OPEN HEAVENS READING
MATALA LE LAGI MO LE ASO TOFI 5 ME 2022

Manatu Autu: O le Malosiaga o le Toalua poo le Toatolu (The Strength of Two or Three)

Tauloto – Tusi Paia: Mataio 18:19‘Ou te fai atu fo‘i ‘iā te ‘outou: ‘Āfai e loto gatasi se to‘alua o ‘outou o i le lalolagi, i se mea la te ole atu ai, e faia lea mo i lā‘ua e lo‘u Tamā o i le lagi.

 Faitauga - Tusi Paia: Failauga 4:9-12

Upu Folafola
E iai le malosiaga I le tele o le fuainumera. E tusa ai ma tapulaa a le Atua o loo ta’ua I le faitauga o le Tusi Paia o le aso, o tagata e toalua e sili atu I le tagata e toatasi. O loo tatou iloa foi lea tulaga I le tauloto mai le Tusi Paia o le aso, o loo fetalai mai ai Iesu iai tatou o e mulimuli ia te ia, so’o se taimi e o mai faatasi ai ni tagata se toalua I le loto gatasi e ole atu I le Atua I so’o se mea, e na te faia lava (Mataio 18:19). O lo’o faaalia mai ai o loo finagalo lo tatou Alii ia tatou loto gatasi aua ua ia faamautinoa mai, so’o se mea tatou te ole atu ai ia te ia I le loto gatasi, e na te faia lava. 

E tatou te manaomia ni tagata tatou te fai paaga ina ia manuia le tamoega a le au kerisiano. Na aumaia e le Atua se tagata e paga ma Mose, o Arona lona uso ( Esoto 4:10-17). O Uro, o se tasi o ositaulaga na galue I lalo o Mose ma sa fesoasoani ia te ia I le tatalo mo le manumalo o Isaraelu I le taua ma Amaleka (Esoto 17:8-13). O nisi kerisiano e le o iloa ma malamalama I lo latou fesoasoani I le agaga e maua mai I  isi uso kerisiano. I taimi o faigata ma luitau, e tatou te manaomia ni fesoasoani e pei o Tavita na tau ma tagata na tutupu mai I sauai. O le Apisai, le fesoasoani a Tavita na fasiotia le sauai na semanu na te fasiotia Tavita. E leai seisi e iloa le tulaga o Apisai I totonu o le autau, ae o ia na laveai ia Tavita I le aso o le taua (2 Samuelu 21:15-17). 

I le faitauga o le Tusi Paia o le aso, o lo’o faamatala manino e le Tusi Paia le aoga ma faamanuiaga o le malosi o le toatele o tagata. O le tulaga lea ou te ave ai pea le faamamafa I le toatele o le tupu o tagata lotu. O faamanuiaga ma le malosiaga e maua I le toatele o tagata e tatau pea ona matua faataua. O se galuega, e faigofie ona faataunuuina e ni tagata se 200 nai lo le 20. O loo atagia ai foi le lelei o le faaipoipo. E tele faamanuiaga e maua I totonu o le faaipoipoga ma o le tulaga lea e faapea mai ai le Tusi Paia e sili atu le toalua I lo le toatasi (Failauga 4:9).

O se tasi o faamanuiaga i le o mai faatasi o kerisiano, o se avanoa taua e mafai ai ona iai I le mamalu o le nofoalii o le Atua. Na folafola e Iesu Keriso I le Mataio 18:20, o so’o se mea e iai le toalua poo le toatolu I lona suafa, e iai faatasi ma I latou. Le au pele e, ia tatou galulue ina ia tatou lagolago le mafuta faatasi o kerisiano ma fesoasoani le tasi I le isi, e matua aoga tele pe a toatele. 

OPEN HEAVENS READING
MATALA LE LAGI MO LE ASO LULU 4 ME 2022

Manatu Autu: Ala e Fai ai le Anapogi (How to Fast)

Tauloto – Tusi Paia: Isaia 58:3“Se a le mea ‘ua matou anapopogi ai, a ‘e te lē silasila mai? se a le mea ‘ua fa‘atigāina ai i matou e i matou, a ‘e te lē silafia?” Fa‘auta, o le aso e anapopogi ai ‘outou, ‘ua ‘outou maua ai le fiafia ma ‘outou fa‘atauānauina a ‘outou ‘au‘auna ‘ia faia a ‘outou galuega uma.

 Faitauga - Tusi Paia: Isaia 58:1-12

 Upu Folafola
O le mea muamua e tatau ona e iloa ae e te lei amata I se anapogi, o le a taumafai le tiapolo e taofia oe. Ua ia iloa, o le taimi lava e te anapogi ai, o le a e malosi ma o le a le mafai ona ia pule ia te oe. O le tulaga lea e na te faaaogaina ai so’o se metotia o loo ia te ia e taofia ai oe, o le mea lea, ia e sauni ina ia mautinoa, e toilalo le tiapolo. I aso e te le anapogi ai, e iai lava taimi e galo ai ia te oe ona e ai pe e te le fia ai foi seia oo I le afiafi, peitai o le taimi lava e te filifili ai e te anapogi, e mautinoa e te ala mai ua e fiaai, aua e te amanaia le fiaai ae ia e mausali I lau faaiuga e anapogi. 
 
 O le isi mailei a le fili o le faasasala atu lea o manogi o meaai o loo latalata atu ia te oe. O le a amata ona e maitauina le lapoa o le fasi moa I luga o le ipu meaai a nisi o tagata o le ofisa pe ete faalogo atu foi o talanoa I meaai o loo maua I le faleaiga o loo lata atu I le ofisa. Ia e iloa lelei, o mailei uma na a le tiapolo e taofia ai oe mai le anapogi, ma o lea, e tatau ona e tetee iai I lou mafaufau. Aua nei e te tuua iai se avanoa. Alu ese mai le mea o loo aai ai tagata poo talanoa I meaai, afai e leai, ia e faatopetope ona faatumu lou mafaufau I le upu a le Atua. 

 E toatele tagata fesili mai ia te a’u I le tele o taimi: ‘E faapefea ona e anapogi mo le 40 ao ma le 40 po pe sili atu foi?’ O le tali e faigofie, afai e faia sa’u faaiuga o le a ou anapogi, ou te tusi I luga o le kalena ma faitau aso o le a ou anapogi ai. A maea, ona ou fai lea I lou manava (tulou): ‘E amata mai I le aso lea seia oo I le a lava le aso, e leai se meaai e toe avatu ia te oe’. O le taimi ou te lagona ai le fiaai, ou te iloa lelei lava o le tiapolo o loo taumafai ina ia faauma lou la’u anapogi, ma o lea ou te faaaogaina ai lea faailoga e tatalo ai. So’o se taimi ou te lagona ai le fiaai, ua ou iloa ua o’o I le taimi o le tatalo, ma e lei leva ona faia tatalo ae amata ona alu ese le fiaai. O le mea mulimuli, I le taimi o le anapogi, ia faaitiitia lou talanoa I isi tagata ae talanoa I le Atua. I le taimi o le anapogi, a tele le taimi e te tautala ai I isi tagata, ua faaitiitia lou malosi, ae a tele le taimi e te tautala ai I le Atua, e faatupuina lou malosi. Ia faaitiitia galuega e faaaogaina ai le malosi o lou tino a’o e taumafai e faamalosia I le agaga. O le taimi e masani ona faaaogaina e kukaina ai meaai ma ai, ia faaaogaina e suesue ai le Tusi Paia ma tatalo. O le taimi foi lea e te foai atu ai I tagata o lo’o fia maua se fesoasoani I ou tafatafa ane e pei ona iai I le faitauga o le Tusi Paia o le aso. Ia ma lenei, o le taimi lava e te faalialia vale ai o lo’o e anapogi, ua le toe aoga (Mataio 6:16-18). 

 Ia e filiga e tetee atu I mailei a le tiapolo e taofia ai oe mai le anapogi,  I le suafa o Iesu, Amene.  

OPEN HEAVENS READING
MATALA LE LAGI MO LE ASO LUA 3 ME 2022

 Manatu Autu: Aoga o le Anapogi (Benefits of Fasting)

 Tauloto – Tusi Paia: 1 Korinito 9:25O i latou uma o ē faigofie e fai fa‘atatau i mea uma lava; o i latou fo‘i ‘ua latou fa‘apea ‘ina ‘ia maua le pale palagofie, a o i tatou, ‘ina ‘ia maua le pale e lē pala lava.

 Faitauga - Tusi Paia: 1 Korinito 9:24-27

 Upu Folafola
O le anapogi o se mea e faafaigata ona faia e tagata, ae e tele ona aoga ma faamanuiaga pe a mafai ona e faatoilaloina le laualo. Muamua, o le anapogi o se auala e taofiofia ma e pule ai I lou tino. O le tagata e fai ma ana masani le anapogi, faaopoopo atu iai ma le suesue o le Tusi Paia ma tatalo, o le a ia iloa e faigofie ona ola faapaiaina. Afai e te suesue ia te oe lava ma iloa ai ua amata ona e tau manatu i faatosina a le tuinanau o le tino ma ua foliga e le afaina le agasala ia te oe, fai loa sau anapogi. Ao e anapogi, o le a malosi le agaga e manumalo I le tino ma o le a faaumatia le tuinanau. 

 O le mafuaga e toatele ai tagata ua pauu mai I o latou tulaga faamanuiaina ona ua le toe anapogi. Ua ou faalogo I nisi o faapea mai ua taunuu ma ua maea ona faia e Iesu mea uma I luga o le satauro e aofia ai ma le anapogi. Ae faapefea Paulo, le aposetolo, na ia tusia I le 2 Korinito 11:27 na ia anapogi ma o se masani? O ia foi lea na faapea mai I le 1 Korinitio 9:27 e na te faatoilaloina lona tino. E te manao I lou tino e I lalo pea o le pule a Agaga Paia? E tatau ona e anapogi ma ia fai ma masani. Fai mai le Kalatia 5:16 e pau le auala e te faatoilaloina ai le tuinanau o le tino o le savali I le agaga, ma e mafai ona faia e ala I le anapogi. 

16‘Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino. Kalatia 6:16

 Afai e te anapogi, o le a e pulea lou fia ai, ma o le a pulea lou naunau I le ai, ma e taua tele e fua iai le tulaga o le pule e te maua I lenei lalolagi. I le Kenese 25:29-34, na le mafai ona pulea e Esau lona naunau I le meaai ma ua ia le maua faamanuiaga o le tofi o le ulumatua. Ao naunau Esau e faamalie lona fiaai ma ua ia loto malie e faatau atu lona tofi o le ulumatua mo se meaai, na iloa lelei e Iakopo ma o lea aso, na filifili Iakopo e anapogi ae ave lana meaai ma Esau, na ia faaopoopo atu iai ma le areto. Afai e te le mafai ona puleaina lou naunau I le meaai, o lo’o e ofoina atu le malosiaga e te maua ai le pule, e faatau atu mo le meaai. 

 E toetele tagata ua latou lē maua le atoaga o manuia ua faataatia e le Atua mo latou olaga ona ua le mafai ona anapogi. Ia e faia se filifiliga I le aso e faatoilalo I lou tino e ala I le anapogi, ia faia ma masani ona e ola lea e manumalo I le Agaga Paia. 

 Tatalo
Tama, faamolemole ia e aumai ia te a’u le alofa tunoa e anapogi ai ma ia faia ma masani, I le suafa o Iesu, Amene.  

OPEN HEAVENS READING
MATALA LE LAGI MO LE ASO GAFUA 2 ME 2022

 Manatu Autu: Taofi le Tuinanau (Stop Lusting)

 Tauloto – Tusi Paia: Iopu 31:1 ‘Ua ‘ou osia le feagaiga ma o‘u mata, se a fo‘i le mea ‘ou te manatu ai i se taupou?

 Faitauga - Tusi Paia: Mataio 5:27-30

 Upu Folafola
E toatele kerisiano o loo faapea e le o mulilua aua latou te lē o faatinoina. Peitai ane, e latou te le o iloa o so’o se taimi e tilotilo ai ma tuinanau e faia le mulilua ma se tagata I ona mafaufauga, ua faia lava le mulilua. 

 O loo faamatala e lo tatou Alii o Iesu Keriso lea vaega I le Mataio 5:28 e faapea 28‘Ae ‘ou te fai atu ‘iā te ‘outou, ‘ai sē va‘ai atu i le fafine ‘ina ‘ia mana‘o i ai, ‘ua uma ‘ona mulilua ma ia i lona loto.

 So’o se mea e vaai iai ou mata ma e faataga lou mafaufau e manatunatu iai e mafai ona faaleagaina ai lou tino atoa. Fai mai le Mataio 6:22 o mata o sulu ia o le tino ma afai e amioleaga mata, o lou tino atoa o le a faatumulia I le pogisa. O lo’o faamaonia atili lenei mea moni I le Tusi Paia, o so’o se tagata e taulai le vaai I seisi tagata ma le tuinanau e mulilua I lona loto, e faatumulia le na tagata I le pogisa tusa pe na te lei faatinoina. Le au pele e, aua e te faatagaina ou mata e aumaia le pogisa I lou tino atoa. O lou tino o le malumalu o le Atua. E tatau ona tumu I le malamalama I taimi uma. 

 Fai mai le 1 Korinito 6:20 e faapea: 20Auā ‘ua fa‘atauina ‘outou i le tau; o lenei, ‘ia ‘outou vivi‘i atu i le Atua i o ‘outou tino ma o ‘outou agaga, o mea a le Atua ia.

 E tele auala e mafai ai e mata ona faaleagaina le tino atoa. O a ituaiga ata ma polokalame o le televise e te fiafia e matamata ai? O a ituaiga polokalame ma ata e te matamata ai I luga o lau telefoni, komepiuta ma isi masini? E te fai ma tepa I ata o tagata le lavalavā o lo’o faatino le tuinanau o le tino? Taofia loa ina ia aua nei faatumulia lou tino I le pogisa. 

 E iai se alagaupu I le matou nuu e faapea: ‘afai e lē ono aina, aua nei latalata mai I lo’u isu’. Afai o loo e iloa lelei e le taitai e faia le mulilua, aisea e te faalatalata atu ai I na mea e faaosoosoina oe e faia le agasala? Aisea e te fiafia ai I mea e ono taitaia oe e faia le tuinanau o le tino?

 Ia matua aveesea ma oe soo se mea e te ono faia ai le tuinanau o le tino. Ia e faatoilaloina lou tino ina ia taofia le tuinanau o le tino ina ia faamamaina pea. 

 Ia taofia le tuinanau o le tino. 

OPEN HEAVENS READING
MATALA LE LAGI MO LE ASO SA 1 ME 2022

Manatu Autu: O a au mea tausami? (What do you eat?)

Tauloto – Tusi Paia: Mataio 4:4
4‘Ona tali atu ai lea o Iesu, ‘ua fa‘apea atu, “‘Ua tusia, ‘E lē na o mea e ‘ai e ola ai le tagata, a o afioga uma e tulei mai i le fofoga o le Atua.’”

Faitauga - Tusi Paia: Mataio 4:1-4

 Upu Folafola

Sa aoaoina I tatou I aso e lua talu ai, o le tausami e le o se mea e soona ave iai le malosi. O le mea moni, o loo faapea mai le Filipi 3:19 e faapea
19O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi.

Ona tupu mai ai lea o se fesili: o le a au mea tausamai e tatau ona iai? Fai mai le 1 Peteru 2:2 e faapea: 2Fa‘apei o tama meamea fa‘ato‘ā fānau mai, ‘ia naunau ‘outou i le suāsusu fa‘aleagaga e lē suia, ‘ina ‘ia ‘outou tutupu ai i le fa‘aolataga.

 O lou fiaai I afioga a le Atua e le faamalieina, e pei o se pepe e naunau I le suasusu. E tatau ona e matua fiaai I le upu a le Atua e sili atu I le lou fiaai I meaai. E tatau ona avea le upu a le Atua o se vaega e taua I au mea tausami o le aso aua foi o le tagata e na o le tino e aunoa ma le agaga, e tutusa lava ma le tagata ua oti. Fai mai le Ioane 6:63O le agaga lea e tupu ai le ola, e lē aogā le tino i se mea; o ‘upu ‘ou te fai atu ai ‘iā te ‘outou, o le agaga ia, o le ola fo‘i ia.

 O le upu a le Atua o le agaga ia ma le ola. O le meaai moni e tatou te manaomia e maua ai le ola, e tatau ona e ai ai I aso uma. I le taimi o avea a’u ma kerisiano talavou, na fai ma matou masani ma au uo ona matou suesue muamua I le upu a le Atua ae matou te lei aai. O le ala muamua lea I lo’u matua I le itu I faaleagaga. Afai e te avea le upu a le Atua ma au faamuamua e te naunau iai I aso uma, e o’o ia te oe lava o le a e maofa I lou matua I le agaga. E vave ona e iloa ua amata ona e manatu ma mafaufau e pei o Keriso. 

 O le a le itu e sili ai lau tausami? O le upu a le Atua po’o meaai? O lou faanaunautaiga e tatau ona ave I le upu a le Atua I aso uma. E tasi le itu e mautinoa I le upu a le Atua, e le taitai ona uma pe maea. O se vaipuna e puna pea e le matū. E mafai ona e maua se faaaliga mai so’o se fuaiupu o le Tusi Paia I le asō, ona e toe faitauina lea taeao, e mautinoa e a’oa’oina oe e Agaga Paia I seisi mea fou mai le fuaiupu lava lea e tasi. 

 Ia e avea le Upu a le Atua e fai ma au mea tausami I aso uma. Ia e mautinoa e te sailiili ma manatunatu I le Upu a le Atua e le aunoa. 

 Tatalo
Tamā o lau upu e avea ma sulu I ou vae ma le malamala I ou ala, i le suafa mamana o Iesu Keriso, Amene.

OPEN HEAVENS READING
MATALA LE LAGI MO LE ASO TOONAI 30 APERILA 2022

 Manatu Autu: E faafia na e tausami? (How often do you eat?)

 Tauloto – Tusi Paia: Failauga 10:16
16Le nu‘u e, ‘oi talofa ‘iā te oe pe a se tama lou tupu, e ala ‘a‘ai ma fa‘afiafia fo‘i ou ali‘i i le aso ‘atoa!

 Faitauga - Tusi Paia: Faataoto 23:1-2

 Upu Folafola
O le tasi uiga masani o tamaiti, e vaai a latou po'o fea ni meaai. A e tu'u se mea I le lima o se pepe o lana gaioiga muamua a e fai o le tu'u I lona gutu. O le meaai o se vaega taua I o latou olaga I aso ta'Itasi. Afai o meaai le tumutumuga o lau fa'amuamua, ma ua avea ma mea muamua e te manatu I ai I aso uma, ua tutusa oe ma se ta'ita'I tamaititi e lē i'u manuia lona nu'u e pei ona tatou faitau I la tatou Tusi Paia tauloto o le asō. O ituaiga tagata faapea, po'o a mea e avatu latou te vaaia e lē malu puipuia.

 Fai mai le tusi o 1 Tupu 17: 2-6 o le Atua lava na fafagaina Elia ma na ia avatu ia te ia mea taumafa ta'I fa'alua I le aso, o le taeao ma le afiafi. O lona uiga o le finagalo o le Atua mo meaai aemaise mo tagata matutua e fa’alua I le aso. Ou te manatua le aso na ou fa'asoa atu ai lenei feau I nisi o faifeau, e toatele I latou e le'I fiafia I la'u mataupu I lea aso auā ua masani I latou e ta'I tolu aiga mamafa o le aso. E lē gata I lea e toatele fo'I  tagata e masani e aai vāiaiga e o'o lava I taimi o le ā momoe. E lē lelei lea masani mo oe aemaise pe afai e I ai ni mea o loo fa'a tāua ia te oe e aofia ai ma lou lumanai. Afai o oe o se tagata matua e fautuaina ua lava le lua o au taumafataga I le aso. O le fautuaga lea mai lou Atua na faia lou tino. 

 O le mea moni o tagata e manatu mamafa I lona lumana'I e lē aai I aso uma. Fai mai le aposetolo o Paulo I le 2 Korinito 11:27 e anapogi so'o.  Leitioa a i'u ia te ia le tausinioga  (2 Timoteo 4:7-8) Ua 80 o'u tausaga ae ou te lē ai I aso uma. O lo'o o'u anapogi so'o pea auā ou te mana'o e tini la'u galuega ma tau I le taunu'uga a'o o'u maua pea le ola.

 I le 1984 a'o o'u I ai I la'u anapogi 40 aso, ma taoto ma le vāivāi I luga o le fala ou te tatalo ai. Ina ua savali mai se uso I totonu, vaai mai ia te a'u ma faapea mai “o le a lesi mea o e mana'o ai e te soona anapogi ai?” o le 38 tausaga talu ai lea, o le a se mea ua o'u ausia ua fai mai ai se uso aua ou te toe anapogi? Ou te mautinoa o le filifiliga lelei lea sa o'u faia lo'u teena o lea uso. O le a le mea na ua e ausia ma maua I le taimi nei? Ua faamalieina ai oe? Fa’atoa e lē anapogi a pe afai ua leai sesi mea e te tausiniõ ai, se mea e sili atu nai lo'o mea ua ia te oe.

 Tatalo
Tamā faamolemole aua ne'I avea meaai e fai ma faalavelave I lo'u olaga i le suafa mamana o Iesu. Amene.

OPEN HEAVENS READING
MATALA LE LAGI MO LE ASO FARAILE 29 APERILA 2022

Manatu Autu: Aisea e te Tausami ai? (Why Do you Eat?)

Tauloto – Tusi Paia: Failauga 10:17
17Le nu‘u e, ‘amu‘ia oe pe a fai mou tupu le alo o se ali‘i, e ‘a‘ai fo‘i ou ali‘i i le itū aso e tatau ai, ‘ia malolosi ai, ‘ae lē ‘ina ‘ia ‘onā ai.

Faitauga - Tusi Paia: Failauga 10:16-17

 Upu Folafola
O loo tusia I le Tusi Paia, o le mafuaaga tonu o le ai poo le tausami, ia maua ai se faasiliga malosi, ae le o le faamalieina o le tino e pei o le masani o le toatele. O le meaai e maua ai le malosi, peitai ane e mafai foi ona avea ma vaivaiga o se tagata I le tino ma le agaga. A e vaai I tagata e tino lapopoa, ua mafua lea tulaga aua e tausami I so’o se meaai i so’o se taimi e manao ai, a e maitauina lelei, e vaivai lava I latou. Mo se faataitaiga, e te vaaia le matua sela ae na o sina gaoioiga lava e faia. O le ituaiga tagata lenei ua matua faamalie le manao I meaai, ua o’o ina maua ai I latou I le tino vaivai. O lea la, afai ua e lagonaina ua e faatutū gatā ma ua faigata ona e tulai I luga, toe Iloilo le mea tausami. 

 O I latou e aai mo le faasiliga malosi e le faapea e aai I so’o se mea, e latou te aai I meaai e faamalosi ai o latou tino. O  fualaau aina ma fualaau faisua e maua ai le malosi I le tino, ia faatele lau tausami I vaega ia. Ia faaitiitia le aia o meaai e maualuga ai le suka aua e vave ona o’o mai ai le vaivai o le tino. E fai mai nisi e fiafia tele I mea suamalie ma aai lava I meaai e tele ai le suka. Ia aua lava nei avea lau ai masani e te ono taoto ai I le falemai ona o ni ma’i. A e fesili I so’o se fomai, e latou te ta’ua atu ia te oe, o le suka e vaivai ai le malosiaga I le tino e tetee atu ai I ma’I, ma faataga ai le tele o siama ma vairasi e faatupulaia I totonu o le tino. 

 Afai e te ai mo le faasiliga malosi, o lona uiga na o meaai lava e faatupu ai le malosi. E te le soona ai e te ono vaivai ai I le aso e sosoo ai. E iai nisi e matua aai lava seiloga e matua ova le maona, e matautia lea tulaga mo le soifua maloloina lelei. E tatau lava ona fua lau ai I le maua o le malosi e manaomia. Afai ua e faalogoina ua oo I le 80% lou maona, ua tatau loa ona lava. Afai e te matua faatumu lou tino I le meaai, ua faoa uma lona malosi e galueaina ai nei meaai, ma ua leai ma seisi malosi o totoe na o le vaivai. 

 O so’o se tagata e le o ai ia maua le malosi, e o’o foi ina vaivai I le itu I le agaga. E faapefea ona umi ona e tatalo pe afai ua tumu lou laualo I meaai mamafa? E faapefea ona umi ona e tatalo pe afai e vaivai lava lou tino ona o meaai o lo’o e ai ai? Mo lou lelei, e tatau ona e ai fuafua meaai ina ia maua lou malosi I le tino faapea ma le agaga. 

 Toe Iloilo lelei meaai o loo e masani ai, aveese uma meaai faatupu ma’I ae suia I meaai paleni e maua ai le soifua maloloina lelei.  

OPEN HEAVENS READING
MATALA LE LAGI MO LE ASO TOFI 28 APERILA 2022

Manatu Autu: Tatalo mo Lou Nuu (Prayers for Your Community)

Tauloto – Tusi Paia: Salamo 133:1
1Fa‘auta, o le mea e matuā lelei ma le matagofie lava, pe a nonofo fa‘atasi lava o uso.

 Faitauga - Tusi Paia: 1 Nofoaiga Tupu 7:8

 TATALO MO LOU NUU

1.       Faafetai le Alii e, mo lo'u nuu. Faafetai, ona o a’u o se tagata suli moni o lenei nuu, faafetai lava mo oʻu tuaoi uma.
2.       Lo‘u Tamā e, fa‘apei ‘ona e talia Ierusalema, ma e ta‘ua o le ‘a‘ai a le Atua. Avea ia loʻu nuu ma ona tagata e fai ma ou tagata, i le suafa o Iesu. A o e taofia le mala mai le ulu atu i Ierusalema i le 2 Samuelu 24:16; ia leai se mala po o se faafitauli leaga e tupu i so’o se vaega o lenei lalolagi atoa e latalata i loʻu nuu, i le suafa o Iesu.

 3.       Tama e, ou te tatalo mo tamaiti uma o loʻu nuu, ia o latou tutupu aʻe ma iloa ma alolofa ia te oe, i le suafa o Iesu.

 4.       Tama e, ia avea lenei nuu ma faamanuiaga i so’o se nuu o loʻu atunuu, i le suafa o Iesu. Ia avea tagata uma e tutupu mai lenei nuu, o ni tagata ua faamanuiaina, ma faaoloaina ma ia mitamita ai lo’u nuu faapea ma loʻu atunuu, i le suafa o Iesu.

 5.       Tama e, ou te tautala ia aua nei I ai ni feeseeseaiga I totonu o lou nuu ma nuu tuaoi, i le suafa o Iesu. O le a leai foi ni vevesi po o ni fevesiaiga e aafia ai lo’u nuu, i le suafa o Iesu.

 6.       Tama e, faamolemole ia faasaoina lo’u nuu mai faiga faaalatua uma i le lalolagi. Faamolemole aua neʻi avea lenei faʻalapotopotoga e mapuna mai ai ni ituaiga o faiga faaalatua ma le piʻopiʻo, i le suafa o Iesu.

 7.       Tama e, ia faateleina lo matou alolofa ma le lotogatasi i totonu o lo matou nuu. Ia matou ola faatasi uma ma le filemu ma le lotogatasi, i le suafa o Iesu.

 8.       Le Tama e, faamolemole puipuia loʻu nuu ma o matou tuaoi mai mala faalenatura, i le suafa o Iesu.

 9.       Le Tamā e, ia e faamanuiaina ta‘ita‘i uma o lenei nu‘u, foa‘i atu I a’I latou le atamai e tautuaina ai lenei nu‘u, i le suafa o Iesu.

 10.   Tama e, faamolemole fa'aaoga a'u e fa'afouina ai agaga o e o loo aumau I si matou nu'u. Faʻaaoga aʻu e liliuina ai agaga o oʻu tuaoi uma mo lau Afio, ma ia faʻavaeina oe o le Alii o loʻu nuu, i le suafa o Iesu.

 11.   Tama e, faamolemole, asiasi maia i aiga uma i lo'u nuu o lo’o feagai ma faigata. Le Alii e, asiasi ia i latou ma faatoafilemu maseiga I totonu o latou aiga, i le suafa o Iesu. Faamolemole fesoasoani mai I ai matou uma, ma ia aveesea uma o matou faafitauli, i le suafa o Iesu.

 12.   Lo matou Tama I le lagi, ia e faamanuia I tagata ma aiga uma o si ou nuu. Ia faalauteleina ma faatupulaia le tamaoaiga e tua iai ina ia viia ai pea lau afio ma ia iloa uma e tagata, o lo’u nuu e auauna ia te oe, le Atua le Tama, le Alo ma le Agaga Paia, I le suafa pele o Iesu e tatalo atu, Amene.  

OPEN HEAVENS READING
MATALA LE LAGI MO LE ASO LULU 27 APERILA 2022

Manatu Autu: O lo’o Ola ma Malosi (Quick and Powerful)

Tauloto – Tusi Paia: Eperu 4:12
12Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto.

Faitauga - Tusi Paia: Luka 5:17

Upu Folafola
O loo tusia I le Eperu 4:12 o le Upu a le Atua o lo’o ola ma matua galue, e sili atu ona ma’ai I lo se pelu e faatau ma’ai ona itu. Fai mai e na te vavae’eseina o a’ano ma ivi. O loo atagia ai e mafai e le Upu a le Atua ona faia se taotoga e o’o I fomai tipitipi maoa’e, e latou te le mafaufau e taumafai e faia. E iai seisi se tama matua na sau ia te a’u I ni tausaga ua leva ma faapea mai pe mafai ona ou tatalo ia manuia lona taotoga o le a faia ina ia faamalolo ai o ia mai le ma’I o le kanesa. Sa ou fai atu: ‘E a pe a ta tatalo ia e malolo ona aua lea ona o’o sou taotoga?’ Na ata ma fai mai ia te a’u ‘O oe o se tagata talavou, e te le malamalama. Na o lou tatalo lava ia taitaiia e le Atua lima o fomai tipitipi’. Ua ou faapea atu ‘Lau afioga, ou te le tatalo faapena. Ae o le ou tatalo I lo’u Tama I le lagi e na te faamalolo ia te oe’. Na faapea mai e pule lava a’u I le ituaiga tatalo ou te tatalo ai, ae e mautinoa e alu I lona taotoga. I le aso o le taotoga, o faata ma sailiiliga mulimuli a fomai ae lei faia le taotoga, na iloa ai, e leai se taotoga e manaomia aua ua leai se ma’I, ua malolo. Fai mai le Salamo 107:20 
20‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia. 

 O le Upu a le Atua o lo’o ola ma galue malosi e faamalolo ia te o’e ma so’o se tasi o lou aiga mai so’o se ma’i.  I le Luka 7:6-7, na iloa e le taitai o le toaselau, afai e avatu se fetalaiga ma se Upu mai ia Iesu, ona malolo lea o lana auauna. Na auina atu e Iesu lana upu ona malolo ai lea o le auauna. Ua aoaoina I tatou mai lenei taitai o le toaselau le auala e mafai ai ona tatou maua se Upu mai le Atua. Muamua, na ia iloa le Upu o Iesu, ona ia alu atu lea ia te ia I le faatuatua. E te silafia Iesu Keriso, le Upu a le Atua? O le a le umi e te suesue ai I le Tusi Paia? E faapei le tele o vaega o le Tusi Paia e te taulotoina? E faapefea ona e manatu e galue le Upu mo o’e pe afai e te le silafia? Saili ia e iloa le Upu a le Atua e ala I le faitau ma suesue le Tusi Paia, ia fai ma masani. 

 Na matua faamoemoe le taitai o le toaselau I le Upu ma le faatuatua ma na faapea mai Iesu, e na te leiloa muamua se ituaiga faatuatua faapea I totonu o Isaraelu. A faapea mai le Upu I le 1 Peteru 2:24 ua e malolo, e te talitonu iai? A faapea mai le Upu I le Teuterenome 7:15 e leai ma se ma’I o le au Aikipito (tagata le faatuatua) e o’o mai ia te o’e, e te talitonu iai? Afai e te talitonu I le Upu a le Atua, e tatau ona o faatasi mea e te faia ma lou faatuatua (Iakopo 2:17). Po’o le a lava se luitai o loo e feagai ma oe I le aso, ou te folafola atu, e te manumalo I le suafa o Iesu.

 Saili ma suesue I le upu a le Atua, faatuatua iai, ona galue lea mo oe, I le suafa o Iesu, Amene!

OPEN HEAVENS READING
MATALA LE LAGI MO LE ASO LUA 26 APERILA 2022

Manatu Autu: Ia Mulimuli Latalata ia Iesu 3 (Follow Jesus Closely 3)

Tauloto – Tusi Paia: Faataoto 1:10
10 Lo‘u atali‘i e, ‘āfai e fa‘a‘ole‘ole ‘iā te oe tagata agasala, ‘aua ne‘i e usiusita‘i i ai;

Faitauga - Tusi Paia: Faataoto 1:10-19

Upu Folafola
O le a tatou suesue pea e faaauau mai ananafi I le mafuaaga na faafiti ai e Peteru Iesu, o le a tatou Iloilo le mafuaaga tonu na ia filifili ai e nofo I le faapotopotoga o I latou na faasauā ia Iesu. Fai mai le Mareko 14:54 e faapea 54‘Ua mulimuli mamao mai fo‘i Peteru ‘iā te ia, ‘ua o‘o lava i le maota o le ositaulaga sili; ‘ua nofo ai i lalo fa‘atasi ma ‘au‘auna ma fa‘amafanafana i le afi. 

Sa nonofo faatasi Peteru ma nei tagata aua sa ia faamafanafana I le latou afi. O le tele o taimi, o le mafuaga tonu lava e nonofo ai kerisiano I le faapotopotoga a e ua oti, ma iu ai ina latou faafiti ia Iesu, o le mafanafana e maua mai ai. O le mafuaaga e le mafai ai e nisi kerisiano ona taofia le fai pisinisi faatasi ma latou paaga e i’u ai ina latou faafiti ia Iesu, aua foi latou te lē mananao e lē toe maua nisi o faamanauiaga e maua mai I nei faiga faapaaga. Na fetalai Iesu I le Mataio 16:24 ‘Ai sē tasi e fia mulimuli mai ‘iā te a‘u, ‘ia fa‘afiti o ia ‘iā te ia ma ‘ave lona satauro, i le mulimuli mai ai ‘iā te a‘u’.

O le tagata e le mafai ona ia faafitia Iesu e tatau muamua ona ia faafiti ia te ia lava. A le mafai ona e faafiti I nisi o faamanuiaga e te maua pe a tou mafuta ma tagata e le faatuatua, e o’o atu lava ina e faafitia Iesu e pei o Peteru. E leai seisi faamanuiaga e pito sili ona taua I lo le galuega togiola I luga o le satauro na saunia e Iesu Keriso mo o’e ma a’u, o lea la, e le tatau ona e ave le faamuamua I na faamanuiaga.  Ia e manatua, na fetalai Iesu I le Mataio 10:33 ‘Ai sē fa‘afiti fo‘i ‘iā te a‘u i luma o tagata, ‘ou te fa‘afitia fo‘i o ia i luma o lo‘u Tamā o i le lagi.

Afai e te faamuamua inā faamanuiaga nai lo Iesu Keriso, e na te faafiti ia te oe I luma o lona Tamā I le aso mulimuli, ma o tagata na o loo e taumafai e faamalie ma faafiafia, e latou te le iai I lea taimi e laveai oe mai le tiga ma le puapuaga o seoli. 

 E leai se faamanuiaga e sili atu ona taua e te ono faafiti ai ia Iesu, lou Alii ma lou Faaola