Samoan Devotional

OPEN HEAVENS
MATALA LE LAGI MO LE ASO GAFUA 20 FEPUARI 2023

Manatu Autu:  O Miti ma le Faatuatua (Dreams and faith)

Tauloto – Tusi Paia: 2 Korinito 4:13 O lo‘o ‘iā te i matou lea lava agaga fa‘atuatua, pei ‘ona tusia, “‘Ua ‘ou fa‘atuatua o le mea lea na ‘ou tautala atu ai; o i matou fo‘i ‘ua matou fa‘atuatua, o le mea lea ‘ua matou tautala atu ai.”

Faitauga - Tusi Paia: Eperu 11:8-10

Upu Folafola
E mafai e fanau a le Atua ona faia ni miti tetele ma maua le faatuatuaga e taunuu ai, aua o lo latou tama I le lagi o le Alefa ma le Omeka (Faaaliga 1:8). O fanau uma a le Atua e tuuina atu lo latou faatuatua ma le atoatoa I le Atua, e mafai ona malolo ma le mautinoa, e mafai e le Atua ona faataunuuina, tusa po’o le a le telē ma le maualuga aua foi na o ia e mafai ona faia se folafolaga mai le amataga seia oo I le gataaga. 

Tusa poo le a le telē ma le maualuga o sau miti, e mafai e le Atua ona faataunuuina pe afai e iai lou faatuatua ia te ia. O lo’o fetalai le Atua I le Sapakuka 2:4, o le amiotonu e ola ia I lona faatuatua. 

Fai mai le 2 Tesalonia 1:3, e mafai ona tupu lou faatuatua. Ona o le faatuatua e manaomia ina ia tino mai ma taunuu au miti, e tatau ona e fafagaina ina ia tupu ma ola, e ala lea I le faalogologo, suesue, mafaufau loloto I le Upu a le Atua ma ia faifaipea. 

I le Mareko 4:35-41, na fesili le Alii I lona au soo pe aisea e leai ai so latou faatuatua, peitai I le Mataio 6:30, na fetalai atu le Alii iai latou: ‘o outou e fa‘atuatua itiiti’, o lona uiga, ua iai lo latou faatuatua e ui ina itiiti. E mafai ona tupu lou faatuatua seia faateleina (Mataio 15:21-28). E mafai ona sili atu lou lumanai I lo au miti, e pau le tulaga e tatau ona e faia, o lou galue ia tupu lou faatuatua. Le au pele e, e tatau ona tupu lou faatuatua. A e faalogo mai I a’u miti ma tulaga o loo ‘ou naunau iai, o lo’o ou ta’uta’u nei mea tetele aua foi e matua maualuga lou faatuatua I lo’u Atua e Silisili Ese. 

Ae ou te lei faaolaina, ao leai so’u faatuatua, o la’u miti ma le naunautaiga sili, ia avea a’u ma pule sili pito sili ona laitiiti I se Iunivesite I Aferika atoa. Ae ina ua ou feiloai ma Keriso ma tuuina atu lo’u ola ia te ia, na amata ai ona ou iloa, e le mafai e lou mafaufau ona faavasega le maualuga ma le mamao e mafai ai e le Atua ona ave a’u iai. O lea la, ua ou iloa faia ni miti maualuluga aua foi e iai lo’u Atua e mafai ona faia mea tetele ma matautia. 

E tauia e le Atua I latou e faatuatua ia te ia (Eperu 11:6), faia loa ni au miti tetele ma le maualuga, faatuatua I le Atua, ona ia faataunuuina lea o au miti uma, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 19 FEPUARI 2023

Manatu Autu:  E mafai a le Atua ona Feliuaina oe (God can transform you)

Tauloto – Tusi Paia: Isaia 1:18 O lo‘o o fa‘apea mai le ALI‘I: Ō mai ia, ‘inā tatou filifili ia, e ui lava ‘ina pei o ‘ofu mūmū a ‘outou agasala, e sisina ia e pei o le kiona; e ui lava ‘ina mūmū ia e pei o le ‘ie ulaula, e ‘avea e pei o fulufulu mamoe”.

Faitauga - Tusi Paia: Eperu 8:10, Esekielu 36:26

Upu Folafola
A e silasila I le tala iā Saulo o Tasesa o lē na mulimuli ane iloa o Paulo le aposetolo, o ia lava na fai mai i le 1 Timoteo 1:15 “O le Upu moni lenei, e tatau lava ona matuā talia na maliu mai Keriso Iesu i le lalolagi, na te faaolaina o e agasala, ua sili musa a’u nei iā i latou.”

Peita’i fai mai le 2 Korinito 11:5 5Auā o lo‘u lea manatu, e leai se mea e tasi ‘ou te itiiti ai i ‘aposetolo silisili.

Na aumaia ia e le Atua mai le avea ma tagata agasala sili, aumai a faatusa i aposetolo silisili. O le feau o le asō e faapitoa mo se tasi o loo mafatia i se agasala. O le Atua na te mafaia ona fai se feliuaina tele i lou olaga ma avea oe o se tasi o le au paia o lau auga tupulaga. Esekielu 36:26-27 - 26‘Ou te avatu fo‘i ‘iā te ‘outou le loto fou ma ‘ou tu‘u i totonu ‘iā te ‘outou le agaga fou; ‘ou te ‘ave‘esea le loto ma‘a‘a a‘i o ‘outou tino ma ‘ou avatu ‘iā te ‘outou le loto ‘a‘ano. 27‘Ou te tu‘uina atu lo‘u Agaga i totonu ‘iā te ‘outou, tou te sāvavali ai i a‘u tulafono, tou te ‘ana‘ana fo‘i i a‘u fa‘amasinoga ma ‘outou faia.

Ina ia feliuaina lou olaga, e manaomia le faatumulia i le Agaga Paia. O le taimi lava e i ai ia te oe le Agaga Paia e avea ai oe ma tagata fou atoatoa. Suesue lau Tusi Paia I aso uma. O le mana faapaiaina o le Atua o loo i lana Afioga Paia. (Ioane 17:17) Faaalu lou taimi e saili ai fofoga o le Atua e ala i lou tatalo e lē aunoa ma manatunatu i le Upu a le Atua.

Fai mai le 2 Korinito 3:18 ‘A o i tatou uma, o lo‘o va‘ava‘ai i tatou i le pupula o le Ali‘i ma o tatou mata, e lē ufitia ‘ua liua ai i tatou ‘ua foliga i ai nai le pupula e o‘o i le pupula, fa‘apei ‘ona maua ai mai le Ali‘i, o ia o le Agaga’.

A e finafinau e faia uma nei mea o le a vave ona e iloa o agasala uma sa faalavelave gofie ai oe e te lē toe faia. (Eperu 12:1). A e fa’aalu tatau lou taimi e suesue ai le Upu a le Atua ma tatalo o le a fa’amalosia oe e ola faapaiaina I le suafa o Iesu. Amene.

OPEN HEAVENS
MATALA LE LAGI MO LE ASO TOONAI 18 FEPUARI 2023

Manatu Autu:  E mafai foi ona faaaoga oe e le Atua (God can use you too)

Tauloto – Tusi Paia: Roma 11:6 ‘“Āfai fo‘i o le alofa tunoa, ‘ua lē o galuega; ‘ana fa‘apea, po ‘ua lē toe ta‘ualofatunoaina le alofa tunoa.” 

Faitauga - Tusi Paia: 1 Timoteo 1:12-16

Upu Folafola
E toatele tagata I totonu o le Ekalesia e vāai I le faifeau e peiseaī e lē mafaia e le Atua ona fa’aaogā latou faapea. Ua manatu i latou, latou te lē mafai na fa’amālōlō ma’i pe toe fa’atutū e ua oti, peita’i e lē sa’o lea manatu. Atonu o ou lagona ia aua ua e talitonu e te lē mafaia le taulaga o loo fai e le faifeau aemaise le anapogi ma le tatalo peita’i e sesē fo’i lea manatu. Fai mai Sakaria 4:6 e lē o le fitafita,e lē o le malosi a o lo’u Agaga ua fetalai mai ai le Alii o ‘au.

E lē mafai ona tatalo le tagata mo se 12 itula e leai se malolō vagana le fesoasoani a le Agaga Paia. O le Agaga Paia lava lea o loo i totonu ia te oe lea fo’i e fesoasoani ia i latou o loo e fiafia e vaavaai i ai i lo latou toaaga e anapogi ma tatalo seia o’o atu a i le tulaga ua matuai tele le faauuga ia i latou. O lou naunau ma lou gaua’i I le Atua e fua i ai le tele o le fa’aaogaina o oe e le Atua. O le naunau o lona uiga a e filifili e anapogi mo aso e 7 a o le lona lua o aso ae faaletonu lou manava (tulou) e lē tatalā lau anapogi a e te alu i le Atua i le tatalo mo lona alofa tunoa e fa’aauau ai lau anapogi. A e fuafua e tatalo I gagana ese mai le itula e 9pm i le 11pm i aso uma peita’i o se tasi aso ua tuai tele ona e taunuu i le fale ma ua e vaivai, e te lē moe i le ta o le 9pm. E fa’a taunuu pea ona e tootuli ma fosi pe fa’amalosia lou tagata e tatalo.

E mālie lava iā te a’u le tala iā Ioane Mareko. Ua faamatala mai i le Galuega 15:37-40 lenei taulealea e tumu i le mata’alia sa mulimuli iā Paulo ma Panapa I le la faigamalaga tāla’i peita’i na o’o atu I le taimi o le talaiga vaai atu e faigata le galuega aemaise o le vaai atu I tagata o tau’ai mai latou I ma’a toe tamo’e loa I lona aiga. I le Galuega 15:38 na sauni Paulo ma Panapa e o i se isi la malaga, na mana’o Panapa latou te o ma Ioane Mareko ae musu Paulo ma fai mai “Oi e leai ma te lē o ma se isi na alu ese ma a’u.” A e faitau i le 2 Timoteo 4:11 o Paulo lava lea na fai iā Timoteo “ aumai Ioane Mareko iā te a’u e aogā ia iā te a’u i le galuega.” O le talalelei pei ona fai mai Sagata Mareko na tusia e le taulealea lava lenei o lē na lē manuia lana ulua’i malaga tāla’i.

Poo le a lou vaivai, a ia te oe le fesoasoani a le Atua e mafai ona avea oe ma poutū i le mālō o le Atua.

Tatalo
Tamā aumai iā te a’u ma lo’u aiga le alofa tunoa e totogi ai le tau ia matou mafaia ai ona maua ma tauave lau faauuga. I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 17 FEPUARI 2023

Manatu Autu:  E maualuga lou tulaga I le oti (You are above death)

Tauloto – Tusi Paia: 1 Korinito 15:55 ‘“Le oti e, o fea o i ai lou manumālō? Le oti e, o fea o i ai lou tui?” 

Faitauga - Tusi Paia: 1 Korinito 15:51-58

Upu Folafola
Afai e avea oe ma atalii poo afafine o le Atua, tusa pe e te savali I le vanu o le ata o le oti, e leai se mea e te fefe ai aua o loo faatasi ma oe le Atua o ‘au (Salamo 23:4). Fai mai le Tusi Paia I le Ioane 11:25

25‘Ua fetalai atu Iesu ‘iā te ia, “O a‘u nei o le toetū ma le ola; o lē fa‘atuatua mai ‘iā te a‘u, e ui lava ‘ina oti, ‘ae ola lava ia.

O le taimi lava e avea ai oe ma atalii poo afafine o le Atua, o le oti e le o se mea e te toe fefe ai. O le mea moni, e avea o se mea e te naunau ma fiafia pe a oo mai aua foi a tumau ia Iesu,  o lou ala lea I le lagi, e te lua faatasi ai ma lou matai, e le toe iai se tiga poo se faanoanoa. Fai mai le aposetolo o Paulo I le Filipi 1:21: Auā o lo‘u ola ‘ua ‘iā Keriso lea; a o lo‘u oti, o lo‘u manuia lea.

Na matua mou ese a lo’u fefe I le oti ina ua ou maitauina lelei lou tama faaleagaga ao soifua, pe a fai a la tala ma lana uo. E fai mai le tasi ‘ou te oti muamua ia te oe’ ae tali mai le isi, ‘leai, ou te muamua moni atu lava I lo oe’. O nei tamaloloa e toalua, e talanoa I le oti e pei o la e o I le maketi. Afai e te faaolaina moni, ma lou mautinoa o le oti o le faitotoa lea I se nofoaga matagofie tele, e te ola ma soifua e maualuga atu I le oti. 

Le au pele e, ou te tulieseina le fefe I le oti mai lou olaga, I le suafa o Iesu. E amata atu I le aso, o le a e ola ma soifua e sili atu I le oti, I le suafa o Iesu. Ou te manao e te maitauina lelei mai le mea lenei, afai e te lei faaolaina moni, o lo’o iai ni faaleleiga e tatau ona e faia, ma o Iesu e le o sou Alii ma le Faaola moni, o lona uiga e tatau ona e fefe I le oti, aua foi o le a tatala ai le faitotoa I le lepa afi e faavavau. 

Afai e te le I faaolaina lava, tatalo mai le tatalo lenei:

Lou Alii e, Iesu, ou te valaau ia te oe e te afio mai I lou nei olaga e avea ma ou Alii ma Faaola. Ou te ole atu mo lou alofa tunoa ina ia aua ai nei ou toe faia le agasala, ina ia ou agavaa ai e mafuta ma oe I le lagi pe a ou tuua lenei lalolagi, Faafetai le Alii e, I le suafa o Iesu e tatalo atu ai, Amene. 

E avatu le faamalo ia te oe. Saili loa se Ekalesia e faatuatua ma a’oa’o lelei ai le Tusi Paia e te auai atu iai ia faifai pea ma au masani, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 16 FEPUARI 2023

Manatu Autu:  E maualuga lou tulaga I agelu (You are above angels)

Tauloto – Tusi Paia: Eperu 1:14 ‘E lē o agaga e ‘au‘auna ‘ea i latou uma, ‘ua ‘a‘auina e ‘au‘auna ‘ona o i latou o ē a maua le ola?’

Faitauga - Tusi Paia: Eperu 1:13-14

Upu Folafola
O loo tusia I le Salamo 91:11-12, e poloaʻina e Ieova ana agelu e tauave oe i o latou aao. O lo’o faapea mai le Eperu 1:13-14 ai, o agelu o agaga e auauna - i se isi faaupuga, ua auina atu i latou e tautua  i fanau a le Atua. A fesili mai tagata, ‘Papa, aisea e te faimalaga ai na o oe i le po, o e  iloa ea e I ai pona o le fealuai toatasi I le po?’ O la’u tali ia i latou, e i ai aʻu lava leoleo, e le mafai ona iloa - e toalua tagata e maoa’e le tino tetele, e mafai e laua uma ona feagai ma so'o se tagata e faasagatau mai. O laua igoa o Agalelei ma le Alofa Mutimutivale. E pei ona fai mai le Salamo 23:6, E mulimuli atu ia te oe le agalelei ma le alofa mutimutivale i aso uma o lou ola.

O le taimi muamua e te vaʻai ai i se agelu, e muamua ona e fefe, aua e matua tino tetele. E malolosi foʻi i – o o latou malosi, e mafai ai e se agelu e toʻatasi ona fasiotia ni fitafita e 185,000 i le pō e tasi ( 2 Tupu 19:35 ) pe e te talitonu i ai pe leai, o le aso lava na e fanaufouina ai, o se tasi o agelu tetele ma le malolosi na tofia e mulimuli atu ia te oe i vaega uma e te alu i ai,  ma faia so’o se faatonuga e te finagalo e faia, e tusa ai ma le finagalo o le Atua. So’o se taimi lava e faapea ai ou fili ua latou maua oe, e mafai ona sau lau agelu i le tulua o po ma ao e laveai oe (Galuega 5:17-25, Galuega 12:5-11)

O lea la, e tatau ona e malamalama lelei,  e ui lava ina tofia agelu e auauna ia te oe, e tatau lava ona e tuuina atu ia i latou faatonuga e mulimuli ai. E matua gaua’i agelu i faatonuga a le Atua, a e faia se faatonuga I agelu, ia e sii mau mai le afioga a le Atua ia i latou, ma e vave lava ona usitai. Mo se faata’ita’iga, ua maea ona fetalai mai le Atua, latou te tauaveina oe I o latou lima, ina neʻi tuʻia lou vae i se maa (Salamo 91:12) o lona uiga e mafai ona e talosaga atu i le Atua e poloaʻina i latou e aveese so’o se ituaiga o faalavelave mai ou ala uma ae e le’I alu i se malaga. Na fetalai le Atua afai e faapotopoto ou fili e faasagatau ma fasi ia te oe i se auala se tasi, e fitu ala e sōsōla ai i latou mai ou luma (Teuteronome 28:7), o lona uiga, e mafai ona e ole atu i le Atua e poloaiina agelu e faataapeapeina le faatasiga a ou fili.

E tatau ona e malamalama lelei, o le afioga a le Atua, e na o fofoga o lana fanau e iai le malosiaga; afai e te le’i fanaufouina, e le usitai agelu ia te oe, e mafai ona latou galulue e faasagatau mai ia te oe. Afai e te le talitonu mai ia te au, fesili ia Palaamo (Numera 22:21-35). 

Ua atofaina agelu e auauna I ai latou o suli o le malo o le Atua. O oe ea o se suli? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 15 FEPUARI 2023

Manatu Autu:  E silisili atu oe I temoni (You are above demons)

Tauloto – Tusi Paia: Efeso 1:21 ‘E silisili lava i ali‘i sili uma lava, ma faipule, ma ē ‘ua malolosi, ma ali‘i, ma igoa uma lava e ta‘ua, e lē gata i le olaga nei, ‘ae o‘o fo‘i i le atalī’.

Faitauga - Tusi Paia: Efeso 1:18-23

Upu Folafola
O loo faapea mai le tatou faitauga o le Tusi Paia o le aso, o Iesu o loo faanofo o ia I le itu taumatau o le Atua le Tama,  e silisili atu I alii sili ma faipule o le pogisa. Afai o oe o se atalii poo se afafine o le Atua, o oe o le sui o le tino o Keriso ma o le tino o Keriso e aofia ai ona aao, o lona uiga e sili atu oe I lo so’o se temoni pito sili ona maualuga. I le Ioane 14:13, na fetalai Iesu e mafai ona tatou ole atu mo soo se mea I lona suafa. E na te faia, ina ia faaneeneeina le Tama ia te ia. O loo faapea mai le Filipi 2:9-11 o lona suafa e sili atu I suafa uma lava, ma a ta’uta’u lona suafa, e toatuli tulivae uma, poo luga I le lagi, poo le fogaeleele poo lalo o le fogaeleele. Fai mai le Mareko 16:17 e faapea: 17E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou;

Afai e te tutuliina temoni I le suafa o Iesu, e vave ona o ese pe afai e te faaolaina ma le faamaoni. E ao ona e silafia e lua ituaiga tagata e ulufia e temoni, muamua  o I latou ua ulufia faamalosi e temoni ma e manaomia le faasaolotoga. Lona lua, o I latou e malilie e ulufia e temoni. E faigofie ona faasaolotoina I latou e ulufia faamalosi e temoni aua foi o lo’o naunau le tagata lea e fia faasaolotoina. Ao I latou e mananao e ulufia e temoni, e le mananao e faasaolotoina ma e le mafai ona e faamalosia I latou. E pau le mea e mafai ona e faia o le tauanauina ma su’e se auala e finauina ai lea tagata ia faasaolotoina. 

E iai se aso na sau ai se tamaloa I lou ofisa ma lana ava ma faapea mai : ‘Tama, fesoasoani mai ia te au, o la’u ava o le faataulaitu’. Ae na tali mai le fafine: ‘Aua e te faalogo iai, o lona tina o le faataulaitu’. Ona ou tali atu lea: ‘E leai se mea o iai, o le a ou tatalo, afai e le o oe o se taulaitu, o le a manuia pea lou olaga, peitai afai o oe o se taulaitu, o le a ou saisaitia le temoni e le mafai ona toe sau I fafo ma oe’. Na faapea mai le fafine: ‘Ua lelei, tatalo loa’. Ua maea ona ou tatalo ona toe o lea o lenei ulugalii. Ina ua maea se masina, na toe aumaia e lona toalua ia te au, ua fulafula uma le tino aua o le temoni sa I totonu o ia, ua tumau ma saisaitia ai I totonu o lea fafine. E oo mai I le taimi lea, ua naunau lenei fafine e faasaolotoina. 

Ia e pule I so’o se temoni I lou siosiomaga aua foi afai o oe o se afafine poo se atalii o le Atua, o loo ia te oe le mana ma le malosiaga e faia ai. 

Tatalo, 

Ou te faatonuina so’o se temoni I lou siosiomaga ia alu ese nei I le suafa matautia o Iesu, Amene.

 OPEN HEAVENS
MATALA LE LAGI MO LE ASO LUA 14 FEPUARI 2023

Manatu Autu:  Tatalo mo Faaipoipoga (Prayers for Marriages)

Tauloto – Tusi Paia: Kolose 4:2 ‘Ia ‘outou finafinau i le tatalo, ‘ia mataala i lea mea ma le fa‘afetai..

Faitauga - Tusi Paia: Mataio 18:18-20

Tatalo

 1.       Tama faafetai mo la’u faaipoipoga. Faafetai mo lou faamausaliina, o lau puipuiga ma lau faamanuiaga i lo ma aiga, i le suafa o Iesu.

2.       Tama, Faamolemole aua ne’i e tu’ua pe aveesea lou mamalu mai lo ma aiga, i le suafa o Iesu.

3.       Tama, faamolemole ia e lia’i eseina soo se la’au e te lei totoina i totonu o lo ma aiga, i le suafa o Iesu.

4.       Tama faamolemole fesoasoani mai ia te a’u ma lo’u to’alua ina ia manumaloina ni agaga mo oe i aso uma, i le suafa o Iesu.

5.       Tama e, a iai se mea o lo’o punitia ai le ulufale atu o lo’u toalua I le lagi, ia e liaieseina i le aso, i le suafa o Iesu.

6.       Tama, fa’amanuia i lo’u toalua ma ia faalauteleina mea ma te pulea ma va’aia, i lou suafa Iesu.

7.       Tama, ia avea la’u faaipoipoga e maualuga ai lou viiga, i le suafa o Iesu.

8.       Tama, ia mamao ma ia taofia so’o se ituaiga amioleaga mai lo ma aiga, i le suafa o Iesu. 

9.       Tama, faamolemole foai mai ni ta’itoalua talafeagai ma lelei mo la’u fanau ua tatau ona faia ni a latou faaipoipoga, i le suafa o Iesu.

10.   Tama ia maua e aiga uma le manumalo mai so’o se osofa’iga a le fili, i le suafa Iesu.

11.   Tama, faamolemole ia tatala to’ala fanau o lau fanau uma ua faaipoipo ma o lo’o sa’ili atu ma le faatuatua i lou mamalu ma le alofa tunoa mo ni fanau, i le suafa Iesu.

12.   Lo matou Tama o I le lagi, ia e faamanuia ma faamausali faaipoipoga uma a lau fanau, ina ia iai lou olioli ma le filemu, I le suafa o Iesu Keriso ua matou tatalo ma ole atu ai, Amene. 

OPEN HEAVENS
MATALA LE LAGI MO LE ASO GAFUA 13 FEPUARI 2023

Manatu Autu:  E na o le Atua e mafai ona faamalolo (Only God can heal)

Tauloto – Tusi Paia: Esoto 15:26 ‘Ua ia fetalai mai fo‘i, “‘Āfai ‘e te matuā fa‘alogo i le leo o le ALI‘I lou Atua, ma e fai le amio tonu i ona luma, ma ‘ia e ua‘i mai ou taliga i ana poloa‘iga, ma e tausi i ana sauniga uma lava, ‘ou te lē tu‘uina atu ‘iā te oe se tasi o ia ma‘i na ‘ou tu‘uina atu ‘iā Aikupito; auā o a‘u o le ALI‘I, o lē na te fa‘amālōlōina oe’.

Faitauga - Tusi Paia: Luka 8:43-48

Upu Folafola
O fomai o ni tagata e maoae le lelei ma e faaaoga e le Atua I latou e faasaoina ola o le toatele o tagata. Peitai e iai taimi e fiu fomai e faia soo se metotia e ala I togafitiga ae le fo’i I se lelei le ma’i. E iai tulaga e gata ai le iloa o fomai ma e latou te faia I le mafai e gata ai lo latou iloa, ae o le Atua Silisili Ese o ia o le faamalolo ma’i. Ou te talitonu ua avea le faamai tele o le korona vairusi ua faaalia ai I le lalolagi atoa ua na o le Atua e mafai ona faamalolo. O so’o se taimi e faaalia ai ua maua e saienisi se vaifofo e taofia ai le virusi, e vave ona aliae ane seisi ituaiga o le vairusi. 

E iai ma’i ua faaigoina e fomai e leai se vaifofo. E leai se upu faapea ia Iesu Keriso aua e mafai ona ia faamalolo I ma’i uma. E iai ma’i e le mafai ona iloa e fomai mai latou suesuega. E le tau suea e Iesu po’o le a le ituaiga ma’i aua e mafai ona ia faamalolo I so’o se ma’i. E iai se tina na sau I le matou mafutaga ma le ma’i e na o le puai (tulou) e le mafai ona taofi se meaai, ua le mafai e se fomai ona su’e le ituaiga ma’i pe faia foi se togafiti. Ae lei amata le lauga I le matou lotu I se tasi aso, na ou faapea atu ‘alaga mai Aleluia’. Sa alaga mai lea tina ‘Aleluia’ ona pau mai lea o le anufe I fafo mai lona fofoga. E leai seisi togafiti na toe faia, na faamalolo e Iesu ma aveesea lona faafitauli I totonu o se  minute. I le Ieremia 32:27, na fetalai le Atua:

“Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?”

E iai le isi tulaga e sili atu I le faamalologa, e mafai e le Atua ona taofia le o’o mai o so’o se ma’i. E mafai ona ia puipui oe mai le ma’I e oo I tagata I ou tafatafa e maua ini faama’i pipisi, e le mafai ona e afaina ma ma’i ai. 

Le au pele e, usitai ma le atoatoa I le Atua ma e mafai ona ia faamautinoaina lou ola ma soifua e aunoa ma ni ma’i. E tatau foi ona e iloa ma silafia, afai e na te faamaloloina se tagata ae toe foi lea tagata I le agasala, e sili atu le leaga o se isi ma’i e maua ai (Ioane 5:14) ma o le tulaga lea e manaomia ai le ola faapaiaina o lana fanau. O le Atua o lo tatou faamalolo ma’i, tuu atoa lou faatuatua ia te ia e pei o le fafine I le tatou faitauga o le Tusi Paia o le aso, ona e maua lea o le faamalologa mai le Atua I so’o se vaega o lou tino o lo’o e manaomia, I le suafa o Iesu Keriso. 

E na o le Atua e mafai ona faamalolo ma’i, usitai ia te ia ona e ola lea e aunoa ma le ma’i, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO SA 12 FEPUARI 2023

Manatu Autu:  E na o le Atua e mafai ona puipui (Only God can protect)

Tauloto – Tusi Paia: Salamo 127:1 ‘A fai e lē atiina a‘e e le ALI‘I le fale, e galulue fua i latou o ē atiina a‘e; ‘āfai e lē leoleo e le ALI‘I le ‘a‘ai, e mataala fua o lē na te leoleoina.’.

Faitauga - Tusi Paia: 1 Samuelu 26:5-16

Upu Folafola
‘Na ou taoto lava a’u ma o’u moe, na ou ala, aua ua lagolagoina mai le Alii iā te a’u’. Salamo 3:5. 

Fai mai le upu o le Tusi Paia ua taua i luga, na e tofā ma maleifua a’e i le taeao aua ua tausia oe e le Atua. Po’o le a lou malosi, a lē mafaia e ou fili ona osofa’i oe a’o e ala, latou te fa’ato’ilalo oe pe a e moe. E mafai ona e fai mai “o lo’o i ai a’u leoleo e leoleoina a’u 24/7.” E i ai fili e lē mafaia e tagata leoleo na iloa, pe fusu i ai. Na mafai e au tagata leoleo ona puipui oe mai le koronavairasi? I so’o se tulaga e o’o i leoleo aupito sili ona malolosi e momoe fo’i. I le tatou Tusi Paia faitau o le asō na moe le tupu o Saulo a’o Apineru le toa ta’uta’ua o Isaraelu (e o’o iā Tavita e fa’aaloalo i ai) sa tatau ona ia leoleoina le tupu, peitai na moe fo’i. Na alu atu Tavita ma iloa i latou uma ua momoe ona ia ave lea o le tao ma le faguvai a le tupu. I le taeao na alaga Tavita i le tupu ma faaali atu ia te ia tusa lava po’o fitafita sili ona malolosi na leoleoina o ia, semanū lava e fasiotia o ia i le po ua mavae. Po’o le a le toatele o tagata e leoleoina oe, a aunoa ma le Atua e te lē saogalemu.

I nai tausaga ua mavae faatoa uma le matou sauniga i se Aso Sa, i le po lenā po’o le ta o le 2 i le vaveao sa ou alu I fafo ma savali I totonu o le nofoaga sa fai ai le fa’atasiga ma tautalatala faafetai i le Atua Silisili Ese mo mea ua ia faia. Mo se taimi umi ou te lei vaai i se leoleo se toatasi. Na i’u ina ou maua atu se isi o moe fa’agaulua I luga o se nofoa. Sa i ai ma le isi nofoa i ona talane ma sa ou nofo ai loa. A’o ia moe pea ma taumafai e tuliese namu na faalavelave i lana moe, na toetoe a o’u lavea i ana po ma sa o’u tu loa I luga ma ou alu ese. O le leoleo lona lua na o’u vaai i ai, sa ia matuai faatulaga lelei nofoa e fa (4) ave ese ona seevae ma taoto loa I lalo. O lea, tusa pe sa feala nei leoleo latou te mafaia ea ona taofi se mea leaga e tupu vagana ua fesoasoani le Atua ia I latou? Ioe, afai e lē leoleo e le Alii le aai e mataala fua o lē na te leoleoina. (Salamo 127:1). 

Faafetai I le Atua e I ai so tatou Tamā e lē moe ua na o ia e mafai ona ia puipui oe ma lou aiga.

Tatalo
Tamā ou te tuuina atu lo’u ola, o e uma e pele ia te a’u, ma meatotino uma, i ou aao. Faamolemole ia malu ma saogalemu I matou uma I le suafa o Iesu Keriso, Amene.

OPEN HEAVENS
MATALA LE LAGI MO LE ASO TOONAI 11 FEPUARI 2023

Manatu Autu:  E lē fa’asagatau i tagata (Not against flesh and blood)

Tauloto – Tusi Paia: 2 Korinito 10:4 ‘auā o ‘au‘upega a lo matou nei taua e lē fa‘aletino ia, ‘ae fa‘amalolosia e le Atua e lepetia ai ‘olo;’.

Faitauga - Tusi Paia: Efeso 6:12-18

Upu Folafola
Sa faitau a’u tusi mai le meli i se tasi aso ma o’u maitauina ai e lua (2) ni tusi e fa’ai’u faatasi tagata e aumai ai. Muamua o se tusi mai se tinā e mana’o ou te tatalo ia fasioti e le Atua le tinā o lona toalua leaga o le faataulaitu. Tusi lona lua e aumai I le tinā o le toalua e mana’o ia o’u tatalo I le Atua e faauma le ola o le avā a lana tama ona o le faataulaitu. Ioe ou te le’i tatalo mo nei ituaiga manaoga auā fai mai le Afioga Paia a le Atua tatou te lē tau ma tagata. A’o fai lenā uso ma auupega I le lima o le tiapolo e tau ma oe, e te lē faasagatau i ai. E te alu I ou tulivae I le tatalo ma tau ma le malosi o le pouliuli o loo i tua o lenā tagata.

E tolu (3) ituaiga ‘au. O agelu poo ‘au mai le lagi o loo i ai le ‘au agelu a le Atua e pei ona tatou faitau I ai I le Luka 2:13. E i ai ‘au a le tiapolo poo fitafita a Satani ma o latou alii sili ma faipule ma alii o le pouliuli o lenei lalolagi e pei ona auiliili mai i le Efeso 6:12. Mulimuli ua iai tatou ‘au a tagata poo autau a le lalolagi, o autau i luga o le fogaeleele, fitafita tau i luga o le sami, fitafita i luga o le ea, leoleo nanā ma isi e ta’u fo’i o ‘au. Mo se fa’ata’ita’iga i le 1 Samuelu 14:19 o loo faamatala ai e le Afioga Paia a le Atua ‘au togālauapi a Filisitia.

E tumau pea le fete’ena’i I le va o ‘au nei. Tanielu 10:4-14 mo se fa’ata’ita’iga o le alii o le mālō o Peresia (e ‘au ma Satani) na ia taofia pe faalavelave i le agelu na sau ma le tali o tatalo a Tanielu mo le 21 aso seia o’o ina auina atu e le Atua agelu Mikaelu e fesoasoani iā te ia. A’o lē mafai ona tatou iloa i o tatou mata fa’aletino temoni, e mafai ona latou iloa mai tatou. E fa’afefea ona e tau ma se fili e lē o vaai i ai? E te manaomia le fesoasoani a se isi o mafai na ia iloa atu lou fili ma fesoasoani ia e manumalo. O se mafuaaga ogaoga e mafai ai na faatama’ia e le tiapolo ma ana ‘au le toatele o le taumafai e tau taua fa’aleagaga i auupega faaletino. Fai mai le 2 Korinito 10:4, o auupega a le matou nei taua e lē fa’aletino ia ae fa’amalolosia e le Atua e lepetia ai ‘olo. A e mana’o e te manumalō I le malosi o le pouliuli ia e fa’aaogā auupega fa’aleagaga, le viiga, (2 Nofoaiga tupu 20:22) tatalo, (Efeso 6:18) Upu a le Atua,( Efeso 6:17) alofa, (Roma 12:20) a’o le sili o ia mea uma o le ola fa’apaiaina (Faataoto 16:7). Taofi le faasagatau I tagata ae tau ma faatoilalo le malosi o le pouliuli. I le suafa o Iesu Keriso, Amene.