Samoan Devotional

OPEN HEAVENS

MATALA LE LAGI MO LE ASO TOONAI 1 APERILA 2023

Manatu Autu:  O ai lou tamā? (Who is your father?)

Tauloto – Tusi Paia: Ioane 10:10 ‘‘O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.;”

Faitauga - Tusi Paia: Ioane 10:10-16

Upu Folafola
O lo’u tamā I le Alii - Pa Josiah Akindayomi sa masani ona fai mai o lou tamā e gata lana tausi iā te oe i mea na te maua. Afai o lou tamā o Iesu Keriso, talu ai o ia e ona manu e tata’a i mauga e afe (Salamo 50:10) e i ai le fa’amalolōga i ona apaau (Malaki 4:2) ma o mea lelei uma e alu ifo mai i le tamā (Iakopo 1:17) o lona uiga na te tausia oe i faamanuiaga uma nei. Peita’i afai o lou tamā le tiapolo, o le gaoi, pepelo ma le fasioti tagata (Ioane 10:10)o le a ia faaleaga fo’i la ia te oe i nei mea leaga uma. O ai o i laua e te mana’o e fai ma ou tamā?

Ua o’u maitauina i se taimi umi ua mavae e leai ma se mea lelei ou te maua mai i le tiapolo. Ou te manatua poo le limasefulu tausaga ua mavae ina ua tutupu vave suiga lelei o lo’u olaga a’o o’u laititi, na avea a’u ma faiaoga i le Iunivesitē o Lagos, faatau la’u taavale ma fau lo’u fale a’o le’i atoa le tolusefulu o o’u tausaga. Ona o le vave tutupu o nei suiga lelei na o ai o’u tagata ave a’u i se fomai fa’ataulaitu na latou iloa e malosi tele ana togafiti ma fai i ai e aumai se malosiaga e puipui ai a’u mai le fili o le lotoleaga iā te a’u.

Na fai mai le fomai faataulaitu ou te alu atu ma se ‘oti ola e ta’ita’i atu i magaala o Oshogbo. Ona sa o’u manatu o se fuafuaga lea mo lo’u lelei na tu’u ai la’u taavale ae o’u savali i le auala ma ta’ita’i le ‘oti agai I le fale o le faataulaitu. Na aumai e le fomai faataulaitu ni ma’a matagofie se tolu e puipuia a’u e totogi ai le ‘oti. O le tasi o nei ma’a matagofie e tatau ona nonoa i le foeuli o la’u taavale e puipui ai mai le fetoai ma se taavale i o’u luma. Lona lua e tu’u I le pusa pito i tua e taofi ai le lavea i se taavale e sau mai tua ma le lona tolu e nonoa i le nofoa o le ave taavale, a lavea le taavale o o’u alu ai e te’i a i lo’u mou ese e lē aafia i le faalavelave. Sa o’u toe fo’i i Lagos ma le manatu ua lava ma totoe lo’u malu puipuia. Peita’i e lua vaiaso ae faatolu na lavea la’u taavale ma o’u iloa ai e leai ma se puipuiga o I nei ma’a matagofie na aumai e le faataulaitu ma ou lafoa’i ai ia ma’a i le sami. Ou te faafetai i le Atua ina ua tu’u lo’u ola iā Iesu Keriso na avea ia ma o’u tamā ma tafiesea ai le fefe mai lo’u olaga. Tusa lava pe ita mai nisi iā te a’u e laulau mai e lo’u Atua mea I le la’oai ma a’u i luma o e ita mai iā te a’u. (Salamo 23:5)

O le tiapolo o le pepelo ia ma e te lē maua se mea lelei mai iā te ia. Afai e avatu e le tiapolo se mea ia te oe, na te toe aveesea se mea e sili atu lona tāua mai iā te oe. Aua ne’i e se’etia i ana faiga tau fa’avalea. Na o le Atua e te maua ai meaalofa lelei ma le atoatoa. I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 31 MATI 2023

Manatu Autu:  O loo faia faamaumauga a le Atua (God is taking records)

Tauloto – Tusi Paia: 1 Ioane 5:7 ‘‘O le Agaga fo‘i o lo‘o molimau mai, auā o le Agaga o le ‘upu moni lava ia.”

Faitauga - Tusi Paia: Eperu 12:1-2

Upu Folafola

Afai e te faitau I tusi I Ekalesia I le Tusi o Faaaliga, e te silafia ai o mea uma o loo faia e kerisiano I le lalolagi nei o loo faamaumau uma I le lagi, o mea taitasi uma. E iai se tamaitai na malie e o ma se faifeau I le faletalimalo e faia le faitaaga. Ao agai atu I le faletalimalo, sa tilotilo I itu uma I tei ua iloa atu I laua e se tagata. Ina ua o atu I totonu o le potu ua amata ona le mautonu le tamaitai ma faapea atu I le faifeau; ‘na ta tilotilo I le itu agavale ma le itu taumatau ae ta te lei tilotilo I lugā, aua o lo’o silasila mai le Atua’. Fai mai le 2 Nofoaiga Tupu 16:9 9 auā o fofoga o le ALI‘I e fetaufetulia‘i i le lalolagi uma. 

A o’o mai faaosoosoga ia te oe, o lo’o silasila ma tulimatai mai le Atua pe e te paū ma toilalo pe leai. Afai e te paū, ona talai lea e le tiapolo I luma o le Atua aua ua ia manumalo ia te oe. Ia taofia lena tulaga I le suafa o Iesu. Ae afai e te manumalo I le faaosoosoga ma tumau pea, e talai e le Atua o oe o lona afafine po’o le atalii moni. 

I le Iopu 19:25-27, fai mai Iopu e le afaina le mea ua tupu ia te ia, aua ua ia iloa, o lo’o soifua pea Lē na togiolaina o ia. E leiloa pe na faapea atu le Atua I le tiapolo, ‘ua e faalogo atu ea?’ o le tulaga lena e tatau ai ona e filiga e manumalo I so’o se faaosoosoga ina ia faamautinoaina e te manumalo I le iuga. 

Ou te leiloa ia te oe, ae ou te le faatagaina le tiapolo e fai mea talai I luma o le Atua ona o a’u. Ou te manatu I le olioli o le lagi ina ua maea ma manumalo Iopu I lona faaosoosoga. O le tulaga lelei o le silafia e le Atua o mea uma aua afai o loo e faia mea lelei, e silafia e ia ma e na te tauia I faamanuiaga e tusa ma le tulaga ua manumalo ai. Afai o lo’o e faia ni galuega lelei ae peiseai e leai seisi o ona maitauina, o loo silasila mai le Atua ma e iai lava le taimi e na te tauia ai oe. 

Fai mai le Kalatia 6:9

9‘Aua ne‘i tatou fa‘apalapala i le amio lelei; auā o ona po e tatau ai tatou te selesele mai ai, pe ‘āfai tatou te lē fa‘avaivai. 

O le taimi lava e amata ai e se tagata ona taofia le faia o mea lelei ae amata ona faia le agasala, o mea lelei uma na ia faia I aso ua tuanai, e le toe faitauina ia te ia (Esekielu 18:24). Le au pele e, o a tulaga uma o lo’o faamaumau e le Atua e tusa ma oe I le taimi nei? Ia manatua, e silafia e le Atua mea uma ma o lo’o ia faamaumauina lelei tulaga uma o lo’o e faia I le lagi, I le suafa o Iesu, Amene. 

 OPEN HEAVENS
MATALA LE LAGI MO LE ASO TOFI 30 MATI 2023

Manatu Autu:  E faasolo vaega le tulaga taua  (Greatness is in levels)

Tauloto – Tusi Paia: 1 Korinito 15:41 ‘‘E ‘ese le pupula o le lā, ‘ese fo‘i le pupula o le masina, ‘ese fo‘i le pupula o fetū; auā ‘ua ‘ese le pupula o le tasi fetū i lo le tasi fetū.”

Faitauga - Tusi Paia: Filipi 3:12-15

Upu Folafola

I le tele o tausaga talu ai, na valaaulia a’u I le sauniga o le faatautoina o le ao o le malo faatasi ai ma isi malo faaaloalogia. O se tasi o le au valaaulia sa matua fiafia ona o luga o lana tusi valaaulia, o loo iai le ‘A’ e tasi. Ua ia faamalamalama mai ia te a’u o le iai o le A I le tusi valaaulia, e faaalia ai o ia o se tagata taua. O le isi tagata sa iai le lua ‘AA’ I lana tusi, o lona uiga e sili atu lona taua I lo le tagata e tasi lana ‘A’, o lona nofoaga e pito atu I luma ma e sili atu foi faaaloaloga e na te maua. Mulimuli ane ua ou faaamalamalama atu iai laua, e iai foi le vaega e tolu A, o le ‘AAA’. 

E moni, o le taua o tagata e vaevaeina I vaega. E te ono manatu o loo e iai I se tulaga taua, peitai e iai lava leisi vaega maualuga e taua atu e te le’i o’o iai. 

E toatele tagata e o’o loa I se vaega maualuga e manatu ua maea mea uma. O le tulaga e faanoanoa ai, e pei lava ona iai vaega maualuga e tatau ona siitia iai, e iai foi vaega I lalo e ono pau atu iai. E tele taimi e faalogo ai I siamupini o le lalolagi o faamauina ni matatia tetele, o tagata taua ua ausia le faatumutumuga o latou galuega, o pisinisi ma tulaga faapena, seia oo ina o mai nisi tagata fou ma ausia nisi matatia e tetele atu ini tapulaa e sili atu. Mo se faataitaiga I taaloga, e mafai e se tagata taaalo ona ausia se mataia, ona sau lea o seisi fai seisi mataia fou e maualuga atu, o siamupini muamua e vave lava ona faaigoaina o le siamupini talu ai. 

E le tatau ona e gata I ni mea tetele na ausia I le taimi ua sola, saili pea e ausia ni matatia fou ma maualuga atu. Sa avea muamua a’u o se tagata fusu, o le avea ma tagata fusu siamupini e taua tele, peitai e mafai ona fai atu so’o se tagata fusu ia te oe, e faigata atu le faatumauina o se siamupini I lo le taumafai atu e avea ma siamupini, aua foi e naunau uma tagata ia faatoilalo le siamupini ina ia avea ma siamupini talu ai. O le tulaga lea e tatau ai I soo se siamupini ona galue malosi atu I lo’o seisi tagata ina ia tumau pea lona tulaga I le pito I luga. O le taimi e amata ai ona e malolo ma faatalale, e amata ai ona e alu I tua. 

E te manaomia le tulaga e sili atu I lo le taimi na avea ai oe ma siamupini ina ia e tumau ai pea. Ina ua atoa le 80 o ou Tausaga I le Tausaga talu ai, e toatele tagata e manatu o le a ou malolo. Ua ou fai iai o Mose na faatoa amata lana galuega I le 80 tausaga ma o a’u foi, o lea faatoa amata. O so’o se tagata e taofia le galue malosi, taofia le tatalo faatauanau ma ua faaitiitia le filifiliga, e vave ona ia iloa ua amata ona alu I tua ae le o luma. 

Ia tumau pea ma tausisi atu i le fa‘ailoga, ‘ia maua ai le taui na vala‘auina ai oe ma a‘u mai lugā e le Atua ‘iā Keriso Iesu, Amene. 

OPEN HEAVENS
MATALA LE LAGI MO LE ASO LULU 29 MATI 2023

Manatu Autu:  O ai e te faalogo iai? (Who do you listen to?)

Tauloto – Tusi Paia: Faataoto 1:10 ‘‘Lo‘u atali‘i e, ‘āfai e fa‘a‘ole‘ole ‘iā te oe tagata agasala, ‘aua ne‘i e usiusita‘i i ai;”

Faitauga - Tusi Paia: 2 Samuelu 13:1-15, 23-28

Upu Folafola

E matautia le malosi o le mana I mea e te faataga e faalogo iai ou taliga ma ofi atu I lou olaga. Ia talitonu mai I le mea moni lenei, o mea e te faalogo iai, e iai lo latou malosiaga e aafia ai le afuafua o ou talitonuga ma gaoioiga e faia. O le tulaga lea o lo’o tusia ai I le Roma 10:17, e tupu le faatuatua I le faalogo. O leisi tulaga taua, o le fefe, e oo mai foi I le faalogo. O le mea e te faalogo iai e fua iai ou uiga, o amioga ma mea e faia. O le tulaga lea e taua ai le filifili lelei ma le faaeteete o tagata e te faalogo iai. Afai e iai se tagata e te faalogo atu I ana upu e faatoilalo pe faaletonu ma afaina ai lou loto, alu ese mamao ma lea tagata ia vave. 

E toatele failauga o le Tusi Paia e latou te aveesea le mataupu o le ola faapaiaina mai a latou lauga, faamolemole taofia lou toe faalogo iai. O so’o se tagata e na o le talanoa I le faatamaoaigaina ma isi mataupu e faafiafiaina ai tagata, e latou te ta’ita’i le toatele I seoli. 

E iai foi tagata o loo I lou siomaga e te fia saili lava I a latou fautuaga mai lea taimi I lea taimi. Faamolemole ia e faaeteete I tagata e latou te faufautua ia te oe. I le tatou faitauga mai le Tusi Paia o le aso, e sese le tagata ma alu iai Amanono mo se fautuaga, ma na mafua mai ai le faatupuina o se faafitauli tele I lona aiga ma o’o atu ai ina fasiotia o ia (2 Samuelu 13:23-29). E ui ina lelei le maua o ni fautuaga aua e fai mai le Faataoto 11:14 o le toatele o le au faufautua e maua ai le saogalemu. E tatau foi ona e iloilo toto’a I tagata e te sulu iai mo ni fautuaga. Ia e suesue muamua I le olaga o lena tagata, suesue poo le a le latalata o lana mafutaga ma le Atua aua foi o so’o se fautuaga e na te aumaia, e fua lava I ona talitonuga. O ona manatu ea e faavae I le upu a le Atua po’o ona lava manatu ma mafaufauga faale tagata?

Ina ua maea ona matou faatauina le anoano o eka o fanua mo le nofoaga o togalauapiga a le Ekalesia, na fautuaina a’u ia aua nei toe faatauina nisi fanua mo le Ekalesia ae ia faia loa se pa e pa ai fanua ia ua maea ona faatau. Peitai ane, ina ua maea ona ou faalogo I nei fautuaga, ou te lei fesili I le Atua ae ua amata loa le galuega e fau le pa. Ina ua maea se taimi ae faapea mai le Atua ia te au ‘o ai na fai atu ia te oe e fausia se pa? Na ou fai atu ea se mea e gata ai le tele o le lotoa a le Ekalesia?’ Faafetai I le Atua na ia fetalai mai ma ua faalauteleina pea le fanua o le Ekalesia. O le taimi lenei, o le nofoaga o le togalauapiga, ua avea ma taulaga tele. Ae e te lei faalogo ini fautuaga, ia e faamautinoaia e le feteenai ma le Upu a le Atua. E le gata I lea e tatau ona o gatasi ma le fuafuaga a le Atua mo lou olaga. I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 28 MATI 2023

Manatu Autu:  Sa I le Amataga le Upu (In the Beginning was the Word)

Tauloto – Tusi Paia: Ioane 1:1  ‘‘Sa i le amataga le ‘Upu, sa i le Atua le ‘Upu, o le Atua fo‘i le ‘Upu.”

Faitauga - Tusi Paia: Ioane 1:1-10

Upu Folafola

O le fa’amatalaga faigofie, ‘Sa i le amataga le Upu’ e matua tele faamatalaga e faauigaina ai. O se tasi o ia uiga e faapea, ae le’i iai se mea e tasi o mea ua iai nei, ae sa iai le Upu. I se isi faaupuga, ua silafia e le Atua le amataga o mea uma aua o ia sa faia mea uma (Ioane 1:3).

O le aso e umusā ai lou fale fou, o le amataga lena o lou aumau i lena fale, a’o le aso na ‘eli ai le faavae o lou fale, o le isi  amataga fou lena. O le aso na amata ai ona tusi le ata o lou fale e le tusiata, o le isi foi amataga fou lena, a’o le aso na e mafaufauina ai le faia o lou fale o le isi foi amataga fou lena.

A tautala faatagata soifua, o le aso sa feiloai ai ou matua ma manatu e fai sa la tama ma e fanau mai, o le isi amataga lena o lou fale, aua ana e le fanau mai, e le mafaufauina e ou matua le fauina o le fale. I le Ieremia 1:4-5, o lo’o faapea mai, ae lei faia oe e le Atua, ua ia silafia oe. O lona uiga o lou fale ua leva ona foafoaina mai i le finagalo o le Atua ae e te lei fanau mai. Sa iai lava le fuafuaga fa’ata’atia a le Atua I le fale o le a e fausia, ae e te lei fanau mai. O lona uiga e tusa lava po’o le a le tulaga o lo’o e iai nei, e amata mai ma maua’a i le Atua. O le talalelei lea mo le fanau a le Atua, talu ai sa iai le Atua i le amataga o mea uma, ma o mea uma sa ia faia, o lona uiga o ia e pulea mea uma – O le Upu. O lona uiga, o lou  ta’utino atu ma folafola le Upu o le Atua i so’o se tulaga o lou olaga, e te pulea ai lea tulaga.

Ae le’i afua mai mauga, sa  iai lava le Atua (Salamo 90:1-2). O le mafua’aga lea e fai mai le Mareko11:22-24, afai e te fa’atuatua, e mafai ona e fai atu i so’o se mauga e aveesea, e taunuu lava. O se fa’ataitaiga, afai o se mauga o se ma’i o lo’o taumafai e faatoilalo oe, e liaieseina I le upu a le Atua I le Isaia 53:5, o loo faapea mai, aua o faalavalava o Iesu e te malolo ai. Afai o le mauga o le toilalo, ia e liaieseina I le Upu mai le Teuterenome 28:13 o loo faapea mai, e fai oe ma ulu ae le o le i’u. Afai o le mauga o le mativa o lo’o faafefe ia te oe, ta’u iai le upu a le Atua i le 2 Korinito 8:9, o Iesu sa faamativaina ina ia e faatamaoaigaina. O le Upu e te manumalo a’ia’i ai i le suafa o Iesu Keriso.

Sa’ili’ili i le Upu mo le fa’aaliga e uiga i le mauga lena o lo o punitia ai lou auala i luma, ma amata loa ona e ta’utino atu iai i le faatuatua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 27 MATI 2023

Manatu Autu:  E sili ona lelei o lou iuga I lo lou amataga (Your latter end shall be greater than your beginning)

Tauloto – Tusi Paia: Failauga 7:8 ‘‘E sili ‘ona lelei o le i‘uga o se mea i lona amataga. E sili ‘ona lelei o lē ‘ua ‘onosa‘i i lē ‘ua loto fa‘amaualuga.”

Faitauga - Tusi Paia: Sakaria 4:8-10, Iopu 8:7

Upu Folafola
A faatulaga vaega o lou olaga e fua I le taua, e sili atu le taua o le faaiuga I lo le amataga. E le afaina po’o le a lou amataga, o le itu e pito sili ona taua, pe faapeī mai lou iuga. 

O lou iuga e le faapea e fua ini ou mafaufauga matagofie o loo iai, ae e fua I au faaiuga ma galuega o loo faia I le taimi nei. E iai laasaga e tatau ona e faia e aofia ai faiga taulaga e tatau ona faia pe afai e te fia ausia ni mea tetele. Ia e talitonu mai I le tulaga moni lenei, tusa poo le a lou naunau ma toaga e tatalo, ae afai e leai sau galuega e faia ina ia ausia, e leai lava se mea e tupu. O Solomona, I le 2 Nofoaiga Tupu 1:6-15, na ia faia se taulaga mu e lei faia muamua e se tagata, ona ia maua lea o se faamanuiaga e lei maua muamua e se tagata. E matua manino, afai e te naunau e totogi le tau ma fai galuega uma e manaomia, afai e te naunau e suia le tala o lou olaga ia sili atu ona lelei, e matua sili atu ona lelei lou iuga I lo lou amataga. 

I le Kenese 32:3-7, o loo faamau ai na maua e Esau na o se vaega o le faamanuiaga, peitai I le taimi mulimuli ane na la feiloai ai ma Iakopo, na sau Esau ma ni tagata leoleo se 400. E o’o atu I le Kenese 33:4-9, ina ua maea ona feiloai ma fusifusi le au uso, na faliu atu Esau ia Iakopo ma faapea atu, e leai se mea e na  te manaomia aua ua lava ma totoe mea ua ia maua. O loo manino ai, na toe maua e Esau le faasaolotoga ma le pule e gausia ai le amo a lona uso nai lona ua e pei ona folafola e lona tamā I le Kenese 27:40. 

O le tagata e faitaua le Tusi Paia, o le tulaga pito I maualalo I le Ekalesia Egelani, ma o le tulaga lea o lo’u tama I le Lotu I le tele o tausaga talu ai. I le asō, e ala I le alofa tunoa o le Atua, o a’u o se atalii o se tagata faitau Tusi Paia I le lotu, o loo galue nei vavalalata ma le Taitai Aoao o le Ekalesia Egelani (Archbishop of Cantenbury), e faia le toe faatalaleleiga I Peretania. O lenei tulaga siitia ma le faaeaina, ua na o le Atua e mafai ona faia. 

Le au pele e, faalatalata I le Atua ma ia e filifiligā ina ia sili atu ona lelei o lou iuga I lo lou amataga. Ou te faia se faaperofetaga ia te oe I le aso, o ou aso mulimuli o le a sili atu ona lelei I lo lou amataga, I le suafa o Iesu. 

O au galuega ma mea e faia I le taimi nei, e fua iai pe sili atu ona lelei lou iuga I lo lou amataga, filifili ma le poto, I le suafa o Iesu Keriso, Amene.  

OPEN HEAVENS

MATALA LE LAGI MO LE ASO SA 26 MATI 2023

Manatu Autu:  Pe a fa’ataga e le Atua mauga 2 (When God allows mountains 2)

Tauloto – Tusi Paia: Isaia 62:2 ‘‘E va‘ai nu‘u ‘ese i lau amiotonu, ma tupu uma latou te va‘ai i lou mamalu. E igoa fo‘i oe i le igoa fou, e ta‘ua mai e le fofoga o le ALI‘I..”

Faitauga - Tusi Paia: Kenese 41:8-44  

Upu Folafola
O le tele o taimi afai e faataga e le Atua mauga e tutū i o tatou ala e mafua ona o loo finagalo e faailoa oe i le lalolagi. Na te faaaogaina lou manumalō i le mauga poo le faafitauli e fa’aali atu ai i le lalolagi mea ua ia faia i lou olaga. I le 1 Samuelu 17:1-51 a’o fesāvalia’i solo Koliata ma valaau tau fa’amata’u i le nuu o Isaraelu, o le taimi lea o loo faalauiloa e le Atua le mauga po’o le faafitauli ia iloa e tagata uma lona telē. A’o tu’ualaga Koliata e ta’u atu I le fanauga a Isaraelu lona malosi, e leai ma se isi na iloa Tavita i lea taimi. E leai se isi na iloa ua i ai le fa’auuga i luga o se tamaititi mai se aiga lē taualoa, e le’i iloa e se tasi o loo i ai se tama itiiti na fasia se leona ma se urosa i ona lima. Ua sauni le Atua e fa’ailoa Tavita i le lalolagi atoa. Faafetai I le Atua e le’i sola ese Tavita mai le mauga tele sa i ona luma i lea aso aua o le taimi na tu ai i luga o le tino oti o Koliata ma si’i ae i luga le ulu o le fili na ia fasia, na iloa ai e tagata uma o ia o se tagata tulaga ese lona faapitoa.

Ou te tatalo ia fa’aaoga e le Atua le mauga o lo’o lua fetaia’i o se avanoa e fa’ailoa ai lona mamalu i luga o lou olaga i le lalolagi atoa I le suafa o Iesu. Fai mai le Mataio 5:16 ‘Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.

E viia le Atua pe a susulu le malamalama o lana fanau ma tafiesea ai le pogisa ona o mauga. A tupu se faafitauli i lou ofisa, atonu o le avanoa lea ua saunia e le Atua e faasusulu ai lou malamalama i lou ofisa po’o le galuega. A tula’i mai se faalētonu I totonu o lou aiga o le avanoa lea ua tapena e le Atua e faailoa ai i tagata uma o lou aiga o loo i ai se atali’i fa’au’uina o le Atua o loo latou mafuta, ma ta’ita’i atu ai tagata o lou aiga ia te ia. Aua e te sola ona ua e fefe pe palaai I le faafitauli, faasaga I ai ma fa’ato’ilalo le faafitauli.

Ua tatou iloa i la tatou Tusi faitau o le asō o Iosefa sa ia faamatala ni miti a’o i ai i le falepuipui ae mulimuli ane maua lona avanoa e faamatala ai le miti a le tupu ma fa’ailoa ai Iosefa e le Atua i le lalolagi atoa. E tatau ona e filifiligā ma toaga e atia’e oe ina ia faapea ona o’o mai le aso e finagalo le Atua e faailoa atu oe i le lalolagi a ua e lava tapena ma sauni e manumalō i mauga e ala i lona alofa tunoa. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 25 MATI 2023

Manatu Autu:  Pe a fa’ataga e le Atua mauga 1 (When God allows mountains 1)

Tauloto – Tusi Paia: Faataoto 24:10 ‘‘‘Āfai ‘e te fa‘avaivai i le aso vale, ‘ua itiiti lava lou malosi.”

Faitauga - Tusi Paia: Tanielu 3:1-30  

Upu Folafola

Ua tatou iloa e moni e mafai e le Atua ona fo’ia faafitauli uma, a latalata le lua mafutaga ma ia e mafai ona e maitauina e i ai a taimi e fa’ataga ai e le Atua ni mauga poo faafitauli i le ala e te ui ai. O le tulaga lelei, afai na te faatagaina se mauga e tu i le ala, na te faataga ona ua ia silafia e mafai ona e āea le mauga. Mo se fa’ata’ita’iga I le ma’i na o’o iā Iopu, na fa’ataga e le Atua tau lava o mea na ia silafia e gafatia e Iopu ona ui ma manumalō ai. Fai mai 1 Korinito 10:13 e lē tuuina atu e le Atua outou i se faaosoosoga e sili i se mea ua outou lavātia ae na te saunia foi se ala e sao ai outou.

O nisi taimi e faataga e le Atua mauga/fa’aosoosoga I olaga o lana fanau ina ua finagalo e siitia o latou tulaga i le lelei sili atu. I luma mai o so’ose faaeaina e I ai le suega e tatau ona su’e ma pasi e le uso o le a siitia lona tulaga. E leai se faiaoga fai suega na te ave ni fesili o mataupu a aoga maualuluga i se tamaititi aoga o vasega laiti. E lē faatagaina e le Atua se faafitauli e te lē gafatia e te lua fetaia’i.

I le Tanielu e 3 ina ua tuana’i le fefefe I le iai i totonu o le ogaumu aasa o Sataraka, Mesako ma Apeteniko, na siitia o latou tulaga. I le Iopu 42:12-16 ua faamatala mai ai iā i tatou, ina ua uma puapuagā na tofotofoina ai Iopu na sili ona faamanuia e le Atua lona taimi mulimuli i lona amataga.

A faataga e le Atua mauga e tutū I le ala e ui ai lana fanau na te ave fo’i iā i latou le fua talafeagai o lona alofa tunoa e manaomia e fetaia’i ai ma ia mauga. O le tulaga faanoanoa, o le tele o taimi e mumusu tagata e fa’aaogā le alofa tunoa ma latou faatagaina ai le faaosoosoga e manumalō iā i latou. E i ai pea le auala e sao ai, po’o le a le itiiti ia e u’umau lea avanoa ina ia e manumalō ai. O iina e te mana’omia ai le fua o le Agaga e ta’ua o le onosa’i. Aua e te saili ‘alofaga i le Atua ona o lo’o e ui i se faafitauli. Aua ne’i e faia le agasala e avea ma ala e te alo ese mai ai i le mauga po’o faafitauli auā a e faia le agasala e te toe fetaia’i foi ma se isi mauga e sili atu le telē.

Tumau i le Atua e pei ona sa fai e Iopu. Aua e te lafoa’i iā te ia i taimi e te feagai ai ma faigata. Aua e te fa’avaivai i aso leaga ma aso vale. Finau ma faamalosi. O le alofa tunoa o le Atua e lava lea e fesoasoani iā te oe. (2Korinito 12:9)

Tatalo

Tamā faamolemole fesoasoani mai iā te a’u ia aua ne’i o’u fulitua ia te oe tusa lava po’o a mea e o’o mai ia te a’u. Ia o’u tumau iā te oe aua na o oe lo’u fesoasoani. I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 24 MATI 2023

Manatu Autu:  Faatino le Upu (Act on the Word) 

Tauloto – Tusi Paia: Iakopo 1:22 ‘‘A ‘ia fai ‘outou ma ē ‘ana‘ana i le ‘upu, ‘ae ‘aua le na ‘ona fa‘alogologo i ai, o fa‘asesēina ai ‘outou e ‘outou...”

Faitauga - Tusi Paia: Mataio 7:24-29  

Upu Folafola
E ese mai tagata e le faaaogaina taliga e pei ona faamatalaina ananafi, e toatele tagata e iai taliga ae ua matua le mafai ona gaoioi e faatino le Upu a le Atua. E mafai ona latou faamatalaina auiliili lauga a faifeau ae peitai e le savavali ai ma faatino. E mafai foi ona latou sii mau mai le tusi o Kenese seia oo I le Faaaliga ae e le faaalia I o latou olaga aua e leai ma se mea latou te faia e tusa ma le Upu a le Atua. O ia ituaiga tagata o loo faamatalaina I le 1 Timoteo 3:7 e faapea:‘ua a‘oa‘oina e lē aunoa, ‘ae lē āu mafai ‘ona o‘o ‘ina iloa lelei o le ‘upu moni’.

O tagata ia e aoaoina I le Upu, peitai, e le mauaa le Upu I totonu I ai latou e mafai ai ona suia o latou uiga. E matua saisaitia lava e le tiapolo ma taofia I latou e faatino mea ua aoaoina ai. Afai o loo e iai I le vaega lea, ou te folafola atu ua faasaolotoina oe I le aso, I le suafa o Iesu. 

O se tasi o ala e saisaitia ai e le tiapolo tagata pe a maea ona latou faalogo I le Upu o le fai mea tuu.  E latou te faalogo ma naunau e faatino le upu e pei ona aoaoina ai I latou, ae fai mea tu’u lava seia oo ina alu ese le faamaufaailoga e faia ai. O le aso na fai mai ai lo’u tama faaleagaga e lalata mai agaga leaga pe a taina pese a le lalolagi ao pese faaleagaga e latalata mai ai Agaga Paia, na ou faaleaogaina uma musika a le lalolagi sa ia  te au. O le po na ia laugaina ai le tumama ma vaai le pefu I lalo o moega, o le po lava lea na ma taunuu ai I le fale ma lou toalua ma sueni uma I luga moega ae faamama itu uma o lo matou fale. E matou te lei faatali seia oo I le aso na sosoo ai. 

O le tulaga tonu lea e te faatinoina ai le Upu a le Atua, ia vave ona faatino. Fai mai le Iakopo 1:23-25, afai e te le faatinoina le upu a le Atua I le taimi lava lena, e faapei e te le o fetuutuunai ou laei ia sa’o ma lelei ao iai I luma o le faata. E le aoga le toe fetuutuunai ae ua leai se faata. Aua e te faatagaina le tiapolo e saisaitia oe, ia e faatino le Upu a le Atua I le taimi lava e te faalogo iai. 

O le faamanuiaga o loo iai I le faalogo I le Upu a le Atua ma faia loa I le taimi lava lena (Iakopo 1:23-25), I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 23 MATI 2023

Manatu Autu:  Faafofoga I le Upu (Listen to the Word) 

Tauloto – Tusi Paia: Ieremia 6:10 ‘‘Po o ai ‘ea ‘ou te fai atu i ai ma a‘oa‘i atu i ai, ‘ina ‘ia latou fa‘alogo mai? Fa‘auta, e le‘i peritomeina o latou taliga, e lē mafaia e i latou ‘ona fa‘alogo mai; fa‘auta, ‘ua fai le afioga a le ALI‘I ma mea e tauemu i ai i latou; ‘ua latou le fiafia i ai..”

Faitauga - Tusi Paia: Mataio 13:3-23  

Upu Folafola
I le maea ai o le faatalatalanoaga o le Upu poo afioga a le Atua i nai aso ua mavae atu, e mafai ona ou faapea atu,  e toatele tagata, e leai ni taliga e faalogo ai I le Upu o le Atua. O le tusi a Faaaliga 2: 7 o loo faapea mai; 

7O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.

O tulaga ogaoga o lou le faalogo i afioga a le Atua, o loo molimau le Tusi a Isaia 6:8-10, afai e te faalogo, ona e salamo lea ma e faamaloloina oe. O le mafuaaga lena, e faia ai pea e le tiapolo taumafaiga uma, e aveesea ai le afioga a le Atua mai o tatou loto, e pei ona faaalia i le Faitauga o le Tusi Paia mo le aso. Ou te mautinoa, o le aso na e tuuina atu ai lou ola ia Keriso, e le na o oe na faalogo i lena savali. E toatele isi na faalogo foi  i ai, ae o le toatele e le’i tuuina atu o latou ola ia Keriso. E mafua ona e ui lava e iai o latou taliga, ae na punitia e le tiapolo o latou taliga faaleagaga. E le gata i lea, e toatele le au Kerisiano ua tele tausaga o o i le lotu; ma faalogo i Faifeau o lauga I ni lauga mamana, ae e leai se aafiaga i o latou olaga, ona ua pupuni e le tiapolo o latou taliga ma taofia ai i latou, e nofo pologa pea I aso uma. Ou te tatalo o le a le punitiaina ou taliga faaleagaga, i le suafa o Iesu.

E iai foʻi tagata, o ē e filifili na o se vaega o le afioga a le Atua e faalologo I ai. O nei tagata, ua le toe faalavelave I ai le tiapolo, ona ua pupuni lava e latou o latou lava taliga (Ieremia 17:23) Latou te le mananao e faalogo i lena mau o le Tusi Paia o le a taʻusalaina mea latou te faia e faapea e sese. Afai e faalogo nei tagata ia te aʻu o faapea atu "Ua fetalai mai le Atua e tatau ona tatou ola faapaiaina, aua e paia o ia" ae ua latou fai mai, "E leai ea se isi mea e lauga mai ai le la tagata".

O lo’o manino le Salamo 95:6-8, afai e te fia faalogo i le siufofoga o le Atua, “Aua le faama’a’aina lou loto”. O nisi o i tatou ua faama’a’aina o tatou loto; tatou te le toe fia faalogo. Manatua le aioiga a le mauoa i le Luka 16:19–31 ina ua ia fai atu ia Aperaamo e auina atu Lasalo e talai atu i ona uso. Na faapea atu Aperaamo ia te ia, o ona uso o lo’o i ai perofeta o lo’o talai atu iai latou i le lalolagi; afai latou te le faalogo ia i latou, latou te le faalogo i se isi. O lo latou iuga o le a faatafunaina.

O lo’o iai alii ma tamaitai o lo o galulue mo le Alii, o lo’o aoaoina oe i le upu moni i le taimi nei- o le tatou faamalosiau lenei I le Upu a le Atua, o se molimau ola lena mo lenei mau. Faalogo nei loa, ina ia aua nei e toe salamo ane mulimuli  I le faafanoga e faavavau. Tatala lou loto I le Upu moni a le Atua, I le suafa o Iesu, Amene.