OPEN HEAVENS
MATALA LE LAGI MO LE ASO LUA 16 AOKUSO 2022

 Manatu Autu: Tusi I le Ekalesia I Sarataisa 1 (Letter to The Sardis Church 1)

 Tauloto – Tusi Paia: Roma 13:11 ‘‘Ia fa‘apea fo‘i, ‘ina ‘ua tatou iloa ona po, ‘ua o‘o i le itū po ē ala ai ē na momoe; auā ‘ua latalata nei ‘iā te i tatou le ola, sa mamao ‘ina o tatou ulua‘i fa‘atuatua’.

 Faitauga - Tusi Paia: Faaaliga 3:1-3

 Upu Folafola
I totonu o  talafaasolopito faamaumauina, o loo ta’ua ai le osofa’ia ma fouvaleina o le taulaga o Sarataisa e nisi atunuu           mai lea taimi i lea taimi, ma o se mafua’aga o lea tulaga, ona o le lē mataala o tagata sa nonofo ai. O le tulaga fa’atamala lea, ua le gata i totonu o le taulaga, a ua ulu foi i totonu o le Ekalesia. Se’i vagana se vaega to’aitiiti e lei eleelea o latou la’ei, ae sa leai se upu lelei na fetalai Iesu mo i latou. Sa fetalai Iesu: “Ia mataala ma faamalosia o mea o totoe o le a feoti(Faaaliga 3:1-3). 

 O tagata nei ua faapaiē i le fa’amausaliina o lo latou fa’atuatua. E le mafai ona avea oe ma se kerisiano moni pe a fai e le amio pulea lou olaga. So’o se kerisiano e faapaiē i lona faatuatua, o le a ‘ele’elea ona la’ei. Fai mai le Ioane 5:17‘Ona tali atu lea o Iesu ‘iā te i latou, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u.” 

 E iai isi kerisiano ua matuā faapaiē, ma ua latou avea ni tupe i latou faife’au e tatalo ma anapogi mo i latou. E lē taliaina e le Atua ia ituaiga anapogi ma tatalo.  Afai e te lē anapogi ma e tatalo lava oe, afai e te lē faitaua le Tusi Pa’ia , pe e te lē auai i mafutaga a le Ekalesia, o lona uiga e te lē o galue i le tovine a le Atua, afai foi e te lē o faia se tala’iga, o lona uiga ua oti lou faatuatua. Ma e lē umi foi ae toe o’o mai le agasala ma e toe foi i le lalolagi. A fai e te fia faamautū lou tula’i mo Iesu Keriso e o’o i le faaiuga, e manaomia lou mataala! Fai mai le 1 Korinito 10:12:
12O lenei, o lē manatu o lo‘o o tu ia, ‘inā fa‘aeteete ia ne‘i pa‘ū.

 O a ni tulaga e ao ona e mata’ituina i le avea o oe o se kerisiano? Ia o’ofu i le ofu tau atoatoa mai le Atua ina ia mafai ai ona outou tutū mausalī e tetee atu i togafiti a le tiapolo (Efeso 6:11). Ia faaauau ona mataala ma tatalo e lē aunoa ia manumalo i faaosoosoga (Mataio 26:41). E tatau ona e faitau ma suesue le Tusi Pa’ia ina ia ‘alofia ai a’oa’oaga sese.

(Galuega 20:29-30). E tatau ona e mataala i ni galuega faapaiē ma le lē atoatoa e te faia  mo le Atua, aua na te faamasinoina au galuega (Faaaliga 3:2). Ma le mea mulimuli, e tatau ona e mataala mo le toe afio mai o lo tatou Alii Faaola o Iesu Keriso, auā e leai e se tasi e iloa le aso po’o le itu aso e afio mai ai o ia (Mataio 24:42- 43). 

 O tagata Kerisiano e tatau ona amio pulea ma mataala. I le suafa o Iesu, Amene. 

OPEN HEAVENS
MATALA LE LAGI MO LE ASO GAFUA 15 AOKUSO 2022

 Manatu Autu: Tusi I le Ekalesia I Tuatira 3(Letter to The Thyatiran Church 3)

 Tauloto – Tusi Paia: Galuega 4:32 ‘Ua tasi lava le loto ma le manatu o ē fa‘atuatua uma lava; ‘ua lē fai mai fo‘i e se tasi i se isi ana mea, o lana lea; a ‘ua tu‘u tele a latou mea uma.’

 Faitauga - Tusi Paia: Faaaliga 2:18-29, Galuega 2:44-47

 Upu Folafola
E pau le vaega na tetee ai Iesu I le Ekalesia I Tuatira ona na latou faatagaina Iesepela e faia aoaoga I totonu o le faapotopotoga ma a’oa’oina tagata e faia le agasala e tetee I le Atua. E manatu e tatau ona tatou tilotilo I tagata na ta’ita’i seseina. Ia e manatua ala e tatau ona faamalieina ona faatoa mafai lea ona e auai I fefaatauaiga I totonu o Tuatira I na aso. Na faigofie I tagata ona talia faatosina a Iesepela aua na ia saunia ala e faia ai fefaatauaiga e peiseai e latou te lei pauū ese atu ma le faatuatuaga. 

 E toatele tagata ua toe foi I le lalolagi ona ua latou le maua se fesoasoani ia latou pisinisi ma galuega mai le au kerisiano i le Ekalesia. E matua taua tele lo tatou galulue ma tutu faatasi e fesoasoani le tasi I le isi, ina ia ausia fuafuaga alu mamao a tagata. Ia faatuina ni komiti I totonu o le lotu e aoao tagata I le faia o pisinisi. Ia fuafua lelei polokalame e a’oa’o ai tagata I ala e maua ai tupe. Ave le avanoa I tagata e faalauiloa ai I tagata lotu a latou pisinisi o loo faia ma le faamoemoega e te faamalosiau I tagata e faatau mai mea o latou manaomia mai tagata lotu e faia pisinisi. Afai e lagolago leisi kerisiano I le isi, o le a laitiiti le avanoa e faaaoga ai auala faaalatua e maua ai mea e manaomia mo le tausiga o aso uma. 

 O le Ekalesia ma le lotu o le nofoaga lea e ta’ua ai tagata uma o uso e aunoa ma le faailoga tagata. Faitau I le talaaga o le Ekalesia mai le Galuega 2:44-47, na latou tuufaatasi ma faasoa uma mea na latou maua ina ia faamautinoaina e leai seisi e fiaai. E te faasoa atu ea mea ua e maua I tagata o lau aulotu ina ia maua ni latou mea o loo manaomia, pe e te lē fia mafuta ma I latou ona o le leai o ni mea latou te maua?

 Afai e tatou te talanoa I le talai atu o le talalelei I le lalolagi ina ia o mai ia Keriso, e tatau ona tatou iloa o lo’o talai foi le tiapolo I tagata I totonu o le lotu, le au kerisiano ina ia o atu I le lalolagi. Ia tatou faia mea uma ina ia faaitiitia le avanoa I kerisiano I totonu o le Ekalesia e toe foi atu ai I le lalolagi. Ioe, e te tatalo mo I latou ina ia tatala faamanuiaga mo I latou, peitai, afai o loo ia te oe mea o loo latou manaomia ae e te musu e foai atu, e te le o fesoasoani I ai latou ma le tino o Keriso. Fai mai le Iakopo 2:15-16

15‘Āfai ‘ua lē ‘ofu se uso po o se tuafafine, ‘ua leai fo‘i sana mea e ‘ai i lea aso ma lea aso, 16a fai atu, so ‘outou ‘iā te i latou, “‘Inā ō ia ‘outou ma le manuia, ‘ia mafanafana, ma ‘ia mā‘o‘ona,” a ‘ua lē foa‘i atu ‘iā te i latou ni mea e tatau i le tino, se a lona aogā?   

 Saili se tagata o loo manaomia le fesoasoani I totonu o lau aulotu ona e fesoasoani lea iai. Manatua, ia e lagolago I tagata o lau aulotu I le faaaogaina lea o ni auaunaga poo le faatau oloa mai latou pisinisi. I le suafa o Iesu, Amene. 

OPEN HEAVENS
MATALA LE LAGI MO LE ASO SA 14 AOKUSO 2022

 Manatu Autu: Tusi I le Ekalesia I Tuatira 2(Letter to The Thyatiran Church 2)

 Tauloto – Tusi Paia: Mataio 18:6 ‘Ai sē na te fa‘atausuai se tasi o i latou nei e fa‘atauva‘a o ē fa‘atuatua ‘iā te a‘u, e lelei i lea tagata pe a nonoa se ma‘aolo tele i lona ua, ma fa‘agotoina o ia i le moana loloto’.

 Faitauga - Tusi Paia: Faaaliga 2:20-23

 Upu Folafola
I le tatou faitauga o le Tusi Paia o le aso, o lo’o faamatala ai e Iesu le mea e tupu ia Iesepela pe a le salamo. E toatele tagata I le tino o Keriso I nei aso o lo’o talanoa I le olaga faakerisiano, e peiseai ua anamua. O lo’o faapea mai e I ai mea o loo fausia ai faavae o le olaga faakerisiano ua le o toe manaomia ma e mafai ona sui faiga e fai ai ae tumau pea o kerisiano. Ua faapea mai, a tumau lava lou loto I le Atua, e le afaina ou laei aua e taua atu le tulaga o le loto. Ua galo iai latou, o le mea o lo’o I lou loto, e atagia mai fafo. Ua faapea mai e mafai lava ona e uo ma e agasala ae aua le faia le agasala. Ua galo I ai latou, o lē feoa‘i ma ē amio leaga e leaga ai amio lelei. Afai o oe e fa‘atupuina o mea e tausuai ai, po’o se tasi o lo’o tau solomua le  faamalosiau I tagata e le afaina sina agasala ina ia fiafia I nisi o faamanuiaga ma faafiafiaga I le lalolagi, o oe o le Iesepela. E faapefea ona e faapea mai ua anamua tele le fa’a kerisiano a’o Iesu e tumau lava o ia ananafi, o le aso ma a taeao? (Eperu 13:8). 

 E leai ma se tulaga e faapea e anamua pe fou foi le faakerisiano. O le faakerisiano e taulai le vaai ia Iesu. O so’o se a’oa’oga e o lua lava ma aoaoga a le lalolagi e le o se faakerisiano, o le a’oa’oga faa Iesepela. Aua e te a’oa’oina, talia pe faamalosiau foi ia faia. 

 O lo’o fetalai le Atua e na te faasala ia Iesepela I lona taofia lea o ia I le moega. E toatele tagata ua tutupu ai ni ma’I tuga e aunoa ma lo latou iloa o le faapogai e mai le Atua. A leai se salamo, e latou te feoti I nei ma’I ma e o’o foi I latou fanau. O lo’o fetalai Iesu I le Mataio 18:7 e faapea: 7‘Oi talofa i le lalolagi i mea e tausuai ai! Auā e ao ‘ona tutupu mea e tausuai ai; ‘ae ui lava i lea, ‘oi talofa, i le tagata na te fa‘atupuina o mea e tausuai ai.

 Ia e faaeteete I mea o lo’o e a’oa’o I le fanau a le Atua I mea ane ua fetu’u oe e le Atua. 

 E leai se mea e ta’ua o le faakerisiano ua anamua, ia a’oa’o le Upu moni a le Atua e aunoa ma le fa’afilogia pe a maua lou avanoa. I le suafa o Iesu, Amene.  

OPEN HEAVENS
MATALA LE LAGI MO LE ASO TOONAI 13 AOKUSO 2022

 Manatu Autu: Tusi I le Ekalesia I Tuatira 1(Letter to The Thyatiran Church 1)

 Tauloto – Tusi Paia: Faaaliga 2:20 “A ‘ua ‘iā te a‘u ni nai mea ‘ou te lē fiafia ai ‘iā te oe, ‘ona ‘ua e tu‘u pea le fafine o Iesepela, ‘ua ta‘ua o ia e ia o le perofeta fafine, e a‘oa‘o ma fa‘asesē i a‘u ‘au‘auna, ‘ina ‘ia faita‘aga, ma ‘a‘ai mea na fasia mo tupua.?”

 Faitauga - Tusi Paia: Faaaliga 2:18-29 

Upu Folafola
O Tuatira o se taulaga tele o pisinisi sa I ai le tele o Iuni po'o faalapotopotoga a le au fai oloa.  E na o I latou fo'I la o fa'alapotopotoga nei sa faataga e faatau a latou oloa I totonu o le taulaga o Tuatira. Peita'I o nei fa'alapotopotoga sa masani na fai latou faigāai po'o ‘aiga I totonu o fale o tapuaiga ifo I tupua ma fai ai lava ma le faita’aga. A fia faatau la oloa a tagata o le ekalesia e tatau na avea ma sui o fa'alapotopotoga nei ma faapenā ai fo'I na auai i le ifo I tupua ma le faitaaga. O se faafitauli ogaoga lea tulaga ma sa I ai fo'I  se fafine I le ekalesia na ia aoao ma fa’asesē tagata e fai le agasala. O lea fafine na ia taua ia o le perofeta fafine mā e toatele na talitonu I so'o se mea na te aoao. O mea na lē fiafia ai Iesu I le Ekalesia I Tuatira ona ua ia tu'u pea le fafine lenei o Iesepela e a’oa’o ma lauga e pei ona tatou faitau I le upu tauloto o le asō.

 Na iloa lelei e tagata o le ekalesia o le fafine lenei o lo'o ia faatosina tagata o le Atua e mulilua, ifo I tupua ma faita’aga ae tu'u lava e fai. E tatau ona matua'I faaeteete ta’ita’i o ekalesia I tagata e fa'ataga na tutū I pulela’a e a'oa'o I totonu o tatou ekalesia ina ia aua ne'I fa'atupu se tigā I le finagalo o Iesu ia I tatou. Mautinoa ā o lenei fafine e lauiloa ma tele ana tupe. E lē tatau na e fa'ataga le fanau a le tiapolo e a'oa'o le fanau a le Atua tusa po'o le a le tele o se latou sao I galuega fai a le ekalesia.

 O lo'o tatou fa'ataga pea ni Iesepela I le la'oai a le Atua I aso nei.  A fa’alauga e le taitai o le Ekalesia I latou e popoto fa'apitoa I mea o le lalolagi ae lē Kerisiano ua latou fa'a ulufale Iesepela I le Ekalesia. O lea fo'I tagata e lē mafai na ia a'oa'o le Tusi Paia auā e lē o ola ai. Latou te a'oa'o ā talitonuga ma faiga faapaupau o lo’o ola ai. O le taimi e te fa'ataga ai ma tu'u se tagata I luma o le fanau a le Atua e aoao I latou, o lona uiga ua e fai atu I le fanau a le Atua o le failauga o se tagata lelei ua agava’a e fai ma fa'ata'ita'iga lelei ma ua tatau na faalogo I ana aoaoga ma fa'ata'ita'I I ana amio.

Po'o le ā lava se vaega o le soifuaga e te mana'o e aoao I lau aulotu ina ia manuia ai, saili se kerisiano ua faamanuiaina I lea mataupu/vaega e fa'asoa ma a’oa’o le aulotu. Afai e lē maua se isi tago oe e a’oa’o lau aulotu e ala I le fesoasoani a le Agaga Paia ia latou popoto ai ma manuia. Aua ne'i e  avea se avanoa ia Iesepela e a’oa’o ai tagata o le Atua I ala o le tiapolo. I le suafa o Iesu Keriso, Amene.

OPEN HEAVENS
MATALA LE LAGI MO LE ASO FARAILE 12 AOKUSO 2022

 Manatu Autu: Tusi I le Ekalesia I Perekamo (Letter to The Pergamos Church)

 Tauloto – Tusi Paia: 1 Korinito 5:6 “E lē tusa lo ‘outou mitamita. Tou te lē iloa ‘ea o se mea fa‘afefete itiiti, e fa‘afefeteina ai le paluga falaoa uma lava?”.

 Faitauga - Tusi Paia: Faaaliga 2:12-17

 Upu Folafola
O le Ekalesia I Perekamo sa mautu lona tulai mai. E latou te lei faafiti I le faatuatua e ui ina tele faigata na latou feagai. E pau le mea e tasi na tetee ai le Atua I ai latou, ona latou te faafiafia I tagata agasala e aunoa ma le lapataia o I latou I le sese o mea o latou faia. E le lava le ola faapaiaina na o oe lava, e tatau foi ona e naunau e ola faapaiaina le aulotu atoa. E le tatau ona faatelegese le taumafai e faasa’o mea sese o loo faia I totonu o le Ekalesia, le tino o Keriso. E le o faapea atu e tatau ona talanoa sa’o I so’o se tasi ae tatau ona faailoa I tagata uma mea moni ma mea e le moni. E te le tau ta’ua ni igoa, e iloa lava e tagata ē o lo’o faatatau iai so’o se mataupu e talanoaina. O le a manino ai, e te lē lagolagoina a latou mea o lo’o faia. Fai mai le Tusi Paia:   
11A o lenei, ‘ua ‘ou tusi atu ‘iā te ‘outou, ‘ai se tasi ‘ua ta‘uusoina ‘ae faita‘aga, pe matape‘ape‘a, pe ifo i tupua, pe agatele, pe ‘onā, pe fao mea; ‘aua lava ne‘i tou feoa‘i, ‘aua fo‘i tou te ‘a‘ai fa‘atasi ma lē o fa‘apea. 1 Korinito 5:11

 I le tele o aulotu I nei aso, ua tau le manino le laina I le va o le lotu ma le lalolagi. I le taimi o pese ma viiga, ua latou faaaogaina mea faili ma pese e pei lava o le lalolagi. O tagata o le aulotu ua sisiva I ituaiga o gaoioiga a le lalolagi. Ua e vaai I tamaitai ua faia lavalava e fufusi ma faaali ai itu tino (tulou). O nisi o tamaitai o le aufaipese ua tele vali ma teuga e manino ai sa tele atu sauniuniga ia faalalelei le tino nai lo le agaga (1 Peteru 3:3-4). Fai mai le Tusi Paia ia vavae mai le lalolagi (2 Korinito 6:17). Afai o le malamalama ua amata ona faapei o le pogisa, e mautinoa lava ua pogisa. 

 Ua iai foi I le au kerisiano, le agaga o le au Nikalaitai o loo faapea mai, ‘tau lava o le avatu o lou ola ia Keriso, ona pule lava lea o oe pe fai le agasala aua o loo e I lalo o le alofa tunoa o le Atua’. O nisi o nei tagata e matutua ma maualuga I le galuega a le Atua, ma o nisi o faifeau laiti o lo’o malamalama lelei ae ua fefefe e faalavelave ma tautatala I le mea moni. Aua e te filemu. Tautala ma faailoa I so’o se tagata e faalogo ia te oe o le agaga lea o le au Nikalaitai e mai a satani ma e inosia ia Iesu (Faaaliga 2:15). 

 I le Faaaliga 2:15-16, na fetalai Iesu e afio mai o ia e faasagatau iai latou e mulimuli I a’oa’oga sese I totonu o le Ekalesia. Suesue ma Iloilo lelei, o oe ea o se tasi o I latou nei? I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 11 AOKUSO 2022

 Manatu Autu: Tusi I le Ekalesia I Semurana 2 (Letter to The Smyrna Church 2)

 Tauloto – Tusi Paia: Mataio 10:28 “Aua fo‘i tou te matata‘u i ē fasioti le tino, ‘ae latou te lē mafaia ‘ona fasioti le agaga; ‘ae lelei ‘ona ‘outou matata‘u i lē ‘ua mafai ‘ona fano ‘iā te ia le agaga ‘atoa ma le tino i Kēna.”.

 Faitauga - Tusi Paia: Faaaliga 2:8-11

 Upu Folafola
Na faamalosiau Iesu I le Ekalesia I Semurana, e ui ina latou ui I faigata ona o le oti I le tino nei, e latou te le ui I le oti faalua ona o lo’o latou auauna ia te ia. A faapea ua faaaogaina e Iesu lea faatusatusaga, o lona uiga e sili atu le matuia o le oti faalua I lo le oti I le tino nei. O le tulaga lea ou te alofa ai I tagata o loo filifili e faia pea le agasala I lo le ui I ni nai faigata ona o le talalelei. E le tatau ona e fefe I le oti I le tino nei, ae e tatau ona e fefe I le oti I le agaga (Mataio 10:28). O le oti I le tino e na o sina taimi, ae o le oti I le agaga e faavavau. 

 E iai tagata e naunau e fia faia mea e sili atu I lo Iesu ae le naunau e ui i puapuaga e pei o ia. Fai mai Paulo:10‘Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu, Filipi 3:10  

 E le mafai ona e iloa lelei Iesu e aunoa ma lou ui I ona puapuaga ma tiga. Afai o loo e sau ia Keriso ona o mea e maua ai, ae sola mamao ese ma alu atu ia satani pe a oo mai tiga ma faigata, o lona uiga e le tatau ona e mauaina se pale. Afai e te le alofa moni ia te ia ma lafoai lou ola i ate ia, o lona uiga e le tatau ona e maua le ola e faavavau. Na fetalai mai o ia: 25Auā ‘ai sē fia fa‘asaogalemūina lona ola, e māumau ai ‘iā te ia; a o lē fa‘amaumau lona ola ‘ona o a‘u, e maua ai e ia. Mataio 16:25

 O le ola moni e tatau ona e u’u mau, o le ola e faavavau. Aua nei e faatagaina ni mea o lenei lalolagi e ono e alu atu ai I le oti faalua ma faoa ai lou avanoa I le lagi. Na fetalai Iesu I le tusi I le Ekalesia I Semurana, o lona faanaunautaiga ia latou faamaoni I le faatuatua seia oo I le oti. O nisi e lei taitai ona oo I le oti ae ua amata ona leai se faatuatua. O e lavea ai I le vaega lena? O e tumau pea I le faatuatua I le Atua I le ogatotonu o tiga, puapuaga ma faaosoosoga? O le asō o se aso lelei e te salamo ai. Afai e te musu e salamo, aua e te manatu e te maua le lagi aua na fetalai Iesu afai e te faafiti ia te ia I le lalolagi nei, e faafiti foi o ia ia te oe I le lagi (Mataio 10:33). I le suafa o Iesu, Amene. 

OPEN HEAVENS
MATALA LE LAGI MO LE ASO LULU 10 AOKUSO 2022

 Manatu Autu: Tusi I le Ekalesia I Semurana 1 (Letter to The Smyrna Church 1)

 Tauloto – Tusi Paia: Isaia 55:8 “Auā o o‘u manatu e lē o ‘outou manatu, o o‘u ala e lē o ‘outou la, ‘ua fetalai mai ai le ALI‘I”.

 Faitauga - Tusi Paia: Faaaliga 2:8-10

 Upu Folafola
Ai o e to manatu pe na faia e le Ekalesia I Semurana se mea e le fiafia ai le Atua, aua o lo’o talanoa I le tele o puapuaga na latou ui ai e o’o lava ina lafoina I le falepuipui e aunoa ma le faapea mai na ia laveai iai latou I se taimi. O lenei tusi I lona atoaga, e aumai ai iai tatou se ata I manatu o le Atua. 

 Muamua, e ui e foliga mai e le silafia e le Atua le taimi e sauaina ai lana fanau, e silafia e ia mea uma ma o lo’o faatali mai oe le pale pe afai e te tumau seia oo I le iuga. Lona lua, aua ua silafia e Iesu o nisi e maliliu ona o le sauaina, na ia faafeiloai atu iai latou, o se tasi sa maliu ae o lo’o soifua pea. E silafia ma malamalama o ia i mea uma o lo’o tatou ui ai. E faalatalata mai o ia ma faailoa mai sa ui o ia I tulaga uma ia, ae na ia manumalo ai. Fai mai le Eperu 4:15
15Auā e lē ‘iā te i tatou se ositaulaga sili e lē mafaia ‘ona tigā alofa fa‘atasi ma i tatou i o tatou vaivai, a ‘ua fa‘aosoosoina o ia i mea uma pei o i tatou, a ‘ua leai se agasala ‘iā te ia.

 Po’o le a lava le tulaga o lo’o e ui ai, na ui ai Iesu muamua ma na ia manumalo ai. E te manumalo foi I le suafa o Iesu. O nisi o taimi o nei sauaga e auala mai I nisi o kerisiano. O loo fetalai Iesu e tatau ona tatou tumau I le faatuatua. Tusa lava po’o a mea e faia e nei tagata, e tatau ona e vaavaai atu ia Iesu Keriso aua o ia o lē na te ta‘ita‘iina ma lē na te fa‘a‘ato‘atoaina le fa‘atuatua (Eperu 12:2). 

 I le vaega mulimuli, ua tatou iloa le finagalo o le Atua I le oa ma le tamaoaiga. E ui o nei tagata na ola I le mativa, na fetalai Iesu e mauoa I latou (Faaaliga 2:9). I le tagata, o le mauoa o le tele o taavale ma fale, a’o le Atua o le mauoa o le tagata e tele lona faatuatua. Fai mai le 2 Korinito 6:10, o nei tagata e foliga mai e matitiva, e mauoa I latou aua o lo’o latou faaoloa isi tagata. O tagata ia o loo faaputuina le oa I le lagi I le faaaogaina uma o lo latou tamaoaiga e alai ai le talalelei I le malo o le Atua (Mataio 6:19-20). Ou te le o faapea atu o le agasala le mauoa I le tamaoaiga, o le mea moni o lo’o faapea mai o ia o le Atua o Aperaamo, Isaako ma Iakopo (Esoto 3:6) ae o tagata maumea uma I latou. Ia e malamalama I le tulaga lenei, tusa lava po’o le a le maualuga o lou mauoloa, e le tatau ona e vaai I le oa ma le tamaoaiga o ni au oa. E faatoa e mauoa pe afai e te mauoa I le faatuatua. Ou te lui ia te oe ina ia fausia lou faatuatua I le tulaga e o’o ia Iesu Keriso o le a molimau o oe e te mauoa I le faatuatua, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 9 AOKUSO 2022

Manatu Autu: Tusi I le Ekalesia I Efeso 2 (Letter to The Ephesus Church 2)

Tauloto – Tusi Paia: Mataio 15:8 “Ua āva mai ‘iā te a‘u lenei nu‘u i o latou laugutu, a o latou loto ‘ua taumamao ‘iā te a‘u.” 

 Faitauga - Tusi Paia: Faaaliga 2:4-7

 Upu Folafola
O e taumate pe fa’apefea ona fetalai atu Iesu, ua galo i le Ekalesia i Efeso lo latou uluai alofa, a ua uma ona ia fetalai atu e uiga i galuega, gaioiga ma lo latou onosai (Faaaliga 2:4). Ua ta’u manino mai ai, o gaioiga uma na latou faia i le galuega a le Atua, e lei afua mai i o latou loto. Ua avea ma se latou faiga masani. Ua le o toe iai se mafutaga loloto ma le Agaga Pa’ia.

 E toatele le ‘au Kerisiano i aso nei, ua pa’uu atu i le mailei a Satani. A latou auai i se mafutaga tatalo, e atoa se lua itula o tatalo. Peitai, a o’o i totonu o latou tama’i potu, e toetoe a le atoa se lima minute e mafai ona tatalo ai. A sauni le ‘au evagelia mo le galuega tala’i e muamua taunuu atu le isi tagata, ae e le mafai ona ia tala’i atu le tala lelei i  lona lava tua’oi, e le talitonu i le Atua. Auoi! Ua tuanai atu aso sa e taunuu ai i le lotu ae faapea mai le faife’au, e te sauni e lauga i le taeao lena, o aso ia sa avea ai tagata uma ma fitafita, sa nonofo sauni i so’o se taimi e faaaogaina e lona Alii.

 A o aso nei la, seiloga e tatalo faatauanau le faife’au ma ia lava se taimi e tau tapena ai sana fa’anoi i se sui o le Ekalesia mo le faaaogaina o lana taavale i se galuega  a le ‘aulotu. O le faanoanoaga, ua maluluina ma liu aisa le uluai alofa a le to’atele. Po o uunaia oe e lou alofa mo le Atua e te faia gaioiga na e te faia mo  ia, pe ua ala ona e faia ona o ni tiute masani i totonu o le ‘aulotu? O punapuna a’e pea lou ulua’i alofa sa e lagona i le taimi muamua na faato’a tuuina atu ai lou ola ia Keriso? Po o le mea ‘ea o lou olaga fa’aKerisiano ua na o ni fa’aputuga o galuega faatino?

 Faaaliga 2:5 “O lenei, ‘ia e manatua le mea na e pa‘ū mai ai, ma ‘ia e salamō, ma e faia au ulua‘i galuega; ‘āfai e leai, ‘ona ‘ou vave alu atu lea ‘iā te oe, ‘ou te ‘ave‘esea lau tu‘ugāmolī i le mea e tu‘u ai, pe ‘āfai ‘e te lē salamō”.

 I le amataga o le tusi, sa fetalai le Atua i lona vaaia o galuega sa latou faia. I le fuai‘upu e 5 ua ta’ua i luga, sa ia fetalai ai ua tatau ona latou toe fo’i i o latou uluai galuega. E iai galuega ua e faatinoina ona o au faiga masani ai, a ua le o afua mai ona o sou alofa mo le Atua, ae iai foi galuega ua e faatinoina ona o lou alofa mo ia. Ua fetalai mai Iesu ia te oe i le aso, ia e toe fo’i e fai au ulua’I galuega, sa afua mai i lou ulua’i alofa. E tusa foi po’o ni gaioiga masani a ia afua atu, ona o le alofa.

Ia e fesili lava oe ia te oe. O le a le mea o u’una’ia a’u ou te faia le galuega a le Atua? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 08 AOKUSO 2022

Manatu Autu: Tusi I le Ekalesia I Efeso 1 (Letter to The Ephesus Church 1)

Tauloto – Tusi Paia: 2 Korinito 6:14 “Aua tou te amo fa‘alegatasi ma ē lē fa‘atuatua; auā pe fa‘apefea ‘ona fa‘atasi o le amiotonu ma le amio leaga? Pe fa‘apefea fo‘i ‘ona mafuta o le malamalama ma le pouliuli?” 

Faitauga - Tusi Paia: Faaaliga 2:1-3

Upu Folafola
O le mea muamua lava na fetalai atu ai Iesu I le Ekalesia I Efeso ina ua mua’i faailoa atu o ia iai latou, o lenei: ‘Ua ‘ou iloa au galuega, ma lou tigā, ma lou ‘onosa‘i, ‘ina ‘ua e lē lavātia i ē ‘ua leaga; ‘ua e tofotofo fo‘i i ē ‘ua fai mai o ‘aposetolo i latou, ‘ae leai lava, ‘ua e iloa fo‘i o tagata pepelo i latou. Faaaliga 2:2 

 O lo’o silasila mai le Atua iai tatou. E na te silafia mea uma. Na ia faapea mai o le Ekalesia I Efeso e latou te le ola faatasi ma tagata agasala. Na faaesea I latou (2 Korinito 6:17). E te mafanafana ea I le faapotopotoga o tagata agasala? O loo fesili mai le Tusi Paia pe fa‘apefea fo‘i ‘ona mafuta o le malamalama ma le pouliuli?. Afai e te filifilia se paaga e te galulue faatasi I pisinisi e le fanaufouina, e na te ono faia ni gaoioiga faaalatua e le iloa atu e se tagata, ona e tau manatu lea pe aisea ua le tali ai le Atua I au tatalo ae leiloa, ua e valaaulia agaga leaga I lau pisinisi. 

 Na fiafia foi Iesu I le Ekalesia lea I Efeso mo le suesueina lelei ma tofotofo o tagata e o atu ma faapea mai o aposetolo I latou, ma ua iloa ai nisi e pepelo. Ina ua sauni Paulo e alu ese ma le Ekalesia I Efeso, na ia faapea mai: 29Auā o a‘u nei, ‘ua ‘ou iloa lenei mea, pe ā mavae ‘ona ‘ou alu, e o‘o mai ‘iā te ‘outou luko sauā o ē lē fa‘asaoina le lafu mamoe. 30E tupu mai fo‘i ‘iā te ‘outou lava tagata e tautala mai i mea fa‘api‘opi‘o, e fetoso ‘ese ai le ‘au so‘o ia mulimuli ‘iā i latou. Galuega 20:29-30 

 Na lapatai Paulo I ai latou I perofeta pepelo ona vave lea ona latou suesue lelei ma tofotofo so’o se tasi e faapea mai na auina mai I latou e le Atua. O iina e ta’u mai ai, o tagata o le Ekalesia lea, e le gata e faalogo I le Upu a le Atua ae savavali ai foi. Ana faapea e le faia vave e tagata o le Ekalesia le faatonuga a Paulo, semanu e tele le mau a’oa’oga eseese e ofi atu I totonu o le Ekalesia. O le mafuaaga tonu lea sa inosia ai ei latou le au Nikalaitai. O le au Nikalaitai, o I latou ia e faapea mai, e te fanaufouina loa, e faavavau loa lou fanaufouina, o le alofa tunoa pepelo. E le talitonu le Ekalesia I Efeso I nei pepelo aua sa latou suesue lelei ma tofotofo I agaga ae lei faalogologo atu I soo se failauga. E te ono pau ai i aoaoga pepelo pe afai e te le suesue lelei I so’o se agaga. 

 Tatalo
Tama, foai mai ia te au le meaalofa e iloa ai agaga ina ia aua nei ou paū I ni a’oa’oga sese, I le suafa o Iesu Keriso, Amene.  

 OPEN HEAVENS
MATALA LE LAGI MO LE ASO SA 07 AOKUSO 2022

 Manatu Autu: Tusi I Ekalesia? (Letters to The Churches?)

 Tauloto – Tusi Paia: Faaaliga 1:20 “O le uiga lilo o fetū e fitu na e iloa i lo‘u lima taumatau, ma tu‘ugāmolī auro e fitu. O fetū e fitu o agelu ia a ekalesia E fitu; o tu‘ugāmolī fo‘i e fitu na e iloa, o ekalesia ia e fitu.”

 Faitauga - Tusi Paia: Faaaliga 1:10-20

 Upu Folafola
Ua tatou iloa I le faitauga o le Tusi Paia o le aso ao taumafai atu Iesu Keriso e faalau ma faatonuina atu Ioane ia tusia ni tusi ma momoli atu I Ekalesia e fitu. Na filifilia e Iesu Keriso nei Ekalesia e fitu aua o loo faaalia ai  vaega o malosiaga ma vaivaiga o kerisiano mai lava I le amataga seia o’o mai I nei aso. I nai aso o le a sosoo atu, o le a tatou vaavaai I nei tusi taitasi ma suesueina ni lesona e maua mai ai aua foi e aoga mo le tino o Keriso ae faapena foi I tagata taitoatasi I totonu o Ekalesia. O lea la, e tatau ona e faaigoaina tusi mai lou faatoafaiava ia te oe, o Keriso o le faatoafaiava, a’o le Ekalesia, o I tatou, o lana faatoanofotane.

 O le fuaitau “O lē ‘ua i ai taliga, ‘inā fa‘alogo mai ia o ia” (Faaaliga 2:7, 11,17, 29, 3:6, 13, 22) o loo manino ai o loo tu’usa’o le mataupu I tagata taitoatasi. I le aso o le faamasinoga, e te maua taui o au galuega I le lalolagi nei, ma e le afaina po’o le a le Ekalesia sa e auai iai. 

 Ina ua faliu atu Ioane I le siufofoga na valaau ia te ia, sa iai tu‘ugāmolī e fitu e fai ma faailoga o le Ekalesia ma I lona ogatotonu, na ia vaai ai ia Iesu (Faaaliga 1:12-13). O lo’o faaali mai ai iai tatou o loo iai Iesu I le ogatotonu o le Ekalesia. O Iesu o lo’o I le ogatotonu o le matou Ekalesia RCCG ma e faapena so’o se aulotu. Aleluia. 

 E ui ina matagofie lenei faaaliga, e tatau foi ona aumai ai le matau iai latou e le o savavali I lona finagalo. O lo’o iai o ia I le ogatotonu o le mea o lo’o e iai ma e na te iloa atu mea inosia o loo e faia. E le gata I lea o loo ia iloa uma atu le au faamaoni ma o le a ia saunia le taui mo so’o se tagata e fua I galuega na ia faia. O le a se taui taua e ono saunia e Iesu mo oe?

 Na iloa atu foi e Ioane fetu e fitu I le lima o Iesu ma o nei fetu e fitu o agelu I latou a le Ekalesia. Ona o nei tusi o lo’o avatu I agelu o le Ekalesia (Faaaliga 2:1), o lona uiga o I latou o taitai o le Ekalesia, le faifeau. O faifeau o lo’o I ona aao. O le mafuaaga lea o lo’o faapea mai ai ‘Aua le tago i ē ‘ua ‘ou fa‘au‘uina, ‘aua fo‘i le agaleaga atu i a‘u perofeta.” (Salamo 105:15). Afai o oe o se faifeau, ia faamautinoaina e te le aumai ni mea inosia I totonu o le tovine ina ia aua nei tanumia oe I ona lima e faavavau.

 A fua I galuega ua e faatino, I lou manatu, o le a le ituaiga taui o lo’o saunia e Iesu mo oe? I le suafa o Iesu, Amene.