Samoan Devotional

OPEN HEAVENS
MATALA LE LAGI MO LE ASO TOONAI 3 SETEMA 2022

Manatu Autu: O uso o le tagata mauoa (The rich man’s brothers)

Tauloto – Tusi Paia: Luka 16:31 ‘‘‘Ua fai ane Aperaamo ‘iā te ia, ‘Pe ‘āfai latou te lē fa‘alogo ‘iā Mose ma le ‘au perofeta, e ui lava ‘ina tu mai sē tasi nai ē ‘ua oti, latou te lē talitonu lava.” 

 Faitauga - Tusi Paia: Luka 16:19-31

 Upu Folafola
A faapea o loo i ai se gaoiga I le vāiaai o loo sosoo ma outou, ma ua faailoa atu e ou tuaoi, ou te mautinoa o le taimi lava lea e te tapena ai i itu uma ia mautinoa e saogalemu lou aiga mai le gaoi. Afai tatou te puipui lelei ia tatou mea totino fa’a le lalolagi, aisea tatou te lē tausi lelei ai o tatou agaga? Na fai le tagata mauoa iā Aperaamo a lē toe foi se tasi nai e ua oti e ta’u i ona uso seoli latou te lē faalogo i le au perofeta. Na tali Aperaamo afai latou te lē faalogo I le au perofeta latou te lē faalogo foi i se Lasalo toetu mai nai e ua oti. Afai e te lē o faalogo I fai lauga na e ta’u atu ia te oe i le taimi nei le mata’utia o seoli, o lena ua amata ona e agai atu I ai. E ui e toatele tagata na maliliu ma toe ola mai ma faamatalaga o le lagi ma seoli e lē o salamō lava le toatele. Afai e lē lava le feau a Iesu Keriso e te salamō ai mai au agasala, ou te lē iloa la poo le a se isi feau e sili atu e te salamō ai. Fai mai “Eperu 10: 26-27
26Auā ‘āfai tatou te agasala ma le loto i ai pe a uma ‘ona talia o le malamalama o le ‘upu moni, ‘ua lē toe lava se taulaga mo agasala. 27Na o le fa‘atali ma le mata‘u tele i le fa‘amasinoga, ma le to‘asā e mumū e susunu ai i ē o tete‘e atu.

 Afai e fa’aauau pea lou teena o le Talalelei a Keriso ma fai le agasala e ui ua e iloa ma faalogo I le mata’utia o seoli, o lo’o e taalo i le fa’afanoga e faavavau. O le tele o taimi e mo’omo’o e ua oti e mafai na latou ta’u maia ia I tatou mea e tutupu I seoli peitai e lē mafai na toe feso’ota’i mai ia i tatou iinei. A’o puapuagatia ai le toatele I seoli o loo fai pea e nisi o o latou aiga o loo feola tuinanauga o le agasala e aunoa ma le iloa le puapuaga mata’utia o loo faatali mai mo i latou pe a lē salamō. E toatele foi o loo i le lagi o loo talotalo I aso uma e saofagā atu foi o latou aiga i le lagi.

 O se tagata na alu I le lagi ma toe foi mai, sa ia faamatala lana tala. Fai mai so’o se taimi e talia ai e se tasi Keriso e avea ma ona Alii ma fa’aola e olioli tele le lagi aua ua faasaoina lea uso mai le faafanoga. Peitai a fulitua se kerisiano I le Atua o se fa’anoanoaga tele ona ua agai atu lea uso I seoli. Le au uso e, ua auina mai a’u e le Atua i le asō e ta’u atu ia te oe le ola i tua atu o le oti. Ola fa’apaiaina ina ia fai mo oe le lagi ae lē o seoli.

 Tatalo
Faamolemole Tama fesoasoani mai e ala I lou alofa tunoa foai mai le loto gauai I lau fanau ia saofaga atu ai I le lagi ae lē o seoli. Suafa manumalo o Iesu Keriso. Amene

OPEN HEAVENS
MATALA LE LAGI MO LE ASO FARAILE 2 SETEMA 2022

Manatu Autu: Aua nei e misia lou faamoemoega (Don’t miss your purpose)

 Tauloto – Tusi Paia: Faataoto 14:12 ‘‘O i ai le ala ‘ua tonu i le manatu o le tagata; a o lona taunu‘uga, o ala ia e oti ai.” 

 Faitauga - Tusi Paia: Faataoto 3:5-8

 Upu Folafola
E toatele tagata ua leiloa le faamoemoega a le Atua mo latou olaga. O lo’o ola ma soifua I latou e le ausia tapulaa ma faamoemoega a le Atua mo latou olaga. E iai lava auala a le Atua e faatino ai so’o se mea, peitai a filifili pea tagata e faatino I auala a le lalolagi, e le mafai ona latou ausia faamoemoega a le Atua mo latou olaga. Fai mai le Isaia 55:8
“Auā o o‘u manatu e lē o ‘outou manatu, o o‘u ala e lē o ‘outou ala, ‘ua fetalai mai ai le ALI‘I”.

 O manatu o le Atua, e le pei o le tagata. O le mea moni, fai mai le Tusi Paia o le valea I le Atua e poto atu i lo le tagata (1 Korinito 1:25). E le mafai ona e ausia le faamoemoega a le Atua I le faaaogaina o le poto o le lalolagi, e I’u ai ina e misia. Aua e te taumafai e faataitai I mea o loo faia e isi tagata, faataitai I Lē na tofia oe. Na ausia e Iesu lona faamoemoega na afio mai ai I lenei lalolagi aua na ia fetalai mai: “E moni, e moni, ‘ou te fai atu ‘iā te ‘outou, e lē mafai e le Atali‘i ‘ona fai o se mea, na o ia lava; a o mea na te va‘ai atu i le Tamā o faia; o mea fo‘i e faia e ia, o lo‘o faia fo‘i ia lava mea e le Atali‘I” Ioane 5:19 

 Mo faifeau talavou o le talalelei, aua e te taumafai e faia le galuega e pei o isi faifeau tautaua, o lou valaauina e le tutusa ma I latou. Ao ou talavou I le galuega, sa ou vaai i tagata e matautia le lelei o latou lauga. E ui I lea tulaga, na ou tumau pea I le ala na saunia ma aoaoina ai a’u e le Atua e lauga, I lona alofa tunoa, na suia ma faafouina olaga o tagata ma ua tupu le Ekalesia. Mo I latou o loo aoaoina le loloto o le mataupu silisili, e maea ane le lauga, ae e te fesili atu I tagata poo le a se lesona taua o le lauga, ae tali mai, ‘e matautia le manaia o le lauga a le faifeau’, ae leai ma se suiga lelei I olaga o tagata. Le au pele e, aua e te mulimuli I le motu o tagata. Fai mai le Eperu 12:2 ‘Ma ‘ia va‘ava‘ai atu ‘iā Iesu o lē na te ta‘ita‘iina ma lē na te fa‘a‘ato‘atoaina le fa‘atuatua’;

 Ou te maitauina foi nisi o faifeau I pese ma viiga, na amata lelei lava I le usuina o pese faaleagaga e taitaiina mai ai le Agaga o le Atua, ona seesee atu loa lea I pese e fiafia iai le motu o tagata, e lei leva ae amata loa ona pau ma agai ese atu. Ia e atamai, afai e te manao e tele sou aoga ma ia faataunuuina le faamoemoega o lou olaga, ia e faia mea uma I ala a le Atua a le o auala a le lalolagi. 

 Tatalo
Tama, faamolemole aumai ia te a’u le alofa tunoa ina ia aua lava nei o’u mulimuli I le poto o le lalolagi ae ia ou mulimuli I ou ala, I le suafa o Iesu Keriso, Amene.

OPEN HEAVENS
MATALA LE LAGI MO LE ASO TOFI 1 SETEMA 2022

Manatu Autu: Uo, e le moni (Fake friends)

 Tauloto – Tusi Paia: Salamo 55:21 ‘‘O lona gutu ‘ua se suāsusu ‘ua to‘a e molemole, a o i lona loto le tau‘a; e sili le malūlū o ana ‘upu i le suāu‘u, a o pelu ‘ua se‘ia lava ia..” 

 Faitauga - Tusi Paia: Faataoto 26:23-27

 Upu Folafola
A e faitau i le tala i le tusi a Mareko 5:35–42, e te iloa ma silafia ai le tala o mea na tutupu i le fale o Iairo. O lo’o faamatala mai ai tagata e faʻafoliga e faʻamaoni o latou alofa, o loo maua i le lalolagi nei. Ina ua afio mai Iesu ma fetalai atu, e tatau i tagata uma ona o i fafo ona e leʻi oti le tamaitiiti, ae o lo’o moe, o lo’o tusia e le Tusi Paia, na tauemu nei tagata iā te ia. Na suia lo latou fetagisi i le ata fiafia i totonu o le sekone. O lona uiga, e leʻi faʻanoanoa I latou mai i le amataga. O se tulaga lelei na tuliesea e Iesu I latou uma mai le fale. I le suafa e sili atu I so’o se igoa o lenei lalolagi, e tuliesea e Iesu, uo e le moni uma mai lou olaga.

 Ina ua alu atu le fafine Naina ua oti lana tane i le Luka 7:11-17 e tanu lana tama e toʻatasi, sa ia feiloaʻi ma Iesu i le ala, sa iai le toʻatele o tagata e foliga mai o loo faanoanoa faatasi ma lenei tina, ae mautinoa o lo’o latou faapea “Pe na o ia ea i lenei aai? Aisea ua o’o mai ai nei mau malaia ia te ia? Muamua ua maliu lana tane, ae o lana tama e toatasi o lea foi ua maliu. E mautinoa o loo faasalaina o ia e le Atua ona o agasala.” Atonu o mea nā na latou talanoa ai, seʻia o’o ina taunuu Iesu ma taofi le solo a le maliu. 

 Fai mai se tasi o la’u fanau, sa iai se taimi na faatali ai le au eli tuugamau, ua maea ona latou eli le tuugamau. Sa faatalitali e faia faamavaega mulimuli i le tuugamau, ae suia loa e le Atua Silisiliese nei tulaga uma. O tagata eli tuugamau uma o loʻo faʻatali mo o’e, o le a matua le fiafia i lenei tausaga. O tagata uma e faatalitali e fetagisi ma faanoanoa mo oe, o le a le fiafia foi ona ua le taunuu nei faamoemoega, i le suafa o Iesu. So'o se tasi e manatu ifo lava ua manumalo I faiga e oo ai le fa'anoanoa ia te oe, a liliu ai e le Atua le tai, e te 'ata ma le fiafia.

 So’o se tagata lava, e I ai le taimi e fetaiaʻi ai ma uo e le moni, o le mea lea e tatau ona e faʻaeteete i tagata e te taʻua o "Uo". E le o tagata uma latou te taʻua oe o latou uo e tatau ona e latalata I ai. E le tatau i tagata uma e latalata atu ia te oe, ona latou iloa ni vaega o loo lilo I lou olaga. E le tatau ona tu'uina atu i tagata uma le avanoa e lotolotoi ai I totonu o lou siosiomaga. O lo’o faapea mai le Tusi Paia e tatau ona e alofa e o’o lava i ou fili ( Mataio 5:44 ) ae e lē o faapea mai e tatau ona avea tagata uma ma au uō, o lea ia e alofa iai ae aua le latalata iai. Ia e agalelei i tagata, ae aua le avea i latou ma au uo pe afai e te lei mautinoa o ni uo moni. E te le manaʻomia ni uo se tele. Fai mai le Faataoto 18:24, e i ai le uo e sili ona pipi’i mai i lo le uso. E le’o faapea mai, e I ai uo e tele, e na o le uo e tasi o lo’o taua. 

Ia e mataala I uo e le moni, I le suafa o Iesu, Amene. 

OPEN HEAVENS
MATALA LE LAGI MO LE ASO LULU 31 AOKUSO 2022

 Manatu Autu: Tausi i Faifeau (Take care of pastors)

 Tauloto – Tusi Paia: Esekielu 44:30 ‘‘O le fa‘apolopolo o le ulua‘i fua uma i mea uma, ma taulaga uma i mea uma ‘iā ‘outou taulaga uma, e fai ia mā ositaulaga; tou te avatu fo‘i a ‘outou ulua‘i paluga falaoa i le ositaulaga, ‘ina ‘ia fa‘atumauina e ia le manuia i lou ‘āiga.” 

 Faitauga - Tusi Paia: 2 Tupu 4:8-37

 Upu Folafola
I le tusi  o le Esekielu 44:30, na tuuina atu e le Atua I ana ositaulaga ni malosiaga taua, e mafai ona latou tuuina atu faamanuiaga I se tagata pe avesea foi se faamanuiaga mai se tagata. O le tulaga tonu lea e ao ai ona e faia so’o se mea e faaosofia ai le tagata o le Atua e faapea atu ia te oe ‘Faamanuia le Atua ia te oe’. O lena faamanuiaga e faatinoina e le Atua. Ua tau lava o se upu e pau mai le fofoga o se tagata moni o le Atua e faapea mai ‘Faamanuia le Atua ia te oe’ e mafai ona suia atoa mo le lelei le talaaga o lou olaga e faavavau. 

 Ina ua ou sau mai Lagos I Ilorin Nigeria ou te nofo ai I le tele o tausaga talu ai, sa ou manaomia se tagata faimoli e faia se galuega I lou fale ma na sau se tasi o uso ia Keriso mai Lagos e faia lea galuega. Ina ua maea le galuega, sa ia faia fua e leai se totogi. E pau le mea na talosaga mai,  o sona pasese e toe foi ai. Ua ou avatu isi lona pasese ma faapea atu ia te ia: ‘Ia faamanuia le Atua ia te oe’ ona alu lea. Ao agai atu e sue sana taavale, na fetaui ma sana uo na faasino atu ia te ia nisi auala e maua ai ana pisinisi, ma na o ni nai vaiaso lava na sosoo ai, ae mafai ona ia faatauina sana taavale. Na faapea atu Elisaia I le fafine I Sunema, I totonu o le iva masina o le a maua sana pepe, ma sa taunuu lava. E ui e le talitonu le fafine, e leai se mea e mafai ona taofia le upu a le tagata o le Atua ua faia aua e faatino e le mana o le Atua ua maea ona ia tuuina atu I ana ositaulaga, e faamanuia ai I so’o se tagata e mananao i ai. 

 Aua e te tuumamaina lau faifeau ona e te vaai iai I vaiaso uma. Afai o ia o se tagata moni o le Atua, tau lava o sana upu e faamanuia ai ia te oe e ono suia atoa lou olaga. Aua e te faatali sei ta’u atu e le faifeau le mea o lo’o manao ai. Saili se mea o loo manaomia e lau faifeau, aua a e foai atu ia te ia, afai e tatalo o ia mo oe, ia leotele lau tali Amene, aua o lana tatalo o lo’o faamaonia ma faatino e le Atua. Afai e te foai atu I se sui vaaia o le Atua, e tutusa lelei ma lou foai I le Atua. Fai mai le Mataio 10:40-41
40“O lē talia ‘outou, ‘ua talia e ia o a‘u; o lē talia fo‘i a‘u, ‘ua talia e ia o lē na ‘auina mai a‘u, 41O lē talia fo‘i o se perofeta i le igoa o le perofeta, e maua e ia le taui o le perofeta; o lē talia fo‘i se tagata amiotonu i le igoa o le tagata amiotonu, e maua e ia le taui o le tagata amiotonu”. 

 Afai e te tausia lelei auauna a le Atua o lo’o I lou siosiomaga, o lo’o e saunia lou tagata mo faamanuiaga mai le Atua, I le suafa o Iesu, Amene. 

OPEN HEAVENS
MATALA LE LAGI MO LE ASO LUA 30 AOKUSO 2022

Manatu Autu: Viiga Siitia (Praise Raises)

Tauloto – Tusi Paia: Kenese 49:10 ‘‘E lē ‘avea le to‘oto‘o ‘iā Iuta, po o le faipule a‘i ona vae se‘ia maliu mai Sailo, e usiusita‘i fo‘i atunu‘u ‘iā te ia.” 

 Faitauga - Tusi Paia: 2 Samuelu 6:20-22

 Upu Folafola
O le uiga o le upu “Iuta” o “viiga”, i le fuaiupu tauloto mai le Tusi Paia o le aso, ua tatou molimauina le folafolaga a le Atua o le a le aveesea le to’oto’o mai i le itu aiga o Iuta. A tu’u i nisi faaupuga, o  fanau uma a le Atua o loo avea o se itutino o le itu aiga o Iuta po’o viiga, e avea i latou ma taitai i soo se matafaioi latou te tau’aveina. E gasolosolo mai iai tagata iai latou, ma e avea foi i latou ma tagata I le tulaga pito I luga.

 E le o se tala faa’ole’ole lenei, aua o loo faapea mai le tusi o Salamo 22: 3 “A o oe e pa’ia.  Ua e tietie i viiga a Isaraelu”  O le Atua e afio I viiga a ona tagata. Ma afai e te iloa ona fai viiga i le Atua i le auala tonu e finagalo iai o ia, o le a ia afio faatasi ma oe, ma avea oe ma fauluuuluga. Ma e le taitai ona e to’ilalo, ae e fa’amanuiaina oe. I le 2 Samuelu 6:11 na ave le ‘ato laau a Ieova i le fale o Opete-etoma i Kata, ma na faateia ona fa’amanuiaina e Ieova Opete-etoma ma lona aiga uma. Afai e ‘au le Atua ma oe, e siitia oe I le tulaga pito i maualuga. Po o lea lava le matafaioi e te galue ai, afai e te silafia le auala e matua siitia ai Ie viiga i le Atua, e siitia oe e le Atua ma avea ma numera tasi. 

 I se tasi o aso, sa o’o mai se faifeau ia te a’u ma faapea mai: ‘Tama e, ou te iloa ua ou mauaina le mea lilo e mafua ai ona e manuia i lau galuega I le Ekalesia. A e savali atu o le a e lauga, e muamua lava ona e siitia viiga i le Atua ma e te faane’ene’eina o ia se’ia afio mai i lona mana atoatoa, ona faato’a e lauga ai lea’. Ua ou tali lea iai: ‘Ia, o lena ua e iloa. A e toe foi i lou aiga, ona e amata loa ona faia le tulaga lea e tasi’.   I lo’u tulaga o se faife’au i lenei lalolagi, ou te fia ‘ausia le numera tasi. Ou te iloa lelei, afai ou te faia viiga i le Atua e le aunoa, o le a ia faaauau pea ona siitia a’u i se tulaga maualuga atu. 

 O le mafuaaga lea ua le mafai ai e le toatele o kerisiano ona ‘ausia le tulaga numera tasi i o latou matafaoi, ona latou te le o iloa ona vivii malosi i le Atua. O nisi e le mafai ona to’atutuli i le Atua i nofoaga faitele. Ae a o’o i le lagi, e le gata ina to’atutuli ae faapa’u’ū faō i luma o le Atua (Faaaliga 7:11). Ae a fai atu i isi kerisiano e latou te vivii atu i le Atua, e na ona memumemu ma e tau le migoi o latou laugutu. E fa’apefea ona e siitia viiga i le Tupu o Tupu e aunoa ma se leo? Fai mai le Salamo 98:4 “Ia ‘alalaga i le ALI‘I le lalolagi uma; ‘ia leo tele lava ma ‘ia ‘alalaga fiafia ma ‘ia fai pesega”.

 O le lagi e le o se nofoaga e sāō. O le lagi, latou te siitia o latou leo i viiga, ma faapea mai:
“Amene; ‘Ia i lo tatou Atua le fa‘amanū, ma le vi‘iga, ma le poto, ma le fa‘afetai, ma le mamalu, ma le mana, ma le malosi e fa‘avavau fa‘avavau lava. Amene” (Fa’aaliga 7:12). E mana’omia ona e a’oa’oina le auala tonu e vivii atu i le Atua ina ia  maua ai le viiga i le Atua. A fa’aauauina pea ona e vivii i le Atua e le taumate o le a e molimauina faitoto’a sa tāpunia o le a amata ona matalatala mai mo oe, ma o le a ‘avea oe ma numera tasi i lau matafaioi.

  Ia e faapa’ū faō, ma siitia lou leo, ma vivii atu i le Atua Silisili  ‘ese  i se auala e te le’i faia muamua, I le suafa o Iesu, Amene.

OPEN HEAVENS
MATALA LE LAGI MO LE ASO GAFUA 29 AOKUSO 2022

 Manatu Autu: Faamaufaailogaina? (Sealed?)

 Tauloto – Tusi Paia: Efeso 1:13 ‘‘E i ai fo‘i ‘outou ‘iā te ia, ‘ina ‘ua ‘outou fa‘alogologo i le ‘upu o le mea moni, o le tala lelei lea o lo ‘outou fa‘aolataga, ‘ua ‘outou fa‘atuatua ‘iā te ia, ‘ona fa‘amaufa‘ailogaina ai lea o ‘outou e le Agaga Pa‘ia, o lē na folafolaina mai”. 

 Faitauga - Tusi Paia: Galuega 19:1-6

 Upu Folafola
I le itu faaleagaga, e iai lava se faailoga e faamaufaailogaina ai se tagata ina ia mafai ona iloa I latou. A le o le faamaufaailoga o Keriso, o le faamaufaailoga o le tiapolo o loo iloa I lou muaulu. Mo I latou o loo iai le faamaufaailoga o Keriso, e le mafai ona pa’I pe tago iai le tiapolo ma ana au. O le tulaga lea o loo faapea mai ai le Kalatia 6:17:
“E amata i ona po nei, ‘aua le toe fa‘alavelave se tasi ‘iā te a‘u; auā o a‘u ‘ou te tau‘ave fa‘ailoga o le Ali‘i o Iesu i lo‘u nei tino”.

 O le faailoga, o le tuufaatasiga o faamaufaailoga e tolu. O le faamaufaailoga muamua o le toto o Iesu. O le taimi e tuuina atu ai lou ola ia Keriso, o le toto o Iesu e faamamaina au agasala uma ma avatu se faamaufaailoga taua o loo faapea mai, e te au ma ia (Kolose 1:20). O lona lua, o le papatisoga I le vai e pei ona faatino e Iesu ao iai I le lalolagi nei (Mataio 3:13-15). O loo faapea mai le Kolose 2:10-12 ua faa’atoatoa I tatou ia te ia pe afai e tatou te lafoai agasala uma mai I o tatou olaga, e tanumia ma ia i le papatisoga, ma toe tutū mai ai fa‘atasi ma ia i le fa‘atuatua i le mana o le Atua. Afai e lei papatisoina oe I le vai, o se faamaufaailoga e te manaomia vave. Faitau le Roma 6:3-5. 

 O le faamaufaailoga mulimuli o le papatisoga o le Agaga Paia e pei ona tatou iloa I le tatou fuaiupu tauloto mai le Tusi Paia o le aso. O lo’o faamautinoa atili mai i le Efeso 4:30 ua faamaufaailogaina I tatou e le Agaga Paia. O Ioane le Papatiso lava na faapea mai e sili ona maualuga atu Iesu ia te ia ma na te papatisoina I tatou I le Agaga Paia ma le afi (Luka 3:16). Na faamaonia mai lea tulaga e Iesu I le Galuega 1:5. Ina ua maliu Iesu ma ua toetu mai, na ia tuua mo I tatou lona lava Agaga, le Agaga Paia. O le faamaufaailoga e faailogaina ai I tatou o fanau a le Atua e tusa ma le Roma 8:14 “Auā o i latou uma ‘ua ta‘ita‘iina e le Agaga o le Atua, o atali‘i i latou o le Atua”. 

 O le faamaufaailoga lenei e mafai ai ona tatou talaiina le talalelei ia Iesu Keriso (Galuega 1:8) ma faia mea tetele e pei ona faia e Iesu a’o iai o ia I lenei lalolagi (Ioane 14:12-17). E mafai ai foi ona tatou maua le malosiaga e ola ma soifua ai e tetee I le agasala ma fua mai fua o le ola faapaiaina (Mataio 7:16). Afai e lei papatisoina oe I le Agaga Paia, ole atu I le Atua ia papatisoina oe I le Agaga Paia. Afai ua papatisoina oe, ole atu ia e maua le faauuga fou o le Agaga Paia I lou olaga. 

E te manaomia le faamaufaailoga o le papatisoga o Agaga Paia e faamaonia moni ai lou olaga o se kerisiano, I le suafa o Iesu, Amene. 

OPEN HEAVENS
MATALA LE LAGI MO LE ASO SA 28 AOKUSO 2022

Manatu Autu: Ausia o Faamoemoega (Fulfilling Purpose)

Tauloto – Tusi Paia: Galuega 13:36 ‘‘O Tavita fo‘i, ‘ina ‘ua uma ‘ona ‘au‘auna i le finagalo o le Atua i lona lava tupulaga, ‘ua moe o ia, ma ‘ua fa‘atasiina atu i ona tamā, ‘ua o‘o fo‘i ‘iā te ia le pala”.

 Faitauga - Tusi Paia: Efeso 2:10

 Upu Folafola
O so’o se tagata o loo soifua I lenei lalolagi, e iai le faamoemoega taua mo lona olaga. Ou te iloa lelei lenei tulaga aua foi e lē faia e le Atua se mea e tau lava o le faataunuu, e iai lava le faamoemoega taua na alai ona faia. Afai na ia faia oe ma tu’u I lenei lalolagi, o lona uiga e iai le faamoemoega taua mo o’e. 

 Peitai ane, o le faafitauli, e toatele tagata e le taitai ausia faamoemoega na faia e le Atua mo I latou I lenei lalolagi. O le tasi o mafuaaga e latou te le iloa ma silafia le faamoemoega moni mo latou olaga. O leisi mafuaaga, ua latou iloa le faamoemoega o latou olaga, peitai ina ua faalavelave le tiapolo iai latou, ua taitaiina ai I latou e faia isi mea e ese mai le faamoemoega a le Atua mo latou olaga. 

 E iai lava ni vaega o lou tagata na tu’u e le Atua ia te oe, o au taleni ma agavaa. E tatau ona e iloa au taleni ma agavaa, ona saili lea I le Atua pe faapefea ona faaaogaina na taleni mo le faamoemoega o lou olaga. O le taleni a Iosefa o le faaliliuina o miti ma le fuafuaina o le faaaogaina o oloa ma tupe. Na ia vaaia uma oloa ma tupe a Potifara I se tulaga sili ona maualuga ua iu ina tuu uma e Potifara ana oloa ma mea uma, I lalo o lana vaavaaiga. Na ia faaliliuina miti a pagota I le falepuipui faapea ma Farao ma na sa’o lelei ma taunuu nei miti. Peitai ane, o lona faamoemoega taua, o le faasaoina o le lalolagi mai le matelaina I le fia aai ona o le oge tele. Fai mai le Kenese 50:20“A o ‘outou na fai togafiti e ‘outou ‘ia leaga ai a‘u; a o le Atua, na finagalo ia ‘ia i‘u i le lelei, ‘ina ‘ia o‘o ‘ina fa‘aolaina o le nu‘u e to‘atele, pei ‘ona taunu‘u ai i ona po nei”.

 Afai e te iloa au taleni ma agavaa, fesili I le Atua pe faapefea ona faaaogaina na taleni e ausia ai le faamoemoega mo lou olaga, ia e maitauina lelei mai le mailei a le fili e taufaaseseina ai tagata, o le manatu ua na o oe lava. O le laau e fua mai ona fua e aai ai isi tagata ma e faapena ona faataunuuina lona faamoemoega. O lou faamoemoega e le o le faaputuina o le oa mo na o oe lava ae ia avea oe o se faamanuiaga I isi tagata. Afai e taulai lau vaai na o mea o loo e manaomia, e le mafai ona ausia lou faamoemoega, peitai afai e taulai lau vaai I mea o loo manaomia e isi tagata, ona ausia lea o lou faamoemoega. Afai e saunia oe e totogi le tau ina ia mafai ona faamanuiaina ai isi tagata mo le lelei, o lona uiga o loo e agai atu I le ala mo le ausia o le faamoemoega o lou olaga. O olaga o tagata o lo’o e fesoasoani ai, o agaga na e manumaloina mo Keriso ma au galuega lelei ua faia ma o loo faia, o lo’o faamauina uma I le lagi (Faaaliga 20:12). E pau lava lea o le tulaga e pito sili ona taua pe a e tuua lenei lalolagi. 

 Fai mai le Efeso 2:10 na faia i tatou ‘iā Keriso Iesu, ‘ina ‘ia faia galuega lelei, na saunia anamua e le Atua, ‘ina ‘ia tatou sāvavali ai. E fia ni tagata na e faia iai ni galuega lelei I lenei tausaga? I le suafa o Iesu, Amene. 

OPEN HEAVENS
MATALA LE LAGI MO LE ASO TOONAI 27 AOKUSO 2022

Manatu Autu: E Faapitoa oe (You are special)

Tauloto – Tusi Paia: Luka 12:7 ‘‘A o ‘outou lauulu lava ‘ua faitaulia uma ia, ‘aua tou te matata‘u, ‘ua sili ‘outou i manu iti e tele.

Faitauga - Tusi Paia: 1 Peteru 1:18-19

Upu Folafola
O le aofa’i o le tupe e faamalosia e tagata leaga e mafai ai na faasaoloto se tasi na latou ave faamalosi ma faagaoi e fua I le tāua po’o le faitaulia o le tagata o loo saisaitia. Fai mai le Tusi Paia ua agasala tagata uma lava ma ua lē oo I le mamalu o le Atua. (Roma 3:23) ua faapea mai foi o i latou uma e fai le agasala o fanau i latou a le tiapolo (Ioane 8:44-45). O lona uiga a finagalo le Atua e faasaoloto tatou mai lima o le tiapolo e manaomia ona ia totogi se tau. O le Atua e ona uma auro ma siliva peitai I le finagalo o le Atua, e le lava auro ma ario e totogi ai la tatou sala, ona o lo tatou tāua ma o i tatou e taua ma faapitoa ia te ia. O oe o se atalii poo se afafine faapelepele I le Atua ua ia aumai ai lona alo pele e toatasi e togiolaina oe ma a’u.

 O le auina mai e le Atua o lona alo e maliu ina ia e maua le ola, maligi lona toto ia le mafai e le tiapolo ona faao’o le leaga ia te oe, ia faalavalava lona tino i le sasa ma le ta ina ia e malolo, ua tatau na lava lea ma totoe e mafai ai na e fealuai ma le loto fiafia ua e mautinoa e taua ma faapitoa oe.

O le umi a e avea ai oe ma atalii poo se afafine o le Atua, o le tumau foi lena ona silisili ona faapitoa oe i le finagalo o le Atua. Na ia fetalai I le Isaia 49:16 ua tāina lou ata i le alofi o ona aao. “16Fa‘auta, ‘ua ‘ou taia lou fa‘atusa i o‘u alofilima; e tumau ou pā i o‘u luma”

 E toatele agelu i le lagi. O le tasi o nei agelu e mafai na ia faaumatia tagata e 185,000 I le po e tasi. O le agelu masani lenā. Ua tāua e le Tusi Paia e i ai le isi ituaiga agelu e malolosi (Faaaliga 5:2) o le matua’i malosi a. E i ai foi agelu silisili (Faaaliga 8:2). E lei finagalo le Atua e vaetama le au agelu e fai ma ana fanau. Na finagalo le Atua e fai pea agelu ma ave feau, ao le tagata, oe ma a’u, e alofa faapelepele i ai ua ia finagalo e fai ma ana fanau, a’o le au agelu e fai ma ave feau. O loo faapea mai le 1 Ioane 3: 1
1Fa‘auta i le silisili o le alofa ‘ua foa‘iina mai e le Tamā ‘iā te i tatou, ‘ina ‘ua ta‘ua i tatou o fānau a le Atua; o le mea lea e lē iloa ai i tatou e le lalolagi, auā na te lē iloa o ia. 

 Tusa pe foliga e leai se isi i le lalolagi atoa e alofa ia te oe ma amana’ia oe, e ao na e iloa o le Tupu o le lagi ma le lalolagi e alofa ia te oe i le alofa e faavavau (Ieremia 31:3) ma faitaulia oe e sili atu i agelu ma mea uma na ia faia. E sili atu lou taua I lo le oa ma le tamaoaiga o lenei lalolagi.

 Tatalo.
Faafetai tele Tamā na e faatauina a’u i lou toto paia auā e faapitoa le tagata i lou finagalo. I le suafa o Iesu Keriso. Amene

OPEN HEAVENS
MATALA LE LAGI MO LE ASO FARAILE 26 AOKUSO 2022

Manatu Autu: Sili le Valaau ia te ia o lou Alii I le taimi nei (Better Call Him Lord Now)

Tauloto – Tusi Paia: Filipi 2:11 ‘‘ma ‘ia ta‘uta‘u atu e laulaufaiva uma lava o Iesu Keriso o le Ali‘i lava ia, ‘ia i‘u ai i le vi‘iga o le Atua le Tamā.”

Faitauga - Tusi Paia: Faaaliga 5:8-13

Upu Folafola
E mea uma na faia e le Atua e ta’ua o ia o le Alii. O manu felelei e pepese I ona viiga, o lau o laau e patipati e vivii ai ia te ia, e fati ma gogolo le sami e vivii ai ia te ia, o mauga e osooso I ona luma e o’o I le masina ma le la e fetuleni mai I lona mamalu. 

I le Mareko 4:39, na o le faia lava o le faatonuga a Iesu I le matagi ia filemi, ona filemu lea ma ua leai se matagi. O tagata uma na iai na matua maofa ma manatu po’o ai lenei ituaiga tagata, e o’o I le sami e usitai ia te ia. 

 Peitai ane, e iai lava vaega o le foafoaga na faia e le Atua e faigata ma le usitai, o le tagata. O le toatele o tagata e ui ina latou faalogo ma vaai ia te ia, e le taitai ona latou ta’uta’u o ia o le Alii. A’o avea a’u ma se faiaoga I le Iunivesite, o tagata e sinia atu ia te au e iai faailoga maualuluga, ua vaevaeina I latou ini vaega pe afai ou te talanoa atu ia Iesu. O le isi vaega e faapea mai ‘o le Atua ua maliu’ ae fai mai leisi vaega ‘leai e le’i maliu. E ui e moni na ia faia le lalolagi, aua ua tatou iloa mai suesuega faasaienisi, e tatau ona iai se poto silisili ese e mafai ona tuufaatasia le lalolagi. Peitai, ua ia silafia foi, ua telē tele le lalolagi ma o lea ua le mafai ai ona ia toe fuafuaina’. Ao isi tagata e fia lelei o loo faapea mai ‘ou te leiloa pe o soifua po’o ua maliu. Pau le mea o lo’o ou iloa o le Atua o lo’o I le lagi e pule ai lava ia, a’o a’u o loo I le lalolagi o lo’o ou pule ai foi au ia’ Fai mai le Filipi 2:10-11
Ina ‘ia to‘otuli o tulivae uma lava i le suafa o Iesu, o ē o i le lagi ma ē o i le lalolagi, ma ē o i lalo o le lalolagi, 11ma ‘ia ta‘uta‘u atu e laulaufaiva uma lava o Iesu Keriso o le Ali‘i lava ia, ‘ia i‘u ai i le vi‘iga o le Atua le Tamā. ‘

 Afai e te musu e valaau ma ta’uta’u ia te ia le Alii, a’o e maua le filemu, e faamalosia ona e valaau ia te ia ‘o le Alii’ pe a o’o I ou taimi faigata. O I latou e le faia o ia ma Alii io latou olaga I se taimi vave, e toatuli o latou tulivae ma tautau o ia o le Alii pe a maea le siitiaga a’o tuua I latou I le lalolagi nei pe o seoli foi ei lalo o le lalolagi. Afai e te teena pea le avea o ia ma ou Alii I le taimi nei, auā foi e te manao e te ola ma soifua I se olaga e te pule ai, e te tautaua lava ia o le Alii I se taimi e pei o seoli mulimuli ane. O le filifiliga o lo’o I ou aao. 

 Tatalo
Tama e, ou te valaau ia te oe o lo’u Alii I le aso ma ou te folafola atu o le a ou ola e tusa ma lau Upu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOFI 25 AOKUSO 2022

 Manatu Autu: Tatalo o le Faafetai (Prayers of Thanksgiving)

 Tauloto – Tusi Paia: Salamo 116:17 ‘‘Ou te fai le taulaga o le vi‘iga ‘iā te oe, ‘ou te vala‘au atu fo‘i i le suafa o le ALI‘I”.

 Faitauga - Tusi Paia: Salamo 124:1-8

 Tatalo
1.       Faafetai le Alii e, i lou agalelei ma lou alofa mutimutivale, ia te a’u ma lo'u aiga, ma le fanau, faapea lo’u aiga potopoto. Ou te matua faafetai lava ia te oe le Alii e.

2.       Faafetai le Alii e, mo lau puipuiga i le lotolotoi o luitau uma ma fita i atunuu uma o le lalolagi.

3.       Faafetai, le Alii e, i lou faatasi mai I taimi uma lava. Faafetai mo le tali mai ia te au i so’o se taimi ou te tatalo ma augani atu ai ia te Oe. Ou te faafetai le Alii e.

4.       Faafetai le Alii i puapuaga na ou o’o ma ui ai i aso ua mavae. Faafetai I lou alofa tunoa ua ou maua ai pea le ola e o’o mai lava I lenei aso. Ou te momoli ia te oe le viiga le Alii e.

5.       Le Tamā e, fa‘afetai i le lē faaaogaina o fili i totonu o lo’u siosiomaga e fa‘aumatia a‘u. Faafetai, le Alii e, mo le faamaloloina o aʻu, i lea taimi ma lea taimi, ma puipuia aʻu mai maʻi pipisi ma isi gasegase uma.

6.       Le Ali‘i e, fa‘afetai i lou puipuia o a’u a’o o’u moe. E te le tofa, ae ete tu’u avanoa ou te moe ai. Ou te faafetai i le Alii e I lau Afio.

7.       Le Alii e, Iesu e, e lagi pea le agaga faafetai I lau Afio, aemaise lava i lou maliu na  togiolaina ai a’u agasala. Ana le seanoa le taulaga na e faia mo a’u i Kalevaria, semanu ua ou alu nei i seoli. Faafetai mo lou tuua o lou nofoalii, ae afio mai i le lalolagi e laveai lo’u agaga.

8.       Le Tamā e, fa‘afetai lava I Faaaliga na e fa‘aali mai ‘iā te a‘u e ala I valo‘aga  uma na faia e uiga ‘iā te a‘u i aso ua mavae, ‘ina ‘ia ‘ou savali e tusa ma lou finagalo i lo‘u olaga.

9.       Le Ali‘i e, fa‘afetai i fesoasoani uma na e foa‘i mai ‘iā te a‘u i aso ua mavae. Le Alii e ou te faafetai tele I lau Afio.

10.   Fa‘afetai, le Ali‘i e, i au fa‘amanuiaga uma i lo‘u olaga, ‘e le galo lē fa‘afetai iā te oe, le Ali‘i e.

11.   Le Tamā e, fa‘afetai i lou fa‘amāgaloina o a‘u agasala uma. Afai e faitauina a’u amio le tonu, ou te le mafaia ona tula’i i ou luma. Peitaʻi, o lou alofa mutimutivale, ua ou magalo ai I taimi uma ou te ole atu ai I lau Afio. Faafetai le Alii mo lou alofa mutimutivale.

12.   Faafetai Tama aua ua e faafofoga I la matou taulaga faafetai ia te oe. Ia faamanuina ma faane’ene’eina lou suafa paia e oo I le faavavau, I le suafa o Iesu Keriso, Amene.