Samoan Devotional

OPEN HEAVENS
MATALA LE LAGI MO LE ASO LUA 26 IULAI 2022

Manatu Autu: O Oe o se atalii poo se afafine o le Atua? (Are you a child of God?)

Tauloto – Tusi Paia: Ioane 10:14 “O a‘u nei o le leoleo mamoe lelei; ‘ua ‘ou iloa a‘u mamoe, ‘ua iloa fo‘i a‘u e a‘u mamoe”;

Faitauga - Tusi Paia: Kalatia 3:21-26 

Upu Folafola
Fai mai le Efeso 5:1 ‘O lenei, ‘ia fa‘aa‘oa‘o ‘outou i le Atua, fa‘apei o le fānau pele’

 O soo se tagata e fai mai o ia o le afafine poo le atalii o le Atua e tatau ona ia faapei o uiga ma amio a le Atua. O soo seisi e faapea mai o le atalii po’o se afafine o le Atua ae so’o I seisi tamā, o ono taua o ia e leai sona tama. O le tulaga lea, afai e te tautino atu o oe o se atalii po’o se afafine o le Atua e tatau ona e suesue lelei poo fea e te tu ai. Fai mai le 1 Ioane 3:9 o I latou e fanau mai le Atua e le faia le agasala. O e faia pea le agasala ma e manatu o se faiga masani e talafeagai? O se atalii poo se afafine moni o le Atua e le taliaina le faia o le agasala o se masani e talafeagai. Na fetalai Iesu I le Mataio 7:16 e faapea: 16Tou te iloa i latou i o latou fua. Pe tau mai ‘ea e tagata se fuifui vine mai le la‘au tuitui, po o mati mai le la‘au talatala?

 O le a lenei fua? O le fua e faamaonia ai I tagata uma e te lua feiloai o loo iai le Agaga o le Atua ia te oe, o le fua o le Agaga. O a ni fua e fua mai ia te oe? Afai e Iloilo fua mai ia te oe, e fai mai e a tagata tou te faigaluega faatasi, o lou aiga ma tuaoi, o se afafine poo se atalii o ai oe? E o mai ni au uo masani ma faapea mai ia te oe, o le a latou faia se togafiti i totonu o se tou faalapotopotoga, aua latou te iloa lelei, e te faatagaina?  E te taui atu ea le leaga I le leaga? E le o ni uiga ma amioga lena a le Atua ae o le tiapolo. E tatau ona manino poo le atalii poo le afafine oe o ai, ina ia aua nei lavea oe I le vaega e leai ni tama. Afai o oe o le atalii poo le afafine o le tiapolo, aisea e te fai mai ai o oe o le afafine poo le atalii o le Atua? Aisea e te auai ai fua I mea e iai le fanau a le Atua ma faatigaina fua lou laualo I le taimi o anapogi? Aisea e te le ola ai pea mo le tiapolo, ma a oo I le taimi e lafoina ai o ia I le lepa afi, e te lua o atu ai faatasi? Peitai ane, afai e te tautino o oe o le afafine poo le atalii o le Atua, e tatau ona atagia i ou uiga, foliga a Keriso ma e tatau i tagata o siomia oe, ona latou molimauina o oe e te foliga i lou Tamā i le Lagi.

 I le aso mulimuli, o le a Iloilo ma tu’ueseesea e le Atua le saito ma le titania. O le a ia tuu eseese ai tagata e leai ni tama mai lana fanau moni. O le mafua’aga lea, a o’o i le aso mulimuli,  o le a ia faapea atu i nisi: ‘Ou te fai atu ‘iā te ‘outou, ‘ou te lē iloa ‘outou pe maifea; ‘ina ō ‘ese ia ‘outou ‘iā te a‘u, o ‘outou uma o ē fai amio leaga.’ Ioane 13:27

Afai o oe o le fanau moni a le Atua, e te ola fa’apaiaina.

 Faa’avanoa sina taimi, e te suesue ai i lou olaga i le taimi nei, po’o a ni vaega e te le o foliga ai i le Atua? Ia salamo loa ma amata ona faataitai i lou Tamā, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO GAFUA 25 IULAI 2022

Manatu Autu: E Toe Afio Mai o Ia (He will return)

Tauloto – Tusi Paia: Luka 12:37 “Amu‘ia ia ‘au‘auna e maua i latou e lo latou ali‘i, o mataala pe a sau. E moni, ‘ou te fai atu ‘iā te ‘outou, e fusi e ia ona ‘ofu ma fai atu ‘iā te i latou ‘ia ta‘o‘oto e ‘a‘ai ma alu ane lava ma ‘au‘auna ‘iā te i latou”

Faitauga - Tusi Paia: Roma 13:11-14 

Upu Folafola
I le tele o tausaga talu ai, ina ua faatoa ou fanaufouina ma ua amata ona auauna I le Alii, na ou faalogo ai I le laugaina masani o le toe afio mai o lo tatou Alii o Iesu Keriso. Sa matuai malosi lava le faalauaiteleina o lenei mataupu ma ua oo lava ina matou aioi atu I tamaiti aoga I le Iunivesite e faaauau le aoga ma galulue seia toe afio mai ia (Luka 19:13). Sa masani foi I kerisiano I Yoruba I Aferika, a feiloai atu I se tagata e faapea atu: ‘Malo le galue, ao tatou taulai le vaai I le toe afio mai o Iesu Keriso’. I le aso, ua tau leai ni lauga ma aoaoga e faamanatu mai ai I tagata le toe afio mai o le Alii. Ua tele ina laugaina na o mataupu e fiafia iai tagata I le tele o pulelaa. Ua seasea foi ona e vaai atu I kerisiano o ola ma soifua ma taulai le vaai I le toe afio mai o lo tatou Alii. 

 O se tane o loo faatalitali I le toe afio mai o le Alii e na te le sauaina lana ava. O se ava o loo iloa e faafuasei ona toe afio mai le Alii e ava ma usitai I lana tane. O se tagata faigaluega o loo taulai le vaai i le toe afio mai o le Alii e na te le gaoiina se mea mai le fale faigaluega. O se faifeau ma le failauga o le talalelei o loo sauniuni I le toe afio mai o le Alii e na te le nanaina le upu moni mai tagata o lana aulotu. O soo se atalii poo se afafine o le Atua o loo moni lana savaliga ma le Alii e na te faia mea uma e taofia ai lona le siitia ma le Alii pe a toe afio mai. Tusa pe e te fiafia iai, talitonu iai pe leai, e toe afio mai le Alii. Afai o oe o se failauga o le Talalelei, o loo ia te oe le matafaioi e lapatai mamoe a le Atua, I latou I tuuina atu I lalo o lau vaavaaiga, ina ia mataala ma taulai le vaai, I le toe afio mai o le Alii. Afai o oe le faifeau poo le failauga e le o sauniuni, o le a matua faigata I lau lafu mamoe ona sauniuni. 

 Ua tatou iai I le taimi e tatau ma alagatatau ona manaomia le talalelei o le toe afio mai o le Alii. Ua oo atu le lalolagi I le faigata ma matuia, peitai o loo momoe pea le fanau e faitau miliona a le Atua. Na uluai talanoa mai Iesu I le tulaga ua iai nei le lalolagi I le aso, e toatele o le a momoe (Mataio 13:25). O la’u tatalo, ia aua lava nei e moe I le moe o le oti, I le suafa o Iesu. 

 I le aso mulimuli, e na o I latou e faamaoni I le Atua o le a iai I le siitiaga. Tusa lava poo le a le loloto o le momoe a le lalolagi, e toe afio mai Iesu Keriso. O le tulaga lea, e alagatatau ona taofia lou faataalo ae amata ona e ola faapaiaina. O lea ua faia la’u matafaioi o le ta’u atu ia te oe le upu moni. O le tulaga e te i’u atu iai o lau lava filifiliga lea. 

 Tatalo
Lo matou tama I le lagi, faamolemole fesoasoani mai ia te a’u ina ia aua nei o’u moe I le moe a le oti. Fesoasoani mai ina ia ou ala pea, mataala ma tatalo seia e toe afio mai, I le suafa o Iesu Keriso, Amene. 

OPEN HEAVENS
MATALA LE LAGI MO LE ASO SA 24 IULAI 2022

Manatu Autu: Pepa Ulufale I le Lagi (Visa to Heaven)

Tauloto – Tusi Paia: Mataio 5:8 “Amu‘ia ē loto mamā; auā latou te iloa atu le Atua.”

Faitauga - Tusi Paia: Salamo 24:3-5 

Upu Folafola
I le fuaiupu tauloto o le aso mai le Tusi Paia, ua tatou iloa manino ai, o le pepa ulufale I le lagi o le loto mama. O le tulaga o lou loto e iloa ai pe e te maua le lagi pe leai. Aua foi o au upu ma gaoioiga e faia e fua iai le tulaga o lou loto. Fai mai le Mataio 12:34 ‘Fānau a gata fe‘ai e, ‘outou o lo‘o leaga, e mafaia fa‘apefea ‘ona ‘outou ‘upu lelei? Auā o le tele o mea i le loto e tautala mai ai le gutu’.

Fai mai le Mataio 5:28, afai e te tilotilo I se fafine ma tuinanau atu ia te ia, ua e faia le mulilua. E faapena foi I fafine. Fai mai le Levitiko 17:11, o le ola o le manu o lo’o I le toto. O le fatu, o le itutino lea e na te faagasoloina le toto I vaega uma o le tino, o lona uiga o le toto o le nofoa o le ola. ‘Ia sili ‘ona leoleoina o lou loto i le leoleoina o mea uma; auā e tupu mai ai le amio (Faataoto 4:23).

Afai e te fanaufouina, e suia lou gafa. Ua tau lou gafa I le Atua. O lona uiga ua faafouina lou loto. O le mafuaaga lea o loo fai mai ai le 2 Korinito 5:17, afai e te fanaufouina, e avea oe ma se tagata fou. I le Esekielu 36:26, o loo faapea mai le Alii e na te foai atu se loto fou. O lenei loto fou, ua e maua ai se ola fou e tafe I totonu ia te oe, o le ola o Keriso lava ia. Fai mai le 1 Ioane 3:9 O i latou uma o ē ‘ua fānau mai i le Atua, latou te lē faia le agasala; auā o lo‘o tumau i totonu ‘iā te i latou lona uiga; e lē mafai fo‘i ‘ona agasala, auā ‘ua fānau mai i latou i le Atua.

Afai e te fanau mai le Atua, o lou fatu poo lou loto ua faagasoloina mai le ola o Iesu I lou tino, e le mafai ai ona e toe agasala. O le mea lea ou te ofo ai I le aoaoga e ta’ua o le ‘alofa tunoa maoa’e’, o loo laugaina e nisi, e faapea mai e mafai ona e fanaufouina ae le afaina le faia pea o le agasala I lou olaga. Afai o lo’o e faatagaina pea le agasala I lou olaga, aua nei faasesēina oe, e le o ia te oe le ola o Keriso. O le ola faapaiaina e le o se aoaoga a le Feagaiga Tuai, o le olaga ma le natura o le fanau a le Atua. I le upu faamalosiau ananafi, na tatou talanoa ai I le ola faapaiaina ma e lei sii mai lava ni mau mai le Feagaiga Tuai, ae na o le Feagaiga Fou. Aua nei faaseseina oe I ni aoaoga o le alofa tunoa e maua faatasi ma le agasala. A aunoa ma le faapaiaina, e le mafai e se tagata ona iloa atu le Atua. I le suafa o Iesu Keriso, Amene.  

OPEN HEAVENS
MATALA LE LAGI MO LE ASO TO’ONAI 23 IULAI 2022

Manatu Autu: Feiloai ma lou Atua (Seeing God Face to Face)

Tauloto – Tusi Paia: Faaaliga 22:4 “Latou te va‘ava‘ai atu fo‘i i ona fofoga, e i ai fo‘i i o latou muaulu lona suafa”.

Faitauga - Tusi Paia: 1 Ioane 3:2-10 

Upu Folafola
E i ai le aso, o se aso matagofie. O le a o'u vaai ai i fofoga o lo'u Fa'aola o lo’o molimau mai ai le Tusi o 1 Ioane 3:2

Ou te lē iloa iā te oe, a o lo'o o'u faatali ma le loto naunau I lea aso. Fai mai le 1 Timoteo 6:16, o le Atua o lo'o tatou faatalitali i ai e afio I le malamalama e lē masao i ai se tasi. O lona pupula e mata'utia e lē mafai e se tasi ona latalata i ai. Peita'i o’u te fia vaai ia te ia. E faapefea ona mafai lea mana'o? O le ala lea ua fai mai ai le Tusi o Efeso 5:27 O lē o le a avea ma fa'atoānofotane a Keriso Iesu e leai sona ila po'o se ma'anuminumi. Talitonu mai ia te a'u afai o e manatu e te sao i le Lagi ma agasala o lo'o e fa'ataga i lou olaga, o lo'o e fa’asesē lava oe iā te oe. O le a fa’ate’ia le toatele pe a o'o mai lea aso. So'o se tasi e i ai se ila e tasi o le ā lē fa'atagaina I le Lagi I lea aso.  Fai mai le tusi o 1 Ioane 1:7 o le toto o Iesu Keriso e fa'amamāina ai tatou I agasala uma lava. E lē na o le 99% o agasala. O a tatou agasala uma lava.

I le 1 Peteru 1:15 tatou te vaai ai i le tulaga maualuga o le ola faapaiaina e finagalo ai le Atua ia i tatou.
‘Ae pei ‘ona pa‘ia o ia na vala‘auina ‘outou, ‘ia fa‘apea fo‘i ‘outou ‘ona pa‘ia ‘iā ‘outou amio uma 1 Peteru 1:15.

Ia Paia i tatou auā e Paia o ia lo tatou Atua. I se isi faaupuga o le maualuga o le Paia o lou olaga e lē faatusā i le Paia o le soifua o lou faifeau po'o ta'ita'i o le Ekalesia auā e ono manatu i latou e lē afaina agasala laiti. O le Paia o lou olaga e ao ona pei o le Paia o le Atua. Na fetalai Iesu i le tusi o Mataio 5:48 E tatau ona atoatoa la tatou amio lelei faapei o lo tatou Tamā i le Lagi e atoatoa ona lelei o ia. E ao ona faapaiaina outou e pei ona fai mai le 1 Tesalonia 5:22 ia mamao outou ma mea leaga eseese uma lava. O mea ua leaga ma mea uma e āfua ai, ma fesoota'i ma le agasala ia e aloese mamao ai. E mātuiā i le finagalo o le Atua lou ola Paia.  Silasila fo'i, afai e te fia ulu atu i le mamalu o le Atua e lē mafai ona e sao pe a i ai se agasala itiiti i lou olaga. Fai mai le Efeso 5 : 3-4 e lē tatau na e tautala i upu fa’atauva’a ma le fa'aulaula. O lona uiga a tausua nisi i upu faitaaga ma le amio leaga aua ne'i e fa'aopoopo pe ata i ai, e iloa ai o lo'o e a'afia ai fo'i ma oe I le mea sesē na e fai. O e naunau mo'i e te vaai i lou Atua i lea aso? Afai e te mana'o, ia e ola faapaiaina atoatoa.

Tatalo
Tamā faamolemole aumai lou Alofa tunoa e mafai ai ona o'u ola Paia auā e Paia lava oe lo'u Atua. I le suafa o Iesu Keriso, Amene.

OPEN HEAVENS
MATALA LE LAGI MO LE ASO FARAILE 22 IULAI 2022

Manatu Autu: Faamasino I le Atua? (Judging God?)

 Tauloto – Tusi Paia: Isaia 45:9 “‘Oi talofa i lē ‘ua finau ma lē na faia o ia, o le ta‘ega ipu i ta‘ega ipu o le ‘ele‘ele. Pe fai atu ‘ea le ‘omea i lē na te gaosia, “O le a ‘ea ‘e te faia?” pe fai atu lau galuega, “‘Ua leai ni ona lima?”

 Faitauga - Tusi Paia: Luka 18:9-14 

 Upu Folafola
E ono malie se tulaga e tupu I se tagata e faia sana mataupu I le faamasinoga, ma a’o faagasolo le mataupu, e liliu atu le ua molia I le faamasino ma faapea atu: “O oe o le sui o le malo, ae ona ua e le tausia lelei a’u, ua ou faia ai lenei agasala, o oe e tatau ona molia”. O le mea tonu lava lea na tupu I le Kenese 3:8-12 ina ua fesiligia e le Atua Atamu pe aisea ua ia lafi ai mai ia te ia. 

I le Mataio 25:14-30, ua tatou faitau ai I le tala I le Matai na ia tufa atu taleni  I ana auauna se toatolu ia faafaigaluegaina a’o alu atu o ia I se malaga. O le toalua o I laua na o atu ma faafaigaluega a la’ua taleni ao le auauna mulimuli na ave iai le taleni e tasi, e na te lei faia se mea. Ina ua toe taliu mai le matai ma ua ia aami I latou mo ni ripoti, o le auauna mulimuli ma sau ma sa ia faamasinoina o lona matai. Na ia faapea atu, o oe lo’u matai e tua’ina. Muamua, na e avatu taleni e sili atu I isi tagata nai Io a’u. Lona lua, ou te iloa o oe o se tagata amiolega e te selesele lava I vaega e te lei lulu ai, ma o lea na ou nanaina ai lau taleni. Na faamatala e Iesu lenei tala e faamanino mai ai iai tatou, e toatele o lo’o faamasino i lo tatou matai, le Atua Silisili Ese. E tatou te faapea atu I le Atua, o oe lava ua faapea ma mafua ai ona ou faia nei amio. E tua’ina oe, o oe na e faia au ia faapenei. Na aveeseina mai le taleni mai le auauna e faamasinoa atu ma ua lafoina o ia I fafo mai le mamalu o le Atua, I fafo I le nofoaga pogisa, e iai tiga ma faanoanoaga. O leisi taimi e faaosoosoina ai oe e faamasino I le Atua, ia e faaeteete aua e lē lelei le iuga. 

 Afai e ete alu atu I le Atua I le tatalo, aua e te faapea atu e ui I lou lelei, ae le tali mai lava o ia i au tatalo. Ae afai e te alu atu ia te ia I le tatalo, ole atu mo lona alofa mutimutivale auā afai e te iloiloina mea uma, e te iloa ai le tele o mea e tatau ona e faia e alualu ai I luma ma e te lē agavaa i mea uma ua foai atu e le Atua ia te oe. 

 E iai se tina na sau ia te au ma se faaseā, ua fesiligia pe aisea e le faamanuia ai le Atua ia te ia e ui e totogi uma ana sefuluai ma isi lafoga,  e faaavanoaina foi le tele o lona taimi e auauna ai I le Atua. Ua galo ia te ia ua maea ona ia tau mai ia te a’u o lea ua alu lana faatolu o faaipoipoga. Ua ou ta’u atu ia te ia, o le mea o loo ia manaomia o le alofa mutimutivale o le Atua. Afai ou te alu atu I le Atua, e pau la’u tala e faia: Le Alii e, faamolemole ia oo mai ia te a’u lou alofa tunoa, I le suafa o Iesu, Amene.  

OPEN HEAVENS
MATALA LE LAGI MO LE ASO TOFI 21 IULAI 2022

 Manatu Autu: O Lē Na Uluai Faia Mea Uma(The Originator of all Things)

 Tauloto – Tusi Paia: Iakopo 1:17 “o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei, mai lugā lava ia, e alu ifo mai le Tamā o malamalama, e lē o ‘iā te ia se mea fa‘alētumau po o sina liliu itiiti.

 Faitauga - Tusi Paia: Tanielu 4:29-37 

 Upu Folafola
E iai se aso a’o ou savali ma tatalo, ua faia se ma talanoaga ma le Atua. Ua e iloa, afai e te fesili atu I se tamaitiiti I le aoga tulaga lua poo a le fausaga o se fale tele, e na te faamatalaina mai I le vaai a le tusiata o le fale. A e fesili atu I se tama aoga I le kolisi maualuga, e na te faamatalaina mai I le vaai a le tagata e ona le fale tele. O se tagata e na te iloa lelei le fale tele e ono faamatalaina mai e amata mai le taimi na foufou ai e oo I le taimi na fanau mai le tagata e ona le fale. Afai e te silasila loloto iai, e te ono iloa ai, ana le fetaiu matua o le tagata e ona le fale, semanu e le fanau mai lea tagata ma e ono leai se fale. Afai e faasolo pea ona e mafaufau loloto iai, o le a e silafia ai, o mea uma o lo’o e silasila ma vaai atu iai I lenei lalolagi, na afua mai le Atua, o mea uma lava. 

 O lenei, silasila I mea ua e maua. O fea e afua mai ai? E mai ia te oe pe mai le Atua? O le tele o taimi e faapea ai tagata, ‘Sa ou galue malosi ina ia ou maua uma nei mea. Na ou faaaogaina lelei lou mafaufau ma ua maua ai ni au tupe’. O ai e ona le mafaufau ua e maua? Sa iai se polofesa e nofonofo lava I luma o le matou aoga tulaga lua a’o ou aoga ai. Afai e te fia faalogo I le talaaga o le lalolagi, na o lou alu lava faatau sana vaiinu ona ia faamatala atu lea ia te oe soo se talaaga o soo se mea e te fia iloa I soo se vaega o le lalolagi, peitai e galo ia te ia lona igoa. O le alofa mutimutivale o le Atua ia te oe o loo mafai ai pea ona galue lou mafaufau. O lona alofa mutimutivale foi e le o avea ai oe o se tagata ua leai se mea e nofo ai I le aso. E le taulia poo le a le maualuga o mea ma le tulaga ua e ausia, na foai uma atu e le Atua, ae a e manatu e tuu maualuga I luga ou tauau, e na te aveesea ma oe na mea uma e pei o le mea na tupu ia Nepukanesa le tupu I le faitauga o le Tusi Paia o le aso. Ua ia manatu o lona poto na ia maua ai mea uma, ona manatu lea o le Atua, e tatau ona aoaoina lelei o ia I se lesona. Na o le fesuiai lava e le Atua sina iota o lona mafaufau, ma ua tetei tagata uma, ua ai I le mutia ma le vao mo le fitu tausaga. O le taimi lava na maua ai le alofa mutimutivale o le Atua ia te ia, na toe faafoisia ai lona mafaufau, ua toafia lona viia o ia ae ua vivii I le Atua ma faapea atu: 37O lenei, o a‘u o Nepukanesa ‘ou te fa‘amanū atu ma vivi‘i atu ma fa‘ane‘ene‘e atu i le Tupu o le lagi, e fa‘amaoni ana galuega uma ma ona ala ‘ua tonu; na te mafaia fo‘i ‘ona fa‘amaulaloina ē o sāvavali ma le fa‘amaualuga (Tanielu 4:37).

 Tatalo
Tama, ou te vivii ma faamanu ia te oe ona o mea uma ua e foai mai ia te a’u. Ua ou manino, e le o so’u malosi ua ou maua ai, ae o lou alofa mutimutivale, faafetai le Alii e mo le faaalia o lou alofa mutimutivale, I le suafa o Iesu Keriso, Amene

OPEN HEAVENS
MATALA LE LAGI MO LE ASO LULU 20 IULAI 2022

Manatu Autu: E Matuia pe a Filogia (The Dangerous Mixture)

Tauloto – Tusi Paia: 2 Korinito 6:15 “15Pe fa‘apefea fo‘i ‘ona loto gatasi o Keriso ma Pelialo? Pe fa‘apefea fo‘i ‘ona tofusia fa‘atasi o lē fa‘atuatua ma le ‘ua lē fa‘atuatua?.

Faitauga - Tusi Paia: Mataio 6:24 

Upu Folafola
I le tele o tausaga talu ai, na ou malaga ai I ni polokalame e talai ai le talalelei. Ua ou oso I totonu o le taavale ae ua fiu e faaola e le ola. Ua sau le inisinia ma ua iloa ai, o le penisini o le taavale ua filogia I le vai ma o le mafuaaga lea ua le ola ai. Sa ia faia le galuega o le toe faamama le tane penisini o le taavale ma suia atoa le penisini ua filogia I le vai. Ao galue le inisinia I lau taavale, ua oo mai ia te au se feau taua. Ua le ola le taavale ona o sina vai ua filogia ai le penisini, e faapea foi le toatele o tagata, ua leai se alualu I luma o le olaga, ona o loo filogia pea le malamalama ma le pouliuli I o latou olaga. E moni, pe faapefea ona mafuta le malamalama ma le pouliuli? (2 Korinito 6:14). 

Afai e te manao e faateleina e le Atua le oa I ou lima, aua nei filogia tupe na gaoia I tupe na e maua I le galue faamaoni. O le taimi lava e amata ai ona e gaoiina tupe, aua e te manatu e faamanuiaina oe e le Atua. E iai se aso na sau ai se kovana ia te au mo ni tatalo ina ia toe maua lona avanoa lona lua I le tulaga lea. Na faaalia mai e le Atua ia te a’u e manumalo o ia ma sa ou ta’ua foi iai. Ae maea ane le palota, e faiaina. Na mautinoa e lei sa’o le faiga o lea palota. Ua ou foi atu I le Atua ma faapea atu: Le Alii e, o lau afio lava na faapea mai e manumalo o ia, o le a le mea ua tupu? Na faaali mai e le Atua ou te tago e aami ma fesili iai po’o le a mea na tupu, aua ina ua foi atu mai la matou nofoaga, na alu atu ma fono ma le au faataulaitu ma le au lotu aitu. Na faaalia e le Atua na ia finagalo e manumalo o ia, ae na toe suia lona finagalo ina ua alu atu ma fono ma aitu. Ou te ofo pea I le lē malamalama o tagata I le tele o taimi e matou te faapea atu ai e matua inosia I le Atua le agasala. E le mafai ona e faia pea le agasala ae e te manatu, e iai pea ia te oe le alofa tunoa o le Atua. E taofia e le Atua (Roma 6:1-2). Afai e te naunau e iai le Atua I lou olaga, ia e ‘alo mamao ese mai so’o se mea e inosia i le Atua. Aua le sisii ou lima paia I totonu o le lotu ma le falesa ona e faaaoga lea o lima na e faia ai le faitaaga. Aua e te vivii I le Atua mai lou fofoga ona e toe faaaoga lea o le fofoga e tasi e faia ai tala pepelo. O lo’o e valaauliaina le toasa o le Atua. 

 Afai e te fia auauna I le tiapolo, ia e auauna iai ma lou loto atoa, I lo lou taumafai e auauna I le Atua ma le tiapolo I le taimi e tasi. Afai e te fia auauna I le Atua, e tatau ona e usitai ma ia faamaoni I lana Upu, aua o lona taui, e na te foai atu le manuia faulai I lou olaga. Aua nei filogia mea e lua. 

 E le mafai ona e faia pea le agasala ma e manatu e siomia ma tumu oe I le alofa tunoa o le Atua. E le faatagaina e le Atua. I le suafa o Iesu, Amene. 

OPEN HEAVENS
MATALA LE LAGI MO LE ASO LUA 19 IULAI 2022

Manatu Autu: Ia ava ma faasilisiliina le Atua (Honour God)

Tauloto – Tusi Paia: 1 Samuelu 2:30 “O le mea lea ‘ua fetalai mai ai le ALI‘I le Atua o Isaraelu: ‘Na ‘ou fai atu lava i lou ‘āiga ma le ‘āiga o lou tamā latou te feoa‘i i o‘u luma e fa‘avavau;’ a o lenei, ‘ua fetalai mai le ALI‘I, ‘‘Ia mamao lea mea ‘iā te a‘u, a o ē fa‘asili ‘iā te a‘u, ‘ou te fa‘asili ‘iā te i latou; a o ē ‘ino‘ino mai ‘iā te a‘u, e ta‘u fa‘atauva‘aina i latou.

Faitauga - Tusi Paia: Faataoto 3:9-10

Upu Folafola
O le Matematika, e iai se tulafono o gaoioiga e faaigoa ia ‘Newton’. O se vaega o nei tulafono faamatematika, o so’o se gaioiga e faia, e tutusa pe tu’u faafeagai foi le tulaga e tupu. I seisi faaupuga, o le mea e te luluina, e te seleseleina. O lau amioga e fai, e fua faatatau I ai le tali a le Atua. O le mafuaaga tonu lena o le tusi faitau o le aso mai le Tusi Paia, ia e ava ma faasilisiliina le Alii I mea ua e maua, ma o le a tali faatatau mai le Atua i ni faamanuiaga e tele, e fa’atutumuina ai lou fale saito I le tulaga ua tau le mafai ona ofi uma ai. O lou faia o ni taulaga i le Atua, o lou avatu o taulaga o uluai fua, o uluai tupe e te mauaina i le tausaga, e atagia ai lou ava i le Atua. O le taimi e te ava ma faasili i le Atua, e faaalia e le Atua lona fiafia ia te oe ma, o le a faapena ona faasilisili e le Atua, oe. 

 O le matagofie o lau taulaga o se faailoga lea i le Atua e te ava ia te  ia, pe leai foi. A ‘aisi atu ia te oe se tagata mativa, atonu o le a e avea iai le tupe pito laititi o i lau taga, ae peitai, a aisi atu se tagata mau’oa ia te oe, o le a e avea iai se tupe e sili ona telē, aua e te le o avea iai ina ia fesoasoani ia te ia, ae ona o lo’o e ava ma faaaloalo ia te ia. O lo’o silafia lelei e le Atua le aofai o le tupe o lo’o ia te oe. Aua foi, o ia lava na foai atu ia te oe. O le tulaga matagofie o lau taulaga ua e foaiina atu ia te ia mai mea o lo’o I ou lima, e ta’u atu ai i le Atua, po o e ava ma faaaloalo ia te ia, pe leai. Ae talitonu mai oe, ou te fai atu i lo’u faamaoni, e maitau lelei e le Atua le taulaga e te  avatua ia te ia. Afai e te le talitonu, faitau le Mareko 12: 41-44.

 Sa nofonofo Iesu ma maitau tagata uma a o gasolo mai e lafo a latou taulaga, i totonu o le mea e teu ai tupe. A o matamata o ia, na ia faia ni togi a le tagata ma lana taulaga, ma o le taulaga sa sili ona matagofie, o le taulaga a se tina mativa. Aua ua foai e le tina le tupe atoa sa ia te ia, ma ua ia ava, faaaloalo ma faasilisiliina le Atua. Afai e faia e le Atua ni togi o au taulaga, pe mata e na te lagona ai lou faasilisiliina o ia po o lou ta’u faatauvaaina o ia?

 Le au pēlē, aua lava nei e faia se mea e inosia ai oe I le silafaga a le Atua. O le Atua SIlisili Ese, e le alagatatau ona ula pe fa’ata’alo iai se tagata. E ui o ia o le Mamoe, a o ia foi o le Leona! Fai mai le 1 Samuelu 2:7 ‘O le ALI‘I na te fa‘amativaina ma fa‘atamao‘āigaina; o ia na te fa‘amaulaloina ma fa‘amaualugaina’.

 O se tala matou te fiafia e fai i Nigeria, “O lē na faia le penitala o ia foi na faia le titina.” O lē na fa’atamaoaigaina oe, e mafai foi ona ia faamativaina oe. O le na siitia oe, e mafai foi ona faatoilaloina oe. E tatau lava ona e sola ese mai so’o se mea e ono inosia pe le ava ma faaaloalo ai I le Atua.

 Tatalo: Tama e, soo se mea lava ou te faia e ono le ava ma faaaloalo ai ia te oe, faamolemole ia ‘aua nei e faatagaina a’u ou te faia, le Alii e, I le suafa o Iesu, Amene.

OPEN HEAVENS
MATALA LE LAGI MO LE ASO GAFUA 18 IULAI 2022

Manatu Autu: O Le Agasala o le loto lē Faafetai (The Sin of Ingratitude)

Tauloto – Tusi Paia: Salamo 103:2 “Lo‘u agaga e, ‘ia e fa‘amanū atu i le ALI‘I, ‘aua fo‘i ne‘i galo se mea e tasi o ana mea alofa.”.

Faitauga - Tusi Paia: Teuteronome 8:11-18

Upu Folafola
Afai e te suesue lelei i le Tusi Paia, e te iloa ai o le agasala e pito sili ona leaga e faia e se tagata o le lē loto faafetai. O so’o se tagata e leiloa faafetai mo mea lelei ua faia mo ia, ma iloa faaali atu le loto faafetai, e le mafai ona manuia I le olaga nei. A e faitau lelei I le faapogai o le uluai  agasala I le Kenese 3 I le faatoaga I Etena, ona e malamalama lea I le mea o loo ou faiatu ai. Na foai e le Atua I le tagata se faatoaga atoa. E le’i totoina e Atamu le faatoaga. Na toto ma saunia e le Atua le faatoaga ma na tuuina iai mea uma e manaomia e Atamu le uluai tagata. Peitai, na ia alu atu ma ai I le laau na fuafuaina mo le Atua. O le tulaga lea na faapea mai ai le Atua, “Ona e te lē faafetai I le faatoaga na ou saunia mo oe, ua tatau loa ona tuuina atu oe e te faia mea uma mo oe lava”. 

I le Malaki 3:8-10, o lo’o fetalai le Atua, afai e te lē aumai atoa le sefuluai i le fale o le Atua, ua ia te oe se fetuu, o lona uiga o loo faapea mai: “O le a le mea ua tupu ia te oe? O mea uma ua e maua na ou foai atu ia te oe. Aisea e le mafai ai ona e faafetai mai I le foai mai lea o le 10%?”. A e faitau I le 1 Samuelu 10, e te iloa ai le mafuaaga na oo mai ai le toasa o le Atua ia Saulo: ‘Ina ua ou tofia oe e avea ma tupu ia Isaraelu, o oe lava na faapea mai, ‘“E lē o a‘u ‘ea le sa Peniamina, o le itū‘āiga aupito itiiti i Isaraelu? o lo‘u ‘āiga fo‘i ‘ua topito ‘ona fa‘atauva‘a i ‘āiga uma o le itū‘āiga o Peniamina o le a le mea ‘e te fetalai mai ai ‘upu fa‘apenā ‘iā te a‘u?”. Na alu atu foi Saulo ma lafi aua ua itiiti o ia I lona manatu. Ao lenei, ua valaau le Atua ia te ia e faia se galuega ae ua ia le usitai ma le faia le faatonuga a le Atua. Ona auina mai lea o le tagata o le Atua e talanoa ia te ia I le 1 Samuelu 15, na ia faamanatu ia Saulo le amataga, na ia manatu itiiti ma faatauvaa ia te ia lava, ao lenei ua oo I le tulaga maualuga ua galo ia te ia le Atua na ia faamanuia ma siitia lona tulaga. Afai e te faatali I le Atua e toe faamanatu atu ia te oe ana faamanuiaga ia te oe, ua e oo I le tulaga faaletonu. Peitai, afai e te faia ma masani lou faafetai ia te ia I ana meaalofa I lou olaga, ona alu alu pea lea I luma lona siitia o oe. O Tavita I la tatou fuaiupu tauloto mai le Tusi Paia mo le aso, o loo faapea mai e le galo ia te ia se tasi o ana meaalofa ia te ia. O le tulaga lena na siitia ai pea Tavita seia avea o ia ma Tamā o le Tupu o Tupu. 

 E iai se muagagana a le au matutua I Aferika e faapea, afai e te faia ni mea lelei I se tagata ae leai se loto faafetai, e pei lava ua osofaia oe ese faomea. Ia aua nei silasila mai le Atua ia te oe o se faomea. 

 Ia e tusi uma I lalo meaalofa a le Atua I lou olaga ona e avatu lea o le faafetai ia te ia mo na meaalofa uma, I le suafa o Iesu, Amene. 

OPEN HEAVENS
MATALA LE LAGI MO LE ASO SA 17 IULAI 2022

Manatu Autu: O Mea Uma e Maua ai lona Viiga (Whatsoever Things are of Praise)

Tauloto – Tusi Paia: Salamo 34:1 “Ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu”.

Faitauga - Tusi Paia: Filipi 4:8, Salamo 34:1-5

Upu Folafola
Ou te manatu o mafaufauga e pito sili ona maualuga ona lelei mo se tagata, o viiga o le Atua, pe afai e te nofo ma mafaufau i lenei Atua Silisili Ese aemaise o lona matagofie. O nei manatunatuga e faaosofia ai nei igoa: E Silisili Ese atu I lē silisili, e sili ona malosi I le malosi, e sili ona mauoa I le mauoa, e sili ona poto I le e poto, e sili ona matua I le matua, e pei ona ou faaigoaina ai le Atua I le aso. O mafaufauga faapenei e faaosofia ai le tele o pese ma viiga e fatuina e le au fatupese. E pei o se tasi o ou afafine na fatuina se pese e faapea: ‘e matautia ma maualuga lo’u Atua’. E faapea mafaufauga ma manatunatuga e tatau ona maua e le fanau a le Atua. 

E iai nisi o tagata ua feitai I le Atua ona ua le afio mai I le taimi na mananao ai ia te ia. Peitai, e faapefea ona e to’atama’I I Lē na faia oe? Fai mai le Isaia 45:9 e faapea:
 9‘Oi talofa i lē ‘ua finau ma lē na faia o ia, o le ta‘ega ipu i ta‘ega ipu o le ‘ele‘ele. Pe fai atu ‘ea le ‘omea i lē na te gaosia, “O le a ‘ea ‘e te faia?” pe fai atu lau galuega, “‘Ua leai ni ona lima?”

 Ou te ata I le tele o taimi e faia ai e ni tagata ni folafolaga i mea e tatau ona faia e le Atua mo latou. Afai e le faia e le Atua le mea o e manao ai, o le a lau mea e faia? O ai e au sana pule I le Tupu o Tupu? I le tatou fuaiupu tauloto mai le Tusi Paia o le aso, fai mai Tavita e na te vivii I le Atua I taimi uma. O lona uiga I le taimi o faanoanoaga po’o le fiafia, mauoa po’o le mativa, ola po’o le oti, e faaauau pea ona vivii I le Alii. Na faapea mai foi I le Salamo 71:20 e ui I le tele o faanoanoaga, ua ia iloa e toe faatuina o ia e le Atua. 

 O le aso, ou te manao ia e faataatia ese mea o lo’o e atuatuvale ai ae mafaufau I le matautia o le Atua. Avane sau api ona tusi uma lea o ou mafaufauga o viiga I le Atua. E mafai foi ona e faasoa atu nei mafaufauga I nisi tagata ma talanoa I le ofoofogia o lo tatou Atua. Ia faatumulia lou loto I taimi uma I pese ma viiga I le Atua matautia. 

 E le mafai ona e faasagatau atu I le na faia le lagi ma le lalolagi, ae ia e vivii atu ia ia te ia.