OPEN HEAVENS

MATALA LE LAGI MO LE ASO TOONAI 5 APERILA 2025

(tusia e Pastor EA Adeboye)

Manatu Autu: E pei o le aso Penetekoso 5 (Like the day of Pentecost 5)

Tauloto -Tusi Paia–Iopu 33:4  “Na faia a‘u e le Agaga o le Atua; o le mānava fo‘i a Lē e ona le malosi uma lava ‘ua ola ai a‘u.”

‭‭

Faitauga – Tusi Paia – Kenese 1:1-3

A o fa’aauau pea ona ou faamatala le tāua o mea na tutupu I le aso Penetekoso, ou te mana’o ia e manatunatu faapea, i lea aso, sa i ai se leo o se matagi malosi ua agi tele (Galuega 2:1-2). I le Esoto 14:21-28 ina ua agi le matagi ona taatia mai lea o se auala sa lei i ai muamua. A tupu se faaolaolaga pei o le aso Penetekoso, o malosiaga uma o lo’o faalavelave i le ekalesia o le a tafiesea e le matagi, ma o le a tutū mai ni auala e le’i vaaia muamua.

I ni tausaga ua mavae, sa valaaulia ai a’u ou te lauga i se ekalesia e lē talitonu i le Agaga Paia, ma sa ou lauga faatatau i laasaga amata e tolu o le fa’a kerisiano; faaolataga, faamamāina ma le papatisoga a le Agaga Paia. Ina ua uma ona o’u talanoa faatatau I le Agaga Paia, sa o’u manatu o le a i ai ni manatu tete’e, peita’i na sau se faifeau o le ekalesia ma faapea mai ia te a’u, “Faafetai i lau Susuga mo le faamalamalamaina mai ia I matou o le Agaga Paia e pei o le matagi. Afai e mana’o le matagi e agi e pāsia se itu a o loo poloka e se isi le ala, o le a le mea e tupu?” Sa ou tali atu, “O so’u iloa itiiti e faapea; o lea tagata o le a suatia i luga”.

So’o se mea o faalavelave i lou agai I luma ma polokalame a le Atua mo lou olaga o le a lia’ina ma fa’aleaogāina pe a afio ifo le Agaga Paia. Ou te tatalo so’ose malosi o le pouliuli e ono taofia oe mai le faataunuuina o le finagalo o le Atua, ma lou maua o ana faamanuiaga o le a lia’ina e le matagi o le Agaga Paia I le suafa o Iesu. 

O le isi tulaga e tupu pe a agi le matagi o le foai Paia a le Atua. Ina o le a tuuina atu e le Atua aano manu fasi i lona nu’u mo a latou meaai, na ia auina mai se matagi na aumaia salu mai le sami ma ua tu’u ai i le toagalauapi ua tele nauā ua si’osi’omia ai lava le toagalauapi: ma ua faapotopotoina e tagata mai i lea aso seia o’o i le aso na soso’o ai (Numera 11:31-32). E lava pea ma totoe le foai a le Atua e lē aunoa i le mea e agi ai le matagi o le Agaga.

Fai mai Iopu o le Agaga o le Atua na faia ia ma o le mānava fo’i a Le e ona le malosi uma lava ua ola ai o ia (Iopu 33:4). O le matagi a le Atua e aumaia le ola, ma o le mea e i ai le ola e lē mafai ona i ai le oti. Ina ua mānava le Atua i poga’iisu o le tagata, o le mānava ola (Kenese 2:7), ona avea ai lea o le tagata ma tagata ola; ua suia mai le efuefu ma le palapala i se tagata e savali ma tautala. O le a e iloa fesuiaiga pe a agi le matagi o le Agaga o le Atua e pei ona ia suia le soona nunumi o le lalolagi sa i ai i le amataga i se nofoaga matagofie (Kenese 1:1-3).

Ou te folafola o le a e maua se pa’i fou mai pe matagi a le Atua i le vaitau lenei I le suafa o Iesu.

Tatalo

Tamā faamolemole ia faataga le matagi o lou Agaga e agi i luga o lo’u olaga ma lau galuega ua o’u galue ai i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 4 APERILA 2025

(tusia e Pastor EA Adeboye)

Manatu Autu: E pei o le aso Penetekoso 4(Like the day of Pentecost 4)

Tauloto -Tusi Paia–Salamo 149:6 “Ia i ai i o latou gutu o fa‘ane‘ene‘ega i le Atua; ‘ia i ai fo‘i i o latou lima le pelu e fa‘atau ma‘ai itū;”

Faitauga – Tusi Paia – Ieremia 30:18-22

O le a faasolo atu pea le talanoaga i le taua o mea na tutupu i le aso penetekoso, ou te fia faailoa atu, o i latou na faalogo i le au soo ina ua maea ona faatumulia i le Agaga Paia ua faapea mai, “ua matou faalogo atu o loo latou vivii ona o galuega matagofie a le Atua i gagana eseese mai matou nu’u” (Galuega 2:1-12). O lona uiga e tatau ona faia pea le faafetai ma le viiga i le Atua pe afai tatou te fia maua le galue malosi mai o Agaga Paia i le tino o Keriso i le asō. 

A tatou mafuta e tatalo mo tatou manaoga,  e afio mai o ia. Peitai a tatou mafuta faatasi na o le faafetai ia te ia ma faailoa lona mana matautia, e afio ma faaali mai o ia ma lona mana, ma o le a iai faaolaolaga, o vavega o le a avea ma masani i ia mafutaga ma o le a tele tautinoga. 

I le tele o tausaga talu ai, na ou folafola o le a ou asiasi i se tasi o toeaina a le Ekalesia RCCG ma ou faia iai e ma te mafuta tau o le 5 minute. Ae ou te lei taunuu atu, ua ta pese ma viiga matagofie i lona fale ona e faalogo e masani ona ou pese pese lemū i viiga o le Atua. Ua ou le iloa, ua atoa le itula o ma mafuta ma ia ona sa ou fiafia i pese ma viiga. Afai o oe o se afafine poo se atalii o le Atua, e faafofoga le Atua i ona viiga ma pese mai ia te oe, e mautinoa e mafuta pea o ia ma oe. E afio ma tietie o ia i viiga a ona tagata (Salamo 22:3); e afio mai pe a viia ma faaneeneeina o ia. 

O tagata e faitio ma tomumumu e le mafai ona latou saunia se siomaga e afio ai le mamalu o le Atua. Ina ua tomumumu le fanauga a Isaraelu, na lē fiafia iai le Atua, ma è iai taimi na oo mai le afi e faaumatia. E ese mai le afi o Agaga Paia i le aso penetekoso, o le afi lea na mū ma faaumatia ai i latou (Numera 11:1). Ao iai Paulo ma Sila i le falepuipui, e lei tomumumu ma faitio, ae sa fai viiga ma pese i le Atua. Na afio mai le Atua I le falepuipui, ua oo mai se mafuie, ua luluina le eleele ma faavae o le falepuipui (Galuega 16:25-26). A e vivii i le Atua i le taimi o faafitauli, e na te aumaia tali e te manaomia e le mafai ona teena e tagata, ma foai atu faamanuiaga ia te oe, e o’o ma pa’i atu ia’i latou o loo i lou siomaga. Ina ua luluina le falepuipui, na matala uma faitotoa ma ua matalatala uma noanoataga o tagata. 

Le au pele e, lafoai lou ola ia Iesu Keriso pe afai e te lei faia lava ona e filifili lea e ola ma soifua i se olaga o pese ma viiga i le Atua. O le a afio Agaga Paia ma oe ma iloa tino mai i lou olaga. E na te faasaoloto ia te oe mai soo se noataga ma saisaitiaga ma faamanuia ia te oe ina ia faulai faamanuiaga i lou olaga faapea olaga o ē e tau ia te oe ma iai i lou siomaga, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 3 APERILA 2025

(tusia e Pastor EA Adeboye)

Manatu Autu: E pei o le aso Penetekoso 3(Like the day of Pentecost 3)

Tauloto -Tusi Paia–Efeso 5:21 “Ia usiusita‘i le tasi i le tasi ma le mata‘u ‘iā Keriso.”

Faitauga – Tusi Paia – Efeso 5:21

I aso e lua ua mavae, sa ou talanoa atu i le taua o mea na tutupu i le aso Penetekoso. I lena aso, na maua ai e tagata uma sa i le afeafe aupitoaluga le pa'i mai o aao alofa o le Atua. Ua liliuina o latou loto i le Atua, ma sa faatumulia foi i latou uma i le Agaga Paia.

Afai e moni lo tatou naunau ia iai se toe fa'aolaolaga i lenei augatupulaga, e le tatau ona tatou tuulafoa’i tagata vaivai e tumau ai i le tulaga vaivai. E tatau ona tatou fa'amalosi ma faama’ai le tasi i le isi (Faataoto 27:17) seia oo ina faia e tagata 'vaivai' ni vavega. Afai e moni lo tatou lotogatasi, o le a tatou le tilotilo ese pe a va'ai atu i se  uso o loo tautulimoe a’o faia talosaga; e tatau ona tatou uuina lona lima, ma fa'amalosia ia te ia e tatalo. E le tatau ona tatou tilotilo atu i se tuafafine o ofu la'ei le talafeagai ma fa'aalia fa'ailoga o le liliu ese e aunoa ma le taumafai e fa'amalosi I lona fa'atuatua. Afai e foliga mai ua mate le afi i totonu o se tagata, ia tatou tatalo mo ia, ae lē o le fa'aaogaina o lena tagata o se fa'ata'ita'iga leaga i isi, e fa'afoliga ai, o oe e amiotonu.

O tagata uma na i le afeafe aupitoaluga  i lena aso faapitoa, na latou maua le pa’i mai o le Atua, aua sa latou gauai atu ia te Ia, ma faapena le tasi i le isi – e leai se tasi na lagona le sili atu i le isi ona uso a tagata. I le vaitaimi o le 1970, sa i ai se alii talavou e faaigoa ia uso Samuelu. E le o ia o se sui o le RCCG, ae sa lauiloa o ia ona na faauuina o ia i le agaga o le Atua. E le iloa tautala i le gagana Peretania, ae e faauuina ma tele ana valaaulia e maua e lauga. Na valaaulia o ia, e lauga i se tasi kolisi. Ina ua ia tulai atu e tau atu i le faalapotopotoga, e leiloa tautala faaperetania ma e na te mana'omia se faaliliu upu, ae tei ua amata ona tautala mai i le gagana faaperetania maoi. E na te lē malamalama i ana tala o loo faia, ae o loo faasolo lava le lauga. Ina ua mavae le itula e tasi, ua amata ona lolofi atu tagata i ona luma, ua fetagisi ma augani mo le faaolataga. O le taimi lava na ia tuua ai le malae o le kolisi, na lē toe mafai ona tautala faaperetania. Sa iai tautinoga o tagata maliliu e to'atolu na faatūina mai le oti e le Atua e auala ia te ia I lea sauniga. So’o se taimi lava e tatalo ai o ia mo gasegase, e mafai ona ia faamatalaina  auala na ō ese ai ma'i mai o latou tino seia o’o ina faamaloloina atoatoa i latou.

Ae peitai, ua tupu le loto faamaualuga i lona loto ina ua mavae sina taimi. So’o se taimi lava e valaauina ai o ia e auai atu i fono tatalo, sa ia faapea mai, "O ai o loo lauga? E toafia tagata ua maliliu na ia toe faatuina mai?" O le faanoanoaga, na iu lenei alii i se nofoaga e sulufa'i ai tagata pagatia. 

Le au pele e, afai tatou te mananao i le mana o le Atua e tumau ia te i tatou, e tatau ona tatou aloese mai le loto faamaualuga ae gauai atu le tasi i le isi i le mata'u i le Atua (Efeso 5:21). E tatau foi ona tatou lagolago i e vaivai ma taumafai e siitia i latou i luga, i le suafa o Iesu, Amene.

OPEN HEAVENS

MATALA LE LAGI MO LE ASO LULU 2 APERILA 2025

(tusia e Pastor EA Adeboye)

Manatu Autu: E pei o le aso Penetekoso 2(Like the day of Pentecost 2)

Tauloto -Tusi Paia–Roma 12:5 “e fa‘apea i tatou nei le to‘atele, ‘ua tino e tasi ‘iā Keriso, ‘ina ‘ua fēfa‘afeagaia‘i itū tino.”

Faitauga – Tusi Paia – 1 Korinito 12:18-27

Na amata ananafi ona suesue ma faasoa atu i le aafiaga o le aso penetekoso ma le mafuaaga e tatau ai i kerisiano ona ave le faamuamua i le vavaeeseina mai le lalolagi ina ia tatou maua le faaolaolaga. O lei si tulaga e fia faailoa atu, o le aso penetekoso, na loto gatasi le au so’o. Afai tatou te fia vaai i le mana o Agaga Paia o galue mai, e tatau ona iai le alofa ma le loto gatasi i le tino o Keriso, tusa poo le a le Ekalesia. 

Fai mai le Salamo 133:1-3, e faatonu e le Atua le oo mai o le faamanuiaga pe a iai le loto gatasi. E lē o faapea mai e ‘tuuina mai’ e le Atua se faamanuiaga, o loo faapea mai e na te faatonuina le oo mai o le faamanuiaga. I nisi faaupuga, o loo faapea mai, ‘Faamanuiaga, ia tino mai’. Afai e iai le alofa moni ma le loto gatasi i tagata o le aulotu poo se mafutaga, e leai se faailoga fesili e faamanuiaina sui uma o lena mafutaga. 

E lē mafai ona tino mai le mana o le Atua I se Ekalesia poo se aiga e fevaevaea’i. O le loto gatasi e tosina mai ai le mamalu o le Atua, e pei a ona tosina mai loi i le suka. E faapena foi i se Ekalesia e fevaevaea’i, loto leaga ma uiga faapena o le tino. E mamao le mana o le Atua mai Ekalesia faapena. Na teena e le Atua le Ekalesia i Korinito ona o le fevaevaea’i. O nisi ua au ma Paulo, o nisi e au ma Apolo (1 Korinito 3:4).  Na taua i latou e Paulo e faaletino ona o le mataua ma le misa. O le tino o Keriso e tasi, ma a e fia ola i le mana o le Atua ma lona mamalu e pei o le aso penetekoso, e tatau ona tuu ese o tatou fe’eseeseaiga ae taulai le vaai i lē e ona le suafa o loo tatou tauave, o Iesu Keriso. E le mafai ona osofai e le tasi leisi ae manatu e afio mai le Atua e mafuta ma I tatou. Fai mai le Kalatia 5:15 “‘Ae ‘āfai tou te feūta‘i ma fe‘aina‘i, ‘ia ‘outou ‘ina ne‘i fa‘aumatia ‘outou ‘iā te ‘outou.”

‭‭

 I le fuaitau o loo taua i luga, o loo tatou iloa ai a tatou fe’ainai ma feūta’i, e faaumatia i tatou e tatou lava. E toatele tagata faatuatua ua latou faamanu’a i isi uso i le tino o Keriso ia latou upu ma mea e faia. E tatau ona taofia lea faiga ae ola ma soifua i le alofa ma le loto gatasi ina ia afio mai le mamalu ma le mana o le Atua ma iloa tino iai tatou. 

O le alofa o le tasi i le isi ma maua le loto gatasi, o se auala tonu lea e faaali atu ai i le lalolagi o i tatou o so’o moni o Iesu (Ioane 13:35). E le tatau i le au kerisiano ona tataia tagata lē faatuatua e teena le talalelei ona latou te le vaaia le alofa o le Atua iai tatou. E tatau ona maua e le tino o Keriso le loto gatasi. O le faitala, taufaaleaga ma le faia o tauvaga i le va o Ekalesia, e tatau ona taofia pe afai tatou te fia maua moni le faaolaolaga a Agaga Paia. 

Tatalo

Tamā, faamolemole fesoasoani mai ia te a’u ia ou alofa I isi tagata e pei ona ou alofa ia te a’u ma ia maua le loto gatasi i le au kerisiano, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 1 APERILA 2025

(tusia e Pastor EA Adeboye)

Manatu Autu: E pei o le aso Penetekoso 1(Like the day of Pentecost 1)

Tauloto -Tusi Paia–Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

‭

Faitauga – Tusi Paia – Galuega 1:12-14

O le taimi muamua na afio mai ai le Agaga Pa’ia e mau i totonu o le tagata, na tupu i le aso Penetekoso e pei ona tusia i le Galuega 2: 1-12. Na fetalai Iesu i lona ‘au soo e faatali i Ierusalema mo le Agaga Pa’ia (Luka 24:49). O le aso o le Penetekoso ma mea sa tutupu mulimuli mai ai na amata faataatia mai ai alāfua o le fa’a Kerisiano e oo i le gata’aga. Pe ana mafai ona toe tupu se aso faapea i nei aso i Ekalesia uma o le lalolagi; semanu e mata’utia se toe faaolaolaga e tupu mai ai. Sa iai se tulaga faapea, sa tupu i Azusa i Amerika i le tausaga 1906, ma e o’o mai lava i nei onapo o lo’o talanoa ai pea tagata i lena toe faaolaolaga.  Mo aso o sosoo atu nei, o le a ou suesue ma faasoa atu  i  mea sa tutupu i le aso Penetekoso ma a’afiaga na tutupu mai ona o lea aso.

O se tulaga taua, e ao ona e fa’amauina, o le ‘au so’o, sa latou faatasi i le afeafe aupitoaluga,- sa vavaeeseina i latou mai le lalolagi o tagata. I le taimi o tausasami ma fiafia tagata uma i le ‘aiga o le Paseka, o lo o iai I latou i se nofoaga ese e tatalo, anapogi ma naunauta’i ia maua se fesoota’iga loloto ma le Alii. Afai tatou te fia oo i le mana na latou maua I lea aso, e tatau ona a’oa’oina i tatou o kerisiano ia ola ma soifua e vavaeeseina mai le lalolagi (1 Korinito 6:14).

E le mafai ona e fa’amuamua le tausinioga mo ‘oa a le lalolagi e pei o isi uma tagata, ma e manatu o le a afio mai Agaga Pa’ia i ou luga ma faaalia mai lona mana ia te oe e pei ona tupu i le aso Penetekoso. E le tatau ona e manatu e te tau’aveina le mana o Agage Pa’ia a o tulimata’i pea e ou mata mea e faataua e le lalolagi. O mea e te vaavaai iai o le a e foliga ai foi. (2 Korinito 3:18). E le mafai ona e alofa i le lalolagi ae folafola e te alofa I le Atua (1 Ioane 2:15). E le mafai ona e fa’alogologo i musika fa’asalamausau ae naunau e faatumuina oe e Agaga Pa’ia. O mea e te faalogologo iai e tele lona aafiaga i lou ola, ma e tupu le fa’atuatua i lou faalogologo i le ‘Upu a le Atua (Roma 10:17).

I le afeafe aupitoaluga, e le’i faalavelave I mafaufau a le ‘au aposetolo mea masani o le lalolagi. O latou fofoga e iloa ai mea o taulai iai le vaai, ua tasi na o le Atua, ma ua faatumulia i latou e le malamalama (Mataio 6:22). O lo latou naunauta’iga, o le fa’atalitali i le folafolaga a le Tama, ma sa latou faia ma le agaga atoa. O le maua ma faaali mai o le mana o Agaga Paia ia te oe, e manaomia lou saili i le Atua ma le agaga atoa. 

E na o ē saili i le Atua ma o latou loto ma agaga atoa, o le a latou mauaina o ia. (Teuterenome 4:29). E na o latou e vavaeseina mai le agasala ma mea e faalavelave mai, e latou te maua le mana o Agaga Pa’ia e fa’apei o le aso Penetekoso. Le ‘au pele e finagalo le Atua, e vava’eseina mai oe ma a’u auā o oe o lona atalii ma  lona afafine (2 Korinito 6:17) ma e tou te lē i le lalolagi outou (Ioane 15:19). Ia lafoa’i ese ni mea e faalavelave mai,  ma punitia le fa’atumuina o oe e Agaga Pa’ia, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 31 MATI  2025

(tusia e Pastor EA Adeboye)

Manatu Autu: E na te faaaogaina foi tagata lē faatuatua ’(He can use unbelievers too)

Tauloto -Tusi Paia–2 Timoteo 2:20 “Ua lē na o ipu auro ma le ario ‘ua i le fale tele, a o ipu la‘au ma ‘omea; o isi ‘ua ta‘uleleia, a o isi ‘ua ta‘uleagaina.”

Faitauga – Tusi Paia – Esera 1:1-11

O le tauloto mai le Tusi Paia o le aso e faailoa mai ai iai tatou, e iai ipu e tauleleia, e iai ipu e tauleagaina i le fale o se tagata tauoloa. E faaaogaina e le Atua so’o se tagata, e na te faaaogaina lana fanau e avea ma ipu e tauleleia, ae o i latou e musua e ola faapaiaina e faaaogaina o ipu e tauleagaina. 

E iai se aso ao ou agai atu i le lotu e faia galuega mo tagata mama’i, na matua pisi ma poloka le auala. E lei leva ae ou iloa atu se auala ui, ona ou afe loa lea iai ona e lē o pisi. Ou te le iloa, o le auala lea faatoa faataga ona ō ai taavale mai le 10 i le taeao. Na taofi la’u taavale e se alii leoleo ma faapea mai, ‘e te iloa faatoa mafai ona e ui i le auala lea pe a te’a le 10 i le taeao?’ Na ou faamalūlū iai ou te leiloa. Ua ou fai atu iai, o a’u o le faifeau o loo agai atu e faia se galuega mo tagata mama’i. Ua latou faapea mai, ‘ia o lena e te iloa le mea e tatau ona fai’. Ou te iloa o la e mananao i se tupe, ae ona o a’u o le atalii o le Atua, e le mafai ona ou faia. O lea na latou fai mai ai, ‘ia faatali iina sei ta le 10 ona faataga lea o oe e te alu’. A’o ou faatali, na agai mai ai ni tamaiti o le auala ua latou iloa mai a’u ma faapea mai, ‘o le faifeau o Adeboye le lā, e pei ā o loo taofia e leoleo, tatou ō e fesoasoani iai’. Ina ua vaai atu leoleo o agai mai tamaiti nei, ua sosola ese. I lea tulaga, na faaaoga e le Atua tamaiti o le auala e faamatau i leoleo ina ia mafai ona ou alu. 

Ina ua finagalo le Atua e faasaoloto ona tagata mai Papelonia, na ia faaaogaina Kuresa o se taitai le faatuatua. Ae lei fanau mai o ia, na perofeta ane Isaia o le a faaaogaina o ia i le faasaolotoina o tagata o le Atua (Isaia 45:28, Isaia 45:1-5). E mafai ona faaaoga e le Atua tagata lē faatuatua e faia lona finagalo, peitai o nei tagata lē faatuatua o lo latou iuga o seoli pe afai e lē lafoai o latou ola ia Keriso, aua foi o tagata agasala e iu uma i seoli. Fai mai le Ioane 3:18

 “O lē fa‘atuatua ‘iā te ia, e lē fa‘asalaina o ia; a o lē lē fa‘atuatua, ‘ua uma ‘ona fa‘amasinoina nei lava o ia, auā e le‘i fa‘atuatua lava o ia i le igoa o le Atali‘i e to‘atasi o le Atua.”

Le au pele e, lafoai lo’u ola ia Keriso pe afai e te lei faaolaina lava ona amata lea ona e ola faapaiaina ina ia mafai ona faaaoga oe e le Atua o se ipu e tauleleia ae lē o se ipu e tauleagaina. E masani lava ona faaaogaina e le Atua soo se tagata mo lona finagalo. Peitai, e faia lava e i latou le filifiliga pe avea ma ipu e tauleleia poo se ipu e tauleagaina, i le suafa o Iesu, Amene. 

OPEN HEAVENS

MATALA LE LAGI MO LE ASO SA 30 MATI  2025

(tusia e Pastor EA Adeboye)

Manatu Autu: O le faamanuiaga e ta’ua o ‘tinā’(The blessing called mother)

Tauloto -Tusi Paia–Faamasino 5:7 “Ua leai ni ta‘ita‘i ‘iā Isaraelu; ‘ua leai lava; ‘ua o‘o i ona po na tula‘i atu ai a‘u o Tepora; na tula‘i atu ai a‘u o le tinā i Isaraelu.”

‭‭

Faitauga – Tusi Paia – Faataoto 1:8-9

O le tulaga masani, e sili atu ona faaaloalo fanau i o latou tamā na i lo’o o latou tinā aua o tamaloloa e malolosi atu ma sauā. Atonu e lē ‘aumalosi le tino o tinā faapei o tamā, peita’i o le tinā e tele lona malosi i isi vaega o le soifuaga. E masani ona fai la’u tala, ua o’u i’u manuia i le asō ona o le alofa tunoa o le Atua ma tatalo a si o’u tinā. Soose taimi o’u te faia ai se mea e faagae’etia ai le loto o lo’u tinā e faapea mai ai lana upu, “O le a e valaau i le tagata e toatasi ae tali mai le to’a selau.” O le uiga o lana tala, ‘o le a avea oe ma auauna e taitaia tagata.’ O le asō ua faamanuia le Atua ia te a’u ua aiāina ai olaga o le toatele o tagata i so’ose itu o le lalolagi. A fiafia se tinā i sana tama, so’o se mea e faananau i ai lona loto, ma tatalo ia maua e lana tama, e taunuu. 

Le au pele e, o loo faatonu mai le tusi o Efeso 6:2-3 ia e ava i lou tamā ma lou tinā (e lē na o tamā) ina ia e maua ai le tele ma anoanoa’i o manuia. O aso nei, ua toatele fanau e lē talia telefoni pe a vili atu o latou matua. Afai o soifua ou matua, ua tatau ona e mafaufau e ava ma tausi ia i laua aua o le faitoto’a lea i faamanuiaga a le Atua ma le soifua tulu’i.

A o o’u laititi, sa masani ona faatonu a’u e lo’u tinā o’u te nofo i le fale e fai a’u meaaoga a o loo taaalo isi tamaiti o le matou vai aai. Faafetai i le Atua sa ou usita’i i lo’u tinā. O le su’esu’ega o a’u tusi a’oga sa fesoasoani iā te a’u o’u te ‘aloese mai ai i le tele o mea fa’asalāvei ma ou maua ai mea tetele matagofie o le olaga. I lo’u agaga faafetai sa ou tausi lelei lo’u tinā a’o soifua. Sa ou fa’amautinoa o’u te alu e vaai lo’u tinā, e le itiiti ifo ma le ta’i lua vaiaso ina ia aua ne’i ona misia tele a’u. Afai o soifua pea lou tinā poo nisi fo’i na tausia oe ma avea ma tinā i lou olaga, fa’amautinoa e te ava, faaaloalo, usitai ma agalelei ia i latou.

Afai o oe o se tinā, o lou tiute i le tapenaina o le lumana’i o lau fanau e tāua tele. Ia e fa’amautinoa e a’oa’o ma faatonu i latou ma naunau ia faataunuuina le finagalo o le Atua i o latou olaga. Aua le tu’ufaua le fanau, pe faatamala e a’oa’o i latou. Aua ne’i e faamuamua le suega o tupe poo le alu i patī na i loo le tausiga o le fanau ma mafuta ma i latou. E le gata i lea, ia e naunau e tu’u i si mea lē tāua ae faamuamua le fesoasoani ia o latou ola ma tutupu a’e i le poto, malosi ma ala o le Alii. Ou te tatalo ia faamanuia le Atua i tinā uma i le malosi ma le lototele e tausi ai ma tapena a latou fanau i le ala tonu ma le sa’o. Afai ua fai sou āiga ma o loo saili i fofoga o le Atua mo se fanau, ou te folafola e o’o atu i le taimi lenei i le tausaga o lumana’i, o le a e sapaia lau pepe I le suafa o Iesu.

OPEN HEAVENS

MATALA LE LAGI MO LE ASO TOONAI 29 MATI  2025

(tusia e Pastor EA Adeboye)

Manatu Autu: Aua E Te Vaai I O Latou Foliga (Don’t Look At Their Faces)

Tauloto -Tusi Paia–Ieremia 1:8“Aua ‘e te fefe ‘iā te i latou; auā ‘ou te ‘iā te oe e lavea‘i ‘iā te oe;” ‘ua fetalai mai ai le ALI‘I.”

‭‭

Faitauga – Tusi Paia – Ieremia 1:4-10

E toatele tagata faaolaina e lē mafai ona folafola ma tāla’i le Talalelei ona e fefefe. O le ki e manumalō ai i le fefe o le tatalo i le Atua mo le loto toa fa’aleagaga ma le poto mo avanoa lē aumaua ta’itasi.

Ou te manatua se taimi sa ou malaga ai i se vaalele ma ou nofo i le potu faapitoa mo pasese taugatā ona sa agalelei mai se uso ma totogi lo’u pasese. Sa ou nofo la i talaane o se alii sa faigofie ona o’u iloa i ona lavalava ma ona foliga vaaia o se tagata e mauoa. Sa matua’i naunau lou loto ou te talanoa i le tagata mauoa lenei faatatau iā Iesu, peita’i sa ou fefe ne’i lē fia faalogo ma faapea e maualalo tele ia mea mo ia. O lea sa ou manatu ifo ai, ia fai mea uma ma le poto. Sa ou fai atu, “Susuga e, ou te mana’o e faa feiloai lau susuga i lo’u Tamā.” Sa fesili mai le alii, “O ai lou Tamā?” “O lo’u Tamā o le Alii Silisili, o ia e ona suāu’u ma kesi, na te faia fo’i ario ma auro ma taimane. E i ai fo’i lana faatoaga tele faatasi ma le afe ma afe o povi.” Ona toe fesili mai lea, “E faafefea la ona o’u lē iloa lou Tamā? O ai lona igoa?”  Na ou iloa afai ou te fai atu o Iesu i le taimi lea, e ono misi le avanoa, na faapea loa la’u tali, “O le igoa o lo’u Tamā o Afioga Emanuela.” O la’u tala lea na fiafia mai ai loa le tagata mauoa e talanoa, ma mafai ai ona o’u faasoa le talalelei ia te ia. 

Ina ua valaau le Atua ia Ieremia e lauga i le fanauga faalogogatā a Isaraelu, na ia faatonu ia te ia aua ne’i fefe i o latou foliga. O le Atua lava lea e tasi o loo ‘au ma oe pe a e alu atu e tāla’i i tagata le alofa o Iesu. Ua tuuina atu e le Atua lona Agaga e a’oa’o oe i au tala e fai faapei ona ia faasino ma faatonutonu ‘au i luga o le vaalele. Poo le a le foliga paū poo le faigatā o tagata i lau maitau, aua e te vaai i o latou foliga; taula’i lau vaai i lē na auina atu oe e folafola lana feau ia i latou. Fai mai se muagagana faa Yorubaland, e lē tatau ona e fefe I le tagata o loo tatau ona ta’u i ai se feau, peita’i ia e mata’u i lē na auina oe e momoli le feau. Aua le faatagaina le fefe i tagata e taofia oe mai le laugaina o le talalelei. Taula’i lau vaai i le Atua, galue e pei o lana poloaiga I le au uso uma (Mataio 28:18-19), ae faitalia le Atua ma faaliliu ma faa talitonu o latou loto.

A ‘au fa’atasi le Atua ma oe, e leai se isi mea e sili atu. O le folafolaina o le talalelei e lē faatatau i le mālie o le poto o tagata e folafola ma tauloto Afioga Paia a le Atua, ae peita’i o le faasino mai e le Agaga ma le mana (1 Korinito 2:4).

Le au pele e, lafoai lou ola iā Iesu i le asō. Ua na o ia le ala i le faaolataga. Afai ua uma ona e talia Iesu e avea ma Alii ma fa’aola o lou olaga, fa’amautinoa e te tāla’i atu le talalelei i nisi; aua e te fefe i o latou foliga. Ta’u atu i se tagata i le asō le alofa o Iesu, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 28 MATI  2025

(tusia e Pastor EA Adeboye)

Manatu Autu: Tupu e faavavau (King forever )

Tauloto -Tusi Paia–Kenese 1:2-3 “Sa so‘ona nunumi le lalolagi ma ‘ua gaogao, sa ufitia fo‘i le moana i le pouliuli; na fēgaoioi a‘i fo‘i le Agaga o le Atua i le fogātai. ‘Ua fetalai mai le Atua, “‘Ia malamalama;” ‘ona malamalama ai lea.”

Faitauga – Tusi Paia – Isaia 43:15-16

Tupu e faavavau 

E Leai seisi na tofia le Atua e avea ma tupu, o lona uiga e leai seisi e mafai ona aveese o ia. Na taumafai iai le tiapolo peitai na tuli ese ma le lagi (Faaaliga 12:9). O le Atua o le tupu ma e tupu e faavavau. 

A ou fai atu o le Atua o le tupu, o lona uiga e tupu foi i tupu uma o le lalolagi. Po’o le a lava le malosi o le pule ma le maoae o mea ua ausia ese tupu, e sili ai lava le Atua. I le Tanielu 4:1-37, na manatu Nepukanesa e mafai ona ia faoa le mamalu o le Atua.  Na oo ina ai I le mutia mo le 7 tausaga , ma ina ua ua toe tonu ma lelei lona mafaufau, ua ia faapea mai, ‘o le Atua e Silisili Ese’.

Afai ua e ausia se tulaga tupu, i totonu o se faalapotopotoga, aiga, atunuu poo le a lava, o lau nofoaiga e lē tumau. E tatau ona e faamaualalo i le Tupu e faavavau pe afai e te fia maua se nofoaiga lelei e manatua e tagata. Na faamaualalo Tavita i le Atua, ma e o’o mai i le asō, o loo manatua pea e Isaraelu o ia o lo latou tupu pito i tautaua. 

I le tele o tausaga talu ai, sa valaaulia a’u e faaulufale se tasi o lala o le Ekalesia RCCG i se tasi o atunuu, ma na ou faamaonia iai se aso e faia ai. I le atunuu lea, a fai ni sauniga o faaulufalega, e manaomia le pemita mai le malo ma sa talosaga loa e le Ekalesia se pemita. Peitai na iai se tamaloa i le malō na finau malosi ia taofia le faaulufalega. Ua ia faapea mai, ‘ua ou faalogo i le lotu lea. O loo tou fuafua e liliuina le toatele o tagata ma faatu Isi tou Ekalesia, e lē talia la I le atunuu lenei’. Na valaau mai taitai o le Ekalesia i le mea ua tupu, o le mea moni, ou te lei tatalo i lea mataupu. O le aso na fuafua e auai ai lenei tamaloa i le fono e faamautu ai le teena o le pemita, ao sauni ma fai ona lavalava, na faafuseia ona tuu uma ona vae i le vae e tasi o le ofuvae, ua paū ma ave faatopetope i le falemai. Na iu ina maliu ae o loo mau ona vae e lua i le vae e tasi o le ofuvae. E leai seisi e sili atu lona malosi ma le pule i lō le Atua, a finagalo o ia e faia se mea, e sili atu le galulue ma ia auā e leai seisi e mafaia ona taofia o ia. 

O Iesu, o le tupu e faavavau, e ia te ia le mana uma lava. O agaga uma o ia e ana (Esekielu 18:4), e aofia ai ma oe, ma e finagalo e lafoai atu lou ola ia te ia. E te iai faatasi ma le tupu, ma o se faamanuiaga lou iai faatasi ma ia aua e te maua avanoa i mea uma o loo ia te ia. E toatasi lava le tupu e faavavau lana nofoaiga, e na o le tupu o Iesu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 27 MATI  2025

(tusia e Pastor EA Adeboye)

Manatu Autu: Maua mai le leai o se mea (Something out of nothing )

Tauloto -Tusi Paia–Kenese 1:2-3“Sa so‘ona nunumi le lalolagi ma ‘ua gaogao, sa ufitia fo‘i le moana i le pouliuli; na fēgaoioi a‘i fo‘i le Agaga o le Atua i le fogātai. ‘Ua fetalai mai le Atua, “‘Ia malamalama;” ‘ona malamalama ai lea.”

Faitauga – Tusi Paia – Isaia 43:15-16

Mai la’u savaliga puupuu ma le Atua I le 51 tausaga talu ona ou faaolaina, ua ou iloa o le Atua, e matua masani i le faatino o galuega mai le leai o se mea. I taimi ua foliga mai ua leai se fofō o se faafitauli, e na te saunia se auala i se tulaga ua leai se avanoa, e pei ona ia faia i le fanauga a Isaraelu i le Esoto 14:21-22. 

I le Esoto 16:11-17, ao faimalaga atu le fanauga a Isaraelu i le nuu na folafolaina, na toulu faaua mai le lagi meaai ua maea saunia. Ona latou te lei vaai pe tofo muamua iai, na latou  faaigoaina o le ‘mana’. I le Numera 11:1-32, ina ua lelava aai i le mana ma ua fia aai i aano o manufasi, na tagi atu Mose i le Atua mo i latou, ona fetalai mai lea o le Atua o le a maua aano o manu i le aso e sosoo ai. E ui na telē le faatuatua o Mose, na faigata ia te ia ona talitonu o le a lava aano o manu e saunia mo le fanauga a Isaraelu i se aso se tasi. O le aso na sosoo ai, na saunia e le Atua le faulaiga o le manu o le salu mo i latou. Sa leai se aano o manu i le aso, ae i le aso na sosoo ai, ua faulai. E faapena lo’u Atua, e masani i le saunia o mea mai i le leai o se mea. O le mafuaaga lea e lē tatau ai ona e manatu mamā ia te ia. 

I le 2 Tupu 7:1-16, sa iai se oge tele i se taulaga, ona fetalai lea o le Atua I lana perofeta, i totonu o le 24 itula, o le a matuā faulai meaai e maua, o le a lē toe manaomia le faatau o ni meaai. Sa iai se tagata maualuga i le malo na faapea mai e faigata ona tupu, na ia vaai ua taunuu, peitai na oti e lei tofo i le vavega. E lē afaina poo e iai i se tulaga ua leai se faamoemoe, tau o le aumai i totonu o le Atua, e mafai ona ia faatino se ala mai le leai o se mea. 

Sa iai se tina na talosaga mai ou te tatalo mo lana tama, e gugū e le mafai ona tautala talu ona fanau mai. Na tuu ou lima i luga o le tamaitiiti ma faapea atu , ‘i le suafa o Iesu’, ona tali mai lea o le tamaitiiti, ‘Amene’. E lei amata ona ou tatalo ae na faatautala e le Atua le tamaitiiti e lei tautala muamua. Sa ia tuuina se leo i le tulaga e lei iai se leo, ua matuā ou ofo toeitiiti ou paū mai fafo o le faamalamala. Ou te tatalo mo oe i le asō, i vaega o lou olaga ua faia e le tiapolo lagona gaogao ma ua leai se faamoemoe, leai se fua ma leai se agai i luma, o le Atua matautia e mafaia ona faia se mea lelei ma le matagofie e fua mai ai. 

O le masani e fiafia i ai le Atua o le faia o mea matagofie ma le matalasi mai mea pouliuli ma gaogao e pei ona ia faia i le Kenese 1:1-3. O mea ua gaogao i lou olaga e liua i mea e susulu ma matagofie i le asō, i le suafa o Iesu. 

Tatalo

Le Alii e, faamolemole ia e feliuaina mea ua gaogao ma leai se faamoemoe i lo’u olaga, i se tulaga e susulu atu ma matagofie i le asō, i le suafa o Iesu, Amene.