Samoan Devotional

OPEN HEAVENS READING
MATALA LE LAGI MO LE ASO GAFUA 16 ME 2022

 Manatu Autu: O le Atua o Aperaamo (The God of Abraham)

 Tauloto – Tusi Paia: Esoto 3:6‘Ua ia fa‘apea mai fo‘i, “O a‘u o le Atua o lou tamā o le Atua o Aperaamo, o le Atua o Isaako, o le Atua fo‘i o Iakopo.” ‘Ona ufitia lea e Mose o ona mata, auā ‘ua fefe i va‘ai atu i le Atua.

 Faitauga - Tusi Paia: Kenese 17:1-8

 Upu Folafola
I le tatou fuaiupu tauloto o le aso, na uluai faailoa atu e le Atua o ia ia Mose, o le Atua o Aperaamo, Isaako ma Iakopo. I le matou nuu I Yoruba I Nigeria, o le uiga o le igoa o se tagata e momoli mai ai le uiga loloto o lona ituaiga tagata. O lea, ina ia tatou iloa le loloto o le suafa o lo tatou Atua, o le a tatou suesue atili I le uiga o le uluai feiloaiga a le Atua ma Mose mo ni nai aso o lumanai. 

 O le a le uiga moni o le upu moni o le Atua o ia o le Atua o Aperaamo? O lona uiga o ia o le Atua o faamanuiaga (Kenese 12:1-3). I le Kenese 24:34-35, fai mai le auauna a Aperaamo e faapea: ‘Ua fa‘amanuia tele lava e le ALI‘I lo‘u matai’. E le gata I lea o le suafa o le Atua o Aperaamo e tau mai ai iai tatou o ia o le Atua e tausi feagaiga. Fai mai le Teuteronome 7:9, o loo taua ai o ia o le Atua e tausi I feagaiga e pei ona tatou iloa lelei I le talaaga o Aperaamo, aua I le Esoto 2:23-24 ao avea le fanauga a Isaraelu ma pologa I Aikupito, fai mai le Tusi Paia ona manatua ai lea e le Atua lana feagaiga ma Aperaamo. Na tupu lea tulaga ae ua leva ona maliu Aperaamo. Ma o lea I le Esoto 3:6-12, na manatu le Atua o le a ia faia se galuega e laveaiina ma faasaoloto le fanauga a Isaraelu mai Aikupito. 

 O le Atua o Aperaamo, o le Atua o faamanuiaga. Ma o lenei, afai e te auauna I le Atua o Aperaamo, e te agavaa I faamanuiaga a Aperaamo. E toatele kerisiano e latou te le o fiafia ma maua nei faamanuiaga. O le mafuaaga e leiloa pe iai sona sootaga I le mea na fetalai atu ai le Atua ia Aperaamo I le Kenese 17:1O le iva sefulu ma le iva o tausaga o Aperamo na fa‘aali mai ai le ALI‘I ‘iā Aperamo, ‘ua fa‘apea mai fo‘i ‘iā te ia, “O a‘u o le Atua e o‘u le malosi uma lava, ‘ia e savali i o‘u luma ma ‘ia sa‘o lau amio.

 Na osia le feagaiga I le va o le Atua ma Aperaamo e tusa ma le 25 tausaga, peitai ana le amata ona savali Aperaamo ma le amio sa’o I luma o le Atua, e le amata ona tupu. Fai mai le Kenese 21:5, e 100 tausaga o Aperaamo ina ua fanau mai Isaako, pe a ma le iva masina talu ona fai iai le Atua ia savali I ona luma ia sa’o lana amio. Ia e talitonu mai, afai e amata ona e ola faapaiaina, e mulimuli ma faulai faamanuiaga o Aperaamo mo oe. O tamai agasala lena e te faia e avea ma auala e taofia ona o’o mai faamanuiaga a le Atua I lou olaga pe afai e te le alu ese vave mai ai. O tamai alope na o loo faatamaia le tovine, ia aveesea loa ma oe. 

 O le agasala, e taofia le o’o mai faamanuiaga ma folafolaga a le Atua I olaga o lana fanau. I le suafa o Iesu, Amene.  

OPEN HEAVENS READING
MATALA LE LAGI MO LE ASO SA 15 ME 2022

 Manatu Autu: Tagata Lotu e Galue poo se Tagata Galue Faamaoni? (Church Worker or faithful Labourer?)

 Tauloto – Tusi Paia: Mataio 9:38 o lea ‘ia ‘outou ‘ai‘oi atu ai i le Ali‘i e ana le saito e seleseleina, ‘ina ‘ia ‘a‘auina mai e ia ni ē galulue i lana saito e seleseleina.”

 Faitauga - Tusi Paia: Mataio 9:35-38

 Upu Folafola
E le faigata ona maua ni tagata e galulue I totonu o le Ekalesia ae e ese ma le faigata ona maua ni tagata e galulue faamaoni.  E masani lava ona galulue faatasi le Ekalesia ma le toatele o alii ma tamaitai e fia galulue mo le Alii. Peitai ane, e le o sailia e le Alii ni tagata galulue ia tau lava o le faaali atu I le lalolagi o lo’o latou galulue mo le Alii, ae o lo’o ia saili I tagata e galulue punouai e manumaloina agaga mo lona malo e ala I a latou galuega I totonu o le Ekalesia. 

 I le fuaiupu tauloto mai le Tusi Paia o le aso, na fetalai atu Iesu I le au so’o ia tatalo I le Atua ina ia auina mai tagata e galulue e faia le galuega. E naunau Iesu I tagata e faamaoni e manumaloina agaga leiloa. O tagata galulue tusa pe o tagata e faamamaina le falesa, ae o le taimi o loo faamama ai le falesa, e latou te tatalo o so’o se tagata e nofo I le nofoa I totonu o le falesa o le a toefuataina e le upu a le Atua. O ia tagata galulue, e le gata e naunau foliga fiafia e faafeiloai tagata e o atu I le lotu I le aso Sa, ae latou te tatalo foi I le Atua ina ia taitaiina tagata uma I nofoa e mafai ai ona oo atu le Upu a le Atua iai latou e aunoa ma ni mea faalavelave pe faasalavei.

 O tagata uma latou te faia nei mea uma ma le manatu e tasi I o latou mafaufau, e aumaia lava I le malamalama o Keriso. E iai le tautinoga a se tagata o le Atua na maliu ma ua alu atu I le lagi. A’o iai I le lalolagi, e tele polokalame o le faatalaleleiga, faamalologa e na te faia ma e tele ni vavega, faamalologa I ia polokalame. Na mamafa le faauuga ma le mamalu o Agaga Paia na iai. I le lagi, na faaalia atu ia te ia le mafuaaga na tele ai le manuia I galuega na ia faatinoina I le lalolagi. E iai se tina matua o so’o se mea lava e alu iai, e amata tatalo lava lenei tina mo ia I le sauniga atoa seia maea. O lenei tina ua  matua ma ua matuā faamamaina ma tuuesea mo le Atua, ma a tatalo, e pei e papa faititili I le lagi. Na fetalai Iesu I le mafuaaga o le manuia o ana galuega, o le tatalo ma le galue faamaoni e leiloa e seisi o lenei tina matua. 

 O lo’o saili le Atua mo tagata galulue e manumaloina agaga, e le na o I latou e pisi solo I galuega. E finagalo le Atua ia faasaoina tagata uma (1Timoteo 2:4). 

 O e galue I le aufaigaluega a le Alii? A leai, e tatau ona fai oe ma tagata e galue I totonu o le Ekalesia. Afai o lo’o e galue I le aufaigaluega a le Alii I le taimi lenei, ia mautinoa e te faamaoni. 

 Tatalo
Le Tama o I le lagi, faamolemole ia avea ma fai a’u ma tagata galue faamaoni I lau tovine, I le suafa o Iesu, Amene.  

OPEN HEAVENS READING
MATALA LE LAGI MO LE ASO TOONAI 14 ME 2022

 Manatu Autu: Aua e te toe fo'I I Sotoma (Don't go back to Sodom)

 Tauloto – Tusi Paia: Faataoto 26:11E pei o le ta‘ifau ‘ua fo‘i i lona pua‘iga, e fa‘apea fo‘i le vale, ‘ua toe fo‘i atu i lona valea.

 Faitauga - Tusi Paia: Eperu 6:4-8

 Upu Folafola
I le tusi o Kenese 13, o lo'o fa'amatala mai ai na tu'u e Aperaamo le avanoa iā Lota e faasino muamua ai sona fanua e nofo ai, ona fa'atoā  filifili ai lea e Aperaamo  seisi fanua e nofo ai ina ia aua ne'i femisa'i a laua leoleo manu. Fai mai le Tusi Paia na filifili Lota e nofo i Sotoma aua sa foliga laugatasi ma lafulemū e pei o laufanua  o Aikupito. Maitau mai o Aikupito sa lauiloa i ituaiga agasala uma inā aso. E o'o mai i le tusi o Kenese 14 ua tutupu puapuagā ia Lota auā sa nofo i Sotoma, na pu'ea faatasi ia ma tagata Sotoma ina ua tau le taua. Na faalogo Aperaamo ua avea le atali'i o lona uso i le taua ona ia tuliloa lea o le au tau ma toe fa'afo'i mai Lota e atalii o lona uso. I le tusi o Kenese 19 ina ua auina atu e le Atua ana agelu i Sotoma, o ai na fetaia'i ma agelu i le faitotoa o le aai? O Lota. Afai na sesē lau fa'aiuga muamua ma lavea'i oe e le Atua, e lē se faavalevalea ea lou toe fo'i e fai le mea sesē lava lea e tasi?

O nisi tagata fai mai e mafai na e fulitua i le Atua ma toe fo'i i le olaga tuai i so'o se taimi e te mana'o ai, aua ina ua toe fo'i le ui'i fa'amaumauoa na talia lelei e lona tamā.  E fa’afia na tu'ua e le ui'i fa'amaumauoa lona aiga? Na o le fa'atasi,  o lona uiga a e manatu e fai le tala i le ui'i fa'amaumauoa ma se alofaga i le pau atu i le agasala i lea taimi ma lea taimi, ua e fa'avalea lava oe ia te oe. O la'u tatalo so'o se filifiliga sesē sa e faia ia fa'asa'o e le Atua mata'utia  i le asō ma avatu ia te oe le alofa tunoa e te lē toe faia ai le mea sesē lava lea. Na toe fo'i Lota i Sotoma ma i'u ina leiloa uma ai mea uma sa  ia te ia. O mau nei e ta'u mai ai ia i tatou le iuga o fanau a Lota o i latou  o sā Moapī ma sā Amonī.

E fa‘aumatia Moapi, e lē fai ma nu‘u, auā na ia fa‘amaualuga i le ALI‘I. Ieremia 48:42

O le mea lea fa‘auta, e o‘o ai i ona po, ‘ua fetalai mai ai le ALI‘I, ‘ou te fa‘afa‘alogoina le ‘alaga o le tau‘a i Rapa, o le ‘a‘ai o le fānauga a Amoni; e fai ia ma mea mautietie, o le fa‘atafunaga lava, e susunuina ona faoa ‘a‘ai i le afi; ‘ona fai ai lea e Isaraelu o i latou mōna, o ē sa fai o ia mo i latou, ‘ua fetalai mai ai le ALI‘I. Ieremia 49:2

 Fai mai le tusi o Fa'ataoto 29:1 o le tagata ua a'oaina so'o ae fa'amaa'a lona ua e fa'afuase'i ona nutimomoia ae leai se fofō. Faaeteete pe afai na e sesē muamua ma fa'asao ma lavea'iina oe e le Atua, aua e te toe faia lea mea sesē. I le suafa o Iesu. Amene.

OPEN HEAVENS READING
MATALA LE LAGI MO LE ASO FARAILE 13 ME 2022

 Manatu Autu: Aua E te Faatasi Atu I se Fafine Talitane (Don’t Join Yourself to a Harlot)

 Tauloto – Tusi Paia: 1 Korinito 6:16Tou te lē iloa ‘ea, ‘ua tino e tasi lē ‘ua fa‘atasia ma le fafine talitane? Auā o lo‘o fa‘apea mai, “E ‘avea i lā‘ua ma tino e tasi.”

Faitauga - Tusi Paia: Numera 25:1-18

 Upu Folafola
I agasala uma e taua e le Atua e faaumatia, o le tuinanau o le tino e pito sili ona matuia le leaga. O le agasala lenei e faaleaga I le tino. E pei o se tagata e na te tutuina se afi ona nofo ai lea I luga. E I’u lava ina mū. Fai mai le 1 Korinito 6:18 e faapea:
18 ‘Inā sōsōla ‘ese ia ‘outou i le faita‘aga. ‘Ua auliuligia le tino i nisi agasala uma e faia e tagata; a o lē faita‘aga, e agasala ia i lona lava tino.

I le Numera 22 I le 24, na faatonuina le perofeta o Palaamo ina ia fetuu I tagata o Isaraelu. O so’o se taimi e tatala ai lona fofoga e fetu’u iai latou, ua na o faamanuiaga e malele mai. Ua matua leai lava se avanoa e na te fetuuina ai  tagata o le Atua. Peitai, ina ua o’o atu I le Numera 25, ua savavali atu lava tagata I le malaia ona o le faitaaga ma le mulilua. O so’o se tagata e faia le mulilua, ua ia tu’uina le fetuu I luga o lona ulu. Fai mai le Faataoto 6:26 e faapea: 26Auā e i‘u ‘ina toe na o si fasi areto ‘ona o le fafine talitane; o le avā fo‘i a le tasi tagata na te taumailei le ola aogā.

 Ioe, o le tagata e foliga mai e ese ma le lelei ma e faigata ona e teena ona o le aulelei ma le agamalu, e tatau ona e tamoe vave ese mai ai. O le tulaga lea o loo taua e le Tusi Paia e tusa ma le fafine ese:3Auā e fa‘asisina ifo meli a‘i laugutu o le fafine ‘ese; o lona gutu fo‘i e sili ‘ona molemole i le suāu‘u; 4‘ae mulimuli ane ‘ua ‘o‘ona ia, e pei o le laena; e ma‘ama‘ai o ia, e pei o le pelu ‘ua fa‘atau ma‘ai ona itū. 5E ō ifo ona vae i le oti; e taunu‘u atu ona la‘asaga i seoli. Faataoto 5:3-5

 Le au pele e, tamoe ese mai le tuinanau o le tino. Afai ua e faaipoipo, ia lava lau tane poo lau ava mo oe. Afai o loo iai ni faaletonu I le lua ulugalii, ia e alu atu I le Atua I le tatalo, ma ole atu ina ia aumai se fofo mai le Atua. Talanoa I lau faifeau poo nisi ua iai le tomai faapitoa mo ni fautuaga faale Atua I le mea e tatau ona fai. Ia aua lava nei e faatasi atu I seisi tagata aua o le ituaiga agasala lea, e o’o atu ai I le oti ma le faaumatia. 

 Tatalo, Tama, e leai se fafine ese poo se tamaloa ese e ono manumalo I le lumanai manuia ua e saunia mo a’u, I le suafa o Iesu Keriso, Amene. 

OPEN HEAVENS READING
MATALA LE LAGI MO LE ASO TOFI 12 ME 2022

 Manatu Autu: A’oa’o e Tatalo I le Po (Learn to Pray at Night)

 Tauloto – Tusi Paia: Ieremia 6:5 “Tula‘i ia, ‘inā tatou ō a‘e i le po ma tatou fa‘aumatia ona maota.”

 Faitauga - Tusi Paia: Mataio 13:24-30

 Upu Folafola
O le po o le taimi lea e tele ina faia ai osofaʻiga a le fili. O lo’o faapea mai le Mataio 13:25; ua momoe tagata, ‘ona alu ane ai lea o lē ‘ua ita mai ‘iā te ia, ‘ua na lūlūina le titania i totonu o le saito, ‘ona alu ‘ese ai lea o ia.

 A momoe tagata uma, o le taimi lena e fono ai faʻataulāitu ma temoni ma faʻalauiloa ai a latou osofaʻiga i agaga o tagata ma o latou lumanai. E mata'utia ma le tatau ona e moe i lea taimi; ona; o le taimi lena e tatau ai ona tatou faasagatau I le fili. O le taimi foi lena e tatau ai ona e fanaina au aū i le malo o le pogisa.

 I le faitauga o le Tusi Paia o le aso, o loo faapea mai, na moe le auauna a le matai o le fale i le po atoa, o le taimi foi lea na mafai ai e le fili ona lulu ana titania. O le taeao na ia iloa ai ua afaina ana galuega. O le toʻatele o tagata, e fealafa’I mai i le taeao, ma o latou iloa ua faalavelave le fili ia latou galuega, faapea o latou olaga poʻo latou lumanai i le tulua o po ma ao. Ou te le faapena. O le a ou tau i le po ma ou te le faatagaina lava le tiapolo ia ulufale I lou olaga.

 Na alu atu le auauna ma logo lona matai, ua iai se tasi ua faalavelave i lana galuega, na fai le matai I lana auauna e aua neʻi aveese vave le mea na totō e le fili. E tatau ona ia ola faatasi ma titania na totoina e le fili seia o’o i le aso o le seleselega. O lea la, ua tele galuega a le auauna e fai ina ia mautinoa e lelei ana seleselega i le faaiuga o aso uma, ma o le tala moni, e afaina isi fua o ana faatoaga I le titania. E itiiti lou galue i le ao pe a e tatalo i le po. E sili le taofia o le fili mai le lūlūina o titania nai lo le faia o se galuega e foia ai le lūlūina e le fili o le titania I lou faatoaga po o lou olaga.

 O nisi tagata e masalosalo pe aisea tatou te faia ai polokalame faakerisiano i le tulua o po ma ao. O le tatou faia o nei polokalame, o lo o tatou auai lea I fetauaiga ma le fili. I le tusi a Mataio 26:41, na faapea atu ai Iesu I ona so’o ina ia latou mataala ma tatalo. O nei fautuaga na faia uma I le po. Pe o e taumānatu pe aiseā, o loo tusia i le Galuega 16:25-26, o loo faapea mai, na faatali Paulo ma Sila I le tulua o po ma ao, ona amata tatalo loa lea ma pepese I viiga o le Alii. Na la iloa le aoga o tatalo ma viiga i le vaeluaga o le po. Faaa’oa’o e tatalo i le po. 

 Ia fai ma au masani le tatalo I le po. 

OPEN HEAVENS READING
MATALA LE LAGI MO LE ASO FARAILE 6 ME 2022

 Manatu Autu: Fesootai Ina ia Fua Atili (Connected for Fruitfulness)

 Tauloto – Tusi Paia: Ioane 15:5“O a‘u nei o le vine, o la ‘outou. O lē tumau ‘iā te a‘u, ma a‘u ‘iā te ia, o ia lava e fua tele mai; auā e lē mafaia e ‘outou ‘ona fai se mea e tasi pe a a‘u lē i ai.

 Faitauga - Tusi Paia: Ioane 15:1-10

 Upu Folafola
O le faitauga o le Tusi Paia o le aso o loo faaalia mai ai iai tatou, o le tumau ia Iesu Keriso o le mea lilo lea e fua mai ai atili. O le mafuaaga lea, o le fanaufouina, e na o se amataga o le olaga e fua tele mai, ma o le tumau ia Iesu Keriso e aunoa ma le motusia, o le mealilo lea o le maua o le fua tele mai. E faapefea ona tatou tumau ia Iesu? Fai mai le Ioane 15:7-8 7‘Āfai tou te tumau ‘iā te a‘u, e tumau fo‘i a‘u ‘upu ‘iā te ‘outou, o mea uma lava tou te manana‘o i ai, tou te ole atu ai, ‘ona faia lea mo ‘outou. 8E vi‘ia lo‘u Tamā i lenei mea, pe a ‘outou fua tele mai; ‘ona fai ai lea ‘outou mo‘u so‘o.

 Ua tatou iloa ni vaega se tolu mai nei fuaitau o le Tusi Paia. Muamua, o Iesu o le mea lilo I tua atu o le fua tele mai ma e leai se mea e mafai ona tatou faia e aunoa ma ia. Lona lua, o le tumau ia te ia o le ala lea mo I tatou ina ia fua tele mai ai. Lona tolu, o le ola ma soifua I lana upu ma aoaoga, o le faatinoina lea o le tumau ia Iesu Keriso. Na ia fetalai: 29‘Ia ‘outou amoina la‘u amo ma ‘ia ‘outou fa‘aa‘oa‘o ‘iā te a‘u, auā o a‘u lē agamalū ma le loto maulalo; ‘ona maua lea e ‘outou o le mālōlōga mo ‘outou agaga.(Mataio 11:29). E ai lava le tagata ia I le fua e fua mai I lona olaga. E mafai e tagata uma ona fua mai ni fua lelei, pe afai e sau lea tagata ia Iesu Keriso I le faatuatua, ma soifua e tusa ma lana upu. Fai mai le Ioane 8:31“Āfai tou te tumau pea i la‘u a‘oa‘oga, o o‘u so‘o moni ‘outou. 32E iloa fo‘i e ‘outou le mea moni, e tu‘u sa‘oloto fo‘i ‘outou e le ‘upu moni.”

 O le Atua e Silisili ese I mea uma e o’o I le tulaga e fua mai ai. Soo se tagata e naunau ia fua tele mai, e tatau ona fesootai ia te ia. Fai mai le Salamo 23:1 o so’o se tagata e mulimuli I le Atua e leai se mea e mativa ai. O lo’o faamatala atili mai I le Ioane 10:9 faamanuiaga o le tagata e fesootai ia Iesu: 9O a‘u nei o le faitoto‘a; ‘āfai e ui mai se tasi ‘iā te a‘u, e fa‘aolaina o ia, e alu atu ma ulu fafo, e maua fo‘i o ia le mea e ‘ai.

 Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo (Roma 8:28). Le au pele e, o afioga uma a le Atua o loo tusia I luga ma isi e faamaonia ai, afai e te fesootai I le Atua, o le fua tele mai I taimi uma, e mautinoa I lou olaga. O e fesootai ea ia te ia? 

 Tatalo
Tama, faamolemole fesoasoani mai ia te au ina ia ou fesootai ia te oe e faavavau, I le suafa o Iesu, Amene

OPEN HEAVENS READING
MATALA LE LAGI MO LE ASO TOFI 5 ME 2022

Manatu Autu: O le Malosiaga o le Toalua poo le Toatolu (The Strength of Two or Three)

Tauloto – Tusi Paia: Mataio 18:19‘Ou te fai atu fo‘i ‘iā te ‘outou: ‘Āfai e loto gatasi se to‘alua o ‘outou o i le lalolagi, i se mea la te ole atu ai, e faia lea mo i lā‘ua e lo‘u Tamā o i le lagi.

 Faitauga - Tusi Paia: Failauga 4:9-12

Upu Folafola
E iai le malosiaga I le tele o le fuainumera. E tusa ai ma tapulaa a le Atua o loo ta’ua I le faitauga o le Tusi Paia o le aso, o tagata e toalua e sili atu I le tagata e toatasi. O loo tatou iloa foi lea tulaga I le tauloto mai le Tusi Paia o le aso, o loo fetalai mai ai Iesu iai tatou o e mulimuli ia te ia, so’o se taimi e o mai faatasi ai ni tagata se toalua I le loto gatasi e ole atu I le Atua I so’o se mea, e na te faia lava (Mataio 18:19). O lo’o faaalia mai ai o loo finagalo lo tatou Alii ia tatou loto gatasi aua ua ia faamautinoa mai, so’o se mea tatou te ole atu ai ia te ia I le loto gatasi, e na te faia lava. 

E tatou te manaomia ni tagata tatou te fai paaga ina ia manuia le tamoega a le au kerisiano. Na aumaia e le Atua se tagata e paga ma Mose, o Arona lona uso ( Esoto 4:10-17). O Uro, o se tasi o ositaulaga na galue I lalo o Mose ma sa fesoasoani ia te ia I le tatalo mo le manumalo o Isaraelu I le taua ma Amaleka (Esoto 17:8-13). O nisi kerisiano e le o iloa ma malamalama I lo latou fesoasoani I le agaga e maua mai I  isi uso kerisiano. I taimi o faigata ma luitau, e tatou te manaomia ni fesoasoani e pei o Tavita na tau ma tagata na tutupu mai I sauai. O le Apisai, le fesoasoani a Tavita na fasiotia le sauai na semanu na te fasiotia Tavita. E leai seisi e iloa le tulaga o Apisai I totonu o le autau, ae o ia na laveai ia Tavita I le aso o le taua (2 Samuelu 21:15-17). 

I le faitauga o le Tusi Paia o le aso, o lo’o faamatala manino e le Tusi Paia le aoga ma faamanuiaga o le malosi o le toatele o tagata. O le tulaga lea ou te ave ai pea le faamamafa I le toatele o le tupu o tagata lotu. O faamanuiaga ma le malosiaga e maua I le toatele o tagata e tatau pea ona matua faataua. O se galuega, e faigofie ona faataunuuina e ni tagata se 200 nai lo le 20. O loo atagia ai foi le lelei o le faaipoipo. E tele faamanuiaga e maua I totonu o le faaipoipoga ma o le tulaga lea e faapea mai ai le Tusi Paia e sili atu le toalua I lo le toatasi (Failauga 4:9).

O se tasi o faamanuiaga i le o mai faatasi o kerisiano, o se avanoa taua e mafai ai ona iai I le mamalu o le nofoalii o le Atua. Na folafola e Iesu Keriso I le Mataio 18:20, o so’o se mea e iai le toalua poo le toatolu I lona suafa, e iai faatasi ma I latou. Le au pele e, ia tatou galulue ina ia tatou lagolago le mafuta faatasi o kerisiano ma fesoasoani le tasi I le isi, e matua aoga tele pe a toatele. 

OPEN HEAVENS READING
MATALA LE LAGI MO LE ASO LULU 4 ME 2022

Manatu Autu: Ala e Fai ai le Anapogi (How to Fast)

Tauloto – Tusi Paia: Isaia 58:3“Se a le mea ‘ua matou anapopogi ai, a ‘e te lē silasila mai? se a le mea ‘ua fa‘atigāina ai i matou e i matou, a ‘e te lē silafia?” Fa‘auta, o le aso e anapopogi ai ‘outou, ‘ua ‘outou maua ai le fiafia ma ‘outou fa‘atauānauina a ‘outou ‘au‘auna ‘ia faia a ‘outou galuega uma.

 Faitauga - Tusi Paia: Isaia 58:1-12

 Upu Folafola
O le mea muamua e tatau ona e iloa ae e te lei amata I se anapogi, o le a taumafai le tiapolo e taofia oe. Ua ia iloa, o le taimi lava e te anapogi ai, o le a e malosi ma o le a le mafai ona ia pule ia te oe. O le tulaga lea e na te faaaogaina ai so’o se metotia o loo ia te ia e taofia ai oe, o le mea lea, ia e sauni ina ia mautinoa, e toilalo le tiapolo. I aso e te le anapogi ai, e iai lava taimi e galo ai ia te oe ona e ai pe e te le fia ai foi seia oo I le afiafi, peitai o le taimi lava e te filifili ai e te anapogi, e mautinoa e te ala mai ua e fiaai, aua e te amanaia le fiaai ae ia e mausali I lau faaiuga e anapogi. 
 
 O le isi mailei a le fili o le faasasala atu lea o manogi o meaai o loo latalata atu ia te oe. O le a amata ona e maitauina le lapoa o le fasi moa I luga o le ipu meaai a nisi o tagata o le ofisa pe ete faalogo atu foi o talanoa I meaai o loo maua I le faleaiga o loo lata atu I le ofisa. Ia e iloa lelei, o mailei uma na a le tiapolo e taofia ai oe mai le anapogi, ma o lea, e tatau ona e tetee iai I lou mafaufau. Aua nei e te tuua iai se avanoa. Alu ese mai le mea o loo aai ai tagata poo talanoa I meaai, afai e leai, ia e faatopetope ona faatumu lou mafaufau I le upu a le Atua. 

 E toatele tagata fesili mai ia te a’u I le tele o taimi: ‘E faapefea ona e anapogi mo le 40 ao ma le 40 po pe sili atu foi?’ O le tali e faigofie, afai e faia sa’u faaiuga o le a ou anapogi, ou te tusi I luga o le kalena ma faitau aso o le a ou anapogi ai. A maea, ona ou fai lea I lou manava (tulou): ‘E amata mai I le aso lea seia oo I le a lava le aso, e leai se meaai e toe avatu ia te oe’. O le taimi ou te lagona ai le fiaai, ou te iloa lelei lava o le tiapolo o loo taumafai ina ia faauma lou la’u anapogi, ma o lea ou te faaaogaina ai lea faailoga e tatalo ai. So’o se taimi ou te lagona ai le fiaai, ua ou iloa ua o’o I le taimi o le tatalo, ma e lei leva ona faia tatalo ae amata ona alu ese le fiaai. O le mea mulimuli, I le taimi o le anapogi, ia faaitiitia lou talanoa I isi tagata ae talanoa I le Atua. I le taimi o le anapogi, a tele le taimi e te tautala ai I isi tagata, ua faaitiitia lou malosi, ae a tele le taimi e te tautala ai I le Atua, e faatupuina lou malosi. Ia faaitiitia galuega e faaaogaina ai le malosi o lou tino a’o e taumafai e faamalosia I le agaga. O le taimi e masani ona faaaogaina e kukaina ai meaai ma ai, ia faaaogaina e suesue ai le Tusi Paia ma tatalo. O le taimi foi lea e te foai atu ai I tagata o lo’o fia maua se fesoasoani I ou tafatafa ane e pei ona iai I le faitauga o le Tusi Paia o le aso. Ia ma lenei, o le taimi lava e te faalialia vale ai o lo’o e anapogi, ua le toe aoga (Mataio 6:16-18). 

 Ia e filiga e tetee atu I mailei a le tiapolo e taofia ai oe mai le anapogi,  I le suafa o Iesu, Amene.  

OPEN HEAVENS READING
MATALA LE LAGI MO LE ASO LUA 3 ME 2022

 Manatu Autu: Aoga o le Anapogi (Benefits of Fasting)

 Tauloto – Tusi Paia: 1 Korinito 9:25O i latou uma o ē faigofie e fai fa‘atatau i mea uma lava; o i latou fo‘i ‘ua latou fa‘apea ‘ina ‘ia maua le pale palagofie, a o i tatou, ‘ina ‘ia maua le pale e lē pala lava.

 Faitauga - Tusi Paia: 1 Korinito 9:24-27

 Upu Folafola
O le anapogi o se mea e faafaigata ona faia e tagata, ae e tele ona aoga ma faamanuiaga pe a mafai ona e faatoilaloina le laualo. Muamua, o le anapogi o se auala e taofiofia ma e pule ai I lou tino. O le tagata e fai ma ana masani le anapogi, faaopoopo atu iai ma le suesue o le Tusi Paia ma tatalo, o le a ia iloa e faigofie ona ola faapaiaina. Afai e te suesue ia te oe lava ma iloa ai ua amata ona e tau manatu i faatosina a le tuinanau o le tino ma ua foliga e le afaina le agasala ia te oe, fai loa sau anapogi. Ao e anapogi, o le a malosi le agaga e manumalo I le tino ma o le a faaumatia le tuinanau. 

 O le mafuaga e toatele ai tagata ua pauu mai I o latou tulaga faamanuiaina ona ua le toe anapogi. Ua ou faalogo I nisi o faapea mai ua taunuu ma ua maea ona faia e Iesu mea uma I luga o le satauro e aofia ai ma le anapogi. Ae faapefea Paulo, le aposetolo, na ia tusia I le 2 Korinito 11:27 na ia anapogi ma o se masani? O ia foi lea na faapea mai I le 1 Korinitio 9:27 e na te faatoilaloina lona tino. E te manao I lou tino e I lalo pea o le pule a Agaga Paia? E tatau ona e anapogi ma ia fai ma masani. Fai mai le Kalatia 5:16 e pau le auala e te faatoilaloina ai le tuinanau o le tino o le savali I le agaga, ma e mafai ona faia e ala I le anapogi. 

16‘Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino. Kalatia 6:16

 Afai e te anapogi, o le a e pulea lou fia ai, ma o le a pulea lou naunau I le ai, ma e taua tele e fua iai le tulaga o le pule e te maua I lenei lalolagi. I le Kenese 25:29-34, na le mafai ona pulea e Esau lona naunau I le meaai ma ua ia le maua faamanuiaga o le tofi o le ulumatua. Ao naunau Esau e faamalie lona fiaai ma ua ia loto malie e faatau atu lona tofi o le ulumatua mo se meaai, na iloa lelei e Iakopo ma o lea aso, na filifili Iakopo e anapogi ae ave lana meaai ma Esau, na ia faaopoopo atu iai ma le areto. Afai e te le mafai ona puleaina lou naunau I le meaai, o lo’o e ofoina atu le malosiaga e te maua ai le pule, e faatau atu mo le meaai. 

 E toetele tagata ua latou lē maua le atoaga o manuia ua faataatia e le Atua mo latou olaga ona ua le mafai ona anapogi. Ia e faia se filifiliga I le aso e faatoilalo I lou tino e ala I le anapogi, ia faia ma masani ona e ola lea e manumalo I le Agaga Paia. 

 Tatalo
Tama, faamolemole ia e aumai ia te a’u le alofa tunoa e anapogi ai ma ia faia ma masani, I le suafa o Iesu, Amene.  

OPEN HEAVENS READING
MATALA LE LAGI MO LE ASO GAFUA 2 ME 2022

 Manatu Autu: Taofi le Tuinanau (Stop Lusting)

 Tauloto – Tusi Paia: Iopu 31:1 ‘Ua ‘ou osia le feagaiga ma o‘u mata, se a fo‘i le mea ‘ou te manatu ai i se taupou?

 Faitauga - Tusi Paia: Mataio 5:27-30

 Upu Folafola
E toatele kerisiano o loo faapea e le o mulilua aua latou te lē o faatinoina. Peitai ane, e latou te le o iloa o so’o se taimi e tilotilo ai ma tuinanau e faia le mulilua ma se tagata I ona mafaufauga, ua faia lava le mulilua. 

 O loo faamatala e lo tatou Alii o Iesu Keriso lea vaega I le Mataio 5:28 e faapea 28‘Ae ‘ou te fai atu ‘iā te ‘outou, ‘ai sē va‘ai atu i le fafine ‘ina ‘ia mana‘o i ai, ‘ua uma ‘ona mulilua ma ia i lona loto.

 So’o se mea e vaai iai ou mata ma e faataga lou mafaufau e manatunatu iai e mafai ona faaleagaina ai lou tino atoa. Fai mai le Mataio 6:22 o mata o sulu ia o le tino ma afai e amioleaga mata, o lou tino atoa o le a faatumulia I le pogisa. O lo’o faamaonia atili lenei mea moni I le Tusi Paia, o so’o se tagata e taulai le vaai I seisi tagata ma le tuinanau e mulilua I lona loto, e faatumulia le na tagata I le pogisa tusa pe na te lei faatinoina. Le au pele e, aua e te faatagaina ou mata e aumaia le pogisa I lou tino atoa. O lou tino o le malumalu o le Atua. E tatau ona tumu I le malamalama I taimi uma. 

 Fai mai le 1 Korinito 6:20 e faapea: 20Auā ‘ua fa‘atauina ‘outou i le tau; o lenei, ‘ia ‘outou vivi‘i atu i le Atua i o ‘outou tino ma o ‘outou agaga, o mea a le Atua ia.

 E tele auala e mafai ai e mata ona faaleagaina le tino atoa. O a ituaiga ata ma polokalame o le televise e te fiafia e matamata ai? O a ituaiga polokalame ma ata e te matamata ai I luga o lau telefoni, komepiuta ma isi masini? E te fai ma tepa I ata o tagata le lavalavā o lo’o faatino le tuinanau o le tino? Taofia loa ina ia aua nei faatumulia lou tino I le pogisa. 

 E iai se alagaupu I le matou nuu e faapea: ‘afai e lē ono aina, aua nei latalata mai I lo’u isu’. Afai o loo e iloa lelei e le taitai e faia le mulilua, aisea e te faalatalata atu ai I na mea e faaosoosoina oe e faia le agasala? Aisea e te fiafia ai I mea e ono taitaia oe e faia le tuinanau o le tino?

 Ia matua aveesea ma oe soo se mea e te ono faia ai le tuinanau o le tino. Ia e faatoilaloina lou tino ina ia taofia le tuinanau o le tino ina ia faamamaina pea. 

 Ia taofia le tuinanau o le tino.