Samoan Devotional

OPEN HEAVENS
MATALA LE LAGI MO LE ASO TOONAI 16 IULAI 2022

Manatu Autu: O amio uma ua silisili ona Lelei (Whatsoever things are of virtue)

Tauloto – Tusi Paia: Faataoto 23:7 “Auā e pei ‘ona manatu o ia i lona loto, ‘ua fa‘apea lava o ia; e fai mai o ia ‘iā te oe, “‘Ai ia ma inu;” ‘ae lē ‘iā te oe lona loto..” 

Faitauga - Tusi Paia: Filipi 4:8, Iakopo 1:21-25

Upu Folafola
O se tasi o togafiti masani o lo'o fa'aaogā e le tiāpolo e fa'aoso ai tagata e fai le agasala o le tu'u o mafaufauga ma vaaiga leaga I o latou mafaufau. O le tele o le mafaufau o le tagata I amioga leaga o le tupu tele fo'I lea o le mana'o e fai le agasala. O le ala lea o lo'o fai mai ai le Tusi Paia ia tatou manatu tau lava o mea silisili ona ta’uleleia. O le ta’uleleia e faasino I amioga lelei. Afai e te va'ava'ai pea I ou mafaufauga o oe o lo'o fai amioga sesē e lē tusa ma le finagalo o le Atua, e i'u lava ina e faatino mo'I le agasala. O lea e tatau ai lava ona sili ona leoleoina lou loto ma faamautinoa e lē mau nofoaga I lou loto se mea inosia.

 Afai o lo'o e nofo ma ni mafaufauga o le a e faia le faita’aga, gaoi se tupe mai lou fale faigaluega ma isi mea leaga uma, fa'alēaogā nei ou manatu na. So'o se taimi e sau ai le tiāpolo musumusu atu mafaufauga agasala I ou taliga, fai I ai, “Alu I o'u tua Satani" ona e mafaufau lea I amioga lelei ae lē o le agasala.

 O isi auala e aumai ai e le tiapolo manatu inosia I o tatou mafaufau e auala mai polokalame a le TV o lo'o tatou matamata ai, o talanoaga e fai ma uo ma āiga ma ituaiga musika e faalogologo ai. Afai e tatala lou mafaufau I ata o le TV o lo'o tuleia ma unaia amio fa’api’opi’o ma mea inosia o le ā fiafia ma masani ai lou mafaufau ma i'u ai ina e faia ia amioga leaga. O le ala lea o le fai mai o 1 Korinito 15:33 ‘Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.”

 O nisi nei o manatu lelei e ao ona e mafaufau I ai.
1.       O le upu a le Atua. O le mea moni fai mai le Iosua 1:8, e tatau ona e mafaufau I le Upu a le Atua I le ao atoa ma le po.  O lona uiga ia faanofo le Upu a le Atua I lou mafaufau I taimi uma. Fai mai Tavita I le Salamo 119 :11‘Ua ‘ou teu i lo‘u loto lau afioga, ‘ina ne‘i ‘ou agasala ‘iā te oe’. Afai e te tauloto Afioga Paia a le Atua ma mafaufau I ai I le ao ma le po, e te lē faia le agasala. O le tamāoaiga o Afioga Paia a le Atua e leoleoina oe mai le fai o le agasala.

2.       Pe faafefea ona manumālōina agaga mo le mālō o le Atua? 

3.       O a auala e fa'alautele ai le mālō o le Atua I le lalolagi?

 Auā e pei ona manatu o ia I lona loto ua faapea lava o ia (Fa'ataoto 23: 7). 

 Tatalo.
Le Alii e, lo'u Atua ia e tapunia so'o se auala o mafaufauga inosia I lo'u loto, a ia tau lava o mafaufauga lelei mai ia te oe. I le suafa manumalo o Iesu Keriso. Amene.

OPEN HEAVENS
MATALA LE LAGI MO LE ASO FARAILE 15 IULAI 2022

Manatu Autu: O Mea uma e Logoleleia (Whatsoever things are of a good report)

 Tauloto – Tusi Paia: Mareko 5:36 ‘A o Iesu ‘ua fa‘afofoga i le tala ‘ua ta‘uina mai ai, ‘ona fetalai atu loa lea o ia i lē ‘ua pule i le sunako, “‘Aua ‘e te mata‘u; tau lava ‘ina e fa‘atuatua.” 

 Faitauga - Tusi Paia: Filipi 4:8, Mareko 5:22

 Upu Folafola
O se tala po’o se ripoti, o le faaiuga lea o se galuega na faatino. E iai ripoti e le lelei ma e iai foi riporti e lelei. O loo faamalosiau mai le Atua e tatau ona e manatunatu e na o ripoti e logolelei. I le Mareko 5:25-34, ua tatou faitau ai I le tala I le fafine puna toto. Na ave iai e fomai se ripoti leaga e oti le iuga o lona ma’i. Peitai, na ia faalogo foi I riptoi I ma’i e tele na faamaloloina e Iesu. Sa ia te ia le filifiliga I le ripoti e faalogo iai, o le ripoti a le fomai po’o le ripoti o le mana o Iesu. Faafetai I le Atua na taulai lana vaai I le ripoti e logolelei I le mana faamalolo o Iesu ma sa ia maua le vavega. I le Mareko 5:36, e iai se tagata na sau ma se ripoti leaga ia Iairo ua maliu lona afafine. Na fetalai atu iai Iesu ia aua nei ona amanaiaina lea ripoti. Na taulai lava vaai I le ripoti a Iesu ma ua toe ola lona afafine. O le ripoti o lo’o e mafaufau ma manatunatu iai e fua iai le tali e te maua. 

 O le tele o taimi e oo mai ai le fefe e faata’ita’i se mea fou aemaise na faata’ita’i muamua e isi ae lei manuia. Afai e te mafaufau pea I tagata e lei manuia ai, e le manuia foi la le tali e te maua. O loo fetalai mai le Atua, ia e mafaufau ma manatunatu I ripoti e logolelei ae le o ripoti e logo leaga. E leiloa pe iai ni tagata na ui I le tulaga o lo’o e iai ma e lei manuia le iuga, ae e iai foi tagata na ui ai ma sa iu I le manuia, ia e mafaufau I tagata na iu I le manuia. Tusa pe e te leiloa se tasi na ui ai ma manuia ai, vaavaai I ripoti logolelei le upu a le Atua. Ou te mautinoa o le tulaga o loo e ui ai o loo tusia I le Tusi Paia ma o loo iai se ripoti e logolelei. 

 E iai se pese lauiloa a Ron Kenoly a oo ina pese mai I le fuaiupu lea: O ai le ripoti e te talitonu iai? Ona tali mai lea o tagata ‘Matou te talitonu I le ripoti a le Alii. E fai mai lana ripoti, ua ou malolo, fai mai lana ripoti ua faatumuina a’u, fai mai lana ripoti ua ou saoloto, fai mai lana ripoti ua ou manumalo’. Ia e faaumatia mafaufauga ma manatunatuga o ripoti leaga ae taulai lau vaai I ripoti e logolelei ina ia e maua le manumalo. 

 O le Keriso ia te oe o le faamoemoega o le viiga (Kolose 1:27). E faamautinoaina lou lumanai, e manuia tele ma silisili ona lelei pe afai e te mausali ia Iesu Keriso. Ia taulai lau vaai I lea ripoti, I le suafa o Iesu, Amene 

OPEN HEAVENS
MATALA LE LAGI MO LE ASO TOFI 14 IULAI 2022

Manatu Autu: O Mea uma e Matagofie (Whatsoever Things are Lovely)

Tauloto – Tusi Paia: Failauga 3:11 ‘Ua faia e ia mea uma lava e matagofie i o latou lava tausaga; ‘ua tu‘uina fo‘i e ia le manatu i le lalolagi i o latou loto; ‘ae lē mailoa e le tagata le galuega ‘ua faia e le Atua mai le amataga e o‘o i le gata‘aga’.

Faitauga - Tusi Paia: Filipi 4:8

Upu Folafola
O vaega o lo'o fa'amatalaina e matagofie, e matua'i aulelei ma mananaia uma. O le lagi mo se faataitaiga, o se nofoaga matagofie tele; o mea uma foi i le Lagi e matua matagofie ma manaia I le vaavaai. O loo faapea mai le Faaaliga 21:21 ‘O puipui fo‘i e sefulu ma le lua o penina ia e sefulu ma le lua; ta‘itasi le puipui ma le penina e tasi na fai a‘i; o le ala tele fo‘i o le ‘a‘ai o le auro lelei lea, e pei o le tioata manino’.

 O le lagi foi o se nofoaga o le olioli tele; e leai ni tiga po o ni faanoanoaga i le lagi.

 14‘Ua i le pā fo‘i o le ‘a‘ai o fa‘avae e sefulu ma le lua, ‘ua i ai fo‘i igoa o le ‘au ‘aposetolo a le Tama‘i Mamoe e to‘asefulu ma le to‘alua. Faaaliga 21:4

 O mau o le Tusi Paia o loo faapea mai, e I ai le sootaga i le va o mafaufauga i mea matagofie ma lagona o le olioli. O le tele o lou mafaufau ma manatunatu i vaega matagofie uma, o le tele foi lena o lou fiafia ma lou olioli.

 O le toʻatele o tagata o loʻo pagatia I nei aso, ona o le mafaufau i mea e le matagofie, e ui ina tele mea matagofie o loʻo siomia ai i latou e tatau ona mafaufau i ai. Afai ua maua oe i lagona o le atuatuvale, e alagatatau loa ona e mafaufau i mea matagofie. Ia e manatua, o loʻo mafai lava e ou fofoga ona vaʻai manino ma faitau le upu faamalosiau o le Open Heavens (Matala le Lagi) i taeao uma, o lo’o mafai foi ona e savali, e mafai foi ona e faalaeiina oe lava. Atonu o loo manatu nisi o oe o se taʻifau (tulou) i le taimi nei, ae o loo faapea mai le Failauga 9:4 e sili ona lelei o le ulī ua ola, i le leona ua mate. E moni, o lou maua o le ola ma soifua manuia, o se tulaga matagofie e te manatunatu i ai, aua o lona uiga o loʻo i ai ni faʻamoemoega lelei mo lou olaga. Afai e te le o sailia se tasi e foa'i mai ia te oe se fatuga'o  ona o lo'o lelei atoatoa ma o lo’o tata lelei lou fatu, o nei mea uma ma isi e matagofie e mafai ona e mafaufau i ai.

 E tusa lava pe ua e manatu ifo lava, ua leai se mea matagofie e te mafaufau i ai i taimi ua tuanai, mafaufau oe i le lumanai matagofie e pei ona folafola mai e le Atua ia te oe; e i ai se aso e te nono atu tupe I atunuu (Teuteronome 15:6) e te faamālōlōina ē mamaʻi ma toe faatutū mai ē ua oti (Mareko 16:17-18) e te ola ai i se olaga matagofie faatasi ma lau fanau i itu uma o lau laoai (Salamo 128 1-3). 

 Ia taulai lau vaai I mea matagofie ua faia pe ua folafola e le Alii na te faia mo oe ma ia tafe pea lona olioli I lou olaga I le suafa o Iesu, Amene. 

OPEN HEAVENS
MATALA LE LAGI MO LE ASO LULU 13 IULAI 2022

Manatu Autu: O le Faletua I le Galuega a le Atua (The Woman in Ministry)

Tauloto – Tusi Paia: 1 Peteru 3:8 “‘O le i‘uga lenei, ‘ia loto gatasi ‘outou uma, ‘ia fealofani, ‘ia alolofa i le ‘au uso, ‘ia mutimutivale i le alofa, ‘ia agalelei.

Faitauga - Tusi Paia: Eseta 4:13-16

 Upu Folafola
O le asō, o le aso fanau o le faletua a Pastor EA Adeboye ma e fia faasoa o ia I ni aoaoga e ono maua I se faletua o loo galue I le galuega a le Atua. O se se tasi o amio taua e I le faletua e fesoasoani I le manuia o le galuega a le Atua ma e tele lona taua I le alualu I luma o le faifeau, o lona loto alofa. Afai e te iloa se mea e tusa ma le alofa, e tatau ona e iloa o le alofa e foai atu. E le gata e foai atu e le faletua le oa ma le tamaoaiga, e na te foai atu foi le taimi ma le alofa faaalia. E naunau le faletua e faaaluina lona malosi aua le lelei o mamoe o le lafu mamoe (2 Korinito 12:15). E toatele tagata e manatu ua tele le foai a le faletua ona ua tele le tamaoaiga I o la lima ma le faifeau, ae latou te le iloa sa foai lava o ia I le maualuga lenei e oo foi I le taimi o tau faasoa. E iai le aso na ou tau taofia ai le ma ato ufi mulimuli lava na totoe e na te foai atu I se tagata ua leai se meaai. Afai e te naunau e manuia I le galuega faafaifeau a le Atua, e tatau ona e gauai e foai atu seia oo ina leai se mea e totoe. 

 Mo faletua uma o loo galulue I le galuega a le Atua, aua o loo iai faatasi ma o latou tane, e tele foi mea e aoaoina ai. O loo faapea mai le Tusi Paia I le Faataoto 31:11 ua fa‘atuatua ‘iā te ia le loto o lana tane, e tatau I le ava poo le faletua ona fesili ia te ia lava: ‘E faatuatua ea la’u tane I ni vaega o le galuega a le Atua e aunoa ma lona popole iai?’ Afai o oe o le fesoasoani sili I lau tane, le faifeau, ae o loo faia e ia mea uma I le galuega, o le a ea la lau mea o faia e fesoasoani ai ia te ia?

 E tele vaega eseese o le Ekalesia Redeemed Christian Church of God  (RCCG) e lē popole pe faia foi iai se galuega a le faifeau aua foi e leai ma se ripoti faaletonu e aumai ai I le tele o tausaga o loo vaai ai e le faletua. E na te vaavaai le aoga Aso Sa a tamaiti, o le vaega e feagai ma le taliina o malo, o le fafagaina o tagata asiasi mai ma le saunia o meaai mo le miliona o tagata pe a fai a matou polokalame. E faatuatua ma le atoatoa le loto o le faifeau ia te ia ma e lei iai se taimi na faaletonu ai. E telē le matafaioi e faia e le faletua e fua iai le mamao ma le maualuga e oo iai le galuega a le Atua o loo faafoeina e se faifeau. E mautinoa e le mafai ona ausia le tulaga manuia o loo iai nei le galuega a le Atua I le RCCG e aunoa ma le faletua e galulue faatasi ma le faafeagaiga. O ia o se faamanuiaga mai le Atua I le faifeau. E na te lagolago foi I mea I le itu faaleagaga. E tatalo o ia ma le faifeau ma o le tele o taimi e auai faatasi atu ai I anapogi mo le 40 aso, po ma le ao. Ia faamanuia le Atua I le faletua, le ava a Pastor EA Adeboye. Ia maea faatasi le la galuega I le manuia, I le suafa o Iesu. 

 Tatalo mo le faletua o le faifeau I lau Ekalesia ina ia maua e ia le loto alofa ma ia avea o ia o se faamanuiaga I le galuega a le Atua, I le suafa matautia o Iesu Keriso, Amene

OPEN HEAVENS
MATALA LE LAGI MO LE ASO LUA 12 IULAI 2022

 Manatu Autu: O mea uma e Mamā (Whatsoever things are pure)

 Tauloto – Tusi Paia: Salamo 24:4“‘O lē ‘ua i ai lima mamā, ma le loto mamā; o lē ‘ua lē naunau lona loto i le mea fa‘atauva‘a, ma ‘ua lē tautō fa‘a‘ole‘ole.

 Faitauga - Tusi Paia: Salamo 24:3-6, Filipi 4:8 

Upu Folafola
O le mamā, e mafai ona faamatalaina o se mea ua tasi lona tulaga ma e leai se mea o filogia ai. Fai mai le Faaaliga 3:16 “O lenei, ‘ua e fa‘aleogalua, ‘e te lē ma‘alili, ‘e te lē vevela fo‘i, o le mea lea ‘ou te luai atu ai ‘iā te oe i lo‘u gutu.”

 E le o finagalo le Atua i tagata faaleogalua. I le Atua, e lua lava vaega, e te vevela pe malili; e leai se faaleogalua. E toatele tagata e manatu e lelei le ola faapaiaina ae le afaina le fai o sina agasala I ni nai taimi. Ua fetalai le Atua e na te luai atu ia te oe mai lona fofoga pe afai e te faaleogalua. Ua ia faaalia mai e toe afio mai o ia i se Ekalesia e leai se ila e tasi,  e tusa ma le Efeso 5: 27 o loo faapea mai ai:
“27‘ina ‘ia na tu‘uina atu o ia, ‘iā te ia, o le ekalesia matagofie lava, e leai sona ila, po o se ma‘anuminumi, po o se tasi mea fa‘apenā, a ‘ia pa‘ia ma ‘ia lē ponā 

O lenei afai e te manatu e mafai ona fa’aofi sina mea itiiti e lē mamā I lou loto, faamolemole ia e toe tōmanatu ane. E finagalo lo’u Tamā I le lagi e avea oe ma tagata e mamā atoatoa, ma ia leai se ila poo se ponā e tasi. O ē o le a avea ma ana faato’anofotane, e lē tatau ona iai sina ila se tasi i lona la’ei. O lona uiga ia soloia ese so’o se manatu eleelea mai lou mafaufau. 

E tatau ona faatumulia lou mafaufau i mea ua mamā, ae le o ni mea e mafai ona pona’ia ai le pa’ia o ou ‘ofu. E na o I latou e mamā o latou loto o le a latou vaaia le Atua i le toe aso. O loo faapea mai le Mataio 5:8  “Amu‘ia ē loto mamā; auā latou te iloa atu le Atua.” 

 Aua a o’o mai i tulaga o mataupu faale Agaga, afai e te ‘au ma le Atua, ia tuuina atoa lou agaga i le Atua, ae afai e te ‘au ia Satani, ia tuuina atoa iai lou loto. O lo o faapea mai le Alii i le Isaia 1:18: “O lo‘o o fa‘apea mai le ALI‘I: Ō mai ia, ‘inā tatou filifili ia, e ui lava ‘ina pei o ‘ofu mūmū a ‘outou agasala, e sisina ia e pei o le kiona; e ui lava ‘ina mūmū ia e pei o le ‘ie ulaula, e ‘avea e pei o fulufulu mamoe..”

I le itu faaleagaga, a ē lē pa’epa’e mā, e te mumu ulaula. E leai se vaega o le nofo I le pa. O le vaega e te naunau iai o lau filifiliga lava lea, peitai o le fautuaga a le Atua, ia e ola faapa’iaina ma ia pa’epa’e.

 Ia e manatunatu I mafaufauga mamā, I le suafa o Iesu, Amene.  

OPEN HEAVENS
MATALA LE LAGI MO LE ASO GAFUA 11 IULAI 2022

Manatu Autu: O mea uma e Tonu (Whatsoever things are just)

 Tauloto – Tusi Paia: Isaia 1:17 “‘Ia ‘outou fa‘amasani i le amio lelei, sā‘ili‘ili ia i le fa‘amasinoga; ‘ia ‘outou fa‘asaoina lē ‘ua sauāina, ‘ia ‘outou fa‘amasino i lē ‘ua mātuaoti, ‘ia ‘outou finau mo le fafine ‘ua oti lana tane....”

 Faitauga - Tusi Paia: Filipi 4:8

 Upu Folafola
O le tele o le amioleaga I o tatou nu’u ma afioaga I nei aso e afua mai mafaufauga amioleaga. Ana faapea e toatele tagata e aofia ai ma le tele o tagata fai mai o kerisiano e amata ona manatunatu I mea e tonu, semanu ua amata ona sologa lelei le lalolagi. O le amiotonu, o lona uiga o le faia o mea e tatau ma sa’o, o le manatunatu I le aafiaga o au amio I ou tuaoi ae lei faatinoina. O lona uiga e te le taumafai e taufaasese isi pe faamalosia lo latou faia o ni gaoioiga e le tatau ona latou faia. 

 E inosia I le Atua le faia o le amioletonu aemaise pe a e faia i tagata e maualalo atu lo latou tulaga. E inosia I le Atua pe afai e lē lelei lou faia o tagata faigaluega I lalo o lau puleaga e peiseai e le o ni tagata pe e te fa’aaogaina tagata e le aoaoina lelei. E finagalo le Atua ia e amiotonu I taimi uma. Ou te manatua se taimi na ou avatua ai se galuega e fauina se fale I se tagata. Ao ia fuaina le fanua e fau ai le fale, ua ou maitauina ua ia fuaina e faaaogaiina ai mita ae ua le faaaogaina le futu masani. Ina ua ou vaai atu I le mea sese, sa ou manatu o le a ou le faasa’oina. Na ou faalogoina le siufofoga o le Atua ia faasa’o o ia. Ua ou tali atu, afai o lenei tagata e agavaa I le fau fale, e tatau ona ia iloa le eseesega o le mita ma le futu. Tuu ai pea e fai le sese ma ia totogiina le tau o lenei sese, ae ou te le faasaoina. Na tuitui mai pea le Atua ia ou faia le amiotonu I lenei tagata ae na ou musu pea. Ona sau ai lea o se tasi tagata ma ina ua ma faatalofa, na ma lulu lima. E malo pei ni maa ona lima. E le na o le lulu o lou lima, ae ua ia oomiina. Ua matua tiga lou lima ma pei e mu I se afi. Na ou tagi atu I le Atua: Le Alii e, aisea ua faataga ai lenei mea e tupu ia te a’u? Na ia tali mai: Aisea na e le faasa’o ai le tamaloa fau fale e pei ona ou faatonuina ai oe? Na vave ona ou faasa’oina le tamaloa faufale ma o se vavega le vave ona te’a ese atu o le tiga o lo’u lima. 

 Fai mai le Ioane 3:16, e alofa mai le Atua I le lalolagi uma. E alofa o ia I le au mauoa ma le au matitiva ma e finagalo e maua uma e tagata le faamasinoga tonu. Ia e faia le amiotonu I tagata uma, aemaise o I latou e maualalo atu o latou tulaga ma e le mafai ona latou finauina lo latou faamasinoga tonu. E faatauaina tele e le Atua le vasega lenei o tagata. Fai mai le Faataoto 21:13 O lē na te punitia ona taliga i le vala‘au a le tagata mativa, e vala‘au lava o ia, ‘ae lē talia.

 Ia e manatu e faia le amiotonu I tagata uma e te fetaiai ai, I le suafa o Iesu, Amene. 

OPEN HEAVENS
MATALA LE LAGI MO LE ASO TOONAI 9 IULAI 2022

 Manatu Autu: O mea uma ua moni  (Whatsoever things are true)

 Tauloto – Tusi Paia: Ioane 17:17 “ia e fa‘apa‘iaina i latou i lau ‘upu moni; o lau afioga o le ‘upu moni lea..”

 Faitauga - Tusi Paia: Filipi 4:8

 Upu Folafola
O lou agaga lou mafaufau.  So'ose manatu e te mafaufau i ai, e lagona e lou loto ma i'u ina faia le faaiuga o le ituaiga tagata e i ai oe. O le ala lea o le fai mai o le Tusi o Faataoto 23 :7 “Auā e pei ‘ona manatu o ia i lona loto”,

O le lelei ma le leaga o lou olaga e a'afia i mafaufauga e te fa'atagaina i totonu o lou loto e ui atu i lou mafaufau. Fai mai le tusi a Faataoto 4 :23  ‘Ia sili ‘ona leoleoina o lou loto i le leoleoina o mea uma; auā e tupu mai ai le amio.

 O le ala lea e tāua ai tele lou mafaufau tau lava o mea o loo fai mai ai le tatou Tusi Paia faitau o le asō. So'o se mea e sa'o atoatoa ona itū uma e mafai na ta'u e sa'o. Fa'ata'ita'iga a e vaai i se ketapila (caterpillar) ma e ta'u o le pepe (butterfly) o le sa'o lena. E lē faapea a ē lē  iloa atu ni ona apaau ma o lo'o totolo i le asō, ona lē mafai lea na lele le pepe (butterfly). E mafai na foliga i le taimi nei o se anufe peita'i mulimuli ane o se iniseti aulelei ma matagofie. E faapenā fo'i oe e mafai na foliga e te mativa i le taimi nei peita'i e te lē mativa, e foa'i mai e lou Atua mea uma e te mana'omia e tusa ma le faula'i o lona viiga ia Keriso Iesu. ( Filipi 4:19) Atonu e foliga o lo'o e gasegase i le taimi nei peita'i ia e mafaufau i le moni o le upu a le Atua o lo'o fai mai o fa'alavalava o Iesu ua malolō ai tatou. (1 Peteru 2:24)

 Fai mai le tatou upu tauloto o le asō o afioga Paia a le Atua o le Upu moni lea ma ua fai mai fo'i (Ioane  1:14), o Iesu o le Upu. O lona uiga e tatau ona tatou mafaufau tau lava o le Upu a le Atua i taimi uma. So'o se mea e lē tusa ma le Upu a le Atua o le pepelo lea ma e lē tatau na e fa'atagaina i lou mafaufau. O le Upu moni e fai mai o oe le ulu ae lē o le si'usi'u  ( Teuterenome 28:13) Aua lāia ne'i e talitonu o oe se tagata faiaina. Fai mai le upu e i ai fa'atasi le Atua ma oe i taimi uma ( Mataio 28: 13) aua ne'i e talitonu e tu'ulafoaiina oe e le Atua i se taimi. O le Upu moni e leai se auupega e faasaga tau ia te oe e taunuu. (Isaia 54 : 17) aua ne’i e talitonu e mafai e sesi na fa'aleaga oe. Faitau lau Tusi Paia i aso uma ia e iloa ai le Upu moni ma ia e teu i lou loto ana afioga Paia uma ua aoaoina ai oe. 

 Tatalo
Tamā fesoasoani mai faamolemole ia tumau lo'u faatuatua i au afioga Paia i taimi uma aemaise i taimi o fa'afitauli ma faigata o le olaga. I le suafa manumālō O Iesu Keriso, Amene.   

OPEN HEAVENS
MATALA LE LAGI MO LE ASO FARAILE 8 IULAI 2022

 Manatu Autu: Toe Faatumu Lau Tane Penisini (Top Up your Fuel Tank)

 Tauloto – Tusi Paia: Mareko 6:31 “‘Ona fetalai atu lea o ia ‘iā te i latou, “‘Inā ō mai ia, tau lava o i tatou, i se mea tu‘ufua, se‘i tou mapu a‘e teisi” Auā e to‘atele ē na feoa‘i ai, ‘ua lē mafai ai i latou ‘ona ‘a‘ai.”

 Faitauga - Tusi Paia: Mareko 6:30-32

 Upu Folafola
O se tasi o tulaga taua o se taavale, e manaomia le utu o le penisini I taimi uma pe afai o loo faaaogaina. E le taua poo le a le tele o le penisini, pau le tulaga e mautinoa, afai o loo faaaogaina pea, e tatau ona utu aua afai e leai, e le mafai ona toe alu le taavale. E faapena foi oe le tagata galue, e manaomia lava le toe faatumu pe afai ua tele le malosi ua alu. Afai e maea ona faaaogaina lou malosi e tele, e tatau ona e mapu ane, malolo ma ai lelei, ina ia toe faafoisia le malosi. I le tatou fuaiupu tauloto mai le Tusi Paia, na faatonu e Iesu le au soo ina ia mapu ane  teisi ma malolo ina ua maea se galuega fita. 

 O le mafuaaga ua le ausia le tulaga e tatau ona iai e le toatele o tagata o le Atua ona ua le mafai ona malolo. Ua toatele tagata e mulimuli ma tauanau mafutaga ona o le faauuga, peitai afai e le lava ona fai se malologa, e ono afaina le soifua maloloina. E ono maualuga le faauuga ia te oe, ae o oe foi o le tagata I le tino nei. E oo lava ia Iesu Keriso ma matua vaivai o ia ua oo ina alu atu I se vaega paganoa o le vaa ona moe ai lea I le ogatotonu o le matagi (Mareko 4:37-38).

 O nisi o taimi e tatau ona toe faatumu le faauuga ia te oe. Ina ua maea le tele o vavega matautia na faia e Iesu, na ia alu atu I le mauga e tatalo ai (Mataio 14:16-23). Na ou fai I lou atalii I le tasi aso e faifai lemu ona o le tele polokalame e auai atu iai ae laitiiti le taimi e malolo ai ma toe faatumu. Ae tilotilo mai ia te au ma ata i lona manatu e faapea e sili atu lou galue. Na ou taumafai e faamanino e le tele ni polokalame ou te auai ai i taimi faapitoa o le Tausaga pe afai le anapogi a le Ekalesia aoao. E le mafai ona ou malaga I fafo I taimi ia o anapogi aua e manaomia le toe faatumu o le faauuga. Afai e le toe faatumuina le faauuga ae ua leai lava se faauuga, e iloa atu e tagata ona e iloa ai lea e le o oe o loo alolofa iai, ao le faauuga o loo e tauaveina. 

 Soo se inisia taavale e ono fai atu ia te oe e matuia le mea e oo iai lau taavale pe afai e alu ae tau leai se penisini e ola ai. Aua a e faia, e aoina mai palapala o loo to’a I lalo o le tane ma faaleagaina ai taavale. Aua e te fealuai e leai se faauuga. Afai e te le faaavanoaina le taimi e malolo ai ina ia toe faafouina le malosi ma le faauuga, e ono lamatia lou soifua.

 Ia manatua, faaavanoa se taimi e malolo ai ma toe faatumu le poto, le malamalama, le faauuga faapea le malosi o le tino. I le suafa o Iesu, Amene.     

OPEN HEAVENS
MATALA LE LAGI MO LE ASO TOFI 7 IULAI 2022

Manatu Autu: Aumai Faamaumauga 2 (Get Reports 2)

Tauloto – Tusi Paia: Roma 14:12 “O lenei, e ta‘itasi i tatou na tala i lana amio i le Atua”

Faitauga - Tusi Paia: Faaaliga 2:1-7

Upu Folafola
O le faitauga o le Tusi Paia ananafi sa faaalia ai le faamatuu atu e Iesu o nisi o matafaioi ma galuega I le au soo ao faagasolo lana galuega faamisiona I le lalolagi nei. O le faitauga o le Tusi Paia o le aso o loo faamatuu mai pea e Iesu galuega e ui o loo afio o ia I le itu taumatau o le Tama I le Lagi. O le taimi la lenei, o loo ia mauaina ripoti ma faamaumauga o faifeau uma ma avatu iai latou le suesuega ma iloiloga o a latou galuega ina ia mafai ona faaleleia pea le tulaga o galuega ua tuuina mai e faatinoina. 

 O lenei, I lou tulaga taitai, e tatau ona e Iloilo lelei le faatinoina o galuega a I latou ua e faamatuu atu iai galuega ma ia avatu iai ripoti o iloiloga I le tulaga o galuega faatino. Faamanino iai tulaga lelei o le ola galue faapea foi vaega e tatau ona toe faaleleia. Ia mautinoa ma manino le vave ona tuuina atu iai le ripoti o le olaga galuega ae lei umi tele ona faia se tulaga sese seia oo ina matuia ma puapuaga I le taui. I le faitauga o le Tusi Paia o le aso, na faamautinoaina e Iesu e tatau ona avatu ripoti o iloiloga o galuega faatino ae lei o’o mai ni taui. E le afaina pe amanaia nei ripoti o iloiloga pe leai, ae tatau pea ona tuuina atu ni ripoti o le faatinoina o galuega. 

 Afai o oe o se tagata galue, ae e te le amanaiaina ripoti o iloiloga a ou taitai, e te ono puapuagatia I le taui. O la’u fautuaga ia te oe, aua e te faatali I se ripoti I le tulaga o lau galue, alu I lou taitai ma fesili iai “Lau susuga, o ‘ou faatinoina ea I se tulaga lelei tiute ua e tuuina mai ia te au?” Afai e ta’uina mai, e tatau ona e fetuutuuna’I ina ia mautinoa o loo e faatino e sili atu I le tapulaa o loo aumaia I le ripoti. O le ala lea e mafai ai ona e ‘alo ese mai puapuaga e fai ma taui I le leaga o le tulaga galue. 

 E le gata e te avatu ni ripoti o le tulaga galue o I latou o loo e taitaia, e manaomia foi se ripoti mai iai latou I lou faatinoina o galuega ta’ita’i. E le tatau I se ta’ita’i ona fefe I se ripoti o lona tulaga galue mai iai latou o lo’o ia taitaia. E le mafai ona e iloa ma malamalama i le aafiaga o au gaoioiga ma upu e te tautala ai, o lea, e tatau ma onomea ona aumai ni ripoti mai isi tagata pe a mai lou faatinoina o galuega taitai. Afai na fesili Iesu I le au soo pe fai mai e a tagata o ai ia (Mataio 16:13-15) e talafegai ona tatou faata’ita’i iai.  E le faapea ua e maualuga tele ua le mafai ai ona e fesili atu mo se repoti o lou tulaga galue ma I a’i latou o loo e taitaia. I le suafa o Iesu, Amene.   

OPEN HEAVENS 
MATALA LE LAGI MO LE ASO LULU 6 IULAI 2022

Manatu Autu: Aumai Faamaumauga 1 (Get Reports 1)

Tauloto – Tusi Paia: Mareko 6:30 “Ua potopoto mai le ‘au ‘aposetolo ‘iā Iesu, ‘ua latou talatala mai fo‘i ‘iā te ia o mea uma, na latou faia, ‘atoa ma mea na latou a‘oa‘oina”

Faitauga - Tusi Paia: Mareko 6:7-13, 30

Upu Folafola
O le faasoa atu o galuega I isi tagata o se faiga faavae taua I tulaga taitai. Ona o le taitai ua na o se tagata e toatasi, e le mafai ona ia ausia ni tulaga tetele seiloga e faamatuu atu nisi o ona tiute I isi tagata latou te faatinoina. O a’u (Pastor EA Adeboye) o le Taitai Aoao o le Ekalesia Redeemed Christian Church of God, ua iai ana aulotu i le sili atu ma le 190 atunuu o le lalolagi. E matua le mafai ona ou faatonutonuina uma galuega I totonu o nei mau aulotu ma o lea ou te faasoa ma faamatuu atu I isi faifeau e latou te lagolago ia te au I le faatinoina o le galuega a le Atua. O se tasi o sasi ma sese e tele ona fai e nisi, o le tuu tiai lea o galuega I tagata o loo faasoa atu iai. E masani lava ona ou faia le tala lenei, e le mafai ona e maua le tulaga o loo e manatu iai, ae e te maua le tulaga e te suesue ma tuliloaina. Afai e maea ona e faasoa atu galuega I isi tagata, e tatau ona e suesue lelei ma tuliloa ina ia mautinoa o loo sa’o atoatoa lona faatinoina. Afai e le mafai ona e faatinoina lea suesuega, e tatau ona faatonuina e aumai ni faamaumauga ma ripoti e auiliili mai ai galuega uma e pei na faia e le au soo o Iesu ia Iesu I le Mareko 6:30. Fai mai le Tusi Paia na latou logo atu ia te ia o mea uma na latou faia ma aoao atu. O le faamaumauga e tatau ona auiliili mai ai mea uma e faia, mea uma na aoao atu I le faatinoina o le galuega. 

 O le faitauga o le Tusi Paia o le asō e fesoasoani tatou te malamalama ai, a maea so’o se vaitau ma galuega e faatino ai, e tatau ona faia mafutaga e tuuina mai ai e tagata faamaumauga ma ripoti o mea uma na latou faia. A maea se sauniga, so’o se tagata galue e tatau ona aumai faamaumauga I tulaga lelei o le sauniga faapea foi ni luitau na iai I vaega uma. O lea faiga o le a mautinoa ai o leisi sauniga poo le vaitau e faia ai ni galuega faapitoa, o le saunia lelei lea o ni auala e le toe tupu ai faafitauli ma luitau na lipotia mai muamua. 

 O nei aso, ua mafai ona maua vave ripoti e faaaoga ai telefoni. O le tele o taimi a ou malaga atu I atunuu I fafo, ou te valaau atu I le faifeau o loo vaaia le galuega: ‘Malo le galue, e faauuina tele le lauga o lenei aso’. Sa faateia muamua pe faapefea ona vave ona ou faalogo I le lauga. Pau lava lau mea e fai o le sue o le itulau a le RCCG I luga o upega tafailagi ona ou matamata ai lea I le lauga. E vave lava ona ou mauaina le faamaumauga o vaega uma o loo ia aoaoina I luga o lau telefoni. E mafai foi ona e faia faapena pe afai e lelei lou faatulagaina o le faava’a lelei e aumai ai faamaumauga ma ripoti mai tagata o loo e taitaia, e faaaogaina ai metotia fou faatekonolosi o nei ona po. 

 Faasoa atu iai galuega, ae aua e te lafoai ou tiute faataitai, I le suafa o Iesu, Amene.