Samoan Devotional

OPEN HEAVENS
MATALA LE LAGI MO LE ASO LULU 2 NOVEMA 2022

 Manatu Autu: E le se tulaga laitiiti (No small platform)

 Tauloto – Tusi Paia: Roma 10:15 ‘‘Pe fa‘apefea fo‘i ‘ona latou tala‘i atu, pe ‘āfai ‘ua lē ‘a‘auina atu i latou? Pei ‘ona tusia, “E matagofie na‘uā o latou vae o ē ‘aumai le tala lelei i le manuia.”..”

 Faitauga - Tusi Paia: Ioane 4:6-30

 Upu Folafola
Na auina atu e le Atua Silisili Ese ona so’o I le Luka 10:1-6 e talai le Talalelei I nuu uma. Na ia avatu le mana e tele iai latou ina ia talai atu I aiga, ae le o le faia o sauniga ma faapotopotoga tetele. Na ia avatu le mana e tele e talai I aiga aua e le laitiiti se tulaga o le talai atu I tagata. Tau lava o le iai o se tagata se toatasi e faalogo I le talalelei, e taua tele lena tulaga. 

 I le Ioane 4:6-30, na lauga atu Iesu I le fafine e toatasi. O le la talanoaga lea na ia faia ai ni fetalaiga ma faaaliga matautia e faapea, “O le Atua o le agaga lava ia; o ē tapua‘i ‘iā te ia, e tatau ‘ona tapua‘i atu ai i le agaga ma le fa‘amaoni.” (Ioane 4:24). E ui e toatele e manatu o le lauga I se tagata e toatasi o se tulaga laitiiti, ae na fetalai Iesu o lona talai atu i le fafine lea o lana meaai (Ioane 4:32-34).

 Na ou o’o atu ou te lauga I se Ekalesia laitiiti lava e leai sa latou fale tapuai. Na pu’e e la’u fanau lo’u ata a’o ou lauga ai I lea Ekalesia ma latou tu’ua I luga o upega tafailagi ma e toatele na faateia ai. A’o a’u, ou te le malamalama I le tulaga e faateia ai I latou. E ui o se Ekalesia laitiiti, e iai I se nuu tua, ae a iai lava se tagata e toatasi ou taitaia ia Keriso, ou te alu ma lo’u fiafia ou te talai ai. I le faitauga o le Tusi Paia o le aso, na matua naunau ma tele le galuega a Iesu na talai atu ai ina ia manumaloina le agaga o le fafine lea e toatasi, ma o le fafine lea na aumaia le nuu atoa ia Iesu. O lena tamai faapotopotoga e foliga mai o se tulaga laitiiti, e leiloa poo iai se isi Adeboye. O a’u o se tama mai tuā, I le nuu o Ifewara. Peitai, mai lena tamai nuu, na manumaloina e le Atua le agaga e toatasi mo ia lava, ae o le agaga lena e toatasi, o loo ia aumaia le miliona o tagata I le malo o le Atua. Aua lava nei e manatu mamā I se avanoa e manumaloina ai se agaga mo Keriso. O so’o se tulaga lava e avatu ia te oe e talai ai le Upu a le Atua, o se tulaga telē. 

 E toafia tagata o loo mulimuli ia te oe I le Twitter, Instagram, Facebook ma isi? E fia ni imeli ma numera a tagata o loo ia te oe? O nei tulaga uma o ni auala e mafai ona e faaaogaina e talai ai le Talalelei I tagata e manumaloina agaga mo le Alii. O leiloa po’o le isi Billy Graham o loo I ai I tulaga fesootai uma o lo’o ia te oe, ae o lo’o faamoemoe le Atua ia te o’e ina ia manumaloina le agaga lena e tasi mo Ia. Aua le faamaimauina le avanoa ma le tulaga lena e ia te oe, faaaoga lelei. 

 E leai se tulaga e laitiiti I le talaiina o le Talalelei ia Iesu Keriso, I le suafa o Iesu, Amene.  

OPEN HEAVENS
MATALA LE LAGI MO LE ASO LUA 1 NOVEMA 2022

Manatu Autu: Aua e te ‘ata (Don’t laugh)

Tauloto – Tusi Paia: Faataoto 24:17 ‘‘A pa‘ū lē ‘ua ita ‘iā te oe, ‘aua ‘e te fiafia i ai; a tausuai fo‘i o ia, ‘aua le ‘oli‘oli ai lou loto;..”

Faitauga - Tusi Paia: Faataoto 24:17-18

Upu Folafola
O tapulaa a le Atua, e foliga mai e faigata ona tatou ola ai, ae afai e te taofi iai, e te silafia I se taimi, o lo’o galue mo lou manuia. O se tasi o ia tapulaa o loo ta’ua i le Mataio 5: 44 e faapea: ‘Ae ‘ou te fai atu ‘iā te ‘outou, ‘ia ‘outou alolofa atu i ē ‘ua ita mai ‘iā te ‘outou, ‘ia ‘outou fa‘amanuia atu i ē ‘ua fetu‘u mai ‘iā te ‘outou, ‘ia ‘outou agalelei atu i ē ‘ua ‘ino‘ino mai ‘iā te ‘outou, ‘ia ‘outou tatalo fo‘i mo ē ‘ua tu‘ua‘i fua mai ma fa‘asauā mai ‘iā te ‘outou;

 O loo faapea mai e tatau ona e alofa atu i ou fili poo e ita mai ia te oe. E te talitonu ma le faamaoni,  afai o iai ni ou fili e te iloa lelei, e te ioeina pe a ou fai atu, o le alofa atu ia i latou o se mea e faigata ona faia. Peitai, e tatau ona e alofa atu ia i latou. I le fuaiupu 45 o le tusi lenei o Mataio 5o fa’apea mai le Alii: 45‘ina ‘ia faia ‘outou ma atali‘i o lo ‘outou Tamā o i le lagi, o lē na te fa‘aoso i lona lā i ē ‘ua amio leaga ‘atoa ma ē ‘ua amio lelei; ‘ua ia fa‘atotō ifo fo‘i le ua i ē ‘ua amiotonu, ‘atoa ma ē ‘ua amioletonu.

  I se isi faaupuga, afai e te lē alofa i ou fili, e le o oe se atalii po o se afafine a le Atua. Afai e te ‘ata ia ou fili i aso o latou puapuagā, e le o oe o se afafine poo se atalii o le Atua. O le mafuaaga lena e le mafai ona e faatauemu ia ou fili pe afai e le o i’u manuia a latou taumafaiga, aua o uiga na a le ti’apolo. Ae sili atu le leaga pe a fai o e tatalo ia i’u le manuia ana taumafaiga, e le tatau ona e faia lea gaioiga pe afai o oe o se atalii  po’o se afafine o le Atua. I le tusi o le Roma 12: 14-15 o loo faapea mai le Tusi Pa’ia: 14‘Ia fa‘amanuia atu i ē fa‘asauā mai ‘iā te ‘outou, ‘ia fa‘amanuia lava, ‘ae ‘aua le fetu‘u.  15‘Ia ‘outou ‘oli‘oli fa‘atasi ma ē ‘ua ‘oli‘oli, ‘ia ‘outou tagi fo‘i fa‘atasi ma ē ‘ua fētāgisi.

 E le o faapea mai le fuaitau lenei, e te olioli pe afai o loo fetagisi ou fili, pe o faapea mai, ia fetagaisi pe a afai o fetagisi au uo. Afai e iai ni aso e fetagisi ai sou fili , ia e mafuta ia te ia, ma faamafanafana ia te ia. Ia tatalo mo i latou, ia faamutaina lo latou fetagisiga i se taimi lata mai. Aua e te fiafia i le pa’u po’o le malaia o se isi tagata, auā e le o se foliga vaaia lena o se afafine  poo se atalii o le Atua. O loo faapea mai le faitauga o le Tusi Pa’ia o le asō, afai e te ‘ata ma olioli i le pa’u a se tagata, o le a le fiafia le Atua ia te oe. Aua e te faa’ono’ono i le Atua.    

  Aua e te ‘ata pe a pa’uu ou fili po’o e ita mai ia te oe, I le suafa o Iesu Keriso, Amene.   

OPEN HEAVENS
MATALA LE LAGI MO LE ASO GAFUA 31 OKETOPA 2022

Manatu Autu: Fofō o tagata ua ulufia e temoni (Dealing with demon possessed people)

Tauloto – Tusi Paia: Eperu 12:24 ‘‘Ma Iesu le puluvaga o le feagaiga fou, ma le toto e sausau ai, o lo‘o tala mai i mea e sili ‘ona lelei i lo le toto o Apelu..”

Faitauga - Tusi Paia: Faaaliga 12:11

 Upu Folafola
E lē o tagata uma e te vaai atu iai e pei o tagata masani. E toatele o lo’o ulufia e temoni. O nisi ua fiafia e fai le faitaaga, o nisi ua atua I le oa ma le tamaoaiga, o nisi e fiafia e lotolotoi I nofoaga e fiafia iai temoni e pei o fale kalapu ma isi. O nei tagata e ono ulufia e temoni. E iai auala e te iloa ai po’o ulufia I latou e temoni. Peitai, o le auupega sili e te iloa ai po’o ulufia se tagata e temoni, o le meaalofa a le Agaga Paia o le suega o agaga. Po’o le a lava, afai e te masalosalo o se tagata o lo’o ulufia e ni temoni ma o lo’o tau fai iai sau galuega e faasaoloto, e tatau ona sausauina oe I le toto o Iesu I taimi uma. 

 O le toto o Iesu e faamaufaailogaina ai oe I le malosiaga o le pogisa ma e le mafai ai e so’o se agaga o le pogisa ona pa’I ia te oe. Afai e sausauina oe I le toto o Iesu, ua e faamautuina o oe e avatu lou ola ia Iesu ma e o ese mamao temoni ma oe. E faapena foi I ou fanua ma meatotino. E mafai ona e sausauina au meatotino uma I le toto o Iesu ona e faatonuina lea o le tiapolo ia alu ese mamao. Mo se faataitaiga, afai e iai sau tagata faigaluega e te masalomia e ulufia e temoni ae e tetee e tuuina atu lona ola ia Iesu Keriso, e tatau ona e sausauina I le toto o Iesu ina ia aua nei iai se aafiaga I lau pisinisi. 

 I le Esoto 12:13, na faatonu e le Atua le fanauga a Isaraelu faapenei: 13E fai fo‘i le toto ma fa‘ailoga ‘iā te ‘outou i fale tou te i ai, ‘ou te va‘ai atu fo‘i i le toto, ‘ona ‘ou sosopo ai lea ‘iā te ‘outou e lē o‘o fo‘i ‘iā te ‘outou le mala e fano ai, pe a ‘ou taia le nu‘u o Aikupito.  

 So’o se mea e sausauina I le toto o Iesu e matua mumū ma vevela e le mafai ona pa’i iai se temoni. Ia e sausauina mea uma e feso’otai ma oe, e o’o I lau fanau I le toto o Iesu. E te le iloa ituaiga uo o loo latou mafuta I le aoga e o’o I faiaoga o lo’o a’oa’oina I latou. 

 Tatalo
Ou te sausauina a’u nei, o lo’u toalua, o la’u fanau, o lo’u aiga ma mea uma e fesootai ma a’u I le toto o Iesu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 30 OKETOPA 2022

Manatu Autu: E lagona mai oe e le Atua (He hears you)

Tauloto – Tusi Paia: 1 Peteru 3:12 ‘‘Auā o fofoga o le Ali‘i o lo‘o fa‘asaga i ē amiotonu, e liliu mai fo‘i ona taliga ‘iā latou fa‘atoga. A o fofoga o le Ali‘i o lo‘o fa‘asaga ma le to‘asā i ē fai amio leaga.”

Faitauga - Tusi Paia: 1 Ioane 5:14-15

Upu Folafola
O nisi taimi pe a tatou tatalo, e tatou te manatu e peiseaī e le o lagona mai tatou e le Atua. Ou te fa’amalosi’au ia te oe i le asō, a e tatalo ma lou loto atoa e faafofoga le Atua i so’o se upu e te ole atu ai i lau tatalo.

 Fa’aaliga 5:8 ‘Ua tō mai e ia le tusi ta‘ai, ‘ona fa‘apa‘ū ai lea o mea ola e fa ma toeaina e to‘aluafulu ma le to‘afa i luma o le Tama‘i Mamoe, ‘ua tofu i latou ma le kitara, ma le ipu auro ‘ua tumu i mea manogi e mū, o talosaga ia a le ‘au pa‘ia.

 O meaola nei e 4 ma toeaiina e 24 o lo’o tauaveina a tatou tatalo o lo’o i ai tonu a i le nofoalii o le Atua. E o’o atu I le Atua a tatou talosaga. O lona uiga o au tatalo e faafofogaina mai e le Atua mai lona nofoalii. Atonu ua leva ona tali mai le Atua i lau tatalo ae e te le o faalogo aua ua e naunau e fai lou mana’o ma ua e le lagona ai le siufofoga o le Atua. Atonu fo’i o lo’o agai mai le tali o lau tatalo ae le’i o’o I lona taimi e faataunuuina ai. Poo le a lava le mafuaaga, e faafofoga le Atua i au tatalo. Aua le taofia lau tatalo ona ua e manatu e le o faafofoga mai o ia. E lagona e le Atua tatalo uma. O nisi o au tatalo sa fai I le tele o tausaga ua mavae lea ua fa’ataunuuina i lou olaga I le taimi nei. Tumau I le tatalo e lē aunoa.

 E I ai le ituaiga tatalo ua ou maitauina e tali vave i ai le Atua. Vagana e silafia e le Atua o le tali o lau tatalo e lē lelei mo le uso. E tali vave le Atua i le tatalo e tagi mai le loto. Mo se taimi umi sa fai ma masani a Hana le alu I Sailo e ole atu I le Atua mo sana tama. Peitai na te lei maua se tali. I le 1 Samuelu 1: 10-13 sa tatalo Hana ma lona loto atoa, na sasa’a atu lona loto I le Atua mo se vavega. Fai mai le Tusi Paia na ona memu ona laugutu ae lē lagona lona leo.

 E tele tausaga ua mavae sa ou vaai I le peritomeina o se pepe tama. A’o faia le galuega sa tagi fa’ataio le pepe I le tigā ma i’u ina lē lagona sona leo. O le tagi lenā mai le loto. E te o’o I le tulaga o le momoli atu o lou loto atoa I le Atua i lau tatalo ina ua e lē toetoe a e le mafaia lou faafitauli. A o taumafai pea e tāli tāli lou faafitauli e ono faatuai mai le tali. Peitai e te filifili loa I lou loto e manumalo i lou faafitauli ma e tagi atu I le Atua ma lou loto atoa mo se vavega, e lē mafai na faatuai mai le tali o ituaiga tatalo na. Afai o oe o se atalii poo se afafine o le Atua e alu sa’o a lau tatalo ia te ia. Tumau i le tatalo. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO TOONAI 29 OKETOPA 2022

Manatu Autu: E leai se alofa e aunoa ma le a’oa’iga (No love without discipline)

Tauloto – Tusi Paia: Faataoto 13:24 ‘‘O lē ‘ua tu‘una lana sasa, ‘ua ‘ino‘ino o ia i lona atali‘i; a o lē ‘ua alofa ‘iā te ia, ‘ua sā‘ili le a‘oa‘iga mo ia.”

Faitauga - Tusi Paia: Faataoto 3:11-12

Upu Folafola
A e manao e alofagia oe e le Atua, talia ana a’oa’iga. O le tele o le alofa o le Atua iā te oe o le tele lea o le a’oa’iga o oe. E alofa le Atua i Lana fanau e fua o latou olaga aemaise I le manumalōina o agaga mo lona mālō, o lea na ia fetalai ai so’o se laau e fua mai e teuteu e ia. O loo faapea mai le Ioane 15:2
‘O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili’.

O le faamoemoe o le tapu’e ma a’oa’i ia e fua atili mai ni fua ma tupuolaola fa’aleagaga.

A a’oa’iina oe e le Atua i so’o se taimi e te sesē ai, e tatau ona e fiafia auā e tāua ma faapitoa oe i le finagalo o le Atua ma na te lē tuua oe ia fa’aleagaina. Peitai afai o lo’o e faia se mea sese a ua e lē toe faalogoina le siufofoga aoai o le Atua, ua tatau ona e fo’i atu ma tagi ia te ia e faamagalo oe aua ua foliga mai ua uma le taimi aoai o le Atua, o lenā ua tu’u a oe e o’o mai i ai puapuaga. O le taunuuga lea o le tagata e a’oa’iina so’o e le Atua ae lē usitai. O loo maua I le Hosea 4:17 lea fa’ata’ita’iga, ‘Ua pipi‘i Efaraima i tupua; ‘inā tu‘u ai pea ia ‘iā te ia.

Ua fai mai fo’i le Tusi o Roma 1:28. . ‘Ua latou lē loto fo‘i e tāofi i le matā‘upu i le Atua, o lea ‘ua tu‘uina atu ai i latou e le Atua i le loto leaga, latou te fai ai mea e lē tusa;

 Afai na e gaoi ae le’i maua, faitaaga a’o loo sologa lelei pea mea uma pei e leai se mea o tupu, sulu I le Atua mo sou faamagaloga auā masalo o lenā ua e I ai I lima o le tiapolo. Aua e te nofonofo ai pea ma fa’aauau le agasala. Ina ua leai se a’oa’iga poo se fa’asalaga, tagi atu I le Atua e alofa mai ia te oe. Fai I le Atua ua e salamō ma e te lē toe faia le agasala. E leai se mea e lilo I le silafaga a le Atua. Na sisila fofoga o le Atua o ē faia le agasala. Peitai afai ua leai se a’oa’iga mai le Atua ua tatau ona e tulivae I lou Atua ma tagi atu mo sou faamagaloga ia aua ne’i e i’u I le fa’afanoga.

 Afai o loo e faia pea le agasala ae ua filemu le Atua, o lona uiga ua aveesea oe mai le tulaga o se afafine poo se atalii alofaina a le Atua, tagi atu mo lona alofa mutimutivale, I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 28 OKETOPA 2022

 Manatu Autu: Faauta, e afio mai o Ia (Behold, He comes)

 Tauloto – Tusi Paia: Faaaliga 22:12 ‘‘Fa‘auta fo‘i, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu ‘ia tusa ma lana amio ‘ua fai.”

 Faitauga - Tusi Paia: Faaaliga 22:6-12

 Upu Folafola
O le toatele ia o tagata o loo momoe ma faia pea le amioletonu I so’o se mea o iai. E toeititi lava le mafai ona e mauaina ni tagata o lo’o nofo faatalitali pea I le toe afio mai o Iesu Keriso. E tatau ona tatou faaeteete ina ia aua nei avea le tamaoaiga ma le manuia faulai e galo ai iai tatou o loo iai so tatou nofoaga I tua atu o le olaga nei. Ina ia mautinoa e tatou te maua lo tatou nofoaga I le lagi, e tatau pea ona faamumu a tatou lamepa ma sauniuni aua afai na fetalai Iesu e toe afio mai, e toe afio mai lava. E tatau I tagata uma ona manatunatu lelei po’o fea e ono iai I le taimi e sau ai le siitiaga pe o’o foi I le taimi ua faapea mai le Alii, ua o’o I le taimi ua tatau ai ona e tuua le lalolagi nei. 

 Ou te manatua se tasi o fonotaga mo faifeau uma o Ekalesia penetekoso I Nigeria I ni tausaga ua leva, o se tasi o faifeau talavou e laitiiti atu ia te au na lauga. Na lauga malosi I le malo o le Atua, seoli, o le lepa afi ma le toe afio faalua mai o Iesu Keriso. E matautia lona vaevaeina o le Upu a le Atua ua na o le matou sioa ma faalogologo. E te manatu I le filemu na iai lea nofoaga I le taimi o le lauga. E maea ane le lauga, ua matou manino uma. Ona o a’u o le taitai o le sauniga, e tatau ona ou alu e faaiuina le sauiniga ma a’o ou savali atu I le pulelaa, na pau lau upu na faia o lenei, ‘E moni o toe afio mai Iesu, ae a faapea e oti pe maliu le tagata ae lei afio mai Iesu, o lona uiga, ua toe afio mai Iesu ia te ia’. Pau lava lena o lau tala na faia. Ona ou malaga lea ma ina ua ou toe foi mai I le lua vaiaso mulimuli ane, ua ou iloa, o le faifeau talavou lea na lauga, ua maliu. Ua afio mai Iesu ia te ia. 

 Le au pele e, e le tatau ona e fia ula I le mataupu lenei, auā foi e fua iai le ola ma le oti. O le filifiliga e faia e le tagata I le lalolagi nei, e fua iai le nofoaga e iai I le faavavau, ma ou te ta’u atu ia te oe, o le faavavau o se taimi umi. Fai mai le Eperu 9:27 e faapea: 27Pei ‘ona tofia fo‘i mo tagata ‘ia tasi lo latou oti, ‘ae mulimuli ane o le fa‘amasinoga.  

 Afai e te le talitonu ia te au, tau ina e talitonu I le Tusi Paia. O le taimi lava e oti ai le tagata, e faia lona faamasinoga I luma o le Atua. Afai e tatou te o’o uma I le oti I se aso, e tatau la ona tatou faaeteete I le ituaiga olaga tatou te ola ai I lenei lalolagi. Faauta, e toe afio mai Iesu mo lana faato’anofotane, le au paia. E tatau ona saunia lou tagata e feiloai ma le faatoafaiava ina ia aua nei tuua esea oe ma au.

 Tatalo
Tama, afai e te afio mai e siitia ou tagata, faamolemole ‘aua e te tuuesea au, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TOFI 27 OKETOPA 2022

 Manatu Autu: Tuuina atu uma I le Atua? (Sold out to God?)

 Tauloto – Tusi Paia: Filipi 1:21 ‘‘Auā o lo‘u ola ‘ua ‘iā Keriso lea; a o lo‘u oti, o lo‘u manuia lea”

 Faitauga - Tusi Paia: Roma 8:35-39

 Upu Folafola
Na malaga atu se faievagelia i se nuu ma lona faamoemoe, ia manumaloina agaga mo le malo o le Atua. E ese le faamanuiaina o lana misiona, ona o le toatele o tagata o lenei nuu, na ofoina atu o latou ola ia Keriso. Ina ua mavae ni nai masina, a’o latou mafuta pea, na filifili  lenei faievagelia, e fia malaga atu i le isi nuu e sosoo atu ia manumaloina agaga mo le Atua. Na faapea atu nisi o lenei nuu, e iai leona i le va o nuu nei e lua, ma afai e taumafai e sopoia lenei ala, e faʻaumatia uma I latou e leona. Peitaʻi, na maumauaʻi le faievagelia e alu pea I le isi nuu e talaʻi ai. Ina ua foliga mai e lē solomuli lava le finagalo o le faievagelia, na filifili ai se tasi o le nuu e muamua o iā, ma le faamoemoe, ia faaumatia ia e leona, ma maona ai ae laveaina le faievagelia a’o sopoʻia e ia le isi nuu e talaʻi ai. Ua matua tuuina atu atoatoa le ola o lenei tagata mo le Atua. O lona naunau e tuuina atu lona ola mo le talalelei ia Iesu Keriso ina ia talai atu i tagata agasala. O tuuina atu ea lou ola ma mea uma ia te oe mo Keriso?

O loo faapea mai le tusi a Ioane 12:25  
25O lē fa‘apelepele i lona ola, e fa‘amaumau e ia i ai; a o lē ‘ino‘ino i lona ola i lenei lalolagi, e maua ai pea e ia e o‘o i le ola fa‘avavau.

 A o avea aʻu ma faiaʻoga i le iunivesite o Ilorina, sa iai se nuu e matuā ʻinoʻino lava i tagata Kerisiano ma o’o ai lava ina latou fasiotia so’o se tasi e alu atu i inā e talaʻi ai. Na ou faapotopotoina tagata ma matou ō atu I le nuu lenei e talaʻi ai le talalelei mai lea fale i lea fale ma tufa atu ai a matou sāvali. E faalua ona lipoti i matou i le faauluuluga o le nuu, ae na matou faapea atu, e na o sāvali lava o loo tufa ma nai talatalanoaga o loo matou faia ma tagata. Ina ua amata ona pogisa, na fautua mai la matou au tala’i, ua tatau ona matou o ese, ae ou faapea atu, "Tatou faatali pea, ma sei faaali le ata na pu’e, e pei ona fuafuaina". I le viiga o le Atua, na o mai tagata o le nuu I le po lea ina ua faia le valaau mo le faaolataga E o’o mai I le aso, i totonu o lena lava nuu, o lo’o tele aulotu a Le Ekalesia Redeemed Christian Church of God o loo iai. Ua manumalo uma le nuu uma ia Keriso ona na matou tuuina atu mea uma iai matou I le Atua ma e le’i ‘alo ese mai lu’itau ma fita o le tala’iina o le talalelei i totonu o se si’osiomaga e ono afaina ai.

 Afai ua e alofa tele I lou ola, ma ua e faamamao I na nei lamatia lou soifua ona o le Talalelei a Keriso, o lona uiga, e ono maumau ma leiloa le ola o lea tagata. E lē fiafia le Atua iā te oe pe afai e lē o tuuina atu atoa lou ola ia te ia. I le Faaaliga 3:15-16 o loo faapea mai, a e le vevela, e te malulu. ‘Āfai ‘o loo e māfanafana, e lua‘i mai e ia ‘iā te oe mai lona fofoga. Afai e lē o tuuina atu lou ola ma le atoatoa ia te ia, o lona uiga e le o tuuina atu ia te ia. Filifili nei loa ma le poto le faavae o lou olaga. I le suafa o Iesu, Amene. 

OPEN HEAVENS
MATALA LE LAGI MO LE ASO LULU 26 OKETOPA 2022

 Manatu Autu: Talanoaga I le Agaga (Spiritual conversations)

 Tauloto – Tusi Paia: Iakopo 4:4 ‘‘O ‘outou tagata mulilulua e, tou te lē iloa ‘ea o lē fefa‘auōa‘i ma le lalolagi o le ita lea i le Atua? O lenei, o sē fia uō ma le lalolagi, ‘ua ‘avea o ia ma ita i le Atua..”

 Faitauga - Tusi Paia: 2 Korinito 6:14-18

 Upu Folafola
E taua tele le iai o uo kerisiano, o fanau foi a le Atua, o tagata e mafai ona e talanoa iai I le Tusi Paia ma mea uma I le Atua. E mafai ona e talanoa ma ia tagata I mataupu o le Tusi Paia mo le lua itula ae e te lagonaina e pei e na o le lima minute. O uo ia e mafai ona e faasoa atu iai I aoaoga o loo aoaoina ai oe e le Atua mai ana afioga, ma e faalogo foi I le faasoa mai, ona faia lava lea o suesuega loloto o afioga a le Atua e faatatau i so’o se mataupu. O le tulaga tonu lava lea o loo faaigoaina e le Tusi Paia ‘e ma‘ama‘ai le u‘amea i le u‘amea, e fa‘apea fo‘i ‘ona fa‘amafanafana o le tagata i lana uō’(Faataoto 27:17). 

 E te manaomia le faama’ai pea o lou tagata I le itu faaleagaga ia faifaipea ma o talanoaga ia e aoga ai. O ia ituaiga talanoaga, e le faapea e na o le lauga mai, ae o loo e lauga atu ma faasoa atu fo’i. Ao e faia ma lau uo, po’o au uo foi le aoaoina faatasi I le Tusi Paia, e amata ai ona e vaai atu ma le manino I nisi o vaega o le Tusi Paia ma e malamala ai foi I nisi o mea o loo tutupu I lou olaga. I le faia ai o ia talanoaga ma suesuega, e faama’ai ai lou tagata I le itu faaleagaga. 

 O nei talanoaga e iai foi lona auala e suia ai oe e ese mai I le feau o loo laugaina mai Ie pulela’a. O le isi lea faamanuiaga taua ma le aogā o mafutaga e faia I fale o aiga o lo’o faia e le matou Ekalesia o le Redeemed Christian Church of God.  E leai se faifeau I nei mafutaga e faia I fale o aiga, na o se taitai e taitaia, o tagata uma e na o le faasoa lava I le Upu a le Atua e tusa ma lo latou iloa. 

 Afai e leai ni tagata e te suesue ma talanoa iai I afioga a le Atua, e ono talafeagai le suia o au uo pe su’e foi ni au uo fou. Afai ua e pisi tele e leai sou taimi mo ni uo, e tatau la ona faia ia talanoaga ma lou to’alua. E oo mai lava I le taimi nei, e faia lava ma talatalanoaga faapea ma lo’u toalua. Ou te manatua se taimi e lei mamao atu na ma talanoa ai le ‘aiga na ai ai Elia I le 1 Tupu 19:5-8 ma na maua ai lona malosi mo le 40 aso na sosoo ai. E ese ma le taua pe afai e te maua se tagata e sili atu lona iloa o afioga a le Atua I lo oe, e mautinoa e te alu ese ma ia talanoaga, ua siitia ma faaosofia lou tagata. 

 O a mataupu e te talanoa ai ma au uo pe a tou faatasi? E tou te talanoa ea I mataupu o le Agaga pe na o mataupu o le olaga nei? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 25 OKETOPA 2022

Manatu Autu: O le a le tulaga o le a ia feiloai ai ma oe? (How will he meet you?)

 Tauloto – Tusi Paia: Mataio 24:44 ‘‘O le mea lea ‘ia ‘outou nofo sauni ai; auā o le itū aso tou te lē mānatunatu ai e sau ai le Atali‘i o le tagata.”

 Faitauga - Tusi Paia: Mataio 24:44-51

 Upu Folafola
Mo le toa’tele o fanau a’oga, e faato’a tapenapena lava mo a latou su’ega ina ua maua le fa’asologa o su’ega. Fa’afetai ua latou iloa  aso o suega. Ae mo i tatou o tagata Kerisiano, tatou te lē iloa le aso o le a faia ai a tatou su’ega. Tatou te le iloa le aso e toe afio mai ai le Alii Faaola I le siitiaga, po o le aso o le fa’amasinoga. A o’o i le aso o lena faamasinoga, o le a le tulaga o le a feiloa’i mai le Atua ia te oe?’ Pe mata e afio mai o lo’o e nofo sauni mo le feiloa’iga ma ia? O le tulaga taua e maitau mai, o le su’ega lea, e le toe iai se avanoa e te toe su’e ai pe a fai e te lē pasi. 

 O lo’o faapea mai le Eperu 9: 27, ‘Pei ‘ona tofia fo‘i mo tagata ‘ia tasi lo latou oti, ‘ae mulimuli ane o le fa‘amasinoga’.

 I le fuaiupu 45 o le tatou faitauga mai le Tusi Paia o le asō, ua tatou iloa ai se vaega o tagata ua auina atu e le Atua e fafagaina lana fanau i le loloto o lana Upu i le taimi tonu e tatau ai. Po’o e laugaina le upu moni a le Atua i tagata ua auina atu ia te oe? Afai ua faapena ona e faia, a o’o i le taimi o suesuega a i latou, o le a fa’aigoa oe o le tagata faamanuiaina ma o le a e nofo tupu fa’atasi ma Keriso.     

Peitai, afai e te lē o a’oa’oaina i latou i le Upu Moni ua faavaeina i le fa’aolataga, le ola faamamāina ma le papatisoga i le Agaga Pa’ia, faapea ma le toe afio mai o Keriso, e fa’aigoa lou tagata e le Tusi Pa’ia, o le tagata amioleaga.   ‘Aua ne’i e fa’atupu se finauga ma tagata, aemaise uso faife’au a le Atua, ona e foliga mai ua telegese le faataunuuina o le su’ega. ‘Aua foi ne’i e faia ni upu faitio ma ni fa’amatalaga fa’alumaluma ia i latou i luma o tagata lautele, pe afai e te le ‘au i o latou manatu, tusa lava pe a faapea na auina atu I latou e le Atua e talai le talalelei e pei fo’i o oe. ‘Aua foi e te amata ona militino ma tagata agasala ma e auai ma i latou I le agasala; o Lē na auina atu oe, le Alii o Iesu Keriso, o le a toe afio mai i se taimi, e matua e le iloaina. Ia vave ona e salamō pe afai e te ono feiloa’i ma Ia ae e te le o faia lana galuega I le tulaga e tatau ai, aua o loo fa’apea mai le tusi Pa’ia, o le a aveesea oe ma tuliesea oe i le nofoaga faatasi ma tagata lē faatuatua, i le mea e iai le taufaitagi auē ma le lilivau o nifo.

 Afai e toe afio mai Iesu, o le a le tulaga o le Ia feiloa’I ai ma oe e tusa ma le faia o lana galuega? I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 24 OKETOPA 2022

Manatu Autu: Filemu e pei se Vaitafe (Peace like a river)

Tauloto – Tusi Paia: Salamo 29:11 ‘‘E ‘aumaia e le ALI‘I le malosi i lona nu‘u; e fa‘amanuia e le ALI‘I lona nu‘u i le filemū....”

 Faitauga - Tusi Paia: Isaia 48:18-22

Upu Folafola

18 E! ‘ana ua‘i mai ou taliga i a‘u poloa‘iga, po ‘ua tusa ma se vaitafe lou manuia ma lau amiotonu o tusa lea ma peau o le sami. Isaia 48:18

 Mai le fuaitau o lo’o ta’ua I luga, ua tatou iloa ai se feso’otaiga ma le usitaia o poloaiga a le Atua e maua ai le filemu e pei o se vaitafe. Afai e talia e se tagata Keriso, o se lagona muamua latou te maua o le filemu. E peiseai ua te’i lava ua maua le lagona filemu. E faapena le tulaga e iai le fanau a le Atua, auā foi o Ia e afio I totonu I a’i tatou o le Perenise o le Filemu. O le fuaiupu taoloto mai le Tusi Paia o le asō, o lo’o faapea mai e avatu e le Atua le filemu I ona tagata. Afai e le o oe o se tasi o ona tagata, e le mafai ona e maua le filemu. O I latou e le usitai I le Atua e latou te le maua se filemu (Isaia 48:22).

 E sōsōla o ē amio leaga, a o leai sē tuliloa; va o ē amiotonu, e pei o le leona ta‘anoa i latou ‘ona lē mata‘u. Faataoto 28:1

 O le maua o le tele o tupe e le maua ai se filemu. E te maua le filemu tau lava o lou usitai I le Upu a le Atua. Na maua ni avanoa taua tele na ou feiloai ai ma ni tagata mauoa, e matua mauoa lava. Peitai ane, o nisi o nei tagata e le mafai ona momoe I le po. E iai se tagata e ese ma le mauoa na ma feiloai ae na fai mai ia te a’u e le mafai ona moe. Na fai mai, o so’o se taimi e moeiini ai ona mata o le a moe, e tei a I le vaai atu o taooto faatasi ma tagata oti. E ui e lei o’o lo’u tamaoiga I le tulaga e mauoloa tele, ae mautinoa o so’o se taimi ou te taoto ai I se aluga, ou te moe loa. 

 O le tagata na gaoi ananafi e le mafai ona maua se filemu aua o loo popole ma manatu pe le ono tuitui mai leoleo I le faitotoa. O le tagata o loo faia le mulilua e le mafai ona maua se filemu aua foi  o soo se taimi e vaai atu ai ua tago lona to’alua I lana telefoni e tau pe ai lona fatu. O le tagata na tautala pepelo ananafi o loo manatunatu pea I nisi pepelo e faaauau ai pea le pepelo lea na faia muamua. 

 O le le usitai I le Upu a le Atua e aveesea ai lou filemu. 

 Ia e filifili e usitai I le Alii I taimi uma, ona tafe lea o lona filemu I lou olaga, e pei o se vaitafe. 

 E leai se mea po’o se tasi e mafai ona ia avatu le filemu ia te oe, seiloga lava e aumaia ia te ‘oe e le Perenise o le Filemu. I le suafa o Iesu Keriso, Amene.