Samoan Devotional

OPEN HEAVENS
MATALA LE LAGI MO LE ASO FARAILE 2 TESEMA 2022

Manatu Autu: O le Agasala o le le Loto Faafetai (The Sin of Ingratitude)

Tauloto – Tusi Paia: Roma 1:21 ‘Auā fo‘i na iloa e i latou le Atua a ‘ua lē vivi‘i ma fa‘afetai atu ‘iā te ia, ‘ia tusa i le Atua; ‘ae peita‘i ‘ua fa‘avaleleaina i latou i lo latou taumasalosaloga, ‘ua fa‘apouliuligia fo‘i o latou loto vālea;..’

Faitauga - Tusi Paia: Numera 11:1-20

Upu Folafola
O le loto lē faafetai o se agasala ma e maua ai le toatele o tagata e aofia ai fanau a le Atua. O le lē loto faafetai o le faapogai lea o le uluai agasala I le faatoaga I Etena. Ae lei faia e le Atua le tagata, na ia saunia le faatoaga ma mea uma o iai. Ua na o le ala ifo lava o le tagata ma maua le faulai o mea uma I so’o se vaega. Ona fetalai atu lea o le Atua ia te ia: O mea uma o loo e vaai atu iai e ave ma oe, ae tasi lava le laau e le mafai ona e pa’I iai, o le laau e iloa ai le lelei ma le leaga. Ona sau lea o lē na faaosoosoina le fafine ma faapea atu: ‘Aua nei e manatu I mea uma ua faia e le Atua ia te oe, ae ia taulai lau vaai I le mea e tasi e faasā, ‘aua e te faafetai fua I isi mea uma’. Na usitai iai le fafine, ua ai le laau ona ia avatu lea I lana tane ma ia ‘ai ai foi. O lea na tuliesea I laua mai le faatoaga I Etena ma na amata mai ai loa le galulue e toto laau mo meaai (Kenese3). O le latou loto lē faafetai na I’u ai ina leiloa mea uma na faia e le Atua mo I laua I Etena.

E matuia le le loto faafetai I le Atua ona o mea uma na ia faia mo oe, aua e onomea ia te ia le viiga ma le faafetai. O le loto lē faafetai le tulaga o loo e iai pe afai e taulai pea lau vaai na o mea e tatou te lē o maua ae faagalo ma faatalalē I faamanuiaga a le Atua iai tatou uma. 

E iai se tamaloa e mauoa lava ma o se tagata foi e tauoloa. Peitai ane ua oso sona ma’I, ua aveesea ai lona leo. Na avatu o ia I se falemai lelei lava I Lonetona ma e tupu lea tulaga ao ou asiasi atu I lea nuu. E iai se tasi o uo na fai mai ia te au ma te o e tatalo mo le tamaloa lea. Ina ua ma oo atu I le falemai, o lo’o nofo mai I le moega faatasi ma lona toalua o loo tu ai. Ona alu lea o le fafine I fafo mo sina taimi. Ina ua maea ona ou tatalo mo ia, sa taumafai e fai mai se tala e faaaogaina ai taga o ona lima. E tusa ma le 30 minute o matou taumafai e malamalama I le mea o loo fai mai ai, ae uma ane o loo faapea mai toeitiiti toe foi mai lana ava.

O lenei, sei e silasila ane ia te oe lava. E le tatau ona atoa se 30 minute e te taumafai ai se faaupuga faigofie. E mafai ona e tautala, pe alaga pe pese foi. Aisea e te le faafetai ai I le Atua mo meaalofa ma faamanuiaga ua ia foai mai ma le faatuatuaga e nate foai mai mea uma e lei maua. A tatou faitau I le faitauga o le Tusi Paia o le aso, o le loto lē faafetai e oo atu ai I le faafanoga, o se agasala. Ia e loto faafetai I mea ua e maua. 

Tatalo
Tama, ua ou salamo I lo’u loto le faafetai I le tele o Tausaga. Faamolemole tuuina mai lou alofa mutimutivale ia  te au, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TOFI 1 TESEMA 2022

Manatu Autu: Pe a oo mai I totonu le Malamalama (When Light Comes In)

 Tauloto – Tusi Paia: Isaia 60:1 ‘Tula‘i ia, ‘inā malamalama ia, auā ‘ua o‘o mai lou malamalama; ‘ua alu a‘e fo‘i le pupula o le ALI‘I i ou luga...’

 Faitauga - Tusi Paia: Ioane 8:12

 Upu Folafola
A o’o mai le malamalama I se nofoaga pogisa, e suia mea uma. E suia le fememeai ma le faanoanoa I le manino ma le olioli. Faimai le Ioane 8:12 o Iesu o le Malamalama o le lalolagi. A afio mai Iesu I lou olaga, e suia mea uma mo le lelei. A  afio mai o ia I totonu, e tulia I fafo le mativa ae suia I le mauoloa, e suia le faanoanoaga I le olioli, e suia foi le sauaina e temoni I le manumalo I le itu faaleagaga. 

 E iai se fafine na manao e pule I lona toalua. Na alu I se taulaitu ma ua fai iai le taulaitu, e tago I se ata o lona toalua ma tuu I totonu o le pusa ona tapuni lea. Ua ia faamautinoa I le fafine, a tapuni lelei le pusa e faia uma e lona toalua mea e manao e faia. Ae na ia lapatai I le fafine, o so’o se taimi e vaai atu ai ua pei e vaivai lona toalua, ona aveesea lea o le tapuni seia toe malosi ona toe tapunia foi lea. Na ave e le fafine le pusa I le fale ma na matua iloga ona tino mai e pei ona fai mai ai le taulaitu. E iai se taimi na ia aveesea ai le tapuni ina ia ‘aua nei oti lona toalua, ma ua faalogo lona toalua I le talalelei ia Iesu Keriso ina ua maua le avanoa, ua tuuina atu lona ola ia Iesu, ua oo atu le malamalama I lona olaga. Na toe tu’u e le fafine le tapuni o le pusa ma taumafai e pule I lona toalua peitai ua le mafai aua ua faapea mai le tamaloa, ‘e leai, o a’u o le ulu o le aiga lenei’. Na tamoe le fafine I le taulaitu ona ua le toe aoga le togafiti. Na galue le taulaitu e fai ana vai ona faapea mai lea I le fafine ‘e malosi atu se mana ua laveaiina lou toalua mai lo’u mana ma le pule’. 

 A o’o mai le malamalama I lou ola, e le mafai e le tiapolo ona toe pule ia te oe. 

 E toatele tagata o loo pagatia I nei aso ona latou te le o maua le malamalama I o latou olaga. E toatele e faapea mai o kerisiano, ae ona latou te le o maua Iesu I o latou loto ma agaga, ua saisaitia pea I latou e le tiapolo. Ia faataga le malamalama I lou olaga I le aso ina ia e maua le saolotoga. Na o’o mai le malamalama I lo’u olaga I le 1973, ma e oo mai I le aso, e sili atu le lelei o lou olaga talu mai lea aso. Ou te manatua lou maua I le ma’I o le malaria toeitiiti masina uma, ao le taimi lenei ua le toe iai lenei ma’i. Sa maualalo foi lo’u saisaitia I le mativa ma e ui sa ou totogiina sa’u avetaavale, e oo atu I le ogatotonu o le masina ua matua leai lava se tupe ua oo lava I lou toe aitalafu mai la’u avetaavale sei tau utu ai le taavale. Ae ina ua ou mai le malamalama, ua suia mea uma. 

 Ia ave  lou ola ia Iesu Keriso I le aso ona amata lea ona e fiafia I se olaga e faulai ai manuia. Ua na o Iesu e te manaomia e te maua ai se olaga lelei ma sili atu, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO LULU 30 NOVEMA 2022

Manatu Autu: Fofo o Mea e Fasiotia Faamoemoega 3 (Dealing with Destiny Killers 3)

 Tauloto – Tusi Paia: 1 Timoteo 6:10 ‘Auā o le mana‘o i tupe, o le pogai lea o mea leaga uma lava; ‘ua manana‘o tele i ai nisi, ‘ona sesē ai lava lea o i latou i le ‘upu o le fa‘atuatua, ‘ua tuia ai ‘ua ati i latou e i latou i puapuagā e tele..’

 Faitauga - Tusi Paia: 1 Timoteo 6:10-12

 Upu Folafola
O leisi tulaga matuia e fasiotia faamoemoega o tagata o le mana’o tele I le tupe. O le tulaga lenei e tatau ona e maitau mai ma le totoa, o le tele o le tupe e te maua e le o se mafuaaga ma se faamoemoega a le Atua. E le faapea o lou ausia o le tulaga e te maua ma pule I le tele o le tamaoaiga. Ae o ala e te faaaogaina ai le tamaoaiga ua tuu I ou lima e fua iai pe ua e ausia le faamoemoega o lou olaga. Na faapea mai Iosefa, o le faamoemoega autu o lona olaga o le faaolaoina ma ia maua e tagata le ola I le taimi o le oge tele. O le tofia o Iosefa e avea ma Palemia e pule I le tamaoaiga tele ma le oa o Aikupito, ua na o se ala na faaaogaina e le Atua e ausia ai le faamoemoega autu o lona olaga. O loo aumai manino lenei tulaga I le faamatalaga a Iosefa I le Kenese 50:20
A o ‘outou na fai togafiti e ‘outou ‘ia leaga ai a‘u; a o le Atua, na finagalo ia ‘ia i‘u i le lelei, ‘ina ‘ia o‘o ‘ina fa‘aolaina o le nu‘u e to‘atele, pei ‘ona taunu‘u ai i ona po nei. 

 Afai e ave lau faamuamua I le tupe, e te ono e leiloa ai le faamoemoega a le Atua mo lou olaga. 

 O Iuta le Sekara o le teutupe a Iesu. Ua matua ave lana faamuamua I le tupe ua ia leiloa ai isi mea taua e na te maua mai ia Iesu Keriso. Ao sauniuni Peteru e faatuina le Ekalesia ao Ioane sa faalatalata atu ia Iesu ina ia maua uma mealilo o le malo o le Atua, ae o Iuta, sa mulimuli I le tupe. Na ia maua le tupe ae ua leiloa ai le faamoemoega taua o lona olaga ma ua leiloa ai ma lona agaga. Afai e te mulimuli I le fuafuaga a le Atua mo lou olaga ae aveesea le faamuamua o le tupe, e te ausia le faamoemoega o lou olaga ma e faaopoopo atu foi e le Atua le tele o le tupe. 

 Ina ua avea a’u ma taitai aoao o le Ekalesia, na ou popole pe faapefea ona tausi lou aiga ina ua ou tuua la’u galuega, ona ou mafaufau lea e faia sa’u pisinisi ao faia pea le galuega, ae na faapea mai le Alii e aua. O le mea moni, na ou popole peitai ona o la’u vaai e le o taulai I le tupe ae ia faia lona finagalo, o lea na ou usitai ai. O le asō, I le alofa tunoa I le Atua, ua ia faamanuia ia te a’u I le tele o le tupe ou te maua e le mafaatusalia I ni tupe mai ni pisinisi pe ana ou faia. 

 O le tupe e lelei, ae o le manao tele I le tupe e taofia ai le ausia o le faamoemoega ma fuafuaga a le Atua mo lou olaga. Ia taulai lau vaai I le Atua ma lona faamoemoega mo lou olaga. 

 Tatalo
Tama, faamolemole ia e faamamā I lo’u loto mai le manao tele I le tupe, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 29 NOVEMA 2022

 Manatu Autu: Fofo o Mea e Fasiotia Faamoemoega 2(Dealing with Destiny Killers 2)

 Tauloto – Tusi Paia: Faataoto 16:18 ‘E muamua le fa‘amaualuga i le malaia; e muamua fo‘i le loto fa‘asiasia i le pa‘ū’.

 Faitauga - Tusi Paia: Esekielu 28:1-19

 Upu Folafola
O le fa’amaualuga o se tasi o mea ou te iloa e sili ona lamatia ma fasiotia faamoemoega o  tagata. A fai o iai sina iota o le loto faamaualuga i lou olaga, pe fai atu foi tagata ia te oe e te faamaualuga, e sili pe a e ‘ai’oi atu i le Atua ia tafi’esea lea uiga, a’o e taumafai e faia mea uma ina ia e maua le loto maualalo. O lo o faapea mai le Iakopo 4:6 e teena e le Atua tagata e fa’amaualuluga ae na te aveina lona alofa tunoa i e loto maulalo. E le mafai ona e ‘ausia le faamoemoega o lou olaga e aunoa ma le alofa tunoa o le Atua, ma afai e teena oe e le Atua ma le avatua lona alofa tunoa ia te oe, o lona uiga, o lou I’uga fo’i lena. 

 Ou te faafetaia le Atua aua na ia fesoasoani mai ia te a’u i le amataga o lenei galuega a le Atua. Ina ua avea a’u ma Taitai aoao o lenei Ekalesia sa fa’apea ona fa’ailoa lo’u igoa: Reverend (Dr) Enoch Adeboye PhD, MSc, BSc, sa ou manatu ia silafia e tagata uma o le ‘aulotu e le na o se faife’au o loo latou mauaina, a o se faifeau e iai sona faailoga maualuga o le PhD! A o le mea sa tatau ona ou fa’aopoopo iai, o se kalone gaogao, aua o kalone gaogao ia e sili atu le leotele! Sa fesiligia a’u e le Atua pe ou te mana’o e na te si’itia a’u, ma sa ou faailoa atu iai lo’u malie atoatoa i lea tulaga. Ona faapea mai le o le Atua ia te a’u, ‘Aveese uma ou faailoga a ia faaaoga le upu “faife’au.” Faafetai i le Atua i lo’u usita’ia o lea faasinoga aua ina ua ou faia, sa ia siitia a’u i lugā. 

 O le faamaualuga, e fasiotia le faamoemoega o lou olaga; ‘aua nei avea ma auala e punitia ai lou maua o le alofa tunoa o le Atua e te ‘ausia ai le faamoemoega a le Atua mo lou olaga. Ioe, na matuā faia e le Atua Lusifelo ina ia matagofie i le va’ai, ma o totonu o le li’o o agelu o Lusifelo o se agelu faapitoa. E pei ona faia e Iakopo o le Ofu talaloa lanu eseese a Iosefa, na faia e le Atua se ufiufi mo Lusifelo i ma’a taua uma e mafai ona e mafaufauina. Sa faia foi e le Atua ni mea fa’ili i totonu o Lusifero ina ia mafai ona ia taina ni musika e sili ona malie, e ala mai lona leo. O lona uiga sa matua tulaga ‘ese lava Lusifelo. Peitai o lo’o faapea mai le Esekielu 28:17:
‘Na fa‘amaualugaina lou loto i lou matagofie; ‘ua e fa‘amaumau lou poto ma lou matagofie; ‘ou te lafoina oe i lalo i le ‘ele‘ele; ‘ou te tu‘uina atu oe i luma o tupu ‘ina ‘ia latou va‘ava‘ai ‘iā te oe’     

 O le asō o le Lusifelo lena sa ta’ua o le malamalama ua ta’ua nei, o le pogisa. Afai ua e fa’amaualuga, o lona uiga o le a e fa’ama’amulu mea uma ua saunia e le Atua mo oe. Ma o le a ‘inosia lava oe nai lo le faa’eaina. Afai e te fia ausia le faamoemoega o lou olaga, ia e la’ei pea le ‘ofu o le loto maualalo. (Kolose 3:12).  

Ia iloilo lelei lou olaga po o iai se fa’amaualuga. Ia e faamaoni lava oe ia te oe ma e faaumatia lena faamaualuga, i le asō, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 28 NOVEMA 2022

 Manatu Autu: Fofo o Mea e Fasiotia Faamoemoega 1(Dealing with Destiny Killers 1)

 Tauloto – Tusi Paia: Faamasino 18:9 ‘Ua fai atu i latou, “Tula‘i ia, ‘inā tatou ō a‘e ‘iā te i latou, auā ‘ua matou va‘ava‘ai i le nu‘u, fa‘auta, e matuā lelei lava; tou te nofonofo ‘ea? ‘aua ne‘i mumusu e ō atu ‘ia o‘o e fai mo ‘outou le nu‘u.;

 Faitauga - Tusi Paia: Faataoto 6:6-11

 Upu Folafola
O le paie, o leisi mea e fasiotia faamoemoega e masani ona le amanaia e tagata. E tatau ona e silafia, o le savaliga ina ia ausia le faamoemoega mo lou olaga e vaevaeina I aso ma tausaga, ma afai e te misia se vaega ona o le paie, e I’u ina le mafai ona toe maua. O le mafuaaga lea e afaina tele ai le ausia o le faamoemoega o lou olaga. Afai ua o’o I le taimi e fai ai le suiga, ia faia loa ma ia vave. Aua le toe faatuai. O lo’o faamatala auiiliiili mai e le Faataoto 22:13 lea ituaiga tagata. A iai se mea e manaomia le faia, faia loa tusa pe faigata pe faigoifie foi ona faia. E le faigofie ona manumalo I laueeleele ma faalauteleina le pule I nofoaga, e na o e totoa ma malolosi e ausia faamoemoega. 

 I tausaga ua leva, na ou malaga atu ma lo’u toalua ma le fanau tama e toalua, e lua tausaga o le isi ae le fa masina le isi, mai Lagos I le nuu o Otukpo I le setete o Benue I Nigeria. E lua vaega taua o lea malaga, e amataina se aulotu a le Ekalesia ma usuia se fonotaga tele I lea nofoaga. Sa faia I le vaitau timu ma ao matou malaga atu, o se auala laupapa tele e ui atu ai I lea nofoaga, ua tafea I tafeaga ona o le tetele o timuga. Ina ua matou oo atu iai, ua leai se auala laupapa ona matou momoe lea I le taavale I lena po. O se nofoaga matautia ma matuia ma na fautuaina I matou ia aua lava nei o I fafo o le taavale. Ou te manatua sa iai se isi auala alo ua le toe faaaogaina, o lea na matou o atu loa iai, peitai ua tafea foi le auala laupapa. E faigofie lava ona matou toe fo’i I le fale, peitai na faaauau pea le malaga. E lei leva na matou ui I le auala alo lea, ae paū se vaega o le taavale. Sa tu le taavale, piki I luga, tuu I tua o le taavale ma faaauau pea le malaga. Ua o’o I le taimi e o ai I Otukpo ma e leai se toe fo’i I tua. So’o se taimi e matou te tau atu ai I se vai o lo’o tafe, e alu I fafo le tagata e fua le loloto ma saili le vaega e mafai ona ui ai le taavale I leisi itu. 

 E tolu aso na matou malaga ai I luga o le auala ae na matou taunuu saogalemu lava ma ua faataunuuina mea uma na fuafuaina mo lea malaga. I le asō I le setete lea o Benue, e sili atu ma le 500 aulotu o le Redeemed Christian Church of God ua iai nei. 

 Ia e malamalama I ou aso ma tausaga ma ia e maua ma faaaoga avanoa uma e o’o mai ia te oe. A manaomia loa se mea e faia, ia faia loa, pe faigofie pe faigata foi. I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 27 NOVEMA 2022

Manatu Autu: Malamalama I le Faamoemoega o lou olaga (Understanding Destiny)

Tauloto – Tusi Paia: Efeso 1:4 ‘fa‘apei ‘ona ia filifili mai ‘iā i tatou ‘ona o ia, a o le‘i fa‘avaeina le lalolagi, ‘ina ‘ia pa‘ia i tatou ma ia lē mata‘uleagaina i ona luma, i le alofa;

Faitauga - Tusi Paia: Ieremia 1:5

Upu Folafola
O le faamoemoega o le olaga, o lona uiga o fuafuaga a le Atua mo le olaga o se tagata. O le Ieremia 1:5, o loo fetalai mai le Atua: 5“Na a‘u iloa oe a o le‘i faia oe e a‘u i le manava; na a‘u fa‘apa‘iaina oe a o le‘i fānau mai oe, na a‘u tofia oe e fai ma perofeta i nu‘u.”

O le Atua, o se tufuga e atina’e (Salamo 127:1). E pei o so’o se tufuga, e galue o Ia e tusa ma se fuafuaga po’o se ata tusitusia. E le mafai ona amataina se galuega seia maea le ata tusitusia. O lea la, ae na te lei faia oe, ae lei fetaui lou tama ma lou tina, ua maea ona iai le fuafuaga tusitusia a le Atua mo lou olaga. O le talalelei lenei, o lea fuafuaga, o se fuafuaga lelei e tusa ma manatu lelei o le Atua (Ieremia 29:11). 

 E mafai ona e manatu, ‘afai e iai fuafuaga lelei a le Atua mo tagata uma, aisea la e I’u leaga ma lē manuia nisi?’ E tupu lea tulaga  aua tusa poo le a lelei ma le matagofie o fuafuaga a le Atua mo le olaga o se tagata, a fai  mai lava o ia e le manao ai, e le mafai ona faamalosia e le Atua I lea tagata. Fai mai le Roma 8:31 O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?

 O lea fesili e lei maua se tali I le Tusi Paia, peitai o le tali manino o ‘Oe’ ma ‘a’u. Tusa pe ‘au ma oe le Atua, e mafai ona e le ‘au ma oe lava ia. E faapefea ona e le ‘au ma oe lava ia? Fai mai le Faataoto 22:29 e na o e galulue punouai ma le filiga e mafai ona tutu I luma o tupu. Fai mai le Teuteronome 28:1-14, e na o I latou e usita’I e faamanuiaina e le Atua. 

 Afai e te silasila I le Tusi Paia I tagata na ausia faamoemoega a le Atua mo latou olaga, o le a e iloa vaega taua nei I a’i latou uma. O Iosefa o se tagata galue punoua’I, e matua galue ma le filiga ma e lei leva ona galue I le fale o Potifara ae tofia o ia  e pule I oloa ma mea uma a lona matai. Na ola faapaiaina foi o ia. Ina ua manao iai le ava a Potifara,e lei mafai ona ia taoto ma le fafine ma agasala ai I luma o le Atua. O le galue filiga ma le faapaiaina. Ia maitau mai lenei upu moni, afai e te ola faapaiaina e aunoa ma le paie, e mautinoa e te ausia faamoemoega ma fuafuaga ua maea faataatitia mo lou olaga. 

 O fuafuaga ma faamoemoega a le Atua mo lou olaga e mafai ona ausia pe afai e te usitai e galulue faatasi ma ia, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOONAI 26 NOVEMA 2022

 Manatu Autu: Mataala I le Matape’ape’a 2 (Beware of covetousness 2)

 Tauloto – Tusi Paia: 1 Korinito 5:11 ‘A o lenei, ‘ua ‘ou tusi atu ‘iā te ‘outou, ‘ai se tasi ‘ua ta‘uusoina ‘ae faita‘aga, pe matape‘ape‘a, pe ifo i tupua, pe agatele, pe ‘onā, pe fao mea; ‘aua lava ne‘i tou feoa‘i, ‘aua fo‘i tou te ‘a‘ai fa‘atasi ma lē o fa‘apea.”

 Faitauga - Tusi Paia: Kenese 13:8-15

 Upu Folafola
O le matape’pe’a e mata’utia le leaga o loo fai mai le Tusi Paia e tatau ona e fa’aeteete ai, a e vaaia fo’i se isi e maua ai ia e alu ese mamao mai lea uso.

1 Korinito 5:11 A o lenei, ‘ua ‘ou tusi atu ‘iā te ‘outou, ‘ai se tasi ‘ua ta‘uusoina ‘ae faita‘aga, pe matape‘ape‘a, pe ifo i tupua, pe agatele, pe ‘onā, pe fao mea; ‘aua lava ne‘i tou feoa‘i, ‘aua fo‘i tou te ‘a‘ai fa‘atasi ma lē o fa‘apea.

Sa mafuta Aperamo ma Lota le atalii o lona uso le tagata matape’ape’a e pei ona tatou vaai I le lesona o ananafi. E le’i iloa e Aperamo o Lota sa fai ma faalavelave I lona lagonaina o le si’ufofoga o le Atua ma le faataunuuina o folafolaga a le Atua i lona olaga. O le taimi lava na alu ese ai Lota na fetalai ai le Atua iā Aperamo. Kenese 13:14-15 14‘Ua fetalai atu fo‘i le ALI‘I, ‘iā Aperamo ‘ina ‘ua te‘a ‘ese‘ese o Lota ma ia: “Se‘i e va‘ava‘ai ia ma ‘ia e iloa atu i le mea ‘e te i ai na, i le itū i matū, ma le itū i saute, sasa‘e, ma sisifo; 15auā o le lau‘ele‘ele uma ‘ua e iloa atu nei, ‘ou te foa‘iina atu mo oe ma lau fānau e fa‘avauvau.

 Afai o i ai sau uo e talanoa i taimi uma e mana’o i tupe, taavale ma oloa fa’a le lalolagi ae lē taitai talanoa i le faaleleia o lona lalolagi poo le faia o le galuega ua tofia ai e le Atua, alu ese ma ituaiga tagata ia. Afai o lea tagata e lē taitai fa’amalieina lona mana’o ma e mo’omo’o e lē aunoa I mea e maua e isi, o le asosi lea o le loto e malie ai e fai so’ose gaioiga e maua ai lona mana’o. O ituaiga tagata ia e mata’utia le aafiaga leaga e avea ma au uo. Afai e I ai sau uo faapea ae musu e sui, alu ese ma lea tagata faapei ona tuua e Aperamo Lota. E tatau ona e alu ese ia aua ai ne’i avea lea tagata ma faalavelave i manuia ua tapena e le Atua mo oe.

 E i ai le eseesega o le sogasogā ma le matape’ape’a. O le tagata sogasoga e talanoa i le faaleleia o le lalolagi I le tamaoaiga e mulimuli mai a’o le tagata e matape’ape’a e lē popole i se faaleleia o le lalolagi na o le oa ma le tamāoaiga e mana’o ai. Malamalama I le eseesega lea ma mataala poo le a le vaai a au uo I le oa ma le tamāoaiga. Afai e te maitauina e matape’ape’a ma e lē suia, alu ese mai ia ituaiga uo. ‘Aua e te fai paaga ma ē matape’ape’a. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 25 NOVEMA 2022

Manatu Autu: Mataala I le Matape’ape’a 1 (Beware of covetousness 1)

  Tauloto – Tusi Paia: Eperu 13:5 ‘Ia aunoa a ‘outou amio ma le matape‘ape‘a; ‘ia gata ‘iā o ‘outou mana‘o i mea ‘ua ‘iā te ‘outou; auā ‘ua fetalai mai o ia, “‘Ou te lē tu‘ua lava oe, ‘ou te lē tu‘ulafoa‘i lava ‘iā te oe”

 Faitauga - Tusi Paia: 1 Korinito 6:9-10

 Upu Folafola
O le matape’ape’a, o le tulaga lea ua e matua naunau I le oa ma le tamaoaiga ma ua e sauni e faia soo se mea e o’o I le faia o le agasala ae ia maua. I le Kolose 3:5, ua taua e le Tusi Paia le matapeapea o le ifo I tupua: 5O lenei, ‘ia ‘outou fasiotia lo ‘outou itū tino o i le lalolagi, o le faita‘aga, o le amio leaga, o le fa‘amatāitu, o le tu‘inanau leaga, ma le matape‘ape‘a, o le ifo tupua lava lea. 

 O lona uiga, o le tagata matapeapea e le o se atalii poo se afafine o le Atua, ae o le tagata e ifo I tupua. 

 E toatele tagata I le Tusi Paia na faatoilaloina e le matapeapea. O Lota mo se faataitaiga, na ave e Aperaamo. Na avea o ia o se tagata mauoa ona o lona fesootaiga ia Aperaamo. Ina ua faatuputupuina lona tamaoaiga, ua tupu le femisaai I le va o ana auauna ma auauna a Aperaamo, ma ua faaalia ai le mea o lo’o I le loto o Lota, o le matapeapea. Fai mai le Kenese 13:10 ‘Ua va‘ava‘ai Lota, ‘ona iloa atu ai lea e ia i le fanua laugatasi uma ‘ua i ai Ioritana, ‘ua lafulemū uma lava, e o‘o i Soara, e pei o le fa‘ato‘aga a le ALI‘I, e pei o le lau‘ele‘ele o Aikupito, a o le‘i fa‘aumatia e le ALI‘I o Sotoma ma Komoro.

 O le tulaga masani e tatau na iai, ina ua fesili Aperaamo ia Lota e filifili le itu e alu agai iai, sa tatau ona faapea atu, ‘Leai, sa e aumaia au ma tausi ia te au I lenei taimi umi. Filifili muamua le itu e te fia alu iai ona ou alu lea I le isi itu. Peitai o lona matapeapea na oo mai ai puapuaga ia te ia ma na leiloa uma ana mea na alu ma ia ma mea uma na maua I totonu o Sotoma. E oo I lona toalua.  O le matapeapea e matuia le leaga e mafai ona faaumatia ai se tagata. Suesue ia te oe pe le o iai se naunautaiga ina ia milionea. Ia tafiesea lena faamoemoega ae vaavaai I le Atua, ma faatuatua ia te ia e mafai ona ia avatu le mauoa ia te oe e tusa ma ala o le Atua. E na o faamanuiaga a le Atua e mafai ai ona e mauoa e aunoa ma le faanoanoaga I lou olaga (Faataoto 10:22). 

E iai ea ni foliga vaaia o le matapeapea I lou olaga? Afai o loo iai, tatalo I le Atua ina ia aveesea I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 24 NOVEMA 2022

 Manatu Autu: Faataitai I le Viiga (Try Praise)

 Tauloto – Tusi Paia: 2 Nofoaiga 20:22 ‘‘‘Ua latou amata ‘ona pepese ma vivi‘i atu, ‘ona tu‘u atu lea e le ALI‘I o ‘au ‘ua tanu e tau ma le fānauga a Amoni ma Moapi ma le mauga o Seira, na ō mai e tau ma Iuta; ‘ua fasia i latou”.

 Faitauga - Tusi Paia: 2 Nofoaiga Tupu 20:22-27

 Upu Folafola
E iai se faifeau I le Ekalesia o le Redeemed Christian Church of God na faia sana tautinoga I se vavega na faia e le Atua I se tasi o faaipoipoga na faia I se tasi o ana aulotu. Ao sauni atu le tama faaipoipo e saini pepa o le faaipoipoga, ae faateia I le valaau atu o lona igoa e se tagata. Ao taumafai lenei alii e tali atu, na pau I lalo ma ua oti. Na tutu uma I luga faifeau na iai ma amata tatalo loa mo ia. O le umi lava na faia a latou tatalo, o le atili maluluina lea o le tino o le tama faaipoipo. Sa iai se faifeau matua na ia manatua se tasi o au lauga na ou fai atu e faataitai le viiga pe afai e fiu e tatalo ae leai se mea o tupu. E lei leva se taimi ao ave le viiga I le Atua, ae toe foi le ola I le tama faaipoipo. 

 Na faatoa amata I tagata o Iuta ona vivii I le Atua ae ia osofaia loa o latou fili I le taua. O fili uma na o mai e faasagatau I le tupu o Iosefatu ma ona tagata, e matua toatele, peitai fai mai le Tusi Paia I le 2 Nofoaiga Tupu 20:22 ‘‘Ua latou amata ‘ona pepese ma vivi‘i atu, ‘ona tu‘u atu lea e le ALI‘I o ‘au ‘ua tanu e tau ma le fānauga a Amoni ma Moapi ma le mauga o Seira, na ō mai e tau ma Iuta; ‘ua fasia i latou”.

 Sa tatalo tagata I Iuta ae sa leai se tali. Ao lenei ua o atu e faasagatau I o latou fili ae ua le faaaogaina ni auupega e pei o pelu, tao ma talita, ae ua faasagatau atu e ala I le auupega o le viiga. Afai ou te tu I faitotoa o le lagi ae ua mumusu agelu e tatala mai, e amata loa ona ave la’u viiga. Ou te iloa ae lei amata ona ou faalaulau atu suafa eseese ma matagofie o le Atua, e na te faatonuina se agelu e tatala faitotoa ia te a’u. O le taulaga o le viiga, e mafai ona tatalaina faitotoa ua o’o I le tatalo e le mafai ona ia tatalaina. 

 Afai e iai se mea o lo’o e tatalo ai, ae e te lei maua lava se tali, faataitai le viiga I le aso. Afai e te vivii I le Atua, e mautinoa e tali mai. 

 O Iosua ma le autau a Isaraelu, na latou faaaogaina le viiga e solo ai I lalo le pa o Ieriko I le Iosua 6:20. Afai ua umi tele ona e tatalo mo se manaoga, faataitai I le viiga ma e mautinoa e faateia nei oe I ni tali matagofie e foai atu e le Atua Silisiliese. Faataitai le viiga. E iai se tulaga I lou olaga o loo e toilalo ai lava? Faataitai le viiga I le Atua ma siitia ai lena mataupu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 23 NOVEMA 2022

Manatu Autu: Tamoe ese mai Tagata Faaneenee (Run from Flatterers)

 Tauloto – Tusi Paia: Faataoto 26:28 ‘‘O le laulaufaiva pepelo, ‘ua ‘ino‘ino ia i ē ‘ua momomo ai; ma le gutu molemole e tupu ai le malaia.”.

Faitauga - Tusi Paia: Galuega 12:20-23

Upu Folafola
O tagata e faaneenee I isi tagata e matautia le leaga. E o mai faafoliga o ni uo, ae o latou o fili, e ui e le iloa e nisi o I latou. I le faitauga o le Tusi Paia o le aso, na faaumatia Herota e lē faapea ona o ni upu faasausili na ia lafo, ae na fiafia i le faaneeneeina e tagata ma e lei ona taofia foi. O tagata nei na siitia o ia I luga aua sa naunau e maua mai ni mea mai ia te ia, ae le faapea e manatu o ia o se failauga lelei. Fai mai le Faataoto 26:28 O le laulaufaiva pepelo, ‘ua ‘ino‘ino ia i ē ‘ua momomo ai; ma le gutu molemole e tupu ai le malaia. 

 O tagata faaneenee ma faaoleole e latou te faaumatia oe pe afai e te le tamoe ese ai. Afai o loo faaneeneeina oe ma e te fiafia iai ona e logomalie, suesue lelei lou tagata aua o I latou o loo faanenee ia te oe e le o ni au uo, ae o loo latou faia mailei ma o loo auina mai e le tiapolo ia te oe. Fai mai le Faataoto 29:5O le tagata ‘ua fa‘a‘ole‘ole i lē la te tuā‘oi; na te folasia le ‘upega i le mea e ui ai o ia. 

 O se tagata e fai atu ia te oe ua e atoatoa I mea uma ae le taitai ona ta’u atu ia te oe pe afai e sese sau mea ua faia, e le o sau uo. Afai e te faatagaina i latou e faaneenee ma faaoleole ia te oe, e faalatalata mai ia te oe, e tatau ona e iloa, ua lata mai le faaumatia. Fai mai le Salamo 5:9 Auā e leai se fa‘amaoni i o latou gutu; o latou loto fo‘i, ‘ua matuā leaga; ‘ua se tu‘ugamau ‘ua fa‘amaga o latou fa‘aī; ‘ua fa‘aoleole i latou i o latou laulaufaiva.

 O totonu o nei tagata e le faapea e na o le leaga, o loo faamatalaina e matua leaga. O latou faai o loo agai mai ai le faaoleole, ua taua o se tuugamau ua faamaga. E tatau ona e tamoe ese mai nei tagata. Afai e fautua mai ia te oe, e le o manatu ina ia e lelei ai. Fai mai le Salamo 62:4 o le latou fautuaga ia te oe e tulei mai ai oe I lalo mai lou mamalu o loo iai. Tusa pe suamalie upu o latou laulaufaiva, aua e te faalogo iai ae tamoe vave ese ma iai latou. 

 Afai e iai se tagata e fiafia e faaneenee ia te oe I le tele o taimi, ia e tutumamao mai lena tagata, I le suafa o Iesu Keriso, Amene.