Samoan Devotional

OPEN HEAVENS

MATALA LE LAGI MO LE ASO SA 7 TESEMA 2025

(tusia e Pastor EA Adeboye)

Manatu Autu: O le uiga moni o le tulaga siitia(The true meaning of promotion)

Tauloto Tusi Paia: 1 Timoteo 3:1 “O le ‘upu moni lenei, ‘āfai e naunau se tasi i le faiva o le epikopō, e mana‘o o ia i le galuega lelei.”

‭‭

Faitauga - Tusi Paia: 1 Peteru 5:1-4

A siitia tulaga o tagata ia latou galuega i le lalolagi, e mafai ona faaeaina i latou i tulaga e faaitiitia ai galuega e fai na i lo’o tulaga i lalo ifo sa i ai muamua. I le mālō o le Atua, o le uiga moni o le siitia o le tulaga o le faaopoopoina o galuega.

Ou te manatua le tele o tausaga ua mavae a o lei avea a’u ma ta’ita’i aoao o le RCCG, sa ou vaai i le ta’ita’i o tatalo i le po atoa i le isi taimi ma sa ou popole. Sa ou manatu o se tulaga faaletonu matuiā ua tupu ma sa ou fesili ia te ia po o le a se mea ua faaletonu. Sa ata ma fai mai o le a ou malamalama i se aso. I le tele o tausaga mulimuli ane ina ua avea a’u ma ta’ita’i aoao, na o’u malamalama ai auā o lea fo’i ua o’u tatalo i le po atoa. A siitia e le Atua lou tulaga i totonu o lana galuega, o le a faaopoopoina galuega ma fa’aositaulaga e te manaomia e faatino ai le galuega. Fa’ata’ita’iga, ou te le’i toe fai Aso o Tamā faatasi ma lo’u aiga vagana ai le 2020 i le taimi o le vavao o le fa’ama’i coronavirus.

Ou te matua’i fiafia lava pe a ou maua se avanoa ou te moe ai i lo’u lava moega auā ua seāseā maua lea avanoa. Ua laititi le taimi ou te malolo ai na i loo le taimi a’o to’a selau afe tagata o le ekalesia. A siitia oe e le Atua i lana galuega, aua ne’i faaosofia lou fiafia i le tino, a ia e faautauta auā ua tatau ona tupu tele lou malosi fa’aleagaga ia avea ai oe ma faamanuiaga i ni agaga se tele. E tatau ona e saili ia e latalata i le Atua na i loo le faamaimau taimi e fiafia ai ma tagata. 

A faaeaina se uso i le mālō o le Atua, o se valaau e tele atu ma faigata tiute. O lea, a e vaai i ni faifeau lelei a le Atua ua faaeaina tulaga i le galuega a le Atua, aua e te mata’u’a ia i latou. O le maualuga e siitia i ai lou tulaga i le mālō o le Atua, o le tele lea o galuega lelei e tatau ona e faia. 

E taua fo’i le iloa, a faaeaina e le Atua tagata ma avatu ia i latou tiute e tele, na te saunia fo’i mo i latou le alofa tunoa e tele. E leai se mea o le a e fefe ai I le tele o tiute fai e omai faatasi ma le faaeaina a le Atua auā o le a ia fa’afaula’i ia te outou le alofa tunoa uma e pei ona Ia siitia maualuga outou, (2 Korinito 9:8;). E pei ona o tatou faitau muamua I le fuaiupu tauloto o le asō, fai mai Paulo, o lou mana’o I se tulaga maualuga atu I le mālō o le Atua o se tulaga lelei. O lea la, e tatau ona e loto atu ia siitia pea lou tulaga e le Atua ao fa’aauau pea ona e auauna mo Ia. O le tulaga siitia i le malo o le Atua o le valaau e siitia matafaioi ma galuega faatino, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 6 TESEMA 2025

(tusia e Pastor EA Adeboye)

Manatu Autu: Ia Nofo Tupu Le Upu Ia Te Oe (Let The Word Dwell In You)

Tauloto Tusi Paia: Kolose 3:16 “Ia nofo le afioga a Keriso i totonu ‘iā te ‘outou ‘iā tele lava, a o ‘outou a‘oa‘o ma apoapoa‘i le tasi i le tasi i le poto uma lava, a o ‘outou pepese fo‘i i salāmo ma pese, ma siva fa‘aleagaga ma le fa‘afetai i le Atua i o ‘outou loto.”

‭‭

Faitauga - Tusi Paia: Ioane 15:4-7

Fai mai le Tusi Paia I le tusi o Ioane 1:1 .“Sa i le amataga le ‘Upu, sa i le Atua le ‘Upu, o le Atua fo‘i le ‘Upu.” Na toe faapea mai le Tusi Paia I le fuaiupu 14 o le mataupu lava lea “Ua liu tino tagata le ‘Upu, sa mau fo‘i o ia ma i tatou, na matou matamata i lona mamalu; o le mamalu lava lea o le Alo e to‘atasi o le Tamā, ‘ua tumu o ia i le alofa tunoa ma le fa‘amaoni.” A tele lou taimi e suesue ai le Upu a le Atua, ma ua amata nofomau Upu o le Tusi Paia i totonu ia te oe ma ua avea pei o se isi vaega moni o lou tino, o le a amata ona e vaaia le mamalu o le Atua.

Fai mai le 2 Korinito 3;18 “A o i tatou uma, o lo‘o va‘ava‘ai i tatou i le pupula o le Ali‘i ma o tatou mata, e lē ufitia ‘ua liua ai i tatou ‘ua foliga i ai nai le pupula e o‘o i le pupula, fa‘apei ‘ona maua ai mai le Ali‘i, o ia o le Agaga.”

O le tele o lou vaai ma iloa le mamalu o le Atua o le tele lea o le liua o lou tagata e foliga i le Atua mai le pupula i le pupula. O lea afai e te mana’o e faasusulu atu le pupula o le Atua, e ao ona suesue lau Tusi Paia i aso uma ma manatunatu i ai i le ao ma le po. O le Upu a le Atua e mamana ma afai e te faatagaina e nofo i lou loto o le a e iloa ma maua se suiga tele i soose vaega o lou olaga. Fai mai le tusi o Faataoto 18:10 “O le suafa o le ALI‘I, o le ‘olo malosi lea; e sola atu i ai lē amiotonu, ‘ona sao ai lea o ia.”

Ua ta’u mai le fuaiupu lenei ia I tatou, o le suafa o le Atua e mamana tele ma o le ‘olo malosi e fa’asaoina ai I latou o e sulufa’i atu i ai. Peita’i e faapei ona mamana lona suafa, fai mai le Salamo 138;2 “Ou te ifo i lou malumalu pa‘ia, ‘ou te vivi‘i atu fo‘i i lou suafa ‘ona o lou alofa ma lou fa‘amaoni; auā ‘ua e fa‘asilisili lau afioga i lou suafa uma.”

O le Upu a le Atua e sili atu fo’i le mamana nai loo lona suafa. O le ala lea e lē tatau ai ona e talasua i le Upu a le Atua. Fai mai le tusi o Iosua 1:8; e ao ona e mafaufau i ai i le ao ma le po ina ia manuia ai ou ala. Le au pele e, na o i latou e faataga le Upu a le Atua e nofo tupu i o latou loto ma pulea o latou olaga e mafai ona faafiafiaina i le manuia. Ou te tatalo o le a iloga ona e faatofu lou tagata i totonu i le Upu a le Atua ma faataga e nofo tupu maua’a i lou loto ia mafai ai ona e fiafia i le manuia sautualasi i so’o se vaega o lou soifua, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 5 TESEMA 2025

(tusia e Pastor EA Adeboye)

Manatu Autu:  O lou Tama e ona uma (Your Father owns it all)

Tauloto Tusi Paia: Hakai 2:8 'O lo‘o ‘iā te a‘u le ario, o lo‘o ‘iā te a‘u fo‘i le auro, ‘ua fetalai mai ai le ALI‘I o ‘au ' a‘e ai i mea e aogā, e tupu ai le lelei i ē fa‘alogologo i ai.”

‭‭

Faitauga - Tusi Paia:  Salamo 24:1-2

O le faitauga mai le Tusi Paia o le asō o loo faaalia ai iai tatou o le Alii e ona le lalolagi ma mea uma o tumu ai. O le upu tauloto mai le Tusi Paia o le asō o loo faapea mai o loo ia  te ia le auro ma le ario. O loo faaalia iai tatou I le Salamo 50:10 o manu e tataa I mauga e afe o loo ia te ia. O le avea o le Atua e fai ma ou Tama, e le tatau ona e popole I ni faafitauli tau tupe. Ou te mautinoa e te manumalo I soo se faafitauli tau tupe o loo e feagai ma oe, I le taimi nei aua o lou Tama e na te saunia mea uma e matitiva ai outou e tusa ma le faulai o lona viiga ia Iesu Keriso (Filipi 4:19). 

E tatau ona maitau mai o Aperaamo, Isaako, Iakopo ma Iopu ma isi tagata maoae o le Tusi Paia, e tele ina mauoa uma I latou. Na latou savavali ma le Atua, ma na ia matua faamanuia iai latou. Aua o I latou e savavali ma le au popoto e popoto ai ma latou (Faataoto 13:20), a lua savavali foi la ma le Atua Matautia, le Atua e ia te ia mea uma, e na te saunia mea uma e te manaomia. Le au pele e, fai sau faaiuga I le aso e te lua savavali ma le Atua ma lou loto atoa. 

I le Luka 15:16-19, o le atalii faamaumau oa e mauoloa lona tama, peitai na ia oo i le tulaga ua aai ma puaa ma ua leai seisi e foai atu se mea ia te ia. E faapea le tulaga o iai nisi o kerisiano I le asō, o loo aisi ma ole atu I tagata mo mea, ae e matua faigofie ona latou maua mai le Atua Matautia, lo latou Tama. Ia maitau mai, o le alu ese ai o le atalii faamaumau oa mai le fale o lona tama I le amataga, sa lelei mea uma. Peitai, na vave ona suia mea uma ma ua tulaga leaga, ona ia iloa lea e sese lana mea ua faia. E faafetaia na ia faia se faaiuga e toe foi i le tulaga na sau ai, ma o le taimi na ia faia ai le faaiuga ma toe foi I le mafanafana o aao o lona tama, na amata loa ona toe ola I le mauoloa. Le au pele, afai ua e toe foi I tua ma ua mamao mai le Atua, ma o loo e ola I le mativa ma le faanoanoa, toe vaai ou laasaga e toe alu atu I lou tama I le asō. ‘Aua  e te tilotilo I mea e faia e tagata amiolega o loo maumea ai, ae ia toe alu atu i Lē e ona mea uma I le lalolagi na foafoaina, e na te avatu ia te oe le malosi e  maua ai le oloa moni (Teuteronome 8:18). 

Le au pele, fai sau faaiuga ia e pipii pea i le Atua ma le atoatoa i lou olaga atoa ina ia amata ona e fiafia I faamanuiaga e maua ona o oe o le atalii poo le afafine o le Atua. E na o le Atua e foai atu le oloa e aunoa ma le tigā e pei ona tatou iloa I le Faataoto 10:22 'O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā. '

Ou te tatalo e te savali ma le Atua ma lou loto atoa ma aua nei e fiafia I le agasala ina ia e matua faamanuiaina. O lou Tama i le lagi o le puna o le oloa moni, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 4 TESEMA 2025

(tusia e Pastor EA Adeboye)

Manatu Autu: Momoli o le feau a le Atua (Delivering God’s message)

Tauloto Tusi Paia: Efeso 4:29 “Aua ne‘i alu atu se ‘upu leaga a‘i o ‘outou gutu, nā o le ‘upu lelei e ati a‘e ai i mea e aogā, e tupu ai le lelei i ē fa‘alogologo i ai.”

‭‭

Faitauga - Tusi Paia:  2 Samuelu 12:1-14

Afai e te latalata moni i le Atua ma amata ona e tatalo mo isi tagata, e ta’u atu e le Atua ia te oe mea e faatatau iai latou. E iai taimi e manaomia lou ta’u atu i tagata o loo e tatalo ai, mea o loo faaali atu e le Atua e faatatau iai latou, e mafai ona e avatu iai faatonuga e taitai ai i latou  i le finagalo o le Atua. Peitai, afai e taitai oe e le Atua e faasoa atu iai latou, e tatau ona e faia ma le poto, aemaise pe a lē lelei le feau. E tatau ona e aoaoina mai le auala na momoli ai e Natano le feau mai le Atua ia Tavita, e pei ona tatou faitau ai i le faitauga mai le Tusi Paia o le asō. Ana na o le faapea atu lava o Natano ia Tavita, ‘ua fetalai mai le Alii, ona ua e avea le toalua o le isi tamaloa, ma e fasiotia le tamaloa, o le a oo mai le malaia’, semanū e fasiotia o ia i lea aso. Peitai, ona o le auala na ia momoli atu ai le feau, na to’otuli Tavita i ona tulivae i le salamō. 

O le mafuaaga o le perofetaga o le atia’e, faamafanafana ma apoapoai (1 Korinito 14:3), ae lē o le tausuai poo le faaali atu o oe e talanoa mai iai le Atua. Afai o lau perofetaga e lē atia’e, pe faamafanafana pe apoapoai i le tagata o loo e faia iai le perofetaga, e ono lē sa’o le feau o loo e momoli atua. E oo ia Elia na tuusao lona faamasinoina o Aapo aua na tuu sao atu e le Atua upu e tautala ai (1 Tupu 21:17-29), na salamo Aapo aua o le mafuaaga o le perofetaga e lē o le faatausuai ia te ia, ae o le aumaia o ia ia salamō, aua e lē fiafia le Atua i le oti o ē amioleaga ( Esekielu 33:11). 

Ia maitau mai, e iai taimi  e ui e sa’o le auala na e momoli atu ai le feau, o le tagata o loo avatu iai le feau e na te lē ono faia le finagalo o le Atua. E lē mafai ona e faamalosia tagata e faia le finagalo o le Atua, pau lau matafaioi autu o le momoli o le feau a le Atua. E tuu i le faitalia a lē o loo faalogologo i le feau pe talitonu i le perofeta a le Atua ma manuia pe leai (2 Nofoaiga Tupu 20:20). E iai taimi e ono faataga e le Atua loto o e faalogo i le feau e faama’a’a, e pei ona ia faia ia Farao ( Esoto 9:12) ina ia oo i le lumanai, e faatauaina e tagata Lana Upu. 

Le au pele e, fai mai le Efeso 4:15, ia tautala ma le alofa, o lona uiga a finagalo le Atua e te momoli atu le feau i se tagata, e tatau ona e faatagaina lona alofa e taitaia oe i soo se upu e te tautala ai. E taua lou ole atu i le Atua e faatumu muamua lou loto i le poto ma le alofa ae e te lei tautala ina ia aua nei avea au upu e faatigā ai, ae ia faia mo le lelei. I taimi uma aemaise pe afai o loo momoli atu le feau mai le Atua, ia avea au upu, e tumu i le alofa e atia’e ai, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 3 TESEMA 2025

(tusia e Pastor EA Adeboye)

Manatu Autu: Taofi ia te oe (Keep it to yourself)

Tauloto Tusi Paia: Failauga 3:7 “o ona po e saei ai ma ona po e su‘i ai, o ona po e fa‘alologo ai ma ona po e tautala ai.”

‭‭

Faitauga - Tusi Paia:  Faataoto 3:32, Amosa 3:7

O le tulaga maoae, e tele matafaioi e manaomia le faatino e aofia ai ma le taofia o mealilo. Aua foi a e ausia se tapulaa i le tulaga maoae, e iai mea e manaomia e taitai ona taofiofi o mealilo, ina ia puipui ai i latou, o e mulimuli iai latou ma le lelei lautele o loo latou taumafai iai. E iai ituaiga faamaumauga faapitoa e maua i lea tulaga, e mafai ona faaaoga faaletatau pe a iloa e le lautele, ma o le mafuaaga lea e tatau ai ona taofiofi ia lilo. 

E iai foi mealilo a le Atua, ma afai e te latalata ia te ia ma moni lou āva ma lou faaneenee ia te ia, e amata ona ia ta’u atu ia te oe. Peitai, afai e te alu atu ma talai atu i tagata uma mea e fai atu ai le Atua e aunoa ma lou faanoi muamua ia te ia, aua nei e ofo pe a e lē toe faalogo ini mealilo mai ia te ia. A ta’u atu e le Atua ia te oe se mea ma faatonu oe e aua nei e ta’uina i se tagata, ia tapuni lelei lou fofoga, ona ia faatuatuaina lea o oe i nisi mealilo faaopoopo. Ou te tatalo ia e mafuta latalata i le Atua ona amata lea ona ia faasoa atu ia te oe nisi o mealilo, i le suafa o Iesu. 

O le fanau ma le tausia o Iesu Keriso i lona tuputupu ae na manaomia se tapulaa ia lilo le faatinoina, ma ana faapea e tautalatala Maria, semanu e na te tuua o ia i se tulaga lamatia i le amataga o lona soifua. O soo se kerisiano faatuatua, e lē o mea uma e fai atu ai le Atua ia te oe e te ta’u ma faasoa atu i isi tagata. E iai lava mea e ta’u atu e le Atua ia te oe e mo na o ou taliga lava. Fai mai le Salamo 25:14 “O lo‘o fa‘aali e le ALI‘I lona finagalo i ē matata‘u ‘iā te ia; na te fa‘ailoa atu fo‘i lana feagaiga ‘iā te i latou.”

‭‭

O se tasi o mafuaaga e iai mealilo a le Atua aua foi e lē manao i le tiapolo e iloa mea o le a ia faia. E pau le mea e mafai e le tiapolo o le mate o mea o loo finagalo le Atua e faia, peitai o le tele o taimi e sesē ana mate ma iu ane ua fesoasoani i le Atua e ausia le faamoemoega. O le mafuaaga lea e faapea mai ai le 1 Korinito 2:8 “O le mea na lē iloa e se ali‘i e tasi o lenei lalolagi; auā ‘ana latou iloa, po ‘ua latou lē fa‘asatauroina le Ali‘i e ona le manuia.”

‭‭

Afai e fai atu le Atua i se mea e te faia, ae e alu ma talai atu i tagata uma, e leiloa pe ua e faailoa atu i le tiapolo faamaumauga sa lē tatau ona ia iloa. O le mafuaaga lea afai e ta’u atu e le Afua se mea ia te oe, ia e fesili atu ia te ia pe na o oe e tatau ona iloa pe finagalo e te faasoa atu i isi. A fai mai e mo na o ou taliga lava ma aua nei faasoa i isi tagata, faamolemole taofi ia te oe lava. E mafai ona faatuatuaina oe e le Atua i ana mealilo? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 2 TESEMA 2025

(tusia e Pastor EA Adeboye)

Manatu Autu: Faasaolotoga moni (True deliverance)

Tauloto Tusi Paia: Luka 8:39 “Inā fo‘i atu ia oe i lou ‘āiga ma ‘ia fa‘amatala atu i mea tetele ‘ua faia e le Atua ‘iā te oe.” ‘Ona alu ai lea o ia, ‘ua tala‘i i le ‘a‘ai uma i mea tetele na faia e Iesu ‘iā te ia.”

‭‭

Faitauga - Tusi Paia:  Luka 8:1-3

Na tuli’ese e Iesu Keriso temoni mai tagata i le taimi o lana galuega talai i le lalolagi, ma o loo Ia fa’atonuina Kerisiano ia latou faia le mea e tasi. Fai mai le Mataio 10:8 “Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.”

‭‭

Peita‘i, o le fa’asa’olotoina e sili atu nai lo le tuliesea o temoni. E tupu le fa’asa’olotoina moni pe a le mafai e se temoni ona toe foʻi mai ma toe nofoia se tagata ua uma ona faasaolotoina mai ai. Na fetalai Iesu i le Mataio 12:43-45, a alu ese se agaga leaga mai i se tagata, e feoai solo ma sailiili se isi nofoaga e mau ai. Afai e le maua se nofoaga e nofo ai, o le a toe foʻi e siaki pe o avanoa lava lona nofoaga muamua. Afai na te maua atu ua avanoa le nofoaga, o le a ia valaaulia isi temoni e sili atu ona leaga nai lo ia, ma o atu ma nonofo i le olaga o lena tagata. O le iʻuga o lena tagata o le a sili atu ona leaga nai lo le taimi sa na o le tasi le temoni na nofo ai muamua. Mo fanau a le Atua, o le taimi e te tulia ai se temoni mai i se tasi, ia e mautinoa ia faatumuina lena tagata i le Agaga Paia. Afai e toe foʻi mai le temoni ma iloa ua nofoia e le Agaga Paia lea tagata, e le mafai ona toe nofoia ai o ia.

Ina ua maea ona tuliesea e Iesu temoni e fitu mai ia Maria le Makatala, sa avea o ia ma se tasi o ona so’o ma mulimuli atu ia te’ia seia oo i le iuga o Lana galuega i le lalolagi. O le taimi lava na faasaoloto ai o ia e le Alii, na ‘avea ai o ia ma ‘oloa taua mai le Atua ma sa faamaoni e auauna i le Atua ma lona malosi atoa. O lona faamaoni na mafua ai ona avea o ia ma se tasi o tagata muamua na vaai ia Iesu ina ua toetu mai (Ioane 20:13-18). I le Luka 8:26-39, ina ua maea ona tuliesea e Iesu le lekeono o temoni mai le tagata valea i Katara, sa Ia fetalai atu ia te ia e alu e talaʻi le talalelei. E lē lava le tuliesea o se temoni mai i se tasi; o le fa’asaolotoina moni e taunuu i le taimi e fa’atumuina ai o ia i le Agaga Paia ma e le mafai ai e le temoni ona toe foʻi mai e toe nofoia lena tagata.

Le ‘au pele e, o le fa’asaolotoina moni, o le tumu o lou loto i le Agaga Paia aua o loo e tatalo, ma fafagaina i afioga a le Atua i aso uma, anapogi faifaipea ma ola faapa’iaina. O le fa’asaolotoina moni o se tagata, o le taimi e le toe foi ai i lona olaga tuai ona ua fa’asaolotoina mai ai, a ua tumau i le fa’atumuina e le Agaga Paia ma ua le mafai ai ona toe nofoia e temoni. E tupu le fa’asaolotoina moni pe a fa’atagaina e se tagata le Agaga Paia e faatumu uma avanoa sa nofoia muamua e le ti’apolo, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 1 TESEMA 2025

(tusia e Pastor EA Adeboye)

Manatu Autu: Faapogai o Perofetaga 3 (Sources of prophecy 3)

Tauloto Tusi Paia: Isaia 55:11 “E fa‘apea fo‘i la‘u ‘upu e alu atu a‘i lo‘u gutu, e lē fo‘i mai fua ‘iā te a‘u. ‘Ae peita‘i e faia le mea ‘ou te loto i ai, e manuia fo‘i i le mea ‘ou te ‘auina atu ai.”

‭

Faitauga - Tusi Paia:  1 Samuelu 3:19-21

O le asō, o le a faaiu atu ai le a’oa’oga na amata i aso e lua talu ai ma o le a tatou suesue i perofetaga e aumai e Agaga Paia. 

I le tele o tausaga talu ai, na fai mai le Atua ia te a’u ia faia ni ou ofu faa Aferika se fitu i se tasi o matou polokalame, e ui e silafia e ia ou te lē fiafia e faia ituaiga ofu faa Aferika ia ma e matuā faigata ona ou faia le fitu. E oo i tagata e fiafia i ofu Aferika ia, o le faia o le lua e oo i le fitu e manatu le toatele e matuā le fetaui. Sa matua ese lenei ituaiga faatonuga peitai ona ou te iloa lelei lona siufofoga, na ou usitai. Ona ia faatonu mai lea ou te siva mo sina taimi ona faataatitia lea o nei ofu i le nofoaga o iai le pulelaa. Na ou usitai ma na ia faapea mai, ‘Fai i soo se tagata e iai se manaoga e pai i se tasi o nei ofu ae aua nei tago seisi e uu le ofu’. Na ou faailoa le feau mai le Atua i le faapotopotoga, ma e toatele tagata na o mai ma pai i nei ofu. Na maea la matou sauniga i le 8 i le taeao ona ou tuumuli lea i lo’u potu tatalo. E oo atu i le 5.00 i le afiafi, ae tuitui mai tagata i le faitotoa ma ua faapea nisi o le aulotu, ‘E iai se tamaloa o le a oti’. Na faamatala mai na tago lenei tamaloa ma uu le ofu ma faapea mai o lona manaoga e manaomia le sili atu ma le pai, ma e talu ona ua faia,ua gatete lona tino ua lē mafai ona taofi. E foliga o ni ofu masani nei ofu, peitai ona na aumai faatonuga maoti mai le Atua i le mea e fai, ua faatumuina i le mana. Na ou ole ma aioi atu i le Atua ona faatoa taofia lea o le gatete o lenei tamaloa. 

E lei leva mulimuli ane, ae ou malaga i Amerika ise tasi o matou fonotaga ma na faatonu au e le Atua e ave se tasi o ofu Aferika ia. Ao faagasolo le sauniga, na ou fai atu i le faapotopotoga, e na o le pai lava i le ofu lea ae aua nei tago seisi e uu. O se tamaloa palagi i le faapotopotoga na faapea mai, ‘O a nā ituaiga mea faavalevalea?’ Peitai na alu lava ma pai i le ofu. O le tua o lenei tamaloa na iai se uamea e fesoasoani e mafai ai ona tu. O le taimi lava na ia pa’i ai i le ofu lea, na nuti lenei uamea ma ua maua lona faamalologa. 

Le au pele e, a fetalai Agaga Paia, o soo se mea e fai mai ai, e taunuu lava. Tusa poo nisi o nei upu folafola e foliga mai e valea, afai e mai le Atua, e lē mafai ona paū i le palapala. O le lagonaina o le siufofoga o le Atua, e tatau ona lua mafuta ma Agaga Paia ina ia mafai ona e iloa maoti lona siufofoga e ese mai le leo o le tiapolo poo lou lava tagata. 

Tatalo

Le Alii e, faamolemole fesoasoani mai ina ia ou mafuta vavalalata ma lau afio ina ia ou lagonaina manino lou siufofoga, i le suafa o Iesu, Amene. 

OPEN HEAVENS

MATALA LE LAGI MO LE ASO SA 30 NOVEMA 2025

(tusia e Pastor EA Adeboye)

Manatu Autu: Faapogai o Perofetaga 2 (Sources of prophecy 2)

Tauloto Tusi Paia: Mataio 7:15 “Ia ‘outou ma perofeta pepelo, o ē ō mai ‘iā te ‘outou i ‘ofu fa‘amamoe, a o totonu o luko fe‘ai lava i latou.”

‭

Faitauga - Tusi Paia:  Mataio 7:15-21

O ananafi na o’u amata a’oa’o atu ai faatatau i faapogai o perofetaga ma le auala e mafai ai ona tupu se perofetaga e faapogai i le agaga o le tagata. O le asō o le a o’u faamatala ai nisi o auala e ono omai ai perofetaga mai le tiapolo.

O perofetaga mai le tiapolo, o pepelo e pipi’i mai ai ni nai fasi vaega o le mea moni e faanenefu ai ma faasesē le tagata o faatatau i ai le perofetaga. E ono faauiga sesē fo’i e le tiapolo se vaega o le upu a le Atua e tau fa’afoliga mo’i ai ana pepelo ina ia manatu ai le tagata faatuatua o le perofetaga e mai le Atua. A sau mai le tiapolo se perofetaga, e na o sina taimi ae vaaia uiga fa’atiapolo. A i ai Satani i se nofoaga, e tolu ona faamoemoe e sau ai; gaoi, fasioti ma faaumatia (Ioane 10:10). So’o se perofetaga mai le fili e i’u lava i le gaoi mai ia i latou e talitonu ai, fasiotia lo latou olioli ma faamoemoega ma faaumatia lo latou faatuatua.

Ina ua vavalo le teineitiiti i le tusi o Galuega 16:16-18; i ni upu faaperofetaga, sa tele ai i totonu ni vaega itiiti o le upu moni. Peita’i na silafia lelei e Paulo o nei upu o upu mai le tiapolo. Na mana’o le tiapolo ia taula’i le vaai a tagata i le teineitiiti ae lē o Iesu. Na mana’o le fili e aveese manatu o tagata mai lo latou iloaina o Iesu. E iloa e le tiapolo fai faamatalaga ma femilosa’i solo ia upu ia taunuu. O nisi tagata e faalogo i perofetaga mai le tiapolo ma faapasi e le amanaia; peita’i e mafai ona mata’utia aafiaga o lea faiga. Sa i ai se tamaloa mauoa sa tauaimisa ma lona toalua, ona fai lea i ai o le fafine; a o’o ina lā tetea, o le a savali solo o ia i so’o se mea e alu i ai i totonu o Lagos. Ina ua fai atu e le fafine nei upu sa ata’ata le tamaloa auā o le taimi lea e sefulufa ana taavale sa i ai. E lei umi, ae leai uma ni taavale seia o’o Ina totoe na o le taavale e tasi ma le $50 tupe Nigeria i lana taga. Ona faapea ifo lea i lona loto, “Afai ou te faaaogaina lenei $50 e utu ai la’u taavale, o le a la’u mea a ai?” Afai e faatau sa’u meaai i le tupe, o le a o’u savali i soose vaega o Lagos ou te fia alu i ai e pei ona faia ai perofetaga a lo’u toalua.” O iina na liliu ai lenei mauoa ia Iesu Keriso, ma amata ai ona fa’asa’oloto e Iesu mai lona puapuaga. I le aso na ia faasoa mai ai lana ta’utinoga, na faapaiaina ai ona fale fou e lua. Ou te tatalo mo oe i le asō soose valoaga leaga o loo galue e faaleaga lou olaga ma lou lumanai, ia fa’alēaogaina I le suafa o Iesu. 

Le au pele e, e tatau ona e faaeteete i tagata e te faatagaina e faia ni valoaga i lou olaga. Afai e vavalo se tasi i se upu e le o gatusa ma le finagalo o le Atua i lou olaga, sausau i le toto o Iesu ma fa’alēaogā i le taimi lava lea i le suafa o Iesu. Amene.

OPEN HEAVENS

MATALA LE LAGI MO LE ASO TOONAI 29 NOVEMA 2025

(tusia e Pastor EA Adeboye)

Manatu Autu: Faapogai o Perofetaga 1 (Sources of prophecy 1)

Tauloto Tusi Paia: Esekielu 14:4 “O le mea lea ‘ia e tautala atu ai ‘iā te i latou, ma fai atu ‘iā te i latou, O lo‘o fa‘apea ‘ona fetalai mai o le Ali‘i le ATUA: ‘Ai se tagata o le ‘āiga o Isaraelu na te fa‘atūina ana tupua i lona loto ma tu‘uina i ona luma lana agasala e tausuai ai ma alu ane i le perofeta; o a‘u o le ALI‘I, ‘ou te tali atu i lē alu ane, e tusa ma le tele o ana tupua;”

‭

Faitauga - Tusi Paia:  Esekielu 14:1-7

O perofetaga e omai I ni faapogai autu se tolu; o le tiapolo, agaga o le tagata, ma Agaga Paia. O le asō o le a ou faamatala ai perofetaga mai le agaga o le tagata.

A auala mai se perofetaga mai agaga o tagata latou te tā’ua mea latou te faalogoina o le a tutupu, peita’i o le tele o taimi e lē tutupu ia mea. O le tele o taimi, e mafai ona osofia ai le fiafia o se tagata ma manatu ai i lea taimi ua ia faalogoina le siufofoga o le Atua; peita’i e mafai ona faapea o lea tagata o lona lava agaga na faalogo i ai. O le mafuaaga lea e tatau ai ona pulea ou lagona pe a e fia lagonaina le siufofoga o le Atua, ina ia aua ai nei e toe faalogologo lava oe i lou agaga ma fai mai ua e faalogo mai le Atua. Afai o e faatalitali i se fetalaiga mai le Atua ma o loo tā mau lava lou mafaufau i se tali faapitoa e te fia faalogo ai, o le a tele se avanoa e te faalogoina ai se faamaoniga o lea tali mai lou lava agaga ma e faapea ai o le fetalaiga lea mai le Atua. 

A o o’u itiiti i le galuega a le Atua ma ua o’u vaaia fa’aaliga o le a o’u faimalaga so’o i tiute fai o le galuega na ofoina mai e se kamupani vaalele ni pasese faapitoa lelei mo a’u. Sa ou fiafia i le ofo ua aumai ma ou faia ai se perofetaga, o lea kamupani vaalele o le a manuia ma e lē o’o I ai ni mala. E lei umi ona fai la’u folafolaga ae pa’ū le vaalele a le kamupani. Sa tatau ona tau lava o lo’u tatalo mo le kamupani vaalele ma faamanuia I ai nai loo le fai o le perofetaga e fua I o’u lava lagona. 

Pe afai e te lē lafoaia ou lagona ma faataga le Atua e suesue lelei lou loto, o le a e faalogoina tupua o lou loto o aumaia ia te oe le fa’atagaga pe a e tatalo atu I le Atua mo sona finagalo; Fa’ata’ita’iga, afai o se tamaita’i o loo saili I le Atua poo ai se tasi o ana uo alii e finagalo la te faaipoipo, e manaomia le pulea lelei o ona lagona e ui o loo i ai lava lana ia filifiliga e mana’o iai, ae tu’u atoa le pule i le Atua pe afai e mana’o moni e faalogo i le finagalo o le Atua. Afai e fesili i le Atua I lana faaiuga peita’i na te iloa o loo naunau lona loto I le tagata o mana’o ai i taimi o ana talosaga, e tatau ona ia sailia se isi e leai sona fesootaiga ma se isi o ana uo, late tatalo, auā e ono faalogo ia i lona lava agaga o faapea mai e faaipoipo loa ma lē o loo mana’o ai lona loto. E tatau fo’i ona naunau moni ia lagona lelei le finagalo moni o le Atua auā fai mai le upu tauloto o le asō a e alu atu I se perofeta ma ni tupua I lou loto, o le a tali mai le Atua ia te oe e tusa ma lau tupua.

Le au pele e, faamasani lou agaga faaletagata e gaua’i atoatoa i le Atua, a e faia faapea, soose taimi e te manaomia ai lona siufofoga, e lē faalavelave ou lagona i lona finagalo e a’oa’o ma faatonu mai, i le suafa o Iesu, Amene.

Tatalo

Tamā, faamolemole saili ia te au ma aveesea soo se tupua i lo’u loto e ono taofia lo’u faalogo manino i lou siufofoga, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 28 NOVEMA 2025

(tusia e Pastor EA Adeboye)

Manatu Autu: Viiga ma le tapuaiga ( Praise and worship)

Tauloto Tusi Paia: Salamo 5:7 “Ae peita‘i a‘u nei, o le tele o lou alofa, ‘ou te alu atu ai i lou fale, ‘ou te ifo i lou malumalu pa‘ia ma le mata‘u ‘iā te oe.”

‭‭

Faitauga - Tusi Paia:  2 Nofoaiga Tupu 1:6-13

O nisi kerisiano e tuai i sauniga lotu aua e leiloa pe faatoa amata sauni e o i le lotu i le taimi o la ua amata ai viiga ma le tapuaiga. E latou te talitonu o le lauga o le vaega autu lea o le sauniga, peitai e lē moni. O le tapuaiga o le vaega pito taua lea o le sauniga, ma o le mafuaaga lea e masani ona faapea ai o le sauniga lotu o le sauniga o tapuaiga. Fai mai le Salamo 22:3 e tietie ma afio le Atua i viiga a Isaraelu. Mai le amataga o se sauniga lotu, o loo gaioioi mai le Atua. O kerisano e malamalama i lenei tulaga e o vave i le lotu aua latou te iloa ao faagasolo pese, viiga ma le tapuaiga, e mafai ona latou faaloga i le Atua ma maua se feau mai ia te ia. 

E faanoanoa ona o nisi faifeau a le Atua e latou te lē faatauaina pese, viiga ma le tapuaiga. Ao pepese  le aufaipese e vivii ai i le Atua, o le toatele o faifeau o loo nonofo lava i latou ofisa, tusi ni tusi ma faia faatonuga aua latou te manatu o le vaega taua o le sauniga e lei amataina. E oo atu i le taimi e tu ai i le pulelaa, ua toeitiiti uma le sauniga aua o le vaega taua o le sauniga o le viiga ma le tapuaiga. A e tapuai lelei i le Atua, e te vaai ia te ia o galue mai. 

A malamalama kerisiano faatuatua e leai se mea e mafai ona latou faia e aunoa ma le Atua (Ioane 15:5), e latou te le misia viiga ma le tapuaiga. I le faitauga mai le Tusi Paia o le asō, fai mai na tapuai Solomona i le Atua ma avatu taulaga mū e afe ia te ia. O se ala maoae o tapuaiga, o le ituaiga e lei vaai muamua iai tagata i lona siomaga. I lenā po, na asiasi iai le Atua ma fai atu ia te ia e ole mai i soo se mea. Na ole atu Solomona mo le poto ma le iloa ina ia auauna ai i le Atua i ala e tatau ai, ma e fai mai le Tusi Paia na talia e le Atua lana olega ma faaopoopo atu iai ma isi faamanuiaga. O loo fai mai foi le Tusi Paia e leai seisi na muamua atu e pei o Solomona ma e leai foi seisi e mulimuli mai, ma e leai seisi e pei o ia (2 Nofoaiga Tupu 1:12). 

Le au pele e, ia avea ma au masani le aua nei toe misia se avanoa e tapuai ai i le Atua e ala i le siva ma pese viiga i lona suafa, aemaise i taimi o sauniga lotu. Afai e avea ma au masani le siva ma pese ia te ia, e na te vavaeeseina oe ia e maoae. Peitai a e manatu ua e maualuga tele e le mafai ona e siva i ona luma pe tapuai foi ma avatu le faafetai ia te ia, o lana silasila ia te oe, ua e maualuga tele e lē mafai ai ona ave oe i le tumutumu. O pese,  viiga ma le tapuaiga o se vaega taua tele o sauniga lotu, i le suafa o Iesu, Amene.