Samoan Devotional

OPEN HEAVENS
MATALA LE LAGI MO LE ASO TOONAI 12 NOVEMA 2022

Manatu Autu: E Faasolo ina lelei (Things will get better)

 Tauloto – Tusi Paia: 3 Ioane 1:2 ‘‘Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga..”

 Faitauga - Tusi Paia: Kolose 3:1-17 

 Upu Folafola
Ina ua ou faaipoipo ma amata lo’u aiga sa faigata le tulaga na i ai si ma aiga. Sa ou faigaluega peita’i sa nā o a’u o se faiaoga. I nā aso iā maua ma lo’u toalua, sa masani na ma taufao i se ituaiga mea taumafai e ta’u o le pa’u povi, ma te tausua ma faapea atu le isi I le isi e lapoa tele le fasipovi mo le tagata e toatasi o maua e tausami ai e tatau ona vaelua ia maoona ai (tulou) Ou te manatua I nā aso lo’u faamalosi I si o’u toalua I taimi uma “ La’u pele e, aua e te popole, e lē tumau ai pea faapea le olaga, e i’u ina lelei” Faafetai I le Atua na talitonu si o’u toalua ia te a’u ma a’u upu fa’alototele, ma sa ma tumau ma pipii I le Atua. Ou te tulai atu e fai ma sui o le Atua e ta’u atu ia te oe i le asō e faa solo ina lelei le tulaga o mea mo oe i le suafa o Iesu.

Fai mai le 3 Ioane 1:2 Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.

 Ou te mana’o e te maitau le upu lenei mai le Tusi Paia e mai le Agaga o le Atua e ta’u atu ai I lana fanau lona finagalo e silisili I mea uma lava ia ola manuia lana fanau. E avatu ai fo’i ia te oe le mautinoa atoatoa e te manuia ai. Peitai o lenei folafolaga e i ai ona aiaiga. O le aiaiga e tatau ona manuia faatasi ma lou agaga. E faafefea ona manuia lou agaga? O le tatou Tusi Paia faitau o le asō e i ai le tali o le fesili. Toe faitau I ai, fa’amaumau ma teu loto mea o loo apoapoai mai e ao ona e fai e ola ai lou agaga.

 Talitonu mai ia te a’u a e ola e tusa ma le upu a le Atua e mautinoa lou ola ma vaai I manuia sau tua lasi. Fai mai le Teuterenome 28:2 e maua fo‘i e oe o nei mea uma e manuia ai; e o‘o lava ia ‘iā te oe, pe ‘āfai ‘e te fa‘alogo i le si‘ufofoga o le ALI‘I lou Atua:

 Ola faapaiaina (Kenese 17:1) Filigā ( Faataoto 22:29) Loto foa’i (2Korinito 9:6) Totogi lau sefulua’i (Malaki 3:10) ona faamanuia lea o le Atua ia te oe. E tulituliloa ma mulimuli manuia ia te oe. E finagalo le Atua e ola manuia lana fanau. I le suafa o Iesu Keriso, Amene.

OPEN HEAVENS
MATALA LE LAGI MO LE ASO FARAILE 11 NOVEMA 2022

Manatu Autu: Manumalo faale Atua I le lē uluola (Divine victory over barrenness)

Tauloto – Tusi Paia: 2 Tupu 4:17 ‘‘Ona tō ai lea o le fafine, ‘ua fānau mai ai lana tama tane i lea tausaga, e fa‘atatau i le tau o le olaga sa fai atu ai Elisaia ‘iā te ia...”

 Faitauga - Tusi Paia: Kenese 18:9-14 

 Upu Folafola
I le Kenese 18:9-14, na faailoa e le Atua ia Aperaamo, e maua le tama a Sara I totonu o le tausaga, ae ua ata ma le manatu e le mafai ona tupu aua ua loomatua o ia ma pa. E ui lava o le folafolaga mo se tamaitiiti e faigata ona tupu, peitai na tauave e Sara se pepe I le iva masina mulimuli ane. E le afaina poo le a le umi na e pa ai (tulou), e te tauaveina se pepe I le tasi tausaga mai le asō, I le suafa o Iesu. 

 E toatele fafine I le Ekalesia Redeemed Christian Church of God ua fananau ae ua silia tausaga e tatau ona fananau ai. E faaalia ai, e leai se mea e faigata I le Atua lea ou te auauna i ai. E mafai ona ia feliuaina ma suia. 

 E i ai se fafine ua fai iai le fomai ua leai sona toala fanau (tulou). E oo I aiga o lana tane, ua fai iai e aua le avea lea ma faatiga ia te ia aua ua uma ona latou aveesea le toala fanau o lana ava I le itu I le agaga. Na o atu lenei ulugalii I se tasi o matou polokalame, ona faapea mai lea o le Atua ou fai atu I le aofia o lo’o iai se fafine o loo fia foai iai e le Atua se fanau. Na maua o ia I le maitaga I le masina lava lena. Na ave e lona toalua e ola I atunuu I fafo, na ia fai I fomai e faia se taotoga e tuueseesea ai le tina ma le pepe. Ina ua ola le tina lenei, na fiu fomai e sue le toala fanau. Ua faaalia e lou Tama I le lalolagi atoa e mafai ona ia faia mea tetele e lei faia muamua. Afai e mafai ona ia faia I lea ulugalii, e le faigata foi mo oe. 

 I le 2 Tupu 4:8-17, fai mai le Tusi Paia ina ua fai atu Elisaia I le fafine I Sunema o le a maua sana tama, na faapea atu o ia, ‘Tagata o le Atua, aua e te talasua ia te a’u’. O lona uiga na fai iai e aua le pepelo atu ia te ia. O le tiapolo e taumafai ina ia e maua ni lagona e peiseai e pepelo le Atua. E faamaonia e le Atua ia te oe o Ia e le pepelo. I le 1 Samuelu 1:1-6, e faaigoa e le Tusi Paia Penina o le fafine ese aua e faifai lava i le lē fanau o Hana. Ina ua galue mai le Atua SIlisili Ese, ua le maugagana. O so’o se tagata o loo faifai ia te oe, e liua ma auai e fiafia ma oe I lou faaeaina, I le suafa o Iesu.

 O le lē maua o se fanau, e mafai ona maua ai lagona ua lē toe aoga ona ola. I le Kenese 30:1-2. Fai mai Rasela I lona toalua, ‘aumai mo a’u se tamatiiti, a leai ua tatau ona ou oti. O le talalelei lenei mo oe, e te maua ma taufuifui faamanuiaga I so’o se vaega o le olaga nei, tamaoaiga, aoaoga maualuluga, tino ma le agaga, e avea ma faailoga masani ia te oe, I le suafa o Iesu. 

 O le a le vaega o lou olaga o lo’o e faatuatua I le Atua ina ia manuia ma uluola? Tatalo ma ole atu I le Atua mo lena mataupu. E faafofoga le Atua I au tatalo, I le suafa manumalo o Iesu Keriso, Amene. 

OPEN HEAVENS
MATALA LE LAGI MO LE ASO TOFI 10 NOVEMA 2022

Manatu Autu: Manumalo faale Atua I ma’i o le mafaufau (Divine victory over mental sickness)

Tauloto – Tusi Paia: Iakopo 1:5 ‘‘Ae ‘āfai ‘ua leai se poto i so ‘outou, ‘inā ole atu ia i le Atua, o lē foa‘i tele mai i tagata uma ma le lē toe ta‘uta‘ua, ‘ona foa‘iina mai ai lea ‘iā te ia.”

 Faitauga - Tusi Paia: Mareko 5:1-20 

 Upu Folafola
O gasegase o le mafaufau e le na o le faaletonu o lou mafaufau e maua ai. E mafai foʻi ona faauigaina, o loʻo i ai i se tagata ni luʻitau i o latou mafaufau. O nisi tamaiti aoga e atamamai tele o latou mafaufau, ae e faaletonu lava I taimi o suega. Afai o loo I ai ni fa'afitauli i lou mafaufau, e mafai e le Atua ona lavea'iina ma faasa’oloto ia te oe. O lo’o galue lava le tiapolo ina ia avea oe ma se tagata valea ona ua ia iloaina o loo faapea mai le Tusi Paia i le Salamo 14:1‘Ua fai ifo le tagata valea i lona loto, “E leai se Atua.” ‘Ua leaga lava i latou; ‘ua ‘inosia a latou amioga; e leai se tasi ‘ua amio lelei.

 Ua iloa lelei e le tiapolo o loo tusia ma ua faapea mai le Faataoto 13:20 O lē latou te feoa‘i ma tagata popoto, e poto lava ia; a o le uō a ē vālelea, e leaga ai lava ia.

 E loo manao le tiapolo,  ia e ola e pei o se vale ina ia mafai ai ona faaumatia oe, ae i le suafa o Iesu,  e le o faatagaina ai e le Atua nei osofaiga uma e  faasaga ia te oe. O loo manaʻo foʻi le tiapolo ina ia e valea, auā na te iloa o loo faapea mai le Tusi Paia i le Faataoto 3:35. O e popoto e fai mo latou tofi le viiga; a o e valelea, e fai mo latou tomai le mā.

 Fai mai le tusi a Iakopo 1:5, A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

 Afai e te le o maua le atamai, ma o lo’o faletonu pea au suesuega, o le a faae’e atu nei aao o le Atua Silisili Ese ia te oe, ina ia e maua le manumalo i le mafaufau, i le suafa o Iesu.

 Na le mafai e le tagata o loo faaletonu lona mafaufau i le nuu o Katara ona maua le mafaufau tonu ma lelei aua ua uluitinoina o ia e temoni. Peitaʻi, o le taimi lava fetalai atu ai le Upu a le Atua, ona ō ese uma temoni iā te ia ma amata ai ona tonu ma lelei lona mafaufau ma ua tautala lelei e pei ona masani ai (Mareko 5:1-20). Afai e mafai e le Atua e ona le malosi uma lava ona faasaoloto se tagata ua faaaletonu lona mafaufau, e lē sili atu ea ona ia fa'afoisia ia te oe le soifua maloloina lelei I le mafaufau? O le Atua lava lea e tasi e faamaloloina oe i so’o se taimi e te manaʻomia ai le fesoasoani i le mafaufau i le taimi nei, i le suafa matautia o Iesu Keriso.

 E te manaomia se fesoasoani I gasegase o le mafaufau? Tu’u ou aao I lou ulu ona ole atu lea I le Alii e pai atu ma faamalolo ia te oe I le suafa manumalo o Iesu Keriso, Amene. 

OPEN HEAVENS
MATALA LE LAGI MO LE ASO LULU 9 NOVEMA 2022

Manatu Autu: Manumalo faale Atua I ma’i o le tino (Divine victory over physical sickness)

 Tauloto – Tusi Paia: Iopu 1:11 ‘‘Ae peita‘i ‘ia e ‘a‘apa atu lou ‘a‘ao ma ē tago atu i ana mea uma, pe na te lē fāifai ai ‘ea ‘iā te oe i ou lava luma?”

 Faitauga - Tusi Paia: Iopu 1:9-12 

 Upu Folafola
O le faapogai mautu o fuafuaga a satani e faasagatau ia te oe e ala I ma’i o le tino ina ia e faafiti I lou Atua. Fai mai le Iopu 2:4-5 4‘Ona tali mai ai lea o Satani i le ALI‘I, ‘ua fa‘apea mai, “O le pa‘u e sui a‘i le pa‘u; o mea uma fo‘i ‘ua i ai i le tagata, e avatua e ia e sui a‘i lona ola. 5‘Ae peita‘i ‘ia e ‘a‘apa atu lou ‘a‘ao ma e tago atu i ona ivi ma ona ‘a‘ano, pe na te lē fāifai ai ‘ea ‘iā te oe i ou lava luma?”

 E manao Satani ia e ma’I e faatupu ai lou faaseā, tetee I le Atua ma e fulitua ai ia te ia. Ua iloa lelei e satani, afai e te fulitua I le Atua, e te le maua uma mea ua fuafuaina e le Atua mo oe. Ou te tatalo ia faamāina satani I lou olaga I le suafa o Iesu. 

 I le 2 Tupu 5:1-14, ua tatou iloa ai e faapuapuagatia e satani tagata I le tino e faaleaogaina uma ai mea ua ausia I o latou olaga. Na manuia Naamanu I mea uma, peitai sa maua o ia I se ma’i e leai se fofo ma o le tulaga lea ua peiseai e feoloolo tulaga manuia na ia ausia. I le Mareko 5:25-34, na osofaia e satani le fafine puna toto ina ia faaalu uma ana tupe seia oo ina ua leai lava se mea o totoe. E pei ona afio mai Iesu ia Naamu ma le fafine puna toto, e afio mai foi o ia ona o oe I le taimi nei I le suafa o Iesu Keriso. 

 O le tala I le Mareko 2:1-12, o lo’o iloa ai ni uo se toafa a le tama ma’i ua latou sii ia te ia. E manao le tiapolo e toso mai oe mai lea itu I le isi itu, aua foi o lo’o e fesootai I le Atua, e amata atu nei, e le toe avea oe o se avega mamafa I se isi tagata, I le suafa o Iesu. 

 E osofaia foi e le tiapolo tagata ia mama’i I le tino ina ia taotaomia I latou I se tulaga e fai. I le Ioane 5:2-9. E toatele sa faatali I le vai i Petesa sei gaepu le vai. Sa le mafai ona feoai solo ona o ma’i o le tino. E le mafai e le tiapolo ona saisai ma taotaomia oe I lalo aua ua leiloa ma lē toe iai sana pule ia te oe. Na folafolaina e le Alii I tagata o lo’o mulimuli ia te ia, e le mafai ona taotoamia oe I lalo aua ua ia faatoilalo le tiapolo. Fai mai le 1 Ioane 3:8O lē fai le agasala, mai le tiapolo lava ia; auā ‘ua agasala le tiapolo talu le amataga, o le mea lava lea na fa‘aalia mai ai le Alo o le Atua, ‘ina ‘ia fa‘aumatia e ia galuega a le tiapolo.

 O le ma’I o galuega a le tiapolo. Ou te tatalo ia faatuina oe e Iesu mai le moega o le mai I le aso, I le suafa o Iesu. 

 Tatalo
Lo matou Tama e, I le lagi, ou te maua lau faamalologa I lo’u nei tino I le asō, I le suafa matautia o Iesu Keriso, Amene.

OPEN HEAVENS
MATALA LE LAGI MO LE ASO LUA 8 NOVEMA 2022

Manatu Autu: Mafuaaga e mautinoa ai lou manumalo 3 (Why you can be sure of victory 3)

Tauloto – Tusi Paia: Psalm 91:3 ‘O lo‘o fa‘apea ‘ona fetalai mai o le ALI‘I: O le lagi o lo‘u nofoa lea, o le lalolagi o le mea e tu ai o‘u vae lea. O ifea le fale tou te faia mo a‘u? O ifea fo‘i le mea ‘ou te mālōlō ai?

 Faitauga - Tusi Paia: Mareko 6:45-51 

 Upu Folafola
O le mafuaaga lona tolu e mautinoa ai lou manumalo ona e le mafai ona faatoilaloina le Atua i le ‘ea. O lo’o ia faapea mai I le Isaia 66:1 “O loo faapea ona fetalai mai o Ieova, O le lagi o lo’u nofoa lea, o le lalolagi o le mea e tu ai o’u vae lea; o ifea foi le mea ou te malolo ai?”

 O le Alii e afio i le lagi. O ona aao o loo tu i le lalolagi, o lona uiga e iai o ia I mea uma. Afai e feiloa’i taulāiti i se ana e faufau se osofa’iga i se tasi o fanau a le Atua, o lo’o silasila mai fofoga o le Atua I a latou gaioiga ma fuafuaga uma. E na te le fa’atagaina i latou e manumalo ia te oe, pe afai o loo e tumau ia te ia. Ma afai e le mafai ona latou faatoilaloina le Atua I le fogāeleele ma le sami, e mautinoa e le mafai ona latou faatoilalo I le Atua i le ‘ea. Afai o e ‘au ma ia e mautinoa lou malupuipuia. 

 I le Iosua 10:1-14 e iai ni Tupu sa latou osofa’ia Iosua faapea ma tagata o Isaraelu. Na auina e le Atua ni ‘alā mamafa mai le lagi e ta’eia o latou ulu, ona ia taofia lea o le goto o le la, ina ia fasiotia uma i latou e tagata Isaraelu. I le Kenese 19:24 na auina e le Atua le teio ma le afi mai le lagi e fa’aumatia Sotoma ma Komoro. E fa’aumatia ma manumalo le Atua i le fili i luga o le lau’eleele ma le sami. E na te faaumatia i latou i le ‘ea. 

 I se tasi aso, sa matou asiasi atu i se tina ua leva e le’i toe o’o mai i le lotu.  E matou te taunuu atu i  lona fale, ae fai mai le faitioga o le tina ia matou e faapea: “Talu ona ou alu atu i le tou lotu ua le mafai ona ou toe lele i le pō e mafuta ma isi o’u uso taulāitu.” Afai o lou Tama i le Lagi e pule i le ‘ea, o ai se taulāitu e mafai ona tau faamata’u mai ia te oe? Fai mai le Salamo 91:2-4:2‘Ou te fa‘apea atu i le ALI‘I, “O lo‘u malu o ia ma lo‘u ‘olo; o lo‘u Atua ‘ou te fa‘atuatua ‘iā te ia.” 3Auā o ia na te lavea‘iina oe i le mailei a lē fai manu, ma le fa‘ama‘i e oti ai. 4E ufiufi ifo o ia ‘iā te oe i ona ‘apa‘au, ‘e te sulufa‘i fo‘i i lalo o ona ‘apa‘au; e faia lona fa‘amaoni māu talipupuni ma mea e puipuiina ai oe.”        

Afai o oe o se afafine po’o se atalii o le Atua, e mafai ona e nofo ma le mautinoa e te manumalō a’ia’i i taimi uma, I nofoaga uma, auā o lo’u Tama i le Lagi, o Lē e pule i le sami, le lau’ele’ele ma le ‘ea.

 Tatalo
Lo’u tama e i le Lagi, faamolemole ia paū mai uaga o le teio ma le afi i luga o mea uma o loo punitia ai lo’u manuia, i le suafa o Iesu Keriso, Amene.  

OPEN HEAVENS
MATALA LE LAGI MO LE ASO GAFUA 7 NOVEMA 2022

 Manatu Autu: Mafuaaga e mautinoa ai lou manumalo 2 (Why you can be sure of victory 2)

 Tauloto – Tusi Paia: Mareko 4:41 ‘‘‘Ona matuā matata‘u lava lea o i latou ma fetautalatala‘i i latou, “Po o ai lava lenei, ‘ina ‘ua usiusita‘i lava le matagi ma le vai ‘iā te ia?”

 Faitauga - Tusi Paia: Mareko 4:35-41 

 Upu Folafola
O le mafuaaga lona lua e te mautinoa ai e te maua le manumalo I lou tulaga o se atalii po’o se afafine o le Atua, e le mafai e tagata ona faatoilalo le Atua I le vai. Fai mai le Tusi Paia o le matagi ma le vai na usitai I le Atua. Fai mai le Mataio 8:27‘Ona taufaiofo ai lea o tagata, ‘ua fa‘apea ane, “Pe se ā le uiga o lenei tagata auā ‘ua usiusita‘i ‘iā te ia le matagi ma le vai.”

 Afai e taumafai le fili e faasagatau mai ia te oe I totonu o le vai, tuu I le Atua e tau mai I latou. I le Esoto 12:21-28, a’o sopoia e le fanauga a Isaraelu le sami ulaula, na manatu le fili e mulimuli ai, peitai na o’o atu loa Farao ma ana au I le ogatotonu o le sami, na faatonu e le Atua le sami ia tapunia ma toe foi I le tulaga masani. 

A’o finau le ‘au so’o ma le matagi ma ua luluina le vaa, sa moe ma malolo lelei Iesu. Ina ua ala mai o ia I luga, na ona fetalai atu lava o le upu, ona taofia lea o le matagi (Mareko 4:35-41). Ana atamamai le ‘au so’o, semanu e momoe lelei e pei o Iesu, aua e tatau ona latou iloa, po’o le a le malosi o le matagi, e le mafai ona fano ai le Atua na faia le lalolagi ma mea uma. Tusa pe tau faafefe mai le fili I luga o le sami poo le vai, afai o oe o se atalii poo se afafine o le Atua, o loo iai Lē na faia mea uma ma oe. 

 Na ‘auina atu e le Atua Iona I Nineva ae na alu o ia I le vaa I Tasesa. Na oo mai se matagi ona o le lē usitai ma na iu ina lafo o ia e le au malaga I fafo I le sami ina ia faasaoina I latou, ona sau ai le o se I’a tele ma folo ia te ia. Na fetalai atu le Atua I le I’a ‘e le se tagata lea e te aia, ao ia o se tagata e tatau ona momoli I le nofoaga e tatau ona iai’. Ina ua toe sagatonu le mafaufau o Iona, na faatonu loa e le Atua le I’a ia toe luai atu o ia I le matafaga (Iona 1-2). O ou fili uma e faasagatau mai le vai, o loo faamaumauina o latou taimi aua o le Atua Silisili Ese e na te pule I le sami ma mea uma o iai. E le mafai ona ia faatagaina I latou e manumalo ia te oe pe afai o oe o sona atalii po’o se afafine. 

 E iai se tamaitai na sau ma faapea mai ia te ‘Lau afioga, ua ou maua le alii ou te fia faaipoipo iai. Peitai ane fai mai lo’u tama, na ofoina a’u I se agaga o le sami ma ua faapea mai lea agaga e oti lo’u toalua I le aso ou te faaipoipo ai ia te ia. Ona ou fai lea I le tamaitai ‘Ou te iloa seisi e pule I agaga uma o le sami aua e pule I le sami’. Na ou tatalo mo I laua ona la faaipoipo lea. O le isi taimi na ou vaai ai iai laua, ua o mai ma le la pepe e ese le malosi ma soifua maloloina lelei. E le mafai ona faatoilaloina oe e ala I le sami aua o le matagi ma le sami e tatau ona usitai I le Upu a le Atua e faatatau ia te oe. 

 Tatalo
Le Tama e, o I le lagi, o oe o le pule aoao o le sami ma le matagi, fetalai atu I matagi ma afa uma o lo’u olaga ia taofia loa, I le suafa matautia o Iesu Keriso, Amene.  

OPEN HEAVENS
MATALA LE LAGI MO LE ASO SA 6 NOVEMA 2022

Manatu Autu: Mafuaaga e mautinoa ai lou manumalo 1 (Why you can be sure of victory 1)

 Tauloto – Tusi Paia: Salamo 89:11 ‘‘E ou le lagi, e ou fo‘i ma le lalolagi; o oe na e fa‘avaeina le atu laulau ‘atoa ma mea ‘ua tumu ai...”

 Faitauga - Tusi Paia: Salamo 104:1-5 

 Upu Folafola
O oe o le atalii poo le afafine o le Atua e mafai ona e mautinoa e avatu e lou Atua ia te oe le manumalō po’o le ā lava se faafitauli o lua fesaga’i. O le mafuaaga muamua e leai se tasi i luga o le fogaeleele e mafai na fa’atusatusa I le Atua. Fai mai le Salamo 24:1 ‘O le lalolagi ma mea ‘ua tumu ai o a le ALI‘I ia; o le atu laulau ma ē o nonofo ai’.

 Afai o lou fili o loo i luga o le fogaeleele e lē mafai o na mālō I le taua auā o le Atua o ia na faia faavae o le lalolagi. I le Numera 16:23-33 sa faapotopoto nisi e tete’e atu iā Mose. O le mea na fai e le Atua na fetalai I le eleele e tatala lona gutu ma folo uma nei tagata tete’e.

 Atonu o faapotopoto ni tagata e tete’e ia te oe, peitai ona o lou Tama e ona le fogaeleele ma mea uma o i ai, na te lē fa’atagaina le fili e manumalō ia te oe. E le’i mafaia e le eleele na taofi Iesu auā ina ua mavae aso e tolu, na toetu mai le tuugamau le Faaola o le lalolagi. E iā te ia le pule I le fogaeleele ma e lē mafai e le fili ona fa’ato’ilalo oe tusa poo le a le taumafai malosi mai. Na i ai Lasalo I le eleele I aso e tolu peitai o Iesu le Toetu ma le ola, na ia fetalai le upu ma toetu mai ai Lasalo nai e ua oti.

 A’o o’u talavou sa faia se faaipoipoga I lo matou nuu na iai uma faataulaitu ma aitu vavalo. Na ou lauga tete’e I nei agaga leaga ma lo’u loto atoa I lea aso. Na uma le lauga ae ō le au faataulaitu ma aitu vavalo fai I le tinā o le teine fa’aipoipo “lona uiga ua e valaauliā lenei tamaloa e sau e faifai ia I matou? Ia sei matou vaai pe faafefea na fanau se pepe a lau tama” Tulou. Ina ua ma’itaga le tamaitai na sau si ona tinā faamatala mai ia te a’u, na fai mai faataulaitu ma aitu vavalo e lē mafai na tu’ueseeseina le tinā ma lana pepe. Sa ou fai I le tinā “O le aso e fanau ai si au tama (tulou) e momoe uma ai faataulaitu na” Na fanau saogalemu le tamaitai, le tama a le tinā, ma ua avea nei lea pepe ma fomai.

 A’o soifua le Atua o upu uma e tete’e I lou ola tamāoaiga I lenei lalolagi e faaleaogāina uma I le suafa o Iesu. Fai mai le Auega 3: 37Po o ai o ia e fai atu, ‘ona o‘o ai lea, ‘ae le‘i fetalai mai ai le Ali‘i?. O le umi a e avea ai le Atua ma ou Tamā ma le lalolagi ma mea uma o i ai, e mautinoa lou agai atu I le manuia ma le manumalō I le suafa o Iesu. 

 Tatalo 
Le Tama e, oi le lagi, le suafa e sili atu I suafa uma, ou te faatonuina so’o se malosiaga tetee ia te au, ia faaleaogaina I o’u luma, ina ia siitia maualuga ma faaneneeina pea na o lou suafa I vaega uma o lo’u olaga I le suafa o Iesu, Amene. 

OPEN HEAVENS
MATALA LE LAGI MO LE ASO TOONAI 5 NOVEMA 2022

Manatu Autu: O le mamalu o le Atua (The Glory of God)

 Tauloto – Tusi Paia: Salamo 145.5 ‘‘‘Ou te tautala atu i le matagofie o le vi‘iga o lou mamalu, ‘atoa ma au mea mamana..”

 Faitauga - Tusi Paia: Salamo 96:1-13

 Upu Folafola
A e fia vaai I le mamalu o le Atua matamata I mea na ia faia aemaise le vanimonimo. O le lagi ua peiseaī o se potu e fa’ailoa mai ai lona mamalu. Fai mai le Salamo 19:1
1‘Ua tala mai e le lagi le mamalu o le Atua; ‘ua fa‘aalia fo‘i e le vā nimonimo le galuega a ona ‘a‘ao.

I le Salamo 24:8 na fesili Tavita poo ai le Tupu mamalu ae fai mai le tali O le Alii le malosi ma le fitafita. Fai mai le Salamo 29:3 o ia o le Atua mamalu. Molimau fo’i le Salamo 138:5 e mata’utia le mamalu o le Atua. E o’o mai i le asō o loo talanoa pea tagata I le tamāoaiga o Solomona ma le matagofie ma le mamalu o lona maota, peitai o le mamalu o Solomona e pei o se otaota I luma o le Atua. E ui I le tele o le oa ma le tamāoaiga o Solomona na te le’i mafai na fausia ni auala I ni auro. I le aai a lo’u Tamā o le auro lelei manino o loo fola ai ma ona puipui e fai I penina.

Fa’aaliga 21:21 O puipui fo‘i e sefulu ma le lua o penina ia e sefulu ma le lua; ta‘itasi le puipui ma le penina e tasi na fai a‘i; o le ala tele fo‘i o le ‘a‘ai o le auro lelei lea, e pei o le tioata manino.

 Oka o lo’u Atua e mamalu! Ana faapea o lou Tamā le tagata aupito mauoa I le lalolagi e te tala’i I tagata o oe o lona atalii poo le afafine. O lou Tamā I le lagi e silisili ese lona mamalu nai lo soo se tasi e te manatu I ai. Aisea la e te lē ta’uta’u ai o ia? Atonu o oe le isi a auai atu I ni faalapotopotoga poo faatasiga e aunoa ma se isi e iloa o oe o se kerisiano. E te amio pei e lē o oe o se atalii poo se afafine o le Atua i totonu o lou ofisa poo galuega masani a le lalolagi. A na faapea o lou tamā e aupito mauoa I le lalolagi semanu e te faailoa lou fa’ai’u I soo se mea e te alu I ai. E tatau ona e mitamita ona o lou Tamā ma e ta’u atu I tagata I mea uma e te alu I ai. O le mea moni e tatau ona auala atu ia te oe le susulu o le mamalu o lou Atua ia sulugia ai soo se tasi e vaai iā te oe ma ia iloa ai o oe o le suli moni o le Atua.

 O le fuaiupu e 3 o le Tusi Paia faitau o le asō fai mai ia tatou ta’uta’u atu le mamalu o le Atua i nuu ese ae lē seiloga ua e I totonu o le falesa faatasi ma isi kerisiano. Fuaiupu e 10 fai mai ia tatou ta’u atu I tagata o le Atua o loo afio I lona nofoalii. O ia o le tupu o Tupu o loo afio mai na te fa’amasinotonuina le nuu. O e faia nei poloaiga?

 O le Atua ma lona mamalu e mata’utia e tatau ona e ta’uta’u e lē aunoa. Talai i se tasi le mamalu o lou Atua i le asō.

I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 4 NOVEMA 2022

Manatu Autu: E te alofa I le Atua? (Do you love God?)

Tauloto – Tusi Paia: 1 Ioane 4:8 ‘‘O sē lē alofa ‘ua lē iloa e ia le Atua; auā o le Atua, o le alofa lava ia.”

Faitauga - Tusi Paia: 1 Ioane 4:7-21

Upu Folafola
O lou alofa poo le lē alofa I le Atua, e le faapea e fua I ni au folafolaga e faia, ae fua I ou uiga faaalia I le Upu a le Atua. Fai mai le Ioane 14:15 O a‘u uō ‘outou, pe ‘āfai tou te faia mea, uma lava ‘ou te fai atu ai ‘iā te ‘outou. 

 E te usitai I poloaiga a le Atua? Afai e te faia, o lona uiga e te alofa I le Atua. Afai e leai, o lona uiga e te lē alofa ia te ia. I le Ioane 14:15 o loo faapea mai: ‘Āfai tou te alofa mai ‘iā te a‘u, ‘ia ‘outou tausi mai i a‘u poloa‘iga’.

 I le Ioane 15:12, ua folafola e Iesu I ai tatou se tasi o poloaiga e tatau ona tatou mulimuli ai pe afai tatou te alolofa I le Atua o lenei: “O la‘u poloa‘iga lenei, ‘ia ‘outou fealofani, pei ‘ona ‘ou alofa atu ‘iā te ‘outou” Ioane 15:12.

 O lenei, o se poloaiga e faigata ona usitaia aua o nisi tagata e ese le faigata ona maua le loto alofa. O le mafuaaga tonu lea a fai a matou sauniga a faifeau I Nigeria, ou te faatonu lava le aofia e fai atu I le tagata I ona autafa ‘Ou te alofa ia te oe’. E iai se taimi sa iai se tagata na nofo I tafatafa o se tagata na la feese’esea’i, ma o lea na ia faapea atu ‘ou te alofa ia te oe, lou vale’. E ono faigata I tagata I ou tafatafa ona alolofa atu ia te oe, ae e tatau pea ona e alofa iai latou. E leai se mea e mafai ona e faia aua e tatau ona e faia pe afai e te alofa I le Atua. 

 A faapea mai o Iesu ia alofa le tasi I le isi e pei ona ia alofa mai, e te iloa ai le faigata tele pe afai e te faitau I le 1 Ioane 3:16O le mea lava lenei ‘ua tatou iloa ai le alofa, ‘ina ‘ua tu‘uina atu e ia o lona lava soifua e sui a‘i i tatou; e tatau fo‘i ‘ona tatou tu‘uina atu lo tatou ola e sui a‘i le ‘au uso.

 O lona uiga, e laitiiti lava se mafuaaga talafeagai e te ono lē talai atu ai le talalelei I tagata o lo’o agai atu I Seoli. Afai e te alofa I ai latou e pei ona alofa Iesu ia te oe, semanu e te faia so’o se mea ina ia aua nei ō I latou I seoli. E toatele misionare na maumau o latou ola I le talaiina o le talalelei lena ua e aeae ai I le asō ma e maua ai I le lagi. Aisea e faigata ai ia te oe ona e faia lena tulaga na faia e le isi tagata ia te oe?

 Afai e te alofa moni I le Atua, e saunia oe e faata’atia so’o se mea e faamautinoaina ai e talai atu le talalelei o Iesu Keriso I ai latou e lei faaolaina ina ia latou maua Keriso, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 3 NOVEMA 2022

 Manatu Autu: Vavega e matatau ai (Frightening miracles)

 Tauloto – Tusi Paia: Luka 5:9 ‘‘Auā ‘ua ofo o ia ‘atoa ma i latou uma sa ‘iā te ia, auā o le ‘au i‘a ‘ua latou maua;.”

 Faitauga - Tusi Paia: Luka 5:1-9

 Upu Folafola
E iai vavega ma e iai foʻi isi vavega. E iai vavega e faalogo i ai tagata, ma alalaga ai “Aleluia” ae le o faagaeetia I latou. E iai isi vavega e toetoe lava a lē gagana le ua faamanuiaina ona o lona olioli, ma ona lagona faagaeetia ua lē mafaamatalaina (1 Peteru 1:8). E iai isi vavega e matua ofoofogia lava e faigata ai ona talitonuina e le tagata na te mauaina ma faʻapea ane ai o ia, atonu o sana miti. Mulimuli ane, e i ai foi vavega taufaamata’u. O le mafuaaga lena e o'o ai lagona o le fefe tele o le tagata na te mauaina nei vavega, ma e ono taumafai ai e sola ese.

 I le tele o tausaga ua mavae, na saunia ai e le Atua se taavale Mercedes Benz mo se tasi o Faifeau ua loa lona soifua i le Ekalesia o le Redeemed Christian Church of God. O se faifeau e le'i mae'a ana a'oa'oga I le tulagalua ma e le'i moemiti lava o ia, o le a ia maua se ta'avale, e o’o foi I se Mercedes Benz. Ina ua momoli e laʻu avetaavale le taavale lenei ia te ia ma fai atu, "Lau Afioga, o le taavale lenei mo oe, ma o le a iai foi ma lau avetaʻavale, ua maea ona totogi uma", Na ia fesili, po’o se tala ula ea lenei mea?". Fai mai la’u avetaavale, “Ou te le o tausua atu ia te oe; o ou faamanuiaga nei mai le Alii”. Na ia liliu ese mai la’u avetaavale ma amata loa ona savali vave ese loa. Na mulimuli atu la’u avetaavale ia te ia ma faapea atu “Lau susuga faamolemole,  ave le ki o lau taavale lea” ae na atili ai ona faateleina lona savali saoasaoa ese. Ua ia maua se vavega, na mata’u ai o ia. O le masina lenei, o le a faamanuiaina ai e le Atua  oe I se vavega e te matau ai, i le suafa o Iesu.

 I le tatou faitauga o le Tusi Paia mo le aso, tatou te iloa ai auala e maua ai vavega taufaamatau. Na fagota Peteru i le po atoa, ae e leai se I’a na maua. Na matua vaivai lava o ia ma e lei fiafia foi o ia, ae na sau se tasi ia te ia, ma fai atu, pe mafai ona ia faaaogaina lona vaa, ma sa ia tali atu, "Ioe" e aunoa ma se totogiina o le lisi e faaaoga ai le vaa i le po atoa. Atonu o le auala lea e ono maua ai se seleni ona o le leai o se ia na maua I le po ua tuanai. O le taulaga lea a Peteru i lena aso, ma na faamanuiaina e Iesu ia te ia I se vavega na matua matau ai o ia ma na ia fai atu ai i le Alii, e soso ese mai ia te ia. I le 2 Nofoaiga a Tupu 1:6-7 , na tuuina atu ai e Solomona se taulaga ma na faia ai e le Atua o ia ma tupu sili ona mauoa ma sili ona atamai I lenei olaga atoa. Afai e mafai ona e faia se mea lelei mo le Atua, o le a ia toe foaʻi atu ia te oe se vavega na te leʻi tuuina atu i se tagata muamua. I le suafa o Iesu, Amene.