Samoan Devotional

OPEN HEAVENS
MATALA LE LAGI MO LE ASO SA 23 OKETOPA 2022

 Manatu Autu: O le Upu 5 (The Word 5)

 Tauloto – Tusi Paia: Salamo 119:105 ‘‘105 O lau afioga o le sulu lea i o‘u vae, ma le malamalama i lo‘u ala...”

 Faitauga - Tusi Paia: Salamo 119:103-105

 Upu Folafola
Isaia 30:21 E fa‘alogo fo‘i o ‘outou taliga i le ‘upu i o ‘outou tua, pe a ‘outou afe ane i le itū taumatau pe afe ane i le itū tauagavale, e fa‘apea mai, “O le ala lava lenei,” ‘ia ‘outou sāvavali ai.

 O le Upu a le Atua o le ta’iala lea e lelei atoatoa e manaomia e tagata uma. A o’o I taimi e mana’omia ai se filifiliga ogaoga i o tatou olaga, na o le Upu a le Atua e ta’ita’iina tatou I le faaiuga sa’o. So’o se taimi e manaomia ai sau faaiuga ma e tu’u faatasi ou manatu ma filifiliga faatasi ma le Upu a le Atua, o iina e sulugia ai e le malamalama vaega pogisa uma, fesoasoani I lau vaai ma lou mafaufau ia e malamalama ma manino I au filifiliga ma manatu, ma taitaiina ai oe i le faaiuga sili. O nisi taimi o le auala I le faaiuga tonu e ui atu I le tele o fuaitau o le Afioga Paia a le Atua e te suesue ai. O nisi nei o fuaitau e fesoasoani iā te oe Faataoto 18:13 ‘O lē na te tali atu i le ‘upu, a o le‘i fa‘alogo i ai, e fai lea mōna valea ma mea e fa‘amāina ai o ia’

 O le a fesoasoani le fuaitau lenei ia te oe e siaki po ua atoa faamatalaga e te manaomia e fai ai lau faaiuga sa’o. E laveaiina ai oe mai lou faia o se faaiuga e aunoa ma lou malamalama.

 Faataoto 14:15 O lē ‘ua faigofie, e talia e ia ‘upu uma; a o le ‘ua mafaufau, ‘ua fa‘autauta o ia i lona ala.

 O le fesoasoani lea e avatu ia te oe se isi faaiuga e lua a’i se manatu ua I ai e tusa ma faamatalaga ma faamaumauga ma e mautinoa ai e sa’o uma nei faaiuga. E mafai na e saili se fautuaga mai ia I latou e I ai le tomai ma le agava’a I le mataupu pe talafeagai lau faaiuga ua fai. Fai mai le Faataoto 11:14 A leai sē pule, ‘ua malaia le nu‘u; a o le to‘atele o faipule, e saogalemū ai.

 Mulimuli ane o le Upu a le Atua na te faasino le aotelega o ou manatu I lau amiotonu. Ua faapea mai le Faataoto 22:1 ia sili le mana’o ina ia ta’uleleia i le mana’o i le oloa e tele ma le agalelei ia sili lea I le ario ma le auro. ‘Alo ese mai faaiuga ma filifiliga e faaleaga ai lau amiotonu. O le Upu a le Atua e tumu I le tamāoaiga e leai se vaega o le soifuaga o le tagata e lē o’o I ai lana faatonu. Suesue le Upu a le Atua ia avea ai oe ma lē ua fiafia mai i ai le Atua (2 Timoteo 2:15). 

 Afai e te masani e te ola ma soifua I le Upu a le Atua, e seāseā ona e faia se faai’uga sesē, I le suafa o Iesu Keriso. Amene.

OPEN HEAVENS
MATALA LE LAGI MO LE ASO TOONAI 22 OKETOPA 2022

Manatu Autu: O le Upu 4 (The Word 4)

 Tauloto – Tusi Paia: Salamo 107:20 ‘‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia..’

 Faitauga - Tusi Paia: Salamo 107:17-20

 Upu Folafola
O le Upu a le Atua e i ai le mana mata’utia e malolō ai ma’i uma. A e manaomia le fa’amalolōga a le Atua suesue lana Upu. Fai mai le tatou upu tauloto o le asō, O le Upu a le Atua e mafai na auina atu e fa’amalolō ia I latou ma lavea’iina ai nai lo latou malaia.

 A e auina atu se feau i se tagata e I ai le ala e faatino ai. O le tasi auala e auina atu ai le Upu a le Atua o le Tusi Paia. O lea I lau Tusi Paia ua maea tuuina mai e le Atua le Upu e te manaomia e te malolo ai mai so’o se mai. A e suesue I ta’utinoga a i latou ua faamalolōina e le Atua, ma folafolaga a le Atua i le Tusi Paia e uiga I lou soifua maloloina, e mafai ai fo’i na auala mai ai le mana faamalolō o le Atua mai ana afioga e faamalolō ai oe.

 O le auala lona lua (2) e auina mai ai e le Atua lana Upu faamalolō o ana auauna. I le 2 Tupu 2:19-22 fai mai na fa’a magaloina le vai e ala i le upu a Elisaia. I le tusi 2 Tupu 5:10 o le taimi a na fai ai Elisaia iā Naamanu e alu e tofu I le vai o Ioritana na alu atu ai le mana faamalolō ma’i lepela o le Atua i le vaitafe.

 Mo se taimi umi sa faapea ai, so’o se taimi e fai ai Sauniga o le Agaga Paia, I Nigeria e uma na lauga le Upu ona faae’e lea o o’u lima i luga o i latou uma mo le faamalologa ma sa tele ni vavega na tutupu I nei sauniga. O se tasi aso sa ou tula’i ma fa’ae’e o’u lima i luga o tagata e sefulu afe mo se taimi e sili atu ma 5 itula. Na maea lenā sa ou iloa e lē mafai ona ou faia nā o a’u le galuega. O lea na ou valaau ai nisi o uso faifeau matou te galulue faatasi. Na o’u tufa atu I faifeau e tofu ma le fusiua sa ou faaaogaina muamua I isi sauniga o le Agaga Paia. Sa I ai le faauuga i luga o fusiua nei mai taimi na faaaoga muamua ai ma ina ua fusi pe fa’aaogā e le au uso nei fusiua ma matou galulue faatasi ma fa’ae’e lima i luga o tagata na tutupu vavega. Peitai na fa’atupulaia le toatele o tagata ma ua lē mafai na fa’ae’e lima ma tatalo ta’ito’atasi mo tagata uma. Na fetalai le Atua iā te a’u “A’o e laugaina le Upu e mafai fo’i na amata ai ma la’u faamalologa I le taimi lea.” O le amataga lenā o lo’u lagona o le siufofoga fetalai mai o le Atua iā te a’u I le ogatotonu o le lauga a’o ia faamalolō I tagata. O le taimi a e amata fetalai ai le Atua a’o laugaina le Upu ou te faailoa ai I tagata e faapea “Ua fetalai mai le Atua e I ai se uso iinei ua ia faamalolō ia te oe mai lou ma’i.

 A’o folafola le Upu a le Atua e ala i ana auauna galulue e mafai na momoli faatasi mai ai ma lana fa’amalolōga. Ou te tautala I le Upu a le Atua iā te oe i le taimi nei. Ia e malolō I le suafa o Iesu. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 21 OKETOPA 2022

Manatu Autu: O le Upu 3 (The Word 3)

Tauloto – Tusi Paia: 1 Timoteo 4:2 ‘Ia e tala‘i atu le ‘upu, ‘ia e fa‘amalosi i ona aso e taugalemū ai, ma ona aso e lē taugalemū ai, ‘ia e fa‘atonu atu, ‘ia e a‘oa‘i atu, ‘ia e apoapoa‘i atu ma le ‘onosa‘i uma ‘atoa ma le a‘oa‘o atu.’

Faitauga - Tusi Paia: Salamo 119:127-130

Upu Folafola
E masani I le tele o kerisiano aemaise lava faafeagaiga faauuina a le Atua, e ave le faamuamua I meaalofa a le Agaga Paia I lo le Upu a le Atua I o latou olaga. E latou te naunau I tagata ia vaaia faailoga aua foi e faigofie ai ona latou talia I latou, aua foi o loo tusia I le tusi o Ioane 4:48
“48‘Ona fetalai atu lea o Iesu ‘iā te ia, “‘Āfai tou te lē va‘ava‘ai i fa‘ailoga ma vāvega, tou te lē talitonu lava.”

O le mafuaaga lea e toatele ai I latou e faamuamua le galulue I meaalofa o le Agaga Paia I lo le laugaina o le Upu a le Atua. O so’o se galuega o le talalelei o loo faia faapea, e le taitai tumau I le taimi e tofotofoina ai. O so’o se mea e te faia ma tautala ai e tatau ona faavae I le Upu a le Atua ma e faapena foi ona e faailoa atu I soo se tagata e te lua feiloai. O loo’ faapea mai le Atua o tagata o loo ia auina atu ia te oe e te taitaia e pei o mamoe ( Ioane 21:15-17) ma e na o le pau le auala e tuputupu ai o latou olaga, o le aoaoina i le Upu a le Atua O lo’o faapea mai le 1 Peteru 2:2
2Fa‘apei o tama meamea fa‘ato‘ā fānau mai, ‘ia naunau ‘outou i le suāsusu fa‘aleagaga e lē suia, ‘ina ‘ia ‘outou tutupu ai i le fa‘aolataga.  

 I le Ioane 6:25-35, a’o saili e tagata Iesu ona o le mana e mafai ona faafaulai meaai, na teena I latou e Iesu ma faapea atu e sili atu ona latou saili I le areto o le ola, le Upu a le Atua. Afai e faia e se tagata se perofetaga ae lei fetalai mai ai le Atua, ae ua faia ona o le manatu o loo fia faalogo iai tagata, o lea tagata e le umi ona iai I le savaliga a le au kerisiano. 

 E iai se tagata na fai mai ia te au ou te tauina atu pe faailoa atu lona lumanai. Na ou fesili iai pe ua fanaufouina ae fai mai e leai. Ona ou tali atu lea ‘e le lelei le tulaga e oo iai lou lumanai aua fai mai le Upu a le Atua e malaia le au amioleaga’ (Isaia 3:11). Ona ia toe tali mai lea  faapea: ‘e faapefea pe ana ou fai atu ua ou faaolaina?’. Ona ou tali lea iai e manuia lona lumanai aua o loo fai mai ai le Upu a le Atua: Fai atu ia i lē ‘ua amiotonu, e manuia o ia auā o le fua o a latou galuega latou te ‘a‘ai ai. (Isaia 3:10). O mea uma e tatau ona faavae I le Upu a le Atua. 

 O le ulufale atu o le Upu a le Atua, ae le o vavega poo perofetaga e avatu ai le malamalama I agaga o loo e molimau atu iai (Salamo 119:130). Afai e faavae lau Ekalesia po’o se galuega a le Atua I meaalofa o le Agaga ae le o le Upu a le Atua, e le mafai ona tumau. Ua tusa ma le 45 tausaga talu ona ou iai I le galuega a le Atua. Ua ou vaai I le tele o galuega o le talalelei e tuputupu ane ona paū lea ma ua le toe iai, ona o le tulaga sese lenei ua le ave le faamuamua I le Upu a le Atua. 

 Ia e ola ma soifua I le Upu a le Atua, I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 20 OKETOPA 2022

Manatu Autu: O le Upu 2 (The Word 2)

 Tauloto – Tusi Paia: Esekielu 2:2 ‘‘Ua ulu mai fo‘i le Agaga i totonu ‘iā te a‘u ‘ina o fetalai mai o ia ‘iā te a‘u, ‘ua ia fa‘atūina mai fo‘i a‘u i luga i o‘u vae, ‘ona ‘ou fa‘alogo atu lea i lē na fetalai mai ‘iā te a‘u.’

 Faitauga - Tusi Paia: Salamo 119:97-105

 Upu Folafola
O le Afioga a le Atua e fa'atūla’iina oe ma fesoasoani i lou aiga e auala i vaega uma e faatatau I lau fa'aipoipoga, i ou faiva alofilima, o au pisinisi po'o so'o se taumafaiga lava o lo’o e feagai ai. O loo tusia I le Ioane 6:63 ‘O le agaga lea e tupu ai le ola, e lē aogā le tino i se mea; o ‘upu ‘ou te fai atu ai ‘iā te ‘outou, o le agaga ia, o le ola fo‘i ia’.

 A e suesue i le afioga a le Atua, o lo o nofo lana Afioga i totonu ia te oe, e faatumuina oe e le Agaga o le Alii. E faatulai oe e le Agaga i luga o ou vae, e manavaina e ia le ola i totonu ia te oe, ma e mafai ai lea ona e faia so’o se mea sa le mafai ona e faia muamua. E atoatoa le Afioga a le Atua, ma o so’o se mea lava e te manaʻomia, mo lou faamanuiaina, e maua uma i totonu o le Tusi Paia. E maua ai foi le anoanoai o savali ma apoapoaiga mo le faamautuina o lau faaipoipoga, ma e tele foi lesona e fesoasoani ia te oe e te maua ai manuia e taitaiina ai au pisinisi, aʻoaʻoga, faiga faʻaupufai o malo, fesoʻotaʻiga ma tagata, fesoʻotaʻiga ma le Atua ma soʻo se vaega lava e talafeagai i lenei olaga. O loo faapea mai le Faataoto 2:6 Auā o le ALI‘I na te foa‘i mai le poto mai lona fofoga le poto ma le fa‘autauta;

 I le taimi o le faama’I o le koronaviraisi a’o lokaina o tatou lotoifale, e I ai se tagata na fai mai sa  faʻaaluina lona taimi e suʻesuʻe ai I lomiga tuai o lenei faamalosiau o le Open Heaven, ma na ia iloa ai, e leai ma se mataupu po’o lesona e faalua ona faamatalaina mai le 20 tausaga talu ona tusia lenei faamalosiau. Aua foi o lenei faamalosiau  o le Open Heavens o se auupega po’o se metotia e suesue ai le Tusi Paia, ma o le atamai ma le poto e afua mai le afioga a le Atua e le mafai ona gata.

 A'o tusiaina la'u pepa o le faailoga o le PHD o le matematika, ua o'o a’u I le tulaga ua 186 fuaiupu faafuainumera ae ua le mafai ona maua se tali. Ua oo I se tasi aso, ua sau le musua ia te au, ua ou lelava. Ua ou faataatia ese lea galuega, ae amata ona faitau la’u Tusi Paia. Na ou faitau i le fuaitau na vaeluaina ai e le Atua le Sami Ulaula ina ia mafai e Isaraelu ona sopoia le isi itu(Esoto 14). Ona fetalai mai lea o le Agaga o le Atua ia te aʻu, o le fofo lena o lo’u faafitauli. Ua ou toe tago I la’u pepa o lo’o tusi, ma o le taimi lea ua ou vaevaeina ai a’u suesuega i ni vaega se lua – e tasi i le ituagavale ma le isi i le itutaumatau, e pei lava o le vaeluaina o le sami ulaula i le agavale ma le taumatau. Ona ou sueina lea o le tali I itu ia e lua ma ua maua ai le tali atoa o fuaiupu faafuainumera. O iina na maua ai le tali o a’u suesuega. O le afioga a le Atua na ou maua ai le malosi i tulaga faaleaoaoga! Ina ua ou tuuina atu laʻu pepa o au suʻesuʻega i le vasega o faiaoga o le tomai manino, e leai sana fesili na faia mo aʻu. Na o le faapea atu lava, I le vaega o loo iai le pule I nei mataupu, “Avatu loa I lenei Alii lona faailoga o le PHD”!

 Ia e suesue ma le totoa ma le faamaoni le Upu a le Atua e ala I le taitaiga a Agaga Paia, e na te avatu ia te oe le poto e te manaomia e te tu ai ma le faamanuiaina I so’o se vaega o lou olaga, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 19 OKETOPA 2022

Manatu Autu: O le Upu 1 (The Word 1)

Tauloto – Tusi Paia: Iosua 1:8 ‘E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea....’

 Faitauga - Tusi Paia: Ieremia 15:16

 Upu Folafola
O le a faasolo atu I ni nai aso o lumanai, la tatou suesuega I vaega aoga faapea faamanuiaga e tatou te maua mai le Upu a le Atua. Faamolemole ‘aua nei e misia a’oa’oga ma lesona o lenei mataupu. Ou te tatalo ia tatala e le Atua ou fofoga ina ia maua se malamalama loloto o lana Upu I le suafa o Iesu. 

O le tatou faitauga o le Tusi Paia o le asō o lo’o faapea mai o le Upu a le Atua e maua ai le olioli ma le mafanafana I se agaga ua mafatia ma le mautonu. Afai e te faitau I le Tusi Paia ma le taitaiga a Agaga Paia e faamalamalamaina, e te iloa lea ua valaauina oe e le Atua, ma e faamautuina I lou loto ona tafiesea lea o le mafatia ma le lē mautonu ae suia I le olioli ma le loto vivii. 

 A tatou vaavaai I le ata lenei, o se tama talavou e leai se galuega ma ua maua I le loto mafatia ma le le mautonu, ae tei ane ua ia iloa, o lona tama o le peresitene o le atunuu ma o loo sailia o ia e lona tama. E vave ona iloa e lenei alii talavou, o le a suia lona faaiu e tutusa ma le peresitene, ma e tafiesea vave le loto mafatia ma le le mautonu ma i ate ia. 

 Afai e te faitau I le Upu a le Atua, e te iloa ai o loo valaauina oe I le suafa e tasi o lo tatou Alii, o le Atua o ‘Au. Ua ia tuuina I lana Upu le tulaga moni o oe o lona afafine ma lona atalii, ma o so’o se mea e tali I le Atua, e tali foi ia te oe. O lenei upu moni e aumai ai le olioli I le agaga o se tagata, tusa lava po’o le a le luitau o loo feagai ma ia. 

 Afai e te maua le upu a le Atua ma ‘ai ai, e te maua ai le olioli. E le mafai ona e maua se mea seiloga e te saili iai. E le mafai ona e maua se mea mai I le Upu a le Atua seiloga e te saili loloto iai. E tatau ona e saili I le oloa taua o lo’o I totonu o so’o se fuaitau. E tatau ona e ole atu I le Agaga Paia e faamanino ma faamatala Lana upu I lou loto. Afai e te maua le Upu, e te suesue lemu iai ona matua sailiili loloto lea iai, e ala lea I le mafaufau loloto iai. Ona e vaevaeina lea, teu ma talitonu iai lou loto,  faifai pea ma le finau seia faataunuuina I lou olaga. Afai e lē tino mai le Upu a le Atua I lou olaga, e le mafai ona o’o le olioli ma le loto vivii I lou loto. 

 Afai e te faia ma masani le saili ma ‘ai I le upu a le Atua I aso uma, e le mafai ona aveesea le olioli mai lou loto, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 18 OKETOPA 2022

 Manatu Autu: E tasi lava le ala (Only one way)

 Tauloto – Tusi Paia: Ioane 14:6 ‘Ua fetalai atu Iesu ‘iā te ia, “O a‘u nei le ala, ma le ‘upu moni, ma le ola; e lē alu atu lava se tasi i le Tamā, pe a lē ui mai ‘iā te a‘u...’

 Faitauga - Tusi Paia: Ioane 14:1-6

 Upu Folafola
Ua ou faalogo i le tele o tagata ua latou fa’apea mai e anoanoa’i ala i le lagi. Ma ou te manatunatu po o ia tagata o ni kerisiano moni, aua o loo manino lelei le Tusi Pa’ia i lea tulaga, e pei ona ta’ua mai i le fuai’upu tauloto mai le Tusi Paia o le asō.

 E leai se tasi e mafai ona o’o i le Tama se’ia vaganā ua ui atu ia Iesu.

I le tusi o Galuega 4:12 o lo o faapea mai: “E leai fo‘i se tasi ‘ua i ai le ola; e leai lava se isi igoa i lalo o le lagi ‘ua foa‘iina mai i tagata e mafaia ‘ona fa‘aolaina ai o i tatou.”  

 E leai se faaolataga i se isi lava tagata, tapua’iga po o se isi igoa, ua na o Iesu Keriso. O lona toto e faamamāina ai i tatou ma tatou agava’a ai I le ola e faavavau i le lagi- e leai se isi mea, ua na o le toto o Iesu Keriso. O lona uiga, so’o se tasi e lē faamamāina i le toto o Iesu, ma amata ona ola e pei o Keriso, e lē mafai foi ona ia ulufale i le malo o le Atua.

 Afai e taumafai se tagata tau fa’avalea, e faia se tupe po o se pepa tau faasesē, e na te faia ni gaioiga ina ia foliga i le mea moni. Ma e faapena foi isi talitonuga ma tapua’iga e foliga tutusa ma le fa’aKerisiano, ae ‘aua nei fa’aseseina ai oe! Ua na o Iesu Keriso lo tatou ala i le Lagi; o isi auala uma, ua na o ni mea fa’afoliga.  O talitonuga e ‘ese mai i le fa’akerisiano – lea o lo o uuna’ia le so’otaga vāvālalata ma Iesu Keriso, faapea ma le taitaiga a lona Agaga Paia i totonu ‘au Kerisiano, e le o ni mea moni.

 Le ‘au pelē, e na o le tasi lava le suafa i lalo mai o le lagi ua foaiina mai e faaola ai le tagata, ma o lena suafa o Iesu Keriso (Galuega 4:12). 

 O le fuaitau lauiloa o le Ioane 3:16 o loo faapea mai: “Auā ‘ua fa‘apea lava ‘ona alofa mai o le Atua i le lalolagi ‘ua ia ‘aumai ai lona Atali‘i e to‘atasi, ‘ina ‘ia lē fano se tasi o ē fa‘atuatua ‘iā te ia, a ‘ia maua e ia le ola e fa‘avavau.”

 Tatou te iloa mai i lea fuaitau, ua na o latou e talitonu ia Iesu Keriso o le a latou maua le ola e faavavau. Ou te faamālo atu ia te oe pe a fai ua avea Iesu Keriso ma ‘ou Ali’I ma Faaola. Auā o lona uiga, ua e mauaina le ala e tasi e te nofo tupu ai ma Ia i le ola e faavavau. Peitai, afai e te le’i lafoa’i lou ola ia te ia, faamolemole ia faia loa i le asō, auā ua na o Ia le ala e ‘alofia ai le faafanoga e faavavau. Ia filifili ma le poto ma le atamai!

Ia manatua, e na o le tasi le ala i le lagi, e ala I lo tatou Alii ma Faaola o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 17 OKETOPA 2022

Manatu Autu: Ina ia ou Iloa o ia (That I may know him)

Tauloto – Tusi Paia: Ioane 17:3 ‘O le ola e fa‘avavau fo‘i lenei, ‘ia latou iloa oe le Atua moni e to‘atasi, ‘atoa ma lē ‘ua e ‘auina mai, o Iesu Keriso lea..’

Faitauga - Tusi Paia: Isaia 43:10-11

 Upu Folafola
E le taitai ona e iloa ma silafia ma le atoatoa le Atua. Fai mai Paulo I le Filipi 3:10
10‘Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu.  

O Paulo lea, o le aposetolo tautaua na faaali pea iai le Atua ma o lo’o iloa I ana tusitusiga o lo’o iai I vaega taua o le Feagaiga Fou. E ui i lea fai mai Paulo, e naunau pea o ia e fia iloa atili le Atua. E le taitai lava lou iloa ma le silafia o le Atua aua fai mai 1 Korinito 13:8, ua na o se vaega tatou te iloa. O so’o se tagata e faapea mai ua ia iloa mea uma e faatatau I le Atua o se pepelo lava. E tatau lava ona I ai le fa’anaunautaiga I so’o se kerisiano faatuatua ina ia iloa atili le Atua, o le tatou faanaunautaiga lea I aso uma. 

E tele aoga ma faamanuiaga o le iloa o le Atua. Muamua e na o I latou e iloa le Atua e mafai ona faia galuega tetele ma le maoae. Fai mai le faaiuga o le Tanielu 11:32 a o le nu‘u o ē ‘ua iloa lo latou Atua latou te fa‘amalolosi ma fai mea tetele.

 O le tele lava o lou iloa o le Atua, o le tele foi lea o mea tetele e mafai ona e ausia ma e faapena foi I le itu faafeagai. Ia e saili ina ia e iloa atili o ia ina ia siitia pea galuega tetele e mafai ona e faataunuuina. 

 Lona lua, o le ola e faavavau o le iloa lea o le Atua. I le Ioane 17:3, na faauigaina e Iesu le ola e faavavau I le ola i le Atua ma lona alo o Iesu Keriso. Afai e te iloa ma silafia le Atua, ona amata lea ona e fiafia I lona malo e amata atu iinei. A alu atu se tagata faatuatua e faatasi ma lona Alii, e sese pe a faapea mai ua latou se’e atu mai le oti I le ola e atoatoa. E na o le momoe o i latou (1 Tesalonia 4:13-14).

 Afai e te fia silafia le Atua, e tele taimi e te faaaluina e suesue ai I le Upu a le Atua, e tele taimi e te faaaluina e suesue ai I lana Upu I aso uma ma e te fiafia I so’o se mafutaga e apoapoa’i ai le Ekalesia. E te tatalo foi e le aunoa. 

 Ae faatoa ‘ou faaolaina, ou te muamua lava i so’o se mafutaga e a’oa’oina ai le Tusi Paia, aua ou te fia iloa atili le Atua. E o’o mai I le taimi nei, ou te faalogo ma le toto’a ma tusi faamaumauga pe a talanoa se tasi e uiga ia Iesu Keriso. Ou te naunau tele ou te fia iloa atili o ia. Ae fa’apefea oe? 

Tatalo 
Le Tama e, o I le lagi, ou te naunau ou te iloa atili lau afio, faamolemole faaali mai ia te a’u, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 16 OKETOPA 2022

Manatu Autu: Matau I le Atua (Fear God)

 Tauloto – Tusi Paia: Iopu 28:28 ‘Na fetalai mai fo‘i o ia i le tagata, ‘Fa‘auta, o lē mata‘u i le Ali‘i, o le poto lava lea; o lē ‘alo ‘ese i le amio leaga, o le mafaufau lea...’

 Faitauga - Tusi Paia: Salamo 25:14

 Upu Folafola
Ua ou faalogo I ni mafaufauga mālie e faatatau I le mata’u I le Atua. Ua talitonu nisi tagata a fai mai le Tusi Paia mata’u I le Atua, e lē o fai mai e tatau ona e fefe I le Atua, a’o le uiga moni ia e ava, faaaloalo ma migao ia te ia. Ou te lē iloa poo fea le Tusi Paia lea e faitau ai I latou ia a’o la’u Tusi Paia fai mai ‘mata’u I le Atua’, pau lea. 

Fai mai le Eperu 12:29 O le Atua o le afi ma’ama’ai o ia. O ai sē lē fefe I se afi? E o’o I taifau e vaai loa I le afi alu I le atoa. Fai mai le Tusi Paia I le tusi o Faataoto 1:7O le mata‘u i le ALI‘I, o le amataga lea o le poto; ‘ae ‘ino‘ino tagata vālelea i le poto ma le a‘oa‘oina.

 Fai mai le upu ua taua i luga afai ua I ai sina iota o le atamai ia te oe, e te mata’u I le Atua. O lea afai e te vaai I se isi e leai se mata’u I le Atua i le olaga ae fai mai o ia e poto, o lenā e faavalea a e ia ia.

 O la’u fesili ia te oe, e te mata’u I le Atua? Ou te mana’o e te mafaufau lelei I le fesili e tali mai ai. E te mata’u mo’i I le Atua? Afai e moni e te lē solia ana poloaiga. Fai mai le Fa’ataoto 3:7‘Aua ‘e te fa‘afiapoto; ‘ia e mata‘u i le ALI‘I, ‘ia ‘alo ‘ese i le leaga;

 O le taimi a e te faia ai le agasala ua e fai atu ai fo’i I le Atua e te lē fefe iā te ia, ua e atamai lava oe i ou manatu. E ono foliga mai i ou manatu I lea taimi ua leai se mea e mafaia e le Atua aua ua e faatino lava le agasala ae faapalepale pea le Atua. Peitai ou te fautua atu ia te oe e taofi auā e I ai le taimi o le toasa o le Atua i e agasala. Fai mai le Roma 1:18 18‘Ua fa‘aalia mai fo‘i le to‘asā o le Atua mai le lagi i le amio fa‘alēmata‘u ma le amio leaga uma lava a tagata, o ē tāofi i le ‘upu moni ma le amioletonu.

 Aua ne’i avea oe ma se tasi o ē valelea e lē matata’u I le Atua. E fia avea oe ma tagata poto? E te mana’o e fa’aalia e le Atua mea lililo ia te oe? E te mana’o e fa’asaoina oe mai le toasa o le Atua? Mata’u ia te ia ma ia fa’aalia i lou usiusita’i atoatoa I lana upu. I le suafa o Iesu Keriso, Amene.

OPEN HEAVENS
MATALA LE LAGI MO LE ASO TOONAI 15 OKETOPA 2022

Manatu Autu: O le manaomia vave o le faaolataga (The Urgency for Salvation)

 Tauloto – Tusi Paia: Eperu 3:13 ‘A ‘ia ‘outou fēfa‘amafanafanaa‘i i lea aso ma lea aso, manū o ta‘ua o le “aso nei,” ‘ina ne‘i loto ma‘a‘a so ‘outou i le pepelo o le agasala..’

 Faitauga - Tusi Paia: Roma 13:11-14

 Upu Folafola
Le au pele e, afai e fai e se tagata se fa’amata’u, e mafai ona fai ni faiga e tete’e atu ai I lea tagata ia aua ne’i taunuu ana upu. Peitai, a aumai e le Atua se lapataiga o se mala ma se auala e fa’asaoina ai tatou mai le mala, e tatau la ona tatou usitai I le lapataiga aua soo se mea e fetalai ai le Atua e taunuu. Toatele tagata ua latou lē amanaia lapataiga faamanatu o le faafanoga e faavavau o loo faatali mai mo I latou e le’i talia le valaau mo le fa’aolataga. O ituaiga tagata ia o loo manatu faapea, talu ai e lei taitai toe afio mai Iesu, e lē afaina lea valaau. E mafai ona lē taunuu mea fai mai ai le tagata peitai a fetalai loa le Atua, tusa pe o’o I le afe tausaga o faatali e taunuu lava aua o le Afioga Paia a le Atua.

Fai mai le Mataio 24:37-39
37‘Ae pei o ona po o Noa, e fa‘apea fo‘i pe a sau le Atali‘i o le tagata. 38Auā e pei ‘ona faia i ona po a o le‘i o‘o le lolo, ‘ua latou ‘a‘ai ma inu, ‘ua latou fai avā fo‘i ma fa‘aavaga, ‘ua o‘o lava i le aso na ulu atu ai Noa i le va‘a, 39na lē iloa fo‘i e i latou ‘ina se‘ia o‘o le lolo, ma ‘ave‘esea i latou uma; e fa‘apea fo‘i pe a sau le Atali‘i o le tagata.

Na faailoa e le Atua o le a ia solia esea le lalolagi atoa I le lolo ma ia faatonuina Noa e fau le vaa mo ia ma lona aiga ma le ta’ilua o ituaiga meaola uma. E sili atu ma le senituri o faatali e le sau se lolo ae na fa’aauau pea ona fau le vaa o Noa. Ina ia i’u ina amata sau le lolo o i latou na faatauemu I le upu a le Atua na fano. Sa tele ni perofetaga e uiga iā Iesu Keriso I le feagaiga tuai peitai na faatoa faataunuuina lona fanau mai I le lalolagi I le afe tausaga mulimuli ane. E lē afaina poo le a le umi e faatali ai le faataunuuina o le Upu a le Atua aua o le mea mautinoa e taunuu lava. O i latou o loo lē amanaiaina le Upu a le Atua i le taimi nei e toe salamō mulimuli. Atonu o loo faatuai pea lou taliaina o le faaolataga ma lou manatu se’i i ai se aso ae fai mai le 2 Korinito 6:2 
2Auā ‘ua fa‘apea mai o ia, “O le tausaga e talia ai, na ‘ou fa‘alogo ai ‘iā te oe, o le aso fo‘i e fa‘aolaina ai, na ‘ou fesoasoani ai ‘iā te oe.”Fa‘auta, o lenei le tausaga e talileleia mai ai; fa‘auta, o lenei le aso e fa‘aolaina ai’

 E te mautinoa e te toe maua se isi avanoa e te salamō ai e le’i o’o mai le valaau a le Atua ia te oe? Pau lenei o le taimi e te mautinoa, fa’aaogā nei loa le avanoa e fai ai le leleiga a lou tagata ma lou Atua manū e le’i tuai.

 Tatalo
Tama faamolemole fesoasoani mai ia matou naunau e talia lau faaolataga ma tutumau ai manū o i ai le avanoa I le suafa o Iesu Keriso. Amene

OPEN HEAVENS
MATALA LE LAGI MO LE ASO FARAILE 14 OKETOPA 2022

Manatu Autu: Faia I le Faatuatua? (Acting by faith?)

 Tauloto – Tusi Paia: Mataio 9:29 ‘Ona pa‘i atu lea o Iesu i o la mata, ‘ua fa‘apea atu, “E pei ‘ona ‘oulua fa‘atuatua, ‘ia fa‘apea lava ‘ona faia ‘iā te ‘oulua.’

 Faitauga - Tusi Paia: Roma 4:16-20

 Upu Folafola
Fai mai le Eperu 11:6 ‘A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia’.

 E toatele tagata e latou te lē maua mai I le Atua ona e leai se faatuatua. I se tasi o matou sauniga o le Agaga Paia, ua faapea mai le Atua ia te a’u ua Ia fia faamalolo I tagata uma e tiga o latou tua, ona fai mai lea ou te valaau I tagata uma ia e aafia e o mai I luma. Ina ua o mai I luma, ua faapea mai le Atua ou te siva faataamilomilo iai latou. E ui e pei e le fetaui I lo’u manatu, ae na ou usitai. Ua ou siva faataamilomilo I ai latou, ona faapea mai lea o le Atua e taofi ma ou fai atu I tagata e punonou uma I lalo. Ua faatonuina I latou ma ua mafai ona fetagofi I o latou tamaimai vae e aunoa ma se tiga. E manaomia lou faatuatua ina ia tutupu ai ni vavega. E tatau foi ona e usitai I le Atua tusa lava pe foliga mai e le fetaui I lou manatu.  

 I le Mataio 14:25-31, na fetalai atu Iesu ia Peteru e savali atu ia te ia I luga o le vai ma na vave ona oso I fafo o le vaa Peteru ma savali atu loa ia Iesu I luga o le vai. O le taimi e lei tilotilo ai I le afa, sa savali lelei o ia I luga o le vai. Ae o le taimi lava na tilotilo atu ai I le afa, na amata loa ona magoto I lalo. Afai e te fia ‘ae ‘ae I faamanuiaga o vavega a le Atua, e tatau ona tapunipuni o tatou taliga ma mata I mafuaaga e alagatatau ai ona le taunuu. E tatau ona tatou talitonu I upu ma afioga ua folafola mai e le Atua ae teena uma nisi manatu. Ana manatu Aperaamo I lona matua ma ona tausaga, semanu e le mafai ona avea o ia o se tamā I se tamaitiiti, ae o loo tusia I le Roma 4:19 ‘E le‘i vaivai fo‘i lona fa‘atuatua, e le‘i manatu fo‘i i lona tino ‘ua oti, po ‘ua selau ona tausaga, ma le manava fo‘i o Sara ‘ua oti;

 I le Mareko 3:1-5, na fetalai atu Iesu  I le tagata na gase lona lima ina ia tulai mai I totonu. Ana faapea e musu e faia lea tulaga, semanu e misia lana vavega. E te manatu pe ana faapea e fesiligia e Peteru Iesu ina ua ia fetalai atu e lafo lona upega I le vai ae ua alu le po atoa o fagota ae leai se I’a na maua (Luka 5:4-6). E te le tau faaaogaina lou mafaufau e faavasegaina pe faapefea ona faataunuuina e le Atua, na o le usitai lava ona e vaai lea i vavega, aua a leai, e te le maua lava. O e faia ea I le faatuatua?  I le suafa o Iesu Keriso, Amene.