Samoan Devotional

OPEN HEAVENS
MATALA LE LAGI MO LE ASO SA 01 IANUARI 2023

Manatu Autu:  Fuafuaga faataatitia e fia ausia 1 (Setting and achieving goals 1)

Tauloto – Tusi Paia: Faataoto 16:9‘E filifili i le loto o le tagata lona ala; a o le ALI‘I na te fa‘atonuina le mea e ui ai o ia..’.

Faitauga - Tusi Paia: Faataoto 3:5-6

Upu Folafola

O le amataga o se Tausaga fou e masani ona momoli mai ai ma faamoemoega fou, e faamalosiau i tagata ia toe faataatitia ni fuafuaga fou. Ioe e taua le faataatitia o fuafuaga, peitai e sili atu ona taua le sailiili lelei poo o gatasi ma fuafuaga a le Atua mo lou olaga. Ia se’i o tatou suesue lelei le finagalo o le Atua I le faataatitiaga o fuafuaga e pei ona tusia I le Sapakuka 2:1 e faapea:

1‘Ou te tu i le mea ‘ou te leoleo ai, ‘ou te tu fo‘i a‘u i le ‘olo, ‘ou te va‘ava‘ai fo‘i ‘ina ‘ia ‘ou iloa pe se a se mea e fetalai mai ai o ia ‘iā te a‘u pe se a fo‘i se mea ‘ou te tali atu ai i la‘u finauga.

Ua e fesili ea I le Alii mo ana fuafuaga mo lou olaga mo lenei tausaga? Ua e saili ea ma faatali I le Alii ina e iloa manino le mea e tatau ona e mulimuli ai I lenei Tausaga? Afai e leai, faamolemole faaalu sou taimi e saili ai I ona fofoga mo le taitaiga faale Atua. 

O le saosaoa ma vave ona tupu ma faatino, e le faapea o le vaaiga lea o le alualu I luma I taimi uma. Afai o loo e alu saosaoa I le itu sese, e te iloa mulimuli ane o loo e faasolo I tua I lo le alu I luma. Ua na o le Atua na ia faia oe mo ana fuafuaga e silafia le ala e tatau ona e ui ai mai lea taimi I lea taimi, o lona uiga e tatau ona saili pea I le Alii. Ia e manatua, e iai le ala ‘ua tonu i le manatu o le tagata; a o lona taunu‘uga, o ala ia e oti ai (Faataoto 14:12).

E iai le taimi sa matou fuafuaina sauniuniga faapitoa I totonu o ni aai I Nigeria. Ina ua oo I le taimi e matou te o atu ai I aai I le itu I Saute o le atunuu, na ou fesili I le Atua mo lona finagalo, ona ia faatonuina lea o matou e matou te o I se aai I le itu I sisifo o le atunuu. Ona ou tali atu lea I lea Atua o lea faatoa maea le sauniga I se tasi o aai I le itu I sisifo, ae na ou usitai pea ma faia.

I lea sauniga I le aai lea I le itu I sisifo, o le tupu o lea aai o se tagata mosalemi, na ia folafola mai poo le a lava le tele o le eleele matou te manaomia, o le a ia foai mai iai matou. Ao matou sauni e ta’u atu I le tupu o le aai le tele o le fanua ua matou manatu e matua tele lava, ae na faasino I matou e le Alii e fesili mo le vaega atoa o se fanua e tele atu. I lou manatu, e matua le talafeagai lenei manaoga, ae na ou usitai pea I le Atua, na foai mai lava e le tupu le tele o le fanua na matou faiatu ai. I le aso, o le Redeemers University ma le Aoga faa misionare, o loo faia I luga o eleele nei. Ia e faataga le Atua e faaali atu ia te oe fuafuaga faataatitia e tatau ona e taumafai iai I lenei Tausaga. Afai o le fuafuaga alualu mamao a le Atua, e mautinoa e na te saunia mea uma e manaomia ma e lagolago o ia ia te oe ina ia e ausia. 

Tatalo, 

Tama faamolemole faaali mai ia te a’u au fuafuaga e te finagalo ou te galue ina ia ausia I lenei Tausaga ae pe faapefea foi ona faatino ina ia taunuu, I le suafa matautia o Iesu Keriso, Amene.  

OPEN HEAVENS
MATALA LE LAGI MO LE ASO TOONAI 31 TESEMA 2022

Manatu Autu:  Tatalo mo le Tausaga 2023 (Prayers for Year 2023)

Tauloto – Tusi Paia: Faaaliga 21:5‘Ua fetalai mai fo‘i lē ti‘eti‘e i le nofoāli‘i, “Fa‘auta, ‘ou te faia ‘ia fou mea uma lava.” ‘Ua fetalai mai fo‘i o ia ‘iā te a‘u, “‘Ia e tusi; auā o ‘upu nei e moni ma le fa‘amaoni ia.”.’.

Faitauga - Tusi Paia: Isaia 43:18-21

Tatalo

1.      Faafetai tele le Alii e, mo lau tausiga ia te a’u e o’o mai i le faaiuga o le tausaga 2022. Ou te faafetai mo taimi uma na e faamalolōina ai a’u, foai mo a’u ma lavea’i ia te a’u i lenei tausaga.

2.      Tamā faamolemole aua ne’i I ai se mea e taofia lo’u ulufale atu i le tausaga 2023. Ia ou aulia le tausaga fou I le olioli I le suafa o Iesu.

3.      Tamā faamolemole fa’a toilalo fili uma o loo taupulepule ia aua ne’i taunuu o’u faamoemoega i le 2023 I le suafa o Iesu.

4.      Tamā faamolemole aua ne’i faatagā ni o’u vaivaiga ou te alu ma a’u I le tausaga 2023 I le suafa o Iesu. So’o se mea e fai ma faalavelave I lo’u agai I luma I le 2023 ia alu ma le tausaga 2022 I le suafa o Iesu.

5.      Tamā ia sili mamao atu le lelei o le 2023 mo a’u nai loo le tausaga 2022 I le suafa o Iesu. O le a tutupu ni fa’asa’olotoga se tele mo a’u I le tausaga fou I le suafa o Iesu.

6.      Tamā faamolemole muāau lau afioga i o’u luma ma faasa’osa’o ala gaoā uma ma fesoasoani mai ia ou sola ese mai mailei uma a le fili i le tausaga fou I le suafa o Iesu.

7.      Tamā ou te ole atu ia e faatele mai lou alofa tunoa ia ou ola fa’apaiaina ai ma auauna ia te oe ia sili atu I le tausaga 2023 I le suafa o Iesu.

8.      I le 2023 le Alii e, faamolemole faamanuia i galuega a o’u lima ma ia e faatupu ia te a’u i le suafa o Iesu. Ia faamanuia mea uma e tago iai o’u lima i le tausaga fou I le suafa o Iesu.

9.      Tamā o mea lelei uma ua e amata i lo’u olaga I le 2022 ia e fa’aatoatoa mai i le tausaga 2023 I le suafa o Iesu. Aua ne’i faatagaina ni galuega tuua i lo’u olaga I le suafa o Iesu.

10.  Ou te tautala I fa’amanuiaga, tulaga lelei, tamaoaiga, siitia tulaga ma faafiafiaina mo a’u I le 2023 (tau lou suafa atoa) I le suafa o Iesu. (Tau lou suafa atoa) o le a ou manuia I le 2023. O le a e muamua I au uo uma I le 2023. O le 2023 le tausaga o le a ou faaaogaina uma ai avanoa ou te maua I le suafa o Iesu.

11.  Tamā faamolemole ia e talia a’u tatalo uma o le a ou ole atu ai i le tausaga 2023. Faamolemole ia e talia ma faia I ai lou finagalo e lē aunoa I le suafa o Iesu. Faamolemole ia e faafofoga mai ia te a’u i taimi uma ou te valaau atu ai i lou suafa I le tausaga fou I le suafa o Iesu.

12.  Faaopoopo iai ou manaoga ta’ito’atasi mo le tausaga 2023. I le suafa mamana o Iesu Keriso. Amene

OPEN HEAVENS
MATALA LE LAGI MO LE ASO FARAILE 30 TESEMA 2022

Manatu Autu:  Aua lava nei e faaosoosoina le Atua (Never Provoke God)

Tauloto – Tusi Paia: Eperu 10:31‘O le mea e mata‘u tele ai ‘ona maua e ‘a‘ao o le Atua soifua.’.

Faitauga - Tusi Paia: 2 Nofoaiga Tupu 36:15-16

Upu Folafola
O se sese e matua maoa’e ona faia e se tasi i lona olaga, o le faatupuina lea o le to’asa o le Atua Silisiliese. O loo tusia I le 1 Ioane 4:8,  le Atua, o le alofa lava ia. E lē na o ia o se Atua alofa; o ia o le alofa, ae o loo faapea mai foʻi le Eperu 12:29, o lo tatou Atua o le afi ma’ama’ai ia. O so’o se tupe siliva e lua ona itu. O le tasi itu o le Atua, ua ia te ia le alofa o lona alofa tele na ia foaiina mai ai  lona lava Alo pele e toatasi mo i tatou. Ae peitai, i le isi itu, o Ia o le afi e ma’ama’ai. A e faʻalogo i tagata o loʻo talanoa i le Atua, na o lona alofa lava, o lona alofa tunoa I le 100% o le taimi, ae leai seisi lava mea, ia e alo ese mamao ma ia tagata. E moni e agalelei le Atua, e alofa mutimutivale, o le alofa lava Ia, ae aua nei galo ia te oe o ia foi o le afi e ma’ama’ai. Afai ua alofa le Atua ia te oe, ae e te faatalale I lea tulaga, e na te a’oai ia te oe. O loo faamanino mai lea tulaga I le afioga a le Atua i le Eperu 12:6 Auā o lē ‘ua alofagia e le Ali‘i, ‘ua a‘oa‘i atu o ia ‘iā te ia; ‘ua sasaina fo‘i e ia atali‘i uma ‘ua talia e ia.”

E te ono manatu e tatau ona fai mai le Tusi Paia, o so’o se tasi e alofa i ai le Tama, e sogi atu o ia ia te ia, ae e le o le mea lena o loo fai mai ai. Afai e te iloa o loʻo e faia pea se mea sese, ma ua aoai ma faʻasaʻoina oe, ae o lo’o e musua pea e gauai atu, o lona uiga e foliga mai ua e faʻaosoosoina le toasa o le Alii. E tatau ona e taofia loa le faia o lena mea sese e le fiafia iai le Atua. Fai mai le Faataoto 29:1 O le tagata ‘ua a‘oa‘iina so‘o, ‘ae fa‘ama‘a‘a lona ua, e fa‘afuase‘i ‘ona nutimomoia o ia, ‘ae leai se fofō.

E leai se tasi e mafai ona faapea mai, ona e alofa le Atua ia te oe, e mafai ai ona e faia so’o se mea lava e te manaʻo I ai. Afai e mafai ona e faia so’o se mea e te manaʻo I ai, e foliga mai ua ia tuulafoaʻina ia te oe, auā o loo faamanino mai e le Tusi Paia i le Eperu 12:8 ‘Ae ‘āfai e aunoa ‘outou ma le a‘oa‘iga, ‘ua tofusia ai le fānau uma, o tama tō i fale ‘outou, ‘ae lē ni atali‘i.  

Mo i latou e fai mai. ‘O Pastor Adeboye e manatu lava ia le tulafono, o lo’o tautala o ia i le Tulafono, ou te leʻi tusia le Tusi Paia’. O loo tusia manino i le Feagaiga Tuai ma le Feagaiga Fou, afai e te faia se tulaga sese, ma e le o faasalaina oe e le Atua ona o lena tulaga, o lona uiga o oe o se tagata amio leaga,ma e le taliaina ni tagata amio leaga i le malo o le lagi, e pei ona molimauina I le Mataio 7:21-23. 

Ia e faia mea uma e ‘aua ai ona e faaosoosoina le toasa o le Atua, I le suafa o Iesu Keriso, Amene. 

 OPEN HEAVENS
MATALA LE LAGI MO LE ASO TOFI 29 TESEMA 2022

Manatu Autu: Foai ma faigataulaga (Sacrificial Giving)

Tauloto – Tusi Paia: 2 Samuelu 24:24‘Ona fai atu lea o le tupu ‘iā Arana, “‘Aua lava; ‘ou te fa‘atau mai pea ‘iā te oe i le tau; ‘ou te lē fai taulaga i le ALI‘I lo‘u Atua i taulaga maua fua.” ‘Ona fa‘atau mai lea e Tavita le mea e soli ai saito, ‘atoa ma povi i sekeli ario e limagafulu’.

Faitauga - Tusi Paia: Luka 21:1-4

Upu Folafola
I le tatou faitauga o le Tusi Paia o le aso, ua tatou faitau ai I se fafine ua oti lana tane na foai uma mea sa ia te ia ma na matua maofa ma fiafia iai lo tatou Alii o Iesu. Ua faapea mai Iesu, o lana foai e sili atu I isi tagata e ui e laitiiti le aofai pe a faatusa I isi. 

E toatele tagata e latou te faia ni faaupuga faapenei pe a fai ni foai ma le tiga, ‘o lau foai lea e pei o le fafine ua oti lana tane’. Ua latou oleole iai latou lava aua foi, muamua, e mafai ona ou fai atu e le o I latou o ni tagata ua oti a latou taitoalua. Lona lua, e le faapea ua foai uma atu mea sa iai  latou. Seiloga ua e foai uma atu mea o ia te oe ona faatoa e faia lea o lea faaupuga. 

Afai e te foai atu I le Atua se mea e lei iai se tau po’o se totogi ia te oe, e laitiiti lava lona taua I lana silafaga. O le mea moni, e iai taimi e silasila mai ai le Atua I taulaga a tagata ma manatu e faaoleole. E na te silafia le tele o lana foai iai latou, peitai a aumai foai I le Atua, ua peiseai o le Atua o se tagata aisi. Leitioa teena e le Atua le tele o taulaga a tagata. O le faamatalaga a Tavita I le 2 Samuelu 24:24 ‘ou te lē fai taulaga i le ALI‘I lo‘u Atua i taulaga maua fua’  o ni upu e tatau ona tatou mataala I so’o se taimi e tatou te foai atu ai I le Atua. Fai mai le Salamo 126:5-6

5O ē lūlū saito ma loimata, latou te seleseleina ma le ‘alaga fiafia. 6O lē ‘ua alu atu ma tagi fano, o lo‘o ‘ave le saito e lūlū, e fo‘i mai lava ia ma le ‘alaga fiafia, o lo‘o ‘aumai ana fusi saito. 

Afai e avatu lau foai poo le fatu e toto I le Atua, toe saili lelei, e mafai ona faamatalaina o se ‘fatu e matua taua?’ O I latou e o atu ma foai e faamatalaina o ‘fatu e matua taua tele’ e mautinoa a toe foi mai, e oso ai le fia vivii I le Atua. Fai mai le Faataoto 11:25, e fa‘atamao‘āigaina le tagata matamau; ae lē  o le tagata lima u’u e na te tāofia saito. O le fua e ete luluina e fua foi iai lou selesele mai. Fai mai le 2 Korinito 9:6 ‘A o la‘u lenei e fai atu, o lē ‘ua itiiti ana saito e lūlū, e itiiti fo‘i ana e selesele mai; a o lē ‘ua tele ana e lūlū, e tele fo‘i ana e selesele mai’.

Aua e te foai I le Atua ni mea e te lei totogiina le tau. E te  filifilia le loloto ma le lautele o lau seleselega e fua I le lautele ma le loloto o lau lulu. Manatua, afai e te avatu se foai I le Atua e te lei totogiina le tau, e le taua tele I lana silafaga, I le suafa pele o Iesu Keriso, Amene. 

OPEN HEAVENS
MATALA LE LAGI MO LE ASO LULU 28 TESEMA 2022

Manatu Autu: Alofa faale Atua 4(Divine love 4)

 Tauloto – Tusi Paia: 2 Samuelu 12:24 ‘Ona fa‘amatalaloto lea o Tavita ‘iā Patesepa lana avā ma na alu atu ‘iā te ia, ‘ua la momoe ma ia; ‘ona fānau mai lea o lana tama tane, ‘ua ia fa‘aigoa ‘iā te ia, o Solomona. ‘Ua alofa le ALI‘I ‘iā te ia..’

Faitauga - Tusi Paia: 2 Nofoaiga Tupu 1:6-15

Upu Folafola
O le alofa faale Atua, o lona uiga e faia e le Atua vavega e le masani ona tupu. Na ofoina atu e Solomona taulaga mu e afe I le aso e tasi, na matua pai I le Atua ma o lea na ia fesili atu ia Solomona poo le a le mea e manao iai ma o lana tali e faapea: ‘Aumai ia te a’u le poto’. Na tali mai le Atua I lenei manaoga e faapea, “ou te avatu ia te oe le poto ma ou te avatu foi ma isi mea e te lei ole mai ai”. Na tele so’u taimi na alu I le suesueina o lenei tagata o Solomona ona o lona poto ma le tamaoaiga tele. 

Na ou fesili ia te au, ‘o lenei tama talavou, na ia iloa e le o ia o se tagata poto, aua e leiloa poo le mafuaaga lea na ia ole atu ai mo le poto, ae aisea na ia manatu ai e ofoina atu ni taulaga mu e afe?’ Ona ou maua lea o se faaaliga mai le Alii, o Ia na faatulagaina mai I le lagi. O le Atua na ia faaosofia Solomona e faia se mea e lei faia muamua e se tagata na muamua atu ia te ia, ma o lea na faia ai e le Atua se mea ia Solomona e lei faia muamua I se tagata. 

I le 2 Samuelu 12:24-25, fai mai le Tusi Paia ina ua fanau mai Solomona, na faaigoa e le Atua lava o ia o Ietitaia, o lona uiga, o lē alofaina e le Alii. Afai e alofa le Atua ia te oe, e na  te faia mo oe mai lea taimi I lea taimi ni vavega e lei tutupu muamua. E na te faaosofia oe e te faia se mea e foliga mai e valea I manatu o tagata, ina ia mafai ona ia foai atu ia te oe se mea e le maua e isi tagata. 

O se tasi aso, ao soifua pea lou tama faaleagaga, na ia fai mai I tagata uma o le aulotu e faigaluega, o lo’o iai se mea o lo’o fia maua vave lava e le Ekalesia ma e manaomia I le amataga o lena vaiaso, ona ia fai mai lea matou te o e tapuni uma matou teugatupe I faletupe ae aumai tupe I le Ekalesia. I le aso Sa na sosoo ai, na faailoa mai e lo’u tama faalegaga I le Ekalesia ua maea ona maua mea uma na manaomia e le ekalesia, ona fesili mai lea, ‘faatali lava mo se minute, e toafia o outou na tapunia tou teugatupe I faletupe?’ Na o ma’ua ma lou toalua na sii I luga o ma lima. Ina ua ou iloa ua na o maua na tapunia ma teugatupe I faletupe, ua amata ona ou manatu ‘Talosia ou te lei faaopoopo le valea I lo’u kerisiano?’ O le taimi lava lena na ou faalogo I le siufofoga o lou Alii o faapea mai, ‘Lou atalii, e te le valea, ua ou taitaia oe e te faia se mea e lei faia muamua e seisi tagata, aua a oo I le taimi ou te avea ou I le mea ou te ave oe iai, e leai ma seisi e mafai ona faasea’. 

O faaosofia ea oe e le Atua e faia se mea e peiseai e valea? Tago e fai ina ia aua nei e misia le avanoa e maua ai se vavega e lei tupu muamua. 

Tatalo

Tama e, afai e te saunia au ina ia maua sa’u vavega e lei tupu muamua, faamolemole lo’u Alii, aua nei o’u le ausia lou finagalo mo a’u, I le suafa pele o Iesu Keriso, Amene.  

OPEN HEAVENS
MATALA LE LAGI MO LE ASO LUA 27 TESEMA 2022

Manatu Autu: Alofa faale Atua 3 (Divine love 3)

 Tauloto – Tusi Paia: Isaia 63:9 ‘O latou puapuagā uma na lē fai ai o ia mo latou fili; na fa‘aolaina i latou e le agelu mai ona luma. Na ia fa‘atauina i latou i lona alofa ma lona agalelei; na ia si‘itia i latou ma ‘ave ‘iā i latou i aso uma anamua..’

Faitauga - Tusi Paia: Isaia 63:7-9

Upu Folafola
O le taimi muamua lava na ou faitauina ai le tatou upu tauloto mai le Tusi Paia o le aso; (Isaia 63:9) e le’i talitonu o’u mata. Sa matuā faate’ia a’u i le fuaiupu amata.O latou puapuagā uma na lē fai ai o ia mo latou fili;

O le taimi e a’afia ai tagata e alofaina e le Atua, o le taimi fo’i  lena e a’afia ai le Atua. Leitioa foi a ta’ua i le tusi o Mataio 25:37-40; ua faapea mai ai Iesu o ia sa iai i le falepuipui, o ia o le tagata sa fia ‘ai ma isi foi o tulaga, a o tagata sa ia fetalai iai, sa latou manatu o lo o fetalai Iesu i nisi tagata puapuagatia. So’o se taimi e tiga ai tagata e alofagia e le Atua, o lo o tiga fo’i o ia. O loo faapea mai le Kalatia 6:10 O lenei, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua.

E sa’o le tulaga - afai o tatou o tagata e pele ia te ia, o taimi tatou te tigaina ai, o lona uiga o lo o tigaina foi o ia.  Afai e te vaai atu ua tigaina se tasi e pele ia te oe, e te mo’omo’o ia lafoa’iina mai ia te oe lena tiga. Ma o so’o se taimi e puapuagatia se tagata e te alofa iai, e te puapuagatia foi ma oe. O le fa’ aamatalaina lea o le mau i le 1 Peteru 2:24 i iai tatou: “O lē na ‘aveina e ia lava a tatou agasala i lona lava tino i luga i le la‘au, ‘ina ‘iā tēte‘a i ‘outou ma agasala, tatou te nofo ai i le amiotonu. O ona fa‘alavalava ‘ua mālōlō ai i ‘outou”.

O le tulaga o lo’o faamatala mai  i lea fuaitau, Ia fa’apa’u atu I ona luga lou ma’i. Ua ia fetalai mai, e sili pe a oti o ia nai lo le vaai i lou oti. Ua ou mautinoa ai o tiga ma gasegase o le tino, e le mafai ona tumau I lo’u tino. Aua e mafai ona e fai atu ma le mautinoa i so’o se tiga i lou tino ‘E le mafai e Iesu ma a’u nei ona puapuagatia ona o le mea e tasi. Ua uma ona ia tau’aveina o’u tiga, o lona uiga e le mafai ona ou toe tigaina.’ Afai e taulamalama atu le oti ia te oe ona e faapea lea iai: ‘Na maliu Iesu ina ia ou ola. Ma o le alofa o Iesu mo a’u ou te mautinoa ai e le mafai ona ou o’o i se tulaga faamativaina’. Fai mai le 2 Korinito 8:9 Auā ‘ua ‘outou iloa le alofa tunoa o lo tatou Ali‘i o Iesu Keriso, sa tamao‘āiga ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ‘outou i lona mativa.

Ia tuuina atu lou ola ia Iesu Keriso ma lafoaiina a outou agasala pe afai ua e fia mauaina lona alofa faapitoa, le alofa faale Atua. 

Silasila i luitau o loo feagai ma oe i lenei vaitau ona e fai lea iai: ‘E le mafai ona e fa’apuapuagatia Iesu toe faapuapuagatia ma a’u. Ua uma ona totogi e Iesu le tau mo a’u, alu ese loa ma lo’u olaga, i le suafa matautia o Iesu Keriso, Amene.’  

OPEN HEAVENS
MATALA LE LAGI MO LE ASO GAFUA 26 TESEMA 2022

Manatu Autu: Alofa faale Atua 2(Divine love 2)

 
Tauloto – Tusi Paia: Roma 8:28 ‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.’

Faitauga - Tusi Paia: Ioane 11:1-45

Upu Folafola
O le alofa faale Atua e lelei, ao lenei, o a faamanuiaga o e alofaina e le Atua? Sei o tatou vaavaai I le tala ia Lasalo. Na ma’i Lasalo ona auina atu lea o le feau a ona tuafafine ia Iesu e faapenei: ‘Le Alii e, faauta ua ma’I le ua alofaina e oe’. Na matua alofa Iesu ia Lasalo, ma sa iloa uma e tagata, peitai o lana tali lenei:

“Ua fa‘afofoga e Iesu, ‘ona fa‘apea lea o ia, “O lenei ma‘i e lē i‘u ‘ina oti, a ‘ona o le vi‘iga o le Atua, ‘ina ‘ia vi‘ia ai o le Atali‘i o le Atua.” Ioane 11-4

Afai e alofaina oe e le Atua, so’o se luitai e feagai ma oe, e liliu e le Atua I se tautinoga. O le aso e te iloa ai o oe e pele ma alofaina e le Atua, e amata loa ona e vivii atu aua o so’o se taimi e oo mai ai se luitau, e sauni e le Atua se tautinoga mai lena luitau. O le mea moni, o le telē ma le matautia o luitau ma faafitauli, o le maualuga foi lea o mea e faia e le Atua e faaosofia ai lou vivii. 

Mo I latou e alolofa I le Atua, e saunia e le Atua tautinoga mo I latou mai lea taimi I lea taimi ma e le mafai ona e maua ni tautinoga fou seiloga e te ui ina faafitauli fou. O le tautinoga, o le i’uga faaalia lea o se faafitauli na oo mai lona tali ona o se vavega. O le mafuaaga lea, so’o se taimi ou te faafesagai ai ma se luitau poo faafitauli, ou te vivii. Ou te vivii aua o so’o se luitau fou, o lona uiga o se tautinoga fou o le a oo mai. O le mea moni, mo I tatou ua tatou mautinoa e aunoa ma se masalosalo e alofa le Atua iai tatou, e vaavaai atu ma le filiga I luitau fou, aua fo’i tatou te iloa, so’o se luitau tatou te ui ai, o lo’o faatali ma momoli mai ai se vavega. 

E te talitonu e alofa le Atua ia te oe? Afai o lea, aisea e te popole tele ai I faafitauli ma luitau o lo’o feagai ma oe? Aisea e maimau ai le taimi e te tau le moe ai ona o ni luitau o lo’o ia finagalo e maua ai le viiga o lona suafa? Le au pele e, aua e te soona popole. Ia malolo lelei, o lo’o fuafua e le Atua le tala o lou olaga e faaalia ai I le lalolagi atoa lona silisiliese ma le matautia. Pau o lea, ia e faamautinoaina e te le faia se mea e suia ai lona manatu ma le alofa ia te oe. Ae taatia mea uma ia te ia. E na te faia mea e ofo ai ou fili ma e ita mai ia te oe. O luitau ma faafitauli fou, o lona uiga o ni tautinoga fou mo e e alofaina e le Atua.  

OPEN HEAVENS
MATALA LE LAGI MO LE ASO SA 25 TESEMA 2022

Manatu Autu: Alofa faale Atua(Divine love)

Tauloto – Tusi Paia: 1 Ioane 4:10 ‘O le alofa lava lenei, e lē ‘ona ‘ua tatou alofa i le Atua, a ‘ua alofa mai o ia ‘iā te i tatou, ma na ‘auina mai fo‘i lona Alo o le togiola mo a tatou agasala.....’

Faitauga - Tusi Paia: Ioane 15:13-14

Upu Folafola
Alofa faale Atua o le alofa lea o le Atua. O se alofa e atoatoa. Fai mai le Ioane 3:16 ‘ua faapea lava ona alofa tele mai le Atua i le lalolagi ua ia auina mai ai lona alo pele e toatasi’. O se alofa e lē taofia se mea. O loo faapea mai le 

Roma 8:32 “O ia lava sa na lē fa‘asaoina lona lava Alo, a ‘ua tu‘uina mai o ia ‘ona o i tatou uma lava, e lē foa‘i fua mai ‘ea e ia ‘iā te i tatou mea uma lava fa‘atasi ma ia i se a?” 

O le aso na fa’asatauroina ai Iesu na lē lavalavā le Fa’aola. Na ia foai atoa mai lona soifua. O le Alofa faaleAtua e mamana aua e lē suia. Fai mai 1 Ioane 4:8 ‘o le Atua o le alofa ia’. O le alofa lea o le Atua e lē liliu auā o le Atua lava ia e lē liliu. (Eperu13:8, Malaki 3:6) O lona uiga afai e alofaina oe e le Atua, e alofa lava e o’o I le iuga. Fai mai le faaiuga o le Ioane 13:1 “ua na alofa i ona tagata o i le lalolagi, ‘ua ia alofa ‘iā i latou ‘ua o‘o i le gata‘aga”.

Afai e le’i faanoanoa lava lou loto ona o sau uo, sauni atonu e tupu i se taimi. E o’o ifo I le taimi ua e matua pei o a’u masalo ua toatele nisi o au uo ua faatigā i lou finagalo. Peitai o le Atua e lē mafai ona ia fa’atigā ia te oe. O ia lava na fetalai “ou te lē tuuina oe, ou te lē lafoa’i iā te oe” Talitonu mai ia te a’u e faamaoni le fetalaiga a le Atua e faapea lava ona ia fai.

E lua ituaiga alofa o le Atua e alofa ai i le tagata. O lona alofa lautele e laugatasia mo tagata uma. O le alofa lea o loo tāua I le Ioane 3:16. O le alofa lea o le Atua na afio mai ai e maliu mo tagata uma. O le alofa lea ua tatou maua ai le timu, o le la, o loo fai mai ai Mataio 5:45.

Peitai ua tāua I le 1 Ioane 4:19 faapea “ua tatou alolofa auā na ia mua’i alofa mai iā te i tatou.” O tagata uma e alolofa atu i le Atua e tusa ma lona alofa mai, latou te olioli i le tele o lona alofa sili atu, o i latou fo’i ia na fetalai ai le Atua “Ou te alofa atu ia i latou o e alofa mai iā te a’u, o e sailiili mai fo’i ia te a’u latou te maua a’u.”(Faataoto 8:17)

Ina ia maua lenei alofa tele mai le Atua e a’o ona e alofa ia te ia. Ua fetalai fo’i le Atua i le Ioane 14:15 “Afai e te alofa iā te a’u tausi a’u poloaiga.” Afai e te mana’o e fai mo oe le alofa lē mavae o le Atua ia e ola fa’apaiaina. Ia e ola faapaiaina ona fai lea o oe ma atalii ma afafine e pele I le finagalo o le Atua. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO TOONAI 24 TESEMA 2022

Manatu Autu: Faamaoni I lou valaauina (Be Faithful to your calling)

Tauloto – Tusi Paia: 2 Timoteo 1:9 ‘o lē na fa‘aola mai ‘iā i tatou, ma vala‘au mai i le vala‘au pa‘ia, e lē tusa ma a tatou galuega, ‘ae tusa ma lona lava finagalo ma lona alofa tunoa na foa‘iina mai ‘iā i tatou ‘iā Keriso Iesu talu mai le vavau....’

Faitauga - Tusi Paia: 2 Nofoaiga Tupu 20:22-27

Upu Folafola
O le Atua Silisiliese, lo tatou Tamā o I le lagi na ia faia i tatou ta’ito’atasi mo se faamoemoe. E lē afaina po’o a ni mea na tutupu I lou fanau mai, o le Atua na ia aumaia oe i le lalolagi lenei ma valaau oe e faataunuu lona finagalo. E lē o tagata uma e avea ma faifeau, peitai o tagata uma ua tofu ma le faamoemoe na valaauina ai. Fai mai le Tusi o Efeso 2:10 ‘Auā o lana lava galuega i tatou, na faia i tatou ‘iā Keriso Iesu, ‘ina ‘ia faia galuega lelei, na saunia anamua e le Atua, ‘ina ‘ia tatou sāvavali ai’.

Afai ua e iloa ia galuega lelei na faia oe e le Atua e fai, punoua’i e fai. O le finagalo o le Atua mo lana fanau ia tatou taufai iloa lo tatou valaauina ma fai loa. O lē ua valaauina mo upufai o mālō e lē tatau na fia avea ma faifeau ma lē na tofia e le Atua i aoaoga ma le poto salalau e lē tatau na osovale e fai faatoaga. Ua tofusia I tatou ma le tōfiga e faataunuu I le lalolagi ma e taui oe e le Atua faatatau I le lelei ma le atoatoa o lou faataunuuina o lona finagalo I lou soifua e lē fuā I le tele o ni au galuega ua fai.

Agai e te lei maua galuega lelei na faia oe e le Atua e fai, e manaomia lou tatalo I le Atua e faasino mai. E manaomia lou manino lelei ae aua le taumate. Faata’ita’iga e mafai na ia te oe le taleni pese peitai e lē o lou valaauina le fai ma faipese. O le taleni e mafai ona nā o se fesoasoani e fa’aatoa le faataunuuina o lou valaauina. O Iosefa o se alii fai miti ma faamatala miti, pe ana ia taumate ma lē iloa lelei le finagalo o le Atua i lona olaga e i’u ina faapea o lona faamoemoe lea o le faamatala o uiga o miti a tagata. Na talanoa Iosefa I le faamoemoe na faia ai ia e le Atua i le Kenese 45:7 Na ‘auina mai fo‘i a‘u e le Atua e muamua ‘iā te ‘outou e fa‘asaoina ‘outou i le lalolagi, e fa‘aola fo‘i ‘iā te ‘outou i le fa‘aolataga tele. 

O le faamatalaina o uiga o miti ma taleni na iā Iosefa sa na o ni auupega fesoasoani I le faataunuuina o le finagalo o le Atua mo ia. Faafetai I le Atua na manino le vaai ma le faalogo a Iosefa I le finagalo o le Atua mo ia semanū e misi pe ana ia taumafai e taui ma sui i ona uso. Afai e avatu e le Atua ia te oe se taleni o le tomai I le faaaogaina o le seleulu, aua le faia sau faaiuga o lou valaauina mai le Atua le suisui. E fa’aaogā fo’i e tagata oti ulu seleulu. Tatalo ia e maua le faasinoga tonu mai le Atua i lona faamoemoe na auina mai ai oe i le lalolagi ma galue faamaoni loa e fai. Saili I le Atua mo lou fa’asinomaga I lana galuega ma lona finagalo I le lalolagi. Galue faamaoni ia atoatoa ma lelei e tau i le iuga. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 23 TESEMA 2022

Manatu Autu: Aua e te taitaia isi e pauū 2(Don’t cause others to stumble 2)

Tauloto – Tusi Paia: Ioane 17:19 ‘Ou te fa‘apa‘ia fo‘i a‘u e sui a‘i i latou, ‘ina ‘ia fa‘apa‘iaina o i latou i le ‘upu moni...’

Faitauga - Tusi Paia: 1 Peteru 5:1-4

Upu Folafola
O I latou e auauna I le fale o le Atua, e iai la latou matafaioi taua I tagata o lo’o latou vaavaaia I le Ekalesia. O I latou o sui o le Atua I le lafu mamoe, ma e tatau ona latou alolofa ma soifua I olaga lelei, aveesea so’o se pa puipui I o latou ala. E taua I le Atua agaga uma I le faapotopotoga o le Ekalesia. Fai mai le Tusi Paia I le Galuega 20:28 ‘O lenei, ‘inā tausi ia ‘outou ‘iā te ‘outou, ‘atoa ma le lafu mamoe uma lava ‘ua tofia ai ‘outou e le Agaga Pa‘ia e fai ma leoleo, ia leoleo atu i le ekalesia a le Atua, ‘ua fa‘atauina e ia mōna i lona lava toto’.

E lei faapea na toe faatau mai e le Atua le Ekalesia I ni toto o oti poo le ola o ni agelu. O le tau na totogiina I le Alo e toatasi o le Atua ina ia laveaina le lalolagi atoa. Afai tatou te malamalama lelei I lea tulaga I o tatou tulaga o faifeau o le talalelei, e tatou te faatauaina le ola ma soifua I se olaga e le faatauemu I le talalelei ia Iesu Keriso. Le au pele o le talalelei, ia e faaeteete I le avea o oe e fai ma maa e tausuai ma faatiga I tagata o le Atua. Fai mai le Luka 17:1-2‘Ua fetalai atu Iesu i le ‘au so‘o, “E lē mafai lava ‘ona lē o‘o mai o mea e tausuai ai; ‘oi talofa fo‘i i lē e o‘o mai ai. 2E lelei i lea tagata pe a noatia lona ua i se ma‘aolo tele ma lafo ai o ia i le sami, ‘ae leaga lava ‘ona fa‘atausuaiina e ia so latou nei e fa‘atauva‘a.

O upu nei na fetalai mai ai Iesu. Afai o oe o se faifeau a le Atua, sailiili lelei I lou olaga pe ete le o taitaia le lafu mamoe e o ese mai le Atua. Afai e te le faatauaina le aoaoina o le Upu a le Atua, o le a faigofie I tagata o loo mulimuli ia te oe ona faatalale I le upu a le Atua. Afai e le taitai ona e lauga I le faafanoga e faavavau o loo faatali mai mo le agaga e faaauau pea I le agasala, ona e te le manao e lauga I se mataupu e le fiafia iai le lafu mamoe, ua e faia se auala e le popole ai tagata poo fea e iu iai pe a mavae le ola nei. O lona uiga o lo latou toto o loo I luga o lou ao. Fai mai le Iakopo 3:1 O‘u uso e, ‘aua le to‘atele ‘outou e fai ma a‘oa‘o, ‘ina ‘ua tatou iloa e atili ai ‘ona fa‘asalaina o i tatou.

E sili atu le faamasinoga o faifeau o le talalelei a le Atua. O a faataitaiga o loo e faia e mulimuli ai le lafu mamoe? Ou te tatalo ina ia toe afio mai le Atua, e le faamaina oe. 

Tatalo
Lo matou Tama e, o I le lagi, fesoasoani mai ia te a’u ina ia aua nei ou toilalo I la’u galuega I ou tagata, I le suafa o Iesu Keriso, Amene.