Samoan Devotional

OPEN HEAVENS
MATALA LE LAGI MO LE ASO SA 12 MATI 2023

Manatu Autu:  E Silafia oe e le Atua (God can see you) 

Tauloto – Tusi Paia: Salamo 33:18 ‘Fa‘auta, o lo‘o silasila le ALI‘I i ē matata‘u ‘iā te ia, o ē fa‘amoemoe i lona alofa’

Faitauga - Tusi Paia: Ioane 14:18

Upu Folafola
E masani ona i ai tali tatou te manatu o le a tali mai ai le Atua i faafitauli e tele tatou te fetaia’i. Peita’i mulimuli ane, afai e ese se tali tatou te maua ona amata lea ona tatou ofo pe na faafofoga ea le Atua iā tatou tatalo. Fai mai le Tusi Paia I le tusi o Faataoto 13:12 “o le faamoemoe ua tuai ona taunuu e faanoanoa ai le loto, a’o le mana’o ua taunuu o le laau o le ola lea.”

Ou te mana’o e fa’ailoa iā te oe, o le Atua e ati lana silafaga, e tali mai fo’i i au tatalo i se auala e te lei mafaufau e mafai ona tupu, i le suafa mamana o Iesu. O Hana, sa fai ma ana masani le alu i Sailo e tapua’i ma fai taulaga I le Atua o ‘au mo le tele o tausaga. Peitai na te lei iloa, ina ua ia tuua lona aiga mo Sailo i se tasi aso (1 Samuelu 1:3-18) o lana alu mulimuli lea i Sailo o se fafine pa.

I ni nai tausaga ua mavae, sa matou o ai i Haiti e fai se sauniga tāla’i. O lea sauniga sa faasalalau i luga o a latou leitio. A’o fai le lauga sa ou ta’u atu ia i latou le upu faa perofetaga a le Atua e faapea, “E i ai se tasi o loo faafofoga mai i le taimi nei, ua leai se malosi i lona tino, ua fetalai mai le Atua e ta’u atu iā te oe ua ia toe faafoisia lou malosi.” O se tamā gasegase ua lē toe mafai na gaioi. Sa taoto I lona moega I lona fale e mamao ese ma le nofoaga sa fai ai le sauniga, na faalogo ia I le Upu o lauga i luga o le leitio ma malōlō ai i le taimi lava lea. Na tamo’e mai lenei tamā I le nofoaga sa matou I ai ma alaga “O a’u lenei le tagata o loo fetalai mai ai le Atua.” Ou te lē iloa poo le a le umi o tatalo lenei tamā ae pe ua faa vaivai fo’i lona loto pe leai. Peitai ou te mautinoa e lei i ai sona manatu o le a auina mai e le Atua iā te ia se failauga mai Aferika. Faafetai I le Atua e lei faavaivai le uso, sa pipi’i pea i le Atua ma faalogologo I le polokalame o le sauniga tāla’i.

Ou te lē iloa poo le a le umi o e tatalo, po ua amata leai sou faamoemoe, peitai e silasila le Atua ia te oe e tusa fo’i pe na te aumaia se auauna a le Atua mai se tuluiga aupito mamao o le lalolagi, e tali lava iā te oe i se taimi e lē o toe mamao i le suafa o Iesu. Faatalitali pea I le Atua na te lē fa’amāina oe. (Salamō 27:14)

Tatalo
Tamā ou te talitonu o loo e silasila i mea uma o loo o’u ui ai. Faamolemole foai mai le malosi ia ou lototele ai, ma fesoasoani mai iā te a’u ia ou tumau pea ma maua’a i le faatuatua I le suafa o Iesu Keriso. Amene.

OPEN HEAVENS
MATALA LE LAGI MO LE ASO TOONAI 11 MATI 2023

Manatu Autu:  O le faamaoni e fanau mai ai le faamaoni (Commitment begets commitment) 

Tauloto – Tusi Paia: Mataio 22:37 ‘Ona fetalai atu ai lea o Iesu ‘iā te ia, “‘‘E te alofa atu i le Ali‘i lou Atua, ma lou loto ‘atoa, ma lou agaga ‘atoa, ma lou manatu ‘atoa.’’

Faitauga - Tusi Paia: Kenese 22:1-18

Upu Folafola
I tausaga e tele ua mavae a’o to’a laiti le ekalesia Redeemed Christian Church of God sa fai mai se tasi o o’u afafine fa’aleagaga ia te a’u “Tamā e tatau ona e auai i la’u faaipoipoga.” Sa ou ata ma faapea atu, “Ua lelei sei o’u vaai i la’u kalena mo se aso avanoa.” Mai aso na totoe o le tausaga lenā sa leai se Aso Toonai avanoa faapena le tausaga e soso’o atu i ai. Faatoa maua le Aso Toonai avanoa ia Iulai o le isi tausaga. Sa fai mai le afafine “Viia le Alii o le aso lenā o la’u faaipoipoga.” Ua o’o mai le tausaga o le faaipoipoga ae maliu tonu ai si o’u tinā i le masina o Iulai a’o o’u I Lonetona I le galuega. Talu ai ou te lei tusia le faaipoipoga i la’u kalena na manatu ai lo’u toalua o se Aso Toonai avanoa lea ma faapea ai, “Ioe, o le aso lea e falelauasi ai tinā.”

Ou te alofa tele I si o’u tinā. O a’u le ui’i o lana fanau pau foi lea o sana tama tama (atalii). Peitai ona o le naunau o lenei tamaita’i ia o’u I ai I lana faaipoipoga, ou te lē mana’o fo’i la e fai se mea e pau ai lona loto. Sa leai se isi aso avanoa ma sa ou manatu loa e fai le maliu o tinā I le Aso Faraile ia mafai ai ona o’u alu i le faaipoipoga I le Aso Toonai.

A silasila mai le Atua i se tagata faamaoni ma ia silafia se isi e faia soo se mea e faataunuu ai lona finagalo e faamaoni le Atua i lea tagata. Sa faamaoni atoatoa le loto o Aperaamo i le Atua, faamaoni lea na usitai ai ma le malie atoa o lona loto e ave lona atalii e osi ai le taulaga e faataunuu ai le finagalo o le Atua. O le ala lea o le faamaoni o le Atua e faamanuia Aperaamo. Na o’o lava I le tulaga ua fetalai faapea le Atua. “Ua ou tauto a’u ia te a’u, ua e faia lava lenei mea, ua e lē taofia lou atalii, o lou atalii e toatasi.” (Kenese 22:16). 

O nisi tagata e o’o lava i le totogiina o le 10% o a latou tupé maua (sefulua’i) I le Atua e lē faamaoni ai ae manana’o e faamanuia le Atua ia I latou. O nisi o le aufaigaluega a le Ekalesia e lē lava le fa’ataua o le galuega a le Atua, a lē tuai e matua’i le alu lava i fono a le au galulue ae manana’o e silasila le Atua ia latou pisinisi ma faamanuia. O nisi faifeau e seāseā anapopogi ma tatalo mo le galuega ua avatu e le Atua i o latou lima ae manana’o e galue le Atua e faatupu ma ola le galuega. E silafia lelei e le Atua le maualuga ma le maualalo o lou loto faamaoni I lana galuega. O le fua faatatau fo’i lenā o lana faamanuia iā te oe. O e faamaoni I le Atua e pei o lou mana’o e tausi mai ia iā te oe? I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 10 MATI 2023

Manatu Autu:  Faatalitali I le Atua (Waiting on God)

Tauloto – Tusi Paia: Isaiah 40:31 ‘‘A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.

Faitauga - Tusi Paia: Salamo 27:13-14

Upu Folafola
E le toatele ni tagata e malamalama I le uiga moni o le faatalitali I le Atua. O le a ou taumafai e faamatala e faatusa I se tagata galue I se faleaiga e faatalitali e laulau atu meaai I tagata e o mai e aai I se faleaiga taugata lava. E faatali le tagata faigaluega sei maea ona alala lelei I lalo malo ona faatoa alu atu lea e tusi ma faamau le oka o meaai. E galue ia mautinoa le tagata faigaluega ia vave ona taunuu mai le meaai na okaina ma ia sa’o e tusa ma faatonuga o le faiga o le meaai. 

Fai mai le Aposetolo o Paulo I le Efeso 6:13 O le mea lea ‘ia ‘outou tago ai i ‘ofutau ‘ato‘atoa mai le Atua, ‘ina ‘ia ‘outou mafaia ‘ona tutū ma tete‘e atu pe a o‘o i le aso vale, pe a uma fo‘i ‘ona ‘outou faia o mea uma tou te tūtūmau ai lava. A maea ona faia uma mea e manaomia e faia I luma o le Atua, ia tutumau ai lava. E amata loa ona e auauna ia te ia I le manumaloina o agaga, ia e tulimatai po’o a mai I latou, totogi au sefuluai, ia fai taulaga, avatu le uluai fua o au galuega ma mea uma e te silafia e tatau ona faia e tusa ma lana Upu, ma e pau le tulaga o loo totoe, ia e tutumau ai lava. E tatau ona e fatalitali ia te ia ma fesili atu; ‘Le Alii e, o le a le isi mea o lo’o e finagalo ia faia?’. O le taimi lava e te maua ai le tali, oso loa ma faatino. 

Afai e o atu I latou o loo faatalitali ia te ia I le tatalo, e tatau ona tatalo e tusa ma le ala o loo faasino mai e ia, e latou te tataloina ia te Ia lana Upu. Ona o lana upu, e vave ona tali mai. E le faapea e na o le tatalo I le taimi e fia tatalo ai, o le tele o taimi, o loo musumusu mai e tatalo tusa pe latou te le fia tatalo. O I latou e faatalitali I le Alii, e latou te lē saili le fiafiaga I le olaga nei, e pau le mea o loo naunau iai ia faamalie lo latou matai. Afai e faapea atu le Atua ‘ou te manaomia uma tupe na o lo’o I lau teugatupe mo le galuega lea’, e le faatali ae faia loa. E latou te fiafia e faia so’o se mea o loo finagalo ai le Alii. 

O lenei, e iai taimi e te matua fiafia ai I le auaunaga a le tagata I le faleaiga ma e naunau e avatu iai se taui o se tupe faasili. O le mea faasili e taui ma foai e le Atua ia te oe pe afai e te faatalitali ia te ia, o loo tusia I le Isaia 40:31, fai mai e na te faafouina lou malosi, o lona uiga o le ma’i ma le tino matua e le toe iai sona malosi ia te oe. E avea o ia ma au fomai, e tausi o ia ia te oe. E le gata I lea, e na te avatu apaau e pei o aeto ina ia e lelei ai. O lona uiga e siitia lou tulaga e le faamatusalia I seisi. O tagata tautaua ma tauoloa e latou te valaau o oe e te tautaua ma tauoloa. E matua siitia lou tulaga ma mea e te ausia e faigata e nisi tagata ona maua ma ausia au metotia. Ia e faamaoni e faatalitali I le Atua e amata atu I le aso, e na te tauia I latou o lo’o saili ma le faamaoni ia te ia (Eperu 11:6). I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 9 MATI 2023

Manatu Autu:  I Ona Luma  (In His Presence)

Tauloto – Tusi Paia: Salamo 16:11 ‘‘E te fa‘ailoa mai ‘iā te a‘u le ala o le ola; o i ou luma le fiafia e malie ai; o i lou itū taumatau le ‘oli‘oli e fa‘avavau’

Faitauga - Tusi Paia: Salamo 24:3-6

Upu Folafola
O luma o le mamalu o le Atua Maualuga ma le Silisili Ese, o se nofoaga e pito sili ona lelei e iai se tagata. O I latou e tele taimi e mafuta ai I ona luma e manumalo lava I taua o le olaga lenei ae le o le itu e toilalo. Na faatoa sau lava Elia mai luma o le Atua I le 1 Tupu 17 ae ia faia loa se folafolaga e le toe iai se timu po’o se ua e paū mo le tolu tausaga ma na taunuu lava. Afai e te naunau e te pulea le tulaga o le olaga o loo e iai, o le mea e te manaomia o le nofo ma mafuta I luma o le mamalu o le Atua. O se tulaga lelei o lo’o manino lelei tapulaa e mafai ai ona e nofo I luma o le mamalu o le Atua e pei ona faaalia I le faitauga o le Tusi Paia o le aso. O lo’o faasolo atu I lalo:

1.       E tatau ona mama ou lima. I le 2 Korinito 6:17, o loo fetalai mai le Atua: 17O lea, ‘Ia ō mai ai ‘outou nai totonu ‘iā te i latou, ma ‘ia ‘outou vavae mai, ‘ua fetalai mai ai le Ali‘i, ‘aua fo‘i tou te papa‘i atu i se mea leaga; ‘ona ‘ou talia ai lea o ‘outou. E tatau ona e faaeteete I mea e tago iai ou lima. Ou te fai lava I la’u fanau ia faaeteete I mea latou te sainia. Afai e sese se ripoti, pe le sa’o faamaumauga o loo iai, aua nei faapipiiina iai lau saini. Aua e te gaoi, aua e te faaseseina ripoti, mataala I mea e tago iai ou lima. 

2.       E tatau ona mama lou loto. Fai mai le Mataio 5:8 ‘Amu‘ia ē loto mamā; auā latou te iloa atu le Atua. Ia e faaeteete I mea e te teu I lou loto ma mea e te mafaufau loloto iai pe afai e te naunau e te nofo I luma o le Atua. 

3.       E le tatau ona siitia lou loto I mea ua e maua. Fai mai le Kolose 3:1-3 1O lenei, ‘āfai ‘ua toe fa‘atūina ‘outou fa‘atasi ma Keriso, ‘ia ‘outou sā‘ili i mea o i lugā o i ai Keriso, o lo‘o ti‘eti‘e i le itū taumatau o le Atua. 2‘Ia ‘outou loto lava i mea i lugā, ‘ae lē o mea i le lalolagi. 3Auā ‘ua oti ‘outou, ‘ua lilo fo‘i lo ‘outou ola fa‘atasi ma Keriso i le Atua. E tatau ona e suesueina lelei poo le a le mafuaaga e te faatino ai mea o loo e faia. O taitaina ea oe ona o le oa ma le tamaoaiga poo mea faaleagaga? Fai mai le 1 Ioane 2:15 ‘Aua tou te manana‘o i le lalolagi, po o mea o i ai i le lalolagi. Pe ‘āfai e mana‘o se tasi i le lalolagi, e lē o ‘iā te ia le alofa i le Tamā. 

4.       E le tatau ona e pepelo. O loo faaalia manino I le Faaaliga 22:15 A ‘ua i tuāpā o ulī, ma ē fa‘ataulāitu, ma ē faita‘aga, ma ē fasioti tagata, ma ē ifo i tupua, ‘atoa uma lava ē ‘ua loto i le tala pepelo ma latou faia. Afai o oe o se tagata tala pepelo, po’o e ‘ae’ae foi I manuia mai ni tagata pepelo, e tuu oe e le Atua I fafo ae le o ona luma. 

E te agavaa ea e iai I luma o le mamalu o le Alii? Afai e leai, ia toefuataina loa lou olaga, I le suafa o Iesu, Amene. 

OPEN HEAVENS
MATALA LE LAGI MO LE ASO LULU 8 MATI 2023

Manatu Autu:  E Taua ou laei (What you wear matters)

Tauloto – Tusi Paia: Sakaria 3:4 ‘Ua ia tali atu ma fetalai atu i ē na tutū mai i ona luma, o lo‘o fa‘apea, “‘Ave ‘ese ia o ‘ofu ‘ele‘elea ‘ua ‘ofu ai o ia.” ‘Ua ia fetalai atu fo‘i ‘iā te ia, “Fa‘auta, ‘ua ‘ou ‘ave‘esea au amioletonu i ou luga; ‘ou te fa‘a‘ofu fo‘i ‘iā te oe i le ‘ofu matagofie.”.’

Faitauga - Tusi Paia: Mataio 22:9-13

Upu Folafola
E taua ou laei e ofuina. E ui e moni e silasila le Atua I le loto (1 Samuelu 16:7), ae moni foi o mea o lo’o i totonu ia te oe, e faaalia mai lava I fafo. O laei e oofu ai teine talitane e le tatau ona tutusa ma laei e oofu ai fanau a le Atua. Ina ia faamanino lelei lenei mataupu I tamaiti o le aoga Tusi Paia na ou aoaoina, na ou fa’atauina ni moli se lua e tutusa lelei le lapopoa ae lanu samasama le tasi ae lanumeamata le isi. Ona ou tu lea I luma o le vasega ma ou fai atu po’o fea o moli ia e ono mananao ai. Na latou filifilia uma le moli lanu samasama aua ua latou manatu, a samasama o lona uiga e pula ma e tatau ona suamalie. Na ou fesili iai pe faapefea ona latou iloa, ae fai mai e iloa i le lanu i fafo. O le feau autu lena o lo’o tau faamalamalama atu. 

O laei e te ofuina e taua tele. I le Mataio 22:1-14, sa iai se tupu sa savalivali solo I le au valaaulia I le faaipoipoga a lona atalii ma na ia maitauina se tamā e le talafeagai ona laei, ma o lea na ia tulia I fafo. 

Na ou talanoa I se tasi o o’u aiga e fiafia lava e ofu I ofu o le lalolagi. Na ou fai atu iai ‘o oe o se tagata e mai se aiga lelei. O lo’o tilotilo mai le fili iai tatou, afai e fuafua e osofai mai, e latou te tilotilo mo se tagata I lo tatou siomaga e osofai, e latou te suea se tagata e iloa gofie e ese mai. Ua na o oe lava le tagata e ese. Afai latou te mananao e osofai mai, e faigofie ona latou filifilia oe’. Na vave ona suia le mafaufau o le tagata lea. 

E te manatua le tala ia Patimaio I le Mareko 10:46-52. Ina ua faalogo ua valaau Iesu ia te ia, o le mea muamua na ia faia o le tiai ese lona ofu. Na ia faapea ane I lona atoaga ‘ou te le toe ofu e pei o se tagata aisi, ou te le toe aisi, ou te le toe faanoanoa, ou te le toe nofo I le pogisa’.Afai e lafoai lou ola ia Iesu Keriso, e tatau ona iai le suiga I ou laei. 

I le Mareko 5:25-34, na faapea mai le fafine puna toto ‘ ia tau lava ina ou pai atu I ona ofu’. O laei o Iesu e iai le faauuga na malolo ai o ia. Fai mai le Galuega 19:11-12, o solosolo ma ofu na aumai mai ia Paulo e fai ai faamalologa ma faasaolotoga. O ou laei e taua ma e tatau ona viia ai le Atua I taimi uma, I le suafa o Iesu, Amene. 

OPEN HEAVENS
MATALA LE LAGI MO LE ASO LUA 7 MATI 2023

Manatu Autu:  O Lē e vavao I le Matagi (The Storm Stiller)

Tauloto – Tusi Paia: Mareko 4:39 ‘Ona tula‘i lea o ia ma na vavao atu i le matagi, ‘ua fetalai atu fo‘i i le vai, “Fa‘alologo ia, ‘inā malū ia.” ‘Ona mate lea o le matagi, i le ‘ua matuā malū.’

Faitauga - Tusi Paia: Mareko 4:35-41

Upu Folafola

O se afā o se faafitauli sili ona tele ma mamafa tū ma e le mafai e se tagata to’atasi ona ia fo’ia. Peitai o nisi afā e mafai 

ona vavao, ma ina ua ou suesue I le Tusi Pa’ia, e mafai ona tupu pe afai e galulue faatasi le Atua ma le tagata. 

I le taimi sa tupu ai le afa i le faaipoipoga i Kana i Kalilaia, sa mana’omia le gaioiga faatasi o auauna faatasi ma Iesu ina ia mafai ona vavao le afā (Ioane 2:1-10). Ana faapea latou te fefinau’i i le asuina o le vai i totonu o ipu omea tetele, ma auina atu i le pule o le tausama’aga, semanū e le mafai ona  vavao le afā.

I le 2 Tupu 4:1-7 ina ua fetaia’i le ava a le perofeta ua maliu ma se afā semanu e aveesea faamalosi ai lana fanau tama e to’alua, sa faatonuina o ia e aoina mai ni  ipu omea lē susua ma sasa’a iai le tama’i suau’u sa ia te ia. E ui ina lagona e lea tina le lē talafeagai o lea faatonuga, ae sa ia faia pea lana matafaioi i lona usita’ia, ona faia lea e le Atua lana pitola’au, o le fa’atuputeleina o le suau’u. A mafai ona e galue felagolagoma’i ma le Atua, e fesoasoani mai o ia i le vavaoina o so’o se afā.

I ni tausaga ua tuanai atu a’o tapenapena se polokalame mo le itu i Mātū o le atunuu, sa faailoa mai ia te  a’u e faapea o afa oneone e masani ona tutupu ai, e ono lolofia ai le va’ai a tagata. O la’u tali, “Se’i va’ai pea iai”. I lenā afiafi i le taimi na ou taitaiina ai le polokalame i fafo, ona ua le ofi tagata i le tama’i falesa sa iai, sa faafuase’i ona tupu mai le afā oneone ma ua amata ona fememea’i tagata. Ona faapea mai o lo’u Tama ia te a’u: “Ia faaloaloa lou lima i luma ma e faapea atu: “Filemu!” Ona ou faia lea o le faatonuga ma sa mate ai le savili i le Taimi lava lena, ma toe to’ulu i lalo i le eleele le oneone, ae fa’aauau le polokalame matagofie. I le Mareko 4: 25-41 sa malaga le Alii ma lona au so’o i le va’a ae tupu loa le afā. Ona tula’I lea o le Alii ma vavao le afā, ma ia fesili ai i lona au so’o: ‘Se a le mea tou te fefefe ai fa’apea? Se a le mea tou te le faatuatua mai ai?” 

Po’o agi ea se afā i lou olaga, ma fa’aumi ona taufaamata’u ia te oe? A o le fesili mo oe e faapea: “Se a le mea e te le faatuatua ai?” E te le o silafia ‘ea, afai e te galue faatasi ma le Atua o le a mafai ona e vavao lena afā? Faalatalata i le Atua e ala i lau tatalo, ma e nofo I lona mamalu se’ia  fetalai mai o ia i le mea e ao ona e faia e fa’afilemu ai lena afā. O se atalii poo se afafine o le Atua e le tatau ona fefe i se afā. Ae tatau ona e tautala atu e vavao le afā i le suafa o Iesu, ona mate lea ma matua malū ai. 

Tatalo

Tamā faamolemole faailoa mai ia te au le mea e tatau ona faia e vavao ai lenei afā (ta’utino ma faamatala le afā) i lo’u olaga ma lo’u aiga, i le suafa o Iesu, Amene. 

 OPEN HEAVENS
MATALA LE LAGI MO LE ASO GAFUA 6 MATI 2023

Manatu Autu:  Tulaga siitia e le Atua 2 (Divine Promotion 2)

Tauloto – Tusi Paia: 2 Samuelu 6:21 ‘Ua fai atu Tavita ‘iā Mekala, “Na faia i luma o le ALI‘I, sa na filifilia a‘u, ‘ae tu‘ua lou tamā ma lona ‘āiga uma, na tofia a‘u e pule i le nu‘u o le ALI‘I, o Isaraelu lava ia, ‘ou te siva ai lava i luma o le ALI‘I..’

Faitauga - Tusi Paia: 2 Samuelu 6:20-23

Upu Folafola
E sili atu I le naunau e faia le finagalo o le Alii, o leisi vaega e maitauina I tagata e siitia ma faaeaina e le Atua, e ese ma le loto maualalo. E le manatu e sili atu I latou I isi tagata. I le faitauga o le Tusi Paia o le aso, ua tatou vaaia ai le uiga o Mekala e tutusa lelei ma lona tama, aua e pei lava o lona tama, e manatu tele I le vaaiga a tagata, ae o Tavita, o lana faamuamua o le siitia o le viiga I le Alii na tofia o ia e avea ma tupu. Afai e te loto maualalo ma vivii I le Atua I so’o se ituaiga auala I luma o tagata, ma afai e te le manatu maualuga tele I lou lava tagata, e faaauau pea ona ia faaeaina oe. 

I le finagalo o le Atua, o le tagata e tatau ona faaeaina, o le tagata e mafai ona ia mulumulu I vae o tagata o loo latou galulue faatasi, ae le o se tagata e manatu e maualuga lona tulaga e tatau ona faaaloalo atu uma iai tagata. Fai mai le Mareko 10:44 ‘o sē fia muamua fo‘i ‘iā te ‘outou, ‘ia fai o ia ma tautua a ‘outou uma’.

Afai e tumu le tagata I le faamaualuga, e teena e le Atua ae na te le siitia o ia I luga (Iakopo 4:6). Afai e te naunau tele ia e maua le faaeaina e mai le Atua, e tatau ona e faamaualalo I luma o le Alii. Fai mai le 1 Peteru 5:6 

‘O le mea lea ‘ia fa‘amaulalo ai ‘outou i lalo o le ‘a‘ao malosi o le Atua, ‘ina i‘a fa‘amaualugaina ‘outou e ia i ona pō e tatau ai’.

O loo faapea mai foi le Iakopo 4:10 ‘inā fa‘amaulalo ia i luma o le Ali‘i, ‘ona fa‘amaualugaina lea o ‘outou e ia.

E iai le aso na faaali mai ai e le Atua ia te au se faaaliga o ni ata (graphs) se lua. O nei ata e pei o ni mauga maualuluga se lua ae e iai se vanu I lo la va. Na ia fesili mai mo lo’’u manatu poo fea o loo ou iai I le ata lea, o luga po’o lalo? I le taitaiga a Agaga Paia na ou faapea atu ‘lalo’ ma lou manatu, I lou tulaga lea I lalo, e mafai ona siitia au I luga e le Atua. Ona faapea mai lea o le Alii ia te au, ‘Afai e te fia oo I le pito I luga, e tatau ona e faamaualalo, ma aveese le faaaogaina o le faaaloalo o le ‘reverend Doctor’ mai lo’u igoa ae faaigoa au o ‘pastor’ poo le ‘faifeau’. Na ou faia, ma na amata mai I le aso lea, o loo ou ‘ae’ae pea I le faaeaina mai le Atua. A e filifili e faamaualalo, e pau le auala e maua, o le faaeaina ma le faamaualugaina. E faaeaina e le Atua I latou e faamaualalo, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 5 MATI 2023

Manatu Autu:  Tulaga siitia e le Atua 1 (Divine Promotion 1)

Tauloto – Tusi Paia: Galuega 13:22 ‘Ua na ‘ave ‘ese fo‘i ‘iā te ia, ‘ona fa‘atūina lea e ia o Tavita e fai mo latou tupu; ‘ua ia molitino fo‘i ‘iā te ia, ‘ua fa‘apea ane, ‘‘Ua ‘ou maua Tavita le atali‘i o Iese, o le tagata e tusa ma lo‘u nei loto, na te faia o mea uma lava ‘ou te mana‘o i ai.’

Faitauga - Tusi Paia: 2 Samuelu 6:20-22 

Upu Folafola
O le tusi 1 Samuelu 2:7-8 ua faailoa mai ai ia’i tatou o le Atua, na te faamativaina ma fa’atamāoaigaina le tagata. Na te fa’amaualaloina ma fa’aeaina. Na te fa’atula’iina le tagata aisi nai le eleele ma fa’aauau ona si’itia lona tulaga seia o’o ina nofo faatasi ma alii. Ua faapea mai fo’i Salamo 75:7 “a o le Atua na te fa’amasinoina, o ia na te fa’amaualaloina le tasi o ia fo’i na te faaeaina i luga le tasi.”

O le a le mea e fia silasila I ai le Atua i tagata na te siitia tulaga? O le tulaga muamua e tusa ma le tatou tauloto mai le Tusi Paia o le aso, o le loto naunau e fai le finagalo o le Atua. O le taimi a na te silafia ai o oe e te gaua’i I lona finagalo e tusi aao ai iā te oe mo se tulaga siitia. Afai e silasila mai le Atua o lou naunautaiga ia siitia maualuga lona suafa e sili i suafa uma lava, o le a ia siitia lou tulaga. O le ituaiga pulunaunau lea sa iā Tavita. O le mautinoa lea na lototele ai e tau ma Koliata ina ua ia faalogo o faifai lenei tagata tino ese I le suafa o le Alii o ‘au.

Fai mai le 1 Samuelu 17:26 ‘Ua fesili atu Tavita i tagata na tutū fa‘atasi ma ia, ‘ua fa‘apea, “Se a se mea e avatu ma le tagata na te fasia lenei Filisitia, e galo ifo ai le fāifai ‘iā Isaraelu? auā po o ai lenei Filisitia lē peritomeina na te fāifai ai i ‘au a le Atua soifua?”

I le 1 Samuelu 17:45-47 fai mai Tavita o loo i le Alii le taua. E lei tau Tavita mo ia lava, sa tau mo le viiga o le Atua. O le a se tele o lou naunau e usitai ma faatino le finagalo o le Atua i lou olaga?

E fai a ma tupu lenei tulaga o se uso na amata o fai le finagalo o le Atua, ona siitia lea o lona tulaga e le Atua. Peita’i i lona tulaga manuia ma le faaeaina, ua faaseseina le tagata I le pule ma le tofi ta’ita’i ua ia te ia, ma lē toe popole ai e fai le finagalo o le Atua a’o lona lava loto. E tali le Atua e ala i lona aveese o ana tofiga I le tagata i se ala vave ma le faalumaina e pei o le tala I le tupu o Saulo I le 1 Samuelu 15:23.

O aso nei a talanoa tagata e uiga i le tupu o Saulo latou te faaaoga ia o se fa’ata’ita’iga lē manuia. E te fiu e mafaufau se faamatalaga lelei e fai iā te ia. O le taui lenā o i latou e siitia loa e le Atua tulaga, amata fai loa o latou lava loto ae tu’u le finagalo o le Atua.

I le siosiomaga o loo o’o atu iai lau pule, e te pulunaunau ea e fai le finagalo o le Atua po’o lou loto? I le suafa o Iesu Keriso. Amene.

OPEN HEAVENS
MATALA LE LAGI MO LE ASO TO’ONAI MATI 2023

Manatu Autu:  Tulai I Luma o Tupu (Standing before Kings)

Tauloto – Tusi Paia: Faataoto 22:29 ‘Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u.’

Faitauga - Tusi Paia: Faataoto 6:4-11 

Upu Folafola
E lē o tagata uma e maua le avanoa e tū ai i luma o tupu. O le tulai i luma o tupu o le faailoga lea o le I ai I le tumutumuga o lau galuega ma ou tiute fai. O lona uiga ua avea oe ma tagata faamanuiaina, o oe fo’i o se tupu i le matatā o loo e galue ai. Fai mai le Tusi Paia afai e te fia tu i luma o tupu e ao ona e galue punoua’i ( Faataoto 22:29 ). O le ola paie ua tatau ona lē toe vaaia i au faamaumauga o aso ta’itasi. O le augatā ma le faapalapala e lē tatau ona avea o se vaega o lou soifuaga.

E lē mafai ona e o’o I le tulaga aupito maualuga i lau galuega pe afai e te paie. Fai mai le Tusi Paia 

‘E manumālō lima o ē filigā i galuega; a o lē paiē, e fai taulaga o ia’ (Faataoto 12:24).

O loo faapea mai fo’i le Faataoto 23:21 auā o lē inu tele ma ‘ai tele e faamativaina o ia, ma lē fia moe pea e ofu o ia i ofu masaesae.

I vaitausaga o le 70 sa fa’amalosia ai ta’utinoga ola. Toatele tagata na ta’utino e maua a latou taavale Mercedes Benz peitai e te maua atu a o nofonofovale i o latou aiga ua ta le 10 i le taeao I le tele o aso. E tele tausaga mulimuli ane o fai pea ta’utinoga ola ae le’i maua lava ni taavale Mercedes Benz. E lē lava lou tautino o le a avea oe ma tagata iloga, e manaomia le o faatasi ma au galuega. O le fa’aeaina e lē faia mo tagata paie. Fai mai Faataoto 24:33-34 se’i toeitiiti sina moe, toe itiiti se matamoe, toeitiiti se piilima e taoto ai. A e o’o mai lou mativa e pei o le malaga, ma lou lē tagolima pei o le tagata ua sauni lana auupega.

O loo faapea mai le Upu a le Atua o e lē galulue e lē tatau ona aai. (2 Tesalonia 3:10) Ua avatu e le Atua iā te oe le malosi e maua mai ai oloa e pei ona folafola mai i le Teuterenome 8:18. Peitai afai e te lē toaga ma filifiligā i soosemea o loo e galue ai auā le tausiga o oe, e lē mafai ona e maua le tamāoaiga.

E mafai ona tatala e le Atua se faitotoa mo oe peita’i o oe lava e te tu i luga ma savali e ulu atu i lea faitotoa. O lou Atua na te lē faamanuia I le paie. I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 3 MATI 2023

Manatu Autu:  Tatalo mo le Ekalesia (Prayers for the Church)

Tauloto – Tusi Paia: Mataio 16:18 ‘Ou te fai atu ‘ia te oe, o Peteru oe, ‘ou te ati a‘e fo‘i la‘u ekalesia i luga o lenei papa, e lē mafai fo‘i e faitoto‘a o seoli ‘ona manumālō i ai....’.

Faitauga - Tusi Paia: Ioane 17:9-26 

Tatalo

1.       Tama, faafetai mo le Ekalesia poo le tino o Keriso I lo matou atunuu faapea ma le lalolagi atoa. Faafetai aua e le manumalo faitotoa o seoli I lau Ekalesia. 

2.       Tama, ia e faamamaina lau Ekalesia. Faamama iai matou ma faaatoatoaina. 

3.       Tama, faamolemole ia e faatupuina le fati mai o se galu o le toe fuataina e ala ia Agaga Paia I le tino o Keriso, I le Suafa o Iesu. 

4.       Le Alii e, liligi mai lou Agaga e faafouina I matou. Matou te manaomia le afi e fou le Alii e. Tama, ia ligi le afi e fou I luga o lau Ekalesia e sili atu I aso anamua. 

5.       Tama, fesoasoani I lau Ekalesia e faia ma siitia galuega e faia mo oe. Fesoasoani iai matou ina ia toatele ni agaga e manumaloina seia oo ina manumaloina atoa le lalolagi atoa. Fesoasoani iai matou ia faatumuina le lalolagi atoa I lou alofa ma le malamalama. 

6.       Tama, faamolemole ia faamamao faamai ma gasegase mai tagata o le tino o Keriso I le suafa o Iesu. 

7.       Tama, faamolemole ia lotogatasi lau Ekalesia. Aua nei faatagaina le tiapolo e fevaevaeaina I matou. Faamolemole ia faatupuina le alofa I o matou loto ao matou galulue faatasi I le lotogatasi I lau galuega. 

8.       Tama, a pule le au amiotonu, e olioli tagata uma. Faamolemole le Alii e, ia faatulai ni tagata amiotonu e avea ma taitai I atunuu ma malo uma o le lalolagi. 

9.       Tama, liaieseina ma faaalia perofeta pepelo ma faifeau o loo ta’ita’i seseina ou tagata. Ia faamāina I latou pe afai e le salamo, I le suafa o Iesu. 

10.   Tama, fesoasoani mai iai matou ina ia faia lou finagalo. Fesoasoani I tagata matutua, talavou ma taimaiti I totonu o le tino o Keriso I le lalolagi atoa ia faia na o lou finagalo. 

11.   Tama, fesoasoani mai ina ia matou mulimuli ia te oe ma le loto atoa I le suafa o Iesu, Amene.