Samoan Devotional

OPEN HEAVENS
MATALA LE LAGI MO LE LUA 13 SETEMA 2022

Manatu Autu: Ua gauia le amo (The Yoke is Broken)

Tauloto – Tusi Paia: Nauma 1:13 ‘‘Auā ‘ou te gauia nei lana amo o ‘iā te oe, ‘ou te motusi fo‘i ou noanoaga..”

Faitauga - Tusi Paia: Isaia 10:27

 Upu Folafola
O le amo o se mea e tuuina i le ua o se manu ina ia taofiofia ma ta’ita’ia ana gaioioiga. E toatele ni tagata o lo’o feoai ma amo i o latou ua, o amo sa tuuina iai e le tiapolo. O le aso, so’o se amo ua tuuina atu e le tiapolo i ou luga o le a gauia, i le suafa o Iesu. O le vaega faaiu o le Isaia 10: 27 e faapea mai: “e gausia fo‘i le amo ‘ona o lē fa‘au‘uina”. 

 Ona o le faau’uga e mafai ona susulu atu ma o’o atu ai I so’o se mea, i le asō, e ala I le alofa tunoa o le Atua, o le a o’o atu le faauuga ia te oe e ala I lenei a’oa’oga ma o lena fa’auuga o le a gausia ai amo uma o lo’o I lou olaga i le suafa o Iesu. Fai mai le Faamasino 6:3-6, ua tatou molimauina le pagatia o le fanauga a Isaraelu ona o le amo o le mativa. Sa latou totōina fatu ma tausia e o’o lava i le taimi o le seleselega, peitai e gaoia faamalosia mai I a’i latou e o latou fili, seia o’o ina fa’asa’olotoina i latou e le Alii ma ua gausia le latou amo e ala ia Kitiona.

 I ni tausaga ua tuanai, sa fatuina se pese I se tagata gaoi ta’uta’ua e igoa ia Anikura i Lagos Nigeria. Sa fuafuaina lelei e Anikura, o tupe faasili uma na maua mai I le faatauina atu o nei pese, e leai ma se vaega o nei tupe e o’o I se tagata.           Ma o le tulaga lenei o loo tupu i nisi tagata, latou te galulue malosi ma maua tupe, ae peiseai e te’I a ua mou atu ae le iloa lelei po’o a ni mea maoti na faatau ma faaaogaina lelei ai. Ou te folafola atu i lou soifua i le aso, ia gausia uma amo o le mativa ua noatia ai le tuputupu pea o lou tamaoaiga, i le suafa o Iesu!

 O nisi o tamaitai ua tu’uina atu e le tiapolo i o latou ua ni amo I a latou faaipoipoga. Ou te folafola atu, ua gausia uma na amo i le suafa o Iesu. O nisi foi tamaitai ua faaipoipo ma latou taumafai e maua se fanau, peitai ua le faamanuiaina. Ou te folafola atu i le suafa o Iesu, i totonu o le 9 masina o lumanai o le a oulua faaigoaina se lua pepe ma tatou fiafia faatasi ai. Mo nisi, ua tuuina atu e le tiapolo se amo i lou mafaufau, tusa po’o le a taumafaiga e su’esu’e ma maitau, e le mafai ona pasi au suega ma maua se alualu I luma, ou te folafola atu i le taimi nei lava, so’o se amo ua tuuina atu ia te oe, ia gausia i le suafa o Iesu! O le fa’auuga, e gausia ai so’o se amo. Ma e mafai ona e maua lea faauuga pe a maua sau mafutaga vavalalata ma le Atua- pe afai e te suesue mae’ae’a i lana Tusi Pa’ia e aunoa ma le faatopelau, pe afai e te faaalu lou taimi i le tatalo e aunoa ma le vaavaai i lau uati. O le tele o lou taimi e te mafuta ai ma le Atua, o le a faatuputeleina ai le mana ma le faau’uga mai le Atua, ona gausia uma ai lea o amo o lo’o e tau’aveina i lenei soifuaga. 

Ia faaaluina lou taimi taua e te mafuta ai ma le Atua I aso uma, ona le mafai lea e se amo ona tatali le fa’auuga o lo’o ia te oe, I le suafa o Iesu Keriso, Amene.

OPEN HEAVENS
MATALA LE LAGI MO LE GAFUA 12 SETEMA 2022

Manatu Autu: O le a lau meaai? (What is your meat?)

 Tauloto – Tusi Paia: Ioane 4:34 ‘‘Ua fetalai atu Iesu ‘iā te i latou, “O la‘u mea e ‘ai, ‘ia ‘ou faia le finagalo o lē na ‘auina mai a‘u, ma fa‘ai‘u lana galuega.”.

 Faitauga - Tusi Paia: Luka 2:40-49

 Upu Folafola
E ese lo’u naunau ia iloa ma silafia e tagata le faamoemoega a le Atua mo latou olaga ona latou mulimuli ai lea ma le filiga e pei o le meaai. Ou te le iloa po’o le a la’u mea e faia I lenei lalolagi pe ana faapea ou te le o faatinoina le faamoemoega a le Atua mo lo’u olaga. O lo’o fetalai lo tatou Alii o Iesu Keriso  I le tatou upu tauloto o lenei aso, o lana meaai o le faia lea o le finagalo o le Atua. 

 Afai e te lei fesili I le Atua po’o le a le faamoemoega na auina mai ai oe I lenei lalolagi, faamolemole fesili ia te ia I le aso, seiloga e te maua le tali. Afai e te filiga ia faamautinoaina o lo’o e mulimuli I lona faamoemoega mo lou olaga, o le a atagia lea I au faaiuga e faia. Afai o lo’o taula’i lau vaai I le faatinoina o le faamoemoega o le Atua mo lou olaga, ua pei lona finagalo o se meaai ia te oe, o le a e faia ni faaiuga tetele e faamautinoaina ai lona taunuu. Ina ua ou faia se faaiuga e tuua la’u galuega o se faiaoga I le Iunivesite ia avea o se faifeau I se aulotu e tau leai se tupe e totogi ai a’u, fai mai tagata e vaivai lo’u mafaufau, peitai o le finagalo o le Atua ua pei o se meaai ia te a’u ma ou te lei toe solomuli. O lea la ua matua atagia le taunuu o le finagalo o le Atua mo lo’u olaga, ma ua pupula lona viiga, o tagata uma na faapea ua leaga lo’u ulu ua amata ona vivii I le Atua ona o lo’u olaga. 

 E lei faapea na ona fetalai mai Iesu Keriso o lana meaai o le faia o le finagalo o le Atua, ae na ia faapea foi, ia faaiu ma faataunuuina le galuega a lona tama. E iai nisi e amata I le faia o le finagalo o le Atua ae faama’amulu I le ala. Ua latou maua le meaai I seisi mea e ese mai le finagalo o le Atua. O le mafuaaga, ona ua leai se fesootaiga ma le Atua. O la’u tatalo ia avatu e le Atua lona alofa tunoa e te taunuu ai ma le malosi ma faai’uina le tausinioga, I le suafa o Iesu. Afai o lo’o latalata pea le lua mafutaga ma Le na auina mai oe I lenei lalolagi, e na te faailoa atu pea le faamoemoega mo lou olaga I le taimi o lua talanoaga. So’o se taimi e te fetaiai ai ma ia, e faafouina lou naunautaiga e galue ma faia mea tetele mo le Atua.  

 Sa faatumauina le avea o le finagalo o le Atua o se meaai I lo’u olaga mo le 40 tausaga. E na te faaalia faifaipea vaega eseese o lona finagalo. So’o se taimi e na te faaalia mai ai se mea fou, e na te faafoisia lo’u malosi ona ou galue lea ma agai I luma. Afai e te tumau ma Le na auina mai oe, e na te avatu ia te oe le alofa tunoa e faataunuu ai ma faaiuina lana galuega, I le suafa o Iesu Keriso, Amene. 

OPEN HEAVENS
MATALA LE LAGI MO LE SA 11 SETEMA 2022

Manatu Autu: Pe a soisoi le Atua (When God laughs)

Tauloto – Tusi Paia: Salamo 2:4 ‘‘E soisoi lē o afio i le lagi; e tauemu le ALI‘I ‘iā te i latou”.

Faitauga - Tusi Paia: Salamo 2:1-4

Upu Folafola
Afai e soisoi le Atua, e lua mea o le a tutupu. Muamua, o le a ataata ma soisoi lana fanau I o latou fili. Lona lua, o fili o lana fanau o le a faamāina. Mai le faitauga o le Tusi Paia o le aso, na o mai uma tupu e tetee I le Alii ma I latou ua ia faau’uina, ma ua latou faapea mai, se‘i latou motusi ‘ese a lātou  noataga, ma lafoa‘i‘eseina a lātou maea. Ua tatou iloa maea o loo faasino iai lea fuaitau I le Mataio 11:29 “‘Ia ‘outou amoina la‘u amo ma ‘ia ‘outou fa‘aa‘oa‘o ‘iā te a‘u, auā o a‘u lē agamalū ma le loto maulalo; ‘ona maua lea e ‘outou o le mālōlōga mo ‘outou agaga”. 

 O le latou vaai I le Upu a le Atua o maea. E latou te vaai I ala o le Atua o ni maea o loo saisaitia ai I latou. Ua latou vaai atu I le Atua ma I latou ua faau’uina, o lo’o saisaitia I a’i latou, ua le mafai ai ona latou pule saoloto e faia mea o loo mananao ai, ona latou amata lea ona faaofi mai Tulafono ma tulei mai mataupu e tetee I ala o le Atua. O lo’o fetalai le Atua e ataata ma soisoi o ia I a’i latou. E tele malo I nei aso o loo finau e faatulafonoina faaipoipoga a tama ma tama ma teine ma teine, faatulafonoina le faapaūina o pepe ma faia so’o se ituaiga faiga e suia ai lagona o tagata e tetee I le Upu a le Atua. E ono foliga mai o lo’o fiafia ma manuia a latou taumafaiga, ae a finagalo loa le Atua e soisoi iai latou, e iu I latou I le faamāina ma le tauemu (Salamo 2:1-4). 

 Po’o le a lava le mea o lo’o e faia, e le mafai ona e sili atu I le Atua. Afai e te lē ifo ia te ia I lou loto futiaifo, e te ifo lava I se taimi I le tauemu ma le faamāina. E le mafai ona e tetee I le Atua po’o lana fanau ae tuusaoloto oe e leai sou taui, e te I’u I le tauemu ma le faamāina. Afai e soisoi le Atua I ni fuafuaga po’o mailei a se tagata, o lona uiga o lo’o gaoioi mai le Atua ma e I’u lava lana fanau I le manumalo. 

 Tusa foi po’o soifua se tagata I fafo atu o le upu a le Atua ma foliga mai o loo tulaga lelei ma fiafia I lona olaga, I le iuga, o lo’o faatali mai le lepa afi. Aua ete taumafai e motusia maea mai ia te oe, aua e te taumafai e motusia tapulaa o le Upu a le Atua, aua e faia mo lou lelei. O lana amo e māmā,  e tou te maua ai le malologa. O le aso o le siitiaga o le aso e ataata ma soisoi ai le Atua. Afai e te loto e ola ma soifua e tusa ma lona finagalo I le taimi nei, e te ataata faatasi ma ia I le aso o le siitiaga, ae afai e te filifili e ola I le tulaga lena o lo’o e soifua ai, o lona uiga, o le a I’u I le aso o le tauemu ma le faamāina. O le a lau filifiliga? 

Afai e ataata ma soisoi le Atua I ou fili, o fea le itu o le a e iai, o le itu manumalo poo le itu toilalo? I le suafa o Iesu Keriso, Amene. 

OPEN HEAVENS
MATALA LE LAGI MO LE TOONAI 10 SETEMA 2022

Manatu Autu: Pe a faailoa e le Atua lona matautia (When God brags)

Tauloto – Tusi Paia: Isaia 45:5 ‘‘O a‘u o le ALI‘I, ‘ae leai lava se tasi; e leai se Atua, na o a‘u lava; ‘ua ‘ou fusia oe, a o e le‘i iloa a‘u.”

Faitauga - Tusi Paia: Roma 9:17-24

Upu Folafola
E I ai taimi e faailoa ai e le Atua lona matautia. I ia taimi, e tatou te faalogoina ai fetalaiga a le Atua faapea: O lo‘o fa‘apea ‘ona fetalai mai o le ALI‘I, o le Tupu o Isaraelu o lē na fa‘atauina fo‘i o ia. O le ALI‘I o ‘au, o a‘u lē muamua, o a‘u fo‘i lē mulimuli; ‘ae leai se atua, ‘ua na o a‘u lava. Isaia 44:6

 Soo se taimi e fetalai ai le Atua i lona mamalu ma lona mata’utia, o le mafuaaga e finagalo e a’oa’o se lesona i se tasi po’o se faalapotopotoga. Sa I ai le finagalo o le Atua e fetaia’i ma Farao i auala masani e ala i le auina atu o Mose e faasaoloto mai lona nuu, peitai na fōua e le tupu o Farao le Atua Silisili ese, I le tusi o Esoto 5:2 ma fa’amaa’aina ai e le Atua le loto o Farao. Na avea lea ma ala o le fa’aumatia o Farao ma lana vaegaau e aunoa ma se gaioiga a le Atua na faia. Na avea lea mea ma ala e fefefe uma ai I si mālō I le Atua o Isaraelu.

 O loo faailoa manino pea e le Atua lona mamalu ma lona silisiliese i aso nei. Afai e I ai se isi poo se mālō e taumafai e ta’u fa’atauvaa le Atua, e faailoa pea i ai e le Atua o ia o le Atua mata’utia o loo afio pea i lona nofoalii e lē aunoa. I nai tausaga ua mavae, sa tapena ai e la’u fanau se polokalame mo le tatalaga o se falesa fou i se tasi atunuu a’o a’u e lauga ai I le sauniga. Ina ua talosaga mo se fa’atanaga e fai ai le polokalame, sa i ai se tagata ofisa I totonu o le mālō na tū malosi e taofi. Ina ua lata I le aso sa fuafuaina mo le polokalame, sa fa’afuase’i na palasi I lalo lea tagata faigaluega o le mālō a’o taumafai e fai ona lavalava (tulou) ma i’u ai i le falema’i. Na i’u ina maliu le tagata o le mālō ma ni foliga lē manaia i ona lavalava sa taumafai e fai. Ua eli lava e lenei auauna lona tu’ugamau ina ua taumafai e tete’e atu i le Atua ma i’u ai ina faailoa e le Atua lona mata’utia e ala i lenei auauna.

 Ou te manatua se tasi faalavelave na tupu i se aai I Nigeria. Na talia e le tupu o le aai Keriso e avea ma alii ma fa’aola o lona olaga ma ia faia ai se poloaiga latou te lē toe faia se tasi o faaaliga ifo I tupua sa masani ai le aai. Na ita le ositaulaga sili o le tapuaiga ifo I tupua I lenei fa’aiuga a le tupu ma taumafai ia fai pea le faaaliga. Toe tasi le vaiaso fai le latou fiafia ae maliu. Na tofia le ositaulaga fou e suia lē ua maliu, na mana’o fo’i lea tagata e fa’aauau pea lava le fa’aaliga peitai na maliu foi e le’i o’o i le aso na fuafua e fai ai le ifo I tupua. Ina ua toe tofia le isi tagata e tauavea le tofiga, na filifili lenei tagata e usitai i le fa’atonuga a le tupu o le aai ma faapea mai:ou te lē manao e fa’ao’o e le Atua o le tupu le oti ia te a’u.”

 A e fia soifua umi aua e te tofotofo i le Atua Silisili Ese auā e mafai na fa’aaoga e le Atua lou lē ava ia te ia e a’oa’o ai se lesona mo isi tagata. Soo se tasi e tofotofo I le Atua ma musu e salamō e i’u i le fai ma lesona mo isi. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 9 SETEMA 2022

 Manatu Autu: Pe a Fetalai le Atua (When God speaks)

 Tauloto – Tusi Paia: Isaia 55:11 ‘‘E fa‘apea fo‘i la‘u ‘upu e alu atu a‘i lo‘u gutu, e lē fo‘i mai fua ‘iā te a‘u. ‘Ae peita‘i e faia le mea ‘ou te loto i ai, e manuia fo‘i i le mea ‘ou te ‘auina atu ai”.

 Faitauga - Tusi Paia: Salamo 29:3-11

 Upu Folafola
A tautala se tagata, o le mamafa o ia upu ma saunoaga, e fua I le pule o lo’o I le tagata o lo’o tautala. A faapea e susu mai se faafeagaiga ma saunoa mai I tagata o le aulotu ia fetaui uma I le aso e sosoo ai I le amataga o se anapogi ma faia ni fono tatalo I le afiafi, e mautinoa e toatele tagata o le aulotu o le a anapogi ma auai atu I fono tatalo. Peitai ane, ana faapea o le teine faigaluega a le faifeau lea na sau ma faatonu le aulotu e anapogi ma tatalo, e ono faapea nisi o se tala ula. O lenei, o lo’u tama o le Atua Silisili Ese, e sili atu o ia I so’o se tagata e silisili, afai e fetalai o ia, e luluina le lagi ma le lalolagi (Ioelu 3:16) ma e leai se upu mai lona fofoga e le mafai ona taunuu (Isaia 55:11). O le tulaga lea ou te tatalo ai mo o’e, o le a fetalai le Atua mo ni mea lelei mo oe I le aso, I le suafa o Iesu. 

 Afai e te silasila I le foafoaga o mea uma, e te manatua ai I le Kenese 1, o loo faamauina ai o mea uma na faia e ala I se fetalaiga ma upu na faia e se tagata, e te iloa ai le malosiaga o upu e fetalai mai ai le Atua. O ana upu e matautia le malosi, ma o so’o se upu e na te faia, e taunuu ma faia lava. Afai e iai sou faafitauli ua matua leai sona tali po’o se fofo, e pau le mea e te manaomia o le upu a le Atua. A fetalai mai ua e malolo, o lona uiga ua e malolo. I ni nai tausaga talu ai, sa ou iai I Kanata ou te lauga ai, ma sa iai se tina sa maua i le ma’I puna toto mo le tele o tausaga. A’o faia la’u lauga, na fetalai le Atua ia te a’u. Fai mai ou te ta’u I se tagata ua taofia lona puna toto. Ina ua faalogo lenei tina I le upu fetalai mai le Atua, na ia oso I luga I le olioli, ma tamoe I le fale leta’ua ma ua faamaonia ai, ua taofia le puna toto. 

 Ou te tu I le pule a le Atua Silisili Ese ma folafola atu, so’o se faafitauli o loo aumaia pea le maasiasi ia te oe, ua faamutaina e amata atu I le aso, I le suafa o Iesu. O so’o se ma’i e ono lamatia ai lou ola, ua faamaloloina I le taimi nei lava I le suafa o Iesu. O lena faafitauli I lou aiga o loo tu’u faasolo mai pea I augatupulaga, ua faamutaina I le aso, I le suafa o Iesu. E tele upu na fetalai ai le Alii I le Tusi Paia e talafeagai I le tulaga o lo’o e ui ai. Ia e manatunatu I nei upu, savali ai ma faatino, ona amata lea ona e vaai atu ua tupu, ua faaalia ma fua mai I lou olaga I le suafa o Iesu. E leai ma se mea e mafai ona tete’e I le upu a le Atua mo lou olaga, e matua leai lava. 

 Su’esu’e ma faailoga upu a le Atua e talafeagai ma le tulaga o lo’o e ui ai I lou olaga, manatunatu I nei upu, tatalo I nei upu, ona e faatino lea ma savali ai I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 8 SETEMA 2022

 Manatu Autu: Pule I malosiaga o le pogisa (Power over dark forces)

 Tauloto – Tusi Paia: Luka 10:19 ‘‘Fa‘auta, ‘ou te foa‘i ‘iā te ‘outou le pule e soli ai gata ma akarava ma le malosi uma o le fili; e leai lava se mea e leaga ai ‘outou..”

 Faitauga - Tusi Paia: Mareko 16:17-18

 Upu Folafola
O tagata faatuatua uma, ua faatusaina o se malosiaga faaniukilia i le malo o le pogisa. E na o le tasi lava le upu e tautala ma folafola atu, ma lagolagoina i le suafa o Iesu, e mafai ona faataapeapeina so’o se faapotopotoga faasatani. Afai o oe o se atalii po’o se afafine a le Atua, e ui o ou foliga masani e iloa i fafo, ae o lo’o e tauaveina le pule e tele.

 Ou te manatua le taimi na ou filifili ai ou te toe foʻi i loʻu nuu, i le atoa lena o le 13 tausaga talu ona ou sola ese mai le au faataulaitu, na latou faamata’u ia te a’u, ua leva na sauni e faaumatia ia te a’u. Na ou asiasi i se tasi o o’u aiga ma na ou fai i le uso, o le a ou toe foi I lo’u aiga ona o lea ua ia te au le pule I malosiaga o le pogisa. Na ia tilotilo mai ia te a’u ma fai mai “Dejare, e le o suia ou foliga. O ou foliga lava na, a’o lea ua e fai mai o loo ia te oe le pule ma se malosiaga silisili”. Sa ou fai atu iai, “A’e vaai atu i se uaea eletise o lo’o I ai le eletise ma e vaai atu i seisi uaea ua leai se eletise, e mafai ona e iloa le eseesega? Pau lava le auala e te iloa ai o loʻo i ai le malosiaga i totonu o le tasi o le taimi e te paʻi iai, ma o le taimi lava e te paʻi atu ai i le uaea o loo iai le malosiaga faaeletise, ua e uma"

 O lo’o e tauaveina le pule mai le Alii, aua ne’i e faatagaina se malosiaga o le pogisa e taufa’amata’u ia te oe. Afai tatou te gauai atoatoa atu i le pule a le Atua Silisili Ese, e sili atu I tatou I faipule ma alii sili o le malo o le pogisa. Fai mai le Iakopo 4:7 “O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou”. Afai e te le talitonu ia te au, fesili la i atalii e toafitu o Seva, o loo i le Galuega 19:15-16, o loo faapea mai,“15A ‘ua tali mai le agaga leaga, ‘ua fa‘apea mai, “‘Ua ‘ou iloa Iesu, ‘ua ‘ou iloa fo‘i Paulo, a o ai ‘ea ‘outou nā?”16‘Ona oso mai ai lea o le tagata ‘ua i ai le agaga leaga, ‘ua manumālō ‘iā i latou, ‘ua faia‘ina lava i latou ‘iā te ia; ‘ona sōsōla ai lea o i latou i fafo o le fale ‘ua lē lavalavā ma ‘ua manunu‘a”.

 Fai mai le 2 Korinito 10:6 “O lo‘o nofo sauni fo‘i i matou e taui atu i lē lē ‘ana‘ana uma, pe a fa‘a‘ato‘atoaina lo ‘outou ‘ana‘ana”.

 Seiloga e te usiusitai atoatoa ma gauai atu i le Atua Silisili ese, e le mafai ona e faaaogaina lau pule e tuli ai temoni. O le mea lea, ‘āfai ‘ua ‘outou lelavava I faiga a temoni o lo‘o tafili saunoa I lou olaga, o lena ua e silafia le mea e tatau ona fai.

Lafoai ma le atoatoa lou ola I le Atua, ia e matua usiusitai I lana Upu ona e maua lea o le pule I malosiaga uma o le pogisa, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 7 SETEMA 2022

 Manatu Autu: Musika (Music)

 Tauloto – Tusi Paia: 2 Tupu 3:15 ‘‘A o lenei, ‘ia ‘aumai ‘iā te a‘u se tagata ta la‘aupese.” ‘Ua na ta le la‘aupese, ‘ona i ai lea i ona luga le ‘a‘ao o le ALI‘I.”.

 Faitauga - Tusi Paia: 1 Samuelu 16:15-23

 Upu Folafola
O le musika, o se mea faigaluega matautia I le itu I le agaga. E matua malosi e mafai ona ia tauaveina ni agaga. So’o se taimi e sauaina ai e temoni le tupu o Saulo, a ta e Tavita lana laaupese I viiga o le Atua, ona o ese uma lea o agaga leaga mai lea siosiomaga o lo’o faalavelave I le tupu. A’o matou mafuta pea ma lo’u tama faaleagaga I lenei lalolagi, na ia a’oa’oina I matou I se lesona taua, o le ituaiga musika e ta I totonu o matou fale e iloa ai ituaiga agaga o le a nonofo ma I matou. Sa ou matua fiafia I na aso e ta pese ma musika a le lalolagi. Ina ua ou iloa I lena aso, sa ou tatalaina lo’u fale I agaga leaga ona o musika sa ou faalogologo ai, ma ou pese atu ai lava, na ou vave atu I le fale ma faaleagaina uma kaseti o ia pese. E le o le mafuaaga ea lena e le o mafai ai ona maua tali o au tatalo ona e le mafai e le Agaga Paia o le Atua ona afio I lou fale ona o musika o loo ta ai?

 Ia lafoai uma I fafo musika o le lalolagi mai lou fale, ma aveese mai i telefoni ma so’o se masini o ia te oe. Ia e faalogo na o pese faaleagaga ona amata lea ona e vaaia le suiga I lou olaga I totonu o le tolu masina. Afai e te ala mai I le taeao pe sauni foi o le a e usu, e te pese ea I viiga I le Atua. So’o se avanoa e te maua, ia e pese pea ia te ia. Tuu ni pese lotu ma ni pese o viiga o le Atua I lau telefoni ma faalogo iai I le tele o taimi ona e vaai lea I le suiga o lou olaga. Fai mai le 2 Tupu 3:15‘‘A o lenei, ‘ia ‘aumai ‘iā te a‘u se tagata ta la‘aupese.” ‘Ua na ta le la‘aupese, ‘ona i ai lea i ona luga le ‘a‘ao o le ALI‘I.”.

 Ua ou iloa I le tele o tausaga talu ai I so’o se taimi ou te sauni atu ai e faia le lauga, a lelei le aufaipese, e matua galue mai lava Agaga Paia e amata mai lava I le taimi ou te tu ai I le pulalaa, ae afai e le’i lelei le aufaipese, e faafaigata I le amataga ma e umi sina taimi ona faatoa galue mai lea o Agaga Paia. Ona ou maua lea o se tasi o sui o le aufaili, a ia iliina le pu, e matua galue malosi mai le Agaga o le Atua. Ua ou faatonuina e iliina lana pu I so’o se taimi ou te sauni atu ai e lauga. A faia lea tulaga, a’o amata galue mai Agaga Paia, e ili loa e le atalii lea le pu, e vaaia le galue malosi o le mana o le Atua I so’o se vaega o le fale tele, ma ua faia perofetaga ma vavega. Ia amata ona e faaaogaina le mana o le musika ma pese faaleagaga e amata atu I le aso nei. 

 Ia lafoai so’o se musika a le lalolagi ma oe ae suia I musika ma pese faaleagaga, I le suafa o Iesu, Amene. 

OPEN HEAVENS
MATALA LE LAGI MO LE ASO LUA 6 SETEMA 2022

Manatu Autu: Aisea e manuia ai o e amioleaga? (Why do sinners flourish?)

Tauloto – Tusi Paia: Salamo 92:7 ‘‘A tupu olaola o ē amio leaga e pei o le vao iti, a fuga mai fo‘i i latou uma o ē fai mea leaga e fa‘apea i latou ‘ina ‘ia fa‘aumatia e o‘o i le fa‘avavau lava”.

Faitauga - Tusi Paia: Salamo 37:1-11

Upu Folafola
E tele tagata e manatunatu pe aisea e tupu olaola ai tagata amio leaga ae peitai o isi kerisiano faatuatua, e le tagolima. O le mea moni o loo tapenapena e le tiapolo tagata amioleaga ia  faia ma mamoe po’a e fasia ma faaumatia, e pei ona tatou faitau ai i le fuaiupu tauloto mai le Tusi Paia o le asō. O le mea e faia e le ti’apolo, na te foai iai latou ni mea taugata, pe tusa ma le miliona lona tau, ona ia faoa lea mai ia tagata o se mea e le mafai ona fa’atauina i se tau. E foliga tele le miliona tala, ae a faatusa i le mea ua faoa mai I a’i latou, ona latou faato’a malamalama lea, ua gaoia, fasiotia ma faaumatia i latou e le tiapolo. Aua o le misiona lena a le tiapolo e pei ona faailoa mai e Iesu Keriso i le Ioane 10:10. O lea, a e vaai atu o loo tupu olaola o e amioleaga mai a latou amioletonu uma, aua e te vaai ma manaonao I lo latou tamaoaiga, o lo’o saunia I latou e le tiapolo e faaumatia e o’o I le faavavau. Fai mai le Failauga 7:8 E sili ‘ona lelei o le i‘uga o se mea i lona amataga.      

A maua e se tagata se tamaoaiga mai i le tiapolo, e na te mauaina le fiafia mo na o sina taimi puupuu, ae a oo i le i’uga e faaumatia o ia. Ae a o’o i lena tulaga, e te molimauina lona faaumatia. Ma e oo mai lena taimi e te vaaia lona fa’amamulu o le tamaoaiga ae vave ona ia ‘apoina Iesu Keriso. O ia tagata e o’o ina  faanoanoa, ma e tusa poo a ni tupe na te mauaina, ua na o se mea noa i lana va’ai, aua ua ia iloa lelei ua aga’iga’i atu ina faaumatia. O le tulaga lea e faapea mai ai le Salamo 37:16: “O le mea itiiti ‘ua i le tagata amiotonu, e sili ‘ona lelei lea i ‘oloa e tele o ē amio leaga e to‘atele”.

 E sili atu ona maua o si mea itiiti ma ulufale I le lagi nai lo le mauaina o le lalolagi atoa ae maumau ai lou agaga.  O le finagalo o le Atua  ia e manuia  i mea uma, fa‘apei ‘ona manuia o lou agaga (3 Ioane 1:2). Aua e te faia le agasala ina ia e maua le tamaoaiga, ua maea ona iai I fuafuaga a le Atua e te maua le faamanuiaga o le tamaoaiga i le faaolataga. A’o oe, ia e ola faapaiaina.  O lana fetalaiga I le Teuterenome 28: 1-2, ia tatou matuā fa‘alogo i le si‘ufofoga o le ALI‘I lo tatou Atua,  ma ‘ana‘ana e fai ana poloa‘iga uma lava ‘ona ia fa‘asilisiliina lea o tatou i nu‘u uma lava o le lalolagi. Ua ia folafola mai, e mulimuli faamanuiaga ia te oe ma faasilisiliina ia te oe. O ituaiga faamanuiaga ia ou te moomia, o le ituaiga faamanuiaga e mulimuli mai ma muamua I o’u luma, ae a oo foi I le iuga ona ou maua lea o le lagi. O le ituaiga faamanuiaga lea I le tamaoaiga, ou te fiafia iai, ae le o le ‘oa a tagata amio leaga.

  E faatamaoaiga e le tiapolo tagata amio leaga, ina ia  faaumatia i latou i se taimi mulimuli ane, I le suafa o Iesu, Amene.

OPEN HEAVENS
MATALA LE LAGI MO LE ASO GAFUA 5 SETEMA 2022

Manatu Autu: O le Faamanuia a le Atua (The Blessing of God)

Tauloto – Tusi Paia: Kenese 49:25 ‘‘E a le Atua o lou tamā o le fesoasoani ‘iā te oe, o Lē e ona le malosi uma lava na te fa‘amanuia oe i manuia mai le lagi i lugā, ma manuia mai le mea loloto o lo‘o i lalō, e manuia o susu ma le manava.” 

Faitauga - Tusi Paia: Teuteronome 28:1-14

 Upu Folafola
O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā. Faataoto 10:22

 O le faamanuia a le Atua I galuega a ou lima, e le gata ina fa’atamaoaigaina ai oe, e maua I le filemu e leai ma se tiga. O le  tamaoaiga I le oa e maua I fuafuaga ma mailei e faaaogaina ai tagata, e aumai ai ma le tele o faafitauli. O Haamanu, o se tagata mauoa, o le tulaga moni, e tulaga lua o ia I le malo e soso’o ma le tupu, peitai sa loto leaga ma inoino ia Moretekai, o se tagata e maualalo mamao lona tulaga e faatusa ia te ia (Eseta 3:1-5). E te manao e te fiafia I le maua o le tamaoaiga I le oa faapea ma le filemu o le mafaufau? Saili faamanuiaga a le Atua. 

 E faapefea ona maua faamanuiaga a le Atua? Fai mai le Teuterenome 28:1 ‘Āfai fo‘i ‘e te matuā fa‘alogo i le si‘ufofoga o le ALI‘I lou Atua, e ‘ana‘ana e fai ana poloa‘iga uma lava ‘ou te fai atu ai ‘iā te oe i le aso nei, ‘ona fa‘asilisiliina lea o oe e le ALI‘I lou Atua i nu‘u uma lava o le lalolagi;

 O le faamanuia a le Atua e maua I le matua faalogo I le siufofoga o le Atua ona anana lea e fai ana poloaiga. Muamua, e tatau ona e iloa ma silafia lelei lana Upu ona faia lea ma usitai iai e pei ona faatonu mai. E faapena lona faigofie. Na maua e le fafine Sarefata le oa e tele aua foi sa usitai ma faia faatonuga maoti e pei ona faatonuina mai ai o ia e le perofeta. 

 E iai se tamaloa sa pule I se fale faigaluega ae sa ia fesili pea I le Atua e faapea: ‘Po’o le a le umi o le taimi o le a avea ai a’u o se tagata faigaluega? Faamolemole faamanuia mai a’u I lou tamaoaiga ina ia mafai ona ou faafaigaluegaina tagata’. Na faatonu e le Atua e alu e tunu pinati ona salani lea I le meli. Na ia usitai. O le taimi mulimuli na ou faalogo ai I le tala o le tamaloa lea, ua lua ni ana vaalele ua maua. 

 E iai taimi afai o lo’o e fia maua ni faatonuga maoti mai le Atua I le mea e tatau ona fai, e ao ona e tagi atu ia te ia I le tatalo e pei ona faia e le fafine ua oti lana tane ia Elisaia. Ao le taimi nei, usitai I faatonuga uma e pei ona e faitau ai I le Tusi Paia. Na ia fetalai mai, afai e te aumaia le sefuluai I le fale faaputu ai saito, ona e maua lea o faamanuiaga e tele ua le mafai e lau teugatupe ona faamauina. Ia e matua faalogo. Ia matua faalogo lelei I lana Upu ona e vaai lea pe na te le faamanuia atili ia te oe. 

 Tatalo
Tama, faamolemole ta’u ma faailoa mai ia te a’u le mea e tatau ona faia ina ia ou manuia, faaali mai ia te a’u le ‘oloa o lo‘o i le pogisā, ma ‘oloa lilo o lo‘o i mea nanā; ma ou te folafola atu, ou te matua faalogo ma anaana I lau Upu, I le suafa o Iesu, Amene.  

OPEN HEAVENS
MATALA LE LAGI MO LE ASO SA 4 SETEMA 2022

Manatu Autu: Aua tou te Amio Faatasi (Be not Conformed)

Tauloto – Tusi Paia: Roma 12:2 ‘‘Aua fo‘i tou te amio fa‘atasi ma lenei lalolagi, ‘ae peita‘i ‘ia liliuina i le toe fuata‘iina o ‘outou loto ‘ina ‘ia ‘outou su‘esu‘e pe se a le finagalo o le Atua, o mea ‘ua lelei, ma le mālie, ma le ‘ato‘atoa..” 

 Faitauga - Tusi Paia: 1Korinito 2:11-16

 Upu Folafola
O le toatele o tagata, a’o taumafai atu e siitia lo latou tulaga, o’o I le pito I luga ma fiafia iai tagata, e latou te fiafia e faia auala e taofia ai pea I latou I le pito I lalo. E pau tagata e ausia le pito I luga, o I latou e le fia faataitai ia pei o isi tagata, ae latou te saunia ni alafua fou e fai ma taiala mo tagata. O nei tagata e tautala sa’o ma tumau I o latou ala. E toatele tagata ua leiloa o latou tulaga ia Keriso faapea le faamoemoega o le Atua mo latou olaga aua foi o loo fia faataitai ma faapei o isi tagata. Ua ou faalogo I le tele o failauga ou te fiafia ma vaai maualuga iai. Ou te fiafia I auala e latou te laugaina ai le Upu. Ou te fiafia iai latou, ou te vaai maualuga iai latou, ae ou te le faataitai iai latou. A’o lenei, ou te faia I le auala e faasino mai e le Atua ia te a’u. A’o laugaina le Upu, ua maloloina ma’I, ua tatala toala fanau o tina, ma le tele o agaga ua manumaloina mo Keriso. E pau le tulaga o loo ou faia, o le faataunuu tulaga o lo’o faasino mai e le Atua ma o loo ia fesoasoani mai ia te a’u. E faapea le auala e te o’o ai I le pito I luga. Fai mai le Salamo 121:1 “E faasaga a’e o’u mata I mauga, e o’o mai ai lou fesoasoani”. Afai e te manaomia le fesoasoani a le Atua, e tatau ona taulai lau vaai ia te ia, ae le o mea o lo’o tele ina fiafia iai le toatele. Na fetalai Iesu I le Ioane 5:19
“E moni, e moni, ‘ou te fai atu ‘iā te ‘outou, e lē mafai e le Atali‘i ‘ona fai o se mea, na o ia lava; a o mea na te va‘ai atu i le Tamā o faia; o mea fo‘i e faia e ia, o lo‘o faia fo‘i ia lava mea e le Atali‘i.

 O le tagata o loo naunau ia talia ma fiafia uma tagata ia te ia, e le mafai ona vaavaai I mea e taua. Peitai, o le a faalavelave ia te ia manatu o tagata. I la’u galuega, o le tulaga e pito sili ona taua, o le mafutaga vavalalata ma le Atua. E le o mai tagata ia te a’u ona faapea e fia vaai I ou foliga pe ona ou te lelei I le tulaga faamatematika. E o mai ia te a’u aua latou te iloa ou te latalata I le Alii ma a fia maua se upu mai ia te ia, ona ou tauina sa’o lea iai le manatu ma le finagalo o le Atua mo I latou. Ua latou mautinoa foi, a ou ole atu I le Atua I se mea e manuia ai I latou, e faafofoga le Atua ia te a’u. 

 I le tele o Tausaga talu ai, a’o tele faifeau sa laeiina ni ofu talaloa matagofie, na faaauau pea ona ou ofuina lo’u ofu masani, e toatele na upuia a’u ae ou te lei amanaiaina. E le mafai ona e faapei o isi tagata ae e te manatu e mafai ona avea ou o se tagata e vaai maualuga ma fia faataitai iai le toetele o tagata. O le tagata tauoloa e fia faataitai iai tagata, ae e le faapea o se tagata e faataitai I isi. Aua e te faataitai ma amio faatasi ma le lalolagi, ia e faataitai ia Keriso ona o mai lea o le lalolagi e fia faataitai ia te oe. 

Aua e te fefe e te ese mai I isi tagata, pe afai o loo e usitai ma faataitai ia Keriso, I le suafa o Iesu, Amene.