Samoan Devotional

OPEN HEAVENS

MATALA LE LAGI MO LE ASO GAFUA 17 NOVEMA 2025

(tusia e Pastor EA Adeboye)

Manatu Autu: Manumalo agaga (Win souls)

Tauloto Tusi Paia – Mataio 10:7 “A ‘outou ō, ‘ia ‘outou tala atu, ‘ia fa‘apea atu, ‘‘Ua latalata mai le mālō o le lagi.’”

‭‭

Faitauga - Tusi Paia: Tanielu 12:1-3

I se vaitaimi e lei mamao atu, sa valaaulia a’u e le Peresitene o lo’u atunuu ou te lauga i le faaipoipoga a lona afafine. E toatele tagata taua na iai, o ulu o malo, sui o malo, faauluuuluga o soo se vaega i le malo. I le faaiuga o le lauga, na ou faia le valaau mo le faaolataga. E iai se tagata na mulimuli ane vili i lo’u atalii ma fesili iai, ‘o le a le ituaiga faifeau e iai lou tamā, e faia ni valaau mo le faaolataga i se faaipoipoga a le malō?’ Na ou faamalamalamaina i lo’u atalii, e pau le mafuaaga na ou talia ai le valaaulia aua foi ou te naunau e manumalo agaga mo le Atua. E toatele tagata taua ma tauoloa na iai i le faaipoipoga e lē o ni kerisiano, ma sa ou tilotilo atu o se avanoa taua e latou te faalogo ai i le upu a le Atua. 

O le mea pito sili ona taua e faia e se kerisiano mo le lalolagi o le manumaloina o agaga mo Keriso. A e faia, o loo e galue moni ina ia avea le lalolagi o se nofoaga e sili atu i le tulaga o loo iai nei. O kerisiano moni e le o ni tagata e o atu gaoi faamalosi i ni faletupe, o lona uiga a e manumaloina agaga, o le a faaitiitia le au gaoi. O kerisiano moni e lē pepelo ma gaoi, o lona uiga, a e manumaloina agaga, o le a faaitiitia le tele o mea sesē ma faaalatua (corruption) i totonu o le atunuu. A e musu e manumaloina agaga, o le a siitia le leaga i le atunuu. 

Afai e tauva se kerisiano moni mo se tulaga tofi i le Palemene ae o le toatele o tagata palota e fiafia i mea sese ma faaalatua, e te manatu ea latou te palota ia tū mai lea kerisiano? E lē taitai o mai faatasi ni pagota e palota ia tū mai se leoleo i se tulaga pule. O lona uiga, e matua taua le feliuaina o tagata lē faatuatua i le atunuu ia avea ma kerisiano faatuatua ina ia tulai mai tagata amiotonu i tofi taitai ina ia manuia sautualasi le atunuu (Faataoto 14:34). Ina ia siitia le tulaga o le tamaoaiga i le atunuu, e tatau ona e manumaloina agaga mo le Atua, totō ni Ekalesia fou ma faia mea tetele mo le Atua. I le auala lea, e te lē popole ai i upufai o malo. A e manumaloina lou taulaga mo Keriso, o fanau a le Atua o le a avea taitai o le taulaga ma e fai mai le Faataoto 29:2 a taitai ma pule tagata amiotonu, e olioli le nuu ma le atunuu. 

O se tagata e manumaloina agaga, o se ipu e aumaia le faaolataga i isi tagata. O ia o le tagata foai, o se faamanuiaga, o se tagata galue ma le Atua ma o se paaga foi a le Atua. O se tagata e manumaloina agaga e tele ona faamanuiaga. A avea oe ma tagata e manumaloina agaga, e te fiafia i faamanuiaga, e sili atu i lo le avea ma kerisiano e lē fua mai ni fua i le malo o le Atua aua fai mai le Tusi Paia e sili atu le manuia o lē foai nai lo lē e talia (Galuega 20:35). O le manumaloina o agaga e tuuina atu ai ia te oe avanoa e maua ai tali o tatalo (Ioane 15:16).

Le au pele e, fai sau faaiuga ina ia avea oe ma tagata e manumaloina agaga mo Keriso, e mo lou lava lelei. Ia e ta’u atu Keriso i se tagata se toatasi i le aso, i le suafa o Iesu, Amene. 

OPEN HEAVENS

MATALA LE LAGI MO LE ASO SA 16 NOVEMA 2025

(tusia e Pastor EA Adeboye)

Manatu Autu: O le fatu e tupu mai ai le laau(The seed makes the tree)

Tauloto Tusi Paia – Faataoto 22:6  “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”

‭‭

Faitauga - Tusi Paia: Faamasino 13:1-14

O lo’u tamā o se faifaatoaga, e masani ona ia ilo ese fua mai fua o faatoaga e pito sili ona lelei pe a maea se seleselega, e toe lulū ma totō i leisi fuata. O le mafuaaga ona e fua le ituaiga seleselega e maua i le ituaiga fatu. O le fatu e ono laitiiti ma lē tāua tele, peitai e fua iai le ituaiga laau e tupu mai ai. I le tulaga lava e tasi, o se tamaitiiti e ono foliga mai e laitiiti ma lē taua pe a faatulaga mea uma i le taimi nei, peitai o le ituaiga tagata matua e oo iai lenei tamaitiiti, e fua iai le ola ma le lelei o se aiga. O lona uiga, o le a’oa’oina ma le faatonuina o le tamaitiiti, e matuā sili ona taua i lō tupe ma mea taugata e te avatu iai latou. 

I le faitauga o le Tusi Paia o le asō, na afio atu se agelu i le toalua o Manoa ma fai atu ia te ia o le a ia fanau mai se tama. E ese le mea na iai lona toalua i le taimi na tupu ai, peitai ina ua ia faalogo i le mea na ta’u atu e le agelu i lona toalua, na ia tatalo ina ia faaali atu le Atua ia te ia. Na tali le Atua i lana tatalo, ma ina ua ia vaai atu i le agelu, na ia fesili atu i se fesili taua, 

“‘Ua fai atu Manoa, “O lenei, ‘ia taunu‘u au fetalaiga; se a se mea e tatau ai i le tama, ma se mea e faia ‘iā te ia?”Fa‘amasino‬ ‭13‬:‭12‬ ‭

O Manoa o se tamaloa poto aua sa ia naunau ia malamalama pe faapefea ona taitai le tamaitiiti o le a foai mai e le Atua, ina ia taunuu mea uma ua folafolaina e le Atua. E tatau  i matua uma ona ole atu i le Atua mo le faasinomaga pe afai latou te  naunau e aoao latou fanau i ala e tatau ona savavali ai (Faataoto 26:6). E iai nisi o matua e a’oa’o latou fanau i ala na a’oa’o ai foi i latou ma e tomumumu pe afai e lē faalogo atu iai fanau. E iai lava le auala e faatonu ai soo se tamaitiiti, peitai e lē mafai ona iloa e matua sei vagana ua latou mafuta atu ma iloa Lē na faia le tamaitiiiti. O faifaatoaga latou te iloa lelei le palapala e ola lelei ai se fatu peitai a e tago e ave le fatu lena e tasi ma tuu i seisi palapala, e ono lē ola pe lē fua mai foi ni fua lelei. Mo se faataitaiga, o se laau e pei o le laau talatala (cactus) e ola lelei i le toafa, a’o se lili, e lē mafai ona ola i se toafa. 

E silafia e le Atua le auala pito sili ona lelei e a’oa’o ma faatonu ai soo se tamaitiiti i ala e tatau ona ola ai. Afai o oe o se matua, ole atu i le Atua mo le tusi o faatonuga e a’oa’o ai lau fanau ina ia aua nei e a’oa’o ma faatonuina lau fanau, i ala e tetee atu, i ala na faia ai i latou e le Atua. Na o le Atua lava e silafia le ala e aoao ma faatonu ai so’o se tamaitiiti, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 15 NOVEMA 2025

(tusia e Pastor EA Adeboye)

Manatu Autu: Pulea o faataulaitu (Dealing with witches and wizards)

Tauloto Tusi Paia – 2 Korinito 2:11  “ina ne‘i ‘ole‘olegia i tatou e Satani; auā tatou te lē vālea i ana togafiti.”

‭‭

Faitauga - Tusi Paia: Eperu 5:12-14

I aso e lua ua tuanai atu, ua ou faailoa atu le manaomia o le meaalofa o le su’ega o agaga e mafai ona iloa ai agaga o loo pulea tagata. E taua tele auā o le mafai ona e pulea o taulaitu, e tatau ona muamua e iloa atu. 

O le taimi e te iloa ai faataulaitu o loo i ou tafatafa,o le mea muamua e tatau ona e faia o lou faasagatau atu iai pe tuli ese. E faapea se muagagana mai le nofoaga ou te sau ai, ‘o le taimi e faaali atu ai e le Atua sou fili, e le toe mafai e lou fili lena ona fasioti ia te oe’. O le taimi e te maua ai ni faataulaitu, aua nei o latou iloa ua e iloa aua i le taimi latou te iloa ai, o le a latou sailia se vaega e faasagatau mai ai. O le taimi e iloa ai e le tiapolo ua iloa e le faifeau lana vaega i totonu o le aulotu mo se faataitaiga, o le a ia suia ini vaega fou,  ma e tatau ona iloa foi e le faifeau ia vaega fou, e ala i le fesoasoani a Agaga Paia. Peitai  a nofo filemu le faifeau i le mea ua ia iloa ma faia na o le mea o loo taitaia ai o ia e Agaga Paia e faamautinoa ai ia le oo a latou fuafuaga amioleaga, e leai se aafiaga. 

A e iloa faataulaitu i lou siomaga, faafetai i le Atua mo le faaaliga ma ia e saili i ona fofoga ina ia e iloa lelei laasga e faia e te pulea ai. E tatau ona e saili i le Atua mo le alofa tunoa e te mataala ai i mea i le itu o le agaga i taimi uma ina ia le gata e te iloa i latou, ae o le a e iloa taimi o loo latou fuafua e faataunuu ai a latou fuafuaga leaga, ma iloa le mea e tatau ona faia e taofia ai. I le taimi o se tasi a matou fonotele,  na ou faalogo i le itu faaleagaga o loo fai atu se tasi faataulaitu i se tasi, ‘ua oo i le taimi e osofai ai’. I na aso, ou te lei matua faaleagaga e pei o le taimi nei, ma sa ou mofo sauni i taimi uma e valaau le afi ia paū. O le mea lea ina ua ou faalogo iai, na ou valaau atu i faataulaitu e o mai i luma ona faapea mai lea o se tasi oi laua, ‘ou te lei fia faia, ae o le mea lea ei totonu ia te a’u o loo tuleia a’u’, ao leisi ua na o le tagi masusū. Na faasaolotoina i laua e le Atua i lea aso. Faafetai i le Atua sa ou mataala ma iloa le faaaliga mai ia Agaga Paia. 

Le au pele e, e tatau ona e ola faapaiaina ma tuuina atu i anapogi ma tatalo ina ia e mataala ma iloa Agaga Paia ma iloa mea e tatau ona faia e pulea ma faaumatia vaega a satani. 

Tatalo

Tamā, faamolemole fesoasoani mai ia te a’u ina ia ou mataala ma iloa lau afio ina ia aua ai nei faaaogaina au e o’u fili, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 14 NOVEMA 2025

(tusia e Pastor EA Adeboye)

Manatu Autu: Su’ega o agaga 2 (Discerning of spirits 2)

Tauloto Tusi Paia –  1 Ioane 4:1  “Le ‘au pele e, ‘aua tou te fa‘alogo i agaga uma lava, a ‘ia ‘outou tofotofo i agaga pe mai le Atua i latou; auā e to‘atele perofeta pepelo ‘ua ō atu i le lalolagi.”

‭‭

Faitauga - Tusi Paia:  Galuega 16:16-18

O le meaalofa o le su’ega o agaga, e fesoasoani lea i kerisiano e faailoa ituaiga agaga o loo galulue mai i olaga o tagata o latou fetaiai. Mo se faataitaiga, o se tagata faatuatua e iai le meaalofa o le suega o agaga e mafai ona ia iloa pe o se tagata o se atalii poo se afafine o le Atua pe leai, pe o se tagata faafoliga, o loo faatumulia i le Agaga Paia. O le meaalofa o le suega o agaga, e faaaupegaina ai tagata faatuatua e faailoa i latou o ni luko i ofu o mamoe o loo i totonu o lo latou siomaga. E finagalo le Atua i lenei meaalofa e galue i olaga o tagata faatuatua ma e faatuputeleina pe a mafuta vavalalata ma ia. Peitai e foliga mai e toatele tagata faatuatua e latou te lē faatāuaina le maua o le ei meaalofa. Ia e maitau mai, o le meaalofa o le suega o agaga e lē o le agaga e suesue ai, e pei ona sesē ai le toatele. 

I le faitauga o le Tusi Paia o le asō, o Paulo ma Sila sa agai atu i se galuega taua, e talai atu Iesu i tagata o Filipi, ae fetaiai ai ma se teine e ulufia e temoni. O mea uma na tautala mai ai o ia e moni, peitai, ana lē maua e Paulo le mealofa o le suega o agaga, semanu e na te ono tuua o ia e pito i luma o le vaega talai pe avea foi ma taitai o le vaega talai ona o mea na tautala mai ai. Peitai, na iloa atu e Paulo i tua atu o ana upu ma ia iloa ai o loo faaoso mai e se agaga leaga, lea na ia tulia i fafo. 

E pei ona ou fai atu muamua, o le meaalofa o le suega o agaga e taua i kerisiano, peitai, e pito sili atu ona taua i faifeau a le Atua e galulue ai. Aua foi o autau a le tiapolo e mafai ona ō atu faanana i mafutaga a le au keirisiano i le faafoliga lea o ni fanau a le Atua (2 Korinito 11:14). I ia tulaga, o faifeau o le talalelei e tatau ona latou suea aua foi e lē o ō mai i le faapotopotoga o kerisiano e fiafia ai, o loo latou iai e faatelegese le galuega a le Atua ma ia titina le afi o le Atua o loo mumū pea i le ogatotonu o le faapotopotoga. 

Le au pele e, e lē tatau ona e faatamala i galuega faatemoni i lou siomaga. Afai ua maea ona lafoai lou ola ia Iesu Keriso ae lei maua le meaalofa o le suega o agaga, ole atu i le Atua i le asō ina ia mafai ona e iloa ma e faasagatau atu i malosiaga o le pouliuli. O taeao o le a ou talanoa atu pe faapefea ona e faasagatau atu i taulaitu aemaise i totonu o le lotu. O le mealofa o le suega o agaga e taua i kerisiano uma, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 13 NOVEMA 2025

(tusia e Pastor EA Adeboye)

Manatu Autu: Su’ega o agaga 1 (Discerning of spirits 1)

Tauloto Tusi Paia –  2 Korinito 11:14  “E lē se mea fo‘i lea e ofo ai, auā o Satani lava, ‘ua liua o ia e ia ma agelu o le malamalama.”

‭‭

Faitauga - Tusi Paia: 1 Ioane 4:1-3

E toatele fanau a le Atua ua pauū atu i mailei a le tiapolo ona latou te lē maua le mealofa o le su’ega o agaga. E masani lava ona auina mai e le tiapolo i tagata faatuatua i latou e faafoliga mai o ni agelu i le malamalama (2 Korinito 11:14). E masani ona foliga mai e lē afaina pe ono lamatia ma e lelei ma fiafia mai, e oo ai ina faatuatuaina i latou e kerisiano. E oo ane i le taimi ua iloa e kerisiano o ‘autau a le tiapolo o latou feagai, ua matuā telē le afaina ma ua leiloa avanoa taua e faatatau i o latou lumanai manuia. Peitai, afai e maua e nei tagata faatuatua le meaalofa o le su’ega o agaga, e latou te maua se molimau i totonu oi latou e lapatai atu autau a le tiapolo. 

O nisi tamaitai kerisiano ua faaipoipo atu i tagata mai faapotopotoga a satani o loo faafoliga mai o ni kerisiano faaolaina aua foi latou te lē o maua le meaalofa o le su’ega o agaga. E faapena foi nisi o kerisiano o fai pisinisi ma tagata sese ona latou te lē o maua le meaalofa o le su’ega o agaga. O fale faigaluega kerisiano, e lē tatau ona latou tilotilo tau o faailoga o tagata e fuafua e faafaigaluegaina, e tatau foi ona tilotilo ma su’e le ituaiga agaga o loo ō mai ma latou ina ia aua nei aafia leaga ai le fale faigaluega. 

I le 1980, na ou auai atu i le faaipoipoga a se tasi o a’u uo mamae e toatolu i le taimi lea. Ina ua ou oo atu i le nofoaga o le faaipoipoga, na faafeiloai mai a’u e se tasi o a’u uo e toalua, ma sa ia faia mea uma ina ia ou fiafia e pei o le aumaia o meaai, vaiinu ma meaalofa. Na faafuasei ona faapea mai le Atua ia te a’u, ‘o ia o lou fili’. Ua matua faateia a’u ona ou te latalata tele ia te ia ma sa ou manatu ua ou iloa lelei o ia. Na amata mai i le aso lea ona ou mataala ma faaeteete i mea ou te iai ma ia. I se taimi mulimuli ane, na ou talanoa ia te ia e tusa ma le tulaga na faaali mai e le Atua ia te a’u, peitai na ia teena o ia o sou fili. Ini nai masina mulimuli ane, na ma feiloai e talanoa nisi o vaega o le Ekalesia ina ua maliu lo’u tamā faaleagaga. I le taimi lea, ua ia faaali mai ia te au lona tagata moni ma ua ia faapea mai, ‘o le aso na amata e sau ai i le lotu lenei, na matuā ou inoino ai ia te oe’. 

Le au pele e, afai e te le maua le meaalofa o le su’ega o agaga, e te ono faia se mea sesē e pei o le faauo i se tagata e ita ia te oe pe avea foi ma au uo le fili. O le mafuaaga lea e tatau ai ona e ole atu i le Atua mo le meaalofa o le su’ega o agaga ina ia mafai ona e iloa agaga o loo pule i tagata i lou siomaga. Ou te tatalo o soo se tiapolo o loo faafoliga o se agelu o le malamalama i lou siomaga, ia faaalia mai, i le suafa o Iesu. 

Tatalo

Tamā, faamolemole foai mai ia te a’u le meaalofa o le su’ega o agaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 12 NOVEMA 2025

(tusia e Pastor EA Adeboye)

Manatu Autu: Tumau i le fa’amaualalo 2 (Stay humble 2)

Tauloto Tusi Paia –  Isaia 66:2  “Na faia ia mea uma e o‘u lima; sa i ai lava ia mea uma, ‘ua fetalai mai ai le ALI‘I; A o lenei le tagata ‘ou te va‘ai i ai, o lē ‘ua fa‘amaulalo ma le loto tigā, o lē ‘ua gatete fo‘i i la‘u ‘upu.”

Faitauga - Tusi Paia: 1 Tupu 21:15-29

Ina ua maea ona ou faaolaina, na amata ona ou faalogo o talanoa mai le Atua ia te a’u, ma ua ou lē toe faia se mea e aunoa ma lana taitaiga poo lana faatagana. I aso nā, ou te fesili atu ia te ia poo a auala ou te ui ai ina ia aua nei ou poloka i le auala ma e na te taitai ia te a’u. Peitai e iai se mea na tupu na taofia ai lona toe talanoa mai ia te a’u mo se vaitaimi. Sa ou faaliliu upu i le lotu ma sa naunau ma fiafia le taitai aoao o le Ekalesia ia te a’u ma oo ina manao e avea au ma ana faaliliu upu. Ina ua iloa e isi faifeau i le Ekalesia ua filifili a’u e le taitai aoao e avea ana faaliliu upu, ua taofia loa lo latou toe fai mai ia te au ou te faaliliu upu ona o lo latou faaaloalo i le taitai aoao. 

E iai se aso na fai ai se matou polokame ona fai mai lea o se faifeau ou te  faaliliu upu mo ia pe a fai lana lauga.Ua matuā oso lou ita, peitai ou te lei tetee atu aua o loo a’oa’o mai le Tusi Paia e tatau ona tatou faaaloalo ma usitai iai latou o loo i tulaga taitai iai tatou (Roma 13:1-2). Na ou faaliliu upu i lana lauga peitai i lo’u loto, sa ou tomumu, ‘e faapefea ona ia valaau mai ia te a’u le faaliliu upu a le taitai aoao, e faaliliu mo ia?’. I le faaiuga o le polokalame, ao ou savali atu i la’u taavale, na faapea mai le Atua, “Ua e maualuga tele ua e le fia faaliliu upu ai i la’u auauna?”. Pau a lena o upu na ou faalogo ai ona ou lē toe faalogoina loa lea o lona siufofoga. O le vaitau na mulimuli mai ai ua pei ua ou i seoli aua ua lē toe fia talanoa mai ia te a’u. Ua tele ina ou poloka i le auala ona ua ou lē toe faaologoina lona siufofoga e taitai ia te a’u. Na ou ole atu ia te ia ma folafola ou te lē toe faatagaina le faamaualuga e sosolo mai i lo’u loto. Ou te matua faafetai aua na amata loa ona toe talanoa mai ia te a’u. 

O le faamaualuga e lamatia ai soo se kerisiano i ū fanafana a le tiapolo. Peitai a faamaualalo se kerisiano,e avea lava le Atua ma ona pupuni ma le talitā. E tau le Atua mo tagata faamaualalo aua latou te faaalia atu e ala i le loto maualalo e lē mafai ona latou tau mo latou lava. I le faitauga o le Tusi Paia o le asō, na faia e Aapo se mea leaga i luma o le Atua, ona auina atu lea e le Atua o Elia e logo atu le faamasinoga ia te ia ona o lona amioleaga. Ina ua ia faalogo i le Upu a le Atua, na faamaualalo Aapo i luma o le Atua, o lē na folafola e na te faaumatia ia te ia. Ina ua silasila atu le Atua ua faamaualaloina o ia, na ia toe auina atu Elia e ta’u ia Aapo e na te lē faaoo atu le leaga i ona aso ae o le oo i aso o lona atalii (1 Tupu 21:27-29). Na faatuai e le Atua le faamasinoga o Aapo ona na faamaualalo o ia. 

Le au pele e, aua e te tuu avanoa i le faasagatau mai o le tiapolo. Faamaualalo i luma o le Atua ona ia faamautinoaina lea e te savali i taimi uma i le manumalo. E tetee le Atua i le faamaualuga ae na te avatu le alofa tunoa i le faamaualalo, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 11 NOVEMA 2025

(tusia e Pastor EA Adeboye)

Manatu Autu: Tumau i le fa’amaualalo (Stay humble)

Tauloto Tusi Paia –  Faataoto 11:2  “A sau le fa‘amaualuga, ‘ona sau ai lea o le mā; a o i ai le poto i ē fa‘amaulalo.”

Faitauga - Tusi Paia: 1 Peteru 5:5-6

Afai e tupu se afā i le togavao, e ono liaʻi ese ai laʻau tetele ma maualuluga. Ae a maeʻa le afā, o le a tumau pea le mutia e maualalo lona tulaga. A agi malosi mai matagi, e ifo vaega o le mutia i le itu e agi iai le matagi, ae a maea le matagi, e toe foʻi lava i lona tulaga na iai muamua. I o tatou olaga, e tupu ai afā mai lea taimi i lea taimi. A oo mai se afā, o le toatele o tagata e i ai le fa’amaualuga i o latou loto ma manatu e sili atu i latou i lo isi tagata, e masani ona liaiina ese, ae o ē e le iloa e tagata- o e agamalu ma loto maulalo - e tumau ma vivii atu i le Atua pe a mavae atu le afā. O tagata uma na fa’amaualuluga i totonu o le Tusi Paia, na iu lava ina liaiina ese i latou. Na tuliesea Nepukanesa mai lona nofoalii mo le fitu tausaga, ma sa ia 'ai le mutia e pei o se povi aua sa musu e tumau i le fa’amaulalo (Tanielu 4:28-37). Na leiloa Farao ma lana ‘autau i le sami ‘ula’ula ona sa musu e amanaia le Atua, sa ‘loto ma’a’a ma tuliloa pea le nuu o le Atua (Esoto 14:28). O le fa’amaualuga e mafai ona tuua tagata i nofoaga e faigofie ai ona fa’aumatia. Le ‘au pele e, e tusa lava po o le a le maualuga o lou tulaga i lenei olaga, e te atamai pe a e tumau i le fa’amaulalo ma ‘alo ese mai le faalialia.

O le tauloto mai le Tusi Paia o le asō, ua taʻu mai ai ia i tatou, o le fa’amaualuga e oo mai ai le māasiasi, ae o le fa’amaulalo e maua ai le atamai. E leai se tasi e mafai ona maua le poto a le Atua ae fa’amaualuga le loto. A fa’amaualuga se tagata, ua ia vala’aulia le maasiasi e asiasi mai ia te ia. E muamua le fa‘amaualuga i le malaia; e muamua fo‘i le loto fa‘asiasia i le pa‘ū.(Faataoto16:18). Ae o le tagata loto maulalo, o le a fiafia i le fa’asaoina ma le siitia aua o le lotomaulalo e tosina mai ai le alofa ma fa’amanuiaga a le Atua. Fai mai le  Faataoto29:23, o le fa‘amaualuga o le tagata e fa‘amaulaloina ai o ia; a o le fa‘amaulalo o le loto e maua ai le vi‘iga.

E matautia ma lamatia le fa’amaualuga aua e fa’aseseina ai tagata. I taimi e tatau ai ona latou galulue ia siitia le iloa, o le a pepelo le fa’amaualuga ia i latou e faapea, o latou ua sili. Ua latou le sailia le fesoasoani mai isi tagata, ae ua fa’aseseina e le fa’amaualuga ua lava mea iai latou ma e lē manaomia isi tagata. A faataga e tagata le faamaualuga i o latou loto, ua latou tapunia le lagi mo latou aua e tetee le Atua i e fa’amaualuga ae tuuina atu le alofa tunoa i e fa’amaulalo (Iakopo 4:6).

Le au pele, e leai se tagata e mafai ona alu mamao e aunoa ma le alofa tunoa o le Atua. Afai e te manao i le alofa tunoa o le Atua i mea uma e te faia, ia fa’aofuina oe i le fa’amaulalo ma aua lava neʻi e fa’atagaina le fa’amaualuga i lou loto.

Tatalo:
Tamā e, fa’amolemole fesoasoani mai ia te aʻu ina ia ou ofu pea i le fa’amaulalo, ina ia ou fiafia i lou alofa tunoa, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 10 NOVEMA 2025

(tusia e Pastor EA Adeboye)

Manatu Autu: O Le Pito I Tua Ma Luma o Tagata 2 (The Backstage And The Limelight 2)

Tauloto Tusi Paia –  Eperu 11:23  “O le fa‘atuatua sa natia ai Mose i masina e tolu e ona mātua, ‘ina ‘ua fānau mai o ia, auā na la iloa o ia o le tama tino lelei; na lē fefefe fo‘i i lā‘ua i le poloa‘iga a le tupu.”

‭‭

Faitauga - Tusi Paia: Mataio 2:13-21

O ananafi na ou fai atu ai na faaeaina Aniterea e galue i tua ae lē o luma o tagata. O le asō o le a faaauau atu le talanoaga i le Mataio 10:2 i le faasoa atu ini fesili na fesili ai le Atua ia te a’u a’o faagasolo le suesuega o lenei fuaiupu. Na ia fesili, ‘o le a le vaega o se fale e pito mamafa lana amo?’. Na ou tali, o le faavae. Na ia toe fesili, o le a le vaega o le fale e pito sili ona leiloa atu i le vaai? Na ou tali, ‘o le faavae’. Na ia faaauau, ‘a mu le fale, o le a le vaega e masani ona lē mu ai?’ Na ou tali, o le faavae. Na fesili mai mulimuli, ‘a agi se afā, o le a le vaega o le fale e lelea ese muamua?’ Na ou tali, ‘o le taualuga’. O le taualuga o le vaega o le fale e muamua tau iai le vaai a tagata,  a’o le vaega e muamua lelea ese i taimi o afā o le taualuga, ae o le vaega e tumau pea o le faavae. 

O tagata e fiailoa i taimi uma e ono muamua lava ona mou atu atu i taimi o afā ma faigata. O tagata faatuatua e iai le naunautaiga ia vaaia e tagata ma iloa o ni tagata e mafai ona faia ma faatino galuega ia tino mai, e tatau ona tatalo atu i le Atua mo ni loto fou ina ia aua lava nei latou aveesea muamua i taimi o afā ma faigata. 

E masani ona faalafi e le Atua tagata ina ia faasao iai latou. Ae lei amataina le galuega talai o Ioane le Papatiso, sa iai o ia i le vao seia oo i le aso na faaalia ai o ia ia Isaraelu (Luka 1:80). Na faalafi o ia e le Atua seia oo i lona taimi tonu. Ana inainā pea Ioane ma naunau ia o’o pea perofetaga uma e faatatau ia te ia na ave i lona tamā ae lei oo i lona taimi, semanu e aveesea ae lei oo i lona taimi. E oo foi ia Iesu ina ua ia afio mai i le lalolagi i lona tino tagata, e lei faalauiloa mai e le Atua i le lalolagi atoa i le taimi lena. A tatou faitau i le faitauga mai le Tusi Paia o le asō, na faatonu e le Atua Iosefa ia faalafi  ma nanā Iesu i Aikupito seia oo ina saogalemu e toe foi i Isaraelu. Na faalafi ma nātia foi e le tina o Mose o ia mo le tolu masina seia oo ina ia le toe mafai ona faalafi o ia mai ia Farao. Na ia tuu o ia i se ato ma tuu i le vaitafe o le Naila, ma na saunia e le Atua e faaaoga le auala na tatau ona fasiotia ai o ia, e faasaoina ai o ia (Esoto 2:1-10). A naunau tagata ia pito i luma i taimi uma peitai e lei faatagaina e le Atua, ua latou tatala avanoa e lamatia ai e ni ‘Herota’ ma ‘Farao’ i le ala, e faaumatia faamoemoega lelei o latou olaga. 

Le au pele e, aua e te faavaivai pe a foliga mai e te lei oo i le tulaga e iai le pule na folafola e le Atua ia te oe. E faamaoni o ia i ana Upu, o loo ia faasaoina oe seia oo i le taimi tonu. Ia e onosai ma tu’u lou faatuatua i le Atua. Tu’u i le Atua e na te faalauiloa ia te oe i le taimi tonu e tatau ai, i le suafa o Iesu, Amene. 

OPEN HEAVENS

MATALA LE LAGI MO LE ASO SA 9 NOVEMA 2025

(tusia e Pastor EA Adeboye)

Manatu Autu: O Le Pito I Tua Ma Luma o Tagata (The Backstage And The Limelight)

Tauloto Tusi Paia –  1 Korinito 1:25  “Auā o le valea o le Atua e sili lona poto i tagata; o le vaivai fo‘i o le Atua e sili lona malosi i tagata.”

‭‭

Faitauga - Tusi Paia: Mataio 6:1-6

O ananafi sa ou tā’ua o le a o’u faamatala atu ai le lesona na ou a’oa’oina mai le Mataio 10:2, o lea o le a taula’i ai la’u faamatala i le fuaiupu lenei mo nai aso o soso’o atu. Fai mai le fuaiupu, “. . e muamua Simona e igoa ‘iā Peteru ma Aneterea lona uso, o Iakopo le atali‘i o Sepetaio ma Ioane lona uso,” O le fesili, aisea na lona lua ai Aneterea i le lisi e ui na muamua la fetaia’i ma Keriso? (Ioane 1:40-41) O le tulaga masani, afai ou te faia le lisi o le au aposetolo e tusa ma le ulua’i taimi na fetaia’i ai ma Iesu, ou te faapea atu o lē na muamua o Aneterea, lona lua o Peteru ma faasolo ai lava. O ī ou te talitonu ai o loo faasolo mai e le fuaiupu lenei le au aposetolo e tusa ma le faatulagaga a Iesu. Peita’i a’o faagasolo pea le taimi, na pau i lalo le tulaga o Aneterea mai le lona lua, ma ua lē toe i ai i le au aposetolo toatolu aupito i luga. So’o se taimi e finagalo ai Iesu e afio i se tulaga faapitoa e ave lava Peteru, Iakopo ma Ioane. O le a le mafuaaga o le pa’ū i lalo o le tulaga o Aneterea?

Afai e te faitau atoa i le Tusi Paia, e te lē maua ai se faaletonu se tasi o Aneterea. O nisi o le ‘au aposetolo na i ai faaletonu; o Peteru na ia faafitia faatolu Iesu, ma Iakopo ma Ioane, na manana’o e valaau le afi e pa’ū ifo mai le lagi ia mu ai se aai atoa na lē talia Iesu (Luka 9:51-54). E ui lava i lea, e foliga mai o Aneterea na pa’ū lona tulaga. Peita’i, na faailoa mai e le Alii ia te a’u e lei pa’ū Aneterea; ae na siitia lona tulaga. Na fetalai le Alii ia te a’u ina ua faailoa e Iesu i le tina o Iakopo ma Ioane, ua na o lona Tamā e tofia i latou e nonofo i lona itu taumatau ma le itu agavale, o le uiga o lana fetalaiga, ua uma ona tofia i latou e nonofo i ia nofoa. Na toe musumusu mai le Alii ia te a’u o le tasi o ia nofoaga ua taofia mo Aneterea.

O mea e tutupu i le pito i tua, e lē o vaaia e tagata e masani ona sili atu i mea o loo ta’uta’ua ma lauiloa i luma. A o tauvā uma tagata ia tutū i le pito i luma, o le galuega moni ma ona manuia e masani lava ona maua i tua atu o mea e vaaia i luma. Atonu e te lē o silafia, peita’i o i latou e faia ma tapenaina ata tifaga e manuia, o loo i le pito i tua e le o vaaia, e masani ona totogi tetele atu ma sili ona amanaia na i lō i latou o faatinoina le ata tifaga i luma o tagata. E le aafia fo’i i latou i mea faalavelave ma le vevesi e omai faatasi ma le mamalu, ma le taualoa.

Le au pele e, aua e te naunau ia lauiloa oe e tagata ma fiafia i au mea e fai. E tatau ona ave lau faamuamua ia e faataunuuina le finagalo o le Atua mo lou olaga i so’o se mea ua ia tofia ai oe. E faamanuia le Atua e fua i lou faamaoni ma lou usitai, e lē o le ta’uta’ua poo foliga vaaia. Ou te tatalo ia faamanuia sautualasi le Atua ia te oe, e tusa ma lou pulunaunau e faamuamua i mea uma e fiafia mai ai le Atua ia te oe, e avea ma taulaga e Paia ma mālie (2 Koritnito 5:9). E le tauia e le Atua e fua i le tautaua ae fua i le faamaoni ma le usitai, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 8 NOVEMA 2025

(tusia e Pastor EA Adeboye)

Manatu Autu: E na te a’oa’o ia te outou i mea uma lava (He shall teach you all things)

Tauloto Tusi Paia –  Ioane 14:26 “A o le Fesoasoani, o le Agaga Pa‘ia lea, e ‘auina mai e le Tamā i lo‘u igoa o ia lava na te a‘oa‘o ‘iā te ‘outou i mea uma lava; e fa‘amanatu mai fo‘i e ia ‘iā te ‘outou i mea uma na ‘ou fai atu ai ‘iā te ‘outou.”

‭‭

Faitauga - Tusi Paia: 1 Korinito 2:6-16

O Agaga Paia o le faiaoga. I le upu tauloto mai le Tusi Paia o le asō, na fetalai Iesu o Agaga Paia o le a Ia a’oa’o ia te oe mea uma. A lua mafuta ma Agaga Paia, o le a Ia faapotoina oe e sili atu I le maualuga o lou a’oa’oina. Atonu tou te faitau faatasi ma nisi tagata i ni tusitusiga, peita’i e uma ifo le faitauga, e sili mamao le iloa ma le malamalama ua e maua mai ia tusitusiga na i lo o isi.

A e suesueina lau Tusi Paia; o le a fa’apupula atu e Agaga Paia le Upu a le Atua ia te oe, e sili atu I le maualuga o lou atamai. E toatele faifeau e fa’a faigata ona tutumau tagata o lana aulotu ona ua lē mafai ona o latou fafagaina tagata i le upu moni a le Atua. I nisi taimi e ‘afa ifo le faitauga e le faifeau o le tusi faitau mai le Tusi Paia mo lana lauga, ua iloa e le aulotu le lauga o le a fai, o le amataga ma le faaiuga. Pau le ala e mafai ai ona e maua se mea fou mai le Upu a le Atua i aso uma, pe a fai e a’oa’o mai Agaga Paia ia te oe. Ua na o Ia e mafaia ona avatu ia te oe fa’aaliga fou mai Afioga Paia a le Atua i aso ta’itasi.

A o’u su’esu’e i la’u Tusi Paia, e masani ona o’u faitau se mataupu atoa ona o’u fesili lea iā Agaga Paia poo fea se fuaiupu o le a ia fetalai mai ai. E masani ona Ia fa’aali mai ia te a’u le fuaiupu, ona o’u ole atu lea ia te Ia e a’oa’o ia te a’u mai lea fuaiupu ma, na te faia lava. Peita’i o le tasi aso sa ou faitauina ai le tusi o Mataio 10; ma ina ua uma na o’u faitauina le fuaiupu muamua ua o’o le faitau i le fuaiupu lona lua, na fetalai mai Agaga Paia ia te a’u, “Taofi, o le a ta talanoa i le fuaiupu e lua i le asō.” Ou te vaai atu i le fuaiupu e faapea; “O igoa nei o aposetolo e toasefulu ma le lua.” Sa o’u lē iloa se mea e mafai ona a’oa’oina mai lea fuaiupu, ma sa ou faapea; “Le Alii e, ou te lē iloa poo lē a se mea e talanoa i ai i lenei fuaiupu.” Sa fetalai mai Agaga Paia ia te a’u, “Toe faitau i ai.” Sa o’u toe faitau ma faitau. Ina ua o’u faitauina mo le taimi lona tolu, na matala mai le malamalama ma ua amata ona o’u vaai i le feau na finagalo Agaga Paia ou te iloa. O le a o’u faamatala atu taeao le fa’aaliga na fa’aali mai e Agaga Paia i le Mataio 10:2 auā e mafai ona o’u tusia ai se tusi atoa mai le fuaiupu lea e tasi.

Le au pele e, afai e te mana’o e faaopoopoina lou poto ma lou atamai i aso uma, e manaomia lou mafuta vavalalata iā Agaga Paia, o le a Ia aoao lelei ia te oe, e te matua’i ofo ai fo’i i le poto ma le atamai o le a e maua, i le suafa o Iesu, Amene.