Samoan Devotional

OPEN HEAVENS
MATALA LE LAGI MO LE ASO LUA 31 IANUARI 2023

Manatu Autu:  E te silafia Iesu? (Do you know Jesus?)

Tauloto – Tusi Paia: Iopu 13:15‘E ui lava ‘ina fasioti o ia ‘iā te a‘u, ‘ou te fa‘amoemoe pea ‘iā te ia; ‘ae peita‘i ‘ou te fa‘atonu atu o‘u ala i ona luma’.

Faitauga - Tusi Paia: Luka 7:2-10

Upu Folafola
O le loloto o lou iloa ma le silafia o Iesu e fua iai mea uma e te maua mai ia te ia. I le Mataio 8:1-3, o loo faapea mai le Tusi Paia na sau le lepela (o se gasegase I aso anamua e leai se fofo) ia Iesu ma faapea mai: ‘Ou te iloa e mafai ona e faamama ia te a’u’. E lei faapea mai ‘ou te talitonu’ ae na ia faapea mai ‘ou te iloa’. Na ia iloa e mafai e Iesu ona faamalolo ia te ia e aunoa ma se masalosalo ona ia maua lea o lana vavega. I le Mareko 5:25-34, o le fafine puna toto na ia faapea mai ‘ou te iloa le tagata lenei, ua lava ma totoe le faauuga I ona laei e mafai ona maua ai le fofo o lou faafitauli’. I le Luka 7:2-10, e iloa foi na faapea mai le taitai o le toaselau ‘ou te iloa lelei a e faatonuina le ma’I, e usitai ia te oe’. Afai e te silafia lelei le tagata o loo e talanoa iai I taimi o tatalo, e mafai ona e maua so’o se mea e te manao ai. 

Ina ua maea I le manuia se tasi o matou polokalame tele sa faia, sa ou lagona le vaivai ma le lelava ona ou fai lea I lo’u toalua ma le fanau o le a ou alu ou te moe ae aua nei fafaguina a’u pe faalavelave mai foi seisi. E lei leva se taimi ae sau se fafine e nofo I le itu matu o le atunuu ma fesili I la’u fanau poo ‘ou I le fale. E le mafai ona pepelo lau fanau o lea na fai iai ‘ioe’. Ua fai mai e fia vaai ia te a’u. Na fai iai lau fanau o la ou te moe ma e le sau I fafo o le potu I lenei aso atoa. Na fai mai le fafine lea o le a nofo e faatali le taimi ou te sau ai I fafo. Na nofo ai lava iina I le nofoaga e tasi, ua avatu iai ni meaai ae sa nofo pea I le faitotoa e lei toe alu ese. 

Ua alu le aso, ua sau loa lo’u toalua fafagu a’u ae na ou faamanatu iai lau faatonuga e aua nei faalavelave mai seisi. Na iu lava ina ou tu I luga ma alu atu e fai le mataupu a le fafine lea. Na fai mai le fafine e tau lava o le pa’I o lou lima I lona ulu ona liliuina lea o lona tulaga faaletonu mo le lelei ma e tumau pea. Na ia iloa ona ia maua lea o lana vavega I lea aso. 

Afai e te alu atu I le Atua ma tatalo I le suafa o Iesu, e te iloa moni ea pe faafofoga mai le Atua? E te iloa ma silafia ea o le Atua o lo’o mafai ona faafofoga ia te oe, e iai lona malosiaga e faia so’o se mea e te ole atu ai ia te ia? E te iloa ea o loo ia fia faia ni fofo o ou faafitauli uma? Afai e te iloa, ia faamalo, aua foi ua le toe iai ni ou faafitauli. 

Ia e saili I le Atua I le tatalo, ma lou iloa ma le mautinoa e na te faafofoga ia te oe ma e mafai ona ia fofoina ou faafitauli. Alu atu loa ma e ole atu ia te ia mo so’o se mea o lo’o e manao ai, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 30 IANUARI 2023

Manatu Autu:  Mataala I le finagalo faatagaina e le Atua (Beware of God’s Permissive Will)

Tauloto – Tusi Paia: Esekielu 14:3‘Le atali‘i e o le tagata, ‘ua fa‘atūina e ia tagata o a latou tupua i o latou loto ma ‘ua tu‘uina i o latou luma la latou agasala e tausuai ai; latou te fesili mai ‘ea ‘iā te a‘u?..

Faitauga - Tusi Paia: Numera 22:12-22

Upu Folafola
O le tele o taimi e iai a tatou fuafuaga, ona tuuina atu lea i le Atua ae faapea mai le Atua, ‘E leai’,. Ona tatou faapea lea, ou te iloa liliu le aao o le Tama. Ona amata lea ona tatou tatalo, anapogi ma saili I ona fofoga ona o’o atu lea I le tulaga ua tatou faapea atu ‘Le Alii e, e faapefea la lau faufuaga?’ Ona faapea lea o ia ; ‘Alu loa e fai’. E tatau ona aua nei e alu i se mea. I o tatou tulaga o fanau a le Atua, o la tatou matafaioi le usitai vave ia te ia ma faia I le atoatoa I taimi uma.

I le tatou faitauga o le Tusi Paia o le aso, na faatonu e le tupu le perofeta o Palaamo e fetuu ia Isaraelu. Ne fesili Palaamo I le Atua ae faapea mai le Atua e leai. Ona auina atu lea e le tupu ni tagata e ta’u ia Palaamo o le a ia siitia ma faamauoloa o ia pe afai na te fetuu ia Isaraelu. Na toe fesili lea o Palaamo I le Atua ona faapea mai lea o le Atua: ‘Ua lelei, afai e te manao e fai, ia faia loa’.  Ao agai atu o ia, na auina mai e le Atua se agelu e taofi ia te ia I le ala. Na iloa atu le agelu e lana asini ao le perofeta, ua tauaso ona o le matapeapea ua le mafai ona ia iloa atu se mea o loo iloa e le asini. Afai e iai se mea ua matua e naunau iai ua e manatu e liliuina le aao o le Atua, o le a faatauasoina oe ma e o’o ina e oo atu i se tulaga matuia ma le faaletonu ona ua le mafai ona e iloa atu ma le mafaufau matala. Afai e suesue atili le talafaasolopito o Palaamo, e te silafia ai na iu lona olaga I le maliu I le pelu.

O se tasi o vaega e masani ona saili ai tagata ia maua le finagalo faatagaina o le Atua, o le faaipoipoga ma e toatele ua salamo ai mulimuli ane. O le mea moni lenei na faataga e le Atua Akara e fanauina se pepe ia Aperaamo a’o Sara ua pa, e le faapea o le finagalo o le Atua o le auala lea e faatino ai lana feagaiga ma Aperaamo (Kenese 17:21). 

E le afaina poo le a le matagofie o foliga o le finagalo faatagaina o le Atua, e sili atu lou saili mo lona finagalo faaalia. Le tuafafine ia Keriso, leiloa pe sili atu le tamaoaiga o le tama talavou lena I lo le tama talavou o loo faasino atu e le Atua e te filifilia, aua nei faaseseina oe I le aso, e silafia e le Atua a taeao ma o loo ia faatonuina oe aua foi e silafia e ia.

Saili I le Atua ina ia faailoa atu ia te oe lona finagalo faaalia aua afai e te liliuina le aao o le Atua ina ia e maua e tusa ma le mea o loo e manao ai, e ono oona lona iuga. 

Aua e te saili I le Atua ina ia faia le mea o loo e fuafuaina, e na te ono faatagaina, ae e te ono salamo ai, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 29 IANUARI 2023

Manatu Autu:  Tatalo mo Faifeau Lauiloa  (Pray for popular pastors)

Tauloto – Tusi Paia: Sakaria 13:7‘Ala mai ia, le pelu e, i lo‘u leoleo mamoe, ma le tagata ma te fa‘atasi ma a‘u,” ‘ua fetalai mai ai le ALI‘I o ‘au. ‘Inā tā ia o le leoleo mamoe, ‘ona fa‘ata‘ape‘apeina ai lea o le ‘au mamoe; ‘ona fa‘afo‘i atu lea o lo‘u lima i ē iti..

 Faitauga - Tusi Paia: 2 Korinito 1:11-14

Upu Folafola
E lauiloa faifeau pe a toatele tagata e mulimuli ia i latou a’o latou mulimuli iā Iesu Keriso. O e ua mulimuli e ta’ua o mamoe a le faifeau. E malamalama lelei le tiapolo I le faavae o loo taua i la tatou upu tauloto o le asō. O faifeau lauiloa nei e lamalama pea e le tiapolo e lē aunoa. E iloa e le tiapolo a mafai ona ia faatoilalo le faifeau ma faaleaga o latou igoa o le a ta’ape ana mamoe ma mafai ai ona ia aina i latou. O le ala lea e tatau ai ona e tatalo mo faifeau ae lē o lou au faatasi ma isi e muimui. A e lē lagolagoina mea latou te faia ma e lē mafai ona e talanoa sa’o ia i latou, talanoa i le Atua (o le ona le galuega) ae lē o lou au faatasi ma le tiapolo e faatoilalo i latou.

I le 2 Samuelu 11:3-4 ina ua auina atu e Tavita ana auauna e aami Patisepa e fai le agasala ma ia, na malie I ai Patisepa aua o Tavita o le tupu. E tele se eseesega i le va o le tupu ma le toalua o Patisepa aua ua na o se fitafita. Atonu e fa’ateia oe i lou iloa o isi fafine e manatu o se tulaga lelei le faitaaga ma Epikopo, ta’ita’i, aposetolo, faifeau ma isi. Ioe o le agasala peitai ua matuā faapogisa e le tiapolo o latou loto ma ua manatu ai o se tulaga taualoa. O le pogai lenā e manaomia ai lou tatalo mo I latou. Aua e te manatu latou te lē manaomia lau tatalo. O le mea moni o le telē o le latou galuega o le tele lenā o lo latou manaomia o tatalo.

E manaomia foi lou tatalo mo faifeau lauiloa aua o le tele o taimi e laasia e i latou nofoaga e lamatia ai lo latou soifua e lauga le talalelei. O nisi o i latou e faimalaga i luga o auala lē saogalemu ma o atu i nuu e i ai tagata amio leaga, e tāla’i le talalelei a Keriso. O nisi fo’i o i latou e manaomia le fesootai atu I tagata maualuga ma mau tofi o le nuu, latou te manaomia le toa fa’aleagaga e tautala ai i le amiotonu e aunoa ma le fefe.

I le toa ma le poto manaomia e liliu ai tagata iloga ma malolosi ia latalata i le Atua, e tele se suiga lelei o le a tula’i mai i la latou ta’ita’iga ma mea uma e auai atu i ai. Talitonu mai, a e tatalo mo i latou o loo e tatalo mo le tino o Keriso i le lalolagi atoa ma o le a faamanuia le Atua iā te oe mo au tatalo ma lou lagolago i le galuega a Keriso o loo latou fai. I le suafa o Iesu Keriso. Amene.

OPEN HEAVENS
MATALA LE LAGI MO LE ASO TOONAI 28 IANUARI 2023

Manatu Autu:  Na o le tasi le measesē  (Just one mistake)

Tauloto – Tusi Paia: 2 Korinito 2:11‘ina ne‘i ‘ole‘olegia i tatou e Satani; auā tatou te lē vālea i ana togafiti’.

Faitauga - Tusi Paia: 2 Samuelu 11:1-27

Upu Folafola
E toatele Kerisiano ua manatu e mafai a ona pauū ma toe tutū pe a manana’o ai. E masani ona ou fai atu o manuia e mafai ona pepē a’o mā’ila’ila e tumau. E mafai ona e faia se agasala ma faamagalo oe e le Atua a’o le taui o lau agasala e ola pea ma oe i aso uma o lou soifua tusa fo’i pe uma lou soifua e ola pea le taui. Na o le tasi le measesē ae mafai ona mafua ai faafitauli ogaoga mo lau fanau e o’o lava ia i latou e le’i fananau mai. I le Kenese 16:2 na fa’aoso e Sarai Aperaamo e momoe ma lana auauna fafine ma e o’o mai i le aso nei o loo mafatia pea le lalolagi I le measesē lenei e tasi.

I le Kenese 25:29-34 e tasi le faaiuga sese na fai e Esau na ia faatau lona tofi o le ulumatua ma e tatou te o’o atu I le Kenese 27:30-40 fai mai le Tusi Paia e ulufale atu Esau ua ulufafo ese atu lona uso ma ave lona manuia. Na fa’atauanau Esau I lona tamā mo se manuia o totoe mo ia, ma na faapea atu Isaako i lona atalii e manuia lavā ia, o lana pelu e ola ai peitai e auauna ia i lona uso. Na mafua lea ona o le measesē e tasi.

I le 2 Samuelu 11 na fai e Tavita se measesē na fanau mai ai le tele o isi sese. O lona sesē na nofonofo I lona fale I le taimi e o atu ai tupu i le taua. Semanū e le vaai Tavita I le fafine aulelei a’o taele ma faaosoosoina ai ia pe ana lē nofonofo i le fale. E tatau ona e fesili “Aisea ua autilo ai Tavita i le fanua o le isi tamaloa?” A e fa’ataga I le tiapolo se inisi na te le avea na o se maila peitai e alu a le tiapolo e lē toe taofia. E le’i umi ae auina atu e Tavita ana auauna e aami le fafine i lona fale. Na to le fafine (tulou) ma ina ia nanā lilo le agasala na taupulepule Tavita e fa’ao’o le oti ia Uria lona toalua. Na auina atu e le Atua se perofeta e ta’u iā Tavita e lē mavae le pelu ai lona aiga. E o’o mai i le aso nei e le o mavae le pelu mai Isaraelu. Na amata i le measesē e tasi o le tafao ae lē faia ona tiute.

O nisi kerisiano ua manatu e lē afaina le momoe ae le tatalo. A’o le’i feala i latou i le isi aso ua tu’u e le tiapolo mailei e fai ma fa’asalāvei I o latou olaga. O le tulaga faanoanoa e manatu le tagata o faigata ona nofo I luga e tatalo o se faigata masani ma fa’aauau ai pea le moe ae le nofo I luga e tatalo I taimi tatau.

Le au pele e, aua e te faatamala i togafiti a le fili o loo fealuai e saili se tasi e aina e ia (1 Peteru 5:8). Pau le avanoa e manaomia e le tiapolo o sina measesē se tasi. Aua ne’i e avea se fa’atagaga I le tiapolo. I le suafa mamana o Iesu Keriso.

Amene

OPEN HEAVENS
MATALA LE LAGI MO LE ASO FARAILE 27 IANUARI 2023

Manatu Autu:  O le tulafono o le seleselega (The law of harvest)

Tauloto – Tusi Paia: Hosea 8:7‘Na latou lūlūina le matagi, o le mea lea latou te selesele mai ai le afā; ‘ua leai sona tino; e le tupu se saito i le fuga, ‘ae ‘āfai e fua, e ‘aina e tagata ‘ese.’

Faitauga - Tusi Paia: Kenese 27:18-23, 

        Kenese 37:26-35

Upu Folafola
O le Tulafono o le seleselega o loo faapea mai e sili atu mea e te selesele I mea e te lulu. O le tulaga lea e tatau ai ona e faaeteete I le ituaiga fatu e te luluina, aua foi a o’o I le taimi o le seleselega, e sili atu lava I lo le fatu na luluina. I le tatou faitauga o le Tusi Paia o le aso, ia tatou iloa ai Iakopo ua ia luluina ni fatu I le faitauga muamua ma le seleselega I le faitauga lona lua. I le faitauga muamua, na ia pelogia lona tama ina ia maua le faamanuiaga ma na pelogia foi o ia e lana fanau, o Iosefa ua oti. Fai mai le Kenese 37:35 ‘Ua tutū i luga ona atali‘i uma ma ona afafine uma e fa‘amafanafana ‘iā te ia; ‘ae lē mafai ‘ona fa‘amafanafanaina o ia, ‘ua fai ane, “Auā ‘ou te alu ifo ma le fa‘anoanoa i le tu‘ugamau i lo‘u atali‘i;” ‘ona tagi lea o lona tamā ‘iā te ia.

O le tele o taimi, o le seleselega o mea na e luluina e oo mai a ua e matua ua le mafai ona toe faia iai se mea. O mea uma o loo e faia I le taimi nei o loo e lulu ma e oo mai le seleselega ia te oe a ua leai se malosi o totoe e pei ona maua I le taimi nei. Ou te faafetai I le Atua ona o se mea na ou lulu ai a’o ou laitiiti aua o lo’o ou matua selesele ai lava. I le 1961, ae na o le 19 o ou tausaga, na ou avatu se tupe I se toeaina mativa lava, o se tuaoi ina ia mafai ona maua ma faatau ni ana fualaau. Na fai mai le tamaloa ia te au e iai se aso, ou te malaga atu ai I fafo I le lalolagi atoa o le faatele e pei o tagata o loo o I le maketi. Na ou ata I lea perofetaga aua o le matou nuu I na aso, a sau se tagata mai se atunuu I fafo, e nonofo uma le matou nuu I le fale e leai seisi e alu I le faatoaga. E o mai le au tulimanu ma faapapa fana ma faia le fiafia a tagata. I le taimi lea, e na o le toalua tagata o le matou nuu na mafai ona o atu I atunuu I fafo ona o aoaoga. Ao lenei ua fai mai lenei tamaloa o le a faatele ona ou malaga. E foliga mai I lea taimi e malie, ae sa ou luluina le fatu. O le asō I le alofa mutimutivale o le Atua, ua faataunuuina lea perofetaga. 

Le au pele e, ia e tagai totoa lelei I soo se avanoa e te maua e lulu ai se fatu lelei. Ae ao foi ona e mataala I au mea e faia ina ia faamautinoaina e te le o luluina ni fatu leaga e te salamo ai pe a oo mai le seleselega. 

Ia e mataala I au fatu e lulu I le taimi nei aua foi e toe foi mai ma e fua iai le telē o lau seleselega, I le suafa o Iesu, Amene.  

OPEN HEAVENS
MATALA LE LAGI MO LE ASO TOFI 26 IANUARI 2023

Manatu Autu:  Mo le aso ua tu’upoina (For an appointed time)

Tauloto – Tusi Paia: Sapakuka 2:3‘Auā o le fa‘aaliga ‘ua tu‘uina mo ona aso ‘ua tu‘upoina, ‘ae tautala mai pe a o‘o i le i‘uga, e le pepelo lava; e ui lava ‘ina tuai mai, a ‘ia fa‘atalitali pea i ai auā e o‘o mai lava, e le fa‘atuai mai.”.’

Faitauga - Tusi Paia: Sapakuka 2:2-4

Upu Folafola
O loo tusia I le Tusi a Faataoto 13:12 ‘O le faamoemoe ua tuai ona taunuu e faanoanoa ai le loto; a o le manao ua taunuu, o le laau o le ola lea’. Atonu sa e faʻamoemoe lava i ni faamanuiaga mo le lumanai, ae e te leʻi mauaina lava, ma ua amata ona lagona le lotovaivai. Le au pele e, ia maua pea le malosi ma fa'aolaola pea ou fa'amoemoega. O lo’o tusia I le tusi a  Sapakukua 2: 3 o so’o se faaaliga,  ua tuuina mo ona aso ua tu’upoina. Ua lata ona o’o mai lou aso ua tu’upoina, I le suafa o Iesu. 

A o faatalitali mo lo tatou aso ua tu’upoina, e toatele tagata latou te faia ni vaega e afaina ai a latou tautinoga. I le Kenese 16:2 na fai atu ai Sara ia Aperaamo, se‘i e alu ane i lana auauna fafine ina ia fanau mai ai se tamaitiiti. Na lafoai e Sara lona faamoemoe ma ua le mautonu. Na salamō o ia, mulimuli ane ina ua oo i lona taimi atofaina, ma ua maua lana tama. I le Kenese 21:10, na fai Sara ia Aperaamo, e tuli ese le fafine pologa ma lana tama. I tua atu o lena, ou te mautinoa a tilotilo ifo Sara mai le lagi i le taimi nei ma vaavaai atu i suli o le fafine pologa o loo osofaia ona suli, ou te mautinoa, e mo’omo’o maimau pe ana faʻatumauina pea lona faʻamoemoe I le Alii.

A o faʻatali mo lou aso tu’upoina, ia mautinoa o loʻo e usitaʻia faatonuga uma a le Atua, tusa lava pe talafeagai pe leai. I le tele o tausaga talu ai, na ofoina mai ia i matou le avanoa e faʻatau ai le 40 eka o se tolauapiga toʻafilemu e taʻua o le "The Youth Camp", mo le N100,000. O se tupe tele lenei seleni i lena vaitaimi. Na ou faapotopotoina o’u tagata ma sa matou tatalo ma sii mai le mau: ‘O mea uma lava e solia o e ‘outou alofivae, ‘ou te foa‘iina atu ai ‘iā te ‘outou, e pei ‘ona ‘ou fai atu ai ‘iā Mose’ Iosua 1:3

Sa to ese o matou seevae ma savavali faataamilo i lena nofoaga o le tolauapiga ma tatalo ma tautino atu, o matou e ona lenei eleele, e faia i le faatuatua. E lei umi ae faalogo le isi aulotu ua avanoa le fanua mo le faatauina, ma na vave ona latou totogiina le tau o le fanua lenei. Na mou lo matou faamoemoe, ae na ou faamalosiau ia te aʻu i le Alii, ia ola pea lo matou faamoemoe. E leʻi umi, ae taʻitaʻiina i matou e le Atua i le nofoaga lea ua iai nei le ‘togālauapi o le Togiola’ (Redemption Camp), e ui ina sa taʻutaʻua i lenā taimi ona o se nofoaga mo tagata faomea ma gata tetele. Sa matou faalagolago i le Alii ma na matou faatauina mai le fasi fanua muamua sosoo atu ma isi fanua, lea ua avea nei ma se aai tele e taua ‘Aai o le Togiola’ (Redemption City). O le Aai o le Togiola, ua faavaeina nei i luga o lenei laueleele e sili mamao atu nai lo le mea sa matou mananao muamua e faatau. Faafetai i le Atua sa ia faaolaolaoina pea le faamoemoe mo le aso ua tuupoina.

Ia e manatua, o lou aso atofaina e o’o mai lava, ‘aua le faavaivai, I le suafa pele o Iesu Keriso, Amene. 

OPEN HEAVENS
MATALA LE LAGI MO LE ASO LULU 25 IANUARI 2023

Manatu Autu:  Afi mumū 5 (Flames of fire 5)

Tauloto – Tusi Paia: Galuega 21:13‘A ‘ua tali mai Paulo, “Tou te fetagisi ma faatiga tele mai lo’u loto I se a? Auā ua ‘ou sauni lava a’u e le gata ina fusifusia, a ‘ia ‘ou oti lava I Ierusalema, ‘ona o le suafa o le Ali’i o Iesu”.’

Faitauga - Tusi Paia: Galuega 21:4-13

Upu Folafola
O le afi e malosi ma taofiofi gata e mafai ona mu atoa ai se nofoaga pe a lē taofiofia. E mumu ma sosolo ma faatamaia soo se mea e tu I lona ala. I le tatou faitauga o le Tusi Paia o le aso, e lei faatagaina e Paulo se mea e tasi e faavaivai ia te ia mai le galue mo le Atua. I le Galuega 13:6-12, sa taumafai Paulo e lauga atu I le sui konesula, ae o Elima le taulaitu ‘ua tete‘e mai o ia ‘iā te i lā‘ua, ‘ua fia fa‘aliliu ‘ese atu e ia i le suikonesula i le fa‘atuatua. Ae lei faavaivai ai Paulo, ua ia faaoo le tauaso ia te ia, ua aveesea le taulaitu, ma ua manumaloina le suikonesula mo Keriso. O le afi, e leai ma se fefe I so’o se mea e tulai I lona ala. 

Ou te manatua le taimi muamua na matou o atu ai I le taulaga  o Ede I Nigeria mo se matou sauniga faapitoa. Ua iloa ni faailoga o le tetee mai I le itu I le agaga, ae peitai na tumau lo matou faatuatua I le Atua, leai se faavaivai ma faaauau le polokalame. Ao amata le polokalame, ua amata ona pau timuga tetele. Ou te lei popole, tusa lava po’o le timu, e sili atu I lo le pau o le afi, ua ou faia le faaiuga e faaauau pea le sauniga. Ao sauni atu le aufaipese e usu le pese, ua tei ua gau le nofoaga e tutu ai le aifaupese. Sa iai se uso e iai sana loli tele, ua ou fai iai e alu e aumai I totonu o le nofoaga o le sauniga. Na avea le loli tele lea ma nofoaga e tutu ai le aifaipese ma pepese. Na faaauau pea la matou polokalame e ui e tele faafitauli na matou feagai. 

Aua e te faavaivai ona o I latou o loo tutu I le ala o galuega ua maea ona atofa e le Atua ia te oe e te faia, ia faaauau pea. Afai e mumusu e o ese ma le faalavelave, e faaumatia I le suafa o le Atua. Ia e filiga e faaauau le ausia o galuega o le malo o le Atua. Aua le avea le lē lava o le tupe e taofia ai oe mai lou faia o galuega o lo’o e manao e faia mo le Atua. Ia faaauau pea, e saunia e le Atua tupe manaomia a’o e faaauau pea le faataunuuina. Aua nei e faavaivai pe faataga tagata e pepelo ma faalata ia te oe e tuua oe I lalo, ia e faamalosiau ia te oe lava ma faaauau pea le agai I luma (1 Samuelu 30:6). 

I le faasolo mai o le tele o tausaga, e tele mea na tutu ma faasoesa I o’u ala e aofia ia ma tulafono e faia e tagata. Afai e filifili nisi e tutu i o’u ala ma tetee mai, poo le a lava le taui I mea e tutupu ma lavevea ai, e le o se mea lena a a’u. E tatau ona e filiga e aunoa ma se mea e taofia oe pe afai e te naunau e faia le tulaga ua valaau ai oe e le Atua e faia. Aua nei e faatagaina se mea e taofia oe. O le afi e faigata ona taofiofi, I le suafa o Iesu, Amene.   

OPEN HEAVENS
MATALA LE LAGI MO LE ASO LUA 24 IANUARI 2023

Manatu Autu:  Afi mumū 4 (Flames of fire 4)

Tauloto – Tusi Paia: Faataoto 27:17‘E ma‘ama‘ai le u‘amea i le u‘amea, e fa‘apea fo‘i ‘ona fa‘amafanafana o le tagata i lana uō.’

Faitauga - Tusi Paia: Failauga 4:9-12

Upu Folafola
E matuia aafiaga o le afi. A iai ni moli ga’o se 100, e mafai ona e faaaogaina le moli ga’o e tasi e tutu ma mumu uma ai moli ga’o e 99. E faamumu e le afi so’o se mea e mafai ona mumu. E faapena foi ona sue e le afi so’o se mea e mafai ona mumu lelei. I le Teuterenome 34:9, ina ua silafia e Mose o Iosua o se tagata e mafai ona mumu, na ia faaee atu ia te ia le agaga o le poto. Ina ua silafia e Elia o Elisaia o se tagata e ono mumu, na ia foai ma faae’e atu iai le faalua o lona faauuga. O ai ni tagata lelei e ono mumu lelei o loo iai I mafutaga ma nofoaga o lo’o e iai? Tagata ia e iai le malosiaga e mafai ona faia mea tetele o le Atua ae tau lava o le faatonutonu lelei le mea o lo’o manaomia? Faalatalata atu iai latou ma faamumuina I latou mo le Atua. E te leiloa po’o le a le umi e mumu ai pea lena afi mo le Atua. Maimau pe ana mafai ona aumaia o ia e latalata ia te o’e ina ia maua se vevela o le afi mai ia te oe. 

Ou te le malamalama I tagata o le Atua o lo’o taumafai e tape le afi o isi tagata. E le mafai ona faatauva le afi ia te ia lava. Afai e fesooatai le afi ma le afi, e tutū faatasi ina ia matua a’afia le siosiomaga o lo’o iai. E iai seisi tagata o loo ia tauaveina le afi I mafutaga ma nofoaga o e iai? Faataatia ese igoa o Ekalesia o loo lua lolotu ai ae galulue faatasi ina ia faalautele galuega o le malo o le Atua. E ono iai ni faafitauli e te lua uia pe a fai e taitoatasi, peitai a tutu faatasi, e mafai ona lua faatoilaloina ni mauga tetele. Afai e tau alu ane I lalo le mumu o se afi, e pai atu loa iai le isi afi ona toe mumu tele lea. O nisi taimi ou te ofo pe afai e vaai atu se afafine po’o se atalii o le Atua I se uso ua maalili, ae fiafia ma faapea mai; ‘e le o sau galuega le aia fua iai’. Ae sa tatau ona faalatalata ma fesoasoani atu I lea tagata ina ia toe faamumu le afi ia mumu atili mo le Atua.

E sili atu le mumu o le afi pea afai e pipii atu I isi afi. O oe ma isi afi o loo I ou tafatafa, e sili atu ona mumu lelei pe afai e faia pea tou mafutaga e fesoasoani ai le tasi I le isi e toe faamumu atili ai a outou afi. O le mafuaaga lea e te vaai ai I faifeau, e o mai faatasi ma fai faatasiga ma mafutaga ina ia faamautinoaina e leai se afi e mumu itiiti. Talitonu mai ma le faamaoni, e sili atu ona mumutele lou afi pe afai e te lē tilotilo ese pe a e vaai atu ua amata ona tau lē mumu le afi a le isi tagata. E sili atu ona mumu tele lou afi pe a fesootai atu I isi afi, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO GAFUA 23 IANUARI 2023

Manatu Autu:  Afi mumū 3 (Flames of fire 3)

Tauloto – Tusi Paia: Mataio 5:15‘Latou te lē tutuina fo‘i le molī i le tu‘u ai i lalo o le mea e fua a‘i saito, ‘ae tu‘u i luga lava o le tu‘ugāmolī ‘ia pupula atu ai i ē o i le fale uma..’

Faitauga - Tusi Paia: Mareko 16:15-20

Upu Folafola
E le mafai ona e le ano I le afi, aua e aafia lava le siosiomaga I le afi. So’o se mea e iai le afi, e lagona uma e tagata lona vevela ma o so’o se mea e pa’i I le afi, afai e le mu, e mumu ma avea ma afi. Afai e amata ona tutu se afi, a e lafoa iai ni pepa, e mumu ma faateleina le afi. O lo’o ou tutuina ma faaolaolaina tagata faatuatua I le aso. E le afaina pe afai o lea faatoa e alu atu I se aoga ma faapea mai ‘Ua siosiomio a’u e le au agasala’ ae o se tulaga faanoanoa pe afai e maea le tolu masina o loo tumau pea tagata o loo tou iai faatasi I le agasala. E faapefea o na e iai I se ofisa mo le tolu tausaga ae tumau pea tagata o le ofisa o loo tou mafuta e leai se suiga? O le afi e mafai ona ia suia so’o se mea e pa’i iai ina ia faapei o le afi. Afai e te le o talai atu le talalelei I tagata o loo lua mafuta I aso uma, o fea la le vevela o lou afi? Aisea ua e maalili ai?

I le 1 Tupu 18:36-39, ina ua faamalamalamaina e Elia o ia o le afi, na matua salamo le atunuu atoa ma faapea ‘O lou Atua o le Atua’. I le galuega 16:25-34, ina ua lafoina Paulo ma Sila I le falepuipui, e o’o atu I le taimi ua la faaalia o la’ua o le afi, na faamaulalo le pule o le falepuipui ma faapea mai ‘Ta’u mai ia te au le ala e faaolaina ai’. Ou te tatalo e te maua le malosiaga e faaalia ai le mana o le Atua I lou siosiomaga, I le suafa o Iesu. O le faapupulaina atu o lou malamalama e manaomia nisi o suiga e faia I lou olaga. E tatau ona faaavanoa sou taimi mo le tatalo ma mafuta I le mamalu o le Atua. E manaomia lou anapogi ma suesue I lau Tusi Paia I le tele o taimi.

Aua e te matamuli e faaaoga avanoa e faaalia ai o oe o le afi. Afai e iai se tasi o au uo e fai atu ua le maua le malosi o le tino, aua e te faasino iai ni fualaau, faaee iai ou lima ma tatalo mo lona faamalologa. Afai e faamaloloina lena tagata, e na te talai atu I isi tagata ma e le umi se taimi ae e vaai atu, ua e manumaloina le vasega atoa I le Alii. E iai se tasi o au uo I le ofisa o loo saili I le Atua mo se pepe? Ia e faaaogaina o se avanoa lelei e talai atu ai Iesu Keriso I le ofisa atoa. Ia e tatalo mo lea tagata ma ta’u iai, a na te tauaveina se pepe I totonu o le iva masina. A faia e le Atua le vavega, e iloa uma ai e tagata o lou Atua e moni ona latou ifo lea I le Atua. 

Ia e faamautinoaina, o soo se tasi e te lua fetaui, ia faalogo I le talalelei ia Iesu Keriso, I le suafa pele o Iesu Keriso, Amene.

OPEN HEAVENS
MATALA LE LAGI MO LE ASO SA 22 IANUARI 2023

Manatu Autu:  Afi mumū 2 (Flames of fire2)

Tauloto – Tusi Paia: Roma 12:2‘Aua fo‘i tou te amio fa‘atasi ma lenei lalolagi, ‘ae peita‘i ‘ia liliuina i le toe fuata‘iina o ‘outou loto ‘ina ‘ia ‘outou su‘esu‘e pe se a le finagalo o le Atua, o mea ‘ua lelei, ma le mālie, ma le ‘ato‘atoa.’

Faitauga - Tusi Paia: 2 Korinito 6:14-18

Upu Folafola
O le afi e lē taumulimuli i se isi, e tumau lava ia i taimi uma. O le afi a o le afi. E lē liu aisa ma malo nei, liu suāvaia taeao ae liua I le ea I le aso e sosoo ai. O le afi e tumau lava o le afi. E lē fa’ata’ita’i i se mea po’o se tasi, e tuma’oti lava ma tumau I lona tulaga.

Ou te manatua se vaitaimi sa avea ai ma tu ma aga masani a atalii o le Atua I Nigeria le oofu i ofu talanoa. Ou te le tetee I lea ituaiga lavalava. Ae ua avea o se ofu ua masani ai I le aganuu a Nigeria ma o loo faapea ona ‘ou ofuina foi I le taimi nei. Peitai, ou te le mulimuli ini faiga masani e tatau ona ofu faapea I taimi uma. E iai se tagata o le Atua ua fapea mai ia te au ‘ou te fiafia ia te oe, ae ou te le fiafia I lou ofu e pei o se tagata tulimanu’, ma o loo faia nei faamatalaga e faatatau I ou ofu faa farani e masani ona ofuina. Ua ou fai iai e le o a’u o se tulimanu, ae o le fitafita a Keriso. O le afi e lē milo faatasi ma lona siosiomaga, ae e aafia ai le siosiomaga. 

E tatau ona e tula’i lava oe. E lē mafai ona e faia se mea ona o loo fai fo’i e isi tagata. O le afi e lē fa’ata’ita’i i se isi, e lē fefe e talitonu to’atasi ma tu na o ia. O le afi e lē lolo i ni ta’aiga. Fai mai le Faataoto 1:10 afai e fa’aoleole iā te oe tagata agasala aua ne’i e usitai i ai. Poo le a lava le fa’atosina mai o ala ma faiga fou, a lē tusa ma le Upu a le Atua, tetee ma tia’i ese. I le 1 Tupu 18:22 sa tapuai uma le nuu o Isaraelu iā Paala vagana Elia. E lei mulimuli atu Elia i tagata sa latou mafuta auā o ia o le afi. Tusa pe fai uma e tagata mea e inosia e le Atua, peitai ona o oe o le afi e lē mafai ona e amio faatasi ma i latou. I le 2 Korinito 6:16-17, o loo faatauanau ia i tatou e o ese ma tagata lē faatuatua ma lē faaolaina.

Fai mai Mataio 5:16 ia faapea ona pupula atu lo outou malamalama I luma o tagata ina ia latou iloa la tatou amio lelei latou te vivi’i atu ai i lo tatou Tamā o I le lagi. E faapefea ona latou iloa atu galuega a le Atua I totonu ia te oe pe afai o loo e fia faataitai pea I tagata o lo’o faia galuega a le tiapolo? Suesue ia te oe lava, o e mulimuli ea I mea masani e fiafia iai le lalolagi? Manatua, aua fo‘i tou te amio fa‘atasi ma lenei lalolagi, ‘ae peita‘i ‘ia liliuina i le toe fuata‘iina o ‘outou loto ‘ina ‘ia ‘outou su‘esu‘e pe se a le finagalo o le Atua, o mea ‘ua lelei, ma le mālie, ma le ‘ato‘atoa.’ I le suafa o Iesu Keriso, Amene.