Samoan Devotional

OPEN HEAVENS
MATALA LE LAGI MO LE ASO GAFUA 3 OKETOPA 2022

Manatu Autu: Faaalia o galuega faatemoni 2 (Exposing demonic operations 2)

 Tauloto – Tusi Paia: Salamo 42:11 ‘Lo‘u agaga e, se a ‘ea le mea ‘ua e fa‘anoanoa ai? ‘Ua atuatuvale fo‘i oe i totonu ‘iā te a‘u i se a? ‘Ia e fa‘amoemoe i le Atua, auā ‘ou te toe vivi‘i ‘iā te ia, o lo‘u fa‘aolataga ia ma lo‘u Atua..’.

 Faitauga - Tusi Paia: 2 Korinito 1:3-5

 Upu Folafola
O le isi mailei a le tiapolo o le faanoanoaga ma le atuatuvale (depression). O lenei tulaga e le gata e maua I le faanoanoa ae taotaomia I lalo se tagata. Afai e maua le tagata I le faanoanoaga ma le atuatuvale, e le mafai ona ia faia se mea. E faia e le tiapolo I le tagata I le faatonutonuina lea o lona mafaufau. E faifaipea lona musumusu atu o pepelo I le taliga o lea tagata ina ia vaai atu le tagata e maualuga atu le faafitauli I lo le tulaga o lo’o iai. 

 Peitai, afai e te faataga le Atua e faaalia atu ia te oe le ala o le ola, e te maua le atoatoaga o le olioli I lona mamalu (Salamo 16:11). 

 O le tali e pito sili ona lelei e foia ai lenei faafitauli o le faalogo lea I le siufofoga o le Atua. Afai e amata ona malo le tiapolo e faapopole oe, ia e alu atu I luma o le nofoalii o le Atua ma saili ia te ia, ma ‘aua nei e alu ese seiloga ua e faalogo I lona siufofoga. Fai mai le Salamo 119:130 “O le fa‘aalia mai o au afioga e fa‘amalamalamaina ai; e fa‘alotomatalaina ai ē ‘ua faigofie.Afai e faataga lana Upu I lou agaga, e faamalamalamaina le tulaga o loo fa’aaogaina e le tiapolo e taotaomia oe I lalo. E vave ona e vaai atu I le mauga ua avea o se ma’a e la’a ai luga ou vae. Faitau lau Tusi Paia ma amata ona e tatalo I le Agaga Paia. E vave se taimi ae amata ona e maua lona olioli e le mafai ona faamatalaina. 

 O le mamalu o le Atua e mafai ona aumai ai le malologa mai faafitauli uma. Fai mai le Esoto 33:14 ‘Ona fetalai mai lea o le ALI‘I, “Tā te ō atu lava ma a‘u; ‘ou te avatua fo‘i le mapusaga mo oe.”

 O lo’o faamanatu mai e le Atua ia e saili ia te ia pe afai e o’o mai faaletonu. E naunau o ia e mafuta ma oe. Afai tatou te le mafuta ma le Atua, e faaaoga e le tiapolo le taimi paganoa lea e taotaomia ai oe I lalo I lona leo. O lau tautinoga e tatau ona pei o le fai Salamo o lo’o faapea mai I le Salamo 27:8 ‘Na fai atu lo‘u loto ‘iā te oe i lau na e fetalai mai,‘Ia ‘outou sā‘ili‘ili mai ‘iā te a‘u; le ALI‘I e, ‘ou te sā‘ili‘ili atu i lau afio’,

 I le Ieremia 29:13, o lo’o faapea mai a tatou sā‘ili atu ‘iā te ia, tatou te maua, pe afai tatou te sā‘ili atu ‘iā te ia ma tatou loto ‘atoa. Ao e saili atu I le Atua ma lou loto atoa e amata atu I le aso, a tafiesea le faanoanoaga ma le atuatuvale mai lou olaga I le suafa o Iesu. 

 Tatalo
Tama, ia faaumatia ma tafiesea le leo o le tiapolo ma ‘aua nei ou toe lagonaina I ou taliga, ae ia faatupulaia ona ou lagonaina lou siufofoga I lo’u loto, I le suafa o Iesu Keriso, Amene.

OPEN HEAVENS
MATALA LE LAGI MO LE ASO SA 2 OKETOPA 2022

Manatu Autu: Faaalia o galuega faatemoni 1(Exposing demonic operations 1)

 Tauloto – Tusi Paia: Ioane 10:10 ‘O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.’.

 Faitauga - Tusi Paia: Luka 13:10-17

 Upu Folafola
O le a amata ona tatou suesue ma faia a’oa’oga ina ia faaalia galuega faatemoni I nei aso ma o le a faasolo I leisi 5 aso. Ou te faatuatua ma talitonu a maea ane lenei suesuega, ua faaumatia ma taofia so’o se galuega faatemoni I lou olaga I le suafa o Iesu. Faamolemole ia e faia ma le faamaoni tatalo mai lenei aoaoga, tatalo e le aunoa I nei tatalo I le aso atoa. Ia e manatua, e aoga tele le tatalo faatauanau a le tagata amiotonu (Iakopo 5:16).

 A tatou talanoa loa I temoni o lo’o gaoioi e ala mai tagata, e eseese lava auala e iloa tino ai. E iai galuega faatemoni e ta’ua o le saisaitiga (oppression). A o’o se tagata I lea tulaga, e peiseai o loo tauave se avega mamafa ma ua le mafai ona ia tuua I lalo. Fai mai le Galuega 10:38:o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua.

 O le saisaitiaga e foliga mai o lo’o sau le tiapolo mai fafo ma osofaia le tagata o loo saisaitia. O le tagata e faaaoga e le tiapolo e tauala mai ai le osofaiga o se tagata, e latalata I le ua osofaia. 

I le tele o tausaga talu ai, ao faagasolo se polokalame, ua faailoa mai e le Atua o lo’o iai se tagata I le faapotopotoga o loo faia e lona tina ni mailei ina ia aua nei o’o ona faaipoipo. Ua faailoa mai e le Atua afai e le faasaolotoina e lea tina lana tama I totonu o le fitu aso, e oti. I le aso na sosoo ai, ua faateia a’u I le o mai o se tamaitai e 30 tausaga e lei faaipoipo ma lona tina I lou ofisa. Na faasea mai lea tina ia te au faapea: ‘Fai mai la’u tama ua e fai mai afai ou te le faatagaina o ia e faaipoipo, ou te oti I totonu o le fitu aso’. Ua ou tali atu o le feau mai le Atua, e le na o lana tama ae o so’o se tagata I le sauniga o loo taofia a latou fanau mai le faaipoipo. Na fai lea tina I lana tama e alu I fafo ae faapea mai ia te a’u, ‘ou te le o musu e faaipoipo la’u tama, ae o ai o le a tausia a’u pe afai e faaipoipo?’. Na ou fai atu iai o le a matou talanoa I le tamaitai ma lona toalua ina ia mautinoa e tausia lelei o ia. Na iu ina faaipoipo lenei tamaitai I le ono masina mulimuli ane. Ia faasaolotoina oe mai so’o se saisaitiaga I le suafa o Iesu. 

 Tatalo
Tama, so’o se avega mamafa ua tuuina I o’u luga e le tiapolo, ia faaumatia nei I le suafa o Iesu Keriso, Amene. 

OPEN HEAVENS
MATALA LE LAGI MO LE ASO TOONAI 1 OKETOPA 2022

 Manatu Autu: O Tatalo mo lou atunuu (Prayers for your nation).

 Tauloto – Tusi Paia: Salamo 122:6 ‘Ai‘oi atu ‘outou ‘ina ‘ia manuia Ierusalema: “‘Ia manuia i latou o ē alolofa ‘iā te oe.’.

 Faitauga - Tusi Paia: Salamo 122:6-9

 Tatalo

1.       Tama, faafetai I le faaalia o lou alofa I lo’u atunuu mai le amataga o le o’o mai o le Coronavirus I le lalolagi seia o’o mai i le taimi nei. Faafetai o loo manuia pea lou atunuu e ui i aafiaga uma o le siama o le faamai I luga o tagata ma le tamaoaiga o le atunuu

2.       Tamā faamolemole aumai le filemū i luga o si o’u atunuu, ‘aua ma ni puapuaga I le suafa o Iesu

3.       Tamā faamolemole fa’ataapeape uma faatasiga e faatupu e le tiapolo e taupulepule ai se leaga mo lo’u atunuu i le suafa o Iesu. Faamolemole faasaoloto lo’u atunuu mai lima o tagata e galulue faapito mo lo latou lava lelei I le suafa o Iesu.

4.       Tamā faamolemole faamanuia mai lou atunuu ia fau ma soloia ia mafai ai ona matou fesoasoani atu I isi mālō I le suafa o Iesu

5.       Tamā faamolemole fa’atula’i mai ni ta’ita’i amio Atua e galulue I tulaga tofi fa’auluuluga o matagaluega uma o si matou mālō. Ia avea i latou uma ua mautulaga I tofiga o upu fai o le mālō o nisi e matatau I le Atua i le suafa o Iesu.

6.       Tama faamolemole fa’afilemu soo se fa’afitauli I le va o aiga, nuu ma fa’alapotopotoga I totonu o Samoa. Ia nofo fealofani ma fetausia’i I le loto gatasi tagata uma o Samoa I le suafa o Iesu

7.       Tamā faamolemole fa’alēaoga uma soo se faiga faavae o faamalosia le ola faitaaga I totonu o Samoa I le suafa o Iesu. O Samoa e lē mafai na avea ma nofoaga o le agasala ma temoni I le suafa o Iesu. Ia ufitia Samoa I lou malamalama ma tafiesea ai I latou uma e faia tulafono e faatupu ai le agasala I le suafa o Iesu

8.       Tamā po’o le a lava se ala ua agasala ai Samoa ia te oe e o’o mai ai lou toasa ia I matou faamolemole malie afenoa lou finagalo le Alii e,

9.       Tamā mai mālō uma o le lalolagi ia e faatula’i lo’u atunuu e avea ma mālō tele I le suafa o Iesu

10.   Tamā faamolemole faatulai mai ni tagata galulue malolosi mai lou atunuu e lulūina le lalolagi mo se lelei I le suafa o Iesu

11.   Tamā faamolemole faamanuia laueleele o Samoa ia tutupu mai ai ni faamanuiaga tetele I le suafa o Iesu

12.   Tamā alofa fesoasoani mai ia fa’aolaina uma tagatanu’u o Samoa I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 30 SETEMA 2022

 Manatu Autu: E na te puipui I latou ua leai se puipuiga (He can defend the defenseless)

 Tauloto – Tusi Paia: Salamo 91:2 ‘Ou te fa‘apea atu i le ALI‘I, “O lo‘u malu o ia ma lo‘u ‘olo; o lo‘u Atua ‘ou te fa‘atuatua ‘iā te ia’.

 Faitauga - Tusi Paia: Ioane 10:7-14

 Upu Folafola
O se tulaga e oo mai ai le fefe pe a leai se puipuiga I le lalolagi faigata o lo’o tatou ola ai. Afai e ma’I se tagata, e te tamoe I le fomai mo le puipuiga, ae faapefea pe a faapea mai le fomai ‘ua leai seisi togafitiga e mafai ona faia mo oe?’. Afai e iai se tagata i faafitauli tau tupe, e mafai ona tamoe I le faletupe ma le naunautaiga e faia se nonogatupe a maua ai se fofo o le faafitauli, ae faapefea pe a fai mai le faletupe e le mafai ona fesoasoani ia te oe? O se tulaga matuia le leaga pe afai e lafoaina se tagata e lona aiga po’o ana uo, ae o le tulaga pito sili ona matautia le leaga pe a faapea mai le faifeau: ‘ Ua ou fiu e tatalo ae ua leai seisi mea e mafai ona ou toe faia mo oe’. Faafetai I le Atua aua o lena taimi, o loo iai sē e ta’ua o ‘Lē puipui i latou ua leai se puipuiga’. Fai mai le Salamo 46:1O le Atua, o lo tatou malu ia ma lo tatou malosi; e fai o ia ma fesoasoani silisili i puapuagā. 

 Tusa lava po’o le a se ituaiga faafitauli, o lo’o iai le Atua e puipui ia te oe. E iai lava taimi tatou te feagai ma I latou ua maualuga atu I a’i tatou ua le mafai ona tatou feagai. I na taimi e tatou te lagonaina ua leai se puipuiga, peitai e iai pea le Atua e puipui I ai tatou, pe afai o I tatou o lana fanau. E iai se taimi o matou sauniga o le Agaga Paia, fai mai le Atua ou te ta’u atu I se tagata I le potopotoga e aua le popole o ia o le a ata mulimuli. O le mea moni, sa iai se tama talavou I le sauniga ua ia maua se tusi e faamalolo ai mai lona fale faigaluega. Na sau sa’o lava mai le ofisa I le sauniga ma le tusi lea ma tagi I le Atua mo se fesoasoani. E o’o atu I le Aso Gafua, o I latou uma na tau pulepule ia tuli o ia, ua tutuli uma ae ua siitia lona tulaga. 

 I le Ioane 10:11, ua faaigoaina o ia o le Leoleo mamoe lelei. Fai mai le Ioane 10:12 A o le ‘au‘auna, e lē o le leoleo fo‘i o ia, e le ana le lafu mamoe; ‘ua va‘ai atu o ia i le luko ‘ua sau, ‘ona lafoa‘i lea e ia o mamoe, ‘ae sola; ‘ona pu‘ea lea o mamoe e le luko ma fa‘asalalauina.

 O le auauna o loo taua I le faitauga o le Tusi Paia o le aso o le tiapolo. Afai e te tuua oe I lalo o lana vaavaaiga, a oo mai mea faigata o le olaga nei e pei o ni luko feai, e sola ese ma oe. Afai e te talia Iesu e avea ma ou Alii ma Faaola, e te aofia I lalo o le puipuiga a le leoleo mamoe lelei ma e na te puipui ia te oe pe afai e osofai mai le fili. O e malu ea I lalo o le puipuiga a Keriso?  I le suafa o Iesu Keriso, Amene.   

OPEN HEAVENS
MATALA LE LAGI MO LE ASO TOFI 29 SETEMA 2022

 Manatu Autu: Talosaga mo talavou (Prayers for youth)

 Tauloto – Tusi Paia: Isaia 11:2 “E afio mau ‘iā te ia le Agaga o le ALI‘I; o le Agaga o le poto ma le mafaufau; o le agaga o le fa‘atonuga ma le malosi; o le Agaga o le malamalama ma le mata‘u i le ALI‘I”.

 Faitauga - Tusi Paia: Isaia 11:1-5

 Tatalo

1.       Le Alii e, faafetai lava, e ui lava i le tele o le amioleaga I le lalolagi i nei aso, o loo i ai pea talavou i Ekalesia, o lo’o naunau ma mumu pea le afi mo lau afio.

2.       Le Alii e, matou te tatalo ia faaipoipo lelei a matou talavou. Aua lava nei faaseseina i latou e le tiapolo, ia aua nei filifilia ni taitoalua e fai ma avega mamafa I ai latou, i le suafa o Iesu.

3.       Le Alii e, o loo tusia i le tusi a le Galuega 2:17, O ona aso e gata ai, o loo faapea mai le Atua, e na te liligi ifo ai lona Agaga i luga o tagata uma lava. Faamolemole liligi maia lou Agaga i luga o a tatou tupulaga talavou ma ia latou faia perofetaga ma maua faaaliga e matua faaosofia ma taitaia ai o latou olaga I le lelei ma le manuia, i le suafa o Iesu.

4.       Tama e, fetalai mai i taliga o matou talavou e pei ona e folafola mai i le Isaia 30:21 ina ia latou silafia lou finagalo mo le lelei o o latou olaga, i le suafa o Iesu.

5.       Le Alii e, faamolemole foai ia matou talavou le poto faalelagi e faatautaia ai faigata uma o le olaga latou te ono fetaiai a o latou tuputupu a’e i le suafa o Iesu.

6.       Le Tamā e, mo so’o se tasi lava o a matou tupulaga, ua I ai lagona o le fememea’i i so’o se vaega o o latou olaga, faamolemole foa’i atu le agaga o le malamalama, e savavali ai i le ala uma ua e saunia mo i latou, i le suafa o Iesu.

7.       Tamā e, foaʻi mai i o matou talavou le agaga o le faamalosiau ma le toa, ina ia mafai ai ona latou faia galuega maoa’e mo oe, i le suafa o Iesu.

8.       Tamā e, fa‘amolemole ,‘ia faaosofia  a matou talavoa ia fia‘a‘ai mo le poto talafeagai. Faasaoina i latou mai gaoioiga uma e faamaumau taimi, i le suafa o Iesu.

9.       Tamā e, ‘ia matata‘u ‘iā te oe o matou talavou uma, ‘ina ‘ia tamomoe mamao ese mai le agasala.

10.   Le Alii e lo matou Tama, ‘aua ne‘i fa‘asesēina e le tiapolo o matou talavou i mea feilafi o le lalolagi. Aua foi nei tosina I latou I auala leaga ma lē talafeagai e maua ai seleni, ma ia aua neʻi latou faia ni filifiliga o ni faaipoipo e faavae i seleni e maua mai ai, ma na o foliga faaletino, i le suafa o Iesu.

11.   Tama e, faʻamolemole, faaumatia ma tineia manaʻoga ma naunataiga o talavou, e faaaoga ai upega tafailagi I auala taufaasese poʻo isi gaioiga faasolitulafono, i le suafa o Iesu.

12.   Ia e faamanuia lo matou Atua I talavou tuputupu a’e I si o matou atunuu, I le suafa o Iesu Keriso e tatalo atu ai, Amene.

OPEN HEAVENS
MATALA LE LAGI MO LE ASO LULU 28 SETEMA 2022

 Manatu Autu: E mafai ona ia  faamaloloina mai ua le toe aoga iai se togafiti (He can cure the incurable)

 Tauloto – Tusi Paia: Ieremia 32:27“Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?”.

 Faitauga - Tusi Paia: Mareko 2:1-12

 Upu Folafola
I le Mareko 2:1-12, ua tatou faitau I le tamaloa pipili e amata mai I lona ua. O se tulaga ua le toe aoga iai ni togafitiga faa fomai. Ua le toe aoga iai se togafiti, ae ina ua ia feiloai ma le Alii o Iesu Keriso, o le e mafai ona faamaloloina ma’I ua le toe iai se togafiti, ua tafiesea lona pipili I ni nai sekone. Ia faamanuia le Atua I fomai uma, peitai  o le tele o taimi, e toatele e o atu e vaai fomai ae faapea mai: ‘Malie ae ua leai seisi togafiti e mafai ona toe faia e fesoasoani iai’. Peitai o lo’o iai se faamalolo ma’I e sili atu I so’o se fomai ma e mafai ona ia suia le ripoti a le fomai. Avea a’u e fai ma ona sui e poloai atu, o so’o se ripoti faanoanoa mai so’o se fomai ua e maua, ia suia ia e manuia I le suafa o Iesu. 

 Ua ou faalogo I se tautinoga e faaosofia ai a’u e siva ma pese. Fai mai lea tagata na tuia lona mata I se fao ma ua fai iai le fomai e leai ma seisi togafiti e mafai ona toe faia e toe iloa ai se mea I lona mata. Peitai o le Atua e faamaloloina ma’I ua le toe iai se togafiti, ua ia feliuaina lea ripoti, ina ua mavae  le tolu o aso talu ona logoina o ia e le mafai ona toe iloa se mea I lona mata lea, ua amata ona ia toe vaai. E mafai e fomai ona toe togafiti vaega o le tino. O lo’u tama e na te le tau togafiti ina ni itutino ua faaletonu,  ae e mafai ona ia suia soo se vaega o le tino. A afaina loa ma ua le toe aoga se itutino, e mafai e le Atua faamalolo ona toe suia lea vaega o le tino ma foliga mai e lei afaina muamua. I aso anamua, o le ma’I lepela sa leai sona fofo, e oo I aso nei, e mafai ona faamaloloina lepela, ae e te iloa atu lava ni faailoga sa lepela. Petai ina ua faamaloloina e le Atua Naamanu I le 2 Tupu 5:14, na toe foi le molemole o lona tino e pei o se pepe fou. Ou te poloai atu, o so’o se ripoti a le fomai o lo’o faalavelave I lou maua o le olioli ma soifua manuia, o le a toe feliuaina I le suafa o Iesu. 

 E mafai e Iesu Keriso ona faamaloloina ma’i ua le toe maua ni togafiti pe afai e te valaau ia te ia ma le loto mama, ae le sili ea le le maua I se ma’i? Afai e afio le Atua faamalolo ia  te oe, afai e o’o mai le ma’i Ia te oe, e tafiesea e le mana o Iesu Keriso. Fai mai le Faaaliga 3:20 o lo’o tu o ia I le faitotoa o lou agaga, o lo’o tuitui ma faatalitali e tatala mai lou loto ia te ia. E mafai ona e faapea mai ‘ua maea ona tuuina atu lou ola ia Keriso, aisea ua le faamalolo ai a’u e le Atua? Saili lelei, o e ola faapaiaina moni? O e soifua ma le usitai I le upu a le Atua? Afai e afio le Atua faamalolo ma’I I totonu ia te oe, e leai se ma’I e mafai ona ola I lou tino, I le suafa o Iesu Keriso, Amene.      

OPEN HEAVENS
MATALA LE LAGI MO LE ASO LUA 27 SETEMA 2022

 Manatu Autu: E mafai ona ia  pulea ē ua le mafai ona pulea (He can control the uncontrollable)

 Tauloto – Tusi Paia: Faataoto 21:1“O le finagalo o le tupu, o vaitai ia i le ‘a‘ao o le ALI‘I; na te liliuina i mea uma ‘ua ia finagalo i ai”.

 Faitauga - Tusi Paia: Salamo 135:1-12

 Upu Folafola
O le upu tauloto mai le Tusi Paia o le asō ua faapea mai, o loto o Tupu ua i a’ao o le Atua ma na te liliuina i se so’o se ala na te finagaloina. E ta’u mai ai ia te oe, o le so’otaga sili ona e mauaina, o le so’otaga lea ma le Atua. Afai ua ‘avea le Atua ma au uo, e so’o se tasi e te manaomia mai ai se fesoasoani o le a leai se latou filifiliga ma e le taumate lo latou tali leleia o lou fanoga ona ua pulea e le Atua o latou loto.

 I ni tausaga e tele ua leva atu, sa manaomia ona resitara le Ekalesia Redeemed Christian Church of God i se atunuu i fafo. Sa fa’ailoa mai e tagata uma e le mafai, aua e le taliaina e lea atunuu ni Ekalesia Penitekoso. Ae sa matou tauanau pea ma tuuina atu a matou tusi talosaga. Ina ua tuanai se taimi umi, sa maua mai a matou pepa resitara. Ua tuanai nisi tausaga, sa iai le poloketi sa matou talosagaina le faamaonia. Sa tusi mai tagata faigaluega a le Malo, e le taliaina aua e le i resitaraina le matou Ekalesia. Ona matou tali atu lea iai, ua mae’a ona resitaraina, ma sa matou tuuina atu matou tusi ma kopi o pepa resitara, ma ua faate’ia ai i latou ma tau manatunatu pe faapefea ona resitaraina le matou Ekalesia.

 Sa ou ‘ata’ata lemu i lea tulaga ona o lea ou te iloa lelei, e pulea e lo’u Tama, le Atua, mea uma lava! Ou te folafola atu i lou olaga, e so’o se mea o e mana’omia ai le manuia, e tusa pe  le o silafia e isi tagata lea tulaga, ua uma ona latou avatua le faamanuiaga ia te ‘oe, i le suafa o Iesu. E le gata ina pulea e lo’u Atua ia Tupu, e na te pulea foi isi mea. I le tusi o Mataio 8:23-27 na ia pulea le afa. I le Numera 22:28-30 sa ia puleaina le leo o le asini. I le Esoto 14:16-28 na ia pulea ma vaeluaina ai le sami ‘ula’ula ina ia maua ai se ‘auala e ui ai ona tagata. O lo’ o faapea mai le Tusi Pa’ia, o le lalolagi atoa e tu ai ona aao (Galuega 7:49). O lona uiga o lo o e iai i lalo ifo o vae o le Atua, afai e te gauai ia te ia, e na te pulea mea uma mo lou manuia (Roma 8:28), ae afai e te te’ena o ia, e mafai ona ia pulea mea uma ina ia tete’e atu ia te oe. I tua atu o lenei lalolagi o lo’o ia te ia le pule i faitoto’a o le Lagi ma Seoli. A fai e te ola faapa’iaina, o le a ia tatalaina le faitoto’a o le Lagi, ma e tasi lava le isi nofoaga e mafai ona aga’i iai le tagata, o Seoli. O le fea o ia nofoaga e te fia alu iai, o le Lagi po’o Seoli?

 O le Atua e pulea mea uma, ia e fa’a uō ia te ia i le asō, ona faamanuiaina ai lea o oe, I le suafa o Iesu Keriso, Amene.   

OPEN HEAVENS
MATALA LE LAGI MO LE GAFUA 26 SETEMA 2022

 Manatu Autu: E mafai ona Ia feliuaina tulaga ua le mafai (He can reverse the irreversible)

 Tauloto – Tusi Paia: Faaaliga 1:8 “O a‘u le Alefa ma le Omeka,” ‘ua fetalai mai ai le Ali‘i le Atua, o lo‘o soifua, na soifua fo‘i, o le a afio mai, e ona le malosi uma lava.

 Faitauga - Tusi Paia: Esekielu 37:1-14 

 Upu Folafola
E mafai ona faauigaina le tatou fuaiupu tauloto mai le Tusi Paia o le asō, e iai faatasi i le Atua o mea uma o ananafi, o le asō ma a taeao. O lona uiga, e ia te ia le pule I so’o se fuata ma taimi (Tanielu 2:20-21). Ona o lea, a finagalo iai le Atua, e mafai ona ia taofia le taimi e pei ona iai I le Iosua 10:12-14. Ou te manatua le taimi o le a atoa lo’u onosefulu tausaga, o le galuega na tuuina mai e le Atua ia te a’u ua peiseai e le taitai ona ausia. Ua ou tagi atu I le Atua ‘Le Alii e, fesoasoani mai ia te a’u. Ou te lei ausia lava mea uma ua e valaauina atu ou te faia. O lo’o tele pea galuega e manaomia le faataunuuina ao lenei ua amata ona goto le la. Ua ia faapea mai, ‘Atalii, e ia te a’u le pule I le taimi e goto ai le la’. 

 Ioe, o lo’u Atua e mafai ona ia taofia le taimi, ma e iai leisi mea e sili atu, e mafai ona ia toe feliuaina tulaga ua le toe mafai. I le Isaia 38:7-8 na ia fetalai atu I se tupu e faamaloloina o ia, ae na ia fesili mo se faailoga. Ona fai atu lea o le perofeta, ‘ua lelei ao le a le faailoga e te manao iai, ou te fai ea I le la e alu I luma pe alu I tua?’ Ona faapea mai lea o le tupu, ‘e faigofie le fai I le la e alu i luma, fai la I le la e toe foi I tua’ ona toe foi lea I tua I le aso lea. 

 E mafai e le Atua ona toe aumai ia te oe se avanoa ua e manatu e te le toe maua. O le mea na ia faia I le Kenese 18:9-14 ina ua ia fai mai o le a fanauina e Sara se pepe. Ua sili atu ma le 40 tausaga talu ona oti lona manava, ae e lei afaina lea I le Atua aua foi e mafai ona ia toe aumai ni mea ua manatu ua le toe maua. Ou te faia se perofetaga ia te oe, o avanoa uma ua leiloa ma ua e le maua, e toe faaolaina ma faafoisia ia te oe I le suafa o Iesu. Ou te le manao e na o lou faapea mai Amene I le tatalo lea. Ou te manao ia e manatunatu iai mo se taimi. A faapea na toe faafoisia e le Atua le ola I le manava o se tina e 99 tausaga, e te manatu ea e faigata le mea o lo’o e naunau e na te aumaia se tali? 

 E iai se tina na maua sana fanau mai ni tama eseese ae lei tuuina atu lona ola ia Iesu Keriso. Ua ia manatu e leai seisi tama e toe fia faaipoipo ia te ia, ae na faateia o ia, aua na aumaia e le Atua se tama e faaipoipo ia te ia. Na faailoa atu foi e le Atua I lea tama, e ui sa ui lenei tamaitai I ni faigata muamua, ua faamamaina o ia ma foai atu ia te ia se amataga fou! O lo’o iai pea le Atua I le pisinisi e feliuaina tulaga ua le toe mafai ona suia ma e mafai ona ia toe faafoisia mea uma ua leiloa, I le suafa o Iesu, Amene. 

 Tagi atu I le Atua ona o se avanoa ua e leiloa ma ua le toe maua. Ole atu ia te ia ‘Le Alii e, faamolemole ia feliuaina tulaga ua le mafai ona toe suia mo au’. Tagi ma ole atu pea I le tatalo, I le suafa o Iesu Keriso, Amene. 

OPEN HEAVENS
MATALA LE LAGI MO LE SA 25 SETEMA 2022

Manatu Autu: Mai le perofetaga I le poloaiga (From prophecy to decree)

 Tauloto – Tusi Paia: Salamo 33:9 ‘‘Auā o ia lava na fetalai ane, ‘ona i ai lava lea; o ia na tulei mai lana afioga, ‘ona tu mai lava lea.

 Faitauga - Tusi Paia: Salamo 33:8-9 

 Upu Folafola
E iai lava le eseesega o perofetaga ma poloaiga. A faia se perofetaga, o se folafolaga, ma a faia e le Atua se folafolaga, e na te faataunuuina I le taimi e tatau ai ma sa’o I le ausia o tapula’a. Peita’I, a ia faia se poloaiga, e faia ma taunuu I le taimi lava lena e aunoa ma ni tapulaa. O le tatalo a so’o se kerisiano ina ia liua e le Atua perofetaga I poloaiga e manuia ai I latou. 

 Na maua e Aperaamo le perofetaga e avea o ia ma Tama o nuu uma, peitai na umi se taimi o faatali le tino mai. O le aso na valaaulia ai le Atua e fai ‘aiga I lona fale, o perofetaga uma I le fanau mai o se tamaitiiti mai ia te ia, ua liua I se poloaiga. I lena aso, ua liua se mea sa faatali iai ma ua taunuu I le aso lea. I le Ioane 2:1-11 I le faaipoipoga I Kana I Kalilaia, na ta’u atu e le tina o Iesu ia Iesu ua leai se uaina. Ae na ia tali atu I lona tina, ‘e lei o’o I lo’u taimi’,  ae le’i leva se taimi, ae liua loa I le taunuu. I le 2 Tupu 4:8-17, na faia se poloaiga e Elisaia I le fafine Sunema e maua lana tama, e ui e lei talitonu iai, na taunuu lava.

  O se poloaiga e tuu esea le faalotolotolua ma le lē talitonu. E na te faataunuuina se upu ua poloai atu, ae o le perofetaga, e manaomia lou talitonu ma tatalo ina ia o’o ona taunuu. E leai se perofetaga ua folafolaina e le Atua ia te oe e le mafai ona ia faataunuuina aua o ia o le Atua Silisili ese. Fai mai le Mataio3:9 e matua Silisili ese o ia e mafai ona ia liua ni maa e faia ma tamaiti. E matua ofoofogia o ia e mafai ona ia liua mea e le mafai, I mea e mafai, I le Roma 4:16-19, fai mai o le manava o Sara ua oti. Afai o e naunau ia tino mai lena perofetaga, e tatau ona liua o se poloaiga. E faapefea ona faia e le Atua, ia liua ana perofetaga e faatatau ia te oe I ni poloaiga? E faigofie. Ia e foai atu le Atua o mea e fiafia iai o ia. Fai mai le Salamo 50:13-14 ‘Ou te ‘ai ‘ea i tino o povi po‘a, pe inu i le toto o oti? 14O le vi‘iga, ‘ia e faia lea ma taulaga i le Atua; ‘ia e avatu fo‘i i lē Silisili‘ese mea na e tautō ai.

 Ia e avatu pese ma viiga I le Atua, faafetai ia te ia mai le taele o lou loto ma faia lona finagalo. A e faia nei mea uma faifaipea ma le lelei, e pa’i atu I lona finagalo, e na te liua perofetaga I ni poloaiga ia manuia lou olaga. 

 Tatalo
Tama, faamolemole ia e liua perofetaga ua ou maua I poloaiga ou te manuia ai I le suafa o Iesu Keriso, Amene. 

OPEN HEAVENS
MATALA LE LAGI MO LE TOONAI 24 SETEMA 2022

 Manatu Autu: E lē mafai o na e faatonua lou pule (You cannot command your Master)

 Tauloto – Tusi Paia: Roma 6:16 ‘‘‘Na āfua mai i ona po o Ioane le papatiso, ‘ua o‘o i nei ona po, ‘ua taufaoa ai le mālō o le lagi, o lo‘o ‘ua ‘avea fa‘amalosi fo‘i e i latou o taufao...”.

 Faitauga - Tusi Paia: Mareko 3:23-27

 Upu Folafola
Fai mai le Tusi o Efeso 2:6‘Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi’

 O le upu lenei mai le Afioga Paia a le Atua e lē mo tagata uma. Ua na o i latou e ola faapaiaina e agava’a ai. Fai mai le Salamo 24: 3-4 ‘O ai ‘ea se alu a‘e i le mauga o le ALI‘I? O ai sē tumau i lona afio‘aga pa‘ia? 4O lē ‘ua i ai lima mamā, ma le loto mamā; o lē ‘ua lē naunau lona loto i le mea fa‘atauva‘a, ma ‘ua lē tautō fa‘a‘ole‘ole’.

 Afai e te lē ola paia e lē mafai foi na e alu a’e i le Atua pe talanoa ma nofo faatasi ma ia. O lea o i latou uma e lē ola faapaiaina e le mafai na nonofo faatasi ma Keriso aua fai mai le Efeso 1:20-21 o Keriso ua afio o ia e silisili lava I alii sili uma lava ma faipule o lona uiga e lē mafai e i latou o e ola lē faapaiaina na faatonu alii sili ma faipule. I soo se sauniga faatalalelei a o’o ina faapea mai le taitai I le potopotoga e alalaga e saisai le tiapolo ma ana au, ae alalaga faatasi atu ai ma i latou o loo ola pea i le agasala, o le mea e tupu ia I latou ia e atili ai na faapologa e le tiapolo. Afai e te lē talitonu faitau I le iuga na oo i ai atalii e toafitu o Seva o loo i le Galuega 19:11-16. E lē o se fanau I latou a le Atua ae na taumafai e tutuli temoni. Na a’oa’o ina i latou i lea aso a e manao e fefefe temoni ia te oe, ola faapaiaina.

 Fai mai le 1 Ioane 3:8 ‘O lē fai le agasala, mai le tiapolo lava ia; auā ‘ua agasala le tiapolo talu le amataga, o le mea lava lea na fa‘aalia mai ai le Alo o le Atua, ‘ina ‘ia fa‘aumatia e ia galuega a le tiapolo’.

 O le tulaga o lou tuaā I le soifuaga nei e fua I ai tagata e mafai o na e faatonua, afai o lou tamā e faigaluega i se tagata taualoa e lē mafai o na e faatonua le fanau a le tagata e ona le galuega aua o i latou foi o isi ou pule, e mafai o na latou faatonua oe. Peitai a faasaoloto oe mai lenei saisaitiaga ina ua avea oe ma tagata e sili atu I le tagata taualoa sa faigaluega ai lou tamā ona mafai lea na e faatonua uma ia ma lana fanau.

 Ou te avatu se valaaulia mo oe i le asō e faatasi atu ia i latou ua nofo faatasi ma Keriso Iesu e silisili lava i alii sili uma ma faipule. O i tatou uma foi, ua fai le tiapolo ma ana au ma a tatou auauna tatou te pule ai. Tatou te faatonua i latou ae lē mafai na faasagatau mai ia I tatou.

 Tatalo
Tamā faamolemole fesoasoani mai ia ou ola faapaiaina i aso uma o lou ola. I le suafa manumalo o Iesu Keriso, Amene.