Samoan Devotional

OPEN HEAVENS
MATALA LE LAGI MO LE ASO LULU 15 IUNI 2022

 Manatu Autu: O le Manaomia o Faufautua (The Need for Counsellors)

 Tauloto – Tusi Paia: Faataoto 11:14 A leai sē pule, ‘ua malaia le nu‘u; a o le to‘atele o faipule, e saogalemū ai.

 Faitauga - Tusi Paia: Faataoto 13:10, Faataoto 15:22

 Upu Folafola
O se faufautua, o se tagata ua lava lona iloa ma le poto I se matafaioi ma e naunau e faasoa atu I tagata o lo’o latou manaomia lea fesoasoani e maua ai ni tali o latou faafitauli. O nisi o taimi o se faufautua o se tagata ua maea ona aoaoina lelei I agavaa ma tomai faapitoa ma ua lava le iloa I le faagasologa o lea matafaioi. O lona uiga o loo ia te ia le poto e te manaomia mo le tali o ou faafitauli I lea matafaioi. Afai e iai ni au faufautua I soo se vaega o lou olaga, ua e maua la le poto e te manaomia e fofoina ou faafitauli uma. 

 E tusa ma le faitauga o leTusi Paia o le aso, e tatau ona iloa ai e manaomia faufautua I soo se vaega o lou olaga o loo le lava ma papau ai lou iloa. Mo se faataitaiga, afai e te le malamalama tele I le Tulafono ae o loo tau faia sau maliega tusitusia ma seisi tagata, e manaomia la se loia e faufautua ia te oe. Tusa foi pe e te le maua pe gafatia le totogi o se loia, e mafai ona e mauaina se tusi poo ni pepa o faamatalaga e te faitau ma suesue atili ai lea mataupu. O le poto e te maua mai I le suesueina o tusi ma pepa o faamatalaga e aoga I lau mataupu. Afai o loo iai ni faafitauli I le lua ulugalii, aisea e te le saili fesoasoani ai I se faufautua lelei o ulugalii ma faaipoipoga? Afai o loo iai ni faafitauli I le tulaga tau tupe, aisea e te le saili ai ni faufautua I tulaga tau tupe e fesoasoani ia te oe? Afai e te manaomia le fesoasoani I mea faaleagaga, talanoa I lau faifeau. Ae e iai lava tagata e latou te teena le manatu e manaomia le fesoasoani  aua ua latou manatu ua lava lo latou iloa e fofo ai lava o latou faafitauli. Ao nisi, ua latou ioe e manaomia le poto, ae ua latou saili atu I nofoaga e le talafeagai. O nei ituaiga tagata uma e pei ona taua I luga o loo agai atu e faaumatia. Fai mai le Hosea 4:6‘Ua fa‘aumatia lo‘u nu‘u ‘ina ‘ua leai se poto; o oe fo‘i na e tete‘e atu i le poto, o le mea lea ‘ou te tete‘e atu ai ‘iā te oe, e lē fai oe ma ositaulaga ‘iā te a‘u; ‘ua e fa‘agalogalo le tulafono a lou Atua, o a‘u fo‘i, ‘ou te fa‘agalogalo i lau fānau.

 O a vaega o lou olaga o loo e ui ai I faafitauli ma ua e manaomia ai se faufautua? Ia e mafaufau loloto iai. Aisea e te faataga ai oe e te alu atu pea I le loloto o lena faafitauli ae ua e le saili loa se faufautua lelei e lava lona tomai ma le poto I lena vaega o le olaga, ina ia aoao ia te oe? Ae ao pea ona e faaeteete e teena so’o se fautuaga e tetee I le Upu a le Atua.

Tatalo
Tama, faamolemole aumai faufautua popoto ma le atamai I o’u ala, e latou te fesoasoani ia te a’u e ala I fautuaga ma faataitaiga lelei ia te a’u ina ia faigofie ma lelei ai lo’u olaga I le suafa o Iesu, Amene

OPEN HEAVENS
MATALA LE LAGI MO LE ASO LUA 14 IUNI 2022

 Manatu Autu: Foai faale Atua (Divine Provision)

 Tauloto – Tusi Paia: Filipi 4:19 A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.

 Faitauga - Tusi Paia: Mataio 14:15-21

 Upu Folafola
I le tele o tausaga talu ai, ao ou nofonofo I lo’u potu malolo, ua ou maitauina o loo faia se fono a la’u fanau I le isi potu o le matou fale. E lei leva ae sau le uii ma faapea mai ia te a’u ‘Lou Tama e, o le a se mealofa e te manao ai?’ ua ou fai atu iai ou te manao I se vaalele. Ua alu atu ma ta’u atu I le isi vaega o la’u fanau, ma na toe tuli mai fai mai, e ta’u atu se mea e mafai ona latou faatauina. Ua ou faia foi. Ona toe tuli mai foi lea o le uii ma fai mai e avatu le tupe e faatau le meaalofa. O lo’o latou fai mai ia te a’u mo se tupe e faatau ai se meaalofa mo a’u lava. E leai ma seisi o latou na faigaluega I lea taimi ma e faamoemoe uma ia te a’u mo lo latou tausiga. O lo latou naunautaiga e aumai ia te a’u se meaalofa na mulimuli mai ai ma le foai e faatinoina. 

 I le tatou faitauga o le Tusi Paia o le aso, na iai le manaoga I le ‘au soo e fafagaina tagata na lolofi atu e fia faalogologo I le Upu mai le Alii. Ua latou le o atu ia Iesu e fesili pe faapefea ona fagaina le motu o tagata, ae ua mananao e tutuli ese. Semanu e latou te le vaai I se vavega I lena aso. Ae o Iesu, na ia silafia lelei, ma o lona naunau e faia le finagalo o le Alii, na saunia e le Atua le auala. I le iuga o le aso, na foai mai e le Atua, ua matua faula’i. Afai e te vaai atu I se mea o loo manaomia I totonu o le fale o le Atua, ma o loo e naunau e faia se mea lelei e fiafia ai le Alii, aua nei avea le tulaga o lau ato e taofia ai oe. Ia e alu atu ia te ia I le tatalo, ma ta’u atu ou manaoga. Ua ia silafia o lo’o e faalagolago ia te ia mo lana foai e faatuanuuina ai. E na te foai mai le ala e mafai ai ona e faia le mea o loo e finagalo e te faia mo ia. 

 E iai se tamaloa na sau ia te au I tausaga ua te’a, e manao ou te tatalo mo ia aua o loo ia naunau e aofia o ia I tagata e latou te fatupeina nisi o fonotaga aoao ma tetele a le Ekalesia. Ua ou tatalo mo ia ae na toe foi mai I le vaiaso na sosoo ai, ua faasea mai e faapea: ‘Na ou faiatu ia e oe e te tatalo mo a’u ina ia ou fesoasoani I le faatupeina o le fonotaga aoao. Ua le maua sa’u siitaga ae ua tuli a’u ma la’u galuega’. Ua ou ata ma ou fai atu ‘E te manatu ea e mafaia ona e faatupeina le fonotaga aoao I lena tamai totogi? Aua e te popole, ua tapunia e le Atua le faitotoa lena sei ona tatala se faitotoa e tele ma sili atu’. E lei umi ae foi mai ma se tupe e faatupeina se vaega tele o le fonotaga aoao. Aua nei avea le tulaga tau tupe o lo’o e iai, e taofia oe mai le faia o le galuega a le Atua. Ia e tauave le amoga o lena galuega I lou loto ma avatu I ona luma, e na te foai mai ia te oe mea uma e manaomia. 

 Ia e mafaufau lelei I se mea taua e te fia faia mo le Atua. Ole atu ia te ia e foai mai mea uma e manaomia e fesoasoani ia te oe e faataunnuina ai.

OPEN HEAVENS
MATALA LE LAGI MO LE ASO GAFUA 13 IUNI 2022

 Manatu Autu: Pe Afai e te Faapea Atu ‘Faafetai Le Alii e’ (When you say ‘Thank You Lord’)

 Tauloto – Tusi Paia: 2 Nofoaiga Tupou 1:7 ‘Ua fa‘aali mai le Atua i lea lava po ‘iā Solomona ma fa‘apea mai ‘iā te ia, “‘Ia e fai mai se mea ‘ou te avatu ai ‘iā te oe.”

 Faitauga - Tusi Paia: 2 Nofoaiga Tupu 1:6-12

 Upu Folafola
E iai se tulaga taua ua ou iloa e faatatau I le Atua, o lona finagalo I so’o se taimi e faapea atu ai se tagata ia te ia ‘Faafetai’. Afai e fai atu se tagata I le Atua ‘Faafetai’, e tali mai foi o ia ‘Faafetai’. Mo se faataitaiga, I le 2 Nofoaiga Tupu 1:6-7, na avatu le afe taulaga mu e Solomona I le Atua ma faapea atu ‘Faafetai le Alii e, mo lou tofia o a’u e avea ma tupu’. Na tali mai iai le Atua ma faaali atu ia te ia faapenei;“‘Ia e fai mai se mea ‘ou te avatu ai ‘iā te oe.”

 I le Kenese 8:20-22, na avatu e Noa le taulaga e faafetai ai I le Atua ona o le faasaoina o ia ma lona aiga mai le lolo. Na tali mai le Atua ma le folafolaga, e na te le toe faaumatia le lalolagi e ala I se lolo ma o le a le gata taimi e toto ai ma taimi o seleselega. E faamautinoa lava e le Atua I taimi uma o ia e faia le faafetai mulimuli. O le tele lava o lau faafetai I le Atua o le tele foi lena o lona tali mai I le faafetai. O lo’o faaalia mai ai iai tatou o le ‘faafetai’ o le tatalo pito sili lea ona lelei e te tatalo ai. Na o lana faafetai lava na faia e Solomona ae na avea ai o ia ma tagata e pito sili ona poto ma mauoloa. A e faamasani e te faafetai pea I le Atua mo mea uma ua na faia mo oe ananafi, e sili atu mea e na te foai mo oe a taeao. O tagata popoto e latou te fiafia e siisii pea le alualu I luma, e latou te faafetai I le Atua I mea e le’I oo mai. E mautinoa e maualuga lona tali mai ia te oe. 

 Ao lenei, e le ulagia le Atua. E na te silafia le eseesega o le loto faafetai ma le faafetai e na o upu. E iai lava mea e te faia e iloa ai le moni o lou loto faafetai. Mo se faataitaiga, o se tagata loto faafetai e na te usu pese ma viiga I le Atua (Salamo 7:17). O le tagata e loto faafetai e na te ta’u atu I tagata uma le agalelei o le Atua (Salamo 9:1). Afai e te iloa se fomai na ia faia togifitiga e manuia ai lou ma’i faigata, e te le ta’u atu ea I tagata o lo’o maua I lea ma’I ona o lou loto faafetai I lea fomai? O iina e iloa ai lou loto faafetai ona o le galuega alofa a le fomai. Afai e te le molimau atu ma faia ni tautinoga, e te lē loto faafetai I le Atua I lona faasaoina o lou ola mai le afi I seoli. O le tagata loto faafetai moni e le na o le faafetai e aunoa ma le faia po’o le avatu o se mea e faailoa ai le loto faafetai. I le Salamo 107:22, o loo talanoa mai I le taulaga faafetai. Afai e te loto faafetai moni I le Atua, e te saili pea I auala e avatu ai le faafetai, a le o se taulaga, o galuega e faia mo le Alii. O oe ea o se tagata loto faafetai moni?

 A e avatu le faafetai I le Atua, e tali mai o ia I se faafetai e sili atu!

OPEN HEAVENS
MATALA LE LAGI MO LE ASO SA 12 IUNI 2022

 Manatu Autu: E Faamanuiaina Tagata Galulue (Workers are Blessed)

 Tauloto – Tusi Paia: Eperu 6:10 Auā e lē amioletonu le Atua, na te lē fa‘agalogaloina la ‘outou galuega ma le alofa ‘ua ‘outou fa‘aali mai ai i lona suafa, auā na ‘outou ‘au‘auna i le ‘au pa‘ia, i le o lo‘o ‘outou ‘au‘auna i ai.

 Faitauga - Tusi Paia: Eperu 6:9-20

 Upu Folafola
I le tatou fuaiupu tauloto o le aso, o loo tusia I le Tusi Paia e lē amioletonu le Atua e na te lē faagalogaloina galuega uma e te faia I lona suafa. E faigata ma e lē faigofie  I nisi o taimi le galue I totonu o le tovine a le Atua. O le tele o taimi, e tatau ona e faaaogaina au tupe ma mea e te maua I ou lima, e faia ai le galuega a le Atua ina ia faaauau pea. Fai mai le Teuteronome 24:15‘ia e avatu ‘iā te ia lona totogi i lona lava aso, a‘o le‘i goto le la; auā ‘ua mativa o ia, ‘ua naunau fo‘i i ai lona loto; ne‘i vala‘au o ia i le ALI‘I ‘ona o oe, ‘ona fai lea ma agasala ‘iā te oe.

 Ona o loo faatonu mai e le Atua e tatau ona totogi so’o se tagata e galue mo oe ma ‘aua nei e aitalafu ai, o lona uiga, e totogiina e le Atua ana tagata faigaluega. Ou te ta’u atu lea tulaga ma le mautinoa aua foi, ua 40 tausaga o ou faigaluega ia te ia. 

 I le tele o tausaga talu ai, sa ou malaga ai I se atunuu I fafo I le faia o se polokalame. So’o se taimi lava ou te alu ai I le atunuu lea, e iai lava se uso e sau piki a’u mai le malae vaalele. A ma o atu I le taavale, e ui atu lava I se tasi o fale taavale e faatau ai taavale o le ituaiga taugata o le Rolls Royce, ma e masani ona ou fai atu I le uso lea e iai lava le aso ou te alu ai I le fale taavale lea e faatau ai sa’u Rolls Royce. I se tasi la o a’u malaga I le atunuu lava lea, na ma ui atu foi I le fale taavale lea ona fai foi lea o la’u tala masani. Na pasi atu lea I se fale ofu ua ou vaai atu o fai le paū. Ua ou fai atu I le uso e faatu sei faatau ni o’u lavalava manu o loo fai le paū. Na faateia au, tusa lava pe faapaū tau, ou te le gafatia lava ona faatau. Ua ou sau I fafo ma le faanoanoa ona o le le mafai ona faatau ni ou lavalava. Ua ata le uso lea ma lona manatu, e faapefea ona mafai ona ou faatauina se rolls Royce e oo I nei ofu o loo paū tau e le gafatia? Na ou faliu atu I lo’u Atua ma faapea atu: ‘O oe o lo’u pule ma o le uso lea o lo’o ‘ata ia te a’u, lau tagata faigaluega, faamolemole alofa mai’. O le isi taimi na ou asiasi ai I le atunuu lea, ua ese le uso na faatali maia a’u I le malae vaalele ma na sau I se Rolls Royce. Na sau le uso lea ma faapea mai: ‘Lo’u tama e, ua ou faatauina mai lenei taavale mo oe’

 Ou te manao e te ole atu I le Atua I le aso, ta’u atu ia te ia so’o se mea o lo’o e manaomia I le taimi nei. E tu’u faatasi lo’u faatuatua ma le faatuatua o so’o se tagata galue moni lava a le Atua e faia le tatalo lea I le asō. E tali lo’u Atua I lau tatalo I le aso lenei. E lē amioletonu le Atua, na te lē fa‘agalogaloina la ‘outou galuega ma le alofa.

OPEN HEAVENS
MATALA LE LAGI MO LE ASO TOONAI 11 IUNI 2022

 Manatu Autu: Faalogo I ou Matua (Listen to your Parents)

 Tauloto – Tusi Paia: Faataoto 13:1 E fa‘alogo le atali‘i poto i le a‘oa‘o atu a lona tamā; a o lē fa‘atauemu, e lē fa‘alogo ia i le a‘oa‘iga.

 Faitauga - Tusi Paia: Efeso 6:1-3

 Upu Folafola
Ua tele aso o tatou talanoa e uiga ia tatou fanau. O le asō se'I o tatou talanoa ia te outou le fanau. Po'o le a lou matua ua I ai e tatau lava na tumau lou usita'I I ou matua na e fanau mai ai faapea ou matua fa'aleagaga.  Fai mai le Fa'ataoto 4:10 Fa‘alogo mai, lo‘u atali‘i e, ma e talia a‘u ‘upu, ‘ona fa‘ateleina ai lea o tausaga o lou olaga.

 A e fa’alogo I ou matua o le a umi lou soifua auā na muamua soifua ou mātua ia te oe. Atonu ua e maua le poto ae lē o ia te oe le tomai o lo'o I ou mātua. E mafai fo'I na I ai ou lagona ua sili atu oe ona ua e maua ni faailoga e le'I ausia e nai mātua, ae aua ne'I galo ia te oe na foa'I mai oe e le Atua I le lalolagi e ala mai ou matua ma le fa'amoemoe, o ou matua e a'oa'o atu ma fa'atonu oe I ala o le Atua ma lona finagalo ia tatou popoto ai e pei ona ta'u mai I le Fa'ataoto 19:20 ‘Ia e fa‘alogo i le fa‘atonu mai, ma e talia le a‘oa‘o atu; ‘ina ‘ia e poto ai pe a o‘o i ou tausaga amulī.

 Atonu e pei se avega mamafa lou usiusita'I I le pulega a ou matua I le taimi ne’I, ae sau se aso e fiafia ue e usita'I. Tusa pe le'I maualuga so la aoaoina e pei o le tulaga ua e o'o I ai, faalogo pea I ou matua. Ia aua ne'I ia te oe tiga na o'o I ai ou mātua I le suafa o Iesu. Aua ne'I si’ia lou leo I ou mātua. Pe matutua I lāua ma vaivai, tusa fo'I pe sa faaletonu le la tausiga ia te oe a'o e la’ititi, ia e ava pea ma fa'aaloalo I ai, o I lāua o ou mātua. 

 O se tagata matua ua pulapula la goto lona soifua, e mamala ana upu.  A maligi loimata ma fetagisi ou matua  ua matutua ona ua tigā ia te oe, ua e faia le leaga mo oe I le lumana'I. Aua ne'I galo le tulafono o le lūlū ma le selesele. O le fua e te lulū nei e te toe selesele taeao. Saili ia fa'amanuia o’u mātua ia te oe I taimi uma. Fa'afiafia o la loto, ia ataata o la foliga ma ia avea oe ma mapusaga I o la loto. Afai sa faatiga  ou mātua ia te oe a'o talavou, faamagalo I ai ina ia aua ne'I i'u I ou luga le la agasala. E lē o se tiute o le fanau le  faamasino o mātua, tu'u I le Atua o ia na aumaia oe I le lalolagi e ala mai ou matua. 

Tatalo
Tama faamolemole fa'amagalo ia te a’u I mea uma sa o'u sesē ai I le vā ma o’u matua. I le suafa mamana o Iesu Keriso. Amene.

OPEN HEAVENS
MATALA LE LAGI MO LE ASO FARAILE 10 IUNI 2022

 Manatu Autu: A’oa’o I Latou e o Ese mai Faapotopotoga o e Amioleaga (Teach Them To Avoid Evil Company)

 Tauloto – Tusi Paia: Faataoto 13:20 O lē latou te feoa‘i ma tagata popoto, e poto lava ia; a o le uō a ē vālelea, e leaga ai lava ia.

 Faitauga - Tusi Paia: 2 Korinito 6:14-18

 Upu Folafola
E le tatau ona latalata lau fanau I so’o se uo latou te maua. Fai mai le 1 Korinito 15:33‘Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.

 E toatele matua e faataga latou fanau e faauo ma Ionatapa (2 Samuelu 13:3-5) ma o loo faapea mai, o le vaitau lenei o le saolotoga. Oka se valea! O le tatou fuaiupu tauloto o le aso o loo faaalia manino ai, e avea I tatou ma tagata e faapei o tagata e tatou te mafuta iai. E te manao I lau fanau ia faaumatia? E iai se muagagana e faapea ‘Faaali mai au uo ona ou ta’u atu lea ia te oe lou ituaiga tagata’. Afai o le uo mamae a lau tama e le o se afafine poo se atalii o le Atua, ua amata ona agai atu lena tamaitiiti e avea ma mailei a le fili. Ia vavae ese lau fanau mai na ituaiga uo faavavevave. 

 O la’u matafaioi o le vaaia o la’u fanau. Ao ou tuputupu a’e, a’o taaalo uma a’u uo I fafo, e faatonu lava a’u e lo’u tina ou te alu I totonu o le fale e fai a’u meaaoga. E masani ona ou fai atu I lo’u tina, ao la e taaalo uma tamaiti. E masani lava ona tali mai, e leai sa’u feau I tamaiti la, a’o oe, o lau matafaioi tausi. I le asō, ou te faafetai I le Atua mo lo’u tina aua sa mausali o ia I le faatonuina o a’u. 

 Fai mai le Salamo 1:1-3 o loo faaalia ai iai tatou, afai tatou te fia manuia, e iai ituaiga tagata e tatau ona tatou o ese mamao mai ai. E tatau ona o ese mamao mai le au amioleaga, au agasala ma le au tauemu. Ia e ta’u I lau fanau, a fia manuia I lenei lalolagi, e tatau ona filifili ma le poto a latou uo. E pau lava le tapulaa I le filifilia lelei o se uo e tusa ma le Faataoto 13:20 o lea, e tatau I le tagata ona poto ma atamai. Ia e manatua, o le mata’u I le Alii, o le amataga lea o le poto. Afai o lena uo e le o se atalii poo se afafine moni o le Atua, e le tatau ona faauo iai lau tama. 

 O fesootaiga I nei ona po, e le gata I le uo. O le telefoni ua avea ma metotia o fesootaiga I nei ona po. E tatau foi ona vavaeeseina le tamaitiiti mai so’o se amioleaga e ala I le telefoni. Ia e suesue polokalame o le televise po’o tifaga o loo matamata ai. Aua e te soona faatagaina so’o se mea ona ua tatou iai I nei vaitau, o le Upu a le Atua o lo’o taua pea. Afai e amioleaga fesootaiga o loo matamata ai, e faaleagaina ma faaleaogaina a latou amio lelei. 

Ia e suesue lelei po’o ai uo a lau fanau aemaise o mea o loo matamata ai I telefoni ma isi.  

OPEN HEAVENS
MATALA LE LAGI MO LE ASO TOFI 9 IUNI 2022

Manatu Autu: A’oa’o Atu e Ala I Faaa'oaoga (Teach by Example)

Tauloto – Tusi Paia: Tito 2:7 ‘Ia ‘avea oe ma fa‘aa‘oa‘o o galuega lelei i mea uma lava; ‘ia e a‘oa‘o i le matā‘upu ma le fa‘amaoni, ma le fa‘atoeaina, 

 Faitauga - Tusi Paia: Tito 2:6-8

 Upu Folafola
O le auala sili e aʻoaʻo ai lau fanau o se faaaʻoaʻoga, ae lē na o upu. Fai mai le Esekielu 16:44 Fa‘auta, o i latou uma o ē fai ‘upu fa‘atusa latou te fai le fa‘atusa ‘iā te oe, e fa‘apea ane, “E pei o le tinā lana tama.”

 O le mea e te faia, e faata’ita’i i ai lau fanau. O le auala latou te vaaia ai oe o e tautala, e latou te  talanoa ai foi. Ioe, e te aʻoaʻoina i latou, ae o au amioga e faia, e aʻoaʻoina ai i latou ma e sili atu nai lo au upu e te tautala atu ai. O le mafuaaga o le lē fanaufouina o nisi o fanau a faifeau, ona o upu e saunoa ai ma mea latou te faia, I totonu o le lotu, e ese mai a latou tala ma mea e faatino i totonu o latou aiga. E le mafai ona e nanaina se mea mai lau fanau; latou te iloa oe ma lou tagata moni. Atonu e te le o iloaina, a e folafolaina se anapogi o le a faatinoina i le lotu, ae o lo’o e tausami lava oe, e maitauina e lau fanau nei uiga. O lena faatinoga ua aoaoina ai i latou i se mea e ese mai i mea na e saunoa ai. O lo’o latou vaavaai atu ia te oe; e le o le mea e te fai atu ai e sili ona taua, ae o le mea e te faia. 

 A'o oʻu iai i Ilorina, sa masani ona ō mai i lo’u fale tagata mamaʻi ma e manaʻomia se faamālōlōga ma talosaga. E moeiini ou mata, faae’e ou lima i luga o latou ma tatalo. I taimi o le faauuina, e masani ona pauū nisi o i latou. O se tasi o la'u fanau tama pe a ma le 2-3 tausaga le matua i lena taimi. I se tasi aso, na sau ai se tasi tagata e asiasi I lo’u fale ma lana tama. Na alu lo’u atalii i lo’u potu, tago i lo’u fusiua, ua fai, alu atu loa i le tamaitiiti, moeiini ona mata ma faae’e ona lima ia te ia. Ina ua mavae sina taimi, e pupula ane mata o lo’u atalii ma iloa atu le tamaitiiti o loo tu pea, sa ia fai atu loa, "Paū nei loa." Na ia manatu o le ofuina o le fusiua na mafua ai ona pauū tagata ou te tatalo I ai. I le asō, o laʻu fanau uma, o lo’o  avea ma faifeʻau i le Ekalesia a le The Redeemed Christian Church of God.

 Afai e lē mulimuli mātua i le Atua, o le ā le faaaʻoaʻoga o le a mulimuli ai le fanau? Afai e iloa atu pea e ou atalii o e tuliloa fafine, e faapefea la ona e faamoemoe e alu ese o ia mai i le faitaaga? Afai e vaai atu lou afafine o lo’o e totogia se faiaoga ina ia pasi ai lana suega, e faapefea ona e aoaoina o ia I uiga o le amiotonu ma le faamaoni? E so’o le atalii I lona tamā, e faapena foi le tama teine, I lona tina. Afai e te leʻi toe fanaufouina ma ola faapaiaina, o lau faʻataʻitaʻiga e mulimuli ai lau fanau. Ia e faʻaalia atu I lau fanau ala o le malamalama, ina ia ‘aua nei latou iʻu I ala o le pogisa.

OPEN HEAVENS
MATALA LE LAGI MO LE ASO LULU 8 IUNI 2022

 Manatu Autu: A’oa’o I Latou o le Tausaga e le o se Pa Puipui  (Teach Them That Age is no Barrier)

 Tauloto – Tusi Paia: Salamo 8:2 ‘Ua e fa‘atumauina le vi‘iga i gutu o tama meamea ma tama fesusui, ‘ona o ē fa‘asauā ‘iā te oe, ‘ina ‘ia fa‘anofosa‘oina lē ‘ua ita ma lē ‘ua taui ma sui.

Faitauga - Tusi Paia: 1 Samuelu 3:1-14

 Upu Folafola
A’oa’o I lau fanau e le faatapulaaina tausaga o tagata e faaaogaina lea e le Atua. A’oa’o I latou ia tatala o latou loto I le Atua ao laiti. Na faalogo Samuelu I le siufofoga o le Alii mai lona laitiiti. I le 1 Samuelu 12:2, na ia faapea
2O lenei, fa‘auta, ‘ua savali le tupu i o ‘outou luma; a o a‘u nei, ‘ua toeaina a‘u ma ulusinā; fa‘auta fo‘i, o lo‘o ‘iā te ‘outou o‘u atali‘i; o a‘u fo‘i, ‘ua ‘ou fealua‘i i o ‘outou luma talu ‘ina ou itiiti, ‘ua o‘o mai i le aso nei. 

 E mafai ona faaaogaina e le Alii lau fanau, e le faailogaina poo le a le matua. O Tavita o se talavou ina ua faaaogaina o ia e le Atua e fasiotia Koliata. I le 1 Timoteo 4:12, na faapea atu Paulo ia Timoteo: 12‘Aua ne‘i ‘ino‘ino se tasi i lou taule‘ale‘a, a ‘ia fai oe ma fa‘aa‘oa‘o i ē ‘ua fa‘atuatua, i le ‘upu, ma le amio, ma le alofa, ma le loto, ma le fa‘atuatua, ma le amio mamā.

 O Timoteo, sa avea o ia ma faataitaiga lelei I le au kerisiano faatuatua mai lona talavou. E le faapea e laiti tele lau fanau e le mafai ai ona avea ma faataitaiga lelei I isi tagata. 

 Ae lei avea a’u ma lo’u toalua o ni tagata faaolaina, sa maua se ma fanau e toatolu ma na taoto lo’u toalua I le fanauina o nei tamaiti. Ua faia foi le ma faaiuga e le toe faia nisi tamaiti ona o fautuaga a fomai I le faigata ona toe maua seisi tamaititi I le fanau sa’o. Peitai ane, ua ma fanaufouina ma ua avea Iesu ma ma fomai. E iai se aso, na ma faitauina ai le Luka 1:37, o loo faapea mai, e leai se mea e le mafai ona faia e le Atua. Ua faia loa ma le ma faaiuga, o le a fai nisi tamaiti. O le taimi na iloa ai ua maua lo’u toalua I le ma’itaga, na oti se tasi o ana uo a’o fanauina lana pepe. Ua luluina lo ma faatuatua, peitai ane, ua manatu le Atua e fetalai mai I a’i ma’ua e ala I tamaiti. I le matou faigalotu I se tasi taeao, ua matou faitauina le Esoto 14 ma ua ou fai atu I tamaiti po’o le a lo latou malamalama I lea tala mai le Tusi Paia. Ua latou fai mai, ‘O le mea ua leai se auala muamua e faia ai, o le a saunia e le Atua le ala’. O nei upu na matua faamalosia’u I ai maua. I le iuga, e le gata na fanau sa’o lou toalua, ae na toe maua foi le isi tamaitiiti soso’o ane ai. 

 E mafai ona fetalai mai le Alii e ala I lau fanau ma faaaogaina I latou e le Atua e faatupuina lou faatuatua. E tatau ona e aoaoina lau fanau I ala o le Alii ma ia faailoa I a’i latou, e leai ma se tagata e faapea ua laitiiti tele ma ua le mafai ai ona faaaogaina e le Atua. 

 E mafai e le Atua ona faaaogaina lau fanau mai le laiti. 

OPEN HEAVENS
MATALA LE LAGI MO LE ASO LUA 7 IUNI 2022

Manatu Autu: A’oa’o I Latou e Saili I le Atua (Teach Them to Seek God)

Tauloto – Tusi Paia: 1 Nofoaiga Tupu 16:11 Sā‘ili ia ‘outou i le ALI‘I ma lona malosi; sā‘ili‘ili ‘iā te ia, ‘aua le aunoa.

Faitauga - Tusi Paia: Salamo 9:10

 Upu Folafola
1O lenei, ‘ia e manatua lē na faia oe i ona po o lou taule‘ale‘a, a o le‘i o‘o mai aso leaga, a o le‘i o‘o mai fo‘i tausaga ‘e te fa‘apea ai, “E leai so‘u fiafia i ai.” Failauga 12:1

O lo’o faaalia I le fuaitau mai le Tusi Paia o loo taua I luga, o le taimi e pito sili ona lelei mo le tagata e manatua ai le Atua o le taimi o le taulealea poo le taimi o le talavou. O le taimi lelei mo lau fanau e saili ai ia te ia o le taimi o laiti. O lo’o fetalai le Atua I le Faataoto 8:17
‘Ou te alofa atu ‘iā i latou o ē alofa mai ‘iā te a‘u; o ē sā‘ili‘ili mai fo‘i ‘iā te a‘u, latou te maua a‘u.

 Ta’u I lau fanau ia saili I le Atua ia maua o ia ao laiti ina ne’i tuai. E iai ni talavou e faapea o le a latou saili I le Alii pe a maea ona latou maua oa ma le tamaoaiga. Ia e ta’u atu iai latou e le mafai ona  manuia I le olaga nei, e aunoa ma Lē na faia I latou. O le manuia I le lalolagi e na o se tulaga e faafoliga. E iai tagata e foliga mai I le vaaiga lautele o lo’o tele o latou manuia, a’o totonu, o lo’o latou faafesagai ma ni faaletonu ogaoga. Ia e faamalosiau I lau fanau ia saili vave I le Atua I le taimi lenei, ina ia mautinoa e manuia o latou olaga I lenei lalolagi. Fai mai le Eperu 11:6“o ia fo‘i na te tauia mai o ē matuā sā‘ili ‘iā te ia”.

 E tauia e le Atua I latou o ē matua saili ma le filiga ia te ia. I nisi faaupuga, afai e te lē saili ia te ia ma le filiga, ‘aua e te mafaufau e te maua se taui. Fai mai le Salamo 34:10 E oge mea leona ta‘anoa ma latou fia ‘a‘ai; ‘ae e leai se mea lelei e mativa ai i latou o ē sā‘ili i le ALI‘I. 

 A’oa’o  I lau fanau o so’o se mea lelei e naunau ma mananao iai, e maua uma I le Alii. Ao’a’o I lau fanau e saili I le Alii ona leai lea o se mea e matitiva ai I latou. A’oa’o I latou e suesue I le Tusi Paia.  O se faanoanoaga I le toatele o kerisiano, e suesue lelei I le Tusi Paia pe a o I le Lotu ae faatopetope ona faia I le fale. A’oa’o I lau fanau ia saili ma suesue loloto I le Tusi Paia ina ia latou maua ni faaaliga mai le Alii a’o latou faitau I le Tusi Paia. A’oa’o I latou ia iloa tatalo. A’oa’o I latou e ole atu I le Atua I so’o se mea e mananao ai ae lei omai e ole atu ia te oe. E faapena ona e a’oa’o ma totō I totonu o I latou le faamaufaailoga e talanoa ai I le Atua. 

OPEN HEAVENS
MATALA LE LAGI MO LE ASO GAFUA 6 IUNI 2022

 Manatu Autu: A’oa’o I Latou I Mea e Tatau na Fiafia iai(Teach Them What to Appreciate)

 Tauloto – Tusi Paia: 1 Korinito 11:1 ‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso.

 Faitauga - Tusi Paia: 2 Korinito 3:18

 Upu Folafola
E iai le Tulafono I le itu faaleagaga e taua o le ‘Tulafono o le Liliuina i le toe Fuata‘iina’, ma o lona uiga, o so’o se mea lelei e te fiafia ma naunau iai, e telē le avanoa e te ausia ai lea tulaga. Ua faia I tatou ia liliuina i le toe fuata‘iina ina ia ausia so’o se tapulaa e avatu iai la tatou faamuamua, e pei ona faamanino mai I le faitauga o le Tusi Paia o le aso. 

 Le au pele e, a’o e vaavaai I le Alii, e liliuina i le toe fuata‘iina I tatou I lona faatusa mai le mamalu I le mamalu. Na fiafia Elisaia ia Elia ma o le iuga na ia maua le faaluaina o le faauuga sa ia Elia. Na fiafia Iosua ia Mose, ae lei alu ese Mose, na ia faamatuu atu ia te ia le poto ma le atamai. O mea e fiafia iai lau fanau mai le laiti ma le tulaga talavou, o mea ia e ono latou ausia I le tulaga matua. A’oa’o I latou ia fiafia I tagata kerisiano I totonu o atunuu, o tagata o le Atua e ola I poloaiga ma tapulaa a le Tusi Paia. E mafai ona latou fiafia I tagata pese, o taitai o malo, po’o se tagata I totonu o faalapotopotoga tau agavaa o loo iai, poo ai lava, ae ia e mautinoa o nei tagata e ola I taiala o le Tusi Paia ma o ni tagata e tausi mea lelei ma e faamaoni. 

 A'o ou laitiiti, na sau se faiaoga e faia sana aoaoga I le matou nu’u. Na sau ma aumai se tasi o ona tausoga. O lea tamaitiiti e matua le fiafia I se aoga. E matou te faalogo atu lava o ia fasia le tamaitiiti ona o le lē fia aoga. O se tasi aso, na fesili ai le faiaoga I le tamaitiiti; ‘o le a mea e te manao e te ausia’. Na tali mai le tamaitiiti e fia avea ma ave uilipaelo. O le mea moni, sa iai se ave uipaelo na fiafia iai lenei tamaitiiti ma o lea na naunau ai ia faapei o ia. 

 Ou te manatua foi se tasi mea na tupu a’o ou iai I le aoga. Na asiasi ane se epikopo mai le Ekalesia Egelani I la matou nuu I se taavale e fou lava. E matagofie ona laei, ma o matou uma I le aoga na tu faaalalua ma pepese ao ia savali atu I totonu o le aoga. Ina ua sau I fafo mai le taavale, na ou vaaia le iila manaia o ona seevae. Ina ua ‘ou alu atu I le fale I lea aso, na ou fai I lo’u tina o le a avea a’u ma se epikopo. E ui e le o a’u o se epikopo I le asō, ae o loo latalata iai lou tulaga.     

 O le a e iloa le mea e fiafia iai lau fanau e fua I mea e talanoa ai ma pese e pepese ai I totonu o le fale. Ia a’oa’o o latou ala ina ia fiafia I ala ma poloaiga a le Atua aua a matutua, e le toe te’a ese ai (Faataoto 22:6). A’oa’o lau fanau ia fiafia I ala ma tapulaa a le Atua mai le talavou.