Samoan Devotional

OPEN HEAVENS
MATALA LE LAGI MO LE ASO TOONAI 21 IANUARI 2023

Manatu Autu:  Afi mumū (Flames of fire)

Tauloto – Tusi Paia: Eperu 1:7‘O agelu fo‘i ‘ua fetalai mai ai o ia, “‘Ua faia e ia ana agelu o matagi, ma ana ‘au‘auna o le afi mumū.”

Faitauga - Tusi Paia: Luka 6:43-45

Upu Folafola

O le aoaoga faasolo lenei o le Afi mumū e mo tagata uma lava. Peitai o’u te fautuaina tupulaga talavou e faafofoga lelei ma amanaia le aoaoga. E fa (4) elemeni poo vaega faavae I le lalolagi - vai, fogaeleele, ea ma le afi. O nei vaega uma e taua i le tagata soifua. E taua elemeni uma nei, peitai e mālie ma tāua I le iloa na filifili le Atua e avea ana auauna o afi mumū.

Se’i tatou talanoa i nisi o uiga o le afi. Muamua o le afi e mātilatila. O le taimi a e te vaai ai i le afi e te iloa ai, e lē taumatea. I le 2 Tupu 1:1-8 sa gasegase le tupu ona ia auina atu lea o ana auauna e fesili i ē ifo i tupua pe toe manuia lona ma’i pe leai. Na o atu auauna fetaui ma se tagata I le ala ma ia toe fa’afo’i auauna ma le feau I le tupu o le a maliu lava ia. Ina ua faamatala e auauna foliga o le tagata na latou fetaia’i na faapea mai le tupu, o le tagata lenā o Elia le Tisepi. O le afi e tulaga ese lava lona pupula ma e lē mafai ona e lē iloa.

E tatau ona iloa gofie e tagata le atalii / afafine o le Atua ma faapea mai “o le atalii o le Atua lenei.” O aso nei e toatele ua fai mai “e lē taulia le vaaiga po’o foliga I fafo na o le loto e silasila i ai le Atua.” I se tasi aso a’o o’u faiaoga i le aoga Tusi Paia sa ou aumaia ni molī se lua e lanu meamata ma le lanu samasama ma o’u fesili i le vasega e faasino mai le moli pula. Na fa’asino uma le vasega I le moli lanu samasama ma fa’amatalaina mai o ona foliga vaaia e manino lelei ai o le moli pula lea.

O le afi e pupula ona foliga e te vaai atu loa e iloa. Aua e te talitonu i manatu pepelo o tagata faapea e le amanaia e le Atua foliga I fafo. E taua i le Atua. E moni e lē mafai ona e olegia le Atua i ou foliga I fafo e pei ona ia fetalai I le 1 Samuelu 16:7. Fai mai lana Afioga Paia o lou ituaiga tagata I totonu e fa’aalia lava I fafo. Ua faapea mai Mataio 23:26 ‘O oe nā lē faresaio tauaso, ‘ia e mua‘i fa‘amamā i totonu o le ipu ma le tanoa, ‘ina ‘ia mamā ‘atoa ma le tua’.

E lē mafai ona e ta’u oe o se auauna a le Atua ma o oe o se afi mumū pe a e lē foliga a’i. E lē mafai ona e fai mai o oe o se atali’i poo se afafine o le Atua ae laei ma foliga fa’atasi ma tagata o le lalolagi. Afai e mana’omia lou faailoa atu I tagata o oe o se atalii o le Atua ia latou talitonu ai, o lona uiga e lē o oe o se Afi mumū. I le suafa mamana o Iesu Keriso. Amene

OPEN HEAVENS
MATALA LE LAGI MO LE ASO FARAILE 20 IANUARI 2023

Manatu Autu:  Fai se faataitaiga tonu (Set the right example)

 Tauloto – Tusi Paia: 2 Timoteo 2:21‘O lenei, ‘ai se tasi e fa‘amamā ‘iā te ia a‘i nei mea, ‘ua ta‘uleagaina, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma.’

Faitauga - Tusi Paia: 2 Timoteo 2:19-21

Upu Folafola
O le isi fesili e tatau ona e fesili ai lava oe ia te oe o lenei: ‘O le a le ituaiga faataitaiga lelei ou te faia mo I latou e mulimuli mai ia te au?’ Ua e silafia e mafai e le Atua ona faatulai se tagata ma faaeaina tele o ia, ae a fai e lea tagata se mea sese ona pau lea I lalo, e avea o ia ma faataitaiga I tagata o se mea e le tatau ona faia. Afai e te faitauina lelei le 1 Korinito 10:1-11, e te iloa ai o le fuaiupu 1-4 o loo auiliili ai le faamatalaga o tagata Isaraelu na fuafua ma faafaigaluegaina e le Atua, ona lisiina mai lea I le mataupu atoa le toatele na avea ma ni faataitaiga leaga mo I tatou na mulimuli mai. O le fuafua ma tuuina atu o oe e faafaigaluegaina e le Atua I le taimi lenei, o loo ia naunau ia e faitau ma faalogo i feau taua o loo tuuina mai, ae o le a le iuga o nei mea uma? E faaaogaina ea oe o se faataitaiga lelei I le lumanai poo se faataitaiga leaga?

1 Korinito 10:5 ‘ae peita‘i o le to‘atele o i latou ‘ua lē fiafia i ai le Atua, auā na fa‘ata‘atitia solo o latou tino i le vao’.

O le fuaitau o loo taua I luga o loo faapea mai ua le fiafia le Atua I le toatele. O le mea moni, o le toatele lava o tagata e I’u ane, o ni faataitaiga leaga aua foi e laiti lava ni nai tagata e matua filiga ma ua taufaoa le mālō o le lagi, ma ‘ua ‘avea fa‘amalosi fo‘i e i latou o taufao (Mataio 11:12). O le a lafoai mai ni mailei se tele a le fili I ou ala. O nisi o ia mailei e aumai e pei oni fesoasoani e foliga e le afaina, peitai e tatau ona e saunia lelei e usitai I le Alii ma ia tetee I le fili ina ia sola ese ai(Iakopo 4:7). 

E pei ona tatou iloa I le faitauga o le Tusi Paia o le aso, faamama oe mai so’o se amioletonu uma ina ia avea oe ma faataitaiga lelei mo I latou o mulimuli mai. Fesili I a Agaga Paia mo se fesoasoani. E le tatau ona e oo I se tulaga ua e manatu ua lava lou maua o Agaga Paia. E na o Agaga Paia e mafai ona taofia oe mai le pau I lalo, ia fusia o ia ma faalagolago malosi iai e pei ua faamoemoe atoatoa iai lou ola, aua foi o le tulaga tonu lava lena e tatau ona iai. 

Tatalo

Tama, faamolemole ia aua lava nei avea a’u o se faataitaiga leaga mo I latou o mulimuli mai ia te au. Taitai ia te au ina ia ou avea o se faataitaiga lelei, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TOFI 19 IANUARI 2023

Manatu Autu:  O Taulaga e taofia ai mala (Sacrifice can avert disasters).

Tauloto – Tusi Paia: 2 Samuelu 24:25‘Ona faia lea e Tavita i lea mea o le fatafaitaulaga i le ALI‘I; ‘ua fai ai taulaga mū ma taulaga fa‘afetai. ‘Ona fa‘afofoga lea o le ALI‘I i le tatalo mo le nu‘u ma na tāofia le fa‘ama‘i ‘iā Isaraelu.’ 

Faitauga - Tusi Paia: 1 Tupu 17:8-16

Upu Folafola
I le faitauga o le Tusi Paia o le aso, ua tatou iloa ai le fafine ua oti lana tane I Sarefata ua toe tasi lava sana meaai mulimuli na totoe. Na tuu e aai ai ma lana tama ona la feoti lea. Na ia avea lea meaai e faitaulaga ai, ona maua lea e ia ma lana tama le ola. Fai mai le Salamo 50:14-15, afai e te tuuina atu le viiga e te faitaulaga ai ma avatu I le Silisili Ese mea na e tauto ai, e laveaina oe e le Atua I aso o le puapuaga. I le 2 Samuelu 24:11-25, e 70,000 alii na maliliu ona o se faama’i na aliae I totonu o Isaraelu ona ua faitauina e Tavita tagata ma ua tupu ai le toasa o le Atua. O se mala matuia ma e tatau ona fai iai se fuafuaga vave e taofia ai. Ua latou tatalo, ma e ui na taofia e le Atua le agelu na ia faasosolo atu le faamai, ae na te lei toe faafoi mai le agelu, na tumau ai le agelu I le mea e soli ai saito a Aruna le sā Iepusē. O lona uiga o loo tumau pea le faafitauli, ona manatu lea o Kato, le faifeau a Tavita, e tatau ona faia se faiga e alofia ma taofia ai lenei mala:

‘Ona alu ane lea o Kato ‘iā Tavita i lea aso; ‘ua fai mai ‘iā te ia, “‘Ia e maliu a‘e ma e faia se fatafaitaulaga i le ALI‘I i le mea e soli ai saito a Aruna le sa Iepusē.” 2 Samuelu 24:18

Ao saunia e Tavita mea e fai ai le taulaga, na taumafai Aruna e avatu mea uma e faia ai le taulaga e aunoa ma se totogi, ae na teena e Tavita. Na ia naunau e na te totogiina le tau. Na faia e Tavita le taulaga mu, ona taofia lea o le mala I le taimi lava lena. 

25‘Ona faia lea e Tavita i lea mea o le fatafaitaulaga i le ALI‘I; ‘ua fai ai taulaga mū ma taulaga fa‘afetai. ‘Ona fa‘afofoga lea o le ALI‘I i le tatalo mo le nu‘u ma na tāofia le fa‘ama‘i ‘iā Isaraelu. 2 Samuelu 24:25

O le mea malie, e toatele nisi e le o ni kerisiano e malamalama I le faiga lea, a oo mai se mala, o se faigataulaga tele e mafai ona alofia ma taofia ai (2 Tupu 3:26-27). O I tatou o fanau a le Atua, e tatau ona tatou mulimuli I faataitaiga a Tavita, ia saunia e foai ni faigataulaga tetele aemaise I taimi faigata. 

Tau ina fesoasoani mai le Atua I fanau moni a le Atua e faataitai I lenei poloaiga ina ia alofia ma taofia mala o loo foufou mai, I le suafa o Iesu. 

Tatalo, 

Tama, a foufou mai ni mala, a’oa’o ia te au i mea e tatau ona faia, aemaise foai mai lou alofa tunoa ina ia mafai ona ou faataunuuina, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 18 IANUARI 2023

Manatu Autu:  Aoaoga mai isi Tagata (Learn from others).

Tauloto – Tusi Paia: 1 Samuelu 15:11‘Ua ‘ou salamō ‘ina ‘ua ‘ou tofia Saulo e fai ma tupu, auā ‘ua ia liliu ‘ese ‘iā te a‘u, ‘ua na lē fa‘ai‘uina a‘u ‘upu.” ‘Ua tigā ai Samuelu, ‘ua aoina le po o vala‘au o ia i le ALI‘I..’ 

Faitauga - Tusi Paia: 1 Korinito 10:1-11

Upu Folafola
Fai mai le 1 Samuelu 15:11“‘Ua ‘ou salamō ‘ina ‘ua ‘ou tofia Saulo e fai ma tupu, auā ‘ua ia liliu ‘ese ‘iā te a‘u, ‘ua na lē fa‘ai‘uina a‘u ‘upu.” ‘Ua tigā ai Samuelu, ‘ua aoina le po o vala‘au o ia i le ALI‘I.

O le taimi muamua na ou faitau ai I le fuaitau ua ta’ua I luga, na matua faateia a’u I se tulaga ua salamo ai le Atua. Na ou faitauina le Tusi Paia I le Esekielu 33:14-16 lea na fetalai le Atua  ‘ou te fai atu fo‘i i lē ‘ua amio leaga, “E oti lava oe;” ‘āfai e liliu ‘ese ia i lana agasala, e ola lava ia, e lē oti’. Peitai o le tulaga e ofo ai le mafaufau I le mea na tupu ia Saulo, ona e ese lea ituaiga salamo. O le mea moni, o Saulo o se tagata faamaualalo, filiga ma o se talavou galue malosi ao lei avea ma tupu. I le 1 Samuelu 9:3-4, na tuli e lona tama I sana feau e sue ni manu na leiloa. Na saili pea Saulo ma na matua filiga e sue seiloga e maua ona faatoa toe foi I le fale. O le Atua o le Alefa male Omeka (Faaaliga 1:8), e silafia e ia le gataaga e amata mai I le amataga (Galuega 15:18); e faapefea la I se isi faapea ona salamo I sana faaiuga na faia? O se tasi aso, na faaaoga e le Atua le fuaitau lenei o le Tusi Paia e tali ai lau fesili

“Na o‘o nā mea uma ‘iā te i latou e fai ma fa‘ailoga; ‘ua tusia fo‘i e fai ma apoapoa‘iga mo i tatou o ē ‘ua aulia mai ai tausaga e gata ai” 1 Korinito 10:11.

O tala uma tatou te faitau ai I le Tusi Paia, e oo I mea o loo tutupu I nei aso, e fai nei mea ma lesona ma apoapoaiga mo I tatou. E mafai ona tatou faapea, e faaaoga e le Atua nisi e aoaoina ai I tatou. O lenei, e lua ni fesili e tatau ona e fesili ai lava oe ia te oe lava: Muamua, o aoaoina ea a’u I faataitaiga ua tuuina atu e le Atua mai le Tusi Paia faapea ma mea o loo tutupu I lenei olaga? Ua aoaoina ea a’u mai le tala ia Iuta le Sekara, o le tuinanau o le oa e mafai ona faaumatia le tagata e le gata I le olaga nei ae faapea foi I le faavavau? Ua aoaoina ea oe mai ia Samasoni o le agasala o le tuinanau o le tino e mafai ona faaitiitia se tagata malosi e avea ma se falaoa magumagu (Faataoto 6:26)? Ua aoaoina ea oe mai le mau faataitaiga I ou tafatafa ane?

O e fiafia pea e fai le agasala lena? O le a se mea ua aoaoaina ai oe mai le Tusi Paia e faatatau I le taui o lena ituaiga agasala? E tau lava o se upu mo le tagata poto, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 17 IANUARI 2023

Manatu Autu:  O le Taulaga ola (The Living Sacrifice).

 Tauloto – Tusi Paia: Roma 12:1‘O lenei, le ‘au uso e, ‘ou te ‘ai‘oi atu ‘iā te ‘outou, ‘ona o le alofa mutimutivale o le Atua, ia ‘outou tu‘uina atu o ‘outou tino i le Atua, o le taulaga ola, ma le pa‘ia, ma le mālie, o le mea lea e tatau ai ‘ona ‘outou faia...’ 

Faitauga - Tusi Paia: Mataio 16:24-27

Upu Folafola
O le taulaga e sili ona fiafia iai le Atua o lou ola ma lou soifua. E avea oe ma taulaga ola i le aso e te tuuina atu ai lou soifua ia Iesu. Mai le aso e te tuuina atu i le faamaoni lou ola atoatoa ia te ia, o le a mafai ona ia auina atu oe i soo se mea e finagalo ai, pulea le mea e agai iai lou soifua ma faaaogaina oe e faataunuuina ai lona finagalo. E silafia e le Atua o a'u ou te lei fia avea ma faifeau pe avea foi ma faifea'u e taitai i le Ekalesia aoao, peitai o a'u o le taulaga ola. Sa ou naunau ou te malolo ritaea i le 70 tausaga o lo'u matua, ina ia mafai ona ou ola i se olaga masani, ia mafai ona moe i le umi e masani ai isi tagata, ma ai i taimi e aai ai isi tagata. PeitaI sa fetalai mai le Atua ‘E leai’. Ona o a’u o le taulaga ola a le Atua sa ou tali atu ia te ia ‘Ua lelei Tama’. 

O le finagalo o le Atua ia avea lou olaga atoa ma taulaga ola ia te ia; e te alu i so’o se mea na te auina atu ai oe iai. A faapea mai e te molimau - ona e molimau lea, pe finagalo e te saofa’i ona e nofo lea i lalo. O le taimi lava e silafia e le Atua ua avea oe ma ana taulaga ola, o le a ia taliaina so’o se taulaga e te faia mo ia, aua o le a faia lena taulaga i lalo o lana taitaiga. O nisi o tatou ae le’i ulufale mai i le lotu, ua leva ona tatou mafaufauina le taulaga o le a faia mo le Atua. Ae mo le tagata o le taulaga ola, e ta’u atu e le Atua le taulaga e faia.

Ina ua avea a’u ma taitai aoao o le Ekalesia, sa faigata mea uma. Sa toetoe a le mafai ona maua ni tupe e totogi ai le au faigaluega a le Ekalesia ma o le tele o taimi sa leai se tupe totoe mo le totogi o le taitai aoao o le Ekalesia. Ina ua ou faamavae mai la’u galuega i le malo ua le toe maua so’u totogi a ua ave atoa lo’u taimi mo le galuega tala’i a le Atua. Sa maua mai la’u tupe mai le malo ina ua faamavae mai le galuega, ma o la’u fuafuaga mo lea tupe, o le teu se vaega ae ave se isi vaega e faafaigaluega mo se tupe faasili. Peitai ona o a’u o le taulaga ola, na ou fesiligia le Atua: ‘O lea se mea ou te faia i le tupe lea?’

Ona tali mai lea o le Atua, ia vaevae le tupe i ni vaega se tolu (3), ma ia tuuina atu ia vaega i ni galuega tala’i e tolu, ae leai se tupe mo a’u. O se tulaga tuga lava lea, ae sa ou maua le mafanafana i le faapea mai o le Atua: “E avea a’u ma ou puna’oa”. Afai o le a avea oe ma taulaga ola, o le a avea le Atua ma ou puna’oa. Aua o le aso na avea ai oe ma taulaga ola, o le aso lava lena sa avea ai oe ma mea totino a le Atua, ma o le a ia tausia lelei oe. E faigata le taimi e te tau amata ai, ae e faamaoni le Atua ia te oe ina ia saogalemu lou lumanai (Kolose 1:27).   

Po ua avea oe ma taulaga ola mo le Atua? Pe mafai ea ona ia pule faitalia ia te oe ma au mea totino uma? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 16 IANUARI 2023

Manatu Autu:  Faatulai se Fatafaitaulaga mo le Atua (Raising an Altar unto God).

Tauloto – Tusi Paia: Levitiko 6:13‘Ia mū pea lava le afi i luga o le fatafaitaulaga; ‘aua ne‘i mate lava ia..’ 

Faitauga - Tusi Paia: Kenese 28:11-19

Upu Folafola
O Apreaamo o se tagata e tele ni fatafaitaulaga na ia faatuina (Kenese 12:7, 13:4, 13:18, 22:9). Leitioa a matuai faamanuiaina o ia e faasolo augatupulaga e tupuga mai ia te ia. O le fatafaitaulaga o se nofoaga e feiloai fesagai ai le Atua ma le tagata. I le tatou faitauga o le Tusi Paia o le aso, ua tatou iloa ai e lei iloa e Iakopo o lo’o iai o ia I le nofoaga o le fatafaitaulaga, peitai na ia vaaia I le miti o se nofoaga lea e fetaui ai le lagi ma le laueleele nei. Mo se faataitaiga o le fatafaitaulaga, o se tulimanu lea o lou potu pe afai e na o le tasi le potu o lou fale. E mafai ona e faaavanoaina se vaega o lou potu e fai ma au fatafaitaulaga ona fai lea ma au masani e te feiloai ai ma le Atua. E tatau ona e avea lea vaega o se vaega e faapaiaina, aua o le fatafaitaulaga lena I le Atua. O le taimi lava e te faaavanoaina ai le vaega lena e fai ma fatafaitaulaga, o soo se taimi e te alu ai iina, e faatali mai ai le Atua. 

Afai e alu atu se tagata I le fatafaitaulaga, e na te faia e avatu ai taulaga I le Atua, ma tapuai ia te ia. I le Kenese 22:1-14 ina ua fetalai le Atua ia Aperaamo e ofo atu lona atalii o Isaako e fai ma taulaga mu, na ia faatonu e alu atu I se  nofoaga na faasino mai, e fai ai se fatafaitaulaga ma avatu le taulaga mu. So’o se taimi e te asiasi ai I se tagata tauoloa, ona o lou ava tele I lea tagata, e le mafai ona e alu e leai se mea e avea. Aisea la e te alu ai ma le leai o se mea pe afai e te alu atu I le Atua e Silisiliese? Aua e te alu I le Atua e leai se mea e ofo atu ia te ia. Afai e leai se mea e te avatua, e na te talia le taulaga o viiga (Ieremia 17:26).

Afai e afio mai le Atua e feiloai ma se tagata I le fatafaitaulaga, e afio mai e faamanuia. Fai mai le Salamo 67:5-7 a sii atu I luga le viiga, e paū mai I lalo faamanuiaga. I le Kenese 22:15-18, ina ua avatu e Aperaamo Isaako e osi ai le taulaga mu, na taofia e le Atua ma faapea atu: ‘Ua maea ona e faia lau vaega, tuu mai sei fai la’u vaega, I faamanuiaga ou te faamanuia ia te oe ma faateleina, ou te matua faateleina o e tupuga mai ia te oe. A feiloai le Atua ma lana fanau I sauniga, e faamanuia iai latou, aemaise I latou o loo o mai ma faigataulaga. Na ou faatuina se fatafaitaulaga I se potu laitiiti I le fale muamua na ou nofo ai I totonu o le lotoa a le Ekalesia e taua o le ‘Redemption Camp’ e sili atu ma le 20 tausaga talu ai. O lena fale ua faaigoaina nei o le ‘Open Heavens International Centre’. Ona o lea nofoaga na faamauina o se fatafaitaulaga, e oo mai I le aso, o loo o atu iai tagata e tatalo I le faatuatua ina ia maua ni vavega tetele mai le Atua e o’o ia te a’u ou te matua ofo ai. 

Ia filifilia ma saunia se vaega o lou fale e avea ma fatafaitaulaga e te lua feiloai ai ma le Atua ia fai ma masani, I le suafa o Iesu Keriso, Amene.     

OPEN HEAVENS
MATALA LE LAGI MO LE ASO SA 15 IANUARI 2023

Manatu Autu:  O oe o se tagata e le mafaia se mea pe a aunoa ma le Atua (You are nothing without Him).

Tauloto – Tusi Paia: Ioane 15:5‘O a‘u nei o le vine, o la ‘outou. O lē tumau ‘iā te a‘u, ma a‘u ‘iā te ia, o ia lava e fua tele mai; auā e lē mafaia e ‘outou ‘ona fai se mea e tasi pe a a‘u lē i ai.’ 

Faitauga - Tusi Paia: Luka 19:29-38

Upu Folafola
Sa ou faalogo i se tasi o lauga ua faapea mai, a afio ese le Atua ma ia o le a itiiti e totoe. Ou te lē iloa I le failauga pe faafefea ona totoe ai pea se mea, aua ana faapea o a’u, e aveesea mea uma ma leai se mea e totoe. A’o a’u, ua ou manino lelei a aunoa ma le Atua, ua na o a’u o se tagata e le mafaia se mea, matua’i leai lava, ma ou te ta’u pea i le Atua e lē aunoa.

Sa ou lauga I le tofiga o lo’u atalii I le galuega pe a ma le fa sefulu (40) tausaga talu ai. Sa ou faamanatu ia i latou le asini na tietie ai Iesu o loo i le tatou Tusi Paia faitau o le asō. Atonu na faafuasei ona vaai atu le asini ma iloa atu tagata o fola o latou ofu I le ala e savali ai i luga, ma le toatele o e pepese ma sisiva a’o ia savali atu. Atonu sa matuā fa’agae’etia le asini I le faapitoa o ia. Peitai o le taimi na alu ese ai Iesu, o lē  sa toe tietie I le asini na uma ai ma le manaomia o le asini a ua tu’u e alu. O le taimi lea atonu ua mamao ese le asini mai lona aiga, ma ua lē iloa fo’i le auala e toe fo’i ai. Masalo foi na fetaui ma ni tagata ma ua uma le pepese fiafia a ua tuli ese si asini. E sili atu pe a fai na i’u I se faatoaga ma galue ai. Le au pele e, o le taimi e alu ese ai le Atua ma oe e uma ai fo’i ma oe. O e manatu e te poto? Na o sina mimilo a i le mafaufau o se polofesa poto ona pei a lea o se vale e fealualua’i solo i le auala.

A vaai mai tagata o lo’o ‘ou ola fa’apaiaina, loto maulalo ma usiusitai I le Atua e pei ona tusia i lana Upu, o le mafuaaga ona ou te lē mana’o e afio ese le Atua ma a’u. Ou te lē manao ou te fiu e saili ae ua lē toe faatasi le Atua ma a’u. Ou te lē manao ou te tatalo atu a ua lē faafofoga mai le Atua i a’u tatalo. Ou te ole atu ia te oe le au pele e, aua ne’i e faia se mea e afio ese ai le Atua ma oe.

I luga o le satauro na alaga Iesu “Tamā aisea ua e tu’ulafoa’i mai ai iā te a’u?” (Mataio 27:46). Mafaufau i lenei, ina ua fa’asauā le lalolagi atoa I le Alii Fa’aola e le’i afaina iā te ia. Peitai ina ua liliu ese fofoga o le Tamā mai ia te ia na tutulu. Tusa pe fa’asauā le lalolagi atoa ma fulitua iā te oe, e lē afaina pe a fai o loo tumau pea le Atua ma oe. A aunoa ma le Atua, o oe o se tagata e le mafaia se mea. Aua ne’i e faia se mea e afio ese ai le Atua ma oe. Alu ese mamao mai le agasala. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO TOONAI 14 IANUARI 2023

Manatu Autu:  Ua na o le Alofa tunoa (Only by the Grace)

Tauloto – Tusi Paia: Ioane 15:16‘Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa...’ 

Faitauga - Tusi Paia: Roma 9:15-26

Upu Folafola
Ua manatu nisi ua faia e le Atua mea tetele ma lelei mo i latou aua o se tulaga ua alagātatau ma ua agava’a i ai. I o latou manatu auā ua tele lo latou aogā I le Atua ua tatau fo’i la ona faamanuia mai le Atua ia I latou. Talitonu mai ma le faamaoni o mea uma lava e faia e le Atua, e faia ona o lona lava suafa, e lē mo oe ae mo lona lava suafa ia faailoa atu ai lona mana. (Salamo 106:7-8)

Aua e te fa’amaualuga. E mafai e le Atua ona fa’aaogā so’o se tasi. E i ai tagata o lo’o tatalo, suesue le Tusi Paia, sili atu lo latou agava’a na i lo’o oe, ae ua filifilia oe e le Atua ma e tatau la ona e loto faafetai ai. O lenei, afai tatou te maitaulia le amio leaga, o ai se o le a tula’i? (Salamo 130:3) A vaai tagata I mea o loo fai e le Atua i le Ekalesia RCCG e manatu atonu e faapitoa a’u. Pau le tulaga ese o a’u, na filifilia a’u e le Atua, aua mai lava i aso o o’u laititi na folafola e le Atua i lo’u tamā o le RCCG o le a so’o ai le lalolagi. E lē ona o a’u ae ona ua finagalo le Atua e faailoa le mamalu o lona suafa e ala i le elalesia lenei ma ua nā o lona alofa tunoa ua filifilia ai a’u e avea ma ta’ita’i o le ekalesia. Semanū na te filifilia se isi tagata auā o loo i ai e sili atu le agava’a ia te a’u peitai ua na o lona alofa tunoa ua mafua ai ona avea a’u ma tagata filifilia.

Afai e te vaai I tagata o loo malelemo pea I le agasala, ‘aua e te faamasino ia i latou ona ua faaolaina lou agaga ma o loo e agai atu i le lagi a ia e tatalo I le Atua e laveaiina i latou e ala i lona alofa tunoa, e pei ona ia laveaiina oe mai lou agai atu i Seoli. Aua ne’i galo o le Atua o lo’o galue pea mo le viiga o lona lava suafa. O le alofa tunoa ua e maua ai faamanuiaga a le Atua. Atonu na manatu le fanauga a Isaraelu na vaeluaina e le Atua le sami ulaula ma malelemo ai Farao ma ana ‘au tau ona e faapitoa i latou i le finagalo o le Atua. Leai na faia e le Atua mo lona lava suafa. Ua na o i latou o ni tagata ua alofaina i le alofa tunoa o le Atua. Ua tautino mai ai Paulo I le tusi o Roma 9:17 ‘Auā ‘ua fa‘apea mai le Tusi ‘iā Farao, “O lenei lava le mea ‘ua ‘ou fa‘atū ai ‘iā te oe, ‘ina ‘ia ‘ou fa‘aalia lo‘u mana ‘iā te oe, ‘ina ‘ia ta‘ua fo‘i lo‘u igoa i le lalolagi uma lava.”’

Tatalo

Tamā faafetai mo lou alofa tunoa i luga o lo’u olaga. Faamolemole aua lava ne’i faatagaina se mea e taofia ai a’u mai lo’u fiafia pea e ola fiafia i lou fesoasoani mai lou nofoalii o lou alofa tunoa. I le suafa mamana o Iesu Keriso, Amene. 

OPEN HEAVENS
MATALA LE LAGI MO LE ASO FARAILE 13 IANUARI 2023

Manatu Autu:  Faaumatia le Faamaualuga (Kill Pride)

Tauloto – Tusi Paia: Iakopo 4:6‘A ‘ua foa‘i mai e ia le alofa tunoa e sili; o lea ‘ua fa‘apea mai ai, “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo...’ 

Faitauga - Tusi Paia: Faataoto 16:5

Upu Folafola

O le tele o taimi o tagata e faaosofia le toasa o le Atua e ala I le faamaualuga. O se tagata faigaluega fou I se ofisa e faapena ona faamaualalo ma usitai. Peitai o le taimi lava e amata ai ona manatu o ia ua taua tele, e amata ai iina ona ia faaosofia le inoino iai o tagata. O le taimi e amata ai ona e faamaualuga, ua e faaosofia le inoino o le Atua. Aua nei galo ia te oe, po’o le a le maualuga e te oo iai, e maualuga ma Silisili Ese atu le Atua. 

E lua lava auala e aoai ai e le Atua se tagata faamaualuga. Muamua, o le faafusei lea ona ia aveesea le tofi o lea tagata I se auala e matua faamāina ai. I le Galuega 12:20-24, o le faamaualuga o le tupu o Herota ua ia faatagaina ai le faatusa o lona tagata I le Atua Maualuga. Na faatonu e le Atua anufe e ai ola o ia. Ua fetalai le Alii, ‘E te manatu ea ua e maualuga tele ona e te taitaia se autau toatele? E iai la’u autau e latou te le tauaveina ni fana, o anufe’. Sa nofo Herota I lona nofoalii o le tupu, I se taimi itiiti mulimuli ane, ua ai ola e anufe. Peitai ane, e mafai e le Alii ona faamaina se tagata I luma o tagata ae maua pea e ia lona ola. O le mea lena na ia faia ia Nepukanesa I le Tanielu 4:28-37. 

O Nepukanesa o le tupu sili ona lauiloa ma tautaua I lona vaitaimi. Na ia fausia se taulaga tele e ta’ua o Papelonia, ma sa iai I Papelonia se tasi o mataaga tautaua e fitu I le lalolagi o aso anamua. Na iai le taimi ua silafia e le Atua ua amata ona faamaualuga Nepukanesa ma ua ia auina atu se lapataiga e ala I se miti. O le faanoanoaga, ina ua maea le tausaga talu ona auina mai le lapataiga, ua galo ia Nepukanesa, ma o lea na faapea ai loa le Atua, ‘ua lelei, ua e manatu ua e maualuga tele? Alu loa e aai ma manu mo le fitu tausaga’. E lei iai seisi na aveeseina ona laei o le tupu, na ia aveesea e ona lava lima. Afai e iai se mea e tatau ona aveesea ma lou olaga I le aso, aveese le faamaualuga. 

Ia e faaeteete a’o e tulai mai ina ia aua lava nei e manatu ua maualuga ma taua tele lou tagata. Fai mai toeaiina, a paū se mogamoga, e le lagona e seisi, a paū se loi, e le luluina le eleele, ae a paū se elefane, e luluina le eleele e le gata o le eleele o lo’o tu ai, ae faapena foi nofoaga tuaoi. Afai o siitia pea oe I luga e le Atua, ia e faaeteete I le faamaualuga, ina ia aua lava nei avea oe ma se faataitaiga I le Atua e na te tausi ma siitia se elefane, ona toe faapau lea ina ia aoaia o ia, e pei o Farao (Roma 9:17).    

Afai e iai se mea e tatau ona aveesea mai lou olaga I le aso seia o’o I le faavavau, aveese le faamaualuga, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 12 IANUARI 2023

Manatu Autu:  E te inoino I le Atua? (Do you hate God?)

Tauloto – Tusi Paia: Faataoto 21:30‘E leai lava se poto, e leai se mafaufau, e leai se pule e tete‘e atu i le ALI‘I..’ 

Faitauga - Tusi Paia: 2 Nofoaiga Tupu 13:9-12

Upu Folafola

Fai mai le Kalatia 2:20 ‘Ua fa‘asatauroina fa‘atasi i mā‘ua ma Keriso; ‘ou te lē toe ola a‘u, a o Keriso o lo‘o ola i totonu ‘iā te a‘u; o le ola fo‘i ‘ou te ola ai nei i le tino, ‘ou te ola ai lava i le fa‘atuatua i le Alo o le Atua, o lē na alofa mai ‘iā te a‘u, ma foa‘iina mai e ia o ia mo a‘u. 

Fai mai Paulo, aua na alofa Keriso ia te ia, ua ia foai atu lona ola mo ia. E mafai ona tatou maua mai ai le feau taua, e alofa le Atua ia te oe ma a’u. E foai atu lona ola mo oe. I le aoaoga faamatematika, afai e faatulaga mai se fuaiupu faafuainumera, e tatau lava ona iai se tulaga e mulimuli mai, o le tali o fuainumera nei. O le tali o le feau taua mo I tatou o lo’o maua I le Faataoto 8:36

A o lē agasala mai ‘iā te a‘u, ‘ua fa‘asaunoa e ia lona lava ola; ‘atoa uma o ē ‘ino‘ino ‘iā te a‘u, ‘ua latou manana‘o i le oti.”

O Herota o se tamaloa e ese ma le inoino I le Atua, na ia faia mea uma e taofia ai le galuega a le Alii ma sa maliu faafusaei o ia I se oti e faamaina. Ina ua maliu o ia, fai mai le Tusi Paia ‘A ‘ua tupu le afioga a le Atua ma ‘ua fa‘ateleina’ (Galuega 12:24). O so’o se tagata e taumafai e taofi ma tu I le ala o le Atua Silisili Ese, e inoino iai le Atua ma ua valaau o ia I lona oti. 

I aso ua mavae, I se tasi atunuu, sa matou mananao e faatuina seisi Ekalesia fou, ae ao faagasolo lona faatinoina, sa isi se tagata faigaluega I le malo na tauto o le a ia faia mea uma e taofia ai. Na valaau mai la’u fanau ma ta’u mai ia te au, ma ou te ta’u atu le mea moni, e le’i maimau sou taimi ou te tatalo ai mo lenei mataupu. I le aso o le matou fonotaga lea na fuafua ai lenei tagata faigaluega a le malo e ta’u mai ai iai matou, e teena la matou talosaga, sa ia faamaulu lona ofu vae ma ua tuu uma ona vae e lua I le vae e tasi o le ofuvae. Ao ia taumafai e faasa’o le faamauluina o le ofuvae, ua pau ma ua faamanualia ma faavavevave ona avatu I le falemai. Ua maliu o ia ae o loo mau pea ona vae e lua I le vae e tasi o le ofuvae. 

E mafai ona e faapea mai e te le taitai ona e tetee faapena I le galuega a le Atua. E te faaosoina tagata e aua nei usitai I le taitaiga a le faifeau ma le au toeaina o le Ekalesia? O e gaoia ea tupe a le lotu ua faigata ai ona faatino galuega a le Ekalesia? O lo’o e faalavelave ma taofia galuega a le Atua ma o soo se tagata o loo ia faia, o lo’o taaalo o ia ma le oti. Ua lava lava se upu mo le tagata poto. 

O iai ea se mea o lo’o e faia e tetee ai ma taofia le galuega a le Atua I la outou Ekalesia, nuu ma le atunuu? Tu’u loa ina  ia aua lava nei o’o mai le oti faafuasei. I le suafa o Iesu Keriso, Amene.