Samoan Devotional

OPEN HEAVENS
MATALA LE LAGI MO LE ASO LULU 11 IANUARI 2023

Manatu Autu:  Tulai mo Keriso I soo se mea (Stand up for Christ Everywhere)

 Tauloto – Tusi Paia: Salamo 137:6‘Āfai ‘ou te lē manatua oe, ‘ia pipi‘i a‘e lo‘u laulaufaiva i lo‘u gutu, pe a lē fa‘asili Ierusalema i mea uma ‘ou te fiafia i ai.’ 

Faitauga - Tusi Paia: Tanielu 1:8-20

Upu Folafola

I le tatou faitauga o le Tusi Paia o le aso, ua tatou iloa ai Tanielu, Hanania, Mesaelu ma Asaria na latou teena meaai mai le laoai a le tupu ina ia aua nei le faamamaina I latou. E ui oi latou o ni pologa I nuu ese, na filiga nei tama e faia mea uma e tumau ai, ona vavaeeseina I latou mo le Atua. 

Peitai ane, e toatele kerisiano ua amio faatasi ma le lalolagi aemaise pe a o atu I atunuu ma nofoaga e leiloa ai latou e ni tagata. Ua tatou vaai I le tele o faataitaiga I le Tusi Paia. Mo se faataitaiga o Lota. O ia o le atalii o le uso o Aperaamo ma e masalo na aoaoina I poloaiga a le Tusi Paia ae ina ua o atu agelu I Sotoma ma Komoro, o ai na latou fetaiai I faitotoa o le aai? O Lota. Ua ola lelei faatasi o ia ma tagata o le aai ma ua mafuta ma I latou e leoleo faitotoa o le aai (Kenese 19:1). Na I’u ina leiloa oloa ma mea uma na ia maua e o’o I lana ava. 

Po’o fea lava e te iai, e ao ona e ola I tapulaa a le Atua Silisili ese. O nisi o tamaiti aoga kerisiano e o atu loa i Iunivesite tiai uma ola vavaeeseina mo le Atua na masani ai ao iai I o latou aiga. Ua mafuta atu I uo e le kerisiano ma amioleaga ma faataitai atu ai I o latou olaga agasala. O nisi e malaga atu loa I nisi atunuu I fafo atu o latou atunuu amata loa ona fai le amioleaga. 

Ia lapataia oe! Ina ua oo atu Tanielu I se atunuu ese, ua ia faamautinoaina e mafuta atu i kerisiano faatuatua. Afai e te oo atu I atunuu ese, sue nisi kerisiano, tagata o loo mumu o latou afi mo le Atua, ma faauo atu iai. Su’e se ekalesia e talitonu I le Tusi Paia ma mafuta atu iai ma faaauau ai ona e auauna I le Atua e pei ona e masani ai I lou atunuu. Afai e e te teena meaai mai le laoai a le tupu I na atunuu ese ina ia tumau lou faamamaina, e puipui oe e le Atua I taimi uma. 

Ina ua lafoai Hanania, Mesaelu ma Asaria (lea ua faaigoaina o Satataka, Mesako ma Apeteniko) I le taigaafi, sa le mafai e le afi ona mu ai I latou aua sa tulai I latou mo le Atua (Tanielu 3). Ina ua lafoai Tanielu I le lua o leona, sa le mafaia e leona ona aia o ia aua na ia tulai mo le Atua (Tanielu 6). Ia e tulai mo Keriso I soo se mea e te iai ona tulai foi lea o Keriso mo oe I soo se mea. 

Ia faatumauina lou vavaeeseina mo le Atua I soo se mea e te iai, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LUA 10 IANUARI 2023

Manatu Autu:  Lulu ni fatu lelei mo le Agai I luma (Sow good seeds Ahead)

Tauloto – Tusi Paia: Kalatia 6:7‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia...’. 

Faitauga - Tusi Paia: Salamo 20:1-3

Upu Folafola
E iai le alaga upu lauiloa e faapea: ‘A’o e iai i le taimi o le filemu, ia tapenapena mo taua’. E tutusa lea ma le manatu e faapea: ‘A o le’i iai sou mana’oga, ia vave lulu ni fatu, aua a tupu mai se afa, ona molimau lea o fatu nei mo oe. E tatau ona lulu i le taimi nei ni fatu o lau auaunaga i le Atua, aua a o’o i le taimi ua e avea ma tagata matua, o le a leai sou malosi e te femo’ea’I solo ai e te faia le galuega a le Atua. E tusa foi pe leai ni afa e feagai ma oe, e iai le taimi o lou olaga e te fesaga’i ai ma le afa, o le oti. O le taimi lena o le a fesili ai le Atua, o lea le mea na e fa’aaogaina ai taleni na ou avatu ia te oe?

Ia lulu ni fatu lelei i le taimi nei, a’o lei o’o mai se afa, aua e te manaomia fatu e molimau mai mo oe’. A e faitau i le tala o le fafine agasala i le tusi o Luka 7:37 – 38, ona e va’ai lea i lona luluina o le fatu lelei, ina ua ia faamama a’ao o Iesu i ona loimata ae solo mago ona a’ao i lona lauulu. Na fa’aaoga e le fafine agasala se faguu’u taugata e u’u ai a’ao o Iesu ma sa maitauina lelei e le Alii Faaola lenei gaioiga lelei sa fai e le fafine agasala mo ia. Talosia e mafai ona e faia se mea lelei i le aso, e fa’aosofia ai le Atua na te maitauina lou tagata! 

I se fonotaga i ni tausaga ua tuanai, sa ou iai ma pa’aga uma e lagolago ma faatupea galuega a le Ekalesia I so’o se vaega. Na ou fai atu ia i latou e tatalo mo se mea e tasi. Sa matou iai faatasi ma se fafine ua leva ona matou mafuta, a ua loa tausaga e le fanau o ia, ma o lana tatalo, ia maua sana pepe. Sa i’u ina  maua o ia I le ma’itaga ona malaga lea i Amerika, mo ni su’esu’ega o lona ma’itaga ma sa faapea ane fomai ia te ia e tele le avanoa e maua ai lana pepe i le HIV ma, e tatau ona aveesea ia mai Amerika ae toe foi i lona atunuu. Sa musu le fafine e toe fo’i, a ua ia tatalo i le Atua e faapea: ‘Aumai se fa’aaliga ia te a’u ou te iloa ai ua e lagona mai la’u tatalo.’ O le tali na aumai e le Atua: ‘Ia e toe fo’i i lou  atunuu, o le a e mauaina se faaaliga e te lei taunu’u’. Ona toe foi lea o ia i Nigeria, ae ma fetaui ai i luga o le vaalele. Ua faate’ia si fafine ina ua ma fetaui i luga o le vaalele, ona ou fesili lea iai po’o lea le mea ua tupu. Ina ua faamatala mai sa ou faia le ma tatalo. Ina ua tuanai ni nai masina, sa fanau lea fafine i se tulaga saogalemu ma le manuia. Sa faia suesuega ma fa’amaonia ai e HIV negative lana pepe faapea foi lona to’alua, a o le tulaga sa iai muamua, o lona to’alua sa HIV positive. O le fatu na luluina e le tina lenei I galuega a le Ekalesia ua toe molimau mai. Ia lagona mai e le Atua lau tatalo i aso e te puapuagatia ai, ma ia le fa’agaloina e le Atua au taulaga na faia muamua, i le suafa o Iesu.

Pe ua e luluina ea ni fatu e mafai ona molimau mo oe pe a tulai mai ni afa? I le suafa o Iesu Keriso, Amene.  

OPEN HEAVENS
MATALA LE LAGI MO LE ASO GAFUA 9 IANUARI 2023

Manatu Autu:  E manaomia e tagata uma uo lelei (Everyone needs good friends)

 Tauloto – Tusi Paia: Faataoto 18:24‘O le tagata ‘ua fai ana uō, e i‘u ‘ina tigāina ai o ia, a o i ai le tagata alofa e sili ona pipi‘i mai i lo le uso...’. 

Faitauga - Tusi Paia: Failauga 4:9-10

Upu Folafola
O le alofa e lua ona itu (Faataoto 18:24). Afai e te faaalia atu le alofa I se tagata, e masani lava ona faaalia mai foi le alofa ia te oe. Afai e te manao e maua ni au uo ma faauo atu I tagata, e tatau ona muamua faaali atu ou foliga fiafia I tagata (Faataoto 18:24). Afai e te manao e agalelei mai, agalelei atu muamua iai latou. Ua ou vaai I tagata e o mai I lo’u fale e faauu o latou foliga ae o atu I fafo ma lou fale ma foliga fiafia ma ataata ona e talimalo lelei la’u ava. E moni, e toatele tagata e leai ni uo aua foi e le faaalia ni o latou foliga fiafia I tagata. 

I ni tausaga talu ai, o se tasi o ou afafine ua sau ma fai mai ia te a’u, ‘Tama, ua ou matua ae lei sau lava se tagata ia te au ma faapea mai ;ua faaali mai e le Alii..’ Ua ou fai atu iai, ‘Afai e faapena lou faauu ma faasiasia I tagata e pei o loo e sauni e fai se fusuaga, o ai se e mafai na sau ma faapea atu ‘ua faaali mai e le Alii…’ tusa po’o lo’o faailoa iai e le Atua? E te le ata, e faauu ma foliga ita e pei na faaita oe e seisi, ma afai e sau se alii, e tasi lava le tilotilo I ou foliga ua lava lea e toe suia ai lona mafaufau’. Faafetai I le Atua ua ia faalogo ma faaaoga lelei le fautuaga ma ua faia ni suiga. E lei leva lava ae faaipoipo loa. O le alofa e tatau ona feofoofotai. 

Pe e te talitonu iai pe leai, e manaomia e tagata uma ni uo. Fai mai la tatou faitauga o le Tusi Paia o le aso, mo le tagata e leai sana uo, afai e pau, e leai seisi e toe siitia I luga. E iai lava le taimi e manaomia ai e le tagata seisi tagata e siitia pe toso mai o ia I luga. Aua nei faatagaina e le Atua se tulaga ua leai ai se tagata e toso maia oe I luga pe a o’o I taimi faigata. Fai mai le Faataoto 18:24  e i ai le tagata alofa e sili ona pipi‘i mai i lo le uso. E manaomia ni au uo, faaali foliga fiafia I tagata aemaise I latou o lo’o I ou tafatafa ane. 

Peitai, e tatau ona filifili lelei ni au uo ma le totoa aua foi e faamaai e le uamea le uamea (Faataoto 27:17) aua e faapena foi, e le lelei pe afai e feoa‘i ma ē amio leaga aua e leaga ai amio lelei (1 Korinito 15:33). E manaomia e tagata uma ni uo lelei, ma o le uo maoae lava, o lo tatou Alii o Iesu Keriso. Lafoai lou ola ia te ia I le aso pe afai e lei faia lava, ina ia avea oe ma ana uo (Ioane 15:15). I le suafa o Iesu Keriso, Amene.   

OPEN HEAVENS
MATALA LE LAGI MO LE ASO SA 08 IANUARI 2023

Manatu Autu:  Olioli e le ma faamatalaina (Joy unspeakable)

Tauloto – Tusi Paia: 1 Peteru 1:8‘To‘u te lē iloa atu ‘outou ‘iā te ia, a ‘ua alolofa ‘iā te ia; e lē o va‘ai atu nei fo‘i ‘iā te ia, a o lo‘o fa‘atuatua ‘iā te ia, tou te ‘oli‘oli ai ma le fiafia e lē matalatalaina, e silisili ‘ese lava..’. 

Faitauga - Tusi Paia: 1 Korinito 2:9

Upu Folafola
E toatele ua fa’alogo I le fuaitau ‘olioli e lē ma fa’amatalaina’ peitai e to’alaiti ua tofo ma o’o i ai. O le ituaiga olioli lea e matuā fa’atumulia ai oe e te fiu e faamatala e lē maua ni upu e faamatala ai. I ni tausaga ua mavae sa fai la matou polokalame i se tasi o taulaga I Nigeria. Na sau ai se tinā ua tele ni tausaga e le’i maua sana fanau, ma manao e fai se tatalo mo ia ina ua fa’afefe e tagata o le aiga o lona toalua e tuli ese e le’i uma le tausaga. Sa tumu tagata ma ou te le’i maitauina poo ai uma i latou na o’u tatalo ai. O le tausaga na sosoo na toe fai ai le isi polokalame ma sa toatele foi na faasolo mai ia te a’u mo tatalo. Sa i ai si tinā lenei I le laina, ma ina ua o’o mai i luma sa na o le tatala o lona fofoga e fia tautala ae leai se upu e mafai na fai. Na i’u ina mafai na matala mai le upu e tasi ‘Iesu’

Ina ua mafai na tautala le tinā na ia faamatala o ia o le fafine sa pa (tulou) ae sa ou tatalo mo ia I le tausaga ua mavae. O iina na ou iloa ai o le mafuaaga o le lē mafai na ia faamatala, o loo afisi le isi pepe I lona itu agavale ae sapai le isi I le itu taumatau, o le masaga si ana fanau. Ou te tatalo ia vave ona e o’o I le olioli e lē ma fa’amatalaina, I le suafa o Iesu.

O la tatou upu tauloto (1Peteru 1:8) fai mai a e faatuatua i le Atua e foai mai e ia iā te oe le olioli e lē ma fa’amatalaina e tumu i le matagofie. Na o lou loto talitonu i le Atua e manaomia. O le talitonu iā te ia o lona uiga e o faatasi au mea e fai ma lau ta’utinoga. Fai mai Iakopo 2:17 E fa‘apea fo‘i le fa‘atuatua, pe ‘āfai e lē i ai galuega, e mate lava ia ‘ina ‘ua na o ia.

O tatau ona faaalia I lau amio lou talitonu i le Atua. O ou manatu e tatau ona iloa ai lou talitonu ma Amene i folafolaga uma a le Atua o loo i lana Afioga Paia. E tatau ona e talitonu o oe o se tagata so’o se mea e ole atu ai i le Atua e faia mo oe. Fai mai le Iakopo 1:6-8, so’o se tasi e alu atu i le Atua e aunoa ma le faatuatua aua lava ne’i manatu na te maua se mea mai ia te ia. Tu’u atoa lou faatuatua I le Atua ona e maua lea o le olioli e lē ma fa’amatalaina a’o ia amata faailoa mai ana fuafuaga matagofie mo oe i le suafa o Iesu.

Tatalo
Tamā ua o’u tu’u atu atoa lo’u faatuatuaga ia te oe. Faamolemole foai mai ia te a’u le olioli e lē ma fa’amatalaina i vaega ta’itasi uma o lo’u olaga i le suafa o Iesu, Amene.

OPEN HEAVENS
MATALA LE LAGI MO LE ASO TO’ONAI 07 IANUARI 2023

Manatu Autu:  Alofa e Atoatoa (Perfect love)

 Tauloto – Tusi Paia: 1 Ioane 4:16‘O i tatou fo‘i, ‘ua tatou iloa ma ‘ua fa‘atuatua i le alofa ‘ua i le Atua ‘iā te i tatou. O le Atua, o le alofa lava ia; o lē tumau i le alofa, ‘ua tumau ia i totonu o le Atua, o le Atua fo‘i o i totonu ‘iā te ia.’. 

Faitauga - Tusi Paia: 1 Ioane 4:15-21

Upu Folafola

O le Atua o le alofa lava ia ma nā o ia e maua ai le alofa e atoatoa (1 Ioane 4:16-17) Poo le a lava le malosi o le alofa o le tagata e masani lava ona i ai ma isi mafuaaga e natia I totonu ma e tumau le lē atoatoa pe a aunoa ma le Atua.

O se fa’ata’ita’iga lelei o ni tagata se toalua i totonu o le Tusi Paia na alofa le isi I le tasi. O Tavita ma Ionatana. Fai mai le 1 Samuelu 18:4 ‘Ua tō ‘ese fo‘i Ionatana lona ‘ofu talaloa nai ‘iā te ia, ‘ua foa‘i atu ai ‘iā Tavita, ma lona ‘ofu tino, ‘atoa ma lana pelu, ma lana ‘aufana, ‘atoa ma lona fusi.

A silasila toto’a I meaalofa e te silafia ai na foa’i e Ionatana iā Tavita ana mea uma vagana ona seevae. O le mafuaaga, o aso anamua o le auala lea e fa’amau a’i se feagaiga o le foai atu o se’evae, a leai, o mea uma e ave e mafai na toe fa’afo’i i lē na aumai ai (Ruta 4:7). O aso fo’i la na o atalii e faataga na fai latou se’evae, o auauna e fa’asā. O le pogai lea o le fai mai o Luka 15:11-24 ina ua toe fo’i le ui’i fa’amaumau oa na fai atu le tamā i ana auauna e fa’ase’e i ona vae e fa’ailoa ai ua talia ia o se atalii ae lē se auauna. O lea ua tatou iloa na fai Ionatana iā Tavita “o i tāua o le uō, ae aua ne’i galo o oe o le auauna a’o a’u o le atalii, ua na o oe o se auauna ua alofagia.” I le 1 Samuelu 20:13-16, ma le 42 ua tatou iloa ai na amata e Ionatana se feagaiga ma Tavita ina ua ia iloa ua lata na avea Tavita ma tupu. Na fa’a upu fo’i e Ionatana se mavaega ia ioe i ai Tavita na te lē faaumatia le aiga o Ionatana (Saulo). Mulimuli ane fai fo’i Ionatana iā Tavita a avea ia ma tupu o Isaraelu o ia fo’i (Ionatana) ia aupito atu iā Tavita. (1Samuelu 23:17) Faaeteete pe a fai mai tagata e alolofa iā te oe. Atonu e alolofa ona o mea ua latou maua ia te oe ae lē toe maua loa se mea e iloa loa ē alolofa moni iā te oe.

Peitai o le alofa o le Atua mo i tatou e atoatoa ma leai ni tapula’a. Na alofa mai lava ia i tatou a’o tatou faia pea le agasala (Roma 5:8) Na ia foai mai lona alo pele e toatasi ia faaolaina oe ma a’u. (Ioane 3:16) Ua na o ia ua tatau ona tatou fa’amoemoe i ai (1 Ioane 4:16)

Filifili nei le alofa e atoatoa o le Atua mo oe i le asō e ala i lou tu’u atoa o lou ola iā Iesu. Ua na o ia tatou te mautinoa ai le lototele I le aso o le faamasinoga ( 1 Ioane 4:17) ma le ola e faavavau (Roma 6:23), I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 6 IANUARI 2023

Manatu Autu:  Tatalo mo le Tausaga Fou (Prayers for the new year)

Tauloto – Tusi Paia: Salamo 65:11‘‘Ua e fa‘ae‘e i le tausaga le paleali‘i o lou agalelei; o ou ala ‘ua tautulu ai mea lololo.’. 

Faitauga - Tusi Paia: Isaia 43:16-20

Tatalo

1.       Tama, faafetai ua mafai ona ou aulia mai lenei Tausaga fou, 2023

2.       Ou te lafoai mea uma e faatatau ia te au ma tuuina atu I ou aao I lenei Tausaga. Faamolemole ia e tautai ma taitai lou ola le Alii e. 

3.       Tama, faamolemole foai mai le vave faalelagi  mo manuia I lenei Tausaga I le suafa o Iesu. 

4.       Le Alii e, aua nei maliliu pe aveesea nisi o e pele ia te au I lenei Tausaga. Faamolemole ia e puipui I latou uma e fesootai ma a’u e ala I lou mana, I le suafa o Iesu. 

5.       Tama, faamolemole faaaoga au mo lou viiga I lenei Tausaga ia sili atu I lo le muamua, I le suafa o Iesu. 

6.       Le Alii e, so’o se amioleaga o lo’o fuafua e le tiapolo e tetee pe osofai Ia te au I lenei Tausaga, faamolemole ia aveesea mamao ma au ma e pele ia te au I le suafa o Iesu. 

7.       Tama, faamolemole I lenei Tausaga, ia tatala o’u taliga ou te faalogo manino ia te oe I taimi uma. 

8.       Tama, ia vave ona ou ola vavalata ma oe ma ia ou tauavea lou mamalu I taimi uma. 

9.       Le Alii e, faamolemole ia e manava I luga o vaega tau tupe uma o lou olaga. E le maimauina se tupe ou te totogiina ona o ma’I, faamasinoga, maliu ma mea faapena I lenei tausaga I le suafa o Iesu. 

10.   Tama, faamolemole ia e tatala faitotoa tetele mo a’u I lenei tausaga. Ia maua ni taui lelei o a’u galuega I lenei Tausaga I le suafa o Iesu. 

11.   Tausaga 2023, ou te folafola atu e te agalelei ia te au. E galulue mea uma mo lo’u lelei I lenei Tausaga I le suafa o Iesu. 

12.   Tama, foai mai le poto ma le atamai ia te a’u I lenei Tausaga ia maualuga ai pea lou viiga I lou ola. Faafetai e te faafofoga ma tali mai ia matou tatalo, I le suafa pele o Iesu Keriso e tatalo atu ai, Amene.  

OPEN HEAVENS
MATALA LE LAGI MO LE ASO TOFI 05 IANUARI 2023

Manatu Autu:  A’oa’oina mai le Upu a le Atua (Learn from the Word of God)

Tauloto – Tusi Paia: 2 Timoteo 2:15‘ia e taumafai ‘ina ‘ia ‘avea oe ma lē ‘ua fiafia mai i ai le Atua, o le faigaluega e leai se mea e mā ai, na te tala‘itonuina le ‘upu moni’. 

Faitauga - Tusi Paia: Salamo 25:4-5

Upu Folafola

O le tatou upu tauloto o le aso o loo faapea mai o le tagata faigaluega e iloa tonu le vaevaeina ma talaitonuina le upu moni, e leai se mea e ma ai. O lea tagata e le gata ina faitau, ae mafai ona ia vaevaeina le Upu ma a’oa’oina mai ai o ia. E toatele tagata e faitauina le Tusi Paia e aunoa ma le aoaoina mai ai. Ua fai ma mea masani e fai ina ia ausia vaega e ta’u amiotonuina ai. E tele ni oloa taua o le poto ma le malamalama o loo I le Tusi Paia ma e manuia tele ai tagata e latou te filiga e suesue ma a’oa’o mai ai.   

Afai e te suesue I le Tusi Paia, e te vaavaai atu ini mea fou e mafai ona aoaoina ai oe ma savali ai I le lua ulugalii, o lau pisinisi, galuega, lotu ma le ekalesia ma soo se vaega o lou olaga. Fai mai le Faataoto 18:15 ‘O le loto o lē ‘ua mafaufau na te maua le poto; o taliga fo‘i o lē ‘ua poto, e sā‘ili ia i le poto’.

O le Tusi Paia e le o se tusi na o tala, o le tusi e taitaia ai le ola o le tagata, ma o lesona ma aoaoga e maua mai ai e tatau ona faataitai ma savavali ai I o tatou olaga. Fai mai le Roma 15:4 ‘O mea uma fo‘i na tusia anamua, na tusia ia e a‘oa‘o mai ai ‘iā te i tatou; ‘ina ‘ia tatou maua le fa‘amoemoe e tupu mai i le ‘onosa‘i, ma le fa‘amafanafana mai o Tusi’.

Fai mai le 2 Timoteo 3:16-17 o Tusi Paia uma ua tuuina mai iai tatou ina ia atoatoa ona lelei I tatou ma saunia lava I galuega lelei uma lava, e le na o ni nai galuega, ae o galuega lelei uma lava. 

16O tusi pa‘ia uma lava e mai le Agaga o le Atua ia, e aogā fo‘i ‘ia e a‘oa‘o ai, e a‘oa‘i ai, e fa‘atonu ai, e fa‘apoto ai fo‘i i le amiotonu 17‘ina ‘ia ‘ato‘atoa ‘ona lelei ai o le tagata o le Atua, ‘ia saunia lava ia i galuega lelei uma lava.

O le ola ma soifua e tusa ma tapulaa a le Atua e pei ona tusia I le Tusi Paia e ono foliga mai e faigata, peitai ane, e sili atu le aoaia o o’e ma a’u ina ia faia aua foi o le taui e matua maualuga I o tatou olaga. Mo le faataitaiga,o le upu a le Atua, e tatau ona e faamaualalo, ia faamaualalo loa. Afai e te faamaualalo, e avatu e le Atua ia te oe le alofa tunoa e te manuia ai (Iakopo 4:6). Fai mai lana Upu e tatau ona e filiga ma galue malosi, filiga ma galue malosi ma o lona taui, e te tu I luma o tupu (Faataoto 22:29). 

Talitonu mai, ua ou maua ma iloa, o le Upu a le Atua o le ki mautu lea o le manuia I le olaga nei. Ia e faamaoni e suesue ma aoao mai le Upu a le Atua ona faataitai lea ma savali ai, ia sa’o ma tonu I lou olaga e amata atu nei. Tatalo e tusa ma le Salamo 25:4, Le ALI‘I e, ‘ia e fa‘ailoa mai ‘iā te a‘u ou ala; ‘ia e a‘oa‘o mai ‘iā te a‘u i ou magāala, I le suafa pele o Iesu Keriso, Amene. 

OPEN HEAVENS
MATALA LE LAGI MO LE ASO LULU 04 IANUARI 2023

Manatu Autu:  Pe a Manava mai le Atua 2 (When God Breathes 2)

 Tauloto – Tusi Paia: 2 Samuelu 22:16‘Ona iloa ai lea o le ‘iliti vai; ‘ua aliali mai fa‘avae o le lalolagi, i le a‘oa‘iga a le ALI‘I, i le mapugatama‘i ai ona fofoga.’.

Faitauga - Tusi Paia: 2 Samuelu 22:16-25

Upu Folafola
Afai e finagalo le Atua e manava atu ona o se tagata, e na te ono le faia tuusa’o I lea tagata, ae na te manava ma feula ese fili ma e ita I lea tagata. Afai tatou te vaai I le Tusi Paia I upu nei ‘mapugatamai ai ona fofoga (blast of his nostrils)’, o le Atua lena ua manava atu ma le malosi e feula ese fili o lana fanau, e pei ona tatou iloa I le Esoto 15:8-10. 

I le mapugatamai mai o ona fofoga, na ia vaeluaina le sami ulaula na tu I le ala o le fanauga a Isaraelu e agai atu I le nuu na folafolaina, ona ia toe faafoi lea o le sami I lona tulaga masani ma malelemo uma ai farao ma lana autau. A manava atu le Atua e faasagatau I ou fili uma, e le gata e faaumatia I latou ma le toe iloa, ae na te siitia foi oe I le tulaga o faamoemoega mo lou olaga. Na faia le tautinoga a Tavita I lea tulaga e pei ona iai I le tatou faitauga o le Tusi Paia o lenei aso e faapea: 20‘Ua ia ‘aumaia a‘u i le mea lautele ‘ua ia lavea‘i ‘iā te a‘u, auā ‘ua finagalo alofa mai o ia ‘iā te a‘u.

I lea manava e tasi, na faaumatia e le Atua fili uma o Tavita ma aumai o ia I le mea lautele. E te silafia ea e mafai e le Atua ona faia lea tulaga mo oe I le aso? E mafai ona ia faaumatia uma ou fili ma ave oe I le nofoaga o loo taumafai pea ou fili e aua lava nei e oo iai. 

E masani lava ona ou faapea atu, o le aotelega o lauga a Iesu I le Tusi Paia, e leai se mea e faia fua. O lona uiga, e iai lava tapulaa e tatau ona ausia mo soo se mea tatou te mananao e faia e le Atua mo tatou. O le a le tapulaa o le manava atu lea o le Atua e faaumatia ou fili uma ina ia siitia I tatou I le tulaga ua ia saunia mo I tatou? O loo iai I le fuaiupu 21-25 o le tatou faitauga o le Tusi Paia o le aso – ola faapaiaina. Fai mai Tavita na faamanuia ma taui ia e le Atua e tusa ma lana amiotonu ma le mama o ona lima. 

E mama ea ou lima? A faafesagai se tagata ma ona fili ma e ita mai e malolosi atu e le mafai ona ia faatoilaloina, e manaomia nisi e au ma ia e malosi atu I ona fili ina ia maua ma mausali le manumalo. O ia tagata e au ma ia e mafai ona o ese pe afai e faia e lea tagata se mea e ita ai I latou. Aua ete faaita I le e au ma oe. Aua e te faia mea e le fiafia ai le Atua, ona ia le tau lea o le taua mo oe. 

Tatalo
Tama, faamolemole fesoasoani mai ia te au ina ia ou ola faapaiaina. Le Alii e, manava atu I o’u fili uma ina ia ausia fuafuaga ma faamoemoega o lo’u olaga I lenei tausaga, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO LUA 03 IANUARI 2023

Manatu Autu:  Pe a Manava mai le Atua 1 (When God Breathes 1)

 Tauloto – Tusi Paia: Esekielu 37:5‘Ua fa‘apea ‘ona fetalai mai o le Ali‘i le ATUA i na ivi; Fa‘auta, ‘ou te fa‘aulu ane le mānava i totonu ‘iā te ‘outou, ‘ona ‘outou ola ai lea;...’.

Faitauga - Tusi Paia: Salamo 128:1-6

Upu Folafola
O le mea muamua lava e tatau ona e silafia I le tatou mataupu o le aso, e le manaomia e le Atua le manava e ola ai e pei o tatou. O le Atua e le mafai ona oti ma e le manaomia le manava ina ia ola. O lea la, afai tatou te faapea mai ua manava le Atua, o lona uiga e iai se mea taua ma e lei tupu muamua o le a tupu. Fai mai le Kenese 2:7

‘Ona faia lea e le ALI‘I le Atua o le tagata i le efuefu o le ‘ele‘ele, ma ‘ua mānava i ona pogaiisu o le mānava ola, ‘ona ‘avea ai lea o le tagata ma tagata ola.

O le Atua Silisili Ese, e le manaomia ona manava e maua ai le ola, ua ia finagalo ia manava ina ia tuuina atu le ola I mea e leai se ola. Ua ia manava I le efuefu o le eleele ona avea ai lea ma tagata ola. Afai e manava o ia I luga o le tagata oti, e toe ola. O le ala lea tatou te iloa ai le matautia o le malosi o le manava a le Atua, ma ia e talitonu mai, o so’o se mea o loo oti I o tatou olaga, e tatou te manaomia le manava a le Atua iai tatou. 

Fai mai le Roma 4:19, e le gata ua oti le manava o Sara, ua oti foi le tino o lana tane. Peitai, e mafai ona avatu le manava ola, na ia manava atu ma ua toe ola. E le gata e mafai ona manava atu I manava ua oti, e mafai foi ona manava atu I pisisini ua leai se ola, o galuega, o faaipoipoga, o galuega a le Ekalesia ma isi ua leai ni ola. 

E te ono iloa se vaega o lou olaga ua e maitauina le leai o se alualu I luma mo le tele o Tausaga, e te ono manaomia le Atua e manava atu iai le manava ola. Fai mai le Kenese 49:22 ‘O Iosefa o le la la‘au o ia e fua, o le la la‘au e fua i tafatafa o le vaipuna, e sosolo ‘ona la i luga i le pā’. Na matua faamanuiaina Iosefa I so’o se mea na alu iai o ia, e oo I le tulaga o se pologa (Kenese 39:2), o le pagota (Kenese 39:21-23) e oo I le avea ma palemia (Kenese 41:41). 

O le fuaiupu muamua o le tatou faitauga o le Tusi Paia o le aso, o loo faaalia ai le mealilo o le fuatele mai o galuega a Iosefa, e matau o ia I le Alii ma savali o ona ala. E tatau ona e taofia le agasala ae savali I ala o le Alii, ona e iloa lea o mea sa oti ua amata ona ola ma fua mai. Ou te tatalo ia foai atu e le Atua Ia te oe le alofa tunoa e te matau ai ia te ia ma faia lona finagalo I taimi uma, I le suafa o Iesu. 

Tatalo

Tama, faamolemole, ia manava mai le manava ola I soo se mea o loo oti I lou olaga I le aso, I le suafa matautia o Iesu Keriso, Amene.

OPEN HEAVENS
MATALA LE LAGI MO LE ASO GAFUA 02 IANUARI 2023

Manatu Autu:  Fuafuaga faataatitia e fia ausia 2 (Setting and achieving goals 2)

 Tauloto – Tusi Paia: Ieremia 30:2‘O lo‘o fa‘apea ‘ona fetalai mai o le ALI‘I, le Atua o Isaraelu, ‘ua fa‘apea mai: ‘Inā tusi ia i le tusi, o ‘upu uma ‘ua ‘ou fai atu ai ‘iā te oe...’.

Faitauga - Tusi Paia: Sapakuka 2:1-3

Upu Folafola

Afai ua maua le fuafuaga autu mo lou olaga I lenei Tausaga mai le Atua, o le isi laasaga sosoo o le tusi lelei I lalo (Sapakuka 2:2). O le tele o taimi, ua le ausia a tatau fuafuaga faataatitia ona e lei tusia lelei I lalo. O le fautuaga a le Atua I lou galue atu e ausia se fuafuaga  autu faataatia mo lenei tausaga, ia muamua lava ona tusia lelei I lalo. Ua e maua se faatonuga poo se faaaliga mai le Alii? Tusi loa I lalo. O lou faia o lea tulaga, ua amata ona e faatinoina ia oo na tupu, ua e aumai lea faaaliga mai le itu I le agaga ina ia tino mai I le la le tino nei. O le tusia I lalo, o le laasaga muamua lea I lona ausia. E le gata e tusi manino I lalo, ae tusi foi I lalo ma galuega e tatau ona faia ina tino mai ma ausia. 

O leisi laasaga e sosoo atu ai, ‘o le tusi manino I papa ma’a’. o le tusi manino ma faigofie, e mafai ona vaevaeina I ni galuega laiti e fia ausia, ma afai e te ausia nei galuega laiti faasolosolo, ua e lata atu foi I le ausia o le fuafuaga faataatitia mo le Tausaga. Ia e manatua, o le faapea mai le Sapakuka 2:2 o papa maa. O lona uiga e tatau ona tusia I soo se mea e tau atu iai lau vaai ina ia e vaai iai I taimi uma. Afai e te faia, o I latou ua saunia faatasi ma o’e ina ia ausia, o le a amata loa ona tamomoe ai. 

O lenei, e le gata ia manino le visiona ma auala e faatino ai, e tatau foi ona e mataitu lelei vaega uma e le tatau ona faia ina ia mautinoa e ausia le visiona poo le fuafuaga autu. Fai mai le Mataio 9:17

“E lē utufia fo‘i le uaina fou i fagu pa‘u tuai; a fa‘apea, ‘ona pāpā ai lea o fagu pa‘u, ‘ona masa‘a lea o le uaina, e māumau fo‘i fagu pa‘u; ‘ae utufia le uaina fou i fagu pa‘u fou, ‘ona fa‘atau saogalemū ai lea.”

E le mafai ona e ausia ni mea fou ae tumau pea au amioga tuai. E iai ni au uo sa taofiofia lou alualu I luma I le Tausaga talu ai, e tatau ona e alu ese mai I latou I lenei Tausaga. Sailiili po’o a au mea sa masani ona faia I taeao uma I le Tausaga talu ai, na fesoasoani ea I le ausia o galuega sa tatau ona faataunuuina I lena aso? A leai, e tatau ona suia. E faapei lau mafutaga ma le Atua I le tausaga talu ai? Afai e le vavalalata pe tele foi ina luluina, e tatau ona e faia se fuafuaga ina ia e latalata I le Atua I lenei Tausaga, pe latalata atili foi ia te ia. Ia e manatua, a lē atinae e le Atua le fale, e galulue fua I latou o ē atina’e (Salamo 127:1).