Samoan Devotional

OPEN HEAVENS
MATALA LE LAGI MO LE FARAILE 23 SETEMA 2022

 Manatu Autu: Pe a o’o ina e finau ma le malosi (When you must be violent)

 Tauloto – Tusi Paia: Mataio 11:12 ‘‘‘Na āfua mai i ona po o Ioane le papatiso, ‘ua o‘o i nei ona po, ‘ua taufaoa ai le mālō o le lagi, o lo‘o ‘ua ‘avea fa‘amalosi fo‘i e i latou o taufao...”.

 Faitauga - Tusi Paia: Mataio 18:18

 Upu Folafola
O nisi kerisiano e ese ma le fifilemu ma latou talia faiga a le tiapolo ma ana ‘au I o latou olaga, ma faapea mai e tatau ona fifilemu e pei o lupe.  Fai mai le Tusi Paia e na o I latou e avea faamalosi e mafai ona taufao I le malo o le Atua. E faia e le tiapolo mea uma ina ia aua nei e o’o I le malo o le Atua, e te avea faamalosi. Afai e te fifilemu I le taimi e tatau ai ona a finau ma le malosi, e matua manumalo le tiapolo ia te oe. 

E tatau ona e finau ma le malosi I so’o se tulaga e faasagatau mai ai le tiapolo e te ono oti ai. O so’o se tulaga e o’o ai ina faaumatia le faamoemoega manuia o lou olaga po’o lou olaga faaleagaga, e le tatau ona e faatamala iai. 

 I le tele o tausaga talu ai, na ou fetaiai ai ma se fafine e maualuga le tulaga I totonu o komiti e faia suega I Aferika i sisifo. Ua faaipoipo o ia ma e manuia foi lana fanau. Afai e te vaai atu ia te ia, e foliga o loo manuia ma lelei mea uma e pei ona masani ai, peitai o lo’o nonofo ma temoni. Na sau ia te a’u I le isi aso ma faapea mai: ‘o oe o lo’u toalua, o lo’o fetalai mai ai le Alii’. Ona ou fai atu lea, ‘e le sa’o lena mea. O a’u o lo’o ou fiafia I la’u faaipoipoga, o a’u o se tagata o le Atua, ma o loo ou taumafai ou te ola faapaiaina’. Na ia faapea mai: ‘o le a ou faaipoipo ia te oe’. Ina ua le mafai ona matou fofoina le faafitauli, ua ripotia loa I leoleo. E iai se aso na ou alu ai I Lonetona I se galuega ae ou te le’i ta’ua I seisi tagata. Ao ou ulufale atu I le fale ou te nofo ai, ae tatagi le telefoni o le fafine lea ua faapea: ‘Afio mai, ua leva ona ou faatali atu, ou te iina I le 15 minute’, Ua ou fai iai o le a vili leoleo. Ua le sau loa ae ua alu le po atoa o vilivili mai. Ua ou iloa e tele ma matuia le faafitauli ma e tatau ona ou finau ma le malosi. Ua ou alu atu I le Atua I le tatalo I ou tulivae ma tagi atu ia te ia e fesoasoani mai. Ua fetalai mai le Atua: ‘Atalii, ua e iloa le uiga o le Upu, o le mea e te saisaitia I le lalolagi e faapena foi I le lagi, o le mea e te tatala I le lalolagi e faapena foi I le lagi. O le mea e te faatagaina, e faatagaina foi. O le mea e te faasaina, e taofia lava. Ua ou faapea atu ‘Ioe le Alii e’, ona ia faapea mai lea, ‘e tuu mai I la’u faitalia’. Ua ou faapea atu: o le mauga lenei e tatau ona aveesea, ma ua aveesea. Ana ou le finau ma le malosi, semanu e faaumatia a’u e le mauga, I le suafa o Iesu Keriso, Amene. 

OPEN HEAVENS
MATALA LE LAGI MO LE TOFI 22 SETEMA 2022

 Manatu Autu: Pe a tuitui mai pea le faaosoosoga (When temptation keeps knocking)

 Tauloto – Tusi Paia: 1 Peteru 5:8 ‘‘‘Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia..”.

 Faitauga - Tusi Paia: 1 Peteru 5:8-10

 Upu Folafola
O le tiapolo e matua faitogafiti. E na te iloa loa se lumanai manuia ua fuafuaina mo se tagata, e na te faia mea uma I lona malosi ina ia aua nei ausia e lea tagata. Peitai, e le mafai ona manumalo le tiapolo seiloga lava e faia e le tagata le agasala, aua e tuua ai o ia e le Atua. Ina ua faalogo I le miti a Iosefa, ua ia iloa le faamoemoega manuia o lona lumanai, o lea na ia faaosoosoina ai ona uso e fasioti ia te ia, ae na faalavelave le Atua ma ua faatau atu o ia o se pologa. Ona saunia lea e le tiapolo se fafine e faaosooso ia te ia, o se fafine e nofo I le fale sa iai ma e leai se pule a Iosefa ia te ia. So’o se itu na liliu iai I lea fale, na ia vaaia foliga ataata o le fafine o loo taulai ma momo’o ia te ia. E toatele tagata ua leiloa o latou faamoemoega mo le lumanai manuia I le auala lea. E saunia e le tiapolo se fafine e latatala iai latou e faaosooso pea seia oo I le aso e paū ai. E le faaaogaina e le tiapolo se fafine e na o le faatasi ona e vaai iai, e na te faaaogaina le fafine e te vaai pea iai I aso uma aua foi e naunau ia mautinoa e te pau ma le mafai ona ausia lou faamoemoega manuia. Afai e tu’itu’i mai pea lena faaosoosoga, ia e poto e iloa o le mailei a le fili ona e tamoe vave ese lea e pei o Iosefa. Fai mai le 1 Korinito 10:13‘Ua lē maua ‘outou e se tofotofoga e ‘ese i lo tagata; a ‘ua fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono.       

 E leiloa poo iai se alii po’o se tamaitai o lo’o naunau mai ia te oe I totonu o le ofisa, pe faaosoosoina oe e matamata I ata leaga, tusa poo le a le loloto o le tofotofoga, e saunia e le Atua le auala e te sao mai ai. E iai tagata e mafai ona fesoasoani ia te oe e te alu ese ai ma lena tofotofoga. Ae e iai faaiuga taua e tatau ona e faia, e ui e faiagata, ae e te saoloto mai ai mai na tofotofoga. E iai lava le auala e saoloto mai ai. 

 ‘Aua e te matamuli e fesili mo se fesoasoani, ‘aua e te loto maa’a e faia le mea e tatau ona faia ina ia aua nei e paū. E tatau ona e saoloto mai ai ina ia ausia le faamoemoega o lou lumanai manuia. Ou te tautala atu lava I mea na ou ui ai, o le tele o tofotofoga e te manumalo ma saoloto mai ai, o le latalata foi lena o lou ausia o le faamoemoega mo lou lumanai manuia. 

 O le a le tofotofoga o loo tuitui atu pea I lou loto? Ia e faia se laasaga mautinoa I lenei aso ina ia aua lava nei e toe paū ai, I le suafa o Iesu Keriso, Amene. 

OPEN HEAVENS
MATALA LE LAGI MO LE LULU 21 SETEMA 2022

 Manatu Autu: Auā e te lei ole atu (Because you ask not)

 Tauloto – Tusi Paia: Mataio 7:8 ‘‘Auā ‘ai sē ole atu, e maua e ia; o lē sā‘ili fo‘i, e iloa e ia; e tōina fo‘i i lē tu‘itu‘i atu.”.

 Faitauga - Tusi Paia: Mataio 7:7-11

 Upu Folafola
E iai taimi e ui ai kerisiano I faafitauli I mea sa le tatau ona avea ma faafitauli. E iai lou Tama I le lagi e Silisili Ese ma na ia faia le lalolagi atoa ma mea uma o loo iai, ae o lo’o faamamafa pea I lou mafaufau mea o lo’o e manaomia ae e faigafie lava ona e ole atu ia te ia ma e mafai ona ia foai atu mea uma o lo’o e manaomia. O le mafuaaga o le tele o faafitauli o lo’o tumau pea, ona ua leai se tatalo ae na o le popole. Fai mai le vaega  mulimuli o le Iakopo 5:16 e faapea: ‘Ua aogā tele le tatalo fa‘atauānau a le tagata amiotonu’.

 E le o faapea mai ua aoga tele le popole ma le faatauanau. O le mea moni, I le Mataio 6:27 na matua faamanino mai e Iesu Keriso o le popole e leai ma sona aoga ia te oe. ‘Aua le avea ma se amoga mamafa ia te oe mea e le mafai ona e amoina, ole atu I le Atua ona ia amoina lea mo oe. E na te lei tuua se tapulaa e gata ai mea e te ole atu ai ia te oe. I le Ioane 16:24, o lo’o faapea mai, ia e ole atu ina ia atoatoa lou olioli. O lona uiga e le mafai ona faatumuina oe I le olioli seiloga e te ole atu ia te ia. 

 E toatele tagata ua feita ma le fiafia I le Atua. E latou te o I tagata uma ina ia maua se tali ae atili ai ona popole, a le  maua se tali ona liliu lea I le Atua ma faapea: ;Aisea ua tupu ai lenei tulaga ia te au? E toatele kerisiano e amoina avega mamafa aua latou te le iloa le loloto o le alofa o le Atua iai latou aemaise o lona naunau e foai ia te I latou mea uma e ole atu ai. Ua ia alofa mai I le lalolagi atoa na ia foai mai ai lona atalii e toatasi mo I tatou. O le a se mea o lo’o e ole atu ai e sili atu I lena? E faapefea ona ia taofia se mea e te ole atu ai, e o’o I lona atalii e toatasi e na te lei taofia? 

 32O ia lava sa na lē fa‘asaoina lona lava Alo, a ‘ua tu‘uina mai o ia ‘ona o i tatou uma lava, e lē foa‘i fua mai ‘ea e ia ‘iā te i tatou mea uma lava fa‘atasi ma ia i se a? Roma 8:32

 Ua ia avatu se siaki tupe ia te oe e pule ai lava oe I le aofaiga e tusi ai. Aua le soona popole ma pisi vale solo e tau su’e ni fofo I ou faafitauli, tootuli I ou tulivae I le tatalo ona tusi lea o le aofaiga I le siaki tupe, e pei ona tusia I le Mataio 7:7-8

 Ole atu I le Atua I so’o se mea o lo’o e manaomia, I le suafa o Iesu Keriso, Amene.     

OPEN HEAVENS
MATALA LE LAGI MO LE LUA 20 SETEMA 2022

 Manatu Autu: Ua lava, ua lava 2 (Enough is enough 2)

 Tauloto – Tusi Paia: Galuega 2:21 ‘‘E i‘u fo‘i ‘ina fa‘aolaina o i latou uma lava o ē vala‘au atu i le suafa o le Ali‘I”.

 Faitauga - Tusi Paia: 2 Tupu 2:15-22

 Upu Folafola
I le 2 Tupu 2:19-22, sa pologa ma pagatia tagata Ieriko ona o se mala i tausaga e tele. O le lē maua o ni fanau ma le oti ua avea ma tulaga masani. Sa atagia foliga manuia pe a tagai iai, a’o I le loloto, e tele le fa’anoanoaga ma le amioleaga ma faiga faaalatua, ae sa le mafai ona latou gagana ai. Ina ua ave’esea Elia i le nofo afi, sa foliga mai ua leai se latou faamoemoe mo le toe fuata’ina. A ua fa’amanuiaina i latou ona sa maua e Elisaia le fa’aluaina o le agaga o Elia. Ma o le taimi lava sa iloa ai e tagata ua maua e Elisaia le agaga o Elia, ona latou augani loa iai mo se fesoasoani. I lena lava aso, sa gausia ai le amo ua leva ona pologa ai a latou augātupulaga.

 Afai o e tolopoina se avanoa e te māfuta vavalalata ai ma le Atua i se nofoaga pāganoa, e te talanoa ai i le Atua i faiga masani lē manuia ua tuufaasolo i augatupulaga a lou aiga. O le mea moni, afai e te faatuai, e ono pagatia ai fo’i lau fanau I na faafitauli. E te le toe gafatia loa ona tatali, alu i se nofoaga pāganoa ma augani i le Atua Silisili ese faapenei: ‘Le Alii e, ou te le tu’ua oe seia e suia lenei tulaga amioleaga, mo le lelei’. O le tatalo ‘ua lava, ua lava’ o se tatalo e te faia i le po atoa, e pule oe I taga e faia e aunoa ma le iloa atu e seisi. 

 E iai se tasi o a’u fanau faaleagaga, sa o’o mai ma faapea mai, o lo’o nofo lisi faatasi ma se tinā taulaitu i le nofoaga e tasi ma ua afaina lana galuega auā ua leai se alualu i luma. Ua ou fai atu: ‘Aisea e te lē tuliesea ai le fafine? E lē o oe ea o se tagata tatalo?’ Ae tali mai, ‘Leai, o a’u o se tagata nofo lisi e pei o le fafine lea; tau lava o lou tatalo mo a’u ia alualu i luma la’u galuega, ae tu’u pea le faitalia I tagata’. 

 Sa umi se taimi ua ou le toe vaai i lo’u atalii lea, ae ina toe foi mai, ua vaaia ni papala I lona tino. Sa ia faapea mai sa tuuaia o ia e le fafine taulāitu i le talepe fale , ma ua molia e leoleo. Sa taofia ma nofo vaavaaia, ma ua sa’oloto ai namu i lona tino. Ae sa maitauina pea e malu o le malo lona faia o viiga i le Atua ma tauloto le Tusi Pa’ia i taimi uma, ona latou tatalaina lea o ia, i tua.  Sa ou faamanatu iai, ‘Na ou fai atu e te tuliesea le tagata lea, ae ete musu, a o lena ua ia tuliesea oe! Ma o se isi gaioiga na te faia ia oe, o lona uiga, e te le toe foi mai ai!’  Sa tatalo loa lo’u atalii lea, i totonu o le 3 aso, ua alu ese ma suia le nofoaga e nofo ai le fafine taulāitu. Soia e te toe tolopoina lou sa’olotoga, auā afai e te tu’u avanoa pea i lē o loo faapologaina oe, e ono maua ai lona avanoa e matuā tā ai oe i se tulaga e te le toe foi ai I se lelei! Talosia ua e sauniuni e tatalo loa i le taimi nei.

 Tatalo     
Tama, o so’o se mea, so’o se tagata, so’o se malosiaga o lo o fa’alavelave ia te a’u ma lo’u aiga, o la’u tatalo i le asō; ia pa’ū mai le afi o le Atua ma fa’aumatia uma ai, i le suafa o Iesu Keriso, Amene.          

OPEN HEAVENS
MATALA LE LAGI MO LE GAFUA 19 SETEMA 2022

Manatu Autu: Ua lava, ua lava1 (Enough is enough 1)

 Tauloto – Tusi Paia: Esoto 3:8 ‘‘O lenei, ‘ua ‘ou alu ifo, ‘ou te lavea‘i mai ‘iā te i latou a‘i lima o Aikupito, ma ‘ou ‘aveina a‘e i latou a‘i lea nu‘u i le nu‘u lelei ma le lautele, o le nu‘u e tafe ai le suāsusu ma le meli, o le mea e i ai sa Kananā, ma sa Hetī, ma sa Amorī, ma sa Perisē, ma sa Hivī, ‘atoa ma sa Iepusē”.

 Faitauga - Tusi Paia: 2 Tupu 4:1-7

 Upu Folafola
Ua ou vaai I tagata e ui I luitau e tele ma e matua pagatia ai. E ui I lea, e latou te maua lava sina avanoa e taumafai ai pea ia manumalo a’o tumau pea nei luitau. Ae e iai lava le aso e latou te faapea; ‘Ua lava, ua lava’. Na o’o iai le fafine ua oti lana tane ina ua o atu tagata o lo’o nofo aitalafu ai, e ave faamalosi lana fanau tama. E leiloa pe na faasoesa pea nei tagata o lo’o aitalafu ai ia te ia ae sa filemu ma pologa ai lava ae na te leiloa le perofeta o lo’o iai le tali o lona faafitauli. I lena aso atofaina, e leiloa pe na faapea ane ia te ia lava, ‘ua lava, ua lava’ ona tagi atu lea I le perofeta mo se fesoasoani, ona maua lea. O le aso e te taofia ai lou talia pea o lena luitau, e taofia ai, ae afai e te ui ai pea ma le pagatia, o lo’o matamata atu pea le Atua ia te oe. 

 I le tele o tausaga talu ai, sa iai se ulugalii ua la iloa, e tele lava a la tupe e maua, peitai e tele ina mou atu ma ua maua ai pea I laua I le mativa. Na la pagatia pea I lenei faafitauli seia oo I le aso ua la faapea ai ‘ua lava, ua lava’. I lena aso, na la tatalo ai ni tatalo matautia, ma o lo la tausoga na la aumaia mai le nuu e faia a la feau, ua vave ona tautino ane. Na ia sau ma le faatonuga mai le latou nuu, ia tago I se pulou o le alii ma momoli atu I le nuu ma ua faia iai ni vai faataulaitu. O so’o se tupe a lenei alii e maua, e maua e I latou ia I le nuu I totonu o le pulou lea. Ua toe maua mai lenei pulou ma ua susunuina, ona faatoa toe maua loa lea e lenei ulugalii a la tupe ma ua mafai ona faatauina se la fanua ma fauina ai se la fale. Na amata ona alualu I luma ina ua la faapea ane, ‘ua lava, ua lava’. 

 Ou te leiloa ia te oe, ae ua ou fiu I le tulaga o lo’o ou iai ma ou te fia alualu pea I luma. Ioe, ua ou maua faamanuiaga e tele ma ou te faafetai ai pea I le Atua, ae ou te le’i o’o I le tulaga o lo’o ou naunau ou te iai. Ua e loto malie ea I le tulaga o lo’o e tumau ai mo se taimi umi? E te manao ea e te mataitu ina pe e te manao e saoloto mai saisaitiaga a le fili ma lele loa? O lo’o ia te oe le pule ma le faitalia. Afai e te naunau e alualu I luma, ona e tatalo lea o le tatalo lenei ma le filiga I le itu faaleagaga. 

 Tatalo.
Tama, ua ou faapea atu I le aso, ua lava, ua lava lenei pologa, ma ou te folafola atu, o lenei faafitauli, ia taofia loa I le aso, I le suafa o Iesu Keriso, Amene.

OPEN HEAVENS
MATALA LE LAGI MO LE SA 18 SETEMA 2022

Manatu Autu: Manuia o le tagata tāla’i 3 (Benefits of witnessing 3)

 Tauloto – Tusi Paia: Mataio 24:14 ‘‘E tala‘iina atu fo‘i lenei tala lelei o le mālō i le atu laulau uma, e fai ma molimau i nu‘u uma; ‘ona o‘o mai ai lea o le gata‘aga.”

 Faitauga - Tusi Paia: Roma 8:19-23

 Upu Folafola
O so’o se tagata tamoe I tamoega e naunau I le vaai atu ua o’o I le tini. O le tamoega I le lagi, e le o tuuga puupuu ae o le marafoni e umi. Ua tusa ma le lua afe tausaga o tatou nofo faatalitali pea I le toe afio faalua mai o Keriso. Ua tusa ma le 50 tausaga o ou tamo’e I lenei tamoega ma o lo’o faaauau pea. Ou te leiloa po’o le a le umi o lau tamoega, ae mautinoa o lo’o e nofo faatalitali ma le naunau I le toe afio mai o lo tatou Alii o Iesu Keriso. E iai se galuega e mafai ona e faia e vave ai ona toe afio faalua mai o ia – o le talaiina o le talalelei ia Iesu Keriso ma manumaloina agaga mo le malo o le Atua. Fai mai le Mataio 24:14 “E tala‘iina atu fo‘i lenei tala lelei o le mālō i le atu laulau uma, e fai ma molimau i nu‘u uma; ‘ona o‘o mai ai lea o le gata‘aga”.

 Fai mai le faitauga o le Tusi Paia o le asō, o fanau uma a le Atua o loo nofo faatalitali ma le naunau I lena aso e liua uma ai I tatou ae nofo tupu ma lo tatou Tama I le lagi, ae pau le ala e vave ai ona taunuu le toe afio mai o lo tatou Alii o Iesu Keriso, o le talaaina lea o le talalelei. Seiloga lava e o’o atu le talalelei ia Iesu Keriso I tagata uma e le’i faalogo muamua iai, e le afio mai Iesu. Afai e te naunau I lona toe afio mai ma nofo tupu ma ia I parataiso (pe afai e te mautinoa e te maua le lagi), e tatau la ona e talaiina le talalelei. O lo’o ou nofo faatalitali ma lo’u naunau I lona toe afio mai ma o lea ou te toaga e manumaloina agaga e o’o lava I nofoaga mamao I le lalolagi nei. Ua ou o’o atu I atunuu e toalaiti tagata e iloa uma e tagata isi tagata. E o’o I tagata falepuipui e o I le fale e vaai o latou aiga I le faaiuga o le vaiaso ma toe fo’i I le aso Gafua. E faapena le laiti o isi atunuu. E mafai ona ou alu I so’o se mea, pau lava le mea ia iai se tagata e manaomia le faalogo I le talalelei ia Iesu Keriso ma ia faaolaina, ua saunia a’u ou te alu iai I so’o se taimi.  

 E ofo nisi ona e lei toe afio mai lava Iesu ae ua iloa uma e le lalogai o ia. Sa ou lauga I se faalapotopotoga o amepasa e faatatau I le Atua I se tasi aso. Ua maea le 30 minute o le lauga ae fesili mai se tasi o amepasa: ‘O le a le Atua?’. Ua ou iloa e leai ma sona malamalamaaga I la’u lauga. O lo’o toatele lava tagata e lei faalogo muamua ia Keriso ma e tatou te faatali pea pe afai tatou te le talai atu le talalelei I a’i latou. Seiloga lava e latou te faalogo, e le mafai ona toe afio mai Iesu. O lenei, e tatau ona tatou talaiina le talalelei ia Iesu Keriso I le lalolagi atoa ma manumaloina agaga mo ia pe afai tatou te naunau e vave ona ia toe afio mai. 

Vaai po’o ai ni tagata fou e te talai atu iai Iesu Keriso, I le suafa o Iesu, Amene. 

OPEN HEAVENS
MATALA LE LAGI MO LE TOONAI 17 SETEMA 2022

Manatu Autu: Manuia o le tagata tāla’i (Benefits of witnessing)

Tauloto – Tusi Paia: Ioane 15:16 ‘‘Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.”

 Faitauga - Tusi Paia: Mataio 28:18-20

 Upu Folafola
Se’i tatou vaavaai i se isi faamanuiaga o le soifua molimau e pei ona taua i la tatou upu tauloto o le asō I le Tusi o Ioane 15:16 “Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa”.

 O au tatalo uma o le a talia e le Atua pe afai o oe o se tagata e manumaloina agaga mo le Atua. A faapea o oe e fai sau pisinisi ae i ai lou atali’i o lana masani lea o le aumai o tagata fou e fesoasoani e faatupu lau pisinisi, e I ai ea se mea e manao mai ai lou atalii lea e te lē faia? O le mea moni e mafai foi na e fa’ataua se taavale mo lou atalii tusa pe lei ole mai. E fa’apenā uma lava le finagalo o le Atua i lana fanau e tala’ia lona finagalo ma manumaloina agaga mo lona mālō. Fai mai Luka 15: 2 e olioli le lagi I soo se tagata agasala e salamō.

 E naunau tele le Atua i le tagata, na te faia se fiafia tele I le lagi I soo se taimi e salamō ai le tagata ma fulitua i le pogisa ae alu atu ia te ia le malamalama sili. O le fiafia tele o le Atua na te faia ai se pātī tele I le lagi mo so’o se agaga e faaolaina. Faapena foi na silasila le Atua i le uso na molimau I le agaga ua salamō. E mautinoa tusa pe lē o i le lagi le uso na lauga pe molimau e auai I le fiafia e momoli mai lava e le Atua le taui mo le uso i le lalolagi. O I latou uma foi e faia le galuega talai e pele i le finagalo o le Atua. E faapena foi la oe pe a e faamaoni I le galuega tāla’i ma manumalōina agaga, o au tatalo uma e lē faatuai na tali mai i ai le Atua.

 E lē lava lou lauga, ta’ita’i tagata iā Keriso na tuu ai lea. E tatau na e asiasi i ai i le telefoni, su’esu’e I le Tusi Paia ma isi ia mautinoa e lē toe foi i le lalolagi. Tatalo e le aunoa mo latou ia mautinoa e malu puipuia i latou mai mailei a le fili e taumafai e toe fa’afoi latou i le lalolagi. A e faia faapea e leai se mea e te ole atu ai i le Atua e lē faia mo oe. Lauga le talalelei ma tausi lelei agaga fou e manumaloina mo le mālō o le Atua ia mautinoa e lē toe foi i latou i le lalolagi.

I le suafa mamana o Iesu Keriso. Amene.

OPEN HEAVENS
MATALA LE LAGI MO LE FARAILE 16 SETEMA 2022

 Manatu Autu: Aoga o le Molimau 1 (Benefits of Witnessing 1)

 Tauloto – Tusi Paia: 1 Korinito 3:8 ‘‘A o lē totō fo‘i ma fa‘asūsū, e tasi lava i lā‘ua; ‘ae ta‘itasi ma lona lava taui e maua, e tusa ma lana lava galuega..”

 Faitauga - Tusi Paia: Tanielu 12:3

 Upu Folafola
E tele aoga ma faamanuiaga e maua mai I lou ta’uta’u ma talai atu I tagata o Iesu Keriso. Leiloa pe ana e iloa nei aoga ma faamanuiaga, semanu ua e talai atu le talalelei. O le a tatou talanoa I le aso I se tasi o aoga e tele o le molimau atu I le talalelei ia Iesu Keriso ma e maua I le tatou upu tauloto o le asō, 1 Korinito 3:8 ‘‘A o lē totō fo‘i ma fa‘asūsū, e tasi lava i lā‘ua; ‘ae ta‘itasi ma lona lava taui e maua, e tusa ma lana lava galuega..”

 E avea oe ma fetu pe afai e te talaiina le talalelei ia Iesu Keriso. Mo se faataitaiga, o le toatele o tagata e te aumaia I le Atua Silisili Ese, o le toatele foi lena o lau fanau I le Alii. Ou te lei fetaui lava I se tagata e lē loto faafetai ona o le tagata na molimau ia te ia ma taitaiina o ia e alu ese mai le ala I seoli. E o’o I le aso, ou te viia le Atua I le tagata na ia taitaiina mai a’u I le Ekalesia o le Redeemed Christian Church of God, o le nofoaga na ma feiloai ai ma Keriso. Ana faapea e le usitai o ia I le faatonuga a le Alii ia molimau ma talai atu le talalelei, e na o le Atua e na te silafia le ituaiga olaga pologa ma le faanoanoa semanu ou te maua. 

 Ou te folafola pea ma le mautinoa o a’u o se tagata e pito sili ona mauoa I le lalolagi. O a’u o le tagata mauoa I le lalolagi atoa aua foi e leai se atunuu e leai so’u fale o I ai. E te fesili mai pe faapefea ona tupu lena mea? E leai ma se atunuu ou te alu iai I le asō e tau sue se mea ou te nofo ai aua foi e iai la’u fanau faaleagaga I so’o se atunuu ma e tauva poo ai e tali malo ia te au pe afai latou te faalogo ua ou agai atu I lo latou atunuu. E le faapea e iai ni a’u tupe e ave iai latou, ae ona o le loto faafetai i lo’u taitaia o I latou ia Keriso ma o lo’o ou fesoasoani pea iai latou ina ia faalatalata pea le latou mafutaga ma le Alii. O le toatele o tagata e te taitaia ia Keriso, o le toatele foi lena oi latou e latou te faafetai I le Atua ona o oe, ma e o’o lava ina avea oe o se fetu. 

 O le manumaloina o agaga, o le pisinisi lena a lo tatou Tama I le lagi. Afai e te galue ina ia faalauteleina le pisinisi a lou tama ma fai lau galuega ia manuia, e na te faafetai ia te oe I le avea lea o oe o se fetu. E te aveina taavale e te lei faatauina, e te nofo I fale e te le’i faatauina ma ua e maua le mamalu, ma o so’o se taimi e te tautala ai, e faalologo uma tagata. Ia e filiga e talai le talalelei ia Iesu Keriso, I le suafa o Iesu Keriso, Amene. 

OPEN HEAVENS
MATALA LE LAGI MO LE TOFI 15 SETEMA 2022

 Manatu Autu: O ai e te aiga iai?  (Who do you belong to?)

 Tauloto – Tusi Paia: 1 Ioane 3:10 ‘‘O le mea lea ‘ua iloa ai fānau a le Atua ma fānau a le tiapolo. O i latou uma o ē lē fai le amiotonu, e lē mai le Atua i latou, ‘atoa ma ē lē alolofa i o latou uso...”

 Faitauga - Tusi Paia: 1 Ioane 3:8-10

 Upu Folafola
E toatele tagata ua faapea mai, o I latou o fanau a le Atua, peitai, ua na o i latou o lo’o mulimuli ma le faamaoni i tulaga aao o Iesu, o I latou ia o fanau moni a le Alii. O lo’o faamautuina atili mai le 1 Ioane 3:10, o i latou o e fai le amiotonu, o fanau ia a le Atua, ae o i latou o e fai le amioleaga, o i latou o fanau a le tiapolo. So’o se tasi e le o ola i le amiotonu, e le o se atalii o le Atua o ia. O se tagata e lē fua mai fua o le Atua, e fua mai e ia galuega a Satani. E faapefea ona e faaauau pea le pepelo ma e manatu o oe o se atalii o le Atua? E fa'afefea ona e suia fuainumera i tusi a le ofisa, ma e fa'apea o lo'o e nono mai e faaaoga ona toe totogi lea? O gaioiga na a le gaoi, aua ua e avea mea e le patino ia te oe, e aunoa ma se faʻatagana. Fai mai le Tusi Paia i le Ioane 8:44 : “O ‘outou nai lo ‘outou tamā, le tiapolo, tou te fia faia fo‘i mea e tu‘inanau i ai lo ‘outou tamā. O le fasioti tagata ia talu le amataga, e lē tu lava ia i le ‘upu moni, auā e lē o i totonu lava ‘iā te ia le ‘upu moni. A tautala ia i le tala pepelo, o lana lava lea e tautala ai, auā o le pepelo ia ma le tamā o le pepelo.”

 Le au pele e, faʻamolemole mafaufau loloto i mea nei. Afai e te lē o ola i se olaga amiotonu, e le tatau la ona e ta'ua oe o se atalii po’o se afafine o le Atua. Na fetalai Iesu Keriso i le Ioane 10:27: ‘O a‘u mamoe e fa‘alogo mai i latou i lo‘u leo, ‘ua ‘ou iloa fo‘i i latou, ‘ua latou mulimuli mai fo‘i ‘iā te a‘u’.

 E mafai ona e faaseseina tagata i le taimi nei, ae a o’o mai le taimi o le faamasinoga, e le mafai ona e faaseseina le Atua aua na te silafia uma lana fanau. Na fetalai Iesu o le a ia tuliesea i latou uma o loo taʻuta’u o ia o le Alii, ma faia vavega i Lona suafa, ae o lo’o ola pea i le agasala. (Mataio 7:21-23 ). A o’o mai lena aso, o le a auina atu oe, I le e te aiga iai, ma e faalagolago lea i le ituaiga tagata e te amio iai, po’o Keriso po’o le tiapolo.

 I le itu a Keriso, o le parataiso lea, a’o le itu a le tiapolo, e I ai le afi ma le puapuaga tele. E te faia nei le filifiliga i amioga e te fia faataitai ai.

 E atagia ea amio a Iesu Keriso I lou olaga? I le suafa o Iesu, Amene. 

OPEN HEAVENS
MATALA LE LAGI MO LE LULU 14 SETEMA 2022

 Manatu Autu: E mulimuli ona e ata (You shall laugh last)

 Tauloto – Tusi Paia: Salamo 27:6 ‘‘O lenei, e fa‘aeaina lo‘u ulu i luga o ē ‘ua ita mai ‘iā te a‘u, o ē si‘osi‘o ‘iā te a‘u; ‘ou te osia ai taulaga i lona fale fetāfa‘i ma le ‘alaga fiafia; ‘ou te pese ma ‘ou fai pesega i le ALI‘I..”

 Faitauga - Tusi Paia: Roma 12:19-21

 Upu Folafola
E fai lava ma auina mai e le tiapolo luitau I ala o kerisiano mai lea taimi I lea taimi. O nisi o taimi, e matua matuia nei luitau e matua ataata ai lava le tiapolo ma lona manatu e leai se ala e toe foi ai I le lelei, ae ou te tatalo mo oe I le aso, e mulimuli ona e ata, I le suafa o Iesu. Ia e manatu I le tala o le fafine ua oti lana tane, o se ava a se tasi o atalii o le au perofeta I le 2 Tupu 4:1-7. Ua matua tele ana aitalafu ua o atu tagata o loo aitalafu ai ma folafola o le a latou avea faamalosi lana fanau tama pe afai e le totogiina ana aitalafu. Ina ua maea ona faia nei folafolaga, e leiloa pe na o ese ma ataata aua ua latou iloa lelei, e le mafai e lenei fafine ona totogi ma o le a vave ona maua ni la pologa se toalua. Peitai, e o’o ane I le taimi na toe foi ane ai e ave le fanau tama a le fafine ua oti lana tane, ua lava ma totoe le tupe e totogi ai le aitalafu ma ua ia mulimuli ona ata, aua foi na alofa mai iai le Atua. Ae le’i maea le tausaga lenei, o I latou uma ua manatu o le a e malemo I le tele o aitalafu, o le a latou iloaina, o le tagata e mulimuli ataata e matua sili atu lana ata. 

 O le aso na ma o ai ma lo’u toalua e ma te faaipoipo I le resitara o faaipoipoga a le malo, na iai se tamaitai na alu atu foi mo le mafuaaga e tasi. Sa ia faatali ai lava I le ofisa faaipoipoga ae ua le alu atu le tama na tuu la te faaipoipo. Na matua tagi o ia I lena aso, ae ina ua maea ni nai masina ua faaauau pea lona olaga, ua ia fetaui ma seisi alii I le fitafita ma ua la faaipoipo. Ina ua mavae ni nai tausaga, ua avea le toalua o lea tamaitai ma Taitai sili o lea taulaga. Ao le alii lea na tuu la te faaipoipo, ua alu atu foi o ia I le fitafita ma ua tofia e avea ma faafeao a le Taitai Sili, le toalua o lea tamaitai. So’o se mea e fia alu iai lenei tamaitai, o le alii lenei e na te tatalaina le faitotoa ae lei oso I totonu o le taavale. O lenei alii faafeao sa fuafuaina e avea ma ona toalua, ao lea ua avea ma ana auauna. Ou te tatalo mo oe, o I latou uma na latou faia mea uma ia e faamāina I tausaga ua mavae, o le a toe o mai e auauna ia te oe, I le suafa o Iesu. 

 Afai e fia avea oe ma tagata e ata mulimuli, e iai lava mea e tatau ona e faia. Muamua, e tatau ona avea oe ma atalii po’o se afafine o le Atua. Afai e te naunau e finau le Atua mo oe, e tatau ona avea o ia ma au uo. O lona lua, e tatau ona e savali I le alofa, e o’o I a’i latou ua faatiga ia te oe. Fai mai le Roma 12:14 ‘Ia fa‘amanuia atu i ē fa‘asauā mai ‘iā te ‘outou, ‘ia fa‘amanuia lava, ‘ae ‘aua le fetu‘u’ . Alofa I ou fili (Mataio 5:44), tu’u I le Atua e tauia ou fili ona e ata mulimuli lea. 

 Tatalo
Tama e, faamolemole aua nei faatagaina le tiapolo e ata mulimuli ona o a’u, ae ia ou ata mulimuli, I le suafa o Iesu Keriso, Amene