Samoan Devotional

OPEN HEAVENS

MATALA LE LAGI MO LE ASO TOFI 27 NOVEMA 2025

(tusia e Pastor EA Adeboye)

Manatu Autu: E le mafai ona e suia se tagata  (You cant change anyone)

Tauloto Tusi Paia: Ioane 16:8 Ae peita‘i a‘u nei, o le tele o lou alofa, ‘ou te alu atu ai i lou fale, ‘ou te ifo i lou malumalu pa‘ia ma le mata‘u ‘iā te oe.”

‭‭

Faitauga - Tusi Paia:  1 Korinito 2:1-5

I le 1 Korinito 3:6, na faapea mai Paulo, o ia na totoina, na fasūsūina e Apolo, ae le Atua na te faatupuina. O Agaga Paia e galueaina le agaga o le tagata, e salamo mai agasala, ma avea ma sui o le tino o Keriso.

Le au pele e, tusa poo le a lelei o lau tautala ma upu, e lē mafai ona e faaolaina se agaga. Afai o le lelei o le tautala ma upu, e manaomia e liliu ai tagata i le Atua, o le 3000 o tagata na faaolaina i le Galuega 2, semanu latou te lē ole atu i le Atua ma le salamo, aua o Peteru o se faifaiva masani, ma o ana upu, e lē ono teuteua. Peitai ina ua afio mai Agaga Paia i ona luga, o tagata na faalogo ia te ia, na feliuaina. Ina ua latou faalogo i lana lauga, na lagonaina i o latou loto ma fesili, poo le a le mea e tatau ona latou faia ( Galuega 2:37). O Paulo o se tagata a’oa’oina lelei, na ia iloa, e lē mafai ona ia faaolaina se tagata ma o le lelei o ana upu, e lē mafai o a maluelue ai se loto o se tagata. O le mafuaaga lea na ia faapea mai ai, i le faitauga mai le Tusi Paia o le asō, o ana upu ma talaiga, e le faia i upu malie mai le poto o tagata ae faia i le faasino mai e le Agaga ma le mana. 

Na o Agaga Paia lava, e feliuaina agaga o tagata, e mafai e na o ia lava, ona aumai le malamalama, i le pogisa, i le agaga o le tagata agasala. Fai mai le 2 Korinito 4:4 o le atua o lenei lalolagi, e na te faatauasoina mafaufau o tagata lē faatuatua. E lē manao satani e faaolaina tagata, ma e na te faatauasoina latou mata ma taofia i latou mai le talia o Iesu. O le mafuaaga lea, e te manaomia ai Agaga Paia, pe a e alu atu e talai. E na te mafai na o ia, ona faaumatia pepelo a satani i mafaufau o tagata. A aunoa mai ia, o lau talaiga, ua nā o upu. E ono patipati tagata ona o upu mālie e te faaaogaina, peitai e lē suia o latou loto ma tumau i le maaa i le agasala. Peitai a faatumulia oe ia Agaga Paia, e lē tele ni upu e te faaaogaina ae lafoai ola ma loto o tagata ia Iesu. 

Le au pele e, e le mafai ona e alu i le fale o le tagata malosi seiloga e muamua ona e saisai ia te ia (Mareko 3:27). O le saisai o le tiapolo, ma taofia ana galuega i ola o tagata, e te manaomia le mana o Agaga Paia. Ae e te lei talai atu i tagata, ole atu ia Agaga Paia ia galue i o latou loto. O ia o lou fesoasoani sili, ma o loo i totonu ia te oe, e fesoasoani ia te oe, ia avea ma tagata lelei tele i le manumaloina o agaga. Ou te tatalo, ia galue atu Agaga Paia ia te oe ina ia aumai le tele o agaga leiloa i le malo o le Atua, i le suafa o Iesu. E te manaomia le mana ma le fesoasoani a Agaga Paia e avea ma molimau ola mo Iesu Keriso, Amene. 

OPEN HEAVENS

MATALA LE LAGI MO LE ASO LULU 26 NOVEMA 2025

(tusia e Pastor EA Adeboye)

Manatu Autu: Ia pupula atu lou malamalama (Let you light shine)

Tauloto Tusi Paia:Mataio 5:16 “Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.”

Faitauga - Tusi Paia:  Ioane 9:1-7

 A fai mai tagata e iai se mea e lelei ai i latou, e manaomia se faamaoniga i le mafai lea ona latou faatino ma le matuā lelei. A latou faia, o le a amanaia e tagata. Le au pele e, o le tomumu pe a lē amanaia e tagata lau taleni, e matua leai se mea e maua ai. Ao le mea e tatau ona faia, galue ia iai faamaoniga o mea e mafai ona e faia, i le mafai e gata ai tusa poo le a le laitiiti. E lē umi ae iloa atu e tagata lou malamalama ma o mai i le susulu atu o lou tulai mai (Isaia 60:1-3). 

E mafai ona e talenia, peitai a e lē galue malosi ma faaaoga lau taleni, e le mafai ona iloa e tagata. O le upu tauloto mai le Tusi Paia o le asō, ia pupula atu lo ‘outou malamalama ‘ina ‘ia iloa e tagata la ‘outou amio lelei, ma viia ai lou Tamā o i le lagi. Na e maitauina le upu ‘galuega’ (poo le amio) i le na fuaiupu? E tatau ona e galue mo tagata ina ia latou iloa mai oe. Na faaali mai e se tagata se nusipepa ma tala o loo tusia ai o loo ulagia e se tusitala vavega o loo faia e le Atua i lo’u olaga. O le tagata na faaalia mai ia te au le tala mai le nusipepa ua faapea mai, ‘lo’u tamā e, o le a lau tali iai?’ Na ou fai iai e leai sau tali iai. E leai ni au tala e fai ini upu ulagia ona o lo’o ou pisi tele e fai le galuega a le Atua, e le mafai ona faalavelave ia te au ia mea laiti. 

O le faitauga mai le Tusi Paia o le asō o loo faamatala ai se tala o se tamaloa na fanau mai o tauaso. A’o finau le au soo poo le agasala a ai ua mafua ai le tulaga tauaso o le tamaloa, na toe faapupula e Iesu iai latou le tulaga taua, ma ua ia faapea atu iai latou, “E tatau ‘ona ‘ou faia galuega a lē ‘ua ‘auina mai a‘u, manū o ao; a o‘o i le po, e lē mafaia e se tasi ‘ona galue ai.” Ioane‬ ‭9‬:‭4‬ ‭

Ona ia feanu lea i le ‘ele‘ele ma faia le palapala i le feanuga, ‘ua nini mata o le tauaso i le palapala ma faatonu e alu e mulumulu i le taelega i Seloa,  na toe foi mai le tamaloa tauaso ma ni mata fou. Na fealuai Iesu e faia le galuega a lona tamā i le taimi atoa o lana galuega i le lalolagi, sa matua pisi e faia galuega lelei ma o soo se mea na alu iai, na amanaia ma iloa e tagata ma ua mulimuli ia te ia. 

Le au pele e, a e fealuai e faia le galuega a Lē na auina mai oe, e te faapei o se taulaga i luga o le mauga e lē mafai ona natia, o se moli i luga o le tuugamolī e avatu le malamalama i le fale (Mataio 5:14-15). E ono le fiafia tagata i le fausaga o se matauila, peitai e lē mafai ona e tuuesea lona taua. Afai e te manao ia e talafeagai pea e lē mafai e tagata ona faia se mea e aunoa ma lou sao, ia pupula atu lou malamalama i le taulai lea o lau faamuamua i le faia o le galuega a le Atua ua ia tuuina atu i ou lima. O e faatagaina le pupula atu o lou malamalama e faaaogaina ai meaalofa ua tuuina atu ia te oe? I le suafa o Iesu, Amene. 

‭‭

OPEN HEAVENS

MATALA LE LAGI MO LE ASO LUA 25 NOVEMA 2025

(tusia e Pastor EA Adeboye)

Manatu Autu: Fataga latou e felelei (Let them fly)

Tauloto Tusi Paia:Ioelu 2:28 “Mulimuli ane, e i‘u ‘ina ‘ou liligi ifo ai lo‘u Agaga i luga i tagata uma; ona perofeta ai lea o ‘outou atali‘i ma o ‘outou afafine, e fai miti o ‘outou toeaina, e iloa fa‘aaliga e o ‘outou taulele‘a.”

Faitauga - Tusi Paia:  Numera 11:10-29

 I le tusi faitau o le Tusi Paia i le asō, na ave e le Atua se vaega o le agaga sa i luga o Mose ma tuu i luga o toeaina e toʻa 70 aua ua faitio ua mamafa tele le avega o le taʻitaʻiina o le fanauga a Isaraelu. Ina ua amata ona fai perofetaga e le au toeaina e 70, na sau se tauleʻaleʻa ma logo Mose e iai ni alii se toʻalua e lē vaega ma i latou o loo faia foi perofetaga. Ina ua faalogo atu Iosua i lenei mea, na ia fai atu ia Mose e taofi i laʻua. Peitai, na tali atu Mose e lē afaina pe afai e tuu e le Alii Lona Agaga i luga o ona tagata, aua o lona finagalo tonu lea. O Mose o se taʻitaʻi moni, ma o taʻitaʻi moni e faatagaina o latou so’o e felelei.

Na fesili atu se tasi i se faifeʻau, "Se a le mafuaaga e te le a’oa’oina ai le papatisoga o le Agaga Paia i totonu o lau aulotu?" Na tali le faife’au, "Aua afai latou te mauaina le mana o Agaga Paia, o le a sili atu la latou tausinioga nai lo matou, latou faifeʻau." Na ou ofo i lenei tali aua o laʻu tatalo, ia sili atu laʻu fanau ia te aʻu. O taimi uma ou te tatalo ai mo faifeʻau o le RCCG, ou te ole atu i le Atua ia fa’aluaina le faauuga i loʻu ola i luga iai latou, aua a taunuu, o le a sili atu ona faigofie laʻu galuega.

O se faʻataʻitaʻiga, a aumai se tino maliu i le falesa ina ia toe faaola, e le matagofie ‘ea pe afai e mafai e se tagata galue faasino nofoa  ona toe faatū le tagata oti e toe ola mai e aunoa ma loʻu faatinoina po o le faia o se galuega e seisi faifeʻau. 

O le tele o faifeʻau e toetoe lava a latou faia mea uma i totonu o a latou ekalesia ona ua latou manatu e na o i latou lava e mafai ona feagai ma ia vaega, o ia faifeʻau e iʻu ane ua matua pologa ai ae e lē manaomia. E faapefea ona faatupuina e le Atua le Ekalesia pe afai e lē taumafai faifeau e atiae ia latou e auauna i totonu o le galuega? A ole atu faife’au I le Atua e avatu le mana i a latou Ekalesia, ma ua faatumuina tagata i le afi mo le Atua, o le a tupu se toe faʻaolaolaga tele, ma o le a agaʻi i luma le galuega. E ui e moni a maua e tagata uma o le aulotu se vaega o le mana o le Atua, atonu o le a latou fememea’i ma lagona le fiu e faalogologo i lauga a le faife’au, peitai o le faifeʻau atamai, e na te le toe vavaoina i latou. A’o le mea e tatau ona fai, e tatau i faifeʻau ona aoaoina i latou ma tuu i ni nu’u fou ina ia mafai ai ona latou taitaiina isi tagata i le faauuga ua aoaoina ai i latou. Ioe, atonu latou te faia ni mea sese, peitai a maua le taʻitaʻiga a le faifeʻau ma le fesoasoani a le Atua, o le a manuia.

Le ‘au pele, afai o oe o se taʻitaʻi i so’o se tulaga, saili le tuputupu aʻe ma aoaoina lelei tagata o lo’o i lalo o lau taʻitaʻiga aua o le a faafaigofie ai lau galuega. E le gata i lea, a o’o ina aoaoina lelei i latou, faataga i latou, e felelei! O taʻitaʻi moni e sai’ili auala e aoaoina malosi tagata o lo’o auauna i lalo o latou taʻitaʻiga, ina ia mafai ona latou felelei, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 24 NOVEMA 2025

(tusia e Pastor EA Adeboye)

Manatu Autu: Faaipoipo ma le tonu (Marry right)

Tauloto Tusi Paia:Salamo 32:8 “Ou te a‘oa‘o ‘iā te oe, ma fa‘asino ‘iā te oe i lea lava ala ‘e te savali ai; ‘ou te fa‘atonu ‘iā te oe ma ‘ou va‘ai ‘iā te oe.”

Faitauga - Tusi Paia:  Faamasino 16:4-21

I nei aso, e toatele alii ua fefefe e faaipoipo e ui ua matutua, lelei galuega poo pisinisi ma o loo lelei le tulaga o le tamaoaiga. O le mafuaaga masani ona e lē mananao e sesē le tamaitai e faaipoipo iai e avea ma latou avā. E faapena foi tamaitai, ua faaeteete e faaipoipo e ui e tele alii ua latou feoai ona e lē mananao e faiga ni faaiuga sesē pe a oo i le filifilia o se paaga mo le olaga atoa. 

E taua le iloa e kerisiano a oo ina faaipoipo, e lē mafai ona toe foi i tua. O le faaipoipo atu i le tagata sesē e pei o loo e ola i seoli a’o iai i le lalolagi nei. E leai se tagata e alu i se malaga umi e aunoa ma sauniuniga talafeagai, ma o le faaipoipoga o se malaga umi. O le mafuaaga lea afai e te lei faaipoipo, e te manaomia le fesoasoani a le Atua ina ia e faia le faaiuga tonu e tusa ma lau paaga i lenei malaga umi. O nisi tagata ua vavevave e faia faaipoipoga ae faatoa latou iloa mulimuli ane, o le paaga e manatu lava na o ia ma e valea. O nisi ua filifilia paaga e fua i o latou foliga, ma e iu ane e nofo i se tagata aulelei i le vaai ae papau le iloa faaleagaga, o se tulaga manaomia mo le malaga. A o’o ina faigata le malaga, o latou toalua e vaivai faaleagaga ma leai se iloa e faamalosiau ia mautu i le faatuatua. A oo ina filifili poo ai e faaipoipo iai, e lē tatau i kerisiano faatuatua ona filifili ma taitaia i latou tau o foliga vaaia.

O Samasoni o se tagata sa fuafuaina e matua maoae lona lumanai. O lona lumanai sa folafolaina ae lei fanau mai ma sa faagasolo lelei lona olaga e agai atu i lona lumanai manuia ma le maoae peitai ina ua ia filifilia Talila ma paaga,  na ia motusia ma faapuupuu lona olaga. Ae lei tupu lea tulaga, na tele vaega na ia lē faia e tusa ma le faatuatuaga kerisano ma ua lē faalogo i le taitaiga a le Atua. Ma ua ia filifilia e alofa ia Talila e tusa ma ona foliga lalelei. Fai mai le Faamasino 16:4 na vaai atu Samasoni ia te ia i le vanu o Soreka ma ua manao ia te ia, na ia faataga o ia lava e tosina i lona lalelei. O le vanu o se nofoaga maualalo ma a iai se kerisiano i se tulaga maualalo faaleagaga, ua ia lē savali i le amio lelei ma usitai i poloaiga a le Atua, o lea tagata kerisiano faatuatua e lē o iai i se tulaga talafegai e faia ai ni faaiuga mo le faaipoipoga aua foi e ono sesē le faaiuga. 

Le au pele e, afai e te lei faaipoipo, e finagalo le Atua e taitai ia te oe e faia le faaiuga tonu i le tagata e tatau ona e faaipoipo iai. E tatau ona lava ona e ola usitai i lana upu ma ana poloaiga ina ia mafai ona ia taitai ia te oe e faia le faaiuga tonu. O le faalogo i le Atua e taua tele i le filifilia o se tagata tonu e te faaipoipo iai, i le suafa o Iesu, Amene. 

OPEN HEAVENS

MATALA LE LAGI MO LE ASO SA 23 NOVEMA 2025

(tusia e Pastor EA Adeboye)

Manatu Autu: Fa’aaogaina O Le Mana O Le Atua (Using The Power Of God)

Tauloto Tusi Paia:2 Korinito 13:10 “O le mea lava lea ‘ou te tusi atu ai na mea, o lo‘o le i ai a‘u ‘iā te ‘outou, ‘ina ne‘i ‘ou fai fa‘amalosi pe a ‘ou i ai ‘iā te ‘outou, e tusa ma le pule ‘ua tu‘uina mai e le Ali‘i ‘iā te a‘u o ati a‘e ai ‘iā te ‘outou, ‘ae lē ‘ina ‘ia lepetia i lalo.”

Faitauga - Tusi Paia:  Luka 9:52-56

O nisi tagata ua o latou maua se vaega o le mana o le Atua ua o latou fa’aaogā sesē. Fa’ata’ita’iga; ona ua pā’ū’ū i lalo tagata ona o le faauuga i le taimi e faatino ai le galuega, o nisi auauna a le Atua o le a manana’o e pa’i atu i tagata tau lava ia faailoa ai o i latou ua i ai le fa’au’uga. O nisi fo’i e faatino fa’aaliga eseese i le taimi o galuega e fa’asa’oloto ai tagata. O nisi o i latou e fa’atautatala tagata o ulutinoina e temoni i fa’aleotele leo ia lagona atu ai e tagata tala a temoni o fai. O nei faiga uma e lē manaomia ma e sesē. O faifeau a le Atua e tatau ona tau lava o le tuliese o temoni mai tagata ma fa’asa’oloto i latou, e lē tatau ona o latou fa’amāasiasia tagata o loo taumafai e fa’asa’oloto ona o le manana’o e fa’aaliali o i latou e fa’au’uina. 

O le mana o le Atua e lē o se auupega mo se fa’asalaga peita’i e aumaia le olioli i loto o tagata. A avatu e le Atua ia te oe se vaega o lona mana, e mo oe e te avatu ai le ola i mea ua oti ma avatu ai le Viiga i le Atua, e le’i avatua e te fa’alialia vale ai, saili ai ni au mea, pe e te tauimasui ai. E mafai ona faaumatia ma fasioti i le mana ua avatu e le Atua ia te oe; peita’i e lē o le faamoemoe lea. O le mafuaaga lea e fa’ateletelegese ai ona tautatala le toatele o le au kerisiano matutua ma taumafai lava aua ne’i feita tusa poo a mea a tagata e fai atu ia i latou. Latou te lē manana’o lava e fa’aaogā le mana o le Atua mo se leaga. A avatu e le Atua ia te oe se vaega o lona mana, e te lē fealuai solo ai e faaumatia tagata e te manatu o ni ou fili.

Fai mai le tusi o Efeso 6:12

“Auā tatou te lē tau ma tagata, a o ali‘i sili, ma faipule, ma ali‘i o le pouliuli o lenei lalolagi, ‘atoa ma agaga leaga i mea o i le lagi.”

O se ipu i le lima o satani i le asō e mafai ona avea ma ipu taua i aao o le Atua taeao. Afai na mafai e le Atua ona fa’aaogā Maria le Makatala, sa ia te ia temoni e fitu, e mafai fo’i ona Ia fa’aaogāina so’o se tasi e leaga. Pe ana fai na valaau e Setefano le oti ia o’o ifo ia Saulo a’o fasiotia o ia i lalo o le ta’ita’iga a Saulo, semanū e leai se Aposetolo Paulo. Fai mai Paulo i le upu tauloto mai le Tusi Paia o le asō, o le mana o le Atua e atia’e ai ae lē o le faaumatia.

I le tusi faitau mai le Tusi Paia o le asō na manana’o Iakopo ma Ioane e valaau le afi e o’o ifo i luga o tagata Samaria ona latou te le’i talia Iesu, peita’i na fetalai atu Iesu ia te I latou na afio mai o Ia e Fa’aola ae lē o le fasioti. Le au pele e, o le finagalo o le Atua ia faaolaina tagata uma (1 Timoteo 2:4); E le finagalo o Ia e fano se tasi (2 Peteru 3:9). Afai ua Ia avatu ia te oe se vaega o lona mana, ia e fa’aaogā tau lava o le faataunuuina o lona finagalo, aua lava ne’i faaumatia ai se tasi. O le mana o le Atua e faaaogaina e faaola ma faamanuia i tagata, e lē faalialia vale ai pe faaumatia ai ola o tagata, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 22 NOVEMA 2025

(tusia e Pastor EA Adeboye)

Manatu Autu: Perofetaga Moni (Real Prophecy)

Tauloto Tusi Paia:2 Peteru 1:21 “Auā e lē o le loto o tagata na tu‘u mai ai le valo‘aga anamua, a o tagata o le Atua na talatalaina mai ‘ina ‘ua osofia mai e le Agaga Pa‘ia.”

‭‭

Faitauga - Tusi Paia:  2 Tupu 7:1-16

E toatele latou te tā’ua i latou lava o perofeta, e fai perofetaga i le vaai. Atonu latou te tilotilo i se tagata, mate se tala o fia faalogo ai, ma faaleo loa le perofetaga faatasi ma ona foliga mautinoa. O le mea lena e ta’u o le taumate, e lē o se perofetaga. O nisi e tilotilo i le lagi ma afai e vaai atu e paa’uli ao, ona fai mai lea o le perofetaga, o le a timuga. Na vavalo se tasi o le a timuga Nigeria ia Iuni. Sa ou faalogo faatatau i le perofetaga ma ou manatu ifo ia te a’u lava, “o Iuni o le ogatotonu lea o le tau o timuga; afai e le timuga Iuni o le a la le isi taimi o le a timu ai?” O se perofetaga lena i le vaai. Peita’i o perofetaga mo’i e lē faavaea i le maitau poo le vaai fa’aletino; e faavae I le feau e faailoa mai e le Atua i le siosiomaga faaleagaga.

O le tele o taimi, a aumai e le Atua se perofetaga, o le a le malamalama ai le mafaufau o le tagata auā e leai ma se tulaga i le faaletino e lagolagoina le mea o fetalai mai ai le Atua. O le mea moni, o le tele o taimi, e ono fefe le tagata o auala mai ai le perofetaga e faaleo ona e foliga e lē moni ma e faigata ona tupu - tautala faaletagata - o le mea ua fetalai ai le Atua e taunuu. Afai e avatu e le Atua ia te oe se perofetaga ma fetalai atu ia te oe e folafola, aua e te fefe e tautala; ia e mautinoa soose upu e te fai o le a taunuu.

I le tusi faitau o le asō mai le Tusi Paia, sa i ai se oge tele i Samaria mo le fitu tausaga. Ua matuā leaga lava le oge ua amata aina e fafine a latou fanau (2 Tupu 6;25-30). I le totonugalemū o nei puapuaga, na auala mai ai le upu a le Atua ia Elisaia e faapea.

“Fa‘alogologo mai ia ‘outou i le afioga a le ALI‘I, O lo‘o fa‘apea ‘ona fetalai mai o le ALI‘I, O le itū aso fa‘apenei a taeao, e fa‘ataulia i le faitoto‘a o Samaria le fua o falaoa lelei i le sekeli, e lua fo‘i sea o karite i le sekeli.” 2 Tupu‬ ‭7‬:‭1‬ ‭

I fua faatatau uma tau tamāoaiga, o le upu na fetalai ai Elisaia sa foliga lē talafeagai ma lē mafai ona faataunuu. E le’i afaina lea, peita’i, auā na faataunuuina lava e le Atua lana upu. Fai mai le tusi o Isaia 55:10-11 “Auā e pei ‘ona totō ifo o le timu ma le kiona mai le lagi, ‘ae lē toe fo‘i atu i ai. ‘Ae peita‘i e fa‘asūsūina ai le lau‘ele‘ele, ma fua mai ai ma totogo mai ai, e tupu mai ai saito i lē lūlū saito ma mea e ‘ai i le ‘ua ‘ai. E fa‘apea fo‘i la‘u ‘upu e alu atu a‘i lo‘u gutu, e lē fo‘i mai fua ‘iā te a‘u. ‘Ae peita‘i e faia le mea ‘ou te loto i ai, e manuia fo‘i i le mea ‘ou te ‘auina atu ai.”

Le au pele e, aua e te inoino i perofetaga e ala mai i auauna moni a le Atua ona e lē talafeagai pe lē mafai. Talu ai o le feau e aumai i le Atua, e mautinoa fo’i na te faataunuuina. O perofetaga moni e ono foliga mai e lē mafai ona taunuu, peitai e faia ma faataunuu e le Atua ana fetalaiga uma, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 21 NOVEMA 2025

(tusia e Pastor EA Adeboye)

Manatu Autu: O le a le mea e te manao ai? (What do you want?)

Tauloto Tusi Paia –  Eperu 12:16 “ne‘i iai se faita‘aga, po o se fa‘atalalē i mea pa‘ia, pei o Esau, o lē na avatu lona tofi o le ulumatua e fa‘atau a‘i le ‘ai e tasi.”

‭‭

Faitauga - Tusi Paia: Kenese 25:29-34

I se tasi aso i le 1986, a’o faia sa’u mafutaga matagofie ma le Atua ae fesili mai ia te a’u, ‘Atalii, o le a se mea e te manao ai i lou aso fanau?’ E masani lava ou te lē amanaia aso fanau, aua ia te a’u, o le aso fanau moni o le aso e faaolaina ai le tagata. Peitai, o le aso na e fanau ai e taua aua fai mai le Salamo 90:12, “‘Ia fa‘apea ‘ona e a‘oa‘o mai ‘iā i matou e faitauina o matou aso, ‘ina ‘ia maua ai le poto i o matou loto.”

‭‭Na ou tali atu, ‘ou te manao e maua uma e tagata o le aulotu ni vavega’. Ona ia faapea mai lea, ‘valaau iai ia o mai faatasi e feiloai mai ia te a’u mo se vaiaso atoa. E oo atu i le faaiuga o le vaiaso, e maua uma e i latou ni vavega’. O le vaiaso lena i le 1986 e le mafai ona faagaloina e le RCCG aua o le mana o le Atua sa matua matautia i la matou potopotoga na matou faatoa vaai ai ini vavega ofoofogia e maofa ai, vavega ia ua fai ma masani i aso nei. 

E masani le Atua i le fesili ia te oe i le mea e te manao ai. Tusa pe le fesili tuusao mai e pei ona ia faia ia te a’u, ae na te avatu ia te oe ni vaega se lua e te filifili ai, ma o lau filifiliga e fua iai lou olaga atoa. A fesili atu le Atua poo le a le mea e te manao ai, e te ole atu mo mea i le olaga nei e vave ona mou atu, pe afai o loo taulai lou mafaufau i mea o le tino nei. I le faitauga mai le Tusi Paia o le asō, e lei iloa e Esau o loo tofotofo o ia e le Atua ina ua foi mai i lana tuliga manu a’o fia ai. Ina ua tauanau e Iakopo e faatau atu lona tofi o le ulumatua mo se ipu meaai, e na te lei iloiloina avanoa e lua i ona luma, pau le mea na manao iai, ia faatumu lona manava. Sa tele le malosi nai ia Esau na mafai ai ona tautala atu ia Iakopo, o loo atagia ai, e lei faapea o le a oti i le fiaai, o lona uiga ana ia lē taliaina le ofo a Iakopo, e lē oti. 

Peitai na ia talia le ofo a Iakopo ma ua inoino i lona tofi ulumatua ona sa taulai lona mafaufau i mea o le lalolagi. I le upu tauloto mai le Tusi Paia o le asō, o loo ta’ua o ia o le faitaaga ma o se tagata faatalalē aua na ia filifilia mea o le lalolagi i lō mea e faavavau.

Le au pele e, e te feiloa ma avanoa e faia ai faaiuga i aso uma ma o au faaiuga e te faia i le asō, e fua iai le tulaga lelei poo le leaga o lou olaga a taeao. O a faaiuga o loo e faia i le asō? A avatu e le Atua ia te oe se siaki e pule oe i le aofai, o le a mea o le a e ole atu ai? E te ole atu ea mo mea i le tino e mou atu e pei o Esau, poo mea e aoga e faataunuuina ai le faamoemoega ola o lou olaga mo le Atua? Ou te tatalo e foai atu e le Atua ia te oe le poto e faia ai faaiuga tonu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 20 NOVEMA 2025

(tusia e Pastor EA Adeboye)

Manatu Autu: Faataga Agaga Paia (Allow the Holy Spirit)

Tauloto Tusi Paia:Kenese 1:2 “Sa so‘ona nunumi le lalolagi ma ‘ua gaogao, sa ufitia fo‘i le moana i le pouliuli; na fēgaoioi a‘i fo‘i le Agaga o le Atua i le fogātai.”

‭‭

Faitauga - Tusi Paia:  Numera 11:10-23, 30-32

O loo faaalia mai e le tauloto mai le Tusi Paia o le asō na fegaoioi ai Agaga Paia i le fogātai ae lei foafoaina le lalolagi. O le lalolagi sa gaogao ma nunumi, ae na vave ona faatumulia i mea e ola ina ua galue ma fegaoioi a’i ai Agaga Paia. O soo se vaega o lou olaga e pei o lau galuega, aoaoga, galuega i le Ekalesia, faaipoipoga ma isi e te faatagaina Agaga Paia e galue ai, o le a tumu ma ola. 

E toatele kerisiano e fapea mai o loo taitaia i latou e Agaga Paia, peitai, o i latou ia o loo taumafai e taitai Agaga Paia. E latou te manatu e lelei ma atoatoa fuafuaga ua latou maua e manuia ai, ma o nisi o i latou e faamoemoe i tagata e popoto faapitoa e fautuaina i latou i le mea e tatau ona faia ae ua lē faalagolago ia Agaga Paia. I ni tausaga talu ai, sa ou tatalo faifaipea ina ia tupu le Ekalesia ma sa tele fonotaga na ou auai atu iai. Na ou taumafaia mea uma na aoaoina ai au i nei fonotaga, peitai e leai se mea na tupu. O le mea moni, ua oo i se tulaga ua matou tauanauina tagata e faaaoga ai meaai ia o mai ai i le lotu, ua matou faaigoaina o le ‘mafutaga mo tausiga’. E o mai tagata, ave latou meaai, ma toe foi lea i latou fale, ona le toe vaaia lea. Ua lagona le fiu, ona ou tatalo lea i le Atua, ‘Le Alii e, e iai lava le tulaga o loo misi’. Na ia tali mai, ‘O Agaga Paia’. 

I le faitauga o le Tusi Paia o le asō, na tomumumu le fanauga a Isaraelu ia Mose ona ua fia aai ini aano o manu fasi. Na ripotia e Mose le mataupu i le Atua ona faapea mai lea o le Atua, ‘o le a ou foai atu seia matua fiu e aai’. O le aso na sosoo ai, na agi le matagi, ua pauu ma siomia le togalauapiga i le faitau miliona o le manu o le salu ma e pau la latou mea e faia o le ao ma aai ai. Ina ua taitaia a’u e le Atua e faitaua le fuaitau lea ina ua maea ona ou ole atu ia faatupuina le lotu, na ou fai atu iai, ‘ou te lē malamalama, o le a le fesootaiga i le tala lea ma le tupu o le lotu?’ Ua ia faapea mai, ‘ia faataga Agaga Paia e agi mai, ona ō mai lea o tagata, e te lē tau alu e sue mai nisi. O le a matua toatele o le a le lava le potu e ofi uma ai i latou. I lena aso, na ou faamatuu ese fuafuaga uma ae faamoemoe loa tau lava o ia, ma e lei leva, ae amata loa ona tupu le lotu. 

Le au pele e, avatu ia Agaga Paia vaega uma o lou olaga. O le a aveesea vaega uma e tetee i le finagalo o le Atua ma faamautinoa e te savali i lona alofa tunoa ma le faulai o faamanuiaga. 

Tatalo

Agaga Paia, ou te tatalaina atu ia te oe vaega uma o lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 19 NOVEMA 2025

(tusia e Pastor EA Adeboye)

Manatu Autu: Ia e loto matala ma le Atua (Be vulnerable with God)

Tauloto Tusi Paia:Salamo 34:18 “Ua latalata mai le ALI‘I i ē ‘ua loto momomo; ‘ua ia fa‘aola fo‘i i ē ‘ua loto nutimomoia.”

‭‭

Faitauga - Tusi Paia: Esoto 3:1-5

O soo se taimi ou te iai i le mamalu o le Atua, ou te amio o se tamaitiiti aua ua ou iloa o a’u o se pepe o loo manaomia lona alofa, faamafanafanaga, alofa tunoa ma lana fesoasoani. I le Luka 18:9-14, na faamatala e Iesu le tala o tamaloloa e toalua na o i le malumalu e tatalo. O le tasi na faalialia vaega ua ia ausia i luma o le Atua peitai e lei tauamiotonuina. Peitai o le tasi oi laua na faamaualalo i luma o le Atua ma tautau lona  faatauvaa, na tauamiotonuina. I le lalolagi i le asō, e toatele tagata e ō atu i le Atua oni tagata e maualuga le faatuatua. Peitai, o le mafuaaga lea e tatalo umi ai ae aunoa ma ni   tali mai le Atua. 

A faamatala e le Atua le fua o le nofoa o le alofa mutimutivale i le atolaau o le feagaiga ia Mose i le Esoto 25:17, na ia matua auiliili mai le umi e 2.5 kupita ma lona lautele e 1.5 kupita. Ia maitau mai, e lei auiliiili mai e le Atua le maualuga. O lona uiga o le nofoa o le alofa mutimutivale e lē o se nofoa e nofo ai ae o se nofoaga e taoto ai. O i latou e maua le alofa mutimutivale o le Atua e tatau ona o atu i ō latou itu pito maualalo. A e iai i le mamalu o le Atua, e tatau ona e loto matala i le Atua ma talanoa ia te ia i ou vaivaiga, o faafitauli, lagona ma vaega o loo nunumi ia te oe. 

E iai le eseesega o le talanoa ma le tatalo. O le tatalo o le ole atu mo se fesoasoani ae o le talanoa o le faapea atu, “ Le Alii e, o au lenei. Ua maea ona ou faataitaia le laasaga lea ma lea laasaga. O le a le mea ou te faia?” Afai e te alu atu i le tulaga lea i le tatalo, o le a amata ona ia a’oa’o atu ia te oe mea e lē iloa e isi tagata. O loo lapatai mai i tatou i le Faataoto 3:7 ia aua nei o tatou faafiapopoto. O nisi tagata e ole atu mo le taitaiga ae ua maea ona faia faaiuga i le mea e tatau ona fai. O nisi tagata ua le fia faalogo ini fautuaga peitai o loo saili ia nā o le ioe atu iai o le Atua ia latou faaiuga. O tagata e o mai faapea i le Atua, e lē taitai ona latou maua se mea mai ia te ia aua latou te manatu e sili atu mea latou te iloa nai lō le Atua. E manatu faamaualuga e tuuina atu o latou manatu ma fuafuaga i ona luma ma faalogo i ana faatonuga. 

I le faitauga o le Tusi Paia o le asō, ina ua fetaiai Mose ma le Atua i le laau talatala o loo mumū, o le mea muamua na fai le Atua ia Mose e faia, o le aveese o ona seevae. Le au pele e, o ou seevae  o mea o loo taofia ona tatala lou loto i le Atua e pei o lou iloa ma mea ua ausia. Tago e aveese ae e te lei sau i lou tama i le lagi. E le taitai ona ia teena i latou e loto matala i ona luma ma o lona alofa mutimutivale e maua ai lava i latou i le loto maualalo (Iakopo 4:6). Ou te tatalo ia oo atu le alofa tunoa o le Atua ia te oe, ao e faamaulalo ia te ia i aso uma, i le suafa o Iesu. 

Tatalo

Tamā, ou te faamaualalo i ou luma. Faamolemole ia oo mai lou alofa mutimutivale ia te a’u i le suafa o Iesu, Amene. 

OPEN HEAVENS

MATALA LE LAGI MO LE ASO LUA 18 NOVEMA 2025

(tusia e Pastor EA Adeboye)

Manatu Autu: E taua i le Atua lou sao(God values your input)

Tauloto Tusi Paia – Kenese 2:19 “Na faia e le ALI‘I le Atua i le ‘ele‘ele o manu vaefā uma lava ma manu felelei uma lava; ma ‘ia ‘aumaia ‘iā Atamu ‘ia iloa pe ni a ni igoa na te fa‘aigoa ai; o le igoa ‘ua fa‘aigoaina ai e Atamu i mea ola uma o lona igoa lea.”

‭‭

Faitauga - Tusi Paia: Kenese 18:16-33

Ua ou mātauina i la’u savaliga ma le Atua, e ui o ia o le Silisili Ese ma le Pule aoao, ae e naunau e faia mea uma e faipaaga ma lana fanau. I le tele o taimi a finagalo e faataunuu se mea, e fai atu i lana fanau e latou te faia se vaega ae na te faia mea uma o totoe. I le upu tauloto mai le Tusi Paia o le asō, na tuuina atu manu na Ia faia ia Atamu, e na te faaigoaina, ma o le igoa lava na faaigoa ai e Atamu, o le igoa lena sa faaaogaina. I le tusi o Ioane 6:5-7, ua muai silafia e Iesu le mea o le a Ia faia, ae na Ia fesili atu i le au soo pe faapefea ona latou fafagaina le silia ma le 5,000 o tagata. Mulimuli ane, na Ia faaaogaina le meaai a se tamaititi na aumai e se tasi o ona soo e fafaga ai le motu o tagata. E ui i le mamana o le Atua, e fiafia e faaaoga le sao a Lana fanau i so’o se mea e finagalo e faia. Ae o le faanoanoaga, e lē toatele i latou ua mafuta vavalalata ma le Atua e mafai ai ona Ia fai atu mo so latou sao.

I le Esekielu 37:1-10, na ave e le Atua se tagata i se vanu e tumu i ivi mamago ma fesili atu ia te ia pe mafai ea ona ola ia ivi. A amata ona faʻatauaina e se Kerisiano lana mafutaga ma le Atua, e le gata o le a ia faʻalogo i le Atua, ae o le a amata foʻi ona la talanoa vavalalata ma Ia. Soʻo se tasi e mafai ona faalogo i le Atua, ae e toʻaitiiti e mafai ona talanoa ma Ia, ae e toʻaitiiti atu i latou e mafuta vavalalata ma Ia, e mafai ai ona fesili atu iai le Atua, “Loʻu atalii e, o le a sou manatu i le tulaga lenei?”

I le faitauga mai le Tusi Paia o le asō, ua tatou iloa ai o Aperaamo sa mafuta vavalalata ma le Atua na le mafai ai e le Atua ona natia mai ia te ia lona faamoemoe e faaumatia Sotoma ma Komoro. Afai e te manao e faasoa atu le Atua mo lou sao i mea ua Ia finagalo e faataunuu, e tatau ona mafana lau mafutaga ma Ia. E tatau ona e matua latalata ia te ia, e faapea mai o ia, “E lē mafai ‘ona ‘ou natia mai i laʻu uō le mea o le a ou faia.” E lē lava le na o le auai i le lotu i le tele o taimi, e tele mea e sili atu i le Atua i lo le auai i sauniga lotu mo le lua pe tolu itula. O le mafuta vavalalata ma le Atua, e tatau ona faʻaalu lou taimi ma Ia i tatalo, ma faitau i ana afioga paia i aso uma. A e to’aga e mafuta ma Ia i aso uma, e lē gata o le a e iloa atili ai o Ia, ae o le a Ia talosagaina foʻi lou sao i ni isi o mataupu e sili ona pele ia te Ia. E mafai ea e le Atua ona saʻili atu lou sao i so’o se mea na te finagaloi e faia? I le suafa o Iesu, Amene.