ia lava, ma ua o’o lona naunauta’iga i le mamalu o le nofoalii a le Atua. Sa i’u ina fa’atoilaloina o ia, ma a o’o i le i’uga po o le gata’aga o mea uma, o le a saisaitia o ia i le vanu o le afi ma pagātia ai e faavavau.

O le faatonuga a le Atua mo kerisiano uma o le faamuamua o isi tagata nai lo le viia o oe lava. I le Roma 12:10 o lo o fa’apea mai: “10‘Ia fefa‘apelepelea‘i i le fealofani o uso; ‘ia tausolomua ona āva o le tasi i le tasi..” 

O le aso e galo ai ia te oe o mea uma ua e mauaina sa foai atu e le Atua, o le aso fo’i lena e amata ai lou to’ilalo. Sa lapata’ia Nepukanesa i le tusi o Tanielu 4:24-27 e pei ona ou lapata’ia ai oe i lenei taimi, peitai e lei amana’ia e Nepukanesa le lapata’iga. Ua tupu a’e le fa’amaualuga i lona loto ma ua ia tautala faamaualuga i mea sa faia e le Atua, na fa’aauala mai ia te ia, peita’i ua ia tala’ia e pei o ni ana lava galuega. Ua faatoilaloina Nepukanesa i se tulaga sili ona maulalo ma ua i’u ina ‘ai vao o ia faatasi ma manu o le vao matua. I le tusi o Iakopo 4:6 o lo o faapea mai, o ē e naunau ina ia maua le alofa tunoa o le Atua ia galue i totonu o latou olaga, e tatau ona faamaulalo. Ia e faamaulalo, aua o le mea moni, o le faamaualuga e fa’aumatia ai faamoemoega o lou olaga.

Tatalo

Tama, faamolemole ia e fa’aumatia le a’a o le fa’amaualuga i lo’u olaga, i le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 10 APERILA 2023

Manatu Autu:  O vaitau o Keriso (The seasons of Christ)

Tauloto – Tusi Paia: Mataio 28:6 ‘E lē o ‘i‘inei o ia; auā ‘ua toetū mai o ia, pei ‘ona fetalai atu ai o ia. Ō mai, ‘inā matamata i le mea na tu‘u ai o ia’.

Faitauga - Tusi Paia: Mataio 28:1-7

Upu Folafola

I le va o ni aso se lua I le olaga o le tagata, e iai lava le po. E oo lava ia Iesu Keriso sa ia feagai foi ma le ao faapea le po. O le aso muamua o Iesu o le aso na fanau mai ai. O loo tusia e Luka 2:8-14, na auina mai se aufaipese mai le lagi e asiasi I le lalolagi ma pepese I le aso na fanau ai. O tagata uma e oo I le tupu na latou iloa e iai se tamaitiiti faapitoa na fanau I lea aso. Ao tuputupu ae Iesu, sa lautele le lagolago na ia maua mai le Atua a’o ia faia le tele o vavega. Mai lona aso muamua, na ia soifua mo le tolu sefulu tolu ma le afa tausaga. 

Ina ua maea le ao ona oo mai lea o le po ma ua faasatauroina o ia (Mataio 27). Sa iai le pogisa I le ogatotonu o le aso aua ua le susulu le la (Mareko 15:33). Na ia lagona le ootia I le nofo toatasi aua sa tuulafoaina o ia e ana uo. E oo I lana uo sili, na ia faafiti e na te leiloa o ia (Mataio 26:69-74). Sa iai foi le faanoanoaga ma le fefefe I le au so’o (Ioane 20:19). Faafetai I le Atua e na o le tolu po le umi. Afai o loo e iai I le tulaga lea I le taimi nei, o lena po e faamuta I le aso I le suafa o Iesu Keriso. 

I le Mataio 28:1-7, o loo faamauina ai le amataga o le aso lona lua a Iesu. E tele I faailoga na tutupu e faailoa ai lea aso fou. Muamua, na luluina se mafuie tele e faailoa ai I le lalolagi atoa ua oo mai se aso fou. Ona auina mai lea o se agelu, aveese le maa o le tuugamau ma nofo ai luga. Sa ia nofo ai luga o le maa ma faapea mai, o lenei taimi, ua tatou maua le manumalo e tumau. E amata atu I le aso, o so’o se faitotoa ua tatala e Iesu mo oe, e le toe tapunia lava I le suafa o Iesu. 

Fai mai le Mataio 28:4, o leoleo I le tuugamau ua le mafai ona gaioioi I le fefefe, ua matatau tele I latou ua pauu I lalo e pei oni tagata oti. O le talalelei tele lea mo oe, aua o loo e iai I le vaitau o le aso o lo tatou faaola, a vaai mai ou fili ua e alu atu, a le tamomoe ese, e pauu I lalo. O le aso o Iesu, e o’o I le faavavau. E le toe mamao ae afio mai e siitia lana fanau e nofo tupu ma ia I lona mamalu. Afai o oe o se tasi o ana fanau, avatu le faamalo, ae afai o loo e faia pea le agasala, o lona uiga o loo e faasatauroina pea Iesu Keriso (Eperu 6:6) ma e tutusa lou ituaiga tagata ma I latou na faasatauroina Iesu. Afai e te atamai, e te foai atu lou ola ia te ia I le aso ma e alu ese mai le agasala e faavavau.

O le toetu mai o Iesu o le talalelei lea mo ana uo a’o se tala le lelei poo le leaga mo le au agasala. O fea le vaega o lo’o e iai? I le suafa o Iesu, Amene.   

OPEN HEAVENS

MATALA LE LAGI MO LE ASO SA 9 APERILA 2023

Manatu Autu:  O le a lau vaai? (What do you see?)

Tauloto – Tusi Paia: Ioane 1:29 O le taeao ‘ua va‘ai atu ai Ioane ‘iā Iesu o maliu mai ‘iā te ia ‘ona fai ane lea, “Fa‘auta i le Tama‘i mamoe a le Atua, na te ‘ave‘esea le agasala a le lalolagi..”

Faitauga - Tusi Paia: Ioane 19:1-18

Upu Folafola

Mafaufau o loo e I ai I le taimi na faasatauroina ai Iesu ma o loo e vaai tino atu iā te ia a’o i luga o le satauro. O le a lau vaai? E sa’o oe pe a e faapea mai “o loo e vaaia se tagata tigā.” Na sasaina ia e fitafita Roma ma fa’ae’e se pale tuitui i lona ao a’o le’i faasatauroina (Ioane 19:1-18)

E ono faapea mai se isi “o loo o’u vaai atu i se tagata lē lavalavā,” auā fai mai Mataio 27:35 na tufatufa e i latou ona ofu ma latou fai ai le vili. O le fa’amāina aupito ogaoga lea e o’o i ai se tagata soifua o le lē lavalavā i luma o tagata toatele.

Atonu e faapea mai fo’i se isi, “ua o’u vaaia se tagata o loo faifai ma ula i ai tagata”. Fai mai Mataio 27:39-44 ua faifai iā te ia o e na ui ane ma lia’i o latou ulu ma faapea mai, “na ia faaolaina isi tagata, ae lē mafaia e ia ona fa’aola iā te ia.” E ui e iā te ia le pule e faatonu ai agelu e lavea’i ia te ia, ae na filifili e ui i le faatauemu ia maua ai e oe ma a’u le avanoa I le ola e faavavau I le lagi. Ou te mana’o ia te oe e te mafaufau I le Peresetene o le mālō aupito malosi I le lalolagi o loo i lona lima se telefoni e mafai ona valaau ai lana ‘au fitafita tau i so’o se taimi peita’i na tu’u atu ia lava i ni tagata fa’atupu faalavelave na osofa’i iā te ia e fasioti ma faifai i ai, “e ta’u oe o le Peresetene o se mālō o meatau niukilia malolosi ae se’i vaai iā te oe i le taimi lenei e te lē mafai ona fa’asaoina oe.” O se fa’ata’ita’iga lenā o le mea na faia e Iesu ina ia lavea’i oe ma a’u ne’i fano i Seoli.

E mautinoa a e vaai iā Iesu i luga o le satauro o se tagata faanoanoa. E lē mafai ona e tigā, lē lavalavā, faamāina ma tauemua, ae olioli. Na vaai le perofeta o Isaia I le faaaliga o le faasatauroina o Iesu i ni tausaga se tele muamua I lona maliu ma ia faaigoa iā te ia o le tagata faanoanoa (Isaia 53:3-5).

Peita’i a e silasila toto’a i fofoga o lo tatou fa’aola a’o i luga o le satauro e te vaaia le alofa. O se tagata e tumu i le alofa iā te oe ma a’u, na ui i le maualuga e gata ai tigā o le tino ma lagona ina ia laveaiina lou agaga. Faafetai i le Atua na toetu manumalō i le aso tolu ma ua avanoa le ola faavavau mo i latou uma e talia o ia e avea ma Alii ma Fa’aola i o latou olaga.

Le au pele e, aua ne’i maimaua le taulaga na saunia e Iesu Keriso lou Fa’aola mo oe ma a’u. Aua ne’i e ola mo le tiapolo. Tu’u lou ola i lē e sili ona alofa iā te oe, na ia foai mai lona soifua atoatoa mo oe. Filifili ne’i loa e te lē toe fa’atigā ia te ia. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 8 APERILA 2023

Manatu Autu:  O le faamoemoega o lona maliu 2 (The Purpose of His death 2)

Tauloto – Tusi Paia: Galuega 1:8 “‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”.”

Faitauga - Tusi Paia: Mareko 16:15-18

Upu Folafola

I le tusi o Ioane 17:4 a’o tatalo Iesu a’o le’i faasatauroina o ia, na faapea atu i lona tamā ua ia faataunuuina le galuega na ia tuuina mai na te faia. Mulimuli ane I le Ioane 19:30 na toe fetalai faapea Iesu “ua mae’a.” I se isi faaupuga “Galuega Mae’a” ina ua maea ona aveina a’e o ia na ia faapea atu i lona au so’o i le Galuega 1:8 o le a afio ifo le Agaga Paia I luga iā te outou ona maua lea e outou le mana.

O le a le Mana? O le mana i le gagana a tagata lolotu o le mafaia lea ona fai se galuega I le lelei. O le mana e te manaomia e faataunuu ai le finagalo o le Atua mo oe e pei ona ia fa’au’uina e ala i le Agaga Paia. I le Luka e 5:10 na fetalai Iesu Keriso iā Peteru o le a amata i ia ona po ona ia maua tagata, ma na faataunuuina lava lea fetalaiga i le tolu (3) tausaga mulimuli ane, ina ua afio ifo le Agaga Paia i ona luga ma ia manumaloina ai Agaga e (3) tolu afe i le lauga e tasi.

I lo’u tuputupu a’e sa ou tausinio ia avea a’u ma se pule i le Iunivesite aupito laititi i Aferika peita’i na tu’u lo’u ola iā Iesu Keriso i le 1973. Na papatisoina a’u I le Agaga Paia I le tausaga lava lea ma faapena ona o’u lagona peiseaī o lo o i ai se malosi e unaia pea a’u I le polokalame moni faataatia a le Atua mo lo’u olaga. Ou te tatalo ia ta’ita’iina oe e le mana o le Atua Silisiliese I le ala e te taunuu ai i lou manuia i le suafa o Iesu.

O lenei, o le tele o le mana o le faigofie lea ona e taunuu. Fa’ata’ita’iga afai e te fia malaga mai Lagos Nigeria I Peretania e ala i taavale ma vaa e ono alu ai ni aso poo ni vaiaso peitai afai e te malaga i se vaalele e te taunuu poo le 6 ma le afa itula. Ua faamatala mai i le Galuega 3:1-11 na faaalia le mana o le Atua i le soifuaga o le aposetolo o Peteru ina ua savali le tagata pipili sa nofo I le faitotoa o Matagofie. O le lauga a Peteru na sosoo ma le faamalologa o le pipili na feliuaina ai agaga e lima afe mo le Atua. (Galuega 4:4). E o’o atu I le tusi o Galuega 5:12-16 ua malolō tagata mama’i i lona ata lafoia ma omai ai le motu o tagata ia Keriso. Na faataunuuina le faamoemoe o le Atua i lona soifua i se tulaga maualuga.

O le a le vave e te mana’o e te taunuu ai i le faamoemoe o le Atua i lou soifua? E faalagolago lea vave I le tele o le mana o le Atua o ia te oe.

Tatalo I le Agaga mo le umi e lē itiiti ifo ma le itula I le asō ma fa’aauau ai pea i aso uma i le suafa o Iesu Keriso Amene.

OPEN HEAVENS

MATALA LE LAGI MO LE ASO FARAILE 7 APERILA 2023

Manatu Autu:  O le faamoemoega o lona maliu 1 (The Purpose of His death 1)

Tauloto – Tusi Paia: Mareko 16:15 “Ua fetalai atu fo‘i o ia ‘iā te i latou, “Ō atu ia ‘outou i le lalolagi uma, ‘inā tala‘i atu ai le tala lelei i tagata uma lava.”

Faitauga - Tusi Paia: Luka 4:13-20, Isaiah 61:1-3

Upu Folafola

I le Luka 4:13-20, na faitauina mai e Iesu mai le Tusi le mafuaaga na ia afio mai ai I le lalolagi e pei ona folafola mai e Isaia 61:1-3. Na ia amata ona faitauina le faaperofetaga a Isaia e faatatau I lana galuega talai mai le amataga, ae ina ua oo atu I le vaega lea e faapea mai: ‘E tala‘i le tausaga e talileleia mai ai e le ALI‘I,’ sa ia faagata loa le faitauga ae tapuni le Tusi. E le na o le pau lena o le faaperofetaga na faia e Isaia, e iai ma isi ae ina ua faailoa atu e Iesu le galuega ua auina mai o ia e faia I le lalolagi, na taofia le faitau o Iesu I le ogatotonu. E tatau lava ona iai se mafuaaga. Ua tatou iloa le mafuaaga i le Galuega 1:8

‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

Na afio mai Iesu I le lalolagi, na soifua ai, na maliu ma toetu, ona auina mai lea o lona Agaga Paia ina ia tatou faaauauina mai le tulaga na gata ai lana galuega. O le vaega muamua na faataunuuina ao iai o ia I le lalolagi nei, ae o le vaega atoa e pei ona folafolaina e Isaia, e faataunuuina e ala iai tatou lana fanau I le maea ai ona tatou maua Agaga Paia. 

Na faaolaina oe e Iesu ina ia faaaogaina oe e faaolaina ai isi tagata. O le fesili, o oe ea o se ipu ua saunia mo lea galuega pe leai? Ao e faamanatuina le Eseta, aua nei galo ia te oe le galuega na tuuina atu e lo tatou Alii ia te oe ina ua ia toetu mai le oti (Mataio 28:19-20). 

E moni ea le faaaogaina o oe e Keriso e fai ma ipu omea e faia lona finagalo? O le aposetolo o Paulo o se tagata e lei taofia i se mea lona talai o le talalelei ia Iesu Keriso. O le Eseta e le o se aso e na o le aai ma nonofo I le fale e malolo, o le taimi e te alu atu ai e faaaogaina oe e Iesu e manumaloina ai le au lē faatuatua. Ua o’o I le taimi e talai atu ai le aso o le taui ma sui a le Atua ma faamafanafana iai latou o loo faanoanoa. 

Ia faaaogaina oe e Iesu e manumaloina se agaga se tasi I lenei vaitau. Ia e ta’u atu I se tagata le aso e oo mai ai le toasa o le Atua, aua nei faatagaina lena tagata e iu I seoli. Alu atu ia I le lalolagi ma talai atu le talalelei ia Iesu Keriso I tagata uma, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 6 APERILA 2023

Manatu Autu:  O Tatalo mo lou lava tagata (Prayers for yourself)

Tauloto – Tusi Paia: 1 Korinito 4:10 “Ua vala‘au atu Iapesa i le Atua o Isaraelu, ‘ua fa‘apea atu, “E, fia manuia a‘u ‘iā te oe ma fa‘alauteleina lo‘u lau‘ele‘ele, ia ‘iā te a‘u fo‘i lou ‘a‘ao ma ‘ia e leoleo mai ‘iā te a‘u a‘i le leaga, ‘ina ne‘i tigāina a‘u.” Na avatu e le Atua ‘iā te ia le mea na ia fa‘atoga atu ai.”.

Faitauga - Tusi Paia: Filipi 4:6-7

Tatalo

1.       Faafetai, le Alii e, mo lo'u Ola. Faafetai mo le mamao o tausaga na e talisapaia mai ai aʻu ma fuafuaga mamao o loʻo e aveina ai aʻu I le lumanai. Ou te faafetaia lou alofa ma le Agalelei, ua ou matua fiafia ai i le aso.

2.       Tama e, atonu e itiiti lo’u faatuatua, ae ou te talitonu, o oe o le Atua Silisiliese. Faamolemole ia  e manatua lota faatuatua ma tali mai i a’u tatalo uma i le aso.

3.       Tamā e, fa‘amolemole, fa‘ae‘e mai ou ‘a‘ao alofa i luga ‘iā te a‘u, ma foa‘i mai ‘iā te a‘u le maoae o lou alofa I lou ola, i le suafa o Iesu Keriso. Fesoasoani mai le Alii, ia ou ausia i lenei tausaga faamanuiaga e masani ona umi pe e sefulu tausaga e ausia ai.

4.       Tama e, faamolemole, faamanuia lou nei tagata I ni vavega, o se mea ua e faia faapitoa mo lo’u lava tagata. I lou lava finagalo Le Alii e, foaʻi mai ia te aʻu ni faamanuiaga se tele ma tatala ni faitotoa fou mo a’u, i le suafa o Iesu.

5.       Le Tamā e, ona o lou mamalu, foa‘i mai I lou nei tagata le mana e fai ai vavega, ‘ia e fa‘aaogāina lou nei tagata e vi‘ia ai lou suafa, le Ali‘i e.

6.       Lo‘u Tamā e, faamolemole ‘aua ne‘i fa‘agataina lo‘u faaolataga, ‘ia mumū pea la‘u lamepa mo oe le Ali‘i.

7.       Tama e, faamolemole ia faamutaina aafiaga faatemoni uma i loʻu olaga i le suafa o Iesu.

8.       Tama e, faamolemole aveese a’u mai so’o se masaniga e mafai ona afaina ai loʻu olaga, i le suafa o Iesu Keriso. Afai ou te faia se mea sese i so’o se vaega o loʻu olaga, faamolemole aveese aʻu i tua , ma toe tuu aʻu i luga o le ala saʻo ma talafeagai, i le suafa o Iesu.

9.       Tama e, Ia puipuia aʻu ina ia aua lava nei ou aafia ini ma’I poo ni fa’amaʻi. Ia le toe avea loʻu tino ma nofoaga o nei gasegase uma, i le suafa o Iesu.

10.   Le Tamā e, ia e faʻamanuia mai ia te aʻu ma faʻalauteleina ala ma le laueleele o o’u faamanuiaga, i le suafa o Iesu.

11.   Lo‘u Tamā e, ‘ia ‘iā te a‘u lou ‘a‘ao e lē aunoa ma ‘ia e tu’u ese mamao ‘lo’u nei tagata mai mea leaga uma, i le suafa o Iesu.

12.   Le Alii e, o le a ou tula‘i, ma malamalama, auā ‘ua o‘o mai lou malamalama; ‘ua alu a‘e fo‘i lou pupula i ou luga. Faafetai Tama ua e faafofoga ma tali mai ia matou tatalo, I le suafa o Iesu Keriso, Amene.

OPEN HEAVENS

MATALA LE LAGI MO LE ASO LULU 5 APERILA 2023

Manatu Autu:  O le Fili Sili o tagata (The Greatest Enemy of Man)

Tauloto – Tusi Paia: 1 Korinito 9:27 “A ‘ou te fa‘ato‘ilaloina lo‘u nei tino ma a‘u fai ai ma pologa, ‘ina ne‘i i‘u ‘ina lē fa‘amaoni a‘u, o a‘u sa tala‘i atu i isi tagata”.

Faitauga - Tusi Paia: 1 Korinito 9:24-27

Upu Folafola

O lou fili e sili ona matautia, e le o le tiapolo, poo le tina o lou toalua, poo ni taulaitu poo ni aitu vavalo foi. Afai o oe o se afafine poo se atalii o le Atua, e te silafia lelei e sili atu Lē o loo I totonu ia te oe nai lo lē o lo’o I le lalolagi (1 Ioane 4:4). O loo manino mai I le Tusi Paia, ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou (Roma 8:37).

O lou fili numera tasi, o lou lava tagata. O le tagata ua manumalo aiai o ia lea ua manumalo ia te ia lava. Afai e te ola ma soifua e faatino mea e manao iai lou tino, ua e faatagaina le faatoilalo o lou lava tagata. Fai mai le Faataoto 16:32

E sili ‘ona lelei o lē ‘ua gesegese i le ita i lē ‘ua malosi; e sili fo‘i lē ‘ua pule i lona loto i lē na te ā‘ea le ‘a‘ai.

Na faatoilalo e Samasoni le taulaga atoa ae sa le mafai ona ia manumalo ia te ia. E ese ma le malosi o Samasoni ma ua fefefe ma matatau ai le tele o taulaga, ae ina ua ia taoto I vae o le fafine, ua avea ma tagata pito sili ona vaivai. E o’o I se tamaitiiti laitiiti e na te iloa e mu le lima pe a tago I se mea vevela na tago muamua iai. Ia Samasoni, na pepelo ia Talila I le faapogai o lona malosi ae o le taimi na tei ane ai, ua ia iloa o se mailei. E ui I lea, e lei alu ese o ia mai a Talila. Na ia toe pepelo foi lea ia Talila ma sa taumafai foi e Talila le isi mailei ae lei manuia. Peitai e lei alu ese lava Samasoni. O le vaega pito sili ona leaga, na iu ina faasoa atu ia Talila le mea moni I le mafuaaga o lona malosi, ma na iu ane ua galue e vili le saito a ona fili, lea sa matua fefefe ia  te  muamua (Faamasino 16:6-21). E mafai ona e faapea mai ua ova le valea o Samasoni, ae faapefea oe? O e alo ese mamao ea ma tamai agasala na o loo aafia ai oe?

Afai e matua filiga tele se atalii poo se afafine o le Atua, e amata loa ona saili e le tiapolo lona vaivaiga. Afai e na te maua, e na te faaaogaina lena e fai ma auupega e faatoilaloina ai se atalii poo se afafine o le Atua. O le tulaga lena e tatau ai ona e aveesea mamao ma oe lena vaivaiga ae lei faaaogaina e le tiapolo e faasagatau ai ia te oe. Fai mai le Faataoto 25:28O le tagata ‘ua lē mafai ona ia pulea lona loto,‘ua pei o le ‘a‘ai ‘ua fa‘atafunaina, ‘ua leai ni ona ‘aupā. Ia pulea lou loto ina ia e manumalo aiai ma faasagatau atu I osofaiga a le tiapolo. Ua e manumalo ea ia te oe lava? I le suafa o Iesu Keriso, Amene

OPEN HEAVENS

MATALA LE LAGI MO LE ASO LUA 4 APERILA 2023

Manatu Autu:  Tau I le itu a le Atua (Fighting on God’s Side)

Tauloto – Tusi Paia: Salamo 23:4 “E ui lava ‘ina ‘ou savali i le vanu o le ata o le oti, ‘ou te lē fefe lava i se mea leaga;

auā o oe tā te fa‘atasi ma a‘u; o lau la‘au ma lou to‘oto‘o e fa‘amafanafanaina ai a‘u.”

Faitauga - Tusi Paia: Numera 16:23-34

Upu Folafola

I le faaauauina o le tatou talanoaga mai ananafi i le lamatia o le finau ma le fa’asaga tau i le Atua, se’i tatou va’avaai i le mea e tupu pe a fai e te finau mai i lana itu. O le taimi e te filifili e tau i le itu a le Atua e tusa po o lea le telē ma le malosi o lou fili, e te manumalo lava. E tusa po’o e tau ma fili i totonu o lou aiga po’o fafo atu - afai o e tau mai I le itu a le Atua, e le mafai ona latou faatoilaloina oe!

O le mea sili ona matagofie i lou tu i le itu a seisi, o le a mautinoa le tu mai o lea tagata i ou tafatafa, ma afai e aga’i mai se aū a le fili ia oe, e te avea lena aū i le Atua. O le mafuaaga lena e le mafai ai ona manuia se au’upega e faasaga tau ia te oe (Isaia 54:17). Afai e te I le itu a le Atua, e leai sou fili e mafai ona faatoilalo ia te oe. 

I le Samuelu 17: 34-37, sa talanoa mai Tavita i lona fa’aumatia o le liona ma le urosa, ma e mafai ona ia fasiotia Koliata  auā sa faatasi le Atua ma ia. Ona faapea atu lea o le Tupu o Saulo ia Tavita: ‘Alu ia ma ia faatasi le Alii ma oe.’ Na faatoilalo Koliata e le tamaititi i se ma’a itiiti aua sa iai le Atua i lana itu ma sa iai o ia I le itu a le Atua (1 Samuelu 17:44-50).

I le tusi o Iosua 10:1-14, sa ‘au le Atua ma le itu a Iosua aua o Iosua fo’i sa auai i le Itu a le Atua. Sa taofia e Iosua le lā ina ia mafai ona ia fa’atoilaloina ona fili uma. Afai e te finauina le taua o le olaga nei i le Itu a le Atua, e mautinoa lou manumalo. E le afaina poo lea se mea e agai mai ia te oe, e sili atu Lē o lo’o totonu ia te oe, nai lo le tagata o iai i le lalolagi. (1 Ioane 4:4). Ma o lo’o faamautinoaina mai e Iesu Keriso iai tatou I le Ioane 16:33-

‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi’

O Iesu na ia manumalo i le lalolagi, ma ua mautinoa lou manumalo i le taimi lava e te ‘au ai i lana itu ma o le laasaga muamua e te faamautinoaina ai lea tulaga, o le tuuina atu o lou ola ma le atoatoa ia te ia.O I latou o lo’o ‘au i le itu a le Atua, e manumalo I taua o le olaga nei. I le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 3 APERILA 2023

Manatu Autu:  Aua e te  finau ma le Atua (Don’t fight God)

Tauloto – Tusi Paia: Isaia 45:9 ‘‘‘Oi talofa i lē ‘ua finau ma lē na faia o ia, o le ta‘ega ipu i ta‘ega ipu o le ‘ele‘ele.

Pe fai atu ‘ea le ‘omea i lē na te gaosia, “O le a ‘ea ‘e te faia?” pe fai atu lau galuega, “‘Ua leai ni ona lima?””;

Faitauga - Tusi Paia: Isaia 45:9-10

Upu Folafola

E sosoo atu I le mataupu na amata ananafi, o le itu e te iai e fua iai le tagata e te finau iai. Afai e te iai I le itu a le Atua, o lona uiga e te finau ma le tiapolo ma ana temoni. Afai e te lē usiusitai I le Alii, o lona uiga ua e filifili le itu a le tiapolo ma finau ma le Atua. Taitonu mai I le mea moni lenei, e le tatau ona e fia finau ma le Atua. E matua matautia o ia ma e te le gafatia ona finau mai ia ma e manumalo.

E iai le auala e faia e le Atua I tagata e au ma le tiapolo e ala I le le usiusitai ia te ia. O le tasi o auala, o le aveesea lea o lana fesoasoani mai lea tagata e pei ona tusia I le Iosua 7:1-12, ina ua toilalo Iosua aua ua ia faataga le agasala I totonu o lana togalauapiga. O leisi auala o le tuua ma alu ese o le Atua mai se tagata e pei ona ia faia ia Samasoni I le Faamasino 16:18-31. E toatele tagata o loo ui ai I nei aso ae latou te le o iloa o le Atua o lo’o finau ma I latou, ma o lo’o finau pea e aunoa ma lo latou iloa o Lē o lo’o latou finau e le mafai e seisi ona faatoilalo. 

E iai se loia na fai mai ia te a’u o le sefuluai ua na o se auala e faaaoga e faifeau e aoina ai tupe, o totogi a I latou o loo tigaina e galulue. Sa ou taumafai e faamalamalama, o le sefuluai o se poloaiga mai le Atua ae matua le fia faalogo lava. O lea na ou fai atu ai ia te ia ‘e mafai la ona ou fai I le Atua e faailoa tuusao atu ia te oe o le sefuluai o le poloaiga a le Atua pe leai foi?’ na ia tali mai, ‘tago e tatalo ai’, ma o lea na ou faia. O lenei loia tauoloa, na faiaina uma ana mataupu e tolu I luma o le faamasinoga ina ua maea ai le ma talanoaga lea. Na aafia tele ai lona tulaga tauoloa ma ua tele le aafiaga o lana pisinisi. Sa ia umia foi se fale fai falaoa ae tei lava I se taimi o aso faamanatu e masani ona siitia ai pisinisi ma tupe maua, ua faamavae uma le aufaigaluega. Ua ia ofoina atu iai latou le siitia ma faaluaina o latou totogi ae na tumau pea lo latou manaoga e faamavae. E ui na tele ana taumafaiga, sa le mafai ona maua se aufaigaluega. Ina ua ia iloa e leiloa po’o le Atua o loo finau ma ia, na ia foi mai ma faapea mai ia te au, ‘ua ou talitonu nei o le sefuluai o le finagalo o le Atua, faamolemole tatalo mo a’u. Na ma faia loa se tatalo faigofie. Mulimuli ane, na toe apili uma ana mataupu ia e tolu I luma o le faamasinoga lea na faiaina ai ma ua toe manumalo uma. Ua toe foi uma mai lana aufaigaluega ma ua toe foi I le lelei ana pisinisi. 

Le au pele e, o le le usiusitai I le Atua e oo atu ai ina finau ma le Atua, Oi talofa i lē ‘ua finau ma lē na faia o ia (Isaia 45:9). Afai e te le usiusitai I le Atua, o loo e au I le itu a le tiapolo ma finau e tetee I le Atua. I le suafa o Iesu, Amene. 

OPEN HEAVENS

MATALA LE LAGI MO LE ASO SA 2 APERILA 2023

Manatu Autu:  O fea le itu o e I ai? (Whose side are you on?)

Tauloto – Tusi Paia: Efeso 6:18 ‘‘Ia ‘outou tatalo i le Agaga i aso uma lava i talotaloga ma fa‘atoga uma; ‘ia ‘outou mataala pea i lenei lava mea, ma matuā tausisi i le fa‘atoga mo tagata pa‘ia uma lava”;

Faitauga - Tusi Paia: Efeso 6:10-18

Upu Folafola

O tagata soifua e amata fetaia’i lava ma ituaiga taua eseese mai le taimi e foafoa ai seia o’o i le aso e tuua ai lenei lalolagi. Fai mai le Kenese 38:27 a fanau se fafine e tigā o ia. A uma ona fanau mai le pepe e amata ai a i le taimi lea ona fetaia’i le tamaititi ma fili eseese, o fili e iloa ma fili e lē iloa. O Iesu Keriso lava na fetalai I le Mataio 10:36 “ E fai fo’i le tagata ma fili o lona lava aiga.” A na faailoa atu e le Atua iā te oe ou aiga ma ā latou uō na manana’o e te oti a’o e laititi e matua’i fa’ateia oe. Peita’i faafetai i le Atua na ia fa’asaoina oe.

A tatou talanoa i fili i totonu o le aiga e mafai ona aofia ai lou tamā poo lou tinā fo’i. Afai e te lē talitonu e mafai ona fai matua ma fili o a latou fanau Faitau le Kenese 27 e te iloa ai pe na faafefea o na taupule se tinā e fa’aleaga lana ia lava tama ma fāoa ai lona fa’amanuiaga.

E masani ona o’u mafaufau I le taimi ina ua fetalai le Atua iā Aperaamo o Isaako e osi ai le taulaga ia te ia. Na fesili Isaako poo fea o i ai le tama’i mamoe e osi ai le taulaga. E le’i tau’a e Aperaamo i lona atalii le sa’o ae na ia faapea “e aumai e le Atua se tama’i mamoe.” Atonu na vaavaai solo Isaako ma le fa’ate’ia o lona loto ina ua fusifusi ona vae ma ona lima e lona tamā ma ia manatu ai faapea, “o a’u la le mamoe.”

Ae ā o tatou aiga ua tatou faaipoipo atu iai? Faitau I le 1 Samuelu 18:29 ma e iloa ai le tupu o Saulo o loo fa’amatalaina o lona fili, o le toalua o lona afafine, o Tavita. Ae lē o tā’ua ai taulaitu ma aitu vavalo ma alii o le pouliuli (ma isi) Efeso 6:12. O le taua lenei, e lua ‘au o loo tau mo le agaga o le tagata. E te filifili lava pe e te ‘au ma ‘au a le lagi po’o ‘au a le tiapolo.? E lē mafai ona e tu i ‘au e lua pe leai fo’i sau ‘au. E fua le itu e te ‘au ai, i amio e te fai. A e loto e ‘au ma le Atua e te alo ese mamao ma le agasala ae mulimuli iā Iesu Keriso i aso uma. (Luka 9:23) o le a e tatalo, suesue le Tusi Paia, molimau ma fai le finagalo o le Atua i aso uma. O ē filifili e ‘au ma le tiapolo e ola fa’ale tino ma faia le agasala. Mo i latou e ‘alo ese ma le agasala e i’u I le manumalō ma ulufale atu i le lagi (Faaaliga 3:5) a’o ē faia le agasala e i’u I le lepa afi faatasi ma le tiapolo ma ana ‘au temoni. (Mataio 25:41) O le faaiuga o loo i amioga e te fai. Suesue lou olaga ma faamaoni iā te oe lava poo e ‘au ma Iesu Keriso po’o le tiapolo. I le suafa o Iesu Keriso. Amene.