Samoan Devotional

OPEN HEAVENS 
MATALA LE LAGI MO LE ASO LUA 5 IULAI 2022

 Manatu Autu: Aveese Tagata e Faaumatia le Faatuatua (Remove Faith Killers)

 Tauloto – Tusi Paia: Mareko 5:36 “A o Iesu ‘ua fa‘afofoga i le tala ‘ua ta‘uina mai ai, ‘ona fetalai atu loa lea o ia i lē ‘ua pule i le sunako, “‘Aua ‘e te mata‘u; tau lava ‘ina e fa‘atuatua.”

 Faitauga - Tusi Paia: Mareko 5:21-43

 Upu Folafola
E iai le mea sili ona mataína na tupu i le va o Iesu ma Iairo i le faitauga o le Tusi Paia o le asō. Ina ua sau se tagata mai le fale o Iairo e ta’u mai iai le maliu o lona afafine, e leí faatagaina e Iesu e tali iai Iairo. Ae sa manino lava le faatonuga a Iesu ia te ia: “Aua e te mata’u tau lava ina e faatuatua.” Ua tatou iloa, o gaioiga uma na faia e Iesu ae na te lei toe faaola le afafine, o lona aveesea o tagata e faaumatia le faatuatua. Aua ua silafia lelei e Iesu, ana faataga e Iairo le fefe e sosolo mai ia te ia, ina ua ta’u mai o lona afaine ua maliu, e le tupu se vavega. Ua silafia e Iesu, o tagata fetagisi uma sa tumu ai le fale, o tagata e leai se faatuatua, ma a umi ona va’avaai iai Iairo ma lona to’alua i tagata nei, e faaumatia ai lo la faatuatua. Ona faatonu ai lea e Iesu tagata uma nei, e o ese mai le fale, ona faato’a ia faia ai lea o le vavega.

 O lona uiga, afai e te lei mauaina se vavega mai i le Atua, e le taumate e afua mai i le siómia o oe e tagata “e faaumatia le faatuatua.” Talitonu mai, i lo’u faamaoni ou te faapea atu ai, a fai e te fiafia pea e mafuta ma tagata e ono faaumatia lou faatuatua, o le a avea i latou ma ē e faalavelave i au tausinioga. E manaomia lou aveesea o tagata nei mai lou olaga, ma ia e alu ese mai i nofoaga ma tagata o loo faia talanoaga e faaumatia lou faatuatua. Aua afai e te faalogologo pea iai e avea ma auala e punitia ai oe mai le ausia o ou faamoemoega. Afai e talanoa pea latou e siomia oe, ma faapea mai, ua tulaga leaga mea uma ma e leai se avanoa e toe faaleleia ai, ua sili ai ona e suia le nofoaga o loo e aumau ai. 

Ia sui lou nofoaga i se nofoaga e talanoa ai tagata, i le mafai ona suia mai le tulaga faaletonu i le tulaga sili ona manuia, ma latou talanoa i le tulaga o le mafai ona ausia o au faamoemoega, ma o se nofoaga e te le toe faalogoina ai upu nei: “Leai, e le mafai” ae e te faalogoina  upu nei: “Ioe, e te mafaia!”

 O a’u foi e iai a’u fuafuaga poo a’u miti tetele. A faalogoina e tagata e vave ona latou manatu, e le mafai ona ‘ausia. Ae so o se taimi e ula mai ai se tagata i a’u miti, ou te fai iai: “Faatalitali la’ia, matamata la iai”, ona ou la’a ese mai lea i le tagata lea, nei faaumatia ai lo’u faatuatua. Afai e amata loa ona tino mai a’u miti, ona oo mai lea ia te a’u le avanoa ou te ‘ata ai. O la’u tala e masani ona fai, afai e lē áta aámu se isi i lau miti, o lona uiga e le se miti telē! Afai e le o se miti e manaomia ai le faatinoina e le Atua, o lona uiga, o se miti tau amata.  Aua le ano fua ia i latou sa taumafai e titina au miti i aso ua tuanai. Aua le amanaia fua, ae ave atoa lou faatuatua i le Atua, ona e molimauina lea o lona faatinoga o au miti uma. 

 ‘Alo ese ma tagata e faaumatia lou faatuatua, i latou upu ma gaioiga.

OPEN HEAVENS 
MATALA LE LAGI MO LE ASO GAFUA 4 IULAI 2022

Manatu Autu: Mataala (Watch)

Tauloto – Tusi Paia: Mataio 24:42 “O lea, ‘ia ‘outou mataala ai; auā tou te lē iloa po‘o le fea le itū aso e sau ai lo ‘outou Ali‘i. 43‘Ia ‘outou iloa lenei mea, ‘ana iloa e le matai o le ‘āiga po‘o le fea le itū po e sau ai le gaoi, po ‘ua na leoleoina, ‘ae lē tu‘ua e ia lona fale ‘ia ‘elia.

Faitauga - Tusi Paia: Mareko 13:33-37

Upu Folafola
Na lapataia e Iesu lona auso’o ia mataala ma tatalo aua foi e faafuasei lava ona o’o mai le iuga o le lalolagi. Ua sili atu ona tatou latalata I le iuga o le lalolagi I lo le aso na faia ai e Iesu lenei fetalaiga. Peitai ane, e ui sa tatau ona tatou mataala, e toatele o lo’o momoe. 

 O aso o loo tatou iai nei, e faatusa I aso o Noa. Fai mai le Tusi Paia I le Mataio 24:38 Auā e pei ‘ona faia i ona po a o le‘i o‘o le lolo, ‘ua latou ‘a‘ai ma inu, ‘ua latou fai avā fo‘i ma fa‘aavaga, ‘ua o‘o lava i le aso na ulu atu ai Noa i le va‘a, 

 E oo atu I le aso e ili ai le pu ma afio mai lo tatou Alii o Iesu Keriso e siitia le au faatuatua, e toatele tagata o le lalolagi o loo aai ma inu ma foliga mai o loo latou fiafia lava, e ui o le a o atu I le faafanoga e faavavau. E matautia le matuia o lea tulaga, ae ona o nei fetalaiga na malele mai fofoga o lo tatou Alii o Iesu, e faaosofia ai I tatou e toatuli I tulivae ma aioi atu mo le fesoasoani. O le po I lenei lalolagi ua tatau ona faamutaina aua ua lata mai le aso o le Alii. O la’u tatalo ia afio mai le Alii ae o loo e mataala pea, I le suafa o Iesu. 

 I ni nai tausaga ua tuanai, sa iai se tagata o le Atua na sau I Nigeria e asiasi I se tasi o ana uo. Ina ua mavae ni nai aso ma ua ia iloa le tamaoaiga ma le tulaga lelei o lona olaga ma le ituaiga o lauga o lo’o ia laugaina, na ia faapea atu I lana uo: ‘E atagia mai e te lē o manatu e vave ona toe afio mai le Alii’. O tatou sauni ea I le toe afio mai o lo tatou Alii o Iesu Keriso?

 I le Mataio 25:1-13 ua tatou faitau ai I le tala o taupou e toasefulu. E toalima taupou popoto ae toalima taupou valelea. O taupou valelea, e lei lava ni a latou suauu na ave ae sa faia e taupou popoto. Ina ua oo mai le faaaliga ua afio mai le faatoafaiava, o taupou valelea na vave atu e taumafai e sauni, ae peitai ua tuai. E le mafai ona faatoa amata ona e sauni I le taimi ua afio mai ai Iesu. E tatau ona e sauni mo lona toe afio mai. Aua e te moe I le moe a le oti. Mataala ma tatalo aua e te leiloa le aso e toe afio mai ai o ia. Ou te tatalo I le suafa o Iesu ia aua lava nei tuua oe I le lalolagi I le aso e toe afio mai ai Iesu. 

 O fetalaiga a Iesu, ia mataala ma tatalo, I le suafa o Iesu, Amene. 

OPEN HEAVENS
MATALA LE LAGI MO LE ASO SA 3 IULAI 2022

Manatu Autu: Ia Faatino ma Aoao Atu (To Do and to Teach)

 Tauloto – Tusi Paia: Galuega 1:1 1Teofilo e: Na ‘ou tusia le ulua‘i tala i mea uma lava na amata ‘ona faia e Iesu ma a‘oa‘o atu, 

 Faitauga - Tusi Paia: Mataio 23:23-28

 Upu Folafola
Mai le fuaiupu tauloto o le aso mai le Tusi Paia, ua tatou iloa ai, le ata o galuega na faatino e Iesu. Na amata I lona faatinoina ona aoao atu lea. O le faatino e faia muamua ae mulimuli mai le aoao atu. E tatau ona e faatino muamua mataupu ae e te lei aoaoina I se tagata. Afai e te lei faatinoina, e leai se pule ia te oe e te aoaoina ai. Ua e iloa, o le aoaoina o le Upu a le Atua e le o se tulaga e ula pe fia malie ai se tagata. E faigofie lava ona e taulotoina ni lauga matautia a failauga tautaua ona e laugaina lea. E ono patipati tagata o loo faalogologo iai, ae ua faailogaina oe mo le faamasinoga e sili atu I le lagi pe afai e te le savali ma faatinoina. 

Fai mai le Iakopo 3:1O‘u uso e, ‘aua le to‘atele ‘outou e fai ma a‘oa‘o, ‘ina ‘ua tatou iloa e atili ai ‘ona fa‘asalaina o i tatou.

O le upu ‘a’oa’o’ o loo faaaogaina I le mau mai le Tusi Paia I luga, o loo faatatau I faiaoga. E le afaina pe e te taulotoina le lauga, pe patipati tagata pe talanoa foi tagata I le lelei o lau lauga. Afai o loo e aoaoina le Upu, o lou faamasinoga o le a sili atu I isi. O le mafuaaga tonu lea e tatau lava ona e faatinoina le Upu ae e te lei aoaoina. E leai ma se aia talafeagai ia te oe e te tetee ai I se tagata e lē o usitai I le Upu a le Atua pe afai e te le o usitai foi iai (2 Korinito 10:6). 

 O le tele o mafuaaga e le usitai ai nisi o le fanau I matua pe a vaai atu e le o savavali pe faatino e matua mataupu o loo latou aoaoina. E masani lava ona ou faia lenei faaupuga, o le mafuaaga sili e te vaai ai I le tele o fanau a faifeau o loo agai I tua, ona o mataupu o loo lauga ai le faifeau I le pulelaa e ese mai le tulaga o loo ia faatino I le fale. Afai e maea ona e aveesea le utupoto mai lou mata, ona mafai lea ona e aveesea le fasi laau I le mata o leisi (Mataio 7:3). Faatino mataupu o loo e aoaoina. Ia e faatino muamua, ona e faatoa aoaoina lea I soo se tagata e te manao e aoao. I le tatou faitauga o le Tusi Paia o le aso, na fetalai Iesu e tele atu faanoanoaga o I latou e le savavali ma faatino mataupu o loo latou a’oa’oina. Faatino mataupu o loo e aoaoina. 

OPEN HEAVENS
MATALA LE LAGI MO LE ASO TOONAI 2 IULAI 2022

Manatu Autu: Pe Afai e Natia le Talalelei (If our Gospel Be Hid)

Tauloto – Tusi Paia: 2 Korinito 4:5 ‘Auā matou te lē tala‘iina i matou, a o Keriso Iesu le Ali‘i; o i matou nei fo‘i o a ‘outou ‘au‘auna ‘ona o Iesu.

 Faitauga - Tusi Paia: 2 Korinito 4:1-7

 Upu Folafola
O le taufa’asesē lou avatu o se fa'amatalaga sesē e fa'a foliga e moni ae pepelo. Po'o lou suia ma toe fetu'una'i lona faaupuga ia foliga ai o le mea moni. E to'atele failauga o le Talalelei i aso nei ua feliua’ia le upu moni i le lauga e manana'o e ta'u i tagata e aunoa ma le mafaufau e faasalaina ai latou e le Atua i nei faiga taufaasesē. O le mea latou te lē o iloa ua fa'aaoga latou e le tiapolo e tāla'i ana aoaoga sesē. Fai mai le 1 Timoteo 4:1 A o lo‘o ta‘utino mai e le Agaga, e ō ‘ese nisi i le fa‘atuatua i tausaga amulī, latou te fa‘alogo i agaga e fa‘asesē ma a‘oa‘oga a temoni.

 Afai e fulitua tagata i le Atua ma o ese mai le faatuatuaga moni i le Atua ona o au talaiga, o lona uiga o oe lesi o loo tala'iina aoaoga a le tiapolo. Ia tāla'i le Upu moni atoa o le Talalelei a Iesu Keriso. Aua e te fai I lau aulotu ona o lo'o fai mai le tusi a Roma 8:1 E leai se faasala i lē o iā Keriso Iesu ona saoloto lea e na o le latou talia ā o le valaau e talia Iesu i o latou olaga, ona faaauau pea lea ona fai le agasala ae lē afaina e tumau pea na sao i le Lagi. Fa'aaoga uma le fuaiupu (Roma 8:1) i lau talaiga e pei ona fai mai “ o ē lē savali i la le tino ae I lā le Agaga “

 Fai mai le tusi o 1 Ioane 3:6 E lē agasala se tasi o ē tumau ‘iā te ia; o sē agasala ‘ua lē va‘ai o ia ‘iā te ia, ‘ua lē iloa fo‘i o ia e ia.

 O lona uiga o le vaega muamua o le Roma 8:1 o ē o le a lē fa’asalā o i latou o iā Keriso Iesu. E fa'apei ona fai mai le 1 Ioane 3:6, o I latou o iā Keriso e lē faia le agasala, so'o se isi e faia le agasala e le'i iloa e ia Keriso. Aua e te ta'ita'ia tagata i seoli i au aoaoga sesē. Aua e te lauga i tagata e fa'a lē aogā le Feagaiga tuai ae tau o le Feagaiga fou e usita'i i ai, auā na fetalai manino Iesu e le'i sau e tatalaina le tulafono a ia fa'ataunuuina (Mataio 5:17). Tāla'i le Upu moni i lona atoatoaga ia i latou uma e mafai na e laugaina i ai le Talalelei a Iesu Keriso

 Tatalo.
Tamā faamolemole foa'i mai le loto mata’u ia i matou uma ina ia talai le talalelei ia Iesu Keriso ae le o aoaoga a le tiapolo, i le suafa mamana o Iesu Keriso, Amene.

OPEN HEAVENS
MATALA LE LAGI MO LE ASO FARAILE 1 IULAI 2022

Manatu Autu: Moe I Taimi o Aoaoga? (Sleeping in Training?)

Tauloto – Tusi Paia: 1 Peteru 5:8 ‘Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia.

Faitauga - Tusi Paia: Galuega 20:7-12

 Upu Folafola
Ao faia aoaoga a le Aposetolo o Paulo, sa iai se taule’ale’a talavou e igoa ia Eutiko sa moe. O le faamamafa I lenei aso e le o Paulo ao Eutiko. Sa iai le tagata e maualuga le faauuga a le Atua o loo laugaina le upu ae sa moe lelei lenei taulealea. E ono foliga mai ose tulaga e faamasinoina ai Eutiko, peitai e toatele I latou e pei o Eutiko I totonu o le Ekalesia. E toatele tagata e o atu I le lotu I le asō ae momoe I le taimi atoa o le sauniga lotu. E ono le moeiini o latou fofoga a’o latou mata faaleagaga o lo’o moeiini. E iai nisi o le aufaigaluega o lo’o momoe pea faaleagaga ae o loo galue malosi mai le faauuga. Fai mai le Ioane 7:38-39 e faapea
38O sē fa‘atuatua ‘iā te a‘u, e fa‘apei ‘ona fai mai o le Tusi, ‘E tafe mai o vaitafe mai totonu ‘iā te ia, o le vai ola lava.’” 39‘Ua fetalai atu o ia lenā ‘upu i le Agaga, e maua e i latou ‘ua fa‘atuatua ‘iā te ia; auā o ona po ia e le‘i maua ai le Agaga Pa‘ia, auā e le‘i o‘o Iesu i lona mamalu.

O vaitafe o loo taua I le fuaitau o le Tusi Paia I luga, e faatatau I le Agaga Paia. E tafe e pei o se vaitafe le Agaga Paia. Afai e galue mai Agaga Paia, ae e te lē o iloa lona afio mai ma lē avatu iai lau faamuamua, e pasi ane ma oe ona e misia lea o lau vavega. O so’o se tagata na vaai ia Eutiko ma isi I le taeao ao latou tuua le sauniga e manatu,  na faamanuiaina ma ua toe faafoisia ma siitia I leisi tulaga le malosi faaleagaga, ae leiloa e pei lava o Eutiko na moe I le taimi o le sauniga atoa ma ua tuua le sauniga e leai ma se suiga. O le mafuaaga lea o le toatele o tagata e auai atu I le tele o fonotaga ma sauniga matautia faauuina ua suia ai olaga o tagata, peitai ane e leai se suiga o latou olaga. 

 O le tele o taimi, e mafua ona o I latou o loo fuafuaina nei sauniga tetele, ona ua latou faia faiga e faigofie ai ona momoe tagata i taimi o sauniga ae sa tatau ona tele taimi o mafutaga vavalalata ma le Atua. Afai e te teuteuina le fale e matagofie e pei o se fale mataaga, o le a fiafia tagata e matamata I ata ma teuga I lo le fesootai I tapuaiga ma le Alii. O le Ekalesia o le nofoaga e te mafuta ai vavalalata ma le Atua, o lona uiga e tatau I le siosiomaga ona faigofie ona faia ai mafutaga vavalalata ma tapuaiga I le Atua. O le tulaga tonu lea matou te teuteuina ai la matou falesa I fuaitau ma mau e sii mai le Tusi Paia. So’o se vaega o le fale e te liliu atu iai, o le a iai lava se fuaiupu mai le Tusi Paia e taulai iai lau vaai aua foi matou te mananao ia ave pea le faamuamua ma ia taulai le vaai a tagata I le Atua ma ia na o ia lava. 

 O le sauniga lotu e aoga mo le aoaoina o oe aua lou manuia lautele, aua e te moe I le taimi o le aoaoga, I le suafa o Iesu, Amene. 

OPEN HEAVENS
MATALA LE LAGI MO LE ASO TOFI 30 IUNI 2022

Manatu Autu: Tatalo mo ou Taitai (Prayers for your Leaders)

Tauloto – Tusi Paia: Roma 13:11‘Ia usiusita‘i tagata uma i faipule silisili; auā e leai se pule pe ā lē mai le Atua; o pule uma lava o lo‘o fai nei, ‘ua fa‘atūina e le Atua.

 Faitauga - Tusi Paia: Faataoto 21:1-3

 Tatalo

1.     Le Alii e, faafetai mo matou Taitai uma lava, o e ua e filifilia  i lenei augatupulaga. Faafetai mo Taitai fa'aupufai fa'apea fo'i Taitai i totonu o Ekalesia. Ua matou iloa, e leai lava se tasi e mafai ona avea ma Taitai, se’I vagana ua e filifilia ma faatuina I latou; Faafetai mo le filifiliina o nei tagata, lo matou Tama e.
2.     Lo matou Tamā e, ou te tatalo, liligi mai i o matou taitai uma le atamai ma le malamalama e taitaia ai o matou tagata. Foai atu ia i latou le tomai e iloatino ai faaiuga lelei, ma ia faia ma le faamaoni, ia o latou iloa foi taulimaina vaega uma latou te fetaiai, i le suafa o Iesu.
3.     Lo matou Tamā e, auina mai lou Agaga Paia e aʻoaʻoina o matou Taitai i ala silisili e taitai ai, I le suafa o Iesu. Fautuaina i latou i laasaga uma, ma ala ua e tapenaina ma ia o latou  faalogo i au fautuaga uma, i le suafa o Iesu.
4.     Lo matou Tamā e, faamolemole ia faamalosia o matou taitai lelei uma, ina ia faaauau pea ona tutumau i taitaiga saʻo o tagata ma ia aveesea uma le faavaivai mai o latou ala, i le suafa o Iesu.
5.     Lo matou Tama e, o Taitai uma e mumusu e faia Lou finagalo, faamolemole ia aveeseina I latou mai tulaga o Taitai, i le suafa o Iesu.
6.     Lo matou Tama e, fa'amolemole tu'u atu I o matou Taitai le loto maelega ma le filiga e Taitai tagata i le ala tonu. Ia avea i latou ma Taitai mo tagata uma, ma ia o latou faamuamua nei uiga, i le suafa o Iesu. 
7.     Tama e, faamolemole tuu atu i o matou Taitai le loto toa ma le lototele, e faatino ai galuega ia lelei ma atoatoa, i le suafa o Iesu Keriso. Aua lava neʻi fefefe i latou e faia faaiuga eseese, mo le lelei o tagata uma, i le suafa o Iesu.
8.     Tama e, faamolemole, ia e filifilia foi nisi e fesoasoani I o matou Taitai - o nei tagata, o le a fesoasoani e faatino tiute tauave o matou Taitai, i le suafa o Iesu.
9.     Tama e, i soo se vaega lava o loo manaomia ai se fesoasoani i lo’u atunuu, faamolemole ia e tapenaina se Taitai e foia uma nei faafitauli, i le suafa o Iesu. Ia le itiiti ifo ma le toatasi se Taitai e te tapenaina  mo lea vaega, i le suafa o Iesu.
10.  Le Tamā e, faamolemole ia galulue faatasi o matou Taitai i le alofa ma ia lotogatasi. Aua neʻi i ai le feitagaʻi ma le loto feeseeseai i totonu oi latou, i le suafa o Iesu.
11.  Tama e, faamolemole ia totoina le loto mata’u i loto o o matou Taitai. Fa'amolemole ia ta'u amiotonuina o matou Taitai uma i le suafa o Iesu, Amene.                                                                                           

OPEN HEAVENS
MATALA LE LAGI MO LE ASO LULU 29 IUNI 2022

 Manatu Autu: Olioli e lē Matalatalaina (Joy Unspeakable)

 Tauloto – Tusi Paia: 1 Peteru 1:8“To‘u te lē iloa atu ‘outou ‘iā te ia, a ‘ua alolofa ‘iā te ia; e lē o va‘ai atu nei fo‘i ‘iā te ia, a o lo‘o fa‘atuatua ‘iā te ia, tou te ‘oli‘oli ai ma le fiafia e lē matalatalaina, e silisili ‘ese lava”

 Faitauga - Tusi Paia: 1 Korinito 2:9

 Upu Folafola
E toatele ua faalogo I le faamatalaga o le ‘Olioli e le matalatalaina’ ae toaitiiti ua mafai ona latou maua. O le ituaiga olioli lea e matua silisili ese atu le maualuga I ou manatu ma ua le mafai e au upu ona faamatalaina lona matalasi. 

 I nai tausaga talu ai, na faia sa matou sauniga I se aai e taua o Ota I Nigeria. Sa iai se tina ua leva tausaga e lei faamanuiaina I se tamaitiiti ma sa auai atu I la matou polokalame, ma na ia talosaga mai ou te tatalo mo ia ma sa ou faia lava. Ae lei sau I la matou polokalame, ua fai iai le aiga o lona toalua, afai e le mafai ona faamanuiaina o ia I se tamaitiiti mo le latou atalii I totonu o le tausaga, o le a tuli ese o ia mai lo latou aiga. I le tausaga na sosoo ai, na toe faia foi la matou polokalame I le aai lava lea, ma sa tele lava le laina o I latou o faasolo mai mo tatalo ma sa iai ma le tina lea. Ina ua oo I lona taimi, ua le mautala ma ina ua tatala lona fofoga, na ona faapea mai lava ‘Iesu’. Na ia toe taumafai mai ma faapea mai ‘Iesu’ ma faapea foi faatolu. Ua ou le mautonu po’o le a tonu le mea ua tupu. Na ia fai mai lea ia te au, o ia le tina lea na ou tatalo ai I le tausaga talu ai. Ma ua ou iloa le tulaga ua tau le mafai ai ona tautala, ua faamanuiaina o ia I se masaga ma ua ia maua le olioli e le matalatalaina. 

 Ao e faitau pe faalogologo I lenei faamalosiau I le Upu a le Atua I le aso, ou te folafola atu e vave ona e maua le olioli e le matalatalaina I le suafa o Iesu. 

 Fai mai le tatou fuaiupu tauloto o le aso mai le Tusi Paia, afai e te faatuatua I le Atua, ona ia foaiina atu lea o le olioli e le matalatalaina, e silisili ese lava. E pau le mea e tatau ona e faia o le faatuatua ia te ia. O le faatuatua ia te ia o le faia lea o galuega uma ma le talitonu iai. Fai mai le Iakopo 2:17E fa‘apea fo‘i le fa‘atuatua, pe ‘āfai e lē i ai galuega, e mate lava ia ‘ina ‘ua na o ia. 

 O au galuega ma mea e fai e atagia ai e te talitonu ma faatuatua I le Atua. E tatau ona atagia I soo se tagata e faatuatua e na te maua mea uma o lo’o ole atu ai I le Atua. Fai mai le Iakopo 1:6-8 o so’o se tagata e alu atu I le Atua e aunoa ma le faatuatua, e le tatau ona manatu e na te maua se mea e tasi mai le Alii. 

Ia e faamaoni ia te oe lava. E te talitonu ea I le Atua? E te faatuatua moni ea ia te ia? I le suafa o Iesu, Amene.                                                                                            

OPEN HEAVENS
MATALA LE LAGI MO LE ASO LUA 28 IUNI 2022

 Manatu Autu: Alalaga o le Viiga 2 (The Shout of Praise 2)

 Tauloto – Tusi Paia: Salamo 67:5-6 “Le Atua e, ‘ia vi‘ia oe e le nu‘u; ‘ia vi‘ia lava oe e le nu‘u, o i latou uma lava. 6‘Ua fua mai e le lau‘ele‘ele ona lava fua; o le Atua, o lo matou Atua lava na te fa‘amanuia mai i matou”.

 Faitauga - Tusi Paia: Salamo 67:3-7

 Upu Folafola
Ua lo’o faapea mai le Tusi Pa’ia, e saili le Atua mo i latou e tapuai ia te ia i le agaga ma le faamaoni. Fai mai le Ioane 4:24 “O le Atua o le agaga lava ia; o ē tapua‘i ‘iā te ia, e tatau ‘ona tapua‘i atu ai i le agaga ma le fa‘amaoni.”

 I se isi faaupuga, o taimi uma, e sailiili le Atua i tagata e faane’ene’e ma avatu le viiga ia te ia. Afai na te mauaina, e aumau ma afio ma i latou e pei ona tatou a’oa’oaina ai ananafi, e tietie ma afio o ia i a latou viiga. (Salamo 22:3). Fai mai le Salamo 16:11 11‘E te fa‘ailoa mai ‘iā te a‘u le ala o le ola; o i ou luma le fiafia e malie ai; o i lou itū taumatau le ‘oli‘oli e fa‘avavau. 

O lona uiga, afai ua faalatalata mai le Atua ia te oe ona o au viiga, e te maua ai le olioli, ma isi auala e faafiafia e malie ai lou loto ona o lona faatasi mai. 

 Sa iai se tina ua leva ona faaipoipo ae e le faamanuiana i sana pepe. Sa ia faamatala mai, e masani ona ia ‘alaga fa’a fitu, “Aleluia!” ma ua amata ona faaigoa e tagata o “Sister Hallelujah.” Ae oo i le isi aso, ua ia manatu ane ma faapea: “Ou te le mana’o e na o le to’atasi sa’u pepe, ou te manaomia se to’atolu! Ona ia ‘alagaina loa o Aleluia e 21! Ua pei o le ‘emo o le mata, le tafi’esea o le 30 tausaga sa lē alo ai, ae faamanuiana lenei tina i sana fanau e to’atolu! 

O le mea moni, afai e te ‘alaga i le lagi, e sasa’a mai vavega ia te oe! Fai mai le Salamo 67: 5-6: “Le Atua e, ‘ia vi‘ia oe e le nu‘u; ‘ia vi‘ia lava oe e le nu‘u, o i latou uma lava. 6‘Ua fua mai e le lau‘ele‘ele ona lava fua; o le Atua, o lo matou Atua lava na te fa‘amanuia mai i matou”.

 Ia talitonu mai i la’u tala lea e fai atu ma lo’u faamaoni, o le taimi lava e te tatalo ai i le Atua, ma saputu atu iai le mau mana’oga fa’atauanau, o se tulaga faivavale lena ua e faia. A o tagata atamamai, latou te silafia lelei, a o atu i luma o le Atua ma viiga, ona fesili mai lea o le Atua ia tei latou “ O le a se mea e te mana’o iai?” Afai e te le talitonu i la’u tala, fesili ia Solomona (2 Nofoaiga Tupu 1:6-7). Afai e te faatauaina ma faamuamua le avatu o le viiga i  le Atua, nai lo le tele o tatalo o manaoga, o le a tali mai le Atua i au tatalo, e matua fa’ateleina, e sili atu I ou faamoemoega.

 Ia faatumulia lou olaga i le faia o viiga i le tatou Atua Silisili Ese, ona ia tali mai lea i au tatalo, e matua faateleina e sili atu i ou faamoemoega uma, I le suafa o Iesu Keriso, Amene.

OPEN HEAVENS
MATALA LE LAGI MO LE ASO GAFUA 27 IUNI 2022

 Manatu Autu: Alalaga o le Viiga 1  (The Shout of Praise 1)

 Tauloto – Tusi Paia: Iosua 6:16 ‘Ua o‘o i le atu fitu, ‘ua ili pū e ositaulaga; ‘ona fai atu ai lea o Iosua i le nu‘u, “‘Inā ‘alalaga ia auā ‘ua foa‘iina mai e le ALI‘I le ‘a‘ai ‘iā te ‘outou.

 Faitauga - Tusi Paia: Iosua 6:1-20

 Upu Folafola
E iai se mea e matautia lona malosi pe a alalaga viiga I le Atua Maualuga. O se au’upega malosi e faasagatau I le tiapolo. O nisi o tagata e manatu pe aisea ou te le saisaitia ma tutuli muamua temoni ae ou te lei lauga. Ou te le saisaitia pe tutuli, e pau la’u mea e fai o le fai atu I tagata e alalaga Aleluia ona o ese uma lea o temoni aua foi e le mafai ona iai I se nofoaga o loo faia ai le viiga I lo latou fili. 

 E iai se tina e mauoloa lava ua ia iloa o so’o se meaai lava e tausami ai, e puai (tulou). Sa alu atu ma vaai fomai eseese e iai le tomai faapitoa I le lalolagi, ua tele ana tupe ua faaaluina, ae e le mafai lava ona taofi se meaai. Mulimuli ane, ua fautua iai se tagata e sau I le matou Ekalesia le Redeemed Christian Church of God mo se faamalologa ona ua leai lava seisi faamoemoe. Na sau lea I le lotu ma e lei leva ona amata ae ou valaau atu loa I le faapotopotoga e faapea: ‘Aumai mai sau alaga leotele Aleluia’. A’o tatala lona fofoga ma alaga ‘Aleluia’ e vivii ai I le Alii, na pau mai I fafo se anufe, ma na amata mai I lena taimi ona ia maua le faamalologa. Fai mai le Salamo 22:3 e faapea:3A o oe, e pa‘ia oe; o lo‘o e ti‘eti‘e i vi‘iga a Isaraelu.   

 E tietie ma afio le Atua I viiga a ona tagata. Ina ia mafai ona ia tietie ma afio I le viiga, e ao ona ia tulai mai lona nofoalii ma savali mai iai. Fai mai le Salamo 68:1 a tulai le Atua mai lona nofoalii, e faataapeapeina ona fili ma e ita mai. O lea, afai o oe o se afafine poo se atalii o le Atua, o ou fili e avea ma fili o le Atua. Ma o lea, a tulai mai o ia ona o oe, e faataapeapeina ou fili. O le tulaga tonu lea na tupu I le Galuega 16:16-34. Ua ia faafofoga I viiga na alalaga ane mai le falepuipui ma ua ia tulai mai lona nofoalii e tietie ma afio I viiga a Paulo ma Sila. So’o se taimi e faafofoga ai o ia I viiga mai so’o se tagata, e tulai mai o ia ona faaumatia uma lea o saisaitiaga ma pa o falepuipui uma. E iai ea se mea o loo faatiga ma faatigaina ai oe e le tiapolo? O le alaga o le viiga e tutuli ese ai I latou. I le 1 Samuelu 16:23 ao ta e Tavita le kitara, na sola ese le agaga leaga mai ia Saulo. 

 E iai ea se mea ua e iloa ua matua faigata mo oe ona maua pe manumaloina? O le alaga o le viiga e mafai ona faaumatia I lalo lena pa puipui ma faaavanoa le ala mo oe (Iosua 6:20). Afai e te avatu le alaga o le viiga ia te ia I le aso, faauta o le a e vaai I le pau I lalo o satani. Alaga Aleluia, I le suafa o Iesu Keriso, Amene!

OPEN HEAVENS
MATALA LE LAGI MO LE ASO SA 26 IUNI 2022

 Manatu Autu: E Fesoasoani le Atua ia te oe  (God Will Help You)

 Tauloto – Tusi Paia: Isaia 41:10 ‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.

 Faitauga - Tusi Paia: Isaia 41:10-14

 Upu Folafola
O se tulaga e pito sili ona lelei mo se tagata pe afai e finagalo le Atua e fesoasoani ia te ia. Afai e finagalo le Atua e fesoasoani ia te oe, e leai ma se mea e tasi e mafai ona faalavelave I lou faataunuuina ma ausia lea lumanai manuia. Afai e manaomia tupe e faatino ai, ua ia fetalai I le Hakai 2:8 e faapea: 8O lo‘o ‘iā te a‘u le ario, o lo‘o ‘iā te a‘u fo‘i le auro, ‘ua fetalai mai ai le ALI‘I o ‘au.

 E iai foi lana fesootaiga lelei ma I latou I tulaga mau tofi maualuluga e pei ona tatou iloa I le Faataoto 21:1O le finagalo o le tupu, o vaitai ia i le ‘a‘ao o le ALI‘I; na te liliuina i mea uma ‘ua ia finagalo i ai.

 Ana le seanoa le Atua, semanu e le mafai ona ausia le tulaga ua ou iai I le aso. Ina ua mafai ona ou au I le aoga maualuga o Ilesha Grammar School, sa manaomia le totogiina o se tupe e lua pauni, peitai e leai se tupe a ou matua. Pau le mea na ou iloa na saunia e le Atua le tupe ma ua ou alu I le aoga. E uma ane le tausaga muamua o la’u aoga, ua ou iloa ua toeitiiti uma ona faatau mea o le matou fale. Ina ua maea le tolu o o’u tausaga I le aoga, ua matua leai ma se mea o totoe e toe faatau. 

 I le vaitaimi lava lena, na aumaia e le Atua se tagata I le matou nuu faato’a foi mai lava mai Lonetona I Peretania. Na o uma tagata e fiafia ona o ia. A’o iai uma tagata e siomia o ia ma fiafia, na faliu mai o ia ia te a’u ma faapea mai: ‘Malo lava tamaitiiti’. Ua amata ona ma talanoa. E lei umi ae ua ia matauina e lelei la’u tautala I le gagana peretania. Ua ou tau atu iai ou te aoga I le Ilesha Grammar School. Na ia fesili mai po’o le a la’u vasega, na ou fai iai ou te vasega I le Form 4 ae ua leai se tupe mo lo’u pili. Na alu atu o ia I le aoga ma totogi uma lou pili mo le vasega fa maualuga. Ina ua maea lea tausaga, na alu atu lo’u tina ma tauanau le aoga pe mafai ona aumai la’u tusi pasi e mafai ai ona ou alu I le Iunivesite aua o lea ua maea le fa tausaga o le lima tausaga e manaomia. Peitai, na fai mai le aoga e tatau pea ona faauma le lima tausaga. Na saunia lava e le Atua le fesoasoani mo a’u aua na maea lelei lau aoga maualuga, ua ou au ma maua lo’u avanoa I le Iunivesite ma ua ou savalia tulaga uma e ausia ai lo’u lumanai manuia aua na fesoasoani le Atua ia te a’u. 

 Ou te tatalo mo ‘oe I le aso, ina ia faia ma saunia e le Atua mea uma e manaomia ina ia ausia lou lumanai manuia, I le suafa o Iesu, Amene.