Samoan Devotional

OPEN HEAVENS
MATALA LE LAGI MO LE ASO LUA 22 NOVEMA 2022

 Manatu Autu: Aua le Faa’ole’ole I Tagata (Stop Flattering People)

 Tauloto – Tusi Paia: Salamo 12:3 ‘‘E vavae ‘ese e le ALI‘I o laugutu molemole uma lava, ma le laulaufaiva e tautala i mea fa‘asausili”.

 Faitauga - Tusi Paia: Salamo 12:1-4

 Upu Folafola
O le tatou fa’a’ole’ole i se tagata, o le faia lea o ni viiviiga tetele ae e le moni, aemaise pe a e faia lea tulaga mo sou lava lelei. Ma o le fa’a’ole’ole, o se au’upega lea a le ti’apolo e fa’aumatia ai tagata. O lona uiga, o le tagata na te faia le fa’a’ole’ole, o se sui a le ti’apolo mo le fa’aumatiaina o tagata. So’o se taimi e te  fa’a’ole’ole ai se tagata, ua e faia se galuega mo le sini ‘autu a le ti’apolo o le fa’ato’ilaloina o lea tagata. O lea la, afai e fia ‘avea oe ma sui a le ti’apolo, fa’aauauina pea lou faa’ole’ole i tagata. Peita’i e le taliaina e le Atua ni tagata galulue o le pouliuli. Fai mai le Salamo 12:3 ‘‘E vavae ‘ese e le ALI‘I o laugutu molemole uma lava, ma le laulaufaiva e tautala i mea fa‘asausili”.     

Afai e faauauina lou faa’ole’ole atu, o lo’o e valaaulia le Alii e na te vavae esea ou laugutu (tulou). Fai mai le Iopu 32:22Auā ‘ou te lē mafai ona fa‘ane‘ene‘e atu, ne‘i ‘avea fa‘afuase‘i a‘u e Lē na faia a‘u.

  Afai e faia e se tagata se mea lelei, ia e ta’ua iai e aunoa ma le faane’ene’e. Afai fo’i latou te faia se mea leaga, ia ta’u sa’o iai faatasi ma se fautuaga ina ia suia ai o latou tagata mo le lelei. Aua o taimi e te  faane’ene’e atu  i tagata, e te faatupuina se manatu iai latou, ua atoatoa so latou lelei. O lo’o e tafuina le afi o le fa’amaualuga, atonu o se lagona sa iai i le tagata i se taimi muamua, a o lea ua toe mumu a’e ia lagona, ona te’ena ai lea e le Alii lea tagata. A tupu lea tulaga, ona fano ai lea. 

 O le tele o tagata latou te lagona lava le taimi e faaneeneeina ai i latou e isi. E mafai lava ona sao sau fa’a’ole’ole i se tagata i nisi o taimi, ae e i’u lava ina manino i lea tagata, e ala ona e pipii atu iai, ona lou fia mauaina o mea mai ia te ia, ma e i’u ina amata ai loa ona sola ‘ese mai ia te oe. Aua ua latou silafia lelei lava, o le isi tagata na te ta’utino le mea moni e aunoa ma se tau fa’a’ole’ole, ma o le uo moni le tagata lenā ma a umi se taimi o faia pea lou faaneenee ia te ia, e i’u ina fa’amuta le faiga uo ma le tagata e fa’a’ole’ole. Afai e masani I se tagata ona faaneenee ia te oe, e lē o se uō moni lena tagata. Fai mai le upu a le Atua i le Faata’oto 28:23 “O lē ‘ua a‘oa‘i i le tagata, e mulimuli ane e alofagia o ia e sili i lē ‘ua tautala fa‘a‘ole‘ole”.

 Afai e te manao e fiafia ma fai mea lelei mai se tagata ia te oe, ta’u iai le mea moni ae taofi lou fa’a’ole’ole ia i latou.    

 Ia e pa’i i ou laugutu ma e ta’utino atu: “E le mafai lava ona fa’a’oleole nei laugutu i so’o se tagata, i le suafa o Iesu Keriso , Amene. 

OPEN HEAVENS
MATALA LE LAGI MO LE ASO GAFUA 21 NOVEMA 2022

 Manatu Autu: E le o se Mana e faafuasei ona maua (No Automatic Power)

  Tauloto – Tusi Paia: 2 Tupu 2:10 ‘‘Ona fai atu ai lea o ia, “O le mea faigatā ‘ua e fai mai ai; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; ‘ae ‘āfai e leai, ‘ona lē fa‘apea lea.””.

 Faitauga - Tusi Paia: 2 Tupu 2:9-14

 Upu Folafola
E iai se aso ua leva, a’o ou ulu atu I se potu, na faafuasei ona oso mai se tamaloa mai tua o le faitotoa, u’u lou lima ma amata ona folafola atu ‘ua ou maua le faauuga, ua fai ma au le faauuga e faalua’. Ua ou faamamulu lo’u lima. E te maua le faauuga I le faia o le taulaga ae le o le folafola atu. E tele aso ma taimi e te toatuli ai ma tatalo I ou tulivae. E te anapogi i le tele o aso, faaalu le tele o itula e suesue ai le Tusi Paia ina ia e iloa le Atua, e te alu atu e talai atu le talalelei tusa pe faigata, ma e auauna I le Atua ma lou loto atoa. E te luluina ni fatu, o ni fatu e matua tele e te lagona ai lou tagi a’o faia. E tatau ona saunia lou tagata e faia taulaga ina ia e maua le mana. E le faapea e maua le faauuga tau lava o lou mulimuli I se alii poo se tamaitai faauuina o le Atua. 

 A'o i ai Iesu I le lalolagi, e faitau afe tagata na mulimuli ia te ia, ae na o le 120 tagata na faatali I le afeafe aupitoaluga, e pei ona ia faatonuina,  e na o le pau foi ia o tagata na faatumuina I le Agaga Paia I le Galuega 2:1-4. Na iai se auauna a Elia ae lei maua Elisaia. I le 1 Tupu 19:1-3 a’o saili e Iesepela e fasiotia Elia, na faatonu e Elia lana auauna e faatali I se nofoaga, ae lei faia e ia, ma e na te lei maua le faalua o le faauuga a Elia. Peitai, ina ua oo I le taimi o Elisaia, na faia uma e Elia  gaoioiga e tuli esea ai o ia ae na tumau ma ia Elisaia seia oo I le iuga, ona ia maua lea o le ofu tele o Elia ma le faalua o le faauuga. E tatau ona e auauna I le Alii ma lou loto atoa ma lou malosi atoa. E tatau ona e mulimuli ia te ia seia oo I le iuga. Fai mai le 2 Tupu 2:10
‘Ona fai atu ai lea o ia, “O le mea faigatā ‘ua e fai mai ai; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; ‘ae ‘āfai e leai, ‘ona lē fa‘apea lea.”

 Ina ua fai atu Elia ia Elisaia ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; o lona uiga o loo faapea atu Elia ‘Afai e te iloa lelei au, ma e fiafia I mea ou te fiafia iai, ma e inoino I mea ou te inoino iai, ma afai e te mulimuli ia te au ma lou loto atoa, e te maua foi lo’u ofu tele ma le faauuga’. Afai e te manao I se faauuga o lo’o I se tagata, e tatau ona lua tutusa lelei ma lea tagata faauuina. Afai e le o fesootai lelei lou loto ma le loto o le tagata faauuina lea o le Atua o loo e mulimuli ai, e le mafai ona e maua lona faauuga. O le tulaga mulimuli, afai e te le o sauni e tuuina atu lou loto, agaga, mafaufau ma le malosi e auauna ai I le Atua, e le mafai ona e maua lona faauuga. 

 E oo mai le faau’uga e ala I le auaunaga ma le faitaulaga, e le na o le folafola atu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 20 NOVEMA 2022

 Manatu Autu: Aua nei galo lona alofa mutimutivale (Don’t forget his mercies)

 Tauloto – Tusi Paia: Salamo 103:2 ‘‘Lo‘u agaga e,‘ia e fa‘amanū atu i le ALI‘I, ‘aua fo‘i ne‘i galo se mea e tasi o ana mea alofa”.

Faitauga - Tusi Paia: Salamo 103:1-5

 Upu Folafola
I le tatou Tusi Paia faitau o le asō, fai mai Tavita, Lo’u agaga e, aua ne’i galo se mea e tasi o ana meaalofa, ma ia amata loa ona tolaulau ana meaalofa mo tatou. O le tasi o vaivaiga tele o le au kerisiano, o le vave ona galo ia i latou o meaalofa a le Atua Silisiliese. Afai e ala a’e se tagata I le taeao ma alaga leotele “Viia le Alii, ia faamanūina le Atua” ma feala ai tuaoi e omai e fesili po’o le a se mea ua tupu ae tali atu, “o lea ou te faafetai i le Atua mo le fanau saogalemu o si o’u toalua I le tolu tausaga talu ai.” O le a manatu uma po ua faaletonu le mafaufau o le uso. Peitai a ala a’e se tasi I le taeao po, tagi auē uē ma uiō ona ua misia lona toalua na maliu i le sefulu tausaga ua mavae, mautinoa a e faapea tagata “Talofa e, matou te lagona ou lagona faanoanoa”.

 O le natura o le tagata le manatua o mea leaga ae galo mea lelei, a’o le kerisiano, o le tagata fou iā Keriso e tatau la ona ese ia mai tagata o le lalolagi. Fai mai upu o le pese masani “Faitau ou Manuia uma ta’itasi “

O se tulaga ogaoga pe a faigata ona e faafetaia le Atua mo mea ua ia faia. I nai tausaga ua mavae a’o o’u tapena le lauga o le Lotu faafetai o le tausaga fou ou te manatua lo’u fai I le Atua, “Tamā o lea ua na o tā’ua e mafai o na ta talanoa pei o le atalii I lona tamā?” Sa tali Tamā ua lelei ma sa o’u fai atu, “Le Alii e, o le a ou faamalosi I lau fanau e vivii ia te oe mo mea e tele ua e faia mo I latou I lenei tausaga o le a mavae atu, a’o le tā va, ua e silafia e leai ma se mea na e faia mo a’u.” Sa o’u amata tolaulau mea uma sa ou faatali ai i le fa’solo mai o le tausaga ae le’i maua. Na vave tali mai le Atua e ave ifo sa’u api ma tali atu ana fesili. Na amata le fetalaiga a le Atua I le faapea mai “E fa’afia ona e faimalaga i le tausaga lenei?” Sa ou tali “fa’a tele” “ E fa’afia ona e aafia I ni faalavelave faafuasei?” Sa ou tali “leai se aso” fa’aauau mai le fetalaiga a Tamā “ua silia ma le 360 aso ua uma o le tausaga e fa’afia ona e moe ma toe ala? O e iloa le toatele o tagata na momoe ma maliliu ai a e le’i toe feala mai? E fia ni aso na e matelāina ai i lou fia ai? O e iloa le toatele o tagata I le falemai o lo’o fia aai ae lē manogi se ai?”

 Sa vave ona o’u tali atu I le Atua ina ua o’u lagona le fefe ma le mata’u ia te ia, ua o’u iloa lou lē loto faafetai. Po’o le a le leaga o le tulaga o mea o le soifuaga I lau vaai aua ne’i galo le alofa mutimutivale o lou Atua. Fa’aalu sou taimi e faafetai ai i le alofa o le Atua ma ana meaalofa uma mo oe. Aua ne’i galo le alofa mutimutivale o lou Atua. I le suafa o Iesu Keriso. Amene

OPEN HEAVENS
MATALA LE LAGI MO LE ASO TOONAI 19 NOVEMA 2022

Manatu Autu: Atua Silisili’ese 2 (Wonderful God 2)

Tauloto – Tusi Paia: Galuega 19:11 ‘‘Ua faia fo‘i e le Atua vāvega sili i lima o Paulo;.”

Faitauga - Tusi Paia: Galuega 19:11-16

Upu Folafola
A uma ona feliuaina e le Atua lou olaga, e mafai na filifili le Atua e fa’aaogā oe e fai ma ana mea faigaluega e ala mai ai ana galuega ofoofogia i le lalolagi. O le tasi lenei tulaga e tatau i soo se kerisiano na saili. Ua ta’u mai e le Tusi Paia ia i tatou i le Galuega 5: 12-16 galuega tetele ma ofoofogia na faia e le Atua e ala i aposetolo ma lona faamalolōina o ma’i e ala i le ata lafoia o Peteru. Afai ua amata malolō ni gasegase I le ata lafoia o se tagata, ua avea lenā tagata ma ipu e tauleleia mo galuega ofoofogia a le Atua.

A e mana’o e avea oe ma ipu e tauleleia mo galuega mamana a le Atua, ia e matua’i faafitia le tele o mea. O le Aposetolo o Paulo e lei taumatea sa avea ma ipu e tauleleia mo galuega ofoofogia a le Atua aua o ona solosolo ma ona ie tali eleele na tutupu ai vavega 1 Korinito 10:23 “‘Ua tataga mea uma ‘iā te a‘u,” a ‘ua lē aogā mea uma; “‘ua tataga mea uma ‘iā te a‘u,” a ‘ua lē fa‘amafanafana mea uma.

 A e mana’o e faia e le Atua ni vavega ofoofogia mo oe ia e taumamao ma so’osemea e fa’asā e le Atua. Peitai a e mana’o e fa’aaoga oe e le Atua e auala mai ai lona mana ofoofogia ia e aloese mai mea faasa atoa ma mea faataga ae leai tele se tāua mo oe. E lē fa’asā a le tausami peitai a e mana’o e avea oe ma mea faigaluega a le Atua e ala mai ai lona mana ofoofogia, toaga e anapogi. E lē fa’asa le mafuta ma talatalanoa ma uo ae mo I latou o le a fa’aaogaina e le Atua mo lana galuega, faaaoga le tele o latou taimi e mafuta ai ma le Atua i le tatalo ma su’esu’e lana upu na i loo tele o taimi e faaalu ma isi tagata. Latou te ave le tele o latou taimi ma mea totino mo le Atua ma i’u ina fai ifo ai tagata ua leaga le ulu. E galulue pei o loo totogi ta’i miliona, aemaise e ofo atu o latou tagata atoa I le Atua. O ituaiga tagata ia e faatinoa le mana ofoofogia o le Atua.

 O Mose le tagata na fa’aauala mai ai e le Atua lona vaeluaina o le Sami ‘Ula’ula sa tele lona taimi i luga o le mauga nai lo’o se isi lava nofoaga. O le mea moni o se tagata sa masani I le mamalu o le Atua, sa fetalai mai fo’i le Atua ia te ia ma la fesaga’i faapei o le tagata ona tautalatala ma lana uo. O Elia le tagata na ia valaaua le afi mai le lagi I luga o le mauga o Karamelu ma pupuni le lagi I luga a’e o Isaraelu mo le tolu tausaga sa nofo e lē aunoa i luga o le mauga (2 Tupu 1:9) E tatau ona e ofoina atu lou tagata atoa i le Atua o se taulaga ola (Roma 12:1) pe a e mana’o e tutupu vavega e ala iā te oe. Afai e te manao e faia e le Atua mea ofoofogia e ala ia te oe, ia saunia lou tagata e totogi le tau I lou olaga. 

 Tatalo
Tamā faamolemole foai mai le loto naunau e ola faapitoa mo oe lo’u Atua ofoofogia i le suafa o Iesu Keriso. Amene

OPEN HEAVENS
MATALA LE LAGI MO LE ASO FARAILE 18 NOVEMA 2022

Manatu Autu: Atua Silisili’ese 1 (Wonderful God 1)

Tauloto – Tusi Paia: Isaia 9:6 ‘‘Auā ‘ua fānau mai mo i tatou le tama,‘ua foa‘iina mai mo i tatou le atali‘i, e i lona ‘ua lē mālō. E igoa fo‘i o ia, o le Silisili‘ese, o le Faipule, o le Atua malosi, o le Tama o le fa‘avavau, o le Ali‘i o le filemū...”

 Faitauga - Tusi Paia: Tanielu 6:25-27

 Upu Folafola
O le Atua, o ia o le Silisili’ese. O lo’o faapea mai le Isaia 9:6, e igoa foi o ia o le Silisili’ese. O lona uiga o le Silisili’ese, e tumu I mea silisili ese ma ofoofogia. E ofoofogia ona fanau se taupou. E ofoofogia le fanau mai o le Tupu o Tupu I se falepovi. E ofoofogia ma silisili ese le Atua e pule I autau o le lagi ona faatagaina e faasatauroina o ia. E ofoofogia ma silisiliese ona toetu mai le oti. E le gata o le Atua e Silisili’ese, e na te faia mea e silisili ese ma ofoofogia. I le tatou faitauga o le Tusi Paia o le aso, e oo I se tupu e tapuai I atua ese na ia folafola o lo tatou Atua, o le Atua soifua e na te faia faaaliga ma mea ofoofogia I le lagi ma le lalolagi. O ia o le Atua Silisili’ese, e mafai ona ia faia mea silisili ese ma ofoofogia mo oe. I le Ioane 9:32, o le tauaso na faapupulaina ona mata na faapea mai: 32E le‘i fa‘alogo lava talu mai le vavau, ‘ona fa‘apupulaina e se tasi o mata o lē na fānau mai o tauaso.

 O le Atua Silisili’ese e mafai ona ia faamaloloina ma’I o lo’o e ui ai. E mafai ona ia fofoina faafitauli uma o loo e ui ai I le taimi nei, o so’o se faafitauli. Fai mai le Ieremia 32:27Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi? 

 E leai se mea e faigata I le Atua. Afai e te ola faapaiaina, a e ole atu ia te ia I se mea, e leai se mea e le mafai ona ia faia. 

 E le gata e mafai ona ia faia mea silisili ese ma ofoofogia mo oe, e mafai e le Atua ona ia suia oe e avea ma se tagata silisili ese. I le Mareko 2:1-12, e iai se tamaloa pipili na aumaia ia Iesu e auala mai I le taualuga o le fale, ae na o le fetalaiga lava mai le Alii, ona tu lea I luga o le tamaloa, ua maloloina atoatoa. Fai mai le Tusi Paia I le Mareko 2:12 ‘Ona tula‘i loa lea o ia, ‘ua ‘ave fo‘i lona moega ma savali ane i luma o i latou uma. ‘Ona ofo tele ai lea o i latou uma ma vivi‘i atu i le Atua, ‘ua fa‘apea, “‘Ua tatou lē iloa mai anamua se mea fa‘apenā.”

Na matua ofo uma tagata ma e mafai foi ona ia faia mo oe. 

 O le tala o lo’u olaga o se faamaoniga lelei lea e mafai e le Atua ona suia se tagata ia silisili ese. Na ia suia se tama mativa mai se nuu laitiiti I Nigeria e avea ma tagata e faasoa atu I taitai iloga o le lalolagi atoa, o se tulaga silisiliese ma le ofoofogia. Afai e te manao e suia oe e le Atua I se tagata silisili ese ma le ofoofogia, e manaomia muamua ona lafoai lou ola ia Iesu Keriso, amata loa ona e ola faapaiaina ma saili atu I ona fofoga mo lona alofa mutimutivale. 

 Tatalo
Tama, faamolemole aumai lou alofa mutimutivale ia te a’u, ia suia a’u nei e avea ma tagata silisili ese i la’u augatupulaga, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 17 NOVEMA 2022

Manatu Autu: Tatalo mo tatou fanau (Prayers for our children)

Tauloto – Tusi Paia: Isaia 8:18 ‘‘Fa‘auta, o a‘u nei ma la‘u fānau, o ē ‘ua foa‘iina mai ‘iā te a‘u e le ALI‘I, e fai ma fa‘ailoga ma mea e ofo ai ‘iā Isaraelu, mai le ALI‘I o ‘au, o lē afio i le mauga o Siona..”

Faitauga - Tusi Paia: Salamo 127:3-5

Tatalo
1.       Faafetai Iesu I lou alofa mutimutivale ma le alofa tunoa I le fanau, e faafoi atu pea le viiga ma le faamanu ia te oe lo’u Alii. 

2.       Tama, ou te tatalo mo lou alofa mutimutivale e te tapue ma faaea I lau fanau I le augatupulaga o loo iai I le suafa o Iesu. 

3.       Tama, faamolemole, ia avea lou siufofoga e taiala I le fanau I mea uma latou te faia. Ia aveesea ni leo e ono taitai eseina I latou I ala e fano ai, I le suafa o Iesu. 

4.       Tama, ia manuia lumanai o a matou fanau. Ia avea I latou o ni alii ma tamaitai e faia mea tetele I le suafa o Iesu. 

5.       Tama, I lou alofa mutimutivale, ia e faamanuia I a matou fanau I lo’u tamaoaiga. Ia latou maua ou manuia faulai ina ia aua lava nei leai se mea e tagolima I iai. 

6.       Tama, e pei ona e faia ia faalogo Samuelu I lou siufofoga, faamolemole ia iloa e matou fanau uma lou siufofoga, ia manino la latou faalogo I ‘lou siufofoga e amata atu nei, I le suafa o Iesu. 

7.       Tama, ou te folafola atu, e le manuia soo se auupega e faasagatau mai I a matou fanau I le suafa o Iesu. E le avea a matou fanau o nisi e afaina I galuega a tagata amioleaga, I le suafa o Iesu. 

8.       Tama, ia e totoina I loto o matou fanau le naunau e manumaloina agaga mo  lou malo I le suafa o Iesu. Ia aoaoina I latou ia avea ma faifaiva I tagata, I le suafa o Iesu. 

9.       Tama, faamolemole, ia pupula lou malamalama I luga o a matou fanau. Ia e alofa ma faamanuia iai latou I le suafa o Iesu. 

10.   Tamai ia maua e a matou fanau le faulai o lou alofa tunoa e le gata I ou luma ae o luma foi o tagata, I le suafa o Iesu. 

11.   Lou Tama e, o le Ala, Upu Moni ma le Ola,  faamolemole ia faaauau pea ona e saunia le alatonu mo a matou fanau ia latou taumafaiga uma I le suafa o Iesu. E le faamaina seisi o matou fanau ona o lou alofa mutimutivale I le suafa o Iesu. 

12.   Faafetai Tama mo au fuafuaga manuia mo a matou fanau. Taitai I o latou ala moni ma ia mulimuli pea I ai latou lou alofa ma lou agalelei, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 16 NOVEMA 2022

 Manatu Autu: Pa’i I le Atua 3 (Touching God 3)

  Tauloto – Tusi Paia: Mataio 15:28 ‘‘Ona tali atu ai lea o Iesu, ‘ua fa‘apea atu ‘iā te ia, “Funa e, ‘ua tele lou fa‘atuatua; e pei o lou mana‘o, ‘ia fa‘apea lava ‘ona faia ‘ia te oe.” ‘Ona mālōlō ai lea o lana tama teine i lea lava itū aso.”

 Faitauga - Tusi Paia: Mareko 10:46-52

 Upu Folafola
E mafai ona e pa’i atu i le Atua e ala i au tatalo. I le tatou faitauga o le Tusi Paia o le aso, na valaau atu Patimaio ia Iesu ona ia tu lea. Na pai atu ia Iesu le tagi a Patimaio aua na faifaipea lona valaau atu. E iai tatalo a tagata e faia ma le faaaloalo, e leo malu e faaaogaina upu matagofie e logomalie. Ae e iai foi tatalo e pa’i atu I le Atua – e masani lava ona e faia ma le loto faanaunau. I le Luka 18:1-8, na avatu e Iesu le faataitaiga o le tatalo e pai atu I le Atua. O le mea moni, o lenei tatalo e pai atu I le tagata amioleaga e o’o foi I le Atua. 

 E iai tagata e tatalo pea, ona taofi lea ona ua le maua a latou vavega. Aisea ua taofi ai? E iai seisi tagata e te sulu iai e ese mai le Atua?   E iai taimi ua ou o’o atu ai I luma o Peresitene, ma a e iai I lea tulaga, e le mafai ona e faatopetopea. E te muamua I lea nofoaga ae lei oo I le taimi faatulagaina mo oe, e I’u foi ina e faatalitali mo sina taimi ae lei o’o I le taimi e valaau mai ai. E iai nisi o taimi ou te alu e vaai le Peresitene ona o lana valaau mai, peitai ou te faatali lava. E faapefea la ona e alu atu I luma o le Peresitene o Peresitene ma e faapea atu ona e lei tali mai I lou manao, ua tatau ona e alu ese? Afai e te alu ese, o ai e aafia? E tumau pea le Atua I lona tulaga Atua, pe e te tatalo atu pe leai. Afai e te tumau mo se taimi I le nofoaga o tatalo, e te pai atu I le Atua ona foai lea ia te oe o so’o se mea e te ole atu ai. 

 le Mataio 15:22-28, ua tatou faitau I le tala I se fafine na tagi atu ia Iesu ia faamaloloina lana tama. Na ia tagi tele o ia ma ua inosia o ia I le au soo ua iu ina fai atu ia Iesu e tuli ese. E lei taofia ai le tatalo pea o lenei fafine. Na oo ina pai atu ia Iesu ma ua ia maua lana vavega. O le a le tulaga o lou naunau mo se vavega? Afai e te naunau, e iloa I le ituiga o tatalo e te faia. E iloa foi I le umi ona e tatalo. E toatele tagata o loo ui pea I faigata o faafitauli aua ua vave ona taofia a latou tatalo. Aua nei e iai I lea tulaga. 

 Afai e te manao e pa’i atu I le Atua e ala I au tatalo, ia tatalo e le aunoa, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO LUA 15 NOVEMA 2022

 Manatu Autu: Pa’i I le Atua 2 (Touching God 2)

 Tauloto – Tusi Paia: Eperu 13:15 ‘‘O lenei, o ‘iā tatou te avatu so‘o ai le taulaga o le vi‘iga i le Atua, o le fua lea o tatou laugutu, o lo‘o fa‘afetai atu i lona suafa....”

 Faitauga - Tusi Paia: 2 Nofoaiga Tupu 1:6-12

 Upu Folafola
E mafai ona e pa’i atu i le Atua e ala i lau tapua’iga. I le Galuega 16: 25-26 i le tulua o po ma ao, sa pepese ai Paulo ma Sila, i viiga i le Atua Silisili Ese i totonu o le fale puipui. Sa lagona ma faafofoga le Atua I a la viiga a’o falepuipui ma ua pa’I atu ia te ia. Sa le taumuimui i la’ua a ua vivii atu i le Atua, ona ia tatalaina faamalosi ai lea o faitoto’a o le fale puipui. O le aposetolo o Paulo, o se tagata na iloa le auala e pa’i atu ai i le Atua e ala i le faia o viiga ia te ia. O ia lea sa tusitusi e uiga i le taulaga o viiga i le tusi o: Eperu 13: 15 ‘O lenei, o ‘iā tatou te avatu so‘o ai le taulaga o le vi‘iga i le Atua, o le fua lea o tatou laugutu, o lo‘o fa‘afetai atu i lona suafa’.

  O le a le taulaga o viiga? O le taulaga o viiga e pei ona taua I luga, o le fua o tatou laugutu. A tatou tu’ua faatasi lea fuaitau ma le Mataio 7: 16 o loo faapea mai : “Tou te iloa i latou i o latou fua. Pe tau mai ‘ea e tagata se fuifui vine mai le la‘au tuitui, po o mati mai le la‘au talatala?” Aua o iina e te iloa ai o taulaga o viiga e le faia e ni laugutu e na ona vivii i ni nai taimi, po’o na o taimi e saogalemu ai. O le taulaga o viiga e sau mai laugutu e vivii atu ia te ia i taimi uma, o laugutu e vivii ma faafetaia le Atua Silisili Ese, o laugutu ua tuuina atu e fai ma taulaga i le fata faitaulaga o viiga i le Atua. E te fia pa’i atu i le Atua e ala i au tapua’iga? Ave se viiga i lou Atua mai ou laugutu ua tuuina atu mo le viiga o le Atua i taimi uma lava. 

 E lē taliaina e le Atua se viiga mai se tagata agasala, aua e le mafai ona silasila ona fofoga I se agasala. (Sapakuka 1:13) A o le mea moni e lafi le agasala mai tagata agasala, ma e le lagonaina e ia (Isaia 59:1-2) sei vagana ua latou salamo ma lafoa’i a latou agasala ma mea sesē. 

Ia tuuina atu lou ola ia Iesu Keriso i le asō pe afai e te lei faia, ona e mautinoa lea, a o’o i taimi e sii atu ai lau taulaga o le viiga ia te ia,  e faafofoga o ia ma galueaina o Ia e faia mea ofoofogia i lou olaga.        

  Ia avea le viiga I le Atua o se faiga masani i lou olaga, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO GAFUA 14 NOVEMA 2022

Manatu Autu: Pa’i I le Atua 1 (Touching God 1)

Tauloto – Tusi Paia: Mataio 8:3 ‘‘Ona ‘a‘apa atu lea o Iesu o lona ‘a‘ao, ‘ua pa‘i atu ‘iā te ia, ‘ua fa‘apea atu, “‘Ou te loto i ai; ‘inā mamā ia oe.” ‘Ona mamā loa lea o lona lepela...”

Faitauga - Tusi Paia: Mareko 5:25-34 

 Upu Folafola
Le au pele e, afai e pa’I le Atua I lou olaga, e le mafai ona tumau lou olaga I le tulaga e tasi. O le tulaga ua iai, e faitau miliona fanau a le Atua I le lalolagi, e faapefea la ona mautinoa e silafia ma pa’i atu le Atua ia te oe mai lenei toatele? E mafai ona pai atu le Atua pe e te pai atu foi I le Atua, o lona iuga e tutusa lelei. Afai e paū ma pa’i atu se uaea eletise I se tagata pe tago atu foi le tagata e pai atu I le uaea eletise, o lona iuga ma le aafiaga e tutusa lelei. O le Atua o le afi maamaai (Eperu 12:29). Tusa po’o Ia e pai atu ia te oe, po’o oe e te pa’i atu I le Atua, o lona faaiuga e tutusa lelei. I le faitauga o le Tusi Paia o le aso, o le fafine puna toto na pa’i atu ia Iesu ona faapea mai lea o lo tatou Alii, ua alu atu le mana. 

 E faapefea ona e pa’i atu I le Atua? E mafai ona e pai atu ia te ia I le faatuatua. I le Mataio 8:5-13, o loo taua I le Tusi Paia le tala I le taitai o le toaselau na alu atu ia Iesu ma augani atu mo le faamalologa o lana auauna. Na fetalai atu Iesu o le a alu atu e faamalolo ia te ia. Ae na faapea mai le taitai o le toaselau, tau lava o sau upu e fetalai mai ma e na te iloa, e faamaloloina lana auauna. O le faatuatua o lenei tamaloa na matua pa’i ia Iesu. Ne faapea mai Iesu Keriso ‘ou te le‘i iloa ‘iā Isaraelu lava se fa‘atuatua e fa‘apenā ‘ona tele.

 E iai se taimi na ou maua ai se tusi mai se tagata na faapea mai: ‘E tele faafitauli o lo’o ou feagai ma a’u. Ou te le o talosaga atu e te sau e tatalo mo a’u, pe faia foi se talosaga mo se fonotaga, ou te iloa afai e tau lava o lou faitau I lau tusi, ou te iloa e maua a’u vavega’. Ua ou faitau I le tusi ona ou faapea atu lea I le Alii, ‘Le Atua Silisili Ese, e tatau ona e faaeaina lenei faatuatua’. Ina ua maea le lua vaiaso, ua toe maua le isi tusi ma ua faapea mai: ‘Ua ou iloa ua e faitau I lau tusi aua ua maea ona faia e le Alii’. 

 O le a le malosi o lou faatuatua? E mafai ona pai I le Atua? Afai e le malosi tele lou faatuatua e pai atu I le Alii, o lona uiga e tatau ona e suesue ma faalogo I le Upu a le Atua ia faifaipea. Fai mai le Roma 10:17 O lenei, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea.

 Ia e talia pea le Upu a le Atua, e ala I le Tusi Paia, o tusi po’o lauga a tagata moni o le Atua ona e vaai lea I le tupu o lou faatuatua I le tulaga maualuga e pai atu ai I le Atua, ona suia lea o mea e lē mafai ona faia I mea ua faataunuuina. 

 Tatalo
Tama, fesoasoani mai I lo’u faatuatua ina ia tuputupu pea ma maualuga I le tulaga e pa’i atu ai ia te oe, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 13 NOVEMA 2022

Manatu Autu: E manaomia e le Atua lou filiga (God requires diligence)

Tauloto – Tusi Paia: Faataoto 13:4 ‘‘4‘Ua tu‘inanau le loto o le paiē, ‘ae leai se mea e maua; a o lē mana‘o o ē filigā i galuega e matuā mā‘ona ia. 

 Faitauga - Tusi Paia: Faataoto 6:6-11 

 Upu Folafola
O le toatele o tagata e manatu a faamanuia le Atua ia I latou o lona uiga e toulu faafuasei mai tupe mo latou e le tau o e galulue. E sese lea manatu. A e manao e siitia le tulaga o lo’o e i ai, a tatala mai loa e le Atua avanoa, e manaomia lou galue filiga. I nai tausaga ua mavae, sa ou avea I se uso se galuega iā Ianuari e tatau na maea I le 3 masina. Sa ou fuafua e uma loa le galuega muamua lea toe ave I ai le isi peitai e o’o mai ia Setema e le’i uma a le galuega muamua. Matuai leai se avanoa ou te toe avea i ai se isi galuega e fai. Sa tatala e le Atua faitoto’a o faamanuiaga tau tupe mo le uso ae paie. O lona lē filiga na le maua atoa ai manuia tatau mo ia.

 O le isi itu, sa i ai si o’u atalii sa fai ma ana masani le fai mai ou te tatalo mo ia, ia alu ese mai le tulaga mativa o loo i ai, I so’o se taimi ma te fetaui ai, ma sa faapena foi na o’u faamanatu i ai e tatau na galue filiga. O se tasi aso na ou maua ai se tusi mai le atalii ua maua sana galuega tele. Na ia tau mai totogi o le galuega ae sa ou le talitonu ma o’u manatu o sana mea sese le fuainumera tele ua ta’u mai, ma ou manatu ai e na o le $50,000.00 le totogi o le galuega e le $500,000.00 tala. Sa faateia a’u I le maua mai o la’u tupe mai le atalii faatasi ma le tusi e faapea “Tamā ua maea totogi la’u sefulua’i peitai o oe na tatalo, o lesi 10% lea ma oe”. Sa ou ofo ma ua ou iloa ai o lea sa sa’o le totogi o le galuega sa tau mai e le atalii, ma ou valaau loa I ai e faamatala mai lana tala. O le faamatalaga a le atalii sa ia faia muamua se galuega tele mo se setete o le mālō. Na fiafia le kovana I le lelei o le faatinoga o le galuega ma ia valaaulia ai le atalii I lona ofisa ma toe ave I ai le isi galuega tele e fai ma uma ai le mativa o lona olaga.

 E finagalo le Atua e tali tatalo a le toatele o tagata peitai o le leai o se loto filigā ua poloka ai faamanuiaga. Fai mai Luka 16:12 ‘Āfai fo‘i ‘ua ‘outou lē fa‘amaoni i mea a le tagata ‘ese, o ai sē na te tu‘u atu ‘iā te ‘outou a ‘outou lava mea?

Ua e fai mai e la’ititi lou totogi I lau galuega na e fai ma ua e mana’o e avatu e le Atua le fesuiaiga ia mafai na fai sau pisinisi peitai afai e te lē faamaoni I le pisinisi a le tagata o loo e galue ai e faapefea na avatu e le Atua se pisinisi mo oe? E finagalo le Atua e te filigā ia e alu ese ai mai le tulaga mativa.

 Tatalo
Tamā faamolemole foai mai le loto filiga ia te a’u ia suia ai le olaga mativa o loo i ai i le tamaoaiga faulai, I le suafa mamana o Iesu Keriso. Amene.