Samoan Devotional

OPEN HEAVENS

MATALA LE LAGI MO LE ASO FARAILE 7 NOVEMA 2025

(tusia e Pastor EA Adeboye)

Manatu Autu: Tatalo o le Faafetai (Prayer of thanksgiving)

Tauloto Tusi Paia –  Salamo 50:14 “O le vi‘iga, ‘ia e faia lea ma taulaga i le Atua; ‘ia e avatu fo‘i i lē Silisili‘ese mea na e tautō ai.”

‭‭

Faitauga - Tusi Paia: Salamo 100:1-5

Tatalo

1. Faafetai le Alii e mo le meaalofa o le faaolataga e ala i lou Alo o Iesu Keriso. Faafetai mo lo’u faaolataga ma le aumaia o a’u i l malamalama. 

1. Faafetai le Alii e mo le faamagaloina o a’u agasala. Faafetai mo lou alofa mutimutivale faifaipea ia te au e ui ou te le agavaa iai i le tele o taimi. 
2. Faafetai le Alii e mo lou alofa e lē faatuaoia ia te a’u. Tusa pe ou te lē faamaoni ia te oe, e te faamaoni pea ia te a’u
3. Faafetai le Alii e, mo au folafolaga uma ia te au. Faafetai aua ou te iloa e mautinoa e oo mai lava, i le suafa o Iesu. 
4. Faafetai le Alii e, aua o loo mautū lo’u lumanai manuia ia te oe. Faafetai aua ou te iloa e te aumaia ia te au se lumanai manuia e tusa ma lou finagalo, i le suafa o Iesu. 
5. Faafetai le Alii e mo tagata uma o lo’u aiga , o a’u uo, o le auuso i la matou Ekalesia ma tagata uma i lo matou nuu. Ou te matua loto faafetai mo le meaalofa o mafutaga ma tagata. 
6. Faafetai le Alii e, mo lau tausiga ia te a’u, o meaai, fale ma mea uma ou te manaomia i aso uma. O lau afio lava ua ou maua ai le ola ma o lea ou te matua faafetai ia te oe. 
7. Faafetai le Alii e mo le faasaolotoina o a’u mai malosiaga uma o le pogisa. Ua e puipui ia te a’u mai le amioelaga i aso uma ma ou te matua faafetai ia te oe. 
8. Faafetai le Alii mo luitau ma mea faigata sa ou feagai ai i taimi ua tuanai. Le Alii e, ou te iloa e galulue mea uma lava mo lo’u lelei, ma ou te matua faafetai ia te oe aua e te aumaia pea ia te a’u le manumalo. 
9. Faafetai le Alii e, mo faitotoa uma ua e tatalaina ma avanoa ua e aumaia i o’u ala uma. Ua e faamanuia ia te a’u, ma ou te matua faafetai lava ia te oe. 
10. Faafetai le Alii e mo le galuega a lau Upu ua oo mai ia te au e ala i soo se ipu faauuina e aofia ai lenei faamalosiau o le ‘matala le lagi’. Ou te matua faafetai le Atua e, mo le tuputupu pea ma le faulai o faamanuiaga o lau Upu ua aumaia i lo’u olaga. 
11. Faafetai le Alii mo lau Upu faauuuina faapea ma le faulai o le tamaoaiga ua e foai iai matou, i le suafa o Iesu ua matou tatalo atu ai, Amene. 

OPEN HEAVENS

MATALA LE LAGI MO LE ASO TOFI 6 NOVEMA 2025

(tusia e Pastor EA Adeboye)

Manatu Autu: Iloa o Agaga Paia (Knowing the Holy Spirit)

Tauloto Tusi Paia –  Luka 1:35 “Ua tali mai le agelu, ‘iā te ia, “E afio ifo le Agaga Pa‘ia i luga ‘iā te oe, e fa‘amalumalu ifo fo‘i ‘iā te oe le mana o lē Silisili‘ese; o le mea lea e ta‘ua ai le tama pa‘ia e fānau mai, o le Alo o le Atua.”

‭‭

Faitauga - Tusi Paia: Luka 1:34-37

Ina ua ou faatoa faaolaina lava, na ou maitauina o soo se taimi lava e fai ai le valaau o le faaolataga i le lotu, e faapea lava upu a failauga, ‘o i latou e fia talia le faaolataga, agai mai i luma. O i latou e manaomia le faauuina i le Agaga Paia, e tatau ona ole atu i le Atua’. I le taimi lea , ou te lei faalogo i se aoaoga i le papatisoga a Agaga Paia ma sa ou tau manatu poo le a le uiga o le upu a le faifeau. Ua tea sina taimi ma ua ou naunau e fia inu i le Agaga Paia, ua ou fia iloa o ia, ona amata lea ona ou faitau i tusi o le papatisoga a Agaga Paia. Na oo lava i le taimi ua papatisoina a’u e Agaga Paia ma ua matua mafanafana le ma mafutaga ma ia. 

A avea oe ma uo a Agaga Paia, e leai se pa puipui  o mea e mafai ona faia e le Atua e tauala ia te oe. Ao ou faitauina le papatisoga o Agaga Paia, o le faitauga o le asō, na matua ave iai la’u faamamafa. Na fai le agelu ia Maria o le a ia fanaua se tama, ona fesili atu lea o Maria i se fesili taua “A fa‘apefea le mea nei; auā ‘ou te lē iloa se tane?” Ona tali atu lea o le  agelu, ‘iā te ia, “E afio ifo le Agaga Pa‘ia i luga ‘iā te oe, ma na faauma lana faamatalaga i upu nei, “Auā e leai lava se mea e tasi e lē mafaia e le Atua.” O la’u vaai i lea fuaitau, ua ou iloa ai, o Agaga Paia, a afio mai i o’u luga ma pule ia te a’u, ona leai lea o se mea ou te lē mafaia. 

Le au pele e, o le ola i se olaga e faapaiaina tusa pe o siomio oe e faaosoosoga ma le agasala, e te manaomia Agaga Paia. E te manaomia foi Agaga Paia ina ia suia mea e foliga e lē mafaia i mea e mafaia i lou olaga. Ina ua ou faitau i le ala na afio mai ai Agaga Paia i luga o Maria, na ou iloa ai e tatau ona mafana la’u mafutaga ma Agaga Paia ina ia mafai ona faia mea tetele mo le Atua. O le tulaga lea na ou papatisoina ai i le Agaga Paia ma ua tautala i lana gagana. Ona amata loa lea ona ia faia mea e lē masani ona mafaia aua le talaiina o le talalelei ma le faalauteleina o le malo o le Atua e tauala ia te au. 

Fai mai le Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

‭‭

A avea Agaga Paia ma au uo, e faaaupegaina oe i le mana e faia ai mea tetele ma talai atu le talalelei i tuluiga o le lalolagi. Fai sau faaiuga ina ia faia se lua mafutaga vavalalata ma Agaga Paia i aso uma. A mafana le lua mafutaga ma Agaga Paia, e leai se mea e te lē mafaia, i le suafa o Iesu, Amene. 

‭‭

OPEN HEAVENS

MATALA LE LAGI MO LE ASO LULU 5 NOVEMA 2025

(tusia e Pastor EA Adeboye)

Manatu Autu: Faalogo i le Atua 2 (Hearing from God 2)

Tauloto Tusi Paia –  Ioane 10:27 “O a‘u mamoe e fa‘alogo mai i latou i lo‘u leo, ‘ua ‘ou iloa fo‘i i latou, ‘ua latou mulimuli mai fo‘i ‘iā te a‘u.”

‭‭

Faitauga - Tusi Paia: Ioane 10:1-16

O le tauloto mai le Tusi Paia o le asō o loo faaalia mai ai, o soo se tasi o se mamoe i le lafumamoe a le Atua o le a faalogo i lona siufofoga i taimi uma. A e faalogo i le Atua, o le a ia taitai ia te oe i ou ala uma. 

I ni tausaga talu ai i le taimi o se fonotaga, sa iai se feeseeseaiga i le va o ni faifeau poo ai e palota iai i le taimi o palota mo le peresitene i Nigeria. Sa ou iai foi i le fonotaga lea ona ou faapea atu lea, ‘le au uso e, na fai atu ea le Atua o seisi o i laua ia o le a avea ma peresitene? Na fai atu ea pe oo se palota pe tumau le iuga o le palota?  Na faailoa atu ea e le Atua poo ai o le toalua lea e finagalo iai?”. Na ou fai atu pea, “o a’u la, e lei faailoa mai lava e le Atua ia te a’u. O loo ou ole atu pea ia te ia poo ai o le a avea ma peresitene, peitai e lei tali mai, o lona uiga e leiloa pe sesē a’u fesili o loo fesili atu ai i le Atua. O le a ou suia lau fesili i lenei, ‘e oo ea se palota, ma e ono talia le iuga o le palota?’. E lei leva ona maea lea fonotaga, ao faagasolo le fonotaga a faifeau, ona ou faailoa lea iai latou na auai, ua tali mai le Atua ia te a’u e faatatau i le palota. Na ia faailoa mai o se tasi o sui ia o le a manumalo peitai o le a le mafai ona faatagaina e taitai, ma o le tulaga tonu lea na tupu. O le ole ma fesili atu i le Atua i se tulaga ma faatali ia te ia e fetalai mai o le a fesoasoani lea i se kerisiano e ola e sili atu i le fememeai. 

I se tasi taeao, na ou ole atu i le Atua poo fea le auala ou te ui ai ina ia aua nei ou poloka i le auala. Na faapea mai, ‘e te lē alu ese mai le fale i le asō”. Ua amata ona ou sii mau atu i Lē na tusia, ‘Le Alii e, na e fetalai o lē e lē galue e lē tatau ona ai. O loo faapea mai foi lau upu, ‘Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u.’ Na tumau pea lana tali. Ona ou faapea atu lea, ‘ua lelei, afai e latou tulia au mai le galuega, ou te mautinoa o le a e foai mai seisi galuega’. I le taimi lea, ou te lei faalogo i le leitio, ma ou te leiloa ai o loo fouvale le malosi o le fitafita i le malo. E lei leva ae tupu se faalavelave i se aoga i luma ane o lou fale ao vevesi atu matua e piki a latou fanau. O le taimi lava lea na ki ai lau leitio ma ou faalogo i le mea ua tupu. O le siufofoga o le Atua na puipuia au mai le vevesi lea na tupu i le auala luma ane o lo’u fale. 

Le au pele e, a’oa’o lou agaga e faalogo i le siufofoga o le Atua i le mafuta lea i lona mamalu, e ala i le suesue i lana upu ma faatalitali ia te ia. E faatonu oe e lona siufofoga i ala e te ui ai, e puipui ai oe mai soo se puapuaga. 

Tatalo

Tamā, faamolemole tatala o’u taliga ina ia ou faalogo ma lagonaina oe i taimi uma, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 4 NOVEMA 2025

(tusia e Pastor EA Adeboye)

Manatu Autu: Faalogo i le Atua 1 (Hearing from God 1)

Tauloto Tusi Paia –  Mataio 3:16-17 “Ua papatisoina Iesu, ‘ona maliu a‘e loa lea o ia nai le vai, fa‘auta fo‘i, ‘ua fa‘aavanoaina le lagi ‘iā te ia, ‘ua ia iloa atu fo‘i le Agaga o le Atua ‘ua afio ifo e peiseaī se lupe, ‘ua o‘o i ona luga. Fa‘auta fo‘i, o le si‘ufofoga mai le lagi, ‘ua fa‘apea mai, “O lo‘u Atali‘i pele lenā, ‘ua ‘ou fiafia lava ‘iā te ia.”

‭‭

Faitauga - Tusi Paia: Kenese 1:2-3

O le taimi muamua na fetalai ai le Atua I le Tusi Paia, o loʻo i le faitauga o le Tusi Paia o le aso. Ina ia e malamalama i le mea e manaʻomia ina ia fetalai mai ai le Atua ia te oe, e tatau ona e suʻesuʻeina ma le totoʻa lenei mau. Ae leʻi fetalai mai o ia, sa fēgaoioi le Agaga o le Atua i luga o le fogaeleele. O lona uiga, e fetalai le Atua i taimi uma o loʻo fēgaoioi ai le Agaga Paia.

Afai e te fia faʻalogo i le Atua, e tatau ona fēgaoioi mai le Agaga Paia i lou siomaga. O le taimi lava e te iloa ai faa fēgaoioi le Agaga Pa’ia i totonu ia te oe, o le a e faʻalogo pea ia te ia. Ou te faʻalogo pea i le Atua pe a ou lauga, aua e masani lava, ae ou te leʻi alu atu i le pulelaa e lauga, ua maea ona fai viiga ma tapuaiga i le Atua le faapotopotoga mo sina taimi. A ou oo atu la i le pulela’a, e faaauau pea ona ou tapuaʻi ma viʻia le Atua. A mae’a, ma ua oo i le taimi o le lauga, ua faatumulia le nofoaga atoa i le Agaga o le Atua, ma amata ona Ia fetalai mai ia te aʻu.

O faifeau e lē faalogo i le Atua, o le a faigata aua o le faalogoina o se upu mai le Atua e faigofieina ai le lauga atu. O le a faaali atu e le Atua ia te oe mea e tatau ona e faia ma mea e lē tatau ona e faia, ina ia lē maumauina lou taimi ma au punaoa. Mo se faʻataʻitaʻiga, afai ou te manaʻo e faia se sauniga tele  e talai ai le talalelei i se nofoaga, ou te fesili atu ia te ia, “Tamā, e tatau ona ou alu?” Afai e fetalai mai, “Leai,” ona ou iloa lea, e maumau loʻu taimi pe a ou alu i ai. E iai nisi faifeau e o atu ma lauga i nofoaga eseese e aunoa ma le faalogo i le taitaiga a le Atua. Peitaʻi, a latou mafatia i mea faigata ma sauaga e le moʻomia, ona latou fai mai lea o loʻo sauaina i latou mo Iesu. O nisi e faapea mai ona o loo fai mai le Tusi Paia e talai le talalelei i nuu uma, o le a latou faatūina se lotu i se nofoaga, e aunoa ma le fesili i le Atua ma e leʻi faʻatonuina faapitoa i latou e le Atua ia faia. O le iʻuga, atonu o le a latou le maua le tupe e manaʻomia e faʻatautaia ai le Ekalesia ma amata loa ona latou saʻili tagata e mafai ona latou faʻaogaina e maua ai ni a latou tupe.

Le au pele, o le faʻalogo i le Atua ma le usitaʻia o lona siʻufofoga o le a taofia ai pea oe i le totonugalemu o ana fuafuaga ma lana tausiga. E tusa lava poo a faigata, afai lava o loʻo e galue e tusa ma lona finagalo, o le a Ia tauaveina pea oe seia faataunuuina. O le filiga faifaipea, e faatupuina se siosiomaga mo le Atua e galue ai i lou olaga, ma e na te taʻitaʻi pea oe i tulaga pito maualuga o lona alofa tunoa ma lona mamalu. E fetalai pea le Atua ia te oe pe a e iloa faa fēgaoioi lona Agaga Pa’ia i totonu ia te oe, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 3 NOVEMA 2025

(tusia e Pastor EA Adeboye)

Manatu Autu: O le pule  i le taimi nei (The current dispensation)

Tauloto Tusi Paia –  Ioane 16:14 “O ia lava e vivi‘i mai ‘iā te a‘u, auā e maua e ia mai ‘iā te a‘u, ma fa‘ailoa atu ai ‘iā te ‘outou.”

‭‭

Faitauga - Tusi Paia: 1 Ioane 5:5-8

Na ou talanoa atu ananafi i le taimi o le pule a le Tamā i le feagaiga tuai, na faamasinoina tagata ona o a latou agasala i le taimi e tupu ai. O le upu  pule i le faatulagaina lea, o lona uiga o le malo o loo pulea se vaega. O le malo o le Atua le Tamā i le lalolagi na amata mai i le aso Penetekoso. O le malo o le Atalii e mo le afe tausaga ( Faaaliga 20:1-4). O le a iai le filemu tele i lea vaitaimi aua o le a pulea e le Perenise o Perenise. O le taimi nei, o loo tatou iai i le malo o Agaga Paia, na amata mai i l e aso Penetekoso ma o loo iai pea seia oo mai i le asō. 

O le manuia i le taimi o ia malo, e tatau ona e malamalama ma usitai i e pule. O Lē o loo pulea i le taimi nei mea e tutupu i tagata o Agaga Paia. O lona uiga, o le manuia i mea uma, e tatau ona e iloa le Agaga Paia ma ia mafuta vavalalata ma ia. O le mafuta vavalalata ma Agaga Paia e lē faapea  o le a e tuua ai i lalo pe lē amanaia foi le Atalii poo le Tamā. I le upu tauloto mai le Tusi Paia o le asō, na fetalai Iesu o le Agaga Paia e viia o ia, ma faailoa mai iai tatou mea uma e faatatau ia te ia. O le taimi e te mafuta vavalata ai ma Agaga Paia, e te vivii i le Atua le Tamā i le auala e tatau ai, e te avatu le viiga i le atalii i le auala tonu ma e suesue i le Upu a le Atua i le ala tonu. A avea oe ma uo a Agaga Paia, e avea foi oe ma uo a le Tolutasi Paia. E mafai ona e mafuta vavalalata ma Agaga Paia i le tautala i gagana eseese faifaipea ma ole atu ia faatumuina oe. 

E taua le maitau mai, o le mafai ona faia o vavega, e lē o se faamaoniga lena o le tagata o loo mafana lana mafutaga ma le Agaga Paia. Fai mai le Kalatia 5:16-17, o le tino ma le agaga e feteenai. E mafana le mafutaga a le tagata ma Agaga Paia pe afai ua lē mafai ona savali i le tino ae ua faatonu e le Agaga. O tagata o loo mafuta ma lea tagata e tautino atu pe a vaai atu o fua mai fua  o Agaga Paia i o latou olaga. Na fetalai Iesu i le Mataio 7:16-29, e te iloa le laau i ona fua. Afai e moni o lau uo o Agaga Paia, e fua mai ia te oe fua lelei e faamaonia ai le lua mafutaga vavalalata ma ia. 

Le au pele e, ia osia se lua mafutaga vavalalata ma Agaga Paia, e na te puipui ma faasaoina oe. E na te faamautinoaina e te manuia i mea uma e te faia, i le suafa o Iesu, Amene. 

OPEN HEAVENS

MATALA LE LAGI MO LE ASO SA 2 NOVEMA 2025

(tusia e Pastor EA Adeboye)

Manatu Autu: O le Tolutasi Paia (The Trinity)

Tauloto Tusi Paia –  2 Korinito 13:14 “Ia ‘iā te ‘outou uma lava le alofa tunoa o le Ali‘i o Iesu Keriso, ma le alofa o le Atua, ‘atoa ma le mafuta fa‘atasi ma le Agaga Pa‘ia. Amene.”

‭‭

Faitauga - Tusi Paia: 1 Ioane 5:5-8

E toatele tagata e faigata ona malamalama i le uiga o le Tolutasi Paia. Fai mai le Tusi Paia I le 1 Ioane 5:7; o le Tamā, o le Upu - Iesu e tusa ma le tusi o Ioane 1:14; ma Agaga Paia, e tasi. E tasi i latou, ae tolu itutino eseese. O le a o’u faaamatala faapenei; o a’u o le tagata e toatasi e igoa iā Adeboye, peita’i e mafai ona o’u faaalia ese a’u i ni tulaga eseese e tutupu. Fa’ata’ita’iga, afai e ta’e se ipu mafolafola māta’eta’e i lo’u toalua, o le a iloa a’u iā Adeboye agamalū; o le a o’u tautala lemu ia te ia ma fa’amautinoa o lo o saogalemū o ia. Peita’i afai o lo’u atalii, e mafai ona o’u Adeboye ita tele, auā atonu ou te ita i lo’u atalii ona o le faatamala. O a’u o le tagata e tasi peita’i o le a o’u faaalia atu o’u ituaiga tagata eseese fuafua i le tulaga o manaomia i mea ta’itasi e tutupu.

E tasi le Atua, peita’i e filifili o Ia e faaalia ia lava i ituaiga eseese e tolu. O le vai e mafai ona liusuavai, ausa pe malō (liu aisa) e fua i suiga o le fua o le vevela. I le tulaga lava lea, o le Atua e toatasi lava Ia, ma e pule lava Ia pe a finagalo e fa’aalia mai ia lava o Agaga Paia pe a manaomia, o le Upu pe a alagātatau, ma le Tamā pe a manaomia. E tutusa lelei uma ia faaaliga, e lē itiiti ifo le tulaga Atua o lesi faaaliga i le isi, faapei o le aisa poo le ausa e lē ese ma le vai pe a liusuavai.

O le Atua le Tamā o le itu fa’atamā o le Atua. Peita’i e faapei o Adeboye le tamā sa ou faamatala i le parakalafa muamua, e mafai ona ia sauā i lona tulaga lenei, I le taimi o le Atua le Tamā i le Feagaiga Tuai, sa faamasinoina tagata i le taimi lava e agasala ma sesē ai. O le Atua le Alo, o Iesu Keriso lea, na afio mai i le tino, e pei ona fai mai ai le Eperu 4:15, e i ai ona lagona faapei o i tatou ma o Ia e tumau ananafi, o le asō e o’o fo’i I le faavavau (Eperu 13:8). O Ia ua sili ona silafia o tatou lagona aua sa ui i faaosoosoga o loo tatou ui ai nei, ma o loo fautua i le Tamā mo i tatou (1 Ioane 2:1). O le Atua le Agaga o le itu foafoa / fatufatu lea o le Atua. O Ia o loo afio i totonu ia te oe e faataunuu mea tatou te lē mafaia ona fai (Roma 8:11, Filipi 4:13, 1 Korinito 3:16, I Ioane 2:27, Ioane 14:26).

Le au pele e, o lou iloa o le Tolutasi Paia o le a e maua ai le malosi e te soifua ai i luga atu o tapula’a. E le gata i lea, ina ia e soifua fiafia i le atoatoaga o le Atua, e te manaomia lou iloa o Ia o le Tamā, o le Alo ma Agaga Paia. Ou te tatalo o le a e maua le atoatoa o le Atua le Tamā, le Atua le Alo ma le Atua le Agaga Paia i lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 1 NOVEMA 2025

(tusia e Pastor EA Adeboye)

Manatu Autu: Fautuaga Fa’ale Atua (Godly Counsel)

 Tauloto –  Faataoto 19:20 ‘Ia e fa‘alogo i le fa‘atonu mai, ma e talia le a‘oa‘o atu; ‘ina ‘ia e poto ai pe a o‘o i ou tausaga amulī.'

Faitauga - Tusi Paia: Esoto 18:13-26

I le 2 Tupu 5:1-14; o Naamanu o le alii e pule i ‘au a le tupu o Suria, na alu iā Elisaia ia fa’amamāina o ia mai le ma’i lepela. Na faatonu e le perofeta Naamanu I le mea e fai e malolo ai peita’i na manatu Naamanu o se tulaga maualalo tele lea mo ia - e alu e tofu faafitu i le vaitafe o Ioritana, o se vaitafe na manatu e sili atu ai ona lelei vai o lona nuu o Tamaseko. Na liliu o ia ma le ita tele o le a toe fo’i i Suria, a ua fautua i ai se tasi o ana auauna ia usitai i le fa’atonuga a le perofeta. Faafetai i le Atua na faalogo Naamanu i le fautuaga a lana auauna ma fai e tusa ma le upu a le tagata o le Atua, ona fo’i mai ai lea o lona tino tuai pei o le tino o le tamaitiiti, ua mamā fo’i o ia. Pe ana fai na te lē talia le fautuaga faigofie a lana auauna, semanū e uma a lona ola o ma’i lepela. Atonu o le vavega sili o lou olaga o loo fusia faatasi ma le faalogo ma usitai i fautuaga fa’ale Atua. E taua le talia o so’o se fautuaga fa’ale Atua, poo lē a lava le matua o le soifua poo le tulaga o le tagata e ala mai ai le fautuaga.

Fai mai le Faataoto 11:14 'A leai sē pule, ‘ua malaia le nu‘u; a o le to‘atele o faipule, e saogalemū ai. '

I le tusi faitau mai le Tusi Paia o le asō, na alu Ietero i le vao e asi Mose le tane a lona afafine. I le asiasiga a Ietero, na ia maitauina ai le faamasino toatasi e Mose o so’o se faafitauli e tula’i mai i le potopotoga a le fanauga a Isaraelu, mai i le taeao e o’o lava i le afiafi, ma e uma ifo le aso ua mafatia ma lē lavā lava ia. Ona fautua lea o Ietero ia Mose, ia filifili ‘ai le nuu atoa ni ta’ita’i o vaega eseese, ma ia latou faamasino atu i le nuu i aso uma lava. E ui e le’i vaai Ietero i le afi mumū i totonu o le laau talatala sa vaai i ai Mose, na faalogo lava Mose iā Ietero le tamā o lana avā na auala mai ai le fa’atonuga a le Atua mo ia.

Fai mai le Iakopo 4:6 ‘ua foa‘i mai e ia le alofa tunoa e sili; o lea ‘ua fa‘apea mai ai, “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo.”

O le loto maulalo poo le agamalū o se tulaga manaomia e maua ai le alofatunoa o le Atua. E te manaomia le loto agamalu e faalogo lelei ai pe a fetalai mai le Atua e auala mai i se tasi, ma ē talia lelei ai le finagalo o le Atua mo oe. Na iloa Mose i lona agamalū, e sili lava i tagata uma o le lalolagi, (Numera 12:3), ma o lona agamalū lea na mafai ai ona ia talia fautuaga mai tagata e foliga e sili atu ai lona tomai ma le malamalama fa’aleagaga. Po’o le a le maualuga e te o’o i ai, e finagalo le Atua e tumau pea lou agamalū. Ole i le Atua e foai mai ia te oe se loto agamalū e talia ai lana a’oa’i mai e ala i so’o se tagata po’o se auala e finagalo e fa’aaogā.

Tatalo

Tamā faamolemole aumai ia te a’u le loto agamalū ia ou talia ai ma gaua’i i so’o se fa’atonuga e te aumai; po o le a lava se auala poo se tagata e te finagalo e auala mai ai, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 31 OKETOPA 2025

(tusia e Pastor EA Adeboye)

Manatu Autu: Fai atu i le Mauga (Say to the mountain)

Tauloto Tusi Paia –  Mareko 11:23 “auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.”

‭‭

Faitauga - Tusi Paia: Kenese 1:1-3

Na faia e le Atua le lalolagi i lona fetalai atu lea ia faia, e pei ona tatou faitau ai i le Kenese 1. Na soona nunumi le lalolagi, sa gaogao ma pouliuli. I le ogatotonu o lenei fenumiai, na fetalai le Atua ia malamalama e ufitia ai le pogisa, o le amataga lea o le foafoaina o mea uma. Fai mai le Eperu 11:3 “O le fa‘atuatua ‘ua tatou iloa ai na faia mea uma i le afioga a le Atua; na faia fo‘i mea ‘ua va‘aia i mea ‘ua lē aliali mai.”

‭‭

O mea uma o loo tatou vaai atu iai, na faia i le mana o le Upu a le Atua. E iai le mana e faia mea i le Upu a le Atua. O le mafuaaga lea, afai o oe o se afafine poo se atalii o le Atua, ae oo mai luitau i ou ala, e te lē tomumu ma faaseā. E te lē faasea, ae tago e faaaoga le Upu a le Atua, e tuu i ou fofoga ma fai atu ia tino mai. Poo le ā lava luitai ma mea faalavelave o loo taofia le taunuu ma tino mai o le finagalo o le Atua i lou olaga, e finagalo le Atua ia e fai atu ma faatonu e ō ese ma ou ala. 

Fai mai le Sakaria 4:7 “O ai ‘ea oe le mauga tele e, e fa‘alaugatasia oe i luma o Serupapelu; na te ‘aumaia fo‘i le ma‘a tulimanu aupitoaluga, o lo‘o ‘alalaga, ‘Le alofa tunoa e! ia ‘iā te ia le alofa tunoa.”

O le pule e fai atu ai i le mauga e lē faapea e nā o faifeau e mafai ona faia. Peitai e foai mai i soo se afafine poo se atalii moni o le Atua. O lona uiga, afai o oe ose afafine poo se atalii o le Atua, ma e faatonu le mauga o loo faalavelave i le finagalo o le Atua mo lou olaga ia alu ese, e latou te usitai. Fai mai le Tusi Paia i le Filipi 2:9-10, a ta’uta’u le suafa o Iesu, o tulivae uma i le lagi, le lalolagi ma lalo o le lalolagi, e toatuli. 

O nisi kerisiano e fai atu i le mauga, peitai e lē sa’o upu o fai atu ai. E latou te lē faatonuina le mauga e alu ese, ae latou te aioi mo le alofa mutimuti vale ma tomumu. A fetalai mai le Atua e te fai atu i le mauga, e finagalo e te tautala atu iai. Peitai e tatau foi ona e lafoai le loto masalosalo ina ia iai le mana i au upu pe a e fai atu i le mauga. Fai mai le Iakopo 1:6 “A ‘ia ole atu ma le fa‘atuatua, ‘aua lava ne‘i māsalosalo; auā o lē māsalosalo e tusa ia ma le peau o le sami ‘ua sousou i le matagi ma felafolafoa‘iina.”

Le au pele e, o le masalosalo e faoa le pule ma e lē tatau ona e faataga e nofo i lou loto. Talitonu i le pule atoatoa ma le mana o le Upu a le Atua e aunoa ma le masalosalo, ona e vaai lea e leai se mauga e tu i ou luma. Aua le tomumu pe a oo mai luitau ma mea faigata i lou olaga, ae ia e tautala ma fai atu iai le finagalo o le Atua e tusa ma i latou, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 30 OKETOPA 2025

(tusia e Pastor EA Adeboye)

Manatu Autu: Tamoe ese mai ē fouvale (Run from Rebels)

Tauloto Tusi Paia –  Salamo 68:6 “O le Atua na te fa‘atagatāina ē ‘ua ausage; na te ‘aumaia ē ‘ua noanoatia i le mea e manuia ai; a o ē fouvale, latou te nonofo i le nu‘u naumati.”

‭

‭‭

Faitauga - Tusi Paia: Numera 16:1-35

O le faitauga mai le Tusi Paia o le asō o se tala faanoanoa ae tele aoaoga e maua mai ai. O se tala faanoanoa ona o le toatele o tagata na maliliu ae sa mafai lava ona foia, ae ua o atu ‘au faatasi ma le au fouvale na faasagatau atu ia Mose, le tagata o le Atua. Na amata le faitauga o le Tusi Paia ia Koru ma ona uso e toalua o Tatano ma Apiramo na o mai faatasi e fesiligia Mose. A e suesue lelei i le tala, e te iloa ai na amata le fouvale ia Koru aua o le tele o fuaiupu o le mataupu, o upu na faaaogaina o ‘Koru ma i latou’. E na o le toatasi le tagata na amata ona fouvale, ae na fasiotia ai le 15,000 o tagata. E leaga ma faaumatia le fouvale. 

Sa ono ese le iuga o le tala pe ana faapea o le toatele o tagata na taua i le mataupu lea, sa teena le auai atu i le fouvale ina ua fesootai atu i latou. Sa tatau ona latou fautua ia te ia e aua le fouvale ae ia faaaloalo ia Mose. E mafai e le Atua ona fetalai atu i soo se tagata, peitai e na te le filifilia so’o se tagata e taitai i ona tagata pe avea foi ma taitai o sana faaolaolaga. Ana malamalama Koru i le ofisa lea na tulai ai Mose, semanu e na te lē faatupuina le fouvale e tetee ai ia te ia. 

O le asō, e iai foi le au fouvale i totonu o le tino o Keriso. E latou te manatu e tele atu lo latou iloa i taitai faaleagaga, na tofia e le Atua e taitai iai latou, ma latou talitonu foi o latou e tatau ona tutū i le pito i luma i mea o loo faia e le Atua. Afai e lei valaauina oe e le Atua i le ofisa lena i lana Ekalesia, aua e te taumafai e tuu i lalo i latou o loo galulue ai i ia ofisa. E le gata i lea, aua e te taumafai e galue i se ofisa e lei valaauina ai oe e te galue ai aua e te ono lamatia ai. Na maua le tupu o Usia i le lepela aua sa ia taumafai e galue i se ofisa a le Atua peitai e lei valaauina ai o ia (2 Nofoaiga Tupu 26:16-21). A fouvale se tagata i le Atua i le faatulagaina o pulega, e puapugatia i latou i le olaga nei.

O loo tatou ola i se augatupulaga e manatu ai talavou ua lava ma totoe faaaliga mai le Upu a le Atua e latou te faia ai faamatalaga e tetee ai i taitai faaleagaga i totonu o le Ekalesia. O nisi ua toatele tagata e mulimuli iai latou i luga o Upega Tafailagi ma ua latou manatu ai, ua latou ausia se tulaga maualuga i le faaleagaga ma mafai ai ona pule saoloto i faamatalaga e lafo. O le tautaua i luga o upega tafailagi e lē taitai tutusa ma le pule i le faaleagaga. 

Le au pele e, a iai ni ‘au fouvale i lou siomaga, tamoe vave ese mai iai latou ina ia aua nei e aofia i lo latou faamasinoga. E le gata i lea afai ua e tautala ma le lē mafaufau i so’o se tagata ua tofia e le Atua ma avatu iai le pule e taitai ai i le Ekalesia, salamo loa. O le fouvale e matua lamatia ma e lē lelei lona iuga i se tagata, i le suafa o Iesu, Amene.

OPEN HEAVENS

MATALA LE LAGI MO LE ASO LULU 29 OKETOPA 2025

(tusia e Pastor EA Adeboye)

Manatu Autu: Manumalo i lona suafa (Victory in His Name)

Tauloto Tusi Paia –  Salamo 20:1 “A fa‘afofoga mai le ALI‘I ‘iā te oe i le aso o le puapuagā, ‘ia fa‘amamaluina oe i le suafa o le Atua o Iakopo.”

‭‭

Faitauga - Tusi Paia: Salamo 118:6-12

O le igoa o se tagata e aafia ai lona lumanai. Mo se faataitaiga, na faaigoaina Mose i le Esoto 2:10 aua sa aumai mai le vai. I lona olaga atoa, sa fetaiai ma le tele o mea i le vai. Na faaaoga e le Atua e faia le tele o vavega i le vai e aofia ai le liliuina o le vai mamā i le vai suatoto (Esoto 7:20), vaeluaina le sami (Esoto 14:21), liliuina le vai oona i le vai mai (Esoto 15), ma aumai le vai mai le papa (Esoto 17). 

E taua igoa, o le mafuaaga lea e toatele tagata na suia e le Atua o latou igoa ina ia taunuu faamoemoega manuia o latou olaga. Fai mai lo’u tina ao agai atu i le faifeau e faamau lo’u igoa papatiso, o le igoa sa i lona mafaufau o Elisaia. Peitai e oo atu i le faifeau ua galo, ona fai lea i le faifeau e faaigoa ia Enoka. Ina ua ia ta’u mai ia te au lea tala, na ou fai lea iai, o le a ou taofi pea igoa e lua, Elisaia na maua le faalua o le faauuga ma Enoka, o le tagata na savavali ma le Atua. 

O igoa o tagata e taua i o latou lumanai manuia, peitai e iai le suafa e sili i suafa uma lava, ma o lea suafa o Iesu. I le Filipi 2:9-11, fai mai le Tusi Paia; “O le mea lava lea ‘ua matuā fa‘aeaina ai o ia e le Atua, ma foa‘iina atu ai ‘iā te ia o le suafa e silisili i suafa uma lava. ‘Ina ‘ia to‘otuli o tulivae uma lava i le suafa o Iesu, o ē o i le lagi ma ē o i le lalolagi, ma ē o i lalo o le lalolagi,”

I le Salamo 118:10-13, na faailoa e Tavita le mealilo o lona manumalo. Fai mai a siosio mai nuu uma e osofai ia te ia, e na te faaumatia i le suafa o le Alii. E malamalama lelei i le malosiaga ma le matautia o le suafa o le Alii. 

Le au pele e, o iai se mea o e puapuaga ai ao oe o se atalii poo se afafine o le Atua? E iai sona igoa? A iai, ou te faamalo atu ia te oe aua ua e faaumatia ina. A iai lava se igoa, e iai le igoa e sili atu ai. Tusa pe le mafai e fomai ona iloa le mafuaaga o lo’o e tigaina ai i lou tino, ma faapea mai, i latou suesuega e leai se mea o iloa, o le igoa lena, ma afai e te faatuatua i le suafa o le Alii, e te maua le manumalo. Valaau i le suafa o le Alii i le asō, aua e na te avatu le manumalo ia te oe i soo se mea o e puapuaga ai. E te faatuatua ea ma le atoatoa i le suafa o Iesu? I le suafa o Iesu, Amene.