Samoan Devotional

OPEN HEAVENS
MATALA LE LAGI MO LE ASO TOFI 13 OKETOPA 2022

 Manatu Autu: ‘Aua le Fefe 2 (Fear not 2)

 Tauloto – Tusi Paia: 1 Ioane 4:18 ‘E leai se fefe i le alofa, a o le alofa ‘ato‘atoa e fa‘ate‘a‘eseina ai le fefe. O le mea lea o le alofa e lē ‘ato‘atoa i se tasi e fefe auā e tatau lava ‘ona fa‘asalaina le fefe.’

 Faitauga - Tusi Paia: 1 Ioane 4:17-19

 Upu Folafola
O se tasi o tulaga matagofie o le alofa o Keriso, e faate’aeseina ai le fefe. Afai e te fetaiai ma le alofa o le Atua ma e tumau ai, e leai se mea e te fefe ai. E faaaogaina e le tiapolo le fefe e faapologa ma faoina le alofa o le Atua mai le tagata. 

 O le fefe, e faapologaina oe ma e fai atu ia te oe e le mafai ona e faia se mea, peitai o lo’o faapea atu le Atua e pito sili ona maualuga e te mafaia mea uma e ala I lona faatasi ma le faamalosi’au mai (Filipi 4:13). O le tagata ua saisaitia I le fefe, e le mafai ona faaalia taleni ma agavaa ua tuuina iai e le Atua. E manatu maualalo ia te ia lava ma e faaaoga e le tiapolo lea tulaga e pule ma taotaomia ia te ia. Aua e te gauai I le fefe aua e avea ma tulaga e pule ai le tiapolo ia te oe. Afai o oe o se atalii poo se afafine o le Atua, tu I lou tulaga pule ma faatoilalo le fefe I le suafa o Iesu Keriso. E tatau ona e tulei esea le agaga o le fefe, ina ia aua nei gaoia folafolaga matagofie a le Atua mo oe. E pau le auala e mafai ai ona e faia lea tulaga ma le manumalo, o le talipupuni o le faatuatua. Fai mai le Efeso 6:16‘Ia fa‘aopoopo i na mea uma ‘ona tago atu i le talipupuni o le fa‘atuatua, tou te mafai ai ‘ona tinei o ū fanafana mū uma lava a lē o lo‘o leaga’.   

 Auā foi e tupu le fa‘atuatua i le taulogologo atu, o le taulogologo atu fo‘i o le afioga a Keriso (Roma 10:17) o lona uiga o lou talipupuni o le faatuatua e fua I le loloto ole Upu a le Atua o lo’o I lo’u loto. A’o fana mai e le tiapolo u fanafana o le fefe, e te pupunia I le upu a le Atua o lo’o e iloa. Ao lenei, afai e le o oe o se atalii poo se afafine o le Atua, tusa lava poo le a le tele o mau o le Tusi Paia e te si’i maia, e tumau lava le agaga o le fefe ia te oe. Fai mai le Faataoto 28:1 e faapea: E sōsōla o ē amio leaga, a o leai sē tuliloa; a o ē amiotonu, e pei o le leona ta‘anoa i latou ‘ona lē mata‘u.

 O le au amiotonu e totoa aua foi o le Atua Silisili Ese o lo latou leoleo mamoe ma e leai se mea e fefefe ai. O lou leoleo mamoe e puipui ia te oe, e tausia ma taitai ia te oe. Peitai ane, afai o oe o se tagata amioleaga, e tele mafuaaga e tatau ai ona e fefe aua foi e faapuapuagatia e le tiapolo I latou e ‘au ma ia I le agaga o le fefe. E mo lou lelei le tuuina atu o lou ola ia Iesu ina ia e pule I le agaga o le fefe ma ia e ola e faataunuuina fuafuaga uma a le Atua mo lou olaga. Ou te tulieseina le agaga o le fefe mai ia te a’u I le suafa o Iesu, o a’u o le afafine ma le atalii o le Atua, e le mafai ona pulea a'u e le agaga o le fefe, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 12 OKETOPA 2022

 Manatu Autu:  ‘Aua le Fefe 1 (Fear not 1)

 Tauloto – Tusi Paia: Salamo 23:4 ‘E ui lava ‘ina ‘ou savali i le vanu o le ata o le oti, ‘ou te lē fefe lava i se mea leaga; auā o oe tā te fa‘atasi ma a‘u; o lau la‘au ma lou to‘oto‘o e fa‘amafanafanaina ai a‘u.’

 Faitauga - Tusi Paia: Salamo 23:1-6

 Upu Folafola
Aua le fefe. Aua le fefe aua foi o le tiapolo e na ona pei o se Leona tagi. E pau le taimi e mafai ai ona ia osofai se tagata pe afai e mafai ona ia faatupuina le fefe I lea tagata I lana tagi. I nisi faaupuga, afai e te lē fefe I le tiapolo I lou tulaga o se atalii poo se afafine o le Atua, e le mafai ona ia pa’I pe osofai ia te oe. Fai mai le 2 Timoteo 1:7 Auā ‘ua lē foa‘iina mai e le Atua ‘iā te i tatou le Agaga e mata‘u ai, a o le Agaga e fa‘amalosi ai, ma alofa ai, ma pulea ai o tatou loto.

 Afai o oe ose afafine po’o se atalii o le Atua, o lo’o faamautinoa mai e le Atua e te saoloto mai le agaga o le fefe. Ua faatulaga oe e le Atua I se tulaga e sili atu I seisi agaga tetee aua foi ua e iai ma Iesu Keriso. E te manatu I le tulaga i sou atalii e usitai lava ia te oe ma fiafia e mafuta ma oe, e mafai ea e sona fili ona sau e osofai ia te ia a’o iai I ou luma? E le mafai. E puipui lelei e le Atua lana fanau ia malu aua foi o ia o le Tama lelei. Ma a sau le fili e aumai ma saputu mai manatu e faatupu ai le fefe i lou loto, ia avea lou iloa o lou tama e faatupuina le loto toa ia te oe. Fai mai le Tusi Paia e tatau ona lepeti I lalo masalosaloga e taumafai e siitia maualuga I lou loto ma tete’e I le iloa o le Atua. Fai mai le 2 Korinito 10:5 “o lo‘o lepeti i lalo māsalosaloga, ma mea maualuluga uma ‘ua fa‘asiasia i le iloa o le Atua, o lo‘o fa‘ato‘ilaloina manatu uma ‘ia ‘ana‘ana ‘iā Keriso”.

 Ia avea lou iloa o le Atua e maualuga atu I lo ni manatu fefe e aumai e le tiapolo ia te oe. O le fefe e na o se auupega a le tiapolo e faaaogaina e saisaitia ai oe, e le tatau ona e faatagaina I lou loto. Fai mai le Roma 8:15 e faapea: ‘Auā ‘ua ‘outou lē maua le agaga o le pologa, e toe fefefe ai; a ‘ua ‘outou maua le Agaga o tamafai, tou te vala‘au atu ai, “Ava, le Tamā e’.

 O le Atua Silisili Ese o lou Tama, e matua leai se mea e te ono fefe ai aua foi e leai seisi e sili atu le malosi I lo Ia. Ou te faapea atu ia te oe I le asō, afai lava e avea oe ma e tumau o se atalii po’o se afafine o le Atua, po’o le a lava le tulaga e te o’o iai, ‘aua le fefe. 

 Tatalo
Tama, ou te saisaitia so’o se agaga o le fefe I lo’u olaga I le taimi lenei. Ou te folafola atu, ua faasaolotoina a’u mai le agaga o le fefe aua ua ou mautinoa o oe lo’u Alii o lo’u talitā, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 11 OKETOPA 2022

Manatu Autu:  Tulafono o le fai ma sui (The law of substitution)

 Tauloto – Tusi Paia: Faataoto 11:8 ‘E lavea‘iina lē amiotonu a‘i le puapuagā; ‘ae sau lē amio leaga e sui a‘i o ia.’

 Faitauga - Tusi Paia: Isaia 43:2-4

Upu Folafola
So’o se taimi e fa’alogo  tagata ua ou fa’amamafaina fa’atonuga ‘ia ola faapaiaina’ e tatau ona faamanino, e lē faapea ou te musu e te  maua se olaga fiafia, ae māfua ona ua ou manino lelei i lamatia o le lē ola fa’apa’iaina, ma ou te musu e te pagātia ai. O se tasi o itu e lamatia ai lou soifua, o le tulafono o le fai ma sui. O le tulafono fa’aleagaga lea o lo’o fa’apea mai, e mafai ona sui a’i se ola mo se isi tagata. O tagata i totonu o le mālō o le pogisa, ua latou iloa lelei lea tulafono ma ua latou fa’aaogaina. E silafia e tagata matutua o Aferika, afai o se tasi ua tigaina lona ma’i, o le a oti, e mafai e se taulāitu ona suia ‘ese le ma’i o lea tagata i se isi tagata, ona toe malosi  lea o le tagata sa ma’i. O le tulafono o le fai ma sui o se tulafono fa’aleagaga. O lo’o fetalai le Atua i le Faata’oto 11:8, afai e aga’i mai se fa’afitauli i se tagata amiotonu, e mafai ona ave’esea mai e le Atua ae suia iai se tagata amioleaga. Afai e lē fia ‘avea oe ma sē e sui a’i se tagata amiotonu, e tatau ona avea oe ma se tagata amiotonu.

 I ni tausaga ua mamao atu, sa o’o mai se fafine ia te a’u ua gatete atoa le tino. Sa ia faapea mai, ‘Tama, sa fai la’u miti e fa’apea; o lo’u to’alua sa faimalaga ese atu, ae fo’i mai i le pusa maliu’ Na ou fesili iai ‘O lou to’alua o se atali’i o le Atua?’ Sa ia tali mai ‘Ioe’ ona ma tatalo ai lea mo ia. E lua vaiaso soso’o ai, na ou va’ai i se fa’amaisega i  le nusipepa sa tā’ua ai le faai’u o le tina lenei. Sa ou vaai i le mafine lea i le Aso Sā soso’o ai, ma ou fesili iai e uiga i le fa’amaisega, ae tali fiafia mai, e leai, e le o lona to’alua a o se tasi o le aiga o lona to’alua, ua maliu. Se manū e ’ave’esea e le oti le tagata amiotonu; sa ma tatalo faatasi mo ia, ona ave’esea mai lea e le Atua lona to’alua mai le gutu o le oti, ae suia i se tasi o lona aiga, e le’i fa’aolaina.  Afai e te alofa ia te oe, e te ola faapaiaina, ina ia ‘alofia ai lou ‘avea o se tagata e fai ma sui o se tagata amiotonu.

  I le tusi o Tanielu 3: 1-30 o tagata sa latou lafoina Sataraka, Mesake ma Apeteniko i le ogaumu a’asa, o latou lava ia sa susunuina ai.  Ao tama Eperu e to’atolu sa lafoina i totonu, na toe aumaia i fafo e aunoa ma se afaina. O le ogaumu lea sa faia ina ia susunuina ai tagata. A ua lē susunuina le fanau a le Atua, a ua susunuina ai le fanau a le tiapolo. I le tusi o  Tanielu 6:1-28, ina ua lafoina Tanielu i le lua o leona, sa fetalai atu le Atua iai latou: ‘E lē mafai ona e ‘aia le tagata lea. Ae o le a ou sueina se e fai ma sui o ia’. O le taeao na soso’o ai, sa malele le Tupu, o latou uma sa faufau ia Tanielu, faatasi ma o latou aiga, o le a lafoina i le lua o leona. Ma o tagata uma nei sa latou fai ma sui o Tanielu.  O le tulafono o le fai ma sui I le itu fa’aleagaga o se mea moni, ma e sili ona e ola fa’apaiaina, ia ‘alofia ai lou iai i le itu sesē o lea tulafono.

 Ia avea oe o sē e amiotonu, ina ia fa’asaoina oe mai ni faalavelave,  nai lō le avea o se tagata amiolētonu, e fai ma sui o lē e amiotonu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 10 OKETOPA 2022

Manatu Autu:  Manumalo maoa’e, faia o taulaga maoa’e (Great victory, great sacrifice)

Tauloto – Tusi Paia: 1 Korinito 15:10 ‘A o le alofa tunoa o le Atua ‘ua ‘ou fa‘apenei ai a‘u; o lona alofa tunoa fo‘i o ‘iā te a‘u, e lē fa‘alēaogāina lea, a ‘ua sili la‘u galuega ‘iā latou uma; a o le alofa tunoa o le Atua ‘ua ‘iā te a‘u..’

 Faitauga - Tusi Paia: 1 Korinito 9:25-27

 Upu Folafola
E toatele tagata e naunau e tele taimi e maua ai le manumalo maoae’ peitai e le mananao e fai taulaga I latou olaga ina ia maua. Afai e naunau e na o ni taimi e manumalo ai, ona faatino pea lea o faiga taulaga I o tatou olaga o lo’o faia I le taimi nei. I le Ekalesia Redeemed Christian Church of God, e matou te anapogi mo le 40 aso I le tausaga pe a laitiiti ae iai taimi e oo atu ai I le 100 aso I le tausaga. A vaavaai mai nisi Ekalesia ma galuega faamisiona o lo’o matou anapogi, e talie, ae a o’o ina sasa’a mai manumalo e maoae e tele, o I matou e talie mulimuli. O le maualuga lava o ose mauga e te fia a’eina, o le maualuga foi lena o le malosi e te manaomia e a’eina ai.

 Ua ou fiu I le taalo I mea itiiti, ua ou fiu foi I manumalo itiiti, ae ou te naunau I ni tautinoga tetele. So’o se tulaga maualuga e te taumafai atu e ausia, e te lua fetaiai lava ma luitau e taofiofi ai oe. Ae tatau ona saunia oe e finau ina ia manumalo. O le maualuga lava o le tulaga e te fia ausia, o le maualuga foi lena o le tapenapenaga e tatau ona saunia  mo le taua. 

 A’o sauni atu se tama fusu mo se fusuaga, e koleni malosi e fusu ma tagata fusu malolosi atu. Afai e te sauni e fusu ma le siamupini o le lalolagi, e te koleni malosi ma sauni e sili atu le maualuga pe a fua I se fusuaga ma se tagata fusu I totonu lava o lou lotoifale. 

 O le maualuga o le manumalo e te fia maua, e fua iai le sauniuniga e tatau ona faia ma le ituaiga faiga taulaga e te faia I lou olaga. Afai e te ola ma soifua pea I mea e tatau ma onomea ona iai mai lea taimi I lea taimi, tausami I so’o se mea e te manao iai, moe I le po atoa, tele le taimi e alu I mea faafiafia ae faatoa tatalo pe a alu I le lotu pe faatonuina e faia, o lona uiga e na o ni nai manumalo e maua. Peitai, afai o oe o se fitafita, e saunia I taimi uma e ala I le koleni ma le a’oa’oina, e leai se tulaga maualuga o lo’o e naunau iai e te le maua. Mai le tatou fuaiupu tauloto I le aso, ua tatou iloa le mafuaaga na avea ai Paulo o se aposetolo tautaua. 

 Afai e te naunau e fia avea oe ma tagata tautaua I le vaega o lo’o e galue ai, ia saunia oe e galue maoa’e e sili atu I seisi lava tagata. O le maualuga lava o le tulaga e te naunau e ausia, o le maualuga foi lena o le faiga taulaga e tatau ona e faia I lou olaga. I le suafa o Iesu Keriso, Amene.  

OPEN HEAVENS
MATALA LE LAGI MO LE ASO SA 9 OKETOPA 2022

Manatu Autu: Agalelei I ē matitiva 2 (Treat the poor right 2)

 Tauloto – Tusi Paia: Faataoto 19:17 ‘O lē ‘ua fa‘asauā, i le tagata mativa, e fa‘alumaina e ia Lē na faia o ia; a o lē ‘ua āva ‘iā te ia, ‘ua alofa o ia i le tagata mativa.’

 Faitauga - Tusi Paia: Mataio 25:31-46

Upu Folafola
E sili atu I le leaga o i latou e fa’asauā I e matitiva ona e maulalo lo latou tulaga i latou e fa’asauā I ē matitiva ina ia faaopoopoina ai lona tamāoaiga. O le upu lenei a le Tusi Paia ia i latou. Faataoto 22:16 O lē ‘ua fa‘asauā i le tagata mativa ‘ina ‘ia fa‘atele ai ana ‘oloa, ma lē ‘ua foa‘i atu i le mau‘oa, e i‘u ai lava i le mativa.

 Afai o iā te oe se faamanuiaga e tatau ona ave mo ē matitiva a ua e pule ai e tu’u mā oe, fai mai le Tusi Paia e mautinoa e te i’u I le mativa. Faapena foi pe a e musu e totogi lau au faigaluega e ui o lo’o e maua tupe mai galuega o lo’o latou faia mo oe. O le mea moni ua e fa’asauā ia I latou ona e matitiva ma e lē mafai na tete’e atu ia te oe. Fai mai le Tusi Paia e mautinoa o lou iuga le mativa. E naunau le Atua i tagata matitiva aua e te fa’asauā I ai. Fai mai le Faataoto 21:13 ‘O lē na te punitia ona taliga i le vala‘au a le tagata mativa, e vala‘au lava o ia, ‘ae lē talia.

 Afai sa e lē alofa I ē matitiva, avea ia lou faitau I le Faataoto 21:13 e taofi ai nei loa lou manatu faatauvaa ia i latou. Foai au mea mo i latou o manaomia. Fai mai le Tusi Paia I le Tusi o Luka 3:11 O le tagata e lua (2) ona ofutino ia avane iā te ia e leai sona ofu, o lē ua ia te ia mea e ai, ia faapea fo’i ona fai. E lē tatau ona faigata I kerisiano na faia ia mea aua o lē o loo afio I totonu ia I tatou o le alofa lava ia. Fai mai le 1 Ioane 4:8 O sē lē alofa ‘ua lē iloa e ia le Atua; auā o le Atua, o le alofa lava ia

 Afai e te lē alofa I ou tuaoi matitiva ma tausi ia I latou, e matuai faailoga fesili a lou kerisiano. A tatou faitau fo’i I le tala I le tagata mauoa ma Lasalo I le Tusi o Luka 16:19-24 e lē o ta’u maia ni agasala na faia e le tagata mauoa, pau le measesē a le tagata mauoa na ia poloka ona taliga I le tagi a Lasalo le tagata mativa mo se fesoasoani. Na i’u I seoli le tagata mauoa ma tagi ai ae leai se isi na lagona atu lona leo pe fesoasoani atu ia te ia. I le tatou Tusi Paia faitau o le asō o le isi lea measesē a i latou na tulia e Iesu I seoli, e le’i agalelei I tagata matitiva. Avea oe ma tagata poto e alofa ma tausi I ē matitiva.

 Tatalo
Tamā faamolemole fesoasoani mai ia te a’u ia ou alofa ma agalelei I nai uso matitiva e tusa ma au afioga. Ona o Iesu. Amene.

OPEN HEAVENS
MATALA LE LAGI MO LE ASO TOONAI 8 OKETOPA 2022

 Manatu Autu: Agalelei I ē matitiva 1 (Treat the poor right 1)

 Tauloto – Tusi Paia: Faataoto 14:31 ‘O lē ‘ua fa‘asauā, i le tagata mativa, e fa‘alumaina e ia Lē na faia o ia; a o lē ‘ua āva ‘iā te ia, ‘ua alofa o ia i le tagata mativa.’

 Faitauga - Tusi Paia: Salamo 10:1-15

 Upu Folafola
O le Atua e naunau tele I le tagata mativa. E lē finagalo fo’i e fa’asauā I ai se tasi. Fai mai la tatou upu tauloto o le asō, so’o se tasi e faasaua I e matitiva ua faalumaina e ia le Atua. I le Mataio 25:45 ua ta’u faatasi ai e le Atua ia ma le tagata mativa ma fetalai mai faapea, soo se mea tatou te faia I le tagata mativa o ia lava lea ua faia I ai. E pele I le finagalo o le Atua le tagata mativa, ma afai e te agaleaga ia i latou e taui e le Atua lou agaleaga. Fai mai le fuaiupu e lua o la tatou Tusi Paia faitau o le asō, o le tagata amio leaga ua fa’asauā I le tagata mativa e maua lava o ia I ana togafiti leaga, o lona uiga o le fua o lona fa’asauā I le tagata mativa e toe taui atu ia te ia.

 Fai mai le Salamō 10:6 6‘Ua fai ifo ia i lona loto, “E lē fa‘agae‘etia a‘u; e lē o‘o mai se mea leaga ‘iā te a‘u e fa‘avavau.”

 O le fuaiupu ua taua i luga o manatu ia o i latou e fa’asauā I e matitiva. Ua manatu i latou o le maualuga o lo latou tamaoaiga o lo’o i ai i le taimi nei, e lē mafai ai o na avea i latou faapei o e matitiva. Peitai o se pepelo tele lea manatu. E tele nauā faamaumauga o tagata na amata i se olaga e telē le tamaoaiga ae faaiu I le leai o se mea. O le toatele o ia ituaiga tagata na faalumaina mai o latou tulaga taualoa ona o le agaleaga I tagata matitiva sa latou mafuta.

 O le isi mea e mafai na fai e le Atua o le faagata o le tagata mauoloa I lona tulaga o i ai ae siitia le uso mativa ia sili atu e avea ma pule e auauna i ai le tagata mauoa. Ua molimau tutusa le 1 Samuelu 2:8 ma le Salamo 113:7-8 e mafai e le Atua o na faatula’i mai le tagata mativa nai le efuefu ma fa’anofo fa’atasi ia ma alii sili o lona nuu. Sa faapena o na faia e le Atua i le aiga o Potifala. Na tu’uaiina sesē e le avā a Potifala Iosefa. Talu ai ona o Iosefa o se tagata mativa na te lē gafatia se lōia e finauina lona faamasinoga, na ave sa’o a e Potifala Iosefa loka I le falepuipui e aunoa ma se faamasinoga. E le’i leva ae toe fa’atula’i e le Atua Iosefa e avea ma alii e sili atu iā Potifala I totonu o le malō.

Aua aua ne’i e fa’asauā ia I latou e maulalo ifo lo latou tamaoaiga ia te oe, ma e manatu e tumau ai lava faapea le soifuaga. E lē o tofā le Atua. O loo silasila I mea uma o loo e faia ma faapea a e toaga pea e fa’asauā I lē mativa o lo’o e faalumaina pea le Atua. Aua e te faatupu le toasa o le Atua e ala i lou fa’asauā I ē matitiva. I le suafa manumalo o Iesu Keriso. Amene. 

OPEN HEAVENS
MATALA LE LAGI MO LE ASO FARAILE 7 OKETOPA 2022

 Manatu Autu: Faaalia o galuega faatemoni 6 (Exposing demonic operations 6)

 Tauloto – Tusi Paia: Iakopo 4:7 ‘O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou’.

 Faitauga - Tusi Paia: Luka 11:21-26

 Upu Folafola
Tusa lava po’o le a le tulaga o se tagata ua ulufia e temoni, e mafai I lea tagata ona faasa’olotoina e pei o le emo o le mata I le mana o le suafa o Iesu. Peitai, o so’o se tagata e faasa’olotoina mai se temoni, e mulimuli pea iai le temoni e toe sue sona avanoa I lea tagata. O le taimi lava e vaai atu ai le temoni ua le o toe iai Agaga Paia, e toe sau o ia ma isi temoni e fitu e sili atu le leaga e toe ulufia le tagata lava lea. Ua o’o ina sili atu le leaga o le tulaga o lea tagata I lo le tulaga na iai muamua. Afai e leai se suesue I le upu a le Atua ma fai mafutaga ma Agaga Paia, o lo’o tatala e lea tagata le avanoa I temoni e toe ulufia o ia. O le upu ua lava ma totoe lea mo le tagata poto. 

 Le au pele e, e sili atu le taofia o le ulufia e le temoni I lo le ulufia e le temoni ona faia lea o le faasaolotoga. Afai e te afaina ai, e ono malolo mai manuaga, ae iai pea faailoga o manuaga. O le tamaloa na ulutinoina e temoni I Katara na faasaolotoina mai temoni ina ua fetaiai ma Iesu, ae na tumau pea faailoga I lona tino. O tausaga uma na nofo ai I le ana ua le toe maua. O le tulaga lea e tatau ai ona e mamao ese ma so’o se mea e ono ulutino ai oe e temoni. Fai mai le Luka 4:41 ‘Ua ō atu fo‘i temoni i fafo i ē to‘atele, o ‘alalaga, ‘ua fa‘apea mai, “O oe lava le Keriso, le Alo o le Atua.” ‘Ona vavao lea o ia ‘iā te i latou, ‘ua lē mafai ‘ona latou tautala; auā ‘ua latou iloa o ia o le Keriso.

 I le Mareko 9:20, Luka 4:41 ma isi fuaitau faapea, na iloa e temoni Iesu ma e matua fefefe I latou ia te ia. Fai mai le Filipi 2:9-11 e toatuli tulivae uma ma tautau o ia o le Alii o Alii. O Iesu o le tagata e sili lona malosi o lo’o talanoa mai ai I le Luka 11:22‘Ae ‘āfai e oso atu ‘iā te ia le tasi e sili lona malosi ‘iā te ia, ‘ua manumālō i ai, ‘ona fao ai lea o lana ‘au‘upega uma na ia fa‘atuatua i ai, ma tufatufa i ana mea na fao.

 Ua na o le mana o le tagata sili ona malosi e mafai ona faasaolotoina le tagata ua ulutinoina e temoni. O lo’o afio Iesu Keriso I totonu iai tatou ma e sili o ia ‘ua ‘iā tei ‘tatou, i lē ‘ua i le lalolagi (1 Ioane 4:4).A vaai atu temoni I se tagata o loo afio ai Iesu, e latou te ifo iai(Galuega 19:15). E tusa ma le poloaiga ua tuuina mai e Iesu Keriso  I le Mareko 16:17, I lo tatou tulaga o tagata faatuatua, e tatau ona tatou tutuli temoni I le suafa o Iesu. O so’o se tagata faatuatua e tumu I le Agaga Paia, e mafai ona ia tutuli ese temoni mai se tagata (Galuega 16:16-18). Ia tatou faaaogaina lenei pule ua tuuina mai iai tatou. 

 Tatalo
Lo’u Alii Iesu Keriso, o lau afio o le tagata ua sili ona malosi. Faamolemole le Alii e, is tuli ese I le aso, so’o se temoni e ono nofo I totonu ia te a’u I le suafa o Iesu Keriso, Amene.

OPEN HEAVENS
MATALA LE LAGI MO LE ASO TOFI 6 OKETOPA 2022

Manatu Autu: Faaalia o galuega faatemoni 5 (Exposing demonic operations 5)

 Tauloto – Tusi Paia: Salamo 32:7 ‘O oe lava lo‘u lafitaga, ‘e te leoleoina a‘u i le puapuagā, ‘e te si‘osi‘omia a‘u i siva o le olataga. Selā’.

 Faitauga - Tusi Paia: Mareko 5:1-20

 Upu Folafola
O galuega faatemoni e aupito sili ona leaga, o le ulufia lea e agaga o tagata - o lona uiga, ua pulea atoatoa tagata e le fili ma ua nofo i totonu o nei tagata. Ae paga lea, e toatele tagata o lo’o feoai solo, ma ua ulufia e temoni e tele.

 O le tagata le taualoa, o lona igoa o Katara, sa ulutinoina o ia e le faitau afe o temoni. Sa matuā faapuapuagatiaina o ia e nei temoni, ma na lē mafai ona ia aveesea i latou. Ina ua tutuli ese e Iesu temoni ma ua ulu i totonu o puaa(tulou), na sili atu i puaa le malelemo nai lo le taofiofia o agaga leaga i totonu ia i latou. I le 1 Samuelu 16:14-23, na amata ai ona gaoioi le Tupu o Saulo e pei o se tagata valea ina ua uluitinoina o ia e ni agaga leaga. O le sini autu o galuega faatemoni pe a latou maua se tagata, o le faʻaaogaina lea o le tagata e faʻataunuʻu ai fuafuaga a le tiapolo i luga o lenei fogaeleele, a maea ona faʻaumatia loa lea o lea tagata. Ina ua latou aumaia le tamaitiiti na uluitinoina e le temoni ia Iesu i le Mareko 9:22, na faapea mai lona tama, o lo’o taumafai le temoni e faaumatia le tamaitiiti.

 E lua ituaiga o tagata ua ulufiaina e temoni, o le tagata ua loto e faaaogaina I latou, ma e e tetee I temoni. O i latou ua loto i ai, o i latou ia ua tuuina atu i latou e faaaoga e le tiapolo e faaauau ai ana galuega leaga i lenei lalolagi. O tāulaitu ma faataulāitu o faataitaiga o tagata ua faaaogaina e temoni. O i latou e tetee I temoni, e mafai ona aafia I latou ini ala se lua. Muamua, o le aafiaga ona o tagata e mafuta iai. A nonofo tagata i nofoaga, e lalata I ai temoni, e mafai ona nonofo nei temoni iai latou. Ou te manatua se taimi na aumai ai se tamaiititi iā te aʻu ina ia laveaʻiina. Na faapea mai e masani ona alu i nofoaga e tumu i temoni, ma na matua le mafai ai ona ia tootuli pe savali foi.

 O le auala lona lua e uluitinoina ai e temoni le toʻatele o tagata e aunoa ma lo latou iloa, e auala lea i mea latou te faʻaalia, e pei o lo latou fiafia i musika faalelalolagi, o ata tifaga poʻo le faitaaga ma tagata ua uluitinoina e temoni. Sa a’oa’o mai e lo’u tama o Pastor Josiah Akindayomi i matou, o taimi uma lava e tata ai ni pesepesega, o loo valaauina agaga. E lagolagoina lenei faamatalaga i le tusi a 1 Samuelu 16:23, ina ua taina e Tavita ni musika faale-agaga, ua tuliesea ai agaga leaga mai ia Saulo. Ua faapea mai le 1 Korinito 6:16, ua avea outou ma tino e tasi ma so’o se tasi tou te taooto faatasi. O lea la, afai e te taoto ma se tagata ua uluitinoina e temoni, e maua e le temoni le aiā atoatoa e pulea ai oe. Afai o loʻo i ai se temoni i totonu ia te oe, ma e te naunau e laveaʻiina oe, e tuu faʻatasi loʻu faʻatuatua mo oe ma ou te faʻatonuina temoni, ia tuua oe i le taimi nei, i le suafa o Iesu.

 Tatalo
Tama, faamolemole ia faaumatia uma galuega faatemoni I lo’u olaga I le aso, I le suafa o Iesu Keriso, Amene.

OPEN HEAVENS
MATALA LE LAGI MO LE ASO LULU 5 OKETOPA 2022

 Manatu Autu: Faaalia o galuega faatemoni 4 (Exposing demonic operations 4)

 Tauloto – Tusi Paia: Kenese 26:13 ‘Ua tagata ola lenei tagata, ‘ua tupu pea lava, ‘ua atili ai ‘ua o‘o ‘ina matuā tagata ola lava ia’

 Faitauga - Tusi Paia: Mareko 5:25-29

 Upu Folafola
O le isi galuega faatemoni e taua o le toe fo’I I tua (regression), a taumafai se tagata e la’a I luma, ae uma ane ua lua la’a e agai I tua. E foliga e iai se malosiaga o loo tosoina ia I tua. E sili atu le taotaomia I le tulaga e tasi I lo le tulaga ua foi pe o lo’o faagasolo pea I tua. 

 Ua tatou faitau I le tala I le fafine puna toto I le faitauga o le Tusi Paia o le aso, sa taumafai pea ina ia maua se suiga lelei ae ua atili ai lona ma’i seia o’o ina la fetaiai ma Iesu. 

 E leiloa pe na e ui ai I le ala lea. E leiloa pe na e taumafai pea e te alu ese mai le mativa ae foliga mai pea o loo atili ai le mativa. O le aso, o le a faasaolotoina oe e le Atua Silisili Ese mai lima o le tiapolo, I le suafa o Iesu. I le tele o Tausaga talu ai, sa iai se ulugalii mauoa sa iai se la feeseeseaiga. A’o misa ma felafoai upu, na faapea atu le fafine e uma ane mea uma o le a la ui ai, e toe foi lona toalua I le matua mativa e o’o I le alu I se mea, o le a savali. Na ata aamu lenei alii I le faamatalaga a lona toalua aua foi e 14 ana taavale ma ua manatu e le taitai ona toe o’o I se mativa, ae na te lei iloa, o lona toalua o se taulaitu. E lei umi se taimi ae amata ona faaitiitia ana tupe ma ua faatau ese uma ana taavale seia vagana se taavale se tasi, a’o taumafai pea. Ua o’o I le tulaga ua toe lava o le $5 tala. Ua ia manatu, a faaaoga le tupe e ‘ai ai, o lona uiga o le a savali e pei ona folafola e lona toalua, ae a faaaoga foi e utu ai le taavale, o lona uiga e oti I le fiaai. I le taimi lea, na vave ona tamoe I le Ekalesia mo se fesoasoani. Ua faasaolotoina o ia e le Atua ma ua toe faafoisia uma mea na leiloa. 

 Le au pele e, afai ua e maitauina o loo e alualu pea I tua ae le o luma, o lona uiga e ono iai se temoni o loo tosoa oe I tua. O le aso, ou te poloai ma folafola atu lou saolotoga mai na temoni I le suafa o Iesu.  

 Tatalo
Tama, faamolemole ia faaumatia mea uma o loo tosoina a’u I tua ma taofia ai le alualu I luma, I le suafa o Iesu Keriso, Amene.

OPEN HEAVENS
MATALA LE LAGI MO LE ASO LUA 4 OKETOPA 2022

Manatu Autu: Faaalia o galuega faatemoni 3 (Exposing demonic operations 3)

 Tauloto – Tusi Paia: Filipi 3:14 ‘Ou te tausisi atu i le fa‘ailoga, ‘ia maua ai le taui na vala‘auina ai a‘u mai lugā e le Atua ‘iā Keriso Iesu’.

 Faitauga - Tusi Paia: Ioane 5:1-11

 Upu Folafola
O le isi auala e galulue mai ai temoni o le taotaomia I lalo (suppression). O le taotaomia I lalo o le tulaga lea ua paū I lalo le tagata ae ua taumafai le tiapolo ina ia aua lava nei mafai ona toe tu I luga. O le tamaloa I le vai I Petesa, sa iai i tafatafa o le vai ma lona manaoga ia malolo. Sa ia vaaia I tausaga uma I tagata ua maloloina a’o ia, o loo tumau pea I le tulaga e tasi. E iai tagata o loo tumau pea I le tulaga e tasi faaleagaga mo le tele o tausaga, e le gata  I le itu faaleagaga, I galuega, tulaga tau tupe ma isi. Ia faaumatia le taotaomia I lalo I le asō, I le suafa o Iesu. 

 E toetele tagata e le anoano tele pe afai e tumau I le tulaga e tasi mo le tele o tausaga. E latou te lē o iloa, ua latou faatagaina temoni e taotaomia I latou. O le asō, e aveesea ai le tali pupuni mai o latou fofoga ma latou finau atu, ona latou agai lea I luma. E te agai I luma I le suafa o Iesu. O le tamaloa I le vai i Petesa ua iai I luma o Iesu ae e le’i ole atu mo le faamalologa. Ou te poloai ma folafola atu, e taitaia oe I luma e lo tatou Alii I le asō. O le a amata ona sii a’e o outou apaau e pei o aeto, I l e suafa o Iesu. 

 A'o ‘ou aoga mo le faailoaga o le masters of science I le Iunivesite o Lagos I Nigeria, sa iai se tamaloa iina e faiaoga lagolago. Ua maea la’u aoga, toe sue leisi o’u faailoga ma I’u ina avea lea o a’u ma faiaoga I le Iunivesite ma ua siitia lo’u tulaga I lo le tamaloa lea. O le tulaga o le tamaloa lea, o se faataitaiga lelei o le taotaomia I lalo. O le fofo o le taotaomia I lalo o le faauuga a le Atua. Fai mai le Isaia 10:27, o le faauuga e gausia le amo o lo’o tuu e le tiapolo I luga o le tagata, e taotaomia ai I lalo gaoioiga e mafai ona ia faia. O le tamaloa I le vai I Petesa na nofo ai I talane o le vai I le naunau I  le faauuga e faatasi ona paū I le tausaga. Faafetai na ia feiloai ma le tagata ua ta’ua o le faauuga, ma I lena aso, ua gausia le amo.

 I le Galuega 3:2-11, o le aso na feiloai ai le tamaloa I le lotoa matagofie ma le faauuga, na amata loa ona savali, osooso ma vivii I le Atua. O le tauaso o Patimaio na tumau I le tulaga e tasi mo le tele o Tausaga ae ina ua valaau atu ma le leotele ia Iesu Keriso, ina ia o’o mai lona alofa mutimutivale ia te ia. E le’i taofia lana alaga leo tele seia o’o atu ia te ia le alofa mutimutivale o le Atua ma ua gausia le amo a le tiapolo I lona olaga. 

Tatalo
Tama, faamolemole ia o’o mai lou alofa mutimutivale ia te a’u. Ia o’o mai lau faau’uga mana ina ia gausia le amo o le taotaomia I lalo mai ia te a’u, I le suafa o Iesu Keriso, Amene.