Samoan Devotional

OPEN HEAVENS
MATALA LE LAGI MO LE ASO FARAILE 5 AOKUSO 2022

 Manatu Autu: Suesue (Study)

 Tauloto – Tusi Paia: 2 Timoteo 2:15 “‘ia e taumafai ‘ina ‘ia ‘avea oe ma lē ‘ua fiafia mai i ai le Atua, o le faigaluega e leai se mea e mā ai, na te tala‘itonuina le ‘upu moni...”

Faitauga - Tusi Paia: Tanielu 9:1-7

 Upu Folafola
O le toatele o tagata I nei aso ua tele ina le toe fia suesue. Ua fiafia atu le tupulaga e matamata I luga upega tafailagi I lo le faitau o se tusi po’o se suesuega loloto o ni mataupu. So’o se tagata maoae ma tauoloa le tulaga, sa amata mai I le suesue ma a’oa’oina I mataupu lea ua maoae ai lo latou iloa I nei aso. O lona uiga, afai e te manao e avea oe ma tagata maoa’e, ia a’oa’oina oe e fiafia e suesue. O aso lava ia, a e fia suesue e te alu I le potu tusi (library), a o nei aso, e te maua uma so’o se mea I luga o upega tafailagi. 

 Ou te le malamalama I le mafuaaga e le fiafia ai tagata e suesue. E iai lava le siomaga o tagata e te faatoa mafai ona e oo ma ulu atu iai pe afai e te fiafia e suesue. Fai mai le Tusi Paia e tatau ona e suesue pe afai e te manao e tauleleia oe (2 Timoteo 2:15). E iai lava tapulaa maualuluga e le mafai ona e ausia mo le Atua pe afai e te le fiafia e suesue. O Peteru o se tagata maoae o le Atua e o’o I lona ataata(shadow) e malolo ai tagata (Galuega 5:15). O le mea moni, na avea Peteru ma taitai o le au aposetolo, peitai o Paulo le tagata e sili atu mea na ia ausia I le galuega a le Atua I le au aposetolo  ona o ia o se tagata e maualuga lona a’oa’oina. O le tele o tusi o le Feagaiga Fou na tusia e Paulo aua foi e maualuga lona a’oa’oina ma e tele tusi na ia tusia. E toatele lava kerisiano faauuina, ae le toatele nisi e ausia tulaga tauoloa fa’ataita’i ona e le fiafia e suesue. Fai mai le Tanielu 9:2-3
2O le tausaga muamua o lana nofoa‘iga, o a‘u o Tanielu na a‘u iloa ai i tusi le faitau o tausaga na fetalai mai ai le ALI‘I ‘iā Ieremia le perofeta, ‘ia fa‘a‘atoaina ai le fa‘atafunaga o Ierusalema, o tausaga e fitugafulu ia. 3‘Ona ‘ou fa‘asaga lea i le Ali‘i le Atua e sā‘ili i le tatalo ma le fa‘atoga ma le anapogi ma le ‘ie talatala, ma le lefulefu.

 Na iloa e Tanielu e manaomia le tatalo, na ia silafia tatalo e tatau ona fai aua foi sa suesue I tusi sa’o. O nisi tagata o lo’o puapuagatia pea I nisi o vaega o latou olaga ona latou te le iloa le mea moni o tulaga o latou feagai. O nisi e le taitai ona suesue I le Tusi Paia e iloa ai po’o a fofo o lo’o saunia mai I le Upu a le Atua e faatatau I luitau o lo’o ui ai. 

 Fai mai le Tanielu 12:4, I aso mulimuli, o le a faatupulaia le poto ma le iloa. O lea ua tupu lea tulaga. Ua faatupulaia le poto I le lalolagi. Aua e te tuua le poto e siitia ai le vaega e au iai le pule I le tiapolo, alu foi oe e sue mai le poto lena e faaaogaina mo le malo o le Atua. 

 Ia avea le toaga e suesue o lau masani, I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 4 AOKUSO 2022

Manatu Autu: O le Malosiaga o le Filemu (The Power of Silence)

Tauloto – Tusi Paia: Isaia 30:15 “15Auā o lo‘o fa‘apea ‘ona fetalai mai o le Ali‘i le ATUA, o le Pa‘ia o Isaraelu: O lē liliu mai ma le filemū e fa‘aolaina ai ‘outou, o le filemū ma le fa‘atuatua o lo ‘outou malosi lea; a ‘ua ‘outou lē mafafai..”

 Faitauga - Tusi Paia: Faataoto 18:6-8

 Upu Folafola
O mea aupito sili ona maualuga ma matautia e fausia mai I mea e leai se pisa, e filemu. A afuafua le pepe I le manava o le tina, e faia ma le filemu. E oo mai I le taimi ua matua le pepe ma ua sauni e fanau mai I le lalolagi, ona faatoa lagonaina lea o se leo. I le tele o Tausaga talu ai, na sau ai se faifeau o le talalelei mai I Amerika I le matou nofoaga o togalauapiga, ma ua ia iloa le tele o le nofoaga ma faapea mai pe aisea ua le faapisa ma faailoa lenei nofoaga. Ua ou fai atu ia te ia, e iai le muagagana I le matou nuu e faapea, afai e te tutuina se afi, ia e puipui lelei e taofi le matagi seia mumu lelei ma aua nei pe. A maea sina taimi, ona iloa ai lea o le afi ua mumu tele ma ua le mafai ona toe taofiofia. O lou le pisa tele, o le mamao foi lena o lou agai I luma ma siitia oe I luga. Fai mai le Mataio 10:16 “Fa‘auta, ‘ou te ‘a‘au atu ‘iā te ‘outou e pei o mamoe i le vā o luko; o lenei, ‘ia ‘outou atamamai pei o gata, a ‘ia fīfīlemū pei o lupe.  

 O se tasi o vaega taua tele e tāua ai le gata e poto, o le filemu. Ana faapea oni meaaola e pisa, semanu ailoga o toe iai ni gata I le lalolagi. Afai e te masani I le filemu ma le leai o se pisa, o le faigata foi lena ona fasiotia oe e luko feai o le lalolagi. O le tagata pisa e tautala lava e aunoa ma le mafaufau muamua ae o le tagata filemu e mafaufau lelei ae le’i tautala. Afai e na te le iloa pe le mautinoa foi le tali, e filemu lelei ma e le pisa, ma e le afaina o ia ona o upu na faia. 

 E le faapea e tatau ona e taliina so’o se fesili. E le faapea foi e tatau ona e tali atu I luitau uma. Ia a’oa’oina oe e filemu ma aua le pisa I nisi o taimi, o le ala lena e umi ai ona e manumalo. O le mafuaaga e leiloa ai le tauleleia o nisi o tagata I totonu o atunuu ma nuu, ona o le tautala soo. Fai mai le Faataoto 17:28 O le vale lava, a fa‘alologo o ia, fa tagata, o ia ‘ua poto; o lē ‘ua pupuni ona laugutu, fa tagata, o le tagata mafaufau ia  

 Afai e tautatala uma tagata I le fono ae e iai se tagata o lo’o filemu, e mautinoa e iai le taimi e taofi ai e le taitaifono le fono ae fesili I le tagata lea o loo filemu e faaali sona manatu, ma o upu e tautala mai ai e faaaloaloina. Ia e fesili I le Atua I taimi uma mo le poto ina ia e iloa le taimi e filemu ai, o le taimi e tautala ai aemaise o upu e tautala ai. 

 O mea maoae ma matautia e faia ma tuputupu pea ma le filemu, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 3 AOKUSO 2022

Manatu Autu: E Mafaia Mea uma I le Atua (With God All Things are Possible)

 Tauloto – Tusi Paia: Mareko 10:27 “A ‘ua silasila atu Iesu ‘iā te i latou, ‘ua fa‘apea atu, “E lē mafaia e tagata, na o le Atua; auā e mafaia mea uma e le Atua.”

Faitauga - Tusi Paia: Roma 4:16-21

 Upu Folafola
I le amataga, na faia e le Atua le lagi ma le lalolagi mai le leai o se mea. Fai mai le Tusi Paia o le lalolagi na soona nunumi ma ua gaogao. O le lalolagi sa leai se mea lelei sa iai. Ana faapea e te vaai I le lalolagi I le amataga, e te ono faia se faaiuga e leai se mea lelei e ono tupuga mai ai. Peitai ane, ina ua maea le fitu aso, o le Atua Silisili Ese na ia faia se lalolagi pito sili ona matagofie mai I le leai o se mea. O le Atua e na te mafai ona faia soo se mea. 

 I le tele o aso talu ai, e iai se tama talavou na aumai I a’i matou ona o le ulavale. E uiga ese lea ulavale ma ua tuuina atu o ia I lalo o le vaavaaiga a se tasi o fitafita o le aulotu ma o ia foi e ta laau I le aufaipese. O so’o se tagata na vaai I lenei talavou na manatu e leai ma se mea lelei e ono tupu mai ia te ia. Peitai, na amata loa ona a’oa’oina e lenei fitafita le tama talavou I le musika. E iai se aso na ou malaga ai I fafo ma lo’u toalua ma na ia vaai ai I se flute ma ia faatauina loa mo le talavou ulavale lea. Ina ua vaai iai le tama talavou, na amata loa ona ia iliina ma faataitai I aso uma, ma o le aso, o lena talavou ulavale ua avea ma faifeau faamoemoeina I le viiga. So’o se taimi ou te sauni atu ai e faia le lauga ae sau le faifeau lea ta le saxophone, e suia le siosiomaga atoa, e pau ma loloto le galue mai o le Agaga o le Alii I le fonotaga. 

 Na suia e le Atua le igoa o le auauna teine mai ia Hatasa ia Eseta le Masiofo. Na liua e le Atua le ogaumu aasa I le nofoaga e faamaluluina mo tama Eperu e toatolu o Sataraka, Mesako ma Apetiniko. Na tapunia e le Atua gutu o liona feai ona o Tanielu. Na soloia I lalo e le Atuaa pa o Ieriko o loo tu I le ala o le fanau a le Atua. E iai ea se mea e le mafai ona faia e lo’u Tama?

 O lo tatou Atua o le Atua e mafaia mea uma. E na te mafai ona liua mea e le mafai I mea e mafai ona faia. Afai e iai se tulaga I lou olaga e foliga mai e le mafai ona iai se alualu I luma, e mafai ona liliuina e le Atua. Afai e iai se pa puipui e faalavelave I lou mauaina o le olioli, o lo’o aveesea e le Atua Silisili Ese mai ia te oe I le suafa o Iesu. 

 Aua lava nei e fesiliga le mafai e le Atua ona liliuina mea e le mafaia I mea e mafaia I lou olaga. Po’o le a lava le mea o lo’o e ui ai, o lo’u Tama o le na faia mea uma lava, e mafai ona ia suia. E ao ona tuuina atu lou ola I ona aao ma faatuatua ia te ia mo le manumalo e na te avatu ia te oe. 

 Tatalo: Le tama e, oi le lagi, ou te valaau ia te oe ia aveeseina soo se faafitauli o faalavelave I lou olaga, I le suafa o Iesu Keriso, Amene 

OPEN HEAVENS
MATALA LE LAGI MO LE ASO LUA 2 AOKUSO 2022

 Manatu Autu: Manumalo I Ma’i (Victory over Sicknesses and Diseases)

 Tauloto – Tusi Paia: 1 Peteru 2:24 “O lē na ‘aveina e ia lava a tatou agasala i lona lava tino i luga i le la‘au, ‘ina ‘iā tēte‘a i ‘outou ma agasala, tatou te nofo ai i le amiotonu. O ona fa‘alavalava ‘ua mālōlō ai i ‘outou”.

 Faitauga - Tusi Paia: 1 Ioane 5:4-6

 Upu Folafola
O le Atua mamana o lo’o faia pea le matafaioi o le togafitia o gasegase a so’o se tasi e alu atu ia te ia i le faatuatua. Ina ua maliu ifo Iesu mai le mauga sa ia lauga ai, na faafetaui o ia e se lepela i le ala, ma e le’i teena e Iesu, pei ona faaalia i le tusi o Mataio 8:3 e faapea
3‘Ona ‘a‘apa atu lea o Iesu o lona ‘a‘ao, ‘ua pa‘i atu ‘iā te ia, ‘ua fa‘apea atu, “‘Ou te loto i ai; ‘inā mamā ia oe.” ‘Ona mamā loa lea o lona lepela.

 A fai o iai se ma’i i lou tino, e mafai e lo’u tama, o Lē na faia mea uma, ona faamālolo  ia te oe i le asō, i le suafa o Iesu.

E iai se tamaita’i sa auai i se tasi o matou mafutaga. E uiga ese lona gasegase; auā e so’o se mea’ai na te taumafaina e toe luai mai i fafo (tulou). E tele ni fomai sa suesueina lona ma’i ma latou faapea mai e le maua se mafua’aga o lona ma’i, ae peitai, sa lē maua sona mapusaga. E lei amataina a matou tatalo, ua na ona matou alalaga “Aleluia!” a ina ua tatala le fofoga o lenei tina ma ‘alaga Aleluia, ae matou va’aia se anufe ua paū mai i fafo o lona fofoga. Sa faamaloloina o ia mai lea gasegase i le taimi lava lea! 

 Afai o iai se gasegase i lou tino, o le taimi lava e te ‘alaga ai “Aleluia!” e faamalolo e le Atua lou gasegase i le taimi lava lea, i le suafa o Iesu. O tagata uma na o’o mai ia Iesu, sa ia faamaloloina. So’o se tasi na oo mai ia Iesu mo se faamalologa e le’i tuli ‘esea e Iesu. I se tasi o taimi, a o auai Iesu i se fonotaga tāua, sa oo mai se tasi o pule o le Sunako e suafa ia Iairo. Sa ma’i le afafine o Iairo ona ia o’o mai lea ia Iesu ma lona manaoga, ia la ō ma Iesu e faamālolo lona afafine.

E le’i tali tualimaina Iairo e Iesu, pe faapea atu Iesu; o ia o lo’o tuatuagia. Sa tuua e Iesu lana fonotaga ae malaga ma Iairo e faamālolo lona afafine. 

E le mafai ona talitualimina oe e Iesu pe a e valaau iai ona o sou gasegase. Afai e te valaau ia te ia, e o’o mai lava e faamālolo ia te oe. O lea ‘ea lena gasgase, e foliga mai ua siliga taliiseu ona maua se fofō? O le a lena ma’i i lou olaga ua faapea mai foma’i e leai se togafiti o maua? O loo faamaloloina oe e lo’u Tama i le suafa o Iesu i le taimi nei lava. Va’ava’ai atu i luga, ia Iesu. Sau ia Iesu mo lou faamalologa ma ia e faatuatua ia te ia! E leai se ma’i po o se gasegase ogaoga e le mafai e Iesu ona togafiti.

 Afai na toe faatuina e Iesu ia Lasalo mai le tuugamau, e ui ina ua 4 aso talu ona o ia ta’oto ai, e mafai foi e Iesu ona faamālolo ia te oe. I le suafa manumalo o Iesu, talia lou faamālologa I le taimi nei lava! 

 Tatalo: Lo’u Tama e i le Lagi, o la’u tatalo, ina pa’i maia lou a’ao faamalolo i lo’u tino i le taimi nei lava, ou te tulai ai i luga, ma ou fa’ane’ene’e atu ia te oe, ona o lo’u ola maloloina lelei, i le suafa o Iesu Keriso, Amene!

OPEN HEAVENS
MATALA LE LAGI MO LE ASO GAFUA 1 AOKUSO 2022

Manatu Autu: Manumalo I Faigata (Victory over Adversity)

Tauloto – Tusi Paia: Ioane 16:33 “33‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.”

 Faitauga - Tusi Paia: 1 Ioane 5:4-6

 Upu Folafola
O mea faigata ma puapuaga e ono faapea mai o se vaega o le olaga I le lalolagi nei, peitai e fai mai lo’u Tama I le Lagi, o Le na faia le lagi ma le lalolagi, e sili atu lona maoa’e I lo faigata (Kenese 1:1). O faigata ma puapuaga e peiseai ua sili atu lona malosi I lo le tagata. E iai mauga e taofia le alualu I luma o le tagata, o se aiga po’o se faalapotopotoga o tagata. O nisi faigata ma puapuaga ua manatu le tagata ua matautia tele ma ua leai lava se vaifofo. Na feagai le fanauga a Isaraelu ma lenei ituaiga faigata ina ua maea ona faasaolotoina I latou mai le nofoaga sa nofo pologa ai. O Farao ma lana autau ua tuliloaina I latou a’o le sami ulaula ua I o latou luma. A ua matua fefefe le fanauga a Isaraelu aua ua leai lava se auala e sosola ese ai. A fua iai I le vaai faaletagata, ua leai se famoemoe ma ailoga e mafai ona manumalo ai. E o’o ia Mose ua na leiloa le mea o le a faia seia oo ina ua ia valaau atu I le Atua; Lo’u Tama, le Atua Silisili ese, na ia saunia le ala ina ua leai lava se ala. I le taimi muamua I le talaaga o le lalolagi ma tagata, ua vaeluaina le sami, ma ua savavali le fanau a le Atua e ui atu I le sami I leisi itu. 

 I le suafa o Iesu, ou te tatalo I le Atua Silisili Ese, ina ia e maua lea ituaiga manumalo I le asō. O le ituaiga manumalo e matautia e lei tupu muamua e maofa ai, e na o Iesu Keriso e maua ai. E mafai e le tiapolo ona faatuina ni afā e siomia ai oe, e aumai e Iesu le manumalo mautinoa mai se tulaga faigata ma le matuiā. 

 I le tele o tausaga talu ai, a’o faia se polokalame faatalaleleiga I Nigeria, na valaau se tina mo se fesoasoani, ma talosaga mai ia ou tatalo mo ia ona ua le maua sana tama, ma ua leai seisi o le aiga o lona toalua e avatu ai se filemu I lona fale. Na ou tatalo mo ia. I le maea o se Tausaga, a’o faagasolo mai tagata mo le tatalo, na sau ai le tina lea. Na ou fesili atu po’o le a mea e manao e tatalo ai, ae tali mai; Iesu! Ua amata ona leai so’u toafilemu. Ua ou toe fesili atu po’o le a le mea e manao ai. Na ia tali mai foi Iesu, ma fai mai o ia lea na ou tatalo ai I le tausaga talu mo se fanau. Na ou vaai atu e toalua pepe o lo’o ia siiina, o le tasi I le itu tauagavale ma le tasi I le itu taumatau. Ia avatu e le Atua ia te oe lea ituaiga o manumao I le aso I le suafa o Iesu Keriso. 

 E aumai e le Atua le manumalo I faigata, luitau ma puapuaga e ui ai lana fanau. Afai e lei tuuina atu lou ola ia Iesu Keriso, ia fai loa I le taimi nei, ma o so’o se luitau e faasaga tau ia te oe e faatoilaloina ma faaumatia, I le suafa matautia o Iesu Keriso, Amene. 

OPEN HEAVENS
MATALA LE LAGI MO LE ASO SA 31 IULAI 2022

Manatu Autu: Talia Fautuaga (Take Feedback)

 Tauloto – Tusi Paia: Faataoto 29:1 “O le tagata ‘ua a‘oa‘iina so‘o, ‘ae fa‘ama‘a‘a lona ua, e fa‘afuase‘i ‘ona nutimomoia o ia, ‘ae leai se fofō.

 Faitauga - Tusi Paia: 2 Samuelu 12:1-13

Upu Folafola
O le tele o taimi, e tatou te faia gaoioiga e sese e aunoa ma lo tatou iloa. E tatou te faia gaoioiga tatou te mananao ai I so’o se taimi e aunoa ma lo tatou iloa, o lo’o tatou faatiga I loto o tagata pe faaalia ni uiga ma amioga lē lelei. O tagata popoto e latou te faalogo pe a fautuaina e faasa’oina I latou ma faia loa suiga e manaomia. O ē valea e lē talia ae manatu I mafuaaga e alagatatau ai ma e leai ma ni suiga e faia. A tatou suesueina le olaga o Tavita ma Saulo, e tatou iloa ai le vaega poto faapea foi le valea. Ina ua sese Saulo ae faasa’o atu e Samuelu, na ia faamatalaina le mafuaaga na faia ai seia oo ina saeina le ofu talaloa o Samuelu ona o le musu e tauleagaina o ia I luma o tagata (1 Samuelu 15:13-27). A’o Tavita, ina ua faasa’oina o ia e le perofeta o Natano, na vave ona salamo ma faia mea uma e faia ai le faaleleiga ma le Atua (2 Samuelu 12:15-18). A tatou vaavaai lelei iai, ua tatou iloa ai mafuaaga na teena ai e le Atua Saulo, ae na ia alofaina Tavita, o la uiga faaalia pe a faasa’oina. 

 Afai e fai atu tagata ia te oe e ese ma lou ita gofie ae e te faapea mai ‘ou te le ita gofie, ae ala ona oso lo’u ita o le valea o tagata e fai mai ia te a’u’, pe faapea atu foi nisi e te paie ma moe so’o ae e te faapea mai, ‘e le o se laupapa le tino, e tatau foi ona malolo, e o’o foi ia Iesu na moe ma malolo a’o I le lalolagi’, pe faapea atu foi seisi ia te oe, e ese ma lou tautala so’o, ae e te faapea ane, ‘oi e te manao ou te le tautala e pei e valea?’. Afai o oe lea, o loo iai le faafitauli ma oe ma e tatau ona faia iai se faatatau. Afai e auina atu e le Atua se tagata e faasa’oina se tagata, ae e le faia ona e le talitonu iai, fai mai le tatou fuaiupu tauloto o le aso, o lea tagata e fa‘afuase‘i ‘ona nutimomoia o ia, ‘ae leai se fofō. Afai e te fia vaai I se faataitaiga, vaai ia Saulo. Fai mai le Tusi Paia I le 1 Samuelu 3:19, sa ia Samuelu le Atua ma e lei iu vale sana upu ae na faatino uma e le Atua, peitai a’o ole atu Samuelu I le Atua mo Saulo, na fetalai le Atua ia te ia e aua le faamaimauina lona taimi ua maea ona ia tofia seisi tupu e sui ia Saulo (1 Samuelu 16:1). 

 O ou uiga itiiti na ua leva ona fai atu ai lou toalua, lou pule I le fale faigaluega, lau uo I le fale faigaluega, tagata o lou aiga poo sou tuaoi, se fautuaga e faasa’oina ai, o lou faia o le faasa’oga pe leai, e ono sii ai oe I luga pe oo ina faaumatia ai oe. O le pule o lo’o ia te oe pe e te gauai I le tulaga e tatau ona faasa’o ai. O sina mea itiiti lena, e ono o’o ina nutimomoia ai oe I le tulaga ua leai se fofo pe afai e te le faaeteete. Tau lava o sina upu mo e popoto. 

 O a ou vaivaiga na ua leva ona fai atu tagata ia te oe e tatau ona faasa’oina ma faaleleia? Ia e talia le fautuaga ma amata ona faia fesuiaiga talafeagai e o gatasi ma le Upu a le Atua, I le suafa o Iesu Keriso, Amene

OPEN HEAVENS
MATALA LE LAGI MO LE ASO TOONAI 30 IULAI 2022 

Manatu Autu: Seia Atoatoa Lou Olioli 2 (Until Your Joy Be Full 2)

 Tauloto – Tusi Paia: Salamo 40:1 “Na ‘ou matuā fa‘atalitali lava i le ALI‘I; ‘ona fa‘asaga mai ai lea o ia ‘iā te a‘u, ‘ua fa‘afofoga mai fo‘i o ia i la‘u ‘alaga.”

 Faitauga - Tusi Paia: Salamo 40:1-5

 Upu Folafola
I tele o tausaga ua mavae I totonu o si o'u nu'u, sa mana'omia se vaieli ma fa'afeso'ota'I ai se tasi e faia le galuega.  Sa umi se taimi na eli ai e le uso le palapala e le'I maua se vai ma musu ai loa e toe fa'aauau lana galuega. E le'I maua fo'I la se tupe a le uso auā o tuutuuga o le galuega faatoa totogi pe'ā maua se vai. Sa maua se tasi na is fa'aauau le galuega.  Na matou malilie faatasi aiaiga o le totogi ma amata ai loa le galuega a le alii faigaluega fou lea. Sa fa'aauau lana eli I le vaega eleele na togi ai le solo a le tagata eli vai muamua.  Na ona amata atu ā o le eli a le alii faigaluega lona lua lea puna mai ma le vai. E le'I umi se taimi ae mae’a lana galuega ma ia maua uma ai le totogi semanū e maua e lē tagata na elia muamua. Atonu o faapea oe, atonu e lē o toe mamao e maua le tali o au talosaga o lo'o fai.   Afai e te faavaivai nei, ma'Imau lou tautigā I le tatalo faapei o le tagata faigaluega eli vai na musu ua toeitiiti lava puna a'e le vai ma mae’a lana galuega. 

 E lē taofia e lē Atua se mea lelei mai lana fanau. (Luka 11:11-13) E finagalo fo'I o ia e foa'I mai ia I tatou mea e sili atu nai lo o ā tatou tatalo. Atonu o I ai ni ou mana'oga ua leva na e tatalo ai, aua e te popole ua faafofoga lou Atua I lau tatalo e tali mai fo'I I le taimi e finagalo ai. A'o o'u nofo I le fale lea ua avea nei ma ofisa tutotonu fa'a va o mālõ o le polokalame Matala le Lagi, o lo'u potu tatalo na sili na afea gofie e la'u fanau.  Peita'I so'o se taimi ou te tatalo ai e leai ma se isi na fa'alavelave ia te a'u vagana lo'u atali'I ui'I e alu atu I totonu o le potu I so'o se taimi e mana'o ai I ni masi keke (cookies). O isi taimi o’u te lē ano I lo'u atali'I ma lo'u manatu ia alu ese ai ma a'u peita'I e lē fiu e fa’atalitali ma viga ia fai lona mana'o. E i'u a ina o'u tula'I e fai muamua le mana'o o le atali'I. E mafai na e tu'itu'I pea I le Atua I lau tatalo seia i'u ina faapea o ia “e sili ai lo'u avatu I le tama/ teine lenei lona mana'o ia mafai ai na ou malolō”

 O nisi o vavega o olaga feliua'ina fa'atoā tutupu ina ua e faapea atu I le Atua “Ou te lē tu'ua oe e te alu seia e fa'amanuia mai ia te a'u,” e pei ona fai e Iakopo. Fai I lau tane / avā e te lua tatalo fa'atasi I so'o se taimi e lagona ai lou fa'avaivai e tatalo I se manaoga fa'apitoa. O I latou e le'I faaipoipo, tatalo fa’atasi ma lou uso kerisiano e te lua itūpa faatasi ina ia fa'amalosiau lē tasi I le isi e pei ona fai mai le Fa'ataoto 27:17 E ma'ama'ai le u'amea I le u'amea.

 Afai o lou manaoga o lo'o e tatalo ai o le finagalo o le Atua ma e lē fiu e tatalo, e te maua le tali I le taimi e finagalo ai lou Atua. Ia tatalo e le aunoa, I le suafa o Iesu Keriso. Amene.

OPEN HEAVENS
MATALA LE LAGI MO LE ASO FARAILE 29 IULAI 2022

 Manatu Autu: Seia Atoatoa Lou Olioli 1 (Until Your Joy Be Full 1)

 Tauloto – Tusi Paia: Luka 18:1 “‘Ua tumau pea i latou i le a‘oa‘oga a le ‘au ‘aposetolo ma le mafuta fa‘atasi, ma le tofitofiga o le areto, ma talotaloga.”

 Faitauga - Tusi Paia: Luka 18:1-8 

 Upu Folafola
O le faamasino amioletonu e lei iai sona ava I tagata. E lei manatu lava I se tagata. Peitai ane, o lenei fafine mativa ua oti lana tane, ua faasoesā ma faalavelave ia te ia ma lana talosaga mo le faamasinoga tonu, ua tatou iloa I le tala, ua ia tali atu I le fafine ma faamasino I ana mea ina ia maua sana malologa. E toatele fanau a le Atua ua malolo mai ia latou tatalo ae lei tali mai iai le Atua. Ana faapea a taofia le tuitui atu o le fafine ua oti lana tane e aunoa ma le faia e le faamasino o le faaiuga I lana mataupu, semanu e na te le maua le faamasinoga tonu. E toatele kerisiano ua toe lava o ni nai tatalo maua le tali ae ua fiu ma taofia loa le tatalo, ma ua le maua a latou vavega. E iai taimi e faatasi ona e tatalo ona tali mai lea o le Atua, ae iai foi taimi, e tatau ona e tu’itu’i atu I le agaga, ina ia o’o ma maua le tali o au tatalo. Afai e taofia lou filiga pea I le tatalo pe a maea sina taimi, e ono le maua le tali. O le mafuaaga tonu lea e faapea mai ai le vaega mulimuli o le Ioane 16:24 ‘Ua o‘o mai nei lava tou te le‘i ole atu i se mea i lo‘u igoa; ‘inā ole atu ia, ‘ona ‘outou maua ai lea, ‘ina ‘ia ‘ato‘atoa ai lo ‘outou ‘oli‘oli. 

 Ou te iloa e iai taimi e finagalo ai le Atua e te tatalo pea, e le faapea e le finagalo e vave tali atu, ae ona o loo iai vaega o lou tagata e finagalo o Ia ina ia faaatoatoaina. Ma o lena vaega o lou tagata e faaatoatoaina pe afai e tuitui pea ma le filiga I le tatalo. Fai mai le Iakopo 1:3-4 e faapea: 3‘Ina ‘ua ‘outou iloa o le tofotofoina o lo ‘outou fa‘atuatua e tupu ai le ‘onosa‘i. 4A ‘ia ‘ato‘atoa le galuega a le ‘onosa‘i, ‘ina ‘ia ‘ato‘atoa ai ma ‘ia sao ‘ona lelei ai ‘outou, ‘ia leai se mea e tasi e mativa ai.

 Ou te ta’u atu le mea moni lenei. Ana faapea e tali mai e le Atua a’u tatalo uma I le taimi muamua na ou tatalo atu ai, semanu e le loloto le ma mafutaga ma le Atua e pei ona iai I le aso. O le tatalo o se faamanuiaga e sili atu mo tatou nai lo le Atua. E tatau ona e manatua, o le tatalo e le suia ai le Atua, ae suia ai oe ma a’u. O le tele o lou taimi I le tatalo, o lou malosi foi lea I lou tulaga o se kerisiano. E le faapea e musua le Atua e tali au tatalo, ae o le tatalo e faia pea I le faatuatua, o lo’o e faufauina se ao o faamanuiaga e iai le taimi e to mai ai I ou luga. Tatalo pea seia to mai le timu o faamanuiaga. Aua le taofia lou tu’itu’i pea I faitotoa o le lagi seia maua le atoatoa o lou olioli. Ia e filiga ma tuitui atu I le agaga seia maua mai le tali. 

 O a mea na ua taofia ona e tatalo ai ona ua lē maua mai lava se tali? Ia tusi uma I lalo ona amata lea ona toe aofia I vaega o au tatalo I aso uma, I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TOFI 28 IULAI 2022

Manatu Autu: Talosaga mo le Ekalesia (Prayers for the Church)

Tauloto – Tusi Paia: Galuega 2:42 “‘Ua tumau pea i latou i le a‘oa‘oga a le ‘au ‘aposetolo ma le mafuta fa‘atasi, ma le tofitofiga o le areto, ma talotaloga.”

 Faitauga - Tusi Paia: Galuega 2:42-47 

 Tatalo
 1.       Tama e, faafetai mo le fausiaina o lau ekalesia, ma le faamautinoaina o le lē mafai e faitotoa o seoli ona manumalo i ai.
2.       Tama e, faʻamolemole ia faʻaumatia soʻo se vaega lē mama o loʻo I totonu o lenei ekalesia, ma o tagata uma o loʻo faapea mai o le afafine poo le atalii o le Atua, e amata ona ola faapaiaina, i le suafa o Iesu.
3.       Tama e, ia faamautinoaina e le ekalesia ona faamoemoega o le tapu’eina ma le manumaloina o agaga mo lou malo ma ia matou matua tuliloaina seia e toe afio mai.
4.       Lo’u Alii e, ma lo’u Atua, faamolemole, tuuina atu i alii ma tamaitai faatuatua uma i le lalolagi atoa le agaga o le filiga i le tatalo, ma le su’esu’e mataalia I lau upu. 
5.       Le Alii e, faamolemole, ia faatula’i mai tagata e loto totoa I le galuega o le manumaloina o agaga, i le suafa silisili ese o Iesu Keriso.
6.       Tama e, faamolemole ia siitia nisi taitai e fiafia e auauna i totonu o le ekalesia – o tagata e sili atu le fiafia i le auauna nai lo le faamuamua o le matagofie o le tauoloa o tulaga ta’ita’i, I le suafa o Iesu.
7.       Tama e, faamolemole ia e faatulai mai ni taitai lelei ma manuia mai lau Ekalesia, e fia faata’ita’i iai tagata I o latou olaga ma ia sili atu ona taitaia ai tagata I lo tu ma aga a le lalolagi, i le suafa o Iesu.
8.       Le Ali‘i o lau afioga, o loo faapea mai le Faataoto 29:2 A pule ē amiotonu, ua olioli ai le nuu; Faʻamolemole ia tapu’eina ma faatula’I ni taʻitaʻi I upu fai o malo mai le Ekalesia i le suafa o Iesu Keriso– o ni taʻitaʻi e tapenaina ni faiga faʻavae e tusa ai ma lou finagalo ma taʻitaʻia tagata i le mataʻu i le Alii, i le suafa o Iesu.
9.       Tama e, faamolemole, faalauiloa gaoioiga uma faaevagelia, toe faafouina, galuega faatino na e amataina i le tino o Keriso, i le suafa o Iesu.
10.   Tama e, faamolemole ia saunia ia tele ma faulai vaega uma e manaomia e lau ekalesia - o tagata galulue, o tupe e  faatino ai galuega, ina ia tupu malosi ma tele, i le suafa o Iesu. 
11.   Tama e, faamolemole, ia avea lau Ekalesia e sili lona agaalofa i tagata uma. Ia tausia e lau Ekalesia ona tagata lotu, ia sili atu lo latou tausiga ma le agaalofa i lo se isi lava taimi muamua, I e mamai, matitiva, o e na falepuipuina, o e ua teenaina e aiga, ma i latou uma ua mafatia i soo se auala lava, i le suafa o Iesu.
12.   Tama e, ia e faamanuia I la’u faifeau, le susuga a le faafeagaiga, le faletua ma le nofoaalo. Ia tafe pea le faauuga o oe Agaga Paia I au auauna ae faasili I ai le loto alolofa I le fanau a le Atua I totonu o le Ekalesia, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO LULU 27 IULAI 2022

Manatu Autu: O Fanau a le Atua e Manumalo (God’s Children are Overcomers)

Tauloto – Tusi Paia: 1 Ioane 5:4 “Auā o i latou uma o ē fānau mai i le Atua, e manumālō i latou i le lalolagi; o lenei fo‘i le manumālō e manumālō ai i le lalolagi, o lo tatou fa‘atuatua lava”

Faitauga - Tusi Paia: Ioane 17:9-16 

Upu Folafola
Fai mai le Mataio 28:20 ‘ia ‘outou a‘oa‘o atu ‘iā te i latou ‘ia tausi i mea uma ‘ua ‘ou fai atu ai ‘iā te ‘outou; fa‘auta fo‘i, ‘ou te ‘iā te ‘outou i aso uma lava, e o‘o lava i le gata‘aga o le lalolagi.

O le galuega Togiola na faia e Iesu Keriso e mafai ona ta’ua e le aoga pe afai o fanau a le Atua, I latou ua o mai I le Atua e ala ia Iesu Keriso, e latou te le maua le manumalo. Na ausia e Iesu Keriso le manumalo atoatoa I le tiapolo faapea le lalolagi, ina ia mafai ona ola fanau a le Atua I le manumalo. Na maliu Iesu I le satauro I Kalevaria mo oe, ma na faatuina mai le oti ina ia aua lava nei iai se pule a le tiapolo ma ana au ia te oe (Kolose 2:13-15). 

E te ono manatunatu pe aisea lava e tele ai kerisiano e puapuagatia I lalo o saisaitiaga a le tiapolo. O lenei, afai e le faia e le atalii poo le afafine o le Atua le matafaioi o le tatalo, suesue I le Tusi Paia, ola faapaiaina, e le mafai ona ia fiafia I le manumalo na ausia e Iesu Keriso mo ia. Fai mai le Tusi Paia e taui atu i lē lē ‘ana‘ana uma, pe a fa‘a‘ato‘atoaina lo ‘outou ‘ana‘ana (2 Korinito 10:6).

 O le manumalo ia Keriso Iesu e mafai ona e folafola I le tiapolo, luitau ma vaega faigata o le olaga, e fua lea I lou gauai I lo tatou Alii o Iesu Keriso. Fai mai le Iakopo 4:7:‘O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou’.

 Ae e te lei tete’e atu I le tiapolo ona sola ese ai lea o ia, e tatau muamua ona e gauai I le Atua. Afai e te le gauai I le Atua, e le mafai ona sola ese le tiapolo pe afai e te tetee atu iai. E le fefe le tiapolo ia te oe, aua foi e na te iloa e mafai ona ia faatoilalo ia te oe pe afai e te lē o tutu faatasi ma Iesu Keriso. Ua ia iloa e leai se malosiaga o ia te oe e te faao’olima ai ia te ia, ae mafai ona ia faao’olima ia te oe. E na te iloa uma ia mea, ma o le mafuaaga lena e le fefe ai ia te oe. Peitai ane, afai e te alu atu I lalo o le mana o le Atua Silisili Ese, ona ia gatete ai lea I le fefe I ou luma. Na tau atu e le taitai o le toaselau ia Iesu, o ana au ma fitafita e usiusitai uma ia te ia aua o ia e I lalo foi o le pule a le isi tagata (Mataio 8:9). Afai e te manao I le tiapolo ma ana autau e usitai ia te oe, e tatau ona e I lalo o le pule a le Atua Silisili Ese. E faigofie lava faapena. 

 O le matafaioi a le Atua ia faamalosia ona e maua le manumalo I le lalolagi, ae o lau matafaioi o le tumau ona e gauai I le Atua, I le suafa o Iesu Keriso, Amene.