Samoan Devotional

OPEN HEAVENS

MATALA LE LAGI MO LE ASO LUA 28 OKETOPA 2025

(tusia e Pastor EA Adeboye)

Manatu Autu: Ia susulu atu le malamalama (Shine the Light)

Tauloto Tusi Paia –  Mataio 5:15 “Latou te lē tutuina fo‘i le molī i le tu‘u ai i lalo o le mea e fua a‘i saito, ‘ae tu‘u i luga lava o le tu‘ugāmolī ‘ia pupula atu ai i ē o i le fale uma.”

‭‭

Faitauga - Tusi Paia: Mataio 18:23-35

O soo se afafine poo se atalii o le Atua o se malamalama e pupula atu.  O oe o le malamalama o le lalolagi, ma o loo fai mai le Mataio 5:16, "Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.”

‭‭E tasi lava le matafaioi o le malamalama: ia susulu. O lona uiga, so’o se mea e taofia ai le malamalama mai le susulu, o lona fili lea. I lou tulaga o le fanau a le Atua, so’o se mea e taofia ai oe mai le susulu atu, o lou fili lena, ma e tatau ona fai iai sau fuafuaga.

So’o se mea e mafai ai e le pogisa ona pulea le malamalama ile olaga o se tagata faatuatua, o lona fili lea. I le tauloto mai le Tusi Paia o le asō, na faailoa mai e Iesu se mea e taofia le pupula atu o lo tatou malamalama ma faataga ai le pogisa e pule i le malamalama - o le 'ato (bushel). O le 'ato e faaaoga e fua ai saito, poo ni fatu e ‘aina i aso ua mavae. Afai e tutu e se tasi se lamepa i totonu o se potu pogisa ma tuu i lalo o se 'ato e fua ai saito, e faigata ona iloa poo i ai se malamalama i totonu o lena potu.

O leisi tulaga matautia ma lamatia o ‘ato e mafai ona natia le malamalama o le toatele o tagata faatuatua, o le loto lē faamagalo. O le mea e sili ona matautia o le loto lē faamagalo, e amata i le 'ato e tasi, ae e faateleina ai 'ato e ufiufi ai le malamalama o le tagata faatuatua ma taofia ai lona susulu atu. 

O le loto le faamagalo e mautinoa e sau faatasi ma le mataua, losilosi vale, ita ma le inoino. A faatiga se tasi ia te oe ma e filifili e te lē faamagaloina lena tagata, e lē umi ae amata ona e inoino iai, sosoo ai  ma lou lē  toe fia talanoa lava iai. O le loto lē faamagalo e mafai ona taofia le tali mai o le Atua i au talosaga. Fai mai le Mareko 11:25-26

“A ‘outou tutū ma tatalo, ‘ai se mea tou te tigā ai i se tasi, ‘ia ‘outou fa‘amāgaloina; ‘ina ‘ia fa‘amāgaloina fo‘i e lo ‘outou Tamā o i le lagi a ‘outou agasala. ‘Āfai fo‘i tou te lē fa‘amāgaloina, e lē fa‘amāgaloina e lo ‘outou Tamā o i le lagi a ‘outou agasala.”

Le ‘au pele e, aua le faataalo i le loto lē faamagalo. E mafai ona nanāina le malamalama o le tagata ma faapogisaina le tagata lē loto faamagalo. Ina ua faamatala e Iesu le fa’ataoto i le auauna lē loto faamagalo i le faitauga mai le Tusi Paia o le asō, na Ia faaalia ai le iuga o i latou e le loto fa’amagalo - e tuuina atu e sauaina e tagata faasauā. 

O e natia lou malamalama i lalo o le 'ato o le loto lē faamagalo? Ua oo mai le taimi e tuli ese ai ae ia fa‘apea ‘ona pupula atu lou malamalama i luma o tagata, ‘ina ‘ia latou iloa lau amio lelei, latou te vivi‘i atu ai i lou Tamā o i le lagi (Mataio‬ ‭5‬:‭16‬). Ou te tatalo ia viia le Atua i au upu ma lau amio, i le suafa o Iesu.O le loto lē faamagalo e matua lamatia; aua e te fa’atagaina e faaitiitia le pupula o lou malamalama, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 27 OKETOPA 2025

(tusia e Pastor EA Adeboye)

Manatu Autu: O Le Alii O Lo’u Lafitaga (The Lord Is My Hiding Place)

Tauloto Tusi Paia –  Salamo 119:114 “O lo‘u lafitaga, oe ma lo‘u talitā; ‘ou te fa‘amoemoe i lau afioga.”

‭‭

Faitauga - Tusi Paia: Salamo 32:6-7

I uluai tausaga i le avea ai o a’u ma taitai aoao o le Ekalesia RCCG, na sau la’u avā i le taimi o le fonotele a le Ekalesia i se tasi tausaga ma faapea mai, ‘E manaomia le 5000 tala faaopoopo e fafaga ai tagata o le fono mo le asō’. Na ou fesili atu ia te ia, ‘la’u pele, o a fea e te manaomia ai le tupe? O le asō poo le taimi nei?’na fesili mai poo le a le esesega. Na ou faailoa atu lea e telē le eseesega o le taimi nei ma le asō. Ona ia tali mai lea, ‘E matou te manaomia le tupe i le asō’. Ona ou fai atu lea, ‘e mafai la ona e alu. A ou maua loa le tupe, ona ou avatu loa lea ia te oe’. I le taimi na sau ai mo se tupe, sa leai se tupe ia te a’u, peitai ou te iloa e iai le Atua i le lagi, o lo’u lafitaga. E mafai lava ona ou tamo’e ia te ia pe a oo i puapuaga. 

Ina alu ese atu la’u avā, na ou liliu atu i le Alii ma faapea atu, ‘Ua o mai tagata. O ou tagata, ma e lē mafai ona ō fia aai’. E lei leva, ae sau se tamaloa e lē lotu ia matou e fia vaai ia te a’u. Sa ui ane i le matou nofoaga o togālauapiga ma vaai mai i le motu o tagata o ō mai i totonu. Na afe mai e fia iloa poo le a le mea o tumutumu ai tagata ma faapea mai, ‘o le a le mea lea e tupu iinei?’. Na ou fai atu ia te ia o le matou fonotele faaletausaga. Na tali mai, ‘matagofie! Ou te sau la i le tausaga fou’, ona tuu lea o lona lima i lana taga, aumai se teutusi ma faapea mai, ‘i le taimi nei, ou te fia fesoasoani i le Ekalesia i la’u meaalofa lea’, na ou tatalo mo ia ona alu lea. Ina ua ou tatala le teutusi, e 1000 tala o loo iai. Ua ou faapea ia te au lava, ‘faafetai le Atua, o lea ua maua le 1000, toe la o le $4000’. E lei leva, ae o mai taitai o le autalavou a le Ekalesia e vaai au i le ofisa ma latou aumai se teutusi. Ua ou tatalo mo latou ona ō lea. Na ou tatalaina le teutusi ma sa iai le 2000 tala. E lei leva se taimi ae ou valaau i la’u avā e sau ona ou tuuina atu lea ia te ia le 5000 tala na ia ole mai ai i le amataga, aua na saunia e le Atua i se vavega le isi 2000 tala. 

I le Salamo 61, na tagi atu le fai Salamo i le Atua e taitai o ia i se papa e sili ona maualuga atu ia te ia. O le Upu a le Atua o le papa o lo tatou lafitaga mai puapuaga ma mea e faamāina ai. Le au pele e, e le mafai ona e puapuagatia pe a tuuina atu lou faamoemoe i le Upu a le Atua. A tuuina atu lou faatuatua atoatoa i lana Upu, e na te faalafi ia te oe i lona lafitaga ma faamautinoaina e lē faamāina oe. 

Tatalo

Tamā, faamolemole ia e faalafi ia te au i lou lafitaga. Aua nei faamāina a’u, i le suafa o Iesu, Amene. 

OPEN HEAVENS

MATALA LE LAGI MO LE ASO SA 26 OKETOPA 2025

(tusia e Pastor EA Adeboye)

Manatu Autu: O Le Alii O Lo’u Fesoasoani Silisili (The Lord Is My Very Present Help)

Tauloto Tusi Paia –  Salamo 46:1 “O le Atua, o lo tatou malu ia ma lo tatou malosi; e fai o ia ma fesoasoani silisili i puapuagā.”

‭‭

Faitauga - Tusi Paia: Salamo 46:1-11

O loo faamamafa i le tauloto mai Le Tusi Paia o le asō, o le Atua o lō tatou fesoasoani silisili i taimi o puapuaga. O ia o le Atua o ananafi ae o ia foi o le Atua o le asō. E mafai ona ia toe faaleleia soo se mea i lou olaga i le taimi nei pe afai o loo aafia ini mea sese na faia I le tuanai. 

E iai se tamaititi aoga o la’u vasega ao ou faiaoga i le Iunivesite na sau ia te au. Sa iai sona faafitauli, e afu i taimi uma ma e manogi le lelei. E le mafai ona nofo ai seisi i ona autafa ona o le manogi. E tele fomai na vaaia ma faatonu mai fasimoli eseese, peitai na tumau pea le faafitauli. Na ou sauni e tatalo mo ia ae fai mai le Atua, “leai, ‘aua e te tatalo, e iai le faaleleiga e tatau ona ia faia’. Na ou logoina lenei alii I le upu mai le Atua ona ia faia lea o le faaleleiga. Ina ua maea ma foi mai ou te tatalo mo ia, ae fai mai le Atua, “e te lē tau tatalo mo ia, na o le fai lava iai e aua le toe inu vai aisa mo le lua vaiaso”. Na gata ai iina lona faafutauli. E lē taitai mafai e fomai ona fofoina ituaiga faafitauli faapea, ae o Lē o le fesoasoani silisili i le taimi nei, ua afio i lona tuanai, ua feliuaina mo le lelei, ma avatu i lenei alii le tautinoga. 

A tatou faapea mai o le Atua o le taimi nei, o lona uiga e leai ma se vaega o le taimi e na te lē silafia. O lona uiga foi e silafia e ia le auala pito sili ona lelei e fofo ai le mataupu I le taimi nei. O le fesoasoani a le Atua e mo le taimi nei, ae e mo tagata ua lafoai o latou ola ia te ia. Fai mai le Isaia 65:24; “A o le‘i vala‘au lava i latou, ‘ou te tali atu. A o tautala mai i latou, ‘ou te fa‘alogo atu lava.”  O lona uiga, e lei oo i le taimi e te iloa ai ua e manaomia le fesoasoani, ae ua muamua atu le Fesoasoani Silisili e saunia mo oe. Ou te tatalo e te tofo ma maua le fesoasoani e saunia ma fetaui lelei mo oe ma le manaoga e amata atu nei, i le suafa o Iesu. 

E tatau pea ona ou toe faaopoopo atu, afai e te lei tuuina atu lou ola ia Iesu, e lē mafai ona e maua lea fesoasoani. ‘Aua e te faapei o tagata e ta’uta’u le mafutaga ma le Atua i taimi ua tuanai ma manatu e fesoasoani pea o ia i le taimi nei. Afai na o le mamalu o aso ua tuanai o loo e iai, ua oo i le taimi e toe faafouina le lua mafutaga ma le Atua. A e faia, e amata loa ona e fiafia i le Fesoasoani Silisili. O le Atua o le Fesoasoani silisili iai latou o loo avea o ia ma o latou Alii i le taimi nei, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 25 OKETOPA 2025

(tusia e Pastor EA Adeboye)

Manatu Autu: O Le Alii O Lo’u Lavea’i (The Lord Is My Deliverer)

Tauloto Tusi Paia –  Salamo 40:17 “A’o a‘u nei, ‘ua ‘ou puapuagātia ma ‘ou mativa; e manatua mai a‘u e le ALI‘I. O oe lava lo‘u fesoasoani ma lo‘u fa‘aola; lo‘u Atua e, ‘aua lava ‘e te tuai mai.”

‭‭

Faitauga - Tusi Paia: Mareko 7:32-37

Ua tā’ua mai ia i tatou i le tusi o Luka 13:11-13 se fafine sa fa’ano’uno’u mo le sefuluvalu tausaga ua le mafai ona tu sa’o i luga. Atonu e toatele ni foma’i na alu i ai ma fa’aaogā ni vailaau eseese ae le’i manuia ai. Peita’i ina ua fetaia’i o ia ma Iesu, na mālōlō ai lava i le taimi lea. E i ai gasegase e o’o i foma’i aupito lelei e lē mafaia ona togafiti. Afai o e feagai ma se gasegase faaumiumi e te manaomia tau lava o se pa’i se tasi mai lo tatou Faaola ma le Lavea’i Sili e te mālōlō ai.

A fa’ataugāina se uso e le tiapolo i ma’i, e fa’afaula’i i ai ma le tele o mea faanoanoa i le olaga o lea uso. Fa’ata’ita’iga, e ese mai le pagatia i le ma’i lepela, e mafatia fo’i i le fa’aesea e ono maua ai i le loto faanoanoa, aemaise pe afai e tu’ulafoa’iina i latou e o latou aiga ma uo. Afai o ola ma sologa lelei ni a latou pisinisi, e ono i’u ina tapuni nei pisinisi ona ua le toe fia fai pisinisi nisi o tagata ma i latou. I le Luka 17:12-19; sa i ai ni tagata lepela e toasefulu sa manana’o ia fa’asa’oloto i latou mai le ma’i lepela. Ina ua o’o atu i ai le lavea’i sili, na fa’amamāina i latou ma o le toatasi o i latou na toe fo’i e faafetai, na fa’amaloloina o ia. Ou te talitonu o le uiga o lea fuaitau, ua toe totogi uma atu ia te ia ana mea uma na leiloa i le tuana’i. O mea nei e mafai ona faia e le Alii mo oe pe afai o Ia lou lavea’i. E mafai ona ia toe faafoisia au mea uma na gaoia e le fili, peisea’ī e le’i o’o pe latalata atu fo’i ia te oe. 

Ou te tatalo ia fa’aalia e le Atua lona lava mata’utia mo oe, lavea’i oe mai puapuaga uma ma sauaga e ono oo ia te oe, ma fa’aatoatoaina oe i le suafa o Iesu. 

E i ai lo tatou lavea’i. E tā’ua o ia o le Alii o ‘au (Salamo 24:10) ma le Alii le malosi i le taua (Salamo 24:8). E mafai ona ia lavea’i so’ose tasi, ma e leai se tasi e mafai ona fāoa lana fanau mai ona aao. 

O le Alii o lo’u papa, o lo’u ’olo ma lo’u fa’aola; o lo’u Atua, o lo’u malosi, ou te faamoemoe ia te Ia, o lo’u talitā ma le nifo o lo’u faaolataga, o lo’u ’olo maualuga. Ou te valaau i le Alii, e tatau ona Viia o Ia; o lea e laveaiina ai a’u i e ua ita mai ia te a’u, (Salamo 18:2-3).

Le au pele e, afai e le’i tuua lou ola ia Iesu Keriso, o oe o lona fili, ma o se tulaga e mata’u tele ai, ona maua i aao o le Atua soifua (Eperu 10:31) auā e leai fo’i se na te laveaiina se tasi mai ia te Ia (Isaia 43:13). Lafoa’i lou ola i le Atua i le asō ia avea ai o Ia ma ou faaola ma lavea’i sili. Afai o oe o se atalii o le Atua, a’o e tumau pea i soose ituaiga saisaitiaga, ou te tatalo ia fa’asa’oloto atoatoa oe e le lavea’i sili i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 24 OKETOPA 2025

(tusia e Pastor EA Adeboye)

Manatu Autu: O Le Alii O La’u Pese (The Lord Is My Song)

Tauloto Tusi Paia –  Salamo 118:14 “O le ALI‘I, o lo‘u malosi o ia ma la‘u pese, ‘ua ‘avea fo‘i o ia mo‘u fa‘aolataga.”

‭‭

Faitauga - Tusi Paia: Salamo 126:1-6

E matagofie le iloa o Iesu ma faatuatua ia te ia. I nai aso ua tuanai atu, sa ou talanoa atu i faamanuiaga o le avea o Iesu ma ou Alii. O i latou e lei tuuina atu o latou ola i le Alii o Iesu, o loo latou taofia lo latou maua o faamanuiaga e tele i le avea lea ma fanau a le Atua Silisili Ese. 

O tagata e fiafia i pese mananaia ma fiafia e pepese i pese fou. Afai e avea Iesu ma ou Alii, e le gata e na te foai atu se pese fou, e avea o ia ma au pese. E le gata e na te faatumuina lou fofoga i le ataata, e avea o Ia e te ataata ai ma fai ma puna o lou olioli. Ina ua aumaia e le Atua le fanauga a Isaraelu mai Aikupito ma taitai e ui atu i le sami ulaula, na amata ona pepese i se pese fou i le Alii e faapea;

“O le ALI‘I, o lo‘u malosi ia ma la‘u pese, ‘ua fai fo‘i o ia mo‘u olataga. O lo‘u Atua lenei, ‘ou te fa‘ane‘ene‘e i ai; o le Atua o lo‘u tamā, ‘ou te vivi‘i lava ‘iā te ia.” Esoto‬ ‭15‬:‭2‬ ‭

A avea le Atua ma au pese, e na te faatumuina lou fofoga i le olioli ma le ataata. Ina ua avea o ia ma pese a Sarai, na ia faatumu lona fofoga i le ataata ma ataata atu ai ma tagata uma (Kenese 21:6). Ou te tatalo o tagata uma na aamu ia te oe, o le a ataata ma oe, i le suafa o Iesu. 

A manatu le tiapolo ua ia manumalo pe manatu foi ua sili atu le leaga o mea ua ia faia ia te oe ma e lē toe foi i se lelei, e tatau i lea kerisiano ona iloa, o le a avea le Atua ma pese ia te ia. Ina ua osofaia e le tiapolo Iopu ma lona aiga, na ia manatu o ia e faia le upu mulimuli. Peitai na afio mai le Atua mo Iopu ma foai atu le faalua o mea uma na leiloa ( Iopu 42:12). 

A avea le Atua ma au pese, o le a ia faatumuina lou fofoga i pese o le manumalo. Ina ua finagalo e solo i lalo le pa i Ieriko, na ia saunia le alaga o le manumalo i fofoga o tagata. 

“Ua ili pū e ositaulaga, ‘ona ‘alalaga ai lea o le nu‘u; ‘ua fa‘alogo le nu‘u i le leo o le pū, ‘ona ‘alalaga lea o le nu‘u i le leo tele, ‘ona solo ai lea i lalo o le pā, ‘ona ō a‘e ai lea o le nu‘u i le ‘a‘ai ta‘itasi i o latou luma, ‘ua latou ā‘ea fo‘i le ‘a‘ai.” Iosua‬ ‭6‬:‭20‬ ‭

Le au pele e, e finagalo le Atua e avea ma au pese. E fingalo e na te saunia faifaipea mo oe le pese fou o le olioli ma le manumalo. Lafoai lou ola ma le atoatoa ia te ia ona avea lea o ou aso e faatumulia i le ataata ma le pese. A lafoai ma le atoatoa lou ola ia Iesu, e avea o ia ma au pese, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 23 OKETOPA 2025

(tusia e Pastor EA Adeboye)

Manatu Autu: O le Alii o lo’u leoleo (The Lord Is My Keeper). 

Tauloto Tusi Paia –  Tanielu 6:22 “ua ‘auina mai e lo‘u Atua o lana agelu, ‘ua punitia ai gutu o leona, ‘ua lē afaina ai a‘u; auā ‘ua silafia e ia ‘ua leai sa‘u amio i ona luma; e leai fo‘i se mea leaga ‘ua a‘u faia i ou luma, le tupu.”

‭‭

Faitauga - Tusi Paia: Salamo 121:1-8

Afai e avea Iesu ma ou Alii, e te fiafia i le puipuiga faalelagi e faasaoina oe. Fai mai le faitauga o le Tusi Paia o le asō, o lē leoleo ‘iā Isaraelu, e lē tulemoe ia, e lē moe lava. A leoleo e le Atua se tagata, e leai se mea poo se tagata e mafai ona ia pa’i ia te ia (Roma 8:31). 

I tausaga talu ai, sa iai se tasi o o’u afafine sa faigaluega i le malo i lalo o se polokalame mo tagata talavou faatoa iu mai i Iunivesite. I le taimi lea, sa iai se auala fou o le malo e taua o le highway, auala tetele lea e feoai matua saosaoa ai taavale afi. E iai se aso na malaga mai ai lou afafine lea i se taavale a le malo, e tietie i le nofoa pito i tua o le taavale. Na faafuasei ona pa le pa’u o le taavale ona amata lea ona taavalevale le taavale ona o le saosaoa. Na alaga o ia, ‘Iesu’, ma ao taavalevale le taavale, e pei e iai ni lima e leiloa e mata, ua tago atu e ati i le faamalamala, ma sii mai o ia mai le nofoa pito i tua o le taavale ae faanofo i luga o le auala. Ona ia matamata atu lea ua taavalevale faalima le taavale ona faatoa tu lea. Na tamomoe atu tagata ma iloa atu o loo ia nofo mai luga o le auala. Ina ua latou fesili pe na faapefea ona oo ane i le auala ma ua ia failoa atu o ia sa i totonu o le taavale lea na tupu ai le faalavelave, sa le mafai ona latou talitonu. O le mea lea e tupu pe afai e auina mai e le Alii ana agelu e puipui i lou ola i taimi uma (Salamo 91:11). 

A avea le Alii ma ou leoleo, e na te puipui ou vae ia aua nei mapeva (Salamo 121:3). A faitio tagata i le tulaga o le tamaoaiga mo se faataitaiga, e lē luluina ai oe aua o le Alii o lou leoleo. Ua na o kerisiano ua avea Iesu ma o latou Alii ma Faaola e lē popole i se mea i le ogatotonu o tulaga lamatia, e pei o Tanielu i le lua o leona. Na auina mai ele Atua lana agelu ua punitia ai gutu o leona ma lē mafai ai ona latou osofaia Tanielu aua foi ua ia avea le Atua ma ona Alii, aua o le matafaioi lea a le Atua. I le aso na sosoo ai, o tagata uma na avea upufai o malo ma o latou Atua, ua lafo i le lua o leona, na osofaia ma ai uma e leona (Tanielu 6:16-24). 

O tagata e lē avea Iesu ma o latou faaola e lamatia i osofaiga a le tiapolo. Ua lafoai ea lou ola i le Alii?Afai e leai, faamolemole ia e faia i le asō. Ou te tatalo ia leoleo oe e le Alii i ou ala uma i ona aao matautia, i le suafa o Iesu. Afai e avea Iesu ma ou faaola, e te fiafia i lana puipuiga mai le lagi, i le suafa o Iesu, Amene. 

‭‭

OPEN HEAVENS

MATALA LE LAGI MO LE ASO LULU 22 OKETOPA 2025

(tusia e Pastor EA Adeboye)

Manatu Autu: O le Alii O Lo’u Malosi (The Lord Is My Strength). 

Tauloto Tusi Paia –  Esoto 15:2 “O le ALI‘I, o lo‘u malosi ia ma la‘u pese, ‘ua fai fo‘i o ia mo‘u olataga. O lo‘u Atua lenei, ‘ou te fa‘ane‘ene‘e i ai; o le Atua o lo‘u tamā, ‘ou te vivi‘i lava ‘iā te ia.”

‭‭

Faitauga - Tusi Paia: Salamo 20:1-4

Afai e avea Iesu ma ou Alii, e lē gata lou malosi. Fai mai le Salamo 84:5, “‘Amu‘ia le tagata o lo‘o ‘iā te oe lona malosi; o ala ‘ua i o latou loto ia.” A faitio tagata i le lelava ma le vaivai, o le tagata ua avea Iesu Keriso ma ona Alii ma Faaola e faatupuina pea lona malosi. Fai mai le Salamo 84:7, “Latou te sāvavali ma le malosi e tupu pea; e iloa i latou i Siona i luma o le Atua.”

‭‭

Afai o oe o se atalii poo se afafine o le Atua, o soo se taimi e te alu atu ai i ona luma, e na te foai atu le tului o le malosi e sili i le tulaga na iai muamua. E leai se tasi e alu atu i luma o le Atua ae alu ese ua vaivai ma lelavā. Afai e te sau i le Atua ma le faavaivai, e te alu ese ua faamalosia. A e alu atu i le Atua ma le lelavā, e te alu ese ma le malosi. O le mamalu o le Atua e foai mai ai le malosi faifaipea i ē loto vaivai. I vaega o loo e vaivai ai, e saunia e le Atua lona malosi mo oe pe afai e te faatalitali ia te ia. Fai mai le Isaia 40:29-31

 “Na te avatua le malosi i ē ‘ua vaivai; a o ē ‘ua leai se malosi, na te fa‘atuputele i ai le malosi. E vaivai ma tigāina tama matutua; o taulele‘a fo‘i, e pa‘u‘ū lava i latou. A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.”

‭‭

O le isi auala e faamalosi ai le Atua i lana fanau o le foai atu o ni tala matagofie e faatumuina ai o latou loto i le olioli. Ou te tatalo ia auina atu e le Atua ni tala matagofie e faamalosi ai i lou loto, i le suafa o Iesu. 

Ou te manatua ao matou fausia le Redemption Camp, na matou fausia se fale mai lona faavae seia maea i le fitu aso. Sa ou iai e faatonutonu le galuega i taimi uma ae lei lagona sou lelavā. Aua foi sa ou matua fiafia i mea o loo faia e le Atua i lea taimi, ma e fai mai le Tusi Paia o le olioli i le Alii o lō tatou malosi lea. Fai mai le Neemia 8:10……”auā o le aso pa‘ia lenei i lo tatou Ali‘i; ‘aua ne‘i tigā fo‘i ‘outou; auā o le fiafia i le ALI‘I o lo ‘outou malosi lea.”

‭‭

O le fiafia i le Alii e saunia le malosi faulai, o le malosi o le mafaia lea ona faia soo se mea e te manao iai. A e maua le malosi, e te mafai ona faia mea uma e naunau iai lou loto mo le Atua. Ou te tatalo mo oe i le asō ia avatu e le Alii le malosi ia te oe ma faatumu lou loto i le olioli, i le suafa o Iesu. 

Tatalo

Tamā, faamolemole aumai ni tala matagofie e faamalosi ai i lou loto i le asō, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 21 OKETOPA 2025

(tusia e Pastor EA Adeboye)

Manatu Autu: O le Alii O Lo’u Filemu(The Lord Is My Peace). 

Tauloto Tusi Paia –  Filipi 4:7 “O le manuia fo‘i mai le Atua, o lo‘o silisili lava i mea uma e manatu i ai, e leoleoina ai o ‘outou loto ‘atoa ma o ‘outou mafaufau ‘iā Keriso Iesu.”

Faitauga - Tusi Paia: Galuega 27:7-44

E le'i folafola mai e le Atua ia i tatou se olaga e aunoa ma afā. I le Ioane 16:33, na fetalai Iesu, “... e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.” A avea Iesu ma o tatou Alii, ua tatou mautinoa le filemu ma le saogalemu i le ogatotonu o afā mataʻutia.

I le faitauga o le Tusi Paia mo lenei aso, sa malaga atu Paulo i Roma i se vaa faatasi ma le lua selau fitusefulu ono o pasese. Ina ua latou taunuu i le nofoaga e igoa o le āva matagofie, sa iloa lelei e Paulo e lamatia i latou i le ala ona ia taʻu atu lea i tagata sa i luga o le vaa ma fa‘apea atu, “Ali‘i e, o lo‘u manatu o le a tele le leaga ma māumau o mea i lenei folauga, e lē gata i le uta ma le va‘a, ‘ae ‘atoa ma o tatou ola.”Galuega‬ ‭27‬:‭10

A avea Iesu e fai ma ou Alii, o le a Ia muai lapatai oe i afā o fotuai mai. O so’o se taimi e te lagona ma iloa se mea o faaletonu i se gaioiga faapitoa o le a e faia, po’o se faaiuga o le a e faia, atonu o Iesu lena o taumafai e puipuia oe mai se afā.

Talu ai e leai se poto masani po’o se faailoga faapitoa a Paulo i le faafoeina o le vaa, o lea na filifili ai le kapeteni, e ‘aua le amanaiaina ana upu lapatai. O nisi taimi, o le a auina mai e le Atua le faatonuga e aumai ai le filemu ia te oe e ala i tagata e te leʻi mafaufauina. O tagata e faatalitali i taimi uma ia faaali atu e le Atua ia i latou i se auala ofoofogia, e masani ona latou misia o Ia aua e masani lava ona ia faaali mai i se auala faigofie. Aua sa musu le kapeteni e faalogo ia Paulo, na ia faafoeina le vaa  ma folau pea ma fetaui ai ma se afā mataʻutia lea na toetoe lava a maliliu ai tagata uma sa i luga o le vaa. Na leiloa le tele o a latou meatotino ma sa le mafai ona aai mo le tele o aso ma ua leai so latou faamoemoe. Ae ui i lea, o Paulo, e nate silafia lelei le Alii o Lona filemu, na faamalosiau atu ia i latou e ui lava sa latou lē amanaiaina muamua lana fautuaga. Fai mai le Galuega 27:23-25

“Auā sa tu mai ‘iā te a‘u anapō le agelu a le Atua, e ‘ona a‘u, ‘ou te ‘au‘auna i ai, ‘ua fa‘apea mai, ‘Paulo e, ‘aua ‘e te fefe; e tatau ‘ona e tu i luma o Kaisara; fa‘auta fo‘i, ‘ua foa‘i atu e le Atua ‘iā te oe o i latou uma ‘ua folau ma oe.’ O lenei, ali‘i e, ia ‘outou fa‘amalosi; auā ‘ou te fa‘atuatua i le Atua, o le a fa‘apea lava pei ‘ona fetalai mai ai ‘iā te a‘u.”

Le ‘au pele e, a avea le Alii ma ou filemu, e na te laveai oe mai afā uma ma faamautinoa e leai se mea o misi pe faaletonu i lou olaga. A avea le Alii ma ou filemu, o le a Ia faafilemuina lou loto, e oo i le ogatotonu o tofotofoga ma luitau o le olaga. A avea le Alii ma ou filemu, e tusa lava po o a afā e te feagai ma oe, e te iu i le manumalo, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 20 OKETOPA 2025

(tusia e Pastor EA Adeboye)

Manatu Autu: O le Alii O Lo’u Malamalama(The Lord Is My Light). 

Tauloto Tusi Paia –  Salamo 27:1“O le ALI‘I, o lo‘u malamalama ia ma lo‘u olataga: o ai ‘ea se ‘ou te fefe ai? O le ALI‘I, o le malosi ia o lo‘u ola; ‘ou te mata‘u ‘ea ‘iā te ai?”

Faitauga - Tusi Paia: Kenese 26:1-12

A e gauai i le Alii o Iesu, e avea o Ia ma ou malamalama, e te iloa mea lilo o loo i mea nanā. A’o faitio isi ona ua lepeti i lalo, e te fiafia pea aua o le malamalama o le Atua o le a faaali atu ia te oe le ala e fiafia ai i le toe siitia ( Iopu 22:29). O loo tatou iloa i le faitauga o le Tusi Paia o le asō, na fiafia Isaako ona o le malamalama o le Alii. Ao faaumatia isi tagata i le oge, na faatupulaia fua o ana faatoaga, ua tagata ola ma sili i tagata uma aua na faamalamalama e le Atua ona ala ma faaali ia te ia le mea e tatau ona faia. 

O le fiafia e maua i le malamalama o le Atua e amata i le faailoa atu ma gauai i lana pule. Ina ua fai le Atua ia Isaako e nofo i le nofoaga ua ia faasino e nofo ai i le taimi o le oge, e lei finau atu. E lē mafai ona e fiafia i le malamalama o le Atua pe a e savali i le malamalama o lou lava afi. Na faia perofetaga a Isaia i tagata e savavali i le malamalama o latou lava afi e faapea:

“Fa‘auta mai ‘outou uma o ē si‘a se afi; ‘ua si‘omia ‘outou e ‘outou i aloiafi. Sāvavali ia i le malamalama o lo ‘outou afi, ma aloiafi o lo ‘outou afi; e o‘o ‘iā te ‘outou lenei mea a‘i lo‘u lima, tou te ta‘o‘oto i le tigā.” Isaia‬ ‭50‬:‭11‬ ‭

O le savali i le malamalama o lou afi o lona uiga o le faia o mea uma i ou ala ma faalagolago i lou lava atamai. Fai mai le Faataoto 3:5, e aua e te faalagolago i lou lava atamai. O i latou e faalagolago i o latou lava atamai e iu ane lava i le faanoanoaga aua o le a latou iloa mulimuli ane o le ala na latou manatu e sa’o, o le auala sesē (Faataoto 14:12). 

A avea le Alii ma ou malamalama, e te savali i le ala tonu, ae le o le auala e foliga sa’o. E na te faaali atu le ala e tatau ona e savali ai ma taitai oe i ala o le amiotonu (Salamo 23:3). O le Alii o lou malamalama, e na te a‘oa‘o ‘iā te oe, ma fa‘asino ‘iā te oe i le ala ‘e te savali ai; e na te fa‘atonu ‘iā te oe i lana vaai aua o oe o lana matafaioi. (Salāmo‬ ‭32‬:‭8‬). 

E lē mafai ona e tumau i le pogisa i fuafuaga a le tiapolo pe a avea le Alii ma ou malamalama. I le Galuega 23:12-22, sa iai Paulo i le falepuipui ma e iai tagata sa taupulepule e fasioti ia te ia. Sa latou faia se fuafuaga e olegia le pule o le falepuipui, e na o le fia fesiligia lava o Paulo ini fesili,  ae o le fuafuaga autu, ia fasiotia Paulo. Peitai, na saunia e le Atua le tausoga o Paulo e faalogo i lenei faufuaga ma ia faailoa i latou. A avea le Atua ma ou malamalama, e na te faaalia fuafuaga a le tiapolo ma puipui ia te oe mai a latou fuafuaga leaga. A avea le Alii ma ou malamalama, e na te faaalia fuafuaga a le tiapolo ma faataga oe e te vaai i mealilo o loo i mea nanā, i le suafa o Iesu, Amene. 

OPEN HEAVENS

MATALA LE LAGI MO LE ASO SA 19 OKETOPA 2025

(tusia e Pastor EA Adeboye)

Manatu Autu: O le Alii O Lo’u Leoleo Mamoe O Ia (The Lord Is My Shepherd). 

Tauloto Tusi Paia –  Salamo 23:1 “O le ALI‘I, o lo‘u leoleo mamoe o ia; e leai se mea ‘ou te mativa ai.”

Faitauga - Tusi Paia: Salamo 23:1-6

O Tavita sa leoleo mamoe a’o le’i fa’au’uina ia e Samuelu e fai ma tupu o Isaraelu. O le mea moni na aami e Samuelu Tavita a o leoleo mamoe a lona tamā (1 Samuelu 16:11-13). O lea, e malamalama lelei Tavita i le uiga o le avea ma leoleo mamoe, ma o le mafuaaga lea o lona ta’ua o le Atua o lona leoleo mamoe i le faitauga mai le Tusi Paia o le asō. E tele faamanuiaga e maua e mamoe mai lo latou leoleo mamoe. O lo tatou Alii, e le gata o se leoleo mamoe; a o ia o se leoleo mamoe lelei (Ioane 10:11). Le au pele e, a o le’i faia mō oe faamanuiaga a le leoleo mamoe lelei, e tatau ona avea Ia ma ou Alii, ma oe o lana mamoe. E lē faia ma leoleo mamoe le Atua ia i latou o e pule ia i latou lava, e lē leoleo mamoe fo’i i ni ‘oti.

O nisi nei o faamanuiaga o le avea o le Alii ma ou leoleo mamoe.

1. E lē mativa oe i le mālōlō. Fai mai Tavita i le Salamo 23:2 “na te ave a’u i le mea o i ai le vao mu’a o’u te taoto ai.” A fai oe ma mamoe a le Atua, o le a e lē mativa i le moe. E avatu e le Atua le moe i lana pele (Salamo 127:2).
2. O le a fafagaina lelei oe. E le fia aai mamoe a le Atua auā ‘na te faataoto i latou i le mea o i ai le vao mu’a’ (Salamo 23:2). Fai mai le Salamo 63:5; “E peiseaī o le ga’o ma le mea lololo, ou te ma’ona ai lava a’u.”
3. E faamalieina lou galala auā na te ta’ita’i ia te oe i tafatafa o vai e tafe lemu (Salamo 23:2). Fai mai Mataio 5:6 “Amuia ē fia aai ma fia inu i le amiotonu, auā e maoona i latou.”
4. E lē aunoa oe ma le faafouina o lou agaga (Salamo 23:3). I le Ioelu 2:23-26; na folafola e le Atua o le a Ia taui atu tausaga na aina e le se akerise ma le se aleka. So’o sau mea e leiloa, ua fa’amautinoa mai e toe faatumuina atoa pe a fai o le Alii lou leoleo mamoe.
5. E lē tea ese oe ma le ta’ita’iga auā na te ta’ita’i ia te oe i ala o le amiotonu (Salamo 23:3). Na fetalai Iesu e ta’ita’i outou e Agaga Paia i upu moni uma (Ioane 16:12-13). A pulea lou olaga e Agaga Paia o le a leai se mea e tasi e te popole ai.
6. O le a leai se mea e te fefe ai auā o le a e fiafia i le mamalu paia o le Atua. E ui lava ina e savali i le vanu o le ata o le oti, e te lē fefe lava i se mea leaga, auā o Ia na te faatasi ma oe (Salamo 23:4). I le Eperu 13:5; na Ia folafola na te lē tuua oe na te lē tuulafoaiina lava oe. 

Le au pele e, ta’uta’u le Alii o lou leoleo mamoe i soose vaega o lou olaga. Tu’u atoa lou soifua ia te Ia ona e maua uma lea o nei faamanuiaga ma sili atu. Ou te tatalo ia faaalia e le Alii ia lava i lou olaga, i le suafa o Iesu, Amene.