Samoan Devotional

OPEN HEAVENS
MATALA LE LAGI MO LE ASO TOFI 2 MATI 2023

Manatu Autu:  Talai atu le Upu (Preach the Word)

Tauloto – Tusi Paia: 2 Timoteo 4:2 ‘Ia e tala‘i atu le ‘upu, ‘ia e fa‘amalosi i ona aso e taugalemū ai, ma ona aso e lē taugalemū ai, ‘ia e fa‘atonu atu, ‘ia e a‘oa‘i atu, ‘ia e apoapoa‘i atu ma le ‘onosa‘i uma ‘atoa ma le a‘oa‘o atu....’.

Faitauga - Tusi Paia: 2 Timoteo 4:1-5 

Upu Folafola
O le tusi a Mareko 16:15, o loo fetalai mai ai Iesu “O atu ia outou i le lalolagi, ma tala‘i atu le talalelei  i tagata uma lava”. O le poloaiga lenei mo so’o uma o Iesu Keriso. O le mau e pei ona taua i luga, o lo’o manino mai ai, ua tofia so’o uma o Iesu e talaʻi le talalelei. E mafai ona e fesili po’o, “O ai e tatau ona talaʻi atu i ai?” Ua saunia e Iesu le tali i le vaega faaiʻu o le mau o lo’o taua i luga. Na Ia fetalai, e talaʻi atu le talalelei i tagata uma, ae I le Mataio 28: 19-20, o lo o ia fetalai mai ai, "Talaʻi atu le talalelei i nuu uma lava".

Atonu e te fesili ma faapea atu, “O afea e tatau ai ona ou tala’iina le Talalelei?” Na tali e le Agaga Paia I lenei fesili e ala i le tusi lona lua a Paulo ia Timoteo o lo o iai I le tauloto mai le Tusi Paia o le aso. O le Upu a le Atua e tatau ona tala’iina i taimi uma. I se isi faaupuga, e tatau lava ona tatou talaʻi atu le upu a le Atua pe talafeagai pe le talafeagai foi. 

Atonu tatou te mafaufau ma fesili, pe aisea na poloa’iina ai e Iesu ona so’o uma e tala’i atu le upu a le Atua i tagata uma, ma atunuu uma o le lalolagi. O loo manino I le Roma 10:13-15 se tali I lea vaega:
13Auā “E fa‘aolaina i latou uma o ē vala‘au i le suafa o le Ali‘i.” 14O lenei, pe fa‘apefea ‘ona latou vala‘au atu i lē ‘ua latou lē fa‘atuatua i ai? Pe fa‘apefea fo‘i ‘ona latou fa‘atuatua i lē ‘ua latou lē fa‘alogo atu i ai? Pe fa‘apefea fo‘i ‘ona latou fa‘alogo atu, pe ā leai se tala‘i atu? 15Pe fa‘apefea fo‘i ‘ona latou tala‘i atu, pe ‘āfai ‘ua lē ‘a‘auina atu i latou? Pei ‘ona tusia, “E matagofie na‘uā o latou vae o ē ‘aumai le tala lelei i le manuia.”

O le finagalo o le Atua, e laveaina le lalolagi atoa mai le agasala ma le malaia e faavavau – ae e faapefea ona faalogo tagata uma i le upu a le Atua pe afai e leai ni failauga po o ni faifeau? Na fetalai Iesu Keriso, e tele le saito e mafai ona seleseleina ae e toaitiiti le au faigaluega (Mataio 9:37). Ia saunia lou tagata I le aso e galue malosi mo le Alii, ma o le amataga lea o lou iloa o faailoga ma vaega eseese ofoofogia faalelagi i lou olaga.

E moni, e matagofie vae o ē e talaʻi atu le tala lelei (Roma 10:15) ma o lē e manumalo i agaga e poto lava ia ( Faataoto 11:30 ).

Afai e te le'i taliaina Iesu e avea ma ou Alii ma Fa’aola, faamolemole, ia taliaina loa le Alii I lou olaga, ina ia mafai ai ona e auai i le tala’iina atu o le talalelei o le faaolataga a le Atua, i tagata uma i le lalolagi.

Ia e auai ma a’u e faafetaia le Alii mo le faaopoopoina o seisi tausaga I lo’u olaga I le aso, ona talai atu lea o le talalelei I se tagata se toatasi I aso uma lava, e amata atu I le aso, I le suafa o Iesu Keriso, Amene. 

OPEN HEAVEN
MATALA LE LAGI MO LE ASO LULU 1 MATI 2023

Manatu Autu:  Punaoa o Meaalofa Lelei ma le Atoatoa (The Source of Good and Perfect Gifts)

Tauloto – Tusi Paia: Iakopo 1:17 ‘‘o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei, mai lugā lava ia, e alu ifo mai le Tamā o malamalama, e lē o ‘iā te ia se mea fa‘alētumau po o sina liliu itiiti...’.

Faitauga - Tusi Paia: Luka 6:38 

Upu Folafola
O mea uma lava o lo’o vaaia I le lalolagi nei na amata ma tupuga mai le Atua, e o’o I mea na fausia e tagata. O lona uiga, e pule le Atua I so’o se punaoa I le fogaeleele. Fai mai le Salamo 24:1 “O le lalolagi ma mea ‘ua tumu ai o a le ALI‘I ia; o le atu laulau ma ē o nonofo ai”. O so’o se mea e maua e se tagata, na tuuina ia te ia mai le Atua. O le uso o lou tama lena e te faamoemoe iai e totogiina lou pili aoga, ua na o se ipu I aao o le Atua, e le o ia e te maua ai mea uma e te manaomia. Afai o lou faamoemoe o loo ia te ia, afai e le toe maua sana galuega e maua ai se tupe taeao, o le a lau mea e faia? E le mafai ona faamoemoe ma faatuatua I se tagata, aua e na o le Atua e mafai ona ia foai ma fesoasoani ia te oe I so’o se mea. 

Fai mai le Ieremia 17:5 ‘ O lo‘o fa‘apea ‘ona fetalai mai o le ALI‘I: ‘Ia malaia le tagata e fa‘atuatua i tagata ma ‘ua fai tagata mōna lima a ‘ua liliu ‘ese lona loto i le ALI‘I.

O mea alofa uma e ‘ato‘atoa ‘ona lelei, e mai le Atua (Iakopo 1:17). Tu’u atu I le Atua lou faatuatua e foai mai mea uma e te manaomia ma o le a e iloa lona foai mai o mea uma. Ae e te lei saili fesoasoani atu I se tagata, fesili I le Atua. Talanoa ia te ia ina ia avea le Atua e fai ma taitai ia te oe I so’o se tagata ua ia saunia e fesoasoani ia te oe. Na malamalama lelei Tavita I lenei tulaga ma o lea na ia faapea mai ai: 1E fa‘asaga a‘e o‘u mata i mauga, e o‘o mai ai lo‘u fesoasoani. 2O lo‘u fesoasoani mai i le ALI‘I lea, o lē na faia le lagi ‘atoa ma le lalolagi (Salamo 121:1-2).

O le a se mea o lo’o e manaomia ina ia e fiafia I le foai a le Atua? Ia e lima foai. Afai e te lima uu, ia e manatua e faapena foi le fua e te maua.  O lo’o aoaoina I tatou e Iesu I le Luka 6:38 Ia outou foai atu ona foaiina mai lea ia te outou. I nisi faaupuga, aua e te manatu e te maua pe afai e te le foai. O lenei aoaoga e faigofie ma malamalama gofie. Ia e foai I tagata matitiva (Salamo 41:1), foai I le aiga o le Atua (Kalatia 6:10) foai i le Alii (Faataoto 3:9-10). 

Ia e manatua, e na o le Atua lou punaoa ma o so’o se foai e faia e tusa ma lona finagalo, e matalatala ai avanoa e maua ai meaalofa e atoatoa ona lelei. Afai e iai sou manaoga, silasila I le Atua ae le o le tagata, aua na te foai atu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 28 FEPUARI 2023

Manatu Autu:  O Lē Silisili Ese (The Most High)

Tauloto – Tusi Paia: Salamo 47:2 ‘‘Auā e mata‘utia le ALI‘I lē Silisili‘ese; o le Tupu silisili ia i le lalolagi ‘atoa..’.

Faitauga - Tusi Paia: Salamo 47:1-7 

Upu Folafola
E toatele ni taitai ta’uta’ua i le lalolagi. Peitai, e iai Lē ua ta’ua o le Silisili ‘ese, o Lē e ona le malosi uma lava. E sili atu lona maualuga nai lo se tagata silisili (Failauga 5:8). A o Isaia 66:1 o lo o faapea mai o le lagi o lona nofoalii a o le lalolagi o le nofoaga e tu ai ona vae. I le tusi o Faaaliga, o lo o fa’apea mai o ia o le Tupu o Tupu ae a fa’atusa mai i aso nei, o lona uiga, o ia o le Peresetene o Peresetene o lenei lalolagi.

O le Atua Silisili ‘ese na te pulea mataupu e faatatau i tagata (Tanielu 4:25). I le tusi o Tanielu 4:34-35 sa ta’utino mai e le Tupu o le atunuu ma le malo e sili ona maualuga le tamaoaiga ma le malosi i lena vaitaimi, e faavavau le pule’aga a Lē e Silisili ‘Ese. O lona uiga mai lea taimi i lea taimi, a iai se Ta’itai o se Malo ua manatu o ia ua mata’utia ma ua ia te ia le Pule atoatoa, e faia e le Atua se a’oa’iga ina ia faamanatu i le lalolagi o loo ia umia pea le pule aoao. O le vairasi o le Korona sa faaalia ai e le Atua i ta’ita’i o le lalolagi, e ui ina latou maua le atamai, ae a aunoa ma le Atua, e leai so latou malosi ma e tatau ona latou lafoa’i tulaga uma i le ta’ita’iga a le Atua. 

O loo faapea mai le Faata’oto 21:1, O le finagalo o le tupu, o vaitai ia i le ‘a‘ao o le ALI‘I; na te liliuina i mea uma ‘ua ia finagalo i ai. A iai se taimi ua musuā ma teena e se Tupu I le lalolagi ona ifo atu i le Atua, e lua ni auala e faia e le Atua I lea tupu. O le auala muamua o lona liua o le mafaufau a le Tupu ina ia foliga e pei o se meaola. A alua’e alua’e ua a’oa’oina lona mafaufau ma ua iloa ma manino o le Atua e ana le pule uma lava, ona toe fa’afoisia lea o lona mafaufau i le lelei ma e ono mafai foi ona toe faatula’I lona nofoalii fa’atupu. O le mea lena sa o’o ia Nepukanesa i le tusi o Tanielu 4: 30-37.  O le auala lona lua e mafai ona fa’aaoga e le Atua, o le fa’ama’a’a o le loto o le Tupu, ona fa’aumatia lea e le Atua ina ia fai ma faataitaiga i le lalolagi atoa, o le Atua o le Tupu Silisili Ese.  O le tulaga lena sa o’o iai Farao i le tusi o Esoto 15:4-6. 

E faapena foi le mea na tupu i ni tausaga e lei leva atu, i Nigeria, ina ua pulea le atunuu e se fitafita sa avea ma Ao o le Malo. Ua pei o ia e ana le atunuu, i lona fasiotia o tagata ma faia lana faitalia. Ina ua tumu le ipu a le Atua, na ia tafi’esea lenei ta’ita’i e faavavau. Afai e avea oe ma ta’ita’i, aua nei fa’afefeteina ai lou mafaufau; ia e manatua i taimi uma lava, o le mea moni, o Atua o lo’o iai le pule aoao. 

O le Atua o lo o pule pea i mataupu e faatatau i tagata ma o lana pule’aga e faavauvau, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 27 FEPUARI 2023

Manatu Autu:  Ia Usiusitai I Pule Uma lava (Obey Constituted Authority)

Tauloto – Tusi Paia: Roma 13:1 ‘‘Ia usiusita‘i tagata uma i faipule silisili; auā e leai se pule pe ā lē mai le Atua; o pule uma lava o lo‘o fai nei, ‘ua fa‘atūina e le Atua.’.

Faitauga - Tusi Paia: Roma 13:1-7 

Upu Folafola
O loo faapea mai le Roma 13:1 o I latou uma o loo I ai le pule, na faatuina I latou e le Atua. Fai mai le Roma 13:4, o se taitai, o se ‘au‘auna a le Atua, o lē na te taui atu i le to‘asā i lē amioleaga. 

Fai mai le Failauga e 8:4 ‘O le mea ‘ua i ai le poloa‘iga a le tupu, o le mea lea ‘ua i ai le pule; o ai fo‘i sē na te fai atu ‘iā te ia, “Se a le mea ‘ua e faia?” O so’o se tagata o lo’o I se tulaga pule e iai le mana, e tatau ona usiusitai iai seia vagana o latou faatonuga e tetee I le Upu a le Atua. 

Fai mai le Roma 13:3-4, e tauave e le tupu le pelu ma e tatau ona anaana iai aua e le fai fua lana pelu. I nisi faaupuga, o lo’o ia te ia le mana e faaaoga ai le pelu pe a e sese. Ina ua tupu le faamai tele o le korona vairusi, na tatou iloa ai le malosi o le pule a I latou o taitai tatou te lei vaai muamua iai. Mo se faataitaiga, ina ua aumai le poloaiga a le malo e tapunia mea uma, na faia uma ma usitaia e tagta ma ua peiseai ua lokaina uma tagata I le fale. Na tuuina iai e le Atua lenei pule. E le afaina pe pito sili ona maualuga lou faauuina, ae e tatau ona e usiusitai iai latou ua tuuina iai le tulaga pule.

E faapeī o tatou foliga o kerisiano pe afai e tatou te lē usiusitai lava I pule uma lava? E te manatu ea e finagalo le Atua e silasila ane le lalolagi I lana fanau o ni tagata e loto ma’a’a ma lē usiusitai? O so’o se tagata e tetee I e pule, e le tatau ona aofia o ni kerisiano, aua foi o le faakerisiano e tatau ona faapaiaina, o lona uiga e tatau ona usiusitai ma le atoatoa. Afai o se tagata faipisinisi o loo avea foi ma se faifeau, ae tago fetuutuunai fuainumera ina ia laitiiti pe leai foi ni lafoga e totogina I le malo, e talafeagai ea lona lauga atu o le talalelei ia Iesu Keriso I tagata o le Ofisa o Lafoga na latou mauaina lana solitulafono? Afai e iloa atu oe e tagata e loo tauai lapisi I le auala ma alu pea lau taavale ao loo mumu moli, o le a le ata o loo e valiina atu o lou tama I le lagi? Talitonu mai ma le faamaoni, afai e te lē usiusitai I pule uma lava, o lo’o e lē usiusitai I le Atua, ma a faaaoga e I latou e iai le pule le pelu ia te oe, e lē faasaoina oe e le Atua. E finagalo le Atua I lana fanau e usiusitai I pule uma lava. O le lē usiusitai I pule uma lava, e oo atu ai I le fouvale, ma o se agasala (1 Samuelu 15:23).

O le le usitaia o pule uma lava, o le le usitaia foi lea o le Atua, I le suafa o Iesu Keriso, Amene.     

OPEN HEAVENS
MATALA LE LAGI MO LE ASO SA 26 FEPUARI 2023

Manatu Autu:  Faavasegaina lelei o le faale tino ma le faaleagaga (Balancing the Physical and Spiritual)

Tauloto – Tusi Paia: 3 Ioane 2 ‘Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga’.

Faitauga - Tusi Paia: Kalatia 5:16-25 

Upu Folafola
E toatele tagata o loo ola ma soifua I ni olaga e le ausia le maualuga e tatau ona iai ona e le mafai ona faapaleni le faaletino ma le faaleagaga. E toatele kerisiano e faatino na o mea faaleagaga, e tatalo, faitau le Tusi Paia, ma faia galuega tetele ma le matagofie I totonu o le Ekalesia, molimau atu I tagata ma faapena, ae tuulafoai le galue punouai I totonu o fale faigaluega, tuulafoai le soifua maloloina I le ai o meaai paleni ma faamalositino ma tuulafoai le mafuta vavalalata lelei ma aiga. E maea ane, e matua le fiafia I le ituaiga olaga o loo soifua ai ma manatu, pe aisea ua le faia ai e le Atua se faiga ina ia manuia mea uma. E sa’o ma lelei le faia o mea ina ia e matua manuia I le itu faalegaga ae aua nei e tuulafoai le faia o galuega mo lou soifua maloloina lelei. Fai mai le Kalatia 6:7 ‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia.

Afai e te faatalale I lou soifua maloloina, aua e te ofo pe a e ma’i. Afai e te tuulafoai I lou toalua ma lau fanau, e te selesele foi pe a tuulafoai oe e I latou. Afai e te luluina le leaga o le faigaluega I le ofisa ma le leai o se galue punouai, e oo mai ai lava le mativa (Faataoto 6:10-11). O le mea e te luluina I le itu faaleagaga, e te seleseleina foi, e faapena foi I le faaletino. 

O le tatou tauloto mai le Tusi Paia o le aso, o loo faaalia manino ai le finagalo o le Atua ia tatou manuia I mea uma, tamaoaiga faulai, soifua maloloina lelei ma le manuia o tatou agaga. O le tulaga o I latou e tuuina atu uma le faamamafa I le manuia faaletino ae tuulafoai le faaleagaga, e ogaoga aafiaga. Mo nei tagata, e amata I le tatalo ma le anapogi mo se mea o loo manaomia, peitai e ono le mafai ona se maua se tali lelei, e latou te le silafia ina, e iai mea faapitoa e maua le tali na o totonu o se mafutaga vavalalata ma le Atua le Tama, e pei o le Tama ma lona atalii (Mataio 15:26). 

O ituaiga olaga o loo finagalo le Atua e te soifua ai, o le manaomia lea ona faapaleni le itu faaletino ma le itu faalegaga, o le ituaiga olaga lea e faamalieina lelei I le lalolagi nei ma faapena ona maua le lagi pe a mavae atu ma tuua le lalolagi. O le olaga paleni lelei lea. O le ituaiga olaga lena e tatau ona e saili iai ina ia maua. I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOONAI 25 FEPUARI 2023

Manatu Autu:  E finagalo le Atua e te manuia (God wants you to prosper).

Tauloto – Tusi Paia: Salamo 35:27 ‘‘Ia pepese ma taufai‘oli‘oli o ē loto i la‘u amiotonu; ‘ia fai ane pea lava i latou,

“‘Ia vi‘ia le ALI‘I, o lē ‘ua finagalo ‘ia manuia lana ‘au‘auna.

Faitauga - Tusi Paia: Kenese 26:12-14, 3 Ioane 2. 

Upu Folafola
I le Tusi o Ioane 10:10 o loo folafola mai ai e Iesu Keriso na afio mai o ia, ia tatou maua le ola ma ia maua atili ai lava. E lē gata i lea fai mai le Salamo 68:19 ua fa’ae’e mai e le Atua i lea aso ma lea aso manuia ia i tatou. E finagalo le Atua ia e manuia aua o loo manino mai lava i le Tusi Paia I le Faataoto 10:15 o le malaia o ē matitiva o le mativa lava lea. E lē faaumatiaina oe i le suafa o Iesu. O loo fa’aalia manino I le 1Timoteo 6:10 o le mana’o i tupe (e lē o tupe) o le pogai lea o mea leaga uma lava.

E finagalo le Atua e faulai lou tamāoaiga auā o lana polokalame mo lou olaga ia avea oe o se faamanuiaga. E lē mafai ona avea oe ma faamanuiaga i nisi pe afai e te lē o manuia foi oe. Afai e lē o i ai se meaai e te tausami ai, e faafefea ona e fafaga i e matitiva? Ou te folafola atu i lou olaga, e te manuia I le suafa mamana o Iesu Keriso.

O nisi failauga a talanoa i le tala iā Lasalo ma le tagata mauoa o loo i le Luka 16:19-31 e faapea mai, ona na alu le tagata mauoa i seoli a’o Lasalo le tagata mativa sa avea ia e agelu i le fatafata o Aperaamo, o tagata mauoa uma a la e o i seoli ae na o tagata matitiva e o i le lagi. O lea faatatau e lē tutusa ma le tala. A e suesue lelei I le tala lea e te iloa ai na fa’atoga le tagata mauoa ia toe fo’i Lasalo I le lalolagi e lauga i ona uso peita’i na tali Aperaamo le tamā afai e le’i faalogo ona uso i le ‘au perofeta, e lē faalogo fo’i iā Lasalo. O lona uiga ua manino e lē o le mauoa na alu ai le tagata mauoa I seoli a’o lona musu e faalogo I le ‘au perofeta.

Ua fa’aali manino mai le Ioane 3:1-16 o le ala e sao ai i le lagi o le olaga fanaufouina. E lē afaina pe ete mauoa pe mativa, a lē faaolaina lou olaga o le a e nofo e faavavau I le lepa afi. E mafai ona avea oe ma tagata aupito sili ona mauoa I le lalolagi ma alu I le Lagi pe a fai ua e fanaufouina. E mafai fo’i ona avea oe ma sē aupito mativa i le lalolagi ae alu i seoli pe a e musu e tu’u lou ola iā Iesu.

Ua fa’aalia manino mai le Faataoto 10:22 o le fa’amanuia a le Atua e fa’atamāoaiga ai na te lē faaopoopo I ai se tigā. E lē mafai ona e i’u i seoli pe afai o lou tamāoaiga e aumai i le Alii ma e soifua e tusa ma lona finagalo. I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 24 FEPUARI 2023

Manatu Autu:  Tuputupu a’e o lou faatuatua 4 (Growing your faith 4)

Tauloto – Tusi Paia: Iuta 1:20 ‘A o ‘outou le ‘au pele e, ‘ia ‘outou ati a‘e ‘iā te ‘outou i lo ‘outou fa‘atuatua e silisili ‘ona pa‘ia, o le Agaga Pa‘ia tou te tatalo ai.

Faitauga - Tusi Paia: 1 Korinito 14:14-15

Upu Folafola

Fai mai le 1 Korinito 14:14Auā ‘āfai ‘ou te tatalo i le gagana uiga ‘ese, ‘ua tatalo ai lo‘u agaga, a ‘ua lē fua mai ni fua e lo‘u mafaufau.

O so’o se taimi e te tatalo ai I le Agaga Paia, o lo’o e tatalo I le faatuatua aua foi e tele lava e te le malamalama I upu o lo’o e tautala ai. I nisi faaupuga, a’o e tatalo I le Agaga Paia, o lo’o e faaaogaina lou faatuatua. O maso o le tino e tupu pe a faagaoioi I le faamalositino, e faapena foi le faatuatua. O le faatuatua o lou maso lea I le itu I le agaga, e te faatupuina e ala I le tatalo I gagana eseese. 

Ou te ofo I le tele o kerisiano, e aofia ai le toatele o le au penetekoso e le masani ona tatalo I le Agaga Paia, ona o lea tulaga, e leai se tupu o lo latou faatuatua. O le tele lava o taimi e te tatalo ai I le Agaga Paia, o le tupu ma maualuga foi lea o lou faatuatua ma sili ai ona manuia lou lumanai. 

Afai e te lei maua le papatisoga o le tautala I gagana eseese, ou te tatalo ia e maua I le aso, I le suafa o Iesu. Afai ua papatisoina oe I le tautala I gagana eseese ae e te le o faaaogaina, amata loa ona faia. I le aso o le Penetekoso, ao lauga e Peteru se lauga matautia ina ua ia maua le papatisoga a Agaga Paia, na o mai iai tagata ma faapea atu ‘Sema e, le ‘au uso e, se a se mea matou te faia?’ ona tali manino atu lea o Peteru I le Galuega 2:38 e faapea:

38‘Ona fai atu lea o Peteru ‘iā te i latou, “‘Inā salamō ia, ma ‘ia ta‘itasi ma papatisoina ‘outou uma i le suafa o Iesu Keriso, mo le fa‘amāgaloina o agasala; ‘ona maua lea o ‘outou o le mea foa‘i fua mai, o le Agaga Pa‘ia lea

Na ta’u manino iai e Peteru, o le laasaga muamua o le salamo, lona lua o le papatisoga I le vai ma lona tolu ia maua ma talia Agaga Paia. O Peteru lava lea na ia tiai le valaauina ma le miti e avea ma faifaiva I tagata. Na ia lauga ma manumaloina agaga e $3000 I le aso e tasi, mai le aso na amata ai ona tautala I gagana eseese. O ana miti ma naunautaiga uma, na toe faaolaina I le aso na papatisoina ai e Agaga Paia. Na amata ai lava I le aso lea, e lei toe iai se solomuli. Na amata ai ona siitia ma siitia atili lona tulaga ma le faatuatua ua oo lava I lona ataata ua malolo ai ma’i. E toe ola uma au miti pe afai e te tautala I gagana eseese e faifaipea. 

Tatalo I gagana eseese I le itula I le aso, e amata atu I le aso, ma ia faia ma au masani, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 23 FEPUARI 2023

Manatu Autu:  Tuputupu a’e o lou faatuatua 3 (Growing your faith 3)

Tauloto – Tusi Paia: Iakopo 1:22 ‘A ‘ia fai ‘outou ma ē ‘ana‘ana i le ‘upu, ‘ae ‘aua le na ‘ona fa‘alogologo i ai, o fa‘asesēina ai ‘outou e ‘outou.

Faitauga - Tusi Paia: Iakopo 1:22-25

Upu Folafola
A maea ona e suʻesuʻeina afioga a le Atua, tauloto ma mafaufau loloto i ai, e tatau ona e galue e faatino ma savali ai, ona tuputupu aʻe lou o faatuatua. O le faitauga o le Tusi Paia mo le aso, o loo manino lava, e lē tatau ona na o lou faalogo, ae ia e faatino galuega uma o loo fai mai ai le Tusi Paia.  E moni, o le fuaiupu 25 o loʻo faapea mai, afai o oe o se tagata e anaana i le upu a le Atua, e faamanuiaina oe. I se isi faaupuga, o le tele o lou faaaogaina o le upu a le Atua, o le tele foi lena o ou manuia.

O le faamaoni, o se nauna, o le faatuatua o se veape. Afai e te talitonu ma le faamaoni, e faaalia i au amioga uma (Iakopo 2:26). A e manatunatu loloto i se vaega na e faitauina i le Tusi Paia, o le isi mea ua talafeagai ona e faia o le faatino loa. Ia e gaioioi e faatino e tusa ai ma vaega o loo faʻaalia ia te oe, mai le upu a le Alii.

A e faitau i le Faataoto 21:13, o loo faapea mai, e lē tatau ona punitia ou taliga i le alaga a ē matitiva, po’o e faia lea tulaga? A e faitau i le Teuteronome 28:7 o loo faapea mai, afai e faapotopoto mai fili e faasagatau mai ia te oe i le ala e tasi, o le a faataapeapeina i latou i vaega e fitu, po’o e toatamai pea i le vaai atu ia i latou?

A e faaaogaina lesona e te maua mai le afioga a le Atua, o le amataga lena o le tuputupu a’e o lou faatuatua. I le amataga, o le a avea le faatuatua itiiti ma faatuatua tele, ma faatuatua tele o le a avea ma faatuatuaga e sili atu le tetele. Pau lava le vaega e tatau ona e faia, o le faʻataʻitaʻiina o vaega uma e pei ona aʻoaʻoina ai oe.

Ou te lei amata i le tulaga o lo’u faatuatua ua ou maua nei. Ou te manatua lelei le taimi na faatoa ou fanaufouina ai; na aoaoina i matou e lo’u faiaoga Aso Sa e faapea, afai e alu se tamaitiiti i luga o le taualuga o lo latou fale ma fai atu lona tama ia te ia e oso i lalo, ma ia folafola atu o le a ia pu’e ma sapo o ia, o le a oso le tamaitiiti lea. I le manatu lava lea e tasi, a fetalai mai le Atua tatou te osooso, e tatau lava ona tatou faia. Na ou mafaufau loloto, ona talu mai lena taimi, na o lo’u osooso lava, ae laveaiina aʻu e le Atua. O le tele o taimi ou te amataina ai ni galuega, e le faapea ona o loo i ai a’u tupe e manaomia e faamaea ai, ae ona ua ou iloa, o le a opogi a’u e le Atua ma e lei toilalo lava o Ia. Mo taimi uma lava e faaali mai ai o Ia, na tuputupu ae ai lo’u faatuatua ma faateleina ai a’u miti. Ou te alu pea i mauga tetele ona ou te mautinoa, o loo soifua le Atua ma o loo ia puipuia lo’u nei tagata i ala uma.

O e faataitai ea ma faatino lesona uma o lo’o a’oa’oina ai oe mai le Upu a le Atua, le Tusi Paia? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 22 FEPUARI 2023

Manatu Autu:  Tuputupu a’e o lou faatuatua 2 (Growing your faith 2)

Tauloto – Tusi Paia: Iosua 1:8 ‘E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea’

Faitauga - Tusi Paia: Salamo 1:1-3

Upu Folafola
A’o faaauau pea la tatou suesuega I auala e faatupuina ai le faatuatua, o le a ave le faamamafa I le aso I le taulotoina ma mafaufau loloto I le Upu a le Atua. 

O le a tatou suesue ia Tavita. O ia o se leoloe mamoe ma sa le amanaiaina ao valaaulia mai ona uso I le autau a Isaraelu. Peitai na ia faia se miti tele e faasagatau atu ma faatoilaloina se sauai na matua fefefe uma ai le autau a Isaraelu (1 Samuelu 17). 

O se tasi o mealilo pito sili ona taua, o lo’o taatia I se faamatalaga na faia e Tavita e faapenei I le Salamo 119:11 ‘Ua ‘ou teu i lo‘u loto lau afioga, ‘ina ne‘i ‘ou agasala ‘iā te oe. O lona uiga o lana faamatalaga o loo faapea mai ‘ou te taulotoina le Upu a le Atua’. Leitioa e oo mai lava I le aso, o loo tumau lona lauiloa o se tasi o tupu tautaua o Isaraelu. 

E iai se tamaitiiti na fesili mai ia te a’u, ‘e faapefea ona tele ina e iloa uma le Tusi Paia?’ O la’u tali iai ‘aua ou te taulotoina’. Ina ua ou faaolaina, na amata loa ona ou taulotoina le tasi le fuaiupu I le vaiaso. I le tatou tusi taiala mo le Aoga Aso Sa, o loo iai se upu e taulotoina I vaiaso uma. Afai e tasi le mau e tauloto I le vaiaso, o lona uiga e maea ane le Tausaga ua 52 fuaiupu ua taulotoina. Ona na ou faaolaina I le 1973, tago e fai ane lau faatele pe fia le aofai o fuaiupu, aua o le aofai lena o fuaiupu mai le Tusi Paia ua maea ona ou taulotoina ma teu I lou loto. E na o sina galuega lava e faia I vaiaso uma, ma ao faagasolo Tausaga, e oo atu ina matua tele fuaiupu o le Tusi Paia e te taulotoina ma e tupu ai lava ma maualuga lou faatuatua. 

E tatau foi ona e mafaufau loloto I le Upu a le Atua. A e mafaufau loloto iai, o loo e suesue ma maitau I ona vaega uma. E pei o se povi e ai le vao ona taoto lea I lalo ma lamulamu lemu, e manaomia lou suesue ina o le Upu o loo e taulotoina e vaevaeina lelei ina ia e maua le loloto o faaaliga mai le Upu e faatupuina lou faatuatua. E o’o mai ai le manuia. 

Fai mai le Salamo 1:1-3, afai e te fia manuia, e tatau ona mafaufau loloto I le upu  a le Atua I le aso atoa ma le po. Ua e iloa, o le Upu a le Atua o le Atua lava lea (Ioane 1:1) ma afai o loo e mafaufau loloto iai, o lona uiga o loo e sailiili I le Atua lava ia. Tauloto ma mafaufau loloto I le Upu a le Atua I aso uma ona e vaai lea I le tupu talaulau o lou faatuatua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 21 FEPUARI 2023

Manatu Autu:  Tuputupu a’e o lou faatuatua 1 (Growing your faith 1)

Tauloto – Tusi Paia: Roma 10:17 ‘O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea’.

Faitauga - Tusi Paia: Roma 12:3

Upu Folafola
O le faitauga o le Tusi Paia o le asō o loo faapea mai, o le aso na faaolaina ai oe, na tuuina atu e le Atua ia te oe se ‘fuataga’ o lou faatuatua. O lo’o faapea mai le Efeso 2:8, o le alofa tunoa a le Atua ua faaolaina ai oe e ala i le faatuatua. I se isi faaupuga, a aunoa ma le fuataga lena o lou faatuatua, e aunoa foi ma le faaolataga. O lona uiga, e mafai ona tuputupu a’e lou fa’atuatua mai le taimi na e mua’i faaolaina ai, pe leai foi. Ina ia faatupuina lou faatuatua, e tatau ona e faia ni laasaga. O le tatou suesuega i le aso, o le a aofia ai se tasi o ia la’asaga, o le ‘faalogo i le upu o le Atua’.

Fai mai le Roma 10:17:O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea’.

O le auala muamua e faatupu ai lou faatuatua, o le faalogo lea i le Upu a le Atua. E iai nisi e taumate pe aisea tatou te o mai ai pea I mafutaga a le lotu, ae maise le faalogologo i lauga a le faifeau ma faitau le Tusi Pa’ia, e faia ina ia tuputupu a’e ai le faatuatua. I le Salamo 119:30 o loo faapea mai le Tusi Pa’ia –“O le fa‘aalia mai o au afioga e fa‘amalamalamaina ai; e fa‘alotomatalaina ai ē ‘ua faigofie”.

O le faatele ona pa’i atu o le upu a le Atua i lou loto, e atili ai ona e maua le malamalama ma le tele o le iloa e te mauaina. E mafai ona faatusa i le tagata e ‘ave taavale i le po, a malosi le susulu o moli taavale, ona saoasaoa foi lea o le alu o le taavale, ae a vaivai le susulu o moli, o le a tau fa’agese le alu o le taavale. Peitai afai foi e pepe moli o le taavale, o le a faamalosia ai ona faatu le taavale. O le Faataoto 4:18 e faapea mai: ‘A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la’.

O le tele o lou suesue i le Upu o le Atua, ma lou alu i le A’oga Aso Sa ma mafutaga e a’oa’o ai le Tusi Paia, ma faalogologo i lauga, o le a faatupu teleina lou faatuatua ma o le a faatupuina le manuia ma le faamoemoe mo lou lumanai! E finagalo le Atua e te fuafua fa’atatau le fa’atupu atili o lou faatuatua mai le aso na e faaolaina. Ae afai e te lei taliaina Iesu e avea ma ou Alii ma Faaola, e tatau ona e faia loa, ma amata ona e faatupu lou faatuatua i le Atua.

Ia suesue le upu o le Atua i aso uma, I le suafa o Iesu Keriso, Amene.