Samoan Devotional

OPEN HEAVENS
MATALA LE LAGI MO LE ASO SA 5 IUNI 2022

 Manatu Autu: A’oao I Latou e Ava I Tagata Faauuina (Teach Them to Respect the Anointed)

 Tauloto – Tusi Paia: Salamo 105:15 Ua fa‘apea atu i ai, “‘Aua le tago i ē ‘ua ‘ou fa‘au‘uina, ‘aua fo‘i le agaleaga atu i a‘u perofeta.”

 Faitauga - Tusi Paia: Salamo 105:14-15

 Upu Folafola

15‘Ua fa‘apea atu i ai, “‘Aua le tago i ē ‘ua ‘ou fa‘au‘uina, ‘aua fo‘i le agaleaga atu i a‘u perofeta.” Salamo 105:15

 I le fuaitau o le Tusi Paia o loo taua I luga, e leo taua ai se tausaga faatapulaa o le matua o le tagata. E lei faapea mai le Atua, ‘Au toeaina, aua le tago I e ua faauuina’ pe faapea mai foi ‘Tamaiti, e pule lava outou I mea toe te faia I e faau’uina’. A’oa’o I tagata e le gata I tagata talavou ae o le au matutua, ia ava ma faaaloalo I tagata faau’uina. Afai e tago se tamaitiiti I se mea vevela, e le faapea e suia ai lea mea ia malulu, ae e mu ai le tamaitiiti, ma e faapena foi le tagata matua. O le faau’uga e le o se mea e taalo ai seisi. E toatele talavou ua latou maua fetuu ona o le leai o se ava ma le faaaloalo I tagata faauuina. Afai e iloa e tagata faau’uina tagata o loo latou lē ava I ai latou, semanu e mafai ona nofo tatalo mo I latou, peitai o le tele o taimi, e latou te lē o iloa tagata o lo’o tauemu I ai latou, ma ua galue atu iai le afi. 

 E le mafai ona tuuesea ni tamaiti mai le puapuaga e o’o I ai ona o le taui I le osofaia o tagata faau’uina o le Atua e ala I upu e lafo pe o amioga e faia. I le 2 Tupu 2:23-24, na iai ni tamaiti na ula ma tauemu I le tagata faau’uina o le Atua ma na feoti uma I le aso e tasi. Faamolemole ia a’oa’o lau fanau e ‘aua nei faatasi atu ma isi tagata e tauemu I se tagata, pe talanoa ma muimui foi se alii po’o se tamaitai faau’uina a le Atua. Afai e te faitau I le Numera 16:1-35, e te iloa ai o I latou e osofaia ma faasagatau I tagata faau’uina a le Atua, e ono tei a ua feoti faafuasei. A’oa’o I lau fanau, tusa poo le a le matua po’o le laitiiti, ia aua lava nei lē ava ma lē faaaloalo I tagata faau’uina a le Atua aua e ono maimau ai o latou ola. 

 O Tavita o se tagata e matua faaaloalo I tagata faauuina a le Atua. A’o saili Saulo e fasioti ia Tavita, na iai le avanoa na maua e Tavita e fasioti ai ia Saulo, ae na te lei fasiotia Saulo. Na a’oa’oina lelei o ia e ona matua ia ava ma faaaloalo I tagata faauuina a le Atua e pei ona tusia I le 1 Samuelu 16:19-20. O le tulaga lea, e ui ina tele taua na faia I le vaitau o Tavita, e lei oti ai I nei taua, ae na faato’a maliu lava o ia ina ua tagata matua ma toeaina. 

 Aua e te faatagaina lau fanau e taaalo I le afi. A’oa’o I latou e tatau ona ava ma faaaloalo I tagata faau’uina. Tusa pe o’o I le tulaga ua sese ai le tagata faauuina, e le o sa outou matafaioi le faasalaina o lea tagata. Tu’u I le Atua na te faasalaina lana lava auauna. 

 E le o iai se tausaga faatapulaa o tagata e tatau ona ava ma faaaloalo I tagata faauuina o le Atua. I le suafa o Iesu, Amene. 

OPEN HEAVENS
MATALA LE LAGI MO LE ASO TOONAI 4 IUNI 2022

 Manatu Autu: A’oao I Latou e Su’esu’e (Teach Them to Study)

 Tauloto – Tusi Paia: Faataoto 4:7 O le poto o le mea sili lea, ‘ia maua le poto; o mea uma ‘e te maua ia maua mai ai le atamai.

 Faitauga - Tusi Paia: Faataoto 4:7-9

 Upu Folafola
Fai mai le tusi o Salamo 127:3 O le fanau o le tofi lea mai le Alii o lona uiga o fanau, e patino i le Atua a'o tatou ua na o ni tausimea. E taua lā lou tausia lelei o le fanau ua foa'I atu e le Atua ia te oe. E tatau na e a'oa'o  lau fanau ia aua ne'I vālea aua a vālea lau fanau o lona uiga e le'I faia lou tiute. Ua fa'amatalaina e le tatou fuaiupu tauloto mai le Tusi Paia o le asō, o le poto o le mea sili lea. Ua fa’atonuina fo'I tatou ia maua le poto, ia maua ma le atamai.  O lona uiga e tatau na saili ia maua le poto. O le ala fo'I lea o le valaau ia tatou a'oa'o ia tatou fanau ala e maua ai le poto.

 A’oa’o lau fanau o le poto e sili atu nai lo'o le malosi (Failauga 9:16) Talu ai o le poto e iloa ai le atamai e tatau na e faasino lau fanau ia su'esu'e ma saili le atamai. Aua e te fa'atagaina lau fanau e matamata TV ma taa’alo I le asō atoa.  E tatau na fai meaaoga aua e leai se isi e mafai na lelei e aunoa ma le toaga e su'esu'e. O lo’u toaga e su'esu'e o le maualuga lea o lo’u a’oa’oina.

 A o o'u faiaoga I le Ondo Boys High School I le 1963, sa o'u aoaoina ni vasega se 35. Sa I ai se tasi faiaoga ua i'u mai ma lona faailoga I se Iunivesite e na o le 21 a lana vasega na a'oa'o ae fa’afāina lo'u totogi fa'atoā maua lona totogi. E ui I le tēlē o lona totogi sa tomumu ā ma lē fiafia. Sa o'u fai  I lea faiaoga “o lea e 35 a'u vasega ae na o le 21 lau vasega ae fa'a fāina e sili ai lou totogi ia te a'u a'o lenā lava e te fa’aseā.” Na sōsō mai le faiaoga ma faapea mai, “Atali'I, e te lē malamalama o lea e totogi a'u mo se galuega ua uma na ou faia.” 

 O le aso lenā na fai ai la'u fa'aiuga o le a ou alu I le Iunivesite tusa po'o le a le tau. E lē afaina pe na fa’afefea le amataga o le olaga o se tamaititi, e lē afaina pe matitiva mātua, afai e toaga le tamaititi e su'esu'e e o'o ina tutū fa'atasi o ia ma tupu. A fai e te lē talitonu, saili se taimi e faitau ai I le talaaga o lo'u olaga ma fa'atusatusa I le tulaga ua o’u I ai I le taimi nei. Ou te tatalo mo lau fanau aua ne'I avea o nisi e lē manuia o latou taumafai I le suafa o Iesu. O oe, e I ai fo'I lau vaega e fai mo le tatalo lenā ia tali mai I ai le Atua. Ia e a’oa’o lau fanau e toaaga e su'esu'e.

E mafai na e faapea mai, “e lē afaina pe su’esu’e la'u fanau pe leai ua mae’a na o'u saunia o latou lumana'I e leai se mea e oge ai I latou.” Aua ne'I fa'asesēina oe. Na o le tamaititi atamai e mafai na ia tausia lelei mea ua na maua. Ou te tatalo aua ne'I avea lau fanau o nisi e fa'a leagaina au galuega lelei pe a ē oti.  I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 3 IUNI 2022

Manatu Autu: E Lapatai oe e le Alofa (Love Forewarns)

 Tauloto – Tusi Paia: 1 Tesalonia 5:2 Auā ‘ua ‘outou iloa lelei lava, o le aso o le Ali‘i e pei o le gaoi i le po, e fa‘apea ‘ona o‘o mai ai.

 Faitauga - Tusi Paia: Mataio 24:43-51

 Upu Folafola
O le tele o taimi, e lapatai mai ai le Atua I le tagata I se mea o le a tupu po’o le taui foi o amioga e faatino. Ae le’I faia e Kaino le gaoioiga e fasioti I lona uso, na lapatai iai le Atua I le Kenese 4:6-7‘Ona fetalai atu lea o le ALI‘I ‘iā Kaino, “Se a le mea ‘ua e ita ai? Se a fo‘i ‘ua fa‘a‘ū‘ū ai ou mata? 7Pe ‘āfai ‘e te amio lelei ‘e te lē maua ‘ea le fiafia? ‘Ae ‘āfai ‘e te lē amio lelei o lo‘o ta‘oto i le faitoto‘a le agasala. E ua‘i atu lona mana‘o ‘iā te oe, ‘e te pule fo‘i oe ‘iā te ia.”

 E ui na lapatai e le Atua, e le’I suia ai ona ala. Na ia fasiotia lona uso ma sa ia maua le taui. Ae lei aveeseina atu Iesu e maliu mo agasala a le lalolagi uma, na ia lapatai mai e faafiti Peteru ia te ia. Ae na faalialia vale Peteru aua ua ia faamaualuga I lona tomai ma le agavaa. Na faatoilaloina Peteru e pei ona lapatai mai ai le Atua, ae faafetai I le alofa mutimutivale o le Atua na ia maua ma ua toe faafoisia lona ola. Ia e maua le alofa mutimutivale o le Atua I le aso ma ia e toe maua mea uma ia te oe ua leiloa, I le suafa o Iesu. 

 O le aso, I lona alofa, o loo lapatai pea le Atua I le tagata I le afaina ona o ana amioga. Na ia fetalai mai I le Faaaliga 22:12“Fa‘auta fo‘i, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu ‘ia tusa ma lana amio ‘ua fai.

 E iai nisi o tagata e manatu e na o tala lava a Iesu sa faamatala, aua foi e le afio mai lava Iesu. O loo faamatala mai I le 2 Peteru 3:9 le mafuaaga tonu ua faatuai ai ona toe afio mai:
9E lē fa‘atuai mai le Ali‘i i le mea na folafolaina mai, fa‘apei o le manatu a isi tagata i le fa‘atuai; ‘ae peita‘i ‘ua ‘onosa‘i mai lava o ia ‘iā te ‘outou, ‘ona ‘ua lē finagalo ia fano se tasi, a ‘ia o‘o uma lava i le salamō.

 Le au pele e, a fai mai le Tusi Paia o pei o le emo o le mata le taimi e sau ai le siitiaga, e le na o se tala. Ua mausali Afioga a le Atua e faavavau (Salamo 119:89). A faapea mai le Alii e toe afio mai, e toe afio mai. Talosia ia ‘aua lava nei avea oe ma se tagata e matua tumu I le salamo I le aso e tupu ai. 

 E faapefea ona e sauni mo le siitiaga?

OPEN HEAVENS
MATALA LE LAGI MO LE ASO TOFI 2 IUNI 2022

 Manatu Autu: E Puipui oe e le Alofa (Love Protects)

 Tauloto – Tusi Paia: Roma 8:31 ‘O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?

 Faitauga - Tusi Paia: Ioane 10:11-15

 Upu Folafola
Ina ua tuua I le tino e Iesu le lalolagi, na ia fetalai ma le mautinoa i ona so’o o le a ia le tu’ua lava i latou, ma o le a faatasi pea o ia ma i latou seia o’o i le gataaga o le lalolagi. (Mataio 28:20) ma o upu  faamafanafana na mo I tatou. Ana le’i fetalai mai o Ia, e faatasi ma I tatou seia o’o i le iʻuga o le lalolagi, e te taumānatu pe o Ia puipuia i tatou i le taimi nei mai mea leaga uma o loo tutupu i le lalolagi. Peitaʻi, o loo ia fetalai, o le a faaauau pea lana puipuiga seʻia o’o i le gataaga o le lalolagi. Na ia faamautinoa mai iā i tatou i le Isaia 60:2Auā fa‘auta mai, e ufitia le lalolagi i le pouliuli, e ufitia fo‘i nu‘u i le pogisā. ‘Ae afio a‘e le ALI‘I i ou luga, ma le pupula o le ALI‘I e aliali mai lea i ou luga.

 E ui ina tele le vevesi i le lalolagi, e leai se mea e popole ai. Afai o oe moni o se atalii po’o se afafine o le Atua, o lena ua faamautinoa mai e Iesu ia i tatou i le Ioane 16:33 e ui lava ina i ai puapuaga i le lalolagi, ae e tatau ona tatou fiafia aua ua Ia manumalo i le lalolagi.

 Afai e molimauina e se tasi, uiga o le puipuiga ale Atua, ou te fia molimau I lea itu. I le tele o tausaga ua mavae, i se tasi o a matou sauniga mo le Agaga Paia i Nigeria, a o o’u savali atu i luga o le pulelaa ou te lauga ai, na tatala e le Alii o’u taliga ma na ou faalogoina ai se talanoaga o faia i le va o ni taulaitu se toalua, ma o lo’o sauni ma taupulepule le faia se osofaiga i lo’u olaga i lena lava taimi. Na ou faasilasila i le aofia o lo’o potopoto, o lo’o mafai ona ou faalogo i taulaitu e toalua ma ou faapea atu ai, afai latou te le mananao e fano i totonu o le 7 aso, e tatau loa ona latou o mai i fafo ma faaalia le agaga salamo. Na faateʻia le faapotopotoga ina ua ō mai i fafo tagata faataulāitu. I le 2 Tupu 6:14-17 o loo faapea mai, na fefe le auauna a Elisaia ina ua ia vaaia le autau atoa o siomia i latou ma ua sauni uma e osofai. Peitaʻi, na toʻafilemu pea Elisaia ona na ia iloaina, o Lē o loo puipuia o ia, e sili atu na i lo le ʻautau i fafo atu o le aai. Sa ia tatalo i le Atua e faapupulaina mata o lana auauna, ina ua vaai atu le auauna i le aofaʻi o fitafita mai le lagi o lo’o i lo latou itu, ma na ia maua ai loa le toʻafilemu. 

 Afai o lo’o e faia pea le agasala, o le mea moni ua e taalo i lou olaga, aua o le leoleo mamoe lelei, e na te puipuia ana lafumamoe. E na o i latou o fanau moni a le Atua e saogalemu i le mea lilo o lo’o I ai le Atua Silisili Ese, e mau o ia i le paolo o Lē e ona le malosi uma lava ( Salamo 91:1 ). 

OPEN HEAVENS
MATALA LE LAGI MO LE ASO LULU 1 IUNI 2022

Manatu Autu: E Foai le Alofa (Love Gives)

Tauloto – Tusi Paia: 1 Ioane 3:16 ‘O le mea lava lenei ‘ua tatou iloa ai le alofa, ‘ina ‘ua tu‘uina atu e ia o lona lava soifua e sui a‘i i tatou; e tatau fo‘i ‘ona tatou tu‘uina atu lo tatou ola e sui a‘i le ‘au uso.

 Faitauga - Tusi Paia: Roma 8:31-37

 Upu Folafola
I le 1 Korinito 13:13, o le fa‘atuatua, ma le fa‘amoemoe, ma le alofa e ‘tumau’. Na faaauau le fuaiupu ma faapea mai ‘a o le sili o nā mea o le alofa lea’. O i tatou, ‘ua tatou alolofa ‘iā te ia, auā na ia mua‘i alofa mai ‘iā te i tatou (1 Ioane 4:19). A maua e se tagata le malamalama moni i le alofa o le Atua ia te ia, ua pei o se ufimata ua aveesea ma ona fofoga, ma o le a faatupuina lona alofa I le Atua ma alu ese ai ma saisaitiaga o le agasala. Ua matua alofa tele mai le Atua iai tatou ma e leai se mea ua maoae tele ua le mafai ai ona ia aumaia I a’i tatou. Fai mai le Roma 8:32O ia lava sa na lē fa‘asaoina lona lava Alo, a ‘ua tu‘uina mai o ia ‘ona o i tatou uma lava, e lē foa‘i fua mai ‘ea e ia ‘iā te i tatou mea uma lava fa‘atasi ma ia i se a?

 Afai na foai mai e le Atua le mealofa e pito sili ona maoa’e, o lona Alo e toatasi (Ioane 3:16), e leai se mea e mauluga tele e le mafai ona ia foai atu ia te oe. E leai se mea! E foai e le Atua ia tei tatou aua foi e naunau ma alofa mai o ia. O lo’o ia manatu foi e tatau ona tatou alolofa atu I o tatou tuaoi ma foai atu iai latou. Fai mai le 1 Ioane 4:21 O lenei fo‘i le poloa‘iga ‘ua tatou maua mai ‘iā te ia, o lē alofa i le Atua ‘ia alofa fo‘i o ia i lona uso. 

 O le a le telē o lou alofa I a’i latou I ou tafatafa? O le a le telē o lou alofa I a’i latou tou te faigaluega faatasi? E iai se aso na sau ai se alii talavou I le matou sauniga o le Agaga Paia I totonu o Nigeria ma ia vaaia le uso o lona tina I le ogatotonu o le motu o tagata. Na ia valaau atu ma le leo tele, aunty, ua e sau iinei? Na tali ma o ia, ioe o lea faatoa amata ona ou sau. Ae tali atu le alii talavou lea, ua tele tausaga o ‘ou sau I nei sauniga. Na matua ita ma lē fiafia lenei tina I lona tausoga I le tele o Tausaga na ia iloa ai le malamalama ae le tauina atu ia te ia Iesu Keriso. Ua ita I lona le tauina atu ia te ia o loo agai atu o ia I seoli. 

 E te maua pea I le lē loto alofa ma e vaavaai atu I ou aiga o loo agai atu I seoli? O loo ia te oe le malamalama, aisea e te le tauina atu ai iai latou Iesu? Aisea e te le valaaulia ai I latou I le lotu? Aisea e le fai ai ma au masani ma ta’u iai lenei faamalosiau o le ‘Open Heavens’ I taimi uma po’o tausaga uma, aua e tusa pe musu e tuuina atu o latou ola ia Iesu, e iai le aso e taitaiina ai I latou e faitau pe faalogo foi ma e iai lava se fea’u mai nei faamalosiau e ono pa’I atu iai latou. Afai e te alofa moni I lou tuaoi, e te taitaiina I latou ia maua le meaalofa na foai mai e le Alii, o le faaolataga. 

 O le meaalofa pito sili ona lelei e te foai atu I se tagata e faailoa I ai e te alofa ia te ia, o le talalelei ia Iesu Keriso. Aua e te taofia!

OPEN HEAVENS
MATALA LE LAGI MO LE ASO LUA 31 ME 2022

 Manatu Autu: E Faamaoni le Atua 4 (God is faithful 4)

 Tauloto – Tusi Paia: Faaaliga 22:12 ‘12“Fa‘auta fo‘i, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu ‘ia tusa ma lana amio ‘ua fai.

 Faitauga - Tusi Paia: Mareko 10:28-30

 Upu Folafola
O le faamaoni o le Atua e faalautele atu I lana folafolaga e tauia le tagata e tusa ma ana galuega. O lona uiga, o le toe afio faalua mai o Iesu Keriso e tauaao atu ai nisi o faamanuiaga o taui o galuega. O le a faaalia ai, o nisi o tagata kerisiano e paie e faia le galuega a le Atua o le a iai I le lagi, ae o le a matua salamo ona o le tele o lo latou olaga faapaiaina I le lagolagi e le’i faaaogaina mo le galuega a le Atua. O lo’o tusia e le aposetolo o le a I ai faamanuiaga ma taui maoa’e mo faifeau o le talalelei na latou tausi lelei I le lafu mamoe. Fai mai le 1 Peteru 5:4 Pe a fa‘aali mai fo‘i le Leoleo mamoe silisili, e maua e ‘outou le pale pupula e lē mamae lava.

I le tatou faitauga o le Tusi Paia o le aso, ua tatou faitau ai I le tali matagofie a Iesu Keriso I le fesili a Peteru I le taui o le latou galuega e mulimuli ia te ia. O le Ala, Upu Moni ma le Ola (Ioane 14:6) ua ia faamautu mai  taui o faamanuiaga maoa’e, ma o le taui silisili, o le maua o le ola e faavavau. O le ogatotonu lea o le faatuatuaga kerisiano, o le ola e faavavau. Le au pele e, o avea ea le ola e faavavau ma faavae mautu o lou mulimuli ia Iesu Keriso? Aua nei leiloa ia te oe lenei folafolaga e faavavau. O loo folafola mai foi e le Tusi Paia o I latou e faatuatua ma talitonu ia Iesu Keriso e latou te maua le ola e faavavau (Ioane 3:16-18). Peitai, e iai vaega eseese o le ola e faavavau. E iai nisi e leai ma se taui e maua. O loo atagia lea I le ituaiga olaga e ola ma soifua ai I lenei lalolagi. O lo’o tusia e le aposetolo o Paulo: 14‘Āfai e tumau le galuega a se tasi na ia ati a‘e, o le a maua e ia le taui. 15‘Āfai o le a fa‘amūina le galuega a se tasi, e māumau ana mea; peita‘i ane o le a sao o ia, ‘ae pei o sē na ui mai i le afi. 1 Korinito 3:14-15

 Le au pele e, ia e manatua, e lē amioletonu le Atua, na te lē fa‘agalogaloina la ‘outou galuega ma le alofa ‘ua ‘outou fa‘aali mai ai i lona suafa (Eperu 6:10). ‘Aua ne‘i tatou fa‘apalapala i le amio lelei; auā o ona po e tatau ai tatou te selesele mai ai, pe ‘āfai tatou te lē fa‘avaivai (Kalatia 6:9).

 Tatalo:
Tama, faamolemole ia ou tumau I le faatuatua ma auauna ia te oe ma e leai seisi e faoa lo’u taui I lou malo I le suafa mamana o Iesu Keriso, Amene

OPEN HEAVENS
MATALA LE LAGI MO LE ASO GAFUA 30 ME 2022

 Manatu Autu: E Faamaoni le Atua 3 (God is faithful 3)

 Tauloto – Tusi Paia: Ioane 14:3 ‘Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u.

 Faitauga - Tusi Paia: Ioane 12:1-4

 Upu Folafola
O se tasi o folafolaga a le Atua e faamaoni o ia e faataunuu, o le toe afio faalua mai o Iesu Keriso. Na folafola e lo tatou Alii o Iesu Keriso e fai ma sui o le Tolutasi Paia, e toe afio mai e siitia atu i latou e mulimuli ia te ia I le lagi e pei o le fuaiupu tauloto ma le faitauga mai le Tusi Paia o le aso. O le faanoanoaga ua toatele nisi o tagata popoto o le Tusi Paia ua faapea mai e le toe afio mai Iesu I le tino. Le au pele e, aua nei taitai seseina oe e nei aoaoga a satani, faamolemole toe liuliu le tofa, toe faitau lelei lau Tusi Paia. Aua e te talitonu ia aoaoga ia a le tiapolo. E faamaoni le Atua ma e le taitai ona ia faia se folafolaga e le taunuu. Na fetalai Iesu ‘ana leai, ‘ua ‘ou fai atu ‘iā te ‘outou’ (Ioane 14:2). Ua ia silafia lelei, o le a toetele le au tauemu, le au taufaasese ma le au lē talitonu I lona toe afio faalua mai. Le au pele e, ou te folafola atu ia te oe I le aso nei, e toe afio mai lo tatou Alii o Iesu Keriso, ma ua lata mai. Na faamaonia e agelu nei folafolaga na ia faia I le au so’o e fai ma sui o Agaga Paia I le Galuega 1:10-11

10‘Ua latou tulimata‘i a‘e i le lagi, a o afio a‘e o ia, fa‘auta fo‘i, o tagata e to‘alua ‘ua tutū mai ‘iā te i latou ma ‘ofu sisina. 11‘Ua la fai mai, “O ‘outou tagata Kalilaia e, se a le mea tou te tutū ai, ma va‘ava‘ai i le lagi? O Iesu lenā, ‘ua ‘aveina a‘e nai ‘iā te ‘outou i le lagi, e fa‘apea ‘ona toe afio mai o ia, e pei o lona afio atu i le lagi ‘ua ‘outou va‘ava‘ai i ai.”

E lua ni aoaoga mai le fuaitau o loo taua I luga. Muamua, o I latou o loo manatu e le faamaoni Iesu Keriso I lana folafolaga o le toe afio faalua mai, ia toe liuliu le tofa. Aua foi e toe afio mai Iesu, e faamaina I latou seiloga e salamo. Lona lua, o I latou e le talitonu I le faamaoni o le Atua e tusa ma lona toe afio faalua mai, afai e maliliu I latou ma lenei manatu e lē talitonu, ua leai seisi avanoa e toe salamo ai, aua ua tofia fo‘i mo tagata ‘ia tasi lo latou oti, ‘ae mulimuli ane o le fa‘amasinoga (Eperu 9:27).

O so’o se tagata e tuuina atu lona ola ia Iesu Keriso ma tumau ia te ia, e avea ma tagata fou. E mavae atu mea tuai, faauta ua faafouina mea uma ma e le toe faavaivai I latou ona o le agasala (2 Korinito 5:17).

Le au pele e, ia sauni ia ola I le amiotonu e ala I le faatuatua ia Iesu Keriso, le alo o le Atua Soifua. I le suafa o Iesu, Amene.   

OPEN HEAVENS
MATALA LE LAGI MO LE ASO SA 29 ME 2022

 Manatu Autu: E Faamaoni le Atua 2 (God is faithful 2)

 Tauloto – Tusi Paia: Ieremia 1:12 ‘Ona fetalai mai ai lea o le ALI‘I ‘iā te a‘u, “‘Ua lelei lau va‘ai; auā ‘ou te mataala ‘ina ‘ia faia a‘u ‘upu.”

 Faitauga - Tusi Paia: Isaia 52:7-12

 Upu Folafola
Na folafolaina le faaolataga o le tagata mai lava I le amataga I le faatoaga I Etena e ui e pei na umi ona faatalitali, na taunuu lava I le taimi na atofaina. E ta’u mai ai I ai tatou le faamaoni o le Atua ma e na te faataunuuina folafolaga uma ua ia faia ia te oe. Tusa pe foliga mai ua tuai, ia e faatali seia o’o mai. E taunuu lava (Sapakuka 2:3). 

 O se vaega o le faamaoni o le Atua o le a tatou suesueina I le aso, o le faaolataga. E matautia le agalelei o le Atua I lona amata saunia lea o le auala mo le faaolataga I le taimi lava na paū ai le tagata, ma ua folafolaina ai le manumalo a’ia’i e tusa ma le Kenese 3:15. 

 Ina ua amata le galuega mo le faasaolotoina o le fanauga a Isaraelu, na iai I le finagalo o le Atua le saunia o le faaolataga e amata mai lava I le taimi o Aperaamo I le Kenese. O se tasi o ana folafolaga ia Aperaamo I le Kenese12:3, e tauala mai I ona suli le faaolataga. Fai mai le Hosea 1:10 A o le faitau aofa‘i o fānauga a Isaraelu ‘ua pei o le oneone o le sami ia, e le māfuatia, e lē mafaitaulia; o i le mea fo‘i na fa‘apeaina atu ai ‘iā te i latou, “E lē o so‘u nu‘u ‘outou,” e i‘u ‘ina fa‘apeaina atu ‘iā te i latou, “O atali‘i o le Atua soifua ‘outou.”

 O le fuaitau o le Tusi Paia o lo’o taua I luga, na toe sii mai I le Feagaiga Fou ina ua faamaonia e Paulo le faamaoni o le Atua I lana folafolaga o le faaolataga I tagata o nuu ese (Roma 9:26). O le faitauga o le Tusi Paia o le aso o loo taua ai le folafolaga o le faaolataga o le tagata. Afai e te lei taliaina lenei faaolataga ua ofoina mai, o se mealofa foai fua mai, faamolemole ia e faia ma talia loa I le aso ae lei tuai. Fai mai le Tusi Paia I le 2 Korinito 6:2:
Auā ‘ua fa‘apea mai o ia, “O le tausaga e talia ai, na ‘ou fa‘alogo ai ‘iā te oe, o le aso fo‘i e fa‘aolaina ai, na ‘ou fesoasoani ai ‘iā te oe.” Fa‘auta, o lenei le tausaga e talileleia mai ai; fa‘auta, o lenei le aso e fa‘aolaina ai.

Mo I latou ua maea tuuina atu o latou soifua ia Iesu, ia e tumau ma mautinoa, o ana folafolaga ia te oe e faataunuuina I le taimi ua atofaina. Ia e faatuatua pea ia te ia ma lou loto atoa ma ia e olioli ae e faatalitali ia te ia. Ou te ta’u atu ia te oe, e faamaoni le Atua ma e te lē ono faanoanoa ai. 

 Saili I le Tusi Paia i folafolaga a le Atua mo oe ona e tumau ma faatuatua e te maua, I le suafa o Iesu, Amene.   

OPEN HEAVENS
MATALA LE LAGI MO LE ASO TOONAI 28 ME 2022

 Manatu Autu: E Faamaoni le Atua 1 (God is faithful 1)

 Tauloto – Tusi Paia: Eperu 6:18 18‘Ina ‘ia ‘iā i tatou o mea e lua e lē mafai ‘ona liua, e lē mafai ‘ona pepelo ai le Atua, tatou te maua ai le fa‘amafanafanaga tele, o i tatou o ē ‘ua sōsōla e tago atu i le fa‘amoemoega ‘ua tu‘u i o tatou luma.

 Faitauga - Tusi Paia: Teuterenome 7:7-9

 Upu Folafola
E na o le to'atasi le tagata fa'amaoni I le lalolagi atoa ma o ia na faia mea uma. O le mafuaaga lea ina ua tauto le Atua ia Aperaamo e faamaoni lona alofa ia te ia, na ia faailoa o ia o le Atua faamaoni, e tausi feagaiga. Afai tatou te fai se su'esu'ega I le va feagai o le Atua ma le tagata, tatou te maofa e aunoa ma se masalosalo I le faamaoni o le alofa o lo tatou Atua. Fa'ata'ita'iga na valaau le Atua iā Aperaamo a'o I le fale o lona tamā ma folafola na te faia o ia ma nuu tele. ( Kenese 12:1-2) o le taimi lea e le'I fanau Isaako.

Ina ua lē mautonu ma lē onosa'I Aperaamo e pei o le natura o le tagata soifua, na fa’afou ma fa'aopoopo e le Atua ana folafolaga iā Aperaamo I le Kenese 15: 1,5 e faapea:

1‘Ua ‘ava‘e ia mea, ‘ona tulei mai lea o le afioga a le ALI‘I ‘iā Aperamo i le fa‘aaliga ‘ua fa‘apea mai, “Aperamo e, ‘aua ‘e te fefe o a‘u nei o lou talitā, o lou taui e matuā tele lava. 5‘Ua ia ‘aumaia fo‘i o ia i fafo, ma fa‘apea atu, “‘Inā e va‘ava‘ai a‘e ia i le lagi, ma ē faitauina fetū, pe ‘āfai e mafaia ‘ona e faitauina.” ‘Ua ia fa‘apea atu fo‘i ‘iā te ia, “E fa‘apea lava lau fānau.”

 Na fa'ataunuu uma e le Atua nei folafolaga I le tusi o Kenese 21: 1-3 ma le tusi o Esoto 1:9-10. Ina ua fefefe tagata Aikupito I le vave fa'atupula'ia ma uluola o le fanauga a Isaraelu, na fai atu Farao I lona nu'u I le tusi o Esoto 1: 9-10 e faapea:

9‘Ua ia fai atu i lona nu‘u, “Fa‘auta, o le nu‘u o le fānauga a Isaraelu ‘ua sili ‘ona to‘atele ma le malosi ‘iā i tatou; 10‘inā ō mai ia, ‘inā tatou togafiti poto ‘iā i latou, ne‘i tupu tele, ‘ona i‘u ai lea, pe a o‘o se tau‘a, ‘ina ‘au fa‘atasi i latou ma ē ‘ino‘ino mai ‘iā i tatou, ma latou tau mai ‘iā i tatou, ma ō ‘ese i le nu‘u nei.”

 Le au pele e, e alofa ma faamaoni le Atua I lana foafoaga e aofia ai ma le fa'ataunu'uina o ana folafolaga I taimi ma fuata e tusa ma lona finagalo ( Kenese 8:22). E faamaoni le Atua ia te oe pe a e faamaoni ia te ia e pei o fanau a le Atua.  Manatua lana fetalaiga I le tusi o Esoto 20:6 o lo'o tumau pea. Sau I lou Atua lē na folafola mai I a’i tatou o le a afio mai lo tatou Faaola o ia fo'I ua na fa'ataunu'u lea folafolaga, o le a feliua'ina I le lelei lou olaga e ala I lona alofa fa'amaoni, I le suafa o Iesu. Amene.

 Tatalo
Faafetai ma viia oe lo'u Atua I lou fa'amaoni I augā tupulaga uma aemaise I lo'u tagata, I le suafa o Iesu, Amene.

OPEN HEAVENS
MATALA LE LAGI MO LE ASO FARAILE 27 ME 2022

 Manatu Autu: Aua e te aoai atu I se Toeaina (Rebuke not an Elder)

 Tauloto – Tusi Paia: Eperu 6:18 1‘Aua ‘e te a‘oa‘i atu i se toeaina, a ‘ia apoapoa‘i atu i ai peiseaī se tamā; o taulele‘a fo‘i, peiseaī o uso;, 

 Faitauga - Tusi Paia: Faataoto 30:11-14

 Upu Folafola
O le faanoanoaga, o le augatupulaga o lo’o faatatau iai le faitauga o le Tusi Paia o le asō, e fetuu I o latou tama, o lo’o ola ma iai I lenei vaitaimi. O le augatupulaga lea ua faasausili ona o le faamaualuga ma le faalialia vale, ua latou manatu e popoto atu I toeaiina. Ou te lē o talanoa atu I lenei mataupu ona o a’u o se tagata ua matua, ae ona o lo’u alofa atu aua afai ou te filemu ma le tautala I lenei mataupu, ua avea a’u o se matua leaga e vaavaai atu I le fanau ua savavali atu I le tulaga e fano ai. E ui ina tele ina upuia a’u e tagata ona o lo’u talanoa pea I lenei mataupu, ae ou te tautala pea I le Upu Moni mai I le Tusi Paia. 

 O le tatou fuaiupu tauloto mai le Tusi Paia o le asō o lo’o manino ai le poloaiga, e tatau I talavou ona ava I le au matutua. Peitai, e toatele talavou e matua leai se ava I le au matutua ma ua matua le mafaufau iai latou. O nisi o mafuaaga e fai ma alofaga e faapea mai e leai seisi e atoatoa. E latou te manatu e o’o I le au matutua e sese I nisi o taimi ma e tatau ona aoa’i ma faasa’osa’o. E sa’o e ono sese le au matutua, e ui e lē faasaina e le Tusi Paia ona e faasa’oina le au matutua, ae fai mai le Tusi Paia e tatau ona e ava I le au matutua e pei lava o ou matua, ae lē aoaia I latou. Afai e te faasea I se tagata I luma o tagata, e ta’u le mea lena o lo’o e aoai atu (1 Timoteo 5:20) ma e tetee I le Upu a le Atua pe afai e faia I le au matutua. Afai e faia e se tagata matua se mea sese, e tatau ona e momoli iai le apoapoaiga e ala I se faatalanoaga po’o se tusi, ia faia ma le faaaloalo, ona taatia lea e latou te faia le mea e tatau ona faia e faasa’o ai. 

 E o’o foi I totonu o le Lotu, tusa pe manatu talavou ua tele lo latou iloa ma le poto e faia vave ai ni mataupu, e tatau pea ona ava ma faaaloalo I le au matutua. Ia aua nei lē amanaiaina I latou. E moni e leiloa pe tele atu lou iloa ma le poto, ae o le au matutua e lava le silafia I le finagalo o le Atua. Ua tele ona maea ona latou savavali I le ala ma ua tele aoaoga na latou maua mai ai. Ave I ai latou le faaaloalo e onomea mo i latou. O le mea moni, fai mai le Tusi Paia e tatau ona  avatu I ai ia faaluaina lo latou taui e pei ona tusia I le 1 Timoteo 5:17 e faapea:

17 O toeaina o ē pule lelei, ‘ia ta‘uaogāina i latou ‘ona fa‘aluaina atu i ai o le taui, ‘ae fa‘asili i ē galulue i le ‘upu ‘atoa ma le a‘oa‘o atu.   

 Ia outou ava I le au matutua, I le suafa o Iesu, Amene.