Samoan Devotional

OPEN HEAVENS
MATALA LE LAGI MO LE ASO FARAILE 10 FEPUARI 2023

Manatu Autu:  Ola faapaiaina (Living holy).

Tauloto – Tusi Paia: 1 Tesalonia 5:22 ‘Ia mamao ‘outou ma mea leaga ‘ese‘ese uma lava’.

Faitauga - Tusi Paia: 1 Peteru 5:8-10

Upu Folafola
O le Atua e paia ma o loo ia poloaina lana fanau ia ola faapaiaina (1 Peteru 1:16) e ala lea I le faamamao ese ma le agasala I le fesoasoani a Agaga Paia. O lo’o faapea mai le tauloto o lenei aso I lona aotelega, o le taimi e amata ai ona e sogisogi i meaai e le tatau ona e ai ai, ua e oo atu I se tulaga matuia ma e te ono lamatia ai. Mo se faataitaiga, o se alii, e le tatau ona alu na o ia pe a fai asiasiga I se fale o se tamaitai e leai sona toalua, aua o le laalaa atu lea I le agasala. A iloa atu e seisi o sau I fafo o le fale o lea tamaitai, e mafai ona faia se moliaga, o loo ia faia le faitaaga, a suesue ane, e leiloa po’o ai e sa’o.

E amata le agasala I se mea laitiiti lava e pei e le afaina, peitai o le tulaga lena e fai mai ai le Tusi Paia o le tiapolo e faitogafiti (Efeso 6:11), a e gauai iai ona e peiseai e leai se afaina, ua amata lava ona e pau atu I lana mailei. Ia aua lava nei e pau I mailei a le fili I le suafa o Iesu. E pei ona faamalosiau mai le faitauga o le Tusi Paia o le aso, e tatau ona e faautauta ma mataala I taimi uma pe afai e te le manao e pau I mailei a le tiapolo. 

Ou te lapatai lava I lau fanau ina ia aua nei faafaigaluegaina ni tamaitai e fai ma latou failautusi. O le faia o lea tulaga ua faalatalata atu le tiapolo e fasi oe aua afai e te le faaeteete I mea e te savali ai, e matua fasi e le tiapolo lou agaga. O le a tele ina lua faigaluega ma lea tagata e na o oulua e oo I le leva o le po. E mafai ona e faapea mai e ese le maotua ma anamua o o’u manatu, peitai ou te faapea atu, na ou faaolaina I le 1973 ae o lo’o ‘ou tulai pea e oo mai I le taimi nei. E sili atu ia te a’u le anamua o manatu ae o loo tulai pea I lo le maua o manatu o aso nei ae pau ai. Ia e faautauta, o loo e iloa lelei lava mea na ua amata ona e taaalo ai e ono o’o atu ai I le agasala, mo se faataitaiga, o ata tifaga o lo’o e matamata ai, o upega tafailagi o asiasi iai ma mulimuli ai faapea le ituaiga talanoa o loo e talanoa ai. 

Afai e te mamao ese mai so’o se mea e taitaia ai oe I le agasala, e tatau foi ona e faalatalata atu I le Atua. E le tatau ona e faimea malie I lou taimi ma le Atua. O le taimi lea, e te lua mafuta ai na o oulua ma le Atua ma e tatau ona faia I aso uma. Faaaoga le taimi e tatalo ai ma suesue I le Tusi Paia. Ia aua nei e lafoai le mafuta atu ma le auuso kerisiano. Ia e faalatalata atu I le Atua I aso uma, tamoe ese mai le amioleaga ona e iloa lea, e faigofie atu le ola faapaiaina I le tulaga na e manatu muamua iai. 

Tatalo
Le Atua Silisili Ese, faamolemole foai mai le malosi ou te manaomia e alu ese mamao ai ma le agasala ae faalatalata atu ia te oe, I le suafa matautia o Iesu Keriso, Amene.    

OPEN HEAVENS
MATALA LE LAGI MO LE ASO TOFI 9 FEPUARI 2023

Manatu Autu:  Lafoai ma le Atoatoa 2 (Total Surrender 2).

Tauloto – Tusi Paia: Luka 8:38 ‘Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.”

Faitauga - Tusi Paia: 1 Tupu 17:8-16

Upu Folafola
O loʻu Atua e lē nofo aitalafu I se tagata; E le o ia o se faletupe e teu ai au tupe pe aveesea uma faatasi ma tului. So’o se vaega lava e te tuuina atu I le Atua, e mafai ona faitau afe lona taui. E fai lo’u nei tagata ma molimau ola o lenei tulaga. Na tuʻuina atu lo’u faailoga PHD I le Atua, o a’u galuega uma tau aʻoaʻoga ma lo’u faʻamoemoe e avea lo’u nei tagata ma Pule Sili pito laitiiti o se Iunivesite i Aferika, ae na ia taui a’u, ma siitia lo’u tulaga I le avea o a’u ma tama o le tele o Pule Sili o Iunivesite I Aferika. Po o le a lava le mea e te tuuina atu i le Atua, e toe foi mai ia te oe ma ua faateleina.

E I ai se tina o lo o taua i le faitauga o le Tusi Paia mo le aso, faapea na ia aveina lana taumafataga mulimuli i le perofeta a le Atua. O lena taumafataga e tasi, e faapea na fafaga ai tagata e toatolu i le vaitaimi atoa o le oge na latou fetaiai ai. E I ai foi se tamaiititi o loo taua i le Ioane 6:9-11 na foaiina lana meaai e lima areto ma i'a e lua. Na matua faateleina taumafa na maua mai ai, ma e faapea, e sefulu ma le lua ato na fa'aputuina ai taumafa na totoe mulimuli ane. E leai se mea e te tuuina atu i le Atua, e na te le faateleina ma e toe foi mai lava ia te oe.

O le tele o taimi, o loʻo tapena e le Atua le Tama, ni faamanuiaga se tele e fia tuuina atu ia te oe, pe a mafai ona tuʻuina ese nisi mea e sili ona pele ia te oe. Afai e te ave ese ina nei mea uma, o le a e mauaina faamanuiaga uma na ia fuafuaina e tuuina atu ia te oe, ma e matua silisili atu nai lo le mea na e avatua ia te ia. Na finagalo le Atua e faamanuia atili iā Aperaamo, o lea na ia fetalai atu ai i lenei tama, ina ia tapena lona atalii e fai ai lana taulaga. E le’i manaomia e le Atua lenei tama; e le saua i tamaiti lo'u Tama. Ae o lona finagalo ia Aperaamo, ia tuuina atu atoatoa lona ola ia te Ia, ma na ia tatalaina ai le faitotoa o faamanuiaga mo Aperaamo. Na manumalo Aperaamo i le tofotofoga ma e o’o mai I le aso, o ana fanau uma e manuia ai atunuu uma o le lalolagi (Kenese 22: 16-18).

Aua e te ta’u faatauvaaina lou tagata. Aua e te pipiimau i mea faatauvaa, ma e lafoa’I ai I faamanuiaga po’o oa o loo tapena mai mo oe. Afai na patino le talosaga a le Alii e tuuina ese nei mea faatauvaa, e te mautinoa o lo’o i ai ni faamanuiaga e sili atu i lona agaga e faamanuia ai oe. E mafai ona e teena Lana ofo pe e te talia foi – ma e faalagolago uma lava i lou naunau e lafoai atu lou ola atoa e Tautua ai o ia.

O soo se mea e te lafoai I le Atua, e faateleina ma toe foi mai ia te oe, I le suafa mamana o Iesu Keriso, Amene. 

OPEN HEAVENS
MATALA LE LAGI MO LE ASO LULU 8 FEPUARI 2023

Manatu Autu:  Lafoai ma le Atoatoa 1 (Total Surrender 1).

Tauloto – Tusi Paia: Roma 12:1 ‘O lenei, le ‘au uso e, ‘ou te ‘ai‘oi atu ‘iā te ‘outou, ‘ona o le alofa mutimutivale o le Atua, ia ‘outou tu‘uina atu o ‘outou tino i le Atua, o le taulaga ola, ma le pa‘ia, ma le mālie, o le mea lea e tatau ai ‘ona ‘outou faia’.

Faitauga - Tusi Paia: Mataio 16:24-27

Upu Folafola
O so’o se tagata e lafoai mea uma ia Iesu, e faafiafiaina I le tele o faamanuiaga. Peitai ane, e toatele kerisiano e latou te le iloa lenei tulaga, ma e tele ina filifili e faia o latou manao e aunoa ma le lafoai atoatoa o latou ola ma mea uma I le Atua. Le au pele e, aua nei avea oe o se tagata ‘e tu I totonu le vae e tasi ae tu I fafo le isi vae’. Aua nei e maalili. 

E faapefea ona e iloa ua lafoai ma le atoatoa lou ola I le Atua? Vaai lelei ala e faia ai au faaiuga. E te talanoa I le Atua I au faaiuga e faia mai lea taimi I lea taimi? Fai mai le aposetolo o Paulo I le Kalatia 2:20 ‘Ua fa‘asatauroina fa‘atasi i mā‘ua ma Keriso; ‘ou te lē toe ola a‘u, a o Keriso o lo‘o ola i totonu ‘iā te a‘u; o le ola fo‘i ‘ou te ola ai nei i le tino, ‘ou te ola ai lava i le fa‘atuatua i le Alo o le Atua, o lē na alofa mai ‘iā te a‘u, ma foa‘iina mai e ia o ia mo a‘u’.

Afai e te lafoai mea uma I le Atua, e te loto i mea e finagalo malie ai o ia ma ‘ia ‘outou galulue ai (Filipi 2:13). Ua e lafoai mea uma I le Atua?

O le mea moni, e iai tagata e amata lelei I le lafoai mea uma I le Atua, ae amata loa ona faamanuia iai le Atua, ua tau le naunau e lafoai mea I le Atua. Ao nonofo I se fale laitiiti, sa faigofie ona faaavanoa le fale mo mafutaga faale Tusi Paia, ae faamanuia loa iai le Atua I se fale tele I nofoaga taugata, ua mumusu ona e faapea mai e faigata puipuiga I ia nofoaga. 

O le maualuga o lou alu I luga o le maualuga foi lena o le lafoai o mea uma I le Atua. 

E iai se uso I le Ekalesia I le tele o Tausaga talu ai, e le taitai ona misia se sauniga lotu, ae tei ua o’o I se tasi aso, ua sau se tagata o le Atua ma faia se perofetaga e faapea, o le a avea o ia ma milionea. I totonu o le ono masina, ua matua suia le tamaoaiga I le lelei. E lei leva ae amata loa ona le toe sau I le lotu ma faapea mai ua pisi tele lana pisinisi ona ua amata ona tupu. E iai se aso ua ou faalogo ua oso lona ma’I stroke, o lea na ou aami e sau. Na oo mai ma faapea mai, na oso lona ma’I ina ua faamaamulu se konekarate I le aso tonu sa tatau ai ona totogi atu se tupe tele ia te ia. Maimau pe ana lafoai ana mea uma I le Atua o le na faamanuia ia te ia. Ia e faamaoni e lafoai mea uma I le Atua a’o ia faamanuia ia te oe, I le suafa o Iesu. 

Tatalo,
Tama, faamolemole aumai ia te a’u le alofa tunoa e lafoai atu ia te oe mea uma ia te a’u, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO LUA 7 FEPUARI 2023

Manatu Autu:  E manuia lou taeao (Your tomorrow shall be all right).

Tauloto – Tusi Paia: Salamo 42:5 ‘Lo‘u agaga e, se a ‘ea le mea ‘ua e fa‘anoanoa ai, ma atuatuvale ai i totonu ‘iā te a‘u? ‘Ia e fa‘amoemoe i le Atua, auā ‘ou te toe vivi‘i ‘iā te ia, ‘ona o le fa‘aolataga mai ona luma’.

Faitauga - Tusi Paia: Salamo 42:3-5

Upu Folafola
Le ‘au pele, e tasi lava le fe’au faigofie mo oe i le aso. Aua e te faaleaoga lou lava tagata. I le tatou tauloto mo le aso, sa faatonu e Tavita lona lava agaga ia tumau le faamoemoe i le Atua, ma ia  mautinoa, na te vivii pea i le Atua ona o lana fesoasoani. So’o se taimi e te lagona ai le fa’anoanoa, ma e manatu ua leai se faamoemoe, ia e faapea ane ia te oe lava, “E leai, e le i’u fa’apenei lo’u olaga, e iai le aso ou te molimau ai i le fesoasoani a le Atua ia te a’u”.

I tausaga e tele ua tuanai, faato’a ou faaipoipo ma lo’u to’alua, sa faigata mea uma, ae sa ou fai pea ia te ia: ‘Aua le popole, e le tumau le tulaga pagatia lenei, o le ta taeao e manuia’ ma o le mea moni, sa faamaoni le Atua. Ma ou te faapea atu ia te oe lea o loo faitau ma faalogologo i lenei faamalosiau, e manuia lou taeao i le suafa o Iesu!

Ae le’i fanauina e Sara lana tama o Isaako, sa nofo lava ia ma fa’aumatia lona avanoa. Ina ua fetalai mai le Atua o le a ia fanauina se pepe tama, sa ‘ata Sara ma faapea e le mafai ona tupu lena tulaga ona ua 90 tausaga o lona soifua. E tusa po’o lea le umi sa e faatalia ai se vavega, ‘aua nei e manatu o le a le taunuu. O lo’u Atua o le Atua e mafai ona toe feliuaina mea ua le mafai ona toe suia, e na te faia mo oe I le suafa o Iesu.

I le tusi o Luka 5: 1-11, sa ta’utino e Iesu Keriso ia Simona Peteru o le a le toe ‘avea o ia ma faifaiva o i’a, a’o tagata. Ina ua tuanai le tolu ma le ‘afa tausaga i le taimi na matua manaomia ai e Iesu lana fesoasoani, sa te’ena e Peteru le Alii Faaola, ona tagi masusu ai lea ona ua ia manatu, o ia o se tagata toilalo ua le mafaia se mea.  Sa tatau ona ia taitaia ma manumaloina tagata mo Iesu, ae peita’i ua ia fulitua ia Iesu (Luka 22:55-62). Ina ua maliu Iesu ma ua foliga mai e leai se mea o toe tupu, ona toe fo’i a lea o Peteru i lana galuega o le faifaiva, (Ioane 21:3). ‘Aua nei avea oe ma se tagata e toe foi i tua!’ 

I le fuaiupu e 4 o le tusi o Ioane sa iai Iesu mo Peteru. Ma o le fetalaiga a Iesu ia Peteru, e le gata e na te manumaloina tagata, a o le a ia fafaga i latou. O le mua’i lauga sa faia e Peteru ina ua mae’a le fetalaiga lena a Iesu, e 3,000 agaga na manumaloina mo le malo o le Atua, (Galuega 2:41). I le tusi o Galuega 3: 1-8 na savali le tagata pipili i le suafa o Iesu, le suafa sa ia teena muamua. I le tusi o Galuega 5:14-16, o lona atata ua mafai ona faamaloloina e mama’i. E tusa pe fia ni taimi ua e te’ena pe fulitua ia lesu,  afai e toe salamo moni, o le a toe faatula’i oe e le Atua ma faaaogaina oe i se tulaga maoa’e, e pei ona ia faaaogaina ai Peteru; pe afai e te salamo moni ma e lē toe foi I le agasala.

E le tatau ona gata lou faamoemoe, o lo’o agai mai le Atua e toe feliuaina mea uma e foliga mai e le mafai ona toe liliuina, e faia mo oe, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 6 FEPUARI 2023

Manatu Autu:  Puipuiga Moni (True Protection).

Tauloto – Tusi Paia: Isaia 8:19 ‘A latou fai atu fo‘i ‘iā te ‘outou. “Sā‘ili atu ia i aitu vavalo ma taulāitu o ē leo ‘i‘i, ma ē ‘ua memu, ‘ia ‘outou tali atu; A le sā‘ili atu ‘ea le nu‘u i lo latou Atua? E sā‘ili atu ‘ea i ē ‘ua oti mo ē o ola?’

Faitauga - Tusi Paia: Salamo 91:1-16

Upu Folafola
Ua tele ina leai se malu I lenei lalolagi ma ua manaomia e tagata le pupuiga lelei ao agai atu mai lea nofoaga I isi nofoaga. O I latou e mauoloa e masani ona latou totogi ni tagata leoleo mo lo latou puipuiga ma e o’o I lea tulaga e le lava. O nisi tagata e o atu I le tiapolo mo le puipuiga ae peitai e mautinoa e oo atu ai I nisi faafitauli tugā.Ou te manatua le tala I le tamaitiiti o le matou nuu e masani ona ū e gata. Ua matou iloa mulimuli ane, sa ave e lona tama I se taulaitu mo le puipuiga mai gata. Fai mai le Ioane 10:10 e sau le tiapolo, e gaoi, fasia ma faaumatia. O le tiapolo o lou fili, ‘aua nei faaseseina oe pe a ofo mai ma naunau e puipui ia te oe. 

E iai se tina na sau ma aumai lana fanau teine e toafa mo tatalo. O le uii o teine e 28 tausaga ma e leai ma se alii e fia faaipoipo I se tasi o I latou. Ina ua maea sina suesuega, ua ta’utino e le tina, na ia ofoina atu I latou I se taulaitu ina ia puipuia I latou mai le oti. O le tulaga e na te leiloa, o lona faia o lea tulaga, ua ia foai atu I le itu I le agaga lana fanau e fai ma ava a le taulaitu. Ua matou tatalo ona motusia lea e le Atua le sootaga o nei fanau teine ma le taulaitu. Na faaipoipo uma nei teine e toafa I totonu o le tausaga e tasi. O le tiapolo o lou fili, ‘aua e te alu iai mo lou puipuiga. 

E tasi lava le punaoa moni o puipuiga e le mafai ona toilalo, o le puipuiga mai le Atua. O lona tulaga ‘Silisili ese’ ma ‘Lē Malosi’ o lona uiga e sili ese atu I so’o se tagata po’o se mea e malosi.   Fai mai le Mataio 28:18 o Iesu e iai le malosi uma lava I le lagi ma le lalolagi. Fai mai le Filipi, e na o le ta’u lava o lona suafae toatuli tulivae uma I le lagi, le lalolagi ma lalo o le lalolagi. E aofia ai fili uma e vaaia ma fili e le vaaia. O le Atua lava e tasi o lo’o faapea mai I le Eperu 13:5 “Ou te lē tu‘ua lava oe, ‘ou te lē tu‘ulafoa‘i lava ‘iā te oe.” Afai e puipui e le Atua lou tagata, e te moe e moeiini uma ou mata, e leai se mea leaga e o’o ia te oe aua e te nofo I le mea lilo o lo’o iai le Silisili Ese, e te malu ai (Salamo 91:1). 

O I latou e nonofo I le mea lilo o le Atua Silisili Ese e mafuta lelei ma ia I aso uma. O I latou ia e mau I lalo o le paolo o le Atua Silisili Ese. 

Tatalo
Tama, faamolemole ia ou nofo I le mea lilo ma mau I lalo o lou paolo I le aso, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 5 FEPUARI 2023

Manatu Autu:  O oe vs le oti (You vs death).

Tauloto – Tusi Paia: Iopu 7:1 ‘E lē o i ai ‘ea i le taua ‘ua tofia i tagata i le lalolagi? pe lē tusa fo‘i o latou aso i aso o lē ‘ua galue i le taui?.’

Faitauga - Tusi Paia: Eperu 9:27-28

Upu Folafola
O le oti o se fili e sili ona malosi. E malosi tele o lea na faapea mai le 1 Korinito 15:26, o le oti o le fili mulimuli lava na faaumatia. O lo’o ta’u mai ai iina, ua sili lona malosi ua tu’u lava e mulimuli. O se tasi o mafuaaga e iloa ai le malosi o le oti ma e fefefe iai le toatele, aua foi e tutusa uma ai tagata. O e mauoa, mativa, maualuga, tupu, auauna, tagata aisi ma so’o se tagata, e tutusa uma I le oti, aua e oo uma I le oti. Fai mai le Salamo 49:10 Auā ‘ua iloa e ia e oti tagata popoto, e fano fo‘i le tagata valea ‘atoa ma le vale; ‘ona tu‘ua lea e i latou a latou ‘oa mā nisi.

E leai se faaaloalo a le oti ini faailoga maualuluga poo ni matatia ua ausia pe a oo I le taimi e oo mai ai, e le faalogo I se aioi atu. E oo ia Lasalo na faatu e Iesu mai le oti ina ua maea aso e fa, na toe o’o lava ina oti. Pe ete fiafia pe ita I le oti, e iai le aso e sau ai ma tuitui mai lou faitotoa seia vagana ua afio muamua mai Iesu e siitia ona tagata. I nei vaega e lua, e tutusa lelei le iuga, e te lua fesagai ma le Atua I lona nofoa faamasino. 

O le itu e pito sili ona matuia ma matatau ai tagata i le oti, e tumau e le mafai ona toe suia. I le tatou faitauga o le Tusi Paia o le aso, fai mai le fuaiupu 27, o le taimi lava e oti ai le tagata e faia ai lona faamasinoga, e leai se avanoa faalua, leai se avanoa e toe taumafai atu ai, e tumau e le suia. O le tulaga lea ou te ofo ai pe a faapea mai nisi tagata e toe tuu atu I tua lo latou faaolataga pe sei amata ona ola faapaiaina I seisi aso. Peitai e toatele tagata I aso ua tuanai ua feoti ae lei oo atu I le taimi o loo manatu ai e amata ai ona ola faapaiaina. O loo iai I latou I seoli I le taimi nei, ua matua salamo ma e faapena ai lava e faavavau. 

E tatau ona sauni lelei mo le oti I soo se taimi e ono sau ai. O I latou o loo nofo sauni e latou te maua le parataiso pe a oo mai le oti, ae mo le toatele, e latou te iai I le mea o iai le taufaitagiaue ma le lilivau o nifo e faavavau (Luka 13:27-28). Aua le pepelo, soia le taumafai e faaseseina fuainumera ina tele ni tupe e te maua, soia le faia o le faitaaga, taofi le faia o le agasala. A oo mai le oti, e leai ma se mea o na mea e aoga, e pau le tulaga e taua I lena taimi, po’o tusia lou igoa I le tusi o le ola. Ia lafoai lou ola ia Iesu Keriso I le aso ona e faamaoni lea e mulimuli ia te ia seia oo I le iuga. E pau lea o le auala e manumalo ai I le oti I le agaga ma maua ai le ola e faavavau. 

A valaau Iesu ia te oe I le aso, o fea e te iai e faavavau? O le lagi po’o le lepa afi? I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TOONAI 4 FEPUARI 2023

Manatu Autu:  Manatua lou ulua’i alofa (Remember your first love).

Tauloto – Tusi Paia: Faaaliga 2:4 ‘A ‘ua ‘ou lē fiafia ‘iā te oe, ‘ona ‘ua e tu‘ua o lo‘u ulua‘i alofa.’.

Faitauga - Tusi Paia: Faaaliga 2:4-5

Upu Folafola
O le asō ou te mana’o e toe faasolo lau vaai i tua ina ua fa’atoā fanaufouina lou olaga. Ou te mana’o e te manatua lou fiafia iā Iesu Keriso i nā aso. Manatua lou fa’a avanoaina o lou taimi e te alu ai i le lotu. Manatua lou toaga e faitau lau Tusi Paia ma tatalo. Manatua lou naunau e latalata le lua mafutaga ma le Atua. Ae a lou olaga I le taimi nei? O tumau lou fiafia I le Atua e pei ona i ai muamua? Le au pele e, manatua lou ulua’i alofa.

E le galo iā te a’u le ta’utinoga a se tuafafine sa lē lava sana tupe e sau ai i le sauniga o le Agaga Paia ma manatu ai e matamata mai i le sauniga i luga o le TV peitai na iloa ifo e leai se eletise leai fo’i se suāu’u e ola ai lana afi fa’aleoleo. Sa faapea le tuafafine “Tiapolo o oe o le pepelo. Na liliu e lo’u Atua le suavai e fai ma uaina. O le a ia liliu fo’i le vai e avea ma suāu’u.” Sa ia utu se kalone vai I totonu o le afi fa’aleoleo, fa’aloaloa ai ona lima i luga ma faapea, “Afi, I le suafa o Iesu, ola.” Sa ki e le tuafafine le afi ma ola mai seia uma le polokalame. O le faatuatua lenā. O faapenā ea lou faatuatua poo lenā ua e faatulagā mea uma?

Ina ia toe fo’i i lou ulua’i alofa, e tatau ona e toe manatunatu i lana Upu i le ao ma le po. Toe fo’i e fa’aalu lou taimi e mafuta ai ma lou Atua ia sili atu le umi nai loo lou taimi ma se isi lava tagata. Ia e filifili e avea lou Atua ma uluai tagata e te talanoa i ai pe a e ala a’e I le taeao ma lē mulimuli e faatofa i ai i le po. Suesue I lau Tusi Paia ma tatalo mo se taimi umi e pei ona sa e masani ai muamua. Le au pele e, manatua lou ulua’i alofa.

E tasi le mea ou te fia fa’ailoa iā te oe, e fesootai mai le Atua ia i tatou e fua i ō tatou tagata i le taimi nei ae lē o le tuana’i. Fetalai le Atua i le Esekielu 18:21-24 afai o se uso sa faia le amiotonu ae mulimuli ane liliu fai le amio leaga, e lē manatua aso o lana amio lelei ae taui atu e le Atua i le uso tusa ma lana amio leaga o loo fai. E faapenā fo’i pe ā liliu ese lē ua amioleaga ai ana agasala uma ma tausi a’u tulafono ma faia e ia le amio tatau ma le amiotonu, e ola lava ia e le oti.

O ai le ituaiga tagata o i ai oe i le silasila a le Atua i le taimi nei? O tala ofoofogia ma matagofie o le lua mafutaga vavā lalata ma le Atua i aso ua tuanai e lē toe taulia, o lou tagata i le taimi nei e fai ai le faamasinoga a le Atua. O ā mai le lua mafutaga ma le Atua i le asō? Le au pele e, toe fa’amumū le lamepa o lou ulua’i alofa. I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 3 FEPUARI 2023

Manatu Autu:  Alofa Moni I le Atua (Loving God Truly).

Tauloto – Tusi Paia: 1 Ioane 5:3‘Auā o lenei lava le alofa i le Atua, ‘ia tatou tausi i ana poloa‘iga; e lē mamafa fo‘i ana poloa‘iga.’

Faitauga - Tusi Paia: Luka 16:13

Upu Folafola
I le tatou faitauga o le Tusi Paia mo le aso, na fetalai Iesu ma faamanino, e lē mafai ese ‘au‘auna ‘ona ‘au‘auna i ali‘i e to‘alua; auā e ‘ino‘ino o ia i le tasi, ‘ae alofa atu i le tasi; a lē o lea, e fa‘apipi‘i atu o ia i le tasi, ‘ae fa‘alēaogā i le tasi. Tou te lē mafaia ‘ona ‘au‘auna i le Atua ‘atoa ma le ‘oa. O le alofa I le Atua ma le selau pasene e ausia ai foi le isi poloaiga, o le alofa atu I lou tuaoi e pei o oe lava ia te oe aua o loo faapea mai 1 Ioane 4:20 ‘Pe ‘āfai e fa‘apea mai se tasi, “‘Ou te alofa i le Atua, ‘ae ‘ino‘ino i lona uso,” o le pepelo lava ia; auā o lē lē alofa i lona uso ‘ua ia va‘ai atu i ai, pe mafai fa‘apefea ‘ona alofa o ia i le Atua ‘ua ia lē va‘ai atu i ai’.

Afai e te alofa ia Iesu, e alofa le Atua ia te oe ma afio I totonu ia te oe (Ioane 14:23). O lo’o faapea mai le Roma 8:28 ‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo’. E le afaina po’o a mea o tutupu, e i’u lava I le lelei aua fai mai le Roma 8:37, e te manumalo a’ia’i. Afai e te tau le taua e aunoa ma le Atua, e te ono faiaina. Afai e te tau le taua ma e fesili mo le fesoasoani a le Atua, e te manumalo e ui e ono maua mai ai ni mailaila. Afai e tau le taua e le Atua mo oe, e manumaloina e ia mo oe, ona ia avatu lea o le manumalo ia te oe. O le tulaga lena e te maua ai le manumalo a’ia’i. 

Fai mai le Ioane 15:14, ‘O a‘u uō ‘outou, pe ‘āfai tou te faia mea, uma lava ‘ou te fai atu ai ‘iā te ‘outou’. Usitai I poloaiga a le Atua pe afai e te alofa moni ia te ia. E mafai foi ona faaalia lou alofa ia te ia e ala I le foai. I le 1 Tupu 3:3-4, fai mai le Tusi Paia na alofa moni Solomona I le Atua o lea na ia ofo atu ai ni taulaga mu I le Atua. 

Na alu atu se fai evagalia I le atunuu o Ghana. Na ia fetaui ma se fafine e matua mativa e na o le tasi lona ofu ma e ofu lava I aso uma. Na foai atu le ola o lenei fafine ia Keriso ma e iai se aso na sau ai ma lana foai, o se tupe auro se tasi na tuu I le sene. Na fesili atu le fai evagelia: ‘A ou vaai atu ia te oe, ou te masalosalo na e gaoia lenei tupe mai lou matai’ Ae na faapea mai le fafine: ‘Leai, ou te lei gaoia, ae na faatau atu a’u o se pologa, ma o le totogi lea’. O se faaaliga maoa’e lenei o le alofa moni I le Atua. 

E te alofa moni ea I le Atua? O le faamaoniga o lou alofa moni I le Atua o loo taatia I lou usitai I le upu a le Atua ma le faamaoni e auauna I galuega o le malo o le Atua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 2 FEPUARI 2023

Manatu Autu:  Mataala I tagata ete Latalata iai 2 (Watch that Intimacy 2)

Tauloto – Tusi Paia: Salamo 41:9‘O le tagata fo‘i o la‘u uō, o lē na ‘ou fa‘atuatua i ai, na ‘ai la‘u areto, ‘ua a‘a mai o ia ‘iā te a‘u i lona mulivae’.

Faitauga - Tusi Paia: Mika 7:1-7

Upu Folafola
Ou te fia faʻasoa atu ia te oe I le aso, ni vaega lililo na umi se taimi na pagatia ai le tele o alii ma tamaitai ona o tiga na maua mai ai, ae na faia ma aoaoga io latou olaga. E tatau ona e matua faʻaeteete I so’o se tagata e te latalata I ai. O le tele o tagata e fa'aalia mai o latou uiga o ni uo, ae mulimuli ane, e le moni nei uiga. Mo nisi oi latou, e i ai manatunatuga leaga mai le amataga a’o uo, ma o le tele o nisi, o le taimi lava e fesouina ai le faigata o lenei olaga, ua faalata loa oe. E itiiti lava tagata, ma o le uiga o la'u tala, ua na o se vaega toaitiiti o nei tagata e mafai ona e ta'ua, o au uo moni.

O faʻamatalaga uma e te tuʻuina atu i se tagata, e le mafai ona toe maua mai pe faafo’I mai, ma e tatau ona e faʻaeteete i so’o se faamatalaga e te taʻuina atu i au uo. Ina ua ou auai i le Ekalesia o le Redeemed Christian Church of God, sa ou latalata i ni uso se toalua. I se tasi aso, na faaali mai ai e le Atua ia te au, o se tasi o i laua nei, e le o se uo moni, ae o se luko ua ofu I ofu mamoe. Sa ou fesoota’I ma lea uso, ae sa ia faafitia malosi o ia o se uo pepelo mo au. I ni nai tausaga mulimuli ane ina ua ou avea ma Taitai Aoao o le Ekalesia, sa ou talanoa I le uso lea I o’u tiute ma matafaioi fou, na ia tautino ai ma ia faapea mai, sa matua inoino ia te a’u I le aso na ou ulufale ai i le lotu. O le toatele o i tatou, e I ai le taimi e faalataina ai tatou e nisi; o le mea e leaga ai, e le aʻoaʻoina le tele o tagata mai o latou aafiaga faapenei.

O au uo moni, o i latou ia e fiafia pe a e fiafia ma faanoanoa foi pe a e faanoanoa. Ina ua ō mai fitafita e puʻe Iesu lo tatou Alii, i le fanua i Ketesemane (Ioane 18:1-10), na seʻi e Peteru le pelu ma taumafai e puipuia Iesu. E mafai faapefea e le tagata e toatasi ona faasagatau i le tele o fitafita ua faaauupegaina? Sa ia faasaga atu ia i latou e peiseai o ia na latou o mai e ave. O uiga na o se uo. I le isi itu, o Iuta e pei ona taua i le Ioane 12:3-6 , na faaalia ai e manatu lava ia ua na o ia, ma e le mamafa iā te ia, Iesu. Ina ua ia vaai atu i se fafine o sasaa le suāuu taugatā ma faauuina ai Iesu, sa tatau ona fiafia o ia e vaai atu i lana uō o lo’o faamamaluina faapena, ae na ia faitio ma taumafai e taofia le fafine mai le tapuaʻi atu I le Alii. E lē o se uō moni lenā. E tatau ona e mataala i nei tulaga uma mo se taimi umi lava, faatasi ai ma le fesoasoani mai a le Agaga Paia, e saili ai po o ai au uo e moni ma faamaoni.

Ia e mataala  ma faaeteete I tagata e latalata mai ia te oe, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 1 FEPUARI 2023

Manatu Autu:  Mataala I le  Mafutaga Vavalalata 1(Watch that Intimacy 1)

Tauloto – Tusi Paia: 2 Timoteo 2:22‘Ia e sola ‘ese i tu‘inanau o taulele‘a, ‘ia e tausisi i le amiotonu, ma le fa‘atuatua, ma le alofa, ‘atoa ma le filemū, fa‘atasi ma i latou o ē vala‘au i le Ali‘i ai le loto mamā.’.

 Faitauga - Tusi Paia: Faataoto 6:23-28

Upu Folafola
O le fausia o mafutaga vavalalata ma isi tagata aemaise o I latou I totonu o le aiga o le Atua o se tulaga lelei. Peitai, e tatau ona manino lelei le faavae o soo se mafutaga vavalalata ma ia aua nei faatagaina o se avanoa e faia ai le agasala. Mo se faataitaiga, o le mafutaga vavalalata I totonu o le Ekalesia, e mafai ona iloa e le faifeau le vaega o le Ekalesia o loo galue ai se tuafafine ia Keriso ma o se tulaga masani. O se uo I totonu o lena vaega o le Ekalesia e mafai ona iloa lona fale, ona matua, falefaigaluega, o mea e fiafia iai ma isi, o leisi lea tulaga o mafutaga vavalalata. Peitai o le isi vaega e maualuga atu, o le mafutaga vavalalata lea I le va o se ulugalii, e ao I le tane ona iloa mea uma I lana ava e sili atu I lo seisi. 

E iai le tulaga o mafutaga vavalalata e le tatau ona iai I le va o le tane ma le fafine e lei faaipoipo.  Afai e te maitauina ua amata ona e vavalalata tele I se tagata ua tau le mafai ona alu ese ma lou mafaufau I taimi uma, ua tatau ona faamutaina le lua mafutaga. Afai o oe o se tamaitai ae ua e maitauina se alii i le ofisa ua e misia pe faanoanoa pe afai ua le faigaluega, o loo iai se afi I luga o le mauga e tatau ona tineia ae lei faaumatia ai oe.

E toatele tagata ua pauu atu I le mulilua ma le faitaaga ona o ni mafutaga vavalalata e peiseai e le afaina tele, ma faapea mai ua na o se ‘uo’. O so’o se uo e iloa lelei oe e sili atu I lou toalua faaipoipo e faigofie ona iu ane ua ia talepe le lua aiga. O so’o se uo e faigofie atu ona e talanoa iai e sili atu I lou toalua e ono avea ma ou fili. E leai se tagata e tatau ona iloa lelei oe e sili atu I lo lou toalua faaipoipo. Afai o oe o se tamaitai ae iai se alii o loo naunau e fia mafuta vavalalata ma oe, ia mautu ma faailoa iai ni tapulaa e puipuia ai oe. 

Fai mai o’u tagata I Nigeria, a amata loa ona o’o atu le lulu aao i le tulilima I le va o se alii ma se tamaitai, ua tatau ona faama’amulu.   

Ia saunia lelei ni tapulaa mo so’o se mafutaga ma se tagata. ‘Aua nei mafuta vavalalata tele se tamaitai ma se alii I se tulaga e ono sese ma agasala ai, i mea ane ua e iu I seoli. Ia e sola ‘ese i tu‘inanau o taulele‘a, ‘ia e tausisi i le amiotonu, ma le fa‘atuatua, ma le alofa, ‘atoa ma le filemū, fa‘atasi ma i latou o ē vala‘au i le Ali‘i ai le loto mama, I le suafa o Iesu Keriso, Amene.