Samoan Devotional

OPEN HEAVENS

MATALA LE LAGI MO LE ASO LULU 8 OKETOPA 2025

(tusia e Pastor EA Adeboye)

Manatu Autu:   Fafaga le agaga (Feed the Spirit)

Tauloto Tusi Paia –  Roma 8:9 “A o ‘outou, tou te lē i la le tino, ‘ae i la le Agaga, pe ‘āfai e nofo le Agaga o le Atua i totonu ‘iā te ‘outou. ‘Ai se tasi ‘ua lē ‘iā te ia le Agaga o Keriso, e lē fai lea mōna.”

‭‭

Faitauga - Tusi Paia: Kalatia 5:16-18

O loo faaalia i le faitauga mai le Tusi Paia o le asō, o le tino ma le agaga e feteenai ma o le vaega e fafaga, o le vaega lena e manumalo. O le ola e sili atu i le tino, e tatau i le fanau a le Atua ona fafagaina pea lona agaga i le upu a le Atua. 

O le tala ia Peteru i le Luka 22:54-62 e faanoanoa ai. O ia o se tasi o soo o Iesu na auina atu i taulaga ma nuu e talai le talalelei ma na foi mai ma le fiafia ona na usitai temoni iai latou (Luka 10:17). Sa ia iai foi ma Iesu ao ia fagaina le toa lima afe ( Mareko 6:35-44) ma faatuina Lasalo mai le tuugamau (Ioane 11:1-44). E iai foi le taimi na savali ai i luga o le vai (Mataio 14:28-29). A toaga Peteru e fafaga lona agaga, e le mafai e le tiapolo ona pa’i ia te ia. Peitai na amata loa ona faamaualuga ma ia faapea e lē taitai ona ia faafiti ia Iesu (Mataio 26:34-35), ua amata ai loa ona ia vaivai i le agaga. Na lapatai e Iesu ia Peteru o loo faasagatau mai le tiapolo ia te ia ia paū (Luka 22:31), peitai ua lē tamoe e nofo i le mea lilo e puipui ai o ia, ae ua finau pea e na te lē faafiti i le Alii seia oo ina paū. Afai e te lē fafagaina lou agaga, o le a e lamatia i le tau mai a le tiapolo. O le a e vave ita ma faigofie ona e inoino i le tele o mea. 

O le fafagaina o lou agaga,  o se galuega e faifai pea. I le Mataio 6:34, na fetalai Iesu, “ …Auā e popole le aso a taeao i ana lava mea. E tatau i le aso lona lava leaga.” I nisi faaupuga, o le manumalo i le leaga i aso uma, e tatau ona fafagaina lou agaga i aso uma. E tatau ona faaalu lou taimi e suesue ai i le upu a le Atua. Fai mai le Iosua 1:8 “E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po,..” E tatau foi ona e mafuta i le tatalo ina ia aua nei e paū i le tiapolo. 

O nisi faifeau ua latou masani ma iloa le Tusi Paia ua latou manatu ai, e lē toe manaomia le suesue o le Tusi Paia ma tatalo e pei ona iai muamua. E mafai ona latou tusia se lauga i se taimi puupuu ma latou manatu ai o loo lelei pea lo latou itu faaleagaga. Afai e galala pea lou agaga ona e te lē o fafagaina, e vave ona e matutū. Aua e te faatagaina le tiapolo e pelogia oe o loo lelei mea uma peitai e te le o fafagaina lou agaga. E manao e faaaoga uma lou malosi ina ia manumalo o ia, ia te oe.

Le au pele e, fafaga lou agaga i aso uma e ala i le suesue o le upu a le Atua ma mafuta ma Agaga Paia, i le suafa o Iesu, Amene.

OPEN HEAVENS

MATALA LE LAGI MO LE ASO LUA 7 OKETOPA 2025

(tusia e Pastor EA Adeboye)

Manatu Autu:   Vaega o faamanuiaga (Levels of breakthroughs)

Tauloto Tusi Paia –  Salamo 37:4“Ia e fiafia lava oe i le ALI‘I, ‘ona foa‘iina lea e ia ‘iā te oe o mea e mana‘o i ai lou loto.”

‭‭

Faitauga - Tusi Paia: Ruta 3:1-18

E eseese vaega o faamanuiaga. I le Kenese 18:9-14, na maua e Aperaamo faamanuiaga, peitai o se faamanuiaga e 25 tausaga na taumafai ai faatoa tino mai. I le Kenese 41:38-44, na faamanuiaina Iosefa, peitai o lena faamanuiaga e tele tausaga na taumafai ai faatoa tino mai le tulaga na faaali e le Atua ia Iosefa i se miti. Na maua foi e Mose le faamanuiaina i se folafolaga mo ia na umi se taimi faatoa tino mai i lona olaga (Esoto 3:1-15). Sa ia iloa mo se taimi umi o ia ua filifilia e faasaoloto i le fanauga a Isaraelu ( Galuega 7:22-25), peitai na umi ma tele tausaga faatoa tino mai. 

Peitai o leisi ituaiga faamanuiaga e pei o lea na faamauina i le 1 Samuelu 16:11-13, o se tama leoleo mamoe na faauuina e avea ma tupu ae lei iai se faaaliga muamua. I le Eseta 2:15-18, o se auauna teine na avea ma masiofo i se nuu ese, o seisi lea ituaiga faamanuiaga. 

A e faitau i le tusi o Ruta, e te vaai ai ini lesona e fesoasoani ai ia te oe ia e maua se isi vaega siitia o le faamanuiaina. Ia le maea ai ona ia ui i faanoanoaga ma tigā, na faia le faaiuga a Ruta e mulimuli i le tinā o lana tane, mai lona nuu o Moapi ae agai i Ierusalema. O Moapi o se nuu e ifo i tupua, ae na ia faia se faaiuga e lafoai atua ese na ia iloa ao tuputupu ae, ae alu atu e tapuai i le Atua o Isaraelu. E leiloa foi pe tele ana uo ma aiga na ia tuua, sa ia tuua lona ola tuai ae amata se olaga fou. E le mafai ona e uu mau i mea ua tuunai ae e te manatu e te fia ui i se vaega siitia o faamanuiaga. E tatau ona e lafoai i mea ua tuanai, lafoai i amioga tuai e lē lelei ina ia e maua ni mea fou ua saunia e le Atua mo oe. 

Fai mai le Isaia 43:18-19

“Aua tou te manatua mea na muamua, ‘aua fo‘i le mafaufau i mea anamua. Fa‘auta, ‘ou te faia se mea e fa‘ato‘ā iloa, e tupu a‘e nei lava; tou te lē iloa ‘ea? E moni, ‘ou te faia se ala i le vao lafulafuā, ma vaitafe i le nu‘u naumati.”

‭‭

 Na maua e Ruta le faamanuiaga i Peteleema aua sa ia auauna ma mulimuli i fautuaga lelei a le tinā o lona toalua. O se fafine galue malosi, ma o lona galue ma le filiga na iloa ai o ia e Poasa mai lana aufaigaluega ma ua alofaina ai o ia (Ruta 2:1-16). I le faitauga o le Tusi Paia o le asō, e te iloa ai, o le usitai o Ruta i le fautuaga a Naomi na taitaiina ai o ia e avea ma avā a Poasa. 

Le au pele e, afai e te fia ui ini faamanuiaga fou i lou olaga, e tatau ona e usitai i le Upu a le Atua ma le atoatoa. E tatau foi ona e saili ma mulimuli i fautuaga faa le Atua faapea ma le galue filigā i lau galuega. 

Tatalo

Tamā, faamolemole fesoasoani mai ia te au ia ou usitai i au tulafono i mea e tatau ona ou faia ina ia maua faamanuiaga siitia i lo’u olaga, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 6 OKETOPA 2025

(tusia e Pastor EA Adeboye)

Manatu Autu:   Ola fou (New life)

Tauloto Tusi Paia –  Ioane 11:25 “Ua fetalai atu Iesu ‘iā te ia, “O a‘u nei o le toetū ma le ola; o lē fa‘atuatua mai ‘iā te a‘u, e ui lava ‘ina oti, ‘ae ola lava ia.”

‭‭

Faitauga - Tusi Paia: Ioane 11:1-44

I ni tausaga talu ai, sa iai se fafine maitaga ua fai iai le fomai o lana pepe i le manava ua maliu. Na fai iai fomai e manaomia ona aveese le pepe mai lona manava ona ua amata ona leaga ma e telē le afaina ai o lona soifua maloloina. Peitai ona sa latalata i le taimi o le sauniga tele a le RCCG, na ia fai iai latou, ‘sei ou alu i le sauniga lea muamua, a lē faia e le Atua se vavega, ona tou aveesea lea o le pepe’. Sa latou fai ia te ia, ‘a tuu mo seisi vaiaso, e te ono oti ai’. Peitai sa finau pea sei alu muamua i le sauniga lea. I le aso muamua ma le aso lona lua, e leai se mea na tupu. Peitai i le aso lona tolu, na oo mai le afi, ua matua mamafa le faauuga, sa tau le mafai ona ou tu, sa ou fai atu e aumai se nofoa ou te nofo ai ao faasolo pea la’u lauga. Ao ou nofo atu i lalo, na fetalai le Atua ma faailoa mai ia te a’u o loo iai se fafine i le potopotoga ua oti le pepe i lona manava mo sina taimi, ma o le a ia toe aumaia le ola i le pepe. Na toe ola le pepe i le taimi lava lena, ma oo ina fanau lenei fafine. Le au pele e, afai o lau pisinisi, faaipoipoga, galuega i le Ekalesia poo soo se vaega i lou olaga ua taua ua leai se ola, ou te folafola atu, e toe manava e le Atua le ola iai, i le suafa o Iesu. 

O se sui o le matou Ekalesia sa auai i se tasi o matou sauniga e faauu ai solosolo. I ni nai aso mulimuli ane, ao alu atu i lana taavale, na vaai atu ini tagata o tumu i tafatafa o le auala. Sa tu ona o lona fia iloa poo le a le mea o tupu, na alu atu ma vaai ai i se ave pasika na taia e se taavale, o loo taatia mai i tafatafa o le auala ua maliu. Na lagona le ootia ma le alofa mo lenei tamaloa, ona oo mai lea o le taitaiga a le Agaga e faaaoga le solosolo na faauuina, ua ia tago ma tuu i luga o le tagata maliu lea ma faapea atu, ‘tu i luga’. O tagata na iai ua faapea pe faaletonu lona mafaufau, peitai na suia ina ua toe tu mai i luga ua ola le tamaloa. 

E mafai e le Atua ona toe faaola soo se vaega ua oti i lou olaga ma faia e avea o se vaega fou. E mafai ona ia toe faaola se pisinisi ua gau ma leai se ola, ma toe manava iai le ola fou ma suia o se pisinisi e talafeagai ma manaomia i le lalolagi atoa. E mafai foi ona ia toe faaola ni faaipoipoga ua leai se ola ma toe faaleleia e pei o se faaipoipoga fou. E leai se mea ua matua leai se ola pe a iai Iesu aua o ia o le toetu ma le ola ( Ioane 11:25). Afai na ia faatuina Lasalo ina ua maea ona maliu ma tanu mo aso e fa, e leai se mea e na te lē mafaia (Luka 1:37). E leai se mea e tumau ona leai se ola pe a afio mai iai Iesu, i le suafa o Iesu, Amene. 

OPEN HEAVENS

MATALA LE LAGI MO LE ASO SA 5 OKETOPA 2025

(tusia e Pastor EA Adeboye)

Manatu Autu:   Tatalo Fai Faatasi (Corporate Prayers)

Tauloto Tusi Paia –  Efeso 4:3 “Ia taumafaia e ‘outou ‘ona tāofi o le loto gatasi i la le Agaga i le noataga o le filemū.”

‭‭

Faitauga - Tusi Paia: Galuega 6:1-7

I le tusi o Galuega 4: 21-30, ina ua uma ona faa falepuipui ma sauaina le ‘au aposetolo, ona o latou toe fo’i lea i le latou potopotoga, ua latou alalaga i le Atua ma le loto gatasi. O le ulua’i tali fa’aaliali o a latou tatalo o le fa’atumulia o i latou uma e Agaga Paia, ma o latou amata folafola ai le upu a le Atua ma le loto tele (Galuega 4:31). O le isi tali i a latou tatalo fai faatasi o le alofaina ma le mana e lauga ai le Talalelei o le maliu, Toetu ma le afio a’e o Iesu Keriso e pei ona o tatou faitau ai i le tusi o Galuega 4;33; “Ua molitino atu e le ‘au ‘aposetolo ma le mana tele i le toetū mai o le Ali‘i o Iesu; ‘ua alofateleina fo‘i i latou uma.”

Le au pele e, e te mana’o i le loto tele nauā e fai ai le finagalo o le Atua? E te mana’o ia e vaai ma maua le mana e tele ma le alofateleina? E tatau la ona e nofo lelei ma loto gatasi ma le au uso. So’o se taimi e i ai le filemu ma le loto gatasi i le va o le auuso, e faapea ona maua ai le mana o le Atua e lē faatapula’ia. I le Galuega 12:1-5; na amata sauaina ai ma fasiotia e Herota le au kerisiano. Na ia mua’i saisaitia Iakopo le uso o Ioane, ma auā sa leai se tete’e mai o le au faatuatua, na fasiotia ai o ia. Mulimuli ane, na ia saisaitia Peteru ma tuuina o ia i le falepuipui, ma le manatu e fasioti ia te ia pe a mavae le paseka. Peita’i, na potopoto faatasi le ekalesia ma tatalo faatauanau mo Peteru, ma faatoa mālōlō i latou ina ua laveaiina faavavega o ia mai le sauāina e Herota (Galuega 12:6-11).

E tatau fo’i ona o tatou nonofo fealofani ma isi o tatou uso kerisiano pe afai tatou te fia vaai ma iloa ni faaopoopoga tetele. E malamalama le tiapolo i le mana o le loto gatasitasi i totonu o le ekalesia, o le mafuaaga lena e taumafai ai pea le fili e fai mea uma na te mafaia e faatupu ai le fevaevaea’i e ala i misa ma le taumuimui i le va o le au uso. 

I le tusi faitau mai le Tusi Paia o le asō, ina ua taumafai le tiapolo e fa’afeaina’i le ekalesia anamua, na vave ona totofi e le au aposetolo tagata faatuatuaina e vaaia i latou sa faitio ma lē malilie. O le taimi lava lea na fo’ia ai e le au aposetolo faafitauli sa taumafai e vaevae le ekalesia, na faatuputeleina ai le iloa o le upu a le Atua ma faaopoopoina le aofa’i o le au so’o. O ekalesia e le o ola ma soifua fealofani ma loto gatasi, latou te lē vaai lava i se faateleina o le upu a le Atua ma le mana i le va o I latou, se’i vagana ua fo’ia faafitauli uma o loo faatupuina le fevaevaea’i.

Le au pele e, aua le tuua taimi ua faapitoa mo tatalo fai faatasi i le potopotoga o e i ai. O le ekalesia o se aiga, ma fai mai se fa’aupuga masani; o le aiga e tatalo faatasi e tumau faatasi. E moni lenei fuaitau aua fai mai le Tusi Paia e tulia e le toatasi le toaafe ae tutuli e le toalua le sefuluafe. O le Ekalesia e tatalo faatasi e tumau faatasi, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 4 OKETOPA 2025

(tusia e Pastor EA Adeboye)

Manatu Autu:   Vavega fou (New miracles)

Tauloto Tusi Paia –  Galuega 9:12 “o lea ‘ua ‘avea ai solosolo po o ‘ie tali ‘ele‘ele nai lona tino i ē mama‘i, ‘ona mavae ai lea o latou ma‘i, ‘ua ō i fafo fo‘i ‘iā te i latou agaga leaga.”

‭‭

Faitauga - Tusi Paia: Isaia 43:18-21

A finagalo le Atua e tapena le tulaga mo ni mea fou, e masani ona Ia amata e ala i le faia o vavega ma faamanuiaga fou. Ina ua finagalo le Atua e fa’asa’oloto le fanauga Isaraelu mai le nofo pologa I Aikupito, na amata I le fa’aaoga o le to’oto’o o Mose e faatino ai le tele o vavega e le’i vaai muamua I ai se isi (Esoto 4:17). Ina ua afio mai Iesu e faia se feagaiga fou, na Ia faia ni vavega fou se tele, na fai mai tagata e le’i vaai muamua lava o tupu se mea faapea talu mai anamua (Mareko 2:12). E Faapena fo’i Ina ua o’o I le taimi e o ai le au aposetolo e tāla’i le Talalelei i tala atu o Ierusalema i Samaria, Iutaia ma itu uma o le lalolagi, na amata malolo tagata mama’i i le ata lafoia o Peteru (Galuega 5:15). Ia te a’u lava ia, ua ou maitauina soose taimi e finagalo ai le Atua e siitia i matou i se tulaga fou i le RCCG, e muamua lava Ia faia ni vavega fou matou te lei vaai muamua i ai.

I tausaga ua mavae sa fai ai se tauaofiaga a le mafutaga a tamaloloa fai pisinisi faavaomalo a le Full Gospel i Port Harcourt, o se taulaga i Nigeria i Saute ma sa valaaulia ai a’u oute talanoa i le mataupu o le “faauuga fou”. Sa o’u faamatala ni fa’ata’ita’iga o mea na faia e le Atua i lona alofa mutimutivale le faatuaoia e ala ia te a’u. Ina ua o’o i le taimi e o ai i aiga, na amata gaioi mai agai i luma le faapotopotoga ma sa manaomia ai ona puipui ma taitai a’u i la’u taavale. O se fafine sa iai, e iai sona uso, e matua’i faaletonu le mafaufau, sa naunau a lē mafai ona pai mai ia te a’u o lea alu e pa’i i la’u taavale. O lea na ia aumaia ai se solosolo tuu i luga o le taavale na o’u iai i totonu ma ia toe aveese a’o lei alu ese le taavale. Ina ua taunuu i lona aiga, sa ia fai i ni tagata malolosi se toaono e taofiofi lona uso. Na ia talotalo le solosolo ma faapea, “ua i lo’u lima le tali o le fa’afitauli”. Ona ia ave lea o le solosolo ma tu’u i luga o lona uso ona toe fo’i lea o ia i ona uiga masani ua malolo. 

A finagalo le Atua e siitia oe i se isi laasaga fou e masani lava ona amata i vavega fou. O lea, e tatau ai lava ona e vaavaai ma maitau ni ituaiga vavega faapea i lou olaga ia mafai ai ona e malamalama i ou vaitau. E ese mai lou vaavaai mo vavega faapea, e mafai fo’i ona e ole i le Atua e foa’i mai. I le Galuega e 4: 29-30, na ole le au aposetolo i le Atua ia faatasi ma i latou i le talaiina o le talalelei, i le faaloaloa mai o lona ‘a’ao e faamalolo ai e mama’i ma faia faailoga ma vavega. O le tali o lea tatalo, na mata’utia le tupu ma ola o le ekalesia (Galuega 4:31-33). 

Le au pelē, ole atu i le Atua mo ni vavega fou i lou olaga i le asō. O lou faia fa’apea o le a e amatalia ai se tautotogo i se vaitau fou o lou olaga. Ole atu i le Atua e amata se mea fou i lou olaga i le asō i le foai atu lea o ni vavega fou, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 3 OKETOPA 2025

(tusia e Pastor EA Adeboye)

Manatu Autu:  E lua ituaiga mea ofoofogia (Two kinds of wonders)

Tauloto Tusi Paia –  Salamo 136:4 “O lē faia vāvega tetele, na o ia lava; auā e fa‘avavau lava lona alofa.”

‭‭

Faitauga - Tusi Paia: Esoto 12:21-30

E lua ituaiga vavega tetele poo mea ofoofogia, o le lelei ma le leaga. I le 2 Tupu 5:1-27, sa iai se tamaloa e suafa ia Naamanu, o le taitai o le autau a le tupu o Suria. O ia o se lepela, ma na faatonu e Elisaia e alu e tofu i le vai i Ioritana ina ia malolo ai. Ina ua ia faia, o lona pau ua liua e faapei o se pau o se pepe fou, o le faataitaiga lea o se mea ofoofogia lelei. Ina ua maea lea, o Keasi, le auauna a le tagata o le Atua, na tamo’e e mulimuli ia Naamanu ma ia aoina faanana meaalofa na teena e Elisaia. Ina ua iloa e Elisaia, na ia fetuu Keasi i le faapea atu, ‘ou te faatonuina le lepela o Naamanu e pipii ia te oe’. Na pipii soloatoa le lepela ia Keasi i le taimi lava lea ma ua paepae e pei o le kiona, o le faataitaiga lea o se mea ofoofogia e leaga. 

A faaali mai le Atua, e na te faia mea ofoofogia lelei mo lana fanau. E faifai lemu ma faeteete i lana fanau, peitai o ia o le afi maamaai iai latou e teena lana pule o le Alii. I le faitauga o le Tusi Paia o le asō, o le fanauga a Isaraelu na latou fiafia i le mea ofoofogia lelei, lea na faasaoina i latou mai le agelu o le oti. Peitai i le taimi lava e tasi, na tofo le au Aikupito i le toasa ma le faamasinoga a le Atua. I le sami ulaula, ao vaai atu le fanauga a Isaraelu i le ofoofogia o le Atua, a’o ia vaeluaina le sami ina ia latou savavali i le isi itu i le pau matū, o le sami lava lea e tasi na malelemo ai le au Aikupito ( Esoto 14:21-28). O le Atua o le Atua e faia vavega tetele ma mea ofoofogia, peitai o le ituaiga mea ofoofogia e maua e le tagata mai le Atua, e fua pe na te ‘au ma ia pe tetee ia te ia. 

Le au pele e, o e iai i le itu a le Atua (Esoto 32:26) poo le itu o le togalauapiga a le tiapolo? E lē na o tagata lē faatuatua e lē ō i le itu a le Alii, o tagata foi e ola ma taitaia e le tino e lē auai i le itu a le Atua. Fai mai Paulo i le Roma 8:7, o le loto i la le tino o le ita lea i le Atua; auā e lē usiusita‘i i le tulafono a le Atua. O le kerisiano e loto i la le tino, e manao e faia mea uma i ona ala ae lē o ala o le Atua. O ia kerisiano e galulue e fua i mea vaaia ae lē o le Upu a le Atua. O soo se tagata e ola e pei o latou e lē taitai fiafia i mea ofoofogia lelei e faia e le Atua. 

Afai e te lei faaolaina lava ae ete manao e faaaoga e le Atua lou ola o se faataitaiga o mea ofoofogia lelei e faia mo isi tagata, sau i lana itu i le asō ma lafoai lou ola ia Iesu. Afai o oe o se atalii poo se afafine o le Atua, aua nei avea oe o se kerisiano e la le tino ma ia lafoai lou mafaufau ma le atoatoa ia faafouina faifaipea e lana Upu. Suesue lelei lou olaga, o saunia ea lou tagata e te maua mea ofoofogia lelei pe leaga e faia e le Atua? I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 2 OKETOPA 2025

(tusia e Pastor EA Adeboye)

Manatu Autu:  E tatau ona e inoino i le feoloolo (You must hate average)

Tauloto Tusi Paia –  Filipi 3:13 “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.”

‭‭

Faitauga - Tusi Paia: Teuteronome 28:8-13

A e inoino i se mea, e te faia soo se mea ina ia alofia ai. A’o ou aoga i le tulagalua, o matou ma a’u uo e toalua e faamatua i le matematika. Peitai e ui e masani ona sili atu ma le 90% matou maka, e fai mai lava la matou faiaoga matematika e lē lelei a matou maka ona e le maua le 100%. Ae iai le aso na matou maua ai le tai 100% ona matou faapea lea, ‘tatou ō e vaai le faiaoga poo le a lana tala o le fai i le taimi nei’. Ua matou o atu ia te ia ma le fiafia, ae na vave uma lo matou fiafia ina ua faapea mai, ‘o le tou augatupulaga la ua oo i le Iunivesite o loo suesuea tali i fuaiupu fuainumera faigata ao outou lea tou te matua fiafua i le 100% o le numera faigofie o le tulagalua”. O ana upu ia na amata ai ona ou inoino i le feololo ae taulai loa i le matua sili atoatoa. O le mea lea ou te lē fiafia ai pe a ou vaai i tagata o fiafia i le feololo. 

I ni tausaga e tele talu ai, ina ua faasalalau iuga o suega i kolisi maualuluga i Nigeria ma o le faatulagaina o maka e amata mai i le maualuga o le 1, faasolo atu i le 2, 3, ae faaiu i le Pasi. Sa iai se pule aoga o se aoga na matua fiafia ina ua ausia e se tamaitiiti o lana aoga mo le taimi muamua le maka 3. Peitai i se tasi aoga, na matua tagi le pule aoga ona o se tamaititi o lana aoga mo le taimi muamua, ua paū maualalo lona maka i le 3. 

E pei ona faaalia i le faitauga o le Tusi Paia o le asō, o le finagalo o le Atua mo lana fanau ina ia i luga. O lona uiga e lē tatau ona malie se kerisiano i le feololo. Afai ua e manatu ua e ausia le maualuga e mafai ona e oo iai, e tatau ona e iloa, o lena tulaga e amata ai isi tagata. I le Esekielu 47:1-12, na faaali e le Atua ia Esekielu, se tamaloa ma se manoa e fuatia kupita e afe, ao amata ona siitia le vai. Na amata mai i tapuvae seia oo i tuli, ona oo atu lea i le sulugatiti seia avea ma vaitafe tele. E iai tagata e oo atu i manuia i tapuvae ma manatu ua taunuu, ae lē malamalama o loo iai isi tulaga e sili atu o loo faatali mai mo latou. 

I le 2 Tupu 2:1-15, o atalii o perofeta sa malilie i le feololo, peitai o Elisaia na taumafai atu mo le faaluaina o le faauuga ma le agaga o Elia. Na silafia e atalii o perofeta ua lata ona aveesea Elia, ma sa latou iloa lelei e oo mai lea aso. Peitai sa malilie i le maua o le faaaliga ae lei saili mo le mana. Ao Elisaia, e lei malie i le feololo, ma sa faaaogaina o ia e le Alii, sa matua matautia, e lē faagaloina lona igoa. O tagata e malilie i le feololo e lē iloa e nisi. 

Le au pele e, fai loa sau faaiuga ina ia e ausia le maualuga ma le tulaga pito sili ona lelei ua saunia e le Atua mo oe. Aua e te malie i le feololo, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 1 OKETOPA 2025

(tusia e Pastor EA Adeboye)

Manatu Autu:  Tatalo mo lou atunuu (Prayers for your nation)

Tauloto Tusi Paia –  Salamo 122:6 “Ai‘oi atu ‘outou ‘ina ‘ia manuia Ierusalema: “‘Ia manuia i latou o ē alolofa ‘iā te oe.”

‭‭

Faitauga - Tusi Paia: 1 Timoteo 2:1-2

Tatalo mo lou atunuu

1. Tama, ou te faafetai ia te oe mo lo’u atunuu. Faafetai mo le tele o afā ma matagi na e tauave mai ai I matou ma le mamao ua e aumai ai I matou I lou fesoasoani mai pea. 
2. Tama, faafetai mo punaoa ua e faamanuia ai I lo matou atunuu. Faamolemole fesoasoani mai iai matou ina ia matou faaaogaina ma le poto i le suafa o Iesu. 
3. Tama, faamolemole fesoasoani mai ina ia o gatasi matou tapulaa faale malo ma lou finagalo e atoatoa ona lelei. Ia faamamao ese ma matou le amioleaga I le suafa o Iesu. 
4. Tama, faamolemole ia iai le loto gatasi o tagatanuu uma o lo matou atunuu. Ia aumaia vaega uma o le atunuu ia tutu faatasi o se tino e tasi,  e faavae ai le tuputupu pea i vaega uma faapea le atinae o le tamaoaiga. 
5. Tama, faamolemole ia iai le filemu i lenei atunuu. Ia aua nei iai ni taua ma ni misa poo ni vevesi e pei ona vaaia i isi atunuu, i le suafa o Iesu. 
6. Tama, ou te tuuina atu vaega uma o lou atunuu o loo lutia i faigata e sosoo atu ma isi faalavelave. Faamolemole le Alii e, ia e faamalolo ma faaola i lo matou atunuu, i le suafa o Iesu. 
7. Tama, ou te tuuina atu lo matou tamaoaiga i ou aao. Faamolemole ia e faatulagaleleia lo matou tamaoaiga ma ia tuputupu pea ina ia maua e tagata nuu uma mea latou te manaomia. 
8. Tama, ou te  tuuina atu ia te oe matagaluega uma ma soo se ofisa o le malo i ou aao, faamolemole, ia e pulea i latou, i le suafa o Iesu. 
9. Tama, faamolemole fesoasoani i taitai i soo se vaega o lo matou atunuu ina ia pulea lelei tupe ma punaoa ua io latou lima ma ia ripoti ma faamanino i le atunuu le faaaogaina o tupe ma punaoa. Avatu iai latou le poto e taitaia lenei atunuu i ala e tonu ma lelei, i le suafa o Iesu. 
10. Tama, faamolemole, ia iai se faaolaolaga tele e oo mai i lo’u atunuu. Ia e liligi lou afi i luga o talavou ma toeaina ina ia latou naunau e faia lou finagalo. Ia latou talai atu le talalelei i soo se vaega o le lalolagi. 
11. Tama, ia avea kerisiano uma i lo’u atunuu e saoloto e vivii ma tapuai ia te oe. Ia avea so’o se fuafuaga a le tiapolo e faasagatau i kerisiano, ia faaleaogaina ma faaumatia i le suafa o Iesu, Amene. 
12. Tamā, ia e faamanuia ia Samoa ma ona taitai totofi. Ia liligi faaua lou poto ma le atamai i o matou taitai ina ia fai ma le amiotonu faaiuga uma aua le manuia lautele o tagata uma. Ia e siomia i latou ini faufautua atamamai ma matatau ia te oe aua e saogalemu ai le atunuu. O le tatalo lea i le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 30 SETEMA 2025

(tusia e Pastor EA Adeboye)

Manatu Autu:  Aua le faailoga tagata ( Dont discriminate)

Tauloto Tusi Paia –  Ioane 7:24“Aua le so‘ona fa‘amasino, a ‘ia fa‘amasino i le fa‘amasinoga tonu.”

‭‭

Faitauga - Tusi Paia: 1 Timoteo 2:1-4

E alofa le Atua i tagata faatuatua, e alofa foi i tagata lē faatuatua. I le faitauga o le Tusi Paia o le asō, e tatou te iloa ai e finagalo le Atua ina ia faaolaina tagata uma ma ia latou iloa le upu moni. E pei lava ona mafai ona auina atu e le Atua agelu ma isi tagata ia te oe, e finagalo foi e auina atu oe e pei ona auina atu Filipo i le eunuka Aitiope. E finagalo e avea oe ma tali i fesili a se tagata ma saunia se fofo i faafitauli a se tagata. O loo ia saili i tagata e auina atu e pei o Peteru, o lē na ia auina atu i le fale o Konelio, e talai atu le talalelei i tagata o nuu ese (Galuega 10). A ia auina atu oe, ou te talosia e te lē teena le galuega, aemaise pe afai o le tagata o loo fia auina atu iai oe, o se tagata agasala. 

E leai se tagata ua matua leaga ua lē mafai ona faaolaina. E fai lava la’u tala, ana o au o le Atua, ou te lē faaolaina Adeboye. O a’u o se tagata sa matua leaga e masani i le upu vale i le Atua ae lei tuuina atu lo’u ola ia Keriso. Peitai, vaai mai ia te a’u, o le alofa tunoa o le Atua ua mafai ai ona ou taitaia le faitau miliona o tagata ia te ia. 

O Paulo o se tagata faatupu faalavelave na ia sauaina kerisiano. Ou te iloa ana auina e le Atua ni tagata e talai atu ia te ia, e latou te ono teena aua e mafai ona ia saisai iai latou. Na asiasi faapitoa mai iai le Alii ona faamaualaloina lea o ia, ae ina ua maea lena, na manaomia e Paulo kerisiano e taitai ia te ia. Muamua, na faailoa atu e le Atua ia Anania Paulo ( Galuega 9:1-17). E leiloa pe ana fai le Atua i isi kerisiano, e latou te teena lea leo ona e manatu o satani o loo taitai i latou i se mea e lavevea ai. Peitai o Anania, o se soo moni o lē na silafia le siufofoga o le Atua ma sa saunia e usitai ia te ia. E lei faailoga tagata ia Paulo e ui i lona talaaga agasala. 

E lei faailoga tagata foi Panapa ia Paulo. E ui na fefefe isi kerisiano e galulue ma Paulo, na alu Panapa i Tasesa e sue o ia ma aumai i Anetioka, ona latou aoao ai lea i tagata ( Galuega 11:25-26). O le tamaloa sa ia faafalepupuiina tagata kerisiano ua amata ona ia manumaloina agaga mo Keriso. 

Le au pele e, e mafai ona faaolaina e le Atua soo se tagata, e leai seisi ua leaga tele ua le mafai ona faaolaina. E na te saili i tagata faatuatua e pei o Anania, o lē e mafai ona ia auina atu iai latou e ola i ni olaga faigata. E saili i so’o e pei o Panapa e taitai i latou e faia le galuega a le Atua. Aua e te faailoga tagata, ae fesoasoani iai latou ina ia latou iloa atili Keriso. I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 29 SETEMA 2025

(tusia e Pastor EA Adeboye)

Manatu Autu:   Tuputupu pea faaleagaga (Spiritual growth)

Tauloto Tusi Paia –  Kalatia 4:1 “Ou te fai atu fo‘i, o aso uma o itiiti ai le suli, e ui lava o ia e ana mea uma, e leai se mea e ‘ese ai o ia ma le pologa.”

Faitauga - Tusi Paia: 1 Peteru 2:1-3

O se kerisiano e teena le tuputupu pea faaleagaga, e pulea e le mea sa tatau ona ia pulea. O ia kerisiano, e ole ma aioi atu i mea, sa tatau ona latou maua o ni mea masani latou te pulea. 

Seiloga lava e te tuputupu pea faaleagaga, e iai lava le tulaga e gata ai mea e faatuatuaina ai oe e le Atua. O le tulaga lea e tatau ai ona e faia sau faaiuga ina ia e tuputupu pea faaleagaga. ‘Aua e te faalagolago i lau faifeau i le mea e tatau ona e faia lava e oe. O soo se kerisiano e lē tuputupu a’e faaleagaga, e lē saunia i latou e fesagai ma matagi e afātia ai i le olaga nei. O le a lē mafaia ona tauave galuega e tatau ona faatino i le malo o le Atua ona o le a lutia ma toilalo pea i osofaiga a satani. 

A tufa atu e le Atua galuega taua, e masani i le Atua ona faamisi i latou o loo pepe olaga ma itiiti pea, ae tuu atu iai latou ua matutua faaleagaga. O le mafuaaga lea e taua ai lou totogiina o le tau e te tuputupu ai pea faaleagaga. E tatau ona fafagaina pea oe i aso uma i le Upu a le Atua ma mafuta i lona mamalu. 

I le tele o tausaga talu ai, a’o leai nisi e nonofo i le  nofoaga o le togalauapiga o le faaolataga (Redemption Camp lea ua taua nei o Redemption City), e masani ona ou alu ese mai le matou fale i taeao uma o aso Lua ma ou nofo i le nofoaga o togalauapiga seia oo i le taeao o le aso Tofi. E pau isi tagata e masani ona matou iai, o le au kamuta o loo fauina le fale. Peitai e oo loa i le afiafi, ona o uma lea malolo i le maea o le aso, ona tuua ai lea na o a’u e saili i fofoga o le Atua ma lo’u loto atoa i le po atoa. E iai le po, ou te manatua lelei lena po e pei lava na tupu ananafi, sa ou tatalo: “Tamā, ou te lafoai atu mea uma ia te oe. Ua na o oe ou te manao ai. Ou te lē fia pei o faifeau masani. Ou te lē ole atu i se auro, ni lavalava poo le tautaua. E pau le tulaga ou te naunau iai ia ou maua le mana e faataunuu ai lau galuega. Afai e te lē faia, faamolemole avatu a’u”. I lena aso, na tali le Atua i le tatalo, na luluina le nofoaga atoa, na lagonaina i taulaga e 60 maila le mamao. A e naunau e tuputupu ae faaleagaga, e asiasi atu le Atua i ni auala e matua luluina lou lalolagi mo le lelei. 

Le au pele e, o le a le mea o loo taofia lou tuputupu pea faaleagaga? Ua e pisi tele e mulimuli i fiafiaga o le lalolagi? Ua avea ea le tele o galuega ua tatou pisi ai i le olaga nei ua titinaina lou alofa i le Atua? Ia e filiga ia tuputupu pea faaleagaga ina ia aua nei felafoaina pe fetosoa’ina oe mai lea itu i lea itu i mailei a le tiapolo (Efeso 4:14). 

Tatalo

Tamā, fesoasoani mai ia te au ina ia ou ou iloa pulea mea uma o loo faalavelave i lo’u tuputupu pea faaleagaga, i le suafa o Iesu, Amene.