Samoan Devotional

OPEN HEAVENS

MATALA LE LAGI MO LE ASO LULU 22 MATI 2023

Manatu Autu:  O le Upu e Tupu ai le Faatuatua (The Word Produces Faith) 

Tauloto – Tusi Paia: Salamo 119:42 ‘‘Ona ‘ou tali atu lea se ‘upu i lē fa‘alumaina a‘u; auā ‘ou te fa‘atuatua i lau afioga.”

Faitauga - Tusi Paia: Salamo 119:49-51  

Upu Folafola

O se tasi o itu matagofie e faatatau I le Upu a le Atua, e faatupuina le faatuatua. Fai mai le Roma 10:17 O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea.

E aoga le Upu e faatupuina le faatuatua I totonu ia te oe, ia matua faateleina ma e mafai ai ona e faataunuuina mea sa le mafai ona faia muamua. Fai mai le Tanielu 11:32…a o le nu‘u o ē ‘ua iloa lo latou Atua latou te fa‘amalolosi ma fai mea tetele. 

O le tele o lou silafia o le Atua, o lou malosi foi lena e faia mea tetele mo le Atua. E iai lava se mea e matagofie e faatumulia ai oe pe a suesue I lau Tusi Paia, ua amata ona e vaai atu I mea I le vaaiga a le Atua. Ua amata ona e tilotilo atu I vaega eseese o le olaga e pei o le silasila a le Atua. Ua e matua toa ma leai se fefe, O mea sa masani ona le mafai ona ausia ua avea ma mea masani ua ausia. O le mea moni, ua e ui ma maua vavega tetele, ua faigata ona e faia ni tautinoga ona e matua faigata I tagata ona talitonu iai. 

Afai e te ai I le Upu a le Atua e matua faateleina ua matua faatumuina ai lou tagata, o lona uiga o loo faapea mai Iesu Keriso ia te oe, o so’o se mea e te ole atu ai, e na te faia lava (Ioane 15:7). Oka se matautia o lenei mea lilo. Afai o loo e manatu pe aisea e vave ai ona maua tali o tatalo a isi tagata, o lenei la ua  e silafia I le aso. Fai mai le

Eperu 11:6 A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia.

Ona o le faatuatua e tupu I le faalogo I le Upu a le Atua ma e le mafai ona faafiafia ia te ia e aunoa ma le faatuatua, e te manaomia le Upu a le Atua e faafiafia ai ia te ia. Afai e te faapei o a’u e ole ma tagi atu lava I le Atua I le tele o taimi ma faapea atu ‘Le Alii e, ou te fia faafiafia ia te oe’, e faigofie le fofo, ia e matua suesue manino ma mafaufau loloto  I le Upu a le Atua. 

E tatau foi ona maitauina lelei mai, o le fefe e oo mai foi I le faalogo, o lona uiga e tatau ona e mataala ma faaeteete I mea o lo’o e faalogo ai. 

Filifili e te faalogo I le Upu a le Atua. Faatumu lou loto I le Upu a le Atua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 21 MATI 2023

Manatu Autu:  O le Upu e Silisili Ese (The Word is Almighty) 

Tauloto – Tusi Paia: Eperu 4:12 ‘‘Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto.”

Faitauga - Tusi Paia: Isaia 55:10-11

Upu Folafola

O le upu e Silisili ‘Ese! Sa ia faia mea uma lava, ma o le mea moni o ia lava o le Atua (Ioane 1:1-3). O le mata’utia o le malosi o le Upu ua na faia ai ni amataga fou. I le Esoto 3:1-5, ina ua fetalai le Atua ia Mose i le si’ui o le toafa, sa maua ai e Mose se amataga fou. E ui sa avea o ia ma se tagata sulufa’i ma foliga mai ua misia faamanuiaga i lona olaga, ae sa maua e Mose se avanoa mo se amataga fou i le taimi ua ia fa’alogo ai i le si’ufofoga o le Atua. I le Ioane 11:39-44, ina ua agai Iesu e toe faatu mai Lasalo, na te lei faae’e ona a’ao i luga o Lasalo; ae sa na ona ia fetalai atu, ona maua lea o se amataga fou o le tagata ua atoa le 4 aso talu ona maliu. Ma ou te folafola atu le ‘Upu a le Atua i le taimi nei lava: ia e mauaina se amataga fou, i le suafa o Iesu.

Ae e le gata ina silisili ‘ese le Upu a le Atua ae e maama’ai, ma o se ituaiga ma’ai e mafai ona vavae’eseina le gaugatino mai a’ano o ivi ma e mafai foi ona vavaeseina le agaga ma le loto (Eperu 4:12). A e va’aia se tagata pagotā ua leva ona masani i le solitulafono, a ua tagi fa’atauanau i luma o le fata faitaulaga ina ia tuuina atu lona ola mo Keriso, o se faataitaiga lena o itu’aiga gaioiga e mafai ona faatino e le Upu a le Atua. E mafai ona vavaeina ai loto ua sili ona fa’ama’aina. O le mafuaaga lena e matua maimau ai le taimi e te taumafai e suia ai ou aiga ua maa’a loto, pe a e faaaogaina au lava upu. A ia e tala’i atu le Upu a le Atua ia i latou ma ia e tatalo o le a vavaeseina o latou loto ina ia latou iloa a latou agasala. 

E iai le tagata na fesili pe aisea e masani ona fa’atumulia I tagata a matou sauniga fa’aevagelia. Sa atili ai ona latou masalosalo aua o a’u lauga i mafutaga nei, ou te fa’aaogaina ai se gagana faigofie ma o le ‘autu o le lauga e tasi lava: “Ia ola faapa’iaina.” Peitai e faatoa’teleina ma faatupula’ia pea tagata e auai mai ai ma e afe ma afe foi tagata e tuuina atu o latou ola ia Keriso i so’o se taimi e faia ai le vala’au. Sa ou faapea atu iai, o ni lauga matagofie ou te faia e faamatalaina ai lo’u malamalama i le gagana Eperu ma le gagana Eleni, e le liua ai ni tagata agasala. E le o ni mafaufauga loloto ma ni a’u filosofia o le a liua ai tagata ae vagana ua iai Agaga Pa’ia. E ui ina faigofie ma tu’usa’o le Upu o le Atua, e matua mata’utia le malosi e liua ai tagata agasala e avea ma ni tagata ola faapaiaina.

Afai o oe o se tagata e folafolaina le Upu a le Atua, faamolemole aua ne’i e taumafai e te mimita i tagata ma e fa’aalia ai lou silafia o gagana Eleni ma Eperu. A ia e folafolaina le Upu ma lou talitonuga o le a galue le Agaga Pa’ia ina ia ‘ausia mea uma e finagalo iai le Alii (Isaia 55:11). 

O le Upu a le Atua e mata’utia lona malosi, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 20 MATI 2023

Manatu Autu:  O le Upu o le Meaai  (The Word is food) 

Tauloto – Tusi Paia: 1 Peteru 2:2 ‘‘Fa‘apei o tama meamea fa‘ato‘ā fānau mai, ‘ia naunau ‘outou i le suāsusu fa‘aleagaga e lē suia, ‘ina ‘ia ‘outou tutupu ai i le fa‘aolataga.”.

Faitauga - Tusi Paia: Ioane 6:48-51

Upu Folafola
Ao tali atu lo tatou Alii o Iesu Keriso I le tiapolo, na ia fetalai; “‘Ua tusia, ‘E lē na o mea e ‘ai e ola ai le tagata, a’o afioga uma e tulei mai i le fofoga o le Atua.’”(Mataio 4:4). 

E moni e manaomia e o tatou tino le meaai mo le ola, ae e moni e manaomia foi e o tatou agaga le meaai faaleagaga o le Upu lea a le Atua. Afai e te le ai I le Upu a le Atua, e te matelaina I le fiaai ma oo atu ai I le oti. E toatele kerisiano e oti I le agaga I le asō, e o’o I faifeau ona latou te le faitau I le Tusi Paia. E avatu le ola e le Upu a le Atua. Na fetalai Iesu Keriso I le Ioane 6:63

“O le agaga lea e tupu ai le ola, e lē aogā le tino i se mea; o ‘upu ‘ou te fai atu ai ‘iā te ‘outou, o le agaga ia, o le ola fo‘i ia”.

O le mafuaaga e maua ai isi tagata I le loto momomo ona e seasea ona aai I le Upu a le Atua. Fai mai le Tusi Paia I le Ieremia 15:16 Na maua au afioga, ‘ona ‘ou ‘ai ai lea; sa ‘iā te a‘u lau afioga e fai ma mea e ‘oli‘oli ai ma fiafia ai lo‘u loto; auā ‘ua ta‘ua a‘u i lou suafa, le ALI‘I e, le Atua o ‘au.

Afai e te ai I le Upu a le Atua, e faamalosia lou agaga ona e faalogoina lea o le ituaiga olioli e le mafai ona faamatalaina. Fai mai le Iosua 1:8 E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea. 

E lei leva ona ou faaolaina ona matou mulimuli lea ma le auuso I le faavae lenei ‘A leai se Tusi Paia, e le leai se meaai o le taeao’. Matou te aai I le Upu a le Atua ae matou te lei aai I meaai. O le mea muamua e tatau ona e faia I le taeao o le ai o le Upu a le Atua. E te maua ai le soifua manuia lelei aua foi ua muamua alu atu I totonu le Upu I lo meaai. 

Ia e faia se faaiuga I le aso ia sili atu lou ai I meaai faaleagaga, le Upu a le Atua, I lo meaai. Ia faia lenei faaupuga ma ou taiala ‘A leai se Tusi Paia leai se meaai o le taeao’, I le suafa o Iesu Keriso, Amene.    

OPEN HEAVENS

MATALA LE LAGI MO LE ASO SA 19 MATI 2023

Manatu Autu:  O le Upu e Faasinoala 2  (The Word Guides 2) 

Tauloto – Tusi Paia: Salamo 119:101 ‘‘Ua ‘alo ‘ese o‘u vae i ala leaga uma lava, ‘ina ‘ia ‘ou tausi i lau afioga”.

Faitauga - Tusi Paia: Mataio 10:17-20

Upu Folafola
O le aso ananafi na tatou faalogo ai pe faapefea e le Upu a le Atua ona faasinoala ia te oe seia faataunuuina le faamoemoe o le Atua mo lou olaga. O le asō o le a tatou talanoa ai pe faapefea e le Upu a le Atua ona ta’ita’i ese oe mai faafitauli. Fai mai le Mataio 10:19: 

“Pe a latou tu‘uina atu ‘outou, ‘aua tou te popole pe fa‘apefea, pe se a fo‘i tou te fai atu ai, auā e foa‘iina mai ‘iā te ‘outou i lea lava itū aso se ‘upu tou te fai atu ai”.

Ina ua avea a’u ma ta’ita’i aoao o le ekalesia sa tele ni faafitauli na ou ui ai auā sa avea a’u ma ta’ita’i o le toatele o tagata ua leva na lolotu I le Ekalesia talu na faatuina i le tausaga 1952, a’o a’u faatoa o’u auai i le ekalesia I le tausaga 1973. O nisi o nei tagata o sui o le faalapotopotoga maualuga I nā aso. O fonotaga uma a lā a le Ekalesia sa fai sa pei se faasalaga mamafa tu ia te a’u. Sa o latou faitio I mea uma. I le tasi aso sa fetalai mai le Atua iā te a’u, “a fai le fono nei aua ne’i faia sau tala sei vagana ua ou fai atu.” O le fonotaga aupito vevela lea ma lugā ma lalō o fono uma. E leai sa’u tala na faia e pei ona faatonuina ai a’u ma na faafuasei ona fetalai mai le Atua faapea “Ta’u atu ia i latou uma nei, ua tusia, o upu faatauvaa uma e faia e tagata latou te talatala atu ai le tala I le aso faamasino.” (Mataio 12:36) O le taimi mulimuli lea na i ai ni faafitauli ma i latou.

O le Upu moni e pei ona fai mai ai Ioane 17:17 o le Upu a le Atua. E tusa ma le ta’ita’iga a le Upu o le a ia te oe le mautinoa aua o le Agaga o le Upu moni e silafia mea uma e o’o I mea moni o loo nātia faatatau I mea uma lava. Ina ua ‘ou tuua se galuega e tele se lumana’i I le poto salalau, e avea ma ta’ita’i i se Ekalesia to’a gaogao latou te lē gafatia ona totogi le au faigaluega, sa ‘ou lē malamalama poo le a le uiga I le taimi lea. Peita’i o le Agaga o le Upu moni na fetalai mai iā te a’u e leai se mea e faaletonu I lo’u lumana’i pe a o’u ui I le ala lea ua ia faasino mai. I le asō ou te faafetai na ou faia faapea. Ina ua fausia e le Ekalesia Redeemed Christia Chuch of God lona nofoaga tutotonu i le ogatotonu o le vaomatua e tumu i gata ma toatele ai tagata faomea, sa ou lē malamalama pe aisea, peita’i o iina e ta’ita’i ai e le Agaga o le Upu moni i tatou. O aso nei o le nofoaga lea ua avea ma taulaga e sili ona fia nonofo ma fia faigaluega ai tagata.

Faataga le Upu a le Atua e faasino ia te oe i filifiliga uma e te fai. E lē mafai ona sili atu lou iloa i le silafaga a le Agaga o le Upu moni. Faailoa iā te ia mea uma ma faatali i lana faasinoga a’o le’i faia lava sau gaioiga, o se faaiuga sili lea ona atamai.

Tatalo

Tamā faamolemole fesoasoani mai ia o’u gaua’i I le Agaga o le Upu moni e ta’ita’i ma faasino vaega uma o lo’u olaga i le suafa o Iesu. Amene.

OPEN HEAVENS
MATALA LE LAGI MO LE ASO TOONAI 18 MATI 2023

Manatu Autu:  O le Upu e Faasinoala 1 (The Word Guides) 

Tauloto – Tusi Paia: 2 Timoteo 3:16 ‘‘O Tusi Pa‘ia uma lava e mai le Agaga o le Atua ia, e aogā fo‘i ‘ia e a‘oa‘o ai, e a‘oa‘i ai, e fa‘atonu ai, e fa‘apoto ai fo‘i i le amiotonu’

Faitauga - Tusi Paia: Salamo 119:97-105

Upu Folafola

I le 1 Tupu 17:2-16 na auina atu e le Atua lana Upu e ta’ita’i Elia i le mea e maua ai lana meaai mo se vaitaimi. Ina ua maea le taimi na toe o’o mai le Upu e ta’u mai ia Elia e alu i Sarefata i le nuu ua maea tapena ai e le Atua lana taumafataga e auala mai i se fafine ua oti lana tane. O le Upu a le Atua e faasinoala. Na te ta’u atu ia te oe le mea e fai pe a foliga mai ua leai se auala e te sao ai mai se faafitauli faigata. Ou te tatalo ia tatala e le Atua lau faalogo ia amata ai ona e lagona lona siufofoga.

O le a vave ona e foia faafitauli pe a e lagona le siufofoga o le Atua. A’o o’u galue i la’u tusi (thesis) mo le sailia o lo’u faailoga PHD e uma ifo ua tele ai ma isi faailoga fa’a Matematika. E o’o i se taliina o se faamatalaga faa Matematika se tasi ua faigata ma mamafa ae lē taulia ai le tele o le galuega e tatau ona ou faia. Sa ou taumafai ma taumafai e tali uma fesili faa Matematika peita’i ou te le’i mafaia ona fai. I se tasi aso ae o’u te le’i moe sa ou faitauina le Esoto 14 ina ua sopoia e le fanauga a Isaraelu le sami ulaula. Na faafuasei ona ou faalogoina le siufofoga o le Alii ua faapea mai “aumai iinei au faailoga faa Matematika.” Sa faapea ona o’u fai ona toe fetalai mai lea “tu’u le faailoga lea I le itu taumatau, tu’u isi I le itu agavale ma fa’aauau ai pea. E uma ifo o’u vaai atu i faailoga sa I le itu taumatau e i ai foliga e tutusa ai. E Faapena fo’i faailoga sa I le itu agavale. Talu ai ona sa nunumi ma fefiloi faatasi sa lē mafai ai ona o’u iloa o latou foliga tutusa. Na toe fetalai mai le Atua faapea “Faavasega ese faailoga o loo i le itu taumatau ma le itu agavale ona tu’u faatasi lea. O le mea tonu lava lea na tupu i le sami ulaula. Na vaeluaina le sami, savavali le fanauga a Isaraelu ona toe tu’u faatasi lea o itu e lua sa vaeluaina ma malelemo ai Farao ma lana au tau. E lima (5) itula mulimuli ane ae maea le tusiina o la’u pepa (thesis). 

Na tali e le siufofoga o le Atua i le lima (5) itula fesili ua 18 masina o o’u taumafai e faavasega e lē mafai. Ina ua avatu a’u tusitusiga (thesis) i lē na togiina na faitau I ai ma fai mai “Fa’ae’e le faailoa PHD o le tama lea e leai ni a’u fesili mo ia.” Na logoina I ai e tatau ona fai sa’u suega tali gutu ae tali le fai suega e leai ni ana fesili mo a’u. Sala ina leai ni fesili a le fai suega aua e lē o a’u na taliina fesili ma tusi la’u tusi (thesis) o le Upu lava a le Atua na faia le galuega. A e faatagaina le Upu a le Atua e fai ma ou faasinoala mo so’o se filifiliga e te faia e te lē savali lava i le pouliuli, na te ta’ita’i oe seia faataunuuina lana polokalame i lou olaga (Ioane 8:12)

Avea le Upu a le Atua ma ou ta’ita’i ala i so’o se faaiuga e te fai. I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 17 MATI 2023

Manatu Autu:  O le Upu e Faasa’oloto (The Word Delivers) 

Tauloto – Tusi Paia: Salamo 107:20 ‘‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia..”

Faitauga - Tusi Paia: Ieremia 30:17-20

Upu Folafola
Afai e te faitau I le misiona a le ‘Upu’ e pei ona tusia I le Luka 4:18-19, e te silafia ai na afio mai o Iesu e laugaina le faasa’olotoga I e o lo’o saisaitia. I seisi faaupuga, o le Upu, o Iesu Keriso lava lea, o ia e faasa’oloto I e saisaitia. I le Mareko 5:1-15, na auina mai e le Atua le Upu I tagata I Katara mo se faamoemoega e tasi, e faasa’oloto I se tamaloa se toatasi o loo ulufia e temoni. 

O so’o se taimi e auina mai ai le Upu, e oo mai ai le malamalama I lena nofoaga ma aveesea le pogisa. Fai mai le Salamo 119:130 O le fa‘aalia mai o au afioga e fa‘amalamalamaina ai; e fa‘alotomatalaina ai ē ‘ua faigofie.   O so’o se mea o pogisa ai lou olaga, e tafiesea a’o e faitau I lenei faamalosiau I le Upu a le Atua, I le suafa o Iesu.

I le Tanielu 5:5-30, ina ua faatumulia Pelesara I le faamaualuga, na auina mai e le Atua lana Upu e ala I se miti e faasaoloto ia te ia mai le faamaualuga o lona loto. O le faanoanoaga, e lei faalogo, ona ia maua lea o le taui o le faamaualuga ma o’o ina fasiotia o ia I le po lava lea e tasi.

O le tele o taimi, e amata ona auai atu kerisiano I ni tulaga e ono faaumatia ai I latou. Afai e finagalo le Atua e faasaoina I latou mai le faaumatia, e na te auina atu lana Upu iai latou. E auina atu le Upu e tauala atu i se lauga a se failauga, o se uo, le Tusi Paia pe tuusa’o mai ia Agaga Paia. Afai e oo mai le Upu, ae poto lea tagata, e tatau ona liliu ese mai le tulaga e ono faaumatia ai o ia. 

E toatele tagata ou te iloa na latou maua se upu mai le Atua semanu e faasa’olotoina I latou mai tulaga e faaumatia ai, peitai e lei faalogo ma oo ai ina faaumatia I latou. Aua nei e o’o I lea tulaga. 

O lapatai ea le Alii ia te oe e taofia se agasala? Ua ia avatu ea ni faatonuga ia te oe e faia ae e te lei faia lava? O e tetee pea I le valaau mo le faaolataga e lafoai lou ola ia Iesu Keriso? Le au pele e, o le usitai I le Upu a le Atua e o’o mai ai le faasa’olotoga ae o le lē usitai I lana Upu e faaumatia ai. Ia e filifili ma le poto. 

Tatalo

Tama, faamolemole auina mai lau Upu ia te au I le aso mo lo’u faasaolotoga, I le suafa o Iesu Keriso, Amene.     

OPEN HEAVENS
MATALA LE LAGI MO LE ASO TOFI 16 MATI 2023

Manatu Autu:  O le Upu e Faamaloloina Oe 2 (The Word Heals You 2) 

Tauloto – Tusi Paia: Ioane 14:18 ‘Ou te lē tu‘ua ‘outou o mātuaoti, ‘ou te sau ‘iā te ‘outou’.

Faitauga - Tusi Paia: Salamo 147:3, Salamo 119:50

Upu Folafola
O Iesu Keriso, o Afioga a le Atua lava Ia, na ia fetalai, ma faailoa le mafuaaga na auina mai ai o ia mai le lagi i le lalolagi, ona o le faataunuuina o Lana misiona, e pei ona tusia I le tusi a Luka 4:18-19.

18“‘Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina, 19e tala‘i le Tausaga e finagalo malie mai ai le Ali‘i.” E silasila le Atua i lou loto pe a tuimomomoina, ma e na te faaleleia lou loto, e auina atu foi lana Upu mo oe.

I le tele o tausaga ua mavae, sa i ai se tama talavou na ou alofa lava i ai, ona o lona finau ma le pipii I le Alii e ala I ana talaiga faaevagelia. A’o I ai o ia I le Faalapotopotoga a le Autalavou, na maliu o ia. Na potopoto  ona uso a Autalavou ma fai talosaga mo ia, na toe ola mai o ia, na ia nofo i luga ma fai atu ia i latou uma lava na iai I lena potopotoga “O loo fetalai mai le Atua, ou te sau e ta’u atu ia te outou o lo o outou faalavelave ia te Ia; soia le tatalo” ona toe oti ai lea o ia. Ina ua ou faalogo i lea tala, na matua nutimomoia lava lo'u loto. I lena vaitaimi a’o avea a’u ma Faifeʻau, sa ou faamalosi lava I luma o tagata uma, I so’o se taimi lava, ae ou te foʻi loa i le fale, ou te tagi loa. Sa matua nutimomoia lava lo'u loto.

Ae peitaʻi, i se tasi aso, na auina mai ai e le Atua lana Afioga iā te aʻu, e faapea, “Loʻu atalii e, aiseā ua e faanoanoa ai?”. Sa ou tali atu, “Ona o le oti po o le toesea o lenei tama talavou”. Na toe auina mai le Upu ma faapea mai “Leai, e le o le mea moni lena ua e faanoanoa ai. Ua e faanoanoa ona ua lua valavala ma le tama lea; o lea ua i ai o ia i le Lagi ae o lo’o e iinei pea i le lalolagi”. Sa ou fai atu, “E moni lava”. Ona fetalai mai lea o le Alii, “Afai e te alu i se nuu mamao e te lei alu lava i ai, pe e te le fiafia ea i le i ai o se tasi e te iloa e muamua atu ia te oe, ina ia e taunuu atu, o lo’o i ai se tasi e faatali mai ma faafeiloaia oe?” Sa ou fai atu, ‘Ioe”. Ona faapea mai lea o le Alii: “Ua muamua atu lou atalii ia te oe; pe a o’o i le taimi e te folau atu ai, o le a faatali mai o ia e faafeiloai ia te oe.”

Afai o lo’o nutimomoia lou loto, aua e te faaaogaina ala o faasalalauga lautele e pei o upega tafaiilagi, ata tifaga, fualaau faasaina, ava malosi po o uo e te maua ai ni lagona lelei; o le fofo moni lava o le loto momomo, o le afioga lea a le Atua. E mafai ona o’o mai Lana afioga ia te oe e ala i se lauga, suesuega faale-Tusi Paia pe tu’usa’o mai e Agaga Paia.

Tatala lou loto e talia Afioga a le Atua I taimi uma, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 15 MATI 2023

Manatu Autu:  O le Upu e Faamaloloina Oe (The Word Heals You) 

Tauloto – Tusi Paia: Mataio 8:8 ‘Ua tali mai le ta‘ita‘i o le to‘aselau, ‘ua fa‘apea mai, “Le Ali‘i e, e lē aogā a‘u ‘ona e ulufale atu i lo‘u fale; tau lava ‘ina o‘o mai sau fetalaiga, e mālōlō ai la‘u ‘au‘auna.. 

Faitauga - Tusi Paia: Mataio 8:8-13

Upu Folafola
Afai e finagalo le Atua e faatino se galuega faamalolo, e na te auina atu lana Upu I le nofoaga o loo manaomia ai le faamalologa. Fai mai le Salamo 107:20‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia’.

E iai lava le taimi e te manaomia ai le auai mai o le Atua I se mataupu, I le taimi lea, e auina atu e le Atua lana Upu e faatino lana feau taua e fesoasoani ia te oe. O la’u tatalo, ia aua lava nei taofia e le Atua lana Upu e o’o atu ia te oe. Afai e o’o atu lana Upu ia te oe, o lona uiga ua o’o atu le fofo o ou faafitauli. 

O le tasi o vaega taua e auina atu le Upu e faataunuuina, o le momoli atu lea o le faamalologa. Na faia e le Atua ou itutino uma. Afai e te silafia ua iai ni vaega o lou tino ua tau faaletonu ma ua le galue lelei I le tulaga e tatau ona iai, tagi atu I le Atua ona ia auina mai lea o lana Upu e faamalolo I lou tino pe sui foi se vaega o lou tino ua le toe aoga iai se togafiti. O le tulaga tonu lea na tupu I le faitauga o le Tusi Paia o le aso, ina ua ma’i le auauna a le Taitai o le toaselau, ona ia fai atu lea ia Iesu ua tau lava o sana fetalaiga, e pau mai I ona fofoga ona malolo lea o lana auauna. 

17Sa a‘oa‘o atu o ia i le tasi aso, ‘ua nonofo mai ai faresaio ma a‘oa‘o o le tulafono, ē na ō mai mai faoa ‘a‘ai uma o Kalilaia, ma Iutaia, ma Ierusalema; ‘ua i ai fo‘i le mana o le Ali‘i e fa‘amālōlō i ē mama‘i.  Luka 5:17  

I le fuaitau o le Tusi Paia o loo ta’ua I luga, a’o lauga atu e Iesu le Upu, ua paū le mana o le Atua ma ua faamaloloina tagata mamai. Sa masani ona ou faaloaloa ou lima I luga o tagata mamai uma lava e o atu I a matou polokalame, ae na faaalia mai ia te au I le Luka 5:17, o le faamalologa e o faatasi lava I le taimi o le lauga. O le taimi la lenei, e faamalolo e le Atua tagata I le taimi o la e fai le lauga. O le tulaga lea ou te alofa ai iai latou e le faalogo lelei I le taimi o lauga aua e tele ni mea o loo latou misia. 

Ia tuu uma lou faatuatua I le Upu a le Atua I le aso, ona e maua lea o le faamalologa mai le Atua I le suafa o Iesu. O le faamalologa, o loo maua’a I le Upu a le Atua, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO LUA 14 MATI 2023

Manatu Autu:  O le Upu ua Faatauina Oe (The Word has Purchased You) 

Tauloto – Tusi Paia: 1 Korinito 6:20 ‘Auā ‘ua fa‘atauina ‘outou i le tau; o lenei, ‘ia ‘outou vivi‘i atu i le Atua i o ‘outou tino ma o ‘outou agaga, o mea a le Atua ia’. 

Faitauga - Tusi Paia: Ioane 1:1-18

Upu Folafola
Mai le tatou faitauga o le Tusi Paia o le asō, tatou te manino ai, o le Upu, o Iesu Keriso lava lea (Ioane 1:14). O le Upu e mata’utia lona malosi. A mafai ona e iloa ma faatumulia oe i le Upu, e leai se mea e tasi e le mafai ona e faia. 

Afai e te feiloai ma se tasi, ma ua ia fa’ailoa mai lona tagata ia te oe, e le taumate o le a ia ta’uina mai lana galuega. Mo se faata’ita’iga, afai o ia o se Inisinia e fauina auala ma galuega tetele, o le a ia faamatala mai lona tagata e tusa ma lana matafaioi. Ae a e fa’amasani i le Upu, e tatau ona e mua’i malamalama i mea e faatino e le Upu. E tusa ma le Ioane 1:1-3, o le Upu na ia foafoaina mai mea uma. Po o iai ‘ea se tasi e mafai ona ia fausia seisi la, se masina, o le sami po’o le fai’ai o see tagata? Ae po o e silafia o le Upu na faia oe? O le faamaoniga o le mata’utia o lana foafoaga, o lona tu’uina o tulāgālima i ou tamatama’ilima e faamaonia ai e leai se tagata na ia faia, e tutusa lelei ma oe. E mafai ona tutusa le lua maualuga ma se isi tagata, e mafai ona tutusa a lua foliga ma le lanu o lua tino, ae peita’i e leai ni tagata se to’alua e matuā tutusa atoatoa. Na ia faia oe mo se fa’amoemoe fa’apitoa ma o le a ia fa’ataunuuina le fa’amoemoe lena, i le suafa o Iesu.

Afai e te vaaia se galuega sili ona matagofie, e masani ona matuā taugata fo’i lona tau, ma e mafai foi ona o’o i se ituaiga tau e le mafai ona ‘ausia, ona ave lea e faatautu’i i le tagata e pito maualuga sana ofo. Fai mai le Mataio 16:26, o lou ola e sili ona taugatā ma e tusa pe avea uma ‘oa o le lalolagi e fa’atautu’i ai oe, e le ‘ausia lava lou tau. O le mea lena ou te matua maofa ai pe a ou vaai i tagata ua faatau atu o latou ola i le ti’apolo, ina ia latou mauaina ‘oa faale tino. O ia tagata ua latou fa’atau tia’i o latou lava tagata. Aua e pau lava le tau e talafeagai mo lou Ola, o le toto o Iesu Keriso- o ia lava o le Upu. Ua maligi lona toto ma togiolaina ai oe  ina ia oulua mafuta faatasi ma ia, e faavavau.

O nisi ua fa’atauina o latou ola i le ti’apolo ona o le tu’inanau i fafine. A o nisi ua fa’atau o latou ola ma latou faia pepelo e ‘alofia ai le vevesi ma tagata. E leai se mea i le lalolagi po o se mea o ia Satani e mafai ona faatusalia i le taugata o lou ola. ‘Aua e te faatalalē i se tau e ‘ave ai oe e le fili, auā ua uma ona  fa’atauina oe e le Upu, e ala i le toto o Iesu, e leai se tau.

O le taimi e te faia ai le agasala, o oe o se vale i le va’ai a le ti’apolo aua ua e faatau tiai lou tagata. I le suafa o Iesu, Amene. 

OPEN HEAVENS
MATALA LE LAGI MO LE ASO GAFUA 13 MATI 2023

Manatu Autu:  O le Usiusitai I lona Faamatalaina Faigofie (Obedience made simple) 

Tauloto – Tusi Paia: Salamo 50:12 ‘Ana ‘ou fia ai, ‘ou te lē ta‘u atu ‘iā te oe; auā o ‘iā te a‘u le lalolagi ma mea ‘ua tumu ai.’

Faitauga - Tusi Paia: 1 Samuelu 15:16-23

Upu Folafola
Afai e avatu e le tagata pito i mauoloa ma maualuga I le lalolagi se $100 ia te oe, ona toe fai atu lea ia te oe e toe faafoi atu le tupe ona ua ia toe manaomia, e mautinoa e te toe faafoi ia te ia I le taimi lava lena aua foi o ia na avatua le tupe ia te oe ma e mafai ona ia toe avatu ia te oe ma e ono sili atu foi. O le tulaga lea ou te ofo ai pe a ou vaai I tagata e mumusu e totogi a latou sefuluai. O le tagata o loo fai atu e tatau ona totogi lau 10%, na ia foai atu ia te oe le 100%. E na te folafola atu foi ia te oe I le Malaki 3:10, afai e te foai atu ia te ia le 10% mai so’o se mea o lo’o ia foai atu ia te oe, e na te sasa’a mai faamanuiaga tele, e tele naua ua tau le mafai ona taofiofia, peitai o loo e musu pea e totogi le 10%, o ai e gau pe a fua I lenei tulaga?

I le Eperu 11:17-19, fai mai le Tusi Paia ina ua usiusitai Aperaamo i le Atua I le avatu lea o lona atalii o Isaako e osi ai le taulaga, na ia faia aua foi na ia maua o ia mai le Atua, ma ua iloa ma le mautinoa, afai e oti Isaako, e mafai e le Atua o Lē na foaiina mai Isaako ona toe faatuina mai o ia mai le oti.  Na iloa lelei e Aperaamo e na te lei faia le tamaitiiti, ma o le ofoina atu o le tama I le na foai mai ia te ia, e le faigata. E faapena foi ia Hana ina ua fanau mai Samuelu ma sa ia toe foai atu I le Atua (1 Samuelu 1:24-28). 

So’o se taimi lava e fesili ai le Atua I se tagata mo se mea ae usiusitai lea tagata, e foai atu lava e le Atua e sili atu I lea tagata. O lo’o mautinoa ai e le o naunau tele le Atua I le mea o lo’o ia finagalo e te faia, ao loo naunau ia e usiusitai. E matua faamamafa I le Atua le usiusitai, afai e fai atu ia te oe I le taavale e ave I se tagata ae e musu, ae uma ane ua ia faataua seisi taavale mo le tagata lea, o lona uiga ua e misia le avanoa e usitai ai. E le manatu o ia I au taulaga e pei o lona naunau ia e usitai. Fai mai le 1 Samuelu 15:22

“E tusa, ‘ea ‘ona fiafia o le ALI‘I i taulaga mū ma taulaga, i lona fiafia i le fa‘alogo i le si‘ufofoga o le ALI‘I? Fa‘auta o le fa‘alogo e sili lea i le taulaga ma le usiusita‘i e sili lea i le ga‘o o mamoe po‘a. 

E faigata faatonuga a le Atua I nisi taimi, ae afai e te manatunatu lelei ma manatua o le Atua e ona mea uma, e vave lava ona faigofie ia te oe le usitai ia te ia. Aua nei e pei o le tupu o Saulo na galo ia te ia lona amataga ma I’u ina faamāina, le faamāina lava lea e tasi sa ia taumafai e alofia ina ua ia lē usitai I le Atua. 

Afai e foai atu e le Atua se mea ia te oe ona ia faapea atu lea: ‘ou te fia faaaogaina’, talosia e te poto ma atamai ma avatu ia te ia e aunoa ma le musua, I le suafa o Iesu Keriso, Amene.