Samoan Devotional

OPEN HEAVENS
MATALA LE LAGI MO LE ASO TOFI 22 TESEMA 2022

Manatu Autu: Aua e te taitaia isi e pauū (Don’t cause others to stumble)

Tauloto – Tusi Paia: 2 Peteru 2:2 ‘E to‘atele fo‘i latou te mulimuli atu i tu‘inanau vale o o latou tino, ‘ona o i latou e ‘upuleagaina ai le ala o le ‘upu moni..’

Faitauga - Tusi Paia: Esekielu 36:20-23

Upu Folafola
A tatou mumusu e faaaoga le susulu o le malamalama o Iesu Keriso i o tatou olaga e ala i auala uma tatou te ola ai, ua tatou taofia nisi e o mai I le Atua soifua mamalu. Na tauemu i le talalelei a Iesu Keriso nisi ona o le toatele o tagata ua faapea ifo, o’I latou o tagata talitonu I le Alii. Roma 2:24 o loo faapea mai; “Auā ‘ua fa‘apei ‘ona tusia, “‘Ua ‘upuleagaina le suafa o le Atua talu ‘outou i nu‘u ‘ese.”

Aua nei avea lea ma au molimau, le faapea mai o le lagi, o oe o se tagata na taofia isi tagata mai le malamalama o le Silisiliese. O le finagalo o le Atua, ia faaolaina tagata uma ma ia o latou silafia le upu moni (1 Timoteo 2:4) O se faaiuga mataʻutia le avea o oe ma māfuaaga e lē filifiliaina ai se tasi e sau iā Keriso. O Hofeni ma Fineaso, o atali‘i o Eli le ositaulaga sili, ua faaaoga le tatau o la tulaga, ma ua o‘o ‘ina ‘ino‘ino le nu‘u e faitaulaga i le Alii. E le’I iu lelei nei alii. (1 Samuelu 2”12-17, 4:11 ) Ua faapea mai le Roma 14:13; O lenei, ‘aua ne‘i tatou toe fefa‘amasinoa‘i; ‘ae lelei ‘ina ‘ia manatu i lenei lava mea, ‘aua ne‘i tu‘u ane e se tasi se mea e tausuai ai, po o se mea e tautevateva ai lona uso.

E sili atu le leiloa o oe o se Kerisiano, nai lo le taʻua o oe o se Kersiano, ae o loʻo e ola pea  I le agasala. A’o e pelofia pea oe, o lo’o avea oe ma maa e tu'ia ai le ala mo tagata agasala, e tatau ona o mai i le Alii. A latou vaai pea i le olaga o loo e ola ai, e faapea mai, “Ia, e lē ese lona olaga ma loʻu olaga. Aiseā e tatau ai ona avea aʻu ma Kerisiano?” ‘Aua le taua oe o se kerisiano pe afai e te le o ola e pei o Keriso.

E toatele tagata ua faaaoga o latou olaga e faalavelave ai i le faaolataga o isi. E faamasinoina nei tagata i le faamasinoga a le Atua, pe a le suia lava o latou olaga. E leʻi foaʻi mai e le Atua lona atalii e toʻatasi o Iesu Keriso, ina ia taʻaalo sese ai nisi I agaga o nei tagata. Afai na ia totogiina le tau maualuga e ala i le tuuina mai o Iesu Keriso e togiolaina ai i tatou, ina ia faasaoina i tatou mai le faafanoga e faavavau, ona e mautinoa lea, e na te faia so’o se mea e aofia ai le faalumaina o nei tagata pepelo o loo faapea mai o kerisiano - ina ia siitia le aofai o tagata agasala e faaolaina.  

Aua e te tu i le ala o le Atua. Ia e ola i se olaga e fiafia i ai le Atua, ma maua pea oe i ona itu uma, a o ia tau ma temoni uma o loo taofia tagata i le falepuipui.

Aua e te tautaua o oe o se kerisiano pe afai e te le o ola ma soifua e pei o Keriso, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 21 TESEMA 2022

 Manatu Autu: Tapulaa a le Atua (God’s Standard)

 Tauloto – Tusi Paia: 2 Timoteo 2:19 ‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.”

Faitauga - Tusi Paia: Tito 2:11-13

Upu Folafola
O le iloa poo le silafia o le Atua e le tutusa ma le alu I le lotu. O le faamaufaailoga o lou silafia o le Atua o lou alofa lea ia te ia ma isi tagata. E faataua e nisi meaalofa o le Agaga Paia e sili atu I lo le alofa, peitai e naunau le Atua I le tagata e alofa ia te ia, e pei ona faaalia I le 1 Korinito 8:3 ‘ae ‘āfai e alofa atu se tasi i le Atua, ‘ua silafia lenā tagata e ia. 

E te faaalia lou alofa I le Atua e ala I lou usitai I ana poloaiga. Fai mai le Ioane 14:15 ‘Āfai tou te alofa mai ‘iā te a‘u, ‘ia ‘outou tausi mai i a‘u poloa‘iga’.

E faigofie lou fai mai o oe o le kerisiano, ae poo e ola ma soifua e pei o Iesu Keriso?

I le tele o Tausaga talu ai, e mafai ona e iloa se tagata ua fanaufouina moni I lona naunau I le Alii. I lenei vaitau I le lalolagi, e toatele tagata e fai mai o kerisiano ae le moni. E le o suia tapulaa a le Atua. Fai mai le 2 Timoteo 2:19 ‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.”

E na o I latou e ausia tapulaa a le Atua e ta’ua o kerisiano. O soo se tagata e le o o gatasi lona olaga ma ala a Iesu Keriso, e le o se kerisiano. O se tagata e alofa I le Atua e le faapea e faia le agasala faalilolilo. Tusa pe pau I le agasala, e taumafai e alu ese mai ai. Afai e te pau atu I le agasala, aua e te faapea mai, ‘ia o la e faia e tagata uma’, ona faaauau pea lea o lou tetee I poloaiga a le Atua, pe e te taumafai e te alu ese mai ai? 

A toe afio mai Iesu e ave I lana fanau, e valaau o ia I ana mamoe e feiloai ma ia (1 Tesalonia 4:16-17). Fai mai e silafia e ana mamoe lona siufofoga (Ioane 10:27). O lea, I lena aso, afai e te le ausia tapulaa a le Atua mo ana mamoe, e te le iloa lona valaau mai, o lona uiga e tuua oe I lalo nei. E te maua le tele o avanoa e lafoai ai le agasala ina ia ausia tapulaa o le usiusitai atoatoa ia te ia. Le au pele e, lafoai I na agasala ma tuuina atu lou ola ia faapaiaina ae lei tuai. 

Fesili ia te oe lava: ‘o o gatasi ea lo’u ola ma tapulaa a le Atua mo lana fanau? Afai o lau tali e leai, salamo loa I le aso ma amata loa ona ola faapaiaina, I le suafa pele o Iesu Keriso, Amene.  

 OPEN HEAVENS
MATALA LE LAGI MO LE ASO LUA 20 TESEMA 2022

Manatu Autu: O pepe pea lou kerisano? (Are you still a baby Christian?)

Tauloto – Tusi Paia: Kalatia 4:1 “Ou te fai atu fo‘i, o aso uma o itiiti ai le suli, e ui lava o ia e ana mea uma, e leai se mea e ‘ese ai o ia ma le pologa.”.

Faitauga - Tusi Paia: 2 Timoteo 2:1-4

Upu Folafola

Tatou te maitauina i le upu tauloto mai le Tusi Paia o le aso, o se suli e faatusaina o se pologa, pe  afai o loo avea pea lena suli ma se taimaititi. Mai lena lava faatusa, o le a featofa’I solo e le ti’apolo se atalii poo se afafine o le Atua pe afai e le matua lona olaga I le agaga. Ua lava ma totoe lena faitau e ta’u mai ai e matua’i manaomia ona avea le fanau a le Atua ma tagata ua matutua fa’aleagaga.

E iai kerisiano ua atoa le 10 tausaga talu ona fa’aolaina, peitai e lei iai se tagata ua mafai ona ia faamaloloina mai le tiga o le ulu.  E faapefea la ona alualu I luma I latou? Fai mai le 1 Peteru 2:2 “Faapei o tama meamea faatoa fanau mai, ia naunau outou i le suāsusu fa’aleagaga e lē suia, ina ia outou tutupu ai i le faaolataga.” 

O le tele o le upu o le Atua e te taliaina o le faaopoopoina lena o lou matua faaleagaga. I lou sa’iliili i le Tusi Pa’ia mai lea aso i lea aso, o le a taitaia oe e le Agaga Paia i le upu o le Atua, ia faia la’asaga uma e mo’omia ia tuputpu pea lou ola fa’aleagaga. Afai e tele lou taimi e te suesue ai i le Tusi Pa’ia, o le a e inoino i le agasala, o le a e anapogi ma tatalo i le tele o taimi, e te alofa foi I ou tua’oi e pei ona e alofa ia te oe lava, ma o le a fausia ma faaopoopo atu ia te oe, uiga ma amioga o se Kerisiano ua matua. 

‘Aua le fa’amaimauina taimi e tatau ona fa’amausali ai lau mafutaga ma le Atua, I fiafiaga o le lalolagi nei. Aua e te tausami i taimi e tatau ona e anapogi ai. Aua le moe i taimi e manaomia ai ona e tatalo. Aua le faamaimau lou taimi i ta’aloga ma fiafiaga i le taimi e te suesue ai i le Tusi Pa’ia. O se tamaitai e fia maua sona to’alua kerisiano, e matua ma’imau lona taimi, pe a fai na te le o fa’atauaina le fa’amausali muamua o lana mafutaga ma le Atua. O se tamā lelei e le faatagaina sona atalii faatuatua e nofo ma se tamaitai e le maua’a lona fa’atuatua i le Atua. I le ma le isi, a fai e fetaui le ti’apolo ma oe a o “pepe” lou Kerisiano, o se faafitauli tele lena. 

Sa fai le miti a se tamaitai e faapea sa o’o mai se tagata e leaga le ulu ma tu’itu’i malosi le faitoto’a. Sa tatala e le tamaitai le faitoto’a ma tuli ese le vale, ae e le alu ese, a ua na ona tautala mai ‘Tuu a’u. tu’u a’u, o lea ou te sau e va’ai lou to’alua’. Ona sau lea o lona to’alua, ua vaai i le vale ma fa’ataga mai i totonu o le fale. Ona te’i lea ua ma’i lona to’alua, ma ina ua te’a ni nai masina ua maliu ai o ia. Ana matua le tamaloa faale Agaga, se manu na te tulia ese le vale lea i le itu faaleagaga. Le ‘au pele, aua nei e tuu lafoa’ina lou ola faaleagaga; e mata’utia le leaga o a’afiaga o le le matua o le ola faaleagaga.

O lou to’aga e fausia ma fa’amalosia lou ola faaleagaga, o le vave foi lena ona tupu ma faamausali lou ola faaleagaga, ma maua le malosiaga e faato’ilalo ai satani, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 19 TESEMA 2022

Manatu Autu: Tele le Lulu tele le selesele (Bountiful sowing bountiful harvest)

 Tauloto – Tusi Paia: 2 Korinito 9:6 “A o la‘u lenei e fai atu, o lē ‘ua itiiti ana saito e lūlū, e itiiti fo‘i ana e selesele mai; a o lē ‘ua tele ana e lūlū, e tele fo‘i ana e selesele mai”.

Faitauga - Tusi Paia: Faataoto 11:24-25

Upu Folafola
O loo tusia I le Failauga 3:2 “O ona po e fānau mai ai ma ona po e oti ai, o ona po e totō ai ma ona po e lia‘i ai le mea ‘ua totōina”,

Afai e le mafai e se tagata ona lulu i le taimi e tatau ona lulu ai, e le mafai ona ia selesele I le taimi talafeagai. O lo’o faapea mai le Faataoto 20:4 “E le suatia le ‘ele‘ele e le paiē, ‘ona o le tausaga ma‘alili; e ‘aisi o ia i le tausaga e selesele ai saito, ‘ae lē maua”. 

Afai e te lē lulu pe afai e tatau ona lulu, e mautinoa e leai se fua e te seleseleina. Afai e te manao I se seleselega tele, e tatau foi ona e naunau e lulu tele. Fai mai le 2 Korinito 9:6 A o la‘u lenei e fai atu, o lē ‘ua itiiti ana saito e lūlū, e itiiti fo‘i ana e selesele mai; a o lē ‘ua tele ana e lūlū, e tele fo‘i ana e selesele mai.

I Tausaga ua leva I le amataga o le Ekalesia Redeemed Christian Church of God ao laitiiti lava, sa ou faaaogaina lou totogi atoa e fai ai totogi o le toatele o le aufaigaluega seia uma ma e leai se tupe e totoe. Na oo ina ou malolo ritaea ina ia mafai ona ou galue tumau I le Ekalesia  I le tulaga o le Taitai Aoao ma sa tele lo’u manatu e siitia lo’u totogi. I le ogatotonu o a’u fuafuaga uma, ua ou manatua ou te lei fesili I le Atua poo le a le mea e fai i lo’u totogi, ona ou fai lea I le Atua. Ua faaalia mai e le Atua ia te a’u, ia ou vaevaeina la’u tupe maua I ni vaega se tolu, ma e tolu vaega o galuega o le Ekalesia e tatau ona avatu iai. E leai ma se vaega o ia vaega o le Ekalesia o lo’o I lalo o la’u taitaiga. 

Ua matua mafatia lo’u loto ae na faamautu mai e le Atua ia te a’u, o ia o le faavae mautu o mea ou te maua. Ua sili atu ma le fasefulu tausaga talu ai e o’o mai le aso. E lei iai se aso na le mafai ai e le Atua ona foai mai ia te a’u ma e tumau lava lea tulaga. 

O seleselega tetele, e maualuga le tau o fatu e te luluina. Afai o lo’o fai atu le Atua ia te oe e te foai atu ni mea tetele, o lona uiga o lo’o ia fuafua e taui ia te oe ini seleselega tetele. E le leiloa lou avanoa I le suafa o Iesu Keriso. 

Tatalo

Tama, faamolemole ia e faaali mai ia te a’u le fatu e tatau ona toto faapea ma le nofoaga, ina ia ou maua se seleselega tele, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 18 TESEMA 2022

Manatu Autu: Mafuaaga e tatau ai ona e tautala I gagana eseese (Why you should speak in tongues)

 Tauloto – Tusi Paia: Roma 8:26 “E fa‘apea fo‘i le Agaga ‘ona fesoasoani mai i lo tatou vaivai; auā tatou te lē iloa mea tatou te ole atu ai ma le tusa, ‘ae peita‘i o le Agaga, e fautua o ia mo i tatou i lē ōi, e lē mafai ‘ona talatalaina”.

Faitauga - Tusi Paia: Roma 8:26-27

Upu Folafola
E i ai le meaalofa sili ma mamana na foai mai e le Atua i le Ekalesia o le feagaiga fou ae pagā lea e toatele e lē fa’atauā. O le meaalofa lea o le Agaga Paia aemaise le tautala I gagana eseese. Fai mai le Tusi Paia a e tautala I gagana eseese o le Agaga Paia lea o loo tatalo mo oe. Fai mai le Roma 8:26 “E fa‘apea fo‘i le Agaga ‘ona fesoasoani mai i lo tatou vaivai; auā tatou te lē iloa mea tatou te ole atu ai ma le tusa, ‘ae peita‘i o le Agaga, e fautua o ia mo i tatou i lē ōi e lē mafai ‘ona talatalaina”.

O le Agaga Paia lava ia o lo’o tatalo mo oe. Ia e mautinoa o le tatalo a le Agaga Paia e sa’o ma e talia uma e le Atua aua o ia o le Agaga o le Atua lava ia na te aumaia tali o au tatalo. O le meaalofa o le Agaga Paia o se meaalofa mamana.

Mafaufau faapea ua e manaomia se galuega I se kamupani tele ma na auina mai e lē ona le kamupani lona atalii e toatasi e fesoasoani iā te oe. Ua lua fetaui ma le atalii , avea ma au uo, ona faailoa atu lea o oe e le atalii I se tasi o lona aiga ma o ia lenā na fesoasoani ia te oe e tusi lau tusi talosaga. E lē gata i lea o tagata e iloiloa lau tusi talosaga mo le galuega o lē e ona le kamupani, o lona atalii ma le tagata o le aiga lea na fesoasoani I le tusiga o lau tusi. Ou te mautinoa o lenā ua e iloa e manuia lau talosaga, e te maua le galuega.

O le Atua e ona le kamupani tele lenā o ia fo’i na auina maia Iesu Keriso lona alo pele e toatasi e fai ma au uo ina ua e faaolaina. O le Agaga Paia o le sui o le aiga lea na faamasani atu e le atalii ia te oe e avea ma ou fesoasoani. O le tautala I gagana ese o le Agaga Paia lea e tusi lau talosaga I le Atua mo oe. O le ala lea e tatau ai ona e tautala I gagana eseese e lē aunoa.

Afai e te tautala I gagana eseese e lē itiiti ifo I le itula I aso uma o le a tele le suiga lelei o lou olaga. E tele mea o loo tutupu I le siosiomaga faa le agaga tatou te lē o iloa. Peitai o le Agaga Paia na te silafia mea uma ma ia ta’ita’iina oe i tatalo tonu e tau ai taua faa le agaga pe a e tatalo I gagana ese. O le Agaga Paia o loo nofo i totonu ia te oe e fesoasoani iā te oe e tatalo I gagana a le lagi e ta’ita’iina saogalemu oe i faigata ma manumalō i avanoa manuia o lou lumanai e te lē o iloa. O le tautala I gagana eseese o se auupega malosi ua foaiina fua mai mo I tatou. Faamasani e faaaoga le meaalofa o gagana eseese e lē itiiti ifo ma le itula e amata i le asō. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO TOONAI 17 TESEMA 2022

Manatu Autu: Pe a tula’i le Atua (When God rises).

Tauloto – Tusi Paia: Salamo 68:1‘‘Ia tula‘i mai le Atua, ‘ia fa‘ata‘ape‘apeina ē ‘ua ita ‘iā te ia; ‘ia sōsōla ‘ese fo‘i i ona luma o ē ‘ua ‘ino‘ino ‘iā te ia.’ 

Faitauga - Tusi Paia: Salamo 68:1-4

Upu Folafola
A tula’i le Atua i le taimi o faafitauli e faaumatia so’o se ituaiga puapuagā i soifuaga o lana fanau auā pau ia o fili o le Atua o le tiapolo o loo faalavelave I lana fanau. O nisi taimi a finagalo le Atua i se galuega e fai na te auina atu ana agelu latou te faia peitai e i ai fo’i taimi e tulai ai le Atua ma faataunuu lona lava finagalo. A tula’i le Atua e fai ma sui ia te oe, o ou faafitauli uma e lē toe iloa. Afai e mafai ona e faatula’i le Atua mo oe i taimi uma, e leai se fili e mafai ona faalavelave ia te oe. E mafai ona e faatula’i le Atua mo oe e ala i viiga. A e tatalo I le Atua, e mafai ona ia auina mai se agelu ma le tali o au tatalo peitai a e vivi’i atu I le Atua e afio mai lava ia e talia lau viiga. Fai mai le tusi o Ioane 4:23 ‘Ae o‘o mai ona aso, ‘ua o‘o nei fo‘i i ai o ē tapua‘i fa‘amaoni latou te tapua‘i i le Tamā i le agaga ma le fa‘amaoni; auā o lo‘o sā‘ili le Tamā i ē tapua‘i fa‘apenā ‘iā te ia.

I le Galuega 12:3-1,1 na faafofoga le Atua i tatalo a le au paia ma ia auina mai le agelu e fa’asa’oloto Peteru. Peitai I le Tusi o Galuega 16:23-29 ina ua pepese ma vivi’i Paulo ma Sila I le Atua i totonu o le falepuipui. Na afio atu le Atua i le falepuipui ma tatala noanoataga o i latou uma na saisaitia.

I le 2 Nofoaiga Tupu 20:22-23 ina ua ta’ita’ia e Iosefatu le nuu o Iuta I le taua fai mai le Tusi Paia

22‘Ua latou amata ‘ona pepese ma vivi‘i atu, ‘ona tu‘u atu lea e le ALI‘I o ‘au ‘ua tanu e tau ma le fānauga a Amoni ma Moapi ma le mauga o Seira, na ō mai e tau ma Iuta; ‘ua fasia i latou. 23Auā na tula‘i le fānauga a Amoni ma Moapi e tau ma ē nonofo i le mauga o Seira, e matuā fasioti ma fa‘aumatia ai i latou; ‘ua uma ‘ona latou fasia o ē nonofo i Seira, ‘ona fefasia‘i ai lea o i latou.

E finagalo le Atua e tula’i ma fa’asa’oloto atoatoa oe peitai e i ai le vaega e tatau ona e faia. Fai se taimi I le asō e lē itiiti ifo ma le itula e te tapuai ai i le Atua. Vivi’i atu I le Atua seia e lagona lona mamalu ua auai faatasi ma oe i lau viiga seia e iloa ua tula’i lou Atua mo oe ma faaumatia ou fili uma. Amata nei loa ona e vivi’i ma fai pesega I le Atua Silisiliese. 

Avatu le viiga I le Atua seia tulai mai o Ia e fai ma sui e faataapeape ou fili uma, I le suafa matautia o Iesu Keriso,  Amene.

OPEN HEAVENS
MATALA LE LAGI MO LE ASO FARAILE 16 TESEMA 2022

Manatu Autu: Sausau lau fanau (Cover your children).

Tauloto – Tusi Paia: Sakaria 13:7‘Ala mai ia, le pelu e, i lo‘u leoleo mamoe, ma le tagata ma te fa‘atasi ma a‘u,” ‘ua fetalai mai ai le ALI‘I o ‘au. ‘Inā tā ia o le leoleo mamoe, ‘ona fa‘ata‘ape‘apeina ai lea o le ‘au mamoe; ‘ona fa‘afo‘i atu lea o lo‘u lima i ē iti..’ 

Faitauga - Tusi Paia: Iopu 1:4-5

Upu Folafola
O le tele o taimi e manao ai le tiapolo e osofaia se aiga, e faia e ia e faaaogaina le tapulaa e faapea, afai e le maua le ogalaau o le laau tele, amata ona osofai mai lala, afai e le mafai ona e mauaina le tama, osofai le atalii. Afai ua le maua le tina, osofaia loa le afafine. Ona amata lea ona ia osofaia tamaiti. I le Mataio 15:21-28. o le fafine na sau ia Iesu Keriso ma faapea mai ‘‘ua leaga lava la‘u tama teine i le temoni ‘ua i ai.” I le Mataio 17:14-18, na sau se tamaloa ia Iesu Keriso ma faapea mai ‘ua leaga lava la‘u tama tama i le temoni ‘ua i ai.”1 Samuelu 2:22-36  o loo faapea mai le Tusi Paia o fanau a Eli na faaumatia galuega na ia faia. O le toatele o kerisiano, e pau le faafitauli o loo latou feagai, o latou fanau. E taofia lea tulaga I le aso, I le suafa o Iesu. 

I le tele o Tausaga talu ai, na valaauina au ou te lauga I se faapotopotoga o tagata e tauoloa, ma ua ou sauni ou te lauga I le mataupu e ulutalaina ‘Ua e manaomia se vavega’. Ua faatonuina au ou te nofo I se potu ao faatalia le au valaulia. Ao ou vaavaai atu, ua ou iloa atu nisi potu se fa o loo faasolo mai I lalo, e ese ma le matagofie. Ua ou manao e suia le ulutala o le lauga ona ua ou tilotilo atu, e le manaomia e le taitai se vavega. Ona faapea mai le Atua, e matua manaomia le vavega e le aiga lea e te le o iloa atu. Ua ou iloa mulimuli ane, e iai se la atalii e toatasi e fiafia I fualaau faasaina. Ina ua musu lona tina e avatu se tupe e faia ai le faatau, ua manatu lenei tama e faia se gaoioiga I lona tina, ma ao malaga atu I atunuu I fafo, ua ia nanaina ni fualaau faasaina I le ato a lona tina. Na maua lenei tina I Peretania, ua loka ae na mafai lava on maua le ala e toe tatala ai o ia I tua. Ina ua maea le lauga, ua afio mai le Atua Silisiliese I lenei aiga, ua tuuina atu le ola o le tama a le ulugalii ia Iesu Keriso, ma ua faaumatia le amoga. Ou te folafola atu, o le Atua Silisiliese o le a ia liliuina soo seisi o lau fanau o loo faatiga ia te oe, I le suafa o Iesu. 

Amata loa ona sausau lau fanau I le toto o Iesu amata mai lava a’o laiti. Fai mai le Tusi Paia o le toto o Iesu Keriso e iai le mana e manumalo ai I le tiapolo. Afai e vaai atu le tiapolo I le toto o Iesu I luga o lau fanau, e tamoe vave ese. Ia e faamautinoaia e sausau lau fanau I le toto o Iesu I aso uma. Aua e te faatali seiloga e te vaai atu ua amata ona faalogogata ma faatiga mai, sausau loa I latou I le taimi nei. E toilalo fuafuaga uma a le tiapolo I lau fanau I le suafa o Iesu. 

Tatalo

Tama e, ou te sausau lau fanau I le toto o Iesu Keriso I le aso. Faafetai mo le toto o Iesu, I le suafa pele o Iesu Keriso, Amene.  

OPEN HEAVENS
MATALA LE LAGI MO LE ASO TOFI 15 TESEMA 2022

Manatu Autu: Totoga Fou I le Lagi (Spare Parts in Heaven).

Tauloto – Tusi Paia: Ieremia 32:27‘Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?.’ 

Faitauga - Tusi Paia: 2 Tupu 5:9-14

Upu Folafola
Na ou faalogo, e I ai se tagata na asiasi atu i le lagi ma toe foi mai. Fai mai o le lagi, na faaali atu ia te ia se potu o loo i ai le tele o totoga ma itutino o tagata. Na ia fesili po o a nei totoga, ae poo fea foi e ave I ai, ae na tali ane, e faapea, o totoga nei mo tagata o loo manaomia ni vaega o o latou tino, ae maise lava pe’a faapea ua faaleaga nei vaega o o latou ma ua manaomia ni totoga fou. O se tala lelei tele lenei, ma o loo manaʻomia ni vaega fou o le tino; ia e ole atu i le Atua ona foaiina mai ai lea e ia ia te oe nei totoga fou uma.

Ua faapea mai le Tusi Paia na toe faafouina e le Alii le tino o Naamanu e pei o le tino o se pepe. I le Mareko 3:1–5, na faamaloloina ai e Iesu se tagata ua gase lona lima, ma tuuina atu I ai se lima fou. I le Ioane 9:1-7, na feiloai ai Iesu ma se tagata na fanau mai e aunoa ma ni mata ma na Ia tuuina atu ia te ia ni mata fou. Soo se taimi lava e te faitau ai i le Tusi Paia, ma o loo faapea mai, na faamālōlōina e Iesu se tagata lepela, o le mea na tupu, o tamatamaʻilima po o taliga ua faaleagaina o nei tagata, na suia i totoga fou.

E mafai e le Atua ona suia vaega o lou tino e manaomia ona suia, pe a e ole atu ia te Ia.

E i ai se aiga, o matua uma o Polofesa, a’o si o la alo, o se tagata e vaivai lona mafaufau. Afai ou te faamatalaina lenei tamaititi i la’u lava gagana, ou te fai atu, o le mafaufau (poo le fai’ai sei tulou) o lenei tamaititi, e na o le vai lava o loo I ai. E le'i pasi lava ni su'ega a lenei tamaitiiti. E ulivaa lava o ia i lana vasega. Ina ua siitia mai i se vasega e 33 tamaiti aʻoga i se vasega e 40 tamaiti, na siitia lona tulaga mai le 33 i le tulaga 40. Na faafaigaluegaina e matua ni faiaoga aupito sili ona lelei, e aoaoina I si o la alo, ae e lei maua ai lava se fesoasoani. I se tasi aso, sa fai se matou polokalame i le iunivesite na matou nonofo ai; na matou tatalo ai lea mo lenei tamaititi. O le isi su'ega na su’e ai lenei tamaititi, na tulaga muamua o ia i le vasega. Fai mai ona faiaoga, e le mafai ona latou faamaonia lea tulaga, e tusa lava pe tuuina atu i le tama ia tali o le suega, e na te kopiina seseina lava. O lea, na latou tuuina atu ai ia te ia se isi suega e ese mai le suega na sue ai muamua, o le mea na tupu, e sili atu le maualuga o tali a le tamaititi i le suega lea nai lo le suega muamua. Ua tuuina atu e le Atua ia te ia se mafaufau fou.

O lo'u tama o le Atua o tagata uma. O lo‘o ‘iā te ia totoga fou uma mo tino o tagata uma; tau lava ina ole atu ia te ia, ma na te avatua ia te oe soo se mea e te manaomia. E leai se mea e faigata ia te ia.

Ole ma tatalo atu I le Atua mo le itutino fou o loo e manaomia, poo se faiai, fatu poo le a lava. Afai e te le manaomia se totoga poo se itutino fou, ole atu I le Atua mo seisi tagata o loo manaomia, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 14 TESEMA 2022

Manatu Autu: O Faamanuiaga e Pipisi atu (The Contagious Blessings).

Tauloto – Tusi Paia: Kenese 39:5‘E āfua mai i ona aso na ia tofia o ia e pule i lona ‘āiga ma ana mea uma, na fa‘amanuia ai le ALI‘I i le ‘āiga o le Aikupito ‘ona o Iosefa, na manuia i le ALI‘I ana mea uma i le fale ‘atoa ma Ilo fanua. 6‘Ua ia tu‘u ana mea uma i le lima o Iosefa, ‘ua na lē iloa sana mea na o le mea e ‘ai sa ‘ai ai o ia.’ 

Faitauga - Tusi Paia: Kenese 39:1-5

Upu Folafola

Afai e faamanuia e le Atua se tagata, e o’o I tagata o loo iai ma tau ia te ia, e latou te lagonaina ma aofia ai I ia faamanuiaga. I le Luka 5:4-7, ina ua maua e Peteru se faiga faiva ua matua tele ua masae ai upega, sa ia manaomia ona uso faifaiva e fesoasoani ia te ia e faaaogaina a latou vaa e aumai ai le tele o I’a ua maua aua ua matua le mafai ona aumai I lona vaa. E mafai e le Atua ona faamanuia I lou aiga ia matua faulai ona o oe. E mafai e le malo ona faia ni suiga o faiga faavae e le gata e faamanuiaina ai oe ae faapena le pito nuu atoa o lo’o e nofo ai. O le tulaga lea e ta’ua o le faamanuiaga e pipisi atu. 

I le Galuega 27:22-44, sa afatia ma tafea Paulo i se vaa faatasi ma ni tagata e 276. Ua matua fememeai I latou aua ua foliga mai ua leai se faamoemoe, peitai ona o le iai o Paulo I le vaa, e leai ma se isi o I latou na fano I le oti. O le mea moni, fai mai le Tusi Paia, na tuuina atu e le Atua nei tagata ia Paulo, e na te vaavaaia e oo iai latou na taitai I le aumalaga (Galuega 27:24). E le gata I lea, na taofia e le taitai o le toeselau fitafita mai le fasiotia o pagota sa iai I le vaa aua na ia naunau e faasaoina le ola o Paulo. O lo’o tatou talanoa ia Paulo, o se tamaloa e matua pipisi atu ona faamanuiaga. 

Ou te iloa e masani ona e tatalo I le faaiuga o se faamalosiau I aso uma, peitai faaavanoa loa se minute I le taimi lenei ma tatalo faapenei: ‘Tama, faamolemole ia ou mafuta atu ini tagata o latou faamanuiaga, e pipisi mai ia te a’u, I le suafa o Iesu Keriso, Amene’ 

O le faitauga o le Tusi Paia mo le aso o loo tusia ai le tala ia Iosefa, o se auauna I le fale o Potifara. Fai mai le Tusi Paia, e ui o ia o se auauna poo se pologa, na matua faamanuiaina Potifara ona sa faigaluega ai Iosefa I lona fale. E manuia lou fale faigaluega ona o oe, I le suafa o Iesu. 

E faigofie ona e iloa se tagata e pipisi atu ona faamanuiaga I so’o se fale faifaigaluega, o le taimi e amata ai ona faigaluega ai lenei tagata, ua amata ona siitia tupe mama. E amata ona siitia tupe maua ma o le a tafe mai le tele o le tupe I le pisinisi. Afai o lea tagata e faipisinisi, e toatele tagata e fia fai paaga iai, aua foi o lo’o latou iloa o so’o se mea na te faia e I’u I le manuia. Ou te tatalo pea mo o’e mai le taele o lo’u loto, e matua faamanuiaina oe e pipisi atu. E avea lou atunuu e siitia oloa faatau atu I fafo, ona o oe ma oloa o lo’o e faatau atu, I le suafa o Iesu. O lou aiga atoa ma e tupuga mai ia te oe, e le toe o’o I se mativa ona o oe, I le suafa o Iesu Keriso. 

Tatalo 

Tama, ou te le manao e tau na o lou manuia, ae ou te naunau I o’u manuia e pipisi atu i tagata uma e tau mai ia te au, I le suafa mamana o Iesu Keriso, Amene.   

OPEN HEAVENS
MATALA LE LAGI MO LE ASO LUA 13 TESEMA 2022

Manatu Autu: Alofa Tunoa e le o se Laisene e Agasala ai (Grace is not a License to Sin).

Tauloto – Tusi Paia: Roma 6:1-2‘1O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? 2‘Aua ne‘i fa‘apea. O i tatou ‘ua oti i la le agasala, pe fa‘apefea ‘ona tatou ola pea i ai?.’ 

Faitauga - Tusi Paia: Roma 6:1-12

Upu Folafola

O le alofa tunoa o le malosiaga faaleagaga ua foaiina e le Atua ia i tatou ina ia tatou ola usiusita’i ai ia te ia. O lo’o faapea mai le Tusi Pa’ia i le Roma 6: 14 – Auā e lē pule le agasala ‘iā te ‘outou; auā ‘ua ‘outou lē nonofo i le tulafono, a o le alofa tunoa.

O le alofa tunoa e lē o se laisene e fa’ataga ai ona tatou faia le agasala. O le alofa tunoa o se fesoasoani tatou te faia ai le finagalo o le Atua. Ana faapea o le manumalo i le agasala e le mafai ona ausia, semanū e le maliu Iesu. Auā o lona uiga o lona maliu o se mea na faia fua, e leai se uiga. Fai mai le Mataio 1:21 “E fānau mai e ia le tama tane, ‘e te fa‘aigoa fo‘i ‘iā te ia o Iesu; auā e fa‘aola e ia lona nu‘u ai a latou agasala.”           

Afai e te auai ia Iesu Keriso, e avatu e le Atua ia te oe le alofa tunoa e mafai ai ona e ola ma soifua e manumalo I le agasala e le mafai ai ona pule ia te oe. Aua nei faatagaina a’oa’o pepelo e faaseseina oe e te talitonu ai o le alofa tunoa e avatu ai ia te oe le saolotoga e faia ai pea le agasala, o le totogi o le agasala o le oti. O le a toe afio mai le Atua I se Ekalesia e leai se ila poo se maanuminumi. Afai e te naunau e avea oe ma vaega o le Ekalesia lea, e tatau ona e alu ese ma le agasala. 

Fai mai le Efeso 5:27‘ina ‘ia na tu‘uina atu o ia, ‘iā te ia, o le ekalesia matagofie lava, e leai sona ila, po o se ma‘anuminumi, po o se tasi mea fa‘apenā, a ‘ia pa‘ia ma ‘ia lē ponā.

Afai ua e agasala, e naunau le Atua e avatu ia te oe lona alofa mutimutivale, ona o lona alofa tunoa, ‘ae afai e te fa’amelea lona alofa tunoa ma faia pea le agasala ma au masani, o lona uiga ua e tauanauina mai lou lava malaia. E manino le Tusi Pa’ia i le faapea mai - e lē faatagaina e le Atua le fa’aauauina pea o lau agasala, ae faaaoga le faulai o lona alofa tunoa e fai ma ‘alofaga. Fai mai le Roma 6:1-2 ‘1O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? 2‘Aua ne‘i fa‘apea. O i tatou ‘ua oti i la le agasala, pe fa‘apefea ‘ona tatou ola pea i ai?.’

O se kerisiano ua moni lona faaolaina, o le a ia sailia le alofa tunoa o le Atua e taofia maumaututu ai le agasala mai lona olaga, ae le o le ‘avea o se ‘alofaga e fai ai pea le agasala.

Tatalo

Tamā aumai lou alofa tunoa e matua faaumatia le agasala I lou olaga. O le alofa tunoa ou te matua’i le toe naunau ai i le agasala, le Alii e, faamolemole foai mai lou alofa tunoa, I le suafa pele o  Iesu Keriso, Amene.