Samoan Devotional

OPEN HEAVENS

MATALA LE LAGI MO LE ASO FARAILE 21 APERILA 2023

Manatu Autu:  E sili atu I le sa’olotoga (More than freedom)

Tauloto – Tusi Paia: Isaia 49:25 ‘Auā o lo‘o fa‘apea ‘ona fetalai mai o le ALI‘I, E faoa lava le tāfeaga a lē ‘ua malosi,

e lavea‘iina fo‘i le vete a lē mata‘utia; ‘Ou te finau atu fo‘i a‘u i ē ‘ua finau atu ‘iā te oe, ‘ou te fa‘aolaina fo‘i au tama.’

Faitauga - Tusi Paia: 2 Tupu 4:1-7

Upu Folafola

E le mafai e le Atua ona lima u’u, o soo se mea na te faia, e faia ma le loto foai tele. Fai mai Tavita I le Salamo 23:5 ‘ua e fa‘au‘uina lo‘u ulu i le suāu‘u; ‘ua taumasuasua la‘u ipu. E faapena le finagalo o le Atua, afai e na te foai atu ia te oe se mea, e foai atu e faulai ma taumasuasua. 

E iai se aso ua leva ao faia sa’u lauga, na faapea mai le Alii e iai se tagata I le faapotopotoga o le a ia maua ni faamanuiaga tetele se tolu. O le muamua, e na te maua uma ma le atoatoa. Lona lua, e valueina  ma se isi tagata. Lona tolu, e foai uma I se isi tagata. Mulimuli ane, ua sau se fafine ma aumai se vaega tupe ia te a’u ma faapea mai o lo’o ia faataunuuina lana vaega o le faatonuga. Ou te iloa lelei lenei fafine, e telē se aitalafu na tuua e lona toalua ia te ia ina ua maliu. Ua ia fai mai ia te a’u o ia e faatatau iai le faaaliga e pei ona ou folafola ma e leai ma se mea e mafai ona ou faia e taofia ai o ia. E lei leva ae toe foi mai ma seisi vaega tupe ma fai mai o le vaega lea o le faamanuiaga mulimuli. Ina ua maea lea, ua toe foi mai ma se tautinoga, o le faletupe lea na iai le aitalafu a lona toalua, na fesootai ane ma faatoese I lenei fafine, o le aitalafu lea na tusia I lona toalua e sese, ae o le faaletupe o loo aitalafu I lona toalua. Na latou totogiina se tupe tele I lenei fafine. Afai e faasaoloto oe e le Atua mai aitalafu, e na te faia e faigata ona e toe faia se isi aitalafu. Afai o lo’o iai ni au aitalafu I le taimi lenei, e faasaoloto oe e le Atua, le Atua e faulai ai le oa, I le suafa o Iesu. 

I le Ioane 8:36 O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou. Afai e faamaloloina se tagata mai se ma’I, e ono iai lava ni maila e totoe, ae a faasaolotoina oe e Iesu, e faia ma le atoatoa, e te malolo ma le atoatoa. Afai o e iai I se saisaitiaga, ia e maua le saolotoga I le taimi lava lenei I le suafa o Iesu. E le gata e faasaoloto oe e le Atua, e na te avatu le malosiaga e te faasaoloto ai I isi tagata (Mareko 16:17) ina ia mafai ona e tutuli temoni mai tagata. O lenei avanoa taua e foai atu I fanau a le Atua o I latou ua saunia e anapogi ma tatalo e faifaipea (Mataio 17:21). 

Tatalo

Tama, faamolemole faasaoloto ia te a’u mai so’o se saisaitiaga ma ia faaaogaina a’u e faasaoloto I e saisaitia, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 20 APERILA 2023

Manatu Autu:  E sili atu I le faaolataga (More than salvation)

Tauloto – Tusi Paia: Faataoto 11:30 ‘O le fua o le amiotonu, o le la‘au o le ola lea; ma lē na te maua agaga, e poto ia.’

Faitauga - Tusi Paia: Roma 1:16

Upu Folafola

O lo’u Atua e ese ma le loto foai. Afai e finagalo e faaolaina se tagata, e le gata e na te faaolaina le agaga o le tagata, e na te faamamaina uma agasala a lea tagata e pei lava e lei agasala muamua. O lo’o faapea mai le 1 Ioane 1:7 ‘Ae ‘āfai tatou te sāvavali i le malamalama, fa‘apei ‘ona i ai o ia i le malamalama, ‘ona tatou mafuta fa‘atasi ai lea o le tasi ma le tasi, o le toto fo‘i o Iesu Keriso lona Alo e fa‘amamāina ai i tatou i agasala uma lava. Talitonu mai ia te au, e le afaina po’o le a le loloto o le agasala na e faia I le taimi ua tuanai, e mafai e le Atua ona faaolaina lou agaga ma faaaogaina oe mo lona viiga. 

A maea ona faaolaina lou agaga, e le faapea e na te tuulafoai ia te oe e te taumafai lava na o oe ia e ola faapaiaina, e na te foai atu ia te oe le malosiaga e te lē toe faia ai le agasala ma suia mai le loto ma’a’a I le loto aano. Fai mai le Esekielu 36:26

‘Ou te avatu fo‘i ‘iā te ‘outou le loto fou ma ‘ou tu‘u i totonu ‘iā te ‘outou le agaga fou; ‘ou te ‘ave‘esea le loto ma‘a‘a a‘i o ‘outou tino ma ‘ou avatu ‘iā te ‘outou le loto ‘a‘ano.

O le uiga moni lea o le alofa tunoa, pe afai e avatu e le Atua le malosi ia te oe e te ola faapaiaina ai. E sili I le foai atu o le alofa tunoa e te ola faapaiaina ai, e loto foai tele le Atua e mafai ona ia faaaogaina oe e faaolaina ai agaga o isi tagata mai le I’u I seoli. O se avanoa taua tele lenei tulaga aua o so’o se tagata e aumaia I totonu o le malo o le Atua e avea ma atalii po’o se afafine o le Alii (1 Korinito 4:15). O le a le taimi mulimuli na e manumalo ai se agaga mo Keriso? O le a le taimi mulimuli na e faatagaina ai le Atua e faaaogaina oe e se’I mai ai se tagata mai lima o le tiapolo I ‘aao alofa o lo tatou Keriso?

Afai e te le foai atu le alofa tunoa na avatu e le Atua ia te oe ina ia avea ai au uo ma tagata o lou aiga ma atalii po’o afafine o le Atua, o oe o se tagata amioleaga. Na faia e le Atua ia matagofie vae o I latou e talai lana talalelei. Fai mai le Roma 10:15 “E matagofie na‘uā o latou vae o ē ‘aumai le tala lelei i le manuia.” 

Ta’u atu Iesu Keriso I so’o se tagata lē faatuatua I lou siomaga ae le’i tuai, I le suafa o Iesu Keriso, Amene.  

OPEN HEAVENS

MATALA LE LAGI MO LE ASO LULU 19 APERILA 2023

Manatu Autu:  E sili atu I le faamalologa (More than healing)

Tauloto – Tusi Paia: Ioane 7:38 ‘O sē fa‘atuatua ‘iā te a‘u, e fa‘apei ‘ona fai mai o le Tusi, ‘E tafe mai o vaitafe mai totonu ‘iā te ia, o le vai ola lava.’

Faitauga - Tusi Paia: Mareko 16:17-18 

Upu Folafola

O lo’u Atua e ese le mau mea ma e loto foai tele. Afai e finagalo e faamalolo, e faamalolo atoatoa. E ui e masani I fomai ona faapea mai e iai lava isi aafiaga o fualaau ma vailaau faafomai, peitai e leai ni aafiaga faapea I faamalologa mai le Atua. A faamalolo oe e le Atua, e faamalolo atoatoa. 

I ni tausaga se tele talu ai, sa iai se manua o se tamaitai mai se taotoga ua fiu e faapē ua lē pe ona o le matua o tausaga o lea tamaitai. Na ou fai I lana tama e aumai se solosolo, ua tatalo ai I luga ona fai lea I lana tama e tuu I luga o lona tina. Na ia faia ma o le aso na sosoo ai, e le gata ua malolo ma ua pē le manu’a, a ua leai ma se maila e iloa ai na faia se taotoga.  A faamalolo oe e lo’u Atua, e faamalolo atoatoa.

E faaopoopo atu I le faamalologa, e loto foai tele le Atua e faaopoopo atu ai ma lana puipuiga ina ia aua lava nei e toe ma’i. Fai mai le Esoto 15:26 ‘Ua ia fetalai mai fo‘i, “‘Āfai ‘e te matuā fa‘alogo i le leo o le ALI‘I lou Atua, ma e fai le amio tonu i ona luma, ma ‘ia e ua‘i mai ou taliga i ana poloa‘iga, ma e tausi i ana sauniga uma lava, ‘ou te lē tu‘uina atu ‘iā te oe se tasi o ia ma‘i na ‘ou tu‘uina atu ‘iā Aikupito; auā o a‘u o le ALI‘I, o lē na te fa‘amālōlōina oe.

Afai e avea le ola faapaiaina ma masani I lou olaga, e faia e le Atua e matua lē masani le ma’i ia te oe. 

E faaopoopo atu I le lē toe maua I se ma’I, e loto foai tele lo’u Atua e amata ona tafe mai le faamalologa mai ia te oe. O nei mea uma e mafai ona e maua ae peitai, e iai tapulaa. Muamua, e ao ona avea oe ma se atalii po’o se afafine o le Atua aua o le faamalologa, o meaai ia na o le fanau a le Atua ( Mataio 15:21-28). E le faapea o se fai konekarate lo’u Atua e fai faamalologa ai, e na te faamalolo na o lana fanau. 

E iai nisi o taimi e na te faamalolo I se tagata e lē faatuatua I fafo atu o lana fanau ae faia fa’aaitalafu, ma le faamoemoega e mulimuli ane ua avea lea tagata ma sui o lona aiga I lona talia lea o Iesu e avea ma Alii ma Faaola. Peitai ane, a musu pea e fanaufouina lea tagata, e sili atu ona leaga seisi ma’I e toe maua ai mulimuli (Ioane 5:14). O lou o’o atu I le tulaga maualuga lena ua tafe atu le faamalologa mai ia te oe ma faamalolo ai isi tagata, e tatau ona iai lou faatuatua. Fai mai le Mareko 16:17-18 e tatau ona avea oe ma tagata faatuatua. I lou faatuatua, faaloaloa ou aao I luga o tagata o loo manaomia le faamalologa, ma e le umi ae amata ona e vaai atu ua malolo tagata. 

Tatalo, 

Tama, faamolemole ia e faauu ia te au ia matua malosi ua amata ona ou faamalolo I e mama’i, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 18 APERILA 2023

Manatu Autu:  E Faaumatia Faamoemoega – Loto ita (Destiny Destroyers – Anger)

Tauloto – Tusi Paia: Failauga 7:9 ‘Aua le fa‘ata‘alise ‘ona ita o lou loto; auā e tumau le ita i loto o ē vālelea.’.

Faitauga - Tusi Paia: Faataoto 14:29 

Upu Folafola

O le to’atama’i po’o le ita o se tasi ia o ‘au’upega sili ona faaaoga e le ti’apolo ina ia faaumatia le faamoemoega o lou olaga. E iloa ma manino iai tagata uma, e le te’ite’i ita seisi, e iai le mafuaaga, ma e iai le mafuaaga ua faaosoosoina ai le ita o se tagata. O loo faapea mai le Failauga 7:9‘Aua le fa‘ata‘alise ‘ona ita o lou loto; auā e tumau le ita i loto o ē vālelea.

I le tusi o Numera 20:1-12 o lo o ta’ua ai Mose sa galue mo le Alii i le 40 o tausaga ma avea ma ta’ita’i I se vaega o tagata e sili ona faigata o latou uiga, ua oso lona ita tele toetoe lava a o’o i le nu’u folafolaina ma o le mafuaaga lena sa le ulufale atu ai o ia i le nu’u pa’ia. Ia mata’itu lelei, so’o se taimi e oso ai lou ita, suesue lelei lou tagata, auā e le taumate ua sauni le ti’apolo e osofa’I ia te oe.

E matua lamatia oe e le ita. Sa iai se tamaloa, e pau lea o lona faafitauli o le loto ita. A oso lona ita, e mafai ona ia faia soo se mea. Sa ia faatauina se taavale fou ona faatu lea i luma o le fale ma ua ia fiafia lava, ae sau lona atalii, tago i le mea ma’ai ma osiosi le tino o le taavale fou. Sa va’ai atu iai le tama lenei ma ua oso lona ita tele. O le mea muamua lava na ia vaai atu iai o le samala, ua tago ma aumai ma sasa ai tamatama’I lima a lona atalii. Ua faataiō lona atalii. 

Ina ua faate’ia le tamā i lana mea ua fai, sa ia ave lona atalii i le falema’i. Fai mai le foma’I, e pau le fofo o le faafitauli, o le tipi ese o tamatama’i lima a lona atalii. I le aso na sosoo ai, sa asiasi le tamā i lona atalii i le falema’i. Ua fesili ane lona lona atalii : “Tama, o afea e toe tutupu mai ai o’u tamatama’i lima?” Ua fo’i le tama i lona fale ma le matuā mafatia o lona loto. Sa ia alu atu ma vaai i le osiosiga na faia e lona atalii I le taavale. Na tusi e lona atalii i le taavale: “Daddy, ou te alofa ia te oe.” Ua matua mafatia ma momomo le loto o lenei tamā ma ua i’u i ina pule i lona ola.

O le ita, ua na o sina taimi lava e leaga ai le mafaufau, o le mafuaaga lena e faapea ai isi tagata: “Sa leaga lo’u ulu ia te ia lale” e pei e mimita I le faia o le tala. Afai e te naunau e taunuu manuia le faamoemoega o lou olaga, e tatau ona e pulea ma manumalo I le ita. 

Fai mai le Faata’oto 16:32 E sili ‘ona lelei o lē ‘ua gesegese i le ita i lē ‘ua malosi; e sili fo‘i lē ‘ua pule i lona loto i lē na te ā‘ea le ‘a‘ai.

Ia e pulea lou loto. Aua ne’i e faatagaina le ita e fa’atoilalo ia te oe.

Tatalo, 

Tama, faamolemole ia faaumatia so’o se a’a o le ita ia te a’u, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 17 APERILA 2023

Manatu Autu:  E Faaumatia Faamoemoega – Manatu o loo lelei lava (Destiny Destroyers – self justification)

Tauloto – Tusi Paia: 2 Korinito 10:18 ‘Auā e lē talia o lē ‘ua vivi‘i o ia ‘iā te ia lava, a o lē ‘ua vi‘ia e le Ali‘i.’.

Faitauga - Tusi Paia: Ioane 9:40-41 

Upu Folafola

O le tele o taimi, e toatele tagata o loo iai lava se tulaga faaletonu I o latou olaga ae faapea mai ‘e le o leaga tele’. E o’o atu I le taimi e faapea ai e lē o leaga tele, ua amata ona e sueina se upu e faamatala ai e leaga. 

I le Kenese 9:20-25, o Noa le tagata maoae o le Atua lea na’o ia na faaolatia mai I le lolo, e leiloa pe iai lava sana masani e inu sana ipu uaina mai lea taimi I lea taimi. E lē leaga tele a ea? Peitai e iai le aso na inu ai sana ipu uaina ma faaopoopo atu ma le isi ma le isi seia oo ina onā. Ina ua te’i ane, ua maea ona ia folafolaina se fetuu I luga o se tasi o ona atalii, ma faapea mai o le a avea ma auauna pito sili ona maualalo o auauna uma. Ua ia fetuu I le lumanai manuia o lana ia lava fanau. E sili atu le leaga o leisi tamaloa ma lenei masani, o Lota. I le Kenese 19:30-38, na faasaoina Lota mai le faaumatia I Sotoma ma Komoro, peitai e iai foi lana masani o le inu o sina ipu uaina mai lea taimi I lea taimi. Ua oo ina faaonā e lana fanau teine e toalua ma ua taotooto Lota ma I laua ma fananau mai ai ni tamaiti.  A e faitai i le Tusi Paia, e te iloa ai ni aiga se lua na tupuga mai ai, ma e te lē fia iu e pei o I latou. O le aiga muamua na tupuga mai o le au Moapi (Kenese 19:37) ae o le lona lua o le fanauga a Amoni, o ni tagata pito sili ona amioleaga na latou faatiau I fafine totō (tulou) I le (Amosa 1:13). Silasila I le finagalo o le Atua e faatatau iai latou I le Sefanaia 2:9

‘O le mea lea, o lo‘o fa‘apea mai ai le ALI‘I o ‘au le Atua o Isaraelu: ‘Ou te ola a‘u, e ‘avea lava Moapi pei o Sotoma, o le fānauga a Amoni fo‘i pei o Komoro, o le mea o i ai le vao ogoogo, ma lua o masima, o le mea gaogao fo‘i e fa‘avavau; o ē o totoe o lo‘u nu‘u latou te vetea i latou o ē totoe fo‘i o o‘u tagata latou te fai i latou mo i latou lava.

O nei faafitauli na amata ona na ia faia se faaiuga e inu e tau lava o sina uaina. Ia taofia loa le faia pea o ni masani e lē lelei, ia taofia le taumafai e puipui le faia pea o lenei amioleaga. ‘Aua e te auai I le faia o so’o se mea leaga. ‘Aua le faia se mea e lē viia ai le Alii. E amata atu ai iina ona mautu le faamoemoega manuia o lou olaga ia Keriso. Mo nisi, o le fiafia I le musika a le lalolagi po’o le fiafia e mafuta latalata ma tagata o leisi itupa. E pau lava lena o le gaoioiga a le tiapolo e faia e taitai ai oe e faia le faitaaga. Fai mai le pese a Solomona 2:15 ‘Inā ‘outou pupu‘e ia mā tatou o alope, o alope iti, o ē fa‘amaumau i vine auā ‘ua fua o tatou vine.’

Tatalo

Tamā, o so’o se alope itiiti e ono faamaumau  I la’u vine, faamolemole ia aveesea nei I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 16 APERILA 2023

Manatu Autu:  E Faaumatia Faamoemoega – Tautala so’o (Destiny Destroyers – talkativeness)

Tauloto – Tusi Paia: Faataoto 21:23 ‘O lē ‘ua leoleo i lona gutu ma lona laulaufaiva, e tausi o ia ‘iā te ia ai puapuagā’.

Faitauga - Tusi Paia: 2 Samuelu 1:1-16 

Upu Folafola

Afai e te lē mafai ona faafoe ma pulea lou laulau faiva, e lē o toe mamao oe ma puapuaga ona o lou tautalasoo. E lafi mai i tua o le mana’o e tautala I taimi uma le fia iloa ma le mana’o e ogatotonu I le vaai a tagata uma, o nei uiga e mafai ona faaumatia ai soose tasi e faia.

I le Tusi faitau mai le Tusi Paia o le asō ua tatou faitau ai i se taulealea na mana’o i le fiailoa ma le fia ta’uta’ua. Na ia faamatala se tala ma lona manatu e fiafia iai Tavita i le fai atu o ia na fasiotia Saulo ma lona lē iloa ua ia sailia lava e ia lona malaia. 2 Samuelu 1:16 ‘Ua fai atu fo‘i Tavita ‘iā te ia, “‘Ia i ai i luga o lou ulu lou lava toto, auā na e molimau mai lou lava gutu ‘iā te oe, o lo‘o fa‘apea, ‘Na ‘ou fasioti i lē na fa‘au‘uina e le ALI‘I.’”

Talitonu mai oe, o le itiiti o lou tautala o le lelei lea mo oe auā o upu uma e te tautala ai o loo faamauina e toe tolaulau i le aso faamasino. Na fetalai Iesu Keriso i le Mataio 12:36 e faapea 36 A ‘ou te fai atu ‘iā te ‘outou, o ‘upu fa‘atauva‘a uma e faia e tagata, latou te talatala atu ai le tala i le aso fa‘amasino

Sa ou auai I se fonotaga faatasi ma nisi o auauna iloga a le Atua, sa i ai fo’i ma se uso sa tautala ma tautala ai a e lē malolo ma i’u ai ina o’u fai atu i ai “Lau susuga, o lou manatu ea e sili atu lou silafia na i loo matou uma? a na se’i e filemu aua e te tautala mo sina taimi atonu ua a’oa’oina oe I se mea.” O tagata atamamai e tele le faalogo na i lo’o le tautala aua e iloa o le tele o le malamalama o le uigā lea o le tautala. Fai mai le Iakopo 1:19 ia fa’ata’alise ona faalogologo ae fa’atelegese ona tautala. Faataoto 10:19 ua faapea mai ‘O le tele o ‘upu e fa‘aono solia ai le tulafono; a o lē ‘ua tāofi ona laugutu, o le tagata poto lea’.

O le faafoe ma le pulea lelei o lou laulaufaiva o se faitotoa lea i le ola fa’apaiaina. Aua ne’i avea oe e lou laulaufaiva i Seoli.

Tatalo

Tamā faamolemole foai mai lou alofa tunoa ia te a’u e pulea lelei ai lo’u laulaufaiva i taimi uma I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 15 APERILA 2023

Manatu Autu:  E Faaumatia Faamoemoega – Meaai 2 (Destiny Destroyers – Food 2)

Tauloto – Tusi Paia: 1 Korinito 6:12 ‘Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.’

Faitauga - Tusi Paia: 1 Korinito 6:12-13

Upu Folafola

Fai mai Filipi 3:18-19 ‘Auā o lo‘o sāvavali isi e to‘atele, na ‘ou fai atu so‘o ai ‘iā te ‘outou, ‘ou te toe fai atu nei fo‘i ma le tagi, ‘ua latou fai mo latou fili le satauro o Keriso. O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi’.

A e vaai I se isi o faapa’ole pe fa’atopelau ona tiute ma e fesili i ai “Aisea ua faapea ai?” latou te faapea mai. “E tatau ona o’u ai.” Fai mai le tatou tusi faitau o le asō e lē tatau ona fa’ato’ilaloina tatou i se mea e tasi o lenei lalolagi ma fa’aauau ai i le faapea mai o meaai e mo na o sina taimi. Aua ne’i avea se mea e na o sina taimi, e lē tumau e ta’ita’ia oe i le fa’afanoga e faavavau I Seoli. E ta’i fa’afia ona e anapogi? 

O Iesu Keriso lava na fetalai I le Mataio 17:21 e faapea, “o nei mea ua na o le tatalo ma le anapogi e alu ese ai.” E i ai faafitauli ma temoni o siosiomia oe ua na o le tatalo ma le anapogi e faatoilalo ai. I se tasi aso I lo’u nuu, a’o o’u sauni e tali le sua I le kuka e sili ona o’u fia ai ai, o le ufi ma le supo na fetalai le Atua ia te a’u faapea “aua e te ai ae anapogi i le aso lenei.” Sa o’u finau ma le Atua ma ai pea le meaai. E fetaui le uma ona ou ai ua maona le manava ae sau le tagata valaau mai ou te tatalo mo lo’u tuafafine o loo maua I le ma’i (small pox). Na faigata ona o’u tatalo ma tau ma le agaga o le ma’i ona o le tumu o lo’u manava (se’i tulou). Na o’u fai le auala masani ma faigofie e toe ave ese ai meaai mai lo’u manava (sei tulou) ma faatoa mafai ai ona o’u tatalo mo lo’u tuafafine ma malolo ai lona ma’i.

A fetalai le Atua ia te oe e te anapogi, ia e usita’i auā o le mafuaaga, e mo lou lelei. Ou te le’i masani muamua e anapogi. O le taimi muamua na fai mai ai se isi ou te anapogi mo le tolu aso tolu po e aunoa ma se meaai sa o’u ta’u lea tagata e fasioti tagata. Peita’i na foai mai e le Atua le malosi ou te manumalō ai i lo’u fiaai. Sa amata ona o’u anapogi I le tolu aso ma faasolosolo mālie atu i le lima aso seia o’o I le silia ma le fasefulu aso. So’o se taimi e amata ai sa’u anapogi ou te faailoga le aso amata ma le aso e uma ai, ona o’u pa’i lea I lo’u manava ma faapea, “manava e amata atu I le asō e lē toe i ai se meaai mo oe seia o’o I le aso e tatala ai le anapogi.” O le taimi e te anapogi ai e faafuasei ai ona e amanaia meaai i ou talaane peita’i ia e tete’e atu le faaosoosoga o meaai ae tumau ia e taunuu i le tini.

Tatalo

Tamā faamolemole fesoasoani mai ia te a’u ia faamamāina lo’u tagata mo oe i le anapogi e lē aunoa i le suafa o Iesu.

Amene.

OPEN HEAVENS

MATALA LE LAGI MO LE ASO FARAILE 14 APERILA 2023

Manatu Autu:  E Faaumatia Faamoemoega – Meaai 1 (Destiny Destroyers – Food 1)

Tauloto – Tusi Paia: Faataoto 23:2 ‘ma e tu‘u atu se polo i lou ua, pe ‘āfai ‘o se tagata ‘ai tele;..’

Faitauga - Tusi Paia: Failauga 10:16-17

Upu Folafola

E ono faateia oe o meaai e mafai ona faaumatia le faamoemoega lelei o lou olaga. Fai mai le Filipi 3:19

‘O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi’.

O nisi tagata ua avea le meaai ma atua I o latou olaga. O nei tagata e na o meaai lava e manatu iai ma ua avea ma mea e pito sili ona taua iai latou. E toatele kerisiano e le mafai ona leai se meaai e aia I se aso se tasi. Afai e pule le meaai ia te oe, o lona uiga o se atua ia te oe ma e ono faaumatia ai oe. 

O Esau o se tasi o tagata e pule ai le meaai. Ua matua pulea e le meaai ua ia faatauina le tofi o le ulumatua mo se ipu polesi. Ao Iakopo, ua malie e foai lana meaai na ia kukaina ia maua ai se mea taua aua le faamoemoega lelei mo lona olaga (Kenese 25:29-34). Afai e te suesueina lelei le fuaitau lea, e te iloa ai na faaopoopo atu iai e Iakopo ma le fasi falaoa I le polesi na ia avatu ia Esau. Ua ia iloa lelei, o se taimi taua tele lea mo le faamoemoega o lona olaga ma o lea sa ia faia se anapogi mo ia lava. Ona o lea mea na tupu e pei e leai tele sona taua, ae na le maua ai e Esau le faamanuiaga a lona tama ma misia le avanoa e avea ai o ia ma tama o le fanauga a Isaraelu. E te ono leiloa ae e iai taimi e fai atu ai le Atua ia e anapogi, o loo ia faia ina ia e maua le avanoa mo le faia o se mea e ausia mo le faamoemoega o lou olaga I le lumanai. 

O le aoga autu o le meaai e avatu ai lou malosi I le tino. E tatau ona e ‘ai ia ola ae le o le ola tau na o le ‘ai. Fai mai le Tusi Paia e iai le vaitau e ‘ai ai (Salamo 145:151). I nisi faaupuga, e iai foi vaitau e le tatau ona e ai ai, e tatau ona e anapogi. O e fuafuaina lelei lena vaitau I totonu o fuafuaga mo lou olaga I lenei tausaga? Fai mai le aposetolo o Paulo e masani o ia I le anapogi (2 Korinito 11:27). E tatau ona avea ma masani lou anapogi. Ua ou faalogo I nisi failauga o loo faapea mai ua maea ona anapogi Iesu mo tatou ao iai o ia I le lalolagi o lona uiga e tatou te le toe tau anapogi. O se pepelo tele lea manatu, faitau lelei le Tusi Paia. Na fetalai Iesu I le Mareko 2:19, a oo ina afio ae o ia I le lagi, e tatau ona anapogi lona au soo. Ua maea ona toe afio Iesu I le lagi, o lona uiga ua tatau ona tatou anapogi. Aua nei avea le meaai e gaoia le faamoemoega taua o lou olaga ua maea ona faataatia e le Atua. 

Tatalo

Tama, faamolemole fesoasoani mai ia te a’u ina ia mafai ona ou pulea lo’u naunau I le fiaai. Aumai le alofa tunoa ia te au ina ia faia le anapogi ma a’u masani, I le suafa o Iesu Keriso, Amene.  

OPEN HEAVENS

MATALA LE LAGI MO LE ASO TOFI 13 APERILA 2023

Manatu Autu:  E Faaumatia Faamoemoega – Tuinanau o le tino (Destiny Destroyers – Lust)

Tauloto – Tusi Paia: Kalatia 5:16 ‘Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino..’

Faitauga - Tusi Paia: Kalatia 5:16-17

Upu Folafola

O le tu'inanau o le tino, ua tele ina faaumatia olaga o tagata ma o lo’o faatupulaia pea le faaumatia o faamoemoega o olaga o le toatele o tagata. E mautinoa e i ai tagata o loo faapea atu ia te oe, e mafai lava ona e ulufale atu i le Lagi, tusa lava pe o lo’o e faia pea le tuinanau o le tino. Aua e te faaaogaina nei aoaoga sese, e te o’o atu ai i seoli. O loo tusia i le 1 Korinito 3:17 Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

E te manatu ea o le mulilua po o le faitaaga o se mea e faataalo i ai? I le Numera 31:1-16, sa lē mafai ona faaumatia le nuu o Isaraelu ona o lo’o tumau pea le Atua ma puipuia i latou, ae na taupulepule le fili e auina atu i tagata Isaraelu ni tamaitai lalelei i o latou toagalauapiga ma amata ai ona faitaaga tagata Isaraelu. Ina ua mavae lena, na le faia e le fili se isi laasaga mo i latou; o le Atua lava na faaumatia i latou uma. Afai e te tu’inanau ma e moomoo i se tasi e te le’i faaipoipo i ai, e sili ona e faasaoina le faamoemoega o lou olaga e ala i lou taumamao ese mai lea tagata, aua o le togafiti lena a le tiapolo e faaumatia ai oe. E to'atele tagata ua mafatia i mala ona o le faitaaga ma le mulilua. Aua le avea oe ma se tasi oi latou.

Afai ua o’o lou matua i tausaga e tatau ai ona e faaipoipo, ia e tatalo mo le taitaiga a le Atua, ma alu i le lotu pe a e manaʻo e amata lau faigauo ma se tasi ua taʻitaʻia oe e le Atua lua te mafuta. Atonu e te fai mai, o mafaufauga o aso anamua nei fautuaga, ae o le mea lena na puipuia ai nisi o tatou uma o loo tutu ma galulue i le taimi nei, ona o ala sa’o o taunuuga na savalia mo le tele o tausaga ua tuanai. E sili le usitai i fa’aa’ao’oga tuai nai lo le faaleagaina o lou olaga. Faaaoga lau Ekalesia ma ia aafia lau lotu i la oulua faigauo ma ia mautinoa, ia aua neʻi lua feiloaʻi ma lou toʻalua faaolioli i ni nofoaga e na o oulua aua e vave le faaosoosoina e faia le agasala.

E toʻatele tagata ua latou faia le faitaaga e ala i lo latou nofo vavalalata tele ma le isi itupā, po o le nonofo faatasi i nofoaga na o laua. O le taimi lava e te maitauina ai ua amata ona e tuinanau i se tasi, ia faia loa sau anapogi e taofia ai na tuinanauga. E faatuputupuina le tuinanau pe’a  faalilolilo mea uma, aua le ufiufiina lena pogisa.

Le ‘au pele e, ‘aua ne‘i e faia le faita‘aga poo le mulilua; ‘aua ne‘i fa‘aleagaina le malumalu o le Atua. Afai e te faia, ua e valaau mo lou faʻamasinoga ia te oe lava.

Tatalo

Tama, faamolemole ia faamuta so’o se ituaiga tuinanau o le tino mai lou olaga, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 12 APERILA 2023

Manatu Autu:  Faamaualuga- E faaumatia faamoemoega 2 (Destiny Destroyers – Pride 2)

Tauloto – Tusi Paia: Iakopo 4:6 ‘A ‘ua foa‘i mai e ia le alofa tunoa e sili; o lea ‘ua fa‘apea mai ai, “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo.’.

Faitauga - Tusi Paia: 1 Peteru 5:6

Upu Folafola

Mai le tatou upu tauloto o le aso mai le Tusi Paia, ua tatou iloa ai e tetee atu le Atua I e faamaualuga. I nisi faaupuga, e faasagatau atu le Atua I e faamaualuga. Afai o le Atua Silisili ese o lo’o tau ma oe, e faapefea ona e manumalo? O le faafitauli tele I tagata faamaualuluga, e latou te le o iloa o la e faamaualuluga. E latou te faaigoaina nisi o upu matagofie  e pei o le faaaloalo I le tulaga, poo le mafaufau manino poo le faamamalu ona o se tulaga. Na talosaga atu Saulo ia Samuelu ina ia faamamalu atu ia te ia ona o lona tulaga tupu I le 1 Samuelu 15:30 ina ua aveesea lona palealii o se tupu. Ao Tavita I le isi itu na ia siva malosi e oo I lona tulaga tupu ma ua oo i lana ava, ua inoino ia te ia. Na ia fai atu i lana ava, “Na ou siva i luma o le ALI‘I, o le sa na filifilia a‘u, ‘ae tu‘ua lou tamā ma lona ‘āiga uma” ( 2 Samuelu 6:16-21).

O le taimi o pese ma viiga e te iloa ai le tagata faamaualuga ma lē e le faamaualuga. A e vaai I tamaiti, aua latou te le o saili ma puipui I o latou tulaga o iai, e na o le vivii lava I le Atua, ma siva I le mea e gata ai. Ao faia se tasi o matou sauniga I le Iunivesite o Nigeria, na siva malosi atu le pule sili o le Iunivesite I lo tamaiti aoga. Na silasila mai le Atua ma ua ia silafiaina. I ni nai vaiaso mulimuli ane, na tulai le tiapolo e aveesea o ia mai lona tulaga, ae ua tau le Atua mo ia ma ua ia maua le manumalo. Afai e te faamaulalo I lou loto, e tauina uma e le Atua ou taua mo oe.

Ina ua maea se tasi o matou sauniga tele, ma ina ua ou toe foi atu I la matou nofoaga o le togalauapiga, ma ao faia lau taimi tatalo ma le Atua I le va o le 2-3 I le vaveao, na faateia a’u I le faapea mai o le Atua, ‘atalii, tago e tusi se ata o se tamaloa I le oneone’. Ina ua maea, na ia faapea mai: ‘tago e faaaoga lou vae e faaleaga ai le ata’. Ona faapea mai lea: ‘atalii, aua nei galo ia te oe Le o loo iai le pule, e mafai ona ou aveesea oe ma lē toe iai se tagata e manatua oe ao e iai I le lalolagi’. E le afaina le maualuga e ave iai oe e le Atua, e mafai ona toe aumaia oe I lalo I le na o le fiti lava o lona aao. Fai mai le Faataoto 16:18 E muamua le fa‘amaualuga i le malaia; e muamua fo‘i le loto fa‘asiasia i le pa‘ū.

Ia e atamai e faatupulaia lou faamaualalo ao siitia oe, aua o le maualuga o le tulaga e te o’o iai, o le maoae foi lena o lou paū I lalo pe afai e te faamaualuga. 

Tatalo

Tama, faamolemole ia e foai mai ia te au le alofa tunoa ma le atamai ou te faamaualalo ai I ou luma e amata atu nei, I le suafa o Iesu Keriso, Amene.